Janeiro

Pomwe Mozeji akhakhala pa banja la mambo wa Edjipito, iye akhali lini wakufatsa. Mwa ciratizo, pomwe iye adawona munthu munango ankucita bzinthu mwakusaya cirungamo adamupha nthawe imweyoletu. Mozeji akhakumbuka kuti bzomwe adacitabzo, Yahova akhabverana nabzo. Yahova adamala magole 40 ankuthandiza Mozeji kuti abvesese kufunika kwa kukhala wakufatsa na cakulinga cakuti akwanise kutsogolera Ajirayeri, iye akhafunika kukhala wakupfatsa. Ndipo kuthumizira pa kukhala wakufatsa, iye akhafunikambo kukhala wakubzicepswa na wakubvera. Na thandizoli, Mozeji adapfunza bzinthu bzizinji ndipo adakhala mtsogoleri wabwino kwene-kwene. (Kuf. 2:11, 12; Mab. 7:21-30, 36) Nsiku zino, misolo ya mabanja pabodzi na akulu wa gwere an’funika kutewezera Mozeji. Iwo angamutewezera mwa kuleka kukalipa kamangu wanthu winango akasaya kuwalemekeza. M’mbuto mwace, iwo an’funika kukhala wakubzicepswa na wakufulumiza kuzindikira kuphonya kwa wanthuwo. (Mpal. 7:9, 20) Iwo an’funikambo kuteweza malango yakuperekedwa na Yahova yomwe yambalewa momwe angamalisire bvutolo. Ndipo iwo ambapereka mitawiro mwakufatsa nthawe zense. (Mim. 15:1) Tenepo, misolo ya mabanja pabodzi na akulu wa gwere akambakhala wakufatsa ambakondwesa Yahova, ndipo ambacitisa pamui ayai gwere kukhala pa mtendere ndipo ambapereka ciratizo cabwino pa nkhani ya kufatsa. w19.02 8 ¶1; 10 ¶9-10

Thangwe ranyi Jezu adabvera nsisi wanthu wale? Iye adawona kuti wanthuwo ‘akhali ninga mabira yakusaya m’busa.’ Pinango Jezu adawona kuti winango wa iwo akhali wakusauka ndipo akhaphata basa lamphanvu kuti asamalire mabanja yawo. Ndipo pinango winango akhadasunama thangwe ra kufedwa acibale wawo. Tsono pomwe Jezu adakumbukira bzimwebzi, iye adabvesesa mabvuto yomwe wanthuwo akhagumana nayo pa moyo wawo. Pinango Jezu adagumanambo na mabvuto ninga yamweyale. Tsono pakuti Jezu akhacita thupo na wanthuwo, iye adafunisisa kuwauza mafala yakuwatsangalaza. (Zai. 61:1, 2) Kodi tinkupfunza ciyani na ciratizo ca Jezu? Ninga Jezu, ifepano tiri pakati pa wanthu omwe ali ninga ‘mabira yakusaya m’busa.’ Iwo ankugumana na mabvuto yakusiyana-siyana. Tsono ifepano tina bzipsa bza Umambo bzomwe tingawathandize nabzo. (Cibv. 14:6) Tenepo, mwakutewezera Mbuya wathu Jezu, ifepano timbapalizira bzipsa bzabwino thangwe timbabvera ‘nsisi munthu wakubzicepswa na wakusauka.’ (Psal. 72:13) Ndipopa timbacita ciri-cense kuti tiwathandize. w19.03 21 ¶6-7

Ifepano tina mathangwe mazinji yakulatizira kuti timbafuna Yahova. Ndipo timbacita bzimwebzi sikuti thangwe rakuti ambatipasa bzinthu bzabwino bzomwe timbakomedwa nabzo nsiku na nsiku, koma thangwe rakuti ambatipfunzisa cadidi pabodzi na cakulinga cace. (Ju. 8:31, 32) Iye ambaphatisa basa gwere lacikristau kuti atitsogolere na kutithandiza. Nsiku zino tikagumana na mabvuto, iye ambatithandiza kulimbana nayo ndipo ambatipasa cidikhiro cakudzakhala na moyo wakusaya kumala na wakulungamiratu kutsogolo. (Cibv. 21:3, 4) Tenepo, tikakumbukira bzinthu bzomwe Yahova adaticitira bzomwe bzimbalatiza kuti ambatifuna, lufoyi lathu kwa iye limbathumizirika. Ndipo tikambafuna Yahova, ifepano timbakhala na mantha yakuthemera. Tin’funikambo kumbatcenkha kucita bzinthu bzomwe bzingakalipise abale wathu. Tikapitiriza kuzindikira phindu lomwe limbabwera thangwe ra kutsogoleredwa na Yahova, lufoyi lomwe tinalo kuna iye pabodzi na mitemo yace bzin’dzathumizirika. Ndipo pan’dzawoneka lini cinthu ciri-cense comwe Sathani angakupumpseni naco comwe cingadzakutaziseni kutumikira Yahova. Ndokumbukirani moyo omwe tin’dzakhala nawo mkati mwa magole 1.000. Kulewa cadidi, imwepo mun’dzawona kuti mudacita bwino kwene-kwene kusankhula kubatizidwa pa moyo wanu! w19.03 6 ¶14; 7 ¶19

Banja limbagumana phindu penu wanthu wense wa m’banjamo ambatendana. Wanthu wakulowolana akambatendana, uxamwali bwawo bumbakhala bwakulimba kwene-kwene. Bzimwebzi bzimbacitisa kuti akaphonyerana alekererane mwakusaya kunesa. Mwamuna an’funika kumbatumbiza mkazace sikuti kumbamutenda kokha penu walewa ayai wacita bzinthu bzabwino. (Mim. 31:28) Ndipo mkazi wanzeru ambauza bayace bzinthu bzabwino bzomwe ambadekedwa nabzo kwa bayaceyo. Abereki, kodi mungapfunzise tani wana wanu pa nkhani ya kutenda? Lekani kuyebwa kuti wana wanu an’dzatewezera bzomwe imwepo mumbalewa na kucita. Tenepo, mbaperekani ciratizo cabwino kwa wana wanu mwa kuwatenda akakucitirani cinthu cabwino. Ndipo pfunzisani wanawo kuti ambatende munthu akawacitira ayai kuwapasa cinthu. Athandizeni kuti ambatende kucokera pansi pa mtima, aciwona kuti kucita bzimwebzi kumbacitisa kuti munthu omwe wawathandizayo abzibve bwino. w19.02 17 ¶14-15

Mafalaya yankulatiza kuti Djobi adapitiriza kukhala wakukhulupirika. acilamba macenjera ya Sathani, ndipo ife tingacitembo bzibodzi-bodzi. Sathani ankuphatisambo basa njira zibodzi-bodzizi kwa ifepano. Kodi timbatokonyedwa tani na bzomwe Sathani adabvunza Djobi? Timbatokonyedwa mwa njira yakuti Sathaniyo adalewa kuti, ifepano timbafuna lini Yahova na mtima wense, tikagumana na mabvuto tin’dzasiya kumutumikira, ndipo kukhulupirika kwathu n’kwacinyengo! (Djobi 2:4, 5; Cibv. 12:10) Kodi imwepo mumbabzibva tani na bzimwebzi? Mpsakusunamisa, ndibzo lini? Tsono dziwani kuti, Yahova ambakukhulupirani ndipo ambakupasani mipata mizinji ya momwe mungalatizire kukhulupirika kwanu. Yahova ambalekerera kuti Sathani ayeze cikhulupiro canu. Iye ana citsimikizo cense cakuti imwepo mungapitirize kukhala wakukhulupirika ndipo an’dzakuthandizani kulatiza kuti Sathani ngwakunama. Ndipo iye wapicira kuti an’dzakuthandizani kuti mucite bzimwebzi. (Waheb. 13:6) Ni mwayi ukulu kwene-kwene kudziwa kuti Mtongi wa cirengedwe cense ambatikhulupira! Kodi imwepo munkukwanisa kuwona thangwe race kukhulupirika n’kwakufunika? Kukhulupirika kumbatithandiza kulamba magunkha ya Sathani, kukhotcerera dzina labwino la Baba wathu na kuthandizira utongi bwace. w19.02 5 ¶9-10

Jezu adalimbisa apostolowo mwakuwauza kuti: ‘Khwimikani!’ (Ju. 16:1-4a, 33) Pambuyo pa magole mazinji, anyakupfunza wa Jezu adadzakhalambo wakukhwimika ninga momwe iye akhaliri. Napo kuti akhagumana na mayezo yakusiyana-siyana, iwo alibe kusiya kumbathandizana. (Waheb. 10:33, 34) Nsiku zino, ifepano timbatewezerambo ciratizo ca Jezu mwa kukhala wakukhwimika. Mwa ciratizo, pambafunika kukhwimika kuti tithandize abale wathu omwe ankuzunzidwa thangwe ra cikhulupiro cawo. Nthawe zinango abale wathu angaikhidwe m’kawoko. Bzimwebzi bzikacitika, ifepano tin’funika kucita ciri-cense comwe tingakwanise, kuti tiwakhotcerere kwa omwe ankuwazunza. (Waf. 1:14; Waheb. 13:19) Njira inango yomwe tingalatizire kukhwimika, ni kupalizira mwakusaya kucita mantha. (Mab. 14:3) Ninga Jezu, ifepano tatsimikiza kupitiriza kupalizira bzipsa bzabwino bza Umambo, napo wanthu atitsutse ayai atizunze. w19.01 22-23 ¶8-9

Kodi n’ciyani comwe cingakuthandizeni kuti mumbapereke mitawiro yakulimbisa pa mitsonkhano? Cinthu cakufunika kwene-kwene ni kumbakonzekera mbali zense za mitsonkhano. Kutetekera na kukonzekera bwino mitsonkhano, kun’dzakucitisani kukhala wakutsudzuka kupereka mitawiro pa mitsonkhanoyo. (Mim. 21:5) Kodi kukonzekera bwino mitsonkhano kumbaphatanidza ciyani? Mukanati mwayamba pfunziro lanu, nthawe zense mbakumbirani Yahova mu mpembo kuti akupaseni mzimu wakucena. (Lu. 11:13; 1 Ju. 5:14) Patsogolo pace onani bzense bzomwe bziri mkati mwa nkhaniyo. Mwa ciratizo, mbawonani msolo wa nkhani, tumisolo tung’ono-tung’ono, mathere na kwadru zomwe ziri mkati mwace. Ndipo mukayamba kupfunza ndime ibodzi na ibodzi, mbawerengani mavesi yense yomwe yali mu nkhaniyo. Mumbakumbukire bza nkhaniyo, ndipo mbakonzekerani bwino ndime zomwe mungakapereke mitawiro. Tenepo, mukambakonzekera bwino, mun’dzagumana phindu ndipo mun’dzaneseka lini kupereka mitawiro yanu.—2 Wak. 9:6. w19.01 9 ¶6; 11 ¶13-14; 12 ¶15

Nkhani yakuti Yahova adafulizira Habakuki kunemba bza thupo lace, imbatipfunzisa nkhani yakufunika kwene-kwene. Tin’funika lini kumbacita mantha kumbauza Yahova thupo lathu ayai bzomwe tinkubvesesa lini. Ndipo mwakudeka mtima, iye ambatiuza kuti timbapembe kwa iye na kumufotokozera momwe timbabvera. (Psal. 50:15; 62:8) Habakuki adakhulupira Yahova, omwe akhali Xamwali na Baba wace, ndipo adacita ciri-cense kuti akhale naye pafupi. Habakuki akhandokhalira lini kudandaula bza mabvuto yace acifuna kuyamalisa yekha. M’mbuto mwace, iye adauza Yahova mu mpembo momwe akhabvera na thupo lace lense. Cimweci ni ciratizo cabwino kwene-kwene kwa ifepano. Yahova omwe ni mbveseri wa mpembo, ambatiuza kuti timbamukhulupire mwa kupemba kwa iye ticimbamuuza thupo lathu lense. (Psal. 65:2) Tikambacita bzimwebzi, tin’dzawona momwe Yahova ambatawirira mipembo yathu. Ndipo iye akambatitsangalaza na kutitsogolera tin’dzabzibva ninga kuti watikolombexa mwa lufoyi. (Psal. 73:23, 24) Iye an’dzatithandiza kubvesesa momwe akuwonera bvutolo, bziribe basa mabvuto yomwe tinkugumana nayo. Tenepo, kupemba kwa Yahova ni njira yabwino yakulatiza kuti timbam’khulupira. w18.11 15 ¶2; 16 ¶5-6

Davide alibe kusankhula kokha wale omwe akhana msinkhu ninga wace kuti akhale axamwali wace. Kodi mukukumbukira dzina la m’bodzi wa axamwali omwe Davide akhanawo? Pinango mukukumbukira bza Jonatani. Uxamwali bwa Davide na Jonatani ni ibodzi mwa nkhani zakulimbisa kwene-kwene zomwe timbaziwerenga m’Bibliya. Kodi imwepo mumbadziwa kuti Jonatani akhali mkulu kuposa Davide na magole 30? Tsono thangwe ranyi iwo akhabverana kwene-kwene? Thangwe rakuti wense akhakhulupira Mulungu. Iwo akhambalemekezana, ndipo ali-wense akhawona kufunika kwa makhalidwe yabwino yomwe mwanzace akhanayo, ninga kukhwimika komwe wense adakulatiza pomwe akhamenyana na anyamadulanthaka wa Mulungu. (1 Sam. 13:3; 14:13; 17:48-50; 18:1) Ninga Davide na Jonatani, ifepano tingakhale wakukondwa tikakhala pa uxamwali na wale omwe ambafuna Yahova na kukhulupira. Kiera, omwe adatumikira Mulungu kwa magole mazinji, adalewa kuti, “Ndidakhala pa uxamwali na wanthu wa pa dziko lense la pansi, wanthu wa bzikhalidwe na miyambo yakusiyana-siyana.” Tenepo, mukacitambo bzimwebzi, mun’dzawona momwe Bibliya pabodzi na mzimu wakucena umbatithandizira, kuti tikhale m’banja la anamati wa pa dziko lense la pansi. w18.12 24 ¶11-13

Unzazi umbaphatanidza pikado ninga upombo, uhule, kugonana kwa amuna okha-okha na kugona bzirombo. Mwa ciratizo, penu mwamuna wakulowola wacita upombo, mkazace ndiye angasankhule kumulamba ayai ne. Kumbukirani kuti Jezu alibe kulewa kuti penu mwamuna ayai mkazi wacita upombo, nyakuphonyeredwayo akhafunika kumulamba. Mwa ciratizo, mkazi angadasankhula kupitiriza kukhala pa banja na mwamuna wace napo penu mwamunayo wacita upombo. N’thangwe ranyi? Mkaziyo angadapitiriza kumbafuna mwamunayo, kukhala wakukonzeka kumulekerera na kucitira bzinthu pabodzi kuti alimbise malowozi yawo. Tsono penu iye angadasankhula kulamba mwamuna waceyo, acisaya kulowodwa, mkaziyo pinango angagumane mabvuto manango. Mwa ciratizo, kodi iye angadacita tani kuti agumane bzinthu bzakuthupi na kumalisa cikhumbo cakugonana? Kodi iye angadambasuwa lini mwamunayo? Kodi kulambanako kungadatokonya tani wana wace? (1 Wak. 7:14) Kulewa cadidi, mwamuna ayai mkazi wakuphonyeredwa omwe angadasankhula kulambana, angadagumana na mabvuto makulu. w18.12 12 ¶10-11

Yahova ambawenga kusaya kulungama. (Zai. 61:8) N’cadidi kuti, iye ambadziwa kuti nthawe zinango ifepano timbatazira kucita bzinthu bzakulungama thangwe ndife wakuperewera. Napo bziri tenepo, iye ambafuna kuti timbawenge bzomwe mpsakuipa, ninga momwe iye ambacitira. Kumbakumbukira thangwe lomwe limbacitisa Yahova kuwenga bzinthu bzakuipa, kun’dzatithandiza kuphatisa basa makumbukidwe yace pa moyo wathu ndipo kun’dzatilimbisa kutcenkha kucita cinthu ciri-cense comwe iye ambawenga. Tikapfunza kuwenga bzakuipa, tin’dzakwanisa kuzindikira bzinthu bzinango bzakuipa napo kuti Bibliya limbabzileweratu lini. Mwa ciratizo, nsiku zino pana kabzinidwe kanango (Lap dancing) komwe kadzala m’dzikoli komwe akazi ambabzina m’mabare na bzakubvala bzifupi kwene-kwene. Wanthu winango ambakumbuka kuti n’kuphonyeka lini kuwona bzimwebzo, thangwe n’kugonana lini. Tsono kodi Yahova ambakumbukambo tenepoyo? Kumbukirani kuti, Yahova ambawenga cinthu ciri-cense cakuipa. Tenepo, bwerani timbatcenkhe cinthu ciri-cense cakuipa mwa kukulisa khalidwe la kubziretsa na kuwenga bzomwe Yahova ambawenga.—War. 12:9. w18.11 29 ¶11-12

Piciro lomwe limbagumanika pa Habakuki 2:4 ndakufunika kwene-kwene ndipo mpostolo Paulo adalifotokoza katatu kense m’matsamba yace! (War. 1:17; Wag. 3:11; Waheb. 10:38) Tenepo, tinkupenukira lini kuti ifepano tin’dzawona kukwanirisidwa kwa mapiciro ya Yahova tikambamukhulupira, bziribe basa mabvuto yomwe tinkugumana nayo. Yahova an’funa kuti timbaikhe cidikhiro cathu pa bzinthu bzakutsogolo. Bukhu la Habakuki lina nkhani zabwino zomwe zingatithandize m’nsiku zakumalizira zino. Yahova wapicira kupasa moyo wakusaya kumala nyakulungama ali-wense omwe ambamukhulupira. Tenepo, bwerani tipitirize kulimbisa cikhulupiro cathu kwa Mulungu, bziribe basa kuti tinkugumana na mabvuto ayai thupo. Bzomwe Yahova adauza Habakuki bzimbatitsimikizira kuti iye an’dzatithandiza na kutipulumusa. Ndipo mwakudeka mtima iye ambatiuza kuti timbamukhulupire na kudikhirira nthawe yomwe adaikhazikisa, kuti Umambo bwace budzatonge dziko la pansi. Pa nthaweyo, dziko la pansi lin’dzadzala na wanthu wakukondwa na wa mtendere omwe ambanamata Yahova.—Mat. 5:5; Waheb. 10:36-39. w18.11 19-20 ¶15-17

Mu nthawe ya Jezu, wanthu winango omwe adayamba kubva cadidi alibe kupitiriza kufamba naco. Mwa ciratizo, pomwe Jezu adacita cakudabwisa ca kudyesa thimu la wanthu, thimulo lidamutewera mpaka kufika ku mg’ambu inango ya Nyanza ya Galileya. Koma pomwe Jezu adalewa kuti: ‘Mungasaya kudya thupi la Mwana wa munthu na kumwa mulopa wace, mulibe moyo mwa imwepo,’ iwo adakalipa kwene-kwene. M’mbuto mwa kumubvunza kuti awauze bza thandauzo la mafalayo, iwo adalewa kuti: ‘Mafala yamweya njakuipa, mbani angayatetekereyo?’ Ninga bzakutewera bzace, ‘anyakupfunza wace azinji adamusiya, acibwerera kukacita bzinthu bzomwe akhadasiya m’mbuyo, ndipo alibe kufamba naye pomwe.’ (Ju. 6:53-66) Mpsakupasa nsisi kuti, wanthu winango nsiku zino, asiya cadidi. N’thangwe ranyi? Winango asiya thangwe ra kucinja kwa kabvesesedwe ka vesi linango la m’Bibliya, ayai pinango m’bale omwe ambamudziwa bwino walewa ayai wacita cinthu comwe cawakalipisa. Winango asiya thangwe ra kusaya kukomedwa na malango ya m’Bibliya yomwe adapasidwa ayai thangwe ra kusaya kubvesesana na m’bale ayai mpfumakazi m’gwere. w18.11 10 ¶3-5

Penu gulu lacinja bzinthu bzomwe munkubzibvesesa lini, kumbukirani momwe Kristu adatsogolerera atumiki wa Mulungu mu nthawe zakale. Nsiku zino, Kristu ambapereka malango ya nzeru kuti akhotcerere atumiki wa Mulungu, kulimbisa cikhulupiro cawo na kuwathandiza kuti apitirize kukhala wakuphatana. (Waheb. 13:8) Jezu, ambatipasa malango yomwe timbafunikira pa nthawe yace mwakuphatisa basa ‘kapolo wakukhulupirika na wanzeru’. (Mat. 24:45) Tikambawona momwe Kristu ankutitsogolerera, tin’dzabvesesa kuti iye an’funa kutithandiza kuti cikhulupiro cathu cikhale cakulimba. Kristu ambatithandizambo kuti timbaikhe basa lathu lakupalizira pa mbuto yakuyamba, lomwe ni basa lakufunika kwene-kwene ndipo linkucitidwa pa dziko la pansi nsiku zino.—Mar. 13:10. w18.10 19-20 ¶13-16

Ciratizo cabwino ca momwe tingalatizire kuti ndife wakubzicepswa, wanthu winango akaticitira bzinthu bzakuphonyeka, timbacigumana pa 2 Samuweri 16:5-13. Simeyi, wacibale wa mambo Sauli, adatukwana na kulewa kuipa Davide pabodzi na atumiki wace. Davide angadafuna angadamalizana naye, koma mwa kupirira iye adabvuma kuti Simeyi apitirize kumutukwana. Kodi n’ciyani comwe cidathandiza Davide kukhala wakubziretsa? Davide adanemba kapitulo 3 ya Psalymo pomwe akhathawa mwanace Abisalomu omwe akhafuna kumupha. Ndipo pa nthawe imweyi Simeyi adalewa kuipa Davide, tsono Davideyo adapitiriza kukhala wakubziretsa. Kodi adakwanisa tani? Pa Psalymo 3:4, timbagumana mafala ya Davide yakulewa kuti: ‘Ndin’dzacemera Yahova mwakukuwa, ndipo iye an’dzanditawira.’ Ninga Davide, wanthu akaticitira bzinthu bzakuipa, tin’funika kumbapemba kwa Yahova. Ndipo iye an’dzatipasa mzimu wace wakucena kuti utithandize kokha tikapirira. Kodi imwepo mumbakhala wakubziretsa ayai mumbalekerera munthu akakucitirani bzinthu bzakuipa? Kodi mumbakhulupira kuti Yahova an’dzasamalira bvuto lanu, acikuthandizani na kukusimbani? w18.09 7 ¶16-17

Tikambapalizira, nthawe zense tin’funika kumbalemekeza wanthu omwe timbawapalizira na kuwadekera mtima. Tsono kuti ticite bzimwebzi, tin’funika kuwadziwa bwino. Kumbukirani kuti tikambapalizira nyumba na nyumba, wanthu ambatidikhirira lini thangwe iwo ambakhala alibe kuticemera. Ndipopa mpsakufunika kuwazungira pa nthawe yomwe iwo angakhale adakonzeka kuceza nafe. (Mat. 7:12) Mwa ciratizo, kodi wanthu wa m’dera lanu ambacedwa kumuka kuphampha kwa mdzinga? Mukawona kuti bziri tenepo, pinango mungayambe kucita upalizi bwa mu mseu, bwa padeca, ayai kucita ulendo bwakubwereza kwa wanthu omwe mukudziwa kuti adakonzeka kuceza namwe. Wanthu azinji mbakutanganidwa kwene-kwene, tenepo tin’funika kumbaceza nawo mu nthawe yakucepa, maka-maka bukakhala ulendo bwakuyamba. (1 Wak. 9:20-23) Wanthu akawona kuti timbawabvesesa akatanganidwa, iwo an’dzakhala wakukonzeka kuceza nafe ulendo bunango tikan’dzawazungira pomwe. Tikambalatiza makhalidwe ya mzimu wa Mulungu, ifepano tin’dzakhaladi ‘anyabasa anzace wa Mulungu.’ Ndipo Yahova an’dzatiphatisa basa kuti tithandize munthu ali-wense kuti apfunze cadidi ca m’Bibliya.—1 Wak. 3:6, 7. w18.09 31 ¶15; 32 ¶17

Kodi kukhala wakubzicepswa kungakuthandizeni tani kuti mukhale wakukondwa? Wanthu azinji m’dzikoli mbaukali na waciwembo ndipo bzimwebzi bzimbawacitisa kuti agumane mabvuto mazinji. Tsono akapfunza cadidi ca m’Bibliya, iwo ambacinja acibvala ‘unthu bupsa.’ Ndipo iwo ambakwanisa kulatiza makhalidwe ninga ‘lufoyi, kucitira winango nsisi, kudeka mtima, kubzicepswa m’makumbukidwe, kufatsa na kupirira.’ (Wakol. 3:9-12) Ninga bzakutewera bzace, iwo ambakhala na mtendere wa mu mtima, ambakhala pauxamwali bwakulimba na anzawo ndipo ambakhalambo wakukondwa. Ndipo Fala la Mulungu limbalewa kuti iwo ‘an’dzatambira dziko la pansi.’ (Psal. 37:8-10, 29) Kodi Jezu akhathandauza ciyani pomwe adalewa kuti wakubzicepswa ‘an’dzatambira dziko la pansi’? Akristau wakudzozedwa an’dzatambira dziko la pansi mwa kudzakhala ninga wamambo na wansembe. (Cibv. 20:6) Ndipo bzulu na bzulu bza wanthu omwe alibe cidikhiro ca kudzayenda kudzulu, an’dzatambira dziko la pansi ninga utaka mwa kudzakhala m’mwemo kwa muyaya. Iwo an’dzakhala wakulungamiratu, ndipo an’dzakhalambo na mtendere pabodzi na cikondweso. w18.09 17 ¶8-9

Yahova ni ciratizo cabwino pa nkhaniyi. (Ciy. 18:32; Djos. 10:14) Kuti muwone momwe Yahova aliri mtetekeri wabwino, werengani maceza yomwe yambagumanika pa cinembo ca Kufuluka 32:11-14. Yahova adabvuma kuti Mozeji afotokoze nzeru yace, napo kuti iye akhalibe kumubvunza bzakucita. Ndipo napo Mozeji kawiri-kawiri akhacita bzinthu bzakuphonyeka, Yahova adamutetekera, aciphatisa basa nzeru zacezo. Kodi imwepo mumbatetekerambo munthu omwe kale-kale adacita bzinthu bzakuphonyeka, muciphatisa basa makumbukidwe yace? Bzomwe Yahova adacita na Mozeji ndibzo bzomwe ambacita na wanthu wense omwe ambapemba kwa iye mwakukhulupirika. Bzibvunzeni kuti: ‘Penu Yahova ambabzicepswa kuti atetekere wanthu, ninga momwe adacitira m’mbuyomu na Abalahamu, Rakeli, Mozeji, Djosuwe, Manowa, Eliya na Ezekiya, kodi inepano ndingakwanisembo lini kucita bzibodzi-bodzibzi? Kodi ndimbalemekeza abale wangu mwa kuwatetekera pomwe ankufotokoza makumbukidwe yawo, ndipo bzikakhala bzakuthemera kuphatisa basa makumbukidweyo? Kodi alipo m’bale wa m’gwere ayai wakuthupi omwe inepano ndin’funika kumutetekera? Penu alipo, kodi ndingamutetekere tani?’—Ciy. 30:6; Way. 13:9; 1 Wam. 17:22; 2 Nkha. 30:20. w18.09 6 ¶14-15

Nthawe zinango, bzingatinese kukhala wakupasa penu wanthu omwe timbakhala nawo pafupi ambandokumbukira bza iwo okha basi. Tsono tireke kuyebwa kuti Jezu adalewa kuti timbafune Yahova na mtima wathu wense, na moyo wathu wense, na nzeru zathu zense pabodzi na mphanvu zathu zense, nakuti timbafune mwanzathu ninga momwe timbabzifunira tekha. (Mar. 12:28-31) Wale omwe ambafuna Yahova ambamutewezerambo. Yahova na Jezu mbakupasa. Iwo ambatilimbisa kuti titewezere ciratizo cawo thangwe ambadziwa kuti kucita bzimwebzi kun’dzaticitisa kukhala wakukondwa. Tikakhala wakupasa pakutumikira Mulungu na kumbacitira bzinthu bzabwino anzathu, tin’dzalemekezesa Yahova ndipo ifepano tin’dzagumana phindu pabodzi na winango. Mwakusaya kupenukira imwepo munkucita kale nyongo yakukhala wakupasa na kuthandiza winango, maka-maka abale pabodzi na mpfumakazi zanu. (Wag. 6:10) Ndipo mukapitiriza kucita bzimwebzi, wanthu an’dzakutendani na kukufunani, bzomwe bzin’dzakucitisani kukhala wakukondwa kwene-kwene. w18.08 20 ¶19-20

Yahova adaphatisa basa Pedru kuti athandize Akristau wense kubvesesa nfundo yakuti iye alibe tsankhulo. Ndipo Yahova ambabvuma munthu ali-wense omwe ambamugopa na kucita bzabwino, bziribe basa mtundu wace, komwe adabadwira, dzinza ayai cirewedwe cace. (Wag. 3:26-28; Cibv. 7:9, 10) Mwakusaya kupenukira imwepo mumbaidziwa kale nfundo imweyi, tsono tani penu mudakulira ku dziko ayai m’banja lomwe likhana mzimu wa tsankhulo? Pinango mungalewe kuti mulibe tsankhulo, tsono cadidi n’cakuti nthawe zinango, makumbukidwe ya tsankhuloyo yangakubwerereni basi. Bzimwebzi ndibzo bzomwe bzidacitikambo na Pedru. Iye adathandiza winango kuwona kuti Mulungu alibe tsankhulo, koma napo bzikhali tenepo, iye akhalibe kumalisiratu mzimu wa tsankhuloyo mu mtima mwace. (Wag. 2:11-14) Tenepo tireke kumbayeruza anzathu mwakuwona mawonekedwe yakunja. Kodi tingacite tani bzimwebzi? Kuti tikwanise kuzindikira penu tina tsankhulo ayai ne, ifepano tin’funika kumbapenda bzicito bzathu kuti tiwone penu bzimbabverana na bzomwe timbapfunza m’Bibliya. (Psal. 119:105) Nthawe zinango tingabvunze xamwali wathu wa pamtima kuti atiuze penu ambawona kuti timbalatiza tsankhulo, thangwe tingakwanise lini kubziwona tekha. (Wag. 2:11, 14) Ndipo pinango ifepano tingazolowere khalidwe limweri mwakuti nthawe zinango tingazindikire lini kuti tinkucitira tsankhulo anzathu. w18.08 10 ¶5; 11 ¶6

Timbabzibvunze kuti: ‘Kodi wanthu wense ambawona kuti ndine wakukhulupirika kwa Yahova? Kodi ndimbabzidziwikisa kwa wanthu ninga Mboni ya Yahova?’ Tsono tani penu timbacita manyazi kubzidziwikisa ninga Mboni, kodi Yahova ambabva tani? Mwakusaya kupenukira iye ambasunama kwene-kwene. (Psal. 119:46; Mar. 8:38) Mpsakupasa nsisi kuti abale na mpfumakazi zinango ambatewezera ‘mzimu wa dzikoli,’ ndipo iwo ambasiyana lini na wale omwe ambanamata lini Yahova. (1 Wak. 2:12) Ndipo ‘mzimu wa dziko’ umweyu, umbacitisa wanthu kuikha makumbukidwe yawo pa bzikhumbo bza thupi. (Wayef. 2:3) Mwa ciratizo, ifepano timbatambira malango mazinji yakulewa bza kabvalidwe, koma napo bziri tenepo, abale na mpfumakazi zinango ambabvala bzakubvala bzakusaya kuthemera. Iwo ambabvala bzakubvala bzakuthimba kwene-kwene ayai bzakungwerewera napo pakuyenda ku mitsonkhano. Ndipo ambagwata na kumanga tsisi lawo ninga momwe wanthu azinji ambacitira ku dzikoku. (1 Tim. 2:9, 10) Bzimwebzi bzimbacitisa kuti bzikhale bzakunesa kuzindikira penu iwo ni Mbonidi za Yahova ayai ne.—Tiy. 4:4. w18.07 23 ¶11; 24 ¶12

Tensenefe ndife abale thangwe ndife wana wa Adamu. (Mab. 17:26) Jezu adalewambo kuti anyakupfunza wace akhali abale na mpfumakazi thangwe rakuti iwo adabvuma Yahova ninga Baba wawo wakudzulu. (Mat. 12:50) Wense akhacita mbali ya banja la Mulungu ndipo akhali wakuphatana mu lufoyi na m’cikhulupiro. Ndipopa m’matsamba yomwe apostolo akhanembera magwere, akhaphatisa basa mafala yakuti abale na mpfumakazi pakulewa bza Akristau anzawo. (War. 1:13; 1 Pe. 2:17; 1 Ju. 3:13) Pambuyo pa kufotokozera anyakupfunza wace kuti akhafunika kumbawonana ninga ubale bwawo, Jezu adatsindika kuti iwo akhafunika kukhala wakubzicepswa. (Mat. 23:11, 12) Ninga momwe tawonera kale m’mbuyomu, nthawe zinango apostolo akhanesana thangwe ra kubzikuza. Mu nthawe ya Jezu, wanthu akhasamwa kwene-kwene thangwe ra mtundu wawo. Ndipo Ajuda azinji akhabziwona kuti mbapadzulu kwene-kwene kuposa mitundu inango thangwe iwo akhali wana wa Abalahamu. Tsono Juwau Batista adawauza kuti: ‘Mulungu angakwanise kubweresera wana Abalahamu kucokera ku minyalayi.’—Lu. 3:8. w18.06 11 ¶8-9

Munthu akambatikalipisa mwakubwereza-bwereza, kodi timbayamba takumbuka tinati kulewa cinthu ciri-cense? Kodi timbakhala wakubziphata? (Mim.  10:19; Mat. 5:22) Wanthu akambatinyosa, ifepano tin’funika ‘[kumbapasa] mpata ukali bwa Mulungu,’ ayai kusiya kuti Yahova alatize ukali bwace. (War. 12:17-21) Kodi bzimwebzi bzinkuthandauza ciyani? Bzinkuthandauza kuti m’mbuto mwa kukalipa, ifepano tin’funika kumbapirira, ticimbadikhira Yahova kuti acite ciri-cense pa bvuto lomwe tagumana nalolo. Tsono tikasaya kucita bzimwebzi, ticimbabwezera tekha, tin’dzakhala tikunyoza Yahovayo. Kodi tina cizolowezi cakumbaphatisa basa malango yatsapano yomwe Yahova ambatipasa? Tin’funika lini kumbandocita bzinthu ninga momwe timbacitira kale, m’mbuto mwace, tin’funika kumbateweza mwakamfulumize malango yali-yense yomwe Yahova ambatipasa mwakuphatisa basa gulu lace. (Waheb. 13:17) Ndipo tin’funikambo kumbasamala kwene-kwene kuti tireke ‘kupitirira malire pa bzinthu bzakunembedwa.’ (1 Wak. 4:6) Ndipo tikambaphatisa basa malango ya Yahova, ifepano tin’dzapitiriza kunyang’ana kwa iye. w18.07 13 ¶17; 14 ¶18

Kukhala wakukhwima mwauzimu, kungatithandize kumbafuna kwene-kwene mitemo ya Mulungu. Thangwe ranyi? Thangwe malamulo yambaleweratu padeca bzomwe munthu an’funika kucita, tsono mitemo imbalewa lini, ndipo ingaphatisidwe basa pa bzakucitika bzakusiyana-siyana. Mwa ciratizo, mwana ambabvesesa lini ngozi yomwe ingabwere thangwe ra kucita uxamwali na wanthu wakuipa, tenepo abereki wace ambafunika kumuuza bzakucita kuti amukhotcerere. (1 Wak. 15:33) Tsono mwanayo akakula, ambayamba kuphatisa basa mitemo ya m’Bibliya ndipo bzimwebzi bzimbamuthandiza kusankhula axamwali wabwino. (1 Wak. 13:11; 14:20) Mpsibodzi-bodzimbo na ifepano, tikambaphatisa basa mitemo ya m’Bibliya, cikumbu-mtima cathu cimbapfunzisidwa bwino, cimbakwanisa kutitsogolera ndipo timbabvesesa bzomwe Mulungu an’funa kuti ticite pa cakucitika ciri-cense. Ifepano tina bzinthu bzense bzakufunikira kuti timbacite bzakusankhula bzomwe bzingakondwese Yahova. Ndipo m’Bibliya muna malamulo na mitemo yomwe ingatithandize kukhala ‘wakuthemera na wakukonzeka kuti ticite basa liri-lense labwino.’—2 Tim. 3:16, 17. w18.06 19 ¶14, 16; 20 ¶17

Jezu adalatiza kuti Ajuda angadapfunza na Msamariya ule thandauzo la kufuna mnansi wawo. (Lu. 10:25-37) Jezu anati kubwerera kudzulu, iye adauza anyakupfunza wace kuti apalizire ku ‘Judeya kwensene na ku Samariya mpaka kumalekezero ya dziko la pansi.’ (Mab. 1:8) Tsono kuti akwanise kucita bzimwebzi, anyakupfunza wa Jezu akhafunika kukunda mzimu wakubzikuza na wa tsankhulo. Jezu akhadakonzekeresa kale anyakupfunza wace kuti ambapalizire wanthu wa mitundu yense, thangwe kawiri-kawiri iye akhambalewa bza makhalidwe yabwino ya wanthuwo. Mwa ciratizo, iye adatenda mkulu munango wa acikunda thangwe ra cikhulupiro cace camphanvu. (Mat. 8:5-10) Pomwe akhali mu mzinda wa Nazaleti, Jezu adafotokoza momwe Yahova adathandizira wanthu wa mitundu inango, ninga mkazi mansiwa wa ku Zarefati na Naamani wa ku Siriya omwe akhana mapere. (Lu. 4:25-27) Jezu adapalizirambo mkazi munango wa ku Samariya ndipo adamala nsiku ziwiri mu mzindayo thangwe wanthu wa kumweko akhafunisisa kubva mafala yace.—Ju. 4:21-24, 40. w18.06 11 ¶10; 12 ¶11

Mpostolo Paulo adandendemezera Akristau na acikunda. Ifepano tinkumenya nkhondo, ndipo tinkulimbana na anyamadulanthaka caiwo! Tsono anyamadulanthakawo si wanthu ninga ife, koma ni Sathani pabodzi na madimonyo yace. Iwo ankumenya nkhondo kuyambira kale-kale, ndipo tsapano iwo ni axaxa. Ndipopa, tingawone ninga kuti tingakwanise lini kukunda nkhondoyo, maka-maka kwa wale omwe ni maswaka. Tsono, kodi n’cadidi kuti maswaka yangakwanise lini kukunda nkhondo imweyi? Ne. Iwo angakwanise, ndipo ankukunda kale! Kodi n’ciyani comwe cimbawathandiza? Iwo ambapasidwa mphanvu na Yahova. Ndipo, ninga acikunda wakupfunzisidwa bwino, maswakayo ‘yambabvala bzifuzo bzense bza nkhondo bzakucokera kwa Mulungu’ bzomwe bzimbawathandiza kukhala wakukonzeka bwino kuti amenye nkhondoyo. (Wayef. 6:10-12) Pomwe Paulo adafotokoza ciratizoci, pinango iye akhakumbukira bzifuzo bza nkhondo bzomwe acikunda wa ku Roma akhabvala.—Mab. 28:16. w18.05 21 ¶1-2

Thangwe likulu lomwe limbaticitisa kuti timbapalizire ndakuti timbafuna kutumbiza Yahova na kucenesa dzina lace. (Ju. 15:1, 8) N’cadidi kuti palibe comwe tingacite kuti ticenese dzinalo kuposa momwe liririmo. Iro lidacena kale m’mbali zense. Tsono, onani bzomwe mpolofeta Zaiya adalewa. Iye adati: ‘Yahova wa anyankhondo—ndiye omwe mun’funika kumbamuwona kuti ngwakucena.’ (Zai. 8:13) Tenepo, timbacenesa dzina la Mulungu, tikambawona dzinalo kukhala lakufunika kwene-kwene kuposa madzina yense na pomwe tinkuthandiza winango kuti alidziwembo. Mwa ciratizo, tikambapfunzisa wanthu bza makhalidwe yabwino yomwe Yahova anayo, pabodzi na cakulinga comwe iye anaco kwa wanthufe, cakudzakhala na moyo wakusaya kumala m’Paraizo, timbawathandiza kuwona kuti bzinthu bzense bzakuipa bzomwe Sathani ambalewa pakulewa bza Yahova, mpsakunama. (Ciy. 3:1-5) Ndipo timbacenesambo dzina la Mulungu tikambathandiza wanthu kudziwa kuti Yahova ngwakuthemera ‘kupasidwa mbiri, ulemu na mphanvu.’—Cibv. 4:11. w18.05 10 ¶3-4

Thangwe likulu lomwe limbaticitisa kukhala na bzakulinga bzauzimu ni kutenda Yahova thangwe ra lufoyi lace pabodzi na bzinthu bzense bzomwe iye ambaticitira. Ndokumbukirani bzinthu bzomwe Yahova adakupasani: Moyo, cikhulupiro, Bibliya, gwere pabodzi na cidikhiro comwe munaco cakudzakhala m’Paraizo kwa muyaya. Tenepo, mukakhala na bzakulinga bzauzimu, mumbalatiza kwa Yahova kuti mumbamutenda thangwe ra bzinthu bzensenebzi, ndipo mumbakhalambo wakufendererana naye. Mukambacita nyongo yakukwanirisa bzakulingabzo, mumbakhala munkucitira Yahova basa labwino, ndipo bzimwebzi bzingakucitiseni kukhala wakufendererana naye. Mpostolo Paulo adapicira kuti: ‘Mulungu si wakusaya kulungama kuti angayebwe basa lanu na lufoyi lomwe mudalatiza pa dzina lace mwa kutumikira wakucena na kupitiriza kuwatumikira.’ (Waheb. 6:10) Tenepo, imwepo mungakhale na bzakulinga bzauzimu napo kuti mukali ang’ono. Kodi mungakumbukire bzakulinga bzauzimu bzinango bzomwe imwepo mungakhale nabzo, mucicita nyongo ya kubzikwanirisa?—Waf. 1:10, 11. w18.04 28 ¶5-6

Akristau wakuyambirira akhatongedwa na boma la Roma, lomwe wanthu wace akhasamwa kwene-kwene thangwe ra malamulo ya bomalo, cirungamo na ufulu bomwe akhanabo. Mbali ikulu ya wanthu omwe akhatongedwa na boma la Roma, akhali akapolo, ndipo iro likhathemba akapolowo kuti ambacite basa lizinji lamphanvu. Tenepo, wanthu azinji kuphatanidzambo Akristau omwe akhatongedwa na bomali, kawiri-kawiri akhambacezerana nkhani zakulewa bza ukapolo na ufulu. Kawiri-kawiri mpostolo Paulo akhambalewa bza ufulu m’matsamba yomwe iye akhambanemba. Tsono, iye akhacita lini bzimwebzo kuti amalise mabvuto ya m’dzikoli, ninga momwe wanthu akhafunira pa nthawe imweire. M’mbuto mwace, iye pabodzi na Akristau anzace adacita nyongo yakupfunzisa wanthu bzipsa bzabwino bzakulewa bza Umambo bwa Mulungu, aciwathandizambo kubvesesa kufunika kwa nsembe ya cakulombolera ya Kristu Jezu. Ndipo Paulo adauza Akristau anzace komwe angadagumana Nsansa ya ufulu caibo. w18.04 9 ¶1-2

Usiku bwakumalizira kuti mangwana yace Jezu afe, iye adauza ateweri wace mafala ya mu vesi la leroya. Pedru adakhala m’bodzi mwa wale omwe adatsogolera gwere la Akristau wakuyambirira. (Wag. 2:9) Iye adalimbisa abale na momwe adacitira bzinthu mwakukhwimika pa Pentekosite na patsogolo pace. Ndipo pambuyo pa kutumikira kwa magole mazinji, iye adadzanembera tsamba abale wacewo kuti: ‘Ndakunemberani m’mafala yakucepa kuti ndikulimbiseni na kucitira umboni bwakuti uku ndiko kudeka mtima kukulu kwa Mulungu, ndipo mukuphatisise mwamphanvu.’ (1 Pe. 5:12) Matsamba yomwe Pedru adanembera Akristau wale yadawalimbisa kwene-kwene. Ndipo nsiku zino yangatilimbisembo maka-maka pomwe tinkudikhira kukwanisika kwa mapiciro yense ya Yahova.—2 Pe. 3:13. w18.04 18 ¶12-13

Wanthu azinji pa dziko lense la pansi ambafuna kukhala na ufulu pa bzinthu bzakusiyana-siyana. Wanthu winango mpaka ambacita phiringu, kuti akhale na ufulu. Kodi bzomwe iwo ambacitabzo bzimbawacitisadi kukhala na ufulubo? Ne na pan’gonopo. Kawiri-kawiri, bzakutewera bzace bzimbakhala mabvuto mazinji na infa. Bzimwebzi bzinkubverana na mafala ya Mambo Salomau yomwe yambati: ‘Munthu ambapweteka munthu mwanzace pakumutonga.’ (Mpal. 8:9) Mu vesi la lero, Tiyago adalewa bzomwe tingacite kuti tikhale na cikondweso caico pabodzi na mtsangalazo. Cakutonga cakulungamiratu cimbacokera kwa Yahova ndipo iye ambadziwa bwino bzomwe tin’funikira kuti tikhale na cikondweso caico. Yahova akhadapasa Adamu na Eva ufulu caibo na bzinthu bzense bzakufunikira kuti akhale wakukondwa. w18.04 3 ¶1-3