Korera Aha Kushaba Kwa Yesu

1, 2. Yesu akakora ki bwanyima y’omukoro gw’Okuhingurwaho omu gwa 33 ari n’abeegi be?

OMU mwabazyo gwa Nisani 14 omu gwa 33, Yesu n’abeegi be bakaba baaheza kurya Okuhingurwaho okwabaire kubaijutsya oku Yehova yaacungwire baishenkurubo kuruga Misri omu buhuuku. Kwonka abeegi be aba abeesigwa bakaba nibaija kutunga “okucungurwa okutahwaho.” Yesu akaba naija kwitwa abazigu be aha izooba eryo erya Nisani 14 bwasheesha. Kwonka okufa kwe kukaarugiremu ebirungi. Kukaabaasise abantu boona kucungurwa kuruga omu kibi n’okufa.​—Heb. 9:12-14.

² Yesu akatandikaho omukoro musya ogwagiire omu mwanya gw’Okuhingurwaho ogurikubaho buri mwaka, kugira ngu tugume nitwijuka ekiconco eki Ruhanga yaatuhaire. Eki akakikora arikubega omugaati ogutarimu kitumbisa, yaaguha abeegi be 11 abeesigwa naagira ati: “Ogu n’omubiri gwangye, ogwaheebwayo ahabwanyu; mugume mukore mutyo okuunyijukiraho. Ku baaherize kurya, yaakwata atyo n’ekikopo, yaagira ati: Ekikopo eki niyo ndagaano ensya ehamibwa eshagama yangye, esheesheka ahabwanyu.”​—Luk. 22:19, 20.

3. (a) Ni mpindahinduka ki eyabaire neija kubaho bwanyima y’okufa kwa Yesu? (b) Ni bibuuzo ki ebi twine kuteekateekaho twaba nitushwijuma okushaba kwa Yesu okuri omu Yohaana Eshuura 17?

³ Endagaano y’ebiragiro ei Ruhanga yaakozire n’Abaisraeli ekaba eri haihi kuhendera. Omu mwanya gwayo hakaba nihaija kuzamu endagaano nsya ei Yehova yaakukozire n’abakuratsi ba Yesu abashukirweho amajuta. Yesu akaba atarikwenda bakuratsi be abo kuba nk’eihanga rya Israeli. Abaisraeli abamwe bakaba batarikuramya Yehova, kandi eki kikaba kijumisa eiziina rye eririkwera. (Yoh. 7:45-49; Byak. 23:6-9) Ekirikutaana n’ekyo, Yesu akaba naayenda ngu abakuratsi be bakwatanise omu kuramya kwabo nibakorera hamwe kuhimbisa eiziina rya Ruhanga. Mbwenu shi Yesu akakora ki? Omu kushaba kwe oku buri muntu arikwenda kushomaho, akashaba Ishe kumuha obuhwezi. (Yoh. 17:1-26; reeba ekishushani aha kutandika.) Twine kwebuuza ebibuuzo ebi: Mbwenu shi Ruhanga akagarukamu okushaba kwa Yesu? Kandi shi niinkora ebirikuhikaana nakwo?

EBI YESU YAABAIRE NAAYEBEMBEZA

4, 5. (a) Ni twega ki aha ku Yesu yaatandikiremu okushaba kwe? (b) Obu Yesu yaashaba aha byetengo bye, Yehova akamugarukamu ata?

⁴ Aha izooba eryo, Yesu akeegyesa abeegi be kuhitsya omu kiro. Ku yaaherize ebyo yainamura amaisho, yaareeba ahaiguru, yaagira ati: “Taata, obunaku bwahika; himbisa Omwana waawe, n’Omwana abone kukuhimbisa, nk’oku waamuhaire obushoboorozi aha bantu boona, ngu abone kuha abu waamuhaire boona amagara agatahwaho. . . . Nkuhaisize ekitiinisa omu nsi, ahabw’okuba omurimo ogu wampaire kukora nguhikiriize. Mbwenu,Taata, mpimbisa omu maisho gaawe n’ekitiinisa ekyo eki naabaire nyine naiwe, ensi etakahangirwe.”​—Yoh. 17:1-5.

⁵ Yetegyereze ebi Yesu yaayebembeize obu yaabaire naatandika okushaba kwe. Eki yaabaire naataho omutima n’okuhimbisa Ishe ow’omu iguru, kandi eki nikihikaana n’okushaba kwe oku: “Tataitwe, eiziina ryawe ryezibwe.” (Luk. 11:2) Yesu akakuratsaho okushaba aha bikwatiraine n’ebyetengo by’abeegi be ngu Yehova abaase kubaha “amagara agatahwaho.” Bwanyima y’ekyo, Yesu akashaba aha bikwatiraine n’ebyetengo bye ati: “Taata, mpimbisa omu maisho gaawe nekitiinisa ekyo eki naabaire nyine naiwe, ensi etakahangirwe.” Yehova akaha omwana we ‘eiziina eryahitsire’ aga baamaraika boona.​—Heb. 1:4.

‘OKUMANYA RUHANGA OMWE OW’AMAZIMA’

6. Kubaasa kutunga amagara agatahwaho, entumwa bakaba baine kukora ki, kandi nitumanya tuta ngu bakasingura?

⁶ Omu kushaba kwe, Yesu akagamba n’aha ki twine kukora kubaasa kutunga amagara agatahwaho. (Shoma Yohaana 17:3.) Akagira ngu twine kugumizamu nitutunga “okumanya” okurikukwata ahari Ruhanga na Kristo. Omuringo gumwe ogu turikubaasa kukora eki n’okukoresa amaisho n’amatu gaitu kwega ebirikukiraho ebirikukwata ahari Yehova n’omwana we. Omuringo ogundi n’okukorera aha bi turikwega ekirikutureetera okushemererwa. Entumwa n’abo bakaba baahikiriize ebintu ebi bibiri nk’oku Yesu yaagizire ati: “Ahakuba ebigambo ebi wampaire mbibahaire, baabiikiriza.” (Yoh. 17:8) Kwonka kubaasa kutunga amagara agatahwaho, bakaba baine kuteekateeka aha Kigambo kya Ruhanga kandi bakagyendera aha bikirimu. Mbwenu shi entumwa bakagumizamu nibakikora kuhitsya aha muheru? Buzima bakakikora. Eki nitukimanya ahabw’okuba amaziina gaabo gahandiikirwe aha misingi ikumi n’ebiri eya Yerusaalemu orusya orw’omu iguru.​—Kush. 21:14.

7. “Okumanya” Ruhanga nikimanyisa ki, kandi ahabw’enki eki ni kikuru?

⁷ Kurugiirira aha Orugriika, ekigambo ekirikuvunuurwa “okumanya” nikibaasa kumanyisa okuguma nooyeyongyera kwega ebirikukwata ahari Ruhanga. N’ahabw’ekyo, “okumanya” Ruhanga nikikira aha kumanya ebigyendererwa bye n’emitwarize ye. Kwonka nikitwariramu okugira omukago murungi nawe hamwe n’ab’eishe-emwe. Baibuli neegira eti: “Otagira rukundo tamanya Ruhanga; ahakuba Ruhanga aba rukundo.” (1 Yoh. 4:8) N’ahabw’ekyo, okumanya Ruhanga nikitwariramu okumworobera. (Shoma 1 Yohaana 2:3-5.) N’omugisha kuba ori omwe aha barikumanya Yehova. Kwonka nka Yuda Iskaryota, naitwe nitubaasa kufeerwa omukago ogwo. Ka tuteereho kugurinda. Nibwo turaabaase kutunga ekiconco ky’amagara agatahwaho.​—Mat. 24:13.

“OBARINDIRE OMU IZIINA RYAWE”

8, 9. Ekigyendererwa kya Yesu eky’okwija omu nsi kikaba kiri ki, kandi ni mugyenzo ki ogw’ediini ogu yaabaire naayanga?

⁸ Bwanyima y’okushwijuma okushaba kwa Yesu okuri omu Yohaana eshuura 17, tihariho orikubaasa kubanganisa rukundo ei Yesu yaabaire ainiire entumwa n’abakuratsi be abaabaire nibiija kubaho omu biro by’omumaisho. (Yoh. 17:20) Kandi twine kwetegyereza ngu okucungurwa kwaitu tikyo kigyendererwa kya Yesu ekikuru. Ekigyendererwa kye eky’okwija omu nsi kukaba kuri okuhimbisa n’okweza eiziina rya Ishe. Nk’eky’okureeberaho, obu yaabaire naashoboorora ekyamuretsire omu nsi, akashoma omu byahandiikirwe bya Isaaya ati: ‘Omwoyo gwa Yehova gukaba guri ahariinye, ahakuba akanshukaho amajuta kubuurira abooro ebigambo ebirungi.’ Hatariho kubanganisa, Yesu akaatura gye eiziina rya Ruhanga obu yaabaire naashoma ebigambo ebyo.​—Luk. 4:16-21, NW.

⁹ Kurugiirira aha migyenzo y’Abayudaaya aba ira, abeebembezi b’ediini bakaba bazibira abantu kukoresa eiziina rya Ruhanga. Hatariho kubanganisa Yesu akaba naayangira kimwe emigyenzo nk’egyo. Akabagira ati: “Nyizire omu iziina rya Tata timwanyakiira; ondiijo ku ariija omu iziina rye wenka, we muryamwakiira.” (Yoh. 5:43) Ebiro bikye atakafiire, Yesu akagamba ekyabaire kiri kikuru ahariwe arikushaba naagira ati: “Taata, himbisa eiziina ryawe.” (Yoh. 12:28) N’ahabw’ekyo, tiky’okutangaaza kugira ngu Yesu akaba naagamba aha iziina rya Ishe omu kushaba kwe kwona.

10, 11. (a) Yesu akamanyisa ata abantu eiziina rya Ishe? (b) Ahabw’enki abakuratsi ba Yesu nibamanyisa abandi eiziina rya Ruhanga?

¹⁰ Yesu akashaba ati: “Abashaija, abu waampaire omu nsi nkabooreka eiziina ryawe; bakaba bari abaawe, waabampa, kandi barinzire ekigambo kyawe. Mbwenu hati tinkiri mu nsi, kwonka bo bari omu nsi, kandi niinyija ah’ori. Taata orikwera, obarindire omu iziina ryawe eri wampaire, babe bamwe nkaitwe oku turi bamwe.”​—Yoh. 17:6, 11.

¹¹ Okumanyisa abeegi be aha iziina rya Ishe kikaba nikikira aha kuribagambira kwonka. Yesu akabahwera n’okwetegyereza eki eiziina rya Ruhanga ryabaire nirijwekyera nk’okugira emitwarize ye mirungi n’oku arikukoraganamu n’abantu. (Kur. 34:5-7) Yesu hati n’omutegyeki omu iguru, kandi naagumizamu kuhwera abakuratsi be kumanyisa abandi eiziina rya Ishe omu nsi yoona. Aine kigyendererwa ki? Kugira ngu abeegi babaase kurundaanwa emperu y’obusingye obu etakahikire. Kandi obwire obwo ku buraahike, Yehova naija kucungura abaheereza be abeesigwa kandi abantu boona nibiija kumanya eiziina rye erikuru!​—Ezk. 36:23.

“AB’ENSI BABONE KWIKIRIZA”

12. Ni bintu ki bishatu ebi turikwetenga kubaasa kuhikiiriza obuheereza bwaitu?

¹² Obu yaabaire akiri omu nsi, Yesu akateeraho munonga kuhwera abeegi be kusingura obweremwa bwabo. Eki kikaba nikyetengyesa, kubaasa kuheza omurimo ogu Yesu yaabaire atandikire. Akashaba ati:“ Nk’oku waantumire omu nsi, naanye nikwo mbatumire omu nsi.” Kubaasa kukora gye omu murimo ogu, Yesu akabooreka enshonga ishatu. Ey’okubanza, akashaba ngu abeegi be batakaaba ab’ensi. Eya kabiri, akashaba ngu babe abarikwera barikugyendera aha mazima agari omu Kigambo kya Ruhanga. Eya kashatu, Yesu akaguma naashaba ngu abeegi be bagume nibakundana nk’oku we na Ishe baabaire nibakundana. Eki nikyetengyesa okweshwijuma. Buri omwe ahariitwe aine kwebuuza ati: ‘Ninkora ebirikuhikaana n’ebintu bishatu ebi Yesu yaashabire?’ Yesu akaba ari endeebera birungi obu yaagira ati: “Ab’ensi babone kwikiriza ku niiwe wantumire.”​—Shoma Yohaana 17:15-21.

13. Yehova akagarukamu ata okushaba kwa Yesu omu kyasha ky’okubanza?

¹³ Twashoma ekitabo ky’Ebyakozirwe, nitureeba ngu buzima Yehova akagarukamu okushaba kwa Yesu. Ahabw’okugira ngu Abakristaayo aba ira bakaba barimu Abayudaaya n’Abagriika, abagaiga n’abooro abahuuku n’abakama hakaabaireho okwebaganisamu. Kwonka, bakaba nibakwatanisa nk’ebicweka by’omubiri, Yesu ari omutwe gwabo. (Efe. 4:15, 16) Omwoyo gwa Yehova ogurikwera nigwo gwabahwereire kukwatanisa omu nsi ya Sitaane erimu okwebaganisa.​—1 Kor. 3:5-7.

14. Okushaba kwa Yesu nikugarukwamu kuta omu bunaku bwaitu?

¹⁴ Eky’obusaasi, entumwa ku zaafiire okukwatanisa oku tikuragumireho. Kureka hakabaho abantu abaabaire nibeegyesa ebishuba, ekyarugiremu amadiini maingi ag’ebishuba. (Byak. 20:29, 30) Kwonka omuri 1919, Yesu akacungura abashukirweho amajuta kuruga omu madiini g’ebishuba yaabarundaana hamwe kuguma baine obumwe. (Kol. 3:14) Okubuurira kwabo kukwatsire kuta aha bantu boona abari omu nsi? Abantu abarikurenga obukaikuru mushanju ‘ab’entaama ezindi,’ kuruga “omu mahanga goona n’enganda zoona n’abantu boona n’endimi zoona” baretsirwe omu kitsibo kimwe hamwe n’abashukirweho amajuta. (Yoh. 10:16; Kush. 7:9) Eki ka n’eky’okugarukamu kirungi eky’okushaba kwa Yesu, “ab’ensi bamanye ku niiwe wantumire, okabakunda nk’oku wankunzire.”​—Yoh. 17:23.

OKUHENDERA KURUNGI

15. Yesu akashabira ata abakuratsi be abashukirweho amajuta omu muringo gw’omutaano?

¹⁵ Omu mwabazyo gwa Nisani 14, Yesu akaha entumwa ze ekitiinisa arikukora nabo endagano y’okutegyeka hamwe nawe omu Bukama bwe. (Luk. 22:28-30; Yoh. 17:22) Akashabira abakuratsi be abashukirweho amajuta ati: “Taata, niinyenda ngu abu wampaire nabo bagume naanye ahi ndi, babone kureeba ekitiinisa kyangye eki wampaire; ahakuba okankunda, ensi etakahangirwe.” (Yoh. 17:24) Eki nikireetera ab’entaama ezindi kushemererwa omu mwanya gw’okugira ihari, kandi eki kyongyera kworeka ngu Abakristaayo ab’amazima abariho omu nsi obunaku obu, nibakwatanisa.

16, 17. (a) Yesu akooreka kumariirira ki omu kuhendera okushaba kwe? (b) Tushemereire kumariirira kukora ki?

¹⁶ Barikuhigwa abeebembezi baabo b’ediini, abantu baingi omu nsi tibarikwikiriza ngu Yehova aine abantu abarikumuheereza bakwataniise omu obunaku obu. Nikwo kyabaire kiri n’omu bunaku bwa Yesu. N’ahabw’ekyo akahendera okushaba kwe ati: “Taata ohikiriire, ensi terakumanyire; kandi n’aba nibamanya ku niiwe wantumire. Nkabamanyisa eiziina ryawe, kandi ndyarimanyisa, ngu okukunda oku waankunzire, kube omuribo, naanye mbe omuribo.”​—Yoh. 17:25, 26.

¹⁷ Buzima Yesu akamanyisa eiziina rya Ishe. Nk’omutwe gw’ekibiina, naagumizamu kutuhwera kumanyisa eiziina rya Ishe n’ebigyendererwa bye. Ka tugumizemu nitworobera obwebembezi bwe turikworobera ekiragiro kye ekirikukwata aha kubuurira n’okuhindura abantu abeegi. (Mat. 28:19, 20; Byak. 10:42) Kandi ka tuteereho kurinda n’obumwe bwaitu. Ebi byona nibiija kutuhwera kukora ebirikuhikaana n’okushaba kwa Yesu, kuhimbisa eiziina rya Ruhanga n’okutunga okushemererwa okw’ebiro byona.