Janeiro

Adadikhirira kwene-kwene. Pomwe adawona baba wace ankubwerera bwino-bwino kucokera ku nkhondo iye adatsudzuka, ndipo adawathamangira kuti akamusane nawo acimbasekerera thangwe ra kukunda kwawo. M’mbuto mwa kukondwa na mwana waceyo aciimba na kubzina, iye adang’amba bzakubvala bzace bza ku nkhondo acilira kuti: ‘Mwana wangu! Wandisunamisa kwene-kwene.’ Patsogolo pace iye adalewa mafala yomwe yadacinja moyo wa mwana waceyo kwa nthawe zense, yadacinja bzomwe iye akhafuna kucita pabodzi na cidikhiro ca kukhala na moyo omwe akhadauzolowera. Tsono, mwakusaya kuzeza, iye adalimbisa baba wace kuti acite ninga momwe adapicira kuna Yahova. Mafala yaceya njacikhulupiro cikulu. Iye adakhulupira kuti ciri-cense comwe Yahova akhafuna kuti iye acite, cikhali cabwino kuna iye. (Way. 11:34-37) Baba wace adadzala na cikondweso, thangwe akhadziwa kuti kubzipereka na mtima wense kwa mwana waceyo kuti amuthandize pa cakusankhula caceco, kungadakondwesa Yahova. Djafeti na mwana wace, akhakhulupira momwe Yahova ambacitira bzinthu, napo kucita bzimwebzo kukhali kwakunesa. Iwo akhali wakutsimikiza kubzipereka pa ciri-cense kuti abvumidwe na Mulungu. w16.04 1:1, 2

Mukakhumudwa na mafala yakusaya cilimbiso ya xamwali ayai ya wanthu wa m’banja mwanu, penu munkugumana na matenda makulu, ayai mwafedwa wacibale wanu, mungagumane cilimbiso na ciratizo ca Djobi. (Djobi 1:18, 19; 2:7, 9; 19:1-3) Napo kuti iye akhadziwa lini komwe kukhacokera mabvutoyo, Djobi alibe kutaya cidikhiro thangwe ra kukhumudwa. Thangwe ranyi? Thangwe ‘iye akhagopa Mulungu.’ (Djobi 1:1) Djobi akhadatsimikiza kupitiriza kukondwesa Yahova pa nthawe zabwino napo zakunesa. Na thandizo la Mulungu, Djobi adakumbukira bza bzinthu bzakudabwisa bzomwe Yahova akhadacita mwakuphatisa basa Mzimu Wace Wakucena. Djobi adakhulupira kwene-kwene kuti Yahova angadamalisa mayezoyo pa nthawe yakuthemera. (Djobi 42:1, 2) Ndipo bzimwebzi ndibzo bzidadzacitika. ‘Yahova adacosa matsautso ya Djobi ndipo adamubwezera pomwe bzinthu bzabwino. Yahova adamupasa kubwerezera kawiri bzinthu bzomwe iye akhanabzo pakuyamba.’ Djobi adakhala na moyo ‘utali na wabwino.’—Djobi 42:10, 17. w16.04 2:11, 13

Timbalatiza kucenjera tikambazindikira ngozi mwakamfulumize, ndipo timbapitiriza kukhala wakudeka mtima mwa kutcenkha kutengeka na bzinthu bzomwe bzingaticitise kugwera mu ngozi. Tin’funika kukhala wakucenjera pomwe nkhani za ndale zinkulewedwa. Mwa ciratizo, tikambapalizira bzipsa bza Umambo, tin’funika kutcenkha kutumbiza ayai kunyoza nkhani za ndale za cipani ayai nyakuimira wace. Yezani kukonza mpata wabwino na mwaneciro nyumba mwa kukhala tceru pa nkhani yomwe munkucezerana, m’mbuto mwa kufotokoza njira zakuperekedwa na wa ndale. Pa mbuyo pace, latizani kucokera m’Bibliya momwe boma la Mulungu lin’dzamalisira mabvuto kwamuyaya. Penu nkhani za malowozi ya wanthu wa cidzo cibozi ayai kutaya mimba zinkufotokozedwa, tin’funika kukhotcerera mitemo ya Mulungu na kufotokoza momwe tingaitewezerere pa moyo wathu. Mkati mwa kucezerana, pitirizani kuleka kupitira nkhani za ndale. Ifepano timbalewa lini ciri-cense bza momwe malamulo yangaphatisidwire basa ayai kuyacinja, ndipo tin’funika lini kucitisa winango kuti akhale kumbali yathu pa nkhaniyo. w16.04 4:8, 9

Tin’funika kukhala na anyakupfunza, kuwabatiza, na kuwapfunzisa, koma kodi n’cinthu ciponi cakuyamba comwe tin’funika kucita? Jezu adati: ‘Ndokoni’! Mwakubverana na lamulo limweri, m’pfunzi mbodzi wa Bibliya adati: “Fala lakuti ‘ndokoni’ linkulatiza kuti Mkristau ali-wense an’funika ‘kuyenda’ kukapalizira kuli-kwense, bziribe basa penu aniyambuka msewu ayai nyanza.” (Mat. 10:7; Lu. 10:3) Kodi Jezu akhalewa bza anyakupfunza wace, m’bodzi na m’bodzi payekha ayai akhalewa bza basa lakulinganizidwa ninga gulu, kuti lipalizire bzipsa bzabwino? Pakuti munthu m’bodzi angakwanise lini kupalizira ‘mitundu yense ya wanthu’, basali lingadafunika kucitidwa na gulu la wanthu. Jezu adalatiza kuti basali ndakufunika kwene-kwene pomwe iye adacemera anyakupfunza wace kuti akhale ‘akhombwe wa wanthu.’ (Mat. 4:18-22) Kusodza komwe Jezu akhalewa pamwepa ni khombwe lini omwe ankundophatisa basa nyambzo pa medzo ndipo adandokhala phe acimbadikhirira kuti nsomba ibwere. M’mbuto mwace iye akhalewa bza mabwazi ayai rede—yomwe pangadafunika basa la mphanvu lomwe lingadacitidwa na wanthu azinji mwaciphatano.—Lu. 5:1-11. w16.05 2:3, 4

Kuti tizolowerane na makumbukidwe ya Yahova, tin’funika kuikha pakuyamba pfunziro lathu la patekha. Pomwe tinkuwerenga ayai kupfunza Fala la Mulungu, tingambabzibvunze kuti: ‘Kodi nkhaniyi inkundiuza ciyani bza Yahova, njira zace zakulungama na makumbukidwe yace?’ Tin’funika kucita ninga momwe nyakunemba psalymo Davide adaimbira kuti: ‘Ndidziwiseni njira zanu, imwe Yahova; ndipfunziseni kufamba m’njira zanu. Ndicitiseni kufamba n’cadidi canu ndipo ndipfunziseni, pakuti imwe ndimwe Mulungu wangu wacipulumuso. Mwa imwe ndin’dikhira nsiku yense.’ (Psal. 25:4, 5) Mukambakumbukira bzomwe mwawerenga m’Bibliya mungacite bwino kumbabzibvunza mbvunzo ninga uyu: ‘Kodi nfundo zimwezi ndingaziphatise tani basa pa banja langu? N’kuponi komwe ndingaziphatisire basa? Ku mui? Ku basa? Ku xikola? Ayai mu utumiki?’ Tikadziwa komwe nfundozo tingaziphatisire basa, bzingapuse kuzindikira momwe tingaziphatisire basa. w16.05 3:9, 11

Yahova ambafuna kuti wale omwe ankuthemera kulatidwa ninga akulu, akhale na makhalidwe yabwino, ndipopa iye adapereka ndandanda ya malango yomwe yambacitisa munthu kukhala wakuthemera. (1 Tim. 3:2-7) Iye ambadikhira kuti anyakunyang’anira akhale ciratizo cabwino ca momwe ambacitira bzinthu na gwere ‘lomwe iye adagula na mulopa wa mwana wace caiye.’ (Mab. 20:28) Yahova an’funa kuti tibzibve kukhala wakukhotcerereka pakusamalidwa na wale omwe adasankhulidwa kuti akhale abusa. (Zai. 32:1, 2) Pa nfundo imweyi, Bzinembo bzakulewa bza Mkristau kuti athemere kukhala mkulu bzimbatikumbusa momwe Yahova ambafunisisira kutisamalira. Kulewa cadidi, Mkristau ali-wense an’funika kupfunza m’malango yamweya ndipo mazinji yace yankulewa bzinthu bzomwe Yahova an’kufuna kwa Akristau wense. Mwa ciratizo, tensenefe tin’funika kukhala wakulekerera na wakukumbuka bwino. (Waf. 4:5; 1 Pe. 4:7) Pakuti akulu ni ‘ciratizo cabwino pa thimu la mabira,’ tingapfunze bzizinji kwa iwo na ‘kutewezera cikhulupiro cawo.’—1 Pe. 5:3; Waheb. 13:7. w16.05 5:8-10

Kodi tingadikhirire kugumana na mabvuto yaponi thangwe ra kuuma mtima? Mabvutoyo yangaphatanidze kubzikuza, bzicito bza pikado na kutaya cikhulupiro. Bzimwebzi bzimbabweresa kusaya kubvera, pabodzi na mzimu wa kupanduka. (Dan. 5:1, 20; Waheb. 3:13, 18, 19) Mambo Uziya pa nthawe inango adayamba kubzikuza. (2 Nkha. 26:3-5, 16-21) Pakuyamba, Uziya akhacita ‘bzinthu bzabwino m’maso mwa Yahova,’ ndipo ‘adapitiriza kulinga Mulungu.’ Tsono ‘pomwe iye adakhala wa mphanvu, mtima wace udayamba kubzikuza,’ napo kuti mphanvu yomwe iye akhanayo ikhacokera kuna Mulungu! Ndipo iye adalinga kupereka nsembe yakupsereza mu tempwlo—udindo bumwebu bukhali kokha bwa wansembe wa m’banja la Aroni. Pomwe wansembe adaceza naye, Uziya wakubzikuzayo adakalipa! Kodi bzakutewera bzace bzidakhala bziponi? Iye adakhala na tsoka lakupasa manyazi m’manja mwa Mulungu ndipo adafa na mapere. (Mim. 16:18) Tikatazira kubziletsa pa nkhani ya kubzikuza, tingayambe ‘kumbakumbukira kwene-kwene [bza ifepano] kuposa bzomwe tingadafunika kukumbukira,’ pinango kufika pa kulamba malango ya m’bzinembo.—War. 12:3; Mim. 29:1. w16.06 2:3, 4

Kodi mumbabzibva tani na Akristau anzanu omwe ana bzikhalidwe bzakusiyana kwene-kwene na bzanu? Cirewedwe cawo cakubadwa naco, kabvalidwe, kacitidwe kawo ka bzinthu na cakudya, bzingakhale bzomwe mukanati kubzizolowera. Kodi mungaleke kubverana nawo koma mucimbabverana kokha na wale omwe ana cikhalidwe cakundendemerana na canu? Tani penu omwe aikhidwa ninga wakunyang’anira mu gwere mwanu—ayai mu dera lanu ayai mthambi—ni maswaka ayai mbacikhalidwe na mtundu wakusiyana na wanu? Kodi mungalekerere kuti bzimwebzi bzimalise ciphatano comwe cin’funika kukhala pakati pa wanthu wa Yahova? Kodi n’ciyani comwe cingatithandize kuti titcenkhe msampha umweyu? Paulo adapereka malango yakufunika kwa Akristau wa mu mzinda wa ku Efezo omwe ukhatukuka. (Wayef. 4:1-3) Paulo pakuyamba adafotokoza makhalidwe ninga kubzicepswa, kupfatsa, kupirira na lufoyi. Makhalidweya yambakhala ninga midjirikiro yomwe imbalimbisa nyumba. w16.06 3:17, 18

Sathani ambafuna kuti tiphatise basa mphanvu zathu kuti tilinge kwene-kwene kobiri na bzinthu bzakuthupi m’mbuto mwa kuti tiziphatise basa pa kutumikira Yahova. (Mat. 6:24) Koma penu tinkundolinga kukhala na bzinthu kuti bzitidekere, moyo wathu un’dzakhala ulibe thandauzo. Tingadzakhumudwe ayai kugwa m’mangawa. Cakuipiratu, tingaluze cikhulupiro cathu mwa Yahova na Umambo bwace. (1 Tim. 6:9, 10; Cibv. 3:17) Jezu adalewa kuti ‘bzikhumbo pa bzinthu bzinango’ bziri ninga minga yomwe ingatazise mbewu kukula na kubala bzisapo. (Mar. 4:14, 18, 19) Tinkukhala mu nthawe yomwe dziko la Sathaniri lasala pang’ono kumala. Tenepo, ino ni nthawe lini ya kulinga kukhala na bzinthu bzizinji. Ndipo tin’funika lini kudikhirira kuti pambuyo pa citsautso cikulu, tin’dzapitiriza kukhala na bzinthu bzomwe tinabzo tsapanobzi, napo kuti bzinthubzo mpsakufunika kwa ifepano.—Mim. 11:4; Mat. 24:21, 22. w16.07 1:5, 6

Macibese yanango, mweneciro munda wa mpesa adayenda ku msika kuti akanyang’ane wanthu kuti akalime m’munda mwace. Iye adawagumana ndipo adapangana nawo kobiri yomwe angadawapasa, ndipo wanthuwo adabvuma. Tsono pakuti mwenekaciro mundayo akhafuna anyabasa azinji, iye nsiku imweyo adayenda kazinji kense ku msikako kuti akanyang’ane wanthu azinji. Iye adatsimikiza kuti angadapasa kobiri wanthu wensenewo mwa cirungamo. Kuphampha kwa nsikuyo, mweneciro mundayo adatsonkhanisa anyabasa wensene kuti awapase kobiri yawo. Iye adapasa wensene kobiri ibodzi-bodzi napo kuti winango akhadaphata basa kwa nsiku ya thunthu ndipo winango kwa ora ibodzi basi. Tsono wanthu omwe adaphata basa kwa nsiku ya thunthu adayamba kudandaula, koma mweneciro mundayo adati: ‘Kodi mulibe kubvuma kobiri yomwe tapangana ire? Kodi ndiribe ugo bwakupasa anyabasa wangu wense ciri-cense comwe ine ndin’funa? Kodi munkuipidwa thangwe ndine munthu wakupasa?’ (Mat. 20:1-15) Nkhani ya Jezuyi imbatipasa pfunziro lakufunika kwene-kwene pa nkhani ya ‘kudeka mtima kukulu’ kwa Yahova.—2 Wak. 6:1. w16.07 3:1, 2

Cimaliziro cinkufika! Ino ni nthawe yakuti tipalizire bzipsa bzabwino kuposa kale. (Mar. 13:10) Tin’funika kukumbukira kuti cakulinga cathu pomwe tinkupalizira ni kulemekeza Yahova. Kodi tingacite tani bzimwebzi? Tin’funika kuuza wanthu kuti bzisimbo bzense bzomwe tin’dzagumana m’dziko lipsa bzin’dzakwanisika kokha thangwe ra kudeka mtima kukulu kwa Yahova. Tikambapalizira, tingambafotokozere wanthu kuti pomwe Umambo bwa Kristu bun’dzatonga, wanthu an’dzatambira bzisimbo bzense bza cakulombolera ndipo pang’ono na pang’ono an’dzakhala wakulungamiratu. Bibliya limbati: ‘Cirengedweco cin’dzatsudzulidwa ku ukapolo bwa kubvunda ndipo cicidzakhala na ufulu bwa mbiri ya wana wa Mulungu.’ (War. 8:21) Bzimwebzi bzin’dzakwanisika kokha na kudeka mtima kukulu kwa Yahova. w16.07 4:17-19

Bibliya limbapereka lini mitemo yakulungamiratu pa mitundu na malire ya kulatizana lufoyi pakati pa mwamuna na mkazi. Koma limbalewa bza lufoyi limweri. (Nyi. 1:2; 2:6) Akristau wakulowolana an’funika kucitirana bzinthu na mtima wa nsisi. Tikakhala na lufoyi likulu na Mulungu pabodzi na anzathu, tin’dzabvuma lini kuti munthu ayai cinthu ciri-cense cikhe pa ngozi banja lathu. Winango aipisa ayai kudzonga banja lawo thangwe ra kukhala na cizolowezi ca kumbawona bza maika. Tin’funika kutcenkha mtima uli-wense wa kufuna kumbawona bza maika ayai mitundu inango ya bzinthu yomwe inganyose cikhumbo cakusaya kuthemera ca kugonana. Tin’funikambo kutcenkha kucita cinthu ciri-cense comwe cingaticitise kuwoneka ninga tiri pa umakhadzi na munthu omwe ni mwanzathu lini wa m’banja thangwe kucita bzimwebzi ni kusaya lufoyi. Tin’funika kukumbukira kuti Mulungu ambadziwa makumbukidwe yathu yense pabodzi na bzicito bzathu. Bzimwebzi bzin’dzatithandiza kulimbisa cikhumbo cathu cakufuna kumukondwesa na kupitiriza kukhala wakukhulupirika kwa mwanzathu wa m’banja.—Mat. 5:27, 28; Waheb. 4:13. w16.08 2:7-9

‘Kudzala na cidziwiso caico,’ kungadathandiza Akristau wa ku Koloso ‘kufamba bwino mwakubverana na bzomwe Yahova ambafuna, kuti amukondwese kwene-kwene.’ Bzimwebzi bzingadawathandizambo kuti ‘abale bzisapo pa basa lense labwino’ maka-maka la kupalizira bzipsa bzabwino. (Wakol. 1:10) Mtumiki wa Yahova ali-wense an’funika kuwerenga na kupfunza Bibliya kuti apfunze bzomwe Mulungu ambafuna. Tingacite bwino kuthandiza anyakupfunza wathu wa Bibliya kuti ambacitembo bzibodzi-bodzi. Kuthumizira bzimebzi, ifepano tin’funika kutsimikiza mu mtima mwathu kuti bzomwe tinkuwerengabzo, bzina phindu likulu-lense. Kulewa cadidi, kuwerenga Bibliya nthawe zense na kukumbukira bzomwe tawerengadzo, kun’dzatithandiza pa moyo wathu na mu utumiki. Mwa ciratizo, tikakhala mu utumiki ndipo munthu winango akatibvunza mbvunzo wakunesa, kodi tin’dzakwanisa kuphatisa basa Bibliya kuti tipereke mtawiro? Tikambauza winango bzomwe tapfunza pa pfunziro lathu, na momwe limbatithandizira, bzin’dzawalimbisa kuti apfunze Bibliya na nyongo acigumanambo bzisimbo bzibodzi-bodzi. w16.08 4:3, 4

Mpsakufunika kwene-kwene kupirira kuti tireke kutengedwa na bzipfunziso bza m’dzikoli, bzipfunziso bza nzeru za wanthu, kucita upombo, kufumali pabodzi na kumwa mowa mwakupitirira malire ayai mankhwala yakudzungulumwisa msolo. Tin’funikambo kupitiriza kulimbana pa nkhani ya kukhumudwa ayai kutaya mtima pabodzi na bzakutepa bzathu. (2 Wak. 10:3-6; Wakol. 3:5-9) Kodi mpsakukwanisika kukunda pa nkhondo yakulimbana na anyamadulanthaka wamphanvuwa? Inde, koma bzingakhale bzakunesa! Paulo adabzindendemeza iye na munthu wakuthusa mafaiti pomwe adati: ‘Momwe ndinkuthusira mafaiti yangu si kuti ndinkundomenya mphepo ne.’ (1 Wak. 9:26) Ninga momwe wakuthusa mafaiti ankuthusira nyamadulanthaka wace, ifepano tin’funikambo kulimbana na anyamadulanthaka wathu. Yahova ambatithandiza ndipo ambatipfunzisa kuti tikwanise kucita bzimwebzi. Iye ambacita bzimwebzi mwa kuphatisa basa Bibliya. Ndipo iye ambatithandizambo mwa kuphatisa basa mabukhu yakufotokoza Bibliya, mitsonkhano yacikristau, mitsonkhano yadera na yacigawo. Kodi mumbaphatisa basa malango yense yomwe mumbayatambira? w16.09 2:2, 3

Ninga Jezu, tin’funika kumbawona kucita bzomwe Mulungu ambafuna na kuthandiza winango kukhala cinthu cakufunika kwene-kwene kuposa kucita bzakufuna bzathu. Tenepo tireke kusankhula kabvalidwe komwe ifepano timbafuna komwe kangacitise wanthu kuleka kutetekera mafala yathu. (War. 15:2) Abereki wacikristau ana udindo bwakupfunzisa wana wawo kuti atewezere mitemo ya m’Bibliya. Bzimwebzi bzimbaphatanidza kutsimikiza kuti iwo pabodzi na wana wawo ankukondwesa Mulungu mwa kabvalidwe kawo na kubzidekesa. (Mim. 22:6; 27:11) Kodi abereki angapfunzise tani wana wawo kuti ambalemekeze Mulungu wathu wakucena na mitemo yace? Abereki an’funika kupereka ciratizo cabwino kwa wana wawo. Ndipo iwo an’funika kumbapfunzisa wana wawo mwa lufoyi momwe angasankhulire bzakubvala bzabwino pa kugula. Wanawo an’funika lini kusankhula bzakubvala kokha thangwe rakuti ambabzifuna, koma cakufunika kwene-kwene n’cakuti iwo asankhule bzakubvala bzomwe bzimbalemekezesa Yahova, Mulungu omwe ambamutumikira. w16.09 3:13, 14

Wanthu akhakomedwa kutetekera Jezu thangwe rakuti iye akhafuna Yahova ndipo akhadziwa bwino Bzinembo. Iwo adazindikira kuti Jezu akhawafuna. Tenepo iwo akhamutetekera mwatceru. (Lu. 24:32; Ju. 7:46) Mwa njira ibodzi-bodziyi, wana wanu akawona kuti imwepo mumbafuna Yahova, bzimwebzi bzin’dzawathandiza kuti ambamufunembo. (Bzak. 6:5-8; Lu. 6:45) Na tenepo pitirizani kumbawerenga Bibliya pabodzi na mabukhu yathu nthawe zense. Fikani pa kudziwa bzizinji bzomwe Yahova adalenga. (Mat. 6:26, 28) Mukadziwa bzizinji pakulewa bza Yahova mun’dzakwanisambo kupfunzisa bzizinji wana wanu bza iye. Mukapfunza cinthu cinango cakulewa bza Yahova, uzanimbo wana wanu. Citani bzimwebzi nthawe zense pomwe munawo pabodzi, sikuti kokha pomwe munkukonzekera mitsonkhano ayai pomwe munkunamata ninga banja. w16.09 5:6, 7

Tikaleka kubvesesa bwino-bwino bzomwe Bibliya limbapfunzisa mu cirewedwe cacilendo, uxamwali bwathu na Yahova bungadzongeke. Pomwe Nehemiya adabwerera ku Jeruzalemu, iye adawona kuti wana winango akhakwanisa lini kulewalewa Cihebereu. Pakuti wanawo akhabvesesa lini mafala ya Mulungu, uxamwali bwawo na Yahova bukhatepa. (Neh. 8:2, 8) Abereki winango omwe ankutumikira m’gwere la cirewedwe cacilendo, ambazindikira kuti wana wawo ankutepa mwauzimu. Thangwe ranyi? Thangwe pomwe tinkuwerenga cirewedwe cacilendo, tingatokonyedwe lini ninga momwe tingawerengere m’cirewedwe cathu caico. Ndipo pakuti mpsakunesa kulewalewa na wanthu mu cirewedwe cacilendo, bzingatinetese pa kunamata kwathu Yahova. Pomwe tinkukuza cikhumbo cathu cakufuna kukatumikira mu gwere la cirewedwe cacilendo, tin’funikambo kukhotcerera uxamwali bwathu na Yahova.—Mat. 4:4. w16.10 2:4-6

Cikhulupiro cacikristau ni khalidwe lakufunika kwene-kwene. Tsono ni wanthu lini wense omwe ana cikhulupiro. (2 Wat. 3:2) Koma Yahova ambapereka cikhulupiro kuna munthu ali-wense omwe ambamunamata. (War. 12:3; Wag. 5:22) Timbatenda kwene-kwene Yahova thangwe ambatipasa cikhulupiro! Yahova adapereka mwana wace wakufunidwa, Jezu, kuti ali-wense omwe animukhulupira, alekereredwe pikado zace. Bzimwebzi bzimbacitisa wanthu kukhala pa uxamwali na Yahova na kuti adzakhale na moyo wakusaya kumala. (Ju. 6:44, 65; War. 6:23) Yahova ngwabwino kwene-kwene! Napo kuti ndife anyakuphonya ndipo tiri mu mkhalidwe wakuti timbafa, Yahova ambawona kuti tingakwanise kucita bzinthu bzabwino. (Psal. 103:10) Iye adatithandiza kudziwa bzipsa bzabwino pakulewa bza Jezu na nsembe yace. Pomwe tidayamba kukhala na cikhulupiro mwa Jezu na kumutewera, tidayambambo kukhala na cidikhiro ca moyo wakusaya kumala.—1 Ju. 4:9, 10. w16.10 4:1, 2

Paulo akhambalewa kawiri-kawiri bzinthu bzabwino bzomwe abale wace akhacita. Kwa magole mazinji, iye akhacita ulendo na winango wa iwo ndipo adafika pa kuwadziwa bwino, koma iye alibe kunemba bzakuphonya bzawo. M’mbuto mwace, iye adawatenda. Mwa ciratizo, Paulo adalewa kuti Timotio akhali mwana wace ‘wakufunidwa na wakukhulupirika mwa Mbuya’ ndipo iye akhakhulupira kuti Timotio angadasamalira bzakusaya bza winango. (1 Wak. 4:17; Waf. 2:19, 20) Pakulewa bza Tito, Paulo adawuza Akristau wa ku Kolinto kuti: ‘Iye ni mwanzangu ndipo ndinkuphata naye basa pakuthandiza imwepo.’ (2 Wak. 8:23) Mpsakuwonekeratu kuti Timotio na Tito adalimbisidwa pomwe adadziwa kuti Paulo akhambawakumbukira! Paulo na Barnaba adaikha moyo wawo pa ngozi kuti alimbise abale wawo. Mwa ciratizo, wense awiri adazindikira kuti wanthu wa mu mzinda wa Listra akhafuna kuwapha. Napo bzikhali tenepo, iwo adabwerera pomwe kumweko kuti akalimbise anyakupfunza watsapano na kuwathandiza kuti apitirize kukhulupira Yahova. (Mab. 14:19-22) Pomwe akhali ku Efezo, Paulo adalimbisa abale wa kumweko, pambuyo pakufuna kuphedwa na wanthu waukali.—Mab. 20:1. w16.11 1:10, 11

Yahova ankupfunzisa na kutsogolera wanthu wace pa dziko la pansi nsiku zino. Mwa njira iponi? Iye adaikha Kristu kuti akhale ‘msolo wa gwere,’ ndipo Kristu adaikhambo ‘kapolo wakukhulupirika na wanzeru’ kuti ambapfunzise na kutsogolera wanthu wa Mulungu. (Wayef. 5:23; Mat. 24:45-47) Ninga bungwe lakutonga la m’magole dzana yakuyambirira, kapolo umweyu ambalemekezadi Bibliya thangwe ni Fala la Mulungu. (1 Wat. 2:13) Bibliya limbatiuza kuti timbatsonkhane mwakukhazikika. (Waheb. 10:24, 25) Iro limbalimbisa kuti atumiki wense wa Mulungu an’funika kuteweza cipfunziso cibodzi. Limbatiuzambo kuti tipitirize ‘kuikha pakutoma Umambo bwa Mulungu.’ (Mat. 6:33) Bibliya limbatipfunzisa momwe tingapalizire ku nyumba na nyumba, m’mbuto za padeca na kuli-kwense komwe kungagumanike wanthu. (Mat. 28:19, 20; Mab. 5:42; 17:17; 20:20) Limbauza akulu kuti apitirize kuthandiza gwere kuti likhale lakucena. (1 Wak. 5:1-5, 13; 1 Tim. 5:19-21) Ndipo limbatiuza kuti tin’funika kukhala wakucena mwakuthupi na kutcenkha makumbukidwe yakuipa na bzizolowezi bzomwe Yahova ambanyansidwa nabzo.—2 Wak. 7:1. w16.11 3:7, 8

Magole mazinji, Nkhondo Yakuyamba ya pa Dziko Lense ikanati kuyamba (1914-1918), Charles Taze Russell pabodzi na anyakupfunza Bibliya winango adazindikira kuti bzipembedzo bzikhapfunzisa lini cadidi ca m’Bibliya. Tenepo, iwo akhafuna lini kucita mbverano na cipembedzo cakunama. Nsanza ya Mulindiri ya mu gole la 1879, (yomwe ikhacemeredwa kuti Zion’s Watch Tower) idalewa kuti cipembedzo ciri-cense comwe cikhabziti n’cacikristau, cicimbathandizira maboma ya wanthu, cikhali cakunama. Bzipembedzo bzimwebzi ni mbali ya Babulo Mkulu, omwe Bibliya limbamucemera kuti hule. (Cibv. 17:1, 2) Amuna na akazi wakukhulupirika akhadziwa kuti penu iwo angadapitiriza kuthandizira cipembedzo cakunama, Mulungu angadawasimba lini. Tenepo, azinji wa iwo adatumiza matsamba ku bzipembedzo bzawo yomwe yakhalewa kuti akhafuna lini pomwe kukhala m’bodzi wa bzipembedzobzo. w16.11 5:2, 3

Mwakusaya kupenukira imwepo mudawerenga kale cinembo ca Waroma 8:15-17 pa nthawe ya Cikumbuso ca infa ya Jezu. Mavesiya yambafotokoza momwe Akristau wakudzozedwa ambadziwira kuti ana cidikhiro cakudzakhala na moyo kudzulu. Pa Waroma 8:1 pambalewa kuti anyakudzozedwa ‘mbakuphatana na Kristu.’ Waroma kapitulo 8 adanembedwera maka-maka akristau wakudzozedwa. Iwo ‘ambatambira mzimu’ ndipo ‘ankudikhirira na mtima wense kuti atengedwe kukhala wana wa Mulungu acitsudzulidwa ku mathupi [yawo].’ (War. 8:23) Kutsogoloku, iwo an’dzakhala wana wa Mulungu kudzulu. Yahova adawalekerera pikado zawo mwakuphatisa basa cakulombolera. Iye ambawawona ninga wakulungama ndipo angakhale wana wace (War. 3:23-26; 4:25; 8:30) Tsono kumayambiriro kwa bukhu la Waroma, Paulo adanemba bza munthu omwe akhali lini wakudzozedwa koma Yahova akhamuwona ninga wakulungama. Bzimwebzi, bzinkulatiza kuti napo wale omwe ana cidikhiro cakudzakhala na moyo wakusaya kumala pansi pano angagumanembo phindu na malango yakuperekedwa kwa Akristau wakudzozedwaya. w16.12 2:1-3

Kodi Jezu akhathandauza ciyani pomwe adalewa kuti: ‘Lekani kumbacita thupo’? Jezu akhathandauza lini kuti munthu omwe anitumikira Mulungu angakhale lini na thupo. M’mbuto mwace, iye akhathandiza anyakupfunza wace kuti abvesese kuti thupo lakusaya kufunikira ayai lakunyanya, limbathandiza lini. Nsiku iri-yense ina mabvuto yace, tenepo Akristau an’funika lini kuthumizira thupo lawo mwa kukumbukira mabvuto yakumbuyo ayai yakutsogolo. N’thawe zinango Mkristau angakhale na thupo na mabvuto yomwe pinango yangadzamufikiredi kutsogolo. Tsono mun’funika lini kucita mantha na bzinthu bzomwe bzikanati kucitika. N’thangwe ranyi? Thangwe kawiri-kawiri bzinthu bzimbadzakhala lini bzakuipiratu ninga momwe tikhakumbukirira. Kumbukiranimbo kuti palibe bvuto lomwe Mulungu angatazire kulimalisa. w16.12 3:13, 16

Sauli akhali munthu wakubzicepswa pomwe adasankhulidwa na Yahova kuti akhale mambo. (1 Sam. 9:1, 2, 21; 10:20-24) Tsono pomwe adakhala mambo, iye adayamba kubzikuza. Pa nthawe inango Afilisteu adabwera kudzamenyana na Ajirayeri. Mpolofeta Samuweri akhadauza kale Sauli kuti iye angadabwera kudzapereka nsembe kwa Yahova. Koma pomwe Samuweri akhanati kufika, Ajirayeri adakhala na mantha ndipo azinji wa iwo adathawa Sauli. Sauli adatazira kupirira ndipo m’mbuto mwa kudikhirira Samuweri, iye adapereka yekha nsembeyo. Sauli akhalibe udindo bwakucita bzimwebzi ndipo Yahova alibe kudekedwa. (1 Sam. 13:5-9) Pomwe Samuweri adafika, adatsimula Sauli thangwe ra kuphonyera Yahova. Tsono Sauli alibe kuzindikira kuti bzomwe akhadacitabzo bzikhali bzakuphonyeka. Iye adabzikhululukira acipasa mulandu winango na kuphonya kwaceko. (1 Sam. 13:10-14) Kuyambira nthawe imweyo Sauli adacita bzinthu bzinango mwa kubzikuza. Tenepo Yahova alibe kufuna kuti Sauli apitirize kukhala mambo. (1 Sam. 15:22, 23) Pakuyamba Sauli akhali munthu wabwino tsono pakumalizira adadzakhala wakuipa.—1 Sam. 31:1-6. w17.01 3:1, 2

Mambo Davide akhali munthu wakukhulupirika ndipo Yahova akhamufuna kwene-kwene. Koma pa nthawe inango, Davide adacita pikado ikulu mwa kucita upombo na Bateseba. (2 Sam. 11:1-21) Davide angadakwanisa lini kucinja bzomwe akhadacitabzo. Tenepo, iye angadabonera na bzakutewera bzinango bza pikado yace kwa moyo wace wense. (2 Sam. 12:10-12, 14) Koma iye akhafunikira cikhulupiro. Iye akhafunika kukhulupira kuti akakungula na mtima wense, Yahova angadamukhululukira acimuthandiza kupirira bzakutewera bza pikado yace. Tensenefe timbacita pikado thangwe ndife wakuperewera. Koma pikado zinango zingakhale zikulu kuposa zinango, ndipo nthawe zinango tingakwanise lini kucinja bzomwe taphonya kale. Ifepano tingabonerembo na bzakutewera bza pikado zathu. (Wag. 6:7) Koma timbakhulupira piciro la Mulungu lakuti tikakungula, iye an’dzatithandiza pa nthawe za mabvuto, napo kuti mabvutoyo yabwera thangwe ra kuphonya kwathu.—Zai. 1:18, 19; Mab. 3:19. w17.01 1:10-12

Kukhala wakubzicepswa kun’dzatithandiza kuti ticite bzakusankhula bzabwino napo pomwe tinkudziwa lini kuti bzakutewera bzace bzin’dzakhala bziponi. Mwa ciratizo, tingakumbukire bza kuyamba utumiki bwa nthawe zense. Pinango tingakumbukire mibvunzo ninga iyi: Kodi ndin’dzacita tani ndikadzaduwala? Kodi ndin’dzacita tani abereki wangu akadzaduwala? Kodi ndin’dzacita ciyani ndikadzakalamba? Tingakwanise lini kutawira mibvunzo yenseneyi napo ticipemba na kukumbukira bza mibvunzoyi. Koma tikakhulupira Yahova, tin’dzazindikira bzomwe tingakwanise lini kucita. Tin’dzakumbukira bwino-bwino nkhaniyo, tin’dzakumbira thandizo ndipo kuposa bzense tin’dzapereka mpembo kwa Yahova. Patsogolo pace, tin’dzafunika kuteweza citsogozo ca mzimu wa Yahova. (Mpal. 11:4-6) Yahova angasimbe bzakusankhula bzathu ayai angatithandize kuti ticinje bzomwe tasankhulabzo.—Mim. 16:3, 9. w17.01 4:14

Adamu na Eva akhafunika kusankhula bzomwe angadacita. Kodi iwo angadabvera mbani, Mulungu ayai nyokayo? Mwa kupasa nsisi, iwo alibe kubvera Mulungu. (Ciy. 3:6-13) Pomwe Adamu na Eva adaswa lamulo la Mulungu, iwo akhali lini pomwe wakulungama. Tenepo, iwo adakhala anyamadulanthaka wa Mulungu thangwe iye ambawenga omwe ambacita bzakuipa, pakuti ‘maso yace njakucena kwene-kwene kuti yawone bzinthu bzakuipa.’ (Hab. 1:13) Yahova angadasaya kucita cinthu ciri-cense pa nkhani ya pikado ya Adamu na Eva, cirengedwe cense cingadakhala pa ngozi. Bzingadacitisa kuti wanjo na wanthu apenukire mafala ya Mulungu. Koma Yahova ngwakukhulupirika pa mitemo yace; nthawe zense ambateweza bzomwe ambalewa. (Psal. 119:142) Napo Adamu na Eva akhana ufulu bwa kusankhula, iwo angadakwanisa lini kutcenkha mabvuto yomwe yangadabwera thangwe ra kupanduka kwawoko. Pakumalizira iwo adafa ndipo adabwerera ku pfumbi komwe iwo adacokera.—Ciy. 3:19. w17.02 1:8, 10, 11

Kucokera paciyambi ca utumiki bwace mpaka pa nthawe yomwe iye adafa, Jezu adabvuma kuti Bzinembo bzimutsogolere. Napo atasala pang’ono kufa, iye adafotokoza mapolofesiya yakulewa bza Mesiya. (Mat. 27:46; Lu. 23:46) Koma atsogoleri wa bzipembedzo wa nthawe imweire, akhadasiyana kwene-kwene na Jezu. Iwo akhateweza lini mafala ya Mulungu pa ciri-cense comwe cikhabverana lini na bzipfunziso bzawo. Jezu adaphata mafala ya m’Bzinembo pomwe iye adalewa bza iwo kuti: ‘Wanthuwa ambandilemekeza na miromo yawo, koma mitima yawo iri kutali na ine. Ndipo iwo ambandinamata papezi, thangwe ambapfunzisa nzeru za wanthu ninga malamulo ya Mulungu.’ (Mat. 15:7-9) Jezu akhaphatisambo basa Fala la Mulungu pomwe akhapfunzisa wanthu. Pomwe atsogoleri wa bzipembedzo akhamubvunza mwa kumuyeza, iye akhaphatisa lini basa nzeru zace ayai bzomwe akhadziwa pa moyo wace kuti awatawire. M’mbuto mwace, iye akhapfunzisa wanthu mwakuphatisa basa Bzinembo.—Mat. 22:33-40.w17.02 3:18, 19

Ninga Mboni za Yahova, tin’funika kucita bzense bzomwe tingakwanise kuti timbalemekeze akulu-akulu wa m’maboma. N’cadidi kuti dziko liri-lense lina malamulo yace, na tenepo, bzomwe maboma yangafune, bzingasiyane mwakubverana na mbutoyo. Napo bziri tenepo, ifepano timbateweza bzomwe iwo ambafuna. Koma penu iwo angatikumbire kuti ticite bzinthu bzomwe bzingaphonyere mitemo ya Yahova, tin’funika lini kuwabvera. Pa bzakucitika bzimwebzi, timbabvera na kulemekeza Yahova, m’mbuto mwa kubvera wanthu. (1 Pe. 2:13-16) Tingapfunze kucokera kwa atumiki wa Yahova wakale omwe adalatiza ulemu kwa maboma pabodzi na akulu-akulu wakuimira mabomayo. Zuze na Mariya ni bziratizo bzabwino. Pomwe Waroma akhafuna kudziwa kuti ni wanthu angasi omwe akhalipo mu dzikolo, Zuze na Mariya adayenda ku Beremu kuti akabzinembese kumweko napo Mariya akhadasala pang’ono kuti abereke. (Lu. 2:1-5) Mpostolo Paulo ni m’bodzi mwa wanthu omwe akhalemekeza mautongi. Pomwe adanamiziridwa kuti wacita cinthu cakuipa, mwa ulemu iye adabzikhotcerera kwa Mambo Herode Agripa na kwa Festo, mtongi waciroma m’cigawo ca Judeya.—Mab. 25:1-12; 26:1-3. w17.03 1:9, 10

Pomwe Ajirayeri adatewezera bzicito bza pikado bza wanthu wakukanani, Yahova alibe kudzawakhotcerera pomwe. (Way. 2:1-3, 11-15; Psal. 106:40-43) Bzikhali bzakunesa kwene-kwene kuna mabanja yakugopa Mulungu, kupitiriza kukhala yakukhulupirika kuna Yahova mkati mwa nsiku zimwezire! Tsono Bibliya limbalewa kuti kumweko kukhana wanthu wacikhulupiro, ninga Djafeti, Elikana, Ana na Samuyeri, omwe adatsimikiza kubvumidwa na Mulungu. (1 Sam. 1:20-28; 2:26) Tinkukhala m’dziko lomwe wanthu ambakumbuka na kucita bzinthu ninga momwe wanthu wa ku Kanani akhacitira—iwo akhalemekeza kwene-kwene upombo na ciwembo ndipo akhalimbisa kufunisisa bzinthu bzakuthupi. Yahova ankutipasa cenjezo lakubveka bwino—ninga momwe adacitira na Ajirayeri—kuti titcenkhe bzinthu bzimwebzi. Kodi tinkupfunza ciyani na kuphonya kwa Ajirayeri? (1 Wak. 10:6-10) Tin’funika kucosa cinthu ciri-cense comwe cingalatize makumbukidwe ya cikanani pa moyo wathu. (War. 12:2) Kodi timbalatiza nyongo mwakukhulupirika pa kucita bzimwebzi? w16.04 1:4-6

Tikafuna kucita bzakusankhula bzikulu-bzikulu, bzingakhale bwino kumbaphatisa basa Bibliya ninga mbuto yakugumanira malango yanzeru ticimbalinga citsogozo ca Yahova mu mpembo. Iye angatithandize kucita bzakusankhula bzabwino mwakubverana na cakulinga cace. Ndipopa mbabzibvunzani kuti: ‘Kodi cakusankhula canguci cinkulatiza kuti ndimbafuna Yahova? Kodi cin’dzacitisa kuti banja langu likhale lakukondwa na la mtendere? Ndipo cin’dzalatiza kuti ndine wakupirira na wakudeka mtima?’ Yahova ambatingingimiza lini kuti timbamufune ayai kuti timbamutumikire. Koma ambalemekeza udindo na ufulu bwathu bwakusankhula penu tin’funa kumutumikira ayai ne. (Djos. 24:15; Mpal. 5:4) Koma iye ambafuna kuti timbacite bzakusankhulabzo mwakubvera na Bibliya. Tikakhulupira citsogozo ca Yahova na kuphatisa basa malango yomwe ambatipasa, tin’dzacita bzakusankhula bzanzeru. Ndipo kucita bzimwebzi kun’dzalatiza kuti ndife wakukhazikika mu njira zathu zense.—Tiy. 1:5-8; 4:8. w17.03 2:17, 18