Bzomwe Bzingakutsangalazeni Mukakhala Na Thupo
Moyo Wakusaya Thupo
Malango ya m’Bibliya yangatithandize kucepesa thupo. Ifepano tingakwanise lini kumalisa tekha bzomwe bzimbaticitisa thupo. Koma Mulengi wathu angakwanise. Ndipopa iye adasankhula munthu kuti atithandize, omwe ni Jezu Kristu. Pomwe Jezu akhali pano pa dziko la pantsi, adacita bzinthu bzakudabwisa kwene-kwene. Ndipo kutsogolo, iye an’dzacitira wanthu bzinthu bzizinji kuposa bzomwe adacita kale mbuyomu. Mwa ciratizo:
JEZU AN’DZAPOZA ATENDA.
‘Wanthu adamubweresera wentse omwe akhabonera na matenda yakusiyana-siyana . . . , ndipo iye adawapoza.’ —MATEU 4:24.
JEZU AN’DZAPASA WANTHU WENTSE CAKUDYA NA MBUTO YAKUKHALA.
Wanthu omwe an’dzatongedwa na Jezu ‘an’dzamanga nyumba, acikhala m’mwemo; an’dzalima minda ya mipesa, acidzadya bzisapo bzace. An’dzamanga lini kuti winango akhale; ne kubzala kuti winango adye.’ —ZAIYA 65:21, 22.
JEZU AN’DZATONGA DZIKO LA PANTSI ACIKHAZIKISA MTENDERE.
‘Ntsiku zimwezo, nyakulungama an’dzaphukira, ndipo pan’dzakhala mtendere uzinjisa mpaka mwezi udzaleke kuwoneka. Iye an’dzakhala na wanthu wakumubvera kucokera ku nyanza na nyanza, ndipo kucokera ku Mkulo mpaka kumamaliziro ya dziko la pantsi. . . . Ndipo anyamadulanthaka wace an’dzanyanguta pfumbi.’—PSALYMO 72:7-9.
JEZU AN’DZAMALISA KUSAYA CIRUNGAMO.
‘Iye an’dzabvera ntsisi munthu wakubzicepesa na munthu wakusauka, ndipo an’dzapulumusa moyo wa anyakusauka. Iye an’dzalombola moyo wa anyakuponderezedwa na anyakucitiridwa ciwembo.’—PSALYMO 72:13, 14.
JEZU AN’DZAMALISA KUBONERA NA INFA.
‘Infa in’dzawoneka lini pomwe. Pan’dzawoneka lini pomwe kulira, ayai kubuula ne kuwawidwa.’—CIBVUMBULUTSO 21:4.