Abril

Aristako akhali xamwali wakukhulupirika wa mpostolo Paulo. Iye akhali Mkristau wa ku Tesalonika, mzinda omwe ukhali ku Masedoniya. Ulendo bwakuyamba bomwe Bibliya limbaguma bza Aristako, ni pa ulendo bwacitatu bwa Paulo pomwe akhazungira akristau wa ku Efezo ninga misiyonario. Pomwe Aristako akhaperekeza Paulo, thimu la wanthu waciwembo lidamuphata. (Mab. 19:29) Ndipo pomwe thimulo lidamulekera, Aristako alibe kubwerera m’mbuyo, koma adapitiriza kuperekeza Paulo. Pomwe akhali mu mzinda wa Geresiya, Aristako adapitiriza kukhala wakukhulupirika kwa Paulo, napo pomwe Pauloyo akhafuna kuphedwa na anyamadulanthaka wace. Ndipo mu gole la 58, pomwe Paulo adatumizidwa ku Roma ninga nyam’kawoko, iye akhali pabodzi na Aristako pa ulendo butalibo, ndipo wentse adalubzika m’madzi. (Mab. 27:1, 2, 41) Bzikuwoneka kuti pomwe Aristako na Paulo adafika ku Roma, wentse awiri adafungiridwa m’kawoko. (Wakol. 4:10) Kulewa mwakusaya kupenukira, Paulo adatsangalazidwa kwene-kwene na xamwali wace wakukhulupirikayu! Ninga Aristako, ifepano tingakhalembo axamwali wakukhulupirika kwa abale na mpfumakazi zathu. Kodi tingacite tani bzimwebzo? Mwa kukhala ku mbali yawo sikuti pa nthawe yabwino yokha, koma napo ‘pakawoneka mabvuto.’ w20.01 9 ¶4-5

Nthawe zinango, Mkristau omwe wadzozedwa angabziwone kuti akuthemera lini mwayi umweyu. Koma iye ambapenukira lini kuti Yahova wamusankhula. M’mbuto mwace, iye ambakomedwa kwene-kwene ndipo ambatenda cidikhiro comwe ambapasidwa cakukakhala kudzulu. (1 Pe. 1:3, 4) Kodi bzimwebzi bzikuthandauza kuti anyakudzozedwa ambafuna kufa? Mpostolo Paulo akutawira mbvunzoyu. Iye adandendemezera thupi la munthu na tendi, mwa kulewa kuti: ‘Ife omwe tiri mu tendi ino, tikubuula, thangwe ra kulemedwa. Sikuti thangwe ra kufuna kukhundula, koma thangwe ra kufuna kubvala unango, kuti comwe cimbafa cipitidwe m’mbuto na moyo.’ (2 Wak. 5:4) Tenepo Akristauwa alibe kutairatu cikhumbo cawo cakukhala na moyo pano pa dziko la pantsi, mpaka kukhumba kufa. M’mbuto mwace, iwo ambakomedwa na moyo ndipo ambafuna kutumikira Yahova pabodzi na abale na axamwali wawo ntsiku iri-yentse. Napo bziri tenepo, bziribe basa bzomwe anyakudzozedwa akucita, iwo nthawe zentse ambakumbukira bza cidikhiro cawo.​—1 Wak. 15:53; 2 Pe. 1:4; 1 Ju. 3:2, 3. w20.01 23 ¶12-13

Yahova ambatipfunzisa. Ifepano ndife lini wakulungamiratu ninga Jezu. Ndipopa bzikafunikira, Baba wathu wa lufoyi, ambatilanga kuti atipfunzise. Iye ambatilanga mwakuphatisa basa njira zakusiyana-siyana. Mwa ­ciratizo, iye angatilange mwakuphatisa basa bzomwe timbawerenga m’Bibliya na bzomwe timbabva pa mitsonkhano. Ndipo nthawe zinango, thandizo lomwe tingafunikire lingacokere kwa akulu wa gwere. Bziribe basa momwe Yahova ambatilangira, koma iye ambacita bzimwebzo thangwe ambatifuna. (Jer. 30:11) Yahova ambatithandiza tikagumana na mayezo. Baba wathu wakudzulu ambatipasa mphanvu kuti tikwanise kupirira mayezo yomwe timbagumana nayo, ninga momwe pai wa lufoyi ambathandizira mwana wace akayezedwa. Iye ambatipasa mzimu wace wakucena kuti utikhotcerere ku cinthu ciri-centse comwe cingadzonge uxamwali bwathu na iye. (Lu. 11:13) Ndipo Yahova ambatithandiza tikakhala na thupo. Mwa ciratizo, iye ambatipasa cidikhiro cabwino pakulewa bza kutsogolo. Ndipo cidikhiroco cimbatithandiza kupirira mayezo. Dziwani ibzi: Bziribe basa bzinthu bzakuipa bzomwe tikugumana nabzo, Yahova an’dzamalisa mabvuto yentse yomwe yambatiboneresa. Tenepo, mayezo yomwe timbagumana nayo ntsiku zino, nja kanthawe kakucepa, koma bzisimbo bza Yahova bzin’dzakhala mpaka kale-kale.​—2 Wak. 4:16-18. w20.02 5 ¶14-15

Ifepano tingakunde njiru! Kumbukirani ciratizo ca abale wace wa Zuze. Pomwe padapita magole mazinji pambuyo pakuzunza Zuze, iwo adagumana naye ku Edjipito. Ndipo Zuze akanati kubzidziwikisa kwa abale wacewo kuti akhali yani, iye adawayeza kuti awawone penu akhadacinja. Pomwe akhadya, Zuze adapasa cakudya cizinji m’bale wace omwe akhali mng’onoletu pa wentse, Benjamini, kuposa abale wace winangowo. (Ciy. 43:33, 34) Koma abale wacewo, alibe kucitira njiru Benjamini. M’mbuto mwace, iwo adalatiza kuti akhana thupo na m’bale wawoyo pabodzi na baba wawo, Djakobi. (Ciy. 44:30-34) Pakuti abale wa Zuze adakunda njiru mu mtima mwawo, iwo adakwanisa kubwezeresa mtendere wa banja lawo. (Ciy. 45:4, 15) Mpsibodzi-bodzimbo na ifepano, tikakwanisa kukunda njiru mu mtima mwathu, tin’dzacitisa kuti banja lathu pabodzi na gwere lathu lipitirize kukhala pa mtendere. Yahova an’funa kuti tikunde njiru ticikhala pa mtendere na wanthu wentse. Ndipo tikakulisa khalidwe lakubzicepesa, kumbawona bzomwe tinabzo kukhala bzakutikwanira na kumbawonambo bzomwe winango ambacita kukhala bzakufunika, tin’dzakwanisa kukunda njiru. w20.02 19 ¶17-18

Njira ibodzi yomwe ingakuthandizeni kutenda lufoyi lomwe Yahova ambakulatizani, ni kulewalewa naye mu mpembo. Mukambapemba, mbamuuzani Mulungu bzomwe bzimbakucitisani thupo, ndipo mbatendani bzinthu bzabwino bzomwe iye ambakucitirani. Tenepo mukambawona momwe Yahova akutawirira mipembo yanu, uxamwali bwanu na iye bun’dzalimba. Ndipo lufoyi lanu kwa iye lin’dzathimizirika mucikhala na citsimikizo cakuti Yahova ambakubvesesani. Tsono kuti mukhale naye pa uxamwali bwakulimba, mun’funika kubvesesa bzomwe ambafuna, bzomwe ambafuna lini na mathangwe yomwe iye ambacitira bzinthu bzinango. Ndipo mun’funikambo kudziwa bzomwe iye ambafuna kuna imwepo. Njira ibodzi yomwe ingakuthandizeni kukhala na cidziwiso, ni kupfunza Fala lace, Bibliya. Tenepo, mbalemekezani. Ni Bibliya lokha lomwe limbalewa bza cadidi ca Yahova na bzomwe iye akufuna kudzakucitirani kutsogolo. Ndipopa mbawerengani Bibliya ntsiku zentse, mbakonzekerani pfunziro lomwe mukucita na munthu omwe ambakupfunzisani Bibliyalo, ndipo mbaphatisani basa bzomwe mukupfunzabzo. Mukacita bzimwebzi, mun’dzalatiza kuti mumbalemekeza Bibliya. (Psal. 119:97, 99; Ju. 17:17) Kodi imwepo muna ndandanda yakuwerenga Bibliya ntsiku zentse? Penu munti inde, kodi mumbaiteweza? w20.03 5 ¶8-9

Penu nthawe zinango mumbakwanisa lini kupalizira nyumba na nyumba thangwe rakuti thanzi lanu linkukunesani, mungacite bwino kunyang’ana mbuto yomwe wanthu azinji ambagwata na pamwepo kuti muwapalizire mudakhala. Ayai pinango mungacite upalizi bwakusaya kulinganizidwa, ninga kunembera wanthu matsamba, ayai kuphatisa basa mtedwe. Ndipo abale azinji omwe ambakwanisa lini kupalizira nyumba na nyumba thangwe ra kuduwala na kukalamba, ambakomedwa kwene-kwene thangwe ra kuphatisa basa njira zimwezi. Bzimwebzi bzinkulatiza kuti napo penu muna bvuto la thanzi, mungakwanise kucita utumiki bwanu mwakukwanira. Mpostolo Paulo adati: ‘M’bzinthu bzense, ndimbagumana mphanvu kucokera kwa ule omwe ambandipasa mphanvu.’ (Waf. 4:13) Paulo akhafunikira mphanvu imweyi pomwe akhaduwala pa ulendo bunango bomwe akhacita ninga misiyonario. Iye adauza Agalata kuti: ‘Imwepo mun’dziwa kuti ndidakupalizirani bzipsa bzabwino pa ulendo bwakuyamba thangwe ra kuduwala.’ (Wag. 4:13) Mpsibodzi-bodzimbo na imwepo, penu mukuduwala ndipo muli ku nyumba ya ulapi, mbaphatisani basa njira zense zomwe mungakwanise kuti mupalizire bzipsa bzabwino wanthu winango, ninga adotolo, alapi pabodzi na omwe ­akukusamalirani. Mpsakufunika kupalizira wanthu amwewa thangwe pomwe apalizi ambawazungira m’mii mwawo, iwo ambakhala ali kubasa. w19.04 4-5 ¶10-11

Mu gole la 2018, apalizi wakupitirira 223.000 akhakhala m’madziko yomwe basa lathu lakupalizira limbaletsedwa. Bzimwebzi bzimbatidabwisa lini. Akristau wacadidi ambadziwa kuti an’dzazunzidwa. Bziribe basa dziko lomwe timbakhala, mwadzidzidzi maboma yangatiletse kunamata Yahova, Mulungu wathu wa lufoyi. Boma likaletsa kunamata kwathu, tingayambe kukumbuka kuti Mulungu ankukomedwa lini pomwe nafe. Tsono kumbukirani kuti cizunzo cimbathandauza lini kuti Yahova ankukomedwa lini nafe. Ciratizo pa nkhaniyi ni mpostolo Paulo. Mwakusaya kupenukira, Yahova akhafuna kwene-kwene Paulo. Paulo adakhala na mwayi wakunemba matsamba 14 yomwe yambacita mbali m’Bzinembo Bzacigirego Bzacikristau, ndipo iye adasankhulidwa kuti acite basa lakupambulika ninga mpostolo wa mitundu. Napo kuti Mulungu akhakomedwa naye, Paulo adagumana na mabvuto mazinji. (2 Wak. 11:24-26) Tenepo, bzomwe bzidacitikira mpostolo Paulo bzimbalatiza kuti Yahova ambalekerera kuti atumiki wace wakukhulupirika azunzidwe. w19.07 8 ¶1, 3

Njira ibodzi yomwe Yahova ambalatizira kuti ambacita nafe thupo, ni kutithandiza kulimbana na anyamadulanthaka wathu. Ndipo anyamadulanthaka wathu wakuyamba ni Sathani na madimonyo yace. Tenepo, mwalufoyi Yahova ambaticenjeza kuti tisamale na anyamadulanthakawa, ndipo ambatipasambo bzomwe bzingatithandize kulimbana nawo. (Wayef. 6:10-13) Tenepo, tikabvuma thandizo la Yahova na kumukhulupira na mtima wense, ifepano tin’dzakwanisa kulimbana na Sathani. Ndipo tin’dzakhala na citsimikizo ninga ca mpostolo Paulo. Iye adanemba kuti: ‘Penu Mulungu anafe, mbani omwe angalimbane nafe?’ (War. 8:31) Akristau wacadidife timbaikha lini makumbukidwe yathu pa bzomwe Sathani na madimonyo yace ambacita. Koma timbaikha makumbukidwe yathu yense pa bzomwe timbapfunzisidwa na Yahova, ticimutumikira. (Psal. 25:5) Napo bziri tenepo, tin’funikira basi kudziwa bzinthu bzomwe Sathani ambabziphatisa basa kuti apumpse nabzo wanthu. Thangwe ranyi? Kuti tireke kupumpsidwambo naye.​—2 Wak. 2:11. w19.04 20 ¶1-2

Tikambacita bzinthu na wanthu omwe adasunama, timbakhala atetekeri wa bwino? Kukhala mtetekiri wabwino kumbaphatanidza bzizinji zikuti kundonyamala pomwe munthu ankulewalewa. Tingalatize tani nsisi na lufoyi tikambatetekera abale na mpfumakazi zathu zikambalewalewa. Nthawe zinango, mafala yakucepa yakulimbisa yangalatize momwe tinkubvera na bvuto la m’baleyo. Pinango mungalewe kuti: “Bzomwe bzidakucitikiranibzi bzinkundiwawa kwene-kwene! Palibe mwana omwe angafunikire kucitidwa bzimwebzi!” Pinango mungabvunze mbvunzo ubodzi ayai miwiri kuti mubvesese momwe xamwali wanuyo ankubvera. Pinango mungamubvunze kuti: “Kodi mungafune kundithandiza kubvesesa bzomwe mukufuna kulewa?” ayai “Pomwe imwepo mudalewa bzimwebzi, ndidabvesesadi thandauzo lace . . . Kodi ndibzo bzomwe mukhafuna kulewa?” Mafala ya lufoyi ninga yamweya yangacitise munthu omwe munkumutetekera, kutsimikiza kuti munkubvesesa bzomwe ankulewa. (1 Wak. 13:4, 7) Munthu akambafotokoza nkhani tin’funika kumbacedwa ‘kulewa-lewa.’ Tin’funika lini kumugwata mafala na cakulinga cakufuna kumupasa malango ne kugaza makumbukidwe yace. Ndipo tin’funikambo kupirira! Ndipo m’mbuto mwakuthamangira kuwauza bzomwe angacite kuti amalise mabvuto yawo, tin’funika kumbawabvera nsisi na kuwadekera mtima.​—1 Pe. 3:8. w19.05 17-18 ¶15-17

M’banja, mwamuna wakulowola an’funika kumbafuna mkazi wace ‘ninga momwe Kristu ambafunira gwere.’ (Wayef. 5:28, 29) Mwamuna an’funika kutewezera lufoyi la Kristu mwa kumbaikha pa m’mbuto yakuyamba bzakusaya na bzakufuna bza mkazi wace. Amuna winango bzimbawanesa kulatiza lufoyi ninga limweri, thangwe adakulira ku mbuto komwe nkhani yakucitira winango cirungamo na lufoyi imbawoneka kuti iribe basa. Thangwe ra bzimwebzi iwo anganeseke kucinja makumbukidwe yawo yakuipa, koma mwakubverana na cakutonga ca Kristu iwo an’funika kucinja. Mwamuna omwe ambalatiza lufoyi kwa mkazi wace ambacitisa kuti mkaziyo amulemekeze. Ndipo pai omwe ambafuna wana wace na mtima wense ambawakalipisa lini thangwe ra bzomwe wanawo ambalewa na kucita. (Wayef. 4:31) M’mbuto mwace, iye ambalatiza lufoyi lace kwa iwo na kuwacitisa kubzibva kuti mbakukhotcerereka nakuti ambafunidwa. Pai omwe ambacita bzimwebzi ambacitisa wanawo kumufuna na kumukhulupira. w19.05 6 ¶21

Kodi Mariya adakumbuka ciyani pomwe adabva mafala ya Gabriyeli? Kodi iye adayamba kukumbukira kuti Gabriyeli akhafuna kulewa kuti Jezu an’dzapita nkhankha mwa Mambo Herode, ayai nkhankha ya m’bodzi mwa atongi wa Jirayeri? Tenepo, penu Jezu angadakhaladi mambo pansi pano, Mariya angadakhala mkazi wakulemekezeka, ndipo banja lace lingadakakhala ku nyumba ya mambo. Koma Bibliya limbalewa lini kuti Mariya adakumbira mbuto yabwino kuti adzakhale mu Umambobo. Bzimwebzi bzinkutitsimikizira nfundo yakuti Mariya akhali mkazi wakubzicepswa! Nthawe zense tin’funika kumbakumbukira kuti cakulinga cathu cikulu comwe cimbaticitisa kupfunza Bibliya na mabukhu yathu ni kufuna kukhala pa uxamwali na Yahova. Tin’funikambo kudziwa bwino ‘unthu bwathu,’ kuti ndife mbani na bzomwe tin’funika kucinja kuti tikondwese Mulungu. (Tiy. 1:22-25; 4:8) Ndipo tikafuna kuyamba pfunziro lathu liri-lense, tin’funika kukumbira mzimu wakucena wa Yahova kuti utithandize kubvesesa bzomwe tin’funa kupfunzabzo na kucita bzomwe iye ambafuna. w19.05 30-31 ¶18-19

Nthawe zinango, ifepano tingagumane na mabvuto mazinji pa nthawe ibodzi-bodzi. Mbatiwoneni bziratizo bzakutewerabzi. Cakuyamba n’ca m’bale John omwe ambaduwala matenda yakutepesa bziwalo. Iye adasunama kwene-kwene pomwe mkazace adamuthawa pambuyo pa magole 19 ali pabodzi. Ndipo na kupita kwa nthawe, wana wace awiri wacikazi adadzasiya kutumikira Yahova. Ciratizo cinango n’ca Bob na Linda, banja lomwe lidagumana na mabvuto yakusiyana na ya m’bale John. Bob na Linda, wense awiri adaluza mabasa yomwe akhaphata, ndipo pakuti akhalibe kobiri zakulipirira nyumba yomwe akhakhala, iwo adacosedwa m’nyumbamo. Kuthumizira pa mabvuto yamweya, Linda adauzidwa na dotolo kuti akhana matenda ya mtima yomwe yangadamupha, ndipo akhana pomwe matenda manango yomwe yakhacitisa kuti thupi lace litazire kumbabzikhotcerera lokha. Tina citsimikizo cense cakuti Yahova, omwe ni Mulengi wathu na Baba walufoyi, ambabvesesa momwe ifepano timbabvera tikakhala na thupo. Ndipo iye ambafuna kutithandiza kulimbana na mabvuto yomwe timbagumana nayo. (Waf. 4:6, 7) M’Bibliya muna bziratizo bzizinji bza atumiki wa Mulungu omwe adapirira mabvuto yomwe akhagumana nayo. Iro limbafotokozambo momwe Yahova adawathandizira kulimbana na mabvutoyo. w19.06 14 ¶2-3

Tikambacita tubzinthu tung’ono-tung’ono twakulatiza kudekera mtima wale omwe adafedwa ayai adathawidwa na mwamuna ayai mkazi wawo, iwo an’dzawona kuti timbawafuna. Pa nthawe yomwe ali wokha, ni pomwe ambafunikira kwene-kwene axamwali wabwino. Kodi imwepo mungalatize tani kuti ndimwe xamwali wawo wabwino? Mungawacemere kuti mukadye nawo cakudya. Mungawakumbire kuti muyende nawo mu utumiki bwakumunda ayai ku mbuto inango kuti mukapitidwe kamphepo. Ndipo nthawe zinango mungawacemere kuti adzakhale namwe pa kunamata kwanu ninga banja. Mukacita tenepo, mun’dzakondwesa Yahova, thangwe iye ‘ali pafupi na wale omwe adasweka mtima’ ndipo ni ‘nyakukhotcerera akazi mansiwa.’ (Psal. 34:18; 68:5) Tsapanopapa, Umambo bwa Mulungu buniyamba kutonga dziko la pansiri, ndipo ‘kubonera [kwense] kun’dzayebwedwa.’ Tinkudikhirira na mtima wense nthawe yomwe ‘bzinthu bzakale bzin’dzakumbukiridwa lini pomwe, ne kubwera mu mtima.’ (Zai. 65:16, 17) Tsono pomwe tinkudikhirira nthawe imweyi, tin’funika kupitiriza kuthandizana. Ndipopa mbalatizani m’mafala na bzicito kuti mumbafuna wense wale omwe ambacita mbali ya banja lathu la uzimu.​—1 Pe. 3:8. w19.06 25 ¶18-19

Nsanza ya Mulindiri inango ya m’magole ya mbuyomu, idalewa kuti: “Munthu omwe ambadziwa bwino Mulungu, an’dzamukhulupira pa nthawe ya mayezo.” Bzimwebzi n’cadidi! Kuti tikwanise kulimbana na mazunzo, ifepano tin’funika kufuna Yahova ticimbamukhulupira na mtima wathu wense. (Mat. 22:36-38; Tiy. 5:11) Kuwerenga Bibliya nsiku zense kun’dzalimbisa uxamwali bwanu na Yahova. (Tiy. 4:8) Mukambawerenga, mbayezezani kuwona makhalidwe yabwino ya Yahova. Ndipo mbabvesesani lufoyi lomwe iye analo kwa imwepo kucokera pa bzinthu bzomwe ambalewa na kucita. (Kuf. 34:6) Wanthu winango bzingawanese kukhulupira kuti Mulungu ambawafuna thangwe palibe ne munthu m’bodzi ambawafuna. Penu imwepo mumbawonambo tenepoyo, mbanembani nsiku zense bzinthu bzabwino bzomwe Yahova ambakucitirani. (Psal. 78:38, 39; War. 8:32) Ndipo mukambakumbukira bzinthu bzomwe bzimbakucitikirani na bzomwe mumbawerenga m’Fala la Mulungu, mun’dzakhala na bzinthu bzizinji bzakunemba pa bzomwe Yahova adakucitirani. Tenepo mukambatenda bzinthu bzense bzomwe Yahova ambakucitirani, uxamwali bwanu na iye bun’dzalimba kwene-kwene.​—Psal. 116:1, 2. w19.07 2-3 ¶4-5

Yahova alibe kutipasa udindo bwakumbasankhulira winango bzakucita. Kulewa cadidi, ule omwe ambakhazikisa malamulo yakusaya kufunika, ankukhotcerera lini abale wace, koma ankulinga kukhala mwenekaciro wa cikhulupiro ca abalewo. Sathani, Dyabu, an’dzasiya lini kuzunza atumiki wakukhulupirika wa Yahova. (1 Pe. 5:8; Cibv. 2:10) Iye pabodzi na omwe ali kumbali yace an’dzapitiriza kuyezera kutiletsa kutumikira Yahova. Tsono tin’funika lini kubvuma kuti mantha yatitazise kutumikira Yahova! (Bzak. 7:21) Tireke kuyebwa kuti Yahova ali kumbali yathu, ndipo an’dzapitiriza kutithandiza napo basa lathu likaletsedwa. (2 Nkha. 32:7, 8) Tenepo, tin’funika kukhala na citsimikizo comwe Akristau wakuyambirira akhanaco. Iwo adauza atongi wa mu nthawe yawo kuti: ‘Yeruzani ndimwe penu mpsakuthemera pa maso pa Mulungu kubvera imwepo kuposa Mulungu. Tsono ife, tin’leka lini kulewa bzinthu bzomwe tidawona na kubva.’​—Mab. 4:19, 20. w19.07 13 ¶18-20

Pomwe tikupalizira tin’funika kumbacita nyongo yakubvesesa makumbukidwe ya wanthu omwe timbawapalizira. Mpostolo Paulo adakulira pakati pa Ajuda. Tsono kuti akwanise kupalizira wanthu wa mitundu inango omwe akhadziwa bzinthu bzakucepa ayai ne na pang’ono bza Yahova na Bzinembo, iye akhafunika kucinja upalizi bwace. Mpsibodzi-bodzimbo na ifepano, kuti tibvesese bwino makumbukidwe ya wanthu wa m’gawo lathu, tin’funika kufufudza ayai kubvunza apalizi winango omwe ambalidziwa bwino gawolo. (1 Wak. 9:21-23) Cakulinga cathu ni kugumana ‘omwe ngwakuthemera.’ (Mat. 10:11) Tenepo, tikakhala mu utumiki bwakumunda tin’funika kumbakumbira wanthu kuti afotokoze makumbukidwe yawo ndipo akambafotokoza timbawatetekere mwatceru. M’bale munango ku Inglaterra ambabvunza wanthu kuti afotokoze makumbukidwe yawo pa nkhani ya momwe angakhalire na banja lakukondwa, momwe angalerere wana ayai momwe angalimbanire na kusaya cirungamo. Akamala kutetekera mtawiro wawo, iye ambawabvunza kuti: “Kodi mukuwona tani malango aya yomwe yadanembedwa magole 2.000 m’mbuyomu?” Patsogolo pace, mwakusaya kuguma fala lakuti “Bibliya,” iye ambalatiza munthuyo mavesi yakubverana na nkhaniyo, kucokera mu mtedwe mwace. w19.07 21-22 ¶7-8

Kodi tin’funika kumbamufuna tani Mulungu? Jezu adauza Mfarizeu munango kuti: ‘Umbafune Yahova, Mulungu wako, na mtima wako wense, na moyo wako wense, na nzeru zako zense.’ (Mat. 22:36, 37) Tin’funika kumbafuna Yahova na mtima wathu wense. Ndipo tin’funika kukulisa lufoyi lathu kwa iye nsiku zense. Ifepano tin’funika kumudziwa Mulungu kuti timufune. Bibliya limbati: ‘Ule omwe alibe lufoyi ambamudziwa lini Mulungu thangwe Mulungu ni lufoyi.’ (1 Ju. 4:8) Mpostolo Paulo adalewa kuti lufoyi lathu kwa Mulungu limbakula pomwe timbakhala na ‘cidziwiso caico pabodzi na kuzindikira bzinthu mwakukwanira’ pakulewa bza iye. (Waf. 1:9) Pomwe tidayamba kupfunza cadidi ca m’Bibliya, tidayamba kufuna Yahova napo kuti tikhadziwa lini bzinthu bzizinji pakulewa bza iye. Tsono pomwe tidapfunza bzizinji pakulewa bza Yahovayo, lufoyi lathu lidakula. Ndipopa mpsakufunika kuti timbapfunze Bibliya na kumbakumbukira bzomwe tapfunzabzo nsiku zense.​—Waf. 2:16. w19.08 9 ¶4-5

Penu munkutumikira ku mbuto ipsa, mun’funika kukhala na axamwali watsapasano. Kumbukirani kuti mukhale na axamwali, imwepo mun’funika kukhala wakucezeka. Mbauzani winango bzinthu bzabwino bzomwe mwagumana nabzo, ndipo citisani wanthuwo kuwona cikondweso comwe munaco pakutumikira Yahova. Nthawe zinango, banja lingafunike kusiya kucita utumiki bwa nthawe zense thangwe ra kuduwala kwa mkazi ayai mwamuna. Penu bzimwebzi bzidacitika na imwepo, lekani kupasa mulandu mwanzanu omwe akuduwalayo. Ndipo penu ndimwepo omwe munkuduwala, lekani kubzipasa mulandu wakuti mwacitisa bayanu ayai mkazanu kusiya utumiki bwa nthawe zense. Lekani kuyebwa kuti ndimwe ‘thupi libodzi,’ ndipo pomwe mudalowolana mudapicira kwa Yahova kuti mun’dzasamalirana bziribe basa mabvuto yomwe mungadadzagumana nayo. (Mat. 19:5, 6) Nthawe zinango banja lingasiye utumiki bwa nthawe zense, thangwe rakuti mkazi ana pathupi, tsono penu bzimwebzi bzidakucitikirani, onani mwana wanuyo kukhala wakufunika kwene-kwene kuposa utumiki bomwe mukhacita. Mbauzani mwananuyo kuti iye ni mphaso ya Mulungu. (Psal. 127:3-5) Ndipo mbamufotokozeranimbo phindu lomwe mudaligumana pa utumiki bomwe mukhacita. Mukacita bzimwebzi, mwana wanuyo an’dzakhala na cikhumbo cakucitambo utumiki bwa nthawe zense pa moyo wace. w19.08 22 ¶10-11

Babulo Mkulu, omwe ambaimira bzipembedzo bzentse bzakunama akucitisa wanthu azinji kuleka kulemekeza dzina la Mulungu. Ambapfunzisa bzinthu bzakunama pakulewa bza Mulungu. Pakuti ambacita bzinthu ninga hule, iye ngwakusaya kukhulupirika kwa Mulungu ndipo ambaphatana na akulu-akulu wandale. Ndipo Babulo Mkuluyo ambangingimiza anamati wace kucosa kobiri, ambapha wanthu kuphatanidzambo atumiki wa Mulungu. (Cibv. 18:24; 19:2) Yahova an’dzapfudza ‘hule mkulu,’ mwa kuphatisa basa ‘nyanga khumi’ za ‘cirombo cifuira.’ Ciromboci cimbaimira bungwe la Nações Unidas. Ndipo nyanga khumi zimbaimira maboma ya ndale yomwe yambathandizira bungwe la Nações Unidas. Mabomaya yan’dzaphindukira Babulo Mkulu, pa nthawe yomwe Mulungu adaikhazikisa. Iyo ‘yan’dzamusakaza na kumusiya ali pezi’ mwa kumutengera cuma cace na kuzimbula bzinthu bzakuipa bzomwe adacita. (Cibv. 17:3, 16) Kupfudzidwa kwace kun’dzacitika mwakamfulumize ndipo kun’dzawoneka ninga kwacitika ‘nsiku ibodzi.’ Ndipo bzimwebzi bzin’dzatokonya wense omwe ambathandizira cipembedzo cakunama. Pakuti ico cikhambacita kulegedja kuti: ‘Ndidakhala ninga mambo-mkazi, ndine lini mansiwa, ndipo cipo ndicidzalira.’​—Cibv. 18:7, 8. w19.09 10 ¶10-11

Munthu ali-wense angacite bzimwebzi ndipo Jezu angalambe lini munthu omwe wasankhula kutumikira Mulungu. (Ju. 6:37, 38) Kuthumizira bzimwebzi, ateweri wense wa Kristu ana mwayi wakuphata basa pabodzi na Jezu lomwe Yahova adamupasa. Ndipo tingakhale na citsimikizo cakuti nthawe zense Jezu an’dzakhala nafe ndipo an’pitiriza kutithandiza kucita basalo. (Mat. 28:18-20) Wanthu wakubzicepswa akhafenderera Jezu. (Mat. 19:13, 14; Lu. 7:37, 38) Thangwe ranyi? Thangwe ndakuti Jezu akhali wakusiyana na Afarizi omwe akhali atsogoleri wa bzipembebzo. Iwo akhali wakubzikuza ndipo akhalibe lufoyi na wanthuwo. (Mat. 12:9-14) Tsono Jezu akhali wakubzicepsa ndipo akhana lufoyi. Afarizi akhafuna kudziwika na munthu ali-wense ndipo akhambabziwona kukhala wakufunika kwene-kwene kuposa winango. Ndipopa Jezu adapfunzisa anyakupfunza wace kuti akhale wakubzicepswa na kumbatumikira winango. (Mat. 23:2, 6-11) Afarizi akhafuna kuti wanthu ambawabvere thangwe ra mantha. (Ju. 9:13, 22) Tsono mwakusiyana na iwo, Jezu akhatsangalaza wanthu na mafala yabwino ndipo akhawacitira bzinthu mwa lufoyi. Bzimwebzi bzikulatiza kuti tingapfunze bzinthu bzizinji bzakufunika na bzomwe Jezu adacita. w19.09 20 ¶1; 21 ¶7-8; 23 ¶9

Mitsonkhano imbatithandiza kulimbisa uxamwali bwathu na Yahova. Kufika pa mitsonkhano, kumbatithandiza kuwona momwe tingadzapiririre mazunzo kutsogolo. (Waheb. 10:24, 25) Thangwe ranyi tikulewa tenepo? Penu nsiku zino timbatazira kufika pa mitsonkhano na thangwe lakusaya kubveseseka, kodi n’ciyani cin’dzacitika kutsogolo tikadzafunikira kukhwimika kuti titsonkhane? Kulewa cadidi, penu nsiku zino timbafika kale mwakukhazikika pa mitsonkhano yensene, bzin’dzakhala bzakusaya kunesa kutsonkhana napo anyamadulanthaka wathu akadzatiletsa. Tenepo, ino ni nthawe yakuti timbafune mitsonkhano yathu. Ndipo tikambafuna mitsonkhano, palibe omwe an’dzatitazisa kubvera Mulungu, ne anyakutitsutsa, ne boma lin’dzakwanisa lini kutiletsa kutsonkhana. (Mab. 5:29). Mbakoyani mu msolo mavesi yomwe mumbayafuna. (Mat. 13:52) Pinango imwepo bzimbakunesani kukoya mavesiyo, koma Yahova angaphatise basa mzimu wace wakucena kuti akuthandizeni kumbayakumbukira. (Ju. 14:26) Bzinembobzi, bzin’dzakuthandizani kufendererana na Yahova na kupirira mwakukhulupirika. w19.07 3 ¶5; 4 ¶8-9

Kodi imwepo mudabadwa pambuyo pa gole la 1914? Penu munti inde, ndiye kuti moyo wanu wense udayambira mu nsiku zakumalizira za dzikoli. Jezu adalewa bzinthu bzizinji bzomwe bzingadacitika mu nsiku zakumalizirazi, ninga nkhondo, njala, bziteke-teke, matenda, kuthumizirika kwa kusaya kubvera malamulo na kuzunzidwa kwa atumiki wa Yahova. (Mat. 24:3, 7-9, 12; Lu. 21:10-12) Tensenefe tikubva kuti bzinthu bzimwebzi bzikucitika. Tikuwonambo mikhalidwe ya wanthu yomwe idafotokozedwa na mpostolo Paulo. Atumiki wa Yahovafe, timbapenukira lini kuti tikukhala kuphampha kwa ‘nsiku zakumalizira.’ (Mik. 4:1) Napo kuti papita magole mazinji kucokera mu gole la 1914, tsapano bzikuwoneka kuti tikukhala kuphampha caiko kwa ‘nsiku zakumalizira.’ Pakuti mamaliziro ya dzikoli yali pafupi kwene-kwene, ifepano tin’funika kudziwa mitawiro ya mibvunzo yakufunika ninga iyi: Kodi ni bzinthu bziponi bzomwe bzin’dzacitika kuphampha kwa ‘nsiku zakumalizira’? Kodi n’ciyani comwe Yahova an’funa kuti ifepano ticite bzinthu bzimwebzi bzikanati kucitika? w19.10 8 ¶1-2

Kupirira kwathu kumbathemba lini bzakucitika bzomwe tingagumane nabzo pa moyo wathu. Tingakwanise kupirira thangwe ra kuthemba Yahova. (War. 12:12) Piciro la Jezu lomwe liri mu vesi laleroli likulatiza kuti tin’funika kupitiriza kukhala wakukhulupirika napo tigumane na mabvuto yakusiyana-siyana. Tikakhala wakukhulupirika nsiku zino, tin’dzakhalambo wakukhulupirika pa citsautso cikulu. Ninga kupirira, ifepano timbakhala wakukhwimika thangwe ra kuthemba Yahova. Kodi tingalimbise tani kukhulupirika kwathu kwa iye? Mwa kumbawerenga Fala lace nsiku zense na kumbakumbukira momwe Yahova adapulumusira wanthu wace mu nthawe zakale-kale. (Psal. 68:20; 2 Pe. 2:9) Maboma yakadzafuna kulimbana nafe pa citsautso cikulu, tin’dzafunika kukhala wakukhwimika na kukhulupira Yahova kuposa kale-kale. (Psal. 112:7, 8; Waheb. 13:6) Penu nsiku zino timbathemba Yahova, tin’dzakwanisa kukhala wakukhwimika pomwe Gogi an’dzafuna kulimbana nafe. Tina cikhulupiro centse cakuti tingakhale wakukhotcerereka tikathemba Yahova.​—1 Wak. 13:8. w19.10 18 ¶15-16

Dyabu ndiye omwe akutonga dziko lakuipali, ndipo iye ambacita bzimwebzi mwakulimbikisa wanthu kucita bzinthu bzomwe iwo ambafuna mwa cibadwa na bzikumbo bzathupi. (Wayef. 2:1-3) Cakulinga cace ni kuticitisa kuti titazire kutumikira Yahova na mtima wentse. Pomwe mpostolo Pedru adamala kulewa bza cimaliziro ca dziko la Sathaniri na bza dziko lipsa, iye adati: ‘Abale wakufunidwamwe, pakuti mukudikhirira bzinthu bzimwebzi, citani nyongo kuti mudzagumanidwe na iye wakusaya nthonsa, wakusaya mathangwe, na mu mtendere.’ (2 Pe. 3:14) Tenepo, ifepano tikabvera malangoya na kucita ciri-cense kuti tikhale wakucena mwakuthupi na mwauzimu, tin’dzalatiza kuti timbanamata Yahova yekha basi. Sathani pabodzi na dziko laceri an’pitiriza kutipumpsa kuti tiikhe bzinthu bza m’dzikoli pa mbuto yakuyamba sikuti Yahova. (Lu. 4:13) Koma tin’funika lini kubvuma kuti munthu ayai cinthu ciri-cense cititazise kuikha Yahova pa mbuto yakuyamba, napo tigumane tani na mabvuto. Ndipo tatsimikiza kucita bzomwe Yahova ambafuna bzomwe ni kunamata iye yekha basi! w19.10 27 ¶4; 31 ¶18-19

Kucita thupo na bzinthu bzinango, n’kuphonyeka lini. Mwa ciratizo, kukhala na thupo la momwe tingakondwesere Yahova na Jezu n’kuphonyeka lini. (1 Wak. 7:32) Ndipo tikacita pikado ikulu, tingakhale na thupo la momwe tingabwezeresere uxamwali bwathu na Mulungu. Tingakhalembo na thupo la momwe tingakondwesere mwamuna ayai mkazi wathu, na momwe tingasamalirire banja ayai momwe tingacitire bzinthu bzabwino abale wathu wacikristau. (1 Wak. 7:33; 2 Wak. 11:28) Tsono kumbandokhala na thupo nthawe zentse thangwe ra kufuna kukhala na cakudya cizinji ayai bzakubvala, bzingadzonge cikhulupiro cathu. (Mat. 6:31, 32) Bzimwebzi bzingaticitise kuyamba kufunisisa kobiri ayai bzinthu bzakuthupi. Ndipo tikalekerera bzimwebzi kucitika, cikhulupiro cathu kwa Yahova cin’dzatepa ndipo tin’dzagumana mabvuto mazinji mwauzimu. (Mar. 4:19; 1 Tim. 6:10) Ayai tingagwere m’mbvuto la kukhala na thupo kwene-kwene na momwe wanthu ambatikumbukirira. Bzimwebzi bzingaticitise kugopa kusekedwa na wanthu ayai kuzunzidwa, kuposa kugopa kucita bzinthu bzomwe Yahova ambakomedwa lini nabzo. Kuti titcenkhe bzimwebzi, tin’funika kumbakumbira Yahova kuti atipase cikhulupiro na kutithandiza kukhala wakukhwimika kuti tikwanise kulimbana na mabvutoyo.​—Mim. 29:25; Lu. 17:5. w19.11 15 ¶6-7

Bzakusankhula bzinango bzingafunike lini kubzicinja. Mwa ciratizo, ifepano tidasankhula kutumikira Yahova, ndipo anyakulowolana an’funika kumbakhulupirana. (Mat. 16:24; 19:6) Koma bzakusankhula bzinango bzingacinjidwe. Thangwe ranyi? Thangwe bzinthu bzimbacinja. Kodi n’ciyani comwe cingatithandize kuti timbacite bzakusankhula bzabwino? Kumbirani nzeru mu mpembo. Palibe munthu omwe ambadziwa bzinthu bzense. Tenepo, tikafuna kucita cakusankhula ayai kucinja comwe tidacita kale m’mbuyomu tin’funika kuthemba Yahova kuti ticite cakusankhula cabwino. Tikacita bzimwebzi, Yahovayo an’dzatithandiza kucita bzakusankhula mwanzeru. Tingafufudze m’Fala la Mulungu, kuwerenga mabukhu ya gulu la Yahova na kumbaceza na wanthu omwe timbawakhulupira. (Mim. 20:18) Kufufudza n’kwakufunika kwene-kwene thangwe kungaticitise kusankhula basa lomwe lingadzatithandize kugumana kobiri zakuphatisa basa pa moyo wathu, na kupitiriza kutumikira Yahova. w19.11 27 ¶6-8

Mpsakukondwesa kwene-kwene kudziwa kuti, Mulungu walinganiza njira yakuti tilomboledwe, ayai titsudzulidwe ku pikado. Jezu ndiye omwe adacitisa kuti bzimwebzi bzikwanisike. Kwa magole yakupitirira 700 Jezu akanati kubwera pantsi pano, mpolofeta Zaiya adalewa kuti wanthu azinji an’dzatsudzulidwa, kuposa kutsudzulidwa komwe kukhacitika mu nthawe ya Ajirayeri pa Gole la ufulu. Iye adati: ‘Mzimu wa Yahova, Mbuya Mkululetu uli pa ine, pakuti Yahova wandidzoza kuti ndikapalizire bzipsa bzabwino kwa wanthu wakufatsa. Wandituma kuti ndikapoze wanthu wa mitima yakusweka, kuti ndikadziwise ufulu kwa anyakuyendesedwa ku ukapolo.’ (Zai. 61:1) Kodi polofesiyayi ikhalewa bza wanthu aponi? Polofesiya yakulewa bza kutsudzulidwayi, idayamba kukwanirisidwa pomwe Jezu adayamba utumiki bwace pano pa dziko la pantsi. Pomwe Jezu adayenda ku sinagoga omwe akhali ku Nazaleti, mzinda omwe iye adabadwira, adawerengera polofesiya ya Zaiya Adjuda omwe adawagumana kumweko ndipo adaphatisa basa mafala ya polofesiyayi kwa iye.​—Lu. 4:16-19. w19.12 9-10 ¶6-8

Kuti mukwanise kulimbana na mazunzo, imwepo mun’funika kukhala wakukhwimika. Penu imwepo mumbabziwona kuti ndimwe lini wakukhwimika, kodi mungacite ciyani kuti mukulise khalidweri? Kumbukirani kuti kukhala wakukhwimika kumbathemba lini msinkhu, mphanvu ayai luso lomwe munthu angakhale nalo. Ciratizo pa nkhaniyi ni Davide. Pomwe iye akhali tswaka adalimbana na Goliyati. Mwakusiyana na cinzonzomtalico, Davide akhali m’fupi, wakusaya mphanvu ndipo akhalibe kukonzekera kumenya nkhondo. Iye akhalibe ne mphanga. Napo bzikhali tenepo, Davide adakhwimika ndipo alibe kucita mantha kuyenda kukamenyana na cinzonzomtali cakubzikuza cire. Thangwe ranyi Davide akhali wakukhwimika? Thangwe ndakuti iye akhatsimikizira kuti Yahova akhali ku mbali yace. (1 Sam. 17:37, 45-47) Davide akhandokumbukira lini bza kusiyana kwa msinkhu wace na wa Goliyati. M’mbuto mwace, Davide akhawona kuti Yahova ni mkulu kwene-kwene kuposa Goliyati. Kodi tinkupfunza ciyani na cakucitikaci? Tinkupfunza kuti ifepano tingakhale wakukhwimika tikatsimikiza kuti Yahova ali ku mbali yathu, nakuti anyakutitsutsa wathu ni cinthu lini pamaso pa Mulungu Wamphanvu-zense.​—2 Nkha. 20:15; Psal. 16:8. w19.07 5 ¶11-13

Tikiko akhali Mkristau ndipo iye akhalimbo xamwali wakukhulupirika wa Paulo. (Mab. 20:4) Mu gole la 55, Paulo adacita makonzedwe yakuti paperekedwe kobiri zakuthandizira akristau wa ku Djudeya, omwe akhafunikira thandizo. Ndipo bzikuwoneka kuti Paulo adatumiza Tikiko kuti akacite basa lakufunikali. (2 Wak. 8:18-20) Na kupita kwa nthawe, pomwe Paulo akhali m’kawoko ku Roma pa ulendo bwakuyamba, Tikiko akhatumidwa na Pauloyo kuti akapereke matsamba na kukalimbikisa magwere ya ku Ásia. (Wakol. 4:7-9) Tikiko adapitiriza kukhala xamwali wakukhulupirika wa Paulo. (Tito 3:12) Pa nthawe imweyo, ni akristau lini wentse omwe akhali wakukhulupirika ninga Tikiko. Mu gole la 65, pomwe Paulo akhali m’kawoko pa ulendo bwaciwiri, iye adanemba kuti akristau azinji wa m’cigawo ca Ásia akhadaleka kucita naye tsantsa, thangwe ra kucita mantha na anyakutsutsa. (2 Tim. 1:15) Tenepo, Paulo adathemba Tikiko ndipo adamupasa udindo bunango. (2 Tim. 4:12) Bzikuwoneka kuti Paulo adatenda kwene-kwene thangwe ra kukhala na xamwali wakukhulupirika ninga Tikiko. w20.01 10 ¶7-8

Pinango mungabzibvunze penu mudadzozedwa na mzimu wakucena. Penu bziri tenepo, kumbukirani mibvunzo yakufunikayi: Kodi imwepo mukufunisisa kucita bzomwe Yahova ambafuna? Kodi ndimwe wakubzipereka kwene-kwene pa basa lakupalizira? Kodi mumbakomedwa na kupfunza Bibliya ndipo mumbafunisisa kudziwa ‘bzinthu bzakuzika bza Mulungu’? Kodi mukuwona kuti Yahova akukuthandizani kuyenda pa tsogolo pa basa lakupalizira? Kodi mumbabzibva kuti muna udindo bukulu bwakuthandiza winango kuti apfunze bza Yahova? Kodi mumbakwanisa kuwona kuti Yahova ambakuthandizani mu njira zakusiyana-siyana pa moyo wanu? Penu mtawiro wanu ngwakuti inde pa mibvunzo yentseneyi, kodi bzikufuna kulewa kuti imwepo mwacemerawa kuti mukakhale kudzulu? Ne ndibzo lini. Thangwe ranyi? Thangwe ndakuti atumiki wentse wa Yahova angabzibve tenepo, napo akhale wakudzozedwa ayai wakusaya kudzozedwa. Na mzimu wace wakucena, Yahova angapase mtumiki wace ali-wentse mphanvu ibodzi-bodziyi kuti akwanise kucita bzimwebzi, bziribe basa kuti iwo ana cidikhiro ciponi. Cadidi n’cakuti, penu imwepo mukupenukira kuti ndimwe wakudzozedwa ayai ne, dziwani kuti ndimwe lini. Thangwe wentse wakucemeredwa na Yahova ambapenukira lini kuti mbakudzozedwa. Iwo ambatsimikiza! w20.01 23 ¶14