Ebibuuzo Aha By’omu Baibuli Nibigarukwamu
Abaafiire baryagaruka kuba abahuriire?
Okufa nikushushana n’okugwejegyera ahakuba abafiire nibaba bataine ki barikumanya kandi tihaine eki barikubaasa kukora. Kwonka owaahangire amagara, naabaasa kugaruraho abaafiire arikubazoora. Kuhamya ekyo, Ruhanga akaha Yesu amaani kuzoora abantu baingi abaabaire bafiire.—Shoma Omubuurizi 9:5; Yohaana 11:11, 43, 44.
Ni mu muringo ki ogu okufa kuri nk’okugwejegyera?
Ruhanga naaraganisa ngu abaafiire boona abu arikwijuka, naija kubazoora batuure omu nsi ensya ey’okuhikiirira. Abaafiire nibaija kuguma bafiire kuhitsya obu Ruhanga araabazoore. Ruhanga ow’Obushoboorozi Bwona aine ekihika ky’okuzoora abafu.—Shoma Yobu 14:14, 15.
Okuzooka nikwija kubaho kuta?
Ruhanga ku araazoore abantu, nibaija kumanyana, kumanya banywani baabo n’ab’omu maka gaabo. N’obu omubiri gw’omuntu guraabe nigujunda, Ruhanga naija kuzoora omuntu ogwo n’omubiri musya.—Shoma 1 Abakorinso 15:35, 38.
Abantu bakye nibazoorwa kutunga amagara agatahwaho omu iguru. (Okushuuruurwa 20:6) Baingi abaraazoorwe nibaija kutunga amagara agatahwaho omu paradiso omu nsi. Aba nibaija kuheebwa entandikiriro nungi, baine amatsiko g’okugumaho ebiro byona.—Shoma Zaaburi 37:29; Ebyakozirwe 24:15.