Ebijuriziibwe omu Katabo k’Obuheereza Bwaitu n’Oku Turikutwaza
AGUSTO 3-9
EBY’OMUHENDO EBIRI OMU KIGAMBO KYA RUHANGA | OKURUGA 13-14
“Mwemerere Muhamire, Mureebe Okujunwa kwa Yehova”
w13-E 2/1 4
Musa—Omushaija Owaabaire Aine Okwikiriza
Musa naabaasa kuba yaabaire atarikumanya ngu Ruhanga akaba naaza kubaganisamu Enyanja Erikutukura, kuteeraho Abaisraeli omuhanda gw’okwambukiraho. Kwonka, akaba aine obwesigye ngu Ruhanga akaba naaza kugira eki yaakora kuhwera abaheereza be. Musa akaba naayenda Abaisraeli bagyenzi be bagire obwesigye nk’obwo. Baibuli neegira eti: “Musa yaagambira abantu ati: Mutatiina, mwemerere muhamire, haza mureebe okujunwa oku Mukama, araabareetere eri izooba.” (Okuruga 14:13) Mbwenu shi Musa akabaasa kureetera Abaisraeli bagyenzi be kugira obwesigye? Eego, ahakuba Baibuli neegamba ahari Musa n’Abaisraeli boona eti: “Ahabw’okwikiriza, Abaisraeli bakaraba omu Nyanja Erikutukura nk’abarikuraba ahoomire.” (Abaheburaayo 11:29) Okwikiriza kwa Musa kukamugasira kandi kwagasira na boona abaamwegireho.
Naafayo n’Obu Araabe Ari ow’Obushoboorozi Bwona
Shoma Okuruga 14:19-22. Teera akashushani ori n’Abaisraeli. Mwatangatangirwa ahagati. Eihe ry’Abanyamisri riri enyima yaanyu, kandi Enyanja Erikutukura eri omumaisho gaanyu. Reero Ruhanga agira eki yaakora. Enyomyo y’ekicu eyaaba eri omumaisho eza ahagati yaanyu n’Abanyamisri. Bo bari omu mwirima kwonka imwe nimwakirwa ekyererezi omu muringo gw’eky’okutangaaza! Bwanyima oreeba Musa naagorora omukono gwe aha nyanja, kandi omuyaga gw’amaani kuruga omu burugwa izooba gwija, gubaganisamu enyanja kabiri okuhika seeri. Reero iwe, eka yaawe, n’amatungo gaanyu n’abandi boona abu mwine muraba ahansi ah’eitaka ry’enyanja. Eky’okutangaaza, ahansi tihariho byondo kandi tiharikuterera. Hoomire kandi hahami, n’ahabw’ekyo kyorobi kugyenderaho. Kandi mwena otwariiremu n’abarikugyenda mpora muhika seeri.
w09-E 3/15 7 kacw. 2-3
Otaryebwa Yehova
Obu Abanyamisri baabaire nibateganisibwa ebigaari byabo by’orugamba, Abaisraeli boona bakambuka. Musa akagorora omukono gwe aha Nyanja Erikutukura. Yehova akareetera amaizi kugaruka kukwatana. Amaizi maingi munonga gakashweka Faraho n’eihe rye gaabamira. Tihariho n’omwe aha bazigu abo owaahonokireho. Abaisraeli bakacungurwa!—Kur. 14:26-28; Zab. 136:13-15.
Amakuru agaabaire nigakwata aha kyabaireho gakareetera amahanga agaabaire gabeehinguririize kutiina. (Kur. 15:14-16) Bwanyima y’emyaka makumi ana, Rahabu owa Yeriko akagambira abashaija b’Abaisraeli babiri ati: “Tugizire obwoba bwingi ahabwanyu, . . . ahakuba tukahurira oku Mukama yaayomize amaizi g’Enyanja Erikutukura omu maisho gaanyu, obu mwaruga Misri.” (Yos. 2:9, 10) Amahanga amakafiire tigareebeirwe oku Yehova yaajunire abaheereza be. Buzima, Abaisraeli bakaba baine bingi ebyabaire nibibareetera kwijuka Yehova.
Okwongyera Kucondooza aha Bi Turikwega
it-1-E 1117
Oruguuto Oruhango
Okuruga ira, hakaba hariho enguuto empango, enguuto enkye n’emihanda y’abashuubuzi eyaabaire neegaita endembo n’obugabe butari bumwe omuri Palestine. (Kub 20:17-19; 21:21, 22; 22:5, 21-23; Yos 2:22; Bag 21:19; 1Sam 6:9, 12; 13:17, 18; reeba KING’S ROAD.) Ogwabaire nigumanywa nk’omuhanda mukuru n’ogwabaire niguruga Misri gurikuza omu ndembo za Filistia nka Gaaza na Ashikelooni kandi gukagumizamu gurikuza omu bicweka bya Megido. Gukaba gugumizamu gurikuza Hazori, bukiizi-bwa-bumosho bw’Enyanja ya Galilaaya, reero guza Damasiko. Omuhanda ogu ogwaabaire niguraba Filistia nigwo gwabaire guri ogwa haihi kuruga Misri kuza omu Nsi Eyaraganisiibwe. Kwonka Yehova akareetera Abaisraeli kuraba omu muhanda ogundi kugira ngu batakahwamu amaani baatahirirwa Abafilistia.—Kur 13:17.
it-1-E 782 kacw. 2-3
Okuruga
Enyanja Erikutukura ekabaganisibwamu nkahi kugira ngu Abaisraeli babaase kwambukiraho?
Abaisraeli ku baahikire Esamu “aha munwa gw’eihamba,” omu kicweka kya kabiri ky’orugyendo rwabo, Ruhanga akagambira Musa ‘kugaruka enyima, bakateera amahema omu maisho ga Pihahiroosi . . . aha rubaju rw’Enyanja Erikutukura.’ Okubarabya okwo kikaba nikiza kureetera Faraho kuteekateeka ngu Abaisraeli “bashobereirwe.” (Kur 13:20; 14:1-3) Abacondooza abarikugira ngu omuhanda gwa el Haj nigwo Abaisraeli baarabiremu, nibagira ngu ekigambo ky’Oruheburaayo “okugaruka enyima” tikirikumanyisa “okutiishuka” nari “okuza aha rubaju” kureka kiine amakuru g’okugaruka nari okwetoroora. Nibagira ngu Abaisraeli ku baahikire bukiizi-bwa-bumosho haihi n’enyanja ya Suez, bakahinduka baagaruka enyima baatoora burugwa-eizooba ya Jebel ʽAtaqah, orushozi oruri burengyerwa-eizooba bw’enyanja egyo. Ahabw’okugira ngu Abaisraeli bakaba bari baingi munonga, bakaba batarikubaasa kurahuka kuruga omu kicweka ekyo baataahirirwa kuruga bukiizi-bwa-bumosho ahakuba enyanja ekaba ebatangiize.
Entwaza y’Abayudaaya ab’omu kyasha ky’okubanza ekaba neekyoreka. (Reeba PIHAHIROTH.) Kwonka ekirikukirayo obukuru, embeera nk’egyo neehikaana n’eki Baibuli erikugamba, n’obu abacondooza baingi batarikwikirizana neekyo. (Kur 14:9-16) Nikireebeka ngu Abaisraeli bakambukira hare n’Enyanja Suez (nari burugwa-eizooba bw’Enyanja Erikutukura) kugira ngu amahe ga Faraho gakaba gatarikubaasa kwetoorora Enyanja Suez bakahika aha b’Abaisraeli aha rubaju orundi.—Kur 14:22, 23.
AGUSTO 10-16
EBY’OMUHENDO EBIRI OMU KIGAMBO KYA RUHANGA | OKURUGA 15-16
“Himbisa Yehova Orikweshongora”
w95-E 10/15 11 kacw. 11
Ahabw’enki Twine Kutiina Ruhanga Hati?
Yehova okucwekyereza amahe g’Abanyamisri kikamureetera kuhimbisibwa omu maisho g’abaheereza be boona kyareetera eiziina rye kumanywa abantu baingi. (Yoshua 2:9, 10; 4:23, 24) Eego, eiziina rye rikahimbisibwa kukira baaruhanga b’ebishuba Ababanyamisri, abaayorekire ngu tibarikubaasa kucungura abarikubaramya. Okwesiga baaruhanga aba, abantu nari amahe g’abantu kikabareetera amaganya. (Zaaburi 146:3) N’ahabw’ekyo tikirikutangaaza kureeba ngu Abaisraeli bakeeshongora baahimbisa Ruhanga ohuriire orikujuna abaheereza be!
w95-E 10/15 11-12 kacw. 15-16
Ahabw’enki Twine Kutiina Ruhanga Hati?
Ku ogire ngu tukaba twemereire na Musa, naitwe tukaba nitwija kugira ekihika ky’okweshongora tuti: “N’oha ori nkaiwe, iwe orikuhimbisibwa ahabw’okwera kwawe, ow’okutiinwa ahabw’eby’ekitiinisa n’eby’okutangaaza, ebi okora?” (Okuruga 15:11) Okumara ebyasha bingi ebigambo nk’ebyo bitwire nibigambwa ahari Ruhanga. Omu kitabo ekirikuhererukayo omu Baibuli, entumwa Yohaana akagamba aha baheereza ba Ruhanga abashukirweho omwoyo gurikwera ati: “Nibeeshongora ekyeshongoro kya Musa omugaragwa wa Ruhanga, n’ekyeshongoro ky’Omwana gw’entaama.” Kikaba kiri kyeshongoro ki? “Mukama Ruhanga ow’Obushoboorozi Bwona, ebi waakozire ni bikuru kandi n’eby’okutangaaza; emihanda yaawe ehikiriire kandi n’ey’amazima, nyakusinga Mukama w’amahanga. Mukama waitu, n’oha otaritiina, akahimbisa eiziina ryawe?”—Okushuuruurwa 15:2-4.
N’omu bunaku obu hariho abaheereza ba Ruhanga abarikusiima Ruhanga ahabw’ebi yaakozire n’ebiragiro bye. Abantu kuruga omu mahanga goona bacungwirwe omu by’omwoyo, baayetaanisa aha nsi egi esiisikaire, ahabw’okuba nibamanya ebiragiro bya Ruhanga kandi babigyenderaho. Buri mwaka, abantu baingi nibeetaanisa aha nsi egi embi beegaita aha baheereza ba Yehova abahikire kandi abarikwera. Omu bwire bukye, Ruhanga ku araacwere ediini y’ebishuba orubanja kandi akacwekyereza n’ensi egi esiisikaire, abaheereza be nibaza kugumaho ebiro byona omu nsi ehikiriire.
it-2-E 454 kacw. 1
Ebyeshongoro
Abaisraeli bakaba bakira kugira ebicweka bibiri by’abeeshongozi abaabaire beeshongora barikwihihana, nari omwe arikwebembera abandi bakeeshongora korasi. Omu byahandiikirwe eki nikimanywa ‘nk’okwebembera.’ (Kur 15:21; 1Sam 18:6, 7) Eki nitukimanyira aha ku Zaaburi ezimwe zaahandiikirwe, nka Zaaburi eya 136. Oku guruupu ibiri z’abayeshongwire obu baayeza orugo rwa Yerusaalemu omu bwire bwa Nehemia zirikugambwaho nikyoreka ngu zikeeshongora omu muringo ogwo.—Neh 12:31, 38, 40-42; reeba SONG.
it-2-E 698
Nabikazi
Miriamu niwe mukazi w’okubanza orikugambwaho nka nabikazi omu Baibuli. Nikireebeka ngu Ruhanga arikukoresa omwoyo gwe akamukoresa kugamba obutumwa kurabira omu kweshongora. (Kur 15:20, 21) N’ahabw’ekyo, we na Arooni nibagambwaho kuba baagizire Musa bati: “Itwe [Yehova] tatugambiramu?” (Kub 12:2) Yehova arikurabira omuri nabi Mika, akeegambaho nk’owaatumire “Musa, Arooni na Miriamu” aha Baisraeli obu yaabaire naaza kubaiha omuri Misri. (Mik 6:4) N’obu Miriamu araabe yaatungire omugisha gw’amaani kukoresibwa Yehova kugamba obutumwa, akaguma ari ahansi y’obushoboorozi bwa munyaanya, Musa. Ku yaayetungwire, Yehova akamufubira.—Kub 12:1-15.
Okwongyera Kucondooza aha Bi Turikwega
w11-E 9/1 14
Eki Waaba Nookimanya?
Niki ekirikubaasa kuba kyareetaire Yehova kucwamu kuha Abaisraeli endahi obu baabaire bari omu ihamba?
Obu Abaisraeli baabaire nibaruga Misri, Ruhanga akabaha enyama y’endahi nyingi emirundi ebiri.—Okuruga 16:13; Okubara 11:31.
Endahi n’obunyonyi bukye, burikwingana nka inci 7 oburaingwa kandi burikuremeera guraamu 100. Nizizaarira omuri burengyerwa izooba bwa Asia na Europe. Ahabw’okugira ngu nizigyenda munonga, omu bwire bw’obufuki niziba ziri omu North Africa na Arabia. Omu bwire bwazo bw’okugyenda, enyingi niziza burugwa-izooba bw’enyanja Mediterranean kandi zigaruka ziza Sinai omu bicweka ebirimu amaizi.
Kurugiirira aha kitabo ekirikwetwa The New Westminster Dictionary of the Bible, endahi “niziguruka munonga kandi gye, na munonga haaba hariho omuyaga; kwonka omuyaga gwahinduka nari zikaruha ahabw’okuguruka orugyendo ruraingwa niziteekama ahansi ziruhire munonga.” Zitakagumiizemu orugyendo rwazo, nizibanza zihuumuramu ekiro kimwe nari bibiri, n’ahabw’ekyo abarikuzihiga nibabaasa kuzikwata. Aha kutandika kw’ekyasha kya 20, Misri ekaba neeguza omu bicweka ebindi endahi ezirikwingana obukaikuru bushatu nk’eby’okurya buri mwaka.
Emirundi ebiri obu Abaisraeli baarya endahi bukaba buri omu bunaku bw’okurabya. N’obu endahi zaabaire ziguruka niziraba omu kicweka kya Sinai omu bunaku obwo, Yehova niwe yaareetsire omuyaga gukahuha endahi zikagwa haihi n’orusiisira rw’Abaisraeli.—Okubara 11:31.
w06-E 1/15 31
Ebibuuzo Kuruga omu Bashomi
Bwanyima y’obwire bukye Yehova aherize kucungura Abaisraeli kuruga Misri, bakatandika kwetomboita ahabw’eby’okurya. N’ahabw’ekyo, Yehova akabaha emaanu. (Okuruga 12:17, 18; 16:1-5) Obwo Musa akagambira Arooni ati: “Twara orwabya, orutemu homeri y’emaanu, orubiikye omu maisho ga Mukama, emaanu egyo ebiikwe ahabwa baijukuru baanyu ab’obusingye oburiija.” Baibuli neegira eti: “Atyo Arooni yaagibiika omu maisho g’Ebirikuhamya, ngu egumeho, nk’oku Mukama yaaragiire Musa.” (Okuruga 16:33, 34) N’obu Arooni yaataire emaanu omu rwabya, akaba aine kutegyereza kuhitsya obu Musa yaaherize kukora eshanduukye akatamu ebishate by’amabaare reero Arooni akabona kugitamu.
AGUSTO 17-23
EBY’OMUHENDO EBIRI OMU KIGAMBO KYA RUHANGA | OKURUGA 17-18
“Abashaija Abacureezi Nibatendeka Abandi Kandi Babarekurira Obujunaanizibwa”
w13-E 2/1 6
Musa—Omushaija Owaabaire Aine Rukundo
Musa akooreka ngu naakunda Abaisraeli bagyenzi be. Bakeetegyereza ngu Yehova akaba naakoresa Musa kwebembera abaheereza be, n’ahabw’ekyo bakaba bamushaba obuhwezi ku baabaire baaba baine oburemeezi. Baibuli neegira eti: “Abantu baayemerera beehinguririize Musa okwiha omu kasheeshe okuhitsya omu mwabazyo.” (Okuruga 18:13-16) Teekateeka aha ku kyabaire nikirutsya, Musa kuhurikiza Abaisraeli izooba ryoona barikumugambira oburemeezi bwabo! Kwonka, Musa akashemererwa kubahwera ahabw’okuba akaba naabakunda.
w03-E 11/1 6 kacw. 1
Obwesigye ni Kikuru Kubaasa Kutunga Okushemererwa
Aba bakaba bari abashaija abaayorekire ngu baine emitwarize nk’eya Ruhanga batakatungire obujunaanizibwa. Bakaba baayorekire ngu nibatiina Ruhanga; kandi batarikwenda kumugwisa kubi. Kikaba nikireebwa butunu ngu abashaija aba bakaba nibateeraho kugyendera aha mitindo ya Ruhanga. Bakaba nibanga enguzi, ekyabaire nikyoreka ngu bakaba baine emitindo eyaabaire neeza kubabaasisa kutakoresa kubi obushoboorozi bwabo. Bakaba bataine kukoresa kubi obushoboorozi bwabo kubaasa kwetungira ebyabo nari kutungisa abanyabuzaare nari banywani baabo.
w02-E 5/15 25 kacw. 5
Abeesigwa Nibatwaza Gye
Musa nawe akaba ari omucureezi. Obu yaabaire aruhire munonga ahabw’okuhwera bagyenzi be omu buremeezi bwabo, ishezaara, Yesero, akamuha obuhabuzi obu: Bagana obujunaanizibwa obumwe n’abashaija abarikuhikiiriza ebirikwetengyesa. Musa ku yaamanyire ngu naayetenga obuhwezi, akaikiriza obuhabuzi. (Okuruga 18:17-26; Okubara 12:3) Omuntu omucureezi tarikweziringa kurekurira abandi obujunaanizibwa, nari kutiina ngu naaza kwihwaho obushoboorozi yaarekurira abandi abarikubaasa. (Okubara 11:16, 17, 26-29) Kureka naaba aine ekihika ky’okuhwera abandi kutunguuka omu by’omwoyo. (1 Timoseo 4:15) Naitwe tushemereire kuba nikyo twakora.
Okwongyera Kucondooza aha Bi Turikwega
“Emikono Yaawe Etatentebuka”
Arooni na Huuri bakakwatirira emikono ya Musa butunu omu bwire bw’okurwana. Naitwe nitubaasa kusherura emiringo ei turaashagike abandi kandi tukabahwera. Nibo baahi? Abo abaine emyaka ya bukuru, amagara mabi, abarikuhiiganisibwa ab’omu maka gaabo, abaine eihamba, nari abafeereirwe abakundwa. Nitubaasa n’okugumya abato abarikugyemeserezibwa kukora ebitahikire, nari kusherura obusinguzi omu nsi egi. (1 Tes. 3:1-3; 5:11, 14) Teeraho kworeka ngu noofayo aha bandi mwaba muri aha Kyombeko ky’Obukama, omu kubuurira, mwaba nimurya hamwe, nari mwaba nimugaaniira aha simu.
it-1-E 406
Ebitabo ebi Musa Yaahandiikire
Ebitabo ebi Musa yaahandikire, akabihandiika arikuhwerwa omwoyo gwa Ruhanga kandi nitubaasa kubikoresa omu kuramya okw’amazima, tibirikubanganisibwaho ahabw’ebihandiikirwemu. Musa tiwe yaacwiremu kuba omwebembezi w’Abaisraeli, ahakuba akabanza kwanga. (Kur 3:10, 11; 4:10-14) Kureka, Ruhanga akatoorana Musa kandi yaamuhwera kukora eby’okutangaaza by’amaani kugira ngu n’abafumu ba Faraho bakabaasa kwikiriza ngu Musa akooherezibwa Ruhanga. (Kur 4:1-9; 8:16-19) N’ahabw’ekyo, tikirabaireho ahabw’okukunda kwa Musa kuba omugambi murungi kandi omuhandiiki. Musa akabaasa kukora ebyo ahabw’okworobera Ekiragiro kya Ruhanga n’ahabw’okuhwerwa omwoyo gurikwera.—Kur 17:14.
AGUSTO 24-30
EBY’OMUHENDO EBIRI OMU KIGAMBO KYA RUHANGA | OKURUGA 19-20
“Oku Ebiragiro Ikumi Birikukukwataho”
w89-E 11/15 6 kacw. 1
Ebiragiro Ikumi Nibimanyisa ki Ahariiwe?
Ebiragiro bina eby’okubanza nibyoreka obujunaanizibwa obu twine ahari Yehova. (eky’Okubanza) Ni Ruhanga orikwenda ngu tube niwe twaramya wenka. (Matayo 4:10) (ekya Kabiri) Tihariho muheereza we oshemereire kuramya ebishushani. (1 Yohaana 5:21) (ekya Kashatu) Twine kukoresa eiziina rya Ruhanga omu muringo ogushemeire, tutarikurikoresa omu muringo mubi. (Yohaana 17:26; Abarooma 10:13) (ekya Kana) Twine kwebembeza ebirikwera. Eki nikituhwera kuhuumura, nari ‘kugira sabato,’ omu mwanya gw’okuta omutima aha kusherura ebyaitu.—Abaheburaayo 4:9, 10.
w89-E 11/15 6 kacw. 2-3
Ebiragiro Ikumi Nibimanyisa ki Ahariiwe?
(Ekya Kataano) Abaana okworobera abazaire baabo, nikihwera eka yoona kugira obumwe, ekirikureetera Yehova yaabaha emigisha. Kandi buzima ‘ekiragiro ky’okubanza eki ekirimu okuraganisibwa’ nikituhwera kugira amatsiko. Nikituhwera ‘kuba gye,’ kandi ‘tukahangaara omu nsi’ obwire buraingwa. (Abaefeso 6:1-3) Obu turi omu “biro by’aha mperu” eby’obusingye obu, okworoba nk’oku nikwija kuhwera abaana kutunga omugisha gw’okugumaho ebiro byona.—2 Timoseo 3:1; Yohaana 11:26.
Okukunda bataahi baitu nikituhwera kutabatwariza kubi turikukora ebintu bibi nk’okwita (Ekiragiro kya Mukaaga) obushambani (ekya Mushanju) okwiba (ekya Munaana) n’okugamba ebishuba (ekya Mwenda). (1 Yohaana 3:10-12; Abaheburaayo 13:4; Abaefeso 4:28; Matayo 5:37; Enfumu 6:16-19) Kandi shi ebigyendererwa byaitu? Ekiragiro ekirikugamba aha kwetenga (ekya Ikumi) nikitwijutsya ngu Yehova naayenda ngu ebigyendererwa byaitu bibe bihikire.—Enfumu 21:2.
Okwongyera Kucondooza aha Bi Turikwega
it-2-E 687 kacw. 1-2
Omunyamurwa
Obunyamurwa bw’Ekikristaayo. Yehova akaraganisa Abaisraeli ngu baarinda endagaano ei baabaire baine nawe, bakaba nibaija kuba “obukama bw’abanyamurwa n’eihanga eririkwera.” (Kur 19:6) Kwonka obunyamurwa bw’orunyiriri rwa Arooni bukaba nibwija kugumizamu kuhitsya omunyamurwa orikukirayo ou bwabaire nibujwekyera yaija. (Heb 8:4, 5) Bukaba nibwija kugumaho kuhitsya aha kuhendera kw’endagaano y’ebiragiro n’aha kutandika kw’endagaano ensya. (Heb 7:11-14; 8:6, 7, 13) Yehova akabanza kuraganisa Abaisraeli bonka kuba abanyamurwa omu ntebeekanisa y’Obukama, kwonka bwanyima omugisha ogu akaguha n’Abanyamahanga.—Byak 10:34, 35; 15:14; Rom 10:21.
Abayudaaya bakye nibo baikiriize Kristo, n’ahabw’ekyo eihanga ryabo tirirabaasize kurugamu abaabaire nibaija kuba obukama bw’abanyamurwa abaabuzima n’eihanga eririkwera. (Rom 11:7, 20) Ahabw’okugira ngu Abaisraeli bakanga kuguma bari abeesigwa, Ruhanga akaba yaabarabwire ngu eki kikaba nikiza kubaho kurabira omu nabi Hosea ati: “Naiwe ahabw’okwanga okumanya naanye niinyanga ku oba omunyamurwa wangye; kandi nk’oku oyebirwe ebiragiro bya Ruhanga waawe, naanye ndyayebwa abaana baawe.” (Hos 4:6) Okuhikaana n’eki, Yesu akagambira abeebembezi b’Abayudaaya ati: “Obukama bwa Ruhanga buryabaakwa, buheebwe eihanga eririkwana ebyana byabwo.” (Mat 21:43) Kwonka nabwo, ahabw’okugira ngu Yesu Kristo akaba naayorobera ebiragiro obu yaabaire ari omu nsi, akooreka ngu obunyamurwa bwa Arooni bukaba nibukikora, kandi akaragiira n’abu yaatambiire ebibembe kuza ow’omunyamurwa bakahayo ekitambo ekishemereire.—Mat 8:4; Mak 1:44; Luk 17:14.
w04-E 3/15 27 kacw. 1
Ebi Turikwega omu Kitabo ky’Okuruga
20:5—Yehova ‘naatura abaana eby’okushiisha bya baishebo’ mu muringo ki? Bwanyima y’okuhitsya emyaka y’obujunaanizibwa, buri muntu naacwerwa orubanja kurugiirira aha bi arikukora n’emiteekateekyere ye. Kwonka obu eihanga ry’Abaisraeli ryatandika kuramya ebishushani, ebyarugiremu bikakwata n’ahari abo abaazairwe bwanyima. N’abo abaagumire bari abeesigwa bakakwatwaho ebibi ebyarugire omu kuramya ebishushani kyabareetera kugumirwa kurinda obwesigwa bwabo.
AGUSTO 31–SEPUTEMBA 6
EBY’OMUHENDO EBIRI OMU KIGAMBO KYA RUHANGA | OKURUGA 21-22
“Twara Amagara Nk’oku Yehova Arikugatwara”
it-1-E 271
Okuteera
Omuheburaayo akaba naikirizibwa kuteera omuhuuku we nari omuzaana we yaayanga kumworobera. Kwonka omuhuuku ku yaabaire afa ahabw’okumuteera, mukama we akaba afubirwa. Omuhuuku ku yaabaire amara ekiro kimwe nari bibiri atakafiire, kikaba kyoreka butunu ngu mukama we akaba ataine kigyendererwa ky’okumwita. Akaba aine obugabe bw’okufubira omuhuuku we nk’oku arikwenda ahakuba akaba aba amuguzire esente ze. Omuntu akaba atakira kwenda kucwekyereza ekintu kye eky’omuhendo, reero akafeerwa esente ze. Kandi omuhuuku ku yaabaire afa bwanyima y’ekiro kimwe nari bibiri, kikaba kiguma kuhamya yaaba yaafa ahabw’okuteerwa nari ahabw’enshonga ezindi. N’ahabw’ekyo omuhuuku ku yaabaire aguma ahuriire kumara ekiro kimwe nari bibiri, mukama we akaba atafubirwa.—Kur 21:20, 21.
Nootooreza Ruhanga oha Amagara Ekitiinisa?
Buri magara g’omuntu n’ag’omuhendo ahari Yehova. Nangwa n’omwana otakazairwe naaba eri ow’omuhendo ahariwe. Omu Biragiro bya Musa, omuntu ku yaabaire ahutaaza omukazi oine enda atakigyendereire, reero omukazi ogwo akafa nari omwana akarugamu akafa, Yehova akaba areeba omuntu ogwo nk’omwitsi. Eki kikaba nikimanyisa ngu n’obu eraabe yaaba eri butandu, ahabw’okugira ngu omuntu yaafa haine kubaho enshumbuushano y’amagara. (Shoma Okuruga 21:22, 23.) Omu maisho ga Ruhanga, omwana otakazairwe naingana n’omuntu mukuru ohuriire. Bwanyima y’okumanya eki, nooteekateeka ngu Ruhanga naatwara ata okwihamu enda? Nooteekateeka ngu naayehurira ata yaareeba abaana nyamwingi abatakazairwe nibaitwa buri mwaka?
w10-E 4/15 29 kacw. 4
Yehova Naayenda ngu Ogire Amagara Marungi
Ebiragiro bikaba nibikwata n’ahari butandu ezaabaire zireetwaho amatungo. Enimi ku yaabaire ecumita omuntu ekamwita, mukama waayo akaba agiita kubaasa kurinda abandi. Akaba atarya nyama yaayo nari kugiguza abandi ngu bagirye, buzima akaba afeerwa munonga. Ku ogire ngu bwanyima y’okuhutaaza omuntu, mukama waayo tiyagirinda. Hakaba habaho ki? Enimi egi ku yaabaire eita omuntu bwanyima, ekaba eitwa hamwe na mukama waayo. Ekiragiro ekyo kikaba nikikwata aha muntu owaabaire atarikufayo aha matungo ge.—Kur. 21:28, 29.
Okwongyera Kucondooza aha Bi Turikwega
w10-E 1/15 4 kacw. 4-5
Ahabw’enki Oshemereire Kwehayo Ahari Yehova?
Okwehayo n’enshonga nkuru munonga. Nikukira aha kumariirira. Kwonka shi twayehayo nitugasirwa tuta? Nk’eky’okureeberaho ka tureebe ebirungi ebirikuruga omu kumariirira kuhamira aha muntu omu mukago. Ka tugire ngu oine obunywani. Kubaasa kugasirwa omu bunywani, n’oba oine kwikiriza obujunaanizibwa oburikutwarirwa omu kuba omunywani. Ekyo nikitwariramu okumariirira—n’oba oine obujunaanizibwa bw’okufayo ahari munywani waawe. Bumwe aha bunywani bw’omutaano oburikugambwaho omu Baibuli n’obwa Daudi na Yonasaani. Bakakora hamwe n’endagaano y’omukago. (Shoma 1 Samueli 17:57; 18:1, 3.) N’obu omukago gw’omuringo nk’ogwo gutarikukira kubaho, emikago mingi neeguma ehami abarikuba bagirimu baaba bamaririire, nari baaba nibafayo ahari bagyenzi baabo.—Enf. 17:17; 18:24.
Ebiragiro ebi Ruhanga yaahaire Abaisraeli nibigamba aha muringo ogundi obu baagasiirwe ahabw’okumariirira. Omuhuuku ku yaabaire aba naayenda kuguma omu burinzi bwa mukama we ebiro byona, akaba akora nawe endagaano y’ebiro n’ebiro. Ekiragiro nikigira kiti: “Kwonka ogwo muhuuku ku aryegambira butunu ati: Ninkunda mukama wangye n’omukazi wangye kandi n’abaana bangye; tindikwenda kugyenda kuruga omu buhuuku; mukama we aryamutwara omu maisho ga Ruhanga, amwemereze aha rwigi nari aha kiti ky’omuryango, amufumure okutu n’empindu; omuhuuku ogwo agume naamukorera ebiro byona.”—Kur. 21:5, 6.
it-1-E 1143
Eihembe
Ebigambo ebiri omu Okuruga 21:14 nibibaasa kumanyisa ngu n’omunyamurwa akaba naabaasa kwitwa ahabw’okwita, nari ngu okukwata amahembe g’eitambiro kikaba kitarikubaasa kurinda owaita akigyendereire.—Gyeragyeranisa 1Bag 2:28-34.