EISHOMO 15
Ahabw’Enki Oshemereire Kugumizamu Nooyega?
1. Okugumizamu nooyega Baibuli nikiija kukugasira kita?
Enyegyesa za Baibuli ezi oyegire zikuhwereire kwongyera kukunda Yehova. Kwonka oine kugumizamu nooteeraho kuhamya rukundo egyo. (1 Petero 2:2) Okubaasa kutunga amagara agatahwaho oine kugumizamu noohamya omukago gwawe na Ruhanga orikwega Ekigambo kye.—Shoma Yohaana 17:3; Yuda 21.
Ku oraayeyongyere kumanya Ruhanga, okwikiriza kwawe nikwija kuhama. Okwikiriza okwo nikwija kukuhwera kushemeza Ruhanga. (Abaheburaayo 11:1, 6) Nikwija kukureetera kweteisa n’okukora empindahinduka ezirikwetengyesa.—Shoma Ebyakozirwe 3:19.
2. Noobaasa kukoresa ota ebi oyegire ahari Ruhanga?
Noobaasa kwehayo ahari Yehova ogire omukago murungi nawe
Noija kwenda kugambira abandi ebi oyegire kandi buzima twena nitukunda kugambira abandi amakuru marungi. Waagumizamu nooyega Baibuli, noija kwega kugikoresa kushoboororera abandi amakuru marungi agu oyegire ahari Yehova.—Shoma Abarooma 10:13-15.
Abaingi nibatandika kubuurira amakuru amarungi barikugagambira banywani baabo nari abanyabuzaare. Kwonka koresa obwengye waaba noobabuurira. Omu mwanya gw’okubagira ngu ebi barikwikiriza bigwire, bagambire ebi Ruhanga arikuraganisa. Kandi ijuka ngu emitwarize mirungi neekwata aha bantu munonga kukira ebigambo byawe.—Shoma 2 Timoseo 2:24, 25.
3. Ni mukago ki ogu orikubaasa kugira na Ruhanga?
Okwega Ekigambo kya Ruhanga nikiija kukuhwera kuhama omu by’omwoyo. Ekyo nikiija kukuhwera kugira omukago murungi na Yehova. Noobaasa kuba omwe aha b’omu ka ye.—Shoma 2 Abakorinso 6:18.
4. Noobaasa kweyongyera kuhamya ota omukago gwawe na Yehova?
Noobaasa kuguhamya orikweyongyera kwega Ekigambo kye. (Abaheburaayo 5:13, 14) Shaba omwe aha Bajurizi ba Yehova kukwegyesa Baibuli arikukoresa akatabo Niki Eki Turikwega omu Baibuli? Ku oraayeyongyere kwega Ekigambo kya Ruhanga, ebi oraakore nibiija kugyenda gye.—Shoma Zaaburi 1:1-3; 73:27, 28.
Amakuru marungi nigaruga ahari Yehova, Ruhanga orikushemererwa. Noobaasa kweyongyera kumwirira haihi orikuguma haihi n’abantu be. (Abaheburaayo 10:24, 25) Waaguma nooteeraho kushemeza Yehova nikiija kukubaasisa kutunga amagara agatahwaho. Okugira omukago murungi na Ruhanga buzima nikyo kirikukirayo oburungi.—Shoma 1 Timoseo 1:11; 6:19.