PFUNZIRO 10
Kodi Mitsonkhano ya Mboni za Yahova Ingakuthandizeni Tani?
Kodi mudacemeredwa kale ku mitsonkhano ya Mboni za Yahova? Pinango mungacite thupo pang’ono penu n’kuyamba kuyenda ku mitsonkhanoko. Ndipo mungabzibvunze kuti: ‘Kodi n’ciyani cimbacitika ku mitsonkhano imweyi? Thangwe ranyi njakufunika? Thangwe ranyi nin’funika kuyenda ku mtsonkhanoko? Mu pfunziro lino, munipfunza thangwe ranyi kutsonkhana na wanthu winango kungakuthandizeni kukhala pa uxamwali na Mulungu na phindu lomwe mungaligumane na mitsonkhanoyo.
1. Thangwe ranyi Mboni za Yahova zimbagwezekana kuti zinamate pabodzi?
Onani momwe anembi wa Bibliya adalatizira thangwe likulu lakumbatsonkhanira pabodzi: “Nin’dzatumbiza Yahova pakati pa gulu la wanthu wakutsonkhana.” (Salimo 26:12) Mpsibodzi-bodzimbo, Mboni za Yahova zimbakomedwa kwene-kwene kumbatsonkhana pabodzi. Pa dziko lentse la pantsi, iwo ambatsonkhana pabodzi sumana iri-yentse kuti atumbize Mulungu, kuimba nyimbo na kupemba. Ndipo gole liri-lentse iwo ambacita mitsonkhano mikulu-mikulu.
2. Kodi mun’dzapfunza ciyani pa mitsonkhano yathu?
Pa mitsonkhano yathu timbapfunza Fala la Mulungu, “limbafotokozedwa mwakubveka bwino na kubvekesa thandauzo lace.” (Werengani Nehemiya 8:8.) Ndipo imwepo mukadzabwera, mun’dzapfunza bza Yahova na makhalidwe yace yabwino. Imwepo mukadziwa bzizinji bza lufoyi lace ni pomwe mun’dzakhala naye pa uxamwali. Ndipo mun’dzapfunzambo momwe iye angakuthandizireni kukhala na moyo wabwino.—Zaiya 48:17, 18.
3. Kodi mun’dzagumana phindu liponi mukadzatsonkhana nafe?
Yahova akutiuza kuti “bwerani timbakumbukirane kuti timbalimbikisane pa kulatiza lufoyi na kucita mabasa yabwino, ticileka kusiya kutsonkhana kwathu pabodzi.” (Ahebereu 10:24, 25) Ku mitsonkhano yathu, imwepo mun’dzadziwana na wanthu omwe ambafunanadi ndipo akufunambo kupfunza bzizinji bza Mulungu ninga imwepo. Ndipo mun’dzabva nkhani zakulimbikisa zakucokera m’Bibliya. (Werengani Aroma 1:11, 12.) Imwepo mun’dzadziwana na wanthu azinji omwe ali pa banja na omwe ali lini pa banja omwe akukomendwa napo kuti akugumana na mabvuto mazinji. Yamweya ni mathangwe manango yomwe yambacitisa Yahova kufuna kuti timbatsonkhane pabodzi nthawe zentse.
FUFUDZANI BZINANGO
Onani bzomwe bzimbacitika ku mitsonkhano ya Mboni za Yahova na phindu lomwe mun’dzagumana mukacita nyongo yakugumanika pa mitsonkhanoyo.
4. Mitsonkhano ya Mboni za Yahova
Kale-kale, Akristau akhatsonkhana pabodzi kuti anamate Yahova. (Aroma 16:3-5) Werengani Akolose 3:16, ndipo mukamala cezeranani mbvunzo wakutewerayu:
Kodi Akristau wakale-kale akhanamata tani Yahova?
Ntsiku zino, Mboni za Yahova zimbatsonkhanambo nthawe zentse m’mbuto zawo zakunamatira. Kuti muwone momwe iwo ambacitira mitsonkhano yawoyo, onani VIDIYO. Mukamala onani cithunzi-thunzi comwe cikulatiza mitsonkhano ya gwere, ndipo cezeranani mibvunzo ikutewerayi.
Kodi pana kundendemerana kuponi pakati pa bzomwe bzimbacitika mu Nyumba ya Umambo na bzomwe mwawerenga pa Akolose 3:16?
Kodi pana cinthu comwe cakudekerani mu vidiyoyi ayai pa cithunzi-thunzici?
Werengani 2 Akolinto 9:7, ndipo mukamala cezeranani mbvunzo wakutewerayu:
Thangwe ranyi mitsonkhano ya Mboni za Yahova njafovolo?
Imwepo na pfunzisi wanu onani bzomwe bzin’dzapfunzidwa pa mitsonkhano sumana ino.
Kodi ni mbali iponi ya pa mitsonkhanoyo yomwe mukuwona kuti ingakuthandizeni?
Kodi mukhadziwa?
Pa jw.org, mungagumane mbuto na nthawe yomwe mitsonkhano imbacitika ku mbuto zakusiyana-siyana pa dziko lentse la pantsi.
Pa mitsonkhano yathu pambafotokozedwa nkhani, pambacitidwa bziratizo ndipo pambalatizidwa mavidiyo. Mitsonkhanoyo imbayamba na kumala na nyimbo pabodzi na mpembo
Mbali zinango za mitsonkhanoyo, wanthu ambakhala na mwayi wa kupereka mitawiro
Wana, acikulire, mabanja na omwe ali lini pa banja, wentse ambatambiridwa na manja mawiri
Mitsonkhano yathu njafovolo. Mboni za Yahova zimbafambisa lini ntsengwa ayai palato yakukumbira kobiri pa mitsonkhano yawo
5. Pambafunika nyongo kuti timbatsonkhane
Onani ciratizo ca banja lomwe Jezu adakulira. Kuti akagumanike pa mtsonkhano omwe ukhacitika pa gole, iwo akhafunika kufamba mu mseu wa mapiri mtantho wa makilometro 100, kucokera ku Nazaleti mpaka ku Jeruzalemu. Werengani Luka 2:39-42, ndipo mukamala cezeranani mibvunzo ikutewerayi:
Kodi mukuwona kuti ulendo bwakuyenda ku Jeruzalemu bukhafunika nyongo?
Thangwe ranyi mun’funika kumbacita nyongo ikulu kwene-kwene kuti mumbagumanike pa mitsonkhano?
Kodi mukuwona kuti bzina phindu? Thangwe ranyi?
Bibliya limbalewa kuti kutsonkhana pabodzi kuti tinamate Yahova, n’kwakufunika kwene-kwene. Werengani Ahebereu 10:24, 25, ndipo mukamala cezeranani mbvunzo wakutewerayu:
Thangwe ranyi tin’funika kumbatsonkhana nthawe zentse?
WANTHU WINANGO AMBALEWA KUTI: “Mpsakufunika lini kumbakatsonkhana na wanthu winango. Mpsakukwanira kundopfunza Bibliya pa mui.”
Kodi ni cinembo ciponi ayai ciratizo ca m’Bibliya comwe cimbalatiza bzomwe Yahova akufuna?
KODI MWAPFUNZA CIYANI?
Kugumanika pa mitsonkhano kun’dzakuthandizani kupfunza bzizinji bza Yahova, kulimbikisa uxamwali bwanu na iye na kumunamata pabodzi na wanthu winango.
Mibvunzo yakubwerezera
Thangwe ranyi Yahova ambatiuza kuti timbatsonkhane pabodzi?
Kodi n’ciyani comwe mun’dzapfunza ku mitsonkhano ya Mboni za Yahova?
Kodi mukuwona kuti mitsonkhano ingakuthandizeni tani?
ONANI POMWE IBZI
Tani penu mukucita thupo kukagumanika ku mtsonkhanoko? Onani bzomwe munthu munango adacita pomwe akhacitambo thupo.
Onani momwe tswaka linango limbakomedwera na kugumanika pa mitsonkhano na bzomwe ambacita kuti apitirize kugumanika ku mitsonkhanoko nthawe zentse.
Onani momwe winango ambaiwonera mitsonkhano.
“Thangwe Ranyi Nin’funika Kumbagumanika pa Mitsonkhano pa Nyumba ya Umambo?”(Nkhani ya pa jw.org)
Onani momwe munthu munango omwe akhali waciwembo adacinjira moyo wace pambuyo pa kutsonkhana na Mboni za Yahova.
“Kuli-kwentse Komwe Ndikhayenda Ndikhana Mfuti”(Ntsanza ya Mulindiri ya 1 Julho, 2014)