Julho

Tinkukhala mu ‘nthawe zakupambulika na zakunesa.’ (2 Tim. 3:1) Tenepo, bzinthu bziniyenda bziciipiratu pomwe tinkudikhirira kuti Yahova adzapfudze dziko lakuipali, acibweresa mtendere caiwo pa dziko lense la pansi. Ndipopa ali-wense wa ife an’funika kumbabzibvunza kuti: ‘Kodi ni mbani omwe ndimbalinga ndikafuna thandizo ayai citsogozo?’ Kale-kale m’mbuyomu, munembi munango wa Bibliya adafotokoza bza kufunika kwa kumbanyang’na kwa Yahova tikafuna thandizo. (Psal. 123:1-4) Ndipo iye adalewa kuti tikambanyang’na kwa Yahova, timbakhala ninga mtumiki ayai nyabasa omwe ambanyang’ana kwa bwana wace. Kodi iye ambacita tani bzimwebzi? Kawiri-kawiri nyabasa ambathemba bwana wace kuti amupase cakudya na kumusamalira. Tsono iye ambafunikambo kukhala pafupi na bwana waceyo kuti acite basa liri-lense lomwe bwanayo angafune kuti iye acite. Mpsibodzi-bodzimbo na ifepano, tin’funika kumbawerenga Bibliya nsiku zense kuti tidziwe bzomwe Yahova an’funa kuti ticite, ticicitadi bzimwebzo. Tikacita bzimwebzi, tingakhale na citsimikizo cense cakuti Yahova an’dzatithandiza pa nthawe yomwe tin’dzafuna thandizo. w18.07 9 ¶1, 2

Ufulu bomwe Jezu adapicira ateweri wace kuti angadadzakhala nabo, n’bwakusiyana kwene-kwene na ufulu bomwe wanthu azinji ambafuna nsiku zino. Pomwe Jezu adalewa kuti ‘Mwanayo akakutsudzulani, imwepo mun’dzakhaladi wakutsudzuka,’ iye akhalewa bza kutsudzulidwa ku ukapolo bwa pikado, bomwe ni ukapolo bwakuipa kwene-kwene bomwe wanthu anabo. (Ju. 8:34) Kodi ifepano ndife akapolo wa pikado mwa njira iponi? Ndife akapolo thangwe pikadoyo imbaticitisa kucita bzinthu bzakuipa. Iyo imbatitazisambo kucita bzinthu bzomwe timbadziwa kuti mpsabwino ndipo bzakutewera bzace bzimbakhala msunamo, kuwawidwa mu mtima, kubonera ndipo pakumalizira pace timbafa. (War. 6:23) Mpostolo Paulo ni munthu m’bodzi omwe akhadziwa momwe bzimbawawira kukhala kapolo wa pikado. Tsono ifepano tin’dzakhala na ufulu caibo ninga bomwe Adamu na Eva akhanabo kokha pikado yense ikadzapfudzidwa. Kodi Jezu akhafuna kulewanyi na mafala yakuti ‘mukasunga mafala yangu nthawe zense’? Iye akhafuna kulatiza kuti penu tin’funa kuti iye atitsudzule, ifepano tin’funika kucita cinthu cinango. Kodi cinthuco n’ciponi? (Ju. 8:31) Ninga Akristau wakubzipereka kwa Mulungu, ifepano tin’funika kubziramba tekha, ticisankhula kumbacita bzinthu mwakusaya kupitirira malire yomwe Jezu adayakhazikisa kwa ateweri wace. (Mat. 16:24) Ndipo ninga momwe Jezu adapicirira, ifepano tin’dzakhala na ufulu caibo kutsogolo, nsembe ya cakulombolera ya Jezu ikadzayamba kuphatisidwa basa. w18.04 7-8 ¶14-16

Yahova ambalatiza kuti ambadziwa bwino makumbukidwe ya wanthu wace, napo kuti nthawe zinango makumbukidwe yawoyo yambakhala lini yakulungama. Kumbukirani bzomwe bzidacitika na Djona. Mulungu adatumiza mpolofetayu kuti akauze wanthu wa ku Ninive mafala yakulewa bza kuyeruzidwa kwawo. Tsono pomwe wanthuwo adakungula, Mulungu alibe kudzawapha. Koma Djona alibe kukomedwa na bzomwe Mulungu adacitabzo. Ndipo ‘adakalipa kwene-kwene’ thangwe adawona kuti mafala yomwe akhapalizira yakulewa bza kupfudzidwa kwa mzindayo yalibe kukwanisika. Tsono Yahova adapirira naye ndipo adamuthandiza kucinja makumbukidwe yaceyo. (Djona 3:10–4:11) Na kupita kwa nthawe, Djona adadzabvesesa bzomwe Yahova akhafuna kumupfunzisa na bzomwe adacita, ndipo adam’phatisa basa kuti anembe bzimwebzi m’Bibliya kuti bzitithandizembo nsiku zathu zino. (War. 15:4) Bzomwe Yahova adacita na atumiki wace m’mbuyomu bzimbatithandiza kuwona kuti iye ambabvera nsisi atumiki wace. Ndipo ambadziwa kuwawidwa na kubonera komwe ali-wense wa ifepano ambagumana nako. Iye ambabvesesa makumbukidwe yathu, unthu bwathu na bzomwe timbakwanisa lini kucita. Ndipo iye an’dzalekerera lini kuti tiyezedwe mpaka kutazira ‘kupirira.’ (1 Wak. 10:13) Mafalaya njakutsangalaza kwene-kwene! w19.03 16 ¶6-7

Cakutonga ca Mozeji cikhafotokoza kuti amuna omwe akhatsogolera Ajirayeriwo, akhafunika kusamalira kusaya kubvesesana kwa Ajirayeriwo na nkhani za ngozi zomwe zingadacitika pakati pawo, sikuti kokha nkhani zauzimu. Onani bziratizo bzakucepa. Penu Mjirayeri wapha munthu, cakutonga cikhalewa kuti iye akhafunika kuphedwambo. Koma cakuyamba akulu-akulu wa mzinda omwe nyakuphayo akhakhala, akhafunika kufufudza kuti awone penu bzikhalidi bzakuthemera kuti munthuyo aphedwe. (Bzak. 19:2-7, 11-13) Akulu-akuluwo akhayeruzambo nkhani zomwe zikhacitika nsiku na nsiku pa moyo wa Ajirayeri ninga, kusaya kubvesesana komwe kukhacitika thangwe ra bzinthu bzomwe akhanabzo pabodzi na nkhani za m’banja. (Kuf. 21:35; Bzak. 22:13-19) Tenepo, pomwe akulu-akuluwo akhacita bzinthu mwacirungamo ndipo Ajirayeri acimbabvera Cakutongaco, munthu ali-wense akhagumana phindu ndipo Yahova akhatumbizidwa kwene-kwene. (Mwam. 20:7, 8; Zai. 48:17, 18) Bzinthu bzense bzomwe timbawona pa moyo wathu mpsakufunika kwene-kwene kwa Yahova. Tenepo, iye ambafuna kuti timbacitire wanthu winango bzinthu mwa lufoyi na mwacirungamo. Ndipo iye ambawona bzomwe timbalewa na bzomwe timbacita napo tikakhala patekha. w19.02 23 ¶16-18

Tikasunama, bzimbakhala bzakunesa kukhala wakupfatsa. Ndipo napo tubzinthu tun’gono-tung’ono tungatisunamise, ticiyamba kulewa na kucita bzinthu mwaukali. Tenepo, penu imwepo mudasunama kale, kumbukirani ciratizo ca Jezu. Kuphampha kwa nsiku zakumalizira za moyo wace wa pa dziko la pansi, Jezu adasunama kwene-kwene. Iye akhadziwa kuti angadaboneresedwa ndipo angadaphedwa mwakupasa nsisi. (Ju. 3:14, 15; Wag. 3:13) Pomwe ikhadasala minyezi yakucepa kuti aphedwe, Jezu adalewa kuti akhadasunama kwene-kwene. (Lu. 12:50) Pomwe nsiku zakuti aphedwe zidafendera, iye adati: ‘Moyo wangu unkutsautsika.’ Ndipo mafala yomwe adayafotokoza mu mpembo wace yadalatiza kuti iye akhali wakubzicepswa na wakubvera Mulungu. Iye adalewa kuti: ‘Baba, ndipulumuseni mu nthawe yakutsautsayi. Koma nthawe imweyi in’funika kundifikiradi, pakuti ndibzo bzomwe ndidabwerera. Baba, tumbizani dzina lanu.’ (Ju. 12:27, 28) Pomwe nthawe idafika, Jezu mwakukhwimika adabzipereka kwa anyamadulanthaka wa Mulungu, omwe adamupha mwakupasa manyazi. Jezu adapitiriza kucita kufuna kwa Mulungu mwa kufatsa napo pomwe akhadasunama. Mwa kusaya kupenukira, Jezu ni ciratizo cabwino kwene-kwene ca munthu omwe adakhala wakufatsa napo pomwe akhadasunama!—Zai. 53:10. w19.02 11 ¶14-15

Kuti timbagumanike pa mitsonkhano mwakukhazikika, tingafunike kukhala wakukhwimika tikakhala tinkugumana na mabvuto pa moyo wathu. Abale wathu winango ambayenda ku mitsonkhano napo adasunama thangwe ra mabvuto, ayai akuduwala. Ndipo winango ambagumanika pa mitsonkhano napo ankutsutsidwa na wanthu wa m’banja mwawo ayai akulu-akulu wa boma. Kumbukirani momwe ciratizo cathu cimbatokonyera abale wathu omwe ali m’kawoko thangwe ra cikhulupiro cawo. (Waheb. 13:3) Iwo akabva kuti tinkupitiriza kutumikira Yahova napo tinkugumana na mayezo, an’dzapitirizambo kukhala wakukhwimika ndipo cikhulupiro cawo cin’dzathumizirika. Bzimwebzi bzidacitikambo na mpostolo Paulo. Pomwe akhali m’kawoko ku Roma, iye adakomedwa kwene-kwene pomwe adabva kuti abale wace akhatumikira Mulungu mwakukhulupirika. (Waf. 1:3-5, 12-14) Tsono pomwe adacoka m’kawokomo, Paulo adanembera tsamba Ahebereu. Ndipo mu tsambalo iye adacenjeza Akristau wakukhulupirikawo kuti aleke kusiya kumbatsonkhana.—Waheb. 10:25. w19.01 28 ¶9

Sathani ambafuna kuti tikhale ninga iye omwe ni nyakupandukira mitemo ya Yahova ndipo ambacita bzinthu mwa dyera. Iye ambaphatisa basa wanthu omwe adawapumpsa kale omwe timbakhala nawo pafupi. Iye ambafuna kuti tikhale pa uxamwali na wanthu amwewa, napo ticidziwa kuti kubverana na wanthu wakuipa kun’dzadzonga makumbukidwe na bzicito bzathu. (1 Wak. 15:33) Njira inango yomwe Sathani ambaphatisa basa kuti apumpse mtima wathu, ndiyo kuthemba kwene-kwene nzeru za wanthu sikuti makumbukidwe ya Yahova. (Wakol. 2:8) Njira ibodzi yomwe Sathani ambamwazira nzeru zace, ndiyo kulimbisa wanthu kuti ambaikhe pa mbuto yakuyamba cuma pa moyo wawo. Ndipo wanthu omwe ana makumbukidwe ninga yamweya ambafika pa kudala, koma winango ne. Napo bziri tenepo, wense ambakhala pa ngozi. Thangwe ranyi? Thangwe ndakuti iwo ambaikha makumbukidwe yawo yense pa kufuna kugumana kobiri ndipo ambadzaikha kumbuyo thanzi lawo, banja na uxamwali bwawo na Mulungu koma ambandokumbukira bza kobirizo. (1 Tim. 6:10) Ifepano timbatenda kwene-kwene baba wathu wakudzulu thangwe ambatithandiza kuti timbawone kobiri mwakuthemera.—Mpal. 7:12; Lu. 12:15. w19.01 15-16 ¶6; 17 ¶9

Atumiki wa Yahova akhadziwa kuti akhafunika kulimbisa winango, napo kuti akhalibe ciratizo ca Jezu kuti ambatewezere. Kumbukirani bza Ezekiya. Pomwe Asiriya akhadasala pang’ono kubwera kudzamenyana na mzinda wa Jeruzalemu, iye adatsonkhanisa akulu-akulu wa nkhondo pabodzi na wanthu wense kuti awalimbise, ndipo wanthuwo ‘adakhala wakukhwimika thangwe ra mafala ya Ezekiya.’ (2 Nkha. 32:6-8) Djobi adapfunzisa winango momwe angambalimbisire anzawo. Napo kuti akhafunikira cirimbiso, iye adauza amuna omwe adabwera kudzamulimbisa wale kuti bzingadakhala kuti ndiye omwe an’funa kuwalimbisa, angadalewa bzinthu bzakuwalimbisa na mafala yabwino ndipo angadawacitisa kubzibva bwino, sikuti kulewa bzinthu bzomwe bzingadawawawa. (Djobi 16:1-5) Tsono patsogolo pace, Djobi adadzatambira cirimbiso cakucokera kwa Eliu na kwa Yahova.—Djobi 33:24, 25; 36:1, 11; 42:7, 10. w18.04 16 ¶6; 17 ¶8, 9

Zaiya akhadaleweratu momwe Yahova angadalimbisira wanthu wace, iye adati: ‘Yahova Mbuya Mkululetu an’dzabwera na mphanvu ndipo iye an’dzatonga na boko lace.’ (Zai. 40:10) Kawiri-kawiri Bibliya likambalewa bza ‘boko’ limbakhala linkuthandauza mphanvu. Tenepo mafala yakuti Yahova ‘an’dzatonga na boko lace’ yambatikumbusa kuti Yahovayo ni Mtongi wa mphanvu kwene-kwene. Iye adaphatisa basa mphanvu zacezo kuti athandize na kukhotcerera atumiki wace mbuyomu, ndipo nsiku zino iye ambalimbisa na kukhotcererambo wale omwe ambamukhulupira. (Bzak. 1:30, 31; Zai. 43:10.) Tikambazunzidwa na anyamadulanthaka wathu, Yahova ambakwanirisa piciro lace lakuti: ‘Ndin’dzakulimbisa.’ Mwa ciratizo, m’madziko manango nsiku zino, anyamadulanthaka wathu ambaletsa basa lathu lakupalizira ayai ambafuna lini gulu lathu na pang’onopo. Napo bziri tenepo, tin’funika lini kumbacita thupo na bzimwebzi. Pakuti Yahova ankutitsimikizira kutipasa mphanvu na cilimbiso. Iye akutipicira kuti: ‘Cifuzo ciri-cense comwe cidakonzedwa kuti cikudzonge, cin’dzakunda lini.’—Zai. 54:17. w19.01 5-6 ¶12, 13

Bzirombo bzimbakhala lini na bzakusaya bzauzimu, ndipopa bzimbawona lini kufunika kwa kudziwa Mulengi. Tsono ifepano tin’funika kumudziwa. (Mat. 4:4) Ndipo tikambatetekera Mulungu, ifepano tin’dzakhala na luso, nzeru na cikondweso. Mulungu adatipasa Bibliya ndipo ambaphatisa basa ‘kapolo wakukhulupirika na wanzeru’ kuti ambakonze mabukhu yomwe yambatithandiza kulimbisa cikhulupiro cathu. (Mat. 24:45) Ndipopa, timbakomedwa kwene-kwene na cakudya cakusiyana-siyana cauzimu comwe timbatambira! (Zai. 65:13, 14) Cakudya cauzimu cingakupaseni nzeru na luso lakukumbuka bwino, lomwe lingakukhotcerereni ku bzinthu bzizinji. (Mim. 2:10-14) Mwa ciratizo, makhalidweya yan’dzakuthandizani kuzindikira magunkha yakulewa kuti palibe Mulengi, ayai kuti kobiri na bzinthu bza kuthupi bzin’dzakucitisani kukhala wakukondwa. Ndipo yan’dzakuthandizanimbo kutcenkha bzikhumbo bzomwe bzingadzakusunamiseni kutsogolo. Tenepo, citani bzense bzomwe mungakwanise kuti mukhale wanzeru na wakukumbuka bwino. Mukacita bzimwebzo, mun’dzawona kuti Yahova ambakufunani ndipo ambafuna kuti bzinthu bzikufambireni bwino. w18.12 16-17 ¶6-7

Miti minango imbakhala kwa magole mazinji. Mwakubverana na polofesiyayi, nsiku zathu ‘zin’dzakhala ninga nsiku za muti.’ Tenepo kuti wanthufe tikhale na moyo kwa magole mazinji, tin’funika kukhala na thanzi labwino. Ndipo tikadzakhala na moyo wabwino na wa mtendere, ninga omwe Zaiya adaufotokoza, paraizo an’dzadekeza kwene-kwene! Tinkudikhirira na mtima wense kudzawona kukwanisika kwa polofesiyayi! Kumbukirani momwe mapiciroya yankulatizira kuti kutsogoloku kun’dzakhala paraizo. Dziko lense la pansi lin’dzadzala na wanthu wakusimbidwa na Mulungu. Palibe munthu omwe an’dzacita thupo thangwe ra kugopa bzirombo ayai wanthu waciwembo. Ndipo azimola, ankhuthu na anyakupunduka an’dzapozedwa. Wanthu an’dzamanga nyumba acikhala m’mwemo, an’dzabzala minda acidya bzisapo bzace. Iwo an’dzakhala na moyo utali kuposa miti. Ndipo Bibliya limbalewa kuti paraizoyo ali pafupi kwene-kwene. Koma wanthu winango omwe timbawapalizira angalewe kuti mapolofesiyaya yambathandauza lini kuti pa dziko la pansi pan’dzakhala paraizo. Kodi mungawatawire tani? Kodi ni mathangwe yaponi yomwe imwepo munayo yakulatiza kuti dziko la pansi lin’dzakhala paraizo? Munthu mkulu omwe adakhala na moyo pano pa dziko la pansi, Jezu, adalewa mathangwe yakubveka.—Lu. 23:43. w18.12 6 ¶13-15

Makumbukidwe yathu yangacinje, napo cibadwa na bzakugumana nabzo pa moyo bzingatokonye makumbukidweyo. Ndipo bzimwebzi bzingakwanisike, pokha-pokha tikaphatisa basa bzomwe tasankhulabzo. Tenepo tikambakumbukira bza makumbukidwe ya Yahova, tin’dzawona kuti iye nthawe zense ambawona bzinthu mwakuthemera. Patsogolo pace, tin’dzayamba kuwona bzinthu ninga momwe iye ambabziwonera. Kuti tikhale na makumbukidwe ya Yahova, tin’funika kuleka ‘kutewezera mkonzedwe wa bzinthuyu.’ Bzimwebzi bzinkuthandauza kuti tin’funika kutcenkha kumbawona, kuwerenga na kutetekera bzinthu bzomwe bzimbabverana lini na makumbukidwe ya Mulungu. Kuti tibvesese kufunika kwa bzimwebzi, bwerani tiyezezere na cakudya. Munthu omwe an’funa kukhala na thanzi labwino an’funika kumbadya bzakudya bzakupasa thanzi. Koma nyongo yace ingakhale yakusaya phindu penu iye kawiri-kawiri ambadya cakudya cakubvunda! Mpsibodzi-bodzimbo na ifepano, tikabvuma kuti nzeru za dzikoli zipite m’makumbukidwe mwathu, nyongo yathu yakupfunza bza makumbukidwe ya Yahova in’dzakhala yakusaya phindu. w18.11 24-25 ¶14-15

Tin’funika kutsimikiza kuphatisa basa cadidi ca m’Bibliya pa moyo wathu wa nsiku na nsiku. Bibliya limbandendemezera cadidi na bande la m’cikunda. Mu nthawe zakale, bande likhathandiza na kukhotcerera m’cikunda akakhala ku nkhondo. Koma bandero likhafunika kuthimba bwino, thangwe lingadathetha, lingadakwanisa lini kumuthandiza. Kodi cadidi cimbatikhotcerera tani ninga bande? Tikapitiriza kupfunza cadidi ca m’Bibliya pa moyo wathu, cin’dzatikhotcerera ku makumbukidwe yakuipa ndipo cin’dzatithandiza kucita bzakusankhula bzabwino. Ndipo tikagumana na mabvuto ayai tikayezedwa kucita cinthu cakuipa, cadidi ca m’Bibliya cin’dzatithandiza kucita bzinthu bzomwe mpsabwino. Ninga m’cikunda omwe ambayenda lini ku nkhondo acisiya bande, ifepanombo tin’funika lini kusiya cadidi. Koma tin’funika kumbaphatisa basa cadidico mbali iri-yense ya pa moyo wathu. w18.11 14 ¶15

Tin’funika kucita nyongo kuti tipfunze cadidi ca m’Bibliya. Ndipopa tin’funika kucita ciri-cense kuti ticigumane. Ndipo tikagula ‘cadidi,’ ayai tikapfunza cadidico, tin’funika kucisamalira bwino kuti tireke ‘kucigulisa’ ayai kucisiya. Kulewa kuti pambaperekedwa lini kobiri kuti munthu agumane cinthu cinango kumbathandauza lini kuti cinthuco n’cafovolo. Fala la Cihebereu lakusanduliziridwa kuti ‘kugula’ lomwe limbagumanika pa Mimwani 23:23 lingathandauzembo ‘kugumana.’ Mafala mawiriya yankulatiza kuti munthu an’funika kucita nyongo ayai kupereka cinthu cinango kuti agumane cinthu comwe n’cakufunika kwene-kwene kwa iye. Kuti tibvesese momwe tingagulire cadidi ca m’Bibliya, tiyezeze kuti ku msika kukuperekedwa mafigu yafovolo. Kodi tingadikhire kuti mafiguyo yabwere yokha kumui kwathu? Ne, tin’funika kuyenda ku msikako kuti tikayatenge ticiyabweresa kumui. Tenepo, napo kuti mafiguyo njafovolo, tin’funika kucita nyongo kuti tiyagumane. Mpsibodzi-bodzimbo, kuti ifepano tipfunze cadidi ca m’Bibliya tin’funika lini kupereka kobiri, koma tin’funika kucita nyongo na kubzipereka. w18.11 4 ¶4-5

Pa nthawe imweyi, Jezu akhana Pedru, Tiyago na Juwau omwe akhadayenda naye pabodzi ku phiri linango litali. Pomwe akhali m’phirimo, ateweri wacewo adawona matsomphenya. Iwo adawona nkhope ya Jezu na bzakubvala bzace bzinkuyetima. M’matsomphenyamo iwo adawonambo wanthu awiri, Mozeji na Eliya akuceza na Jezu bza kufendera kwa infa pabodzi na kulamusidwa kwace. (Lu. 9:29-32) Patsogolo pace, mtambo udawampsinkha, ndipo mu mtambomo iwo adabva mafala yakucokera kwa Mulungu! Matsomphenya yale yadalatiza umbiri na mphanvu zomwe Jezu an’dzakhala nazo ninga Mambo wa Umambo bwa Mulungu. Mwakusaya kupenukira, pomwe Kristu adabva mafalaya adalimbisidwa kwene-kwene ndipo adakonzeka kupirira infa yakuwawa yomwe angadagumana nayo. Matsomphenyayo yadalimbisambo cikhulupiro ca anyakupfunza wace. Bzimwebzi bzidawathandiza kukhala wakukonzeka kupirira mayezo yomwe angadadzagumana nayo kutsogolo. Pomwe padapita magole 30, mpostolo Pedru adafotokoza bza matsomphenya yakusandulika kwa Jezu, bzimwebzi bzidalatiza kuti iye akhakumbukira bza matsomphenyayo.—2 Pe. 1:16-18. w19.03 10 ¶7-8

Kodi n’ciyani cimbalatiza kuti Akristau wacadidi mbakusiyana na wanthu wa bzipembedzo bzakunama? Ni ‘kulewa cadidi.’ (Zak. 8:16, 17) Iwo ambalewa cadidi kwa alendo, anzawo wakubasa, axamwali na acibale wawo. Penu imwepo ndimwe tswaka, pinango mumbafuna kuti anzanu ambakufuneni. Ndipo thangwe ra cikhumbo cimweci, maswaka manango yambakhala na moyo wa pawiri. Iwo ambalatiza makhalidwe yabwino akakhala pakati pa acibale wawo na abale wa m’gwere, koma akakhala pawokha ayai pakati pa wanthu omwe ambatumikira lini Yahova iwo ambalatiza makhalidwe yakusiyana kwene-kwene. Na bzimwebzi, iwo ambanamiza abereki wawo, abale wa m’gwere pabodzi na Yahova. (Psal. 26:4, 5) Koma Yahova ambafuna lini kuti timbamulemekeze ndipo pa nthawe ibodzi-bodziyo timbacite bzinthu bzomwe iye ambabziwenga. (Mar. 7:6) Tin’funika kumbacita bzomwe Bibliya limbalewa kuti: ‘Mtima wako uleke kumbacitira njiru anyapikado, koma mbagopa Yahova nsiku yense.’—Mim. 23:17. w18.10 6-7 ¶14-15

Wanthu wa Yahova wa pa dziko la pansi ambacita mbali ya banja libodzi. Ndipo iwo ni abale na mpfumakazi omwe ambalatizana lufoyi. (1 Ju. 4:21) Nthawe zinango iwo ambacita nyongo ikulu kuti athandize abale wawo, koma nthawe zizinji lufoyi lawo limbawonekera napo pa tubzinthu tung’ono-tung’ono, pinango mwa kumbalewa mafala yakulimbisa abale wawo ayai kuwacitira bzinthu mwakudeka mtima. Tenepo, tikambacitira bzinthu bzabwino wanthu winango, timbatewezera Baba wathu wakudzulu. (Wayef. 5:1) Jezu adatewezera Baba wace pa bzinthu bzense. Iye nthawe zense akhacita bzinthu na wanthu mwakudeka mtima. Iye adalewa kuti: ‘Bwerani kwa ine, imwe mwense wakuneta na anyakulemedwa, ndipo ine nin’dzakupumisani.’ (Mat. 11:28, 29) Tenepo, tikambatewezera Jezu na kumbacita bzinthu mwa kukumbukira ‘munthu wakunyozeka,’ tin’dzakondwesa Yahova, ndipo ife tin’dzakondwambo. (Psal. 41:1) Tenepo mbatilatizeni lufoyi mwa kumbacitira bzabwino wanthu wa m’banja mwathu, abale wathu wa m’gwere na wanthu omwe timbawapalizira. w18.09 27 ¶1, 2

Tingaphatembo basa pabodzi na Yahova mwa kuthandiza abale wathu omwe agwedwa na malengwa ya pansi. Njira ibodzi yakucitira bzimwebzi ni kuwathandiza mwa kuwapasa kobiri. (Ju. 13:34, 35; Mab. 11:27-30) Ndipo njira inango ni kucenesa ayai kukonza-konza nyumba zomwe zadzongeka na malengwayo. Mwa ciratizo, mpfumakazi inango ya ku Polônia yakucemeredwa Gabriela, nyumba yace idagwa thangwe ra kusefukira kwa madzi, tsono idakomedwa pomwe idawona abale wa m’magwere ya pafupi adabwera kudzaithandiza. Ndipo tsapano akambakumbukira bza ngoziyo, mpfumakaziyo imbalewa kuti imbacita lini thupo na bzinthu bzakuthupi bzomwe idaluza, koma imbandokumbukira bzomwe idagumana. Mpfumakaziyo idalewa kuti: “Bzomwe bzidandicitikira bzimbanditsimikizira kuti ndinkucita mbali ya gwere la Akristau wa pa dziko lense, ndipo ni mwayi wakupambulika omwe ndinawo, ndipo bzimwebzi bzimbandikondwesa kwene-kwene.” Mafala ninga yamweya yambalewedwambo na abale azinji omwe ambathandizidwa akagwedwa na malengwa ya pansi. Ndipo wale omwe ambaphata basa pabodzi na Yahova ambakhalambo wakukondwa akambathandiza omwe agwedwa na malengwayo.—Mab. 20:35; 2 Wak. 9:6, 7. w18.08 25 ¶12

Kuti tikhotcerere mtima wathu, cakuyamba tin’funika kuzindikira bzinthu bzomwe bzingadzonge mtimayo na kucita ciri-cense kuti tiukhotcerere mwakamfulumize. Ndipo fala lakusanduliziridwa kuti ‘kukhotcerera’ limbatikumbusa basa lomwe mulindiri ambacita. Mu nthawe za Mambo Salomau, alindiri akhanyang’anira litsito la mzinda ndipo akawona kuti anyamadulanthaka akubwera iwo akhapereka cizindikiro mu mzindamo. Bzimwebzi bzinkutithandiza kuwona kuti tin’funika kucita ciri-cense kuti Sathani aleke kudzonga makumbukidwe yathu. Mu nthawe zakale, alindiri wa mzinda akhaphata basa pabodzi na alindiri wa misuwo. (2 Sam. 18:24-26) Wense akhathandizana pa kukhotcerera mzindayo, nthawe zense akhawonesesa kuti misuwo idafunga, ndipo akhabvuma lini kuti anyamadulanthaka awafenderere. (Neh. 7:1-3) Mpsibodzi-bodzimbo na cikumbu-mtima cathu cakupfunzisidwa na Bibliya, ico ciri ninga mulindiri wathu ndipo cingambaticenjeze Sathani akabwera kudzadzonga mtima wathu, ayai akafuna kupumpsa makumbukidwe pabodzi na bzikhumbo bzathu. Tenepo, nthawe zense cikumbu-mtima cathu cikambatidziwisa bza ngozi, tin’funika kumbacitetekera na kucita ciri-cense kuti titcenkhe ngoziyo. w19.01 17 ¶10-11

Pa nkhani yakusankhula m’bale kuti akhale na udindo, akulu an’funika lini kumbaphatisa basa nzeru zawo ayai cikhalidwe ca komwe ambakhala, koma an’funika kumbaphatisa basa mitemo ya m’Bibliya. (2 Tim. 3:16, 17) Akulu akasaya kuphatisa basa mitemo ya m’Bibliya pa nkhani yakusankhula m’bale kuti akhale mtumiki wakuthandiza ayai mkulu, iwo angacitise kuti m’baleyo aleke kukhala na udindo m’gwere. Bzimwebzi ndibzo bzomwe bzidacitika m’dziko linango. Kumweko kukhana m’bale munango omwe akhali mtumiki wakuthandiza, ndipo akhambasamalira bwino bzinthu bzizinji, mwakuti akulu wa gwere adawona kuti iye akhathemera kukhala mkulu. Tsono pakhana mkulu munango wacikulire pakati pawo, omwe adalewa kuti m’baleyo akhali mng’ono kwene-kwene mwakuti akhathemera lini kukhala mkulu, ndipo mpsakupasa nsisi kuti m’baleyo alibedi kukhala pa udindobo. Ndipo bzimwebzi ndibzo bzomwe abale ambakumbuka m’magwere mazinji. Tsono mpsakufunika kwene-kwene kuti timbaphatise basa nfundo za m’Bibliya, sikuti nzeru zathu. Ndipo tikacita bzimwebzi, tin’dzatewezera Jezu, ticisiya kumbayeruza anzathu mwakuwona mawonekedwe yawo yakunja.—Ju. 7:24. w18.08 14 ¶16-17

Pana thangwe linango la kukumbukira bwino pomwe tikanati kutumiza e-mail ayai mensaje. Mwa ciratizo, m’madziko manango, basa lathu lakupalizira limbaletsedwa. Tenepo, anyakutsutsa m’madziko yamweya ambamwaza utowa nkhani zakunama na cakulinga cakufuna kugopswa abale wathu ayai kuwacitisa kuti aleke kumbakhulupirana. Bzimwebzi bzidacitikambo m’mbuyomu pa nthawe ya União Soviética wakale. Pa nthaweyi pakhana gulu la mphanvu za umangi lakucemeredwa KGB, gululi lidamwaza gunkha lakulewa kuti abale winango wa udindo, akhadasiya kukhala Mboni za Yahova, acikhala ku mbali yawo. Mpsakupasa nsisi kuti abale azinji adakhulupira magunkhaya ndipo adasiya gulu la Yahova. Na kupita kwa nthawe, azinji wa iwo adadzabwerera, koma winango alibe. Bzimwebzi bzidacitika thangwe iwo adalekerera kuti nkhani zakunama zidzonge cikhulupiro cawo. (1 Tim. 1:19) Kodi tingatcenkhe tani kuthandizira magunkha ninga yamweya? Mwa kuleka kumbamwaza nkhani zakuipa ayai zomwe ziribe umboni. Ndipo tin’funikambo lini kumbakhulupira bzense bzomwe timbabva, m’mbuto mwace, tin’funika kumbakhala na umboni bwakukwanira pa bzomwe timbabvabzo. w18.08 5 ¶8

M’bzinembo bzakuyambirira bza Cigirego, bzizindikiro bzikhaphatisidwa lini basa kawiri-kawiri. Pinango tingabzibvunze kuti: Kodi Jezu adalewa kuti, ‘Ndikukuuza kuti, lero inepano ndin’dzakhala nawe m’Paraizo?’ Ayai adalewa kuti, ‘Ndikukuuza lero kuti, inepano ndin’dzakhala nawe m’Paraizo?’ Kumbukirani bzomwe Jezu adauza ateweri wace pakulewa bza infa yace. Iye adati: ‘Mwana wa munthu an’dzakhalambo mu mtima wa dziko la pansi kwa nsiku zitatu, masikati na usiku.’ (Mat. 12:40; 16:21; 17:22, 23; Mar. 10:34; Mab. 10:39, 40) Tenepo, pomwe Jezu pabodzi na kapondo omwe akhali ku mbali kwace ule adafa, alibe kuyenda ku Paraizo. Bibliya limbalewa kuti Jezu adamala nsiku zitatu ali ‘m’thenje,’ mpaka Mulungu adamulamusa. (Mab. 2:31, 32) Pomwe Jezu adauza kapondo ule bza Paraizo, iye akhalewa lini bza Paraizo wakudzulu. Kodi thangwe ranyi tinkulewa tenepoyo? Thangwe lakuyamba ndakuti kapondoyo akhadziwa lini kuti Jezu akhadacita mpangano na apostolo wace wakukhulupirika kuti angadadzatonga naye pabodzi kudzulu. (Lu. 22:29) Thangwe laciwiri ndakuti kapondo ule akhalibe kubatizidwa. (Ju. 3:3-6, 12) Tenepo, pomwe Jezu adapicira kapondo ule, iye akhambalewa bza paraizo wa pa dziko la pansi. w18.12 6-7 ¶17, 18; 8 ¶20, 21

Ajirayeri adakonza kamphulu ka oro aciyamba kukanamata, ndipo mwakucita bzimwebzi, iwo alibe kubvera cakutonga ca Yahova cakuletsa kunamata bzifanikiso. Tsono iwo akhabzinamiza pakukumbuka kuti angadanamata bzifanikiso, ndipo pa nthawe ibodzi-bodziyo acipitiriza kukhala ku mbali ya Yahova. Ndipo Aroni adalewa kuti kunamata kamphuluko kukhali ‘madyo ya Yahova.’ Tsono n’ciyani comwe Yahova adacita pa nkhaniyi? Iye adauza Mozeji kuti wanthuwo ‘akhadabziipisa’ ndipo akhadasiya njira yomwe Yahovayo akhadawauza ‘kuti ayende.’ Tenepo Yahova adakalipa kwene-kwene na cakucitikaci, mwakuti iye akhafuna kupfudziratu mtundu wense wa Jirayeri. (Kuf. 32:5-10) Tsono Yahova ni Mulungu wa nsisi, adawona kuti bzikhali lini bwino kupfudza mtundu wense wa Jirayeri. (Kuf. 32:14) Napo kuti ni Aroni omwe adakonza kamphulu ka oro kale, iye adakungula ndipo adaphatana na Alevi, acikhala kumbali ya Yahova. Pa nsiku imweyire, azinji omwe adanamata kamphulu ka oro kale adaphedwa. Koma omwe akhali kumbali ya Yahova adapulumuka ndipo iye adawapicira kuti angadawasimba.—Kuf. 32:26-29. w18.07 19 ¶13-16

Pana kudziwika kunango komwe n’kwabwino kwene-kwene kuposa kwense. N’kuponi? Sikuti ni kudziwika komwe wanthu azinji ambakufuna mwa kucita mapfunziro yapadzulu, kukhala na cuma pa nkhani za malonda ayai kukhala wakubvekera pa nkhani ya masenzeka ya m’dzikoli. Koma ni kudziwika komwe Paulo adakufotokoza pomwe iye adalewa kuti: ‘Pakuti tsapano imwepo mwadziwa Mulungu, ayai tilewe kuti mwadziwidwa na Mulungu, n’thangwe ranyi munkucita pomwe bzinthu bzacibwana, bzomwe mpsakusaya kuthandiza na bzakusaya phindu, ndipo munkufuna kukhala pomwe akapolo wa bzinthu bzimwebzi?’ (Wag. 4:9) Kulewa cadidi, ni mwayi ukulu kwene-kwene ‘kudziwidwa na Mulungu,’ omwe ni Mtongi Mkululetu wa cirengedwe cense! Yahova ambatidziwa bwino-bwino, ambatifuna ndipo an’funa kuti tikhale axamwali wace. Tenepo, bzingakwanisike ifepano kukhala pauxamwali na Yahova thangwe ndiye omwe adatirenga.—Mpal. 12:13, 14. w18.07 3-4 ¶3-4

Tikafuna kuti malamulo ya Mulungu yambatitsogolere tin’funika kumbayafuna na kuyalemekeza. (Am. 5:15) Kodi tingacite tani bzimwebzi? Mwa kumbawona bzinthu ninga momwe Yahova ambabziwonera. Onani ciratizoci: Tiyezeze kuti imwepo mumbaneseka kugona. Tenepo, mwayenda kwa dotolo ndipo iye wakuuzani kuti mun’funika kumbadya cakudya ca thanzi, kumbacita masenzeka yakulimbisa thupi na kucinja bzinthu bzinango pa moyo wanu. Tsono imwepo mwateweza malango yense ndipo tsapano munkukwanisa kugona. Kodi imwepo mungayawone tani malango ya dotolo umweyu? Mpsibodzi-bodzimbo na Mulengi wathu Yahova. Iye adatipasa malamulo yomwe yambatithandiza pa moyo wathu na kutikhotcerera ku bzakutewera bzakuipa bza pikado. Mwa ciratizo, Bibliya limbalewa kuti tin’funika lini kumbanama, kukhala wakusaya kukhulupirika, kuba, kucita upombo, ciwembo ayai kucita bzinthu bzakubverana na bzamizimu. (Mim. 6:16-19; Cibv. 21:8) Tikambateweza malamuloya na kuwona bzakutewera bzace bzabwino, ifepano timbafika pakufuna Yahova pabodzi na malamulo yace. w18.06 16 ¶5-6

Pinango Pirato akhagopa kuti Jezu angadacitisa wanthu kuphindukira Aroma, tsono iye adatawira Piratoyo kuti: ‘Umambo bwangu bumbacita lini mbali ya dzikoli.’ (Ju. 18:36) Jezu akhapitira lini nkhani za ndale thangwe Umambo bwace bungadakhala kudzulu, ndipo iye adalewa kuti akhadabwera pansi pano ‘kudzacitira umboni cadidi.’ (Ju. 18:37) Jezu akhadziwa bza thangwe lomwe akhadabwerera pansi pano. Mpsibodzi-bodzimbo na ifepano, tikadziwa bza basa lomwe tin’funika kucita, tin’dzathandizira lini cipani ciri-cense ca ndale mwa mafala ne na mu mtima mwathu. Tsono kucita bzimwebzi kungakhale kwakunesa. Mwa ciratizo, nyakunyang’anira dera munango adalewa kuti wanthu wa m’gawo lace, ambacita bzinthu mwakunyanyira. Iwo ambasamwa kwene-kwene thangwe ra mtundu wawo ndipo ambakumbuka kuti bzinthu bzingadawafambira bwino pa moyo, bzingadakhala kuti ankutongedwa na munthu wa mtundu wawo. Tsono iye adalewambo kuti: “Mpsakukondwesa kwene-kwene kuwona kuti abale na mpfumakazi ambapitiriza kukhala wakuphatana mwauzimu, acimbapalizira bzipsa bzabwino bza Umambo. Ndipo iwo ambathemba Mulungu kuti adzamalise mabvuto yawo na bzinthu bzense bzakusaya cirungamo bzomwe bzimbacitika.” w18.06 5 ¶6-7

M’bzinembo bza Cihebereu, dzinali limbagumanika kokha m’mabukhu matatu yomwe ni 1 Nkhani, Djobi na Zakariya. Kodi n’thangwe ranyi Bzinembo bzikhalewa lini kawiri-kawiri bza Sathani, Mesiya anati kubwera? Yahova alibe kufotokoza bzizinji pakulewa bza Sathani m’Bzinembo bza Cihebereu, ne bzomwe iye adacita. Thangwe ranyi? Thangwe cakulinga ca Bzinembo bza Cihebereu cikhali cakufuna kuthandiza wanthu kuzindikira Mesiya na kumutewera. (Lu. 24:44; Wag. 3:24) Ndipo pomwe Mesiya adafika, Yahova adaphatisa basa iye pabodzi na anyakupfunza wace kuti azimbule bzizinji pakulewa bza Sathani pabodzi na wanjo wale omwe adaphatana naye pakupandukira Yahova. Mpsakubveka kuti Yahova adaphatisa basa Mesiya kuti azimbule Sathani, thangwe iye an’dzaphatisambo basa Mesiyayo pabodzi na anyakudzozedwa kuti apfudze Sathaniyo na anzace wense. (War. 16:20; Cibv. 17:14; 20:10) Tsono ifepano tin’funika lini kumbagopa Sathani, thangwe mphanvu zace zina malire. Yahova, Jezu pabodzi na wanjo ambatikhotcerera ndipo na thandizo lawo, ifepano tingalimbane na nyamadulanthaka wathuyo. w18.05 15-16 ¶2-4

Yahova ambatiwona kuti ndife atumiki wace tikambabala bzisapo. (Mat. 13:23; 21:43) Tsono, kubala bzisapo komwe kunkulewedwa m’thereli lomwe limbagumanika pa Juwau 15:1-5, kunkuthandauza lini kupfunzisa wanthu. (Mat. 28:19) Bzingadakhala kuti bziri tenepo, ndiye kuti atumiki azinji wakukhulupirika wa Yahova, omwe alibe kuthandiza munthu mpaka kufika pakukhala mteweri wa Jezu, angadakhala ninga mthambi zomwe zinkulewedwazi. Tsono bziri lini tenepo! Thangwe ranyi? Thangwe ndakuti ifepano tingangingimize lini wanthu kuti apfunze cadidi ca m’Bibliya, ndipo Yahova ngwa lufoyi, mwakuti angatikumbire lini kucita cinthu comwe ifepano tingakwanise lini kucicita. Yahova ambatikumbira kuti ticite kokha bzire bzomwe ifepano tingakwanise kucita. (Bzak. 30:11-14) Tawona kuti kubala bzisapo kumbathandauza lini kupfunzisa wanthu cadidi ca m’Bibliya. Kodi kubala bzisapo kumbathandauza ciyani? Ni basa lakupalizira bzipsa bzabwino bza Umambo bwa Mulungu.—Mat. 24:14. w18.05 5 ¶8-9

Nsiku zinombo, pana atsogoleri azinji wa bzipembedzo, ndipo iwo ambacemeredwa abusa, anyansembe na madzina manango ya umbiri. Ninga Afarisi, atsogoleriwa ambapfunzisa lini cadidi ca m’Fala la Mulungu koma ‘ambacinjanisa cadidi ca Mulungu na kunama.’ (War. 1:18, 25) Iwo ambapfunzisa bzinthu bzakunama ninga, kutenthedwa na moto kwa muyaya, moyo wa munthu umbafa lini, Mulungu ambabvumiza amuna ayai akazi kulowolana okha-okha. Wanthu wa ndale ambaphatisambo basa kunama kuti apumpse wanthu. Ndipo kunama kukulu komwe iwo anilewa tsapanopapa n’kwakuti, an’bweresa ‘mtendere na cisungiko’ pa dzikoli. Tsono ‘pa nthawe imweyo cipasu-pasu cin’dzawafikira.’ Na tenepo, ifepano tin’funika lini kumbakhulupira bzomwe atsogoleriwa ambalewa bzakuti bzinthu bzin’cinja. Tsono cadidi n’cakuti ‘nsiku ya Yahova in’dzabwera ninga mbava, usiku.’—1 Wat. 5:1-4. w18.10 4-5 ¶6-8

Ifepano tinkukhala m’nsiku zakunesa ndipo tingasuname na kutaya mtima mwakusaya kunesa. Ndipopa, Jezu ambaphatisa basa abale wace wakudzozedwa na ‘atongi’ omwe ambacita mbali ya kathimu ka mabira manango kuti ambatilimbise. Tsono, akulu wa gwerewa ambakhala lini ‘wenekaciro’ wa cikhulupiro cathu, koma iwo ni ‘anyabasa anzathu’ kuti timbakondwe nawo. Ndipo iwo ambafuna kutithandiza kuti tikhale wakukondwa, ticipitiriza kukhala wakukhulupirika. (Zai. 32:1, 2; 2 Wak. 1:24) Akulu angambatewezere ciratizo ca mpostolo Paulo, omwe nthawe zense akhacita nyongo yakumbalimbisa abale wace wauzimu. Pomwe Akristau wa ku Tesalonika akhazunzidwa, Paulo adawanembera tsamba. Iye adati: ‘Na lufoyi likulu lomwe tinalo kwa imwepo, ifepano tiribe kundokupasani bzipsa bzabwino bza Mulungu, koma tidakupasanimbo moyo wathu, pakuti imwepo mwakhala wakufunidwa kwene-kwene na ifepano.’ (1 Wat. 2:8) Paulo adalatiza kuti kundolewa mafala yakulimbisa nthawe zinango n’kwakukwanira lini, ndipopa iye adauza akulu wa ku Efezo mafala ya mu vesi la lero. w18.04 22-23 ¶6-8

Penu tin’funa kukhala na ufulu bumwebu, tin’funika kubwerera kwa Yahova, bzomwe bzinkuthandauza kuti tin’funika kukhala pa uxamwali bwakulimba na iye. (2 Wak. 3:16) Pomwe Ajirayeri akhali m’dambo, iwo akhawona lini bzinthu ninga momwe Yahova ambabziwonera, ndipo bzimwebzi bzikhakhala ninga kuti iwo akhadampsinkha makumbukidwe na mitima yawo na nguwo. Iwo akhafuna kuphatisa basa ufulu bwawo kuti acite bzakufuna bzawo. (Waheb. 3:8-10) Ufulu bomwe mzimu wa Yahova umbapereka, bumbaposa ufulu bwa kutsudzulidwa ku ukapolo, ndipo n’bukulu kwene-kwene mwakuti palibe munthu na m’bodziyo omwe angadakhala nabo. Mwa ciratizo, mzimuyo ungatitsudzule ku ukapolo bwa pikado na infa na ukapolo bwa kunamata kwakunama pabodzi na miyambo yace. (War. 6:23; 8:2) Kulewa cadidi, bumwebu ni ufulu bwabwino kwene-kwene! Napo munthu omwe ni kapolo ayai ali m’kawoko angakhale na ufulu bumwebu.—Ciy. 39:20-23. w18.04 10 ¶3-5