Março

Kufuna Mulungu pabodzi na Fala lace kumbatilimbisa kubvera Yahova tikakhala tinkungingimizidwa na acibale ayai axamwali kuti ticitembo mbali pa miyambo ya nkhawa yomwe imbabverana lini na Bibliya. Nthawe zinango iwo angatilewe kuti tikhafuna lini ayai tikhalemekeza lini nyakusayikayo pomwe akhana moyo. Ayai iwo angalewe kuti kusaya kucitambo mbali pa miyamboyo kun’citisa nyakufayo kuzunza adzinza omwe asalawo. Wanthu azinji omwe ambakhala ku Nyanza ya Caribe, ambakhulupira kuti munthu akafa “mzimu” wace umbakhala pafupi na iwo, ndipo ungacite cinthu cakuipa kwa wale omwe akhamuzunza pomwe akhana moyo. Ndipo m’mbuto zinango za ku África kuno wanthu ana cizolowezi cakumbampsinkha supedyo pamui pa nyakufayo ndipo ambazungunusa bzithunzi-thunzi bzicinyang’ana ku parede. Kodi thangwe ranyi iwo ambacita bzimwebzi? Winango ambacita bzimwebzi thangwe ra kukhulupira kuti anyakufa an’funika lini kumbabziwona wokha. Tsono ifepano, atumiki wa Yahovafe, tin’funika lini kumbakhulupira ne kucita mbali pa miyambo yomwe imbalimbisa magunkha ya Sathani!​—1 Wak. 10:21,22. w19.04 16 ¶11-12

Jezu adapfunzisa ateweri wace mitemo yomwe ingadawathandiza kumbacitira winango bzinthu mwacirungamo. Mwa ciratizo, kumbukirani bza nfundo yomwe ingaphate basa kwa tensenefe. Mwakusaya kupenukira, tensenefe timbafuna kucitiridwa bzinthu mwacirungamo. Koma napo bziri tenepo, tin’funika kumbacitira winango bzinthu mwacirungamo. Ndipo tikacita bzimwebzo, iwo an’dzaticitirambo bzinthu mwacirungamo. Tsono tani penu tinkucitiridwa bzinthu mwakusaya cirungamo? Jezu adapfunzisambo ateweri wace kuti ambakhulupire kuti Yahova an’dzacitira bzinthu ‘mwacirungamo [wale] omwe ambamucemera masikati na usiku.’ (Lu. 18:6, 7) Mafalaya yankupicira kuti: Mulungu wathu wacirungamo ambadziwa mabvuto yomwe tinkugumana nayo nsiku zakumalizira zino, ndipo iye an’dzacitisa kuti cirungamo cicitike kwa ifepano pa nthawe yakuthemera. (2 Wat. 1:6) Tikateweza mitemo yomwe Jezu adapfunzisa ateweri wace, tin’dzacitira winango bzinthu mwacirungamo. Ndipo tikacitiridwa bzinthu mwakusaya cirungamo m’dziko la Sathaniri, tingatsangalazidwe mwa kudziwa kuti Yahova an’dzaticitira cirungamo pa nthawe yakuthemera. w19.05 5 ¶18-19

Kodi imwepo ndimwe tswaka omwe muli pa xikola? Pinango anzanu wa ku xikolako ambakhulupira kuti wanthu alibe kucita kulengedwa koma adacita kusandulika. Tsono pinango imwepo mungafune kuwafotokozera mathangwe yomwe yambakucitisani kukhulupira kuti wanthu adacita kulengedwa ninga momwe Bibliya limbapfunzisira, koma mukuwona kuti mun’kwanisa lini kucita bzimwebzo. Penu bziri tenepo, mun’funika kucita nyongo yakupfunza bza nkhaniyi, ndipo khalani na bzakulinga bziwiri: (1) kulimbisa cikhulupiro canu cakuti Mulungu ndiye adalenga bzinthu bzense, ndipo (2) kupfunza momwe mungakawafotokozerere bwino bzomwe mumbakhulupira pa nkhaniyi. (War. 1:20) Koma cakuyamba bzibvunzeni kuti, ‘Thangwe ranyi anzangu wa ku xikola ambakhulupira kuti wanthu adacita kusandulika?’ Patsogolo pace, fufudzani mwakusamala m’mabukhu mwathu. Mukacita bzimwebzi, mun’dzawona kuti kuuza anzanu bzomwe mumbakhulupira n’kwakusaya kunesa. Wanthu azinji ambakhulupira kuti wanthu adacita kusandulika thangwe munthu munango omwe iwo ambamulemekeza adawauza kuti mpsacadidi. Tenepo, mukagumana nfundo ibodzi ayai ziwiri zomwe mungauze winango bza nkhaniyi, mungathandize munthu omwe ankufunisisa kugumana cadidi pa nkhaniyi.​—Wakol. 4:6. w19.05 29 ¶13

Pomwe mpolofeta Eliya adapulumuka kwa wanthu omwe akhafuna kumupha, iye adasunama kwene-kwene mpaka adawona kuti kufa kuli bwino. Yahova adatumiza anjo wamphanvu kuti akamutsangalaze. Pomwe anjoyo adafika, adamupasa thandizo lomwe akhafunikira pa nthawe imweyo. Adamupasa cakudya cizinji ndipo adamulimbisa kuti adye. (1 Wam. 19:5-8) Nkhani imweyi inkutipfunzisa cadidi cakuti: Nthawe zinango cinthu cakucepa comwe tingacitire munthu mwakudeka mtima, cingamuthandize kwene-kwene pa moyo wace. Ndipo tingalatize kuti timbafuna abale na mpfumakazi zathu zomwe zinkubonera mwakuwacitira bzinthu ninga, kuwaphikira cakudya, kuwapasa mphaso ayai kuwanembera tsamba lakuwatsangalaza. Penu bzinkutinesa kulewa mafala yomwe yangatsangalaze munthu omwe ankubonera, tingalatize kuti tinaye thupo mwa kucita bzinthu bzomwe bzalewedwabzi. Yahova mwakudabwisa adapasa Eliya thandizo lomwe akhafunikira kuti akwanise kufamba mtantho utali wakuyenda ku phiri la Horebe. Tenepo bzinkuwoneka kuti Eliya adabzibva kukhala wakukhotcerereka pakufamba mtantho umweyu thangwe ra kukumbukira mpangano omwe Yahova adacita na wanthu wace wakale. Ndipo akhabzibvambo kuti akhali patali na wanthu omwe akhafuna kumupha wale. Kodi tikupfunza ciyani na ciratizoci? Tikupfunza kuti tikafuna kutsangalaza wanthu omwe apswithidwa, cakuyamba tin’funika kuwathandiza kuti abzibve kukhala wakukhotcerereka, kungakhale kumui kwawo ayai ku Nyumba ya Umambo. w19.05 16 ¶11; 17 ¶13-14

Tikambawerenga Bibliya, tin’funika kukhala na cakulinga ca kupfunza bzizinji. Mwa ciratizo, tiyezezere kuti mukuwerenga kapitulo 12 ya bukhu la Zakariya, lomwe lidafotokoza bza infa ya Mesiya. (Zak. 12:10) Ndipo pa vesi 12, munkuwerenga mafala yakuti ‘banja la nyumba ya Natani’ lin’dzalira ndipo lin’dzasunama kwene-kwene thangwe ra infa ya Mesiya. Tsono mukanati mwamala kuwerenga mafala yamweya, mwaima pang’ono ndipo mukubzibvunza kuti: ‘Kodi pana kubverana kuponi pakati pa nyumba ya Natani na Mesiya? Kodi ndingacite tani kuti ndibvesese bzomwe vesiri linkufuna kufotokoza?’ Tsono kuti mubvesese bwino mwayamba kufufudza. Ndipo mwawona referência cruzada yomwe ikukuyendesani pa cinembo ca 2 Samuweri 5:13, 14, ndipo na cinemboci mwapfunza kuti Natani akhali m’bodzi wa wana wa Mambo Davide. Ndipo yaciwiri, ikukuyendasani pa cinembo ca Luka 3:23, 31, cinemboci cimbalewa kuti Jezu akhali mbadwo wa Natani, ndipo Nataniyo akhali wa dzinza la Mariya! Imwepo mumbadziwa kuti polofesiya ikhadaleweratu kuti Jezu angadadzabadwira m’banja la Davide. (Mat. 22:42) Tsono Davide akhana wana wakupitirira 20. Kodi mpsakudabwisa lini kubva Zakariya ankulewa kuti banja la Natani likhana mathangwe yakubveka yakudandaulira infa ya Jezu? w19.05 30 ¶17

Kodi n’ciyani comwe tin’funika kucita? Tin’funika kupfunza Bibliya ntsiku zense. Tenepo tikambacita bzimwebzi, tin’dzakhala na citsimikizo cense cakuti bzomwe timbapfunza m’Bibliya mpsacadidi. Patsogolo pace, tin’dzakhala ‘wakukhazikika m’cikhulupiro’ ninga muti omwe ana mizi yakuzika kwene-kwene. (Wakol. 2:6, 7) Lekani kuyebwa kuti ni udindo bwa munthu ali-wense payekha kulimbisa cikhulupiro cace. Tenepo, pitirizani kukhala wapsa mwa kutsogolera makumbukidwe yanu. Mbapembani nthawe zense; mucimbakumbira thandizo la mzimu wakucena wa Yahova. Mbacitani nyongo yakukumbukira bzomwe mumbawerenga; mucimbapitiriza kupenda makumbukidwe yanu. Mbasankhulani axamwali wabwino; mucimbakhala pakati pa wanthu omwe angakuthandizeni kucinja makumbukidwe yanu. Mukacita bzimwebzi, mun’dzakwanisa kutcenkha makumbukidwe yakuipa ya dziko la Sathaniri pabodzi na ‘[bzinthu bzense bzomwe bzinkutsutsana] na cidziwiso ca Mulungu.’​—2 Wak. 10:5. w19.06 13 ¶17-18

Ninga momwe Rute adathandizira mibzala wace Naomi, ifepano tin’funika kupitiriza kuthandiza wale omwe afedwa. (Ru. 1:16, 17) Paula, adati: “Pomwe bayangu adafa, wanthu azinji adabwera kudzandithandiza na kunditsangalaza. Koma na kupita kwa nthawe, thandizo lire likhayenda licicepa thangwe iwo akhadzatanganidwa na mabasa yawo ya nsiku na nsiku. Ndipo moyo wangu ukhadacinja kwene-kwene. Bzimbakhala bwino wanthu winango akazindikira kuti nyakufedwa an’funika kuthandizidwa kwa minyezi, magole ayai kuyenda na kuyenda.” N’cadidi kuti, munthu ali-wense ngwakusiyana na munango. Winango ambazolowera moyo upsa mwakusaya kucedwa, koma winango ambawawidwa kwene-kwene akambacita cinthu ciri-cense comwe kale-kale akhacita pabodzi na munthu omwe adafa. Tenepo, momwe munthu ambabvera akafedwa kumbasiyana na munango. Ndipopa tin’funika kumbakumbukira kuti Yahova watipasa mwayi na udindo bwakusamalira wale omwe afedwa mwamuna ayai mkazi. w19.06 24 ¶16

Basa lathu lakupalizira likaletsedwa, tin’funika kuzindikira ‘nthawe yakunyamala.’ (Mpal. 3:7) Tin’funika kukhotcerera nkhani zathu za cinsinsi, ninga madzina ya abale, mbuto zomwe timbatsonkhanira, momwe timbacitira basa lathu lakupalizira na momwe timbatambirira cakudya cauzimu. Tin’dzalewa lini bzimwebzi kwa wanthu wa boma, axamwali wathu ayai acibale omwe timbakhala nawo dziko libodzi ayai omwe ambakhala m’madziko manango. Tsono tikadzaleka kucita bzimwebzi, tin’dzaikha moyo wa abale wathu pa ngozi. Lekani kubvuma kuti mabvuto mang’ono yatigawanise. Sathani ambadziwa kuti nyumba yakugawanika ingaime lini dzololo. (Mar. 3:24, 25) Iye an’dzacita ciri-cense kuti atigawanise. Mwa njira imweyi, iye ambafuna kuti ifepano timbamenyane tekha-tekha, m’mbuto mwakuti timbamenyane na iye. Napo Akristau wakukhwima mwauzimu an’funika kusamala kuti aleke kugwera mu msampha umweyu. Tikacita nyongo yakukonzesa mabvuto yomwe tingakhale nayo na abale wathu, tin’dzatcenkha msampha omwe umbabweresa magawano.​—Wakol. 3:13, 14. w19.07 11-12 ¶14-16

Kawiri-kawiri, wanthu ambatambira bzipsa bzabwino na manja mawiri, sikuti thangwe ra bzomwe talewa, koma momwe talewera. Iwo ambakomedwa na bzipsabzo tikakhala wakudeka mtima, wa ulemu na kulatiza kuti timbawafuna. Tin’funika lini kungingimiza wanthu kuti atetekere bzomwe tinkuwauza. M’mbuto mwace, tin’funika kucita nyongo yakubvesesa momwe iwo ambawonera nkhani ya cipembedzo. Ndipo wanthu winango ambafuna lini kuceza nkhani za cipembedzo na wanthu wacirendo. Mwa ciratizo pomwe Paulo akhalewalewa na Ajuda, akhaphatisa basa Bzinembo. Koma pomwe akhalewalewa na wanthu wa nzeru wacigirego ku Arewopago, iye alibe kulewa kuti bzomwe akhawauzabzo bzikhacokera m’Bzinembo. (Mab. 17:2, 3, 22-31) Kodi tingatewezere tani ciratizo cace? Mukambaceza na munthu omwe ambakhulupira lini bzomwe Bibliya limbapfunzisa, bzingakhale bwino kuleka kuliguma. Ndipo mukazindikira kuti munthuyo akufuna lini kuwonedwa ankuwerenga Bibliya na imwepo, mulatizeni mavesi mwakusamala kuti winango aleke kuwona, mwa ciratizo mungaphatise basa mtedwe. w19.07 21 ¶5-6

Mwakucenjera Sathani adapumpsa Ajirayeri kuti anamate bzifanikiso. Iye akhadziwa kuti iwo akhafunisisa cakudya, tenepo adalokotera mpata umweyo kuti acite bzomwe iye akhafuna. Pomwe Ajirayeri adapita m’Dziko Lakupiciridwa, iwo akhafunika kucinja njira zawo za ulimi, thangwe pomwe akhali ku Edjipito, iwo akhaphatisa basa madzi ya Mkulo wa Nilo kuti athirizire minda yawo. Koma m’Dziko Lakupiciridwa mukhalibe mkulo ukulu omwe iwo angadaphatisira basa kuti athirizire mbeu zawo, koma akhathemba madzi ya nvula na mame. (Bzak. 11:10-15; Zai. 18:4, 5) Tenepo, Ajirayeri akhafunikadi kupfunza njira zipsa za ulimizi. Thangwe ranyi Yahova adawacenjeza kuti aleke kunamata mirungu yakunama pomwe iye akhalewa bza njira zipsa za ulimi? Yahova akhadziwa kuti Ajirayeri angadapumpsidwa na wanthu wa mitundu minango kuti awapfunzise njira zinango za ulimi. Alimi wa ku Kanani akhanamata Baala ndipo bzomwe iwo akhakhulupira bzikhatokonya kanamatidwe kawo.​—Mirew. 25:3, 5; Way. 2:13; 1 Wam. 18:18. w19.06 3 ¶4-6

Pomwe mpostolo Paulo, Sila, Luka na Timotio adafika ku Firipo m’cigawo comwe cikhatongedwa na Aroma, iwo adagumana wanthu azinji omwe akhafuna kubva bzipsa bzabwino. Abale anaiwa adathandiza kukhazikisa gwere ndipo anyakupfunza wense adayamba kumbatsonkhana pabodzi kumui kwa Lidiya mpfumakazi yomwe ikhatambira bwino alendo. (Mab. 16:40) Mwakusaya kucedwa gwere lipsalo lidayamba kugumana na bzineso. Sathani adacitisa kuti wanthu omwe ambawenga cadidi, alewe kuipa Paulo pabodzi na anzace omwe akhapalizirambo. Paulo na Sila adamangidwa, adamenyedwa aciikhidwa m’kawoko. Pomwe adacosedwa m’kawokomo, adakazungira anyakupfunza wa gwere lipsalo na kuwalimbisa. Paulo, Sila na Timotio adadzacoka mu mzindamo koma bzikuwoneka kuti pinango Luka adasala m’mwemo. Kodi anyakupfunzawo angadacita ciyani? Yahova adawathandiza na mzimu wace wakucena kuti iwo apitirize kumutumikira na nyongo. (Waf. 2:12) Bzimwebzi bzidacitisa Paulo kukhala wakukondwa! w19.08 8 ¶1-2

Kodi mwafulukira ku mbuto inango? Kufuluka kungacitise munthu kudzonga kobiri zizinji acigwa m’mangawa. Tenepo kuti mucepese mangawa, mun’funika kutcenkha kufiyali kobiri kuti mugulire bzinthu bzakusaya kufunika. (Mim. 22:3) Tsono bzingakhale bzakunesa kudziwa kobiri zomwe tingafiyali penu tinkugumana na mabvuto, ninga kusamalira wacibale wathu omwe ankuduwala. Bzimwebzi bzikacitika, kumbukirani kuti ‘mpembo’ ungakuthandizeni kucita bzakusankhula bzabwino. Ndipo Yahova an’dzatawira mipembo yanu mwakukuthandizani kukhala na mtendere wa mu mtima, muciwona bzomwe mungacite pa nkhaniyo. (Waf. 4:6, 7; 1 Pe. 5:7) Khalani pa uxamwali na wanthu wabwino. Mbauzani axamwali wanu momwe munkubvera na bzineso bzomwe munkugumana nabzo, maka-maka wale omwe adagumana nabzo kale. Mukacita bzimwebzi mun’dzabzibva bwino. (Mpal. 4:9, 10) Ndipo axamwali omwe mukhatumikira nawo pabodzi kale-kale pomwe munkhanati an’dzapitiriza kukhala axamwali wanu. w19.08 22 ¶9-10

Thangwe ranyi Yahova adapasa nkhondo yace ikulu dzina lakucokera ku fala lakuti Megido? Thangwe ndakuti mu nthawe zakale nkhondo zizinji zikhacitikira mu mzinda wa Megido omwe ukhali pafupi na cigwa ca Jezireyeli. Ndipo nthawe zinango, Yahova akhapitira nkhondo zomwe zikhacitika mu mzinda umweyu. Mwa ciratizo, pafupi na ‘madzi ya Megido,’ Yahova adathandiza Baraki kukunda gulu la anyankhondo wa Kanani lomwe likhatsogoleredwa na Sizera. Patsogolo pace, Baraki pabodzi na mpolofeta mkazi Debora adatenda Yahova thangwe ra kukunda kwakudabwisako. Ndipo iwo adaimba kuti: ‘Nyenyezi zidamenyana kudzulu . . . na Sizera. . . .  Imwe Yahova, citisani kuti anyamadulanthaka wanu wense anyembereke, koma omwe ambakufunani akhale na mphanvu ninga momwe dzuwa limbakhalira.’ (Way. 5:19-21, 31) Pa nkhondo ya Armagedo, anyamadulanthaka wa Mulungu an’dzapfudzidwa ndipo omwe ambamufuna an’dzapulumuka. Koma pana kusiyana kukulu kwene-kwene pakati pa nkhondo yomwe Baraki adacita na nkhondo ya Armagedo. Pa Armagedo, atumiki wa Mulungu an’dzamenya lini nkhondo ne kuphata nfuti! Koma an’dzakhala wamphanvu mwa kupitiriza ‘kukhala wakuderekha na kukhulupira’ Yahova pabodzi na anyankhondo wace wa kudzulu.​—Zai. 30:15; Cibv. 19:11-15. w19.09 9 ¶4-5

Njira ibodzi ya kuyenda kuna Jezu ni kupfunza na nyongo bzomwe iye adalewa na kucita. (Lu. 1:1-4) Palibe munthu omwe angaticitire bzimwebzi, ali-wense wa ifepano ana udindo wakupfunza bzomwe Bibliya limbapfunzisa pakulewa bza Jezu. Ndipo tingayendembo kuna Jezu mwa kusankhula kubatizidwa kuti tikhale anyakupfunza wace. Njira inango ya kuyenda kuna Jezu ndiyo kukumbira thandizo kwa akulu wa gwere bzikafunikira. Jezu ambaphatisa basa amunawa ninga ‘mphaso’ kuti ambasamalire mabira yace. (Wayef. 4:7, 8, 11; Ju. 21:16; 1 Pe. 5:1-3) Ndipopa ifepano tin’funika kumbacita nyongo yakumbawakumbira thandizo. Ndipo tin’funika lini kumbadikhirira kuti iwo avime bzomwe tikukumbuka na bzomwe tin’funa. Mwa ciratizo, m’bale wakucemeredwa Julian adalewa kuti: “Ndidakumbira thandizo kwa akulu, ndipo tsapano ningalewe kuti kundizungira komwe akulu adacita kudakhala mphaso yomwe idandilimbisa kwene-kwene.” Akulu wakukhulupirika ninga awiri omwe adazungira Julian, angatithandizembo kudziwa ‘makumbukidwe ya Kristu,’ ayai kubvesesa na kutewezera makumbukidwe yace na momwe iye akhacitira bzinthu. (1 Wak. 2:16; 1 Pe. 2:21) Tenepo akuluwo akambatithandiza mwa njira imweyi, imbakhala mphaso yomwe iwo ambatipasa. w19.09 21 ¶4-5

Tikambawerenga Bibliya, timbagumana nkhani zakusiyana-siyana zomwe zimbalewa bza amuna na akazi wakukhulupirika omwe adatsogoleredwa na mzimu wakucena, koma ambacita lini mbali ya wanthu wakukwana 144.000. Ndipo m’bodzi wa iwo ni Juwau Batista. (Mat. 11:11) Ndipo munthu munango ni Davide. (Mab. 2:34) Iwo na wanthu winango azinji, an’dzalamusidwa kuti an’dzakhale na moyo m’paraizo pa dziko la pansi. Wanthu wense wakulamusidwa pabodzi na wa thimu likulu, an’dzakhala na mpata wakulatiza kukhulupirika kwawo kwa Yahova na kubvera utongi bwace. Bzikhanati kale kucitika pa moyo wa wanthu, Yahova kukonkhanisa bzulu na bzulu bza wanthu wa mitundu yense kuti amunamate mwakuphatana. Bziribe basa penu cidikhiro cathu n’cakudzayenda kudzulu ayai n’cakudzakhala pa dziko la pansi, tin’funika kucita ciri-cense comwe tingakwanise kuti tithandize wanthu azinji kuti acitembo mbali ya thimu likulu la ‘mabira manango.’ Tsapanopapa, Yahova an’bweresa citsautso cikulu comwe cin’dzafudza maboma na bzipembedzo bzomwe bzimbacitisa wanthu kubonera. Tsono wense omwe ambacita mbali ya thimu likulu, ana mwayi wakudzapitiriza kutumikira Yahova pa dziko la pansi mpaka kale-kale!​—Cibv 7:14. w19.09 31 ¶18-19

Pakuti citsautso cikulu ciri pafupi, ifepano tin’gumana na mayezo mazinji yomwe yaniyeza kukhulupirika kwathu kwa Yahova na Umambo bwace. Ndipo wanthu an’pitiriza kutinyoza. Iwo an’cita bzimwebzi thangwe ifepano timbacita lini mbali ya dziko la Sathaniri. Ndipopa kuti tidzakwanise kupitiriza kukhala wakukhulupirika kwa Yahova pa citsautso cikulu, tin’funika kulimbisa kukhulupirika kwathu kuyambira nsiku zino. Nsiku zino, Bungwe Lakutonga ni lomwe likusamalira wanthu wa Yahova pa dziko lense la pansi. Napo bziri tenepo, mwakusaya kucedwa pa nthawe ya citsautso cikulu, iwo an’dzakhala lini pomwe pa dziko la pansi pano, thangwe anyakudzozedwa wense an’dzakonkhanisidwira kudzulu kuti akacite mbali pa nkhondo ya Armagedo. (Mat. 24:31; Cibv. 2:26, 27) Koma thimu likulu la wanthu lin’dzapitiriza kukhala lakuphatana. Tenepo, abale wakuthemera omwe ambacita mbali ya thimuli, an’dzasamalira wanthu wa Mulungu. Tsono ifepano tin’dzafunika kukhala wakukhulupirika thangwe cipulumuso cathu cin’dzathemba kukhulupirikako, ndipo tingadzacite bzimwebzo mwa kuthandizira abalewo, kubvera malango yomwe an’dzapasidwa na Mulungu! w19.10 17 ¶13-14

Naomi akhali mkazi wakukhulupirika omwe akhafuna Yahova. Koma pomwe bayace pabodzi na wana wace awiri wacimuna adafa, Naomi adasunama kwene-kwene mpaka adafuna kucinja dzina lace kuti likhale ‘Mara,’ lomwe limbathandauza ‘wakuwawa.’ (Ru. 1:3, 5, 20, 21) Pa nthawe yakunesayi, Rute omwe akhali mulowola wace adapitiriza kumuthandiza pa mabvuto yomwe akhagumana nayo. Tsono Rute alibe kundothandiza Naomi bzomwe akhafunikira, koma akhalewalewa mafala yakumutsangalaza, ya lufoyi ndipo akham’pasa thandizo lomwe akhafunikira. Abale wathu wauzimu akafedwa mwamuna ayai mkazi wawo, ambafunikira thandizo lathu. M’banja mwamuna na mkazi ali ninga miti miwiri yomwe inkukulira pabodzi. Na kupita kwa nthawe, mizi ya mitiyo imbapiringixana. Tsono muti m’bodzi ukazulidwa ucifa, omwe wasalayo umbatokonyedwambo. Mpsibodzi-bodzimbo na munthu omwe wafedwa mwamuna ayai mkazi wace, iye angasuname kwa nthawe itali thangwe ra kukumbukira kufedwako. w19.06 23 ¶12-13

Tin’funika lini kundosamala na mtundu wa masenzeka yomwe timbasankhula, koma tin’funika kusamalambo na nthawe yomwe timbadzonga pakucita masenzekayo. Tikasaya kucita bzimwebzi, tingadzonge nthawe izinji tikucita masenzekayo, m’mbuto mwakucita bzizinji pakutumikira Yahova. Cakuyamba, dziwani nthawe yomwe mumbadzonga pakucita masenzekayo. Nembani nthawe yense yomwe mumbadzonga pakucita masenzeka pa mdzinga uli-wense. Ndipo nembani nthawe zomwe mumbamala mukuwona nkhani pa TV, kuphatisa basa interneti, kusenzeka na tablet ayai mtedwe wanu wa m’manja. Tenepo, mukazindikira kuti mukudzonga nthawe izinji kwene-kwene, citani ndandanda ya bzinthu bzomwe mumbacita. Pambulani nthawe kuti mumbacite cakuyamba bzinthu bzakufunika kwene-kwene, ndipo nthawe yomwe yasala mbacitani masenzeka. Mukamala, kumbirani Yahova kuti akuthandizeni kuteweza ndandandayo. Mukacita bzimwebzi, imwepo mun’dzakhala na nthawe na mphanvu yakupfunza Bibliya, kunamata ninga banja, kugumanika pa mitsonkhano na kupalizira. Tenepo, mukaikha Yahova pa mbuto yakuyamba, mun’dzakhala wakukondwa mukambacita masenzeka yanu. w19.10 30 ¶14, 16; 31 ¶17

M’magole ya 55 mbuyomu, Akristau wa ku Kolinto adacita cakusankhula cakufunika kwene-kwene. Pomwe adadziwa kuti abale wawo omwe akhakhala ku Jeruzalemu na ku Judeya akhabonera, iwo adakhakonceza kobiri kuti awathandize. Thangwe ra kupasa na kudeka mtima, Akristau wa ku Kolintowo adacita nyongo kuti athandizembo abalewo, tenepo iwo adabvunza mpostolo Paulo momwe angadaperekera thandizo lawolo. Tenepo, Paulo adatumiza malango kwa Akristauwo, ndipo adasankhula Tito kuti akathandizire pa nkhani yakukonceza kobirizo. (1 Wak. 16:1; 2 Wak. 8:6) Pomwe padapita minyezi ming’ono-ng’ono, Paulo adabva kuti Akristau wale akhanati akonceza kobiri zomwe akhadalewa zire. Na thangwe limweri, bzakupereka bzawo bzidacebwa kufika ku Jeruzalemu pa nthawe yace, ninga momwe magwere manango yadacitira. (2 Wak. 9:4, 5) Akristau wa ku Kolinto adacita cakusankhula cabwino, ndipo Paulo adawatenda thangwe ra cikhulupiro cakulimba na mtima wawo wakupasa. Koma Paulo akhafunika kuwauza kuti amalize bzomwe akhadayamba kucita. (2 Wak. 8:7, 10, 11) Tenepo, bzomwe Akristauwa adacita bzikutipfunzisa kuti napo Akristau wakukhulupirika nthawe zinango, bzingawanese kukwanirisa cakusankhula cabwino comwe angacite. Ninga Akristau wa ku Kolinto, nthawe zinango ifepano bzingatinesembo kukwanirisa bzakusankhula bzathu. Thangwe ranyi? Pakuti ndife wakuperewera, nthawe zizinji tingambacite bzinthu mwakucedwa. Ayai pangacitike cinthu cinango mwadzidzidzi comwe cingatitazise kucita cakusankhula cathu.​—Mpal. 9:11. w19.11 26-27 ¶3-5

Ninga momwe mkhotco ukhakhotcererera thupi la mcikunda, cikhulupiro canu cingakukhotcerereni ku makhalidwe yakuipa yomwe yali m’dzikoli, ninga unzazi, ciwembo na bzense bzomwe bzimbabverana lini na mitemo ya Mulungu. Ndipo ifepano ninga Akristau, tiri pa nkhondo yakulimbana na mizimu yakuipa. (Wayef. 6:10-12) Kodi mungadziwe tani kuti cikhulupiro canu cin’dzakhala cakulimba mukadzayezedwa? Cakuyamba, pembani kwa Mulungu kuti akuthandizeni. Mukamala, phatisani basa Fala la Mulungu kuti likuthandizeni kubziwona ninga momwe iye ambakuwonerani. (Waheb. 4:12) Bibliya limbalewa kuti: ‘Khulupira Yahova na mtima wako wense ndipo leka kuthemba luso lako la kubvesesa bzinthu.’ (Mim. 3:5, 6) Mwakubverana na mafalaya, kumbukirani bzomwe mudacita pa nkhani inango yomwe idakucitikirani pa moyo wanu. Mwa ciratizo, kodi imwepo mudagumana kale na bvuto lakusaya kobiri? Kodi pomwe mukhanyang’ana njira yakumalisira bvutolo, mudakumbukira mafala ya Yahova yomwe yambagumanika pa Wahebereu 13:⁠5 yomwe yambati ‘nin’dzakusiyani lini na pang’onopo ne kukuthawani’? Kodi mafalaya yadakuthandizani kuwona kuti Yahova angakuthandizeni? Penu mudacita bzimwebzo, ndiye kuti mukusamalira bwino mkhotco wa cikhulupiro canu. w19.11 14 ¶1, 4

Abereki an’funika kukhala na nthawe izinji yakumbaceza na wana wawo. Ndipopa banja likakhala na wana azinji wakutewerana magole, bzimbakhala bzakunesa abereki kudziwa bvuto la mwana ali-wentse payekha. Mabanja yomwe yadalera wana mu njira imweyi, yambalewa kuti ni basa likulu kwene-kwene. Ndipo bzimwebzi bzimbacitisa kuti mai nthawe zentse akhale wakuneta mwakuthupi na m’makumbukidwe. Iye angafike pa kuneta mpaka kutazira kupfunza, kupemba na kupalizira mwakukhazikika. Ndipo bvuto linango ndakuti maiyo ambakhala lini tceru pa mitsonkhano ndipo ambagumana lini phindu. N’cadidi kuti, mwamuna wa lufoyi ambacita ciri-centse, kuti athandize mkazace kusamalira wana ku mitsonkhano napo kumui. Mwa ciratizo, iye angathandizembo mkazace mabasa ya pamui. Koma iye an’funika lini kuleka kucitisa Kunamata Ninga Banja, na kucita nyongo kuti wentse agumane phindu na pfunzirolo. Ndipo iye an’funikambo kumbayenda mu utumiki bwakumunda mwakukhazikika pabodzi na banja lace. w19.12 24 ¶8

Kodi ni phindu liponi lomwe Ajirayeri akhaligumana na Gole la Ufulu? Kumbukirani kuti Mjirayeri akakhala na mangawa mazinji, akhafunikira kugulisa mbuto yace yomwe akhakhala kuti abwezere mangawayo. Tsono pa Gole la Ufulu, Mjirayeriyo akhabwezeredwa mbuto yaceyo. Tenepo, iye [‘akhabwerera] ku mbuto yace,’ ndipo wana wace akhakhala na utaka. Kumbukiranimbo kuti Mjirayeri omwe akhaneseka kubwezera mangawa thangwe ra kusaya, akhangingimizika kugulisa m’bodzi mwa wana wace, ayai kubzigulisa iye yekha ninga kapolo kuti abwezere mangawayo. Koma pa Gole la Ufulu, kapoloyo [‘akhabwerera] ku banja lace.’ (Mwam. 25:10) Makonzedweya yakhacitisa kuti munthu aleke kukhala kapolo kwa muyaya. Kuthimizira bzimwebzi Yahova adalewa kuti: ‘Pakati panu paleke kugumanika munthu wakusauka, pakuti Yahova an’dzakusimbani ku dziko lomwe Yahova Mulungu wanu akukupasani kuti likhale ninga utaka.’ (Bzak. 15:4) Ntsiku zino pana kusiyana kwene-kwene pa bzomwe bzikhacitika mu nthawe ya Ajirayeri! Thangwe kawiri-kawiri tikuwona kuti wanthu wakudala akupitiriza kudala ndipo wakusauka akupitirizambo kusaukiratu. w19.12 8-9 ¶3-4

Pomwe Jezu adagumana na mayezo, iye adapemba mwakucita ‘kulira na kugwesa misozi.’ (Waheb. 5:7) Mipembo yace yakucokera pansi pa mtima, idalatiza kuti akhali wakukhulupirika kwa Yahova, ndipo idamuthandiza kupitiriza kukhala wakubvera. Kwa Yahova, mipembo ya Jezu ikhali ninga bzakununcirisa ndipo ikhamudekera kwene-kwene. Bzomwe Jezu adacita pano pa dziko la pansi, bzidakondwesa Yahova ndipo bzidalatiza kuti katongedwe ka Yahovayo n’kabwino kwene-kwene. Ifepano tingatewezere Jezu mwa kucita bzomwe tingakwanise kuti tibvere Yahova na kumukhulupira. Na tenepo, tikagumana na mayezo, tin’funika kumbapemba kwa Yahova kuti atithandize kucita bzomwe iye ambakomedwa nabzo. Tikacita bzimwebzi, tin’dzalatiza kuti tikuthandizira utongi bwace. Ndipo tin’funikambo kukumbukira kuti Yahova an’dzabvuma lini mipembo yathu tikambacita bzinthu bzomwe iye ambabziwenga. Koma tikambacita bzomwe Yahova ambafuna, mipembo yathu in’dzakhala ninga bzakununcirisa kwa iye. Tenepo, tin’funika lini kuyebwa kuti kukhulupirika na kubvera kwathu kumbakondwesa kwene-kwene Baba wathu wakudzulu. w19.11 21-22 ¶7-8

Mu gole la 1919, Jezu adasankhula kagulu kakucepa ka Akristau wakudzozedwa kuti kakhale ‘kapolo wakukhulupirika na wanzeru.’ Kapoloyo ambatsogolera basa lakupalizira ndipo ambapereka ‘cakudya pa nthawe yakuthemera’ kwa ateweri wa Kristu. Sathani pabodzi na wanthu omwe ali kumbali yace, ambacita ciri-cense kuti aphingize basa lomwe kapolo wakukhulupirikayu ambacita. Bzingadakhala kuti kapoloyo ambathandizidwa lini na Yahova, angadakwanisa lini kucita ­basalo. Mwa ciratizo, kapolo wakukhulupirika na wanzeru akupitiriza kupereka cakudya cauzimu kuna ateweri wa Kristu pano pa dziko la pansi, napo kuti pacitika nkhondo ziwiri za pa dziko lense, bvuto lakusaya kobiri, kuzunzidwa na kucitiridwa bzinthu bzakusaya cirungamo kwa atumiki wa Mulungu. Kumbukirani mabukhu mazinji ya fovolo yomwe tinayo ntsiku zino yakugumanika m’bzirewedwe bzakupitirira 900! Bumwebu ni umboni bwakulatiza kuti Mulungu akuthandiza kapoloyo. Bzipsa bzabwino bzikupaliziridwa ‘pa dziko lense komwe kuna wanthu.’​—Mat. 24:14. w19.11 24 ¶15-16

Pa Ntsiku Yakumpsinkha Pikado, mkulu wa ansembe akhatentha bzakununcirisa akanati kupereka nsembe. Kucita bzimwebzi, kukhamutsimikizirisa kuti Mulungu akhakomedwa naye. Kumbukirani bzomwe Jezu adacita. Timbadziwa kuti iye adabwera pa dziko la pansi kuti adzapereke moyo wace ninga nsembe. Koma akanati kucita bzimwebzi, cakuyamba iye akhafunika kucita cinthu cinango cakufunika kwene-kwene kuposa kupulumusa wanthu. Kodi cinthuco n’ciponi? Iye akhafunika kulatiza kukhulupirika na kubvera Yahova kwa moyo wace wense pomwe akhali pano pa dziko la pansi, kuti Yahovayo abvume nsembe yaceyo. Na bzimwebzi, Jezu adalatiza kuti kucita bzinthu mwakubverana na kufuna kwa Yahova, n’cinthu cakufunika kwene-kwene comwe tingacite kuti tikhale na moyo. Bzomwe Jezu adacitabzi, bzidalatiza kuti katongedwe ka Yahova n’kabwino ndipo n’kakulungama. Pomwe Jezu akhali pano pa dziko la pansi, iye adabvera Yahova pa cinthu ciri-cense. Ndipo alibe kubvuma kuti mayezo yamutazise kukhotcerera utongi bwa Baba wace.​—Waf. 2:8. w19.11 21 ¶6-7

Napo Jezu adagumana na mayezo pomwe akhapalizira, apostolo wace wakukhulupirika adalatiza kuti akhali axamwali wacadidi wa Jezuyo. (Mim. 18:24) Axamwali amwewa akhali wakufunika kwene-kwene kwa Jezu. Mwakusiyana na axamwali wacewo, palibe ne m’bale wace m’bodzi wakuthupi omwe adamukhulupira. (Ju. 7:3-5) Pa nthawe inango, abale wacewo adamulewa kuti wacita msala. (Mar. 3:21) Tsono mafala yomwe Jezu adauza apostolo wace wakukhulupirika yomwe yakutsogolera vesi ya lero, yadalatiza kusiyana kwa iwo na abale wacewo. Apostolo wa Jezu kawiri-kawiri akhacita bzinthu bzomwe bzikhamukalipisa, koma iye akhandokumbukira lini bzakuphonya bzawobzo, m’mbuto mwace, akhawona cikhulupiro comwe iwo akhanaco kwa iye. (Mat. 26:40; Mar. 10:3, 14; Ju. 6:66-69) Ndipo usiku bomwe mangwana yace angadaphedwa, Jezu adauza amuna wakukhulupirikawo kuti: ‘Inepano ndin’kucemerani axamwali, thangwe ndidakuzimbulirani bzense bzomwe ndidabva na Baba wangu.’ (Ju. 15:15) Mwakusaya kupenukira, Jezu akhalimbisidwa kwene-kwene na axamwali wacewo. w19.04 11 ¶11-12

Kodi munthu ambadziwa tani kuti wacemeredwa kuti akakhale kudzulu? Mtawiro timbaugumana pa mafala yomwe mpostolo Paulo adanembera Akristau wakudzozedwa wa ku Roma, omwe akhadasankhulidwa kuti akhale ‘wakucena.’ Kuthumizira mafala ya mu vesi la lero, iye adawauza kuti: ‘­Imwepo mulibe kutambira mzimu wa ukapolo, kuti mumbacite mantha; koma mudatambira mzimu wakukusandusani wana wace, omwe umbaticitisa kukuwa kuti: “Aba, Baba.”’(War. 1:7; 8:15) Tenepo, Mulungu ambaphatisa basa mzimu wace wakucena kuti athandize anyakudzozedwa kutsimikiza kuti acemeredwa kuti akakhale kudzulu. (1 Wat. 2:12) Yahova ambathandiza wentse omwe ambawasankhula kuti akakhale kudzulu kuleka kupenukira kuti asankhulidwa. (1 Ju. 2:20, 27) Akristau wakudzozedwa an’funika lini kucita kuuzidwa na munthu kuti mbakudzozedwa.​—w20.01 22 ¶7-8

‘Cakutonga ca Kristu’ cimbalimbisidwa na lufoyi. (Wag. 6:2) Jezu akhacita bzinthu bzense mwalufoyi. Munthu ambabvera nsisi mwanzace thangwe ra lufoyi. Ndipo thangwe ra nsisi, Jezu adapfunzisa thimu la wanthu, adapoza atenda, adadyesa omwe akhana njala ndipo adalamusa anyakufa. (Mat. 14:14; 15:32-38; Mar. 6:34; Lu. 7:11-15) Jezu akhafunisisa kuikha bzakufuna bza winango pa mbuto yakuyamba. Ndipo njira ikulu ya momwe Jezu adalatizira lufoyi lace ni kupereka moyo wace kuti atifere. Ifepano tingatewezere Jezu mwa kumbaikha bzakufuna bza winango pa mbuto yakuyamba. Tingamutewezerembo mwa kumbabvera nsisi wanthu omwe timbawapalizira m’gawo lathu. Ndipo timbabvera cakutonga ca Kristu, timbalatiza nsisi pakupalizira na pakupfunzisa bzipsa bzabwino. w19.05 4 ¶8-10

Jezu adathandiza wanthu kutsudzulidwa ku bzinthu bzakuphonyeka bzomwe bzikhapfunzisidwa na atsogoleri wa cipembedzo. Adjuda azinji wa mu nthawe imweyire, akhangingimizidwa kuteweza miyambo na bzipfunziso bzakunama. (Mat. 5:31-37; 15:1-11) Tenepo, wanthu omwe akhalewa kuti akhathandiza winango kutumikira Mulungu, akhali ninga azimola thangwe iwombo akhatumikira lini Mulungu caiyeyo. Pakuti iwo adalamba Mesiya na cadidi comwe iye akhapfunzisa, alibe kufika pa kudziwa Mulungu, ndipo alibembo kulekereredwa pikado zawo. (Ju. 9:1, 14-16, 35-41) Ndipo pakuti Jezu adapfunzisa cadidi na kupereka ciratizo cabwino, iye adathandiza wanthuwo kuwona momwe angadatsudzukira ku bzipfunziso bzakunama. (Mar. 1:22; 2:23–3:5) Jezu adacitisambo wanthu kutsudzulidwa ku ukapolo bwa pikado. Thangwe ra ntsembe ya Jezu, Mulungu angalekerere pikado za wale omwe ambakhulupira cakulombolera, ndipo ambalatiza cikhulupiroco na bzomwe iwo ambacita.​—Waheb. 10:12-18. w19.12 10 ¶8; 10-11

ahova ambaphatisa basa mzimu wace wakucena kuti athandize Akristau wakudzozedwawo kutsimikizira kuti ndiye omwe awasankhula. Mwa njira imweyi, mzimuyo umbathandiza Akristauwo kutsimikizira kuti an’dzakhala na moyo wakusaya kumala kudzulu, sikuti pano pa dziko la pantsi. (2 Wak. 1:21, 22) Mkristau akadzozedwa, kodi bzikuthandauza kuti iye ambatambiriratu mabaibai yace ya kudzulu? Ne n’tenepo lini. Iye ambakhala na citsimikizo cakuti wasankhulidwa kuti adzayende kudzulu. Napo bziri tenepo, iye an’funika kukumbukira malango aya: ‘Abale, citani ciri-centse cakuthemera kuti mupitirize kukhala wakukhulupirika, na cakulinga cakuti mukhale m’bodzi wa wanthu omwe Mulungu akuwacemera na kuwasankhula, pakuti mukapitiriza kucita bzimwebzi, mun’dzatazira lini ne na pang’onopo.’ (2 Pe. 1:10) Bzimwebzi bzikuthandauza kuti Mkristau omwe wacemeredwa kuti akakhale kudzulu, an’dzatambira mabaibai yace kokha akapitiriza kukhala wakukhulupirika.​—Waf. 3:12-14; Waheb. 3:1; Cibv. 2:10. w20.01 21-22 ¶5-6

Thangwe libodzi limwe lidacitisa kuti axamwali atatu wa Djobi aleke kumubvera nsisi, ndakuti iwo akhabvesesa lini bzomwe bzikhacitikira Djobiyo. Ninga bzakutewera bzace, iwo adamulewa kuipa acimupasa mulandu thangwe ra mabvuto yomwe iye akhagumana nayo. Kodi mungacite tani kuti muleke kugwera m’bvuto ninga la axamwali wa Djobiwa? Mun’funika kudziwa kuti ni Yahova yekha omwe ambadziwa bzense bzomwe bzimbacitikira munthu. Tenepo, munthu akambafotokoza bza mabvuto yace, mbamutetekerani mwatceru. Ndipo pakutetekerapo mbabvesesani momwe iye ankubvera mu mtima mwace. Mukacita bzimwebzi, mun’dzalatiza nsisi zacadidi kwa m’bale ayai mpfumakazi yanu. Nsisi zingatithandize kutcenkha kumwaza mabvuto yomwe winango ankugumana nayo. Munthu wa magunkha ambalimbisa lini gwere, koma ambalipfudza. (Mim. 20:19; War. 14:19) Iye ambalatiza kusaya kudeka mtima ndipo angapweteke mtima wa munthu omwe ankubonera na mabvutoyo. (Wayef. 4:31, 32) Ndipopa cinthu cabwino kwene-kwene comwe tensenefe tin’funika kucita ni kumbawona mikhalidwe yabwino yomwe munthu anayo, na kukumbukira momwe tingamuthandizire kulimbana na mabvuto yace.​—w19.06 21-22 ¶8-9