Ahabw’Enki Hariho Okubonabona Kwingi?
Kubaasa kwetegyereza ahabw’enki hariho okubonabona kwingi n’enshonga ahabw’enki abantu baremirwe kukumaraho, twine kumanya ebirikukureeta. N’obu ebirikureeta okubonabona biraabe nibitaana kandi bigumire kwetegyereza, twine omugisha ahabw’okugira ngu Baibuli neetuhwera kubimanya. Omu kicweka eki, nituza kureeba enshonga itaano nkuru ahabw’enki hariho okubonabona kwingi. Nitukushaba kushwijuma gye ebiri omu Baibuli oreebe oku erikubaasa kutuhwera kumanya ahabw’enki hariho okubonabona.—2 Timoseo 3:16.
EBIRIKUREETWAHO OBUTEGYEKI BUBI
Baibuli neegira ngu “ababi ku bategyeka, abantu batsinda, baborooga.”—Enfumu 29:2.
Ebyafaayo nibyoreka ngu hatwire hariho baangamba-nyenka abarikutegyeka kubi, ekirikureetera abu barikutegyeka kubonabona munonga. Ekyo tikirikumanyisa ngu abategyeki boona ni babi. Abamwe nibabaasa kuba baine ebigyendererwa birungi. Kwonka okuteeraho kwabo kutegyeka gye, nikuremesibwa omururu n’okuhayahayanira obwebembezi. Nari ahabw’okweyendeza, nibabaasa kukoresa kubi obutegyeki bwabo kubonabonesa abantu. Henry kissinger owaabaireho omuhandiiki w’eishaza rimwe omuri U.S. akagira ati: “Ebyafaayo n’ekitebyo ky’okuteeraho kw’abantu abaaremirwe n’ebigyendererwa ebitarahikiriziibwe.
Kandi Baibuli neegira eti: “Omuntu weena ogyenda tabaasa kwehabura mu rugyendo rwe ahu yaahika hoona.” (Yeremia 10:23) Abantu abatahikiriire tibarikubaasa kwetegyereza ebiraabeho kandi tibarikubaasa kuhikiiriza gye ebigyendererwa byabo. Abantu ku baraabe batarikubaasa kwehabura, nibabaasa bata kuhabura eihanga ryona? Nooreeba enshonga ahabw’enki abategyeki batarikubaasa kumaraho okubonabona? Emirundi mingi, obutegyeki bubi nibwo burikureetaho okubonabona!
EBIRIKUREETWAHO AMADIINI G’EBISHUBA
Yesu akagira ati: “Ku muriguma nimukundana, nibwo abantu boona baribamanya ku muri abeegi bangye.”—Yohaana 13:35.
Abeebembezi b’amadiini goona nibabuurira ahari rukundo n’obumwe. Amazima gari ngu, baremirwe kuhwera abakuratsi baabo kugira rukundo eyaabuzima, kubabaasisa kutashoroora mu bantu. Omu mwanya gw’okuhwera abantu kugira rukundo, amadiini nigabareetera kwebaganisamu, kushoroora omu bantu, n’okugirirana rwango. Arikuhendera ekitabo kye ekirikwetwa Christianity and the World Religions, Hans Küng akahandiika ati: Emivuyo y’eby’obutegyeki erikukira kurengyesereza kandi ekabamu n’obushaarizi, n’egyo erikuba eyejumbirwemu abanyadiini.”
Kandi abeebembezi b’amadiini abaingi nibashagika butunu okuteerana kw’abatakahikize emyaka, obushambani, n’obutiingwa. Eki kirugiremu okujanjaara kw’endwara, enda z’endaaro, okwihamu enda, n’okushenyuka kw’obushwere n’amaka, ekirikureetaho obusaasi bwingi.
OKUTAHIKIIRIRA KW’ABANTU N’EBYETENGO BIBI
“Omuntu weena ayohibwa yaabeihwabeihwa okwetenga kwe, kwamwosyosya. Bwanyima okwetenga okwo ku kuheza kutwara enda, kuzaara ekibi.”—Yakobo 1:14, 15.
Twena ahabw’okugira ngu tukahungura obutahikiirira, nitukora enshobe kandi twine kurwanisa ebyetengo bibi ebirikutureetera ‘kukora ebi emibiri yaitu eyetenga.’ (Abaefeso 2:3) Nikiba kigumire kwetantara ebyetengo bibi na munonga twatunga omugisha gw’okubihikiiriza. Ebyetengo bibi byatureetera kukora ekibi, ebirikurugamu nibiba bibi munonga.
Omuhandiiki P. D. Mehta akahandiika ati: “Okubonabona okwingi nikureetwa okurigira okubi, okurengyesereza omu by’okweshemeza, okweyendeza n’okugira ebigyendererwa bibi.” Emize mibi ey’emiringo yoona nk’obusinzi, okukoresa emibazi y’ekitabura bwongo, okuteera zaara, obushambani n’ebindi nk’ebyo bisiisire abantu abarikuheebwa ekitiinisa kandi kireetaire amaka gaabo, banywani baabo n’abandi kubonabona. Ahabw’okutahikiirira kw’abantu, twine kwikirizana n’ebigambo ebiri omu Baibuli ebi: “Nitumanya ngu ebihangirwe byona bituura nibitsinda, nibisaasira hamwe n’okuhitsya hati.”—Abarooma 8:22.
OBUSHOBOOROZI BWA BAADAIMONI
Baibuli neeyoreka ngu Sitaane niwe “ruhanga w’ensi egi” kandi ayegaitsirweho ebihangirwe by’omwoyo ebibi ebirikwetwa baadaimoni.—2 Abakorinso 4:4; Okushuuruurwa 12:9.
Nka Sitaane, baadaimoni nibeejumbira kimwe omu kutegyeka n’okuhabisa abantu. Entumwa Paulo akeetegyereza eki obu yaagira ati: “Titurikufukaana n’abaine omubiri n’eshagama, kureka niturwana n’ebirikutegyeka n’ebiine obushoboorozi n’ebirikutwara ensi egi omu busingye obu obw’omwirima, kandi niturwana n’amahe g’emyoyo emibi ey’omu myanya y’omu iguru.”—Abaefeso 6:12.
N’obu baadaimoni baraabe nibakunda okubonabonesa abantu, ekyo tikyo kigyendererwa kyabo ekikuru. Nibenda kwiha abantu ahari Yehova Ruhanga, Ow’Obushoboorozi Bwona. (Zaaburi 83:18) Ebikorwa nk’eby’obufumu, obucecezi, okuragura ebiraabeho, oburogo, ni bimwe aha bi baadaimoni barikukoresa kuhabisa abantu n’okubategyeka. Niyo nshonga ahabw’enki Yehova naaturabura aha kabi ako, kandi akaha oburinzi abo boona abarikuhakanisa Sitaane.—Yakobo 4:7.
TURI “OMU BIRO BY’AHA MPERU”
Emyaka nk’enkumi ibiri ehingwire, Baibuli ekagira eti: “Omanye eki ngu, omu biro by’aha mperu, haryabaho ebiro by’akabi kaingi.”
Erikworeka enshonga ahabw’enki ebiro ebi biri eby’akabi kaingi neegumizamu egira eti: “Ahakuba abantu baryaba abarikwekunda, abakunzi b’empiiha, abanyamaryo, abarikwemanya, . . . abatarikukunda baabo, abatarikwenda kugarukana n’abandi, abarikubeihererana, abatarikweyangisa, enshaarizi, abarikwanga ebirungi, abarikureebyana, engangaazi, abarikwekuza, abarikukunda kweshemeza bonka okukira Ruhanga.” Buzima enshonga nkuru ahabw’enki turikubonabona n’okugira ngu turi “omu biro by’aha mperu.”—2 Timoseo 3:1-4.
Kurugiirira aha bi twaheza kushwijuma, nikireebwa butunu ngu abantu tibarikubaasa kuhezaho okubonabona, n’obu baakuba baine ebigyendererwa birungi. Mbwenu shi nitubaasa kwiha nkahi obuhwezi? Twine kubushaba Omuhangi orikuraganisa “kuhwerekyereza emirimo ya Sitaane” n’abarikumushagika. (1 Yohaana 3:8) Omu kicweka ekirikukurataho, nituza kushwijuma eki Ruhanga arikwija kukora kuhezaho byona ebirikureeta okubonabona.