Setembro

Jezu adabva nsisi kwene-kwene pomwe adawona Marta na Mariya ankulira thangwe ra kufedwa m’bale wawo, Lazaro. Tenepo, ‘Jezu adagwesa misozi.’ (Ju. 11:32-35) Tsono iye alibe kulira kokha thangwe rakuti akhadaluza xamwali wace wa pa mtima, pakuti akhadziwa kuti angadamulamusa. Koma iye adalira thangwe ra kubvesesa na kutokonyedwa na kuwawidwa komwe axamwali wace wale akhabva. Napo ifepano ndife lini wakulungamiratu ninga momwe Jezu akhaliri, koma kudziwa kuti iye akhabvera nsisi wanthu kumbatilimbisa kwene-kwene. Tenepo, ifepano timbamufuna thangwe iye akhabvera nsisi wanthu. Ndipo kudziwa kuti iye tsapano akutonga ninga Mambo mu Umambo bwa Mulungu kumbatilimbisa kwene-kwene. Tsapanopapa iye animalisa kubonera kwense. Pakuti iye adakhalambo kale pano pa dziko la pansi, ni mthandizi mkulu wa wanthu pa nkhani yakumalisa kulira na kubonera kwawo komwe kumbayambisidwa thangwe ra utongi bwakuipa bwa Sathani. Tenepo, ndife wakusimbidwa thangwe tina Mtongi omwe ambatibvera ‘nsisi pa kutepa kwathu.’—Waheb. 2:17, 18; 4:15, 16. w19.03 17 ¶12-13

Ifepano timbacita mbali yakuthandiza wanthu kuti apfunze bza Mulungu, koma timbacita lini mbali ikulu ya basali yomwe njakuthandiza wanthuwo kukula. (1 Wak. 3: 6, 7) Yahova ni omwe ambakwewa wanthu kuti abwere kwa iye. Tenepo, munthu ali-wense angabvume ayai angalambe bzipsa bzabwino mwakubverana na momwe mtima wace uliri. (Mat. 13:4-8) Kumbukirani kuti wanthu azinji wa mu nthawe ya Jezu alibe kubvuma bzipsa bzabwino, napo kuti iye akhali Mpfunzisi mkulu kuposa wense omwe adakhala kale pa dziko la pansi! Tenepo, tin’funika lini kumbakalipa penu wanthu omwe tikuwathandiza kupfunza bza Mulungu ankutetekera lini bzipsa bzabwino. Tikapitiriza kumbabvera nsisi wanthu omwe timbawapalizira, tin’dzagumana phindu likulu kwene-kwene. Tin’dzakomedwa kwene-kwene na basa lathu lakupalizira. Tin’dzagumana cikondweso cikulu comwe cimbabwera thangwe ra kupasa. Ndipo tin’dzathandiza wale omwe ana ‘makumbukidwe yabwino yomwe yangawathandize kukagumana moyo wakusaya kumala,’ kubvuma bzipsa bzabwino. (Mab. 13:48) Tenepo, ‘pomwe tikanawo mpata, mbaticitireni wense bzabwino, maka-maka abale wathu wa m’cikhulupiro.’ (Wag. 6:10) Tikacita bzimwebzi tin’dzakondwesa Baba wanthu wakudzulu.—Mat. 5:16. w19.03 25 ¶18-19

Mambo Davide adanemba kuti: ‘Yahova ni mkulu ndipo adathemera kutumbizidwa.’ (Psal. 145:3) Iye akhafuna Yahova, ndipo lufoyi lacero lidamucitisa kuti amutumbize ‘pakati pa gwere.’ (1 Nkha. 29:10-13; Psal. 40:5) Nsiku zino, njira ibodzi yakutumbizira Yahova ni kupereka mitawiro pa mitsonkhano yathu ya gwere. Tensenefe timbakomedwa kwene-kwene tikambabva mitawiro yakusiyana-siyana pa mitsonkhano yathu. Tembakomedwambo na mitawiro yomwe wana ambaipereka na mafala yawo-yawo. Timbalimbisidwa na mitawiro ya munthu omwe akupfunza cadidi ca m’Bibliya. Ndipo timbadekedwa na wale omwe ambacita nyongo yakupereka mitawiro, napo mbamanyazi ayai akupfunza cirewedwe cathu. (1 Wat. 2:2) Kodi tingalatize tani kuti tikutenda nyongo yawo? Cakuyamba tin’funika kumbawatenda pambuyo pa mitsonkhano thangwe ra mitawiro yawo yakulimbisa. Caciwiri ifepano tin’funikambo kumbapereka mitawiro. Tenepo, tin’funika lini kumbandodikhira kutambira cilimbiso pa mitsonkhano yathu, koma timbaperekembo cilimbisoco.—War. 1:11, 12. w19.01 8 ¶1-2; 9 ¶6

Amuna khumi omwe akhana mapere, akhalibe cidikhiro ciri-cense cakuti nthenda yawo ingadadzapozedwa. Koma nsiku inango, iwo adawona Jezu na patali. Pa nthawe imweyi iwo akhadabva kale kuti Jezuyo akhapoza matenda ya mtundu uli-wense. Ndipopa iwo akhana citsimikizo cense cakuti angadawapozambo. Tenepo, iwo adakuwa aciti: ‘Jezu, Mpfunzisi, tibvereni nsisi!’ Ndipo wense adapozedwadi. Tinkupenukira lini kuti wense adatenda kwene-kwene kudeka mtima komwe Jezu adawalatiza. Koma ni m’bodzi yekha omwe adalatiza kutenda bzomwe adacitiridwabzo, mwa kuyenda kukauza Jezu momwe akhabvera mu mtima mwace. Thangwe ra kupozedwako, mwamunayo adafika mpaka pa kutumbiza Mulungu ‘mwakucita kukuwa.’ (Lu. 17:12-19) Ninga Msamariya ule, ifepano timbafuna kutenda wale omwe ambatidekera mtima. Yahova ni ciratizo cabwino kwa ifepano pa nkhani ya kutenda. Ndipo njira ibodzi ya momwe iye ambalatizira kutendako ni kusimba wale omwe ambacita bzinthu bzomwe bzimbamukondwesa. (2 Sam. 22:21; Psal. 13:6; Mat. 10:40, 41) Ndipo Bzinembo bzimbatilimbisa kuti tikhale ‘anyakutewezera Mulungu ninga wana wakufunidwa.’ (Wayef. 5:1) Tenepo, thangwe likulu lomwe limbaticitisa kumbatenda winango ni kufuna kutewezera ciratizo ca Yahova. w19.02 14 ¶1-2, 4

Mtsikana munango omwe ali pa xikola, akulamba mwaulemu kugumanika pa msinda omwe ungadacitika pa nsiku ya feriado. Mulumbwana munango wamanyazi, ankupalizira nyumba na nyumba ndipo iye ankufika pamui pa mwanzace wa ku xikola omwe adanyoza kale Mboni za Yahova m’mbuyomu. Mwamuna munango omwe ambaphata basa na nyongo kuti asamalire banja lace, ankuuzidwa na patrau wace kuti acite cinthu cinango cacinyengo ayai cakusaya kuthemera. Napo kulamba kubvera patrauyo kungamucitise kuluza basa, mwamunayo ankuuza patrauyo kuti iye an’funika kukhala wakukhulupirika na wakubvera lamulo, thangwe Mulungu ambafuna kuti atumiki wace akhale wakukhulupirika. (War. 13:1-4; Waheb. 13:18) Kodi ni khalidwe liponi lomwe imwepo mukuwona kuti wanthu atatuwa adalilatiza? Mwakusaya kupenukira, mukuwona kukhwimika na kukhulupirika. Wensene alatiza kuti mbakukhulupirika kwa Yahova, thangwe alamba kuphonyera mitemo yace. Kukhulupirika kwawathandiza kucita bzinthu bzakuthemera. Mwakusaya kupenukira, Yahova angakomedwe kwene-kwene na ali-wense wa abalewa thangwe ra kukhala wakukhulupirika. Ninga abalewa, ifepano tin’funikambo kukondwesa Baba wathu wa kudzulu. w19.02 2 ¶1-2

Cakutonga cikhakhotcerera maka-maka wale omwe angadakwanisa lini kubzikhotcerera wokha, ninga nkhungwa, akazi mansiwa na alendo omwe akhakhala nawo pabodzi. Ayeruzi wa mu Jirayeri akhauzidwa kuti: ‘Lekani kumbayeruza mulendo ayai nkhungwa mwakusaya cirungamo, ne kuphatira cakubvala mkazi mansiwa thangwe ra mangawa yace.’ (Bzak. 24:17) Yahova adalatiza kuti akhabvera nsisi wanthu omwe akhawoneka kuti mbakusaya kukhotcerereka mu mzinda. Ndipo akhalanga wale omwe akhawacitira bzinthu mwakusaya cirungamo. (Kuf. 22:22-24) Yahova ambafuna kuti wale omwe ana udindo ambasamalire mwa lufoyi wense omwe ambawanyang’anira. Iye ambawenga kugonana pacibale ndipo ambafuna kuti wense ambakhotcereredwe na kucitiridwa bzinthu mwacirungamo. (Mwam. 18:6-30) Ndipo tikadziwa kuti Yahova ambatisamalira mwacirungamo, lufoyi lathu kwa iye limbathumizirika. Tenepo, tikambafuna Mulungu pabodzi na malamulo yace yakulungama, timbalimbisidwa kucitira winango bzinthu mwa lufoyi na mwa cirungamo. w19.02 24-25 ¶22-26

Kumbukirani ciratizo ca momwe tingabzikhotcerere ku makumbukidwe yakuipa ya Sathani. Yahova adatiuza kuti ‘unzazi na cakupswipisa ca mtundu uli-wense’ bzin’funika lini kulewedwa pakati pathu. (Wayef. 5:3) Tsono n’ciyani comwe tingacite penu anzathu wa kubasa ayai wa ku xikola ayamba kufotokoza nkhani zakulewa bza unzazi? Cikumbu-mtima cathu comwe ciri ninga mulindiri, cin’dzaticenja bza ngoziyo. (War. 2:15) Kodi tin’dzatetekera n’cenjezoyo? Pinango tingayezedwe na axamwali wathu kuti tibvesere nkhani ayai tiwone bzithunzi-thunzi bzomwe iwo ankuwonesana. Bzimwebzi bzikacitika bzingakhale bwino kutcenkha ngoziyo, mwa kucinja macezayo ayai kucoka pa mbutoyo. Kuti tireke kupumpsidwa na axamwali wathu, tin’funika kukhala wakukhwimika. Tin’funika lini kuyebwa kuti Yahova ambawona nyongo yathu, ndipo iye an’dzatipasa mphanvu na nzeru zakufunikira kuti tilimbane na makumbukidwe ya Sathani.—2 Nkha. 16:9; Zai. 40:29; Tiy. 1:5. w19.01 17-18 ¶12-13

Salomau omwe akhali munthu wakudala kwene-kwene na wamphanvu kuposa wanthu wense omwe adakhala na moyo pa dziko la pansi, adati: ‘Lekani ndiyeze kukondwa kuti ndiwone ubwino bwace.’ (Mpal. 2:1-10) Tenepo Salomau adamanga nyumba zakuti bwerani mudzawone, adakhala na minda mikulu-mikulu pabodzi na zunde, ndipo adakwanisa kucita ciri-cense comwe akhakhumba pa moyo wace. Kodi iye adakondwadi? Mtawiro unkugumanika mu vesi la lero. Kodi mukupfunza ciyani na ciratizo ca Salomau? Yahova an’funa lini kuti bzimwebzi bzikucitikireni. Iye ambafuna kuti mumutetekere na kumubvera. Kucita bzimwebzi kumbafuna cikhulupiro, tsono imwepo mun’dzadandaula lini thangwe ra bzakusankhula bzomwe munkucita pa moyo wanu mwakubverana na cikhulupiro canu. Ndipo Yahova an’dzayebwa lini ‘lufoyi lomwe mudalatiza pa dzina lace.’ (Waheb. 6:10) Tenepo citani nyongo yakulimbisa cikhulupiro canu. Mukacita bzimwebzo mun’dzacita bzakusankhula bzabwino pa moyo wanu ndipo mun’dzawona kuti Baba wanu wakudzulu ambakufunirani bzabwino.—Psal. 32:8. w18.12 19 ¶14-15

Munthu omwe ana makumbukidwe yauzimu ambakhulupira Mulungu ndipo ambawona bzinthu ninga momwe iye ambabziwonera. Iye ambabvuma kutsogoleredwa na Yahova ndipo ambamubvera. (1 Wak. 2:12, 13) Davide ni ciratizo cabwino pa nkhani ya kukhala na makumbukidwe yauzimu. Iye adaimba kuti: ‘Yahova ni cipande cangu.’ (Psal. 16:5) Davide adatenda kwene-kwene ‘cipande’ cace, ayai uxamwali bomwe akhanabo na Mulungu, ndipo adamuwona ninga pakuthawira. (Psal. 16:1) Ndipopa iye adalewa kuti: ‘Mtima wangu unkukondwa.’ Mafalaya yankulatiza kuti palibe cinthu comwe cikhakondwesa Davide kuposa uxamwali bwace na Yahova! (Psal. 16:9, 11) Munthu omwe ambalinga kukhala na kobiri zizinji ayai kufuna kubvekera, ambakhala lini wakukondwa ninga momwe Davide akhaliri. (1 Tim. 6:9, 10) Tenepo, imwepo mukambakhulupira Yahova na kumutumikira, mun’dzakhala na moyo wakukondwa na wathandauzo. Tsono n’ciyani comwe mungacite kuti mulimbise cikhulupiro canu? Mun’funika kumbalewalewa na Yahova mwa kuwerenga Fala lace, kukhala na nthawe yakumbawona bzinthu bzomwe iye adalenga, kukumbukira bza makhalidwe yace, pabodzi na lufoyi lomwe iye ambalilatiza kwa imwepo.—War. 1:20. w18.12 23 ¶7-8

Na mafalaya, Paulo akhandofotokoza lini bza malowozi ninga nkhani, koma akhauza Akristau kuti ambalemekeze malowozi, ayai kuyawona kukhala yakufunika. Tenepo penu imwepo muli pa banja, kodi mumbayawona tani malowozi yanu? Penu imwepo mumbawona malowozi yanu kukhala yakufunika, mukutewezera ciratizo cabwino ca Jezu omwe adalemekeza malowozi. Pomwe Afarizi adamubvunza bza nkhani ya kulambana, iye adafotokoza bzomwe Mulungu adalewa pa malowozi yakuyambirira. Iye adati: ‘Thangwe ra bzimwebzi mwamuna an’dzasiya baba wace na mai wace, acidzaphatana na mkazace, ndipo awiriwo an’dzakhala thupi libodzi.’ Jezu adathumizira kuti: ‘Comwe Mulungu wacimanga pabodzi, munthu aleke kucilekanisa.’ (Mar. 10:2-5, 9-12; Ciy. 2:24) Jezu adatawiriza kuti Mulungu ndiye omwe adalinganiza malowozi yakuyambirira, ndipo akhafuna kuti malowoziyo yakhale mpaka kale-kale. Tenepo, pomwe Mulungu adakhazikisa malowozi yakuyambirirayo, iye alibe kuuza Adamu na Eva kuti adzalambane. Koma cakulinga cace cikhali cakuti ‘awiriwo’ akhale na banja la muyaya. w18.12 9-10 ¶2-4

Pomwe tidayamba kupfunza cadidi ca m’Bibliya, tidapfunza kuti mpsakufunika kumbabvera mitemo yakuyambirira ya Yahova. Tikapitiriza kuyenda patsogolo mwauzimu, tin’dzapfunza bzizinji bza makumbukidwe yace, bzomwe ambafuna, bzomwe ambafuna lini na momwe iye ambawonera bzinthu. Tenepo tikabvuma kuti makumbukidwe ya Yahova yaphate basa pa bzakusankhula bzathu pabodzi na bzicito bzathu, makumbukidwe yacewo yan’dzaphata basa pa moyo wathu. Napo ifepano timbapfunza bza makumbukidwe ya Yahova, koma nthawe zinango bzimbatinesa kukumbuka ninga momwe iye ambakumbukirira thangwe ndife wakuperewera. Mwa ciratizo, ifepano timbadziwa momwe Yahova ambawonera nkhani ya makhalidwe yabwino, kufunisisa bzinthu bzakuthupi, basa la kupalizira, kuphatisa basa mulopa mwakuphonyeka na bzinthu bzinango. Koma pinango tingakwanise lini kubvesesa thangwe ranyi iye ambawona tenepoyo bzinthu bzimwebzi. Tsono tingacite tani kuti tipfunze bzizinji bza makumbukidwe ya Yahova? Ndipo kodi bzimwebzi bzingatithandize tani kuti timbacite bzinthu bzabwino kuyambira tsapano mpaka kutsogolo? Mwa kucinja makumbukidwe yathu. Bzimwebzi bzikuthandauza kuti ifepano tin’funika kupfunza Fala la Mulungu, kubvesesa makumbukidwe yace, kuyakumbukira na kucita nyongo yakukhala na makumbukidwe ya Mulungu. w18.11 27-28 ¶2-4

Habakuki adakhala mu nthawe yakunesa kwene-kwene, ndipo wanthu wa m’dzikolo akhali wakuipa na waciwembo, ndipo bzimwebzi bzikhamusunamisa kwene-kwene. Ndipo kuli-kwense komwe iye akhanyang’anisa, akhawona Ajirayeri akucitirana ciwembo na bzinthu bzakusaya cirungamo. Tenepo, Habakuki akhabzibvunza kuti: ‘Kodi kuipaku kun’dzamala lini? N’thangwe ranyi Yahova akulekerera nthawe itali kuti amalise bzimwebzi?’ Iye akhabziwona kuti akhalibe na basalo. Tenepo, iye adakumbira Yahova kuti acite ciri-cense pa nkhaniyo. Pinango Habakuki adayamba kukumbuka kuti Yahova akhalibe basa na wanthu wace ayai kuti palibe comwe angadacita. Kodi imwepo mudabzibvambo kale ninga mpolofetayu? Kodi mibvunzo yomwe Habakuki adacitayi, inkulatiza kuti iye akhadaleka kukhulupira Yahova pabodzi na mapiciro yace? Ne na pang’onopo! Habakuki akhabvunza Yahova kuti amuthandize kubvesesa na kumalisa mabvuto yomwe akhagumana nayo, bzomwe bzikulatiza kuti iye akhamukhulupira. Bzinkuwoneka kuti Habakuki akhana thupo kwene-kwene ndipo akhasaya kuti angadaphata muti wanyi. Iye akhabvesesa lini thangwe lomwe likhacitisa Yahova kulekerera bzinthu bzakuipa kwa nthawe itali. w18.11 16 ¶4-5

Pedru na Andereya akhali akhombwe, ndipo pomwe Jezu adawacemera kuti akhale anyakupfunza wace, iwo adasiya malonda yawoyo. (Mat. 4:18-20) Tsono bzimwebzi bzinkuthandauza lini kuti imwepo mukapfunza cadidi, mun’funika kusiya basa lanu. Thangwe munthu an’funika kuphata basa na kusamalira banja lace. (1 Tim. 5:8) Koma mukapfunza cadidico, makumbukidwe yanu yakufuna bzinthu bzakuthupi yambacinja. Imwepo mun’dzazindikira cinthu comwe n’cakufunika kwene-kwene pa moyo. Onani ciratizo ca mtsikana munango wakucemeredwa Maria. Iye akhakomedwa kwene-kwene kucita masenzeka manango yakucemeredwa golf kuyambira ali mwana. Tsono na kupita kwa nthawe iye adayamba kupfunza Bibliya. Iye adakomedwa kwene-kwene na bzomwe adapfunzabzo ndipo adayamba kubziphatisa basa pa moyo wace. Maria adazindikira kuti mpsakunesa kulinga kukhala pa uxamwali na Yahova ndipo pa nthawe ibodzi-bodziyo kulinga kukhala wakubvekera pa masenzeka yace. (Mat. 6:24) Tsapano, Maria ankucita upainiya ndipo iye adalewa kuti “ngwakukondwa kwene-kwene kuposa kale-kale ndipo moyo wace ngwathandauzo.” w18.11 6 ¶9-10

Pomwe Jezu akhana magole 30 yakubadwa, adasiya basa lakusema matabwa aciyamba basa lakupfunzisa wanthu pakuti akhadziwa kuti likhali lakufunika kwene-kwene. Iye adalewa kuti kupalizira bzipsa bza Umambo bwa Mulungu ndiro thangwe lomwe Mulungu akhadamutumizira pansi pano. (Mat. 20:28; Lu. 3:23; 4:43) Jezu akhawona kupalizira bzipsa bzabwino kukhala cinthu cakufunika kwene-kwene pa moyo wace, ndipo iye akhafuna kuti winango acitembo bzibodzi-bodzibzo. (Mat. 9:35-38) Azinji wa ifepano ndife lini anyakusema matabwa, koma tensenefe ndife apfunzisi thangwe timbapfunzisa winango bzipsa bzabwino. Limweri ni basa lakufunika kwene-kwene ndipo Mulungu ambalicitambo. Ndipopa, ifepano timbacemeredwa ‘anyabasa anzace wa Mulungu.’ (1 Wak. 3:9; 2 Wak. 6:4) Ndipo timbabverana na bzomwe nyakunemba bukhu la Psalymo adalewa. Iye adati: ‘Mafala yanu yense ni cadidi.’ (Psal. 119:159, 160) Fala la Yahova ndacadidi. Ndipopa tin’funika kumbaphatisira ‘bwino basa fala la cadidi’ mu utumiki bwakumunda. (2 Tim. 2:15) Ndipo tin’funika kucita nyongo yakuphatisa bwino basa Bibliya pabodzi na bzinthu bzomwe tinabzo kuti tipfunzise wanthu pakulewa bza Yahova, Jezu na Umambo bwa Mulungu. w18.10 9 ¶1, 2

Mwamuna akambatewezera lufoyi la Jezu Kristu, omwe ni msolo wace, bzimbakhala bzakusaya kunesa kuti mkazi wace amulemekeze ‘kwene-kwene.’ (Wayef. 5:22-25, 33) Ndipo mkaziyo akambalemekeza mwamuna wace, iye an’dzacita nyongo yakubvesesa makumbukidwe ya mwamunayo. Abereki akambalemekezana na kudekerana mtima, iwo ambakhala ciratizo cabwino kwa wana wawo. Ndipo iwo an’funikambo kupfunzisa wana wawo kuti ambacite bzinthu mwakukumbukira winango na kuwadekera mtima. Mwa ciratizo, abereki an’funika kupfunzisa wana wawo kuti aleke kumbathamanga-thamanga mu Nyumba ya Umambo. Ayai akakhala pa madyo, abereki an’funika kuuza wanawo kuti ambapase mpata acikulire kuti akhale wakuyamba kutenga cakudya. Kulewa cadidi, munthu ali-wense m’gwere an’funikambo kumbathandiza abereki. Ndipo tin’funika kumbatenda mwana akaticitira cinthu cinango cabwino. Kucita bzimwebzi kun’dzacitisa mwanayo kubzibva bwino na kuwona kufunika kwa mafala ya m’Bibliya yakuti: ‘Kupasa kumbabweresa cikondweso cikulu kuposa kutambira.’ w18.09 28 ¶5, 6

Malango yomwe timbatambira kwa Jezu Kristu, omwe ni Mambo wathu, yambatithandiza kuyambira lero mpaka kutsogolo. Kumbukirani bzisimbo bzomwe mwabzigumana thangwe ra kuteweza kucinja komwe kwacitika tsapanopapa m’gulu la Yahova. Ndipo pa kunamata kwanu ninga banja, cezeranani bza phindu lomwe banja lanu lagumana thangwe ra kucinja kwa mitsonkhano ayai utumiki bwakumunda. Tikambakumbukira kuti kuteweza malango ya m’gulu la Yahova kumbatibweresera bzakutewera bzizinji bzabwino, tin’dzakhala wakukondwa ndipo tin’dzaneseka lini kuyateweza. Mwa ciratizo, pakuti tinkudinda lini pomwe mabukhu mazinji ninga momwe tikhacitira m’mbuyomu, tikudzonga lini kobiri zizinji. Ndipo thangwe ra kuphatisa basa mitcini ya nzeru, tinkukwanisa kumwaza bzipsa bzabwino bza Umambo kwa wanthu azinji. Tenepo, timbaphatise basa mabukhu, mavidiyo na nkhani zakundobva zomwe ziri pa webisaite ayai m’mitcini yathu ya nzeru. Imweyi ni njira ibodzi yakuthandizira Kristu, omwe an’funa kuti timbaphatise basa mwanzeru cuma ca gulu la Yahova. Tikambathandizira citsogozo ca Kristu, tin’dzathandiza abale na mpfumakazi zathu kukhala na cikhulupiro cakulimba ndipo tin’dzakhala wakuphatana kwene-kwene. w18.10 21 ¶17, 19

Tikambatewezera nsisi za Yahova ticimbalatiza nsisizo kwa abale wathu, iwo angawone kuti Yahova ankutawira mipembo yawo mwakuphatisira basa ifepano. (2 Wak. 1:3-6) Tenepo, lekani kumbadikhira kuti abale wathu ati ambacite bzinthu bzakulungamiratu bzokha-bzokha. Mbakumbukirani kuti abale wanu mbakuperewera. Tsono mukambadikhira kuti iwo ambacite bzinthu bzabwino basi, mun’dzasunama. (Mpal. 7:21, 22) Tin’funika kukumbukira kuti Yahova, ambadikhira lini kuti timbacite bzabwino bzokha-bzokha. Tenepo, tin’funika kumbapirira na abale wathu. (Wayef. 4:2, 32) Ndipo tin’funika lini kumbacitisa abale wathu kuwona kuti ankucita lini bzinthu ninga momwe winango ankucitira. Koma timbawalimbise na kumbawona bzinthu bzabwino bzomwe iwo ambacita. Tikacita bzimwebzi, tin’dzacitisa kuti iwo atumikire Yahova mwakukondwa.—Wag. 6:4. w18.09 13 ¶16, 17

Kucita kufuna kwa Mulungu kukhali ninga cakudya kwa Jezu. Tenepo, ninga momwe cakudya cimbapasira thanzi thupi lathu, kucita kufuna kwa Mulungu kumbacitisambo cikhulupiro cathu kukhala cakulimba. Mwa ciratizo, kodi bzidakucitikirani kale kuti nsiku inango mudayenda mu utumiki bwakumunda wakuneta, koma mudabwerera kumui wakukondwa na wakutsangalazidwa? Tikambacita bzomwe Yahova ambatiuza, timbakhala wanzeru. (Psal. 107:43) Ndipo wale omwe ambacita bzinthu mwanzeru bzinthu bzimbawafambira bwino. Mwa ciratizo, Bibliya limbati: ‘Palibe comwe umbafuna comwe cingandendemerane nazo. . . . Izo ni muti wa moyo kwa wale omwe ambaziphatisisa, ndipo omwe ambaziphatisisawo an’dzacemeredwa wakukondwa.’ (Mim. 3:13-18) Jezu adalewa kuti: ‘Mukadziwa bzinthu bzimwebzi, mun’dzakhala wakukondwa mukambabzicita.’ (Ju. 13:17) Na mafalaya Jezu akhathandauza kuti anyakupfunza wace angadapitiriza kucita bzomwe iye adawauza, angadakhala wakukondwa ndipo iwo akhafunika kutewezera ciratizo cace pa moyo wawo wense. w18.09 4 ¶4, 5

Napo kuti Adamu na Eva akhali awiri basi mu zunde la Edeni, iwo akhafunika kukumbukirambo winango. N’thangwe ranyi? Thangwe ndakuti Yahova akhadawapasa basa lakuti acite. Iye adawauza kuti adzaze dziko lense la pansi na wana wawo, acicitisambo dzikoli kukhala paraizo. (Ciy. 1:28) Tenepo, Adamu na Eva akhafunika kukumbukira bza tsogolo la wana wawo kuti adzakhale wakukondwa, ninga momwe Yahova akhafunira kuti wense akhale wakukondwa. Ndipo iwo akhafunika kuphata basa pabodzi kuti dziko lense likhale paraizo. Bzinkuwonekeratu kuti basalo lingadakhala likulu kwene-kwene ndipo lingadafunika thandizo la banja lense. Wanthu wakulungamiratu angadaphata basa pabodzi na Mulungu kuti dzikoli likhale paraizo na kukwanirisa cakulinga cace. Ndipo mwakucita bzimwebzi, iwo angadapita mu mpumulo wace. (Waheb. 4:11) Ndokumbukirani momwe iwo angadakhalira wakukondwa pakucita basali! Ndipo Yahova angadawasimba kwene-kwene thangwe ra kusaya dyera kwawo pabodzi na kukumbukira anzawo. w18.08 15 ¶2; 17-18 ¶8, 9

Kodi n’ciyani comwe mungacite penu munthu ankumwaza magunkha pakulewa bza imwepo? Bzimwebzi ndibzo bzomwe bzidacitikira Jezu pabodzi na Juwau Batista. (Mat. 11:18, 19) Tsono n’ciyani comwe Jezu adacita? Iye alibe kuphatisa basa nthawe na mphanvu zace kuti awonese kuti bzomwe iye akhalewa bzikhali bzacadidi, m’mbuto mwace, adawauza kuti akhale na umboni bwakukwanira pa nkhanizo. Ndipo adacita bzimwebzi thangwe akhafuna kuti wanthuwo ambakhale tceru pa bzomwe iye akhacita na kupfunzisa. Ndipopa iye adalewa kuti: ‘Nzeru imbadziwika kuti njakulungama thangwe ra mabasa yace.’ (Mat. 11:19) Tingapfunze bzizinji na bzomwe Jezu adacitabzi. Nthawe zinango wanthu angatilewe kuipa ayai angatinamizire bzinthu, ndipo tingacite thupo kuti mbiri yathu ingadzongeke. Tsono momwe timbacitira bzinthu pa moyo wathu bzimbalatiza momwe ifepano tiriri. Ndipo tikambatewezera Jezu, khalidwe lathu labwino lin’dzalatiza kuti bzinthu bzense bzomwe tidanamiziridwa mpsakunama. w18.08 6 ¶11; 7 ¶13

Kaini, Salomau pabodzi na Ajirayeri akhana mpata wakukungula acicinja bzicito bzawo bzakuipa. (Mab. 3:19) Yahova ambathamangira lini kusiya atumiki wace akamuphonyera. Ciratizo pa nkhaniyi ni Aroni, omwe adalekeleredwa na Yahova napo kuti akhadacita bzinthu bzakuipa. Nsiku zinombo, Yahova ambaticenjeza kuti atikhotcerere akawona kuti tayamba kucita bzinthu bzakuipa. Iye ambacita bzimwebzi mwakuphatisa basa Bibliya, mabukhu na abale wathu wauzimu. Tenepo, tikambabvera macenjezo yomwe Yahova ambapereka, iye an’dzatilekerera. Kudeka mtima kukulu kwa Yahova kuna cakulinga. (2 Wak. 6:1) Ndipo kumbatithandiza kuti ‘tilambe makhalidwe yakuipa na bzikhumbo bza dziko.’ (Tito 2:11-14) Mu dziko lakuipali, muna bzinthu bzizinji bzomwe bzingayeze kukhulupirika kwathu kwa Yahova. Tenepo, tin’funika kutsimikiza na mtima wathu wense kukhala kumbali ya Yahova! w18.07 20 ¶20, 21

Tin’funika kukhala na cikhumbo cakufuna kudziwidwa na kusimbidwa na Yahova m’mbuto mwa kusimbidwa na dzikoli. Kodi tingakhale naco tani? Mwa kumbakumbukira nfundo ziwiri. Yakuyamba ni kumbakumbukira kuti Yahova nthawe zense ambasimba wale omwe ambamutumikira mwakukhulupirika. (Waheb. 6:10; 11:6) Yahova ambawona atumiki wace wense wakukhulupirika kukhala wakufunika kwene-kwene kwa iye, mwakuti ambawona kuti n’kusaya cirungamo kuleka kufuna ali-wense wa iwo. Ndipo iye ‘ambadziwa bwino njira ya wanthu wakulungama’ ndipo ambadziwambo momwe angawapulumusire. (Psal. 1:6; 2 Pe. 2:9) Nfundo yaciwiri yomwe tin’funika kumbaikumbukira njakuti Yahova angatisimbe ayai angatitende mu njira yomwe pinango tikhaidikhirira lini. Yahova an’dzasimba lini wanthu omwe ambacita bzinthu bzabwino kuti atumbizidwe na anzawo. Thangwe ranyi? Thangwe iwo ambakhala ankutambiriratu kale malipo yawo. (Mat. 6:1-5) Tsono mwakusiyana na iwo, Yahova ‘ambawona mwakubisika’ wale omwe ambatendedwa lini na wanthu pa bzabwino bzomwe iwo ambacitira anzawo, ndipo ambawasimba. Ndipo nthawe zinango Yahova ambasimba ayai ambatenda atumiki wace mu njira yakusaya kudikhirika. w18.07 5 ¶8, 10

Pambuyo pa matsomphenyaya Pedru akhalibe kubvesesa bzomwe falalo likhafuna kulewa. Tsono pa nthawe imweyoletu adafika amuna winango omwe akhadatumidwa na Korneliyo ndipo mzimu wakucena udatsogolera Pedru kuti ayende na amunawo kumui kwa Korneliyoyo, ndipo iye adayendadi. Bzingadakhala kuti Pedru adacita bzinthu ‘mwa kuwona mawonekedwe yakunja,’ iye angadayenda lini kumui kwa Korneliyo thangwe Ajuda akhambayenda lini m’mii ya wanthu omwe akhali lini Ajuda. Tsono n’thangwe ranyi Pedru adayenda? N’cadidi kuti iye akhambasankhula wanthu omwe akhali lini Ajuda, tsono pomwe adawona matsomphenya yale pabodzi na citsogozo comwe adatambira kwa mzimu wakucena, iye adacinja makumbukidwe yace. Pedru adafika kumui kwa Korneliyo ndipo pomwe adamala kuceza naye, iye adalewa kuti: ‘Tsapano ndazindikira kuti Mulungu alibe tsankhulo. Iye ambabvuma munthu wakucokera ku mtundu uli-wense, omwe ambamugopa na kucita cirungamo.’ (Mab. 10:34, 35) Nfundo yomwe Pedru adabvesesayi ikhali yakufunika kwene-kwene ndipo ingadatokonyambo Akristau wense. w18.08 10 ¶3, 4

Bibliya limbalewa bzinthu bzomwe Yahova ambabziwenga ndipo bzimbakhala bzakusaya kunesa ifepano kubziwengambo. Tsono pana bzinthu bzinango bzomwe Bibliya limbalewa lini ciri-cense comwe tingacite. Tenepo, n’ciyani comwe tingacite pa cakucitika ninga cimweci? Ndipo tingadziwe tani bzomwe Mulungu an’funa kuti ticite? Tingadziwe mwakuphatisa basa cikumbu-mtima cathu cakupfunzisidwa na Bibliya. Ndipo tikacita bzimwebzi, tin’dzacita cakusankhula canzeru. Yahova ambatifuna, ndipopa iye adatipasa mitemo yomwe ingatsogolere cikumbu-mtima cathu. Iye ambatiuza kuti: ‘Ine Yahova ndine Mulungu wako, omwe ndimbakupfunzisa kuti ugumane phindu, ule omwe ndimbakutsogolera mu njira yomwe un’funika kufamba.’ (Zai. 48:17, 18) Tikambakumbukira mitemo ya m’Bibliya na kubvuma kuti itokonye mtima wathu, ifepano tin’dzakwanisa kulungamiza na kupfunzisa cikumbu-mtima cathu. Ndipo bzimwebzi bzin’dzatithandiza kucita bzakusankhula bzanzeru. Mitemo ni nfundo zacadidi zomwe zimbatsogolera makumbukidwe yathu ndipo zimbatithandiza kucita bzakusankhula bzabwino. Ndipo kudziwa mitemo ya Yahova kumbatithandiza kubvesesa makumbukidwe yace na thangwe lomwe iye ambaperekera malamulo. w18.06 16 ¶5; 18 ¶8-10

Ateweri wa cipani ca Herode, adacita mbvunzoyu na cakulinga cakuti Jezu akatawira kuti ne, amunamizire kuti iye ni nyamadulanthaka wa boma la Roma. Tsono bzingadakhala kuti Jezu adatawira kuti inde, wanthu azinji pinango angadasiya kumbamutewera. Jezu adacita bzinthu mwakusamala kwene-kwene kuti aleke kupitira nkhaniyi. Iye akhadziwa kuti anyakukhomesa mtsonkho azinji akhali wadyera, koma iye akhalibe basa na bzimwebzo. M’mbuto mwace, iye adaikha Umambo bwa Mulungu pa mbuto yakuyamba pakuti ndibo bomwe bun’dzamalisa mabvuto yense ya wanthu. Jezu n’ciratizo cabwino kwa ifepano. Ninga iye, tin’funika lini kumbathandizira cipani ciri-cense ca ndale, napo cire comwe cingawoneke ninga kuti cinkucita bzinthu mwa cirungamo. Akristau ambathemba Umambo bwa Mulungu, ndipo ambakhulupira bzomwe Mulungu ambalewa kuti mpsabwino. Ndipopa timbapitira lini nkhani za ndale, ne kulewa kuipa atongi thangwe ra bzinthu bzakusaya cirungamo bzomwe ambacita. (Mat. 6:33) Mboni za Yahova zizinji, zinkukwanisa kucinja makumbukidwe yakuphonyeka yomwe zikhanayo. w18.06 6 ¶9-11

Pinango Sathani adapumpsa anjowo mwa kuwauza kuti agonane na akaziwo, na kuwapicira kuti iwo angadadzakhalambo na mphanvu za kutonga wanthufe. Mwa njira imweyi, pinango Sathani akhafuna kuphingiza kukwanisika kwa polofesiya ya Yahova yakulewa bza ‘mbeu ya mkazi.’ (Ciy. 3:15) Tsono Yahova alibe kulekerera kuti bzimwebzi bzicitike, ndipo iye adabweresa Cigumula ca Madzi, comwe cidadzapfudza bzense bzomwe Sathani pabodzi na madimonyo yace akhafuna kucita. Tinkupfunza kuti nkhani yakugonana na kubzikuza ni nyambzo zamphanvu kwene-kwene. Wanjo omwe adakhala ku mbali ya Sathani wale, adalekerera kuti bzikhumbo bzakuipa bzikule mu mtima mwawo mpaka kufika pakukhala bza mphanvu. Tenepo, tin’funika kumbakumbukira nthawe zense kuti bziribe basa magole yomwe tamala tinkutumikira Yahova, bzikhumbo bzakuipa bzingakule mu mtima mwathu. (1 Wak. 10:12) Ndipopa tin’funika nthawe zense kumbabzipenda, kuti tiwone bzomwe bziri mu mtima mwathu, ticicita nyongo yakucosa makumbukidwe yali-yense yakuipa pabodzi na mzimu wa kubzikuza!—Wag. 5:26; Wakol. 3:5. w18.05 18 ¶11, 12

Paulo akhadasunama kwene-kwene thangwe rakuti Ajuda alibe kubvuma bzipsa bza Umambo bzomwe iye akhapalizira. Tsono, Paulo alibe kundowasiya tenepo, m’mbuto mwace iye adapitiriza kumbawapalizira. Iye akhacita thupo kwene-kwene na Ajudawo ndipo pakulewa bza iwo, iye adati: ‘Bzomwe ndinkufunisisa mu mtima mwangumu, ndipo bzomwe ndimbapemba mwakudandaulira Mulungu, mpsakuti iwo apulumusidwe. Pakuti ndinkuwacitira umboni bwakuti iwo ana nyongo pakutumikira Mulungu, koma sikuti mwakubverana na cidziwiso caico.’ (War. 10:1, 2) Kodi n’thangwe ranyi mpostolo Paulo adapitiriza kucita basa lakupalizira, napo kuti wanthu azinji akhamutetekera lini? Iye adalewa kuti akhapalizira Ajuda thangwe ra ‘bzomwe akhafunisisa mu mtima mwace.’ Iye akhafuna kuti Ajuda apulumuke. (War. 11:13, 14) Ndipo iye akhadandaulira Yahova kuti athandize Mjuda ali-wense payekha kuti abvume bzipsa bza Umambo. Paulo adalewambo kuti Ajudawo akhana ‘nyongo pakutumikira Mulungu.’ Tenepo, Paulo akhawona bzabwino bzomwe wanthuwo akhacita, pabodzi na mtima omwe iwo akhanawo wakufuna kutumikira Yahova. Ndipo iye akhadziwa kuti na kupita kwa nthawe, Ajudawo angadadzakhalambo ateweri wa Kristu, ninga iye. w18.05 4 ¶4; 7 ¶13, 14

Ali-wense wa ifepano an’funika kumbadziwa bzomwe winango ankufunikira kuti tikwanise kumbawathandiza. Paulo adauza Akristau wa Cihebereu kuti: ‘Limbisani manja yakutepa pabodzi na mabondo yakunetayo, ndipo pitirizani kulungamiza njira zomwe nzayo zanu zinkufamba, kuti nyakupwetekeka aleke kupwetekekeratu, koma apole.’ (Waheb. 12:12, 13) Tenensenefe tingatsangalaze na kulimbisa anzathu mwa mafala yathu, bziribe basa msinkhu omwe tinawo. Paulo adanembera Akristau wa ku Firipo kuti: ‘Penu pana kulimbisana pakati panu mwa Kristu, ayai penu pana kutsangalazana mwa lufoyi, mzimu wa mbverano, kudekerana mtima na kubverana nsisi, citisani kuti cindweso cangu cikhale cakuthumizirika mwa kukhala na kakumbukidwe na lufoyi libodzi-bodzi, mucikhalambo wakuphatana m’makumbukidwe mabodzi-bodzi. Lekani kucita ciri-cense na ndeu ayai na dyera, koma mwa kubzicepswa, mbawonani winango kukhala wakukuposani, lekani kumbandokumbukira bzakufuna bzanu bzokha, koma mumbakumbukirembo bzakufuna bza wanthu winango.’—Waf. 2:1-4. w18.04 23 ¶10; 24 ¶12

Thangwe lomwe lidacitisa Yahova kupereka Jezu kuti adzatitsudzule ku ukapolo bwa pikado na infa, ni lakuti tiphatise basa moyo wathu wense kuti timutumikire ninga ‘akapolo’ wace. Njira yabwino kwene-kwene yakuphatisira basa ufulu bwathu mwanzeru, ni kuphatisa basa nthawe pabodzi na mphanvu zathu pakutumikira Yahova. Kucita bzimwebzi, kun’dzatithandiza kuleka kumbawona bzikhumbo bzathu na bzakulinga bza dzikoli kukhala bzakufunika kwene-kwene pa moyo wathu. (Wag. 5:16) Ndokumbukirani bzomwe Nowe pabodzi na banja lace adacita. Iwo akhakhala m’dziko lakuipa kwene-kwene na laciwembo, koma napo bzikhali tenepo, iwo alibe kumala nthawe yawo na bzinthu bzomwe wanthu azinji akhambacita pa nthawe imweire. M’mbuto mwace, iwo adakhala wakutanganika kwene-kwene na basa lomwe Yahova akhadawapasa kuti acite. Mwa ciratizo, iwo adamanga cingalawa, adagwezeka cakudya m’cingalawamo, adakonkhanisa bzirombo acibzipitisa m’cingalawamo ndipo adadziwisambo wanthu bza Cigumula ca madzi comwe cingadabwera. ‘Nowe adacita bzense ninga momwe Mulungu adamuuzira. Adacitadi tenepoyo.’ (Ciy. 6:22) Ninga bzakutewera bzace, Nowe pabodzi na banja lace lense adapulumuka pomwe wanthu wakuipa adapfudzidwa.—Waheb. 11:7. w18.04 11 ¶8; 12 ¶11, 12

Sathani pabodzi na madimonyo yace, ambaphatisambo basa cipembedzo cakunama pabodzi na nkhani za malonda za m’dzikoli kuti apumpse ‘dziko lense la pansi,’ ayai kuti apumpse wanthu. (Cibv. 12:9) Sathani ambaphatisa basa cipembedzo cakunama kuti amwaze magunkha yakulewa bza Yahova, ndipo iye ambabisira wanthu dzina la Mulungu. (Jer. 23:26, 27) Bzimwebzi bzimbacitisa kuti wanthu omwe ana mtima wakufuna kutumikira Mulungu, akumbuke kuti ankutumikira Mulunguyo, pomwe ankutumikira madimonyo. (1 Wak. 10:20; 2 Wak. 11:13-15) Ndipo Sathani ambaphatisambo basa nkhani za malonda za m’dzikoli pakunamiza wanthu kuti akakhala na kobiri pabodzi na bzinthu bzakuthupi bzizinji, iwo angakhale wakukondwa. (Mim. 18:11) Ndipopa, wanthu azinji omwe ambakhulupira magunkha ya Sathaniya, ambamala nthawe yawo ankulinga ‘cuma’ m’mbuto mwakutumikira Mulungu. (Mat. 6:24) Ndipo napo wale omwe pakuyamba akhafuna Mulungu, ambadzafunisisa bzinthu bzakuthupi, ndipo lufoyi lomwe akhanalo pakuyamba lire limbadzamala.—Mat. 13:22; 1 Ju. 2:15, 16. w18.05 16-17 ¶6-7