Dezembro

Kale-kale, wanthu kawiri-kawiri akhacemera anzawo kuti abwere kumui kwawo ndipo akhawakonzera cakudya, bzomwe bzikhalatiza kuti iwo akhafuna kukhala nawo pauxamwali na pamtendere. (Ciy. 18:​1-⁠8; Way. 13:​15; Lu. 24:​28-​30) Kodi mbani maka-maka omwe tin’funika kumbawatambira kumui kwathu? Ni abale na mpfumakazi za m’gwere mwathu. Pomwe dzikoli linkuyenda liciipiratu, tin’funika kuthemba abale na mpfumakazi zathu, ticikhala nawo pauxamwali bwakulimba. Anyakunyang’anira dera akazungira magwere, anyakupfunza xikola za Umambo na abale omwe ambabzipereka pa basa la cimango, iwo kawiri-kawiri ambafunika mbuto yakukhala. Tsono tani bza wale omwe ambaluza nyumba zawo thangwe ra malengwa ya pansi? Iwo angafunikembo mbuto yakukhala mpaka nyumba zawo zitamangidwa pomwe. Tin’funika lini kukhala na makumbukidwe yakuti kokha wale omwe ana nyumba zikulu ni omwe angathandize abalewa, thangwe pinango iwo ambabzipekeka kale kazinji kense. Tenepo, kodi imwepo mungatambire m’bale ayai mpfumakazi kuti ikhale kumui kwanu, napo kuti nyumba yanu njing’ono? w18.03 16 ¶6; 17 ¶9

Tsono n’ciyani comwe cin’dzatithandiza ‘kulamuka pomwe’? Ifepano tingalamuke lini mwa mphanvu zathu zokha, koma na thandizo la mzimu wakucena wa Mulungu. (Waf. 4:​13) Ndipo thandizo la mzimu wakucenali ndakufunika kwene-kwene thangwe kubziretsa ni mbali ya cisapo ca mzimu. Ifepano tingakulise khalidwe la kubziretsa mwa kumbacita mpembo, kupfunza Bibliya na kumbakumbukira bzomwe tapfunzabzo. Tsono tani penu kupfunza Bibliya kumbakunesani ayai penu imwepo mumbafuna lini na kupfunzako? Lekani kutaya mtima. M’mbuto mwace, bvumani kuti Yahova akuthandizeni kukhala na cikhumbo ca ‘kumbafunisisa’ Fala lace. (1 Pe. 2:⁠2) Kumbirani Yahova kuti akuthandizeni kumbapambula nthawe yakupfunza Bibliya. Mungayambe kupfunza m’tumphindi twakucepa ndipo na kupita kwa nthawe, mun’dzawona kuti kupfunzako kun’dzayamba kukudekerani. Ndipo imwepo mun’dzayambambo kumbapfunza Bibliya mwakamderekho, mucimbakumbukira bzomwe mwapfunzabzo.​​—⁠1 Tim. 4:​15. w18.03 28 ¶5-6

Akanati kubatizidwa, anyakupfunza Bibliya an’funika kudziwa cadidi cakulewa bza Mulungu, cakulinga comwe iye anaco na wanthu pabodzi na dziko la pansi na bzomwe iye adacita kuti apulumuse wanthu. (1 Tim. 2:​3-⁠6) Patsogolo pace, iwo an’funika kukulisa cikhulupiro cawo, comwe cin’dzawathandiza kubvera malamulo ya Mulungu na kusiya kumbacita bzinthu bzomwe iye ambabziwenga. (Mab. 3:​19) Bzimwebzi mpsakufunika kwene-kwene thangwe Yahova ambabvuma lini kubzipereka kwa munthu omwe ambapitiriza kucita bzinthu bzomwe Iye ambabziwenga. (1 Wak. 6:​9, 10) Koma pana bzinthu bzinango bzomwe iwo an’funika kucita. Wale omwe an’funa kubzipereka kwa Yahova, an’funika kumbagumanika pa mitsonkhano ya gwere, kupalizira bzipsa bzabwino na kupfunzisa winango. (Mab. 1:⁠8) Tenepo, penu nyakupfunzayo ankucita kale bzinthu bzomwe bzafotokozedwabzi, iye angacite mpembo wakubzipereka kwa Yahova, acibatizidwa. w18.03 6 ¶12

Yahova adamusankhula kuti akhale mai wa Jezu thangwe iye akhali munthu wauzimu. Onani bzomwe Mariya adalewa pomwe adayenda kukazungira acibale wace Zakariya na Elizabeti. (Lu. 1:​46-​55) Mavesiya yankulatiza kuti Mariya akhafuna kwene-kwene Fala la Mulungu ndipo akhadziwa bwino Bzinembo bza Cihebereu. (Ciy. 30:​13; 1 Sam. 2:​1-​10; Malak. 3:​12) Mariya na Zuze alibe kugonana mpaka Jezu kubadwa napo kuti akhadalowolana kale, kulatiza kuti iwo akhawona udindo bwawo kukhala bwakufunika kwene-kwene kuposa bzikhumbo bzawo. (Mat. 1:​25) Pomwe Jezu akhakula, Mariya adakhala tceru kuti awone bzense bzomwe bzikhacitika na Jezuyo ndipo akhatetekera bzinthu bzense bzomwe iye akhapfunzisa. Bzimwebzi bzinkulatiza kuti iye akhakumbukira mafala ya Mulungu yakulewa bza Mesiya. Kodi tingatewezerembo Mariya mwa kumbacita bzomwe Mulungu an’funa kuti timbacite? w18.02 19 ¶11

Tingatewezere kukhulupirika na kubvera kwa Djobi bziribe basa kuti tinkugumana na mabvuto yaponi pa moyo wathu, nthawe zense tin’funika kumbawona Yahova kukhala munthu wakufunika kwene-kwene pa moyo wathu. Tin’funika kumukhulupira na kumubvera na mtima wathu wense. Ndipo ifepano tina mathangwe mazinji yakucitira bzimwebzi kuposa Djobi. Mwa ciratizo, nsiku zino ifepano timbadziwa bzinthu bzizinji pakulewa bza Sathani pabodzi na mapumpso yace. (2 Wak. 2:​11) Tikambawerenga Bibliya, maka-maka bukhu la Djobi, timbawona thangwe race Mulungu ankulekerera kubonera. Ndipo kucokera mu polofesiya ya Danyeri, ifepano timbadziwa kuti Umambo bwa Mulungu ni boma cairo ndipo mtongi wace ni Jezu Kristu. (Dan. 7:​13, 14) Timbadziwambo kuti Umambobu tsapanopapa bun’tonga dziko lense la pansi bucimalisa kubonera kwense. Mabvuto yomwe Djobi adagumana nayo yambatipfunzisa kuti tin’funika kubvera nsisi abale wathu akambagumanambo na mabvuto. Ninga Djobi, pinango iwo angalewembo bzinthu mwakusaya kukumbuka bwino. (Mpal. 7:⁠7) Tsono tin’funika lini kukumbuka kuti iwo ankubonera thangwe rakuti adacita bzinthu bzinango bzakuipa. M’mbuto mwace, tin’funika kubvesesa momwe iwo ankubvera. Tikacita bzimwebzi, tin’dzakhala ninga Baba wathu Yahova, omwe ni Mulungu walufoyi na wansisi.​​—⁠Psal. 103:⁠8. w18.02 7 ¶16; 8 ¶19-⁠20

Wanthu winango ambabzikuza thangwe ra kudeka, kubvekera, madu yakuimba ayai thangwe ra mphanvu zomwe anazo. Davide akhanabzo bzinthu bzensenebzi, koma iye adapitiriza kukhala munthu wakubzicepswa. Mwa ciratizo, pambuyo pa Davide kupha Goliyati, mambo Sauli adamuuza kuti alowole mwana wace. Tsono Davide adati: ‘Kodi ndine yanimbo ine, . . . kuti ndikhale mkwasa wa mambo?’ (1 Sam. 18:​18) Atumiki wa Yahova ambacita nyongo yakukhala wakubzicepswa ninga Davide. Kodi n’ciyani cimbatithandiza kukhala wakubzicepswa? Cinthu cibodzi comwe cimbatithandiza ni kutewezera Yahova, pakuti iye ngwakubzicepswa napo ni Mkululetu m’cirengedwe cense. Cinango, n’cakuti timbafuna kubvera malango ya pa Wakoloso 3:​12 yakuti: ‘Bvalani lufoyi likulu, kucitira winango nsisi, kudeka mtima, kubzicepswa m’makumbukidwe, kufatsa na kupirira.’ Ndipo timbadziwambo kuti lufoyi ‘limbabziikha lini ne kubzikuza.’ (1 Wak. 13:⁠4) Ndipo cinango pomwe, n’cakudziwa kuti wanthu akawona kuti ndife wakubzicepswa, iwo angafune kupfunza bza Yahova. w18.01 28-29 ¶6-7

Nsiku zino, timbauzidwambo kucita bzakupereka kuti tithandizire mabasa yakusiyana-siyana yomwe yankucitidwa na gulu la Yahova. (Mab. 4:​34, 35; 1 Wak. 16:⁠2) Mwa ciratizo, pinango gwere lanu lingacite makonzedwe ya kukonzesa Nyumba yanu ya Umambo ayai kumanga ipsa. Tingacitembo bzakupereka kuti tithandizire mtsonkhano wa cigawo, ayai abale wathu omwe ankubonera na malengwa ya pansi. Ndipo bzakupereka bzathu bzimbathandizirambo mamisiyonario, apainiya wakupambulika, anyakunyang’anira dera, abale omwe ankutumikira pa nthambi zakusiyana-siyana na omwe ambatumikira ku likulu la pa dziko lense. Tensenefe tingacite bzakupereka bzakusiyana-siyana kuti tithandizire basa lomwe linkucitidwa na gulu la Yahova mu nsiku zakumalizira zino. Ndipo ifepano timbabziwonesera lini pakucita bzakuperekabzo. Ndipopa, tikambaikha kobiri mu kaxa ya bzakupereka mu Nyumba ya Umambo ayai tikacita bzakupereka mwa kuphatisa basa saite yathu ya jw.org, wanthu winango ambadziwa lini bzomwe taperekabzo. Tsono tani penu munkuwona kuti cakupereka canu n’cakucepa kwene-kwene? Cadidi n’cakuti, bzakupereka bzizinji bzomwe gulu lathu limbatambira, bzimbacokera ku bzakupereka bzing’ono-bzing’ono sikuti bzikulu-bzikulu. w18.01 18 ¶10-⁠11

Mkristau ali-wense an’funika kubatizidwa ndipo batismo njakufunika kwene-kwene kuti munthu adzapulumuke acidzakhala na moyo wakusaya kumala. (Mat. 28:​19, 20) Batismo imbaimira kubzipereka komwe mudacita kwa Yahova. Ndipo imwepo mudapicira kuti mun’dzafuna Yahova na kuikha kufuna kwace pa mbuto yakuyamba pa moyo wanu. Ndipo dziwani kuti Yahova an’dzaleka lini kukutsogolerani pa moyo wanu. Wale omwe ambadziwa lini Yahova ambacita mbali ya dziko la Sathaniri. Ndipo Sathaniyo ambawasamalira lini, ne imwepombo alibe namwe basa. Kulewa cadidi, imwepo muciluza cidikhiro canu cakudzakhala na moyo wakusaya kumala, iye angadekedwe kwene-kwene, thangwe ra kuti mwalamba Yahova mucikhala ku mbali yace. Kumbukirani momwe Yahova adakusimbirani thangwe rakuti mudabzipereka kwa iye mucibatizidwa. Mudapereka moyo wanu kwa Yahova, tenepo mungalewe na mtima wense kuti: ‘Yahova ali kumbali yangu; ndin’dzacita lini mantha. Munthu wakucokera ku pfumbi angandicitenyi?’ (Psal. 118:⁠6) Palibe cinthu cakufunika kwene-kwene kuposa kukhala ku mbali ya Mulungu mucidziwa kuti iye ambakomedwa namwe. w17.12 21-22 ¶1-3

Nthawe zinango, ifepano tingakalipe thangwe ra bzomwe munthu munango wacita ayai walewa, ayai ifepanombo tingakalipise winango. N’cadidi kuti bzimwebzi bzingakhale bzakunesa, koma bzimbatipasa mpata wakulatiza kukhulupirika kwathu kwa Yahova. Mwa njira iponi? Mwa kupfunza kumbacitira bzinthu pabodzi na abale na mpfumakazi zathu mwa mtendere. Yahova ambawafuna kwene-kwene abale wathuwo napo mbakuperewera, ndipo ifepano tin’funikambo kumbacita bzibodzi-bodzibzo. Yahova ambakhotcerera lini atumiki wace kuti aleke kugumana na mayezo. Timbadziwa bzimwebzi thangwe ra bzomwe bzidacitika na Zuze. Pomwe Zuze akhali tswaka, azibale wace adayamba kumucitira njiru. Iwo adamugulisa ninga kapolo ndipo adatengedwa kuyenda ku Edjipito. (Ciy. 37:​28) Yahova akhawona bzense bzomwe bzikhacitikira Zuze, ndipo mwakusaya kupenukira iye adawawidwa kwene-kwene pomwe mtumiki wace wakukhulupirika Zuze akhacitiridwa bzinthu bzakuipabzo. Koma napo bzikhali tenepo, Yahova adalekerera kuti Zuze azunzidwe. Ndipo Yahova adalekererambo Zuze pomwe iye adanamiziridwa kuti akhafuna kupsitha mkazi wa Potifari, ndipo iye adamangidwa, acikaikhidwa m’kawoko. Kodi bzimwebzi bzinkuthandauza kuti Mulungu akhadasiya Zuze? Ne na pang’onopo. Bibliya limbati: ‘Yahova akhana Zuze, ndipo bzense bzomwe iye akhacita, bzikhambamufambira bwino.’​​—⁠Ciy. 39:​21-​23. w18.01 6 ¶12-​14

N’ciyani comwe imwepo mumbakhulupira? Mwakusaya kupenukira, imwepo mungalewe kuti mumbakhulupira kuti Yahova ni Mulengi ndipo ndiye omwe adatipasa moyo. Pinango mungalewe pomwe kuti mumbakhulupira Jezu Kristu, omwe adafa kuti atilombole. Ndipo mungalewembo bza cidikhiro cakuti wanthu wa Mulungu an’dzakhala na moyo m’Paraizo kwa muyaya. Koma kodi mungalewe bza cilamuso ninga cibodzi mwa cipfunziso cikulu comwe mumbacikhulupira? Ifepano tina mathangwe mazinji ya kuikha cilamuso m’gulu la bzinthu bzikulu-bzikulu bzomwe timbakhulupira, napo penu tingadikhirire kudzapulumuka pa citsautso cikulu, ticidzakhala na moyo kwa muyaya pa dziko la pansi. Cilamuso ni cibodzi mwa bzipfunziso bzakufunika pa cikhulupiro cathu. Bzingadakhala kuti Jezu alibe kulamusidwa, iye angadakhala lini Mambo kudzulu, ndipo upalizi bwathu bungadakhala bwakusaya phindu. (1 Wak. 15:​12-​19) Koma timbadziwa kuti Jezu adalamusidwa, ndipopa tiri lini ninga Ajuda omwe akhacemeredwa Asaduki omwe akhakhulupira lini bza cilamuso. Napo wanthu winango angatiseke, ifepano timbapitiriza kukhulupira kuti Mulungu an’dzalamusa anyakufa.​​—⁠Mar. 12:​18; Mab. 4:​2, 3; 17:​32; 23:​6-⁠8. w17.12 9 ¶1-2

Afarizeu akhayeruza lini mwa nsisi. Iwo akhangingimira kwene-kwene pa bzomwe munthuyo wacita m’mbuto mwa unthu bwace. Pomwe Afarizeu winango adawona Jezu ankudya m’nyumba mwa Mateu, iwo adabvunza anyakupfunza wace kuti: ‘N’thangwe ranyi mpfunzisi wanu ankudya pabodzi na anyakukhomesa mtsonkho na anyapikado?’ Jezu adatawira kuti: ‘Wanthu wakulimba ambafuna lini dotolo, koma wanthu omwe ankuduwala. Tenepo, ndokoni mukapfunze thandauzo la mafala yakuti: ‘Ndin’funa nsisi, sikuti nsembe.’ Pakuti ndiribe kubwera kudzacemera anyakulungama, koma anyapikado.’ (Mat. 9:​9-​13) Kodi na mafalaya Jezu akhatawirira anyapikado? Ne. Iye akhafuna kuti iwo akungule. Ndipo imweyi ndiyo ikhali nfundo yakufunika kwene-kwene mu upalizi bwace. (Mat. 4:​17) Jezu akhadziwa kuti ‘anyakukhomesa mtsonkho na anyapikado’ winango angadacinja. Iwo alibe kuyenda kumui kwa Mateu kuti akandodye. Koma akhali kumweko thangwe akhatewera Jezu. (Mar. 2:​15) Mpsakupasa nsisi kuti Afarizeu azinji akhawona lini wanthu ninga momwe Jezu akhawonera. w17.11 15 ¶2; 19 ¶15

Timbadekedwa kwene-kwene thangwe ra kucita mbali ya gwere Lacikristau. Ku mitsonkhano yathu, ifepano timbapfunza Fala la Mulungu, ticilatizana lufoyi winango na mwanzace. Bzimwebzi bzimbatithandiza kupitiriza kumbakumbukira bza mabai-bai yathu ya kutsogolo. Koma nthawe zinango, pangakhale kusaya kubvesesana ndipo bzimwebzi bzingabwerese bvuto likulu pakati pa abale wathu. Tikasaya kumalisa bvutoli mwakamfulumize, ifepano tingayambe kukhala na cakumtima. (1 Pe. 3:​8, 9) Ifepano tin’funika lini kubvumiza kuti kukoya cakumtima kutitazise kudzatambira mabai-bai yathu. Pakufotokoza bzomwe Akristau angacite pa nkhani ninga imweyi, Paulo adati: ‘Ninga wanthu wakucita kusankhulidwa na Mulungu, wakucena na wakufunidwa, bvalani lufoyi likulu la kucitira winango nsisi, kudeka mtima, kubzicepswa m’makumbukidwe, kufatsa na kupirira. Pitirizani kupirirana na kulekererana na mtima wense napo penu alipo omwe ana mathangwe yakudandaulira mwanzace. Ninga momwe Yahova adakulekererani na mtima wense, imwepo mucitembo tenepoyo.​​—⁠Wakol. 3:​12-​14. w17.11 29 ¶7-8

Mjirayeri akapha munthu mwa ngozi, akhafunika kuthawira ku mzinda wakuthawira, ‘acikafotokozera nkhaniyo’ akulu-akulu wa kumweko pa cipata ca mzindayo. Ndipo akulu-akuluwo akhafunika kumutambira. Pambuyo pa nsiku zing’ono-ng’ono, akulu-akuluwo akhafunika kumubwezera ku mzinda omwe iye adaphera munthuyo, kuti akatongedwe na akulu-akulu wa kumweko. (Mirew. 35:​24, 25) Akulu-akuluwo akawona kuti infayo idacitika mwa ngozi, akhamubwezera pomwe ku mzinda wakuthawira omwe iye akhadathawirayo. Kodi n’thangwe ranyi nyakupha munthuyo akhafunika kufotokozera akulu-akulu nkhani yaceyo? Iye akhafunika kucita bzimwebzi kuti akulu-akuluwo athandize mtundu wa Ajirayeri kupitiriza kukhala wakucena nakuti nyakupha mwa ngoziyo abveredwe nsisi na Yahova. M’dziwi munango wa nkhani za m’Bibliya adafotokoza kuti munthu omwe wapha mwanzace angadaphedwambo akasaya kukafotokozera akulu-akuluwo nkhani yaceyo, thangwe alibe kuteweza lamulo la Mulungu. Angadasaya kuthawira mu mzinda ubodzi wakuthawira, m’bale wace wa munthu omwe waphedwayo akhali wakutsudzuka kumuphambo. w17.11 11 ¶6-7

Nsiku zino, Yahova ambaphatisambo basa wanjo wace kuti akhotcerere na kulimbisa atumiki wace. (Malak. 3:⁠6; Waheb. 1:​7) Kuyambira pomwe atumiki wa Yahova adatsudzulidwa ku ukapolo bwa Babulo mkulu mu 1919, anyamadulanthaka wa atumiki wa Mulungu akhala ankucita nyongo yakuletsa kukula kwa kunamata kwacadidi. (Cibv. 18:⁠4) Koma cakulinga cawo cinkukwanisika lini. Pakuti wanjo ankukhotcerera gulu la Yahova, ifepano timbagopa lini, thangwe timbadziwa kuti tin’dzakhala lini pomwe akapolo wa cipembedzo cakunama. (Psal. 34:⁠7) M’mbuto mwace, tin’dzapitiriza kukhala wakukondwa, ticimbatanganika na bzinthu bzauzimu pomwe tinkutumikira Yahova. Thangwe tina anyankhondo wa Yahova ku mbali yathu, ndipo pa citsautso cikulu iwo an’dzakhotcerera atumiki wace, acidzapfudza wense omwe ambatsutsana na utongi bwace. (2 Wat. 1:​7, 8) Imweyi in’dzakhala nsiku yakusaya kuyebweka! w17.10 23 ¶10-⁠11

Bzimbawawa kwene-kwene munthu wa m’banja mwathu akacosedwa m’gwere ayai akabzilekanisa na gulu. Ifepano tingawawidwe kwene-kwene ninga kuti munthu watidzindira pa cironda. Kodi tingalimbane tani na bvuto limweri? Mpsakufuni kupitiriza kumbacita bzinthu bzauzimu. Penu munkuwawidwa thangwe ra bzimwebzi, imwepo mun’funika kulimbisa cikhulupiro canu. Mbawerengani Bibliya nthawe zense, mbakonzekerani na kuyenda ku mitsonkhano, pitirizani kupalizira bzipsa bzabwino ndipo mbapembani kwa Yahova kuti akupaseni mphanvu kuti mukwanise kupirira. (Juda 21) Tsono tani penu imwepo munkucita bzensenebzi, koma munkupitiriza kukhala wakusunama? Lekani kuneta! Pitirizani kumbakumbukira bza kutumikira kwanu Yahova. Na kupita kwa nthawe, bzimwebzi bzin’dzakuthandizani kutsogolera makumbukidwe yanu na momwe munkubvera. Bzimwebzi ndibzo bzomwe bzidacitikira munembi wa Psalymo 73. Idafika nthawe inango pa moyo wace, yomwe iye akhayamba kuwona bzinthu mwanjira yakuphonyeka. Koma kutumikira Yahova kudamuthandiza kuyamba kuwona pomwe bzinthu m’njira yakuthemera. (Psal. 73:​16, 17) Bzimwebzi bzingakucitikirenimbo. w17.10 13-14 ¶17-⁠18

Pomwe Sathani akhalewalewa na Eva mu zunde la Edeni, bzomwe iye akhalewabzo bzikhawoneka ninga kuti akhafunira bzabwino Evayo. Koma bzicito bzace bzidalatiza kuti ndibzo lini bzomwe bzikhali mu mtima mwace. (Ciy. 3:​4, 5) Pomwe Davide akhali mambo, iye akhana xamwali wace wakucemeredwa Ahitofeli. Koma thangwe ra kufuna kubzibweresera phindu, Ahitofeli adapumpsa Davide. Na tenepo, bzicito bzace bzidalatiza kuti iye akhali lini xamwali wacadidi. (2 Sam. 15:​31) Nsiku zino, apanduki na wanthu winango omwe ambagawanisa gwere ambaphatisa basa ‘mafala yakupumpsa na yacinyengo.’ (War. 16:​17, 18) Iwo angawoneke ninga kuti ambafunira bzabwino winango, koma cadidi n’cakuti iwo mbacinyengo. Lufoyi la cinyengo ndakuipa kwene-kwene thangwe limbaphatisidwa basa pa kupumpsa wanthu.Tingakwanise kupumpsa wanthu koma Yahova ne na pang’ono. Jezu adalewa kuti wale omwe ambacita bzinthu mwa cinyengo an’dzapasidwa ‘cirango cikulu kwene-kwene.’ (Mat. 24:​51) Tenepo, tingabzibvunze kuti, ‘kodi lufoyi langu ndacadidi, ayai ndine wadyera na wakusaya kukhulupirika?’ w17.10 4-⁠5 ¶6-8

Tikambawerengera munthu Bibliya, timbakhala tinkupasa mpata Yahova kuti alewelewembo na munthuyo. Ndipo mavesi yakusankhulidwa bwino, yambakhala na mphanvu kwene-kwene kuposa mafala yali-yense yomwe tingayalewe. (1 Wat. 2:​13) Mukakhala muli mu utumiki bwakumunda, kodi imwepo mumbawerenga Bibliya kawiri-kawiri? Kundowerengera vesi la m’Bibliya wanthu omwe tinkuwapalizira mpsakukwanira lini, thangwe wanthu azinji ambabvesesa lini thandauzo lace. Bzimwebzi bzikhacitika na wanthu azinji m’magole dzana yakutoma ndipo ndibzo bzomwe bzinkucitikambo nsiku zino. Tin’funika lini kumbakumbuka kuti mweneciro nyumba ankubvesesa mavesi yomwe tinkuwerenga. Koma tin’funika kumbabwerezera mafala yomwe yana nfundo zikulu-zikulu m’mavesiyo na kumuthandiza kubvesesa thandauzo lace. Tikacita bzimwebzi, Fala la Mulungu lingatokonye makumbukidwe na mtima wa munthuyo.​​—⁠Lu. 24:​32. w17.09 23 ¶7-8

Yahova ambafuna kuti Akristau ambalatize nsisi kuna wanthu winango na abale wawo wauzimu. (Ju. 13:​34, 35) Libodzi mwa thandauzo la nsisi ni “kumulatiza kuti munkuwawidwambo na kubonera kwa mwanzanuyo.” Munthu wansisi ambacita nyongo yakuthandiza wale omwe ankubonera. Tenepo, tin’funika kumbanyang’ana mipata yakuthandizira winango. Tikambawona wanthu ankubonera thangwe ra malengwa ya pansi, tin’funika kumbawathandiza. Ndipo wanthu wa Yahova ambadziwika thangwe ra kuthandiza anzawo akagwedwa na tsoka. (1 Pe. 2:​17) Mwa ciratizo, mpfumakazi inango ku Japão ikhakhala ku mbuto yomwe idagweredwa na tsoka la citeke-teke na tsunami, m’gole la 2011. Iye adalewa kuti ‘adalimbisidwa na kutsangalazidwa’ kwene-kwene, pomwe adawona abale wakubzipereka wakucokera m’mbuto zakusiyana-siyana za ku Japão na m’madziko manango, ankukonza nyumba za wanthu pabodzi na Nyumba za Umambo zomwe zikhadazongeka. Ndipo iye adathumizira kuti: “Cakucitikaci cidandithandiza kuwona kuti Yahova ambatisamalira. Ndipo atumiki wace ambatisamaliranambo, nakuti abale na mpfumakazi wa pa dziko lense akhaticitira mipembo.” w17.09 12 ¶12-⁠13

N’thangwe ranyi tin’funika kukhala na khalidwe la kubziretsa? Bwerani tiwone mathangwe mawiri. Lakuyamba, wanthu omwe ambakwanisa kubziretsa kawiri-kawiri ambagumana na mabvuto yakucepa. Bzimwebzi bzimbawathandiza kukhala na mbverano wabwino na anzawo acitcenkha ukali, thupo, ayai kusunama. Thangwe laciwiri, kuti tipitirize kukhala pa uxamwali na Mulungu, tin’funika kulimbana na mayezo na kutcenkha bzikhumbo bzakuipa. Bzimwebzi ndibzo bzomwe Adamu na Eva adatazira kucita. (Ciy. 3:⁠6) Ninga iwo, wanthu azinji nsiku zino ambagumana na mabvuto makulu thangwe ra kusaya kubziretsa. Yahova ambadziwa kuti ndife wakuperewera nakuti mpsakunesa kukhala wakubziretsa. Koma iye ambafuna kutithandiza kuti tikunde bzikhumbo bzakuipa.​​—⁠1 Wam. 8:​46-​50. w17.09 4 ¶3-4

Pa nthawe inango, lamulo la dziko la Africa do Sul likhabvumiza lini kuti asenzi na azungu akhalire pabodzi. Koma, pa 18 Dezembro, 2011, Mboni za Yahova za mitundu yakusiyana-siyana zakupitirira 78.000 za m’dzikolo na zakucokera m’madziko manango yapafupi, zidatsonkhana mu thambwe likulu la mpira mu mzinda wa Johanesburgo. M’bodzi wa akulu-akulu wa thambwero adati: “Ndikanati kuwona gulu la wanthu lomwe lina makhalidwe yabwino ninga limweri mu thambwe muno. Mwense mwabvala bwino ndipo mwacenesa mbuto ino. Koma kuposa bzense, imwepo ndimwe mitundu yakusiyana-siyana koma mudaphatana.” Wanthu omwe ni Mboni lini za Yahova ambakwanisa kuwona kuti ndife wakuphatana na abale wathu wa pa dziko lense. (1 Pe. 5:​9) N’thangwe ranyi ifepano ndife wakusiyana na magulu manango? Ni thangwe rakuti Bibliya na mzimu wakucena wa Mulungu, bzimbatithandiza kusiya makhalidwe yomwe yambakondwesa lini Yahova. ‘Timbakhundula unthu bwathu bwakale,’ ticibvala ‘unthu bupsa.’​​—⁠Wakol. 3:​9. w17.08 15-16 ¶2-3

Bibliya limbalewa kuti kupirira ni mbali ya cisapo ca mzimu wakucena wa Mulungu. Mwakusaya kuthandizidwa na Mulungu, bzinganese kuti wanthu wakuperewera apirire pa bzakucitika bzakunesa kwene-kwene. Kupirira ni mphaso ya Mulungu, ndipo tikambalatiza khalidwe limweri, timbalatiza kuti timbafuna Yahova na anzathu. Tikambasaya kupirira, lufoyi lathu na winango lingacepe. (1 Wak. 13:⁠4; Wag. 5:​22) Kodi kupirira kumbaphatanidza ciyani? Kumbaphatanidza kupitiriza kukhala wakukondwa napo pomwe tinkulimbana na bzakucitika bzakunesa. (Wakol. 1:​11; Tiy. 1:​3, 4) Kupirira kumbatithandizambo kupitiriza kukhala wakukhulupirika kuna Yahova bziribe basa mabvuto yomwe tingagumane nayo. Bzimwebzi bzin’dzatithandiza kutcenkha kubwezera tikambacitiridwa bzinthu bzakuipa. Bibliya limbatiuza kuti tin’funika kudikhirira na mtima wense. Ndipopa mpsakufunika kwene-kwene kupfunza bzomwe bzidanembedwa pa Tiyago 5:​7, 8. w17.08 4 ¶4

Kodi maswakamwe, mukafuna kuyenda ulendo, mumbayamba lini mwakonzekera ulendobo? Inde, cinthu ca nzeru ni kudziwiratu komwe mun’funa kuyenda. Moyo uli ninga ulendo, ndipo nthawe yakukumbukira komwe mun’funa kuyenda ni pomwe mukali tswaka. N’cadidi kuti mpsakunesa kucita bzimwebzi. Tsono lekani kugopa. Kumbukirani mafala ya Yahova ya m’vesi la leroya. Yahova an’funa kuti mumbakonzekere tsogolo lanu mwanzeru. (Mpa. 12:⁠1; Mat. 6:​20) Iye an’funa kuti mumbakhale wakukondwa. Ndipo timbadziwa bzimwebzi thangwe ra bzinthu bzomwe timbawona m’cirengedwe, mphanvu yakubva yomwe tinayo na goso la cakudya comwe timbadya. Yahova ambatisamalirambo mwa njira zinango. Iye ambatipasa malango ndipo ambatipfunzisa momwe tingakhalire na moyo wabwino. Tenepo, wanthu akalamba kubvera malango yace yanzeru, iye ambasunama kwene-kwene. Ndipo wale omwe ambateweza lini malango yace, iye ambawauza kuti: ‘Imwepo mudasankhula bzomwe bzimbandidekera lini. . . . Atumiki wangu an’dzamwa, tsono imwepo mun’dzanyala. Atumiki wangu an’dzakuwa mwa cikondweso thangwe ra mkhalidwe wabwino wa mtima wawo.’ (Zai. 65:​12-​14) Tikambacita bzakusankhula bzabwino pa moyo wathu, timbapasa mbiri Yahova.​​—⁠Mim. 27:⁠11. w17.07 21 ¶1-2

Penu Mulungu ambadziwa nyenyezi ibodzi na ibodzi, ndiye kuti iye ambakudziwanimbo imwepo. Iye nthawe zense ambadziwa momwe muliri, momwe munkubvera na bzomwe mumbafunikira pa nthawe iri-yense yakuthemera! Yahova ambadziwa mabvuto yomwe munkugumana nayo, ndipo iye ana mphanvu yakukuthandizani. (Psal. 147:⁠5) Pinango mungawone ninga kuti bvuto lanu ndikulu kwene-kwene mwakuti mungakwanise lini kulimbana nalo. Tsono Mulungu ambadziwa bzomwe tingakwanise lini, ndipo ‘ambakumbukira kuti ndife pfumbi.’ (Psal. 103:​14) Pakuti ifepano ndife wakuperewera, ndipopa timbaphonya mwakubwereza-bwereza, ndipo bzimwebzi bzingatisunamise. Timbabziimba mulandu thangwe ra cinthu cinango comwe tidalewa, cikhumbo cinango cakuipa comwe tikhabva ayai njiru yomwe tikhanayo! Tsono Yahova ambaphonya lini na pang’onopo, koma iye ambadziwa momwe timbabvera. (Zai. 40:​28) Pinango imwepo mudakwanisa kale kuwona momwe boko lamphanvu la Yahova lidakuthandizirani kukunda mayezo ayai bzineso bzinango.​​—⁠Zai. 41:​10, 13. w17.07 16 ¶6-8

M’bale munango ku Sir Lanka ambapereka mui wace kuti abale acitire mitsonkhano ya gwere na yadera, nakuti abale omwe ankucita utumiki bwa nthawe zense ambafikire pa muipo. N’cadidi kuti m’baleyu ambaluza kobiri thangwe ra kucita bzimwebzi, koma bzimbathandiza abale wa kumweko, omwe mbakusaya. Abale wa m’madziko yomwe basa lathu ndakuletsedwa, ambaphatisa basa nyumba zawo kuti ambacitire mitsonkhano ya gwere. Bzimwebzi bzimbacitisa kuti apainiya na abale winango wakusaya akhale na mbuto yakutsonkhanira ya fovolo. Mpfumakazi inango yomwe imbapereka kobiri nthawe zense kuti zithandizire basa lakupalizira, idalewa kuti na kupita kwa nthawe, idadzazindikira cinthu cinango. Iyo idati: “Ndidazindikira kuti ndikambathandiza winango, ni pomwe cikhumbo cangu cakufuna kuthandiza winango cimbakuliratu. Ndipo bzimwebzi bzimbandithandiza kuti ndikhale na makhalidwe manango yabwino ninga kulekerera, kupirira, kubvuma malango na kuleka kukalipa winango akandiphonyera.” w17.07 5 ¶9-⁠10

Napo penu Djobi adadzazindikira thangwe la mabvuto yomwe adagumana nayo, pinango iye akhabzibvunza thangwe ranyi Mulungu adamulekerera kubonerako. Penu makumbukidwe yamweya yakhamubwerera, pinango iye akhakumbukira bzomwe Yahova adamuuza. Kukumbukira bzimwebzi kudamutsangalaza ndipo kudamuthandiza kukhala na makumbukidwe yakuthemera. (Psal. 94:⁠19) Kumbakumbukira bzomwe bzidacitikira Djobi kungatithandize kulungamiza makumbukidwe yathu ndipo kungatitsangalaze. Bukhu la Djobi ni mbali ya bzinthu bzomwe Yahova adacitisa kuti bzinembedwe ‘kuti bzitipfunzise, kuti mwa kupirira kwathu pabodzi na mtsangalazo wa Bzakunembedwabzo, ifepano tikhale na cidikhiro.’ (War. 15:⁠4) Bzimwebzi bzimbatipfunzisa kuti tin’funika lini kumbakumbukira kwene-kwene bza mabvuto yathu mpaka kufika pa kuleka kumbakumbukira bza kudziwikisidwa kwa utongi bwa Yahova. Ninga Djobi, ifembo timbathandizira utongi bwa Yahova mwa kupitiriza kukhala wakukhulupirika kwa iye napo tigumane na mabvuto pa moyo wathu. w17.06 17 ¶9; 18 ¶13-⁠14

Jezu akhadziwa kuti anyakupfunza wace akhafunikambo kupuma. Mwa ciratizo, pomwe iwo adaphata basa mwamphanvu lakupalizira, Jezu adawauza mafala yomwe yalewedwa padzuluya.Tingapume mwa kucita masenzeka na bzakutsangalaza. Koma tin’funika kukhala tceru kuti bzimwebzi bzileke kukhala cinthu cakufunika kwene-kwene pa moyo wathu. Mu nthawe ya apostolo, wanthu azinji akhana mkhalidwe wakuti: ‘Mbatidyeni ndipo mbatimweni, pakuti mangwana tinifa.’ (1 Wak. 15:​32) Mkhalidweyu ulipombo nsiku zino. Kodi n’ciyani comwe cingatithandize kudziwa penu tinkuikha masenzeka ayai bzakutsangalaza pa mbuto yakuthemera? Cinthu cibodzi comwe tingacite ni kusankhula mdzinga ticinemba nthawe zomwe tamala pakucita bzinthu bzauzimu mkati mwa mdzingayo. Tikamala tinganembembo nthawe zomwe timbamala tinkucita bzakutsangalaza mkati mwa mdzinga ubodzi-bodziyo, ninga masenzeka ya mpira, kuwona mavidiyo, ma TV na masenzeka yakusiyana-siyana. Kodi bzomwe tiniwonabzo bzinkulatiza kuti tin’funika kucinja cinthu cinango?​​—⁠Wayef. 5:​15, 16. w17.05 24 ¶11-​13

Mu there la Jezu, nyamalondayu adagumana mwala wabwino, wakufunika kwene-kwene. Iye adaufuna kwene-kwene mwalayo, mwakuti adakagulisa bzinthu bzense bzomwe iye akhanabzo kuti augule. Kulewa cadidi, mwalayu ukhali wakufunika kwene-kwene kwa iye! Tinkupfunza kuti cadidi cakulewa bza Umambo bwa Mulungu, ciri ninga mwala wakufunika kwene-kwene. Tikambafuna kwene-kwene Umambo bwa Mulungu ninga munthu wa m’there la Jezu ule, tin’dzacita ciri-cense kuti tikhale nzika za Umambobo. (Mar. 10:​28-​30) Mwa ciratizo, Zakeu adadala thangwe ra kobiri zomwe akhatengera wanthu mwakusaya mulandu. (Lu. 19:​1-⁠9) Nsiku inango, Zakeu adabva Jezu ankulewalewa bza Umambo. Iye adadekedwa kwene-kwene na bzomwe adabvabzo, mwakuti adafuna kucinjiratu bzinthu pa moyo wace. Iye adati: ‘Mbuya, ndinigawa cuma cangu kati na kati ndicicipereka kwa anyakusauka, ndipo bzinthu bzomwe ndidapamba kwa munthu ali-wense, ndinimubwezera kupitirira kanai.’ Zakeu adabwezera kobiri zense zomwe akhadatengera wanthuzo ndipo adasiya kumbacita bzinthu mwa dyera. w17.06 10 ¶3-5

Abereki akakumbira abale kuti ambathandize wana wawo, abalewo an’funika nthawe zense kumbauza wanawo kuti ambalemekeze abereki wawo. Iwo angacite bzimwebzi mwa kumbalewa bzinthu bzabwino bzomwe abereki wawo ambacita na kuleka kuwatengera udindo bwawo bwakulera wanawo. Ndipo abalewa, an’funika kumbatcenkha kucita bzinthu na wanawo bzomwe bzingacitise abale wa m’gwere ayai wanthu winango kukumbuka bzinango. (1 Pe. 2:​12) Napo kuti abereki angakumbire thandizo la winango, iwo an’funika lini kuyebwa kuti ni udindo bwawo kupfunzisa wana wawo cadidi ca m’Bibliya. Ndipo iwo an’funika kumbanyang’anira thandizo lomwe wana wawo ankutambira kwa abale. Abereki, citani bzomwe mungakwanise pakuthandiza wana wanu ndipo kumbirani thandizo la Yahova mu mpembo. (2 Nkha. 15:⁠7) Ikhani uxamwali bwa wana wanu na Yahova pa mbuto yakuyamba m’mbuto mwa bzakufuna bzanu. Citani bzomwe mungakwanise kuti mutokonye mitima ya wana wanu na Fala la Mulungu. Mbakhulupirani kuti nsiku inango wana wanu an’dzatumikira Yahova. w17.05 14 ¶19-⁠20

Amuna awiri wakuipa mtima adaimba mulandu mwamuna munango. Tsono mulanduyo ukhali wa kumunamizira. Koma mwamunayo adapasidwa nyathwa yakuti aphedwe. Ndokumbukirani momwe wanthu omwe akhafuna cirungamo adabvera pomwe akhawona mwamuna wakusaya mulanduyo pabodzi na wana wace ankubomedwa na minyala mpaka kufa! Cimweci ni cidapi lini. Bzimwebzi bzidacitikiradi mtumiki wakukhulupirika wa Yahova wakucemeredwa Nabote, omwe adakhala na moyo pomwe Mambo Akabe akhatonga Jirayeri. (1 Wam. 21:​11-13; 2 Wam. 9:​26) Pomwe Mambo Akabe udauza Nabote kuti amugulisire munda wace wa mpesa ayai kuti acinjane na munda unango wabwino, Nabote adalamba. N’thangwe ranyi? Nabote adalamba mkumbiro wa Mambo Akabe thangwe cakutonga ca Yahova cikhabvumiza lini kuti Ajirayeri ambagulise utaka bwa abereki wawo. (Mwam. 25:​23; Mirew. 36:⁠7) Bzinkuwonekeratu kuti Nabote akhabvera Yahova. w17.04 21 ¶1; 22 ¶4

Kodi mbani an’dzasala wanthu wakuipa akadzapfudzidwa? Yahova adapicira kuti: ‘Anyakulungama an’dzatambira dziko la pansi, acidzapfatsa na mtendere muzinjisa.’ Ndipo pa vesi 29 pambati: ‘Anyakulungama an’dzatambira dziko la pansi, acidzakhala m’mwemo mpaka kale-kale.’ (Psal. 37:​11, 29) Kodi ‘anyakupfatsa’ na ‘ayakulungama’ ni mbani? Anyakupfatsa ni wanthu wakubzicepswa omwe ambapfunza bza Yahova na kumubvera. Anyakulungama ni wale omwe ambafuna kucita bzomwe Mulungu ambalewa kuti mpsabwino. M’dzikoli, wanthu wakuipa ndiwo azinji kwene-kwene kuposa wanthu wakulungama. Koma mu dziko lipsa, mun’dzakhala wanthu wakupfatsa na wakulungama wokha-wokha, ndipo iwo an’dzacitisa dziko lense kukhala paraizo! w17.04 11-21 ¶5-6

Lufoyi lathu kwa Mulungu, ni lomwe limbaticitisa kufuna abale wathu, maka-maka pomwe iwo ankugumana na mabvuto. (1 Ju. 3:​17, 18) Mwa ciratizo, pomwe Akristau wakuyambirira wa ku Judeya adagwedwa na bvuto la njala, gwere lidapereka thandizo. (Mab. 11:​28, 29) Ndipo mpostolo Paulo na Pedru adalimbisa Akristau kuti ambatambire bwino alendo. (War. 12:​13; 1 Pe. 4:⁠9) Pakuti Akristau ambauzidwa kuti ambadekere mtima alendo, ifepano tin’funika kumbadekerambo mtima abale wathu omwe ankugumana na mabvuto ayai omwe ankuzunzidwa thangwe ra cikhulupiro cawo! Tsapanopapa, Mboni za Yahova zizinji zasiya nyumba zawo thangwe ra nkhondo na cizunzo m’madera manango ya ku Ucrânia na ya ku Russia. Ndipo mpsakupasa nsisi kuti winango mwa abale wathuwa adaphedwa. Abalewa ankupitiriza kucita nyongo ya kupalizira ‘bzipsa bzabwino’ na kuleka ‘kucita mbali ya dziko.’​—⁠Ju. 15:​19; Mab. 8:⁠4. w17.05 4-⁠5 ¶6-7