Mugume Nimureeba Sitaane Naayenda Kubarya!

1. Shoboorora oku ekihangirwe ky’omwoyo kyaizire kuba Sitaane.

SITAANE omu kubanza, akaba aine omukago murungi na Yehova. Kwonka bwanyima, ekihangirwe eki eky’omwoyo kikatandika kwetenga ngu abantu bakiramye. Omu mwanya gw’okwetantara ekyetengo kibi ekyo, akakigumya omu biteekateeko bye okuhitsya obu kyarugiremu okushiisha. (Yak. 1:14, 15) Nitumanya ekihangirwe ekyo nka Sitaane, ‘otaragumiire mu mazima.’ Akagomera Yehova yaahinduka “ishe w’ebishuba.”​—Yoh. 8:44.

2, 3. Ebigambo “Sitaane,” “Omuregi,” ‘Enjoka ekya ira,’ hamwe ‘n’ekijoka ekihango’ nibyoreka ki aha muzigu wa Yehova orikukirayo?

² Kuruga obu Sitaane yaagoma, ayorekire ngu n’omuzigu wa Yehova orikukirayo, kandi buzima atwire atari munywani w’abantu. Ebikubyo ebiheirwe Sitaane nibyoreka oburyarya bwe oburengyesereize. Sitaane nikimanyisa “Omuhakanisa,” ekirikworeka ngu ekihangirwe eki eky’omwoyo tikirikushagika obushoboorozi bwa Ruhanga obw’okuba ohikire kutegyeka byona; kureka nikiburwanisiza kimwe. Okukira munonga, Sitaane naayenda ngu obushoboorozi bwa Yehova obw’okutegyeka byona buhweho.

³ Nk’oku kirikworekwa omu Okushuuruurwa 12:9, Sitaane naayetwa Omuregi, ekirikumanyisa “orikubeiherera abandi.” Eki nikitwijutsya ngu Sitaane naashiisha Yehova arikumweta omubeihi. Ebigambo ‘ekijoka ekya ira’ nibitwijutsya ekyabaireho omuri Edeni obu Sitaane yaakoresa enjoka kubeiha Haawa. Ebigambo ‘ekijoka ekihango’ nibitwijutsya ekintu ekirikutiinisa munonga kandi eki nikihikaana n’obushaarizi bwa Sitaane omu kuteeraho kuremesa ekigyendererwa kya Yehova n’okucwekyereza abantu be.

4. Nituza kushwijuma ki omu kicweka eki?

⁴ Buzima, Sitaane naateeraho munonga kuturemesa kuhamira ahari Yehova. Ahabw’enshonga nungi, Baibuli neeturabura eti: “Mwerinde; mugume nimureeba. Sitaane omuzigu waanyu naashooba nk’entare erikutsinda, naasherura ou araarye.” (1 Pet. 5:8) Okuhikaana n’okurabura oku, ekicweka eki nikiza kworeka emitwarize eshatu ya Sitaane eshemereire kutureetera kwerinda omuzigu ogu owa Yehova n’abantu be.

SITAANE AINE AMAANI

5, 6. (a) Ha eby’okureeberaho ebirikworeka ngu ebihangirwe eby’omwoyo biine “amaani.” (b) Sitaane aine “obushoboorozi bwa rufu” mu muringo ki?

⁵ Ebihangirwe eby’omwoyo nibyetwa baamaraika kandi “amamanzi g’amaani.” (Zab. 103:20) Baine amaani maingi n’obwengye bwingi n’ahabw’ekyo nibeetegyereza okukira abantu. Kwonka, baamaraika abeesigwa nibakoresa amaani gaabo okukora ebirungi. Nk’eky’okureeberaho, eizooba rimwe Maraika wa Yehova akacwekyereza abaserukare 185,000 b’Abaasiria, ekyabaire kitarikubaasika aha muntu nari aha ihe rihango. (2 Bag. 19:35) Ogundi murundi Maraika akakoresa amaani ge agarikukira ag’abantu n’obwengye bwe yaakiza entumwa za Yesu kuruga omu kihome. N’obu abarinzi baraabe baabaire bari haihi, tibarabaasize kureeba maraika arikwigura enyigi, akashohoza entumwa aheeru kandi akagaruka akakiinga enyigi!​—Byak. 5:18-23.

⁶ N’obu baamaraika bo baraabe nibakoresa amaani gaabo kukora ebirungi, Sitaane we naakoresa age kukora ebibi. Kandi aine amaani g’okubeihabeiha abantu! Ebyahandiikirwe nibimugambaho ‘nk’omutegyeki w’ensi’ kandi “ruhanga w’ensi egi.” (Yoh. 12:31; 2 Kor. 4:4) Sitaane Omuregi aine “obushoboorozi bwa rufu.” (Heb. 2:14) Eki tikirikumanyisa ngu naita abantu boona butunu. Kwonka, omutima gwe mubi ogw’obwitsi gubugire ensi egi. Teekateeka ahari eki, ahabw’okugira ngu Haawa akaikiriza ekishuba kya Sitaane kandi Adamu yaagomera Ruhanga, ekibi n’okufa bikabuga omu bantu boona. (Rom. 5:12) Ahabw’enshonga egyo, Omuregi aine “obushoboorozi bwa rufu.” Niyo nshonga ahabw’enki Yesu yaamwetsire “omwitsi.” (Yoh. 8:44) Sitaane ka n’omuzigu waitu oine amaani!

7. Baadaimoni boorekire bata ngu baine amaani?

⁷ Twahakanisa Sitaane, nituba twayoreka ngu tituri ha rubaju rwe n’abo boona abarikumushagika omu nshonga y’ogwo ohikire kutegyeka byona. Abarikumushagika nibatwariramu baamaraika abaagomire, nari baadaimoni. (Kush. 12:3, 4) Emirundi mingi, baadaimoni boorekire ngu baine amaani maingi, barikuhitsya obusaasi bwingi ahari abo abu barikubonabonesa. (Mat. 8:28-32; Mak. 5:1-5) Otarigaya amaani ga baamaraika ababi nari agu “mukama” wa baadaimoni aine. (Mat. 9:34) Ku ogire ngu titwine buhwezi bwa Yehova, titwakubaasize kusingura Sitaane.

SITAANE N’OW’AKABI

8. (a) Sitaane aine kigyendererwa ki? (Reeba ekishushani aha kutandika.) (b) Kurugiirira aha kwetegyereza kwawe, ensi egi neeyoreka eta omutima mubi gwa Sitaane?

⁸ Entumwa Petero akagyeragyeranisa Sitaane ‘n’entare erikutsinda.’ Kurugiirira aha kitabo kimwe, ekigambo ky’Orugriika ekirikuvunuurwa “okutsinda” nikimanyisa “okutontoma kw’enyamaishwa yaaba eine enjara y’amaani.” Ekyo ka nikyoreka gye ngu Sitaane ni mubi munonga! N’obu ensi yoona eraabe eri omu bushoboorozi bwa Sitaane, kwonka aine enjara y’amaani naaba naayenda abantu abandi baingi. (1 Yoh. 5:19) Ahabwe, ensi neemureetera kweyongyera kugira enjara y’okuhabisa abantu baingi. N’ekirugiremu, hati Sitaane omutima agutaire aha bashukirweho amajuta, abarikuhwerwa, ‘ab’entaama ezindi.’ (Yoh. 10:16; Kush. 12:17) Sitaane aine ekigyendererwa ky’okwegarurira abantu ba Ruhanga. Okuhiiganisa abakuratsi ba Yesu kuruga omu kyasha ky’okubanza n’okuhitsya hati, nikihamya ngu aine omutima mubi kandi gw’obwitsi.

9, 10. (a) Sitaane akateeraho ata kuremesa ekigyendererwa kya Ruhanga ahabw’eihanga rya Israeli? (Ha eby’okureeberaho.) (b) Ahabw’enki Sitaane yaabaire aine ekigyendererwa ky’omutaano kuta omutima aha Israeli eya ira? (c) Nooteekateeka ngu Omuregi naayehurira ata omwe aha Bajurizi ba Yehova yaakora ekibi ky’amaani?

⁹ Sitaane omu kuteeraho kuremesa ekigyendererwa kya Ruhanga, naayoreka ngu n’ow’akabi omu muringo ogundi. Entare terikubaasa kugirira embabazi eki erikwenda kurya. Neeba etaine saasi yaaba neeza kwita kandi terikwefuuza bwanyima y’okwita. Omu muringo nigwo gumwe, Sitaane tarikugirira mbabazi abo abu arikwenda kurya. Nk’eky’okureeberaho, teekateeka aha mirundi ei Sitaane Omuregi ashemereire kuba yaabaire aine ahu abundami obu Abaisraeli baashiisha ahabw’omururu n’obushambani. Ku orikushoma aha byahikire aha bantu nka Zimuri owaabaire aine emicwe mibi na Gehazi waabaire aine omururu, “nooreeba” entare eshemereirwe ahabw’obusinguzi bwayo?​—Kub. 25:6-8, 14, 15; 2 Bag. 5:20-27.

¹⁰ Sitaane akaba aine enshonga y’omutaano okuta omutima aha Baisraeli aba ira. Ahakuba eihanga eryo rikaba niriija kurugamu Mesia, owaabaire naija kucwekyereza Sitaane, reero akooreka ngu Yehova niwe ahikire kutegyeka byona. (Kut. 3:15) Sitaane akaba atarikwenda ngu Abaisraeli babe gye, kandi akaba ari ow’akabi omu kuteeraho kwe kubareetera kukora eki. Titushemereire kuteekateeka ngu Sitaane akasaasibwa Daudi obu yaashambana nari ngu akasaasibwa Musa obu yaaba otahikire kutaaha omu Nsi Eyaaraganisiibwe. Omu mwanya gw’ekyo, Sitaane hatariho kubanganisa naashemererwa omwe aha baheereza ba Ruhanga ku arikukora ekibi ky’amaani. Buzima, obusinguzi nk’obu ni bimwe aha bi arikukoresa kujuma Yehova.​—Enf. 27:11.

11. Sitaane akaba aine kigyendererwa ki omu kuta omutima ahari Saara?

¹¹ Sitaane akaba ainiire ekiniga oruganda orwabaire niruza kurugamu Mesia. Nk’eky’okureeberaho, yetegyereze ekyabaireho ahonaaho Abrahamu yaheza kugambirwa ngu naija kuba “eihanga rihango.” (Kut. 12:1-3) Obu Abrahamu na Saara baabaire bari omu Misiri, Faraho akaragiira baareeta Saara omu ka ye, obundi naabaasa kuba yaabaire aine ekigyendererwa ky’okumuhindura omukazi we. Kwonka, Yehova akataaha omu nshonga yaajuna Saara kutagwa mu bushambani. (Shoma Okutandika 12:14-20.) Obwire bukye Isaaka atakazairwe, enshonga niyo emwe ekabaho omuri Gerari. (Kut. 20:1-7) Kwonka shi, Sitaane akaba ari omu bikorwa ebi? Mbwenu shi akaba aine amatsiko ngu Saara, owaatsigireho Uri orurembo rurungi akaza kutuura omu mahema, naija kubeihwabeihwa ebintu birungi eby’omu kikaari kya Faraho na Abimeleki? Mbwenu shi Sitaane akaba naateekateeka ngu Saara naaza kureebya iba, na Yehova, reero ataahe omu bushwere by’obushambani? Ekyo Baibuli terikukigambaho, kwonka twine enshonga nungi okwikiriza ngu Omuregi akaba amaririire kuhayo Saara kumubaasisa kuba otahikire kurugwamu oruzaaro orwaraganisiibwe. Sitaane akaba atarikwija kwefuuza ahabw’okugira ngu obushwere burungi bw’omukazi, eiziina rye n’omukago gwe na Yehova bifiire. Sitaane ka ni mubi!

12, 13. (a) Sitaane akooreka ata obubi bwe bwanyima ya Yesu kuzaarwa? (b) Noogira ngu Sitaane aine miteekateekyere ki aha baana abarikukunda Yehova, kandi abarikuteeraho kumuheereza obunaku obu?

¹² Bwanyima ya Abrahamu, hakahinguraho emyaka mingi Yesu yaabona kuzaarwa. Otakaateekateeka ngu Sitaane akaba naareeba Yesu nk’omwereere murungi, orikureebeka gye, nari ow’omuhendo. Ngaaha, Sitaane akaba naamanya ngu omwana ogu naija kuba Mesia owaaraganisiibwe. Buzima, Yesu akaba ari oruzaaro rwa Abrahamu orukuru, owaabaire naija kucwekyereza “emirimo ya Sitaane.” (1 Yoh. 3:8) Sitaane shi akaba naateekateeka ngu okwita omwana ogwo kikaba kiri ekikorwa kibi munonga? Tarikufayo aha kihikire n’ekigwire. Yesu ku yaaherize kuzaarwa, ahonaaho Sitaane akateeraho kwenda kumwita. Ata shi?

¹³ Omugabe Heroode akagira ekiniga kingi obu abanyabwengye baabuuza aha bikwatiraine ‘n’omugabe w’Abayudaaya owaabaire azairwe,’ kandi akaba amaririire kumwita. (Mat. 2:1-3, 13) Kubaasa kuhamya ngu omurimo gwakorwa, akaragiira okwita abaana b’aboojo boona abaabaire baine emyaka ebiri kugarura ahansi ab’omuri Betelehemu n’emyanya egiherereire. (Shoma Matayo 2:13-18.) Yesu akahonokaho omu kwita abaana baingi kutyo, kwonka eki nikitumanyisa ki aha muzigu waitu Sitaane? Nikyoreka gye ngu Omuregi tarikutwara amagara g’omuntu nk’ag’omugasho. Buzima tainiire abaana embabazi. Buzima Sitaane ‘n’entare erikutsinda.’ Otariteekateeka ngu taine miteekateekyere y’akabi!

SITAANE N’OMUBEIHI

14, 15. Sitaane ‘ahumize ata emitima y’abatarikwikiriza’?

¹⁴ Sitaane ahabw’okukoresa ebishuba, naabaasa kureetera abantu kurekyera aho kukunda Yehova, Ruhanga. (1 Yoh. 4:8) Arikukoresa ebishuba, naaremesa abantu kugira ekyetengo ky’eby’omwoyo. (Mat. 5:3) N’ahabw’ekyo ‘ahumize emitima y’abatarikwikiriza ngu omushana gw’engiri y’ekitiinisa kya Kristo, niwe kishushani kya Ruhanga, gutabaakira.’​—2 Kor. 4:4.

¹⁵ Omuringo mukuru ogu Sitaane arikurabizamu ebishuba bye n’ediini y’ebishuba. Ka aine kuba naashemererwa munonga kureeba abantu nibaramya baishenkurubo, nari ebihangirwe, nari enyamaishwa nari ekintu ekindi kyona ekitari Yehova, “Ruhanga ow’eihato”! (Kur. 20:5) Kandi abo abarikuteekateeka ngu nibaramya gye Ruhanga, baine enyikiriza z’ebishuba n’emigyenzo y’ebishuba. Bari omu mbeera mbi y’esaasi, nk’abo abu Yehova yaayehanangiriize ati: “Ahabw’enki nimuheera empiiha zaanyu ebitari by’okurya, n’okuhendekyera ebitarikuhaazya? Mumpurire mutaireho omutima, mubone kurya ebirungi, amagara gaanyu gashemerererwe ebirimu ebishaju.”​—Isa. 55:2.

16, 17. (a) Ahabw’eki Yesu yaagambiire Petero ati: “Garuka enyima yangye, Sitaane”? (b) Sitaane naabaasa kutubeiha ata kutateekateeka aha bukuru bw’obwire obu turimu?

¹⁶ Sitaane naabaasa kuhabisa n’abaheereza ba Yehova abeeziriki. Nk’eky’okureeberaho, yetegyereze ekyabaireho obu Yesu yaagambira entumwa ze ngu ari haihi kwitwa. Hatariho kubanganisa entumwa Petero akamuta aha rubaju yaamugira ati: “Nikikabure, Mukama wangye! ekyo tikirikwija kukubaho na kakye.” Yesu akagarukamu Petero n’obumanzi ati: “Garuka enyima yangye Sitaane!” (Mat. 16:22, 23) Ahabw’eki Yesu yaayetsire Petero “Sitaane”? N’ahabw’okuba Yesu akaba naayetegyereza ekyabaire nikiza kubaho. Obwire bukahika obu yaabaire naija kufa akaba ekitambo reero akooreka ngu Omuregi n’omubeihi. Omu bwire bukuru obwo omu byafaayo by’abantu, bukaba butari bwire bwa Yesu bw’okwesaasira. Sitaane akaba naayenda ngu Yesu ayesaasire arekye kuhikiiriza ekigyendererwa kye.

¹⁷ Obu turi haihi n’emperu y’obusingye obu, naitwe turi omu biro by’akabi kaingi. Sitaane naayenda ngu twesaasire turikuteeraho kuba abasinguzi omu nsi egi, turemwe kumanya obukuru bw’obwire obu turimu. Otakaikiriza ekyo kukubaho! Omu mwanya gw’ekyo, ‘guma nooreeba.’ (Mat. 24:42) Otariikiriza ebishuba bya Sitaane ebirikugira ngu emperu eri hare munonga nari ngu teriija na kakye.

18, 19. (a) Sitaane naabaasa kutubeihabeiha ata aha bikwatiraine n’oku turikweteekateeho? (b) Yehova naatuhwera ata kubaasa kuguma nitureeba?

¹⁸ Sitaane naateeraho kutubeihabeiha omu gundi muringo. Naabaasa kutureetera kuteekateeka ngu Ruhanga tarikutukunda kandi ngu tarikutusaasira ebibi byaitu. Naakoresa ebishuba ebi byona. Kwonka buzima, n’oha ou Yehova atarikukunda? Ni Sitaane. N’oha buzima otarikubaasa kusaasirwa? Nabwo, ni Sitaane. Kwonka Baibuli neetuha amatsiko eti: “Ahabw’okuba Ruhanga ti otahikiriire kwebwa emirimo yaanyu n’okukunda oku mwayorekire aha iziina rye.” (Heb. 6:10) Yehova naasiima okuteeraho kwaitu kumushemeza, kandi obuheereza bwaitu ti bwa busha. (Shoma 1 Abakorinso 15:58.) N’ahabw’ekyo, titushemereire kubeihwabeihwa ebishuba bya Sitaane.

¹⁹ Nk’oku twareeba, Sitaane aine amaani, n’ow’akabi, kandi n’omubeihi. Mbwenu shi nitubaasa kusingura tuta omuzigu waitu ogu? Yehova tarikutureka tutaine burinzi. Ekigambo kye nikitumanyisa emiringo ei Sitaane arikukoresa, kandi “tituri batarikumanya bwengye bwe obu arikutucwera.” (2 Kor. 2:11) Twayetegyereza obukoryo bwa Sitaane, nitwija kuguma nitureeba. Kwonka kumanya emiringo ei Sitaane arikukoresa tikirikumara. Baibuli neegira eti: ‘Murwanise Sitaane, aryabahunga.’ (Yak. 4:7) Ekicweka ekirikukurataho nikiija kugamba emiringo eshatu ei turikubaasa kurwanisamu Sitaane tukamusingura.