Outubro

Ifepano tingakwanise lini kuwona bzomwe bziri mu mtima mwa munthu ninga momwe Yahova na Jezu ambacitira. Napo bziri tenepo, tingakwanise kubvesesa makumbukidwe na bzakusaya bza winango. (2 Wak. 11:29) Mwakusiyana na wanthu wadyera wa m’dzikoli, ifepano tin’funika kumbacita nyongo kuti tireke ‘kumbandokumbukira bzakufuna [bzathu] bzokha, koma [timbakumbukirembo] bzakufuna bza wanthu winango.’ (Waf. 2:4) Akulu wa gwere an’funika kumbalatiza thupo kuna abale wawo wauzimu, thangwe iwo adapasidwa udindo na Yahova bwakusamalira mabira yace. (Waheb. 13:17) Tsono kuti akwanise kuthandiza abale na mpfumakazi zawo, akuluwo an’funika kukhala wansisi. Kodi iwo angacite tani bzimwebzo? Mkulu wa gwere omwe ana thupo ambapambula nthawe yakuceza na abale na mpfumakazi za m’gwere. Ndipo pa macezayo iye ambabvunza mibvunzo acimbatetekera mwatceru na mwakupirira. Abale wa m’gwere ambakomedwa kwene-kwene akakhala na mipata ninga imweyi thangwe pa nthaweyi iwo ambafotokoza bzomwe bziri mu mtima mwawo, na kugumana mafala yakuwatsangalaza. (Mim. 20:5) Tenepo, akulu wa gwere akambapambula nthawe yakuceza na abale wawo, an’dzakhulupirana, an’dzakhala pa uxamwali bwakulimba ndipo lufoyi lawo lin’dzathumizirika.—Mab. 20:37. w19.03 17 ¶14-17

Kutenda kuli ninga cakudya cabwino, comwe cimbakoma kwene-kwene tikambadya pabodzi na anzathu. Ifepano timbakomedwa kwene-kwene tikadziwa kuti wanthu winango ankutenda bzomwe timbacita. Ndipo kutenda kwathu, kumbakondwesa winango. Tikambatenda munthu thangwe ra bzomwe waticitira iye ambawona kuti nyongo yomwe wacita kuti atithandize, iribe kuyenda papezi. Bzimwebzi bzin’dzacitisa kuti mbverano wathu na munthuyo ukhale wakulimba kwene-kwene. Mafala yakutenda njakufunika kwene-kwene, ninga momwe vesi la lero linkulewera. Ndokumbukirani momwe maçã yakukonzedwa na oro na siriva yambakhalira yakudeka! Ndipo kumbukiranimbo momwe yambakhalira yakufunika! Kodi imwepo mungabzibve tani munthu akakupasani mphaso ninga imweyi? Mwakusaya kupenukira, mungakomedwe kwene-kwene, ndipo mafala yakutenda yomwe mungauze munthuyo yangakhale yakufunika. Ndipo ninga momwe maçã ya oro yambakhalira nthawe izinji, mpsibodzi-bodzi na ifepano, mafala yakutenda yomwe tingalewe kwa munthu omwe watithandiza, angambayakumbukire na kuyatenda kwa moyo wace wense. w19.02 15 ¶5-6

Pomwe Adamu na Eva adadya cisapo ca muti wakudziwisa cabwino na cakuipa, iwo adalatiziratu padeca kuti akhakhulupira lini Yahova pabodzi na mitemo yace. Iwo adawona kuti bzikhali bwino kumbabzisankhulira wokha bzabwino na bzakuipa. Tsono kumbukirani bzomwe iwo adaluza. Iwo adaluza uxamwali bomwe akhanabo na Yahova, mwayi wakukhala na moyo kwa muyaya, ndipo patsogolo pace, adapasira wana wawo pikado na infa. (War. 5:12) Tikafuna kundendemezera, pomwe nduna ya ku Etiyopia idapaliziridwa na Firipi, idacita bzinthu mwakusiyana kwene-kwene na Adamu na Eva. Nduna ire idatenda kwene-kwene bzomwe Yahova na Jezu adaicitira, ndipopa idabatizidwa nthawe imweyoletu. (Mab. 8:34-38) Mpsibodzi-bodzimbo na ifepano, tikabzipereka kwa Mulungu na kubatizidwa ninga momwe idacitira nduna ire, tin’dzalatiza padeca kutenda bzomwe Yahova na Jezu adaticitira. Tin’dzalatizambo kuti timbakhulupira Yahova na kuzindikira kuti iye ndiye yekha omwe angatipase mitemo yakulewa bzabwino na bzakuipa. w19.03 2 ¶1-2

Kodi atumiki wa Mulungu ambalatiza tani kuti mbakukhulupirika? Mwa kumbacita bzinthu na kumbafuna Yahova na mtima wense, ndipopa nthawe zense bzakucita bzawo bzimbamukondwesa. M’Bibliya, fala lakuti ‘kukhulupirika’ m’Cihebereu limbathandauza: kucita bzinthu na mtima wense. Mwa ciratizo, Ajirayeri akhapereka bzifuwo kwa Yahova ninga nsembe, ndipo cakutonga cikhalewa kuti cifuwo cikhafunika lini kukhala cakulemala. (Mwam. 22:21, 22) Wanthu wa Mulungu akhabvumizidwa lini kupereka cifuwo comwe catcoka mwendo, cagwatika khutu, ayai cakusaya maso; ne kupereka cifuwo cakuduwala. Yahova akhafuna kwene-kwene cifuwo cakusaya kulemala. (Malak. 1:6-9) Bzimwebzi bzikutithandiza kubvesesa thangwe race Yahova ambafuna kuti atumiki wace akhale wakukhulupirika. Mwa ciratizo, ifepano tingagule lini cisapo comwe cidabvunda mbali ibodzi, ne kugula bukhu lomwe liribe matsamba manango. Koma timbafuna kugula cinthu comwe ciri bwino. Tenepo, Yahova ambafuna kuti timbamufune na kukhala wakukhulupirika kwa iye. Bzimwebzi bzinkulatiza kuti ifepano tin’funika kumbacita bzinthu na mtima wathu wense. w19.02 3 ¶3

Kuti tikhotcerere mtima wathu, tin’funika lini kundotcenkha makumbukidwe yakuipa koma tin’funikambo kumbabvuma makumbukidwe yabwino. Mizinda ya kale-kale ikhana malitsito ndipo alindiri wa misuwo akhambafunga misuwoyo kuti anyamadulanthaka aleke kupita m’mizindayo, koma kukabwera cakudya na bzinthu bzinango bzakufunika, iwo akhafungula misuwoyo kuti bzinthubzo bzipite mu mzindamo. Tenepo, misuwoyo ingadasaya kumbafungulidwa, wanthu wa mu mzindayo angadambafa na njala. Mpsibodzi-bodzimbo na ifepano, nthawe zense tin’funika kumbafungula mtima wathu kuti timbatambire makumbukidwe ya Mulungu. Mu Bibliya muna makumbukidwe ya Yahova, tenepo tikambaliwerenga nthawe zense, timbalatiza kuti tikubvuma kuti makumbukidwe ya Yahova yaphate basa m’makumbukidwe na m’bzicito bzathu. Kodi tin’funika kucita ciyani kuti timbapfunze bzizinji m’Bibliya tikanati tayamba kuliwerenga? Cakuyamba tin’funika kucita mpembo kwa Yahova. Ndipo mpembo ngwakufunika kwene-kwene thangwe umbatithandiza kuwona ‘bwino-bwino bzinthu bzakudekeza’ bzomwe bziri m’Fala la Mulungu. (Psal. 119:18) Caciwiri, tin’funikambo kumbakumbukira bzomwe timbawerengabzo. Tenepo, kucita mpembo, kuwerenga na kukumbukira bzomwe timbawerengabzo, kun’dzacitisa kuti makumbukidwe ya Yahova yakhale ‘mkati mwa mtima’ wathu ndipo tin’dzafika pa kufuna makumbukidwe ya Yahovayo.—Mim. 4:20-22. w19.01 18 ¶14-15

Yahova ambadziwa kuti wanthufe tina luso na cikhalidwe cakusiyana-siyana, napo bziri tenepo, iye ambatenda kwene-kwene nsembe zomwe timbapereka kwa iye. Kumbukirani bza nsembe zomwe iye adabvuma zakucokera kwa Ajirayeri. Mwa ciratizo, Ajirayeri winango akhakwanisa kupereka mwana wa bira ayai tonde. Koma Mjirayeri omwe akhali wakusauka akhapereka ‘njiwa ziwiri ayai wana awiri wa nkhangaiwa.’ Ndipo Mjirayeri omwe akhakwanisa lini kupereka mbalame ziwiri, Yahova akhabvuma ‘ufa bwakunyodoka bwakukwana gawo libodzi la magawo khumi.’ (Mwam. 5:7, 11) Ufa bukhali bwakufewera kwene-kwene, koma bukakhala ‘bwakunyodoka’ bwino Yahova akhatenda kwene-kwene nsembe ninga imweyi. Nsiku zino Yahova ambawonambo bzibodzi-bodzi. Tenepo, tikambapereka mitawiro pa mitsonkhono, iye ambadikhira lini kuti tense tilewe-lewe ninga momwe akhacitira Apolo ayai mpostolo Paulo. (Mab. 18:24; 26:28) Yahova ambafuna kuti tense timbapereke mitawiro yabwino ninga momwe tingakwanisire. Kumbukirani bza mkazi mansiwa omwe adapereka tukobiri tuwiri twakucepa mphanvu. Yahova adamutenda kwene-kwene thangwe iye adapereka bzense bzomwe akhanabzo.—Lu. 21:1-4. w19.01 8-9 ¶3-5

Cakuyamba, ifepano timbawengedwa thangwe ndife ateweri wa Kristu. Jezu adaleweratu kuti anyakupfunza wace angadadzazunzidwa kwene-kwene mu nsiku zakumalizira. (Mat. 24:9; Ju. 15:20) Caciwiri, polofesiya ya Zaiya ikuticenjeza kuti anyamadulanthaka wathu an’dzacita bzinthu bzizinji sikuti kundotiwenga; iwo an’dzaphatisa basa bzifuzo bzakusiyana-siyana kuti alimbane nafe. Bzifuzobzo bzimbaphatanidza mapumpso, magunkha na cizunzo. (Mat. 5:11) Yahova an’dzaletsa lini anyamadulanthaka wathuwo kuleka kuphatisa basa bzifuzobzi kuti alimbane nafe. (Wayef. 6:12; Cibv. 12:17) Koma tin’funika lini kucita mantha na bzimwebzi. Cinthu cacitatu comwe tin’funika kumbacikumbukira ni bzomwe Yahova adalewa, palibe ‘cifuzo’ comwe cin’dzaphatisidwa basa kuti cilimbane nafe ‘cin’dzakunda.’ (Zai. 54:17) Ninga momwe parede imbatikhotcererera ku cimphepo camphanvu, Yahova ambatikhotcererambo kuna ‘wanthu waciwembo’ omwe ambalimbana nafe. (Zai. 25:4, 5) Ndipopa anyamadulanthaka wathu an’dzakwanisa lini kutikunda. (Zai. 65:17) Anyamadulanthaka wense wa atumiki wa Mulungu ‘an’dzapfudzidwa ndipo an’dzawoneka lini pomwe.’—Zai. 41:11, 12. w19.01 6-7 ¶13-16

Maswakamwe, Yahova ambafuna ufulu, ndipo iye adakulengani kuti mumbafunembo ufulubo. Koma iye ambafuna kuti mumbaphatise basa mwanzeru ufulu bwanubo na cakulinga cakuti bumbakukhotcerereni. Mwa ciratizo, maswaka manango yambawona bzinthu bza maika, yambacita unzazi, yambaikha pa ngozi moyo wawo thangwe ra kucita masenzeka yakusaya kuthemera, yambamwa mankhwala yakudzungulumwisa msolo na mowa. Bzinthu bzimwebzi bzingawoneke ninga bzabwino ayai bzakutsangalaza, koma na kupita kwa nthawe bzimbabweresa bzakutewera bzakuipa, ninga matenda, kuledzera na infa. (Wag. 6:7, 8) Maswaka yomwe yambacita bzinthu bzimwebzi yambakumbuka kuti yana ufulu, koma yalibe na pang’onopo. (Tito 3:3) Kubvera Yahova ni cinthu cakufunika kwene-kwene kwa ifepano. Ndipo kubverako kumbaticitisa kukhala na thanzi labwino pabodzi na ufulu caibo. (Psal. 19:7-11) Tenepo mukambaphatisa basa mwanzeru ufulu bwanu, ayai mukasankhula kubvera malamulo na mitemo yakulungama ya Mulungu, mun’dzacitisa Mulungu pabodzi na abereki wanu kukulemekezani. Ndipo abereki wanu an’dzakukhulupirani kwene-kwene acikupasani ufulu buzinji.—War. 8:21. w18.12 19 ¶16, 17

Ninga momwe timbadziwira, pomwe Adamu adacita pikado, bzinthu bzizinji bzidacinja. Ndipo cibodzi mwa bzinthubzo ni kufa kwa wanthu, komwe kudatokonya kwene-kwene malowozi. Mpostolo Paulo adafotokoza kuti Mkristau akafa, malowozi yambamala ndipo mansiwa ambakhala wakutsudzuka kulowola ayai kulowodwa pomwe. (War. 7:1-3) Cakutonga comwe Mulungu adapereka kwa Ajirayeri cikhana nfundo zakulewa bza malowozi. Mwa ciratizo, Ajirayeri akhabvumizidwa kulowola akazi azinji. Bzimwebzi bzikhacitika kale napo Mulungu akhanati apereka Cakutonga. Ndipo Cakutongaco cikhakhotcerera akazi na wana kuti aleke kuzunzidwa. Mwa ciratizo, penu Mjirayeri alowola kapolo ndipo na kupita kwa nthawe alowola pomwe mkazi waciwiri, iye akhafunika kupitiriza kusamalira mkazace wakuyamba ninga momwe akhacitira pakuyamba. Cakulinga ca Mulungu cikhali cakuti mwamunayo apitirize kukhotcerera na kusamalira mkaziyo. (Kuf. 21:9, 10) Nsiku zino tinkuphatisa lini basa Cakutonga ca Mozeji, koma cimbatipfunzisa kuti Mulungu ambawona malowozi kukhala yakufunika kwene-kwene. Tenepo kudziwa bzimwebzi kumbatithandiza kulemekeza malowozi. w18.12 9 ¶3; 10 ¶5, 6

Pomwe Habakuki adamala kuuza Yahova bza thupo lace, iye akhadziwa lini bzomwe Yahova angadacita kuti amalise bvutolo. Tsono ninga Baba wa lufoyi, Yahova adabvesesa momwe Habakuki akhabvera. Iye akhadziwa kuti Habakuki akhabonera ndipo akhafuna thandizo. Tenepo Yahova alibe kutsimula Habakuki, koma adamuuza bzomwe iye angadacita mwakusaya kucedwa kuna Ajuda wakusaya kukhulupirika. Bzinkuwoneka kuti, Habakuki adakhala munthu wakuyamba omwe Yahova adamuuza kuti ciyeruzo ca Ajuda wakusaya kukhulupirikawo cingadacitika mwakusaya kucedwa. Yahova adauza Habakuki kuti akhadakonzeka kumalisa bvuto lace ndipo angadayeruza Ajirayeri waciwembo na wakuipa. Tsono pomwe Yahova adalewa kuti bzimwebzi bzin’dzacitika ‘mu nsiku zawo,’ iye akhalewa kuti ciyeruzoco cingadabwera pomwe Habakuki ayai Ajirayeri akana moyo. Bzomwe Yahova adatawira ndibzo lini bzomwe Habakuki akhadikhirira. Tsono thangwe ranyi Yahova adaphatisa basa wanthu waciwembowa kuti apase nyathwa wanthu wace? Bzimwebzi bzingadacitisa kuti Ajuda abonere kwene-kwene. w18.11 17 ¶7, 8

Kodi imwepo mumbawawona tani wanthu omwe akanati kupfunza cadidi ca m’Bibliya? Mpostolo Paulo akhapalizira Ajuda omwe akhadziwa kale bzinthu bzinango pakulewa bza Yahova. Ndipo iye akhapalizirambo wale omwe akhanamata mirungu yakunama. Kuti iye acite bzimwebzi akhafunika kubzicepswa. Mwa njira iponi? Pomwe Paulo adacita ulendo bwakuyamba bwa umisiyonario, iye adayenda pabodzi na Barnaba ku mzinda wa Listra. Wanthu omwe akhakhala ku Likawoni akhawona Paulo na Barnaba ninga wanthu wapadzulu kwene-kwene, ndipo akhawacemera na madzina ya mirungu yawo yakunama yomwe ni Zeu na Herme. Kodi n’ciyani comwe Paulo na Barnaba adacita? Kodi iwo adakomedwa na bzimwebzo? Kodi iwo adawona kuti bzikhali bzakuthemera kulemekezedwa thangwe rakuti akhacokera pa kuzunzidwa ku mizinda miwiri yomwe akhadaizungira? Kodi iwo adakumbuka kuti mbiri yomwe wanthuwo akhawapasa ingadacitisa kuti wanthu azinji abve bzipsa bzabwino? Nee! M’mbuto mwace, iwo adasunama kwene-kwene, mpaka adang’amba bzakubvala bzawo, aciuza wanthuwo kuti: ‘N’thangwe ranyi munkucita bzimwebzi? Ifembo ndife wanthu ninga imwepo ndipo timbagumanambo na bzakutepesa ninga bzanubzi.’—Mab. 14:8-15. w18.09 4 ¶8, 9

Tikapfunza cadidi ticiyamba kuphatisa basa nfundo za m’Bibliya, tin’funika kucinja makumbukidwe pabodzi na bzicito bzakuipa. Mpostolo Pedru adanemba kuti: ‘Ninga wana wakubvera lekani kutewezera bzikhumbo bzanu bzomwe mukhanabzo kale-kale pomwe mukhali wakusaya kudziwa, koma khalani wakucena m’makhalidwe yanu yense.’ (1 Pe. 1:14, 15) Mu mzinda wakale wa ku Kolinto, wanthu azinji akhacita bzinthu bza unzazi. Ndipo omwe akhakhala mu mzindayo akhafunika kucinja bzinthu bzizinji kuti akhale wakucena pamaso pa Yahova. Nsiku zino, wanthu azinji ambacinjambo bzinthu bzizinji akapfunza cadidi ca m’Bibliya. Pakulewa bza nkhani imweyi Pedru adati: ‘Nthawe yomwe yapitayi njakukwana kuti mucite kufuna kwa wanthu wamitundu, pomwe mukhacita bzinthu bzakuipa, bzikhumbo bzakuipa, kuledzera, maphwando, kumwa kwene-kwene na kunamata bzifanikiso kwakusaya kubvumizidwa.’—1 Pe. 4:3. w18.11 7 ¶13

Kodi tingagumane tani wanthu omwe ‘ana makumbukidwe yabwino yomwe yangawathandize kugumana moyo wakusaya kumala’? Ninga momwe bzikhaliri mu nthawe ya Akristau wakuyambirira, tingagumanire wanthu mwa kupalizira. Jezu adauza anyakupfunza wace kuti: ‘Mukapita mu mzinda ayai m’mui uli-wense, fufudzani omwe ngwakuthemera.’ (Mat. 10:11) Tsono, penu wanthu omwe tinkuwapalizira mbakuthemera lini, mbakubzikuza, ayai ambafuna lini kupfunza bza Mulungu, bzingakhale bzakunesa kuti iwo atetekere bzipsa bzabwino. Ndipopa tin’funika kufufudza wanthu omwe mbakuthemera, wakubzicepswa na omwe akufunisisa kudziwa cadidi ca m’Bibliya. Tingandendemezere kufufudza wanthu mu utumiki na bzomwe Jezu akhacitira pomwe akhali nyakusema matabwa. Kuti akonze bzinthu bzakudeka ninga, misuwo, mipando na bzinthu bzinango, iye cakuyamba akhafufudza matabwa yakuthemera. Ndipo akayagumana, akhatenga bzinthu bzomwe akhaphatisira basa, ndipo na nzeru zace akhakonza bzinthu bzakusiyana-siyana. Mpsibodzi-bodzimbo nsiku zino, cakuyamba tin’funika kufufudza wanthu wakuthemera, ndipo patsogolo pace tiphatise basa bzinthu bzomwe timbapfunzisira wanthu pabodzi na luso lathu kuti tiwathandize kukhala anyakupfunza wa Jezu.—Mat. 28:19, 20. w18.10 10 ¶3, 4

Firipi omwe akhali mpalizi, adakhala ciratizo cabwino kwa munthu ali-wense omwe adaikha utumiki bwace pa mbuto yakuyamba, napo kuti bzinthu bzidacinja pa moyo wace. Pa nthawe inango, iye adakomedwa kwene-kwene na basa lipsa lomwe akhacita ku Jeruzalemu. (Mab. 6:1-6) Koma na kupita kwa nthawe bzinthu bzidacinja. Pomwe Sitefano adaphedwa, Akristau adayamba kuzunzidwa mwamphanvu, ndipo iwo adathawa ku Jeruzalemuko. Firipi akhafunisisa kupitiriza kutumikira Yahova, tenepo iye adayenda ku mzinda wa Samariya, komwe kukhana wanthu omwe akhafunisisa kubva bzipsa bzabwino. (Mat. 10:5; Mab. 8:1) Firipi akhayenda kuli-kwense komwe mzimu wa Mulungu ukhamutsogolera. Tenepo, Yahova adamuphatisa basa kuti akapalizire ku mbuto komwe wanthu akhanati kubva bzipsa bzabwino. Ajuda azinji akhambanyoza Asamariya ndipo akhawacitira bzinthu bzakuipa. Tsono Firipi alibe kuwasankhula, ndipo adawapalizira bzipsa bzabwino na mtima wense. Ndipo Asamariyawo adamutetekera ‘mwa tceru’! (Mab. 8:6-8) Firipi, adapitiriza kuikha utumiki bwace pa mbuto yakuyamba, ndipo Yahova adapitiriza kusimba iye pabodzi na banja lace.—Mab. 21:8, 9. w18.10 25 ¶14-16

Nsiku inango, pomwe Jezu akhali mu mzinda wa Dekapoli, wanthu ‘adamubweresera munthu omwe akhali nkhuthu ndipo akhanesekambo kulewalewa.’ (Mar. 7:31-35) Jezu adamupoza, koma sikuti pa maso pa wanthuwo. N’thangwe ranyi? Thangwe ra kukhala nkhuthu, pinango munthuyo akhabzibva lini bwino pakati pa wanthu wale. Jezu adabvesesa momwe iye akhabvera, tenepo ‘adatenga munthuyo aciyenda naye pambali’ komwe kukhalibe wanthu ndipo adamupozera kumweko. Kulewa cadidi, ifepano tingakwanise lini kucita bzinthu bzakudabwisa ninga momwe Jezu adacitira, koma tin’funika kumbacita bzinthu mwakukumbukira bzakusaya na makumbukidwe ya abale wathu na kuwadekera mtima. Jezu adabvesesa momwe munthuyo akhabvera ndipo adamudekera mtima. Ninga iye, ifepano tin’funika kumbacitira bzinthu bzabwino acikulire na anyakupunduka. Khalidwe likulu kwene-kwene kwa Akristau ni lufoyi, sikuti kondocita bzinthu bzabwino. (Ju. 13:34, 35) Lufoyi limbaticitisa kuti ticite bzomwe tingakwanise kuti tithandize abale wathu omwe mbacikulire ayai anyakupunduka kuti afike pa mitsonkhano na kupalizira. Ndipo timbawathandiza napo kuti bzimbakhala bzakunesa kwa ifepano ayai napo iwo ambakwanisa lini kucita bzinthu bzizinji.—Mat. 13:23. w18.09 29 ¶7-8

Mtumiki ali-wense wa Yahova ambawonedwa kukhala wakufunika kwene-kwene kwa iye pabodzi na Jezu. (Wag. 2:20) Ifepano timbafuna abale pabodzi na mpfumakazi zathu na mtima wense, ndipopa tin’funika kumbawabvera nsisi na kulimbikira ‘pa bzinthu bzomwe bzimbabweresa mtendere na bzomwe mpsakulimbisa.’ (War. 14:19) Timbakumbukire bza momwe moyo un’dzakhalira m’Paraizo, m’mwemo palibe omwe an’dzasunama! Mun’dzakhala mulibe matenda, nkhondo, infa yomwe idabwera thangwe ra pikado, cizunzo, mabvuto ya m’banja na kusunama. Ndipo kuphampha kwa magole culu, wanthu wense an’dzakhala wakulungamiratu. Wale omwe an’dzakhala wakukhulupirika pa mayezo yakumalizira, an’dzakhala ninga wana wa Yahova pa dziko la pansi pano ndipo an’dzakondwa na ‘ufulu bwa mbiri ya wana wa Mulungu.’ (War. 8:21) Tenepo, bwerani timbalatizane lufoyi lacadidi ticimbathandizana kuti tidzapite m’dziko lipsa. w18.09 11 ¶10; 13 ¶18

Kupfunza kumbafuna bzizinji sikuti kundowerenga nkhani mwakamfulumize ayai kukwala mitawiro ya mibvunzo yakupfunza. Tikambapfunza, tin’funika kumbakumbukira kuti Yahova ni mbani, bzomwe ambacita na makumbukidwe yace. Ndipo tin’funika kumbabvesesa thangwe ranyi Yahova ambatiuza kucita bzinthu bzinango ndipo bzinango ambatiletsa. Tin’funikambo kumbawona bzomwe tingafunike kucinja pa moyo wathu pabodzi na makumbukidwe yathu. N’cadidi kuti, bzingakwanisike lini nthawe zense kumbakumbukira nfundo zense zomwe zafotokozedwazi tikambapfunza. Tsono bzimbakhala bwino kumbapambula nthawe kuti timbakumbukire bzomwe timbawerenga. (1 Tim. 4:15) Tikambakhala na cizolowezi ca kumbakumbukira Fala la Mulungu nthawe zense timbatsimikiza kuti makumbukidwe ya Yahova njakulungamiratu. Timbabvesesa momwe iye ambawonera bzinthu, ndipo timbatsimikiza kuti makumbukidwe yaceyo njacadidi. Tenepo, tin’funika kudzaza m’makumbukidwe mwathu na makumbukidwe ya Mulungu ticiyamba kukhala na makumbukidwe yapsa. (War. 12:2) Ndipo pang’ono na pang’ono, tin’dzayamba kuphatisa basa makumbukidwe ya Yahova pa moyo wathu. w18.11 28 ¶5-6

Paulo adalewa kuti iye na Akristau anzace wa m’magole dzana yakuyambirira akhali ‘anyabasa anzace wa Mulungu,’ thangwe iwo akhapalizira na kupfunzisa wanthu cadidi ca Mulungu. (1 Wak. 3:6) Nsiku zino, ifepano tingakhalembo ‘anyabasa anzace wa Mulungu’ mwa kumbapereka nthawe, mphanvu pabodzi na bzinthu bzakuthupi pakucita basa lakupalizira lomwe Mulungu adatiuza kuti ticite. Kulewa cadidi, umweyu ni mwayi ukulu kwene-kwene! Kuphatisa basa nthawe pabodzi na mphanvu zathu pakupalizira na kupfunzisa wanthu bzipsa bzabwino kumbaticitisa kukhala wakukondwa. Ndipo bzimwebzi ndibzo bzomwe abale azinji omwe ambapfunzisa wanthu Bibliya ambalewa. Mwa ciratizo, ifepano timbakomedwa kwene-kwene tikawona kuti anyakupfunza wathu wa Bibliya abvesesa bzomwe Bibliya limbatipfunzisa, akukhulupira bzomwe apfunza, acinja bzinthu pa moyo wawo ndipo ayambambo kuuza winango bzomwe ankupfunzabzo. Jezu adadekedwambo kwene-kwene pomwe apalizi 70 omwe iye akhadawatumiza, ‘adabwerera wankukondwa’ thangwe rakuti bzinthu bzikhadawafambira bwino.—Lu. 10:17-21. w18.08 18 ¶11-12

Pakuwona kuti wanthu ambatilemekeza thangwe ra luso lathu, ifepano tingayambe kumbabzithemba na kumbakhulupira kwene-kwene luso lathulo. Tenepo, tingafike pa kumbakumbuka kuti tinkubvesesa nkhani ayai cakucitika cinango, napo kuti tiribe umboni bwakukwanira pa nkhaniyo. Nthawe zinango, bzingakhale bzakunesa kwene-kwene kukhala na umboni bwakukwanira pa nkhani inango yakulewa bza m’bale omwe timbabverana lini naye. Tikambandokumbukira bzomwe tidaphonyerana na abale wathu, ifepano tin’dzayamba kumbawawona kuipa. Ndipo bzimwebzi bzingacitise kuti ifepano tikhulupire nkhani iri-yense yomwe tingabve pakulewa bza m’baleyo, napo kuti tiribe umboni bwakulatiza kuti nkhaniyo njacadidi. Kodi tinkupfunza ciyani na nfundo imweyi? Tikambakumbukira ayai kuwona kuipa abale wathu, tin’dzakhulupira nkhani zomwe ziribe umboni bwakukwanira. (1 Tim. 6:4, 5) Tenepo, tin’funika kumbacoseratu makumbukidwe yakuipa yomwe tingakhale nayo mu mtima mwathu, ninga njiru na nsanje. Ndipo tireke kuyebwa kuti Yahova ambafuna kuti timbafune abale wathu na kumbawalekerera na mtima wathu wense.—Wakol. 3:12-14. w18.08 7 ¶15; 8 ¶18

Pakuti ni Yahova omwe adalenga wanthu, tensenefe ndife wace. (Psal. 100:3) Tsono pa wanthu wense omwe adalengedwa, Mulungu adasankhula winango kuti akhale wanthu wace wakupambulika. Mwa ciratizo, kapitulo 135 ya bukhu la Psalymo imbafotokoza kuti mtundu wa Jirayeri wakale ukhali ‘cuma cace cakupambulika.’ (Psal. 135:4) Ndipo Ozeya adaleweratu kuti wanthu winango omwe akhali lini Ajirayeri angadadzakhalambo wanthu wa Yahova. (Oze. 2:23) Polofesiyayi idakwanisika pomwe Yahova adayamba kusankhula wanthu omwe akhali lini Ajirayeri kuti akatonge pabodzi na Kristu kudzulu. (Mab. 10:45; War. 9:23-26) Ndipo Akristau wakudzozedwa na mzimuwa ambacemeredwa kuti ‘mtundu wakucena.’ Iwo ni ‘cuma cakupambulika’ ca Yahova. (1 Pe. 2:9, 10) Tsono tani pakulewa bza Akristau wakukhulupirika omwe ana cidikhiro cakudzakhala na moyo wakusaya kumala pansi pano? Kodi Yahova ambawawona tani? Iye ambawacemerambo kuti ‘wanthu wangu omwe ndawasankhula.’—Zai. 65:22. w18.07 21-22 ¶1, 2

Akristau ambatewezera Kristu omwe ni ciratizo cabwino ca momwe wanthufe tingakhalire wakupasa. (Mat. 20:28) Tenepo ali-wense wa ifepano angabzibvunze kuti: ‘Kodi ndimbatewezera ciratizo ca Jezu na pafupi kwene-kwene?’ (1 Pe. 2:21) Yahova ambakomedwa kwene-kwene tikambatewezera ciratizo cace pabodzi na ca Jezu pa nkhani ya kupasa. Ndipo tingawatewezere mwa kumbakumbukira bzakusaya bza winango na kuwathandiza. Jezu adalatiza kufunika kwa nkhani imweyi pomwe adafotokoza bza there la Msamariya wabwino. (Lu. 10:29-37) Ndipo na thereli, Jezu adapfunzisa ateweri wace kufunika kwa kumbathandiza wanthu wense, bziribe basa kuti ni mbani ayai komwe ambakhala. Kodi munkukumbukira comwe cidacitisa Jezu kufotokoza thereli? Ni mbvunzo omwe Mjuda munango adacita, pomwe adamubvunza kuti: ‘Kodi mnansi wangu mbani?’ Tsono mtawiro wa Jezu umbatipfunzisa kuti penu tin’funa kuti Yahova akomedwe nafe, tin’funika kukhala wakupasa ninga momwe Msamariya ule adacitira. w18.08 16 ¶5, 6

Yahova adapitiriza kutenda ayai kusimba Mariya thangwe ra kukhulupirika kwace pakulera na kusamalira Jezu. Kodi tikudziwa tani bzimwebzi? Tikudziwa thangwe Mulungu adacitisa kuti bzinango mwa bzinthu bzomwe Mariya adalewa na kucita bzinembedwe m’Bibliya. Ndipo bzinkuwoneka kuti Mariya alibe kufamba pabodzi na Jezu m’magole matatu na pakati yomwe iye adapalizira bzipsa bzabwino. Pinango bzimwebzi bzidacitika thangwe ra kuti iye akhali mansiwa, tenepo akhafunika kukhala kwawo ku Nazaleti ndipo alibe kukhala na mwayi wakuwona bzinthu bzabwino bzizinji bzomwe Jezu akhacita. Koma pomwe Jezu adaphedwa, iye akhalipo. (Ju. 19:26) Ndipo pomwe akhanati kutambira mzimu wakucena, anyakupfunza wa Jezu akhadatsonkhana pa Pentekosite ku Jeruzalemu ndipo pa nthaweyo Mariya akhalipombo. (Mab. 1:13, 14) Bzinkuwoneka kuti Mariya adadzozedwambo na mzimu wakucena pabodzi na anyakupfunzawo, bzomwe bzinkuthandauza kuti iye adapasidwambo mwayi wakukakhala na Jezu kudzulu kwa muyaya. Kulewa cadidi, Mariya adasimbidwa na kutendedwa thangwe ra kukhulupirika kwace! w18.07 6 ¶11; 7 ¶14

Jezu adaphatisa basa mitemo kuti athandize anyakupfunza wace kuwona kuti cinthu ciri-cense cimbakhala na bzakutewera bzace. Mwa ciratizo, iye adawathandiza kuwona kuti ukali bungacitise munthu kucita bzinthu bzakuipa ndipo kukhala na makumbukidwe ya unzazi kungacitise munthu kucita upombo. (Mat. 5:21, 22, 27, 28) Tenepo, tikambabvuma kutsogoleredwa na mitemo ya Yahova, cikumbu-mtima cathu cin’dzakhala cakupfunzisidwa bwino ndipo tin’dzacita bzakusankhula bzomwe bzin’dzalemekezesa Mulungu. Nthawe zinango, Akristau angasiyane makumbukidwe pa nkhani inango, napo kuti wense ana cikumbu-mtima cakupfunzisidwa na Bibliya. Mwa ciratizo, pinango iwo angasiyane makumbukidwe pa nkhani ya kumwa. N’cadidi kuti Bibliya limbaletsa lini kumwa, koma iro limbaticenjeza kuti tin’funika kumbamwa na malire. (Mim.  20:1; 1 Tim. 3:8) Tenepo, pinango Mkristau omwe cikumbu-mtima cace cimbamubvumiza kumwa angakumbuke kuti palibe bvuto liri-lense kucita bzimwebzo. Tsono kodi bziridi tenepo? Ne. Napo kuti ana ufulu bwakucita bzomwe an’funa pa nkhaniyi, iye an’funika kumbakumbukirambo bza cikumbu-mtima ca winango. w18.06 18 ¶10-11

Jezu adacenjeza anyakupfunza wace kuti asamale na Afarizi, Asaduki na ateweri wa cipani ca ndale ca Herode. (Mat. 16:6, 12) Iye adauza anyakupfunza wace bzimwebzi patandopita nsiku zitatu kucokera pomwe iye adalamba kukhala mambo. Bzipembedzo bzikapitira nkhani za ndale, kawiri-kawiri bzimbacitisa kuti bzinthu bziipiretu. Ndipopa Jezu adauza anyakupfunza wace kuti aleke kumbapitira nkhani za ndale. Limweri ni libodzi mwa mathangwe yomwe yadacitisa kuti akulu-akulu wa ansembe pabodzi na Afarizi afune kumupha. Iwo akhagopa kuti wanthu angadatetekera Jezuyo, acisiya kumbawatewera, bzomwe bzingadacitisa kuti iwo aluze udindo bomwe akhanabo ku cipembedzo na m’bzipani bza ndale. Iwo adati: ‘Tikamulekerera kuti apitirize kumbacita bzimwebzi, wanthu wense an’dzamukhulupira ndipo Aroma an’dzabwera, acidzatenga mbuto yathu pabodzi na mtundu wathuyu.’ (Ju. 11:48) Tenepo, mkulu wa ansembe Kaifasi adacita makonzedwe yakuti Jezu aphedwe.—Ju. 11:49-53; 18:14. w18.06 7 ¶12-13

Nyambzo inango yomwe Sathani ambaiphatisa basa ni nkhani za matsenga. Nsiku zino, Sathani ambacitisa wanthu kucita bza matsenga, mwakuphatisa basa bzipembedzo bzakunama pabodzi na masenzeka. Mafilme, masenzeka ya pa interneti na bzinthu bzinango, bzingacitise kuti wanthu ambadekedwe na bza matsenga. Kodi tingatcenkhe tani nyambzo imweyi? Gulu la Yahova limbapereka lini ndandanda ya masenzeka yomwe tin’funika kusankhula ayai kutcenkha, tenepo, ifepano tin’funika kupfunzisa cikumbu-mtima cathu kuti timbakwanise kucita bzakusankhula mwakubverana na mitemo ya Yahova. (Waheb. 5:14) Ifepano tin’dzakwanisa kucita bzakusankhula bzanzeru tikabvera malango yomwe Paulo adayalewa mu vesi la lero. Tenepo, tikambasankhula masenzeka, tin’funika kumbabzibvunza kuti: ‘Kodi inepano ndimbacita bzomwe ndimbalewa? Kodi n’ciyani comwe anyakupfunza wangu wa Bibliya pabodzi na wanthu omwe ndimbawapalizira angakumbuke, atawona mtundu wa masenzeka yomwe ndimbasankhula?’ Tikambacita bzomwe ifepano timbauza anzathu, bzin’dzakhala bzakusaya kunesa kutcenkha nyambzo za Sathani.—1 Ju. 3:18. w18.05 19 ¶13

Kodi tingatewezere tani Paulo? Cakuyamba, tin’funika kucita nyongo yakugumana wanthu omwe ana ‘makumbukidwe yabwino yomwe yangawathandize kudzagumana moyo wakusaya kumala.’ Caciwiri, ifepano tin’funika kumbakumbira Yahova kuti athandize wanthu wa mitima yabwino kuti ambatibvesere tikambawapalizira. (Mab. 13:48; 16:14) Bzimwebzi ndibzo ambacita Silvana omwe ni mpainiya kwa magole pafupi-fupi 30. Iye adati: “Ndinati kuyenda kukapalizira, ndimbapemba kwa Yahova kuti andithandize kumbawona wanthu ninga momwe iye ambawawonera.” Timbakumbirambo Yahova kuti wanjo atithandize kugumana wanthu omwe ankufunisisa kubva bza iye. (Mat. 10:11-13; Cibv. 14:6) Robert, omwe ni mpainiya kwa magole yakupitirira 30 adati: “Mpsakudekeza kumbaphata basa pabodzi na wanjo omwe ambadziwa bzomwe bzinkucitikira mwenekaciro nyumba ali-wense.” Cacitatu, ifepano tin’funika kumbawona bzinthu bzabwino bzomwe wanthu ambacita, pabodzi na mtima wawo wakufuna kutumikira Yahova. Mkulu wa gwere munango wakucemeredwa Carl, adati: “Ndikambapalizira munthu, ndimbacita nyongo yakuwona tubzinthu tung’ono-tung’ono tomwe munthuyo ankucita ninga kumwetulira, momwe ankundinyang’anisira ayai akacita mbvunzo wakucokera pansi pa mtima, kuti ndizindikire penu iye ankufunisisadi kubva ayai ne.” Tikambacita bzimwebzi, ifepano tin’dzabala ‘bzisapo mwakupirira’ ninga momwe Paulo adacitira. w18.05 7 ¶13; 8 ¶15

Kawiri-kawiri, ifepano timbadekedwa kwene-kwene tikabva kuti munthu omwe tidamuthandiza ankupitiriza kutumikira Yahova mwakukhulupirika. Ndipo mpostolo Juwau adalewa kuti: ‘Palibe comwe cimbandikondwesa kwene-kwene kuposa kubva kuti wana wangu ankupitiriza kufamba m’cadidi.’ (3 Ju. 4) Apainiya azinji ambakhala wakukondwa kwene-kwene akawona kuti munthu omwe iwo adamupfunzisa cadidi m’magole ya m’mbuyo, ankupitiriza kutumikira Yahova mwakukhulupirika, ndipo pinango ankutumikirambo ninga mpainiya. Tenepo, tikawona kuti apainiya asunama, ifepano tin’funika kumbawakumbusa bzinthu bzabwino bzomwe iwo ambacita pakuthandiza winango. Anyakakunyang’anira dera azinji pabodzi na azikazawo, ambalewa kuti cinthu comwe cimbawakondwesa kwene-kwene pambuyo pakuzungira gwere, ni kutambira katsamba kakuwatenda. Ndipo bzimwebzi bzimbacitikambo na akulu wa gwere, mamisiyonario, apainiya pabodzi na abale na mpfumakazi omwe ankutumikira pa Beteli, omwe ambatumikira Yahova mwakukhulupirika. Tikambatenda abalewa, ifepano tingawalimbise m’njira yomwe pinango tingaikumbukire lini. w18.04 24-25 ¶14-15

Salomau alibe kubvera cakutongaci. M’mbuto mwace, iye adakhala na akazi wakukwana 700 na amakhadzi 300! (1 Wam. 11:3) Azinji mwa akazi amwewa akhali lini wa mtundu wa Jirayeri ndipo akhanamata mirungu yakunama. Tenepo, pomwe Salomau adalowola akazi amwewa adalatiza kuti alibe kubvera cakutongaci. (Bzak. 7:3, 4) Pang’ono na pang’ono, Salomau adadzasiya kufuna cakutonga ca Yahova. Ndipo patsogolo pace, iye adadzacita bzinthu bzakuipa kwene-kwene. Mwa ciratizo, iye adamangira mphatso mirungu yakunama Kimosi pabodzi na Asitereti omwe akhali mulungu wacikazi. Ndipo iye adayambambo kunamata mirungu yakunamayi pabodzi na azikazace. Kuti bzinthu bziipiretu Salomau adakamanga mphatsozi ku phiri lomwe likhali pafupi na Jeruzalemu, mbuto yomwe iye akhadamanga templo ya Yahova! (1 Wam. 11:5-8; 2 Wam. 23:13) Pinango Salomau akhakumbuka kuti Yahova angadamulekerera pa bzakuipa bzense bzomwe iye akhacita mwa kumbayenda kukapereka nsembe ku templo. Tsono Yahova alibe kulekerera nkhaniyi. w18.07 16 ¶7; 17-18 ¶8, 9

Sathani angakupumpseni mwakuphatisa basa magunkha yakulewa bza Yahova. Sathani ambafuna kuti imwepo mumbakumbuke kuti Yahova ambakufunani lini, nakuti palibe omwe anamwe basa. Bzimwebzi ndibzo bzomwe bzidacitikira Ida, mtsikana wa magole 19 yakubadwa. Iye adati: “Kawiri-kawiri ndikhawona ninga kuti Yahova ali lini pafupi nane, nakuti iye ambafuna lini kukhala Xamwali wangu.” Kodi n’ciyani comwe iye ambacita yakambamubwerera makumbukidweya? Iye adalewa kuti: “Mitsonkhano imbalimbisa kwene-kwene cikhulupiro cangu. Ndikhayenda ku mitsonkhanoko, koma ndikhapereka lini mitawiro, thangwe ndikhakumbuka kuti palibe munthu omwe angadatetekera bzomwe ndingadalewabzo. Koma tsapano, ndimbakonzekera mitsonkhano, ndipo ndimbacita nyongo yakupereka mitawiro maulendo mawiri ayai matatu.” Mkhotco wa acikunda umbacinja lini, penu ni mkulu umbapitiriza kukhala mkulu ayai penu ni mng’ono umbapitirizambo kukhala mng’ono. Tsono ciratizo ca Ida, cinkutithandiza kuwona kuti cikhulupiro cathu n’cakusiyana na mkhotcoyo. Cikhulupiro cathu cingakule ayai cingacepe, cingakhale camphanvu ayai cingatepe. (Mat. 14:31; 2 Wat. 1:3) Tenepo, kuti ‘mkhotco wa cikhulupiro’ cathu umbatikhotcerere bwino, ifepano tin’funika kuukuza na kuulimbisa! w18.05 24-25 ¶12-14

Mulindiri wa m’kawoko ule adacinja khalidwe lace acikumbira thandizo kokha pambuyo pa citeketeke cire. (Mab. 16:25-34) Mpsibodzi-bodzimbo nsiku zino, wanthu winango omwe ambafuna lini kutetekera mafala ya m’Bibliya angacinje khalidwe lawo acilinga thandizo, cikawacitikira cinthu cinango pa moyo wawo. Mwa ciratizo, wanthu winango angasuname thangwe ra kumala kwa basa. Ndipo winango angasuname kwene-kwene thangwe rakuti agumanidwa na matenda makulu ayai afedwa wacibale wawo. Bzikacitika bzinthu ninga bzimwebzi, wanthu angayambe kumbabzibvunza mibvunzo yomwe akhanati abzibvunza kale pa moyo wawo. Ndipo pinango iwo angabzibvunzembo kuti, ‘Kodi ndin’funika kucita ciyani kuti ndidzapulumuke?’ Pinango iwo mpaka angafune kutetekera bzipsa bza Umambo bzakupasa cidikhiro. Tenepo, tikapitiriza kumbapalizira mwakukhulupirika, tin’dzagumana wanthu omwe an’dzabvuma mafala ya mtsangalazo yomwe timbapalizira.—Zai. 61:1. w18.05 12 ¶10-12

Nsiku zino, Sathani ankumpsinkha m’maso wanthu azinji kuti aleke kuzindikira kuti iwo mbakapolo wa cipembedzo cakunama, wa bzinthu bzakuthupi na wa nkhani za ndale. (2 Wak. 4:4) Tsono ifepano tina mwayi wakutewezera Jezu pa kuthandiza wanthu amwewa kuti afike pa kudziwa Yahova, Mulungu wa ufulu, acimutumikira. (Mat. 28:19, 20) Basa lakupalizira liribe kupusa. M’mbuto zinango wanthu ambafuna lini kubva bza Mulungu ndipo winango mpaka ambafika pakukalipa tikafuna kuwapalizira. Tsono pakuti Yahova an’funa kuti timbapalizire, ifepano tin’funika kumbabzibvunza kuti: ‘Kodi ndingaphatise basa ufulu bomwe ndinabobu kuti ndicite bzizinji pakutumikira Yahova?’ Mpsakulimbisa kwene-kwene kuwona kuti atumiki azinji wa Yahova ambazindikira kuti kumala kwa mkonzedwe uno kwafendera kwene-kwene ndipo iwo ambasankhula kukhala na moyo wakusaya kufuna bzizinji, acimbatumikira ninga apainiya. (1 Wak. 9:19, 23) Winango ambatumikira ninga apainiya m’gwere lawo, pomwe winango ambayenda kukatumikira m’magwere yomwe yankufunikira thandizo. Kulewa cadidi, mpsakukondwesa kwene-kwene kuwona kuti abale na mpfumakazi zizinji ankuphatisa basa ufulu bwawo kuti atumikire Yahova!—Psal. 110:3. w18.04 13 ¶13-14