Novembro

Tikambatumikira Yahova, iye an’dzatisimba mwa kutipasa bzinthu bzense bzomwe Adamu na Eva adaluza, kuphatanidzambo mwayi wakukhala na moyo kwa muyaya. Adamu na Eva adasankhula kusiya kutumikira Yahova thangwe adatazira kukulisa lufoyi lawo kwa iye. Napo bzikhali tenepo, Yahova adawalekerera kuti akhale na nthawe yakukwanira kuti abereke wana acikhazikisa wokha mitemo ya momwe angalerere wanawo. Bzakutewera bzomwe Adamu na Eva adagumana nabzo thangwe ra kufuna kubzisankhulira wokha bzakucita, bzidalatiza kuti iwo akhali apsiru. Mwa ciratizo, mwana wawo wakuyamba adapha m’bale wace thangwe ra njiru, ndipo na kupita kwa nthawe ciwembo na dyera bzidadzala pa dziko lense la pansi. (Ciy. 4:8; 6:11-13) Napo papita nthawe izinji bzimwebzi bzinkucitika, Yahova adalinganiza kale njira yakupulumusira wana wense wa Adamu na Eva omwe an’funa kumutumikira. (Ju. 6:38-40, 57) Tenepo, mukapfunza momwe Yahova aliri wakupirira na walufoyi, lufoyi lanu kwa iye lin’dzathumizirika. Mun’dzatcenkha kutewezera njira yomwe Adamu na Eva adasankhula ndipo mun’dzabzipereka kwa Yahova. w19.03 2 ¶3; 4 ¶9

Tensenefe tin’funika kukulisa khalidweri mwa kubvesesa mabvuto yomwe wanthu wa m’banja mwathu na abale wathu wa m’gwere ankugumana nayo. Ndipo timbalatize thupo kwa maswaka ya m’gwere, omwe ankuduwala, acikulire na omwe afedwa acibale wawo. Mukambaceza nawo mbawabvunzani kuti mudziwe bzomwe akucita kuti amalise bvuto lawo. Ndipo akambafotokoza momwe ankubvera mbawatetekerani mwatceru. Mbalatizani kuti munkubvesesa bvuto lawo. Ndipo mbakhalani wakukonzeka kuwathandiza bzomwe mungakwanise. Tikacita bzimwebzi, tin’dzalatiza kuti tina lufoyi lacadidi. (1 Ju. 3:18) Thangwe ranyi tin’funika kumbaphatisa basa njira zakusiyana-siyana tikambathandiza winango? Thangwe ndakuti munthu ali-wense ambawona mabvuto mwakusiyana-siyana. Mwa ciratizo, wanthu winango ambaneseka lini kufotokozera winango mabvuto yawo, pomwe winango ambafuna lini kuti munthu munango ayadziwe. Tsono tikafuna kuwathandiza, tin’funika lini kuwabvunza mibvunzo yomwe ingawapasise manyazi. (1 Wat. 4:11) Napo winango angakhale wakutsudzuka kutiuza momwe akubvera, ni nthawe lini zense tingabverane na bzomwe iwo angalewe. Tenepo, tin’funika kuzindikira kuti bzomwe angalewe ni momwe iwo akubvera. Ndipo tin’funika kufulumiza kubva na kucedwa kulewalewa.—Mat. 7:1; Tiy. 1:19. w19.03 19 ¶18-19

Kodi imwepo mumbacita mantha kulewalewa bza cadidi ca m’Bibliya pa thimu la wanthu? Kumbukirani bza Nehemiya. Iye adatumikira m’nyumba ya mphala ya mambo. Pomwe Nehemiya adabva kuti litsito la mzinda wa Jeruzalemu likhadadzongeka adasunama kwene-kwene. (Neh. 1:1-4) Kodi munkukumbukira thupo na mantha yomwe Nehemiya adakhala nayo pomwe mambo adamubvunza kuti amuuze thangwe ranyi akhadasunama? Nehemiya akanati kupereka mtawiro, cakuyamba adapemba kwa Yahova. Ninga bzakutewera bzace, mambo adacita bzinthu bzizinji kuti athandize wanthu wa Mulungu. (Neh. 2:1-8) Ciratizo caciwiri, n’ca Djona. Pomwe Yahova adamuuza kuti ayende kukauza mafala ya ciyeruzo wanthu wa m’mzinda wa Ninive, Djona adacita mantha ndipo adathawira ku mzinda munango. (Djona 1:1-3) Koma na thandizo la Yahova, Djona adadzayenda kukapalizira wanthu wa ku Ninive. Ndipo mafala yomwe iye adauza wanthuwo yadawatokonya kwene-kwene. (Djona 3:5-10) Na ciratizo ca Nehemiya, tikupfunza kuti tin’funika kumbapemba tinati kupereka mtawiro. Ndipo na ciratizo ca Djona, tikupfunza kuti Yahova angatithandize kuti timutumikire napo tikagumana na bzinthu bzakupasa mantha. w19.01 11 ¶12

Tikayamba kuphatisa basa bzomwe timbapfunza m’Bibliya, mbverano wathu na axamwali pabodzi na acibale wathu ungacinje. Jezu adatithandiza kubvesesa thangwe lomwe adapembera anyakupfunza wace. Iye adati: ‘Aceneseni na cadidi; fala lanu ni cadidi.’ (Ju. 17:17) Fala lakuti ‘kucenesa’ lingathandauzembo ‘kupambula.’ Tenepo tikayamba kuphatisa basa cadidi pa moyo wathu, tin’funika kumbatalikirana na dziko thangwe ifepano timbateweza mitemo ya m’Bibliya. Napo ticite nyongo yakukhala pa mbverano wabwino na axamwali pabodzi na acibale wathu, winango angafune lini kucita nafe bzinthu ninga momwe akhacitira tinati kupfunza cadidi ndipo angatsutse bzomwe timbakhulupira. Bzimwebzi bzimbatidabwisa lini. Jezu adalewa kuti: ‘Kulewa cadidi, anyamadulanthaka wa munthu, an’dzakhala wanthu wa m’banja lace cairo.’ (Mat. 10:36) Tsono Jezu adalewa pomwe kuti bziribe basa bzinthu bzomwe tingasiye kuti tipfunze cadidi, kutsogolo tin’dzatambira bzinthu bzizinji! w18.11 6 ¶11

Mpostolo Paulo akhatenda abale pabodzi mpfumakazi ndipo akhacita bzimwebzo na momwe iye akhalewera bza iwo. Nthawe zense iye akhambatenda Mulungu thangwe ra kumupasa abalewo ndipo iye akhacita bzimwebzi m’mipembo yomwe akhaicita payekha. Ndipo njira inango yomwe iye adaphatisa basa yakulatiza kuti akhawafuna ni kuwanembera matsamba. Mwa ciratizo, kuyambira vesi yakutoma mpaka vesi 15 ya Waroma kapitulo 16, Paulo adaguma madzina ya Akristau anzace wakukwana 27. Iye adakumbukira kwene-kwene bza Priska na Akila pakuti ‘adaikha moyo wawo pa ngozi’ thangwe ra iye, ndipo adafotokozambo bza Febe kuti akhali ‘mkhotco wa wanthu azinji,’ kuphatanidzambo iye kubodzi. Paulo adatenda kwene-kwene abale na mpfumakazi zomwe zikhaphata basa na nyongo. (War. 16:1-15) Paulo akhadziwa kuti abale pabodzi na mpfumakazi zire zikhali zakuperewera, ndipo mu tsamba lace lomwe adanembera abale wa ku Roma, iye adandofotokoza bza makhalidwe yawo yabwino. Ndokumbukirani momwe abalewo adalimbisidwira pomwe adabva mafala yakutenda yomwe Paulo adawanembera yankuwerengedwa mwakukuwa m’gwere! Ninga bzakuteweza bzace, mbverano wa abalewo na Paulo udakhala wamphanvu kwene-kwene. Kodi imwepo mumbatenda abale wanu wa m’gwere akalewa na kucita bzinthu bzabwino? w19.02 16 ¶8, 9

Kodi bzimwebzi bzinkuthandauza kuti tin’funika kukhala wakulungamiratu kuti tikhale wakukhulupirika? N’cadidi kuti tensenefe ndife wakuperewera. Tsono, tin’funika kudziwa kuti Yahova ambandokumbukira lini bza kuphonya bzathu. Bibliya limbatiuza kuti: ‘Imwe Yah, bzingadakhala kuti mumbanyang’anisa bzakuphonya bzathu, mbani omwe angadaima pa maso panu, Imwe  Yahova?’ (Psal. 130:3) Iye ambadziwa kuti ifepano ndife wakuperewera, anyapikado, ndipo ambatilekerera na mtima wense. (Psal. 86:5) Yahova ambadziwa malire yathu, ndipo iye ambadikhira lini kuti ticite bzinthu bzomwe tingakwanise lini kucita. (Psal. 103:12-14) Comwe cimbathandiza atumiki wa Yahova kukhala wakukhulupirika ni lufoyi. Lufoyi lathu kwa Mulungu, kunamata kwathu komwe timbacita kwa Baba wathu wa kudzulu, kumbaticitisa kupitiriza kumukhulupira na mtima wense. Ndipo tikakhala na lufoyi ninga limweri napo tikagumana na mayezo lin’dzaticitisa kukhala wakukhulupirika. (1 Nkha. 28:9; Mat. 22:37) Ife timbadziwa mitemo yakulungama ya Yahova, ndipo timbafunisisa kukondwesa Baba wathu wakudzulu. Ndipo lufoyi lomwe tinalo kwa iye limbaticitisa kukumbukira bza iye tikanati kucita cakusankhula. Mwa njira imweyi, tindzalatiza kuti ndife wakukhulupirika. w19.02 3 ¶4, 5

Cikhulupiro cathu cimbakhala camphanvu tikambawona phindu lomwe limbabwera thangwe ra kucita bzabwino. (Tiy. 1:2, 3) Timbadekedwa kwene-kwene tikadziwa kuti Yahova ambakomedwa kuticemera wana wace, ndipo cikhumbo cathu cakufuna kucita kufuna kwace cimbathumizirika. (Mim. 27:11) Tenepo, mayezo yali-yense yomwe timbagumana nayo yambatipasa mpata wa kulatiza kuti timbatumikira baba wathu wa lufoyi na mtima wense. Ndipo timbalatiza kuti ndife wakukonzeka kubvera malamulo yace na kucita kufuna kwace. (1 Wam. 8:61) Pakuti ndife wakuperewera, nthawe zinango tingacite pikado. Ndipo bzimwebzi bzikacitika tin’funika lini kutaya mtima, koma tikumbukire ciratizo ca Mambo Ezekiya. Iye adacita pikado, tsono adakungula ndipo adadzatumikira Yahova na ‘mtima wense.’ (Zai. 38:3-6; 2 Nkha. 29:1, 2; 32:25, 26) Tenepo, tin’funika lini kubvuma kuti Sathani atipumpse na makumbukidwe yace. Koma bwerani timbapembe kuti tikulise ‘mtima wakubvera’ na kupitiriza kukhala wakukhulupirika kwa Yahova.—1 Wam. 3:9; Psal. 139:23, 24. w19.01 19 ¶17, 18

Kupereka mitawiro pa mitsonkhano kumbakhala na phindu kwa nyakuperekayo. (Zai. 48:17) Mwanjira iponi? Cakuyamba, tikakhala na cakulinga cakumbapereka mitawiro pa mitsonkhano, timbafunika kuikonzekera bwino. Tikambakonzekera bwino, timbakwanisa kubvesesa Fala la Mulungu. Ndipo tikabvesesa, bzimbakhala bzakusaya kunesa kuphatisa basa bzomwe tapfunzabzo. Caciwiri, timbakomedwa kwene-kwene na mitsonkhano thangwe timbatengambo mbali pa mitsonkhanoyo. Cacitatu, pakuti pambafunika nyongo kuti timbapereke mitawiro, tenepo, pambuyo pa mitsonkhano timbakumbukira nfundo zomwe tazipereka pa mitsonkhanoyo. Timbakondwesambo Yahova tikambafokoza bza cikhulupiro cathu pa mitsonkhano. Tinkupenukira lini kuti Yahova ambatibva ndipo ambatenda kwene-kwene nyongo yomwe timbacita yakupereka mitawiro pa mitsonkhano. (Malak. 3:16) Iye ambatitenda ndipo ambatisimba tikacita nyongo yakumukondwesa. (Malak. 3:10) Kulewa cadidi, ifepano tina mathangwe yakubveka yomwe yambaticitisa kupereka mitawiro pa mitsonkhano. w19.01 8 ¶3; 9-10 ¶7, 9

Yahova ambacita nafe bzinthu mwanzeru kwene-kwene. M’mbuto mwa kutipasa malamulo mazinji, iye mwakudeka mtima ambatipfunzisa kuti timbamubvere mwa lufoyi. Iye ambatipfunzisa kuti timbaphatise basa mitemo yace pa moyo wathu na kuwenga bzomwe mpsakuipa. Pa Nkhani ya pa Phiri, Mwana wace, Jezu, adatithandiza kubvesesa thangwe lomwe limbacitisa wanthu kucita bzinthu bzakuipa. (Mat. 5:27, 28) Ndipo mu dziko lipsa, Jezu ninga Mambo wa Umambo bwa Mulungu, an’dzapitiriza kutipfunzisa kuti tidzakwanise kusiyanisa cabwino na cakuipa ninga momwe iye ambacitira. (Waheb. 1:9) Jezu an’dzacitisa pomwe kuti makumbukidwe pabodzi na thupi lathu bzidzakhale bzakulungamiratu. Tenepo kumbukirani momwe tin’dzakhalira tikadzasaya kuyezedwa na bzinthu bzakuipa ayai kuleka kubonera thangwe ra kuperewera. Ndipo na kupita kwa nthawe tin’dzapfatsa na ‘ufulu’ bomwe Yahova akutipicira. (War. 8:21) M’dziko lipsa, ufulu bwathu bun’dzapitiriza kukhala na malire. Bzimwebzi bzinkulatiziratu padeca kuti ifepano tingakhale na ufulu caibo kokha tikatewezera Mulungu.—1 Ju. 4:7, 8. w18.12 20 ¶19-20

Cakutonga cikhabvumiza kuti mwamuna omwe ni m’Jirayeri alambe mkazace ‘akasaya kumudekera thangwe ra bvuto liri-lense.’ Cakutongaco cikhalewa lini bzinthu bzomwe bzikhali m’gulu la ‘bvutolo.’ Tsono bzinkuwoneka kuti bzikhali bzinthu bzakupasa manyazi ayai bzinthu bzakuipisisa sikuti tubzinthu tung’ono-tung’ono. (Bzak. 23:14) Koma mpsakupasa nsisi kuti mu nsiku za Jezu, Ajuda azinji akhambalamba akazawo ‘pa thangwe liri-lense.’ (Mat. 19:3) Tenepo, ifepano tin’funika lini kutewezera khalidwe limweri. Mu nsiku za mpolofeta Malakiya, amuna akhana msambo wa kumbasiya akazawo wakuyamba, kuti alowole atsikana omwe akhatumikira lini Yahova. Tsono Mulungu alibe kuwabisira momwe iye akhawonera nkhani ya kulambana. Iye adati: ‘Nimbawenga kulambana.’ (Malak. 2:14-16) Kuyambira paciyambi, Mulungu alibe kucinja momwe ambawonera nkhani ya malowozi, iye adalewa kuti mwamuna ‘an’dzaphatana na mkazace, ndipo awiriwo an’dzakhala thupi libodzi.’ (Ciy. 2:24) Ndipo Jezu adathandizira momwe Baba wace ambawonera nkhani ya malowozi pomwe adalewa kuti: ‘Comwe Mulungu wacimanga pabodzi, munthu aleke kucilekanisa.’—Mat. 19:6. w18.12 11 ¶7-8

Pana abale na mpfumakazi omwe ambabzipereka kuti akatumikire mbuto zinango thangwe rakuti ana mpata wakucita bzimwebzo. Ndipo bzomwe iwo ambacitabzi bzimbandendemerana na bzomwe mpolofeta Zaiya adacitambo. Pomwe Yahova adabvunza kuti: ‘Kodi ndin’tuma mbani ndipo mbani aniyenda m’mbuto mwathu?’ iye adatawira kuti: ‘Ndiri pano ine! Nditumizeni!’ (Zai. 6:8) Apa tani imwepombo? Kodi mudakonzeka kuthandiza gulu la Yahova? Kodi mpsiponi bzomwe mungathandize mu gulu la Yahovali? Pakulewa bza basa lakupalizira na kupfunzisa wanthu, Jezu adati: ‘Kumbirani kuna Mweneciro kubvuna kuti atumize anyabasa adzam’bvunire.’ (Mat. 9:38) Kodi imwepo mungayende kukatumikira ku mbuto komwe kunkufunikira apalizi azinji, ayai kutumikira ninga mpainiya? Ayai kodi mungathandize m’bale ayai mpfumakazi kuti icite bzimwebzo? Abale azinji ambawona kuti njira yabwino yakulatizira lufoyi lawo kwa Mulungu na anzawo, ni kukatumikira ninga apainiya ku mbuto komwe kunkufunikira apalizi azinji. Kodi mukukumbukira njira zinango zomwe mungaziphatise basa kuti muthumizire utumiki bwanu? Kulewa cadidi, mukacita bzimwebzi mun’dzakhala wakukondwa kwene-kwene. w18.08 26 ¶14-15

Mabukhu ya m’Bibliya yakulewa bza moyo wa Jezu yambalatiza momwe Yahova ambakumbukirira bzinthu bzakuthupi. Mulungu caiyeyo adasankhula Zuze na Mariya kuti alere Mwana wace napo kuti iwo akhadasauka. (Mwam. 12:8; Lu. 2:24) Ndipo pomwe Jezu adabadwa, Mariya ‘adamugonesa mwakudyera ng’ombe, thangwe m’mbuto za alendo zikhadamala.’ (Lu. 2:7) Yahova angadafuna, angadacita makonzedwe yakuti Jezu abadwire pa mbuto yabwino. Koma iye adafuna kuti Jezu akulire pa banja lomwe likhaikha pa mbuto yakuyamba kunamata Mulungu. Cimweci cikhali cinthu cakufunika kwene-kwene kwa Yahova. Nkhani yakulewa bza kubadwa kwa Jezuyi imbatipfunzisa momwe Yahova ambawonera bzinthu bzakuthupi. Abereki winango ambafuna kuti wana wawo akhale na bzinthu bzizinji bzakuthupi, napo acidziwa kuti kucita bzimwebzo kungadzonge uxamwali bomwe wanawo anabo na Yahova. Kulewa cadidi, Yahova ambawona uxamwali bomwe tinabo na iye kukhala bwakufunika kwene-kwene. Kodi imwepo mumbawonambo ninga momwe Yahova ambawonera pa nkhani imweyi? Kodi bzomwe mumbacita bzimbalatiza ciyani? w18.11 28-29 ¶7, 8

Yahova ni mwenekaciro wa cikondweso ndipo iye ambafuna kuti tikhale wakukondwa, ndipopa iye ambaticitira bzinthu bzizinji kuti tikhale wakukondwa. (Bzak. 12:7; Mpal. 3:12, 13) Koma m’dzikoli, mpsakunesa kwene-kwene kukhala wakukondwa. N’thangwe ranyi? Bzingakhale bzakunesa kwene-kwene kukhala wakukondwa tikagumana na bzinthu bzomwe bzingatisunamise, ninga infa ayai kucosedwa kwa wacibale wathu m’gwere, kumala kwa banja ayai basa. Ndipo bzingakhalembo bzakunesa kukhala wakukondwa tikambakhala pa mui pomwe palibe mtendere thangwe rakuti kawiri-kawiri pambacitika ndewo, tikambasekedwa na anzathu wa ku basa ayai wa ku xikola, tikambazunzidwa ayai tikaikhidwa m’kawoko thangwe ra kutumikira Yahova. Ayai pinango tina bvuto la thanzi, tinkuduwala matenda makulu, ayai thangwe ra thupo. Napo bziri tenepo, tin’funika kukumbukira kuti Jezu Kristu, omwe ngwakukondwa na ‘wamphanvu m’bodzi-yekhayo,’ ayai Mtongi, ambafuna kutsangalaza wanthu ndipo ambawacitisa kukhala wakukondwa. (1 Tim. 6:15; Mat. 11:28-30) Pa Nkhani ya pa Phiri, Jezu adafotokoza makhalidwe yomwe yangatithandize kukhala wakukondwa napo tikagumana na mabvuto yakusiyana-siyana, thangwe tinkukhala m’dziko la Sathani. w18.09 15-16 ¶1-3

Cinthu cakunesa kwene-kwene kucinja ni kuleka kutenga mbali pa miyambo na bzicito bzomwe bzimbakondwesa lini Yahova. (Mim. 23:23) Ndipo winango ambaneseka kusiya napo pambuyo pa kupfunza momwe Yahova ambawonera bzinthu bzimwebzi. Iwo ambadziwa kuti wanthu kawiri-kawiri ambakhulupira kwene-kwene miyambo inango, ninga kulemekeza acibale wawo omwe adafa. Tsono n’ciyani comwe cingatithandize kucinja? Tingapfunze na bziratizo bzabwino bza wale omwe adacinja bzinthu pa moyo wawo pomwe adapfunza cadidi. Kodi n’ciyani comwe wanthu omwe akhacita bza matsenga adacita pomwe adakhala Akristau ku Efezo? Bibliya limbafotokoza kuti: ‘Azinji omwe akhambacita bza matsenga adabweresa mabukhu yawo, aciyatentha pa maso pa wense. Pomwe adalewenga kobiri zomwe adagulira mabukhuyo, zidakwana kobiri 50.000 za siliva. Fala la Yahova likhakula, licikunda mwa mphanvu.’ (Mab. 19:19, 20) Akristau wakukhulupirikawa adatentha mabukhu yawo yakuumira, ndipo Yahova adawasimba thangwe ra bzimwebzi. w18.11 8 ¶15, 16

Pomwe Ajirayeri adayambuka mkulo wa Joridano, Djosuwe adawona munthu omwe akhana mphanga m’manja mwace. Iye akhali ‘nduna ya gulu la anyankhondo wa Yahova,’ ayai anjo omwe akhadabwera kuti adzakhotcerere wanthu wa Mulungu. (Djos. 5:13-15) Anjo ule adauza Djosuwe bzense bzomwe akhafunikira kucita kuti akwanise kukunda mzinda wa Jeriko. Pakuyamba, malango manango yangawoneke ninga yakusaya basa. Mwa ciratizo, anjoyo adauza Djosuwe kuti acikunda wense akhafunika kucita mgwatidwe. Bzimwebzi bzikhathandauza kuti acikundawo angadakwanisa lini kumenya nkhondo kwa nsiku zakucepa. (Ciy. 34:24, 25; Djos. 5:2) Pinango acikundawo adabzibvunza kuti, ‘Kodi anyamadulanthaka akabwera kudzamenyana nafe, tin’dzacita tani kuti tikhotcerere mabanja yathu?’ Koma padacitika cinthu comwe iwo akhacidikhirira lini! M’mbuto mwa kubwera kudzamenyana na Ajirayeri, amuna wa mu mzinda wa Jeriko adacita mantha na Ajirayeriwo. Ndipo Bibliya limbalewa kuti: ‘Mzinda wa Jeriko ukhadafungidwa mwamphanvu thangwe ra Ajirayeri. Ndipo palibe omwe akhabula ne kupita mu mzindamo.’ (Djos. 6:1) Bzimwebzi bzidacitisa Ajirayeri kukhulupira kwene-kwene citsogozo ca Mulungu! w18.10 17 ¶5, 7

Kodi tingamutewezere tani mpostolo Paulo? Cakuyamba, ifepano tin’funika lini kumbabziwona kukhala wapadzulu kwene-kwene kuposa winango thangwe ra basa lathu lakupalizira ayai thangwe ra bzinthu bzomwe Yahova ankutithandiza kuti bzifambe bwino. Pinango tingabzibvunze kuti: ‘Kodi ndimbawawona tani wanthu wa m’gawo langu? Kodi ndimbasankhula wanthu winango ndikambapalizira?’ Kuzungulira dziko lense la pansi, Mboni za Yahova zimbafufudza wanthu omwe ambafunisisa kubva bzipsa bzabwino. Ndipo Mboni zinango zimbacita nyongo yakupfunza cirewedwe ayai cikhalidwe ca wanthu omwe ambawoneka ninga wakusalira ayai wakusaya kufunika. Napo bziri tenepo, iwo ambabziwona lini kukhala wapadzulu kwa wale omwe ankuwapalizira. M’mbuto mwace, iwo ambacita nyongo yakubvesesa munthu ali-wense kuti akwanise kumutokonya mtima na bzipsa bza Umambo. w18.09 4 ¶9; 5 ¶11

Aroma akhadapha Juda. Ndipo Ajuda azinji akhadikhirira kubwera kwa Mesiya. Iwo akhakumbuka kuti Mesiyayo angadadzawatsudzula ku utongi bwa Roma, acicitisa Jirayeri kukhala pomwe mtundu wakufunika. (Lu. 2:38; 3:15) Ndipo azinji akhakumbuka kuti Mesiya angadatonga ninga mambo wa Jirayeri, acicitisa kuti Ajirayeri wense omwe akhadabalalikira m’mbuto zinango, abwerere pomwe ku Jirayeriko. Ndipo napo Juwau Batista caiyeyo, adabvunza Jezu kuti: ‘Kodi Mesiya omwe tikhamudikhirira ule ndimwepo ayai tidikhirire munango?’ (Mat. 11:2, 3) Pinango Juwau akhakumbuka kuti kungadabwera munthu munango omwe angadadzatsudzula Ajuda. Ndipo pomwe Jezu adalamusidwa, anyakupfunza awiri omwe akhayenda ku Emausi adagumana naye m’njira. Iwo akhadziwa lini kuti ankulewalewa na Jezu ndipo pakuceza naye adalewa kuti iwo akhakumbuka kuti Jezu akhali ule omwe angadapulumusa Jirayeri. (Lu. 24:21) Patsogolo pace, apostolo adabvunzambo Jezu kuti: ‘Mbuya, kodi mun’khazikisa Umambo kwa Jirayeri m’nthawe imweyinoletu?’—Mab. 1:6. w18.06 4 ¶3, 4

Kodi n’thangwe ranyi tin’funika kukhala wakusamala maka-maka tikabva nkhani zakulewa bza atumiki wa Yahova? Lekani kuyebwa kuti Bibliya limbalewa kuti nyamadulanthaka wanthu Sathani ni ‘nyakunamizira abale wathu.’ (Cibv. 12:10) Ndipo Jezu adalewambo kuti anyakutsutsa angadatilewera ‘mwakunama bzinthu bzakuipa.’ (Mat. 5:11) Tenepo tikambakumbukira mafalaya, ifepano tin’dzadabwa lini na nkhani zakupasa nsisi zomwe tingabve pakulewa bza atumiki wa Yahova. Kodi imwepo mumbafuna kutumizira axamwali wanu e-mail ayai mensaje? Ndipo tani mukabva bza nkhani ayai cakucitika cinango, kodi mumbabzibva ninga mtola nkhani omwe ambafuna kumwaziratu nkhaniyo pa nthawe imweyoletu? Tsono mukanati kutumiza e-mail ayai mensaje, mbabzibvunzani kuti: ‘Kodi nkhaniyi njacadidi? Kodi ndina umboni bwakukwanira pa nkhaniyi?’ Penu imwepo mulibe citsimikizo pa nkhaniyo, mungakhale munkumwaza magunkha. Tenepo, penu mulibe umboni bwakukwanira pa nkhaniyo, lekani kuitumiza, ipfudzeni. w18.08 3 ¶3; 5 ¶6, 7

Jezu ambafuna kuti ifepano tikhale wakupasa thangwe kumbatikondwesa. Ndipo tikakhala wakupasa, wanthu azinji an’dzaticitirambo bzibodzi-bodzi. N’cadidi kuti ni wanthu lini wense omwe ambatitenda tikakhala wakupasa, tsono napo bziri tenepo, ifepano tin’funika kupitiriza kukhala wakupasa. Tenepo, mbatipitirizeni kukhala wakupasa bziribe basa penu wanthu an’titenda ayai ne, thangwe timbadziwa lini momwe khalidwe lathu lakupasa lingatokonyere winango. Munthu omwe ana mtima wakupasa, ambadikhira lini kubwezeredwa cinthu. Ndipo Jezu adati: ‘Ukacita madyo, cemera anyakusauka, anyakulemala, anyakugwinthoma na azimola ndipo un’dzakondwa, pakuti iwo alibe cinthu comwe angakubwezere.’ (Lu. 14:13, 14) Bibliya limbalewambo kuti: ‘Mpasi an’dzasimbidwa,’ ndipo ‘an’kondwa ni ule omwe ambacita bzinthu acikumbukira munthu wakunyozeka.’ (Mim. 22:9; Psal. 41:1) Ifepano timbakhala wakupasa thangwe ra kufunisisa kuthandiza winango. w18.08 19-20 ¶15-16

Nsiku zino mpsakunesa kwene-kwene kukhala na umboni bwakukwanira na kudziwa cadidi pa nkhani zomwe timbabva. Thangwe ranyi? Thangwe rakuti nkhani zizinji zomwe timbabva zimbakhala lini na umboni bwakukwanira ayai zimbandolewa mbali ibodzi yokha ya nkhaniyo, ndipo thangwe linango ndakuti ndife wakuperewera. Tsono n’ciyani comwe cingatithandize? Ni kuphatisa basa nfundo za m’Bibliya. Mwa ciratizo, nfundo ibodzi imbalewa kuti n’kupusa munthu kutawira nkhani yomwe alibe kuibvesesa. (Mim. 18:13) Nfundo inango imbatithandiza kuwona kuti tin’funika lini kumbakhulupira bzense bzomwe timbabva tinati tawona penu mpsacadidi ayai ne. (Mim. 14:15) Ndipo tin’funika lini kumbathemba kwene-kwene luso lathu la kubvesa bzinthu, bziribe basa magole yomwe tinkutumikira Yahova. Nfundo za m’Bibliya zin’dzatithandiza tikambafufudza umboni kuti tidziwe cadidi pakulewa bza nkhani zomwe timbabva na kucita bzakusankhula mwanzeru. w18.08 8 ¶19

Njira ibodzi yakutendera Yahova thangwe ra mwayi omwe tinawo, ni kubzipereka kwa iye na kubatizidwa. Ndipo tikacita bzimwebzi, wanthu wense ambawona kuti ndife wa Yahova nakuti tinkufunisisa kumutumikira na kumubvera. Jezu adacitambo bzibodzi-bodzibzi pomwe adabatizidwa. Bzimwebzi bzikhali ninga kuti iye akhalewa kuti: ‘Ndimbakomedwa kucita kufuna kwanu, imwe Mulungu wangu.’ (Psal. 40:7, 8) Kodi Yahova adabva tani pomwe Jezu adabatizidwa? Bibliya limbalewa kuti: ‘Pomwe adandomala kubatizidwa, nthawe imweyo Jezu adabula m’madzi; ndipo onani! kudzulu kudafunguka, ndipo iye adawona mzimu wa Mulungu wakuwoneka ninga nkhangaiwa unkupolika kudzam’mbutha. Ndipo padabveka fala kucokera kudzulu, liciti: “Uyu ndiye mwanangu, wakufunidwa, omwe ndimbakondwa naye.”’ (Mat. 3:16, 17) Jezu akhali kale wa Yahova, koma napo bzikhali tenepo, Yahovayo adakomedwa kwene-kwene pomwe adawona Jezu ankubzipereka kwa iye kuti atumikire iye yekha basi. Yahova ambakomedwambo tikabzipereka kwa iye ndipo an’dzatisimba kwene-kwene.—Psal. 149:4. w18.07 22 ¶4, 5

Pomwe adalewa kuti ‘ifepano,’ bzidakhala ninga kuti Mozejiyo akhalewa bza iye pabodzi na m’bale wace Aroni, ndipo bzimwebzi bzidanyoza kwene-kwene Yahova, thangwe iye alibe kumupasa mbiri pa cakudabwisa comwe cidacitikaco. Pa Psalymo 106:32, 33 pambati: ‘Iwo adamunyosa pafupi na madzi ya ku Meriba ndipo thangwe ra iwo, bzinthu bziribe kumufambira bwino Mozeji. Iwo adamukalipisa, ndipo iye adayamba kulewalewa mwakusaya kukumbuka bwino.’ (Mirew. 27:14) Mozeji alibe kupasa Yahova mbiri yomwe iye akhathemera, tenepo Yahovayo adauza iye pabodzi na Aroni kuti: ‘Awirimwe mulibe kubvera malango yangu.’ (Mirew. 20:24) Kulewa cadidi, imweyi ikhali pikado ikulu kwene-kwene! Ndipo Yahova alibe kubvumiza m’badwo wakuyambirira wa Jirayeri kupita m’dziko lakupiciridwa thangwe udamupandukira. (Mirew. 14:26-30, 34) Tenepo, mpsakubveka kuti pomwe Mozeji adaphonyera Mulungu adalangidwambo mu njira ibodzi-bodziyi. Ndipo ninga momwe bzidacitikira na wense omwe adapandukira Yahova, iye alibe kupitambo m’dziko lakupiciridwa. w18.07 11 ¶9; 12 ¶12, 13

Napo kuti tina ufulu bwakucita bzomwe tin’funa pa nkhani ya kumwa, ifepano tin’funika kumbakumbukirambo bza wale omwe cikumbu-mtima cawo cimbawabvumiza lini. Mwa ciratizo, pinango pana m’bale munango omwe pakuyamba akhamwa, koma pomwe adapfunza Bibliya adadzasiya kumwako. Pa cakucitika ninga cimweci, tin’funika kumbasamala kwene-kwene kuti tireke kucitisa m’baleyo kukhala pomwe na cikhumbo cakufuna kumwa. (1 Wak. 6:9, 10) Tsono tani penu tacemera m’baleyo kumui kwathu, kodi tingamungingimize kuti amwe pomwe iye ankulamba? Tin’funika lini kucita tenepo. Timotio n’ciratizo cabwino pa nkhani ya kulemekeza cikumbu-mtima ca winango. Mwa ciratizo, pomwe iye akhali tswaka, adabvuma kucita mgwatidwe thangwe akhadziwa kuti imweyi ikhali nkhani yakufunika kwene-kwene kwa Ajuda omwe iye angadakawapalizira. Ninga Paulo, Timotio akhambalemekeza cikumbu-mtima ca winango. (Mab. 16:3; 1 Wak. 9:19-23) Tsono tani imwepombo, kodi mumbalemekeza cikumbu-mtima ca anzanu? w18.06 18 ¶12-13

Yahova ambakwewa wanthu wa mitima yabwino kuti akhale kumbali ya banja lace lauzimu, lomwe limbamunamata. (Ju. 6:44) Tenepo, bziribe basa komwe munthuyo wacokera ayai wakulira, imwepo mun’dzapfunza bzizinji bzomwe iye ambabzidziwa ndipo iye an’dzapfunzambo bzizinji bza imwepo! Mukagumana na Mboni mwanzanu, mumbadziwa kuti muna bzinthu bzizinji bzakufunika bzakundendemerana. Mwa ciratizo, mumbadziwa kuti napo mumbalewalewa cirewedwe cakusiyana, mun’kwanisa kubverana thangwe mwense mumbalewalewa ‘cirewedwe cakucena’ ca cadidi. Bzimwebzi bzinkuthandauza kuti mwense mumbakhulupira Mulungu, mumbateweza mitemo ibodzi-bodzi ndipo cidikhiro canu n’cakundendemerana. Kukumbukira bzinthu bzimwebzi kun’dzakuthandizani kuti mumbakhulupirane na kucitisa kuti uxamwali bwanu bukhale bwakulimba mpaka kale-kale. w18.12 18 ¶9, 10

Kristu adathandiza bungwe lakutonga kuti libvekese nfundo yakuti Akristau omwe akhali lini Ajuda akhafunikira lini kugwatidwa. (Mab. 15:19, 20) Koma na kupita kwa nthawe, Akristau azinji wacijuda adapitiriza kucita mgwatidwe wana wawo. Na tenepo, pinango tingabzibvunze kuti, thangwe ranyi Jezu adabvuma kuti nkhani yakulewa bza mgwatidwe ipitirize kukhala bvuto kwa nthawe itali, uko Cakutonga ca Mozeji cidaleka kuphata basa pomwe Jezuyo adafa? (Wakol. 2:13, 14) Pangatenge nthawe kuti munthu azolowere na kubvesesa bzinthu bzomwe bzacinja. Mwa ciratizo, Ajuda winango adatenga nthawe itali kuti abvume kuti akhali lini pomwe pansi pa Cakutonga. (Ju. 16:12) Iwo akhakumbuka kuti mgwatidwe ukhali cizindikiro cakuti munthu ali pauxamwali bwakupambulika na Mulungu. (Ciy. 17:9-12) Winango akhacita mantha kuti angadazunzidwa m’madera yawo ya cijuda thangwe ra kukhala wakusiyana na winango. (Wag. 6:12) Koma pa nthaweyo, Kristu adawapasa malango mazinji mwakuphatisa basa matsamba yakucokera kwa Paulo. w18.10 19 ¶10-12

Kaifasi adadikhira kuti kudoke, patsogolo pace, iye adatumiza acikunda kuti akaphate Jezu. Tsono, Jezu akhadziwa kale bza makonzedweyo, tenepo, usiku bwa nsiku imweyire, iye adauza ateweri wace kuti akhale na mphanga. Iwo adatenga mphanga ziwiri, ndipo Jezu adaphatisa basa mphangazo kuti awapfunzise cinthu cinango cakufunika kwene-kwene. (Lu. 22:36-38) Kudabwera thimu la wanthu kuti adzaphate Jezu, tsono Pedru adakalipa kwene-kwene na kusaya cirungamoko, mwakuti adatenga mphanga acigwata khutu la m’bodzi mwa wanthu wale. (Ju. 18:10) Tsono Jezu adauza Pedru kuti: ‘Bweza mphangayo m’mbuto mwace, pakuti wense omwe an’phata mphanga, an’dzafa na mphanga.’ (Mat. 26:52, 53) Kodi n’ciyani comwe Jezu akhafuna kupfunzisa ateweri wace na mafalaya? Iye akhafuna kuwapfunzisa kuti iwo akhafunika lini kucita mbali ya dzikoli ndipo ndibzo bzomwe iye akhadakumbira kale mu mpembo usiku bumwebule. (Ju. 17:1) Ni Mulungu yekha omwe ana ugo bwakumalisa kusaya cirungamo komwe kumbacitika. Ifepano ndife wakuphatana ndipo Yahova ambadekedwa kwene-kwene akambawona mbverano wathu.—Sof. 3:17. w18.06 7 ¶13-14; 8 ¶16

Cinthu cinango comwe Sathani ambacita, ni kutizunza na kutigopswa kuti tisiye kukhala wakukhulupirika kwa Yahova. Mwa ciratizo, iye angaphatise basa maboma kuti aletse basa lathu lakupalizira, ayai angacitise kuti anzathu wa ku basa na wa ku xikola, ambatinyoze thangwe ra kuteweza nfundo za m’Bibliya. (1 Pe. 4:4) Ndipo Sathani angacitisembo kuti wacibale wathu omwe ambatumikira lini Yahova, omwe angawoneke ninga ankutifunira bzabwino, atiletse kumbayenda ku mitsonkhano. (Mat. 10:36) Tsono n’ciyani comwe tingacite kuti tikwanise kulimbana na mazunzo ya Sathaniya? Ifepano tin’funika lini kumbadabwa tikambazunzidwa, thangwe timbadziwa kuti Sathani ankulimbana nafe. (Cibv. 2:10) Ndipo tin’funikambo kumbakumbukira bzomwe Sathani adalewa. Iye adalewa kuti ifepano timbatumikira Yahova kokha bzikakhala kuti bzinthu bzinkutifambira bwino pa moyo wathu, tsono tikagumana na bzineso, Sathani adalewa kuti ifepano tin’dzasiya kutumikira Yahovayo. (Djobi 1:9-11; 2:4, 5) Ndipopa ifepano tin’funika nthawe zense kumbakumbira Yahova kuti atipase mphanvu. Kuposa bzense tileke kuyebwa kuti Yahova cipo acidzatisiya.—Waheb. 13:5. w18.05 19 ¶14

Nthawe zense tin’funika kumbakumbukira kuti basa lathu lakupalizira lingatokonye wanthu winango, napo bzingawoneke ninga kuti palibe omwe an’funa kutibvesera. Wanthu ambawona bzense bzomwe timbacita. Iwo ambawona kuti ifepano timbabvala bwino, ndife waulemu na wakufikirika. Bzimwebzi bzingawatokonye ndipo na kupita kwa nthawe, napo wale omwe akhatikumbukira kuipa, angacinje makumbukidwe yawo. Sergio na Olinda omwe ni painiya adawona kuti nfundo imweyi njacadidi. Thangwe ra matenda, Sergio na Olinda akhadasiya kumbayenda kukapalizira ku mbuto yakupakirira akanderendere ire. Iwo adati: “Tidacita nsiku ne kuyenda kukapalizira. Tsono pomwe tidayamba pomwe kumbayenda, wanthu akhambatibvunza kuti: ‘Mulipo? Tikhadakusuwani, n’ciyani cikhadacitika?’” Boko lanu likaleka kupuma mwa kupitiriza kumbauza winango bza Umambo bwa Mulungu, imwepo mun’dzacita mbali yakufunika kwene-kwene pa nkhani ya kupereka ‘umboni kwa mitundu yense.’ (Mat. 24:14) Ndipo kuposa bzense, imwepo mun’dzakhala wakukondwa kwene-kwene thangwe ra kudziwa kuti munkukondwesa Yahova. Iye ambafuna wanthu wense omwe ‘ambabala bzisapo mwakupirira’!—Lu. 8:15. w18.05 8 ¶16-18

Yahova ni Mulungu omwe ambapereka cirimbiso. Ndipo iye wakhala ankupereka cirimbisoco kuyambira pomwe wanthu adamuphonyera acikhala wakuperewera. Ndipo pomwe Adamu na Eva adapandukira Mulungu, iye mwakusaya kucedwa adapereka polofesiya yomwe ingadalimbisa na kupereka cidikhiro kwa wanthu omwe angadadzabadwa kutsogolo. Polofesiyayo imbagumanika pa Ciyambo 3:15, ndipo imbalewa kuti Sathani Dyabu pabodzi na mabasa yace yense yakuipa yan’dzapfudzidwa. (1 Ju. 3:8; Cibv. 12:9) Ndokumbukirani momwe Yahova adalimbisira mtumiki wace Nowe. Wanthu wa mu nthawe imweire, akhali waciwembo na wa unzazi ndipo ni Nowe yekha pabodzi na banja lace omwe akhanamata Yahova. Tenepo, bzimwebzi bzikhasunamisa Nowe. (Ciy. 6:4, 5, 9, 11; Juda 6) Koma Yahova adapasa Nowe cirimbiso comwe iye akhafunikira kuti apitirize kumunamata na kucita bzomwe mpsabwino. Yahova adauza Nowe kuti angadadzapfudza dziko lakuipalo, ndipo adamuuzambo bzomwe akhafunikira kucita kuti iye pabodzi na banja lace apulumuke. (Ciy. 6:13-18) Kulewa cadidi, Yahova adakhala Mulungu wa cirimbiso kuna Nowe. w18.04 15 ¶1, 2

N’cadidi kuti nthawe zinango bzimbakhala bzakunesa kuuza anzathu momwe timbawawonera, koma kulimbisa winango n’cinthu lini cakuneseratu. Kuti muwone pakuyambira, imwepo munganyang’anise munthu, mucimusekerera. Munthuyo akasaya kukusekereranimbo, ndiye kuti pinango iye ankugumana na bvuto linango lomwe pinango an’funa munthu kuti amufotokozere. Tenepo imwepo mungamutsangalaze pinango mwa kundopambula nthawe ya kumutetekera pa bzomwe anilewabzo. (Tiy. 1:19) Tensenefe tingatsangalaze na kulimbisa abale na mpfumakazi zomwe zinkufunikira cirimbiso. Mambo Salomau adanemba kuti: ‘Mafala yakulewedwa pa nthawe yakuthemera njabwino kwene-kwene! Maso yakuyetima yambakodwesa mtima; ndipo nkhani yabwino imbalimbisa mafupa.’ (Mim. 15:23, 30) Paulo adalewa kuti napo kuimba nyimbo za Umambo pabodzi na abale wathu, kungaticitisembo kubzibva bwino. (Mab. 16:25; Wakol. 3:16) Kulimbisana n’kwakufunika kwene-kwene pomwe tikuwona kuti nsiku ya Yahova ‘inkufika.’—Waheb. 10:25. w18.04 25 ¶16; 26 ¶18-19