Setembro

Palibe cinthu comwe cimbakondwesa kwene-kwene abereki kuposa kupfunzisa wana wawo kufuna Yahova. (Psal. 127:⁠3) Mu nthawe ya Ajirayeri, wana akhabadwa wakubzipereka kale kwa Yahova, tsono nsiku zino, bziri lini tenepo na wana wathu. Ndipopa napo penu abereki ambafuna Yahova, bzinkuthandauza lini kuti wanawo an’dzamufunambo. Tenepo, kuyambira pa nsiku yomwe mwana wabadwa, abereki an’funika kumbacita nyongo yakumuthandiza kuti akhale mteweri wa Jezu nakuti abzipereke kwa Mulungu, acibatizidwa. N’thangwe ranyi kucita bzimwebzi n’kwakufunika? N’kwakufunika thangwe kubzipereka, batismo na kutumikira Yahova mwakukhulupirika, kun’dzathandiza mwana wanuyo kupulumuka pa citsautso cikulu. (Mat. 24:​13) Abereki, tin’funa kuti imwepo mukondwembo mwa kuwona wana wanu ankubzipereka kwa Yahova, acibatizidwa. w18.03 14 ¶16-⁠17

Nthawe iri-yense pomwe akulu wa gwere ankupereka malango yakucokera m’Bibliya, iwo an’funika kutewezera Kristu. Mwa njira imweyi, iwo an’dzalatiza kuti akufuna kutsogoleredwa na Mulungu pabodzi na Mwana wace. Tikabvuma malango ya Mulungu na kutewezera momwe Yahova na Jezu ambaperekera malangoyo, tin’dzakhala na bzisimbo bzizinji kwene-kwene! Bzimwebzi bzin’dzacitisa kuti wanthu wa m’banja na wa m’gwere akhale pa mtendere, kubzibva kukhala wakufunidwa, wakulemekezeka na wakukhotcerereka. Koma bzimwebzi ni kokha ciratizo ca mtendere na cikondweso comwe ­tin’dzakhala naco kutsogoloku. (Psal. 72:⁠7) Tenepo, malango ya Yahova yambatikonzekeresa kuti tidzakhale pabodzi mwamtendere na mwakuphatana, na Yahova Baba wathu. (Zai. 11:⁠9) Tsono tikambakumbukira bzimwebzi, tin’dzawona kuti malango yomwe Yahova ambatipasa ni njira ibodzi yomwe Mulungu ambalatizira lufoyi lace kwa ifepano. w18.03 25-26 ¶15, 17, 19

Wanthu omwe akhabatizidwa na Juwau akhafuna kulatiza kukungula kwawo na mtima wense, thangwe ra kusaya kubvera Cakutonga ca Mozeji. (Mat. 3:​1-⁠6) Tsono Juwau adadzacita batismo inango yomwe ikhali yakufunika kwene-kwene ndipo ikhana thandauzo lakusiyana na batismo zinango zense zomwe iye akhadacita. Batismo imweyo nja Jezu ndipo Juwau adalatiza ulemu bukulu kwene-kwene pomwe akhabatiza Jezu, Mwana wakulungamiratu wa Mulungu. (Mat. 3:​13-​17) Jezu akhalibe pikado ndipo iye akhafunika lini kukungula. (1 Pe. 2:​22) Tsono n’thangwe ranyi Jezu adabatizidwa? Iye adabatizidwa thangwe akhafuna kulatiza kuti akhadakonzeka kuphatisa basa moyo wace kuti acite kufuna kwa Mulungu. (Waheb. 10:⁠7) Pomwe Jezu adayamba kupalizira, anyakupfunza wace adayambambo kubatiza wanthu winango. (Ju. 3:​22; 4:​1, 2) Wanthuwo akhabatizidwa pakufuna kulatiza kuti akhadakungula bzakuphonya bzawo, ndipo akhabvuma kusaya kubvera kwawo Cakutonga ca Mozeji. Koma mwakusiyana na wanthu amwewa, pomwe Jezu adafa acilamusidwa, wale omwe akhafuna kukhala ateweri wace akhafunika kubatizidwa na thangwe linango. w18.03 5 ¶6-7

Mwakusiyana na munthu wakuthupi, munthu wauzimu ambawona uxamwali bwace na Mulungu kukhala bwakufunika kwene-kwene. Iye ambabvuma kutsogoleredwa na mzimu wakucena wa Mulungu ndipo ambacita nyongo ya kutewezera Yahova. (Wayef. 5:⁠1) Iye ambacita nyongo yakupfunza makumbukidwe ya Yahova na kuwona bzinthu ninga momwe Yahovayo ambabziwonera. Ndipo ambawona Mulungu kukhala mwanzace caiye. Mwakusiyana na munthu wakuthupi, munthu wauzimu ambalemekeza mitemo ya Yahova pa mbali zense za moyo wace. (Psal. 119:​33; 143:​10) Iye ambacita lini ‘mabasa ya thupi’ koma ambakulisa ‘cisapo ca mzimu.’ (Wag. 5:​22, 23) Kuti tibvesese thandauzo la kukhala munthu wa makumbukidwe yauzimu, mbatikumbukireni nfundo iyi: Munthu omwe wazolowera kucita malonda, kawiri-kawiri timbalewa kuti malondayo yam’pita m’thupi, ndipo munthu omwe ambafuna kwene-kwene bza kunamata Mulungu timbalewa kuti ngwauzimu. w18.02 17 ¶3, 6

Danyeri adangingimizidwa kukakhala ku Babulo, mzinda omwe ukhadadzala na mirungu yakunama pabodzi na bza mizimu. Wanthu wa kumweko akhawenga Ajuda ndipo iwo akhambanyoza Ajudawo pabodzi na Mulungu wawo Yahova. (Psal. 137:​1, 3) Mwakusaya kupenukira, bzimwebzi bzidasunamisa kwene-kwene Danyeri pabodzi na Ajuda winango omwe akhafuna Yahova! Iwo akhafunika kumbadya cakudya ca mambo, comwe cikhaphatanidza bzinthu bzomwe Yahova akhadaletsa atumiki wace kudya. Tsono Danyeri adatsimikiza mu mtima mwace kuti ‘an’bzipswipiza lini na bzakudya bza mambo.’ (Dan. 1:​5-8, 14-​17) Na kupita kwa nthawe, Danyeri adadzagumana pomwe na bvuto linango lomwe pakuyamba likhawoneka lini ninga bvuto. Iye akhali munthu wa nzeru kwene-kwene ndipo thangwe ra bzimwebzi, mambo wa ku Babulo adamupasa udindo. (Dan. 1:​19, 20) Tsono, Danyeri alibe kubzikuza thangwe ra bzimwebzi. Iye adapitiriza kukhala wakubzicepswa ndipo nthawe zense akhadziwa kuti nzeru zacezo zikhacokera kwa Yahova. (Dan. 2:​30) Yahova adalewa kuti Nowe, Djobi pabodzi na Danyeri, akhali bziratizo bzabwino bzakuthemera kutewezeredwa. Pa nthaweyo, Nowe na Djobi akhadafa kale ndipo iwo akhadatumikira Yahova mwakukhulupirika kwa moyo wawo wense, koma Danyeri akhali tswaka. (Zakiy. 14:​14) Yahova akhakhulupira kwene-kwene Danyeri ndipo mpsakubveka, thangwe Danyeriyo adakhala wakukhulupirika na wakubvera Yahova kwa moyo wace wense. w18.02 5-⁠6 ¶11-⁠12

Jezu adalatiza momwe tingakhalire wacikati-kati pa ­nkhani ya bzakutsangalaza. Iye adayenda ku ‘madyo ya malowozi’ ndipo adayendambo ku ‘madyo makulu.’ (Ju. 2:​1-​10) Ku madyo ya malowoziyo, kukhalibe vinyu wakukwanira, tenepo Jezu adacita cakudabwisa mwa kusandusa madzi kukhala vinyu. N’cadidi kuti Jezu akhapambula nthawe yakucita bzinthu bzakutsangalaza, koma bzimwebzi bzikhali lini bzinthu bzakufunika kwene-kwene pa moyo wace. Iye akhaikha Yahova pa mbuto yakuyamba ndipo akhacita nyongo yakuthandiza winango. Ndipo iye adafika pakupereka moyo wace kuti apulumuse wanthu wense. Jezu adauza wale omwe akhafuna kukhala ateweri wace kuti: ‘Ndimwe wakukondwa ­pomwe wanthu ankuboneresani na kukuzunzani pabodzi na ­kukulewerani mwakunama bzinthu bzakuipa bza mtundu uli-wense thangwe ra inepano. Kondwani, mucimoga-moga mwakukomedwa pakuti mabaibai yanu n’makulu kudzulu.’ (Mat. 5:​11, 12) Ifepano timbafuna Mulungu ndipo timbafunambo kumukondwesa, ndipopa timbacita nyongo ­yakutcenkha sikuti kokha bzinthu bzomwe tin’dziwa kuti mpsakuphonyeka, koma timbatcenkhambo napo bzire bzomwe tin’kuwona kuti bzingamusunamise. ​​—⁠Mat. 22:​37, 38. w18.01 25-26 ¶16-​18

Timbacita bzakupereka kwa ­Yahova thangwe timbamufuna na kumutenda. Timbatokonyedwa kwene-kwene mu mtima mwathu, tikamba­kumbukira bzinthu bzense bzomwe iye adaticitira. Mambo Davide adalewa kuti cinthu ciri-cense comwe tinaco cimbacokera kwa Yahova, ndipo ciri-cense comwe tingapereke kwa iye bzimbakhala ninga kumubwezera. (1 Nkha. 29:​11-​14) Tin’funika kumbapasambo anzathu bzinthu bzomwe tinabzo, sikuti kumbandodikhirira kutambira. Kumbukirani mwana omwe wapasidwa kobiri na abereki wace, ndipo iye wapambula kobirizo acigulira mphaso aberekiwo. Kodi aberekiwo angabzibve tani na mphasoyo? Ayai kumbukirani bza tswaka lomwe linkutumikira ninga mpainiya, ndipo linkukhala pa mui pa abereki wace, tsono tswakalo limbapasa abereki wacewo kobiri kuti alipirire nyumba ya alugeri ayai kuti agulire bzakudya pa muipo. Abereki wace ambadikhirira lini kuti iye acite bzimwebzo, koma iwo ambatambira mphasoyo. Thangwe ranyi? Thangwe ra kufuna kulatiza kuti ambatenda bzinthu bzense bzomwe aberekiwo ambamucitira. Mwa njira ibodzi-bodziyi, Yahova ambadziwa kuti kupasa kumbatithandiza kukhala wanthu wabwino. w18.01 16 ¶4, 6

Abereki, kuti muthandize wana wanu kukulisa cikhulupiro cawo, mpsakukwanira lini kumbandowauza bzabwino na bzakuipa. Koma mun’funikambo kuwathandiza kumbakumbukira mibvunzo ninga iyi: ‘N’thangwe ranyi Bibliya limbaletsa bzinthu bzomwe pinango bzingawoneke ninga bzabwino? Kodi ndingatsimikize tani kuti mitemo ya m’Bibliya njakuthandiza nthawe zense?’ (Zai. 48:​17, 18) Penu mwana wanu an’funa kubatizidwa, muthandizeni kudziwa bzinthu bzomwe bzimbadikhiridwa kwa munthu omwe an’funa kubatizidwa. Kodi iye ambadziwa thandauzo la kubatizidwa? Kodi ndiponi phindu la kubatizidwa? Kodi angadzagumane na bzineso bziponi? N’thangwe ranyi tingalewe kuti munthu wakubatizidwa ambagumana phindu likulu napo kuti nthawe zinango angagumane na bzineso? (Mar. 10:​29, 30) Mpsakufunika kwene-kwene kukumbukira mibvunzoyi tinati kubatizidwa. Ndipo wana ­akathandizidwa kukumbukira nfundo zimwezi, iwo ambadzawona kuti kuteweza mitemo ya m’Bibliya nthawe zense, n’kwakuthandiza. w17.12 18-19 ¶14-⁠15

Azinji wa imwepo munkulimbana na matenda makulu. Ndipo winango ankusamalira acibale wawo wakukalamba. Pomwe winango ankuneseka kugumana bzinthu bzakufunikira kwa banja lawo. Ndipo tikudziwa kuti azinji ankulimbana lini kokha na bvuto libodzi koma mazinji pa nthawe ibodzi-bodzi! Tsono penu Yahova ambasamalira nyenyezi za kudzulu, ndiye kuti iye ambatisamalira kuposa nyenyezizo! Ndipo iye ambacita bzimwebzi thangwe rakuti ifepano timbamutumikira mwa lufoyi, sikuti mwakucita kukakamizidwa. (Psal. 19:​1, 3, 14) Baba wathu wakudzulu ambadziwa bzense pakulewa bza ifepano. Ndipo Bibliya limbalewa kuti iye ambalewenga ‘napo ­tsisi la mu msolo mwanu.’ (Mat. 10:​30) Yahova ambafuna kuti tidziwe kuti iye ‘ambadziwa bzense bzomwe bzimbacitikira anyakulungama.’ (Psal. 37:​18) Kulewa cadidi, Yahova ambawona mabvuto yathu yense ndipo iye an’dzatipasa mphanvu zomwe tin’funikira kuti tipirire. w18.01 3-⁠4 ¶1, 4

Pomwe Pedru adalamusa Tabita, wanthu azinji mu mzinda umweule ‘adakhala anyakukhulupira wa Mbuya.’ Mwakusaya kupenukira, anyakupfunza watsapanowa, adauzambo winango bzipsa bzabwino pakulewa bza Jezu na mphanvu zomwe Yahova anazo zakulamusa anyakufa. (Mab. 9:​36-​42) Ciripo ciratizo cinango ca cilamuso comwe cidacitika pa maso pa mboni zizinji. Nsiku inango, mpostolo Paulo adatsonkhana na abale winango m’cipinda capadzulu ku Trowa, komwe tsapano ni ku Turquia. Iye adafotokoza nkhani yace mpaka pakati pa usiku. Mulumbwana munango wakucemeredwa Eutiko, akhadakhala pa janera acimbatetekera nkhaniyo. Tsono iye adayamba kuwodzira, ndipo adagwa kucokera m’cipinda capadzuluco mpaka pansi. Pinango ni Luka omwe adayamba kufika pomwe pakhadagwera Eutiko. Na tenepo, ninga dotolo, iye adawona kuti Eutikoyo sikuti akhadandokomoka, koma akhadafa! Paulo, adabulukambo m’cipindamo, acibwera pomwe pakhana Eutikopo. Iye adakumbatira Eutikoyo ndipo adati kwa wense: ‘Iye ana moyo.’ Cakucitikaci, cidadabwisa ali-wense omwe adawona. Pakudziwa kuti mulumbwanayo akhadafa nakuti tsapano walamusidwa, iwo ‘adakondwa kwene-kwene.’​—⁠Mab. 20:​7-​12. w17.12 5-⁠6 ¶10-⁠11

Kodi wanthu akwanisadi kumalisa mabvuto yakusiyana-siyana yomwe ankulimbana nayo kwa magole bzulu na bzulu? Kulewa cadidi iwo alibe kukwanisa kumalisa nkhondo, ciwembo, ukapondo, ukapondo wa pa Interneti, kumenyana m’banja ndipo inkuthumizirika mitundu inango ya matenda makulu-makulu. Nsiku zino, cuma na mabungwe ya ndale yankutsogoleredwa na wanthu wa dyera. Ndipo wanthu amwewa angamalise lini nkhondo, ciwembo, matenda na kusauka, koma Umambo bwa Mulungu bokha. Ndokumbukira bzomwe Yahova an’dzacitira wanthu. Umambo bwace bun’dzacosa bzense bzomwe bzimbayambisa nkhondo, bzomwe ni dyera, kucita bobobo, kufunisisa dziko, cipembedzo cakunama pabodzi na Sathani. (Psal. 46:​8, 9) Umambo bwa Mulungu bun’dzamalisa ciwembo. Napo nsiku zino, Umambobo bunkupfunzisa wanthu bzulu na bzulu kuti ambafunane na kukhulupirirana. Palibe boma na libodziro lomwe lingacite bzimwebzi. (Zai. 11:⁠9) Tsapanopapa Yahova animalisa matenda ndipo an’dzacitisa kuti wanthu wense akhale na thanzi labwino. (Zai. 35:​5, 6) Iye an’dzamalisa kusauka ndipo wanthu wense an’dzakhala na moyo wakukondwa.​​—⁠Psal. 72:​12, 13. w17.11 25-26 ¶14-​16

Thangwe libodzi lomwe lidacitisa kuti pakhale mizinda yakuthawira likhali lakukhotcerera Ajirayeri ku mulandu wa mulopa wa munthu omwe waphedwa mwa ngozi. Yahova ambafuna moyo ndipo iye ambawenga nyakupha. (Mim. 6:​16, 17) Tenepo, ninga Mulungu wacirungamo na wakucena, iye angadalekerera lini munthu omwe wapha mwanzace napo mwa ngozi. Mwa kusiyana na Yahova, anembi na Afarizeu akhalemekeza lini moyo wa winango. Jezu adawauza kuti: ‘Mudacosa nfungulo wakuwathandiza kudziwa bzinthu. Imwe mulibe kupita ndipo anyakufuna kupita mudawaphingiza!’ (Lu. 11:​52) Kodi Jezu akhathandauza ciyani na mafalaya? Anembi na Afarizeu akhafunika kuuza wanthu Mafala ya Mulungu, aciwathandiza kudzagumana moyo wakusaya kumala. Tsono m’mbuto mwa kucita bzimwebzo, iwo akhaphingiza wanthu kuti aleke kutewera Jezu, omwe ni ‘Mtumiki Mkulu wa moyo.’ (Mab. 3:​15) Mwa njira imweyi, iwo akhatsogolera wanthu kuti akapfudzidwe. Iwo akhali wakubzikuza na wadyera ndipo akhalibe basa na moyo wa anzawo. Kulewa cadidi, iwo akhali wakuuma mtima na wakusaya lufoyi! w17.11 17-18 ¶9-⁠10

Pomwe tidayamba kupfunza Bibliya na Mboni za Yahova, pinango tiribe kuwuza wanthu wa m’banja mwathu. Koma pomwe cikhulupiro cathu cikhakula, tidawona kuti bzikhafunika kuwauza kuti tin’funa kutumikira Yahova. Penu kukhulupira kwanu Mulungu kumbacitisa kuti wanthu wa m’banja mwanu ayambe kukutsutsani, mbayezerani kubvesesa makumbukidwe yawo. Timbakondwa kwene-kwene thangwe tidadziwa cadidi ca m’Bibliya. Koma azibale wathu omwe ambanamata lini Yahova, angawone ninga kuti ifepano tapumpsidwa ayai tinkucita mbali ya cipembedzo cakuipa. Ndipo iwo angakumbuke kuti timbawafuna lini thangwe timbasekerera lini nawo nsiku za feriyado. Mpaka iwo angafike pakugopa kuti cinthu cinango cakuipa cin’dzaticikira tikadzafa. Tenepo, tin’funika kumbacita nyongo yakubvesesa momwe iwo ankubvera, ticimbatetekera bzomwe iwo ankulewa kuti tikwanise kuzindikira maka-maka comwe cinkuwacitisa kukhala na thupo. (Mim. 20:⁠5) Mpostolo Paulo akhacita nyongo yakubvesesa ‘wanthu wa mtundu uli-wense’ kuti awapalizire bzipsa bzabwino. Tikambacitambo nyongo yakubvesesa makumbukidwe ya azibale wathu, tin’dzakwanisa kugumana njira zakuwapfunzisira cadidi ca m’Bibliya.​​—⁠1 Wak. 9:​19-​23. w17.10 12 ¶11-⁠12

Pinango tingacite mantha kuimba thangwe ra kusaya kudziwa kaimbidwe ka nyimboyo. Tsono pana bzinthu bzinango bzomwe tingacite kuti timbaimbe bwino. Imwepo mungaimbe mwamphanvu, mwakukuwa na mwa kukwewa mphuwe izinji pa kuimbapo. Ninga momwe mphanvu ya magetsi imbagasira maluju, mphuwe ingakupaseni mphanvu palewalewa ayai pakuimba. Imwepo mun’funika kumbaimba mwakukuwa ninga momwe mumbalewalewera ayai mungathumizire fala lanulo. Ndipo Bibliya limbalimbisambo atumiki wa Yahova kuti ‘ambakuwe mwakukondwa’ pomwe ankuimba nyimbo zacitumbizo. (Psal. 33:​1-3) Na tenepo yezerani kucita ibzi: sankhulani nyimbo zomwe mumbazifuna kwene-kwene m’bukhu lanu la nyimbo. Werengani mafala yace mwakukuwa, mwamphanvu na mwakukondwa. Mukamala, kwewani mphuwe izinji mucilewa mafala ya mzere wense mwakukuwa kabodzi na kabodzi. Patsogolo pace, imbani mafala ya mzereyo na mphanvu ibodzi-bodziyo. (Zai. 24:​14) Mukacita bzimwebzi, mun’dzawona kuti mafala yanu pakuimba yan’dzakhala yamphanvu, ndipo bzimwebzi mpsakufunika kwene-kwene. Ndipo lekani kucita manyazi kuimba mwakukuwa! w17.11 6 ¶11-​13

Pomwe Ajuda akhayenda ku Jeruzalemu, pinango iwo akhakumbukira ayai kucezerana bza momwe moyo wawo ungadakhalira ku Jeruzalemu. Wanthu acikulire pinango akhambalewa momwe mzindayu ukhaliri wakudeka pomwe ukhanati kupfudzidwa. (Eza. 3:​12) Tiyezeze kuti imwepo mulipombo pa ulendopo tsono munkufika ku Jeruzalemu ndipo Jeruzalemuyo ankuyamba kuwoneka, kodi imwepo mungadabva tani? Kodi mungadasunama thangwe ra kuwona matere ya mzindayu yakudzala na mauswa na mipanda yakugwa pabodzi na bzipata bzace bzomwe kale-kale bzikhali bwino? Pinango mungadakumbukira mipanda yakulimba ya ku Babulo. Koma Ajuda alibe kutaya mtima. Thangwe ranyi? Thangwe iwo akhawona kuti ­Yahova­ akhawathandiza na kuwakhocerera pa ulendo bomwe adacita. Pomwe adafika ku Jeruzalemu, cinthu cakuyamba comwe iwo adacita, ni kukonza mphatso pa mbuto yomwe pakhana templo ndipo adayamba kumbapereka nsembe kwa Yahova nsiku iri-yense.​​—⁠Eza. 3:​1, 2. w17.10 21-22 ¶2-3

Bzinkuwoneka kuti Salomau adapfunza bzizini kwa pai wace. Davide adalatiza kukhwimika kukulu pomwe akhanyang’anizana na cinzonzomtali omwe akhali nyankhondo wamphanvu kwene-kwene. N’cadidi, na thandizo la Yahova, Davide adakunda Goliyati. (1 Sam. 17:​45, 49, 50) Kodi bzikhali lini bzakuthemera kuti na kupita kwa nthawe, Davide adzalimbise Salomau kuti akhale wakukhwimika acimanga templo? Yahova angadakhala naye mpaka kumaliza kumanga templo. Na tenepo, Salomau adakumbukira mafala yamweya ndipo iye alibe kubvuma kuti kukhala kwace mwana kumutazise kucita basalo. M’mbuto mwace, iye adakhala wakukhwimika ndipo na thandizo la Yahova, adamaliza kumanga templo ikulu kwene-kwene kwa magole manomwe na pakati. Yahova adathandiza Salomau ndipo angatithandizembo kukhala wakukhwimika na kucita basa lace, m’banja na m’gwere. (Zai. 41:​10, 13) Tikakhala wakukhwimika pomwe tinkutumikira Yahova, tingatsimikize kuti iye an’dzatisimba kuyambira pano mpaka kutsogolo. w17.09 27-28 ¶3-4; 32 ¶20-21

Atumiki wa Yahova ambakhulupira kuti Bibliya lomwe ni fala la Mulungu ‘ndamoyo ndipo ndamphanvu.’ Ndipo tensenefe timbawona mphanvu ya Bibliya pa moyo wathu. Pomwe wanthu winango akhanati kukhala Mboni, akhaba, akhaphatisa basa mankhwala yakudzungulumwisa msolo ayai kufumali ndipo winango akhambacita bzinthu bza unzazi. Ndipo winango akhali wanthu wakudziwika ayai wakudala, koma akhawona kuti pakhasala cinthu cinango pa moyo wawo. (Mpal. 2:​3-​11) Koma bzakukondwesa mpsakuti azinji mwa wanthu omwe akhadataika ndipo akhalibe cidikhiro ciri-cense, tsapano ana moyo wabwino ndipo ana cidikhiro. Mu Nsanza ya Mulindiri, ifepano timbawerenga ndipo timbakomedwa na mbiri za wanthu ninga amwewa mu nkhani za msolo wakuti “Baibulo Limasintha Munthu.” Ndipo napo pambuyo pakukhala Akristau, wanthu azinji ambafunika kupitiriza kucita nyongo mwa kuphatisa basa Bibliya kuti alimbise uxamwali bwawo na Yahova. w17.09 21 ¶1

Pakuti Yahova adabva nsisi na mabvuto yomwe Loti akhagumana nayo, ifembo tingakhale na citsimikizo cense cakuti iye ambatibverambo nsisi na bzineso bzense bzomwe timbagumana nabzo. (Zai. 63:​7-⁠9; Tiy. 5:​11, 2 Pe. 2:⁠9) Yahova ambatipfunzisambo kuti timbalatize nsisi. Kumbukirani cibodzi mwa bzakutonga bzomwe iye akhadapasa Ajirayeri. Munthu akafiyalisi mwanzace kobiri, angadatenga cakubvala ca nyakumufiyaliyo ninga citsimikizo cakuti angadadzabwezera kobiri zomwe wafiyalizo. (Kuf. 22:​26, 27) Koma kukadoka, nyakufiyalidwiyo akhafunika kukapereka cakubvalaco kuti nyakufiyaliyo afunike usiku. Pinango munthu wakusaya nsisi angadafuna lini kupereka cakubvalaco, koma Yahova adapfunzisa wanthu wace kukhala wansisi. Kodi cakutongaci cinkutipfunzisa ciyani? Tinkupfunza kuti tin’funika kumbawona bzakusaya bza Akristau anzathu. Tin’funika kumbathandiza abale ayai mpfumakazi omwe ankubonera.​​—⁠Wakol. 3:​12; Tiy. 2:​15, 16; 1 Ju. 3:​17. w17.09 10 ¶4-5

Pomwe Jezu akhabva kuwawa pa muti wakuzunzidwira, iye adakumbira Baba wace kuti alekerere acikunda omwe adamupha wale. Jezu adapitiriza kukhala wakufatsa na wakupirira napo pomwe akhabva kuwawa. (1 Pe. 2:​21-​23) Paulo adafotokoza njira ibodzi yomwe tingalatizire kufatsa na kupirira. Iye adati: ‘Pitirizani kupirirana na kulekererana na mtima wense napo penu alipo omwe ana mathangwe yakudandaulira mwanzace. Ninga momwe Yahova adakulekererani na mtima wense, imwepo mucitembo tenepoyo.’ (Wakol. 3:​13) Kuti tikwanise kukhululukira winango, ifepano tin’funika kukhala wakufatsa na wakupirira. Bzimwebzi bzin’dzacitisa kuti tikhale wakuphatana m’gwere. Yahova ambafuna kuti ifepano tikhale wakufatsa na wakupirirana. Makhalidwe yamweya njakufunika kwene-kwene penu tin’funa kudzakhala m’dziko lace lipsa. (Mat. 5:⁠5; Tiy. 1:​21) Tikakhala wakufatsa na wakupirira, ifepano timbalemekeza Yahova ndipo timbathandiza winango kucitambo bzibodzi-bodzibzo.​​—⁠Wag. 6:⁠1; 2 Tim. 2:​24, 25. w17.08 25 ¶15-​17

Mu Bibliya, timbagumana bziratizo bzizinji bza bzinthu bzakusaya kudikhirika bzomwe Yahova adacita. Mwa ciratizo, pomwe Ezekiya akhali mambo wa Juda, Sanakerube mambo wa Asiriya adapita mwamphanvu mu dziko la Juda acitenga wanthu wense m’mizinda, koma adandosiya Jeruzalemu yekha. (2 Wam. 18:​1-3, 13) Patsogolo pace Sanakerube adabwera kuti adzamenyane na Jeruzalemu. Kodi n’ciyani ­comwe Mambo Ezekiya adacita? Cinthu cakuyamba, iye adapemba kwa Yahova kuti amuthandize ndipo adakakumbira malango kwa Zaiya, mpolofeta wa Yahova. (2 Wam. 19:​5, 15-​20) Patsogolo pace, Ezekiya adabvuma kupereka bzomwe Sanakerube adakumbira. (2 Wam. 18:​14, 15) Pakumalizira pace, Ezekiya adakonzekera. (2 Nkha. 32:​2-⁠4) Kodi bzinthu bzidamala tani? Yahova adatuma anjo m’bodzi ndipo adakapfudza acikunda 185.000 wa Sanakerube usiku bubodzi bokha. Ezekiya akhadikhira lini kuti bzimwebzi bzingadacitika!​​—⁠2 Wam. 19:⁠35. w17.08 11-12 ¶7, 12

Kodi imwepo mungakonzekere tani utumiki bwa nthawe zense? Kuti mudzatumikire bwino Yahova, imwepo mun’funika kukulisa makhalidwe yabwino yacikristau. Mbapfunzani Bibliya nthawe zense mucimbakumbukira bzomwe mwapfunzabzo ndipo mbalatizani kuyenda kwanu patsogolo pa mitsonkhano ya gwere. Pomwe mukadapfunza ku xikola, mungakulise luso lanu lakupalizira mwa kumbauza anzanu bzipsa bzabwino. Pfunzani kulatiza thupo kuna wanthu mwa kumbawacita mibvunzo mwakusamala kuti mudziwe makumbukidwe yawo, mucimbatetekera mitawiro yawo. Ndipo mbakhalani wakubzipereka m’gwere mwa kumbacita mabasa ninga yakucenesa ayai kukonza-konza Nyumba ya Umambo. Yahova ambakomedwa kwene-kwene kuphatisa basa wanthu wakubzicepswa na wale omwe ambaphata basa mwakubzipereka. (Psal. 110:⁠3; Mab. 6:​1-⁠3) Mpostolo Paulo adatumikira ninga misiyonario pabodzi na Timotio thangwe abale ‘akhamupasa mbiri yabwino.’​​—⁠Mab. 16:​1-⁠5. w17.07 23 ¶7; 25 ¶14

Mpaka pano azinji akadapenukira bza katongedwe kakulungama ka Yahova ndipopa mpsakunesa kuwoneka mtendere na ciphatano. Koma Yahova akadzalatiza kuti ndiye adathemeradi kutonga cirengedwe cense, wanthu wense an’dzakhala na moyo pansi pa utongi bwace bwabwino mpaka muyaya. Cirengedwe cense cin’dzakhala pa mtendere. (Wayef. 1:​9, 10) Yahova an’dzalatiza kuti ndiye an’themera kutonga, ndipo utongi bwa Sathani na wanthu wakuipa bun’dzapfudzidwa. Utongi bwa Mulungu mwakuphatisa basa Umambo bwaumesiya bun’dzakunda. Wanthu wakukhulupirika an’dzalatiza kuti munthu angakwanise kukhala wakukhulupirika acithandizira utongi bwa Mulungu. (Zai. 45:​24) Kodi mungafune lini kukhalambo m’bodzi mwa wanthu wakukhulupirikawa? Mpsakupenukisa lini kuti mungafune! Ndipopa tin’funikadi kudziwa kufunika kwa nkhani imweyi. w17.06 16 ¶4-5

Wanthu winango angamale nthawe itali ankuwawidwa thangwe ra kufedwa kusiyana na winango. Munthu akafedwa, wanthu wakuyamba kubwera kudzamutsangalaza ni axamwali na acibale wace. Koma na kupita kwa nthawe, iwo angalekeze kupereka mtsangalazo, tsono wale omwe adafedwa ambafunikira kupitiriza kutsangalazidwa. Tin’funika kupitiriza kupereka mtsangalazo kwa omwe afedwa, bziribe basa kuti iye wamala nthawe zingasi na msunamoyo. (1 Wat. 3:⁠7) Kumbukirani kuti munthu angasuname kwene-kwene akambakumbukira nsiku za feriado, nyengo ya gole, bzomwe nyamuyayo akhacita, akambabvesera nyimbo, ayai akambawona bzithunzi-thunzi. Ndipo mu nsiku zakuyambirira bzimbakhala bzakunesa kuna mansiwa kucita bzinthu yekha, ninga kuyenda ku mtsonkhano wadera ayai ku cikumbuso. Lekani kuyebwa kuti omwe afedwa acibale wawo an’funika lini kulimbisidwa kokha mu nsiku zakupambulika. w17.07 13-14 ¶17-​19

Tikambamala nthawe yathu tinkucitira wanthu winango bzinthu bzabwino, kawiri-kawiri timbayebwa mabvuto yathu caiyo. Mwa ciratizo, mpfumakazi zizinji zakulowodwa na zakusaya kulowodwa, zimbapalizira bzipsa bzabwino bza Umambo, thangwe zimbadziwa kuti zimbakhala zinkuphata basa pabodzi na Yahova na kucita cakulinga cace. Bzimwebzi bzimbawacitisa kukhala wakukondwa. Tensenefe tingalatize thupo kwa wanthu mwa kuwapalizira bzipsa bzabwino. Ndipo tikambacitira bzabwino abale na mpfumakazi zathu, uxamwali bwathu na iwo bun’dzalimba. Bzimwebzi ndibzo bzomwe mpostolo Paulo adacita. Iye akhana thupo na winango ninga momwe ‘mayi wakumamisa ambacitira akambasamalira wana wace.’ Paulo adatsangalaza na kulimbisa abale wace ‘ninga momwe baba ambacitira na wana wace. (1 Wat. 2:​7, 11, 12) Wana omwe ambapfunza bza Yahova angatsangalaze na kulimbisa wanthu wa pa mui pawo. Iwo angacite bzimwebzi mwa kumbalemekeza abereki wawo na kucita nyongo yakuthandiza aberekiwo pa bzinthu bzakuthupi ayai mwa njira zakusiyana-siyana. Kuthumizira bzimwebzi, banja lense limbalimbisidwa wana akambakhala wakukhulupirika kwa Yahova. w17.06 6-7 ¶13-14; 8 ¶17

Kulewa cadidi, pana wanthu bzulu na bzulu wakusauka kwene-kwene, pomwe winango ana kobiri zizinji zomwe angakwanise lini kuzimala. Jezu akhadziwa kuti ni Umambo bwa Mulungu bokha bomwe bun’dzamalisa mabvuto ya cuma m’dzikoli. Ndipo Bibliya limbalewa kuti ‘anyamalonda,’ ayai wa ndale na wa cipembedzo, ni mbali ya dziko la Sathaniri. (Cibv. 18:⁠3) Ndipopa, atumiki wa Mulungu ambapitira lini na pang’onopo nkhani za ndale na za cipembedzo cakunama. Tsono ni atumiki lini wense wa Mulungu omwe angakwanise kulekeratu kucita mbali pa nkhani za cuma ca m’dziko la Sathaniri. Ninga Akristau, tin’funika kumbapenda cikhumbo cathu pa nkhani za cuma ca m’dzikoli. Tingacite bzimwebzi, mwa kubzibvunza kuti: ‘Kodi ndingaphatise tani basa cuma cangu kuti ndikondwese Mulungu? Kodi n’ciyani comwe ndingacite kuti ndikhale wacikati-kati pa nkhani za cuma ca m’dzikoli? Kodi ni bziratizo bziponi bzomwe bzimbalatiza kuti atumiki wa Mulungu ambaikha cikhulupiro cawo pa iye?’ w17.07 3-⁠4 ¶1-3

Jezu akhadziwa kuti moyo wa nsiku zino ungadakhala wakunesa nakuti tingadadzagumana na bzinthu bzakupasa thupo pabodzi na bzineso. Mu there lace la nyakubzala mbeu, Jezu adalewa kuti wanthu winango angadabvuma ‘fala la Umambo’ acilatiza nyongo pakuyamba. Koma na kupita kwa nthawe, wanthuwo angadaluza nyongo yawo thangwe ra ‘thupo na bzinthu bza m’dzikoli pabodzi na mphanvu yakupumpsa ya cuma.’ (Mat. 13:​19-​22; Mar. 4:​19) Tikasaya kusamala, tingatazire kutumikira Yahova bwino-bwino thangwe ra thupo la moyo wathu wa nsiku na nsiku. Ninga Pedru, tingalatize kuti timbafuna Kristu mwa kuikha basa la kupalizira pa mbuto yakuyamba pa moyo wathu. Kodi tingatsimikize tani kuti tinkupitiriza kucita bzimwebzi? Tingabzibvunze kuti: Kodi mtendere wangu umbabwera thangwe ra kutumikira Yahova ayai umbabwera thangwe ra bzinthu bzinango?’ w17.05 22 ¶3-4

Alendo akakhala kuti ali kutali na gwere la cirewedwe cawo, iwo an’funika kumbatsonkhana na gwere la cirewedwe ca komwe ankukahalako. (Psal. 146:⁠9) Tsono penu liripo gwere la cirewedwe cawo pafupipo, msolo wa banja un’funika kusankhula kumbatsonkhana na gwere la cirewedwe comwe cingakhale cakuthandiza kwa banjalo. Ndipo anati kucita cakusankhulaco, an’funika kuyamba waikumbukira bwino nkhaniyo na kuipembera. Ndipo an’funikambo kucezerana na mkazace pabodzi na wana wace. (1 Wak. 11:⁠3) Abereki an’funika kudziwa bzomwe wana wawo ambafuna. Kuti wana abvesese cadidi ca m’Bibliya, pambafunika bzizinji kuposa kundomala mphindi zakucepa ku mitsonkhano ya gwere m’dzinga uli-we. Ndipo bzikakhala kuti wana ankutsonkhana ku gwere la cirewedwe comwe iwo ambabva, wanawo angabvesese bzinthu bzizinji kuposa bzomwe abereki wawo angadikhire. Tsono bzingakhale bzakunesa penu wanawo ambabvesesa lini cirewedweco.​​—⁠1 Wak. 14:​11. w17.05 11-12 ¶10-⁠11

Ali-wense wa ifepano angacite bwino kumbabzibvunza kuti: ‘Kodi ndimbalatiza cikhulupiro na kulimba mtima mwakuphatisa basa bzinthu bzomwe ndinabzo kuti nditumikire Yahova? Kodi ndinkukumbuka bza kuyenda ku dziko linango kuti ndikagumane kobiri zizinji na kukhala na moyo wabwino? Penu inde, kodi ndinkupemba kwa Yahova kuti andithandize kuwona momwe bzimwebzi bzingatokonyere banja langu pabodzi na gwere?’ Kuthandizira utongi bwa Yahova ni mwayi ukulu kwene-kwene omwe iye ambatipasa. Kuyambira m’nthawe za Adamu na Eva, Sathani ambafuna kuti wanthu aphatane naye pa kupandukira Yahova. Tsono tikambathandizira utongi bwa Yahova, ifepano timbalatiziratu kwa Sathani kuti tiri ku mbali ya Yahovayo. Cikhulupiro cathu cimbaticitisa kuti tibzipereke pa basa la Yahova, ndipo iye ambakondwa kwene-kwene na bzimwebzo. (Mim.  23:​15, 16) Ndipo Mulungu wathu, angaphatise basa kukhulupirika na kubvera kwathu kuti atawire Sathani omwe ambamunyoza. (Mim.  27:​11) Cinthu cakufunika kwene-kwene comwe tingapase Yahova ni kubvera kwathu, ndipo iye ambakomedwa nako kwene-kwene. w17.04 32 ¶15-⁠16

Cakutonga ca Mozeji cikhalewa kuti munthu akacita piciro kwa Yahova, ‘akhafunika lini kucinja mafala yaceyo. Iye akhafunika kucita bzense mwakubverana na bzomwe wapicirabzo.’ (Mirew. 30:⁠2) Patsogolo pace, Salomau adanemba mafala ya m’vesi la leroya. Kucita piciro kwa Mulungu ni cinthu cakufunika kwene-kwene, ndipo Jezu adalatiza bzimwebzi pomwe adalewa kuti: ‘Mudabvambo kuti wanthu wakale adauzidwa kuti: “Leka kumbalumbira, ucileka kuteweza, koma umbateweze mapiciro yomwe udacita kwa Yahova.” ’ (Mat. 5:​33) Tin’funika kuwona piciro liri-lense lomwe tingacite kwa Yahova kukhala lakufunika kwene-kwene. Momwe timbacitira na mapiciro yathu, bzimbatokonyambo uxamwali bwathu na Yahova. Davide adalatiza kufunika kwa nfundo imweyi pomwe adabvunza kuti: ‘Mbani angakwire m’phiri la Yahova, ndipo mbani angaime pa mbuto yace yakupambulika?’ Iye adadzatawira mwa kulewa kuti Yahova ambabvuma munthu ali-wense omwe ‘ambalumbira lini mwacinyengo.’​​—⁠Psal. 24:​3, 4. w17.04 4 ¶3-4

Tikawona ninga kuti tinkucitiridwa bzinthu bzakusaya cirungamo m’gwere, tingacite bwino kuleka kumbauza winango bza nkhaniyo. M’mbuto mwace, tin’funika kumbakumbira thandizo kwa akulu ayai kuwauza penu m’bale ayai mpfumakazi yacita pikado ikulu. (Mwam. 5:⁠1) Koma bzikakhala kuti nkhaniyo njakundosaya kubvesesana, bzingakhale bwino kucezerana na m’baleyo kuti mukhazikise mtendere, m’mbuto mwa kukauza wanthu winango ayai akulu. (Mat. 5:​23, 24; 18:​15) Bwerani tikhale wakukhulupirika ticimbaphatisa basa mitemo ya m’Bibliya pa nkhani zimwezi. Na kupita kwa nthawe, pinango tingazindikire kuti ifepano tikhalibe kubvesesa nkhaniyo, ndipo tiribe kucitiridwa bzinthu bzakusaya kulungama na pang’onopo. Tenepo, bzingakhale bzakukondwesa penu tikhalibe kuimwaza nkhaniyo mwa kupfudza m’bale wathuyo! Kumbukirani kuti kulewa mafala yakuipa kungakonze lini nkhaniyo, napo penu tinayodi mathangwe yakucitira bzimwebzo. Penu ndife wakukhulupirika kuna Yahova na abale wathu, tin’dzacita lini bzimwebzi. w17.04 19 ¶14