Abril

Wanthu akalamba kukhulupira nsembe ya Jezu, Mulungu ambawawona ninga anyamadulanthaka. Tenepo, tina udindo bwa kuwauza kuti iwo angakhale axamwali wa Mulungu. Mpostolo Juwau adanemba kuti: ‘Ule omwe an’khulupira Mwanayo ana moyo wakusaya kumala, omwe an’khulupira lini Mwanayo an’dzaugumana lini moyo, koma ukali bwa Mulungu bun’dzakhala pa iye.’ (Ju. 3:36) Timbakondwa thangwe rakuti nsembe ya Kristu ndiyo imbacitisa kuti tikhale axamwali wa Mulungu na kutithandiza kuti tibverane na Yahova. (2 Wak. 5:18-20) Tikambapfunzisa wanthu cadidi cauzimu, timbawathandiza kuti akhale pa uxamwali na Yahova. Imweyi ni mbali yakufunika kwene-kwene pa basa lathu lakupalizira. w16.07 4:8-10

Cakuyamba pa bzense, Jezu adapemba kuti dzina la Yahova licenesedwe, ayai liwonedwe ninga lakucena. Pakuti Yahova ngwakucena, ciri-cense comwe iye ambacita na mitemo iri-yense yomwe iye ambapereka njakucena. Koma mu Edeni, Sathani mwa macenjera adacitisa winango kupenukira katongedwe ka Mulungu pa wanthu. Iye adanamizira Yahova ndipo adapswipisa dzina la Mulungu ayai mbiri yace. (Ciy. 3:1-5) Jezu mwa njira inango, adafunadi dzina la Yahova ndipo adacita ciri-cense kuti alicenese. (Ju. 17:25, 26) Mwa njira iponi? Mwa khalidwe lace na bzomwe akhapfunzisa, Jezu adathandiza winango kuwona kuti mitemo ya Yahova njakulungama na kuti ciri-cense comwe iye ambatiuza kuti ticite, ni thangwe ra kutifunira bzabwino. (Psal. 40:8-10) Mwa kukhala wakukhulupirika mpaka kufa, Jezu adalatiza kuti munthu wakulungama angakwanise kubvera Yahova pa cinthu ciri-cense. w17.02 2:2-4

‘Mwana wa Bira’ wakulewedwa pa Cibvumbulutso 5:13 ni Jezu Kristu. Kodi timbadziwa tani bzimwebzi? Pomwe Jezu akhali pa dziko la pansi akhacemeredwa ‘Mwana wa Bira wa Mulungu omwe ankucosa pikado za m’dziko.’ (Ju. 1:29) Kodi ni mambo uponi omwe adabzipereka kale kuti afere wanthu wace? Ndipopa limweri ni thangwe labwino la kumulemekezera. Jezu an’themerambo kulemekezedwa thangwe ‘iye ni Mambo wa omwe ambatonga ninga wamambo na Mbuya wa omwe ambatonga ninga ambuya.’ (1 Tim. 6:14-16) Pinango mungabve ninga momwe bzakulengedwa bzakudzulu bzidabvera bzomwe bzidaimba kuti: ‘Mwana wa Bira omwe adaphedwa ndiye an’themera kutambira mphanvu na cuma na nzeru na ulemu na umbiri pabodzi na cisimbo.’ (Cibv. 5:12) Kulemekeza Yahova na Kristu ni nkhani lini yakuti munthu angacite kusankhula, koma tin’funika kumbawalemekeza kuti tidzagumane moyo wakusaya kumala.—Psal. 2:11, 12; Ju. 5:23. w17.03 1:3, 4

Djafeti akhadziwa bwino mbiri ya Jirayeri, ndipo bzimwebzi bzidamuthandiza kubvesesa comwe cikhali cabwino na comwe cikhali cakuipa m’maso mwa Yahova. (Way. 11:12-27) Mitemo ya Mulungu yomwe ikhali mu Cakutonga ca Mozeji idacinja makumbukidwe na mtima wace. Iye akhadziwa kuti Yahova ambafuna lini kuti wanthu ambakoyerane cakumtima; m’mbuto mwace, Mulungu ambafuna kuti wanthu wace ambafunane. Cakutonga cikhapfunzisa kuti munthu an’funika lini kuleka kuthandiza omwe ankubonera, napo akhale munthu omwe ‘ambamuwenga.’ (Kuf. 23:5; Mwam. 19:17, 18) Ciratizo ca wanthu wacikhulupiro ninga Zuze omwe adalatiza nsisi kuna abale wace napo kuti iwo ‘akhamuwenga’—pinango ni bzomwe bzidacitisa kuti Djafeti atawire tenepaule. (Ciy. 37:4; 45:4, 5) Kukumbukira bziratizo bzimwebzi kudathandiza Djafeti kusankhula kucita bzinthu bzomwe bzidakondwesa Yahova. Bzicito bza abale wace mwakusaya kupenukira bzidamuwawa kwene-kwene, koma iye alibe kusiya kutumikira Yahova na Wanthu wace.—Way. 11:1-3. w16.04 1:8, 9

Wanthu wa Yahova ambawona kutsonkhana kukhala kwakufunika kwene-kwene. Pomwe gwere Lacikristau lidakhazikisidwa, ateweri wa Jezu adabvera lamulo lakuti ‘ambatsonkhane pabodzi.’ Mwakusaya kupenukira imwepo mumbafunambo kugumanika pa mitsonkhano mwakukhazikika. Tsono, Akristau wense ambagumana na mabvuto. Basa, kutanganidwa ayai kuneta thangwe ra bzakucitika bza nsiku na nsiku bzingatitazise kutsonkhana. Kuwona kuti mitsonkhano n’cinthu cakufunika, kungatithandize kukunda mabvutoya ticikhala na ndondomeko yabwino yakumbagumanika pa mitsonkhanoyo. N’cadidi, winango ambakwanisa lini kugumanika pa mitsonkhano mwakukhazikika thangwe ra mabvuto yakusiyana-siyana, ninga matenda makulu. Akulu angathandize abalewa kuti agumane phindu lauzimu, pinango angacite makonzedwe kuti ambabvesere mitsonkhano na pa mtedwe ayai kugravari mitsonkhanoyo. w16.04 3:3

Bziratizo bza atumiki wakukhulupirika wa Yahova bzingatipase nzeru na mphanvu yomwe tin’funikira kuti tipirire. Mwa ciratizo, Sadraki, Mesaki na Abedinego adalamba kunamata cifanikiso comwe cikhaimira boma la Babulo. (Dan. 3:16-18) Kuwerenga bza kulimba mtima kwawo kumbalimbisa Mboni za nsiku zino kuleka kunamata bandeira ya dziko lawo. Kuthumizira bzimwebzi, Jezu akhapitira lini m’nkhani za ndale na za dzikoli. Pakudziwa bzomwe bzingadadzacitikira winango thangwe ra ciratizo cace, iye adacenjeza anyakupfunza wace kuti ‘akhale wakukhwimika.’ Ndipo thandizo lingabwerembo kucokera kwa abale na mpfumakazi zathu za m’gwere. Abale wa m’gwere an’dzakulimbisani akakhala kuti ankudziwa mayezo yomwe munkugumana nayo. Akumbireni kuti apembe m’dzina lanu. Penu tinkufuna kuti abale wathu atithandize na kutipembera, tin’funika kuwacitirambo bzibodzi-bodzi.—Mat. 7:12. w16.04 4:16, 18

Kodi Mboni za Yahova zimbacita tani kuti zigumane kobiri? Basa lawo limbathandizidwa na bzakupereka bzaufulu. (2 Wak. 9:7) Pa Nyumba zawo za Umambo na pa mitsonkhano ikulu-kulu pambasundidwa lini kobiri. Kuthumizira bzimwebzi, mu gole la 2015 lokha, Mboni za Yahova zidamala nthawe zakukwanira 1.93 bidyau pakucita basa lakupalizira bzipsa bzabwino na kucitisa mapfunziro ya Bibliya yakupitirira 9 midyau mwezi uli-wense. Bzakudabwisa mpsakuti iwo alibe kupasidwa ciri-cense kuti acite basa limweri koma mwakukondwa adapereka bzinthu bzawo pakuthandizira basali. Pakulewa bza basa la kupalizira la Mboni za Yahova nyakufufudza nkhani winango adalewa kuti: “Cakulinga cawo cikulu ni kupalizira na kupfunzisa. . . . Pakati pawo palibe akulu-akulu wa cipembedzo, bzomwe bzimbacitisa kuti paleke kudzongeka kobiri.” Tsono kodi cakulinga cathu n’ciyani pakucita basali? Kulewa mwacigwatho, timbacita basali mwakufunisisa thangwe timbafuna Yahova ndipo timbafunambo anzathu. Mzimu wakubziperekayu unkuthandizira pa kukwanisika kwa polofesiya ya m’vesi ya lero. w16.05 2:9

Kuzindikira bzimwebzi kungaticitise kuti tilambe masenzeka yomwe yangapswipize makumbukidwe yathu. Akristau wakuzindikira ambacita lini kubvunza penu mpsakubvumizika kuwona mabukhu, mavidiyo ayai masenzeka ya pa interneti yomwe Yahova ambayawenga. Makumbukidwe ya Yahova pa nkhani ya bzakusankhula njakudziwika bwino mu Fala lace. Nkhani zizinji zingasankhulidwe mu njira zakusiyana-siyana koma ticipitiriza kukondwesa Yahova. Pa bzakusankhula bzikulu-bzikulu, nthawe zinango mpsakufunika kulinga malango ya akulu wa m’gwere ayai kwa Akristau winango wakukhwima mwauzimu. (Tito 2:3-5; Tiy. 5:13-15) N’cadidi, kungakhale kuphonyeka kukumbira winango kuti ambatisankhulire bzakucita. Akristau an’funika kumbapfunzisa mphanvu zawo za kuzindikira na kumbaziphatisa basa. (Weheb. 5:14) Tensenefe tin’funika kumbakumbukira mafala yakufuliziridwa ya Paulo yakuti: ‘Ali-wense an’dzanyamula mtolo wace.’—Wag. 6:5. w16.05 3:15, 16

Yahova akambawona wanthu, iye ambanyang’anisa lini mawonekedwe ya kunja. M’mbuto mwace iye ambawona mu mtima, mkati mwa munthu. (1 Sam. 16:7b) Cadidi cimweci cidawonekera pomwe Mulungu adakhazikisa gwere lacikristau. Iye ambakwewera wanthu kwa iye na mwana wace, wanthu womwe angawoneke ninga wakusaya kufunika. (Ju. 6:44) M’bodzi mwa wanthu ninga amwewa ni m’Farizeu wakucemeredwa Saulo ndipo Yahova, ‘nyakupenda mitima,’ alibe kuwona Saulo ninga dongo lakusaya phindu. (Mim. 17:3) M’mbuto mwace, Mulungu adawona kuti iye angadakhala ninga dongo lomwe ndakubvuma kuumbika licikhala combo cakufunika—inde, ‘combo cace cakusankhulidwa’ kuti acitire umboni kwa ‘wanthu wa mitundu inango, pabodzi na kwa wamambo na wana wa Jirayeri.’ (Mab. 9:15) Winango omwe Mulungu adawawona kuti angadadzakhala bzombo ‘bzakulemekezeka’ adaphatanidza wanthu omwe akhali bzidakwa, wa makhalidwe yakuipa na mbava. (War. 9:21; 1 Wak. 6:9-11) Pomwe iwo adakhala na cidziwiso ca m’Fala la Mulungu na kulatiza cikhulupiro, adabvuma kuumbidwa na Yahova. w16.06 1:4

Makonzedwe ya Mulungu yakutithandiza kuti tipitirize kukhala ninga dongo lakufewa, yambaphatanidza Fala lace, gwere lacikristau na utumiki bwakumunda. Ninga madzi yakufewesera dongo, kuwerenga Bibliya nsiku na nsiku pabodzi na kumbakumbukira bzomwe tawerengabzo bzingatithandize kukhala wakufewa m’manja mwa Yahova. Ndipo Yahova akhafuna kuti wamambo wa ku Jirayeri ambabzinembere Malamulo ya Mulungu aciyawerenga nsiku zense. (Bzak. 17:18, 19) Apostolo adazindikira kuti kuwerenga na kukumbukira bzomwe akhawerenga m’Bzinembo bzikhali bzakufunika pa utumiki bwawo. Iwo akhambalewa kazinji kense bzomwe bzikhadanembedwa m’Bzinembo bzacihebereu na kubzifotokoza m’matsamba yawo ndipo adalimbisa wathu omwe akhawapalizira kuti ambacitembo bzibodzi-bodzi. (Mab. 17:11) Nsiku zino, timbawonambo kuti mpsakufunika kwene-kwene kuwerenga nsiku zense Fala la Mulungu, kucita mpembo na kumbakumbukira bzomwe tawerengabzo. (1 Tim. 4:15) Kucita bzimwebzi kumbatithandiza kupitiriza kukhala wakubzicepswa pamaso pa Yahova na kukhala wakufewa m’manja mwace. w16.06 2:10

Bzimwebzi bzidawoneka kuti bzikhali bzakufunika pa bzakucitika bza tsapanopa pa nkhondo yomwe idapha wanthu azinji kwene-kwene. Mwa ciratizo, wanthu 55 midyau adaphedwa pa Nkhondo Yaciwiri Yapadziko lense la pansi. Na tenepo, Mboni za Yahova ziribe kuthandizira pa kupha kumweku. (Mik. 4:1, 3) Bzimwebzi bzidawathandiza kupitiriza kukhala ‘wakucena pa mulandu wa mulopa wa wanthu wense.’ (Mab. 20:26) Kuyenda patsogolo kwa wanthu wa Mulungu kunkucitika m’dziko lakuipali, lomwe Bibliya limbalewa kuti linkutsogoleredwa na Sathani, ‘mulungu wa mkonzedwe uno wa bzinthu.’ (2 Wak. 4:4) Iye ankutsogolera wanthu wa ndale wa m’dzikoli pabodzi na nkhani zakumwazidwa m’bzikasi. Koma iye angakwanise lini kuimisa basa lakupalizira bzipsa bzabwino. Na tenepo, Sathani pakudziwa kuti kamusalira kanthawe kakucepa, iye ankuyezera kucosa wanthu pa kunamata kwacadidi ndipo iye ankuphatisa basa njira zakusiyana-siyana pakucita bzimwebzi.—Cibv. 12:12. w16.06 4:3, 4

Jezu adakumbusa anyakupfunza wace momwe Yahova ambasamalirira cirengedwe cace. Jezu adaphatisa basa ciratizo ca ‘maluwa ya m’thengo.’ Ndipo ‘maluwaya’ yangakhale ya mitundu yakusiyana-siyana. Palibe maluwa yali-yense yomwe yambabzikonzera bzakubvala. Koma iyo njakudeka kwene-kwene ndipo Jezu adalewa kuti ‘napo Salomau mu umbiri bwace bwense alibe kubvalira ninga libodzi mwa maluwaya’! Kumbukirani bzomwe Jezu adalewa patsogolo pace: ‘Penu Mulungu ambabvazika bzakumera bza m’thengo . . . , kodi iye angaleke kukubvazikani kuposa pamwepo, imwe wacikhulupiro cakucepamwe?’ (Mat. 6:29, 30) Kulewa cadidi iye an’dzacitadi bzimwebzo! Koma anyakupfunza wa Jezu akhafunikira cikhulupiro cikulu. (Mat. 8:26; 14:31; 16:8; 17:20) Iwo akhafunika kukhulupira kuti Yahova akhafuna kuwasamalira ndipo iye angadacitadi bzimwebzo. Apa tani bza ifepano? Kodi timbakhulupirambo kuti Yahova an’dzatisamalira? w16.07 1:15, 16

Bzimwebzi bzimbathandauza kuti pa bzineso bzense bzomwe tingagumane nabzo pa moyo, Yahova an’dzatipasa bzomwe mpsakufunika kuti tikwanise kupirira bzineso bziri-bzense. (1 Pe. 1:6) Ifepano timbatambira bzisimbo bzizinji thangwe rakuti Yahova ambalatiza kudeka mtima kwace kukulu mu njira zakusiyana-siyana. Cibodzi mwa bzisimbobzi ni kulekereredwa pikado zathu. Thangwe ra kudeka mtima kwace kukulu, Yahova ambatilekerera pikado zathu. Tsono iye ambacita bzimwebzi kokha tikakungula na kupitiriza kulimbana na bzikhumbo bzathu bza pikadobzo. (1 Ju. 1:8, 9) Paulo adati: ‘[Yahova] adatipulumusa ku mphanvu ya utongi bwa mdima, acititumiza ku umambo bwa Mwana wace wakufunidwa, omwe mwa iye tidalomboledwa, na kulekereredwa bzakuphonya bzathu.’ (Wakol. 1:13, 14) Tinkutenda kwene-kwene nsisi za Mulungu ndipopa timbafuna kumutumbiza. Ndipo thangwe rakuti Yahova ambatilekerera pikado zathu, ifepano tingatambire pomwe bzisimbo bzinango bzizinji. w16.07 3:7-9

Kupambula bzomwe Sathani adacita mu Edeni, Yahova adatsimikiza kuti mtundu wa wanthu ukhale na cidikhiro ca kutsogolo. Cidikhiroci cimbagumanika mu polofesiya yakuyambirira m’Bibliya. Iye angadatumiza m’bodzi pa bzakulengedwa bzauzimubzi kuti ‘akaswanye’ Dyabu. Mbeuyo ingadacitisa kuti bzikwanisike kuti wanthu apfatse na bzomwe banja lakuyamba lidaluza. Wanthu wakubvera angadakhala na mwayi wakukhala na moyo pa dziko kwamuyaya ninga momwe Yahova akhafunira. (Ju. 3:16) Kuphonya komwe Adamu na Eva adacita, kudatokonya banja lawo na malowozi yense yomwe yangadadzabwera patsogolo pace. Mwa ciratizo, kuyambira Eva mpaka akazi wense ambabonera na kuwawa pakubala. Akazi ambakhala na cikhumbo cikulu ca kukhala na amuna wawo, koma amuna ndiwo ambatsogolera azikazi wawo, nthawe zinango mpaka ambawaboneresa ninga momwe timbawonera nsiku zino. (Ciy. 3:16) Yahova ambadikhira kuti amuna ambakhale wa lufoyi ninga msolo wa banja ndipo iye ambadikhirambo kuti akazi ambabvere kwene-kwene amuna wawo. (Wayef. 5:33) Banja lacikristau likacitira bzinthu pabodzi, mabvuto mazinji yangamale. w16.08 1:6, 7

Bibliya limbalatiza kuti pana mathangwe yakubveka bwino yakuti wanthu wakulowolana apitirize kukhala pabodzi napo penu m’bodzi ambanamata lini Yahova. (1 Wak. 7:12-14) Munthu wakusaya kukhulupirayo ‘ngwakucenesedwa’ thangwe ngwakulowolana na mtumiki wa Mulungu. Wana wawo ang’ono ambawonedwa kukhala ‘wakucena’ ndipo ambakhala wakukhotcereredwa na Mulungu. Pana bziratizo bzabwino kwene-kwene bza amuna na akazi wacikristau omwe adathandiza mwanzawo wa m’banja kukhala mtumiki wa Yahova. Mpostolo Pedru ambapereka malango kwa akazi wacikristau kuti ambabvere amuna wawo, ‘kuti winango akakhala wakusaya kukhulupira Fala, atengeke sikuti na mafala, koma na makhalidwe ya azikazi wawo, thangwe ra kuwona wokha na maso yawo makhalidwe yawo yakucena pabodzi na ulemu bwawo bukulu.’—1 Pe. 3:1-4. w16.08 2:14, 15

Yahova ambafuna kuti atumiki wace ambafunane winango na mwanzace ninga abale na mpfumakazi na kuti ambatumikirane. (Lu. 22:24-27) Bibliya limbafotokoza kuti Jezu adapereka cinthu ciri-cense, kuphatanidza moyo wace, kuti athandize winango. (Mat. 20:28) Dorka ‘akhacita bzinthu bzizinji bzabwino na kupereka mphaso za nsisi.’ (Mab. 9:36, 39) Mariya ‘akhacita mabasa mazinji’ kuthandiza abale wace na mpfumakazi ku Roma. (War. 16:6) Kodi tingathandize tani apalizi watsapano kubvesesa kuti mpsakufunika kucitira abale na mpfumakazi wawo bzinthu bzabwino? Tingakumbire apalizi watsapano kuti tiyende nawo kukazungira wanthu wacikulire ayai omwe ankuduwala. Ndipo pomwe abereki ankuzungira abale ninga amwewa, bzikakwanisika angayende pabodzi na wana wawo. Akulu wa gwere akafuna kuyenda kukapereka thandizo la cakudya kuna wanthu wakukalamba ayai kukakonza mbuto zomwe zadzongeka kumui kwawo, iwo angakumbire maswaka ayai apalizi watsapano kuti akaphate nawo pabodzi basalo. Maswaka na apalizi watsapano akambawona momwe abale na mpfumakazi ambasamalirana winango na mwanzace, iwo an’dzapfunza kukumbukira bzomwe angacite kuti ambathandize abale na mpfumakazi m’gwere.—War. 12:10. w16.08 4:13, 14

Mpfumakazi inango yacitswaka ya ku França idati: “Azipfunzisi wa ku xikola kwangu ambadabwisidwa kuti pana anyakupfunza omwe ambakhulupira bza Bibliya.” Wanthu azinji nsiku zino ambakhulupira lini kuti Mulungu ndiye adatilenga. Penu imwepo ndimwe mtumiki wa Yahova ayai munkupfunza bza iye, nthawe zinango mungadabwe na momwe mungalatizire kuti iye ni Mulengi wathu. Bibliya limbatithandiza kuti tikumbukire kucokera pansi pa mtima pa bzomwe timbabva ayai kuwerenga na kumbalikumbukira. Fala la Mulungu limbati: ‘Kukumbuka bwino kun’dzakulindirani.’ Mu njira iponi? Kucita bzimwebzi kun’dzakuthandizani kuti mulambe nzeru zomwe n’zacadidi lini ndipo mun’dzalimbisa cikhulupiro canu kuna Yahova. (Mim 2:10-12) Kuti tikhale na cikhulupiro cakulimba kuna Yahova, tin’funika kumudziwa bwino. (1 Tim. 2:4) Tenepo tikambawerenga Bibliya na mabukhu yathu manango, n’bzakufunika kwene-kwene kuima ticimbakumbukira bzomwe bzinkulewedwabzo. Yezerani kubvesesa bzomwe munkuwerengabzo. w16.09 4:1-3

Napo penu tidaleredwa kuipa ayai moyo wathu tsapano unkuwoneka ninga ulibe cidikhiro, tin’funika kupitiriza kulimbikira na kupirira. Tikacita bzimwebzi, tingatsimikize kuti Yahova an’dzatisimba. (Ciy. 39:21-23) Nsiku zino, tin’funikambo kupirira bzineso bzikulu. Pinango imwepo munkubonera thangwe ra kusaya cirungamo, tsankhulo, kunyozedwa ayai munthu kukucitirani nsanje. M’mbuto mwakutaya mtima, kumbukirani bzomwe bzidathandiza Djakobi, Rakeli na Zuze kuti apitirize kutumikira Yahova mwakukondwa. Mulungu adawalimbisa aciwasimba thangwe iwo akhatenda kwene-kwene kukhala kwawo pa uxamwali na iye. Iwo adapitiriza kucita nyongo ayai kulimbikira na kucita bzinthu mwakubverana na mipembo yawo. Pakuti tinkukhala mu nsiku zakumalizira, n’bzakufunika kupitiriza kukhala na cidikhiro camphanvu cakutsogolo! Kodi mun’kufunisisa kulimbikira ayai kuphata basa mwa mphanvu kuti mubvumidwe na Yahova? w16.09 2:8, 9

Abereki, ciratizo canu ca cikhulupiro n’cakufunika kwene-kwene. Wana wanu an’dzawona bzomwe imwepo mumbacita. Na tenepo pitirizani kulimbisa cikhulupiro canu. Citisani kuti wana wanu ambawone kwa imwepo kuti mumbawona Yahova kukhala wacaiye. Mwa ciratizo, mai na baba winango ku Bermudas akambakhala na thupo na cinthu cinango, iwo ambapemba pabodzi na wana wawo ndipo ambakumbira kuti Yahova awatsogolere. Iwo ambalimbisambo wana wawo kuti ambapembe pawokha. “Tidauzambo mwana wathu mkulu, ‘Khulupira Yahova na mtima wense, pitiriza kutanganidwa na basa la Umambo ndipo leka kukhala na thupo kwene-kwene.’ Iye akambawona bzakutewera bzace, ambadziwa kuti Yahova ankutithandiza. Bzimwebzi bzamuthandiza kuti akhulupire Yahova na Bibliya.” Abereki, lekani kuyebwa kuti mun’funika lini kungingimiza wana wanu kuti akhale na cikhulupiro. Imwepo mumbabzala na kuthiriza, koma Yahova yekha ndiye angakulise. (1 Wak. 3:6) Tenepo, phatani basa lamphanvu la kupfunzisa wana wanu wakufunidwa bza iye ndipo kumbirani mzimu wace kuti uwathandize kukhala na cikhulupiro. Mungatsimikize kuti Yahova an’dzasimba basa lanu lense lomwe mungacite.—Wayef. 6:4. w16.09 5:16-18

Kumbukirani bza Serge na mkazi wace Muriel, omwe adatumikira mu gwere la cirewedwe cacilendo kupitirira magole matatu. Iwo adayamba kuzindikira kuti mwana wawo wacimuna wa magole 17 yakubadwa, akhadekedwa lini na utumiki bwakumunda pabodzi na mitsonkhano. Serge adafotokoza kuti: “Pomwe tidazindikira kuti bzimwebzi bzikhacitisa kuti mwana wathu aleke kuyenda patsogolo mwa uzimu, tidawona kuti bziri bwino kubwerera ku gwere lathu lomwe tidacokera.” Kodi n’ciyani cingathandize abereki kuwona penu an’funika kubwerera mu gwere lomwe limbaphatisa basa cirewedwe comwe wana wawo ambabvesesa bwino? Cakuyamba, iwo an’funika kutsimikiza kuti ana nthawe yakukwanira pabodzi na mphanvu kuti apfunzise wana wawo kufuna Yahova, na kuwapfunzisambo cirewedwe cacilendoco. Caciwiri, abereki angawone kuti wana wawo ankukomedwa lini kupalizira ayai kuyenda ku mitsonkhano thangwe ra kutumikira gawo la cirewedwe cacilendoco. Na mathangwe yamweya, abereki angasankhule kuyenda ku gwere la cirewedwe comwe wana wawo ambacibvesesa. Patsogolo pace, aberekiwo akawona kuti cikhulupiro ca wanawo kuna Yahova calimba, iwo angasankhule kubwerera pomwe ku gwere la cirewedwe cacilendo.—Bzak. 6:5-7. w16.10 2:14, 15

Mwakusaya kupenukira, pinango wanthu akhamubvunza thangwe lomwe Nowe akhamangira cingalawaco. Tingakhulupire kuti Nowe akhandonyamala lini. Bibliya limbalewa kuti Nowe akhali ‘mpalizi wa cilungamo.’ Iye adacenjeza wanthu kuti Mulungu an’funa kubweresa cigumula ca madzi kuti adzapfudze wanthu wakuipa. Bzinkuwonekeratu kuti iye adawauza ndendende ninga momwe Yahova adamuuzira kuti: ‘Cafika cimaliziro ca wanthu wense pamaso pangu, pakuti dziko ladzala na ciwembo thangwe ra iwo,’ ndipo ‘inepano ndin’bweresa cigumula ca madzi pa dziko la pansi, kuti cidzapfudze cinthu ciri-cense ca moyo. Bzinthu bzense bzomwe bziri pa dziko la pansi bzin’dzafa.’ Patsogolo pace Nowe pinango akhafotokoza bzomwe wanthuwo akhafunika kucita kuti apulumuke. Yahova adalewa kuti: ‘Un’funika kupita mu cingalawamo.’—Ciy. 6:13, 17, 18; 2 Pe. 2:5. w16.10 4:7

Mu Bibliya, Yahova ambapereka malango kwa abereki ya momwe angapfunzisire wana wawo. Akristau an’funika kusamala kuti aleke kutengera makumbukidwe ya m’dzikoli. (Wayef. 2:2) Mwa ciratizo, m’madziko manango, mwamuna angakumbuke kuti: ‘M’dziko lathu lino, akazi ndiwo ambapfunzisa wana.’ Tsono Bibliya limbalewa kuti amuna ambapfunzise wana wawo bza Yahova. (Wayef. 6:4) Amuna na akazi omwe ambafuna Yahova ambafunambo kuti wana wawo akhale pa uxamwali bwakulimba na Yahova, ninga momwe Samuyeri adacitira pomwe akhali mwana. (1 Sam. 3:19) Ni nzeru kuyamba kukumbukira bzomwe Bibliya limbalewa tikanati tacita cakusankhula cikulu pa nkhani ya banja lathu na basa. Tin’funika thandizo la baba wathu Yahova thangwe tingakwanise lini kutsogolera tekha nzayo zathu. w16.11 3:14, 15

Tikambanyang’anisa bzinthu bzomwe Yahova adalenga, timbawoneratu kuti iye ni Mulungu wakulinganizika. Yahova ‘adatala dziko la pansi mwanzeru. Iye adakhazikisa kudzulu mwakuzindikira.’ (Mim. 3:19) Pana bzinthu bzizinji bzomwe Yahova adalenga bzomwe timbabzidziwa lini. Kulewa cadidi, ‘timbandobva mwa pansi-pansi mafala yace.’ (Djobi 26:14) Bzinthu bzakucepa bzomwe timbadziwa bza m’cirengedwe cathuci, bzimbatithandiza kuwona kuti Yahova ni Mulungu wakulinganizika. Nyenyezi ziripo zizinji kwene-kwene ndipo izo pabodzi na mapulaneta zimbazungulira dzuwa mwa njira yakulinganizika. Bzensebzi bzimbakwanisika kokha thangwe Yahova adalinganiziratu njira zomwe mapulaneta na nyenyezi zingadafambira. Tikambakumbukira momwe iye ‘adalengera kudzulu’ na dziko la pansi mwanzeru, timbafuna kumutumbiza, kumunamata na kukhala wakukhulupirika kwa iye.—Psal. 136:1, 5-9. w16.11 2:3

Bukhu la Malakiya 3:1-3 limbafotokoza bzomwe bzidacitikira anyakupfunza Bibliya pakati pa 1914 mpaka kumayambiriro kwa 1919. Yahova Mulungu omwe ni ‘Mbuya wacadidi’ na Jezu Kristu ninga ‘mtumiki wa mpangano,’ adabwera kudzazondera ‘wana wa Levi,’ omwe akhaimira akristau wakudzozedwa. Pomwe Yahova adawathandiza kubvesesa na kuwacenesa, iwo adakhala wakukonzeka kutambira basa latsapano. Mu 1919, Jezu adaikha ‘kapolo wakukhulupirika na wanzeru,’ kuti atsogolere na kupfunzisa atumiki wense wa Mulungu. (Mat. 24:45) Pakumalizira pace atumiki wa Mulungu adatsudzulidwa pa ukapolo bwa Babulo Mkulu. Kuyambira pamwepo mpaka pano, iwo ankupfunza bzizinji bza cakulinga ca Mulungu ndipo lufoyi lawo kwa iye linkuthumizirika. Iwo ankudekedwa kwene-kwene na bzisimbo bza Yahova! w16.11 5:14

Timbafuna Yahova ‘thangwe iye ndiye omwe adayamba kutifuna.’ (1 Ju. 4:19) Ninga ibodzi mwa njira yakulatizira lufoyi lace, Yahova ambasimba atumiki wace wakukhulupirika mwakucita kufuna. Pomwe lufoyi lathu kuna Yahova linkukula, cikhulupiro cathu cimbalimba ndipo tinkutsimikiza kuti Yahova an’dzasimba wale omwe iye ambawafuna. (Waheb. 11:6) Yahova ambafunisisa kubaira! Imweyi ni mbali ya khalidwe lace. Tenepo cikhulupiro cathu kuna Mulungu cingakhale lini cakukwanira penu timbakhulupira lini kuti iye an’dzabaira wale omwe ambamulinga na mtima wense, pakuti ‘cikhulupiro ndico cidikhiro cakutsimikizika ca bzinthu bzakudikhiridwa.’ (Waheb. 11:1) Inde, cikhulupiro cimbaphatanidza kudikhirira bzisimbo bzomwe Mulungu adapicira. Ninga momwe vesi la lero linkulewera, Yahova ankutikumbira kuti ticite nyongo yakugumana bzisimbo bzace. Tikambabvuma mkumbiroyu timbalatiza kuti timbakhulupira ndipo timbatenda mphaso ya Yahova. w16.12 4:1-3

Napo munthu omwe ankutumikira Yahova kwa magole mazinji, angayambe kukhala na moyo ‘wakuteweza bzicito bza thupi.’ Kodi Paulo akhathandauza kuti tin’funika lini kumbakumbukambo bzinthu bzinango ninga bzakudya, basa, bzakutsangalaza ayai bza malowozi? Ne. Bzimwebzi ni bzinthu bzomwe bzimbacitika mwacibadwa pa moyo. Napo Jezu akhakomedwambo na cakudya ndipo iye adadyesa winango, iye akhafunika kukhalambo na nthawe ya kupuma. Ndipo Paulo adanembambo kuti kugonana n’cinthu cakufunika kwa wanthu wakulowolana. Fala la cigirego lomwe Paulo adaliphatisa basa pamwepa limbalewa bza kuikha makumbukidwe yense na bzakulinga bzense pa cinthu cinango. Mdziwi munango adafotokoza kuti mafalaya yambalewa bza wanthu omwe “ambakumbuka kwene-kwene bza cinthu cinango, ambacilewa kawiri-kawiri,” ndipo ambaciikha pa mbuto yakuyamba pa moyo wawo. Iwo ambalekerera bzikhumbo bzimwebzi kuti bzitsogolere moyo wawo. w16.12 2:5,, 9, 10

Tikambalekerera bzikhumbo bzathu bzakuipa, tingayambe kubzikuza. Azinji ambayamba kubzikuza thangwe ra kufuna kubvekera, kukhala na njiru ayai kusaya kusamalira ukali bwawo. Bzimwebzi bzidacitika kale na wanthu winango wakulewedwa m’Bibliya, ninga Abisalomu, Uziya na Nabukadinazori. Tenepo, Yahova adawauza kuti akhafunika kukhala wakubzicepswa. (2 Sam. 15:1-6; 18:9-17; 2 Nkha. 26:16-21; Dan. 5:18-21) Yalipo mathangwe manango yomwe yangacitise kuti wanthu nthawe zinango aleke kukhala wakubzicepswa. Kumbukirani ciratizo ca Abimeleki na Pedru. (Ciy. 20:2-7; Mat. 26:31-35) Kodi wanthu amwewa adabzikuza? Kodi tingalewe kuti iwo akhanati kubvesesa nkhani yenseneyo ayai iwo adathamanga na kukumbuka? Pakuti tingakwanise lini kuwona bza mumtima, tin’funika lini kuyeruza wanthu pa bzicito bzawo. w17.01 3:9, 10

Ninga mansiwa wakusauka ule, atumiki wa Yahova wa nsiku zino ambakhulupira kuti akaikha Umambo pakuyamba, Yahova an’dzawapasa bzakufunika pa moyo wawo. (Mat. 6:33) Onani ciratizo ca Malcolm. Pomwe iye na mkazi wace akhatumikira Yahova kwa magole mazinji, adagumana na bzinthu bzabwino na bzakuipa. Iye adalewa kuti nthawe zinango moyo umbabveseseka lini ndipo ngwakunesa, koma Yahova ambasimba wale omwe ambamukhulupira. Kodi Malcolm adapereka malango yaponi? Iye adati: “Timbapembe kuti tikhale wakukhulupirika pakutumikira Yahova. Timbakumbukire bzomwe tingakwanise kucita, si kuti bzomwe tingakwanise lini.” Dziko lakuipali linkuyenda liciipiratu ndipopa tingadikhire kugumana mabvuto mazinjisa. (2 Tim. 3:1, 13) Ni bwino kwene-kwene kuti tileke kumbabzipasa mulandu thangwe ra bzakuphonya bzomwe tidabzisiya kale-kale. M’mbuto mwace, tin’funika kulimbisa cikhulupiro cathu kuna Yahova na kulinga kucita bzinthu bzomwe tingakwanise. w17.01 1:17-19

Davide akhana thupo thangwe pakhalibe nyumba ayai tempwlo yakunamatira Yahova, ndipopa iye adafuna kumangira Yahova tempwlo. Tsono Yahova adauza Davide mafala ya vesi ya nsiku ya leroya. Yahova adapicira Davide kuti angadakhala naye nthawe zense. Koma Iye adauza Davideyo kuti mwana wace ndiye omwe angadamanga tempwlo. Kodi n’ciyani comwe Davide adacita? (1 Nkha. 17:1-4, 8, 11, 12; 29:1) Davide akhafuna kwene-kwene kumanga tempwlo ya Yahova, tenepo, pinango iye adasunama kwene-kwene pomwe adadziwa kuti ndiye lini omwe angadamanga. Tsono napo bzikhali tenepoyo, iye adathandizira kwene-kwene basa lomwe mwana wace angadadzalicita. Davide adamuthandiza kulinganiza na kusankhula wanthu omwe angadadzamanga tempwloyo, kunyang’ana simbi, mkuwa, siriva, oro na matabwa. Tempwloyo idadzadziwika na dzina lakuti tempwlo ya Salomau, tsono Davide alibe kukhala na thupo na bzimwebzi. M’mbuto mwace, iye adalimbisa Salomau aciti: ‘Tsapano, mwana wangu, Yahova akhale nawe, ndipo bzinthu bzikufambire bwino kuti umange nyumba ya Yahova.’—1 Nkha. 22:11, 14-16. w17.01 5:6, 7

Napo tigumane na mazunzo, tin’funika kucita ciri-cense comwe tingakwanise kuti tipitirize kukhala na moyo mwakubverana na bzomwe Yahova ambatipfunzisa. Tikakhala na moyo wakubverana na mitemo ya Yahova, timbalemekezesa dzina lace. (Mat. 5:14-16) Timbalatiza kuti malamulo ya Yahova njabwino na kuti Sathani ni nyakunama. Timbaphonya bzinthu bzinango thangwe ndife lini wakulungama. Koma tikaphonya, timbakungula ndipo timbacita ciri-cense kuti tileke kucita bzinthu bzomwe bzingapswipize dzina la Yahova. Penu ndife anyakudzozedwa ayai wa ‘mabira manango,’ Yahova ambalekerera pikado zathu tikakhala na cikhulupiro pa cakulombolera. Iye ambatambira ali-wense omwe ambabzipereka kwa iye kuti akhale anamati wace. Iye ambawona Akristau wakudzozedwa wakulungama ninga wana wace ndipo wa ‘mabira manango,’ wakukhulupirika, ambawawona ninga axamwali wace. (Ju. 10:16; War. 5:1, 2; Tiy. 2:21-25) Napo tsapano, cakulombolera cimbaticitisa kuti tikhale pa mbverano wabwino na Baba wathu wa kudzulu na kucenesa dzina lace. w17.02 2:5, 6