Obuhwezi bw’Abaihirwe omu Kibiina

1-2. (a) Yehova naareeba ata abarikushiisha nkana? (b) Yehova naayenda ngu abasiisi bakore ki?

YEHOVA ni Ruhanga otarikubaasa kushwekyerera, kandi tarikushagika ekibi. (Zab. 5:​4-6) Naayenda ngu tugyendere aha mitindo ye ehikiriire ei yaatuteeraireho omu Kigambo kye. Amazima gari ngu, Yehova naamanya ngu abantu abatahikiriire tibarikubaasa kumworobera omu muringo oguhikiriire. (Zab. 130:​3, 4) Kwonka nabwo, tarikukunda ‘abantu abatarikumutiina, abarikuhindura embabazi ze orwekwatso [rw’okukora ebirikwitsa enshoni].’ (Yud. 4) Nangwa, Baibuli neegira ngu ‘abantu abatarikutiina Ruhanga’ nibaija kucwekyerezibwa aha rutaro rwe orwa Haramagedoni.—2 Pet. 3:7; Kush. 16:16.

² Kwonka nabwo, Yehova tarikwenda omuntu weena kucwekyerezibwa. Nk’oku kigambirweho omu bicweka ebikurataine ebi twegire enyima, Baibuli neeyoreka butunu ngu “naayenda boona bahikye aha kweteisa.” (2 Pet. 3:9) Abareeberezi nibatooreza Yehova barikugumisiriza munonga baaba nibahwera abasiisi kuhindura emitwarize yaabo kugira ngu babaase kugaruka kusiimwa Yehova. Kwonka, ti boona ngu nibacwamu kweteisa. (Isa. 6:9) Abamwe nibagumizamu nibakora ebibi n’obu abareeberezi barikuteeraho munonga kubahwera kuhika aha kweteisa. Niki ekiine kukorwa omu mbeera nk’egyo?

“MWIHE OMURIIMWE OMUNTU OGWO OMUBI”

3. (a) Baibuli neegira ngu abasiisi abatarikweteisa baine kukorerwa ki? (b) Ahabw’enki turikubaasa kugira ngu omuntu otarikweteisa niwe arikuba acwiremu kwihwa omu kibiina?

³ Omusiisi yaayanga kweteisa, abareeberezi nibaba baine kukuratira obuhabuzi oburi omu 1 Abakorinso 5:13: “Mwihe omuriimwe omuntu ogwo omubi.” Ekirikumanyisa ngu omusiisi yaahikwaho ebirugire omu kucwamu kwe, naaba naashaaruura ebi yaabibire. (Gal. 6:7) Ahabw’enki nitugira tutyo? Ahakuba naaba ayangire obuhabuzi bw’abareeberezi obw’okumuhwera kuhika aha kweteisa. (2 Bag. 17:​12-15) Ebikorwa bye nibiba nibyoreka ngu acwiremu kwehuzya emitindo ya Yehova.—Bir. 30:​19, 20.

4. Ahabw’enki nibaranga ngu omusiisi otarikweteisa yaihwa omu kibiina?

⁴ Omusiisi otarikweteisa yaihwa omu kibiina, niharangwa ekirango omu kibiina ekyo ngu takiri omwe aha Abajurizi ba Yehova.a Ekirango ekyo nikiba kitagyendereire kuhemura omusiisi ogwo. Kureka, nikikorwa kugira ngu ekibiina kikuratire obuhabuzi oburi omu Byahandiikirwe ‘obw’okutakwatanisa n’omuntu ogwo’ n’obu kwakuba ‘okurya’ nawe. (1 Kor. 5:​9-11) Obuhabuzi obwo nibuheebwa ahabw’enshonga nungi. Entumwa Paulo akahandiika ati: “Akatumbisa kakye katumbisa ekiihuro kyona.” (1 Kor. 5:6) Abasiisi abatarikweteisa nibabaasa kutuubya okumariirira kw’abo abarikugyendera aha mitindo ya Yehova ehikiriire.—Enf. 13:20; 1 Kor. 15:33.

5. Tushemereire kureeba tuta omuntu oihairwe omu kibiina, kandi ahabw’enki?

⁵ Tushemereire kureeba tuta Omukristaayo oihirwe omu kibiina? N’obu turaabe tutarikukwatanisa nawe, twine kumureeba nk’entaama ebuzire, beitu atari nk’otarikubaasa kugaruka. Entaama nk’egyo erikuba ehabire ekaruga omu zindi neebaasa kugaruka. Ijuka ngu, omuntu orikuba ahabire nawe naaba yaayehaireyo ahari Yehova. Eky’obusaasi, naaba atakikora ebirikuhikaana n’okwehayo kwe, kandi ekyo n’eky’akabi munonga. (Ezk. 18:31) Kwonka Yehova yaaba akiinire abantu embabazi, nihaba hakiriho amatsiko ngu omuntu ogwo naija kugaruka omu kibiina. Abareeberezi nibabaasa kworeka bata ngu baine amatsiko nk’ago aha musiisi oihairwe omu kibiina?

OKU ABAREEBEREZI BARIKUHWERA ABAIHIRWE OMU KIBIINA

6. Abareeberezi nibaija kukora ki kuhwera oihirwe omu kibiina?

⁶ Omuntu orikwihwa omu kibiina shi niwe aine kuteeraho kugarukira Yehova ataine buhwezi? Ngaaha buzima! Akakiiko akatoorainwe abareeberezi kaaba nikamumanyisa ngu naija kwihwa omu kibiina, nikamugambira ebi ashemereire kukora kubaasa kugaruka. Kwonka abareeberezi nibaija kukora ekirikukira ahari ekyo. Nibaija kumugambira ngu nibenda kugaruka kugaaniira nawe bwanyima y’ameezi makye, kureeba yaaba ahindwire omu miteekateekyere ye. Omusiisi ogwo yaikiriza kugaruka kugaaniira nabo, ahonaaho nibamuhiga kweteisa akagaruka omu kibiina. N’obu yaakuba atoorekire ngu ahindwire omu miteekateekyere ye omu bwire obwo, abareeberezi nibaija kuguma nibateeraho kugaaniira nawe omu biro by’omumaisho.

7. Abareeberezi nibooreka bata esaasi nka Yehova baaba nibahwera oihirwe omu kibiina? (Yeremia 3:12)

⁷ Abareeberezi nibateeraho kworeka esaasi nka Yehova baaba nibahwera oihirwe omu kibiina. Nk’eky’okureeberaho, Yehova tarategyereize Abaisraeli abaamugomiire kubanza kweteisa. Kureka, niwe yaabandize kugira eki yaakora kubahwera n’obu baaraabe baabaire bataketeisize. Nk’oku kigambirweho omu kicweka kya kabiri omu munaara ogu, akooreka esaasi arikugambira nabi Hosea kugarukana n’omukazi we owaabaire naakishiisha. (Hos. 3:1; Mal. 3:7) Nka Yehova, abareeberezi nibaba nibendera kimwe kuhwera omusiisi kweteisa akagaruka omu kibiina, kandi nibamworobeza kukikora.—Shoma Yeremia 3:12.

8. Enfumu ya Yesu ey’omwana owaarazire neetuhwera eta kwongyera kwetegyereza esaasi n’embabazi za Yehova? (Luka 15:7)

⁸ Teekateeka aha nfumu ya Yesu ey’omwana owaarazire, erikugambwaho omu kicweka kya kabiri omu munaara ogu. Ishe ku yaamureebiire hare arikugaruka omu ka, ‘akairuka, yaamugwa omunda, yaamunywegyera.’ (Luk. 15:20) Yetegyereze ngu tarategyereize omutabani kumushaba okusaasirwa. Kureka, niwe yaateire orutambwe rw’okubanza kumusaasira. Abareeberezi nibateeraho kugira emiteekateekyere niyo emwe ahari abo abarugire ahari Yehova. Nibenda ngu entaama ehabire egarukye omu ka. (Luk. 15:​22-24, 32) Omu iguru nihabayo okushemererwa omusiisi yaagaruka omu kibiina, nikyo kimwe n’omu nsi.—Shoma Luka 15:7.

9. Yehova naahiga ata abasiisi omu muringo gwa rukundo kweteisa?

⁹ Kurugiirira aha bi twaheeza kwega, Yehova tarikushwekyerera omusiisi otarikweteisa. Kwonka, tarikwehuzya abasiisi. Naayenda ngu bamugarukire. Enyehurira ezi ainiire abarikweteisa nizoorekwa omuri Hosea 14:4 aharikugira hati: ‘Ninyija kubakiza okugaruka enyima kwabo, mbakunde, [ntagyemirwe], ahabw’okuba tinkibainiire kiniga.’ Eki nikihiga abareeberezi kugira eki baakora baareeba obumanyiso oburikworeka ngu omuntu ayeteisize. Kandi eki nikihigira kimwe abarugire ahari Yehova kuteeziringa kumugarukira.

10-11. Abareeberezi nibaija kuteeraho bata kuhwera abo abamazire emyaka mingi baihirwe omu kibiina?

¹⁰ Kandi shi abaayihirwe omu kibiina, obundi emyaka mingi enyima? Abantu nk’abo nibabaasa kuba batakikora ekibi ekyabareetaire kuruga omu kibiina. Obumwe, nibabaasa kuba batakikiijuka. Omu mbeera ezo, abareeberezi nibateeraho kumanya omwanya ogu barikutuuramu, kandi babataayaayira. Ku barikubataayaayira nibabaasa kushaba nabo, kandi babahigye omu muringo gwa rukundo kugaruka omu kibiina. Amazima gari ngu, omuntu yaaba amazire emyaka mingi aheeru y’ekibiina, naaba ahwairemu amaani omu by’omwoyo. N’ahabw’ekyo, yaayoreka ngu naayenda kugaruka omu kibiina abareeberezi nibabaasa kukora entebeekanisa kugira ngu haagaruke kugira owaamwegyesa Baibuli, n’obu yaakuba atakagarwirwe omu kibiina. Omu mbeera ezo zoona, abareeberezi nibo baine kukora entebeekanisa egyo.

¹¹ Abareeberezi nibooreka esaasi nka Yehova barikuteeraho kuhwera baingi nk’oku kirikubaasika kumanya ngu orwingi rw’okugaruka omu kibiina rwigwire. Omusiisi yaayoreka ngu ayeteisize, kandi arekire omuhanda gwe omubi, naabaasa kugarurwa omu kibiina omu bwire bukye.—2 Kor. 2:​6-8.

12. (a) Ni mu mbeera ki obu abareeberezi baine kwegyendesereza? (b) Ahabw’enki bataine kuteekateeka ngu Yehova tarikubaasa kugirira embabazi abasiisi abamwe? (Reeba n’obugambo obw’ahansi.)

¹² Omu mbeera ezimwe abareeberezi baine kwegyendesereza aha bikwatiraine n’okugarura omuntu omu kibiina. Nk’eky’okureeberaho, omuntu ku araabe yaihirwe omu kibiina ahabw’okutuuntuza omwana, okwehagura aha mazima, nari ahabw’okukora orukwe rw’okuhendera obushwere, abareeberezi baine kuhamya ngu buzima ayeteisiize kimwe. (Mal. 2:14; 2 Tim. 3:6) Abareeberezi nibaba baine kurinda obusyo. Kwonka, twine kumanya ngu Yehova naija kwakiira omusiisi weena orikworeka ngu ayeteisiize kimwe, kandi orekyeire aho kwejumba omu bikorwa bibi. N’ahabw’ekyo, n’obu abareeberezi baraabe baine kwegyendesereza baaba nibahwera abareebize bagyenzi baabo, tibaine kuteekateeka ngu Yehova tarikubaasa kugirira embabazi abasiisi abamwe.b—1 Pet. 2:10.

EBI EKIBIINA KIRIKUBAASA KUKORA

13. Oku turikutwariza omuntu ohanirwe abareeberezi nikutaana kuta n’oku turikutwariza omuntu oihirwe omu kibiina?

¹³ Nk’oku kigambirweho omu kicweka eky’enyima, obumwe nibaaranga ngu omuntu ahanirwe. Omu mbeera egyo, nitubaasa kugumizamu nitukwatanisa nawe, turikumanya ngu ayeteisize, kandi ahindwire emitwarize ye. (1 Tim. 5:20) Naaba akiri omwe aha b’ekibiina, kandi naaba naayenda ngu ab’eishe-emwe bamugumye barikukwatanisa nawe. (Heb. 10:​24, 25) Kwonka, tikwo twine kutwariza omuntu oihirwe omu kibiina. Titwine ‘kukwatanisa n’omuntu ogwo’ n’obu kwakuba ‘okurya nawe.’—1 Kor. 5:11.

14. Omukristaayo naabaasa kukoresa ata omuntu we ow’omunda otendekirwe Baibuli kucwamu oku araatwarize abaihirwe omu kibiina? (Reeba n’ekishushani.)

¹⁴ Ebi twashwijuma shi nibimanyisa ngu twine kwehuzya omuntu oihirwe omu kibiina? Ngaaha buzima. Amazima gari ngu, titushemereire kukwatanisa nawe. Kwonka, Omukristaayo naabaasa kwihirira aha muntu we ow’omunda otendekirwe Baibuli kucwamu kweta omuntu oihirwe omu kibiina kwija omu ruteerane, yaaba ari omunyabuzaare, nari abaire ari munywani we. Twine kumutwariza tuta yaija? Enyimaho, tubaire tutarikuramutsya omuntu ogwo. Kwonka hati, buri Mukristaayo aine kwihirira aha muntu we w’omunda otendekirwe Baibuli kucwamu aha nshonga egi. Abamwe nibabaasa kureeba kitaine nshonga kumuramutsya, nari kumwakiira omu ruteerane. Kwonka, titushemereire kugamba nawe obwire buraingwa nari kukwatanisa n’omuntu ogwo.

15. Ni basiiisi ba muringo ki abarikugambwaho omu 2 Yohaana 9-11? (Reeba n’akabokusi “Paulo na Yohaana shi Bakaba Nibagamba aha Kibi Nikyo Kimwe?”)

¹⁵ Abamwe nibabaasa kwebuuza, ‘Baibuli terikugira ngu Omukristaayo yaaramutsya omuntu oihirwe omu kibiina naaba yaakwatanisa nawe omu bikorwa bye ebibi?’ (Shoma 2 Yohaana 9-11.) Ebyetooroire emishororongo egyo nibyoreka ngu obuhabuzi obwo bukaba nibukwata aha beehagwire aha mazima, nʼabandi abarikuba nibeenegyeza ebikorwa bitahikire. (Kush. 2:20) N’ahabw’ekyo, omuntu yaaba naayenegyeza enyegyesa z’abeehagwire aha mazima, nari ebikorwa bibi ebindi, abareeberezi tibaine kutaho entebeekanisa y’okumutaayaayira. Kwonka nabwo, hariho amatsiko ngu omuntu ogwo naija kwegarukamu. Ekyo kitakabaireho, titwine kumuramutsya, nari kumweta omu ruteerane rw’ekibiina.

TOOREZA YEHOVA OMU KWOREKA EMBABAZI N’ESAASI

16-17. (a) Yehova naayenda ngu abasiisi bakore ki? (Ezekieli 18:32) (b) Abareeberezi nibooreka bata ngu nibakora na Yehova baaba nibahwera abasiisi?

¹⁶ Twegire ki omu bicweka bitaano ebi ebikurataine? Yehova tarikwenda omuntu weena kucwekyerezibwa. (Shoma Ezekieli 18:32.) Kureka, naayenda ngu abasiisi boona baagarukane nawe. (2 Kor. 5:20) Niyo nshonga ahabw’enki kuruga ira, Yehova atwire naayehanangiriza abaheereza be abarikumurugaho kweteisa bakamugarukira. Abareeberezi baine omugisha gw’okukora na Yehova, barikuteeraho kuhwera abasiisi kuhika aha kweteisa.—Rom. 2:4; 1 Kor. 3:9.

¹⁷ Teekateeka aha kushemererwa okurikubaho omu iguru abasiisi ku barikweteisa. Yehova Tataitwe ow’omu iguru, nawe naashemererwa emwe aha ntaama ze ezibuzire yaagaruka omu kibiina. Rukundo ei twiniire Yehova neeyeyongyera twateekateeka aha saasi, n’embabazi ze ezitatushemereire.—Luk. 1:78.