Abril

Apa tani ifepanombo? Kodi ifepano timbakumbuka ninga Yahova ayai ninga wanthu wa m’dzikoli? Ninga Akristau, tin’funika kucita nyongo yakucita bzinthu bzomwe bzimbakondwesa Mulungu. Tsono tani pa nkhani ya bzomwe timbakumbuka? Kodi tinkucita nyongo yakuti timbakumbuke ninga Yahova, ayai kuwona bzinthu ninga momwe iye ambabziwonera? Kuti ticite bzimwebzi pambafunika nyongo ikulu. Koma bzimbakhala bzakusaya kunesa kukumbuka ninga wanthu wa m’dzikoli, thangwe tidazunguliridwa na mzimu wa dzikoli. (Wayef. 2:2) Kuthumizira bzimwebzi, wanthu wa m’dzikoli kawiri-kawiri ambaikha patsogolo bzakufuna bzawo, ndipo nthawe zinango ifepano tingatokonyendwe na makumbukidwe yamweya. Bzimwebzi bzikulatiza kuti mpsakunesa kukumbuka ninga Yahova kuposa kukumbuka ninga wanthu wa m’dzikoli. Tikabvuma kuti makumbukidwe yathu yatsogoleredwe na dzikoli, tin’dzakhala wadyera ndipo tin’dzafika pakumbasankhula tekha bzabwino na bzakuipa. (Mar. 7:21, 22) Ndipopa tin’funika kupfunza bza ‘makumbukidwe ya Mulungu,’ sikuti ya ‘wanthu.’ w18.11 21 ¶1; 22 ¶3, 4

Jezu akhafuna lini kutumbizidwa na atsogoleri wa bzipembedzo ayai akulu-akulu wa ndale. Ndipo bzimwebzi mpsakubveka thangwe katatu kense, Yahova adadziwisa Mwana wace Jezu kucokera kudzulu kuti iye ambamufuna kwene-kwene. Mwakusaya kupenukira, bzimwebzi bzidalimbisa kwene-kwene Jezuyo. Ndipo pomwe Jezu adabatizidwa mu mkulo wa Joridano, Yahova adalewa mafala ya mu vesi la nsiku ya lero. Bzinkuwoneka kuti pa nthawe imweyi, ni Juwau yekha omwe adakhala na mwayi wakubva mafalaya. Ndipo pomwe pakhadasala pafupi-fupi gole libodzi kuti Jezu aphedwe, apostolo wace atatu adakhalambo na mwayi wakubva Yahova ankulewa bza Jezu kuti: ‘Uyu ndiye Mwana wangu wakufunidwa, omwe ndimbakomedwa naye; mbamubverani.’ (Mat. 17:5) Patsogolo pace, pomwe zikhadasala nsiku zakucepa kuti Jezu aphedwe, Yahova adalewalewa naye pomwe kucokera kudzulu. (Ju. 12:28) Jezu akhadziwa kuti wanthu angadamunyoza nakuti angadafa na infa yakupasa manyazi kwene-kwene. Tsono napo bzikhali tenepo, iye adakumbira mu mpembo kuti kufuna kwa Mulungu kucitike. (Mat. 26:39, 42) Jezu ‘adapirira muti wakuzunzikira ndipo iye alibe kucita thupo na manyazi,’ thangwe akhafuna kusimbidwa na Baba wace, sikuti na wanthu wa m’dzikoli.—Waheb. 12:2. w18.07 7-8 ¶15-16

Jezu adalatiza kuti akhali wakukhwimika, napo pambuyo pa kucita Ciraliro ca Mbuya. Kodi iye adalatiza tani bzimwebzi? Jezu adabvuma kucita bzomwe Baba wace adamuuza, napo akhadziwa kuti kucita bzimwebzo kungamubweresera infa yakupasa manyazi. (Mat. 26:65, 66) Jezu adapitiriza kukhala wakukhulupirika kuti atumbizise dzina la Yahova, akhotcerere utongi bwa Mulungu na kupereka mpata wakuti wanthu wakukhulupirika adzakhale na moyo wakusaya kumala. Ndipo pa nthawe ibodzi-bodziyo, iye adakonzekeresa ateweri wace momwe angadadzalimbanire na mabvuto yomwe angadagumana nayo mwakusaya kucedwa. Jezu adalatizambo kuti akhali wakukhwimika mwa kuleka kumbakumbukira bza moyo wace, koma akhakumbukira kwene-kwene bzakusaya bza apostolo wace. Pambuyo pa kucosa Juda, Jezu adayambisa msinda wa Ciraliro ca Mbuya, comwe cingadambakumbusa phindu na mpangano mupsa omwe angadakhala nawo wale omwe angadadzakhala ateweri wace wakudzozedwa thangwe ra mulopa wace.—1 Wak. 10:16, 17. w19.01 22-23 ¶7,8

Pakutawira mpembo wa Jezuyu, Baba wace adalewalewa kucokera kudzulu aciti: ‘Ndalitumbiza kale ndipo ndin’dzalitumbiza pomwe.’ Jezu akhacita thupo thangwe ra udindo bomwe akhanabo bwakupitiriza kukhala wakukhulupirika kwa Yahova. Iye akhadziwa kuti angadaboneresedwa kwene-kwene ndipo angadadzaphedwa ninga kapondo. (Mat. 26:38) Napo Jezu akhadziwa kuti bzinthu bzimwebzi bzingadamucitikira, iye akhafuna kwene-kwene kuti dzina la Baba wace litumbizidwe. Jezu adapasidwa mulandu wakuphonyera Mulungu. Ndipo cinthu cinango n’cakuti iye akhafuna lini kuti infa yace idzonge mbiri ya Mulungu. Tenepo, kumbukirani momwe mafala ya Yahova yadalimbisira Jezu pomwe adayabva! Ninga Jezu, ifepano tin’funikambo kumbacita thupo na kupswipizidwa kwa dzina la Mulungu. Ndipo ninga iye, ifepano timbacitiridwa bzinthu mwakusaya cirungamo. Ayai pinango tingaipidwe na nkhani zakunama zomwe anyamadulanthaka wathu angamwaze pakulewa bza ifepano. Tenepo, tin’funika kumbakumbukira kupswipizidwa kwa dzina la Mulungu pabodzi na gulu lace thangwe ra nkhani zakunamazo. Bzimwebzi bzikaticitikira, tin’funika kumbakumbukira mtsangalazo omwe Yahova ambatipasa kucokera m’fala lace. Yahova an’dzaleka lini kutumbiza dzina lace.—Psal. 94:22, 23; Zai. 65:17. w19.03 11 ¶14; 12 ¶15-16

Pomwe Jezu adalewa kuti akhadasala pang’ono kuboneresedwa aciphedwa, anyakupfunza wace adasunama kwene-kwene, thangwe iwo akhakumbuka kuti Jezuyo angadabwezeresa umambo bwa Jirayeri mu nthawe imweyire. Tsono mpostolo Pedru adalewa kuti: ‘Bzibvereni nsisi Mbuya. Bzinthu bzimwebzi bzin’dzakucitikirani lini.’ Koma Jezu adamutawira kuti: ‘Bwera kumbuyo kwangu, Sathani! Iwepo ndiwe mwala wakukhukhumudwisa kwa inepano, pakuti ulibe makumbukidwe ya Mulungu, koma makumbukidwe ya wanthu.’ (Mat. 16:22, 23; Mab. 1:6) Na mafalaya, Jezu adalatiza padeca kuti makumbukidwe ya Yahova njakusiyana kwene-kwene na makumbukidwe ya dzikoli yomwe yambatsogoleredwa na Sathani. (1 Ju. 5:19) Pedru adalimbisa Jezu kuti akhale na makumbukidwe ya dyera yomwe wanthu azinji anayo m’dzikoli. Tsono Jezu akhadziwa kuti Yahova akhafuna kuti iye akhale wakukonzeka kubonera na kufa. Tenepo, mtawiro wa Jezu udalatiza kuti iye adatewezera makumbukidwe ya Yahova sikuti makumbukidwe ya dzikoli. w18.11 21 ¶1-2

Kumbukirani momwe Yahova ambabvera akambawona bzulu na bzulu bza wanthu wa pa dziko lense la pansi ankutsonkhana, pa msinda wakukumbukira infa ya Mbuya Jezu Kristu. Iye ambanyang’anisa lini kokha kuwanda kwa wanthuwo, koma ambawona munthu ali-wense payekha omwe ambagumanika. Mwa ciratizo, iye ambawona anyakukhulupirika omwe ambayenda ku Cikumbuso gole liri-lense. Ndipo pakati pa iwo pambagumanika winango omwe ambafika napo ankulimbana na mayezo yakusiyana-siyana. Winango omwe ambafika pa Cikumbuso ni wale omwe ambatsonkhana lini mwakukhazikika pa mitsonkhano ya gwere, koma ambawona kuti Cikumbuso ni msinda wakufunika kwene-kwene. Yahova ambawonambo wale omwe ambabwera pa ulendo bwakuyamba kuti adzawone momwe Cikumbuso cimbacitikira.Kulewa cadidi, Yahova ambakomedwa kwene-kwene akambawona wanthu azinji ankutsonkhana pa Cikumbuso. (Lu. 22:19) Kwa Yahova, cinthu cakufunika ni kuwanda lini kwa wanthu omwe agumanika pa msindayo, koma thangwe lomwe lawacitisa kufika. Kodi timbafunisisa kupfunzisidwa na Yahova pabodzi na gulu lace lomwe ankuliphatisa basa?—Zai. 30:20; Ju. 6:45. w19.01 26 ¶1-3

Jezu adapereka ciratizo kwa ifepano ca momwe tingalatizire lufoyi kwa winango. Iye adalatiza lufoyiri sikuti kokha pomwe adafera anyakupfunza wace, koma adalilatiza pa moyo wace wa nsiku na nsiku mwa kumbaikha bzakufuna bza anyakupfunza wacewo pa mbuto yakuyamba. Mwa ciratizo, iye akhakumbukira anyakupfunza wace, napo pomwe akhadaneta ayai akhadasunama. (Lu. 22:39-46) Jezu akhambakumbukira kwene-kwene momwe angathandizire wanthu winango, sikuti momwe wanthuwo angadamuthandizira. (Mat. 20:28) Ifepano timbacita mbali ya banja la Akristau wacadidi, ndipo timbamala nthawe izinji kuti ticemere wanthu winango kuti akhalembo nafe m’banja limweri. Ndipo tin’funika kumbathandiza wale omwe ni ‘abale wathu wa m’cikhulupiro’ koma omwe adjedjera mwauzimu. (Wag. 6:10) Tingawalatize lufoyi lathu mwa kuwalimbikisa kuti ambagumanike pa mitsonkhano yathu, maka-maka pa msinda wa Cikumbuso. Ninga Yahova na Jezu, timbakomedwa kwene-kwene tikambawona abale omwe akhadadjedjera mwauzimu abwerera kwa Yahova, Baba wa lufoyi na m’Busa wathu.—Mat. 18:14. w19.01 29 ¶12; 30 ¶14,15

Jezu adayambisa msinda wa Cikumbuso ca infa yace pomwe akhana anyakupfunza wace 11. Iye adaphatisa basa bzinthu bzomwe bzidasala pa Paskwa, mkate wakusaya cakufufumisa na vinyu, kuti acitire msinda wa Cikumbuso. Jezu adauza anyakupfunza wace kuti bzinthu bziwiribzi bzikhaimira thupi lace lakusaya pikado na mulopa wace omwe mwakusaya kucedwa ungadaperekedwa thangwe ra anyakupfunza wace. Pinango kacitidwe kakusaya kunesaka kakhali lini kakudabwisa kwa anyakupfunzawo. Thangwe ranyi? Kumbukirani bzomwe bzidacitika pa minyezi yakuyambirira, mkati mwa gole lacitatu la utumiki bwa Jezu. Iye adayenda kukazungira axamwali wace, Lazaro, Marta na Mariya. Tsono pa nthawe yakudekezayo, Jezu adayamba kuwapfunzisa. Marta akhadatanganidwa na kuphika cakudya cizinji kuti Jezu adye mwakuti akhatetekera lini bzomwe iye akhapfunzisa. Mwakudeka mtima Jezu adamutsimula, acimuthandiza kuwona kuti ni nthawe lini zense cakudya cizinji cimbakhala cakufunika. (Lu. 10:40-42) Pomwe ikhadasala nthawe yakucepa kuti aphedwe, Jezu adaphatisa basa malango yomwe akhadaperekayo. Iye adacita msinda wakukumbukira infa yace mu njira yakusaya kunesa. w19.01 20-21 ¶3-4

Yahova adasimba Jezu m’njira yomwe iye akhaidikhirira lini. Mwa ciratizo, pomwe iye adalamusidwa aciyenda kudzulu, Yahova ‘adamukwizika pa mbuto ya padzulu kwene-kwene’ ndipo adamupasambo moyo wauzimu wakusaya kufa, cinthu comwe palibe munthu na m’bodziyo omwe akhadatambira kale. (Waf. 2:9; 1 Tim. 6:16) Kulewa cadidi, Yahova adasimba Jezu m’njira yakusaya kudikhirika thangwe ra kukhulupirika kwace! Kodi n’ciyani comwe cingatithandize kumbalinga kusimbidwa na Yahova m’mbuto mwa kusimbidwa na dzikoli? Ni kumbakumbukira kuti Yahova nthawe zense ambasimba atumiki wace wakukhulupirika ndipo kawiri-kawiri iye ambacita bzimwebzi m’njira zakusaya kudikhirika. N’cadidi kuti nthawe zinango timbakumbukira momwe Yahova an’dzatisimbira kutsogoloku, koma pakali pano, mbatipirireni mabvuto na bzineso bza m’dziko lakuipali, ticimbakumbukira kuti dzikoli lin’pfudzidwa tsapanopapa. Tenepo, cisimbo ciri-cense comwe tingatambire m’dzikoli n’cakanthawe. (1 Ju. 2:17) Baba wathu wa lufoyi Yahova an’dzayebwa lini basa lathu pabodzi na lufoyi lomwe timbaliratiza pa dzina lace, thangwe iye ‘si wakusaya kulungama.’ (Waheb. 6:10) Ndipo mwakusaya kupenukira iye an’dzalatiza kuti ambatifuna ndipo an’dzatisimba m’njira yomwe timbaikumbukira lini! w18.07 8 ¶17-18

Usiku bomwe Jezu adadya kakumalizira pabodzi na anyakupfunza wace, iye adacita thupo kwene-kwene na ciphatano cawo. Ndipopa mu mpembo wace omwe adacita na iwo, iye adakumbira Yahova kuti anyakupfunza wacewo akhale wakuphatana, ninga momwe iye aliri na Baba wace. Anyakupfunza wa Jezu angadakhala wakuphatana, bzingadacitisa kuti wanthu winango awone kuti ni Yahova omwe akhadatumiza Jezu pa dziko la pansi. Ndipo wanthu angadazindikira anyakupfunza wacadidi wa Jezu thangwe ra lufoyi lomwe angadalatizana, ndipo lufoyiro lingadawacitisa kukhala wakuphatana. (Ju. 13:34, 35) Jezu adalewa bzinthu bzizinji pa nkhani ya ciphatano usiku bule, thangwe adawona kuti anyakupfunza wace akhalibe ciphatano caico. Mwa ciratizo, anyakupfunzawo akhadanesana ‘kuti mbani mkulu pakati pawo,’ ninga momwe akhadacitira kale ulendo bwakuyamba. (Lu. 22:24-27; Mar. 9:33, 34) Ndipo nsiku inango, Tiyago na Juwau adakumbira Jezu kuti adzawapase mbuto zapadzulu mu Umambo bwa kudzulu.—Mar. 10:35-40. w18.06 9 ¶1, 2

Yahova ambafuna kuti anyakulowolana ambafunane nthawe zense ninga momwe ali-wense ambafunira thupi lace. (Mat. 19:3-6) Ndipo m’bodzi wa iwo akacita upombo ambalatiza kusaya lufoyi kwa mwanzace wa m’banja. Kulewa cadidi, cakutonga ca cinomwe pa Bzakutonga Khumi cikhaletsa upombo. (Bzak. 5:18) Upombo ni pikado kwa ‘Mulungu’ ndipo ni cinthu cakuphonyeka kwene-kwene kwa anyakulowolana. (Ciy. 39:7-9) Mwamuna ayai mkazi akacita upombo nyakuphonyeredwayo angasuname kwa magole mazinji. Yahova ambafunambo kuti wana akhale wakukondwa na wakukhotcerereka. Cakutongaco cikhalewa pomwe kuti abereki an’funika kumbasamalira wana wawo mwakuthupi kuti akule bwino na kuwathandiza kuti akhale pa uxamwali bwakulimba na Yahova. Abereki akhambanyang’ana mipata yakumbathandizira wana wawo kuti ambawone kufunika kwa Cakutonga ca Yahova na kum’funa. (Bzak. 6:6-9; 7:13) Abereki akhafunika kumbawona wana wawo sikuti ningati cinthu cakusaya kufunika, koma ninga mphaso yakucokera kwa Yahova yomwe akhafunika kuisamalira bwino.—Psal. 127:3. w19.02 21 ¶5, 7

Djobi adapitiriza kukhala wakukhulupirika mwa kukulisa cidikhiro cace kwa Mulungu. Iye akhakhulupira kuti Mulungu akhawona kukhulupirika kwace. Napo pomwe akhagumana na mayezo, Djobi akhana citsimikizo cense cakuti Yahova angadadzamusimba kutsogolo. Ndipo citsimikizo cimweci cidamuthandiza kupitiriza kukhala wakukhulupirika. Napo Djobi akhali munthu wakuperewera, Yahova adakomedwa naye kwene-kwene thangwe ra kukhulupirika kwace, ndipopa adamusimba! (Djobi 42:12-17; Tiy. 5:11) Ndipo kutsogoloku Djobi an’dzasimbidwa kwene-kwene kuposa m’mbuyomu. Kodi imwepo mumbadikhirirambo kudzasimbidwa na Yahova thangwe ra kukhulupirika kwanu? Mulungu wathu alibe kucinja. (Malak. 3:6) Tenepo, kukumbukira kuti iye ambawona kukhulupirika kwathu kukhala kwakufunika, kun’dzacitisa kuti cidikhiro cathu cikhale ca moyo mu mtima mwathu. (1 Wat. 5:8, 9) Nthawe zinango, pinango mungawone ninga kuti palibe munthu omwe ankupitiriza kukhala wakukhulupirika, tsono penu bziri tenepo, dziwani kuti muli lini mwekha. Imwepo muli pakati pa bzulu na bzulu bza wanthu wakukhulupirika wa pa dziko lense la pansi. Muli m’gulu la amuna na akazi omwe adakhala wakukhulupirika m’mbuyomu, napo pomwe adauzidwa kuti an’phedwa.—Waheb. 11:36-38; 12:1. w19.02 7 ¶15-16

Pomwe nsiku ya Cikumbuso inkufendera bzibvunzeni kuti: ‘Kodi ndingatewezere tani Jezu mwa kulatiza lufoyi? Kodi ndimbakumbukira kwene-kwene bzakufuna bzangu kuposa bzakufuna bza winango? Kodi ndimbadikhirira kuti abale wa m’gwere ambacite bzinthu bzomwe iwo angakwanise lini kucita?’ Nthawe zense tin’funika kumbatewezera Jezu na kumbafuna abale wathu. Lamulo lakuti timbacite Cikumbuso ca infa ya Jezu lin’khalisa lini kwene-kwene. Thangwe ranyi tinkulewa tenepo? Jezu ‘akadzabwera’ pa nthawe ya citsautso cikulu, iye an’dzakonkhanisira kudzulu ‘anyakusankhulidwa’ wace omwe akali pa dziko la pansi pano, ndipo kuyambira pamwepo cikumbuso cin’dzacitika lini pomwe. (1 Wak. 11:26; Mat. 24:31) Napo pa nthawe yomwe Cikumbuso cin’dzacitika lini pomwe, tina citsimikizo cense cakuti wanthu wa Yahova an’dzakumbukira bza Ciraliro ca Mbuya ninga cizindikiro ca kubzicepswa, kukhwimika na lufoyi lomwe lidalatizidwa. w19.01 25 ¶17-19

Kumbukirani momwe thanzi la thupi lathu limbalatizira kufunika kwa unthu bwathu bwa mkati. Cakuyamba, kuti thupi lathu likhale na mawonekedwe yabwino, tin’funika kumbadya bzakudya bzakupasa thanzi na kumbacita masenzeka yakulimbisa thupi mwakukhazikika. Mpsibodzi-bodzimbo na ifepano, kuti tipitirize kukhala na thanzi labwino mwauzimu, tin’funika kumbadya cakudya cauzimu cakupasa thanzi na kumbalimbisa nthawe zense cikhulupiro cathu kwa Yahova. Ndipo tingalatize cikhulupiro cathu kwa Yahova mwa kuphatisa basa bzomwe timbapfunza, na kuuzambo winango bza cikhulupiro cathuco. (War. 10:8-10; Tiy. 2:26) Caciwiri, tikambawona mawonekedwe yathu yakunja, tingakumbuke kuti tina thanzi labwino, ne kudziwa kuti mkati mwa thupiro tina matenda. Mpsibodzi-bodzimbo, tikambawona momwe tinkucitira bzinthu bzauzimu, tingakumbuke kuti cikhulupiro cathu n’cakulimba, tsono bzikhumbo bzakuipa bzingakule mu mtima mwathu. (1 Wak. 10:12; Tiy. 1:14, 15) Tin’funika kumbakumbukira kuti Sathani an’funa kutipumpsa kuti tikhale na makumbukidwe ninga yace. w19.01 15 ¶4-5

Pinango tingabzibvunze kuti: ‘Kodi inepano ndimbacitambo bzomwe Msamariya wabwino ule adacita? Kodi ndimbacita ciri-cense kuti ndithandize omwe akubonera?’ (Lu. 10:30-35) Mwa ciratizo, ‘kodi ndimbathandiza acikule m’gwere, amansiwa, ayai wana omwe abereki wawo ambatumikira lini Yahova? Kodi n’ciyani comwe ndingacite kuti nditsangalaze “anyakusunama”?ʼ (1 Wat. 5:14; Tiy. 1:27) Tikambabvera nsisi winango timbalatiza kuti ndife wakupasa, ndipo Jezu adalewa kuti omwe ambapasa an’dzakhala wakukondwa. Ndipo cinthu cinango n’cakuti tin’dzakondwesa Yahova. (Mab. 20:35; Waheb. 13:16) Mambo Davide adalewa kuti: ‘Yahova an’dzamukhotcerera na kumusunga wa moyo.’ Ndipo iye ‘an’dzacemeredwa wakukondwa pa dziko lense la pansi.’ (Psal. 41:1, 2) Tenepo tikambabvera nsisi winango, Yahova an’dzatibverambo nsisi ndipo tin’dzakhala wakukondwa kwa muyaya.—Tiy. 2:13. w18.09 18 ¶11, 12

Mpfumakazi inango yakucemeredwa Yoshiko idauzidwa na dotolo wace kuti yandosala na minyezi ming’ono-ng’ono kuti ikhale na moyo. Kodi mpfumakaziyi idabzibva tani na mafalaya? Mwakusaya kucedwa idawerenga vesi la m’Bibliya lomwe ikhalifuna kwene-kwene. Patsogolo pace, mpfumakaziyi idauza dotolo waceyo kuti ikhalibe thupo na bzimwebzo, thangwe ikhathemba Yahova. Tenepo, mafala ya mtsangalazo yomwe yambagumanika mu vesiri yadathandiza mpfumakazi yathuyi kukhulupira Yahova na mtima wense. Ndipo vesi limweri lingatithandizembo kupitiriza kugwa nfuwa tikagumana na mayezo yakusiyana-siyana pa moyo wathu. Tsono kuti tibvesese momwe tingacitire bzimwebzi, cakuyamba tin’funika kukumbukira thangwe lomwe lidacitisa Mulungu kuuza Zaiya kuti anembe mafalaya. Yahova adauza Zaiya kuti anembe mafalaya na cakulinga cakuti atsangalaze Ajuda omwe angadadzatengedwa kuti ayende ku ukapolo ku Babulo. Tsono Yahova adacitisa kuti mafalaya yatsangalaze sikuti kokha Ajuda omwe akhali pa ukapolo, koma yatsangalazembo atumiki wace wense napo wa nsiku zino. (Zai. 40:8; War. 15:4) Nsiku zino, tinkukhala mu nthawe ‘zakunesa,’ ndipopa tin’funikira cilimbiso comwe cimbagumanika m’bukhu la Zaiya.—2 Tim. 3:1. w19.01 2 ¶1-2

Penu anyakulowolana asankhula kupumirana thangwe ra bzimwebzi, iwo akanati kulambana, ndipo an’dzagumana na mabvuto. Mpostolo Paulo adalewa thangwe lomwe lingacitise anyakulowolana kuleka kupumirana. Iye adanemba kuti: ‘Mwamuna wakusaya kukhulupira ambacenesedwa thangwe ra mkazace, ndipo mkazi wakusaya kukhulupira ambacenesedwa thangwe ra m’baleyo. Bzingadakhala kuti n’tenepo lini, wana wanu angadakhala wakupswipa, koma tsapano iwo mbakucena.’ (1 Wak. 7:14) Akristau azinji ambapitiriza kukhala pa banja na mwamuna ayai mkazi omwe ambatumikira lini Yahova napo akagumana na mabvuto makulu. Iwo ambacita bzimwebzi thangwe ra kukumbukira bza cikondweso comwe an’dzakhala naco kutsogolo mwanzawoyo akadzakhala Mboni ya Yahova. (1 Wak. 7:16; 1 Pe. 3:1, 2) Nsiku zino, kuzungulira dziko lense la pansi, pana mabanja mazinji m’gwere la Mboni za Yahova yomwe yana moyo wakukondwa. Ndipo mukafufudza m’gwere mwanu, mungagumane mabanja mazinji yomwe yana moyo wakukondwa, yakumangidwa na amuna omwe ambafuna kwene-kwene akazawo ndipo akazimbo ambalemekeza abayawo. Wensenewo ambalatiza kuti malowozi njakufunika kulemekezedwa.—Waheb. 13:4. w18.12 14 ¶18-19

Fala lakuti ‘Edeni’ limbathandauza “Mtsangalazo” ndipo zundeyo ikhali mbuto yakutsangalazadi. Kulewa cadidi, mu zundemo mukhadekeza kwene-kwene thangwe mukhana miti ya bzakudya ndipo wanthu na bzirombo akhali pa mtendere. (Ciy. 1:29-31) Fala la Cihebereu lakulewa bza ‘zunde’ mu Cigirego limbasanduliziridwa kuti paraizo. Bukhu linango lidalewa kuti m’Girego akabva fala lakuti paraizo ambakumbukira bza mbuto yakudeka, yakukhotcerereka ku cinthu ciri-cense cakuipa, miti yace imbabala bzisapo bzakusiyana-siyana, mikulo ya madzi yakucena bwino ndipo ina mbuto za kudyera bzirombo bzakusiyana-siyana. (Ndendemezerani na Ciyambo 2:15, 16.) Yahova adaikha Adamu na Eva mu zunde ninga limweri kuti akhale. Tsono pakuti iwo alibe kubvera Yahova, adaluza mwayi wakukhala m’Paraizo pabodzi na wana wawo. (Ciy. 3:23, 24) Napo kuti palibe munthu omwe adakhala m’Paraizomo kwa nthawe itali, bzinkuwoneka kuti paraizoyo akhalipo mpaka mu nthawe ya Cigumula ca Madzi comwe cidacitika mu nsiku za Nowe. w18.12 3-4 ¶3-5

Abereki ambacita nyongo yakupfunzisa wana wawo makhalidwe yabwino. Ndipo wanawo akapitiriza kuphatisa basa makhalidwe yabwino yomwe abereki wawo adawapfunzisa, iwo ambacita bzakusankhula bzabwino ndipo ambatcenkha mabvuto, thupo na msunamo. Ninga m’bereki wabwino, Yahova ambafuna kuti wana wace akhale na moyo wabwino kwene-kwene. (Zai. 48:18) Ndipopa iye ambatipfunzisa nfundo zakuyambirira zakulewa bza makhalidwe yabwino na momwe tingambacitire bzinthu na anzathu. Yahova ambatiuza kuti timbawone bzinthu ninga momwe iye ambabziwonera ticikhala na moyo wakubverana na makhalidwe yace yabwino. Iye akacita bzimwebzi ambatiphera lini ufulu bwathu, koma bzimbaticitisa kukhala wanzeru na kutithandiza kumbacita bzakusankhula bzabwino. (Psal. 92:5; Mim. 2:1-5; Zai. 55:9) Tenepo, tikapitiriza kumbacita bzakusankhula bzabwino tin’dzakhala wakukondwa. (Psal. 1:2, 3) Ndipo tikakhala na makumbukidwe ya Yahova, tin’dzagumana bzisimbo bzizinji! w18.11 22-23 ¶7-8

Kuti tipitirize kufamba m’cadidi, tin’funika lini kubvuma kupumpsidwa na wanthu omwe ambatumikira lini Yahova. Pomwe tidapfunza cadidi ca m’Bibliya, mbverano omwe tikhanawo na acibale pabodzi na axamwali wathu omwe ni Mboni lini za Yahova udacinja. Mwa ciratizo, winango ambalemekeza bzomwe timbakhulupira, koma winango ambatsutsa. Nthawe zinango acibale wathu, anzathu wa kubasa na wa ku xikola angatiuze kuti tisekerere nawo nsiku za feriado. Kodi n’ciyani comwe cingatithandize kuti titcenkhe kucita mbali pa miyambo na nsiku za feriado zomwe zimbakondwesa lini Yahova? Tin’funika kumbakumbukira mathangwe yomwe yambacitisa Yahova kuletsa kusekerera nsikuzi. Tin’funikambo kumbafufudza m’mabukhu mwathu kuti tidziwe momwe nsiku za feriadozo zidayambira. Ndipo tikambakumbukira mathangwe ya m’Bibliya yomwe yambaticitisa kuti tileke kusekerera nsiku zimwezi, tin’dzabzibva kuti tinkufamba mu njira yomwe ‘[njakubvumizika] kwa Mbuya.’ (Wayef. 5:10) Tenepo, tikambakhulupira Yahova pabodzi na Fala lace, tin’dzacita lini mantha na bzomwe wanthu winango ambakumbuka.—Mim. 29:25. w18.11 12 ¶10; 13 ¶12

Bzinthu bzikacinja pa moyo wathu mwadzidzidzi, tingakhale na thupo kwene-kwene tikambakumbukira mabvuto yomwe yangabwere. Bzimwebzi bzingadacitika na Zuze. Tsono iye adasankhula kucita bzinthu bzakufunika bzomwe angadakwanisa pa cakucitika comwe adagumana naco. Pomwe Zuze akhali m’kawoko, iye adaphata basa na nyongo pa ciri-cense comwe akhauzidwa na mkulu wa m’kawokomo, ninga momwe akhacitira pomwe akhali kumui kwa Potifari. (Ciy. 39:21, 22) Ninga Zuze, pinango tingagumane na cakucitika comwe tingakwanise lini kucimalisa. Koma tikapirira na kucita bzinthu bzakufunika bzomwe tingakwanise, Yahova an’dzatisimba. (Psal. 37:5) Napo tigumane na mabvuto ayai tikhale na thupo, tin’funika lini kuluza cidikhiro. (2 Wak. 4:8) Yahova an’dzakhala nafe, tikapitiriza kuikha utumiki bwathu pa mbuto yakuyamba. w18.10 25 ¶11, 13

Kodi imwepo mumbabva tani munthu omwe mumbamudziwa na kumulemekeza akayebwa dzina lanu ayai akasaya kukuzindikirani? Mwakusaya kupenukira bzimbakuwawani kwene-kwene. Thangwe ranyi? N’thangwe rakuti mwacibadwa, tensenefe timbafuna kuti anzathu atidziwe. Ndipo mpsimwebzo lini bzokha. Ifepano timbafunambo kuti wanthu adziwe unthu bwathu, acititenda pa bzomwe timbacita. (Mirew. 11:16; Djobi 31:6) Tikasaya kusamala, cikhumbo comwe tinaco cakufuna kudziwikaci cingatidzonge. Mwa ciratizo, dziko la Sathaniri lingaticitise kufuna kukhala wakubvekera na wakulemekezeka. Tsono bzimwebzi bzikacitika, ifepano tingakwanise lini kunamata Yahova mu njira yakuthemera ne kum’pasa ulemu bomwe iye ambafunikira.—Cibv. 4:11. w18.07 3 ¶1-2

Tenepo, timbadabwa lini kuti Sathani pabodzi na madimonyo yace ndiwo omwe ambalimbisa wanthu kuti ‘ambalewe magunkha.’ (1 Tim. 4:1, 2) Bzimbakhala bzakuipa kwene-kwene atsogoleri wa bzipembedzo akambanama. Munthu akakhulupira bzipfunziso bzawo bzakunama acimbacita bzinthu bzomwe Mulungu ambabziwenga, munthuyo angaluze mwayi wakudzakhala na moyo wakusaya kumala. (Oze. 4:9) Jezu akhadziwa kuti atsogoleri wa bzipembedzo wa mu nthawe yace akhanamiza wanthu. Tenepo, iye adawatsimula mwamphanvu kuti: ‘Tsoka kwa imwe anembi na Afarisi, anyacinyengomwe! Thangwe mumbayenda ku nyanza na kuzunga dziko lense kuti mutendeuse munthu m’bodzi, ndipo mukamugumana, mumbamucitisa kuti athemere kuthusidwa m’Gehena,’ bzomwe bzikuthandauza kupfudzidwa kwa muyaya. (Mat. 23:15) Jezu adalewa kuti atsogoleri wa bzipembedzo wale akhali ninga baba wawo Sathani, omwe ‘ngwakupha.’—Ju. 8:44. w18.10 4 ¶5, 6

Kodi Jezu akhathandauza ciyani na mafalaya? Iye adati: ‘Kondwani, mucimoga-moga mwakukomedwa pakuti mabaibai yanu n’makulu kudzulu; thangwe n’tenepa momwe iwo adazunzirambo apolofeta, imwepo mukanati kuwoneka.’ (Mat. 5:12) Pomwe apostolo adamenyedwa aciuzidwa kuti aleke kupalizira, ‘iwo adacoka wakukomedwa mu Sinedriyomo.’ N’cadidi kuti iwo alibe kukomedwa thangwe ra kumenyedwa, koma thangwe ‘adawonedwa kukhala wakuthemera kunyozedwa thangwe ra dzina la Jezu.’ (Mab. 5:41) Nsiku zino, atumiki wa Yahova ambapirirambo mwakukondwa akambazunzidwa thangwe ra dzina la Jezu. (Tiy. 1:2-4) Ninga apostolo, ifepano timbakomedwa lini thangwe ra kubonera ayai kuzunzidwa. Koma tikapitiriza kukhala wakukhulupirika kwa Yahova, iye an’dzatipasa mphanvu zakufunikira kuti tipirire. Tikakhala na cikondweso comwe n’cakubvumizika na ‘Mulungu wakukondwa,’ tin’dzakhala wakukondwa napo tinkuzunzidwa na atsogoleri wa cipembedzo ayai tinkutsutsidwa na adzinza wathu.—1 Tim. 1:11. w18.09 20 ¶18-20

Pakuti tinkukhala mu nthawe ‘zakunesa,’ ndipo moyo wathu wandodzaza na mabvuto, bzimwebzi bzikucitisa wanthu azinji omwe akubonera kwene-kwene kuwona kuti palibe phindu lakukhalira na moyo. (2 Tim. 3:1-5) Kafukufuku akulatiza kuti, gole liri-lense wanthu wakupitirira 800.000 ambabzipha, ndipo bzinkulatiza kuti wanthu amwewa ambabzipha m’tumphindi 40. Tsono mpsakupasa nsisi kuti napo Akristau winango akagumana na mabvuto ambabziphambo. Nsiku zino, abale wathu azinji ankulimbana na mabvuto yakusiyana-siyana, na tenepo iwo an’funikira lufoyi lathu kuti akhale wakulimba. Mwa ciratizo, winango ambasekedwa ayai kuzunzidwa na anzawo wa kubasa. Ayai pinango iwo ambaneta thangwe ra kumala nthawe izinji ankuphata basa ayai thangwe ra kuwanda kwa basalo. Ndipo winango ankugumana na mabvuto makulu kwene-kwene m’banja mwawo, maka-maka abale na mpfumakazi omwe ali pa banja na munthu omwe ambatumikira lini Yahova, ndipo iye ambatsutsa bzomwe iwo ambakhulupira. Tsono mabvuto ninga yamweya yambacitisa abale wathuwo kukhala wakusunama ndipo ambafika pa kuwona kuti moyo wawo ulibe phindu. w18.09 9 ¶3, 5

Abereki wacikristau angaphate basa pabodzi na Yahova mwa kuthandiza wana wawo kukhala na bzakulinga bza kutumikira Yahova. Bzimwebzi ndibzo bzomwe abereki azinji ambacita. Ndipo ninga bzakutewera bzace, wanawo ambadzasankhula kutumikira Yahova kwa nthawe zense, ayai kukatumikira ku mbuto zakutali. Mwa ciratizo, winango ambatumikira ninga mamisiyonario, ayai ninga apainiya komwe kunkufunikira apalizi azinji, pomwe winango ambatumikira pa Beteli. Ndipo wana akambatumikira kutali na komwe kuna abereki wawo, bzimbakhala bzakunesa kuti aberekiwo akhale na nthawe yakuceza nawo. Tsono abereki wakusaya dyera ambalimbisa wanawo kuti apitirize kutumikira Yahova komwe aliko. Thangwe ranyi? Thangwe rakuti iwo ambakomedwa kwene-kwene akawona kuti wana wawo ankuikha Umambo bwa Mulungu pa mbuto yakuyamba. Abereki azinji ambakhala ninga Ana, omwe adalewa kuti ‘akhadakumbiza’ mwana wace Samuyeri kuna Yahova. Ndipo iwo ambawona kuti kuphata basa pabodzi na Yahova mu njira imweyi ni mwayi ukulu kwene-kwene.—1 Sam. 1:28. w18.08 22 ¶4

Jezu alibe kulewa kuti bzin’dzakwanisika lini. Iye adalewa kuti: ‘Ndimwe wakukondwa wakusaukamwe, thangwe Umambo bwa Mulungu n‘bwanu.’ (Lu. 6:20) Tsono sikuti na mafalaya Jezu akhafuna kulewa kuti wanthu wense wakusauka angadamutetekera acisimbidwa, thangwe pa nthawe imweyire, pakhana wakusauka azinji omwe akhali lini ateweri wace. Koma iye akhafuna kubvekesa nfundo yakuti tin’funika lini kumbakumbuka kuti Yahova angakhale pauxamwali na munthu thangwe ra bzinthu bzomwe anabzo. Pakati pa atumiki wa Yahova pana abale na mpfumakazi omwe mbakudala ndipo winango mbakusauka. Tsono napo bziri tenepo, wense ambafuna Yahova ndipo ambamutumikira na mtima wense. Ndipo Bibliya limbacenjeza anyakudala wense kuti ‘aleke kuikha cidikhiro cawo pa cuma cakusaya kutsimikizika, koma pa Mulungu.’ (1 Tim. 6:17-19) Tsono iro limbacenjezambo atumiki wense wa Yahova, wakudala na wakusauka kubodzi, kuti kufuna kwene-kwene kobiri kumbabweresa ngozi ikulu. (1 Tim. 6:9, 10) Tikambawona abale wathu ninga momwe Yahova ambawawonera, ifepano tin’dzawayeruza lini thangwe ra bzomwe iwo anabzo ayai alibe. w18.08 12-13 ¶11-12

Mwakusaya kupenukira, ifepano timbatenda kwene-kwene Yahova thangwe ra mwayi omwe tinawo wakukhala wanthu wace. Ndipo tawona kuti njira ibodzi yakucitira bzimwebzi, ni kubzipereka komwe tidacita kwa iye kuti timutumikire. Ndipo tin’funika kutcenkha kucita cinthu ciri-cense comwe Yahova ambaciwenga. Tin’funikambo kumbafuna na kumbalemekeza abale pabodzi na mpfumakazi zathu, thangwe iwo ni wanthumbo wa Yahova ninga ife. (War. 12:10) Bibliya limbati: ‘Yahova cipo acidzasiya wanthu wace.’ (Psal. 94:14) Yamweya ni mafala yakulimbisa kwene-kwene ndipo yankutitsimikizira kuti bziribe basa bzomwe bzingaticitikire pa moyo wathu, Yahova nthawe zense an’dzakhala nafe. Ndipo napo ticifa, iye an’dzatiyebwa lini. (War. 8:38, 39) ‘Tikakhala na moyo, tinkukhalira moyo Yahova; ndipo tikafa, tinkufera Yahova. Tenepo, napo tikhale na moyo ayai tife, ndife wa Yahova.’ (War. 14:8) Kulewa cadidi, timbadikhirira na mtima wense nthawe yomwe Yahova an’dzalamusa axamwali wace wense wakukhulupirika omwe adafa. (Mat. 22:32) Tsono napo nsiku zino, ifepano timbakondwa kwene-kwene na bzisimbo bzomwe Baba wathu ambatipasa. Bibliya limbalewa kuti: ‘Wakukondwa ni mtundu omwe Mulungu wawo ni Yahova; wanthu omwe iye awasankhula kukhala utaka bwace.’—Psal. 33:12. w18.07 26 ¶18-19

Pakuti nkhani yakucita mapfunziro yapadzulu nja ali-wense payekha, wanthu winango ambakumbuka kuti iwo ana ufulu bwakusankhula ciri-cense comwe an’funa, bzikakhala kuti cikumbu-mtima cawo cinkuwabvumiza. Pinango iwo angakumbukire mafala ya Paulo yakuti: ‘N’thangwe ranyi ufulu bwangu bunkutongedwa na cikumbu-mtima ca winango?’ (1 Wak. 10:29) N’cadidi kuti tina ufulu bwakucita bzakusankhula pa nkhani ya mapfunziro na basa, koma tin’funikambo kumbakumbukira kuti ufulu bwathubo buna malire ndipo bzakusankhula bzathu bzense bzimbakhala na bzakutewera bzace. Ndipopa mpostolo Paulo adalewa mafala ya mu vesi ya lero. Tenepo, napo kuti tina ufulu bwakucita bzakusankhula pa moyo wathu, koma pana cinthu cinango comwe n’cakufunika kwene-kwene kuposa bzakusankhula bzathubzo. w18.04 12 ¶10

Mkristau nsiku zino angalewe kuti ankutumikira Yahova, koma pa nthawe ibodzi-bodziyo acimbacita bzinthu bzomwe Yahovayo ambabziwenga. (Juda 11) Ndipo pinango Mkristauyo ambayenda mu utumiki bwakumunda na ku mitsonkhano mwakukhazikika. Koma nthawe ibodzi-bodziyo, pinango iye angakhale na makumbukidwe ya unzazi, bzikhumbo bza dyera, ayai ciwengo. (1 Ju. 2:15-17; 3:15) Makumbukidwe yamweya yangamucitise kufika pa kucita pikado. Wanthu winango ambadziwa lini bzomwe timbakumbuka ayai kucita, koma Yahova ambadziwa, ndipo iye ambadziwa penu ifepano tiri kumbali yace ayai ne. (Jer. 17:9, 10) Yahova ambathamangira lini kutisiya tikacita pikado. Ndipo akawona kuti tinkufamba mu njira yakuphonyeka, iye ambaticenjeza kuti: ‘Bwererani kwa ine.’ Yahova ambadziwa kuti ifepano ndife wakuperewera ndipo timbafunika kulimbana na kuperewerako. Tsono napo bziri tenepo, iye ambafuna kuti tipitirize kukhala wakulimba na kumbatcenkha bzinthu bzakuipa. (Zai. 55:7) Ndipo tikacita bzimwebzi, iye adapicira kuti an’dzatithandiza na kutipasa mphanvu zakufunikira kuti tikunde bzikhumbo bzathu bzakuipa.—Ciy. 4:7. w18.07 16 ¶5-6