Dezembro

Cinthu cakudabwisa kwene-kwene pa makhalidwe yomwe Jezu anayo, ni kubvesesa mabvuto yomwe wanthu wakuperewerafe timbagumana nayo. Pomwe iye akhali pansi pano, adakondwa na omwe akhakondwa ndipo adalira na omwe akhalira. (War. 12:15) Mwa ciratizo, pomwe anyakupfunza wace 70 adabwerera wakukondwa thangwe rakuti basa lakupalizira lomwe akhadawauza kuti akacite lidawafambira bwino, Jezu ‘adakomedwa kwene-kwene mwa mzimu wakucena.’ (Lu. 10:17-21) Koma pa nthawe inango, pomwe iye adawona nsunamo omwe wanthu akhanawo thangwe ra infa ya Lazaro, Jezu ‘adabuula ndipo adawawidwa mu mtima.’ (Ju. 11:33) Napo Jezu akhali munthu wakulungamiratu, iye akhabvera nsisi wanthu wakuperewera. Kodi n’ciyani cidamuthandiza kucita bzimwebzo? Cinthu cakufunika kwene-kwene comwe cidamuthandiza, ni lufoyi lomwe iye akhanalo kwa wanthuwo. Jezu akhakondwa ‘thangwe ra wana wa wanthu.’ (Mim. 8:31) Lufoyi limweri lidamuthandiza kudziwa bwino makumbukidwe ya wanthu. Ndipo mpostolo Juwau adafotokoza kuti: ‘Iye akhadziwa kale bzomwe bzikhali m’mitima ya wanthu.’—Ju. 2:25. w19.03 20 ¶1-2

Sathani adapfudza cuma comwe Djobi akhanaco, adapha anyabasa wace, ndipo adaipisa mbiri yace. Ndipo adamupherambo wana wace khumi omwe akhanawo. Patsogolo pace, iye adaduwalisa Djobi na bzironda bzomwe bzikhamuboneresa kwene-kwene, kuyambira ku msolo mpaka ku nzayo. Mkazace adasaya kuti angadaphata muti wanyi, ndipo thangwe ra thupo, iye adayeza kutaisa cikhulupiro ca bayaceyo mwa kumuuza atukwane Mulungu kuti afe. Napo Djobi caiyeyo adakhumbambo kufa, koma alibe kubvuma kuti kukhulupirika kwace kwa Yahova kudzongeke. Pomwe Sathani adawona kuti watazira kukunda Djobi, iye adayeza kuphatisa basa njira inango. Iye adaphatisa basa amuna atatu omwe akhali axamwali wa Djobiyo. Nsiku zizinji amunawo akhayenda kukazungira Djobi, koma mafala yomwe iwo akhalewa yakhamutsangalaza lini. Mbuto mwa kumulimbisa, iwo adamusunamisa ndipo adamupasa mulandu thangwe ra kuduwala kwaceko. Iwo adamuuza kuti Mulungu ndiye akhacitisa mabvuto yomwe iye akhagumana nayo, ndipo akhalibe basa na kukhulupirika kwaceko. Ndipo iwo adalewa pomwe kuti Djobi akhali munthu wakuipa, nakuti akhathemera mabvuto yomwe akhagumana nayo.— Djobi 1:13-22; 2:7-11; 15:4, 5; 22:3-6; 25:4-6. w19.02 4 ¶7, 8

Nthawe zinango kucita mantha kumbakhala kwabwino kwa ifepano. Mwa ciratizo, ifepano tin’funika kukhala na mantha kuti titcenkhe kucita bzinthu bzomwe bzingakalipise Yahova. Bzingadakhala kuti Adamu na Eva akhana mantha ninga yamweya, iwo angadapandukira lini Yahova. Koma thangwe ra kusaya mantha kwawoko, iwo adamupandukira, ndipo pomwe adacita bzimwebzo, maso yawo yadafunguka ndipo adadziwa kuti aphonya. Tenepo iwo adapasira wana wawo, pikado na infa. Ndipo thangwe rakuti iwo angadakwanisa kuwona, kubvesesa momwe akhaliri, iwo adacita manyazi thangwe akhali pezi, tenepo adapakasa masamba kuti abvale. (Ciy. 3:7, 21) Napo tin’funika kukhala na mantha yakuthemera kwa Yahova, tin’funika lini kumbagopa kufa. Thangwe Yahova adakonza kale njira yakuti tidzakhale na moyo wakusaya kumala. Ndipo tikacita pikado, ticikungula na mtima wense, Yahova an’dzatilekerera. Tsono iye an’dzatilekerera kokha tikakhulupira nsembe ya cakulombolera ya Mwana wace. Ndipo njira ibodzi yakufunika kwene-kwene ya momwe tingalatizire cikhulupiro cathu ni kubzipereka kwa Mulungu na kubatizidwa.—1 Pe. 3:21. w19.03 5-6 ¶12-13

Ajirayeri akhana mathangwe mazinji yakulatizira kutenda Yahova. Iwo adatsudzulidwa ku ukapolo bwa ku Edjipito pomwe Yahova adabweresa Matsoka Khumi ku dzikolo. Patsogolo pace, Mulungu adawapulumusa mwa kupfudza anyankhondo wense wa Edjipito pa Nyanza Ifuira. Pomwe bzimwebzi bzidacitika Ajirayeri adatenda mwa kuimba nyimbo yakukunda yomwe ikhatumbiza Yahova. Kodi iwo adapitiriza kutenda? Pomwe Ajirayeri adagumana na bzineso bzipsa, iwo adayebweratu bzinthu bzense bzabwino bzomwe Yahova akhadawacitira. Bzimwebzi bzidacitisa kuti iwo awoneke padeca kuti akhali wanthu wakusaya kutenda. (Psal. 106:7) Kodi iwo adacita tani bzimwebzo? ‘Ajirayeri wense adayamba kung’ung’udzira Mozeji pabodzi na Aroni m’dambo.’ Koma cadidi n’cakuti, iwo akhang’ung’udzira Yahova. (Kuf. 16:2, 8) Tenepo, Yahova adasunama kwene-kwene thangwe ra kusaya kutenda kwa wanthu wacewo. Na kupita kwa nthawe, iye adalewa kuti mtundu wense wa Jirayeri ungadafera m’dambo, koma angadasala ni Djosuwe na Kalebe yekha.—Mirew. 14:22-24. w19.02 17 ¶12-13

Jezu alibe kufuna kubzipasa mbiri mwakucita msinda wa padzulu kwene-kwene kuti akumbukire infa yace. M’mbuto mwace, iye adauza anyakupfunza wace kuti ambamukumbukire kabodzi pa gole mwa kumbacita msinda wakusaya kunesa. (Ju. 13:15; 1 Wak. 11:23-25) Bzimwebzi, bzimbalatiza kuti Jezu akhali lini wakubzikuza. Mpsakukondwesa kudziwa kuti Mambo wathu wakudzulu ngwakubzicepswa. (Waf. 2:5-8) Kodi tingatewezere tani kubzicepswa kwa Jezu? Mwa kumbaikha bzakufuna bza winango pa mbuto yakuyamba. (Waf. 2:3, 4) Kumbukirani bza usiku bwakumalizira bwa moyo wa Jezu pano pa dziko la pansi. Iye akhadziwa kuti m‘kanthawe kakucepa angadaphedwa; koma napo bzikhali tenepo, Jezu adacita thupo kwene-kwene na apostolo wace wakukhulupirika omwe angadasunama thangwe ra infa yace. Tenepo, iye adamala usiku bwense ankuwapfunzisa, kuwalimbisa na kuwatsangalaza. (Ju. 14:25-31) Jezu adalatiza kuti akhali wakubzicepswa kwene-kwene mwa kucita thupo na moyo wa anyakupfunza wace m’mbuto mwa kucita thupo na moyo wace. Mwakusaya kupenukira, iye ni ciratizo cabwino kwene-kwene kwa ifepano! w19.01 21-22 ¶5-6

Kodi m’mimba mwanu mumbabvunduka mukafuna kuimisa boko lanu kuti mupereke mtawiro pa mitsonkhano? Penu bziri tenepo, dziwani kuti ndimwe lini mwekha. Cadidi n’cakuti azinji wa ifepano timbacita mantha tikambapereka mitawiro. Ndipo Mantha ninga yamweya, yangakhale cizindikiro cabwino. Yangalatize kuti imwepo ndimwe wakubzicepswa nakuti mumbawona winango kukhala wakukuposani. Yahova ambafuna wanthu wa khalidwe limweri. (Psal. 138:6; Waf. 2:3) Koma iye ambafunambo kuti mumutumbize na kulimbisa abale na mpfumakazi zanu pa mitsonkhano. (1 Wat. 5:11) Iye ambakufunani ndipo an’dzakupasani cilimbiso cakufunikira. Onani bzomwe Bzinembo bza m’Bibliya bzambatikumbusa. Bibliya limbalewa kuti tensenefe timbaphonya m’mafala na kalewelewedwe. (Tiy. 3:2) Tsono Yahova ambadikhira lini kuti ifepano tikhale wakulungamiratu, ne pa bzomwe abale na mpfumakazi ambacita. (Psal. 103:12-14) Abalewo mbauzimu ndipo ambatifuna kwene-kwene. (Mar. 10:29, 30; Ju. 13:35) Iwo ambadziwa kuti nthawe zinango mitawiro yathu imbabveka lini bwinoletu ninga momwe tikhafunira. w19.01 8 ¶3; 10-11 ¶10-11

Nthawe zinango kucita bzimwebzi kumbanesa, koma mpsakukwanisika. Ndipo na thandizo la Mulungu, imwepo mungakhale na moyo wakukondwa kuyambira mukali tswaka mpaka mukadzakalamba. Kuti tibvesese momwe bzimwebzi bzingacitikire, bwerani ticezerane bzomwe bzidathandiza Ajirayeri kukapita m’Dziko Lakupiciridwa na momwe Davide adakundira Goliyati. Kodi ni malango yaponi yomwe Yahova adapasa Ajirayeri, pomwe akhadasala pang’ono kupita m’Dziko Lakupiciridwa? Kodi iye adawauza kuti akonzekere nkhondo? Ne na pang’onopo! (Bzak. 28:1, 2) Iye adawauza kuti amubvere na kumukhulupira. (Djos. 1:7-9) Malango yamweya kwa wanthu yangawoneke ninga yakusaya kuthandiza, koma kwa Ajirayeri yadawathandiza kwene-kwene. Ndipo kubvera malangoya kudacitisa kuti, Yahova athandize wanthu wace kukunda Akanani mwakubwereza-bwereza. (Djos. 24:11-13) Kubvera Mulungu kumbafuna cikhulupiro, ndipo cikhulupiroco nthawe zense cimbacitisa kuti bzinthu bzifambe bwino. Bzimwebzi bzidakhala bzakuthandiza m’nthawe zambuyomu ndipo nthawe zino mpsakuthandizambo. w18.12 22 ¶3-4

Wanthu winango nsiku zino ambasunama thangwe ra kabvesesedwe ka mbali inango ya m’Bibliya. Ndipo winango ambasiya cadidi thangwe ra kutengeka na bzipfunziso bzakunama bza apanduki na wanthu omwe ambatinamizira. Yamweya ni mathangwe yakucepa yomwe yambacitisa wanthu winango kusiya utowa kutumikira Yahova pabodzi na gwere lace. (Waheb. 3:12-14) M’mbuto mwa kucita bzimwebzi, iwo akhafunika kukhulupira Jezu ninga momwe mpostolo Pedru adacitira! Wanthu winango adasiya kufamba m’cadidi pang’ono na pang’ono, ndipo pinango alibe kubvesesa bzomwe bzikhacitika. Tsono munthu omwe ambasiya cadidi pang’ono na pang’ono, ali ninga ngalawa yomwe imbasiya ng’ambu inango ya nyanza pang’ono na pang’ono. Bibliya limbaticenjeza kuti tikhale tceru kuti ‘tileke kutengeka ticipambuka pa cikhulupiro.’ (Waheb. 2:1) Kawiri-kawiri munthu akasiya cadidi, bzimbathandauza lini kuti iye wapambuka pa cikhulupiro. Koma iye ambalekerera kuti uxamwali bwace na Yahova butepe, ndipo na kupita kwa nthawe iye ambabuluza. w18.11 10-11 ¶5-6

Kodi mungafune thandizo kuti mutumikire Yahova mwakukwanira? Penu bziri tenepo, pinango mungafunikire kuyenda ku Xikola ya Apalizi wa Umambo. Xikolayi imbapfunzisa abale na mpfumakazi wakukhwima mwauzimu omwe ankucita kale utumiki bwa nthawe zense na cakulinga cakuti acite bzizinji mu gulu la Yahova. Ndipo omwe ambayenda ku xikolayi ambafunika kukonzeka kukatumikira ku mbuto iri-yense komwe angatumizidwe. Kodi imwepo muna cakulinga cakuyendambo ku xikolayi? Mukacita bzimwebzi, mun’dzakwanisa kucita bzizinji m’gulu la Yahova. (1 Wak. 9:23) Pakuti ifepano ndife atumiki wa Yahova, timbapfunzisidwa kukhala wakupasa, wakudeka mtima na wa lufoyi, ndipo nsiku zense timbakumbukirambo bzakusaya bza winango. Ndipopa timbakhala wakukondwa na wa mtendere. (Wag. 5:22, 23) Tenepo, bziribe basa bzomwe munkugumana nabzo pa moyo wanu, imwepo mun’dzakhala wakukondwa mukatewezera khalidwe la Yahova la kupasa na kukhala m’thimu la anyabasa anzace wakufunidwa!—Mim. 3:9, 10. w18.08 26 ¶16-18

Wanthu winango angabzibvunze kuti, ‘Kodi ni thangwe liponi lakubveka lomwe lingacitise Mkristau kulambana na mwamuna ayai mkazi wace acikhala na ufulu bwa kulowola ayai kulowodwa pomwe?’ Kumbukirani bzomwe Jezu adalewa. Iye adati: ‘Ule omwe anilamba mkazace acilowola mkazi munango wacita upombo mwakuphonyera mkazaceyo, ndipo penu mkazi pambuyo pa kulamba mwamuna wace walowodwa na mwamuna munango, iye wacita upombo.’ (Mar. 10:11, 12; Lu. 16:18) Mafalaya yankulatiza kuti Jezu akhalemekeza malowozi, ndipo iye akhafuna kuti winango acitembo bzibodzi-bodzibzo. Tenepo, penu mwamuna adalamba mkazace wakukhulupirika acilowola mkazi munango, ankucita upombo. Mpsibodzi-bodzimbo na mkazi omwe adalamba bayace wakukhulupirika. Bzimwebzi mpsakubveka thangwe kulambana pakokha kumbamalisa lini malowozi. Ndipo Mulungu ambapitiriza kuwona banjalo kukhala ‘thupi libodzi.’ Jezu adalewambo kuti penu mwamuna walamba mkazace napo alibe kuphonya, mkaziyo angakhale pa ngozi yakucita upombo. Kodi bzimwebzi bzingadacitika tani? Mu nthawe imweyire, mkazi wakulambidwa akhalowodwa pomwe thangwe ra bzakusaya bzakuthupi. Tsono malowozi yamweya yakhawonedwa ninga upombo. w18.12 11 ¶8-9

Habakuki adakhala na mtendere wa mu mtima pomwe adaceza na Yahova. Bzimwebzi bzidamucitisa kuti adikhire Yahova kuti amalise bvuto lace. Habakuki adalewa mwakubwereza-bwereza bza citsimikizo cace kuti: ‘Ndikudikhirira na mtima wense nsiku ya matsautso yangu.’ (Hab. 3:16) Kodi tingapfunze ciyani na ciratizo ca Habakuki? Cakuyamba, tin’funika lini kuleka kupemba kwa Yahova, bziribe basa mabvuto yomwe tinkugumana nayo. Caciwiri, tin’funika kumbatetekera bzomwe Yahova ambatiuza mwakuphatisa basa Bibliya pabodzi na gulu lace. Ndipo cacitatu, tin’funika kudikhirira Yahova kuti amalise mabvuto yathu na kukhulupira kuti iye an’dzamalisa kusunama kwathu pa nthawe yakuthemera. Tenepo, tikatewezera Habakuki, tin’dzakhala na mtendere wa mu mtima ndipo tin’dzakwanisa kupirira mabvutoyo. Ndipo cidikhiro cathu cin’dzatithandiza kupirira na kukhala wakukondwa, bziribe basa mabvuto yomwe tinkugumana nayo. Ndipo tinkupenukira lini kuti Baba wathu wa kudzulu an’dzacita ciri-cense kuti atithandize.—War. 12:12. w18.11 18 ¶11-12

Kodi Yahova ambaiwona tani nkhani ya kukhukhumudwisa winango? Jezu adalewa kuti: ‘Omwe an’khukhumudwisa m’bodzi pa ang’ono omwe ana cikhulupirowa, bzingakhale bwino kuti iye amangiriridwe m’khosi mwace mwala wakupeyera, ninga omwe umbazungulirisidwa na bulu ule, acikathusidwa m’nyanza.’ (Mar. 9:42) Mafalaya njamphanvu kwene-kwene! Ndipo ifepano timbadziwa kuti Jezu ana makhalidwe yakundendemerana na Baba wace. Tenepo tinkupenukira lini kuti Yahova ambakomedwa lini na munthu omwe ambakhukhumudwisa anyakupfunza wa Jezu. (Ju. 14:9) Kodi ifepano timbawona kukhukhumudwisa winango ninga momwe Yahova na Jezu ambawonera? Kodi bzomwe timbacita bzimbalatiza ciyani pa nkhani imweyi? Mwa ciratizo, pinango ifepano tina mtundu winango wa kabvalidwe na kubzidekesa komwe timbafuna kwene-kwene. Tsono n’ciyani comwe tingacite penu abale winango m’gwere akukomedwa lini na bzakusankhula bzathu ayai bzikuwacitisa kukhala na makumbukidwe ya unzazi? Kodi tingacite ciyani penu timbafuna abale wathuwo? w18.11 29 ¶9-10

Thangwe ranyi tensenefe tin’funika kukhala wakukhulupirika? Tin’funika kukhala wakukhulupirika thangwe Sathani ambatsutsa Yahova pabodzi na ifepano. Anjo wakupandukayu adanyoza dzina la Mulungu mwa kulewa kuti Mulunguyo ngwakuipa, ngwadyera, ngwakusaya kukhulupirika ndipo ni Mtongi lini wabwino. Mpsakupasa nsisi kuti Adamu na Eva adaphatana na Sathani acipandukira Yahova. (Ciy. 3:1-6) Moyo omwe iwo akhanawo mu zunde la Edeni ukhawapasa mipata mizinji yakulimbisira lufoyi lawo kwa Yahova. Koma pomwe iwo adayezedwa na Sathani, lufoyi lawo liribe kukhalisa ayai kuyenda patali. Pinango mungabzibvunze kuti: Kodi bzingakwanisike munthu ali-wense kupitiriza kukhala wakukhulupirika kwa Yahova thangwe ra kumufuna? Ayai, kodi wanthu angalatize tani kukhulupirika? Mbvunzoyu unkutikumbusa bzomwe bzidacitika na Djobi. (Djobi 1:8-11) Ninga ifepano, iye akhali munthu wakuperewera. Nthawe zinango iye akhacitambo bzinthu bzakuphonyeka. Napo bzikhali tenepo, Yahova adapitiriza kumufuna thangwe ra kukhulupirika kwace. w19.02 3-4 ¶6-7

Jezu adafotokoza bza there lakulewa bza nyamalonda omwe akhalinga kugumana minyala yabwino kwene-kwene. Pomwe nyamalondayo adagumana ubodzi omwe ukhali wakufunika kwene-kwene, mwakusaya kucedwa iye adagulisa bzinthu bzense bzomwe akhanabzo acikagula mwalayo. Mwalayo umbaimira cadidi cakulewa bza Umambo bwa Mulungu. Mwa njira imweyi, Jezu adalatiza momwe wanthu omwe ambafufudza cadidico ambawonera kufunika kwace. (Mat. 13:45, 46) Tenepo, pomwe tidapfunza cadidi cakulewa bza Umambo bwa Mulungu pabodzi na cadidi cinango cakufunika comwe ciri m’Bibliya, tidacita ciri-cense kuti ticigumane. Ndipo tikapitiriza kumbawona cadidico kukhala cakufunika, tin’dzacisiya lini. (Mim. 23:23) Koma mpsakupasa nsisi kuti atumiki winango wa Mulungu adaleka kumbawona cadidici kukhala cakufunika ndipo adacisiya. Ifepano tin’funika lini kucitambo bzimwebzi! Tin’funika kuteweza malango ya m’Bibliya yomwe yambati: ‘Fambani m’cadidi.’ (3 Ju. 2-4) Bzimwebzi bzinkuthandauza kuti tin’funika kuikha cadidico pa mbuto yakuyamba ndipo tingalatize bzimwebzi na momwe timbacitira bzinthu pa moyo wathu. w18.11 10 ¶3

Ajirayeri akhafunika lini kumenyana na Jeriko. M’mbuto mwace, iwo akhafunika kuzungulira mzindayo kabodzi pa nsiku mpaka nsiku zitanthatu ndipo pa nsiku yacinomwe iwo akhafunika kuzungulira kanomwe. Pinango acikundawo adakumbuka kuti, ‘Bzimwebzi bzin’ticitisa kumala mphanvu na nthawe yathu papezi!’ Koma Yahova Mtsogoleri wa Ajirayeri akhadziwa bzomwe iye akhacita. Kuteweza malangoyo kudacitisa kuti cikhulupiro ca Ajirayeri cikhale cakulimba, ndipo iwo alibe kumenyana na acikunda wa Jeriko. (Djos. 6:2-5) Kodi tinkupfunza ciyani na cakucitikaci? Tikupfunza kuti nthawe zinango, gulu la Yahova limbacita bzinthu mu njira inango yatsapano, ndipo pinango tingabvesese lini thangwe race. Mwa ciratizo, tikhakwanisa lini kuwona kuti kungakhale kwakuthandiza kuphatisa basa mtedwe wa m’manja ayai mtcini winango wa nzeru, pa pfunziro la patekha, mu utumiki bwakumunda na pa mitsonkhano yathu. Koma tsapano timbakwanisa kuwona phindu lakuphatisira basa bzinthu bzimwebzi. Ndipo tikambawona bzakutewera bzabwino thangwe ra kucinjaku, cikhulupiro cathu cimbalimba ndipo timbakhala wakuphatana kwene-kwene na abale wathu. w18.10 18 ¶8-9

Bzomwe wanthu na anyakupfunza wa Jezu akhadikhirira kuti Mesiya angadadzacita, bzidacitisa wanthu wa ku Galileya kufuna kuti Jezu akhale mambo wawo. Pinango iwo akhakumbuka kuti iye angadakhala mtsogoleri wabwino thangwe akhadziwa kulewalewa na wanthu, akhapoza atenda ndipo akhadyesa mwakudabwisa wanthu omwe akhana njala. Mwa ciratizo, iye adadyesa mwakudabwisa wanthu wakukwana 5.000 ndipo bzimwebzi bzidadabwisa kwene-kwene wanthuwo. Tsono, Jezu akhadziwa bzomwe wanthu wale akhafuna kucita naye, ndipo Bibliya limbalewa bzomwe iye adacita. Iro limbati: ‘Jezu pakudziwa kuti iwo akhabwera kuti adzamukhazike mambo, iye adacoka, aciyenda pomwe yekha ku phiri.’ (Ju. 6:10-15) Pomwe wanthu wale adayenda pomwe kwa iye mangwana yace, Jezu adawauza kuti iye alibe kubwera pansi pano kuti adzawathandize pa bzakusaya bzawo bzakuthupi, koma kudzawapfunzisa bza Umambo bwa Mulungu. Iye adati: ‘Lekani kuphatira basa cakudya comwe cin’mala, koma phatirani basa cakudya comwe cin’khala ciripo mpaka ku moyo wa muyaya.’—Ju. 6:25-27. w18.06 4 ¶4-5

Jezu akhabvesesa makumbukidwe ya wale omwe akhali wakusunama na wakutepa omwe akhali ninga ‘wakutcoka’ ayai ‘mbvuniko wakuthima,’ tenepo iye adawadekera mtima na kuwabvera nsisi. Napo wana akhafunisisa kukhala na Jezu. (Mar. 10:14) Kulewa cadidi, ifepano tingakwanise lini kubvesesa ayai kucita bzinthu na wanthu ninga momwe Jezu adacitira! Koma tingalatize kuti timbakumbukira wanthu omwe timbawapalizira mwa kalewelewedwe kathu, nthawe yomwe timbawazungira na nthawe yomwe timbamala tikulewalewa nawo. Wanthu bzulu na bzulu nsiku zino ‘mbakunyuka-nyuka na wakumwazika’ thangwe ra maboma na anyakucita malonda yacinyengo, nkhani za ndale pabodzi na atsogoleri wa bzipembedzo bza m’dzikoli. (Mat. 9:36) Ninga bzakutewera bzace, wanthu azinji ambakhulupira lini munthu ali-wense ndipo alibe cidikhiro ciri-cense pakulewa bza tsogolo. Ndipopa mafala yathu yomwe tingayaphatise basa kuti tilewelewe nawo yan’funika kulatiza kuti timbawadekera mtima nakuti timbawakumbukira! Wanthu azinji ambabvuma kubva mafala yathu sikuti kokha thangwe timbaphatisa basa bwino Bibliya, koma thangwe linango ndakuti timbalatiza kuti timbawakumbukira na kuwalemekeza. w18.09 31¶13-14

Kodi tingalatize tani kuti tinkuzindikira bzakusaya bzathu bzauzimu? Kupfunza Bibliya, kubvera Mulungu na kuikha kunamata kwathu Yahova pa m’mbuto yakuyamba pa moyo wathu. Kucita bzimwebzi kun’dzatithandiza kukhala wakukondwa, ndipo cikhulupiro cathu pa mapiciro ya Yahova cin’dzalimba. Ndipo kukumbukira ‘cidikhiro cakukondwesa’ comwe timbacigumana m’Bibliya kun’dzatilimbisa kwene-kwene. (Tito 2:13) Tin’funika kupitiriza kulimbisa uxamwali bwathu na Yahova, kuti tikhale wakukondwa napo tigumane na mabvuto pa moyo wathu. Mpostolo Paulo adalewa kuti: ‘Mbakondwani nthawe zense mwa Mbuya. Ndin’bwerezera pomwe kukuuzani kuti: Mbakondwani!’ (Waf. 4:4) Kuti tikhale pauxamwali bwakulimba na Yahova, tin’funika kukhala na nzeru zakucokera kwa iye. (Mim. 3:13, 18) Kuti tikhale wakukondwa, tin’funika kupitiriza kuphatisa basa bzomwe timbapfunza m’Bibliya. Jezu adalewa kuti: ‘Mukadziwa bzinthu bzimwebzi, mun’dzakhala wakukondwa mukambabzicita.’ (Ju. 13:17; Tiy. 1:25) Kucita bzimwebzi kun’dzatithandiza kumalisa bzakusaya bzathu bzauzimu na kupitiriza kukhala wakukondwa. w18.09 16 ¶4-6

Epafrodito akhandokumbukira lini bza mabvuto yace yokha, iye akhawadziwa bwino abalewo, ndipo akhawacitira thupo. Ndipopa Paulo adalewa kuti akhali ‘kapolo mwanzace.’ (Fil. 23) Iye akhacita thupo na bzakusaya bza winango, ndipo akhacita ciri-cense kuti awathandize. Epafrodito akhambapembera abale wace, ndipo m’mipembomo iye akhaguma madzina yawo. Ifepano tingacitembo bzibodzi-bodzibzi. Mipembo ninga imweyi imbakhala yakufunika kwene-kwene. (2 Wak. 1:11; Tiy. 5:16) Mukanati kucita mpembo cakuyamba kumbukirani bza dzina la munthu omwe mun’funa kumuguma mu mpemboyo. Mwa ciratizo, mungagume m’mipembo yanu madzina ya abale wanu wa m’gwere ayai wakuthupi omwe ankulimbana na mabvuto yakusiyana-siyana pa moyo wawo. Pinango mungapemberembo wale omwe akufuna kucita cakusankhula cikulu ayai omwe ankugumana na mayezo. Mungapemberembo wale omwe adafedwa acibale wawo, omwe adapulumuka pa malengwa ya pansi ayai nkhondo na omwe ankugumana na bvuto la cuma. Bzimwebzi bzinkulatiza kuti pana abale azinji omwe an’funikira mipembo yathu, ndipo tikambawaguma m’mipembo yathuyo bzin’dzalatiza kuti timbakumbukira bzakusaya bza winango sikuti bzathu bzokha. w18.09 5 ¶12-13

Pomwe Paulo adalewa mafala ya Jezu yakuti ‘kupasa kumbabweresa cikondweso cikulu kuposa kutambira,’ iye akhandolewa lini bza kupasa munthu bzinthu bzakuthupi. Mwa ciratizo, tingalatize kuti ndife wakupasa mwa kulimbisa winango, kuwapasa malango kucokera m’Bibliya na kuwathandiza akafunikira thandizo. (Mab. 20:31-35) Ndipo mwa mafala na bzicito, Paulo adalatiza kufunika kwa kumbapasa wanthu nthawe, mphanvu pabodzi na lufoyi lathu. Adziwi omwe ambapfunza bza makhalidwe ya wanthu, adawona kuti kupasa kumbacitisa munthu kukhala wakukondwa. Ndipo mwakubverana na kafukufuku munango, wanthu adalewa kuti ambakhala wakukondwa kwene-kwene akacitira anzawo bzinthu bzabwino. Ndipo adziwiwo ambalewa kuti tikambathandiza winango, ifepano timbawona kuti moyo wathu una cakulinga na thandauzo. Ndipopa, adziwi winango ambauza wanthu kuti ambacite mabasa manango yakubzipereka kuti akhale na thanzi labwino na wakukondwa. Tsono bzomwe adziwiwa ambalewa bzimbatidabwisa lini, thangwe Mulengi wathu Yahova ambatiuza kale m’Bibliya kuti kupasa kumbaticitisa kukhala wakukondwa.—2 Tim. 3:16, 17. w18.08 20 ¶17-18

Pakulewa bza Jezu Kristu, Zaiya adalewa polofesiya inango yomwe imbatilimbisa na kutipasa cidikhiro. Iye adalewa kuti Jezu ‘an’dzatonga lini mwa kundowona na maso yace ndipo an’dzayeruza lini bzinthu mwa kundobva na makutu yace,’ koma iye ‘an’dzayeruza na cirungamo.’ (Zai. 11:3, 4) N’thangwe ranyi mafalaya njakulimbisa? Ni thangwe rakuti ifepano tinkukhala m’dziko la tsankhulo ndipo wanthu ambayeruza anzawo na bzomwe ambawona na maso. Kulewa cadidi, ifepano tin’funa kukhala na muyeruzi wa cirungamo, Jezu, omwe an’dzatiyeruza lini kokha mwakuwona mawonekedwe yathu. Nsiku zense ifepano timbalewa bza anzathu. Tsono mwakusiyana na Jezu omwe akhali wakulungamiratu, ifepano ndife wakuperewera ndipo nthawe zinango bzakulewa bzathu bzimbakhala bzakuphonyeka, thangwe kawiri-kawiri timbalewa bzinthu mwa kundowona na maso. Ndipopa Jezu adacenjeza kuti tileke kuyeruza ‘mwakuwona mawonekedwe yakunja’ koma timbayeruze ‘mwa cirungamo.’ Jezu ambafuna kuti timutewezere mwa kuleka kumbayeruza anzathu thangwe ra mawonekedwe yawo. w18.08 9 ¶1-2

Ifepano timbabva lini Yahova ankulewalewa kucokera kudzulu ninga momwe akhacitira kale-kale. Napo bziri tenepo, ifepano timbabva Yahova ankulewalewa kucokera m’Fala lace Bibliya, bukhu lomwe ambaliphatisa basa kuti atipase malango. Kuthumizira bzimwebzi, mzimu wa Yahova umbathandiza ‘nyakunyang’anira wakukhulupirika’ kuti apitirize kumbapereka cakudya cauzimu kwa atumiki wace. (Lu. 12:42) Ndipo nsiku zino, tina cakudya cizinji kwene-kwene cauzimu comwe timbatambira. Ndipo mafala ya Mulungu yomwe yali m’Bibliya, yambatitsimikizira kuti Yahova ambadziwa bzinthu bzense bzomwe bzinkucitika, nakuti an’dzapfudza bzinthu bzense bzakuipa bzomwe bzimbayambisidwa na Sathani pabodzi na dziko lakuipali. Tenepo, tin’funika kumbabvera na mtima wense bzomwe Yahova ambatiuza. Ndipo tikacita bzimwebzo, tin’dzakwanisa kupirira mabvuto yomwe tinkugumana nayo nsiku zino na yomwe yangabwere kutsogolo. Bibliya limbatikumbusa kuti: ‘Mun’funika kupirira, ndipo mukacita kufuna kwa Mulungu, mun’dzatambira bzomwe iye adapicira.’—Waheb. 10:36. w19.03 13 ¶17-18

Mozeji adatsogolera Ajirayeri kwa magole mazinji, koma tsapano Djosuwe ndiye omwe angadawatsogolera. Tenepo, pinango Djosuwe akhana thupo lakuti wanthuwo angadamubvuma lini ninga mtsogoleri wawo. (Bzak. 34:8, 10-12) Ndipo pakufotokoza bza Cinembo ca Djosuwe 1:1, 2, bukhu linango lakulewa bza Bibliya limbafotokoza kuti: “Kuyambira kale-kale mpaka nsiku zino, nthawe yomwe imbakhala yakunesa kwene-kwene kwa wanthu, ni pomwe mtsogoleri mupsa ambapita m’mbuto mwa munango.” Djosuwe akhana thangwe lakubveka lakucitira thupo. Koma iye adakhulupira Yahova na kuteweza malango yace mwakamfulumize. (Djos. 1:9-11) Tenepo, Mulungu adasimba Djosuweyo thangwe ra kukhulupirika kwace ndipo adaphatisa basa anjo kuti atsogolere iye pabodzi na Ajirayeri. Ndipo bzinkuwoneka kuti anjoyo akhali Mwana wakuyamba kubadwa wa Mulungu, omwe m’Bibliya ambacemeredwa Fala. (Kuf. 23:20-23; Ju. 1:1) Yahova adathandiza mtundu wa Jirayeri kuti ubvume Djosuwe ninga mtsogoleri wawo mupsa. w18.10 16-17 ¶1-4

Yahova ambadziwa wale omwe ambamutumikira na mtima wense, ndipo iye ambanemba madzina yawo mu ‘bukhu la cikumbuso.’ Pana bzinthu bzinango bzomwe tin’funika kucita, penu tin’funa kuti Yahova anembe dzina lathu mu ‘bukhu [lace] la cikumbuso.’ Ndipo pakulewa bza bzinthu bzimwebzi, Malakiya adalewa kuti tin’funika kumbagopa Yahova na kumbakumbukira bza dzina lace. Tsono tikasaya kucita bzimwebzi, ticiyamba kunamata munthu ayai cinthu cinango m’mbuto mwa kunamata Yahova yekha, iye an’dzapfudza dzina lathu m’bukhu lacero. (Kuf. 32:33; Psal. 69:28) Bzimwebzi bzinkulatiziratu padeca kuti kubzipereka kumbaphatanidza bzizinji, kuposa kundopicira kuti tin’dzacita kufuna kwa Yahova, ticibatizidwa. Ndipo bzimwebzi ni bzinthu bzomwe bzimbacitidwa kabodzi kokha, tsono kucita kufuna kwa Yahova, n’cinthu comwe timbacita pa moyo wathu wense. Ndipopa, nsiku zense bzicito bzathu bzin’funika kumbalatiza kuti timbabvera Yahova, nakuti tin’dzapitiriza kumubvera pa moyo wathu wense.—1 Pe. 4:1, 2. w18.07 23 ¶7-9

Tensenefe tin’funika kucita nyongo ‘yakukhala wakukhwima mwauzimu,’ m’mbuto mwakumbandokomedwa na ‘cipfunziso cakuyambirira cakulewa bza Kristu.’ (Waheb. 6:1) Kukhala wakukhwima mwauzimu kumbathemba lini magole yomwe munthu wakhala m’cadidi, koma nyongo yomwe iye ambacita. Tenepo, tin’funika kucita nyongo yakuthumizira cidziwiso cathu na kumbabvesesa nfundo za m’Bibliya. Ndipopa tin’funika kumbawerenga Bibliya nsiku zense. (Psal. 1:1-3) Ndipo tikacita bzimwebzi, ifepano tin’dzakwanisa kubvesesa malamulo na mitemo ya Yahova. Kodi ndiponi lamulo lakufunika kwene-kwene kwa Akristau? Ni lamulo la lufoyi. Jezu adauza ateweri wace kuti: ‘Na bzimwebzo, wense an’dzadziwa kuti ndimwe anyakupfunza wangu, mukambafunana.’ (Ju. 13:35) Bibliya limbalewa kuti lufoyi ni khalidwe lakufunika kwene-kwene nakuti ‘cakutonga cimbakwanisidwa mu lufoyi.’ (Tiy. 2:8; War. 13:10) Ifepano timbadziwa kuti lufoyi ndakufunika thangwe Bibliya limbalewa kuti ‘Mulungu ni lufoyi.’—1 Ju. 4:8. w18.06 19 ¶14-15

Ajirayeri akhadapandukira Yahova, koma Mozeji adakalipa kwene-kwene ninga kuti iwo akhadapandukira iye. Iye alibe kubziphata ndipo bzimwebzi bzidamucitisa kuti alewelewe mwakusaya kukumbuka bwino. Mozeji adasiya kulinga thandizo la Yahova thangwe rakuti adalekerera kuti bzicito bza winango bzimuceukise. Pomwe Ajirayeri adamung’ung’udzira thangwe ra kusaya madzi ulendo bwakuyamba, Mozeji adacita bzinthu mwanzeru. (Kuf. 7:6) Tsono, pinango iye adadzaneta na Ajirayeri thangwe rakuti iwo akhambamupandukira kazinji kense. Ndipo pinango bzimwebzi bzidacitisa Mozeji kumbandokumbukira bza momwe iye akhabvera, mpaka kufika pakuyebwa kupasa mbiri Yahova. Penu Mozeji omwe akhali mpolofeta wakukhulupirika adaphonya, ndiye kuti ifepano bzingaticitikirembo mwakusaya kunesa. Mozeji akhadandosala pang’ono basi kuti apite m’dziko lakupiciridwa, ndipo ifembo tasala pang’ono kupita m’dziko lipsa. (2 Pe. 3:13) N’cadidi kuti ifepano tin’funa lini kuluza mwayi wakupita m’dziko lipsa, tsono kuti bzimwebzi bzikwanisike, tin’funika kupitiriza kunyang’ana kwa Yahova, ticimbamubvera nthawe zense.—1 Ju. 2:17. w18.07 12 ¶14-16

Sathani angakwanise lini kungingimiza wanthu kucita bzomwe iwo an’funa lini. (Tiy. 1:14) Wanthu azinji m’dzikoli ambadziwa lini kuti ali ku mbali ya Sathani. Tsono munthu akapfunza cadidi ca m’Bibliya, iye ambafunika kusankhula kukhala ku mbali ya Yahova ayai ya Sathani. (Mab. 3:17; 17:30) Tikatsimikiza mu mtima mwathu kukhala wakukhulupirika kwa Yahova, Sathani cipo acidzatitazisa kucita bzimwebzo. (Djobi 2:3; 27:5) Pana bzinthu bzinango bzomwe Sathani pabodzi na madimonyo yace angakwanise lini kucita. Mwa ciratizo, Bibliya limbalewa kuti ni Yahova yekha pabodzi na Jezu, omwe ambadziwa bzomwe bziri mu mtima mwathu na bzomwe timbakumbuka, sikuti Sathani na madimonyo yace. (1 Sam. 16:7; Mar. 2:8) Tenepo, tikambacita nyongo yakulewa na kucita bzomwe Yahova ambafuna, tingakhale na citsimikizo cense cakuti iye cipo acidzalekerera kuti Sathani atipweteke mu nsiku zakumalizira zino. (Psal. 34:7) N’cadidi kuti ifepano tin’funika kusamala na mapumpso ya Sathani, koma tin’funika lini kumbamugopa. Ndipo napo kuti ndife wakuperewera, na thandizo la Yahova ifepano tingakunde Sathani! Tikamutsutsa Sathani, iye an’dzatithawa.—Tiy. 4:7; 1 Pe. 5:9. w18.05 20 ¶15-17

Tindendemezere kuti imwepo mun’funa kuyenda ku mzinda munango wa kutali, kuti mukagumanike pa cakucitika cinango cakupambulika. Tsono kuti mucite ulendobo, mun’funika kupakira kanderendere. Tsono pomwe mukufika pakupakirira akanderenderepo, munkuwona akanderendere azinji. Imwepo mun’funika kuwonesesa kuti munkupakira kanderendere omwe mun’funayo, thangwe mukandopakira kanderendere ali-wense, imwepo mun’kafika lini komwe munkuyenda. Moyo uli ninga ulendo ndipo maswaka yali ninga wanthu omwe ali pa mbuto yakupakirira akanderendere. Nthawe zinango, tingagumane na bzinthu bzomwe bzingatinese kusankhula. Tsono mukakhala munkudziwa kale komwe mun’funa kuyenda ayai bzomwe mun’funa kudzacita pa moyo wanu, bzin’dzapusa kuti mucite bzakusankhula bzabwino. Kodi mu’dzacita cakusankhula comwe cimbakondwersa Yahova? Kucita bzimwebzi kumbaphatanidza kuteweza malango ya Yahova ninga kucita mapfunziro ya padzulu, basa lomwe mungaphate pabodzi na nkhani ya kulowola ayai kulowodwa na kukhala na wana. Ndipo bzinkuphatanidzambo kucita nyongo yakukwanirisa bzakulinga bzauzimu. Maswaka, mukapitiriza kumbaikha kutumikira Yahova pa mbuto yakuyamba, mungakhale na citsimikizo cakuti iye an’dzakusimbani na kukuthandizani kuti bzinthu bzikufambireni bwino. w18.04 27 ¶1-3

Djafeti adateweza bzomwe akhadalumbira ndipo mwana wace wacikazi adayenda ku tendi la mkonkhano kuti akatumikire Yahova kwa moyo wace wense. (Way. 11:30-35) Kuteweza lumbiroli cikhali cinthu cakunesa kwene-kwene kwa Djafeti, tsono kwa mwana waceyo, ndico cikhali cinthu cakunesaratu kuposa pamwepo. Koma iye adacita bzomwe baba wace akhadalumbira. (Way. 11:36, 37) Bzimwebzi bzinkuthandauza kuti iye angadalowodwa lini ne kukhala na wana ndipo dzinza la Djafeti lingadamaliratu. Tenepo, mwana wa Djafetiyo akhafunikira mtsangalazo na cirimbiso cikulu kwene-kwene. Bibliya limbalewa kuti: ‘Mu Jirayeri mudadzakhala na cizolowezi cakuti, gole liri-lense, atsikana wa ku Jirayeri akhayenda kukazungira mwana wa Djafeti, Mgileyade kanai kense pa gole, acikambamusimba.’ (Way. 11:39, 40) Ciratizo ca mwana wacikazi wa Djafeti, cimbatikumbusa bza Akristau wa nsiku zathu zino, omwe ambalowola lini ayai kulowodwa kuti acite bzizinji pakutumikira Yahova. Kodi mpsakufunika lini kuwatsangalaza na kuwalimbisa abalewa?—1 Wak. 7:32-35. w18.04 17 ¶10-11

Wanjo azinji adaphatana na Sathani pa kupandukira Mulungu. Ndipo Cigumula ca Madzi cinati kucitika, Sathani adapumpsa winango mwa wanjo amwewa kuti adzagonane na akazi pansi pano. Pakufotokoza bza cakucitika cimweci, Bibliya limbalewa mwakundendemezera kuti cinyoka cidakokolola gawo libodzi pa magawo matatu ya nyenyezi zakudzulu. (Ciy. 6:1-4; Cibv. 12:3, 4) Pomwe wanjowa adasiya kucita mbali ya banja la Mulungu, iwo adasankhula Sathani ninga mtongi wawo. Tsono, comwe tin’funika kudziwa n’cakuti wanjo wakupandukawa ambacita mbali ya thimu lomwe ndakulinganizika bwino. Sathani adakhazikisambo boma lace mwakutewezera Umambo bwa Mulungu. Iye adabziikha mambo ndipo adalinganiza madimonyo yense, aciwapasa mphanvu kuti ambatonge dzikoli. (Wayef. 6:12) Sathani ambaphatisa basa thimu laceri kuti atsogolere maboma yense ya wanthu. w18.05 15 ¶5, 6

Nthawe zinango Mulungu ambalatiza lufoyi lace kwa ifepano mwa kutilanga bzikafunika, ninga momwe baba wa lufoyi ambacitira. Davide adakumbukira makumbukidwe ya Mulungu ndipo adayaphatisa basa pa moyo wace. Iye adabvuma kuti makumbukidwe ya Mulungu yamuumbe, ayai adacinja kuti akhale munthu wabwino. Mukacitambo bzimwebzi, lufoyi lanu pabodzi na cikhumbo canu cakufuna kukondwesa Mulungu bzin’dzathumizirika, ndipo mun’dzakula mwauzimu. Mpfumakazi inango idalewa kuti ikambafufudza na kukumbukira bzomwe imbawerenga, imbawona ninga kuti Yahova adanembera iye mafalayo! Mukakhala na makumbukidwe yauzimu, imwepo mun’dzakwanisa kuwona dzikoli pabodzi na tsogolo lace ninga momwe Mulungu ambaliwonera. Yahova ambakupasani cidziwiso na kubvesesa bzinthu mwakudabwisa kwene-kwene. N’thangwe ranyi iye ambacita tenepo? Thangwe ndakuti iye ambafuna kuti mudziwe cinthu comwe n’cakufunika pa moyo, mumbacite bzakusankhula bzabwino na kuwona tsogolo lanu mwakusaya kucita mantha!—Zai. 26:3. w18.12 23 ¶9-10