Dezembro

Mpostolo Pedru adanemba mafala yamweya kuti alimbise Akristau kupirira mabvuto makulu yomwe Sathani akhawabweresera. Ciratizo ca “wale omwe adapirira” cimbatipfunzisa momwe tingapitirizire kukhala wakulimba ndipo cimbatikumbusa kuti tikapitiriza kukhulupirika, tin’dzasimbidwa. (Tiy. 5:11) Pinango imwepo munkugumana na citsutso cikulu na mazunzo kucokera kwa wanthu omwe ambawenga kunamata kwacadidi. Ayai ndimwe m’kulu wa gwere ayai nyakunyang’anira dera ndipo munkulemedwa kwene-kwene na udindo bwanu. Kumbukirani ciratizo ca Paulo. Iye adagumana na bzineso bzizinji bza ‘kunja kwa thupi’ na anyakuzunza wakuipa mtima ndipo iye adabzibva kuti akhali wakupanikizika nsiku zense thangwe ra thupo lomwe akhanalo ku magwere. (2 Wak. 11:23-29) Tenepo, iye alibe kubwerera m’mbuyo, ndipo ciratizo cace cidalimbisa winango. (2 Wak. 1:6) Mukambapirira mayezo, kumbukirani kuti ciratizo canu cimbalimbisambo winango kuti apirire. w16.04 2:11, 14

Napo kuti wanthu angabverane nafe ndipo winango angatitsutse kwene-kwene, koma mbang’ono-ng’ono womwe angalewe kuti Mboni za Yahova ninga gulu zimbadziwika lini na basa lawo lakupalizira. Pinango mudagumana kale na wanthu mu utumiki bwanu womwe adalewa kale kuti napo iwo ambatsutsa bzikhulupiro bzathu, koma ambalemekeza basa lathu. Ninga momwe timbadziwira, Jezu akhadalewa kale kuti bzipsa bzabwino bza Umambo bzingadadzapalizidwa pa dziko lense la pansi komwe kuna wanthu. (Mat. 24:14) Wanthu wa m’bzipembedzo bzizinji ambakukumbuka kuti ndiwo omwe ankupalizira bzipsa bzabwino. Na tenepo, nyongo yawo imbandomalira pa umboni bwa iwo wokha, mabasa ya cipembedzo ayai nkhani zakufotokozedwa pa bzikasi bzakumwazira nkhani—bzomwe bzingakhale TV ayai interneti. Winango ambacita mabasa yakulatiza ubwino bwawo ayai ambacita nyongo pa mabasa ya ulapi na nkhani za mapfunziro. Kodi bzimwebzi bzinkubverana tani pakufuna kundendemeza na mtemo omwe Jezu adapereka kuna anyakupfunza wace? w16.05 2:1, 2

Kuyambira mu 1914, maboma ya wanthu yadakhala anyamadulanthaka wa Umambo bwa Mulungu, bomwe tsapanopapa bun’dzayeruza mitundu ya wanthu, na kuwapfudziratu. (Psal. 2:2, 7-9) Mulungu ankulekerera atongi wa m’dzikoli kuti apitirize kukhala, thangwe iwo ambacitisa kuti bzinthu bzikhale bwino, pakuti iwo ambatithandiza kuti tipalizire bzipsa bzabwino bza Umambo. (War. 13:3, 4) Mulungu ankutilimbisa kuti timbapembere wale omwe ana udindo, maka-maka penu bzakusankhula bzawo bzinkutokonya kunamata kwathu. (1 Tim. 2:1, 2) Timbakumbira atongi wa wanthu kuti ambaticitire cirungamo, ninga momwe mpostolo Paulo adacitira. Napo kuti Bibliya limbapfunzisa kuti nyamadulanthaka wa Mulungu, Sathani, ana udindo pa ndale, bzimwebzi bzinkuthandauza lini kuti iye ambanyang’anira bzakucita bza mtongi m’bodzi na m’bodzi. (Lu. 4:5, 6) Tenepo, tin’funika kutcenkha kuphatisa basa ciri-cense comwe cinkulalatiza kuti cinkufambisidwa na Dyabu. M’mbuto mwace, pakucita bzinthu na ‘maboma na atongi,’ ifepano ‘timbalewera lini bzakuipa munthu ali-wense.’—Tito 3:1, 2. w16.04 4:5, 6

Pinango imwepo mungabzibvunze kuti: ‘Kodi tingadziwe tani bzomwe Yahova ambafuna penu m’Fala lace mulibe cakutonga comwe cimbaleweratu bza nkhaniyo?’ Penu palibe cakutonga ca m’Bibliya comwe cimbaleweratu bza nkhaniyo, kodi tingadziwe tani bzomwe Yahova ambafuna? Mwa kupemba kuna iye na kubvuma kuti iye atitsogolere na mzimu wakucena. Kumbukirani momwe Jezu adazindikirira bzomwe Baba wace akhafuna kuti iye acite. Mu bzakucitika bziwiri bzakunembedwa m’Bibliya, Jezu adayamba na kupemba ndipo adapasa cakudya thimu likulu la wanthu mwakudabwisa. (Mat. 14:17-20; 15:34-37) Mwakusiyana na bzimwebzi, napo akhana njala, iye adalamba kusandusa minyala kuti ikhale mkate pomwe adayezedwa na Dyabu m’dambo. (Mat. 4:2-4) Pakuti iye akhadazolowerana na makumbukidwe ya Baba wace, Jezu akhadziwa kuti iye akhafunika lini kusandusa minyalayo kuti ikhale mkate. Inde, Jezu adazindikira kuti si kufuna kwa Mulungu kuti iye aphatise basa mphanvu imweyi kuti agumane phindu. Mwa kulamba kucita bzimwebzi, iye adalatiza kuti akhakhulupira citsogozo ca Yahova na kuti ndiye omwe angadamupasa cakudya. w16.05 3:7, 8

Mbali zinango za Bibliya n’zakulungamiratu pa kuthandiza munthu ali-wense payekha ayai gulu linango la wanthu. Ndipopa tinati kuwerenga Fala la Mulungu, tingacite bwino kupemba kukumbira kuti tikhale na mtima wakutsudzuka na nzeru kuti tikumbukire bzomwe Yahova ankufuna kuti tipfunze. (Eza. 7:10; Tiy. 1:5) Pakuwerenga kwanu nkhani za m’Bibliya, mbakhalani na nthawe ya kuima mucibzibvunza mibvunzo ninga iyi: ‘Kodi bzimwebzi bzinkundiuza ciyani bza Yahova? Kodi ndingaphatise tani basa nfundo zimwezi pa moyo wangu? Kodi ndingaziphatise tani basa pakuthandiza winango?’ Tikambakumbukira mibvunzo ninga imweyi, mwakusaya kupenukira, tin’dzapfunza bzizinji pa kuwerenga kwathu Bibliya. Mwa ciratizo, kumbukirani bza Mavesi yakulewa bza Mkristau kuti athemere kukhala mkulu. (1 Tim. 3:2-7) Pakuti azinji wa ife tinkutumikira lini ninga akulu, pinango tingakumbukire kuti mbali zimwezi zingaphate lini basa kwene-kwene kuna ife. Na tenepo, tingawone kuti ndandanda wa bzinthu bzakufotokozedwa pa mavesi yamweya bzimbapasa phindu tensenefe mu njira zakusiyana-siyana. w16.05 5:7, 8

Pomwe akapolo Wacidjuda adapita mu Babulo wakaleyo, iwo adawona kuti mu mzindamo mukhadadzala na bzifanikiso ndipo adawonambo kuti wanthu akhali akapolo wa mizimu yakuipa. Napo bzikhali tenepo, Ajuda wakukhulupirika, ninga Danyeri na anzace atatu, adalamba kuumbidwa na mzimu wa dziko la Babulo. (Dan. 1:6, 8, 12; 3:16-18) Danyeri na anzace wale adakhala wakutsimikiza kubzipereka kokha kwa Yahova ninga Nyakuwaumba wawo. Ndipo bzidawafambiradi bwino! Danyeri adakhala ku Babulo pafupi-fupi moyo wace wense; koma, anjo wa Mulungu adamuuza kuti iye akhali ‘munthu wakufunika kwene-kwene.’ (Dan. 10:11, 19) Mu nthawe za m’Bibliya, nyakuumba angadaikha dongo m’cakuumbira acikonza cinthu ninga momwe iye ankufunira. Nsiku zino, anamati wacadidi ankuzindikira kuti Yahova ninga Mtongi wa cirengedwe cense, ndiye yekha omwe ana ugo bwa kuumba wanthu. (Jer. 18:6) Yahova ana udindo bwa kutiumba patekha. Na tenepo iye ambazindikira ufulu bwathu bwa kusankhula ndipo ambafuna kuti tikhale ku mbali yace mwakucita kufuna tekha. w16.06 2:1, 2

Sathani ambafuna kuti tikhulupire kuti tingapfatse na moyo pokha-pokha tikakhala na bzinthu bzizinji. Tenepo iye ambaphatisa basa dziko lace na ‘cikhumbo ca maso’ kuti ayeze kuticitisa kuti nthawe zense timbafune kuthumizira bzinthu. (1 Ju. 2:15-17; Ciy. 3:6; Mim. 27:20) Timbawona ayai kubva kawiri-kawiri bzinthu bzomwe bzinkutsatsidwa aciyezera kuticitisa kuti tigule cinthu cipsa. Kodi mudagula kale cinthu cinango kokha thangwe mwaciwona mu loja ayai mwaciwona cinkutsatsidwa? Penu n’tenepo, pinango na kupita kwa nthawe mudazindikira kuti mukhafunikiradi lini kugula cinthu cimweco. Tikambagula bzinthu bzomwe mpsakusaya kufunikira, timbakhala tinkuboneresa moyo wathu. Bzinthu bzimwebzi bzingatitazise kutumikira bwino Yahova. Mwa ciratizo, tingakhale lini na nthawe yakukwanira kuti tipfunze Bibliya, kukonzekera na kugumanika pa mitsonkhano na kumbayenda mu utumiki nthawe zense. Kumbukirani, mpostolo Juwau adacenjeza kuti: ‘Dziko linkuyenda pabodzi na bzikhumbo bzace.’ w16.07 1:3, 4

Gwere lacikristau la m’magole dzana yakuyamba likhaphatanidza Ajuda, Agirego, Aroma na wanthu wa mitundu inango. Iwo akhali m’bzipembedzo bzakusiyana-siyana, bzizolowezi na wanthu wa moyo wakusiyana-siyana. Thangwe ra bzimwebzi, winango bzikhawanesa kubvuma njira ipswa ya kunamatira ayai kusiiratu bzicito bzawo bzakale. Mpostolo Paulo adawona kuti bzikhathemera kuwakumbusa kuti Akristau ana Mulungu m’bodzi yekha, Yahova. Tsono tani bza m’gwere lacikristau nsiku zino? Mpolofeta Zaiya adaleweratu kuti ‘mu nsiku zakumalizira,’ wanthu wa mitundu yense an’dzayenda pa mbuto ya padzulu ya Yahova ya kunamata kwa cadidi. Iwo an’dzalewa kuti: ‘[Yahova] an’dzatipfunzisa bza njira zace ndipo ife tin’dzafamba m’njira zacezo.’ (Zai. 2:2, 3) Ndife wakukondwa kuwona na maso yathu kukwanisika kwa polofesiyayi! Bzakutewera mpsakuti pana magwere mazinji ya mitundu, bzikhalidwe na bzirewedwe bzakusiyana-siyana bzomwe bzinkutumbiza Yahova. w16.06 3:15, 16

Mpsakunesa kukumbukira bzinthu bzakudeka bzomwe Yahova adakonzera Akristau wakudzozedwa pomwe iwo an’dzatonga na Kristu kudzulu. (Lu. 22:28-30; Waf. 3:20, 21; 1 Ju. 3:2) Iwo an’dzakhala ‘Jeruzalemu mupsa,’ mkazi wa Kristu. (Cibv. 3:12; 17:14; 21:2, 9, 10) Iwo an’dzaphata basa pabodzi na Jezu pa ‘kupoza mitundu ya wanthu.’ Iwo an’dzathandiza wanthu kuti atsudzulidwe ku mtolo wa pikado na infa na kuwathandiza kuti akhale wakulungama. (Cibv. 22:1, 2, 17) Njira ibodzi pa njira zikulu-zikulu zomwe Yahova an’dzalatizira kudeka mtima kwace kukulu pa dziko la pansi in’dzakhala kulamusa wanthu kucokera ku ‘Thenje.’ (Djobi 14:13-15; Ju. 5:28, 29) Kodi mbani an’dzalamusidwa? Amuna na akazi wakukhulupirika omwe adafa Kristu akanati kufa pabodzi na wale omwe ni ‘mabira yanango’ omwe ambafa wakukhulupirika kuna Yahova mkati mwa nsiku zakumalizira. Wanthu wense wakukhulupirikawa an’dzakhala pomwe na moyo kuti adzapitirize kutumikira Yahova.—Ju. 10:16. w16.07 4:13-15

Kodi n’ciyani comwe cin’dzatithandiza ‘kupitiriza kukhala tceru’ na kukhala wakukonzekera nsiku ya Yahova? Tin’funika kulimbisa cikhumbo ca kupitiriza kucita bzabwino. Koma kucita bzimwebzi n’kwakukwanira lini. Zitasala nsiku zakucepa kuti Jezu aphendwe, iye adauza anyakupfunza wace kuti iwo akhafunika kupitiriza kupemba kuna Yahova kuti awathandize. (Lu. 21:36) Kuti tikhale tceru nsiku zino zakumalizira, tin’funikambo kumbapemba kwene-kwene kuna Yahova nthawe zense. (1 Pe. 4:7) Jezu adalewa kuti cimaliziro cin’dzafika ‘pa nthawe yomwe munkuikumbukira lini.’ (Mat. 24:44) Tenepo tin’funika kukhala wakukonzeka nthawe zense. Ino ni nthawe lini ya kukhala na moyo mwakubverana na dziko la Sathaniri, lomwe limbalewa kuti limbabweresa cikondweso koma bzin’dzacitika lini. M’mbuto mwace, mwa kuphatisa basa Bibliya, Yahova na Jezu ambatiuza momwe tingapitirizire kukhala tceru. Tenepo bwerani tikhale tceru pa mapolofesiya ya m’Bibliya na kuwona momwe yankukwanisikira. Ndipo tingapitirize kukhala pafupi na Yahova na kuikha Umambo bwace pa mbuto yakuyamba pa moyo wathu. Tikacita bzimwebzo tin’dzakhala wakukonzeka pomwe cimaliziro cin’dzafika. (Cibv. 22:20) Moyo wathu umbathemba bzimwebzi! w16.07 2:15-17

Banja lingakhale lakulimba penu wanthu wakulowolanawo ‘an’pitiriza kupirirana na kulekererana na mtima wense.’ Pakuti awiriwo mbakusaya kulungama, ali-wense angaphonye. Bzimwebzi bzikacitika, iwo angapfunze na kuphonyako, agapfunzembo kukhala wakulekerera na kulatiza lufoyi mwakutsogoleredwa na mitemo ya m’Bibliya. Lufoyi limweri ‘limbaphatanidzisa wanthu mwamphamvu kwene-kwene kuposa cinthu ciri-cense.’ (Wakol. 3:14) Wanthu wakulowolana angalatize lufoyi limweri mwa kukhala wakupirira, wakudeka mtima na kuleka ‘kukoyerana mathangwe.’ (1 Wak. 13:4, 5) Pakawoneka kusaya kubvesesana, anyakulowolana an’funika kumalisa bvutolo mwakamfulumize nsikuyo inati kumala. (Wayef. 4:26, 27) Bzimbafuna kubzicepswa na kukhwimika kuti munthu alewe kuti “Ndinkupepesa thangwe ra kukukalipisa,” koma kucita bzimwebzi kumbathandiza kuti mabvuto yamale ndipo kumbacitisa kuti wanthu wakulowolana akhale wakuphatana. w16.08 2:6

Jezu adaikha pa mbuto yakuyamba basa lakupalizira bza Umambo. Iye adakhala na nthawe izinji ya kupfunzisa anyakupfunza wace. Iye adawalatiza momwe angapfunzisire na momwe angasamalilire wanthu wa Mulungu. Anyakupfunzawo adapfunza kukhala ninga mbusa omwe ankusamalira mabira yace. (Mat. 10:5-7) Firipi akhatanganidwa na basa lakupalizira, koma iye adapfunzisambo wana wace wacikazi kuti acitembo basa libodzi-bodziro. (Mab. 21:8, 9) Nsiku zino tin’funika kupfunzisambo winango. Thangwe ranyi? M’magwere ya pa dziko lense la pansi, muna alumbwana azinji omwe akanati kubatizidwa. Amwewa an’funika kupfunzisidwa. Tin’funika kuwathandiza kuti abvesese thangwe ranyi mpsabwino kuna iwo kuti ambawerenge na kupfunza Bibliya pawokha. Ndipo tin’funikambo kuwapfunzisa kupalizira na kupfunzisa bzipsa bzabwino. Abale omwe abatizidwa tsapanopapa an’funika kupfunzisidwa kuti na kupita kwa nthawe angadzatumikire ninga atumiki wakuthandiza na akulu mu gwere. Wensene m’gwere angacite bzizinji kuti athandize watsapano. w16.08 4:1, 2

Tikambaphata basa pabodzi na abale na mpfumakazi zathu timbakhala tinkulimbisa ciphatano cathu. Kucita bzimwebzi kungatithandizembo kuti tikulise uxamwali bwathu bwakusaya kumala na kulimbisa cikhulupiro cathu pa bzisimbo bzomwe Umbambo bwa Mulungu bun’dzabweresa mwakusaya kucedwa. Tikambalimbisa manja ya winango, timbawathandiza kuti apirire bzineso bzikulu na kuti apitirize kukhala na cidikhiro cabwino ca kutsogolo. (Zai. 35:4) Kuthumizira bzimwebzi, tikambathandiza winango, timbakhala tinkulimbisa manja yathu ndipo bzimbatithandiza kuti tinyang’anise kutsogolo. Tikambakumbukira momwe Yahova adathandizira na kukhotcerera atumiki wace wakukhulupirika wakale, bzimbacitisa kuti cikhulupiro cathu kuna iye cikhale cakulimba. Tenepo mukagumana na mabvuto pabodzi na thupo, ‘lekani kulekerera kuti manja yanu yatepe’! (Sof. 3:16) Mungatsimikize kuti mukakumbira thandizo la Yahova mwa mpembo, boko lace lamphanvu lin’dzakulimbisani na kukutsogolerani ku bzisimbo bza Umambo bzomwe bzin’fika tsapanopapa.—Psal. 73:23, 24. w16.09 1:16-18

Pomwe atumiki wa Mulungu ankusankhula bzakubvala kuti abvale, iwo ambakumbukira mafala yali padzuluya. Kusiyana kwa nyengo, nthawe, mikhalidwe ya pamoyo na bzinthu bzinango bzingatokonye kabvalidwe kathu. Tsono mitemo ya Yahova imbacinja lini. (Malak. 3:6) M’nthawe zakutentha mpsakunesa kwene-kwene kutsimikiza kuti bzakubvala bzathu bzinkupasa ulemu ndipo mpsakuthemera. Abale na mpfumakazi zathu ambatenda kwene-kwene tikambabvala bzakubvala bzakusaya kuthimba kwene-kwene ayai bzakusaya kungwerewera. (Djobi 31:1) Ndipo tikakhala tiri ku gombe ayai pomwe tinkutcula, tin’funika kubvala mwakuthemera. (Mim. 11:2, 20) Napo wanthu azinji wa m’dzikoli ambabvala bzakubvala bzakungwerewera pa kutcula, ifepano tin’funika kutsimikiza kuti bzakusankhula bzathu bzibwerese mbiri kwa Yahova, Mulungu wathu wakucena. w16.09 3:11, 12

Jezu akhabvunza kawiri-kawiri anyakupfunza wace bzomwe iwo akhakhulupira. Mungatewezerembo ciratizo caceci. Pomwe munkuceza na wana wanu ayai pomwe munkucita nawo bzinthu bzinango, mbawabvunzani bzomwe iwo ankukumbuka ndipo alekeni akuuzeni momwe iwo ankubvera. Mun’funika kupirira penu mwana wanu ankukhulupira lini cinthu cinango comwe Bibliya limbapfunzisa. Athandizeni kugumana mitawiro ya mibvunzo yawo. Mpsabwino kwene-kwene wana wanu akambakubvunzani, thangwe mibvunzoyo imbathandauza bzinthu bzomwe wanawo an’funa kubvesesa. Napo Jezu akhacitambo mibvunzo pomwe akhali mwana. (Lu. 2:46) Adziweni bwino wana wanu. Lekani kukumbuka kuti iwo ana cikhulupiro kuna Yahova kokha thangwe rakuti iwo ambayenda kukapalizira na ku mitsonkhano. Kodi iwo ambawona tani Yahova na Bibliya? Mungacite bwino kufufudza penu ciripo cinthu cinango comwe cimbawacitisa kuwona ninga kuti mpsakunesa kupitiriza kukhala na cikhulupiro kuna Yahova. Mbacezani nawo bza Yahova nsiku zense pomwe munkucita bzinthu pabodzi na wana wanuwo, ndipo mbawapemberani pomwe munawo pabodzi na pomwe muli mwekha. w16.09 5:3-5

Nsiku zino, Mboni za Yahova zizinji zinkutanganika kwene-kwene pa kuthandiza kukwanisika kwa polofesiya ya kupalizira wanthu wa ‘mitundu yense, madzinza yense, bzirewedwe bzense na mbumba zense.’ (Cibv. 14:6) Kodi imwepo munkupfunzambo cirewedwe cinango? Winango ambatumikira ninga mamisiyonario ayai kuyenda kukapalizira ku dziko linango komwe kun’funika apalizi azinji. Winango ayamba kumbatsonkhana na gwere la cirewedwe cinango m’dziko lawolo. Atumiki wense wa Mulungu an’funika kuyamba kulimbisa uzimu bwawo na bwa banja lawo. Nthawe zinango, tingakhale wakutanganidwa ndipo bzingatinese kugumana nthawe yakucita pfunziro la patekha la thandauzo. Tsono wense omwe ali m’gwere la cirewedwe cacilendo ambakhala na mabvuto manango. Wense omwe ankutumikira m’gwere la cirewedwe cacilendo, an’funika kupfunza cirewedweco tsono iwo an’funikambo kutsimikizira kuti ankupfunza mwakukhazikika bzinthu bzakuzika bza Mulungu.—1 Wak. 2:10. w16.10 2:1-3

Nsiku zino, abale na mpfumakazi zathu ankutumikira Yahova mwakukondwa napo ankuzunzidwa. Azinji wa abalewa ali m’kawoko ku Eritreia, Singapura na ku Coreia do Sul, thangwe rakuti ankulamba ‘kuphata mphanga.’ Atumiki wa Yahova azinji ambaikhidwa lini m’kawoko ayai kuboneresedwa mwadzawoneni ninga bzomwe bzinkucitikira abale wathu omwe afotokozedwawa. Koma azinji ankubonera thangwe ra kusauka, matsoka ya cirengedwe na nkhondo. Winango atewezera ciratizo ca Abalahamu, Izaki, Djakobi na Mozeji mwa kusiya kumbuyo cuma cawo ayai mbiri kuti atumikire Yahova. Kodi n’ciyani cimbathandiza abale wathuwa kuti apitirize kukondwa pomwe ankutumikira Yahova? Lufoyi lawo kwa Yahova na cikhulupiro cawo cakulimba pa mapiciro yace. Iwo ambadziwa kuti Yahova an’dzasimba atumiki wace wakukhulupirika na moyo wakusaya kumala mu dziko lipsa, momwe mun’dzakhala cirungamo.—Psal. 37:5, 7, 9, 29. w16.10 3:15, 16

Pa nthawe inango mpolofeta Jeremiya adakhala wakutepa ndipo akhana mantha, koma Yahova adamupicira kumuthandiza. (Jer. 1:6-10) Yahova adatumiza anjo kuti akalimbise mpolofeta wacikulire Danyeri. Anjoyo adalimbisa Danyeri mwa kumuuza kuti ‘ngwakufunika kwene-kwene.’ (Dan. 10:8, 11, 18, 19) Kodi mungalimbisembo abale na mpfumakazi zanu? Tani mucicitambo bzimwebzi kuna apainiya na abale wacikulire omwe ankukwanisa lini kucita bzinthu ninga momwe akhacitira kale-kale? Napo Yahova na Jezu adakhala pabodzi kwa magole mazinji, pomwe Jezu akhali pa dziko la pansi, Yahova akhadziwa kuti iye akhafunika kupitiriza kulimbisa Mwana wace. Kawiri kense, Jezu adabva mafala yakulimbisa ya Baba wace kucokera kudzulu yakuti: ‘Uyu ndiye Mwanangu, wakufunidwa, omwe ndimbakondwa naye.’ (Mat. 3:17; 17:5) Na tenepo Mulungu adalimbisa Jezu ndipo adamutsimikizira kuti akhacita bwino. Usiku bomwe Jezu angadafa, iye adakhala na thupo kwene-kwene. Tenepo, Yahova adatumiza anjo kuti akamulimbise na kumutsangalaza.—Lu. 22:43. w16.11 1:7, 8

Kubziphata mtima n’cinthu cakunesa. Tingasuname ayai kukalipa, munthu akatilewa mafala yakuipa ayai akaticitira bzinthu mwakusaya cirungamo, pinango thangwe ra cikhalidwe cathu, mtundu ayai mawonekedwe yathu. Ndipo bzingatiwawe kwene-kwene penu munthu watilewayo ni m’bale ayai mpfumakazi yathu. Mpsanzeru kuphatisa basa malango ya m’Bibliya yakuti timbabziphate mtima ticimbatcenkha kufulumiza kukalipa. (Mim. 16:32) Bibliya limbatiuzambo kuti timbalekerere winango. Jezu adalewa kuti tikasaya kulekerera anzathu, Yahova an’dzatilekererambo lini. (Mat. 6:14, 15) Bwerani timbapirire ticimbafunisisa kulekerera winango.Tikambasaya kubziphata mtima, ukali bwathu bungathumizirike mwakuti tingayambe kuwenga munthu winango. Ndipo tingacitise winango m’gwere kukumbukambo bzibodzi-bodzi.—Mwam. 19:17, 18. w16.11 3:4-6

Charles Taze Russell pabodzi na anzace, akhafunisisa kudziwa cadidi. Iwo, adayamba kupfunza Bibliya na nyongo mu gole la 1870. Pakuyamba, m’bale Russell akhafuna kugumana cipembedzo comwe cikhapfunzisa cadidi. Iye adandendemeza mwakusamala bzinthu bzomwe bzipembedzo bzakunama bzikhapfunzisa na bzomwe Bibliya limbalewa. Mwakusaya kucedwa iye adazindikira kuti pakhalibe cipembedzo ne na cibodzi comwe cikhateweza ndendende Fala la Mulungu. Ndipo iye adaceza na atsogoleri wa bzipembedzo bzakusiyana-siyana wa m’deralo bza cadidi comwe adacigumana m’Bibliya. M’bale Russell akhadikhira kuti iwo angadabvuma cadidi comwe iye pabodzi na kagulu kace adacigumana m’Bibliya na kuti angadapfunzisa cadidico m’magwere mwawo. Koma atsogoleri wa bzipembedzowo alibe kufuna kubva bzimwebzo. Anyakupfunza Bibliyawo mwakusaya kucedwa adazindikira kuti akhafunika lini kunamata Mulungu pabodzi na omwe akhacita mbali ya cipembedzo cakunama. w16.11 4:14

Timbadziwa kuti tin’funika kutcenkha upombo, kuledzera na pikado zinango zikulu-zikulu ayai pikado zinango zomwe zikhacitidwa na wanthu winango wa mu mzinda wa Kolinto. (1 Wak. 6:9-11) Koma tin’funikambo kutcenkha kucita cinthu ciri-cense comwe cingakondwese lini Yahova. Mwa ciratizo, tin’funika lini kutcenkha kokha upombo koma tin’funikambo kutcenkha bzinthu bzomwe bzingayambise nzeru za upombo. Tin’funika lini kutcenkha kokha kuledzera, koma kumwa mpaka kusala pang’ono kuledzera. Tingafunike nyongo ikulu kuti tilimbane na mayezo yamweya. Cakulinga cathu cin’funika kukhala ca kutcenkha pikado ya mtundu uli-wense napo iciwoneka ninga ing’ono. N’cadidi kuti tingakwanise lini kucita bzinthu ninga ndife wanthu makulungamiratu. Koma mpsakufunika ticite ninga momwe Paulo adalewera kuti: ‘Lekani kubvuma kuti pikado ipitirize kutonga m’mathupi yanu yomwe yangafeyo, kuti mumbabvere bzikhumbo bzace.’—War. 6:12; 7:18-20. w16.12 1:19-21

Jezu adapicira kuti Baba wathu an’dzatipasa mzimu wakucena tikamukumbira. (Lu. 11:10-13) Mzimu wakucena wa Mulungu ayai mphanvu yace yakuphatira nayo basa, imbatithandiza kukulisa makhalidwe yabwino yomwe Mulungu wathu wamphanvu zense anayo. (Wakol. 3:10) Bibliya limbacemera makhalidweya kuti ni ‘cisapo ca mzimu.’ Tikakulisa makhalidwe yabwinoya, tin’dzakhala pa uxamwali bwabwino na winango, ndipo tin’dzatcenkha bzinthu bzomwe bzingatibweresere thupo. Mun’funika kubzicepswa kuti mukhulupire ‘boko lamphanvu la Mulungu’ nakuti ‘mumutulire thupo lanu lense.’ (1 Pe. 5:6, 7) Penu ndimwe wakubzicepswa, Yahova an’dzakuthandizani na kukusamalirani. (Mik. 6:8) Mukazindikira bzomwe mungakwanise kucita na bzomwe mungakwanise lini munʼdzabzithemba lini mwekha koma mun’dzathemba Mulungu, ndipo bzimwebzi bzin’dzacitisa kuti thupo lanu licepe. w16.12 3:7, 12

Ninga ‘mpalizi wa cirungamo,’ Nowe mwakukhulupirika adapalizira mafala ya cenjezo ya Yahova. Basali lidamuthandiza kulimbisa cikhulupiro cace. Kuthumizira pa basa lakupalizirali, iye adateweza malango ya Yahova ya kumanga cingalawa. (Waheb. 11:7) Ninga Nowe, nthawe zense tinkupitiriza kucita ‘basa la Mbuya.’ (1 Wak. 15:58) Mwa ciratizo, tingathandize pa basa la kumangamanga na kukonza-konza mbuto zakudzongeka za Nyumba za Umambo na za Mitsonkhano mikulu-mikulu, kutumikira pa mitsonkhano ya dera na ya cigawo, ayai kuphata basa pa nthambi ayai m’bzipinda bzakusandulizira. Kuposa bzense, tin’funika kupitiriza kutanganidwa na basa lakupalizira, lomwe limbalimbisa cidikhiro cathu ca kutsogolo. Cidikhiroci cimbatithandiza kuti tipitirize kulimbikira kuti tidzagumane moyo.—1 Wak. 9:24. w17.01 1:8, 9

Tin’funikambo kulemekeza ufulu bomwe winango anabo bwakucita bzakusankhula pa moyo wawo. Thangwe ranyi? Pakuti tensenefe tidapasidwa ufulu bwa kusankhula, bzingacitike lini kuti Akristau awiri nthawe zense ambacite bzakusankhula bzakundendemerana. Bzimwebzi bzingaphatanidze bzakusankhula pa nkhani ya khalidwe lathu na kunamata kwathu. Tikambakumbukira kuti Mkristau ali-wense ana udindo bwa kucita bzakusankhula bzace, tin’dzalemekeza ufulu bwa kusankhula bomwe winango anabo, napo pakucita bzakusankhula pa bzinthu bzing’ono-bzing’ono. (1 Wak. 10:32, 33) Yahova adatipasa mphaso yabwino kwene-kwene ya ufulu bwa kusankhula ndipo tikaiphatisa bwino basa, timbakhaladi na ufulu bwacadidi. (2 Wak. 3:17) Timbalemekeza mphaso imweyi thangwe imbatithandiza kucita bzakusankhula bzomwe bzimbalatiza momwe timbafunira Yahova. Tenepo mbatipitirizeni kucita bzakusankhula bzomwe bzimbalemekezesa Yahova ndipo timbalemekezembo ufulu bwa kusankhula bwa winango. w17.01 2:15, 17, 18

M’mbuto mwa kubzitumbiza ayai kubziwonesera kuna wanthu, tin’funika kuyeza kukhala ‘na mzimu wakuderekha na wakupfatsa.’ (1 Pe. 3:3, 4; Jer. 9:23, 24) Mafala yathu na bzakucita bzathu bzin’dzalatiza kuti ndife wakubzicepswa ayai ne. Mwa ciratizo, tingacitise winango kuwona ninga kuti ndife wakupambulika thangwe ra bzinthu bzomwe timbacita, bzomwe timbadziwa ayai na wanthu omwe timbawadziwa. Ayai tingacitise kuti wanthu awone ninga kuti tacita tekha cinthu cinango cakufunika kwene-kwene, pomwe cinthuco tacita kuthandizidwa na winango. Koma kumbukirani bza Jezu. Angadakhala kuti akhana cakulinga cakufuna kubziwonesera, iye angadadabwisa wanthu thangwe ra nzeru zomwe akhanazo. M’mbuto mwace, bzomwe Jezu kawiri-kawiri akhafotokoza bzikhacokera m’Fala la Mulungu. Iye akhafuna lini kuti wanthu amupase mbiri. Iye nthawe zense akhafuna kuti mbiri yense iyende kwa Yahova. w17.01 4:12

Limweri likhali lini lamulo lakunesa kulibvesesa. Ndipo likhali lini lakunesa kuti iwo aliteweze. Thangwe mu zundemo mukhana bzisapo bzizinji bzabwino na bzakukoma. Sathani adaphatisa basa nyoka kuti apumpse Eva kuti aleke kubvera Baba wace, Yahova. (Ciy. 3:1-5; Cibv. 12:9) Sathani adalewa kuti Mulungu akhaphonya kuletsa Adamu na Eva kudya ‘cisapo ca muti’ uli-wense wa m’zundemo. Ndipo bzimwebzi bzikhakhala ninga akhalewa kuti: ‘Un’funa kulewa kuti imwepo mungakwanise lini kucita bzomwe mun’funa?’ Patsogolo pace, iye adauza Eva kuti: ‘Cipo! Mun’dzafa lini.’ Limweri likhali gunkha. Tenepo, iye adayeza kupumpsa Eva kuti aleke kutetekera Mulungu. Sathani adauza Eva kuti Mulunguyo akhadziwa kuti, nsiku yomwe iwo angadadzadya cisapoco, maso yawo yangadadzafungukiratu. Na mafalaya Sathani akhalewa kuti Yahova akhawaletsa kudya cisapoco thangwe akhadziwa kuti cingadawapasa nzeru zinango zakuthumizirika. Pakumalizira, iye adanama pomwe kuti: ‘Mun’dzakhala ninga Mulungu, mucidziwa bzabwino na bzakuipa.’ w17.02 1:8, 9

Zaiya adalewa kuti Iye angadadzakhala ‘mtsogoleri na mtongi.’ (Zai. 55:4) Ndipo Danyeri adanemba bza Mesiya kuti angadadzakhala ‘mtsogoleri.’ (Dan. 9:25) Pa kumalizira pace, Jezu Kristu adabzidziwikisa ninga ‘Mtsogoleri’ wa wanthu wa Mulungu. (Mat. 23:10) Anyakupfunza wa Jezu adamutewera na mtima wense ndipo iwo adakhulupira kuti iye akhadasankhulidwadi na Yahova. (Ju. 6:68, 69) Kodi n’ciyani comwe cidawatsimikizirisa bzimwebzi? Pomwe Jezu adabatizidwa, Juwau adawona ‘kudzulu kunkufunguka, ndipo mzimu unkubuluka ninga nkhangaiwa ucibwera kuna iye.’ Mwakusaya kucedwa, ‘mzimu udamutsogolera kuti ayende ku dambo.’ (Mar. 1:10-12) Mzimu wa Mulungu udathandiza Jezu kuti apfunzise na kucita bzinthu bzakudabwisa pa nthawe ya utumiki bwace bwa pa dziko la pansi. (Mab. 10:38) Kuthumizira bzimwebzi, mzimu wakucena udathandiza Jezu kuti alatize makhalidwe yabwino ninga lufoyi, cikondweso, pabodzi na cikhulupiro camphanvu. (Ju. 15:9; Waheb. 12:2) Palibe mtsogoleri munango omwe adalatiza kuti akhana mzimu wakucena wa Mulungu ninga iye. Mpsakuwonekeratu kuti Yahova akhadasankhula Jezu ninga mtsogoleri. w17.02 3:15, 16

Apostolo adayamba kutsogolera gwere lacikristau pa Pentekosite mu gole la 33 EC. Bibliya limbalewa kuti ‘Pedru adaima pabodzi na apostolo khumi na m’bodzi’ ndipo adapfunzisa thimu likulu cadidi cakupulumusa moyo. (Mab. 2:14, 15) Wanthu azinji omwe akhabvesera pa thimulo adadzakhala Akristau. Patsogolo pace, Akristau apsawo ‘adapitiriza kutetekera bzomwe apostolowo akhawapfunzisa.’ (Mab. 2:42) Apostolo akhasamalira kaphatisidwe basa ka kobiri mu gwere. (Mab. 4:34, 35) Iwo akhapfunzisambo wanthu wa Mulungu acimbawapembera, aciti: ‘Tin’bzipereka tekha mu mpembo na mu utumiki bwa fala.’ (Mab. 6:4) Ndipo iwo adatumiza Akristau wa luso kuti akapalizire mu mbuto zipsa. (Mab. 8:14, 15) Na kupita kwa nthawe, akulu winango wakudzozedwa adaphatanambo na apostolo pa kutsogolera gwere. Ninga bungwe lakutonga, iwo akhatsogolera magwere yense.—Mab. 15:2. w17.02 4:4

Wanthu azinji ambatsogoleredwa kwene-kwene na mzimu wa dziko la Sathaniri. Iwo ambawona wanthu winango ninga mulungu wawo. M’mbuto mwa kuwalemekeza mu njira yomwe Yahova ambakomedwa nayo, wanthuwo ambapereka ulemu bwakunyanya kwa wanthu winango mwakuti ambawalemekeza ninga kuti ni mulungu wawo. Iwo ambafika mpaka kutewezera kabvalidwe na makhalidwe ya wanthu wa ndale na atsogoleri wa bzipembedzo, anyakucita masenzeka, wanthu wa m’mafilme na winango wakubvekera. Akristau wacadidi ambadziwa kuti kucita bzimwebzi n’kuphonyeka. Pa wanthu wense omwe adakhala kale na moyo, ni Jezu yekha omwe adapereka ciratizo cakuthemera kucitewezera. (1 Pe. 2:21) Tin’funika kukumbukira kuti wanthu ‘wense adaphonya ndipo ambaifikira lini mbiri ya Mulungu.’ (War. 3:23) Palibe munthu omwe an’themera kunamatidwa. Tikapasa wanthu ulemu bwakusaya kuthemera, bzingasunamise Yahova. w17.03 1:6-8

Kodi timbadziwa tani penu timbanamata Yahova na mtima wakusaya kugawanika? Tingabzibvunze kuti: ‘Kodi ndin’dzabvera Yahova napo pomwe bzin’dzakhala bzakunesa kucita bzimwebzo? Kodi ndine wakutsimikiza kucita cinthu ciri-cense kuti gwere lace lipitirize kukhala lakucena?’. Mwa ciratizo, kodi n’ciyani comwe mungacite penu wacibale ayai xamwali wanu wa pa mtima wacita pikado ndipo alibe kukungula ndipo wacosedwa m’gwere? Kodi mun’dzakhala wakutsimikiza kuleka kumbayanjana naye? Kodi mtima wanu un’dzakulimbisani kucita ciyani? Ninga Aza, nthawe zinango tingawone ninga kuti munthu ali-wense ankutiwenga. Pinango anzanu wa ku xikola ayai apfunzisi wanu angakunyozeni thangwe ndimwe Mboni ya Yahova. Ayai pinango ku basa kwanu, wanthu angakuwoneni kuti ndimwe psiru thangwe ra kukumbira kuti muyende ku mtsonkhano wa dera ayai thangwe rakuti kawiri-kawiri mumbalamba kuphata basa nthawe zakuthumizirika. Pa bzakucitika ninga bzimwebzi, khulupirani Mulungu ninga momwe Aza adacitira. (2 Nkha. 14:11) Khalani wakulimba mtima ndipo pitirizani kucita bzinthu bzabwino. Lekani kuyebwa kuti Mulungu adalimbisa Aza ndipo an’dzacitambo bzibodzi-bodzi na imwepo. w17.03 3:6-8

Bibliya limbalewa kuti tireke kukhala na mfulumira tikambacita bzakusankhula bzakufunika kwene-kwene. Kuti ticite cakusankhula cabwino tin’funika kukhala na nthawe yakukwanira kuti tikumbukire mwakusamala mbali zense za nkhaniyo. (1 Wat. 5:21) Msolo wa banja unati kucita cakusankhula ciri-cense, un’funika kukhala na nthawe ya kufufudza bzomwe Bibliya na mabukhu manango yambalewa pa nkhaniyo. Bzingakhalembo bwino kubva makumbukidwe ya wanthu wa m’banja mwace bza nkhaniyo. Lekani kuyebwa kuti Mulungu adauza Abalahamu kuti atetekere mkazi wace. (Ciy. 21:9-12) Akulu wa m’gwere an’funikambo kukhala na nthawe ya kufufudza anati kucita cakusankhula ciri-cense. Ndipo akatambira malango yatsapano yakulatiza kuti an’funika kucinja momwe akhacitira bzinthu, iwo an’funika lini kugopa kuti kucinja kwawoko kungacitise kuti abale aleke kuwalemekeza. Akulu wakubzicepswa an’funika kukhala wakukonzeka kucinja makumbukidwe yawo na bzakusankhula bzawo. Ndipo mpsabwino kwene-kwene kuti tensenefe titewezere ciratizo cawo. Kucita bzimwebzi kungathandizire kuti gwere likhale pa mtendere na lakuphatana.—Mab. 6:1-4. w17.03 2:16