Fevereiro

M’Bibliya fala lakuti ‘cirungamo,’ limbathandauza kucita bzomwe Mulungu ambalewa kuti mpsakulungama na kucita bzinthubzo mwakusaya tsankhulo. Kumbukirani momwe bzicito bza Jezu bzidalatizira momwe akhawonera cirungamo. Mu nthawe yace, atsogoleri wa bzipembedzo bza Cijuda akhawenga wanthu omwe akhali lini Ajuda, ndipo Ajuda omwe akhalibe kupfunza ku cipembedzo ca Cijuda akhawawona ninga wakusaya kufunika, ndipo kuthumizira bzimwebzi akhalemekeza lini akazi. Koma Jezu nthawe zense akhacita bzinthu mwacirungamo na mwakusaya tsankhulo na munthu ali-wense. Iye akhabvuma kuti munthu ali-wense omwe akhamukhulupira akhale mteweri wace napo wale omwe akhali lini Ajuda. (Mat. 8:5-10, 13) Ndipo akhapalizira munthu ali-wense mwakusaya kusankhula kuti ngwakudala ayai ngwakusauka. (Mat. 11:5; Lu. 19:2, 9) Ndipo kwa akazi iye akhawalemekeza na kucita nawo bzinthu mwakudeka mtima, kuphatanidzambo wale omwe wanthu winango akhawawona ninga wakusaya kufunika ayai wakusaya basa. (Lu. 7:37-39, 44-50) Ifepano tingatewezere Jezu mwa kumbacita bzinthu mwakusaya kusankhula winango na kupalizira wense omwe akufunisisa kutetekera bzipsa bzabwino, bziribe basa penu iwo mbakudala ayai mbakusauka ayai mbacipembedzo ciponi. Ndipo amuna Wacikristau ambatewezera Jezu mwa kumbalemekeza akazi wawo. w19.05 2 ¶1; 5 ¶15-17

Akulu wa gwere nsiku zino, iwo an’funika kukhala wakudeka mtima, kulewalewa mafala yabwino akambaphatisa basa Bibliya kuti atsangalaze omwe ankufunikira thandizo. Kodi ni akulu okha wa gwere omwe an’funika kumbatsangalaza omwe adapswithidwa? Ne. Tensenefe tina udindo bwa kupitiriza ‘kumbalimbisana.’ (1 Wat. 4:18) Mwa ciratizo, mpfumakazi Zacikristau zomwe n’zakukhwima mwauzimu zingathandize mpfumakazi zomwe zinkufunika kutsangalazidwa. Mpsakubveka kuti Yahova adabzindendemezera na mai omwe ambatsangalaza mwana wace pomwe iye adafotokoza bza mtsangalazo omwe ambaphatisa basa kuti atsangalaze wale omwe akubonera. (Zai. 66:13) Ndipo m’Bibliya muna bziratizo bza akazi omwe adatsangalaza anyakusunama. (Djobi 42:11) Nsiku zino, Yahova ambakomedwa kwene-kwene akambawona akazi Wacikristau ankutsangalaza mpfumakazi zinzawo zomwe zidasunama. Nthawe zinango, akulu awiri ayai m’bodzi angakumbire mpfumakazi yakukhwima mwauzimu kuti ithandize mpfumakazi yomwe inkubonera m’makumbukidwe thangwe idapswithidwa. Kulewa cadidi, tin’funika kusamala kuti tileke kufuna kudziwa bzinthu bzacintsintsi bza Akristau anzathu.​—1 Wat. 4:11. w19.05 16-17 ¶10-12

Thangwe ranyi akulu wa gwere an’funika kubva umboni bwa wanthu awiri ayai kuposa akanati kukonza komiti yaciyeruzo? Thangwe ndibzo bzomwe Bibliya limbalewa pa nkhani yakucita bzinthu mwacirungamo. Tsono penu munthu omwe wacita pikadoyo ankugaza, akuluwo akanati kukonza komiti yaciyeruzo, cakuyamba an’funika kubva umboni bwakuperekedwa na mboni ziwiri. (Bzak. 19:15; 1 Tim. 5:19) Tsono akagaza, akuluwo ambakumbira mboni zomwe zikudziwa bza nkhaniyo kuti zifotokoze umboni bwawo. Tsono penu omwe wazimbula nkhaniyo na munthu munango alewa kuti munthuyo wapswithadi mwanayo, ayai nthawe inango iye adapswitha mwana munango, akulu ambakhala na umboni bwakukwanira kuti akonze komiti yaciyeruzo. Penu palibe mboni yaciwiri, bzinkuthandauza lini kuti omwe wazimbula nkhaniyo walewa bzakunama. Napo palibe mboni ziwiri zomwe zinkutsimikizira kuti munthuyo wacitadi pikado yakupswitha mwana, akulu wa gwere an’funika kudziwa kuti munthu omwe akulewedwayo angakhale kuti wacita pikado. Bzikakhala tenepo, akulu ambapitiriza kutsangalaza na kuthandiza omwe asunama na nkhaniyo ndipo akuluwo ambakhala tceru kuti akhotcerere gwere kuna wanthu omwe ambapswitha wana.​—Mab. 20:28. w19.05 11 ¶15-16

Abereki an’funika kupfunzisa wana wawo momwe angambapfunzire fala la Mulungu. Wanawo an’funika kupfunza kumbakonzekera mitsonkhano ya gwere, ayai kufufudza mtawiro wa mbvunzo omwe angagumane nawo ku xikola. (Waheb. 5:14) Ndipo wana akambakhala na nthawe ya kupfunza nkhani za m’Bibliya kumui, an’dzaneseka lini kutetekera nkhani zomwe zimbafotokozedwa pa mitsonkhano ya gwere, ya dera, na ya cigawo, sikuti kundokhala tceru kokha pa mbali za vidiyo zomwe zimbalatizidwa. Ndipo kukula kwa nthawe yomwe aberekiwo angapfunze na wana wawo in’themba msinkhu wa wanawo. Anyakupfunza wathu wa Bibliya an’funikambo kudziwa momwe angakonzekerere pfunziro lawo. Iwo akayamba kupfunza Bibliya, ifepano timbakomedwa kwene-kwene tikawona kuti akwala m’bukhu lawo mitawiro ya mibvunzo yakupfunza ayai akonzekera mitsonkhano ya gwere. Koma tin’funika kumbawapfunzisa momwe angafufudzire na kuwathandiza kuti ambapfunze nkhani zakuzika akakhala ali wokha. Kucita bzimwebzi kun’dzawathandiza kuti akadzagumana na bvuto aleke kudzabvunza m’bale ayai mpfumakazi kuti iwauze cakucita, thangwe iwo an’dzakhala akudziwa kale mabukhu yomwe yana nkhani zomwe zingawathandize. w19.05 26 ¶2; 28 ¶10-11

Sathani ankufunisisa kucinja makumbukidwe yathu. Iye ambaphatisa basa bzipfunziso bzakusiyana-siyana kuti aticosere makumbukidwe yomwe tinayo pakulewa bza Fala la Mulungu. Sathani ankupitiriza kucita mbvunzo ubodzi-bodzi omwe adabvunza Eva mu zunde la Edeni kuti: ‘Kodi n’cadidi kuti Mulungu adalewa kuti . . . ?’ (Ciy. 3:1) Mu dziko lomwe linkutongedwa na Sathaniri, kawiri-kawiri timbabva mibvunzo yomwe pinango ingaticitise kupenukira bzomwe timbakhulupira. Mibvunzoyo ni iyi: ‘Kodi n’cadidi kuti Mulungu ambaletsa amuna ayai akazi kulowolana wokha-wokha? Kodi n’cadidi kuti Mulungu ambafuna lini kuti imwepo mumbasekerere Natale na nsiku ya kubadwa kwa munthu? Kodi n’cadidi kuti Mulungu wanu ambafuna lini kuti muikhidwe mulopa? Kodi n’cadidi kuti Mulungu walufoyi ambafuna lini kuti mumbabverane na abale pabodzi na axamwali wanu omwe adacosedwa m’gwere?’ Ifepano tin’funika kumbatsimikizira bzomwe timbakhulupira. Tsono tikasaya kugumana mitawiro ya mibvunzo yakufunika kwene-kwene yomwe timbakhala nayo m’makumbukidwe, tingayambe kupenukira kwene-kwene bzomwe timbakhulupirabzo. Kupenukirako kungacinje makumbukidwe yathu, kucidzonga cikhulupiro cathu. w19.06 12-13 ¶15-17

Yahova ambatifuna kwene-kwene. (Ju. 3:16) Ndipopa ifepano tin’funika kutewezera Baba wathu wa lufoyiyu. Tenepo tin’funika kumbafuna abale [na kubvera] nsisi kwene-kwene’ wense, maka-maka wale omwe ni ‘abale wathu wa m’cikhulupiro.’ (Wag. 6:10) Ndipo abale wathu wauzimu akagumana na mabvuto, ifepano tin’funika kumbawathandiza. Kodi tingatsangalaze tani munthu omwe wafedwa mwamuna ayai mkazace? Cinthu cakuyamba comwe tin’funika kucita ni kulewalewa na nyakufedwayo, napo tikhale na manyazi ayai tisaye bzakulewa. Paula, omwe adafedwa bayace mwadzidzidzi, adati: “Nimbadziwa kuti infa ni cinthu comwe cimbacitisa wanthu kusaya cakuphata. Ndipo iwo ambacita thupo kuti bzomwe angalewe bzingakalipise nyakufedwayo. Koma cakuipiratu kuposa kulewa cinthu comwe n’cakukalipisa ni kuleka kulewa cinthu ciri-cense.” Kawiri-kawiri, nyakufedwa ambadikhira lini kuti timuuze cinthu comwe cingacinje moyo wace pa nthawe imweyoletu. Paula adalewa pomwe kuti: “Ndikhatenda kwene-kwene pomwe axamwali wangu akhalewa kuti, ‘Bzikundiwawa kwene-kwene bzomwe bzacitikabzi.’” w19.06 20 ¶1; 23 ¶14

Basa lathu lakupalizira likaletsedwa, akulu wa m’gwere an’dzacita makonzedwe yakuti tidzatsonkhane mwakabise-bise. Iwo angadzakuuzeni kuti mukatsonkhane m’tumagulu tung’ono-tung’ono, ndipo angadzacinje mwakubwereza-bwereza nthawe ya mitsonkhano na mbuto ya mtsonkhanoyo. Tsono tani pakulewa bza basa lakupalizira? Bzinthu bzin’dzacitika mwakubverana na mbutoyo. Ifepano timbafuna Yahova, ndipo timbakomedwa kuuza anzathu bza Umambo bwace. Tenepo pa nthawe imweyo, tin’dzagumana njira yakuwapalizirira. (Lu. 8:1) Emily Baran, omwe ni mfotokozi wa nkhani za kale-kale, pakulewa bza upalizi bwa Mboni za Yahova ku dziko lomwe likhadziwika na dzina la Soviética adati: “Pomwe boma lidalewa kuti Mboni za Yahova zireke kupalizira bza cikhulupiro cawo, izo zidayamba kumbaceza na avizinyu, anzawo wa kubasa na axamwali wawo. Ndipo pomwe zidatumizidwa ku mbuto za basa lakukakamizidwa, Mbonizo zikhapalizira anzawo omwe akhali m’kawokomo.” Napo kuti basa lakupalizira likhadaletsedwa, abale wathuwo alibe kusiya kupalizira. Imwepo mungakhalembo na citsimikizo ninga cimweci! w19.07 11 ¶12-13

Kodi tingathandize tani wanthu omwe ambanamata lini kuti adziwe Mulungu na kumufuna acikhala anyakupfunza wa Kristu? Ifepano tin’funika kuzindikira kuti munthu atetekere bzipsa bzabwino, bzimbathemba komwe adakulira. Mwa ciratizo, wanthu wa ku Europa pinango angatitetekere lini tikambawapalizira ninga momwe wanthu wa kucokera ku Ásia angacitire. Thangwe ranyi? Thangwe ndakuti wanthu azinji wa ku Europa, ambadziwa bzinthu bzinango pakulewa bza Bibliya ndipo adabva kale kuti Mulungu ndiye adalenga bzinthu bzense. Koma ku Ásia, azinji ambandodziwa bzinthu bzakucepa ayai ambadziwa lini ne na pang’onopo bzomwe Bibliya limbapfunzisa, ndipo pinango iwo ambakhulupira lini kuti Mulengi alipo. Tenepo khalani na makhalidwe yabwino. Gole liri-lense, wanthu omwe ambanamata lini ambakhala Mboni za Yahova. Ndipo azinji wa iwo akhana kale makhalidwe yabwino koma akhakomedwa lini na cinyengo ca cipembedzo cakunama. Winango akhana makhalidwe yabwino, koma winango wa iwo akhafunika kusiya bzikhumbo bzawo bzakuipa. Na thandizo la Yahova, tingakhale na citsimikizo cakuti ifepano tin’dzagumana ‘omwe ana makumbukidwe yabwino yomwe yangawathandize kukagumana moyo wakusaya kumala.’​—Mab. 13:48; 1 Tim. 2:3, 4. w19.07 20-21 ¶3-4

Bziribe basa penu cidikhiro cathu n’cakudzakhala na moyo wakusaya kumala kudzulu ayai pano pa dziko la pansi, tensenefe tin’funika kupitiriza kulimbikira kuti tidzagumane malipo yathu. Tin’funika lini kumbakumbukira bzinthu bzakumbuyo ayai kubvuma kuti cinthu cinango cititazise kutumikira Yahova mwakukhulupirika. (Waf. 3:16) Bzinthu bzikasaya kucitika ninga momwe tikhadikhirira, ayai thangwe ra matenda tikukwanisa lini kucita bzomwe tikhacita kale-kale, ayai tikubonera na mabvuto kwa nthawe itali, tin’funika kudikhirira kuti Yahova an’dzakwanirisa bzomwe wapicira pa nthawe yace. Bziribe basa mabvuto yomwe munkugumana nayo, ‘lekani kumbacita thupo na cinthu ciri-cense.’ M’mbuto mwace, citisani kuti bzakukumbira na madandaulo yanu bzidziwike kwa Mulungu, ndipo iye an’dzakupasani mtendere omwe umbaposa cinthu ciri-cense comwe mungacikumbukire. (Waf. 4:6, 7) Ninga anyakucita mapici yakuthamanga omwe ambalimbikira akakhala akufika kuphampha kwa mapici yawo, ifepanombo tin’funika kuikha makumbukidwe yathu yense pa mapici yakuthamanga pomwe tikufika kuphampha kuti tikatambire moyo. w19.08 7 ¶16-17

Nthawe zinango, pinango bzingakhale bzakunesa kugumana mafala yakuti tiuze munthu omwe wafedwa. Tsono, iwo akatiwona tinkulira an’dzazindikira kuti ifepano tinkubva ninga momwe iwo ankubvera. Mwa ciratizo, pomwe adafa Lazaro xamwali wa Jezu, Mariya, Marta pabodzi na wanthu winango adalira thangwe ra kufedwa m’bale na xamwali wawo. Tsono pomwe padapita nsiku zinai, Jezu adabwera kudzaponda masamba, ndipo pomwe adafika iye ‘adagwesa misozi’ napo akhadziwa kuti angadalamusa Lazaroyo pa nthawe imweyire. (Ju. 11:17, 33-35) Kulira kwa Jezu kudalatiza momwe Yahova akhabvera na infa ya Lazaro. Ndipo pomwe acibale wa Lazaro adawona Jezu ankulira, adazindikira kuti Jezuyo akhawafuna, ndipo bzimwebzi bzidatsangalaza kwene-kwene Mariya na Marta. Mpsibodzi-bodzimbo na ifepano, abale wathu akambawona lufoyi na thupo lomwe timbawalatiza akafedwa, iwo ambawona kuti ali lini wokha pa bvutolo. Nthawe zinango cinthu comwe tingafunike kucita ni kukhala mtetekeri wabwino. M’bale wathu akambafotokoza momwe ankubvera tin’funika kumusiya kuti alewe bzense bzomwe bziri mu mtima mwace, ndipo tin’funika lini kukalipa akalewa bzinthu ‘mwakusaya kukumbuka bwino.’ (Djobi 6:2, 3) Msunamo wace ungathumizirike penu acibale wace omwe ni Mboni lini ankumungingimiza kucita bzinthu bzomwe bzimbabverana lini na Bibliya. Tenepo mbapembani pabodzi na iye, kuti Mulungu amupase mphanvu na mtendere wa mu mtima.​—Psal. 65:2. w19.04 18-19 ¶18-19

Penu tikutumikira pa Beteli ayai ku mbuto inango, tingafike pakufuna wanthu pabodzi na mbuto yomwe tinkutumikirayo. Tsono tingasuname kwene-kwene utumiki bwathu bukacinja. Bzimwebzi bzikacitika, tingasuwe abale wathu na kuwacitira thupo, maka-maka tikasiyana nawo thangwe ra kuzunzidwa na anyamadulanthaka wathu. (Mat. 10:3; 2 Wak. 11:8, 29) Bzingakhalembo bzakunesa kuyenda kukatumikira​—ku mbuto yacirendo komwe—​tingakafunikire kupfunza cikhalidwe cipsa, ndipo tingabzibvembo bzibodzi-bobzi tikauzidwa kuti tikatumikire ku gwere komwe tidacokera. Omwe ambakatumikira ku mbuto yacirendo ambagumana na bvuto la kusaya kobiri. Ndipo bzimwebzi bzingawacitise kubzibva kukhala wakusaya kukhotcerereka ayai kukhala na thupo. Kodi n’ciyani comwe cingawalimbise? Kufenderera Yahova. (Tiy. 4:8) Kodi tingamufenderere tani? Mwa kumukhulupira ninga ‘Mbveseri wa mpembo.’ (Psal. 65:2) Yahova angaticitire bzinthu bzizinji ‘kuposa bzomwe timbakumbira ayai kukumbuka.’ (Wayef. 3:20) Iye ambatipasa lini kokha bzinthu bzomwe timbamukumbira m’mipembo. Koma ambamalisa mabvuto yathu mu njira yomwe tikhaidikhirira lini. w19.08 21 ¶5-6

anthu winango, pakubva fala lakuti Armagedo, ambakumbukira bza matsoka yacilengedwe ayai nkhondo ya mabomba yomwe in’dzapfudza dziko lense. Koma mwakusiyana na bzomwe wanthuwo ambakhulupira, Bibliya limbalewa kuti Armagedo ni nkhondo yomwe in’citika tsapanopapa. Nkhondoyo in’dzakhala na bzakutewera bzabwino kwene-kwene, ndipo bzomwe Bibliya limbalewa pa nkhaniyi, bzimbatikondwesa! (Cibv. 1:3) Nkhondo ya Armagedo in’dzapfudza lini wanthu wense! Kodi bzin’dzacitika tani bzimwebzi? Mwa kumalisa utongi bwa wanthu, kupfudza wanthu wakuipa na kukhotcerera dzikoli kuti lireke kudzongekeratu. (Cibv. 11:18) Fala lakuti ‘Armagedo’ limbagumanika kabodzi basi m’Bibliya, ndipo fala limweri limbacokera ku cirewedwe ca Cihebereu lomwe limbathandauza ‘Phiri la Megido.’ (Cibv. 16:16) Megido ukhali ubodzi mwa mizinda yomwe ikhalipo mu Jirayeri wakale. (Djos. 17:11) Tsono Armagedo ni dzina lini la mbuto yomwe iripodi. Dzinali limbayimira kutsonkhanisidwa kwa ‘wamambo wa pa dziko lense lakukhalidwa na wanthu’ kuti atsutsane na Yahova.​—Cibv. 16:14. w19.09 8 ¶1-3

Mkaziyu akhafunikira thandizo. Iye akhadayenda kale kwa adotolo azinji ndipo akhana cidikhiro cakuti anilimba. Yadapita magole 12 iye akuzunzika na matenda. Ndipo mwakubverana na cakutonga comwe Yahova akhadapereka kwa Mozeji, iye akhawonedwa kukhala wakupsipa. (Mwam. 15:25) Tsono mkaziyo adabva kuti Jezu angadapoza wense omwe akhabonera na matenda. Tenepo, iye adamunyang’ana ndipo pomwe adamugumana adakhuya cakubvala cace cakunja ndipo adalimbiratu pa nthawe imweyoletu! Koma Jezu adacita bzizinji sikuti kundocirisa mkazi ule. Mwa ciratizo, iye adamucemera kuti ‘Mwanangu,’ mafala yomwe yakulatiza kuti Jezu adalewalewa naye mwa lufoyi na mwaulemu. Mwakusaya kupenukira, mafalaya yadatsangalaza na kulimbisa mkaziyo! (Lu. 8:44-48) Kumbukirani kuti mkazi ule ndiye omwe adacita nyongo yakuyenda komwe kukhana Jezu. Mpsibodzi-bodzimbo nsiku zino, ifepano tin’funikambo kucita nyongo yakuyenda kuna Jezu. N’cadidi kuti nsiku zino Jezu akuciza lini atenda omwe akuyenda kuna iye. Koma mcemo wace wakuti ‘Bwerani kuna Ine . . . ndipo ine ndin’dzakudukuzani,’ ukadaphata basa mpaka pano.​—Mat. 11:28. w19.09 20 ¶2-3

M’magole yakuyambirira, mpolofeta Zakariya adalewa kuti: ‘Mu nsiku zimwezire, amuna khumi wa bzirewedwe bzense bza wanthu wa mitundu, an’dzaphatirira mkanjo wa mwamuna m’bodzi Mjuda, aciti: “Tiniyenda namwe thangwe tabva kuti Mulungu anamwe.”’ (Zak. 8:23) Mboni za Yahova zimbadziwa kuti kukonkhana kwa wanthu wa bzirewedwe bzakusiyana-siyana, kukukwanisika thangwe ra basa lakupalizira bzipsa bzabwino mu bzirewedwe bzizinji. Koma tsapano tikusandulizira bzirewedwe bzizinji kwene-kwene, ndipo bzikuwonekeratu kuti basa lathu lakusanduzira likukwanisikadi! Ndipo bzikulatiziratu kuti ni Yahova omwe akukonkhanisa thimu likulu la wanthu wa mitundu yense nsiku zanthu zino. Tsapano, Bibliya na mabukhu yakusiyana-siyana yakugumanika m’bzirewedwe bzizinji, ndipo thimu likululi napo likuimira wanthu wakusiyana-siyana, iwo akutumikira Yahova mwakuphatana. Ndipo atumiki wace, ambadziwika na basa lawo lakupalizira winango cadidi mwakudeka mtima, na lufoyi lomwe analo kuna wanthu winango. Kulewa cadidi, bzinthu bzimwebzi, bzimbalimbisa cikukhulupiro cathu!​—Mat. 24:14; Ju. 13:35. w19.09 30-31 ¶16-17

Pa nthawe ya citsautso cikulu wanthu an’dzakhala na mantha pakuwona bzinthu bzomwe bzin’dzacitika. Iwo an’dzawona bzinthu bzomwe akhakhulupira ninga maboma, anyamalonda na bzinthu bzinango bza m’dzikoli bzikupfudzidwa. Tenepo, iwo an’dzasunama, adzakhala na mantha ya kuluza moyo wawo pa nthawe yakunesayi. (Sof. 1:14, 15) Pa nthaweyo, moyo un’dzakhala wakunesa kwene-kwene kwa munthu ali-wense, kuphatanidzambo atumiki wa Yahova. Ifepano tingadzabonere, thangwe rakuti timbacita lini mbali ya dzikoli. Pinango tingadzasaye bzinthu bzakufunikira pa moyo wathu. Koma Kapolo wakukhulupirika na wanzeru ambatikonzekereseratu kuti tidzakhale wakukhulupirika pa citsautso cikulu. (Mat. 24:45) Bzimwebzi bzimbacitika mu njira zakusiyana-siyana, koma mbatiwoneni ciratizo cibodzi: mitsonkhano yathu ya cigawo ya 2016 mpaka 2018 idatilimbikisa kwene-kwene. Mitsonkhano imweyi idatilimbikisa kukulisa makhalidwe yomwe ngakufunika pomwe ntsiku ya Yahova ikufendera. w19.10 14 ¶2; 16 ¶10; 17 ¶12

Tikadya cakudya, pambacitika bzinthu bzizinji bzomwe ifepano timbadziwa lini. Ndipo thanzi lomwe limbakhala ku cakudyaco, limbayamba kuphata basa m’thupi mwathu. Tenepo, cakudya cabwino cingathandize thupi lathu kukhala na thanzi labwino, koma cakudya cakuipa cingadzonge thanzi lathu. Bzimwebzi bzingacitikembo na masenzeka yomwe tingasankhule kucita, ifepano tin’funika kuwonesesa bzinthu bzomwe tingaikhe m’makumbukidwe mwathu. Koma bzomwe bzimbacitika m’makumbukidwemo ifepano timbabzidziwa lini, ndipo timbakwanisa lini kubzikhotcerera. Tenepo, masenzeka yabwino yangatitsangalaze, koma yakuipa yangatidzonge. (Tiy. 1:14, 15) Nthawe zinango bzakutewera bza masenzeka yakuipa bzingawoneke lini nthawe imweyoletu, koma bzimbadzawonekera patsogolo pace. Ndipopa Bibliya limbaticenjeza kuti: ‘Lekani kupumpsidwa; Mulungu ambapusisidwa lini. Pakuti ciri-cense comwe munthu an’bzala, cimweco ndico comwe an’dzabvuna; pakuti omwe abzale na cakulinga cakukondwesa thupi race, an’dzabvuna kudzongeka kwa thupi racelo.’ (Wag. 6:7, 8) Tenepo, tin’funika kutcenkha masenzeka yense yomwe yambalimbisa bzinthu bzomwe Yahova ambabziwenga!​—Psal. 97:10. w19.10 30 ¶12-14

Yahova adalatiza lufoyi lace kwa ifepano mwa kupereka Mwana wace ninga cakulombolera cathu. (Ju. 3:16) Kodi tingatewezere tani lufoyi la Yahova? Tingamutewezere mwa kumbawona abale na mpfumakazi zathu kukhala zakufunika ndipo timbatambire na manja mawiri wale omwe akhadataika ninga ‘bira wakusocera’ koma abwerera kwa Yahova. (Psal. 119:176; Lu. 15:7, 10) Ndipo tingamutewezerembo mwakuphatisa basa nthawe pabodzi na mphanvu zathu kuti tithandize abale wathuwo pa nthawe yomwe ankufunikira thandizo. (1 Ju. 3:17) Jezu adauza ateweri wace kuti ambafunane wokha-wokha. (Ju. 13:34, 35) Cakutonga ca Jezu n’cipsa thangwe cimbalimbisa lufoyi lomwe mu Cakutonga comwe Mulungu akhadapasa Ajirayeri mukhalibe, ico cimbalewa kuti: Timbafune abale wathu ninga momwe Jezu adatifunira. Bzimwebzi kuti bzikwanisike pambafunika lufoyi lakubzimana. Timbafune abale na mpfumakazi zathu kuposa momwe timbabzifunira. Ndipo timbawafune mpaka bzikafunika kupereka moyo wathu m’mbuto mwawo, ninga momwe Jezu adacitira. w19.05 4 ¶11-13

Kuti titambire thandizo la mzimu wakucena, tin’funika kupitiriza kuukumbira kwa Yahova. (Lu. 11:13) There la Jezu lomwe liri pa Luka 11:5-9 limbatithandizambo kuwona thangwe race Yahova ambatipasa mzimu wakucena. Mwamuna wa mu thereli, akhafuna kutambira bwino mulendo omwe akhadabwera kumui kwace. Iye akhalibe cakudya cakuti angadapasa mulendo omwe akhadabwera pakati pa usikuyo, napo bzikhali tenepo, iye adawona kuti bzikhali bzakufunika kuti mulendoyo adye. Jezu adalewa kuti mwamuna ule adapasidwa cakudya na xamwali wace thangwe ra kupitiriza kukumbira. Kodi Jezu akhafuna kupfunzisa ciyani na thereli? Iye akhafuna kupfunzisa kuti penu munthu wakuperewera ambathandiza xamwali wace omwe ambapitiriza kumukumbira, tani pakulewa bza Baba wathu, Yahova omwe ngwakudeka mtima? Kulewa mwakusaya kupenukira, iye ambathandiza wale omwe ambapitiriza kumukumbira mzimu wakucena! Tenepo, tingakhale na citsimikizo cense cakuti Yahova an’dzatipasa mzimu wakucena tikapitiriza kumukumbira. (Psal. 10:17; 66:19) Sathani anileka lini kutiboneresa, napo bziri tenepo, ifepano tina citsimikizo cense cakuti iye an’kwanisa lini kutikunda. w19.11 13 ¶17-19

Jezu akhadziwa kuti iye pabodzi na anyakupfunza wace akhafunikira nthawe yakupuma. Koma wanthu azinji wa mu nthawe imweyire na wa mu nthawe zathu zino, ambakumbuka ninga munthu nyakudala wa mu there la Jezu. Munthu nyakudalayo adalewa kuti: ‘Ndokhala phee, ndipo udye, umwe na kukondwa.’ (Lu. 12:19; 2 Tim. 3:4) Iye akhakumbuka kuti bzinthu bzakufunika kwene-kwene pa moyo wa munthu ni kupuma na kukondwa. Koma Jezu pabodzi na anyakupfunza wace akhakumbuka mwakusiyana na munthu nyakudalayo! Iwo akhawona lini bzinthu bzakukondwesa kukhala bzakufunika kwene-kwene pa moyo wawo. Ntsiku zino timbatewezera Jezu mwa kuphatisa basa nthawe yathu, sikuti kokha yomwe timbapuma kubasa, koma timbaphatisambo basa nthawe yomwe timbakhala tiri lini kubasa kuti tipalizire bzipsa bzabwino na kugumanika pa mitsonkhano. Ifepano timbacita nyongo yakupfunzisa wanthu na kugumanika pa mitsonkhano, thangwe bzimwebzi ni bzinthu bzakufunika kwene-kwene pa moyo wathu. (Waheb. 10:24, 25) Napo tikakhala tiri pa feriya, timbacita nyongo yakutsonkhana na kupalizira wale omwe timbagumana nawo.​—2 Tim. 4:2. w19.12 7 ¶16-17

Yahova ambatipasa mpata wakusankhula momwe tingakhalire na moyo. Iye ambatipfunzisa momwe tingacitire bzakusankhula bzabwino ndipo tikacita bzakusankhula bzomwe bzin’kodwesa, Yahova an’dzatithandiza kuti bzinthu bzitifambire bwino. (Psal. 119:173) Tikambaphatisa basa malango ya mu m’Fala Mulungu, tin’dzakwanisa kumbacita bzakusankhula bzabwino. (Waheb. 5:14) Napo ticite cakusankhula canzeru, koma nthawe zinango bzingatinese kucikwanirisa. Onani bziratizobzi: M’bale angacite cakusankhula cakuwerenga Bibliya lense. Iye angayambe kuwerenga bwino-bwino pa mdzinga yakuyambirira, koma nakupita kwa nthawe, n’khusiya kuwerengako. Mpfumakazi ikusankhula kutumikira ninga mpainiya wakukhazikika, tsono ikuzeza kuyamba utumikibo pa nsiku yomwe idasankhula. Bungwe la akulu likusankhula kuzungira abale m’gwere mwawo, tsono papita minyezi mizinji ne kuwazungira. Bzakucitikabzi mpsakusiyana, koma bzikundendemerana pa cinthu cibodzi. Wanthuwa adacita bzakusankhula, koma alibe kukwanirisa bzomwe iwo adasankhulabzo. w19.11 26 ¶1-2

Jezu adandendemezera ntsiku zathu zino na ‘ntsiku za Nowa,’ ndipo ifepano timbapenukira lini kuti tikukhala mu ntsiku ‘zakupambulika na zakunesa.’ (Mat. 24:37; 2 Tim. 3:1) Na thangwe limweri, mabanja yanango yambasankhula kuleka kubereka kuti yakhale na nthawe izinji yakutumikira Yahova. Pakucita cakusankhula ca kukhala na wana na kupenda kuti wanawo an’khala angasi, abereki wanzeru ambalewenga ‘kobiri zomwe an’dzonga.’ (Lu. 14:28, 29) Abereki omwe ambalera bwino wana, ambadziwa kuti kulera wanawo kumbafuna kobiri, nthawe na mphanvu. Tenepo, banja limbafunika kucezerana mibvunzo ninga iyi: ‘Kodi tentse awiri tin’funika kumbaphata basa, kuti tikwanise kugula bzinthu bzakufunikira pa banja lathu? Tikafuna kugula cinthu, kodi timbabverana kuti tigule cire “comwe n’cakufunika” kwene-kwene pa banja lathu? Penu tentse awiri tikuphata basa, mbani omwe an’dzasamalira wana wathu? Penu tin’dzanyang’ana munthu kuti awasamalire, kodi makumbukidwe na bzicito bza munthuyo bzin’dzatokonya tani wanawo?’ Banja likambacezerana mibvunzoyi, lin’dzakhala likuphatisa basa mafala ya vesi la ntsiku ya lero. w19.12 23-24 ¶6-7

Moyo wa mpostolo Paulo kawiri-kawiri ukhakhala pa ngozi. (2 Wak. 11:23-28) Iye akhalimbana na ‘munga m’thupi,’ omwe pinango ukhali bvuto la thanzi lace. (2 Wak. 12:7) Ndipo iye akhafunika kupirira msunamo omwe akhanawo thangwe ra kuthawidwa na xamwali wace Dema, omwe akhaphata naye basa pabodzi. Thangwe ranyi adamuthawa? Thangwe Dema akhafunisisa ‘bzinthu bza m’dziko.’ (2 Tim. 4:10) Paulo akhali Mkristau wakudzozedwa, wakukhwimika ndipo akhathandiza winango mwakudeka mtima. Napo bzikhali tenepo, iye nthawe zinango akhasunamambo. (War. 9:1, 2) Paulo adatsangalazidwa ndipo adatambira thandizo lomwe akhafunikira. Mwa njira iponi? Yahova adaphatisa basa mzimu wakucena kuti amulimbise. (2 Wak. 4:7; Waf. 4:13) Ndipo Yahova adaphatisambo basa Akristau winango kuti amutsangalaze. Ndipopa Paulo adalewa kuti Akristau anzace akhali ‘mtsangalazo ukulu kwa [iye.]’ (Wakol. 4:11) Ndipo iye adaguma madzina ya winango omwe adamuthandiza ninga, Aristako, Tikiko na Marko. Amwewa adalimbikisa Paulo kuti apirire mabvuto yomwe akhayagumana. w20.01 8 ¶2-3

Jezu adalewambo kuti mpsakunesa kufotokozera munthu omwe ngwakudzozedwa lini kuti abvesese momwe munthu ambabvera ‘akabadwa papsa’ ayai ‘akabadwa na mzimu.’ (Ju. 3:3-8) Kodi Mkristau akadzozedwa ambayamba kukumbukira ciyani? Mkristau akanati kudzozedwa na Yahova, ambakhala na cidikhiro cakukhala na moyo wakusaya kumala pano pa dziko la pantsi. Ndipo iye ambadikhirira na mtima wentse nthawe yomwe Yahova an’dzamalisa mabvuto yentse na kusandusa dziko la pantsi kukhala paraizo. Pinango iye ambakumbukira akutambira m’bale ayai xamwali wace omwe adafa. Tsono akandodzozedwa, makumbukidwe yace yambacinja. Thangwe ranyi? Sikuti akufuna lini kukhala na moyo wakusaya kumala pano pa dziko la pantsi, ayai thangwe ra kusunama na kuwanda kwa mabvuto ayai pinango andokumbuka kuti kukhala na moyo wakusaya kumala pa dzikoli, kulibe na phindulo. M’mbuto mwace, Yahova ambaphatisa basa mzimu wace wakucena, kuti ucinje makumbukidwe na cidikhiro comwe Mkristauyo akhacifunisisa kwene-kwene. w20.01 22 ¶9-11

Mwakuphatisa basa Cakutonga, mu nthawe ya Ajirayeri, pakhasankhulidwa amuna kuti ambasamalire nkhani zakubverana na kunamata Yahova kuphatanidzambo nkhani zinango zomwe zikhabverana lini na kunamata Yahovayo. Koma pansi pa ‘Cakutonga ca Kristu’, akulu wa gwere ana udindo bwakusamalira kokha pikado zomwe zinkubverana na kunamata Yahova. (Wag. 6:2) Iwo ambazindikira kuti akulu-akulu wa boma adapasidwa udindo na Mulungu bwakusamalira nkhani za m’banja na za ciwembo, bzomwe bzimbaphatanidza kupasa nyathwa ayai kuikha m’kawoko munthu omwe waphonyesa Cakutonga. (War. 13:2-4) Kodi akulu wa m’gwere ambasamalira tani nkhani za pikado zikulu-zikulu? Iwo ambaphatisa basa Bzinembo kuti apende na kucita bzakusankhula. Pa kucita bzimwebzi iwo ambakumbukira kuti lufoyi ni nsansa ya cakutonga ca Kristu. Lufoyi limbacitisa akuluwo kukumbukira mbvunzo ninga uyu: Kodi mpsiponi bzomwe bzin’funika kucitidwa kuti tithandize abale wa m’gwere omwe acita pikado? Akulu akambacezerana na munthu omwe wacita pikado, lufoyi limbawacitisa kubzibvunza mibvunzo ninga iyi: Kodi iye ankulatiza kukungula? Kodi tingamuthandize tani kuti abwezerese uxamwali bwace na Yahova? w19.05 7 ¶23-24

Jezu akhakhulupira na mtima wentse Yahova ndipo Yahovayo akhamupasa bzentse bzomwe iye akhafunikira kuti akhale na moyo. Kuthimizira bzimwebzi, Yahova adathandiza Jezu kuti apitirize kukhala wakukhulupirika. (Mat. 4:4) Yahova ambatipasa bzomwe timbafunikira kuti tikhale pa uxamwali bwabwino na iye. Mwakuphatisa basa Bibliya, iye ambatiuza kuti iye ni mbani, bzomwe akufuna kudzacitira cirengedwe centse, thangwe lomwe iye adatilengera na bzomwe bzin’dzacitika kutsogolo. Iye adatithandiza mwakuphatisa basa abereki wathu ayai atumiki wace winango kuti apfunzise bza iye. Ndipo tikupitiriza kutambira thandizolo na kudeka mtima kwace kucokera kwa akulu wa gwere wa lufoyi pabodzi na abale na mpfumakazi zinango zakusiyana-siyana. Kuthimizira bzimwebzi, Yahova ambatipfunzisa mwakuphatisa basa mitsonkhano ya gwere, komwe timbakapfunza bzizinji pakulewa bza iye. Zimwezi ni njira zinango za momwe Yahova ambalatizira kuti ambatifuna ninga Baba.​—Psal. 32:8. w20.02 3 ¶8; 5 ¶13

Tikakhala na njiru, bzin’dzakhala bzakunesa kuti tikhale pa mtendere na winango. Tenepo, tin’funika kucosa mu mtima mwathu kacinthu kali-kentse komwe kangayambise njiru, ndipo titcenkhembo kucitisa winango kukhala na njiru. Kodi n’ciyani comwe tingacite kuti tithandize wanthu winango kuti akunde njiru? Ndipo tingakhale nawo tani pa mtendere? Makhalidwe yathu na bzomwe timbacita, bzingatokonye kwene-kwene wanthu winango. Dzikoli limbafuna kuti ifepano ‘[timbabziwonesere]’ na bzinthu bzomwe tingakhale nabzo. (1 Ju. 2:16) Tsono khalidwe limweri, limbayambisa njiru. Ndipopa tin’funika lini kumbandokhala ticilewalewa bzinthu bzomwe tinabzo ayai bzomwe tin’funa kugula. Kucita bzimwebzi kun’dzacitisa kuti winango aleke kukhala na njiru. Ndipo njira inango yomwe ingatithandize kuleka kucitisa winango kukhala na njiru, ni kukhala wakubzicepesa tikakhala na maudindo m’gwere. Tikambandokhala ticilewa bza maudindo yomwe tinayo ayai bzomwe timbacita m’gulu la Yahova, bzin’dzacitisa kuti winango akhale na njiru. Koma cinthu cabwino comwe tingacite, ni kulatiza winango kuti timbacita nawo thupo na kuwatenda thangwe ra bzinthu bzabwino bzomwe iwo ambacita. Tikacita bzimwebzi, tin’dzawathandiza kuti ambawone bzomwe anabzo kukhala bzakuwakwanira, ndipo tin’dzacitisa kuti gwere likhale pa mtendere na lakuphatana. w20.02 18 ¶15-16

Mungapfunze bza Yahova kucokera pa bzinthu bzomwe iye adalenga. (Cibv. 4:11) Kumbukirani bza miti na bzirombo bzomwe Yahova adabzilenga na momwe ibzo bzimbalatizira kuti Yahovayo ngwanzeru kwene-kwene. Kumbukiranimbo momwe thupi lathu limbaphatira basa. (Psal. 139:14) Kumbukirani pomwe bza mphanvu zomwe Yahova adaikha mkati mwa dzuwa, lomwe ni libodzi mwa mabidyau ya nyenyezi. (Zai. 40:26) Tenepo, mukambakumbukira bza cirengedwe ca Yahova, imwepo mun’dzamulemekeza kwene-kwene. Tsono kundodziwa kuti Yahova ngwanzeru na wamphanvu n’kwakukwanira lini. Koma ni mbali ibodzi yomwe imbacitisa kuti imwepo mukhale naye pa uxamwali. Tsono kuti mukulise lufoyi lanu kwa Yahova na kukhala naye pa uxamwali, mun’funika kupfunza bzizinji pakulewa bza iye. Imwepo mun’funika kutsimikiza na mtima wentse kuti Yahova ambacita namwe thupo, ndipo ambakufunani kwene-kwene. Kodi bzimbakunesani kukhulupira kuti Mulengi wakudzulu na wa dziko la pantsi ambakuwonani ndipo ambakusamalirani? Penu munti inde, dziwani kuti Yahova ‘ali lini kutali na m’bodzi na m’bodzi wa ifepano.’ (Mab. 17:26-28) Iye ‘ambafufudza mitima yentse,’ ndipo akukuuzani kuti ‘[mukamulinga], iye an’dzabzicitisa kuti [mumugumane].’ (1 Nkha. 28:9) Tenepo, thangwe lomwe likukucitisani kupfunza Bibliya tsapano ndakuti Yahovayo akukwewani. (Jer. 31:3) Ndipo mukabvesesa bzentse bzomwe Yahova ambakucitirani, lufoyi lanu kwa iye lin’dzathimizirika. w20.03 4 ¶6-7

Mpostolo Paulo ni ciratizo cabwino pa nkhani yakumbawona basa lakupalizira kukhala cinthu cakufunika kwene-kwene pa moyo wace. Pomwe iye akhali ku Kolinto pa ulendo bwaciwiri ninga misiyonario, kobiri zace zidamumalira, tenepo iye akhafunika kuphata basa lakukonza matendi kuti akwanise kubzisamalira. Koma iye akhawona lini basa lakukonza matendi kukhala lakufunika kwene-kwene kuposa utumiki bwace. Iye akhacita basali kuti limuthandize mu utumiki bwace kuti akwanise kumbapalizira wanthu wa ku Kolinto bzipsa bzabwino ‘fovolo.’ (2 Wak. 11: 7) Napo Paulo akhacita mabasa ­manango yakuthupi, iye adapitiriza kuikha pa mbuto yakuyamba utumiki bwace ndipo akhapalizira nsiku zense za Malinkhuma. Pomwe bzinthu bzidacinja pa moyo wace, Paulo adapitiriza kuikha patsogolo basa lakupalizira. Iye ‘adayamba kutanganidwa kwene-kwene na basa lakupalizira fala, acimbacitira umboni kwa Ajuda na kuwatsimikizira kuti Jezu ni Kristu.’ (Mab. 18:3-5; 2 Wak. 11:9) Patsogolo pace, pomwe iye akhali m’kawoko ku Roma kwa magole mawiri, Paulo adapalizira wanthu omwe akhabwera kudzamuwona ndipo akhawanembera matsamba. (Mab. 28:16, 30, 31) Paulo alibe kubvuma kuti cinthu ciri-cense ciphingize utumiki bwace. w19.04 4 ¶9