Ekitebyo 56
Saulo—Omugabe wa Israeli w’Okubanza
REEBA Samueli naashuka amajuta aha mutwe gw’omushaija. Eki nikyo baabaire bakira kukora okworeka ngu omuntu atoorainwe kuba omugabe. Yehova akagambira Samueli kushuka amajuta aha mutwe gwa Saulo. N’amajuta g’omutaano againe omugaju.
Saulo tarateekateekire ngu akaba ashemereire kuba omugabe. Akagambira Samueli ati: ‘Ninduga omu ruganda rwa Benyamiini, orurikukirayo obukye omuri Israeli. Ahabw’enki noogira ngu niinyija kuba omugabe?’ Yehova naakunda Saulo ahabw’okuba tarikwetwara kuba mukuru. Niyo nshonga ahabw’enki Amutooraine kuba omugabe.
Kwonka kandi Saulo timwooro nari shi omushaija mukye. Naaruga omu maka amatungi, ni murungi munonga kandi ni muraingwa. Abandi boona ab’omuri Israeli naabakizaho nka fuuti emwe! Kandi Saulo n’omwiruki murungi, kandi aine amaani maingi. Abantu bashemereirwe ahakuba Yehova atooraine Saulo kuba omugabe. Boona batandika kugira bati: ‘Omugabe na karamaare!’
Abazigu ba Israeli baine amaani nk’oku kitwire kiri okwiha enyima. Nibakireetera Abaisraeli oburemeezi bwingi. Omwanya mukye Saulo aherize kwemekwa nk’omugabe, Abaamoni baija kubarwanisa. Kwonka Saulo arundaana hamwe eihe rihango, kandi asingura Abaamoni. Eki kireetera abantu kushemererwa ahabw’okugira ngu Saulo n’omugabe.
Emyaka ku egyenda neehinguraho, Saulo ahitsya Abaisraeli aha kusingura abazigu baabo baingi. Saulo kandi aine omutabani emanzi orikwetwa Yonasaani. Kandi Yonasaani ayamba Israeli okusingura entaro nyingi. Abafilistia bakyari abazigu ba Israeli abarikukirayo obubi. Eizooba rimwe enkumi n’enkumi z’Abafilistia baija kurwanisa Abaisraeli.
Samueli agambira Saulo okurindaho okuhitsya obu araije akahayo ekitambo nari akaha Yehova ekiconco. Kwonka Samueli akyerererwa kwija. Saulo atiina ngu shana Abafilistia nibaija kutandika orutaro, n’ahabw’ekyo agyenda omu maisho ahayo ekitambo we ahabwe. Samueli bwanyima ku aija, agambira Saulo ngu yaagoma. Amugira ati: ‘Yehova naija kutoorana ondiijo muntu kuba omugabe wa Israeli.’
Bwanyima Saulo agaruka agoma. N’ahabw’ekyo Samueli amugambira ati: ‘Okworobera Yehova nikukira okumutambira ekitambo ky’entaama erikukirayo oburungi. Ahabw’okuba waagomera Yehova, Yehova tarikwija kukurekaho nk’omugabe wa Israeli.’
Nitubaasa kwega eishomo rirungi omuri eki. Nikyoreka oku kiri kikuru okworobera Yehova obutoosha. Kandi, nikyoreka ngu omuntu murungi, nka Saulo oku yaabaire ari, naabaasa kuhinduka abe mubi. Titurikwendera kimwe kuba babi, tikwe kiri?
1 Samueli eshuura 9 okuhika 11; 13:5-14; 14:47-52; 15:1-35; 2 Samueli 1:23.