Agosto

Tikakhala pa mitsonkhano kawiri-kawiri timbakumbusidwa bzomwe Yahova na Jezu adaticitira. Ndipo thangwe ra kutenda lufoyi limweri, timbacita nyongo yakutewezera Jezu pa ciri-cense comwe timbacita nsiku na nsiku pa moyo wathu. (2Wak. 5:14, 15) Kuthumizira bzimwebzi, mtima wathu umbatilimbisa kuti timbatumbize Yahova thangwe ra kutipasa cakulombolera. Ndipo njira inango ya momwe tingamutumbizire ni kumbapereka mitawiro yakucokera pansi pa mtima pa mitsonkhano. Njira inango ya momwe tingalatizire lufoyi lathu kwa Yahova na kwa Mwana wace ni kupereka nsembe kwa iwo. Ndipo kawiri-kawiri, ifepano timbafunika kucita nyongo kuti timbagumanike pa mitsonkhano. Mwa ciratizo, magwere mazinji yambacita mitsonkhano yawo pa nsiku yomwe ifepano timbayenda kubasa ndipo timbakhala tidaneta kwene-kwene. Ndipo magwere manango yambacita mitsonkhano kuphampha kwa mdzinga pa nthawe yomwe wanthu winango ankupuma. Kodi Yahova ambawona nyongo yomwe timbacita kuti timbagumanike pa mitsonkhano napo timbakhala wakuneta? Inde ambawona! Kulewa cadidi, Yahova ambatenda kwene-kwene nyongo yomwe timbacita yakulatiza kuti timbamufuna.—Mar. 12:41-44. w19.01 29 ¶12-13

Jezu adagumana na mabvuto ninga yomwe wanthu wa mu nthawe yace akhagumana nayo. Mwa ciratizo, Jezu adakulira m’banja lakusauka. Iye adapfunza momwe angacitire basa lakuthupi na baba wace wakumufuwa, Zuze. (Mat. 13:55; Mar. 6:3) Bzikuwoneka kuti pomwe Jezu adayamba utumiki bwace, pinango Zuze akhadafa kale. Tenepo, Jezu bzidamuwawa kwene-kwene thangwe ra kufedwa babaceyo. Ndipo iye akhadziwa momwe bzikhaliri bzakunesa kukhala m’banja na wanthu wakusiyana makumbukidwe pa nkhani ya cipembedzo. (Ju. 7:5) Tenepo, bzomwe bzidacitikabzo bzidathandiza Jezu kubvesesa mabvuto yomwe wanthu ambagumana nayo na momwe iwo ambabvera. Nsisi za Jezu zidawoneka pomwe iye akhacita bzakudabwisa. Tsono iye akhacita lini bzakudabwisabzo thangwe rakuti akhana mphanvu zakucitira bzimwebzo, koma thangwe ra kubvera ‘nsisi’ wale omwe akhabonera. (Mat. 20:29-34; Mar. 1:40-42) Mwa ciratizo, ndokumbukirani momwe Jezu adabvera pomwe adatenga mwamuna munango nkhuthu omwe akhali pakati pa thimu la wanthu acikamupoza, ayai pomwe adalamusa mwana wacimuna wa mkazi mansiwa. Tenepo, Jezu adawabvera nsisi ndipo adafunisisa kuwathandiza. Mar. 7:32-35; Lu. 7:12-15. w19.03 16 ¶10-11

Ndokumbukirani msunamo omwe Jezu adakhala nawo pausiku bwakumalizira bwa moyo wace pa dziko la pansi. Kodi iye angadapitiriza kukhala wakukhulupirika mpaka infa? Iye angadasaya kukhala wakukhulupirika palibe ne munthu m’bodzi omwe angadakhala na cidikhiro ca moyo wakusaya kumala. (War. 5:18, 19) Ndipo bzomwe iye angadacita usiku bule bzingadadzonga mbiri ya Baba wace. (Djobi 2:4) Pomwe iye akhadya cakudya cakumalizira pabodzi na axamwali wace wa pa mtima, omwe akhali apostolo wace, maceza yawo yadacinja ndipo ‘adayamba kupopotezana mwamphanvu kuti mbani omwe akhali mkulu pakati pawo.’ Napo bzikhali tenepo, Jezu alibe kuwakalipira. M’mbuto mwace, iye adapitiriza kuwathandiza mwa kugwa nfuwa. Ndipo mwakudeka mtima, Jezu adalatiza na kuwafotokozera pomwe bza khalidwe lomwe iwo akhafunikira kukhala nalo. Patsogolo pace, iye adawatenda thangwe ra kupitiriza kukhala naye. (Lu. 22:24-28; Ju. 13:1-5, 12-15) Mungacite bwino kutewezera Jezu mwa kupitiriza kugwa nfuwa napo mukasunama. Ifepano tingabvere mtemo umweyu tikambakumbukira kuti tensenefe timbalewa na kucita bzinthu bzomwe bzimbasunamisa winango. (Mim. 12:18; Tiy. 3: 2, 5) Tenepo, mbacitani nyongo yakumbalewa mikhalidwe yabwino yomwe winango anayo.—Wayef. 4:29. w19.02 11-12 ¶16-17

Cakutonga ca Mozeji cikhakhotcerera munthu omwe wanamiziridwa kuti aleke kupasidwa mulandu. Ndipo muyeruzi akhana udindo bwa kudziwa omwe akhamunamizirayo. (Bzak. 19:16-19; 25:1) Tenepo, munthuyo akanati kuuzidwa bza mulandu wace, pakhafunika mboni ziwiri kuti zipereke umboni pa nkhaniyo. (Bzak. 17:6; 19:15) Tsono tani penu nyakuphayo wawonedwa na mboni ibodzi yokha? Iye akhafunika lini kukumbuka kuti angadapasidwa lini nyathwa thangwe ra mulandu waceyo. Thangwe Yahova akhamuwona pakuphapo. Yahova ni ciratizo cabwino pa nkhani ya kucita bzinthu mwacirungamo. Ndipo iye ambasimba wale omwe ambabvera malamulo yace, koma ambalanga omwe ambaphatisa basa mwakuphonyeka udindo bwawo. (2 Sam. 22:21-23; Zakiy. 9:9, 10) Wanthu winango angacite cinthu cakuphonyeka, ndipo angawone kuti am’pasidwa lini nyathwa, koma Yahova an’dzawayeruza pa nthawe yace yakuthemera. (Mim.  28:13) Ndipo iwo akasaya kukungula, an’dzaluza kukhala ‘m’manja mwa Mulungu wa moyo.’—Waheb. 10:30, 31. w19.02 23-24 ¶20-21

Mozeji akhathemba Yahova kuti amutsogolere ndipo Bibliya limbalewa kuti iye ‘akhapitiriza kukhala wakulimba ningati ankuwona Ule wakusaya kuwonekayo.’ (Waheb. 11:24-27) Pomwe ikhadandopita minyezi ming’ono-ng’ono kucokera pomwe Ajirayeri adacoka ku Edjipito ndipo anati kufika ku Phiri la Sinai, Ajirayeri adayamba kung’ung’udzika thangwe m’dambo mukhalibe madzi. Iwo adayamba kung’ung’udzira Mozeji ndipo adakalipa kwene-kwene, mwakuti ‘Mozeji adadandaulira Yahova kuti: “Kodi ndicitenyi na wanthuwa? Iwo andosala pang’ono kundiboma na minyala!”’ (Kuf. 17:4) Tenepo, Yahova adapasa Mozeji malango ya bzomwe iye akhafunika kucita. Iye adamuuza kuti atenge mpsimbo yace, acikamenya nayo tsendwa linango ku Horebe ndipo Bibliya limbalewa kuti ‘Mozeji adacitadi bzimwebzo pamaso pa akulu-akulu wa Jirayeri.’ Pomwe Mozeji adamenya tsendwalo, madzi yadacoka ndipo tsapano Ajirayeri wense akhana madzi yakumwa.—Kuf. 17:5, 6. w18.07 10 ¶4-5

Yahova ambatilimbisa mwa lufoyi mwakuphatisa basa gwere. Ndipo ifepano tingalatizembo lufoyi limweri mwa kumbafuna abale na mpfumakazi zathu. Tenepo, tin’funika kucita ciri-cense kuti tithandize abale wathu kudziwa kuti iwo mbakufunika kwene-kwene nakuti Yahova ambawafuna. (1 Ju. 4:19-21) Mpostolo Paulo adanemba kuti: ‘Pitirizani kumbalimbisana ninga momwe munkucitiramu.’ (1 Wat. 5:11) Tenepo, ali-wense wa ifepano an’funika kutewezera Yahova na Jezu mwa kumbatsangalaza abale wense wa m’gwere, sikuti akulu okha. (War. 15:1, 2) Abale winango m’gwere omwe ankuduwala angafunikire thandizo la mankhwala. (Lu. 5:31) Tsono akulu m’gwere pabodzi na abale winango an’funika kudziwa kuti iwo ni alapi lini, koma thandizo lawo lomwe angapereke la kutsangalaza abalewo lingakhale lakufunika kwene-kwene. Ndipo abale wense wa m’gwere angatsangalaze ‘anyakusunama, kuthandiza anyakutepa, acipirira na wanthu wense.’—1 Wat. 5:14. w18.09 11 ¶10, 11

Tingakulise cikhulupiro cathu kwa Yahova mwa kucita nyongo yakumudziwa bwino. Ndipo njira ibodzi yomwe ingatithandize kumudziwa bwino Mulungu, ni kuwerenga Bibliya nsiku zense na kukumbukira bzomwe timbawerengabzo. M’Bibliya muna nkhani zakulatiza momwe Yahova adakhotcererera atumiki wace m’mbuyomu. Nkhanizo zimbatithandiza kuwona kuti napo nsiku zino iye an’tisamalirambo. Kumbukirani bza mafala yabwino yomwe Zaiya adaphatisa basa kuti afotokoze momwe Yahova ambatikhotcererera. Iye adalewa kuti Yahova ali ninga m’busa ndipo atumiki wace ali ninga wana wa mabira. Zaiya adalewa bza Yahova kuti: ‘Na boko lace iye an’dzatsonkhanisa wana wa mabira, ndipo an’dzanyamulira mabirayo pa cifuwa.’ (Zai. 40:11) Tikambathandizidwa na mphanvu za Yahova, ifepano timbakhala wakukhotcerereka na wakugwa nfuwa. Tenepo, kuti mutipitirize kugwa nfuwa mukambagumana na mabvuto, mbakumbukirani mafala yamtsangalazo yomwe yankugumanika mu vesi la lero. Iyo yan’dzakulimbisani mukadzagumana na mabvuto kutsogoloku. w19.01 7 ¶17-18

Kodi muna bzakulinga bzauzimu bzomwe munkuyeza kubzikwanirisa? Mwa ciratizo, pinango mungakhale na cakulinga ca kumbawerenga Bibliya nsiku zense, kupereka mitawiro yakubveka na kufotokoza bwino mbali zanu pa mitsonkhano. Ayai mungacite makonzedwe yakupfunza Bibliya kuti mumbaliphatise bwino basa mu utumiki bwakumunda. Kodi imwepo mumbabzibva tani mukawona kuti munkuyenda patsogolo mwauzimu ayai winango akakuuzani bzimwebzo? Mwakusaya kupenukira, mumbakomedwa kwene-kwene ndipo mpsakufunika! Tsono n’thangwe ranyi? Thangwe ndakuti mukucita bzomwe Yahova ambafuna kuti mucite, ninga momwe Jezu adacitira. (Mim. 27:11) Mukambaikha pa mbuto yakuyamba kutumikira Yahova, mun’dzakhala wakukondwa ndipo moyo wanu un’dzakhala wathandauzo. Mpostolo Paulo adacenjeza kuti: ‘Khalani wakulimba na wakusaya kutekenyeka, ndipo nthawe zense khalani na bzakucita bzizinji pa basa la Mbuya, mucimbadziwa kuti bzomwe munkucita pa basa la Mbuya, bzimbayenda lini papezi.’ (1 Wak. 15:58) Koma wanthu omwe ambalinga bzinthu bza m’dzikoli, ninga kobiri ayai kufuna kubvekera, ambakhala lini wakukondwa. Napo bzinthu bziwafambire bwino, iwo kawiri-kawiri ambakhala ninga bolosa lakuboka.—Lu. 9:25. w18.12 18 ¶12, 13

Na mafalaya, Davide akhalewa bza nthawe yomwe wanthu wense pa dziko la pansi an’dzabvera mitemo yakulungama ya Mulungu. (2 Pe. 3:13) Polofesiya ya pa Zaiya 65:22 imbalewa kuti: ‘Nsiku za wanthu wangu, zin’dzakhala ninga nsiku za muti.’ Bzimwebzi bzikulatiza kuti wanthu omwe an’dzatumikira Yahova mu dziko lipsa an’dzakhala na moyo utali. Mwakubverana na Cibvumbulutso 21:1-4, Mulungu an’dzasimba wanthu wa mitundu yense, ndipo cibodzi mwa bzisimbobzo n’cakuti ‘infa in’dzawoneka lini pomwe.’ Adamu na Eva adaluza mwayi wa kukhala na moyo wamuyaya m’Paraizo, koma dziko la pansi lin’dzakhala pomwe paraizo. Ndipo Mulungu wapicira kudzasimba wanthu pa dziko la pansi. Davide adalewa kuti anyakulungama an’dzatambira dziko la pansi ndipo an’dzakhala m’mwemo kwa muyaya. (Psal. 37:11) Mapolofesiya ya m’bukhu la Zaiya yambatithandiza kudikhirira nthawe yomwe tin’dzakondwa na moyo wabwino m’Paraizo pano pa dziko la pansi. (Zai. 11:6-9; 35:5-10; 65:21-23) Kodi ni lini pomwe bzimwebzi bzin’dzacitika? Pa nthawe yomwe piciro la Jezu lomwe adacita kwa kapondo ule lin’dzakwanirisidwa. (Lu. 23:43) Imwepo mungadzakhalembo m’Paraizomo. w18.12 8 ¶22, 23

Kodi bzingakwanisike kutcenkha nzeru zense za dzikoli? Nee. Pana bzinthu bzinango bza dzikoli bzomwe bzingatitokonye thangwe tingakwanise lini kucoka m’dzikoli. (1 Wak. 5:9, 10) Napo tikakhala tinkupalizira bzipsa bzabwino, timbawona wanthu omwe ambalewa nzeru zakuphonyeka ndipo ambakhulupira bzipfunziso bzakunama. Tsono napo kuti tingakwanise lini kutcenkha nzeru zense zakuphonyeka za dzikoli, tin’funika lini kuzibvuma ne kumbazikumbukira. Ninga Jezu, tin’funika kulamba mwakamfulumize makumbukidwe yomwe Sathani ambafuna kuti tikhale nayo. Ndipo tingabzikhotcerere mwa kutcenkha makumbukidwe yakuipa ya dzikoli. Mwa ciratizo, ifepano tin’funika kumbasankhula axamwali wathu mwanzeru. Bibliya limbaticenjeza kuti tikakhala pauxamwali na wanthu omwe ambanamata lini Yahova, tin’dzayamba kutewezera makumbukidwe yawo. (Mim. 13:20; 1 Wak. 15:12, 32, 33) Tin’funikambo kumbasankhula masenzeka yathu mwanzeru. Ndipo tikambalamba masenzeka yomwe yambalimbisa nkhani ya ciwembo, unzazi, na yakuti bzinthu bzidacita kusandulika, tin’dzatcenkha kudzonga makumbukidwe yathu na bzinthu bzomwe bzimbabverana lini na ‘cidziwiso ca Mulungu.’—2 Wak. 10:5. w18.11 25-26 ¶16, 17

Kodi tingalimbise tani citsimikizo cathu ca kufamba n’cadidi? Njira ibodzi ndiyo kupfunzisa wanthu winango cadidi ca m’Bibliya momwe mungakwanisire. Bibliya limbandendemezera cadidico na mphanga. Ninga momwe m’cikunda wa luso akhaphatiririra mphanga yace, ifepanombo tin’funika kupitiriza kuphatirira ‘Fala la Mulungu.’ (Wayef. 6:17) Tensenefe tingakhale apfunzisi wabwino tikambaphatisa ‘basa bwino fala la cadidi.’ (2 Tim. 2:15) Tikambaphatisa basa Bibliya kuti tipfunzise winango, cidziwiso pabodzi na lufoyi lathu pa cadidi ca m’Bibliya bzin’dzathumizirika. Ndipo tin’dzatsimikiza kupitiriza kufamba m’cadidi. Cadidi ca m’Bibliya ni mphaso yakucokera kwa Yahova. Ico cimbaticitisa kuti tikhale pa uxamwali bwakulimba na Baba wathu wakudzulu. Ndipo n’cakufunika kwene-kwene kuposa cinthu ciri-cense comwe tingakhale naco. Yahova ambatipfunzisa kale bzinthu bzizinji, koma ni ciyambi basi! Iye wapicira kupitiriza kutipfunzisa mpaka muyaya. Tenepo, pitirizani kumbawona cadidi ca m’Bibliya kukhala cakufunika ninga minyala yakufunika kwene-kwene. Pitirizani ‘kugula cadidi ndipo lekani kucigulisa.’—Mim. 23:23. w18.11 9 ¶2; 14 ¶15-17

Basa lakupalizira lomwe Nowe adacita cigumula cikanati kufika, likhaphatanidza kucenjeza wanthu bza kupfudzidwa kwa dziko lakuipalo. Jezu adati: ‘M’nsiku zomwe cigumula ca madzi cikhanati kucitika, wanthu akhadya, akhamwa; amuna akhalowola, akazi akhalowodwa, mpaka pa nsiku yomwe Nowe adapita m’cingalawa cire. Wanthu alibe kucita ciri-cense pa bzomwe bzikhacitika, mpaka pomwe cigumula cidafika ciciwapsairiratu wensewo, tenepombo ni momwe bzin’dzacitikira pa kukhala kwa Mwana wa munthu.’ (Mat. 24:38, 39) Napo wanthu azinji alibe kubvera mafala yomwe Nowe akhapalizira, iye mwakukhulupirika adapitiriza kucenjeza wanthuwo pa bzomwe Yahova akhadamuuza. Nsiku zino, tinkupalizira mafala yakulewa bza Umambo yomwe yankupasa wanthu mwayi wakudziwa bzomwe Mulungu an’dzacitira wanthufe kutsogoloku. Ninga Yahova, tinkufunisisa kuti wanthu abvere mafalaya ‘acipitiriza kukhala na moyo.’ (Zakiy. 18:23) Ndipo tikambapalizira bzipsa bzabwino nyumba na nyumba na m’mbuto zapadeca, ifepano timbacenjeza wanthu azinji bza kubwera kwa Umambo bwa Mulungu na kupfudzidwa kwa dzikoli.—Zakiy. 3:18, 19; Dan. 2:44; Cibv. 14:6, 7. w18.05 11 ¶8-9

Kodi mungacite ciyani penu basa lathu laletsedwa komwe mumbakhala ndipo akulu-akulu wa boma akuphatani, ndipo akukubvunzani mibvunzo kuti adziwe bza abale wanu? Kodi mungawauze bzense bzomwe mukudziwa pakulewa bza abale wanuwo? Kodi n’ciyani comwe Jezu adalewa pomwe mtongi wa Roma adamubvunza? Mwakuphatisa basa malango ya M’Bibliya yakulewa kuti pana ‘nthawe yakunyamala na nthawe yakulewa-lewa,’ Jezu adandonyamala. (Mpal. 3:1, 7; Mat. 27:11-14) Tenepo, penu tagumana na cakucitika ninga cimweci, ifepano tin’funika kucenjera kuti tireke kuikha moyo wa abale wathu pa ngozi. (Mim. 10:19; 11:12) Mukadziwa kuti m’bale wacita pikado m’gwere, mbalewani ‘cadidi.’ (Mim. 21:28) Mun’funika kufotokozera akulu cadidi cense mwakusaya kuwabisira na cibodzico. Ndipo akuluwo akakhala na umboni bwakukwanira pa nkhaniyo, iwo angakwanise kuthandiza munthuyo kubwezeresa uxamwali bwace na Yahova.—Tiy. 5:14, 15. w18.10 7-8 ¶17-18

Kodi tingalimbise tani winango mwa lufoyi? Njira ibodzi ni kukhala mbveseri wabwino. (Tiy. 1:19) Tingalatize lufoyi tikakhala mbveseri wabwino. Na tenepo, mbacitani mibvunzo mwa mwakusamala yomwe ingakuthandizeni kubvesesa momwe m’bale wanu ankubvera. Ndipo kawonekedwe ka nkhope yanu kan’dzamuthandiza kuwona kuti munkucita naye thupo. Tsono akambalewalewa lekani kumugwata mafala, koma mbapirirani. Kukhala mbveseri wabwino, kungakuthandizeni kuwona momwe iye ankubvera ndipo kun’dzacitisa kuti iye akukhulupireni. Mukacita bzimwebzi iye an’dzatetekera bzomwe mungamuuze mukafuna kumuthandiza. Mukambacita thupo na wanthu winango, iwo ambatsangalazidwa kwene-kwene. w18.09 11 ¶10; 12 ¶13

Kuti munthu abvesese bzipsa bza Umambo, awerenge Bibliya pabodzi na mabukhu manango yakulewa bza Bibliya, apfunze Bibliya na Mboni za Yahova, akonzekere mitsonkhano yathu na kuyenda ku mitsonkhanoko pambafunika nthawe. Tsono kuti ticite bzensenebzi, tin’funika kuphatisa basa nthawe yomwe tingadacita bzinthu bzinango bzakusaya kufunika kwene-kwene. (Wayef. 5:15, 16) Kodi kupfunza cadidi cakuyambirira ca m’Bibliya kumbafuna nthawe zingasi? Palibe nthawe yakuikhidwiratu koma bzimbathemba munthu ali-wense. Kupfunza bza nzeru za Yahova, njira zace na bzinthu bzomwe iye adakonza kulibe malire. (War. 11:33) Nkhani yakuyambirira ya mu Nsanza ya Mulindiri yakuyamba idandendemezera cadidi ca m’Bibliya na “maluwa yomwe yadabisika pakati pa mauswa.” Iyo idalewa kuti: “Mpsakufunika lini kukomedwa na dziluwa libodzi la cadidi. Ndipo bzingadakhala kuti dziluwa libodzi la cadidi ndakukwanira, Mulungu angadapereka lini cadidi cizinji. Ndipopa citani nyongo yakugumana maluwa manango.” Napo m’dziko lipsa tin’dzakhala na moyo wa muyaya, nthawe zense tin’dzapfunza bzinthu bzizinji bza Yahova. Nsiku zino, mpsakufunika kwene-kwene kumbaphatisa basa nthawe yathu kuti timbapfunze bza Yahova. w18.11 5 ¶7

Amuna akulimbisidwa kukhala na akazi wawo, bzomwe bzingathandauze kumbawacitira bzinthu bzabwino na kuwadziwa bwino. (1 Pe. 3:7) Kudziwa bwino munthu winango na kumucitira bzinthu bzabwino, ni bzinthu bziwiri bzomwe bzimbafambira pabodzi. Ndipo mwamuna omwe ambadziwa bwino mkazi wace ambazindikira kuti napo ambasiyana bzinthu bzinango na mkazaceyo, iye ambabziwona lini kukhala wakufunika kwene-kwene kuposa mkaziyo. (Ciy. 2:18) Koma ambacita naye bzinthu ninga combo cakusaya kulimba ndipo ambamulemekeza. Mwamuna omwe ambacita bzinthu mwakukumbukira mkazi wace, ambacita lini bzinthu na akazi winango bzomwe bzingawacitise kuwona ninga kuti iye ankuwasirira. (Djobi 31:1) Iye ambapitiriza kukhala wakukhulupirika thangwe ra kufuna mkazi wace pabodzi na Yahova na kuwenga comwe n’cakuipa.—Psal. 19:14; 97:10. w18.09 28 ¶3-4

Thangwe ranyi mpsakunesa kuphatisa basa bzomwe timbapfunza m’Bibliya? Thangwe ndakuti kucita bzinthu bzabwino, kumbafuna kubzicepswa. Ndipo ‘m’nsiku zakumalizira’ zino mpsakunesa kwene-kwene kukhala wakubzicepswa, thangwe dzikoli ladzala na wanthu ‘wakubzifuna, wakufuna kobiri, wakubzibva, wakubzikuza, wakunyoza’ na ‘wakusaya kubziretsa.’ (2 Tim. 3:1-3) Tsono ife ninga atumiki wa Mulungu, timbadziwa kuti kusaya kubzicepswa n’kwakuipa. Koma nthawe zinango pinango tingawone ninga kuti wanthu omwe ana khalidwe limweri bzinthu bzimbawafambira bwino ndipo ambakhala na moyo wakukondwa. (Psal. 37:1; 73:3) Na tenepo pinango tingabzibvunze kuti: ‘Kodi kuikha patsogolo bzakufuna bza winango n’kwakufunikadi? Ndikakhala wakubzicepswa, kodi wanthu an’dzapitiriza kundilemekeza?’ Tikabvuma kutokonyedwa na mzimu wa dyera wa dzikoli, tin’dzadzonga uxamwali bomwe tinabo na abale wathu ndipo bzin’dzacitisa kuti wanthu winango aneseke kuzindikira kuti ndife Mboni ya Yahova. Koma tikambapfunza bziratizo bza atumiki wakubzicepswa wa Mulungu, ticitewezera ciratizo cawo, tin’dzakhala na bzakutewera bzabwino. w18.09 3 ¶1

Pakuyamba Yahova akhali yekha, koma patsogolo pace, iye adalenga wanjo kudzulu pabodzi na bzakulengedwa bza moyo bzinango kuti bzikhale pansi pano. Yahova ni ‘Mulungu wakukondwa’ ndipo iye ambafuna kwene-kwene kutipasa bzinthu bzabwino. (1 Tim. 1:11; Tiy. 1:17) Iye ambafuna kuti ifepano tikhalembo wakukondwa, ndipopa ambatipfunzisa kukhala wanthu wakupasa. (War. 1:20) Mulungu adalenga wanthu m’cifanikiso cace. (Ciy. 1:27) Bzimwebzi bzinkuthandauza kuti iye adatilenga na makhalidwe yakundendemerana na yace. Tsono kuti tikhale wanthu wakukondwa, ticisimbidwa na Yahova, ifepano tin’funika kumbamutewezera. Mwa ciratizo, tin’funika kumbakumbukira anzathu na kumbawapasambo bzomwe tinabzo. (Waf. 2:3, 4; Tiy. 1:5) Thangwe ranyi? Thangwe ni momwe Yahova adatilengera, ndipo napo kuti ndife wakuperewera, ifepano tingakwanise kutewezera Yahova, ticikhala wanthu wakupasa. Yahova ambafuna kuti timutewezere, ndipo iye ambakomedwa kwene-kwene tikambakhala wakupasa.—Wayef. 5:1. w18.08 15 ¶1-2; 16 ¶4

Ateweri wa Kristu ambalatiza kuti ambatetekera fala lace, ndipo si kokha kundolitetekera, koma ambaliphatisira basa. Iwo ambataya lini mtima thangwe ra ‘thupo la pa moyo.’ (Lu. 21:34) M’mbuto mwace, iwo ambawona kuti mpsakufunika kubvera malamulo ya Jezu, napo bzicikhala bzakunesa. Napo bziri tenepo, abale wathu ankupitiriza kukhala wakukhulupirika kwa Yahova. Njira inango yakulatiza kuti timbabvera Jezu, ni kumbatetekera wale omwe iye adawaikha kuti ambatsogolere pakati pathu. (Waheb. 13:7, 17) Mwa ciratizo, m’magole yakumalizira yano, gulu la Mulungu likucinja bzinthu bzizinji, ndipo kucinjako kukuphatanidza bzinthu bzipsa bzomwe timbabziphatisa basa na momwe tingacezere na wanthu mu utumiki bwakumunda, momwe mitsonkhano yathu ya pakati pa mdzinga imbacitikira, kamangidwe ka Nyumba zathu za Umambo na momwe tingazisamalirire. Tenepo, tin’funika kutenda kwene-kwene malango ya lufoyi yomwe timbatambiraya. Ndipo tikacita tenepo, Yahova an’dzasimba nyongo yathu yakuteweza malango yomwe gulu lace limbapereka nthawe zense. w19.03 10-11 ¶11-12

Nthawe zinango, ifepano timbabva nkhani zomwe n’zacadidi koma ziribe umboni bwakukwanira. Tingapfunze bzizinji pa nkhaniyi kucokera pa bzomwe bzidacitikira Ajirayeri omwe akhakhala kumadokero kwa mkulo wa Joridano, mu nthawe ya Djosuwe. (Djos. 22:9-34) Iwo adabva kuti Ajirayeri winango omwe akhakhala kumabvadzuwa, akhadamanga mphatso pafupi na mkuloyo. Bzimwebzi bzikhali bzacadidi, koma ikhali kokha mbali ibodzi ya nkhaniyi. Ndipo bzimwebzi bzidacitisa Ajirayeriwo kukumbuka kuti abale wawo wa kumabvadzuwa wale akhadapandukira Yahova, tenepo adacita makonzedwe yakuti akamenyane nawo. (Djos. 22:9-12) Tsono anati kuyenda kukamenyana nawo, Ajirayeri omwe akhakhala kumadokerowo adatumiza amuna winango kuti akafufudze nkhaniyo kuti akhale na umboni bwakukwanira. Kodi n’ciyani comwe iwo adazindikira? Iwo adawona kuti mphatso yomwe abale wawowo akhadamanga, ikhali lini yakuti ambaperekere nsembe kwa mirungu yakunama, koma ikhali umboni bwakuti iwo akhanamata Yahova. Kulewa cadidi, Ajirayeri winangowo adakomedwa kwene-kwene thangwe ra kuyamba kufufudza nkhaniyo kuti akhale na umboni bwakukwanira, anati kuyenda kukamenyana na abale wawowo. w18.08 6 ¶9-10

Paulo adalatiziratu padeca kuti napo mtumiki wa Yahova angayambe kucita bzinthu bzakuipa, acimbakumbuka kuti akali kumbali yace. Tsono kundofuna kukhala pauxamwali na Yahova ayai kundolewa kuti timbamukhulupira, bzimbathandauza lini kuti tinkubvumidwa naye. (1 Wak. 10:1-5) Ajirayeri adakhala na thupo kwene-kwene pomwe adawona kuti Mozeji ankucedwa kubuluka m’phiri la Sinai. Mpsibodzi-bodzimbo na ifepano nsiku zino, pinango tingayambe kukhala na thupo kwene-kwene thangwe ra kuwona kuti nsiku ya Yahova inkucedwa kufika. Ndipo pinango tingayambe kumbawona kuti tsogolo labwino lomwe Yahova adatipicira likali kutali kwene-kwene ayai kuti ndacadidi lini, bzomwe bzingaticitise kuyamba kumbaikha bzakufuna bzathu pa mbuto yakuyamba, m’mbuto mwa kufuna kwa Yahova. Ndipo tikasaya kusamala, tingasiye kumutumikira ticimbacita bzinthu bzomwe tikhakumbukira lini kuti tingadabzicita. w18.07 19-20 ¶17, 18

Ifepano tingatambire bzisimbo bzizinji, tikafika pa kudziwidwa na Yahova. Tsono n’ciyani comwe tin’funika kucita kuti iye afike pakutidziwa, ticikhala axamwali wace? Tin’funika kumbam’funa na kubzipereka kwa iye. (1 Wak. 8:3) Tin’funika kupitiriza kukhala pauxamwali bwakulimba na Baba wathu wakudzulu. Ndipo ninga Akristau wakuyambirira wa ku Galatiya, ifepano tin’funika kusiya kukhala akapolo wa ‘bzomwe mpsakusaya kuthandiza na bzakusaya phindu’ bza m’dzikoli, pabodzi na bzomwe iro limbapereka. (Wag. 4:9) Akristau wa ku Galatiyawa akhamudziwa kale Mulungu ndipo Mulunguyo akhawadziwambo. Tsono, Paulo adalewa kuti winango mwa abalewa adayamba ‘kucita pomwe’ bzinthu bzapezi-pezi. Kulewa kunango, bzikhakhala ninga kuti Paulo akhabvunza abalewa kuti: ‘N’thangwe ranyi imwepo mwabwerera pomwe kukhala akapolo wa bzinthu bza pezi-pezi bzomwe mukhadabzisiya kalebzi?’ w18.07 4 ¶5-6

M’Bibliya muna bziratizo bza wanthu azinji omwe alibe kubvera malamulo ya Mulungu, ndipo adakhala na bzakutewera bzakuipa. Tenepo, na bziratizobzi ifepano tingapfunze kusiyanisa bzabwino na bzakuipa. Kodi malango yamweya yambacokera kuponi? Yambacokera kwa Mulungu ndipo njabwino kwene-kwene kuposa malango yense. Mwa ciratizo, ndokumbukirani momwe Davide adabonerera pomwe iye alibe kubvera Yahova mwakucita upombo na Bate-Seba. (2 Sam. 12:7-14) Mukambawerenga nkhaniyi, mbabzibvunzani kuti: ‘Kodi Davide angadatcenkha tani bvuto limweri? Kodi ndingadakhala ine, ndingadacita tani? Kodi ndingadacitambo upombo ninga Davideyo ayai ndingadatewezera Zuze?’ (Ciy. 39:11-15) Tikambakumbukira mwakusamala bzakutewera bzakuipa bza pikado, ifepano tin’dzakwanisa ‘kuwenga comwe n’cakuipa.’—Am. 5:15. w18.06 16 ¶5; 17 ¶7

Kawiri-kawiri, wanthu ambapitira nkhani za ndale thangwe ra kusaya cirungamo komwe kumbacitika. Mwa ciratizo, kulipira mtsonkho mu nthawe ya Jezu, ikhali nkhani yomwe ikhacitisa wanthu azinji kumbapitira nkhani za ndale. Pakhana mitsonkho izinji yomwe Ajuda akhambalipira. Iwo akhalipira mtsonkho wa bzinthu bzomwe akhanabzo, wa mbuto zakukhala na wa nyumba. Tsono, anyakukhomesa mtsonkhowo akhali wanthu wadyera, bzomwe bzikhacitisa kuti bzinthu bziipiretu. Nthawe zinango, iwo akhambakacita bobobo kwa akulu-akulu wa boma, kuti awapase mpando na cakulinga cakuti agumane mpata wakukhala na kobiri zizinji. Ndipo Zakeu omwe akhali mkulu wa anyakukhomesa mtsonkho ku Jeriko, akhadadala thangwe ra kumbakhomesa mtsonkho mwakuumira kwene-kwene. (Lu. 19:2, 8) Anyamadulanthaka wa Jezu, akhafuna kuti iye apitire nkhani ya kukhomesa mtsonkho. Mwa ciratizo, Ajuda wense akhafunika kumbapereka ‘mtsonkho kwa Sezare,’ omwe ukhali mtsonkho wa dinario ibodzi, koma iwo adabvunza Jezu penu bzimwebzi bzikhalidi bzakufunika ayai ne. (Mat. 22:16-18) Ajudawo akhambawenga mtsonkho umweyu, thangwe ukhambawakumbusa kuti iwo ankutongedwa na boma la Roma. w18.06 6 ¶8-10

Kusankhula kukhala ku mbali ya Sathani nthawe zense kumbakhala na bzakutewera bzakuipa, ndipo kulibe na phindulo! (Djobi 21:7-17; Wag. 6:8) Mpsabwino kwene-kwene kudziwa kuti dzikoli linkutsogoleredwa na Sathani. Thangwe ranyi? Thangwe kudziwa bzimwebzi, kumbatithandiza kumbawona maboma ya wanthuya mu njira yakuthemera, ticimbapitiriza kucita basa lathu lakupalizira bzipsa bzabwino. Ifepano timbadziwa kuti Yahova ambafuna kuti timbalemekeze maboma. (1 Pe. 2:17) Ndipo iye ambafunambo kuti timbabvere malamulo ya boma, penu malamuloyo yankupitana lini na nfundo za m’Bibliya. (War. 13:1-4) Tsono napo bziri tenepo, ifepano timbadziwambo kuti tin’funika lini kucita mbali ya dzikoli, mwa kuleka kuthandizira mtsogoleri ayai cipani ciri-cense ca ndale. (Ju. 17:15, 16; 18:36) Ndipo pakuti timbadziwa kuti Sathani ambabisira wanthu dzina la Mulungu na kupswipiza mbiri yace, ifepano timbacita bzense bzomwe tingakwanise kuti tipfunzise wanthu cadidi cakulewa bza Mulunguyo. Kulewa cadidi, ifepano timbadekedwa kwene-kwene kudziwika na dzina la Mulungu na kuliphatisa basa, ndipo kufuna Mulungu n’cinthu cakufunika kwene-kwene kwa ifepano, kuposa kufuna kobiri ayai bzinthu bzakuthupi.—Zai. 43:10; 1 Tim. 6:6-10. w18.05 17 ¶8, 9

Kodi mpsakubvumizika wanthu wakulowolana kupumirana penu ankugumana na mabvuto m’banja mwawo? Bibliya limbalewa lini mathangwe yomwe yangacitise anyakulowolana kupumirana. Mpostolo Paulo adanemba kuti: ‘Mkazi omwe ana mwamuna wakusaya kukhulupira, mwamunayo akafuna kukhala naye, mkaziyo aleke kumusiya mwamuna waceyo.’ (1 Wak. 7:12, 13) Mafalaya yankuphatambo basa nsiku zino. Pana bzinthu bzinango bzomwe ‘mwamuna wakusaya kukhulupira’ angacite, bzomwe bzingacitise mkazace kupumirana naye. Mwa ciratizo, pinango mwamunayo ngwandewo ndipo moyo wa mkaziyo umbakhala pa ngozi, ambalamba kusamalira mwakuthupi mkazaceyo pabodzi na banja lense, ayai ambamuletsa kutumikira Mulungu. Bzimwebzi bzikacitika, mkazi omwe ni Mkristau angafunike kupenda yekha penu angapumirane naye mwamunayo. Tsono Akristau winango omwe ambagumana na mabvuto ninga yamweya ambapitiriza kukhala pa banjapo. Napo bziri tenepo, iwo ambafunika kupirira na kucita nyongo kuti alimbise malowozi yawo. w18.12 13 ¶14; 14 ¶16, 17

Mu there la nyakubzala mbeu lomwe limbagumanika pa Luka 8:5-8, 11-15, mbeu ni ‘mafala ya Mulungu,’ ayai mafala yakulewa bza Umambo bwa Mulungu. Mataka yomwe mbeuzo zimbagwera, ni mitima ya wanthu ndipo mbeu zomwe zimbagwera pa mataka yabwino zimbamera, zicikula. Zikakula, mbeuzo ‘zimbabala bzisapo maulendo yakupitirira 100.’ Pomwe abereki wathu ayai Mboni zinango zidatipfunzisa bza Umambo bwa Mulungu ulendo bwakuyamba, bzidakhala ninga kuti iwo abzala mbeu pa mataka yabwino. Iwo adadekedwa kwene-kwene pomwe ifepano tidabvuma cadidi ca m’Bibliya. Mbeuyo idapitiriza kukula mpaka kufika pakubala bzisapo. Ndipo ninga ngala-ngala ya tirigu yomwe yafotokozedwa pakuyamba ire, yomwe imbabala lini ngala-ngala zinango koma imbabala mbeu za tirigu, ifepano timbakhalambo lini na anyakupfunza wapsa, koma timbabala mbeu zipsa. Kodi timbacita tani bzimwebzi? Tikambauza winango bza Umambo bwa Mulungu, bzimbakhala ninga kuti tinkumwaza na kuthumizira mbeu zomwe zidabzalidwa mu mtima mwathu. (Lu. 6:45; 8:1) Tenepo, tikambapitiriza kupalizira bzipsa bza Umambo bwa Mulungu, ifepano ‘timbabala bzisapo mwakupirira.’ w18.05 5-6 ¶10, 11

Paulo akhandofuna lini kulimbisa abale wace wauzimu, koma iye ‘akhaphatisambo basa bzinthu bzace bzense’ kuti athandize nabzo abalewo. Ndipo mwa bzicito bzace, iye adalatiziratu padeca kuti akhali wakukonzeka kucita bzense bzomwe angadakwanisa pakufuna kuthandiza abalewo. (2 Wak. 12:15) Mpsibodzi-bodzimbo na akulu, iwo an’funika kumbalimbisa na kutsangalaza winango sikuti na mafala yokha, koma na bzicito bzawo. Akacita bzimwebzi, iwo an’dzalatiza kuti ambatifunadi na kutisamalira. (1 Wak. 14:3) Nthawe zinango, akulu angafunike kupereka malango kuti alimbise abale. Tenepo, iwo angapfunze kucokera m’Bibliya momwe angacitire bzimwebzi m’njira yakuthemera. Ndipo Jezu, adapereka ciratizo cabwino pa nkhaniyi, pomwe iye adapereka malango ku magwere ya ku Ásia Menor pambuyo pa kulamusidwa. Iye adapereka malango ya mphanvu kwene-kwene ku magwere ya ku Efezo, Perigamo na Tiyatira. Tsono anati kupereka malangoyo, iye adatenda magwereya thangwe ra bzinthu bzabwino bzense bzomwe yakhacita. (Cibv. 2:1-5, 12, 13, 18, 19) Tinkupenukira lini kuti akulu wathu ambatewezerambo Kristu pakupereka malango. w18.04 23 ¶8, 9

Abereki, imwepo muna udindo bukulu bwa kukhotcerera wana wanu kuti mitima yawo ireke kupumpsidwa na Sathani. Mwakusaya kupenukira, imwepo mumbacita ciri-cense kuti mukhotcerere wana wanu ku matenda yali-yense yakuthupi. Ndipo kuti bzimwebzi bzikwanisike mumbakhala na khonkho pamui panu, na kucosa cinthu ciri-cense comwe cingacitise imwepo ayai wana wanu kutakanyidwa na matenda. Mpsibodzi-bodzimbo, imwepo mun’funika kukhotcerera wana wanu ku mafilme, programa za pa TV, masenzeka ya pa interneti na webisaite zomwe zingawapswipize na makumbukidwe ya Sathani. Yahova adakupasani udindo bwakuti mumbathandize wana wanu kuti akhale naye pa uxamwali. (Mim. 1: 8) Tenepo, lekani kumbacita mantha kukhazikisa mitemo yakucokera m’Bibliya pa banja lanu. Mbauzani wana wanu bza mafilme yomwe angawone na yomwe an’funika lini kuyawona, ndipo mbawafotokozerani thangwe lomwe mwakhazikisira mitemoyo. (Mat. 5:37) Ndipo wana wanu akambakula, mbawapfunzisani kuti ambazindikire wokha cabwino na cakuipa mwakubverana na mitemo ya Yahova. (Waheb. 5:14) Kumbukirani kuti wana wanu an’dzapfunza bzizinji na bzomwe mumbacita.—Bzak. 6:6, 7; War. 2:21. w19.01 16, 17 ¶8

Maswaka yangacitisembo kuti gwere likhale lakuphatana. Ndipo njira ibodzi yakucitira bzimwebzi ni kucita uxamwali na abale pabodzi na mpfumakazi zacikulire. Tenepo, mukambaceza nawo mbawabvunzani kuti n’ciyani comwe cidawathandiza kupitiriza kutumikira Yahova kwa magole mazinji. Iwo an’dzakufotokozerani bzinthu bzizinji bzomwe bzin’dzakuthandizani, ndipo kucita bzimwebzi kun’dzalimbisa iwo pabodzi na imwepo. Ndipo cinthu cinango comwe tensenefe tingacite ni kumbatambira na manja mawiri alendo omwe ambabwera pa mitsonkhano yathu, bziribe basa penu ndife nkhalamba ayai maswaka. Mukambatsogolera mtsonkhano wakukonzekera utumiki bwakumunda, mungathandize acikulire kupitiriza kuwonesa ceza cawo, mwa kumbawapasa gawo lakuthemerana na thanzi lawo. Ndipo mungawagawembo pabodzi na maswaka kuti ambayende nawo. Acikulire azinji pabodzi na abale omwe ana bvuto la thanzi, kawiri-kawiri ambasunama thangwe ra kuwona kuti ankukwanisa lini kucita bzinthu ninga momwe akhacitira kale-kale. Tsono iwo angatsangalazidwe akambawona kuti imwepo munkuwasamalira na kubvesesa bvuto lawo. Ndipo kucita bzimwebzi kun’dzawalimbisa kuti apitirize kupalizira na nyongo, bziribe basa msinkhu wawo ayai magole yomwe anayo m’cadidi.—Mwam. 19:32. w18.06 23 ¶10; 24 ¶12

Ifepano tin’funika lini kuyebwa kuti Yahova adatitsudzula ku ukapolo bwa pikado na infa. Ndipo timbakondwa kwene-kwene na nsembe ya cakulombolera ya Jezu, yomwe imbatipasa mpata wakutumikira Mulungu wathu na cikumbu-mtima cakucena. (Psal. 40:8) Ifepano tin’funika lini kumbandolewa kuti timbatenda Yahova, koma tin’funikambo kumbasamala kwene-kwene kuti tireke kuphatisa basa ufulu bwathu mwakuphonyeka. Mwa ciratizo, Pedru adaticenjeza kuti tireke kumbawona ufulu bwathu ninga thangwe lakucitira bzinthu bzakuipa. Cenjezoli limbatikumbusa bzomwe bzidacitikira Ajirayeri pomwe akhali m’dambo. Ndipo iro ndakufunika kwene-kwene nsiku zino kuposa kale lense pakuti Sathani pabodzi na dziko laceri, angatipumpse na bzinthu bzomwe iye ambapereka ninga bzakubvala, bzakudya, bzakumwa pabodzi na masenzeka. Anyakucita malonda wakucenjera, kawiri-kawiri ambaphatisa basa wanthu wakudeka kuti ambatsatse malondayo, na cakulinga cakupumpsa wanthu kuti awagulire. Tenepo bzingakhale bzakusaya kunesa kupumpsika na dzikoli, ticiyamba kuphatisa basa kuipa ufulu bwathu. w18.04 11-12 ¶7, 8