Yehova Naatuha Ebirungi Kandi Aturinda

1, 2. Nitutaana tuta omu mbeera ezi twakuriiremu n’oku twayegire amazima?

YEHOVA niwe yaatandikireho entebeekanisa y’amaka. (Efe. 3:14, 15) N’obu twakuba nituruga omu ka emwe, nituba twine emitwarize n’embeera ebitarikushushana. Noobaasa kuba otwire n’abazaire baawe kuruga omu buto. Abamwe nibabaasa kuba baafeereirwe abazaire baabo ahabw’endwara, butandu, nari ebihikiirizi. Kandi abandi nibabaasa kuba batarikumanya bazaire baabo.

² N’obu turaabe turi omu ka emwe ey’abaheereza ba Yehova, emiringo ei twayegiremu amazima terikushushana. Noobaasa kuba waakuriire omu mazima, kandi abazaire baawe baakwegyeise emisingye ya Baibuli. (Bir. 6:6, 7) Nari noobaasa kuba ori omwe ahari baingi abaayegire amazima barikubuurirwa abaheereza ba Yehova abandi.​—Rom. 10:13-15; 1 Tim. 2:3, 4.

3. Ni bintu ki ebi turikushushanisa?

³ Oyihireho ebyagambwa aha ruguru twine ebintu bingi ebi turikushushanisa. Nitubonabona ahabw’obugomi bwa Adamu kandi tukahungura okutahikiirira, ekibi n’okufa kuruga ahariwe. (Rom. 5:12) Kwonka, ahabw’okugira ngu nituramya Yehova, nitubaasa kumweta “Tataitwe.” Isaaya 64:8 harikugamba aha baheereza ba Ruhanga aba ira nihagira hati: “Ai MUKAMA, niiwe Tataitwe.” Na Yesu akatandika okushaba kwe arikugira ati: “Tataitwe ow’omu iguru, eiziina ryawe ryezibwe.”​—Mat. 6:9.

4, 5. Ni nshonga ki ezi turaashwijume eziraatuhwere kwongyera kuhamya omukago gwaitu na Tataitwe Yehova?

⁴ Tataitwe ow’omu iguru naaturinda kandi naatureeberera nk’abaheereza be. Kurugiirira aha muhandiiki wa zaaburi, Yehova akagira ati: “Ndyamukiza ahabw’okuba nankunda, ndyamurinda, ahakuba naamanya eiziina ryangye.” (Zab. 91:14) Yehova Ruhanga naaturinda abazigu baitu kugira ngu batatumaraho.

⁵ Kubaasa kwongyera kusiima Tataitwe ow’omu iguru, ka tushwijume enshonga ishatu nkuru ezi: (1) Yehova Tataitwe naatuha ebirungi. (2) Naaturinda. (3) Kandi ni Munywani waitu orikukirayo. Twaba nitushwijuma enshonga ezi, ni kikuru kuteekateeka aha mukago gwaitu na Ruhanga kandi tukamanya oku tushemereire kumuha ekitiinisa nka Tataitwe. Kandi ni kikuru n’okuteekateeka aha migisha ei Yehova arikuha abo abarikumwirira haihi.​—Yak. 4:8.

YEHOVA NAATUHA EBIRIKUKIRAYO OBURUNGI

6. Ni mu muringo ki gumwe ogu Yehova arikworeka ngu naatuha ‘ekiconco kyona ekirungi’?

⁶ Yakobo omwegi wa Yesu akahandiika ati: “Engabirano yoona enungi n’ekiconco kyona ekihikire biruga omu iguru, nibishuuma okuruga ahari Isheboona, Omuhangi w’ebirikwaka.” (Yak. 1:17) Amagara n’ekiconco kuruga ahari Ruhanga. (Zab. 36:9) Twaheereza Yehova, nitwija kutunga emigisha mingi hati n’amagara agatahwaho omu nsi ensya. (Enf. 10:22; 2 Pet. 3:13) Kwonka shi ekyo nikibaasika kita obu turi abatahikiriire ahabw’ekibi eki twahungwire ahari Adamu?

7. Ruhanga atubaasiise ata kugira omukago murungi nawe?

⁷ Yehova buzima niwe arikutuha ebirikukirayo oburungi omu miringo mingi. Nk’eky’okureeberaho, Ruhanga naatucungura ahabw’embabazi ze. Twena nitushiisha kandi twine okutahikiirira oku twahungwire ahari Adamu. (Rom. 3:23) Kwonka, ahabw’okugira ngu Yehova naatukunda, akatuteeraho entebeekanisa ngu tubaase kugira omukago murungi nawe. Entumwa Yohaana akagira: “Omuri eki nimwo okukunda kwa Ruhanga kwayorekyeirwe omuriitwe, obu yaatuma omwana we omwe nyamunegyere, ngu tube abahuriire ahabwe. Omuri eki nimwo okukunda kuri; tiitwe twakunzire Ruhanga, kureka niwe yaatukunzire, akatuma omwana we kuba ekarabo ahabw’ebibi byaitu.”​—1 Yoh. 4:9, 10.

8, 9. Omu bunaku bwa Abrahamu na Isaaka, Yehova akooreka ata ngu niwe arikuha ebirikukirayo oburungi? (Reeba ekishushani aha kutandika.)

⁸ Omu kyasha 19 Yesu atakazairwe, obunabi bukooreka oku Yehova yaabaire naija kuha abantu amagara agatahwaho. Abaheburaayo 11:17-19 nihagira hati: “Ahabw’okwikiriza, Abrahamu ku yaagyeziibwe, yaahayo Isaaka; kandi owaahairwe ebyaraganisiibwe yaikiriza kuhayo omwana we omwe nyamunegyere, owaabaire agambirweho ngu: Omuri Isaaka nimwo baijukuru baawe baryetererwa; ahakuba akateekateeka ngu Ruhanga naabaasa kuzoora abafu; nikyo yaamugaruriirwe nk’owaaruga omu bafu.” Omu muringo nigwo gumwe, Yehova akahayo omwana we Yesu Kristo kutufeera.​—Shoma Yohaana 3:16, 36.

⁹ Buzima Isaaka aine kuba yaashemereirwe kumanya ngu Ruhanga akahayo ekindi kitambo omu mwanya gwe, niyo empaya y’entaama eyaabaire ekwatsirwe ebikamba by’orushaka omu mahembe. (Kut. 22:10-13) Niyo nshonga ahabw’enki omwanya ogwo gwayetsirwe “Yehova-yire,” omu Ruheburaayo ekirikumanyisa ngu Yehova naija kutuha ebirikwetengyesa.​—Kut. 22:14.

OKUGARUKANISA ABANTU NA RUHANGA

10, 11. Ni baahi abarikwebembera “omurimo gw’okugarukanisa abantu na Ruhanga,” kandi ekyo bakikozire bata?

¹⁰ Twateekateeka aha birungi ebi Yehova arikutuha, nitwija kweyongyera kusiima ekitambo kya Yesu nka Paulo obu yaahandiika ati: “Nitumanyira kimwe ngu omwe akafeera boona; n’ahabw’ekyo boona bakafa. Kandi eki yaafeereire ahabwa boona n’eki; akafa ngu abariho barekye kuguma bariho ahabwabo bonka, kureka ahabw’Ogwo owaabafeereire akabazookyera.”​—2 Kor. 5:14, 15.

¹¹ Abakristaayo aba ira bakaikiriza “omurimo gw’okugarukanisa abantu na Ruhanga” ahabwa rukundo ei baabaire bamwiniire n’okusiima omugisha gw’okumuheereza. Omurimo gwabo gw’okubuurira n’okuhindura abantu abeegi gukabaasisa abantu abacureezi kugarukana na Ruhanga kuba banywani be kandi bwanyima bakaba abaana be omu by’omwoyo. Obunaku obu, abashukirweho amajuta nibakora omurimo nigwo gumwe. Eki barikuhikiiriza nk’abajwekyererwa ba Ruhanga na Kristo, nikibaasisa abantu ab’emitima mirungi kwirira haihi Ruhanga kandi bakaba abaheereza be.​—Shoma 2 Abakorinso 5:18-20; Yoh. 6:44; Byak. 13:48.

12, 13. Nitubaasa kworeka tuta ngu nitusiima byona ebi Yehova arikutuha?

¹² Abakristaayo boona abaine amatsiko g’okutuura omu nsi nibahwera abashukirweho amajuta omu murimo gw’okubuurira kworeka ngu nibasiima Yehova ahabw’ebirungi ebi arikubaha. Omu murimo ogu, ekindi eki Yehova atuhaire ni Baibuli. (2 Tim. 3:16, 17) Twakoresa gye Ekigambo kya Ruhanga omu kubuurira, nituhwera abantu kugira omugisha gw’okutunga amagara agatahwaho. Kandi Yehova naatuha n’omwoyo gwe gurikwera kutuhwera omu murimo gw’okubuurira. (Zek. 4:6; Luk. 11:13) Kandi ebirungi ebirikurugamu nitubishomaho omu Yearbook of Jehovah’s Witnesses. Ka n’omugisha kwejumba omu murimo ogu gw’okuhimbisa Yehova Tataitwe kandi orikutuha ebirungi!

¹³ Turikuteekateeka aha bi Yehova arikutuha, ni kirungi kwebuuza tuti: ‘Ninkora kyona eki ndikubaasa omu kubuurira kworeka ngu ninsiima Yehova ahabw’ebi arikutuha? Nimbaasa kukora mpindahinduka ki kubaasa kuba omubuurizi murungi wa makuru marungi?’ Nitubaasa kworeka okusiima kwaitu ahabw’ebi Yehova arikutuha turikwebembeza eby’Obukama. Twakora ekyo, Yehova naija kutuha ebikuru ebirikwetengyesa. (Mat. 6:25-33) Ahabw’okugira ngu Ruhanga naatukunda, buzima nitwenda kukora kyona eki turikubaasa kumushemeza.​—Enf. 27:11.

14. Yehova atwire naahwera ata abaheereza be?

¹⁴ Omuhandiiki wa zaaburi akagira ati: “N’obu ndaabe ndi omworo kandi omukyene, kwonka Mukama anteekateekaho. Niiwe Muhwezi wangye kandi Omujuni wangye.” (Zab. 40:17) Yehova atwire naahwera abaheereza be boona, okukira munonga baaba nibahiiganisibwa abazigu baabo. Ka nitusiima munonga obuhwezi bwa Yehova omu bwire nk’obwo n’eby’omwoyo ebi arikutuha butoosha!

YEHOVA NAATURINDA

15. Ha eky’okureeberaho kworeka oku omuzaire orikukunda omwana we arikufayo kumurinda.

¹⁵ Omuzaire orikukunda abaana be naabaha ebirikwetengyesa kandi abarinda. Naateeraho kubahwera baaba bari omu kabi. Ow’eishe-emwe omwe naijuka ekintu ekyabaireho obu yaabaire akiri muto. We na ishe bakaba nibaruga kubuurira barikugaruka omuka, kwonka omuhanda ogu baarabiremu gukaba niguraba aha mugyera. Omu kasheeshe ako, hakaba hagwire enjura nyingi kandi omugyera gwijwire. Omuringo gwonka ogw’okwambuka omugyera ogwo kukaba kuri okugyenda nooguruka orikuribata aha mabaare mahango. Omwojo ogwo akaba ayebembeire ishe, reero yaaterera yaagwa omu maizi yaatobera emirundi ebiri. Akashemererwa munonga, ishe ku yaamukwatsire aha ibega akamwiha omu maizi akamucungura. Tataitwe ow’omu iguru naaturinda oburemeezi bw’ensi egi embi n’omutegyeki waayo, Sitaane. Buzima Yehova niwe arikuha oburinzi oburikukirayo.​—Mat. 6:13; 1 Yoh. 5:19.

16, 17. Yehova akarinda kandi yaahwera ata Abaisraeli obu baabaire nibarwana na Abaamaleki?

¹⁶ Obu Yehova yaacungura Abaisraeli kuruga omu bukwatwa omuri Misri, n’obu yaabarinda aha nyanja erikutukura omu muringo gw’eky’okutangaaza omuri 1513 Yesu atakazairwe, n’obuhame ngu naarinda abantu be. Bakahika omuri Refidimu bwanyima y’okuraba omu ihamba haihi n’Orushozi Sinai.

¹⁷ Kurugiirira aha bunabi oburi omu Okutandika 3:15, Sitaane ashemereire kuba yaabaire naateeraho munonga kutaahirira Abaisraeli abaabaire nibareebeka nk’abataine burinzi. Ekyo akakikora arikurabira omu Abaamaleki abaabaire bari abazigu b’abaheereza ba Ruhanga. (Kub. 24:20) Reeba ebi Yehova yaahikiriize arikukoresa abashaija bana aba abeesigwa, Yoshua, Musa, Arooni, na Huuri. Obu Yoshua yaabaire naarwanisa Abaamaleki, Musa, Arooni, na Huuri, bakaba bari aha kibungo ekyabaire kiri haihi n’omwanya ogwo. Abaisraeli bakaba basingura orugamba, Musa ku yaabaire aimutsya emikono ye. Emikono ye ku yaabaire eruha, Arooni na Huuri bakaba bahangirira emikono ye. Yehova akahwera kandi yaarinda ‘Yoshua kusingura Amaleki n’engabo ze na rurara.’ (Kur. 17:8-13) Musa akombekaho eitambiro yaaryeta “Yehova-niisi,” ekirikumanyisa ngu Yehova “n’orurango rwangye” nari obuhungiro bwangye.​—Shoma Okuruga 17:14, 15; obugambo obw’ahansi.

NITURINDWA KUTATAAHIRIRWA SITAANE

18, 19. Ni burinzi bwa muringo ki obu Ruhanga arikuha abaheereza be omu myaka egi?

¹⁸ Yehova naarinda abo abarikumukunda kandi bakamworobera. Nk’Abaisraeli obu baabaire bari omuri Refidimu, naitwe nitushaba Yehova kuturinda abazigu. Yehova atwire naaturinda twena nk’ekibiina, kandi naagumizamu kuturinda kugira ngu Sitaane atatutaahirira. Teekateeka aha mirundi yoona ei Yehova atwire naarinda ab’eishe-emwe abatarikwejwanzya omu by’obutegyeki. Nk’eky’okureeberaho, ekyo nikyo kyabaireho omuri Germany ahansi y’obutegyeki bwa Nazi hamwe n’omu mahanga agandi omu myaka ya 1930 kuhika omu kutandika kw’emyaka ya 1940. Okushoma n’okuteekateeka aha biri omu Yearbook ebirikukwata aha ku Yehova arinzire abaheereza be omu kuhiiganisibwa, nibitugaruramu amaani kitureetera kumwesiga n’okumuhindura obuhungiro bwaitu.​—Zab. 91:2.

¹⁹ Kurabira omu kibiina kya Yehova n’ebitabo byakyo, nitutunga obuhabuzi oburikukwata aha ku turikubaasa kurindwa. Reeba oku ekyo kibaire eky’omugasho obunaku obu. Nk’oku ensi egi erikweyongyera kusiisikara omu micwe kandi erikweyongyera kwebembeza ebirikwitsa enshoni, Yehova naaguma naatwijutsya ebintu bikuru kandi atuha n’obuhabuzi kutuhwera aha bikwatiraine n’emicwe. Nk’eky’okureeberaho, nitubaasa kutunga obuhabuzi obukwatiraine n’okwetantara emikago mibi kurabira omu kukoresa kubi Intaneeti.a​—1 Kor. 15:33.

20. Oburinzi n’obuhabuzi obu turikutunga kurabira omu kibiina Ekikristaayo ni buuha?

²⁰ Nitubaasa kworeka tuta ngu buzima ‘nitwegyesibwa’ Yehova? Teeraho kworobera ebiragiro bye. (Isa. 54:13) Ebibiina byaitu nigwo mwanya murungi agu turikutungiramu oburinzi n’obuhabuzi ahakuba harimu abareeberezi abarikutuhwera barikutuha obuhabuzi kuruga omu Baibuli. (Gal. 6:1) Yehova naakoresa abareeberezi aba kutureeberera omu muringo gwa rukundo. (Efe. 4:7, 8) Mbwenu shi twine kutwaza tuta? Ruhanga naatuha emigisha, twaboorobera.​—Heb. 13:17.

21. (a) Twine kumariirira kukora ki? (b) Niki ekiraagambweho omu kicweka ekiraakurateho?

²¹ Ka tumariirire kwikiriza kwebemberwa omwoyo gurikwera ekiraatuhwere kworobera obuhabuzi bwa Tataitwe ow’omu iguru. Twine n’okuteekateeka aha ky’okureeberaho ky’Omwana we, Yesu Kristo kandi tukamutooreza. Yesu ahabw’okworoba kuhika n’aha kufa akaheebwa ekiconco. (Fil. 2:5-11) Naitwe nka we, nitwija kutunga ebirungi ahabw’okwesiga Yehova n’omutima gwaitu gwona. (Enf. 3:5, 6) N’ahabw’ekyo, ka tuteereho butoosha kwesiga Yehova ahabw’okutuha ebirungi n’okuturinda omu miringo erikukirayo. Nitwija kweyongyera kumukunda twateekateeka aha muringo ogundi ogu arikutufaho nka munywani waitu. Omu kicweka ekirikukurataho nitwija kureeba oku Yehova ari Munywani waitu orikukirayo.