Fevereiro

Jezu akhabvera nsisi wanthu. Ndipo wanthuwo adabvuma na mtima wense bzipsa bza Umambo, thangwe akhawona lufoyi lomwe Jezuyo akhanalo kwa iwo. Mpsibodzi-bodzimbo na ifepano, tikambalatiza lufoyi wanthu omwe timbawagumana mu utumiki bwakumunda, tin’dzakwanisa kuwathandiza tikambawapalizira. Kodi n’ciyani cingatithandize kuti timbabvere nsisi wanthu omwe timbawapaliriza? Tin’funika kudziwa makumbukidwe ya wanthu omwe timbawagumana mu utumiki bwakumunda na kubvesesa momwe iwo aliri. Pambuyo pace, tiwathandize ninga momwe ifepano tingadafunira kuthandizidwa tingadakhala kuti ndifepano. (Mat. 7:12) Tin’funika lini kumbaphatisa basa njira ibodzi na ibodzi kuti tiyambise maceza na wanthu omwe timbawapalizira mu utumiki bwakumunda. Koma tin’funika kumbabvesesa mabvuto pabodzi na makumbukidwe ya munthu ali-wense payekha. Mubvunzeni mwakusamala kuti mudziwe munthuyo na bzomwe iye ambakhulupira. (Mim. 20:5) Tenepo, tikambabvunza wanthu, timbakwanisa kuzindikira momwe tingawathandizire na bzipsa bzabwino. Ndipo tikadziwa bzakusaya bzawo, bzimbakhala bzakusaya kunesa kuwabvera nsisi na kuwathandiza, ninga momwe Jezu adacitira. Ndendemezerani na 1 Wakolinto 9:19-23. w19.03 20 ¶2; 22 ¶8-9

Adamu na Eva adalatiza kuti akhatenda lini bzinthu bzense bzabwino bzomwe Yahova akhadawacitira. Tsono, mwakusiyana na iwo, tensenefe tina mpata wakulatiza kuti timbatenda bzinthu bzense bzomwe Yahova ambaticitira. Ndipo tikabatizidwa timbalatiza kwa Yahova kuti tikubvuma kuti ndiye omwe angatipase mitemo yakutidziwisa bzabwino na bzakuipa. Timbalatizambo kuti timbamufuna na kumukhulupira ninga Baba wathu. Pambuyo pa batismo tin’funika kupitiriza kucita bzinthu mwakubverana na bzomwe Yahova ambafuna, sikuti bzomwe timbafuna. Ndipo atumiki azinji wa Yahova akucita kale bzimwebzi. Tsono kuti imwepo mucitembo bzinthu ninga iwo, mun’funika kupitiriza kucita nyongo yakubvesesa Fala la Mulungu, Bibliya; kutsonkhana na abale pabodzi na mpfumakazi zanu mwakukhazikika, na kupitiriza kuuza wanthu winango bzomwe mudapfunza bza Baba wanu wa lufoyi. (Waheb. 10:24, 25) Ndipo mukafuna kucita bzakusankhula, mbaphatisani basa malango yomwe Yahova ambakupasani kucokera m’Bibliya na gulu lace. (Zai. 30:21) Mukacita bzimwebzi, mun’dzawona kuti bzense bzomwe mun’dzacita bzin’dzakufambirani bwino.—Mim. 16:20. w19.03 7 ¶17-18

Timbatende Mulungu wathu omwe ni mpasi. Yahova ambatipasa cakudya cizinji cauzimu. Mwa ciratizo, timbatambira malango yakutithandiza kucokera pa mitsonkhano, m’mabukhu na pa webisaite yathu. Kodi imwepo mudabvesera kale na kuwerenga nkhani, ayai kuwona vidiyo mu programa ya broadcasting, ndipo patsogolo pace mucilewa kuti, ‘Imweyi ni nkhani yomwe ndikhaifunisisa kwene-kwene’? Kodi tingatende tani Yahova thangwe ra bzinthu bzimwebzi? (Wakol. 3:15) Njira ibodzi yakulatiza kutenda kwathu ni kumbaguma m’mipembo mwathu bzinthu bzabwino bzomwe iye ambatipasa. Timbalatizambo kutenda kwathu Yahova tikambacenesa na kusamalira bwino m’mbuto zomwe timbanamatira. Tenepo, tin’funika kumbacenesa na kusamalira Nyumba zathu za Umambo, ndipo wale omwe ambaphata basa na mitcini ya gwere yakukuzira mafala, an’funika kumbaisamalira bwino kuti ireke kudzongeka. Ndipo tikambasamalira bwino Nyumba zathu za Umambo, zin’dzakhala nthawe izinji ndipo pan’dzakhala lini na bzinthu bzizinji bzakufuna kukonzedwa. Tikacita bzimwebzi, tin’dzakhala na kobiri zizinji zomwe tingadzaziphatisire basa pa kumanga na kukonza Nyumba za Umambo zomwe zadzongeka kuzungulira dziko lense la pansi. w19.02 18 ¶17, 18

Djobi akhapambula nthawe yakumbawona bzinthu bzakudabwisa bza m’cirengedwe ca Yahova. (Djobi 26:7, 8 Iye akhadabwa kwene-kwene pomwe akhakumbukira bzinthu ninga, dziko la pansi, kudzulu, mitambo na ciphaliwali. Koma napo bzikhali tenepo, iye adazindikira kuti bzinthu bzomwe akhadziwa bza m’cirengedwe ca Yahova bzikhali bzakucepa kwene-kwene. Iye akhalemekezambo mafala ya Yahova. Tenepo, iye adalewa kuti: ‘Ndakoya mafala yanu mu mtima.’ (Djobi 23:12) Djobi akhakomedwa na Yahova ndipo akhamulemekeza kwene-kwene. Iye akhafuna Yahova ndipo akhafunisisa kumukondwesa. Ninga bzakutewera bzace, Djobi adatsimikiza kupitiriza kukhala wakukhulupirika kwa Yahova. Tenepo, tin’funika kucitambo bzibodzi-bodzibzi. Ifepano timbadziwa bzinthu bzizinji bza m’cirengedwe ca Yahova kuposa wanthu wa mu nthawe ya Djobi. Ndipo tina Bibliya lomwe limbatithandiza kudziwa momwe Yahova aliri. Bzense bzomwe timbapfunza m’Bibliyamo bzimbatithandiza kupitiriza kulemekeza Yahova. Ndipo ulemu bomwe tinabo kwa Yahova, bumbatithandiza kuti timbamufune, timbamubvere na kukulisa cikhumbo cathu ca kufuna kukhala wakukhulupirika.—Djobi 28:28. w19.02 6 ¶12

Kuyambira kale-kale, maboma ya wanthu yambazunza atumiki wa Yahova. Iwo ambacita bzimwebzo thangwe ambalewa kuti ifepano timbacita bzinthu bzakuipa bzomwe bzimbabverana lini na malamulo ya boma, koma cadidi n’cakuti, iwo ambakalipa nafe thangwe timbabvera Mulungu kuposa iwo. (Mab. 5:29) Na thangwe limweri iwo ambatilewa kuipa, ambatinyoza, ambatiikha m’kawoko ndipo nthawe zinango ambatimenya. Ndipo na thandizo la Yahova tin’dzawabwezera lini koma tin’dzapitiriza kucita bzinthu mwa kufatsa. Kumbukirani ciratizo ca alumbwana atatu Wacihebereu omwe akhali m’kawoko, Ananiya, Misaeli na Azariya. Iwo mwa kufatsa, adafotokozera mamboyo thangwe race angadanamata lini cifanikiso comwe iye adakonza. M’mbuto mwace, iwo akhadikhirira ciri-cense comwe Yahova angadabvuma kuti cicitike. (Dan. 3:1, 8-28) Kodi tingatewezere tani alumbwana atatu Wacihebereu, cikhulupiro cathu cikayezedwa? Mwa kukhala wakubzicepswa na kukhulupira kuti Yahova an’dzatisamalira. (Psal. 118:7) Ndipo wanthu akambatilewa kuti tikucita bzinthu bzakuipa, tin’funika kumbawatawira mwa kufatsa na mwa ulemu. (1 Pe. 3:15) Tin’funikambo kumbatcenkha kucita bzinthu bzomwe bzingadzonge uxamwali bomwe tinabo na Baba wathu wa lufoyi. w19.02 10-11 ¶11-13

Ifepano tingakulise kukhwimika kwathu mwa kumbakumbukira cidikhiro comwe tinaco comwe cidakwanisika thangwe ra nsembe ya cakulombolera ya Jezu. (Ju. 3:16; Wayef. 1:7) Njira ibodzi yomwe ingatithandize kutenda nsembe ya cakulombolera ya Jezu, ni kumbawerenga mavesi pa midzinga yakutewera msinda wa Cikumbuso. Mbawerengani mavesi yakulewa bza Cikumbusoco, ndipo mbapembani mucimbakumbukira bzinthu bzomwe bzidacitika pa nthawe ya infa ya Jezu. Kucita bzimwebzi kun’dzakuthandizani kubvesesa thandauzo la bzizindikiro bzomwe bzimbaphatisidwa basa pa Cikumbuso na bzomwe Cakulombolera ca Kristu cimbaimira. Ndipo tikambabvesesa bzomwe Jezu pabodzi na Yahova adaticitira na phindu lomwe tinalo thangwe ra lufoyi lomwe adalilatiza kwa ifepano, cidikhiro cathu cin’dzakhala camphanvu ndipo tin’dzakhala wakukhwimika na wakupirira mpaka kuphampha. (Waheb. 12:3) Timbatenda kwene-kwene Jezu thangwe ra kupitiriza kukhala wakubzicepswa na wakukhwimika ninga Mkulu wathu wa Nsembe kudzulu, omwe ambatidandaulira kwa Mulungu! (Waheb. 7:24, 25) Kuti tilatize kutenda kwathu, tin’funika kumbagumanika pa msinda wa Cikumbuso ca infa ya Jezu ninga momwe iye adalewera.—Lu. 22:19, 20. w19.01 22 ¶8; 23-24 ¶10, 11

Yahova ambapereka mwayi kwa ali-wense wa ifepano kuti timbamutumbize. Tenepo, mitawiro yomwe timbapereka pa mitsonkhano ni mbali ya ‘nsembe za citumbizo,’ ndipo palibe munthu omwe angatiperekere nsembe imweyi. (Waheb. 13:15) Kodi Yahova ambafuna kuti ali-wense wa ifepano ambapereke mitawiro yakundendemerana? Ne na pang’onopo! Mbawonani mitsonkhano ya gwere ninga cakudya cakucokera kwa xamwali wanu wa pamtima. Yezezerani kuti axamwali wanu wa m’gwere akonza madyo, ndipo akuuzani kuti pakuyenda ku madyoko munyamule cakudya comwe mungakwanise, kodi mungadabzibva tani? Pinango mungadakhala na thupo, koma napo bzingadakhala tenepo, mungadacita bzomwe mungadakwanisa kuti munyamule cakudya ciri-cense comwe munthu ali-wense angadakakomedwa naco. Yahova, omwe ambatikonzera mitsonkhano, ambatipasa bzinthu bzizinji bzabwino pa mitsonkhanoyo. (Psal. 23:5; Mat. 24:45) Ndipo iye ambakomedwa kwene-kwene tikambanyamula nsembe yakucepa pakuyenda ku mitsonkhano. Tenepo, mbakonzekerani bwino ndipo mbakhalani wakutsudzuka kupereka mitawiro momwe mungakwanisire. Mukacita bzimwebzi mun’dzandodya lini pa meza ya Yahova, koma mun’dzabweresambo mphaso kuti mugawane na gwere lense. w19.01 8 ¶3; 13 ¶20

Mu nthawe zakale, unzazi kawiri-kawiri bukhacita mbali ya kunamata kwakunama. (Oze. 4:13, 14) Wanthu azinji akhafuna kunamata kwakunama thangwe akhakomedwa na bzinthu bzakuipa, kodi iwo adakhala wakukondwa? Ne na pang’onopo! Davide adalewa kuti wale omwe ambanamata mirungu yakunama ‘ambathumizira msunamo wawo.’ Ndipo iwo adafika mpaka pa kupereka nsembe wana wawo kwa mirungu yakunama! (Zai. 57:5) Yahova akhawenga ciwembo cawo. (Jer. 7:31) Nsiku zino, bzipembedzo bzizinji bzakunama bzimbabvumiza unzazi, kuphatanidza amuna kugonana okha-okha. Kucita bzimwebzi kumbawacitisa kuwona ninga kuti ana ufulu caibo, koma cadidi n’cakuti iwo ‘ambathumizira msunamo wawo.’ (1 Wak. 6:18, 19) Kodi imwepo mudawonambo kale bzimwebzi? Ndipopa mwaswakamwe, mbatetekerani Baba wanu wakudzulu. Latizani na bzicito bzanu kuti kubvera Mulungu n’kwabwino. Mbakumbukirani bzakutewera bzakuipa bza unzazi. Mukacita bzimwebzi, mun’dzawona kuti bzakutsangalaza bza kanthawe kakucepa bzimbabweresa ngozi ikulu kwene-kwene.—Wag. 6:8. w18.12 25-26 ¶16-18

Penu Mkristau wacita upombo, nyakuphonyeredwa ndiye omwe an’funika kusankhula penu anilambana naye ayai ne. Bzimwebzi bzikacitika, Jezu adalewa kuti nyakuphonyeredwayo ana thangwe lakubveka lakulambira nyakuphonyayo acikhala na ufulu bwa kulowola ayai kulowodwa pomwe. (Mat. 19:9) Tenepo, bzingakhale lini bzakuphonyeka penu nyakuphonyeredwayo wasankhula kulekerera nyakuphonyayo. Kumbukirani kuti pomwe Ozeya adabwererana na Gomeri, adamuuza kuti aleke kudzacita pomwe upombo na mwamuna munango. Ozeya alibe kugona na Gomeri pomwe Gomeriyo adacita upombo, koma na kupita kwa nthawe adadzagona naye pomwe. (Oze. 3:1-3) Bzimwebzi bzikulatiza momwe Mulungu adalekererera Ajirayeri acipitiriza kukhala nawo pa uxamwali. (Oze. 1:11; 3:4, 5) Kodi bzimwebzi bzinkutipfunzisa ciyani pa nkhani ya malowozi nsiku zino? Bzinkutipfunzisa kuti penu mwamuna ayai mkazi wacita upombo, ndipo nyakuphonyeredwa akagona pomwe na nyakuphonyayo, bzimbalatiza kuti nyakuphonyeredwayo walekerera mwanzaceyo. (1 Wak. 7:3, 5) Ndipo bzimwebzi bzikacitika, pambakhala palibe pomwe thangwe lakumulambira nyakuphonyayo. Pambuyo pakulekererana, mwamuna na mkazi an’funika kumbacitira bzinthu pabodzi acimbathandizana kuti awone malowozi ninga momwe Mulungu ambayawonera. w18.12 12 ¶13

Tikambapfunza Bibliya, tin’funika kumbakumbukira momwe Yahova ambawonera bzinthu. thangwe bzimwebzi bzin’dzatithandiza kucita bzakusankhula mwa nzeru. Pomwe mkazi wa Potifari adapumpsa Zuze kuti agone naye, Zuzeyo adalamba nthawe imweyoletu. Bzinkuwoneka kuti, bzomwe bzidacitisa Zuze kulamba ni kukumbukira momwe Yahova ambawonera nkhani ya malowozi. (Ciy. 39:8, 9) Tenepo Zuze adauza mkazi wa Potifari kuti: ‘Ndingacitirenyi cinthu cakuipa kwene-kweneci, ndiciphonyera Mulungu?’ Mbvunzoyu unkulatiza kuti Zuze akhawona bzinthu ninga momwe Yahova ambawonera. Apa tani ifepanombo? Kodi n’ciyani comwe imwepo mungacite penu mwanzanu wa kubasa akufuna kuti mukhale naye paumakhadzi? Kodi n’ciyani comwe mungacite penu munthu wakutumizirani mafala ayai bzithunzi-thunzi bza maika mu mtedwe mwanu? Bzimbakhala bzakusaya kunesa kukhulupirika kwa Yahova tikakhala kuti tidapfunza bza cinthuco na kuciwona ninga momwe iye ambaciwonera ticisankhuliratu bzomwe tin’dzacita. w18.11 30 ¶13-14

Adziwi winango wa Bibliya ambalewa kuti mafalaya yambathandauza kuti: “Ndin’dzamoga pamaso pa Mbuya thangwe ra kukondwa; Ndin’dzazungulira thangwe ra kukomedwa na Mulungu.” Limweri ni pfunziro likulu kwa ifepano! Yahova ambatiuza lini kokha bza mapiciro yabwino ya kutsogolo, koma ambatiuzambo kuti tsapanopapa an’kwanirisa mapiciro yace yense. Nkhani ikulu m’bukhu la Habakuki ni kufunika kwa kukhulupira Yahova. (Hab. 2:4) Ndipo kuti tipitirize kukhulupira Yahova, tin’funika kulimbisa uxamwali bwathu na iye. Tenepo tin’funika (1) Kupitiriza kupemba, ticimuuza Yahova bzense bzomwe bzinkuticitisa thupo. (2) Kutetekera mwa tceru bzomwe Yahova ambatiuza mwakuphatisa basa Bibliya, ticiteweza malango yense yomwe iye ambatipasa kucokera m’gulu lace. (3) Kukhala wakukhulupirika na wakupirira pomwe tinkudikhirira Yahova kuti akwanirise mapiciro yace. Bzimwebzi ndibzo bzomwe Habakuki adacita. Iye akhadasunama kwene-kwene pomwe adayamba maceza yace na Yahova, koma kuphampha kwace, iye adalimbisidwa ndipo adakomedwa kwene-kwene! Tenepo, tikatewezera Habakuki, tin’dzatsangalazidwa na Baba wathu wakudzulu, Yahova, omwe ambakolombexa mwalufoyi. Umweyu ni mtsangalazo ukulu omwe tingakhale nawo m’dziko lakuipali. w18.11 20 ¶18-19

Pana umboni bunango bwakulatiza kuti Yahova ambatifuna. Bibliya limbati: ‘Mulungu adafuna kwene-kwene dziko la pansi, mpaka kupereka Mwana wace wakubadwa-yekha, kuti munthu ali-wense omwe alatize cikhulupiro kwa iye aleke kupfudzidwa, koma akhale na moyo wakusaya kumala.’ (Ju. 3:16) Ndipo nsembe ya Jezu imbalatizambo kuti iye ambatifuna, ndipo lufoyi limweri limbatilimbisa kwene-kwene. Bibliya limbalewa kuti napo ‘cizunzo ayai njala,’ bzingakwanise lini ‘kutilekanisa na lufoyi la Mulungu lomwe liri mwa Kristu.’ (War. 8:35, 38, 39) Nthawe zinango, timbagumana na mabvuto yomwe yambadzonga thanzi ayai makumbukidwe yathu ndipo pinango tingaluze cikondweso cathu pa kutumikira Yahova. Koma kukumbukira momwe Kristu ambatifunira kumbaticitisa kuleka kubwerera m’mbuyo. (2 Wak. 5:14) Lufoyi lace limbatipasa mphanvu yakupitiriza kukhala na moyo na kutumikira Yahova. Ndipo limbaticitisa kuti tireke kuneta, napo tikagwedwa na malengwa ya pansi, cizunzo, wanthu akacita bzinthu bzomwe bzatikalipisa ayai tikakhala na thupo. w18.09 10-11 ¶8-9

Kuti tipitirize kufamba m’cadidi, tin’funika kubvera na kuteweza bzinthu bzense bzomwe Yahova ambalewa. Ndipo tin’funikambo kumbawona cadidi kukhala cakufunika kwene-kwene pa moyo wathu, ticimbateweza malango yense ya m’Bibliya pa bzense bzomwe timbacita. Davide akhadatsimikiza na mtima wense kufamba m’cadidi, ndipo ifepano tin’funika kucitambo bzibodzi-bodzibzi. Tsono tikasaya kucita bzimwebzi, tingayambe kukumbukira bzinthu bzomwe tidabzisiya pomwe tidapfunza cadidi, ayai kubzikhumba pomwe, ticiyamba kubwerera m’mbuyo. Koma tin’funika kumbateweza na kumbafamba ‘m’cadidi cense’ ca m’Bibliya. (Ju. 16:13) Kuti tipitirize kufamba m’cadidi, tin’funika kumbaphatisa basa nthawe yathu mwanzeru. Ndipo tikasaya kusamala, tingadzonge mbali ikulu ya nthawe yathu na bzinthu ninga masenzeka, kufufudza bzinthu pa interneti ayai kumbawona nkhani pa TV. Napo kucita bzimwebzi n’kuphonyeka lini, koma bzingatidzongere nthawe yakucita bzinthu bzauzimu. w18.11 11 ¶7, 8

Nthawe zinango, bzinthu bzingacinje pa moyo wathu mwadzidzidzi, ndipo kucinjako kungatibweresere thupo na msunamo. (Mim. 12:25) Kodi tingacite ciyani kuti tipitirize kukhala na mtendere wa mu mtima, penu bzinkutinesa kucinja? (Psal. 131:1-3) Bziribe basa kuti tinkugumana na mabvuto pa moyo wathu, ifepano tingakhale na ‘mtendere wa Mulungu’ omwe ungakhotcerere ‘luso lathu lakukumbuka’ na kukhala na mtendere wa mu mtima. (Waf. 4:6, 7) Tikakhala na thupo na wakusunama, ‘mtendere wa Mulungu’ ungatilimbise kuti tipitirize kutumikira Yahova na kuleka kubwerera mbuyo. Kuthumizira pa kutsangalazidwa na Mulungu, mzimu wa Mulunguyo ungatithandize kugumana bzinembo bzomwe bzingatithandize kupitiriza kuikha bzinthu bzauzimu pa mbuto yakuyamba.—Ju. 14:26, 27. w18.10 22 ¶2; 23 ¶5; 24 ¶8

Kodi cinthu comwe cimbatokonya moyo wa wanthu wense n’ciponi? Ni kunama! Kunama ni kulewa cinthu comwe tikudziwa kuti n’cadidi lini na cakulinga ca kupumpsa munthu. Kodi mbani omwe adayambisa kunama? Ni Sathani! Ndipo Jezu Kristu adalewa kuti iye ni ‘baba wa gunkha.’ (Ju. 8:44) Kodi ni lini pomwe iye adalewa gunkha lakuyamba? Iye adalewa gunkha lakuyamba mu zunde la Edeni, ndipo papita magole mazinji. Adamu na Eva akhana moyo wabwino kwene-kwene mu Paraizo omwe Yahova akhadawakonzera. Tsono Mulungu akhadawauza kuti iwo angadadya ‘muti wakudziwisa cabwino na cakuipa,’ angadafa. Napo kuti Sathani akhadziwa bzimwebzi, iye adaphatisa basa nyoka aciuza Eva kuti: ‘Cipo un’dzafa lini.’ Limweri lidakhala gunkha lakuyamba. Sathani adalewa pomwe kuti: ‘Mulunguyo akudziwa kuti, nsiku yomwe mun’dzacidya, maso yanu yan’dzafungukiratu, mucidzakhala ninga Mulungu, mucidziwa bzabwino na bzakuipa.’—Ciy. 2:15-17; 3:1-5. w18.10 3 ¶1-2

Kuti tikhale na mtima wakucena, tin’funika kupitiriza kukhala na makumbukidwe na bzikhumbo bzomwe bzimbakondwesa Yahova. Ndipo kukhala wakucena n’kwakufunika kwene-kwene thangwe kumbacitisa kuti Yahova akomedwe na kunamata kwathu. (2 Wak. 4:2; 1 Tim. 1:5) Kodi munthu omwe ana mtima wakucena ‘an’dzawona tani Mulungu,’pomwe ‘palibe munthu omwe angawone Mulungu acipitiriza kukhala na moyo’? (Kuf. 33:20) Fala lakuti ‘kuwona’ m’cigirego limbathandauza kukumbukira cinthu cinango na cakulinga cakufuna kucibvesesa na kucidziwa bwino. Tenepo, ‘kuwona Mulungu’ kumbathandauza kudziwa kuti iye mbani na kufuna makhalidwe yace. (Wayef. 1:18) Jezu adatewezera ndendende makhalidwe ya Mulungu, ndipopa iye adati: ‘Ule omwe an’ndiwona ine awonambo Baba.’ Tingawonembo Mulungu tikambakhala tceru mwa kuwona momwe iye ambatithandizira pa moyo wathu. (Djobi 42:5) Ndipo njira inango yomwe ingatithandize ‘kuwona Mulungu,’ ni kukumbukira bzinthu bzomwe Yahova adapicira wale omwe an’pitiriza kukhala wakucena na wakukhulupirika kwa iye. w18.09 19 ¶13, 15-16

Tikambacita bzinthu bzabwino, tin’dzakhala wanzeru ndipo Yahova an’dzatisimba kwene-kwene. N’cadidi kuti nzeru zimbabverana na cidziwiso, koma kundodziwa cinthu n’kwakukwanira lini, pambafunika bzinthu bzizinji kuti tikhale na nzeru. Ndipo nzeruzo zimbawonekera pa bzakusankhula bzomwe timbacita. Napo nyerere zimbalatizambo nzeru mwa kukoya cakudya kuti zidzadye mainza. (Mim. 30:24, 25) Kristu, omwe ambacemeredwa ‘nzeru za Mulungu,’ nthawe zense iye ambacita bzinthu bzomwe bzimbakondwesa Baba wace. (1 Wak. 1:24; Ju. 8:29) Tikapitiriza kukhala wakubzicepswa na kulatiza nzeru mwa kucita bzinthu bzabwino, Mulungu an’dzatisimba. (Mat. 7:21-23) Tenepo pitirizani kucita nyongo kuti gwere likhale mbuto yomwe wanthu wense angatumikire Yahova mwakubzicepswa. Tsono kuti ticite bzinthu bzabwino pambafunika nthawe na kupirira. Ndipo kucita bzimwebzi kumbalatiza kuti ndife wakubzicepswa, ndipo kubzicepswa kun’dzatithandiza kuti tikhale wakukondwa kuyambira nsiku zino mpaka kutsogolo. w18.09 7 ¶18

Pomwe Yahova adalenga wanthu, iye akhafuna kuti iwo akhale anyabasa anzace. Nsiku zino, wanthu wakukhulupirika angaphate basa pabodzi na Yahova, napo kuti mbakuperewera. Mwa ciratizo, timbakhala ‘anyabasa anzace wa Mulungu’ tikambapalizira bzipsa bzabwino bza Umambo na kupfunzisa wanthu cadidi ca m’Bibliya. (1 Wak. 3:5-9) Ndipo timbatenda kwene-kwene Mulengi wathu wamphanvu zense, thangwe ra kutisankhula kuti timbacite basa lakufunikali. Tsono, kupalizira ndiko lini kokha komwe kungaticitise kuti tiphate basa pabodzi na Yahova. Njira zinango za momwe tingaphatire basa pabodzi na Yahova, ni kumbathandiza wanthu wa m’banja mwathu na wa m’gwere, kumbatambira alendo, kumbathandizira mabasa ya m’gulu la Yahova yomwe yankucitika pa dziko lense na kumbathumizira utumiki bwathu. (Wakol. 3:23) Tsono tin’funika kukumbukira kuti munthu ali-wense ngwakusiyana na mwanzace. Mwa ciratizo, tingasiyane magole, thanzi, bzakucita pabodzi na maluso. w18.08 21 ¶1, 2

Yahova adatsimikizira Habakuki kuti angadamutawira mibvunzo yace ire. Bzikuwoneka kuti Habakuki angadatsangalazidwa mwakusaya kucedwa thupo lace lense. Bzimwebzi bzikhakhala ninga kuti Yahova akhauza Habakuki kuti: ‘Pakuti iwepo wapirira ndipo wandikhulupira, ndin’tawira mibvunzo yako, napo bzinkuwoneka ninga kuti panipita nthawe itali.’ Yahova adakumbusa Habakuki kuti iye akhadaikha kale nsiku yomwe angadakwanirisa piciro lace. Tenepo iye adalimbisa Habakuki kuti apitirize kudikhirira. Ndipo pakumalizira pace, mpolofetayo alibe kusunama pomwe. Ifepanombo tin’funika kudikhirira Yahova kuti amalise mabvuto yathu. Ndipo tin’funikambo kumbatetekera mwatceru bzomwe iye ambatiuza. Tenepo, tin’dzakhala na cikhulupiro camphanvu na mtendere wa mu mtima napo tikagumana na mabvuto makulu. Jezu adatilimbisa kuti tin’funika lini kumbandokumbukira bzakuti Mulungu alibe kutiuza bza ‘nthawe ayai nyengo.’ (Mab. 1:7) Ndipopa tin’funika lini kubwerera m’mbuyo, koma tikhale wakubzicepswa, wakupirira na kukhulupira Mulungu. Tsono pomwe tinkudikhirira nthaweyo, tin’funika kuphatisa basa nthawe yathu mwanzeru na kutumikira Yahova momwe tingakwanisire.—Mar. 13:35-37; Wag. 6:9. w18.11 18-19 ¶13-14

Kuyambira pomwe akhali mwana, Pedru adapfunzisidwa kuti wanthu omwe akhali lini Ajuda, akhali wakupswipa mwakubverana na Cakutonga ca Mulungu. Tsono pomwe adawonesedwa matsomphenya na Mulungu, Pedru adacinja makumbukidwe yace. (Mab. 10:9-16) Ninga Pedru, ifepano tin’funika kumbabzipenda kuti tiwone penu tina mtima wa tsankhulo ayai ne, ticibvumambo thandizo kuti ticinje khalidwe lakuipali. Kodi n’ciyani cinango comwe tingacite? Tikafungula ‘mtima’ wathu, ifepano tin’dzakhala na lufoyi m’mbuto mwakukhala na tsankhulo. (2 Wak. 6:11-13) Tsono tani pakulewa bza imwepo, kodi mumbandoceza na wanthu omwe adabadwira ku mbuto ibodzi na imwepo ayai omwe ni wa mtundu wanu na wa cirewedwe canu okha? Penu bziri tenepo, citani nyongo yakumbacezambo na wanthu winango. Mwa ciratizo, mungacoke mu utumiki bwakumunda pabodzi na abale na mpfumakazi zinango zakucokera m’mbuto zakusiyana-siyana. Ayai mungawacemere kumui kwanu kuti mukadye nawo pabodzi ayai kuceza nawo. (Mab. 16:14, 15) Mukambacita bzimwebzi, lufoyi lin’dzadzala mu mtima mwanu, mwakuti mun’dzawoneka lini mbuto yakukhala tsankhulo. w18.08 10 ¶3; 11 ¶6, 7

Bziripo pomwe bzinthu bzinango bzomwe abale na mpfumakazi zinango zimbacita, bzomwe bzimbacitisa kuti bzikhale bzakunesa kuwasiyanisa na wanthu wa m’dzikoli. Mwa ciratizo, akakhala kuti ali pa madyo, iwo ambabzina na kucita bzinthu bzomwe mpsakuthemera lini kwa Mkristau. Ndipo winango ambanemba mafala na kuikha bzithunzi-thunzi bzawo pa interneti, bzakulatiza kuti iwo ni wanthu lini wauzimu. Iwo angakhale lini axamwali wabwino kwa wale omwe ankucita nyongo yakukhala wakusiyana na dzikoli. (1 Pe. 2:11, 12) Bzinthu bzizinji bzomwe bzinkukonzedwa m’dzikoli, bzina cakulinga cakufuna kukulisa ‘cikhumbo cathu ca thupi, cikhumbo ca maso na kubziwonesera pa bzinthu bzomwe munthu anabzo.’ (1 Ju. 2:16) Tenepo, pakuti ifepano ndife wa Yahova, tin’funika kukhala wakusiyana na wanthu wa m’dzikoli. Ndipo tin’funikambo kumbatcenkha ‘makhalidwe yakuipa na bzikhumbo bza dziko’ ticikhala na ‘makumbukidwe yabwino, wacirungamo na wakubzipereka kwa Mulungu mu nkonzedwe uno wa bzinthu.’ (Tito 2:12) Ndipo bzense bzomwe timbacita pa moyo wathu, kuphatanidza kalalewedwe kathu, kadyedwe, kamwedwe, kabvalidwe pabodzi na kaphatidwe kathu ka basa, bzin’funika kumbalatiziratu padeca kwa munthu ali-wense kuti ndife wa Yahova. w18.07 24-25 ¶13-14

Tikapitiriza kunyang’ana kwa Yahova, ifepano tin’dzadzonga lini uxamwali bwathu na iye, ndipo tin’dzakalipambo lini thangwe ra bzicito bza winango. Bzimwebzi mpsakufunika kwene-kwene, maka-maka tikakhala kuti tina udindo m’gulu la Yahova ninga Mozeji. N’cadidi kuti ali-wense wa ifepano an’funika kucita nyongo yakubvera Yahova kuti adzapulumuke. (Waf. 2:12) Tsono tikakhala na udindo, Yahova ambadikhira bzizinji kwa ife. (Lu. 12:48) Ndipo tikambafunadi Yahova na mtima wense, palibe cinthu ciri-cense comwe cin’dzatikhukhumudwisa mwauzimu ayai cin’dzatilekanisa na lufoyi lace. (Psal. 119:165; War. 8:37-39) Tinkukhala m’nthawe zakupambulika na zakunesa kwene-kwene. Ndipopa mpsakufunika kwene-kwene kupitiriza kumbanyang’ana kwa Yahova, omwe ali ‘pa mpando wace wa umambo kudzulu,’ kuti tidziwe bzomwe iye an’funa kuti ticite. (Psal. 123:1) Tin’funika lini kulekerera kuti bzicito bza winango bzidzonge uxamwali bwathu na Yahova. w18.07 14 ¶19-20

Mpsakukondwesa kwene-kwene kudziwa kuti atumiki wa Yahova ankuwonesa ceza cawo! Mwa ciratizo, m’gole la 2017, Mboni za Yahova zidacitisa mapfunziro ya Bibliya yakupitirira 10 midyau. Ndipo wanthu azinji adagumanika pa msinda wa Cikumbuso, acipfunza bza nsembe ya cakulombolera yomwe ni njira yomwe Yahova adalatizira lufoyi lace kwa wanthu wensene. (1 Ju. 4:9) Kuzungulira dziko lense la pansi, Mboni za Yahova zimbalewalewa bzirewedwe bzakusiyana-siyana. Tsono bzimwebzi bzimbatitazisa lini kutumbiza Yahova mwakuphatana ninga banja. (Cibv. 7:9) Ndipo bziribe basa cirewedwe comwe timbalewalewa ayai komwe timbakhala, ifepano timbayetima ninga ‘mibvuniko ya dzikoli.’ (Waf. 2:15) Kuthumizirika kwa mbogo ya apalizi wa Umambo, ciphatano cathu na kukhala kwathu tceru, ni bzinthu bzomwe bzimbatumbizisa Yahova. w18.06 21 ¶1-3

Jezu adakomedwa kwene-kwene kuceza na mkazi Msamariya, mpaka adalamba kudya pomwe adauzidwa na anyakupfunza wace kuti adye. Mulungu akhafuna kuti iye apalizire, ndipo kupalizira mkazi wa ku Samariya ule na kucita kufuna kwa Baba wace, kukhali ninga cakudya kwa iye. (Ju. 4:32-34) Tiyago na Juwau akhalibe kubvesesa pfunziro lakufunikali. Mwa ciratizo, pomwe Jezu pabodzi na anyakupfunza wace akhali pa ulendo, iwo adapita na m’mudzi munango wa ku Samariya ndipo adakumbira mbuto yakugona. Koma Asamariya alibe kuwabvumiza kuti agone kumweko. Tsono Tiyago na Juwau adakalipa kwene-kwene mwakuti adakumbira Jezu kuti awabvumize kutumiza moto kucokera kudzulu kuti udzapfudze mudziyo. Koma Jezu adawatsimula mwamphanvu. (Lu. 9:51-56) Pinango Tiyago na Juwau angadakalipa lini kwene-kwene bzingadakhala kuti bzimwebzi bzacitikira kwawo ku Galileya. Pinango iwo adakalipa kwene-kwene thangwe akhana mzimu wa tsankhulo. Na kupita kwa nthawe, pomwe Juwau adadzapalizira Asamariya, azinji wa iwo adamutetekera, tsono pinango iye adacita manyazi thangwe ra bzomwe akhafuna kuwacitira pakuyamba bzire.—Mab. 8:14, 25. w18.06 12 ¶12-13

Pakuti cadidi ca m’Fala la Mulungu n’cakufunika kwa ifepano, tin’funika kumbateweza bzomwe Bibliya limbalewa na kumbalewa cadidico nthawe zense. Kunama ni ibodzi mwa njira zamphanvu zomwe Sathani ambaziphatisa basa, ndipo kungapweteke nyakunamayo pabodzi na nyakunamizidwayo. (Ju. 8:44) Ndipopa, ifepano timbacita nyongo yakumbalewa bzinthu bzacadidi nthawe zense, napo kuti ndife wanthu wakuperewera. (Wayef. 4:25) Tsono nthawe zinango, kulewa cadidi kumbakhala kwakunesa. Bvani bzomwe Abigail omwe ana magole 18 adalewa. Iye adati: “Nthawe zinango bzimbanesa kulewa cadidi, maka-maka pa cakucitika comwe tinkuwona kuti kunama kungakhale kwakuthandiza.” Tsono, napo bziri tenepo, Abigail ambacita nyongo ya kumbalewa cadidi nthawe zense. Thangwe ranyi? Iye adalewa kuti: “Ndikambalewa cadidi, ndimbakhala na cikumbu-mtima cakucena pamaso pa Yahova, ndipo abereki na axamwali wangu ambandikhulupira.” Ndipo Victoria, omwe ana magole 23 yakubadwa, adalewambo kuti: “Wanthu angatiseke thangwe ra kumbalewa cadidi na kumbacita bzinthu mwakubverana na bzomwe timbakhulupira. Tsono kucita bzimwebzi kumbakhala na bzakutewera bzabwino. Tikakhala wakukhulupirika, timbafendererana na Yahova, ndipo kuposa bzense timbalemekezedwa na wale omwe ambatifuna.” Mukukwanisa kuwona phindu lakumbabvala ‘bande la cadidi’ nthawe zense? w18.05 22 ¶3, 5

Bzinthu bza m’dzikoli bzinkuyenda bziciipiratu. Ndipopa tin’funika kukhala tceru kwene-kwene kuposa kale-lense. Koma timbadziwa kuti Yahova an’dzamalisa kuipa kwense pa nthawe yomwe adaikhazikisa. (Mat. 24:42-44) Ndipo pomwe tinkudikhirira nthawe imweyi, tin’funika kupirira ticimbapitiriza kukhala tceru. Tenepo, mbawerengani Bibliya nsiku zense, ndipo lekani kusiya kumbapemba kwa Yahova. (1 Pe. 4:7) Mungapfunzembo nkhani za abale na mpfumakazi zomwe zinkutumikira Yahova kwa magole mazinji. Phatisani basa nthawe yanu kuti mutumikire Yahova na kuthandiza abale wanu. Mukacita bzimwebzi mun’dzakhala wakukondwa ndipo mun’dzawona kuti nthawe yanu inkuthamanga. (Wayef. 5:16) Yahova ambabvuma kuti timutumikire napo kuti kawiri-kawiri timbamuphonyera thangwe ra kuperewera. Tsono kuti atithandize, iye ambatipasa ‘amuna ninga mphaso,’ omwe ni akulu wa gwere. (Wayef. 4:8, 11, 12) Tenepo, akulu akakuzungirani mbawonani mpata umweyu kukhala wakufunika kuti mugumane phindu na malango yawo. w18.06 25-26 ¶15-18

Jezu adauza anyakupfunza wace kuti akhafunika ‘kupitiriza kukhala mu lufoyi lace.’ N’thangwe ranyi iye adalewa tenepo? Thangwe ndakuti iye akhadziwa kuti ateweri wace akhafunika kupirira kuti akhale na moyo ninga Akristau wacadidi. Ndipo pa Juwau 15:4-10, timbawona kuti Jezu adaphatisa basa kazinji kense fala lakuti ‘kupitiriza’ kuti athandize anyakupfunza wacewo kubvesesa kuti iwo akhafunika kupirira. Kodi tingalatize tani kuti tin’funa kupitiriza kukhala mu lufoyi la Kristu ticimbafunidwa naye? Mwa kumbamubvera. Ndipo Jezu ambafuna kuti timbacite bzomwe iye adacita. Iye adati: ‘Inepano ndasunga bzakutonga bza Baba, ndicikhala mu lufoyi lace.’ Jezu ni ciratizo cabwino kwene-kwene kwa ifepano. (Ju. 13:15) Tikambabvera lamulo la Jezu lakupalizira, timbalatizambo kuti timbafuna Yahova. (Mat. 17:5; Ju. 8:28) Ndipo tikambalatiza kuti timbafuna Yahova na Jezu, iwo an’dzatithandiza kupitiriza kukhala mu lufoyi lawo. w18.05 10-11 ¶5-7

Maswaka, khalani wa nzetu pakusankhula mapfunziro, basa lomwe mun’dzaphata na bzinthu bzinango. Bzakusankhula bzimwebzi bzimbakhala ninga mphambano yomwe munthu angaigumane pambuyo pakufamba mtantho utali. Tsono bzikakhala kuti munkudziwa kale komwe munkuyenda, bzimbakhala bzakusaya kunesa kuteweza njira yomwe mun’funayo. Mpsibodzi-bodzimbo na imwepo, bzikakhala kuti muna kale bzakulinga, bzimbakhala bzakusaya kunesa kucita bzakusankhula bzanzeru. Kuzungulira dziko lense la pansi, maswaka mazinji yankucita kale bwino pa nkhani yakukhala na bzakulinga bzauzimu, ndipo iwo mbakuthemera kutendedwa. Iwo ambaikha pa mbuto yakuyamba uxamwali bwawo na Yahova pabodzi na bzakulinga bzawo bzauzimu. Maswakaya, yambakhala yakukondwa pa moyo wawo ndipo yambapfunzambo kuteweza malango ya Yahova pa ciri-cense comwe angacite pa moyo wawo, bzomwe bzinkuphatanidza nkhani ya moyo wa m’banja. Salomau adati: ‘Khulupira Yahova na mtima wako wense . . . umbamukumbukire m’njira zako zense, ndipo iye an’dzalungamiza njira zako.’ (Mim. 3:5, 6) Maswakamwe, Yahova ambakufunani kwene-kwene! Imwepo ndimwe wakufunika kwa iye ndipo iye an’dzakukhotcererani, kukutsogolerani na kukusimbani. w18.04 29 ¶7, 9

Mpostolo Juwau adakhala m’bodzi mwa wale omwe adatsogolera gwere la Akristau wakuyambirira. Iye adanemba nkhani zabwino zakusimba bza utumiki bwa Jezu. Tsono mabukhu yomwe iye adanemba yadalimbisa Akristau kwa magole mazinji, ndipo nsiku zino yankutilimbisambo. Mwa ciratizo, ni bukhu la Juwau lokha lomwe limbalewa kuti Jezu adatsimikizira kuti lufoyi ndiro khalidwe lomwe limbazindikirisa anyakupfunza wace wacadidi. (Ju. 13:35) M’matsamba matatu yomwe Juwau adanemba mumbagumanikambo nfundo zakufunika. Mwa ciratizo, tikataya mtima thangwe ra bzakuphonya bzomwe tidacita, timbalimbisidwa tikambawerenga nkhani yakulewa bza nsembe ya cakulombolera ya Jezu yomwe ‘imbaticenesa ku pikado zathu zense.’ (1 Ju. 1:7) Ndipo tikapitiriza kubzipasa mulandu thangwe ra bzakuphonyabzo, ifepano timbalimbisidwa tikambawerenga kuti ‘Mulungu ni mkulu kuposa mitima yathu.’ (1 Ju. 3:20) Ni Juwau yekha omwe adanemba m’Bibliya kuti ‘Mulungu ni lufoyi.’ (1 Ju. 4:8, 16) Ndipo mu tsamba lace laciwiri na lacitatu, muna mafala yakutenda Akristau omwe ambapitiriza ‘kufamba m’cadidi.’—2 Ju. 4; 3 Ju. 3, 4. w18.04 19 ¶14-15