Março

Tikambawerenga bukhu la Ciyambo kapitulo 1 na 2, timbawona kuti Adamu na Eva akhana ufulu bomwe palibe ne m’bodzi wa ifepano omwe anabo nsiku zino. Iwo akhana bzinthu bzense bzomwe akhafunikira ndipo pakhalibe cinthu ciri-cense comwe angadagopa ne munthu omwe angadawacitira bzinthu bzakusaya cirungamo. Ndipo iwo akhacita lini thupo na cakudya, kusaika kwa basa, matenda ne infa. (Ciy. 1:27-29; 2:8, 9, 15) Kodi bzimwebzi bzinkuthandauza kuti ufulu bwawo bukhalibe malire? Tensenefe tin’funika kudziwa kuti ni Yahova Mulungu yekha omwe ana ufulu bwakusaya malire. Thangwe ranyi? Thangwe ndiye omwe adalenga bzinthu bzense ndipo ni Mtongi wamphanvu zense pa cirengedwe cense. (1 Tim. 1:17; Cibv. 4:11) Mambo Davide adaphatisa basa mafala yabwino pakufotokoza bza udindo bwa Yahova. Tsono mwakusiyana na Yahova, bzakulengedwa bzense bza kudzulu na bza pa dziko la pansi bzina ufulu bomwe buna malire. Ndipo Yahova Mulungu ambafuna kuti tibvesese kuti ndiye yekha omwe ana ugo bwakuikhira cirengedwe cace malire yomwe njakulungama, yakufunika na yakuthemera, ndipo iye adaikha malireyo kucokera paciyambi. w18.04 4 ¶4, 6

Timbadziwa kuti moyo ngwakunesa kwene-kwene mu nsiku zakumalizira zino. Ndipo ifepano timbakwanisa kupirira kokha na thandizo la Yahova. (2 Wak. 4:7, 8) Tsono kumbukirani bza wale omwe ali lini pa uxamwali na Yahova. Bzinkuwoneka kuti moyo wawo ngwakunesa kwene-kwene m’dzikoli mwakusaya thandizo la Yahova. Ninga Jezu, tin’funika kumbawabvera nsisi na kuwauza ‘bzipsa bzabwino pa cinthu comwe n’cabwino.’ Tenepo, mbapirirani na omwe mumbawapfunzisa cadidi ca m’Bibliya. Lekani kuyebwa kuti cadidi cinango ca m’Bibliya comwe ifepano timbacidziwa bwino, wanthu winango ambacidziwa lini. Tenepo, azinji ambatsimikizira na mtima wense kuti bzomwe adapfunza anati kudziwa cadidi ca m’Bibliya mpsacadidi. Ndipo wanthu ninga amwewa, angawone kuti bzomwe cipembedzo cawo cimbapfunzisa bzingacitise mabanja yawo, cikhalidwe cawo pabodzi na dera lawo kukhala lakuphatana. Tenepo, tikanati kuuza wanthu kuti asiye kukhulupira bzinthu “bzakale” bzomwe iwo ambabziwona kuti mpsakufunika kwene-kwene pa moyo wawo, cakuyamba tin’funika kuwathandiza kudziwa na kufuna cadidi “cipsa” ca m’Bibliya, comwe iwo akhacidziwa lini pomwe tidayamba kupfunza nawo cadidico. Tikacita bzimwebzo tin’dzawathandiza kusiya kukhulupira bzipfunziso bzawo bzakale. Tsono pambatenga nthawe kuti wanthu acinje bzomwe ambakhulupira.—War. 12:2. w19.03 22 ¶10; 23-24 ¶12, 13

Ciratizo ca Yahova pa nkhani ya lufoyi cimbatithandiza kuti timbanyang’ane mipata yakulimbisira winango. (Ju. 5:20) Ifepano timbakomedwa munthu akambacita bzinthu bzomwe bzimbalatiza kuti ambatifuna na kutitenda thangwe ra bzinthu bzabwino bzomwe tacita. Mpsibodzi-bodzimbo, abale na mpfumakazi zathu za m’gwere pabodzi na wanthu wa m’banja mwathu, ambakomedwa tikambacita bzinthu bzakulatiza kuti timbawafuna na kuwalimbisa. Ndipo tikambatenda anzathu, timbalimbisa cikhulupiro cawo na kuwathandiza kutumikira Yahova mwakukhulupirika. Abereki, an’funikambo kumbalimbisa wana wawo. Ndipo abereki akambatenda wana wawo na mtima wense na kulatiza kuti ambawafuna, iwo ambathandiza wanawo kukula bwino. Mafala yakuti: ‘Ndimbakomedwa nawe’ yambalatiza kuti Yahova akhakhulupira kuti Jezu angadacita kufuna kwa Baba wace mwakukhulupirika. Pakuti Yahova akhakhulupira Mwana wace, ifepanombo tin’funika kukhulupira na mtima wense kuti Jezu an’dzakwanirisa mapiciro yense ya Yahovayo. (2 Wak. 1:20) Tikambakumbukira ciratizo ca Jezu, tin’dzafunisisa kupfunza bza iye na kutewezera ciratizo caceco. Pakuti Yahova akhakhulupira Jezu, iye ambakhulupirambo kuti atumiki wace an’pitiriza kupfunza bzizinji na ciratizo ca Mwana wace.—1 Pe. 2:21. w19.03 8 ¶3; 9 ¶5, 6

Tikapasidwa mphaso, ifepano timbatenda kwene-kwene munthu omwe watipasa mphasoyo. Tsono Ajirayeri alibe kutenda ufulu bomwe Yahova akhadawapasa. Itandopita minyezi ming’ono-ng’ono kucokera pomwe adatsudzulidwa ku ukapolo bwa ku Edjipito, iwo adayamba kusuwa cakudya comwe akhadya ku Edjipitoko. Iwo akhang’ung’udzika thangwe ra mana, cakudya comwe Yahova akhawapasa, mpaka adafika pakukhumba kubwerera pomwe ku Edjipitoko. Kwa iwo, ‘nsomba, makaka, mabvembe, nsabola pabodzi na adyo,’ bzikhali bzinthu bzakufunika kwene-kwene kuposa ufulu bomwe Yahova akhadawapasa bwakuti ambamutumikire. Mwakusaya kupenukira, bzimwebzi bzidasunamisa kwene-kwene Yahovayo. (Mirew. 11:5, 6, 10; 14:3, 4) Na cakucitikaci, tingapfunze nfundo yakufunika kwene-kwene. Paulo adacenjeza Akristau wense kuti ambatende ufulu bomwe Yahova adatipasa, kucokera kwa Mwana wace Jezu Kristu.—2 Wak. 6:1. w18.04 10-11 ¶ 6, 7

Tensenefe timbafuna kuti wanthu winango ambatifune. Ndipo tensene timbafuna kucitiridwa bzinthu mwacirungamo. Tenepo, tikambacitiridwa bzinthu mwakusaya lufoyi na cirungamo, tingabzibve kuti ndife wapezi-pezi ndipo tingakhale tiribe cidikhiro. Yahova ambadziwa kuti ifepano timbafuna lufoyi na cirungamo. (Psal. 33:5) Tenepo, tinkutsimikiza na mtima wense kuti Mulungu wathu ambatifuna kwene-kwene, ndipo ambafuna kuti timbacitiridwe bzinthu mwacirungamo. Umboni wa bzimwebzi ni bzomwe timbawona m’Cakutonga comwe Yahova adapasa mtundu wa Jirayeri mwakuphatisa basa Mozeji. Tikambapfunza Cakutonga ca Mozeji, tin’dzawona lufoyi lomwe Yahova, Mulungu wathu analo kwa ifepano. (War. 13:8-10) Tingawone kuti Cakutonga ca Mozeji cikhalimbisa lufoyi thangwe lufoyi limbaphata basa pa bzinthu bzense bzomwe Yahova ambacita. (1 Ju. 4:8) Malamulo yense yomwe Yahova adayakhazikisa mu Cakutonga ca Mozeji yakhalimbisa kufuna Mulungu na munthu munango. (Mwam. 19:18; Bzak. 6:5; Mat. 22:36-40) Tenepo, tingalewe kuti malamulo 600 na manango yomwe yakhacita mbali mu Cakutongaci yambatipfunzisa bza lufoyi la Yahova. w19.02 20-21 ¶1-4

Djobi akhacita nyongo kuti ambabvere Mulungu nsiku zense. Mwa ciratizo, iye akhasamala kwene-kwene kuti aleke kutengeka mtima na mkazi omwe ngwace lini. (Djobi 31:1) Iye akhadziwa kuti bzikhali lini bzakuthemera kugona na mkazi omwe akhali lini wace. Nsiku zino, tinkukhala m’dziko lomwe ladzala na makumbukidwe ya kugonana. Ninga Djobi, kodi tin’dzatcenkha makumbukidwe yakuphonyeka yomwe yangatibwerere ya kugona na munthu omwe tiri lini naye pa malowozi? Kodi tin’dzatcenkha kuwona bzithunzi-thunzi ayai mavidiyo ya maika? (Mat. 5:28) Tikakhala wakubziretsa nsiku zense, tin’dzapitiriza kukulisa kukhulupirika kwathu. Djobi akhabverambo Yahova pa nkhani ya momwe Yahovayo ambawonera bzinthu bzakuthupi. Iye adabvesesa kuti kuikha bzinthu bzakuthupi pa mbuto yakuyamba, kungadamucitisa pikado ikulu. (Djobi 31:24, 25, 28) Nsiku zino, tinkukhala m’dziko lomwe wanthu azinji ambaikha bzinthu bzakuthupi pa mbuto yakuyamba. Tsono tikambaphatisa basa kobiri pabodzi na cuma cathu mwakubverana na momwe Bibliya limbatiuzira, tin’dzapitiriza kukulisa kukhulupirika kwathu.—Mim. 30:8, 9; Mat. 6:19-21, 20. w19.02 6-7 ¶13, 14

Bzense bzomwe Jezu akhacita, bzikhalatiza lufoyi lomwe Yahova analo kwa ifepano. (1 Ju. 4:8-10) Kuthumizira pa bzense, mwa lufoyi lace Jezu adapereka moyo wace thangwe ra ifepano. Tenepo, penu ndife anyakudzozedwa ayai wa ‘mabira manango,’ tensenefe timbagumana phindu thangwe ra lufoyi lomwe Yahova pabodzi na Mwana wace adatilatiza, mwa kuphatisa basa nsembe ya cakulombolera. (Ju. 10:16; 1 Ju. 2:2) Tikambakumbukira momwe Jezu adacitira msinda wa Cikumbuso, tin’dzakwanisa kuwona lufoyi lace na thupo lomwe akhanalo kwa anyakupfunza wace. Mwa njira iponi? Jezu adalatiza lufoyi kwa ateweri wace, mwa kuyambisa msinda wa Cikumbuso wakusaya kunesa. Bzimwebzi bzidathandiza anyakupfunza wace wakudzozedwawo kuti ambacite msindayu gole liri-lense, napo pa nthawe zakunesa ninga mwa ciratizo, akakhala m’kawoko. (Cibv. 2:10) Kodi anyakupfunzawo adabveradi malango ya Jezu? Inde, adabvera! Kuyambira m’magole dzana yakuyambirira mpaka nsiku zino, Akristau wacadidi, ambakumbukira infa ya Jezu nthawe zense. w19.01 24 ¶13-15

Tinkutenda kwene-kwene Yahova, thangwe ra kutitsudzula ku cipembedzo cakunama, kwa omwe ambafuna lini kubvera malamulo ndipo ambakhulupira bza mizimu. Ndipo kutsogolo, tinkudikhira kudzakhala na ‘ufulu bwa mbiri ya wana wa Mulungu.’ (War. 8:21) Napo nsiku zino, mungakhale na ufulu bumwebu mukateweza bzipfunziso bza Kristu. (Ju. 8:31) Mukacita bzimwebzi, mun’dzafika pa ‘kudziwa cadidi’ sikuti kokha kundocipfunza, koma kuciphatisa basa pa moyo wanu! Mu dziko lakuipali, moyo omwe wanthu ambaulewa kuti n’gwabwino umbakhalisa lini. Palibe munthu omwe ambadziwa bzomwe bzin’dzacitika mangwana. (Tiy. 4:13, 14) Tenepo, cinthu cabwino comwe mungacite ni kusankhula bzomwe bzingadzakuthandizeni kukhala na ‘moyo caiwo,’ omwe ni moyo wakusaya kumala m’dziko lipsa. (1 Tim. 6:19) Yahova ambangingimiza lini munthu kuti amutumikire. Koma ali-wense wa ifepano ana ufulu bwa kusankhula bzakucita. (Psal. 16:5) Tenepo, khalani kumbali ya Yahova mwa kucita nyongo nthawe zense kuti mukhale naye pafupi, ndipo mbasamalirani ‘bzinthu [bzense] bzabwino’ bzomwe iye ambakupasani. (Psal. 103:5) Lekani kuyebwa kuti Yahova ndiye yekha omwe angakupaseni cikondweso ca muyaya!—Psal. 16:11. w18.12 26 ¶19, 21

Akristau wense an’funika kumbalemekeza malowozi ninga momwe Yahova na Jezu ambacitira. Koma pakuti ndife wakuperewera, na kupita kwa nthawe tingaleke kuyalemekeza. (War. 7:18-23) Bzimwebzi bzidacitikambo na Akristau winango wakuyambirira, iwo adagumana na mabvuto makulu m’mabanja mwawo thangwe ra kusaya kulemekeza malowozi yawo. Ndipopa Paulo adanemba kuti, ‘mkazi aleke kusiya mwamuna wace.’ Napo bzikhali tenepo, nthawe zinango bzimwebzi bzikhacitika. (1 Wak. 7:10) Paulo alibe kufotokoza mabvuto yomwe yakhacitisa anyakulowolana kupumirana. Koma timbadziwa kuti bvutolo likhali lini thangwe rakuti mwamuna wacita upombo. Pakuti bzingadakhala kuti ni upombo, mkaziyo akhana thangwe lakubveka lakulambana na mwamuna wace acilowodwa pomwe. Paulo adanemba kuti mkazi omwe wasiya mwamuna wace an’funika kupitiriza ‘kukhala wakusaya kulowodwa [ayai] abwererane na mwamuna waceyo.’ Ndipo Mulungu ambapitiriza kuwawona ninga wanthu wakulowolana. Paulo adalewa kuti penu banja likugumana na mabvuto ayai mayezo, sikuti thangwe ra upombo, cakulinga cawo cikhale cakumalisa bvutolo acipitiriza kukhala pabodzi. Ndipo bzikafunika iwo angakumbire thandizo kwa akulu wa gwere. w18.12 13 ¶14, 15

Nsiku zino, Mulungu ambafuna kuti tikhale axamwali wace ticicita bzense bzomwe tingakwanise kuti tipalizire bzipsa bzabwino. (Mat. 28:19, 20; Tiy. 4:8) Koma wanthu winango omwe angawoneke ninga wabwino angalewe mafala yakutitepesa, ninga momwe Pedru adacitira kuna Jezu. Mwa ciratizo, tiyezeze kuti bwana wanu akufuna kukuthumizirani kobiri zomwe mumbatambira pa mwezi, tsono kuti basa lanu libverana na kobirizo, imwepo mun’funika kuphata basa mwa kupitirira nthawe ndipo bzimwebzi bzin’dzakucitisa kusaya nthawe ya kuyenda ku mitsonkhano na kupalizira pabodzi na gwere. Ayai penu imwepo muli pa xikola, tiyezeze kuti apfunzisi wanu akupasani mwayi wakuti mukapitirize mapfunziro yanu kutali na kumui kwanu. Kodi mun’dzacita ciyani bzimwebzi bzikadzakucitikirani? Kodi mun’dzapembera nkhaniyo, mun’dzafufudza, mun’dzauuza wanthu wa m’banja mwanu ayai akulu wa gwere mukanati kucita cakusankhula? Kulewa cadidi, bziri bwino kupfunza momwe Yahova ambawonera nkhani zimwezi kuyambira nthawe ino mucicita nyongo ya kukumbuka ninga iye. Ndipo kutsogolo mukadzatambira mphaso ninga zimwezi, bzin’dzakhala bzakusaya kunesa kucita cakusankhula mwakubverana na makumbukidwe ya Yahova. Imwepo mun’dzadziwa cakucita thangwe mudasankhula kale kupitiriza kutumikira Yahova. w18.11 32 ¶18

Salomau adakhala mambo wa Jirayeri pomwe akhali tswaka. Tsono kumayambiriro kwa utongi bwace, Yahova adawonekera kwa iye m’matsomphenya ndipo adamuuza kuti: ‘Kumbira comwe ukufuna kuti ndikupase.’ Salomau adatawira kuti: ‘Ndine mwana wakusaya kudziwa bzinthu bzizinji. . . . Tenepo, pasani mtumiki wanune mtima wakubvera kuti ndikwanise kuyeruza wanthu wanu.’ (1 Wam. 3:5-10) Onani kuti Salomau adakumbira ‘mtima wakubvera’ bzomwe bzikulatiza kuti akhali wakubzicepswa. Ndipo timbapenukira lini kuti Yahova akhafuna kwene-kwene Salomau! (2 Sam. 12:24) Tenepo, Yahova adakomedwa kwene-kwene na mtawiro wa mambo Salomau, ndipopa adamupasa ‘nzeru na mtima wakubvesesa bzinthu.’ (1 Wam. 3:12) Salomau adatambira bzisimbo bzizinji pomwe akhali wakukhulupirika. Iye adakhala na mwayi wakumanga templo ‘yakudziwika na dzina la Yahova, Mulungu wa Ajirayeri.’ (1 Wam. 8:20) Na kupita kwa nthawe adadzakhala wakubvekera thangwe ra nzeru zomwe Mulungu adam’pasa. Ndipo bzinthu bzomwe iye adalewa pomwe adafuliziridwa na Mulungu bzimbagumanika m’mabukhu matatu ya m’Bibliya. Libodzi mwa mabukhuyo ni Mimwani. w19.01 14 ¶1, 2

Wanthu winango ambafuna lini kuti munthu awauze bzakucita. Mwa ciratizo iwo ambalewa kuti, “Ndiribe basa na nzeru za munthu.” Na mafalaya iwo ambathandauza kuti ambafuna kucita okha bzakusankhula bzawo ndipo iwo ana ugo bwakucita bzimwebzo. Iwo ambafuna lini kutsogoleredwa na winango ayai kuuzidwa kucita bzinthu ninga momwe winango ambacitira. Bziri bwino kudziwa kuti tikambabvuma makumbukidwe ya Yahova, tin’dzapitiriza kukhala na makumbukidwe yabwino. Pa 2 Wakolinto 3:17 pambati: ‘Pomwe pana mzimu wa Yahova, pamwepo pana ufulu.’ Yahova ambatipasa ufulu bomwe bumbatithandiza kukhala wanthu omwe iye ambafuna kuti tikhale na kusankhula bzomwe timbafuna, pakuti iye adatilenga tenepoyo. Koma bzimwebzi bzinkuthandauza lini kuti ufulu bwathu n’bwakusaya malire. (1 Pe. 2:16) Tenepo Yahova ambafuna kuti timbaphatise basa Fala lace ninga mtsogoleri wathu kuti timbasiyanise cabwino na cakuipa. w18.11 22 ¶5, 6

Pomwe tidapfunza cadidi ca m’Bibliya, tidawona kuti kutumikira Yahova ni cinthu cakufunika kwene-kwene kuposa bzinthu bzakuthupi, ndipo tidabvuma kusiya cinthu ciri-cense kuti tipfunze cadidico. Koma na kupita kwa nthawe, tingayambe kuwona wanthu winango ankugula bzinthu bzipsa bzakusiyana-siyana na kobiri zawo. Tenepo, tingayambe kuwona ninga kuti tikuluza ayai tikusala m’mbuyo. Bzimwebzi bzingaticitise kuwona kuti bzinthu bzomwe tinabzo mpsakukwanira lini ndipo tingayambe kulinga kukhala na bzinthu bzizinji bzakuthupi kuposa kutumikira Yahova. Bzimwebzi bzikutikumbusa bzomwe bzidacitika na Dema. Iye akhafunisisa kwene-kwene ‘bzinthu bza m’dziko,’ tenepo adadzasiya basa lomwe akhacita na mpostolo Paulo. Bzikuwoneka ninga kuti Dema akhafunisisa bzinthu bzakuthupi kuposa kutumikira Mulungu. Ayai pinango iye akhafuna lini kucita nyongo yakuti atumikire pabodzi na Paulo. Kodi tinkupfunza ciyani na ciratizoci? Tikupfunza kuti pinango m’mbuyomu tikhafunisisa kwene-kwene kukhala na bzinthu bzakuthupi. Tsono tikasaya kusamala, cikhumbo cathu ca kufuna bzinthu bzakuthupi cingakule ndipo cingakhale camphanvu mpaka tingaluze lufoyi lathu pa cadidi ca m’Bibliya. w18.11 12 ¶9

Gunkha la Sathani likhali lakuipa kwene-kwene thangwe iye akhadziwa kuti Eva angadamukhulupira na kudya cisapoco, angadafadi. Ndipo ndibzo bzomwe bzidacitika. Na kupita kwa nthawe Eva na Adamu adaleka kubvera mtemo wa Yahova ndipo adadzafa. (Ciy. 3:6; 5:5) Kuthumizira bzimwebzi, thangwe ra pikado ya Adamu, ‘infayo idafikira wanthu wense.’ Tenepo, ‘infa idatonga . . . , napo kwa omwe alibe kucita pikado ninga momwe Adamu adacitira.’ (War. 5:12, 14) Ndipopa ifepano ndife wakuperewera ndipo timbakhala lini kwa muyaya ninga momwe Mulungu akhafunira paciyambi. Koma timbandokhala na moyo kwa ‘magole 70, ndipo tikakhala na mphanvu zakupambulika yambafika 80,’ ndipo moyo wathu ‘umbandodzaza na mabvuto na kuwawa.’ (Psal. 90:10) Bzinthu bzensenebzi bzikucitika thangwe ra gunkha la Sathani! Jezu adalewa bza Sathani kuti: ‘Iye alibe kudimbirira m’cadidi, thangwe mwa iye mulibe cadidi.’ (Ju. 8:44) Sathani alibe kucinja. Iye ankupitiriza ‘kusoceresa wanthu pa dziko lense la pansi’ mwakuphatisa basa magunkha yace. (Cibv. 12:9) Koma tin’funika lini kubvuma kuti Sathani atipumpse. w18.10 3-4 ¶1-4

Tikambayambisa mtendere na anzathu, tingakhale wakukondwa. Mpostolo Tiyago adanemba kuti: ‘Cisapo ca cirungamo n’cakubzalidwa mu mkhalidwe wa mtendere na wale omwe ambacita mtendere.’ (Tiy. 3:18) Na tenepo, penu imwepo munkubvesesana lini na m’bale wanu wa m’gwere ayai wa m’banja mwanu, kumbirani Yahova kuti akuthandizeni kumalisa kusaya kubvesesanako mwa mtendere. Iye an’dzakupasani mzimu wace wakucena, omwe un’dzakuthandizani kulatiza makhalidwe yacikristau, ndipo mukacita bzimwebzi mun’dzakhala wakukondwa. Jezu adafotokoza kufunika kwa kuyambisa mtendere pomwe adalewa kuti: ‘Penu wabweresa mphaso yako pa mphatso, ndipo pamwepo wakumbukira kuti m’bale wako anawe thangwe, siya mphaso yako patsogolo pa mphatsoyo. Ndoko ukatome kuyanjana na m’bale wako cakuyamba; ndipo ukabwerera, pereka mphaso yakoyo.’—Mat. 5:23, 24. w18.09 19 ¶17

Usiku bomwe mangwana yace angadaphedwa, Jezu adalewa bza lufoyi maulendo pafupi-fupi 30. Iye adauza anyakupfunza wace kuti ‘mumbafunane mwekha-mwekha.’ (Ju. 15:12, 17) Ndipo lufoyi lawo lingadawadziwikisa na kupereka umboni kwa wanthu winango kuti akhali ateweri wacadidi wa Kristu. (Ju. 13:35) Lufoyi lomwe Jezu akhalewa ndamphanvu ndipo limbacitisa munthu kubzipereka, sikuti kumbandolilewa. Jezu adati: ‘Palibe omwe ana lufoyi likulu kuposa la munthu omwe wapereka moyo wace thangwe ra axamwali wace. Imwepo ndimwe axamwali wangu, mukacita bzomwe ndinkukuuzani.’ (Ju. 15:13, 14) Nsiku zino, atumiki wa Yahova ambadziwika thangwe ra lufoyi na ciphatano cawo. (1 Ju. 3:10, 11) Iwo ambacita bzimwebzi napo mbakusiyana dziko lakubadwira, dzinza, cirewedwe, komwe adacokera ayai komwe adakulira. w18.09 8 ¶1, 2

Yahova ambafuna kuti timbasamalire mabanja yathu. Mwa ciratizo, pinango imwepo mungafunikire kuphata basa kuti mukwanise kusamalira banja lanu. Ndipo kawiri-kawiri azimai azinji ambakhala pa mui kuti asamalire wana wawo. Tsono wana winango ndiwo omwe ambasamalira abereki wawo akaduwala. Bzimwebzi mpsakufunika kwene-kwene. Penu imwepo muna udindo bwa kusamalira banja, pinango mungakwanise lini kucita bzizinji pa kutumikira Yahova ninga momwe mukhafunira. Koma lekani kumbacita thupo, thangwe Yahova ambakomedwa kwene-kwene akambawona imwepo munkusamalira banja lanu. (1 Wak. 10:31) Penu imwepo mulibe udindo bukulu bwa kusamalira banja, kodi mungathandize abale na mpfumakazi omwe ankuduwala ayai omwe mbakukalamba, ayai wale omwe ankufunikira thandizo liri-lense? Ayai kodi mungathandize wale omwe ankusamalira abale wawo wakukalamba na wakuduwala? Mwa kumbacita bzimwebzi, mun’dzakhala munkuphata basa na Yahova pakutawira mipembo yawo.—1 Wak. 10:24. w18.08 22 ¶3, 5

Zuze akhafunidwa kwene-kwene na baba wace Djakobi, kuposa abale wace wense. Bzimwebzi bzidacitisa kuti abale wacewo amuwenge. Pomwe Zuze akhana magole 17 yakubadwa, iwo adamugulisa ninga kapolo. (Ciy. 37:2-4, 23-28) Zuze adamala magole 13 ankubonera ku Edjipito, pakuyamba ninga kapolo ndipo patsogolo pace ninga nyankawoko. Ndipo iye akhali kutali na baba wace omwe akhamufuna kwene-kwene. Bzimwebzi bzingadamucitisa kukhala na ukali kwene-kwene na kubziwona ninga kuti alibe tsogolo, tsono iye alibe kubziwona tenepo. Kodi n’ciyani comwe cidamuthandiza? Pomwe Zuze akhabonera m’kawoko, pinango iye adapitiriza kukumbukira momwe Yahova akhamuthandizira. (Ciy. 39:21; Psal. 105:17-19) Ndipo pinango iye adalimbisidwa pomwe adakumbukira bza matsomphenya yomwe adawona pomwe akhali mwana na kudziwa kuti Yahova ali naye. (Ciy. 37:5-11) Ayai pinango iye adapemba kazinji kense kwa Yahova ndipo adamuuza bzense bzomwe bzikhali mu mtima mwace. (Psal. 145:18) Ndipo Yahova adatawira mipembo ya Zuze mwa kumutsimikizira kuti ‘angadakhala naye,’ pa mayezo yace yense. w18.10 23 ¶3, 4

Nthawe zinango, ifepano tingayeruze munthu thangwe rakuti adadala ayai adasauka. Kodi bzomwe munthu anabzo bzingatokonye tani momwe timbamuwonera? Salomau adanemba nfundo inango yakulatiza bzomwe bzimbacitika kawiri-kawiri ninga momwe vesi la nsiku ya lero linkulewera. Kodi Salomau akhafuna kulewanyi na mafalaya? Tikaleka kusamala, ifepano tingafune kukhala pauxamwali na wanthu wakudala okha, sikuti wakusauka. Tsono, n’thangwe ranyi n’kuphonyeka kumbacita uxamwali na munthu thangwe ra bzinthu bzomwe anabzo? Tikacita bzimwebzi ifepano tin’dzayambisa m’gawano m’gwere. Bzimwebzi ndibzo bzomwe bzidacitika m’magwere manango ya m’magole dzana yakutoma, ndipo Tiyago adapereka malango kwa abalewo thangwe ra bzimwebzi. (Tiy. 2:1-4) Tenepo, tin’funika lini kulekerera kuti bzimwebzi bzicitikembo m’gwere mwathu. w18.08 11-12 ¶8-10

Momwe timbacitira bzinthu na abale pabodzi na mpfumakazi zathu, bzingalatize penu timbatenda mwayi wakukhala pauxamwali na Yahova ayai ne. Iwo ni wanthu wa Yahova, ninga momwe ifepano tiriri. Ndipo mpsakufunika kwene-kwene kumbakumbukira nfundo imweyi, thangwe kucita bzimwebzi kun’dzatithandiza kumbacita nawo bzinthu mwakudeka mtima na mwa lufoyi. (1 Wat. 5:15) Kodi n’thangwe ranyi nfundo imweyi njakufunika? Jezu adauza ateweri wace kuti: ‘Wense an’dzadziwa kuti ndimwe anyakupfunza wangu, mukambafunana.’ (Ju. 13:35) Malakiya adalewa kuti Yahova ‘akhakhala tceru, acimbatetekera’ momwe wanthu wace akhambacitirana bzinthu. (Malak. 3:16) Yahova ‘ambadziwa wanthu wace.’ (2 Tim. 2:19) Ndipo iye ambabva bzense bzomwe timbalewa na kuwona bzomwe timbacita. (Waheb. 4:13) Tenepo tikasaya kudekera mtima abale pabodzi na mpfumakazi zathu, Yahova ambawona bzimwebzo. Tsono Yahova ambawonambo tikambalekerera abale wathuwo, kuwadekera mtima na kuwacitira bzinthu bzabwino.—Waheb. 13:16. w18.07 25 ¶15; 26 ¶17

Mpsakufunika kwene-kwene kukhala kumbali ya Yahova, thangwe palibe munthu omwe ngwamphanvu, wanzeru na wa lufoyi kuposa iye. Ndipopa tensenefe tin’funika kukhala wakukhulupirika, ticipitiriza kukhala kumbali yace. (Psal. 96:4-6) Tsono atumiki winango wa Mulungu adatazira kucita bzimwebzi. Kumbukirani bza Kaini. Iye alibe kunamata mirungu yakunama koma Yahova yekha, tsono napo bzikhali tenepo, Yahovayo alibe kukomedwa na kunamata kwaceko. N’thangwe ranyi? Yahova adawona makumbukidwe yakuipa yomwe yakhali mu mtima mwa Kaini. (1 Ju. 3:12) Ndipopa Yahova adamucenjeza kuti: Kodi ‘ukayamba kucita bzabwino, ndin’dzakufuna lini pomwe? Tsono ukaleka kucita bzabwino, pikado idabwithama pa msuwo ndipo inkukukhumba kwene-kwene; kodi un’dzakwanisa kuikunda?’ (Ciy. 4:6, 7) Yahova adalatiza padeca kuti bzingadakhala kuti Kaini adakungula acikhala kumbali yace, Yahovayo angadakhalambo kumbali ya Kainiyo. Tsono Kaini alibe kutetekera Mulungu. w18.07 15-16 ¶1, 3-4

Kupalizira bzipsa bzabwino na kupfunzisa wanthu, ni njira yakufunika kwene-kwene yakulatizira ceza cathu kwa wanthu. (Mat. 28:19, 20) Kuthumizira pa basa lathu lakupalizira, makhalidwe yathu yabwino yambapasambo mbiri Yahova. Ndipo wanthu azinji ambatiwona tikambapalizira. Tenepo tikambawamwetulira na kuwamusa, iwo ambakomedwa nafe pabodzi na Mulungu omwe timbamunamata. Jezu adauza anyakupfunza wace kuti: ‘Mukafika pa mui, musanani na wanthu wa pa muipo.’ (Mat. 10:12) Magawo yomwe Jezu akhapalizira, wanthu akhana cizolowezi ca kumbauza alendo kuti apite m’nyumba mwawo. Koma ndibzo lini bzomwe bzimbacitika na magawo mazinji nsiku zino. Wanthu azinji kawiri-kawiri akafikiridwa na alendo kumui kwawo, ambakhala na mantha ayai na thupo. Tsono tikakhala wansangala na wakudeka mtima, iwo ambatsudzuka nafe. Tikambamwetulira wanthu na kuwamusa mwa nsangala, iwo ambakhala wakutsudzuka kutenga mabukhu yathu ndipo winango mpaka ambabvuma kuceza nafe. w18.06 22 ¶4, 5

Mpostolo Pedru akhambaceza na Ajuda okha. Tsono na kupita kwa nthawe, Mulungu adalatiza kuti Akristau an’funika lini kukhala na tsankhulo, ndipo Pedru adapalizira Korneliyo, omwe akhali mcikunda wa Roma. (Mab. 10:28, 35) Ndipo kuyambira nthawe imweyo, Pedru akhambaceza na kudya pabodzi na Akristau omwe akhali lini Ajuda. Koma pomwe Pedru akhali mu mzinda wa Antiyokiya, adaleka kumbadya pabodzi na Akristau omwe akhali lini Ajuda. (Wag. 2:11-14) Tsono Paulo adamutsimula, ndipo Pedru adabvuma malango yomwe adapasidwa. Kodi timbadziwa tani bzimwebzo? Pomwe Pedru adanembera tsamba lakuyamba Akristau wa Cijuda na omwe akhali lini Ajuda ku Ásia Menor, iye adafotokoza kuti mpsakufunika kumbafuna abale wense. (1 Ped. 1:1; 2:17) Na ciratizo ca Jezu, apostolo adapfunza kumbafuna ‘mitundu yense ya wanthu.’ (Ju. 12:32; 1 Tim. 4:10) Iwo adacinja momwe akhawonera wanthu wa mitundu inango, napo kuti padapita nthawe itali. Akristau wakuyambirira adadzadziwika na lufoyi lawo. Pakuti Akristauwo akhadabvala ‘unthu bupsa,’ iwo adabvesesa kuti pamaso pa Mulungu tense ndife abodzi.—Wakol. 3:10, 11. w18.06 13 ¶15, 16

Cakukhotcerera pa cifuwa ca acikunda wa ku Roma, cikhali ca citsulo, ndipo cikhambampsinkha mapewa yawo pabodzi na nkhombe yense. Cakubvalaci cikhathandiza kukhotcerera mtima pabodzi na bziwalo bzinango bza acikundawo. Mitemo yakulungama ya Yahova imbandendemezeredwa na cakukhotcerera pa cifuwaci, thangwe iyo imbakhotcerera ‘mtima’ wathu, ayai unthu bwathu bwa mkati. (Mim. 4:23) Ndipo palibe m’cikunda omwe angadacinjanisa cakubvala ca citsulo cakulimba cakukhotcerera cifuwa cace na cinango cakusaya kulimba. Mpsibodzi-bodzimbo na ifepano, tingacinjanise lini mitemo yakulungama ya Yahova na nzeru zathu, pakuti ifepano tiribe nzeru zakukwanira kuti tikwanise kukhotcerera mtima wathu. (Mim. 3:5, 6) Ndipopa, nthawe zense tin’funika kumbapenda ‘cakukhotcerera pa cifuwa’ pathu kuti tiwone penu cinkupitiriza kukhotcerera bwino mtima wathu. Ndipo tikambafuna cadidi ca m’Fala la Mulungu, bzimbakhala bzakusaya kunesa kuteweza mitemo ya Mulungu ayai kubvala cakubvala ‘cakukhotcerera pa cifuwa’ pathu.—Psal. 111:7, 8; 1 Ju. 5:3. w18.05 22 ¶3-4, 6; 23 ¶7

Napo kuti Mozeji akhadatsogolera wanthuwo kwa magole mazinji, iwo adadandaula sikuti kokha thangwe ra kusaya madzi, koma adadandaulirambo Mozeji, mwa kumupasa mulandu wakuti ndiye omwe adawacitisa kukhala na nyota. (Mirew. 20:1-5, 9-11) Thangwe ra bzimwebzi, Mozeji adakalipa kwene-kwene ndipo adasiya kukhala wakufatsa. Bzimwebzi bzidamucitisa kuti atazire kucita bzomwe Yahova akhadamuuza bzakuti akalewelewe na tsendwa, m’mbuto mwace, iye adakalipira wanthuwo ndipo adawauza kuti iye ndiye angadawacosera madziyo. Pambuyo pace, iye adamenya tsendwalo kawiri kense ndipo yadacoka madzi mazinji. Tenepo, kubzikuza na ukali bzidacitisa Mozeji kucita pikado ikulu. (Psal. 106:32, 33) Ndipo thangwe ra kusaya kukhala wakufatsa mu kanthawe kakucepa, Mozeji alibe kubvumizidwa kupita m’Dziko Lakupiciridwa. (Mirew. 20:12) Ifepano timbapfunza bzinthu bzizinji na ciratizoci. Cakuyamba, tin’funika kucita nyongo kuti tipitirize kukhala wakufatsa. Tsono tikaleka kukhala wakufatsa, tin’dzayamba kubzikuza ndipo tin’dzafika pakulewa na kucita bzinthu bzakusaya kuthemera. Caciwiri, msunamo ungatitazise kukhala wakufatsa, tenepo tin’funika kulatiza khalidweri napo tikagumana na mabvuto. w19.02 12-13 ¶19-21

Kodi ifepano timbawona basa lakupalizira ninga mtolo? Ne na pang’onopo. Jezu atamala kufotokoza bza there lakulewa bza mpesa, iye adalewa kuti tikambapalizira tin’dzakhala na cikondweso cace. (Ju. 15:11) Mwa njira iponi? Kumbukirani kuti mu there lace, Jezu adalewa kuti iye ni mpesa ndipo anyakupfunza wace ni mthambi. (Ju. 15:5) Tsono mthambi zimbakhala na madzi na bzinthu bzinango bzakupasa thanzi pokha-pokha zikakhala zakuphatana na mpesayo. Mpsibodzi-bodzimbo na ifepano, tingakhale wakukondwa ninga momwe Jezu akhaliri kokha tikakhala wakuphatana naye ticitewera nzayo zace. Tikacita bzimwebzi, tin’dzakhala na cikondweso comwe iye akhanaco, cikondweso comwe cimbabwera thangwe ra kucita kufuna kwa Mulungu. (Ju. 4:34; 17:13; 1 Pe. 2:21) Hanne, omwe ankutumikira ninga mpainiya kwa magole yakupitirira 40, adati: “Cikondweso comwe ndimbakhala naco ndikambapalizira cimbandithandiza kuti ndipitirize kutumikira Yahova.” Kulewa cadidi, cikondweso cin’dzatipasa mphanvu kuti tipitirize kupalizira napo pomwe wanthu azinji ankutitetekera lini.—Mat. 5:10-12. w18.05 9 ¶2; 12 ¶14

Mpostolo Paulo akhali ciratizo cabwino pa nkhani yakulimbisa abale wace wauzimu. Ndipo mzimu wakucena udatumiza Paulo kuti akapalizire Agerego, ku Roma, pabodzi na wanthu winango omwe akhanamata mirungu yakusiyana-siyana. (Wag. 2:7-9) Paulo adacita ulendo bwakuyenda ku mbuto yomwe tsapano imbacemeredwa Turquia, ndipo adakafika mpaka ku Grécia na ku Itália. Atafika kumweko, iye adapalizira wanthu omwe akhali lini Ajuda, acikhazikisa magwere yacikristau. Koma moyo wa Akristau watsapanowo ukhali pa ngozi thangwe akhazunzidwa na wanthu wa m’dziko lawo cairo, tenepo iwo akhafunikira cirimbiso. (1 Wat. 2:14) Mu gole la 50, Paulo adanemba tsamba lacirimbiso lomwe lidayenda ku gwere lipsa ku Tesalonika. Iye adati: ‘Nthawe zense timbatenda Mulungu, tikambakugumani mwense m’mipembo yathu, thangwe nthawe zense timbakumbukira mabasa yanu yakukhulupirika, mabasa yanu ya lufoyi, na kupirira kwanu.’ (1 Wat. 1:2, 3) Iye adawauza pomwe kuti ambalimbisane ndipo adanemba kuti: ‘Pitirizani kumbalimbisana ninga momwe munkucitiramu.’—1 Wat. 5:11. w18.04 19-20 ¶16, 17

Mukambacita bzinthu bzakukondwesa Yahova pa moyo wanu, imwepo mun’dzakhala na cikhumbo cakufuna kumbauzambo winango bza iye. Pakuti basa lakupalizira ndakufunika kwene-kwene lin’funika kukhala cibodzi mwa bzinthu bzakufunika kwene-kwene pa moyo wathu. Kodi mungafune kucita bzizinji mu utumiki? Tani mucitumikira ninga mpainiya? Tsono tani penu imwepo mumbafuna lini kwene-kwene basa lakupalizira? Kodi mungakwanise tani kumbafotokozera anzanu bzomwe mumbakhulupira? Pana bzinthu bziwiri bzomwe bzingakuthandizeni. Cinthu cakuyamba ni kukonzekera bwino ndipo caciwiri ni kuleka kusiya kumbauza anzanu bzomwe imwepo mun’dziwa pakulewa bza Yahova. Na kupita kwa nthawe, imwepo mun’dzayamba kufuna kwene-kwene basa lakupalizira. Imwepo mungayambe na kumbakonzekera mitawiro ya mibvunzo yomwe anzanu wa ku xikola angacite. Mwa ciratizo, pinango iwo angabvunze kuti: “Kodi n’thangwe ranyi iwepo umbakhulupira kuti Mulungu alipodi?” Kuti mugumane nkhani zomwe zingakuthandizeni kutawira mbvunzoyu, pitani pa webisaite yathu ya jw.org. imwepo mun’dzagumana mbali inango yakuti zoti achinyamata achite. Mbaliyi ina matsamba ya mibvunzo mizinji, ndipo m’bodzi wa iwo umbati: “N’chifukwa Ciyani Ndimakhulupirira Zoti Kuli Mulungu?” Tawirani mbvunzoyu pa tsambalo kuti mukonzekere mitawiro yanu. w18.04 29-30 ¶10-11

Adamu na Eva akhana ufulu buzinji koma ufulu bwawobo bukhana malire. Ndipo manango mwa malire yomwe akhanayo yakhali yacibadwa. Mwa ciratizo, kuti iwo apitirize kukhala na moyo, akhafunika mphuwe, cakudya na nthawe yakugona. Kodi bzimwebzi bzinkuthandauza kuti iwo akhalibe ufulu? Ne ndibzo lini. Yahova adawona kuti bzinthu ninga bzimwebzi bzingadawacitisa kukhala wakukondwa. (Psal. 104:14, 15; Mpal. 3:12, 13) Yahova akhadapasa Adamu na Eva lamulo lakubveka bwino na lakusaya kunesa. Iye akhadawauza kuti akhale na wana, adzaze dziko lense nakuti ambalisamalire. Kodi lamuloli lidawaphera ufulu bwawo? Ne na pang’onopo! M’mbuto mwace, iro lidawapasa mpata wakuti acitise dziko lense kukhala paraizo na mbuto yomwe angadakhala na wana wawo wakulungama kwa muyaya. Cimweci cikhali cakulinga ca Mulungu. (Psal. 127:3; Zai. 45:18) Bzingadakhala kuti Adamu na Eva adabvera Yahova, iwo angadakondwa na malowozi yawo pabodzi na banja lawo kwa muyaya. w18.04 4 ¶4, 7-8

Tikambapirira na wanthu omwe timbawapalizira, tin’dzadikhira lini kuti iwo atetekere ayai abvume cadidi ca m’Bibliya tikagumana nawo pa ulendo bwakuyamba. Mwa ciratizo, kumbukirani momwe tingauzire munthu bza cidikhiro cakudzakhala na moyo wakusaya kumala, m’paraizo pansi pano. Wanthu azinji ambakhulupira kuti kufa n’kumala bzense, ayai wanthu wense wabwino akafa ambayenda kudzulu. M’bale munango adafotokoza momwe ambathandizira wanthu kubvesesa cidikhiro ca kudzakhala na moyo wakusaya kumala pansi pano. Cakuyamba, iye ambawerenga Ciyambo 1:28. Akamala, iye ambabvunza mwenekaciro nyumba kuti, kodi Mulungu akhafuna kuti wanthu akhale na moyo uponi ndipo angadakhala nawo kuponi? Wanthu azinji ambatawira kuti, “Iye akhafuna kuti wanthu akhali na moyo wakukondwa pansi pano.” Patsogolo pace, m’baleyu ambawerenga cinembo ca Zaiya 55:11 ndipo akamala ambabvunza kuti, kodi Mulungu adacinja cakulinga cace? Kawiri-kawiri, mwenekaciro nyumba ambatawira kuti alibe. Pakumalizira, m’baleyu ambawerenga Psalymo 37:10, 11 ndipo akamala, ambabvunza kuti, kodi tsogolo la wanthu lin’dzakhala tani? Mwakuphatisa basa bwino Bzinembo mwa njira imweyi, m’baleyu adathandiza wanthu azinji kubvesesa kuti Mulungu an’funa kuti wanthu wabwino akhale na moyo wakusaya kumala pano pa dziko la pansi. w19.03 24 ¶14-15; 25 ¶19

Mafalaya yankulatiza padeca kuti Yahova ambafuna kuti ifepano timbatetekere na kubvera Mwana wace. Kodi n’ciyani comwe Jezu adalewa pomwe akhali pa dziko la pansi? Iye adalewa bzinthu bzizinji bzakufunika kwene-kwene bzomwe tin’funika kubzitetekera! Mwa ciratizo, iye adapfunzisa mwalufoyi ateweri wace momwe angapalizirire bzipsa bzabwino, ndipo adawauza mwakubwereza-bwereza kuti apitirize kukhala wakupenya. (Mat. 24:42; 28:19, 20) Iye adawauzambo kuti apitirize kucita nyongo yakucita bzinthu bzabwino, ndipo adawalimbisa kuti aleke kubwerera mbuyo. (Lu. 13:24) Jezu adauza ateweri wace bza phindu la kumbafunana, kupitiriza kukhala wakuphatana na kukoya malamulo yace. (Ju. 15:10, 12, 13) Malango yomwe Jezu adayapereka kwa ateweri wace yakhali yakufunika kwene-kwene ndipo nsiku zino njakufunikambo kwa ifepano. Jezu adalewa kuti: ‘Ali-wense omwe ali ku mbali ya cadidi, an’bva fala langu.’ (Ju. 18:37) Timbalatiza kuti timbabvera fala lace tikapitiriza ‘kupirirana na kulekererana na mtima wense.’ (Wakol. 3:13; Lu. 17:3, 4) Ndipo timbabverambo fala lace tikambapalizira bzipsa bzabwino na nyongo pa ‘nthawe yabwino na pa nthawe yakunesa.’—2 Tim. 4:2. w19.03 10 ¶9, 10