Ahabw’Enki Oine Kushwijuma Ediini Yaawe?

KA TUGIRE ngu oine endwara y’amaani erikwetengyesa ngu oshemezibwe. Oshemereire kuba oine obwesigye omu mushaho orikuza kukushemeza, obu amagara gaawe garikuba gari omu mikono ye. Kandi n’eky’obwengye kubanza waamanya oku atwire naakora omurimo gwe.

Nikyo kimwe, n’eky’obwengye kushwijuma gye ediini. Waaba oine ediini ei orimu, omu by’omwoyo nooba otaire amagara gaawe omu mikono yaayo. Eki nikitwariramu amatsiko gaawe g’amagara agatahwaho.

Yesu akataho omutindo kutuhwera kushwijuma ediini kumanya yaaba ehikire. Akagira ati: “Omuti gwona gumanyirwa aha byana byagwo.” (Luka 6:44) Nk’eky’okureeberaho, aha diini eziriho ku orikugira ei waashwijuma nooreeba ngu neeyana byana ki? Abeebembezi baayo nibata omutima aha kushorooza esente? Mbwenu shi abagirimu nibagyendera aha misingye erikutuhiga kutejumba omu ntaro n’omu micwe mibi? Hariho ediini yoona ei turikubaasa kwesiga? Nitukushaba kushwijuma ebicweka ebirikukurataho.