Janeiro

Atumiki wense wakukhulupirika wa Mulungu an’funika kupfunza kuti adziwe momwe angakwanirisire ‘mbali zentse’ za utumiki bomwe iwo adapasidwa kuti acite. (2 Tim. 4:5) Basa limweri ndakufunika kwene-kwene pa moyo wawo, ndipo iro lin’funika kuphatidwa mwakamkulumize kuposa basa linango liri-lentse. Koma napo bziri tenepo, nthawe zinango bzingakhale bzakunesa kumala nthawe izinji mu utumiki ninga momwe tikhafunira. Bzinthu bzinango bzakufunika bzimbadzonga nthawe na mphanvu zathu. Mwa ciratizo, pinango tingafunike kuphata basa nthawe izinji kuti tigumane kobiri yakusamalirira bzakusaya bzathu na bza banja lathu. Ndipo nthawe zinango bzingatinese kusamalira banja, nkhani ya matenda ayai wacibale omwe mbakukalamba. Tin’funika lini kusunama penu tikukwanisa lini kucita bzizinji pa basa la Yahova thangwe ra mabvuto yomwe tinkugumana nayo. Jezu akhadziwa kuti atumiki wa Mulungu angadabala lini bzisapo bza Umambo mwakundendemerana. (Mat. 13:23) Ndipo Yahova ambatenda kwene-kwene nyongo yomwe timbacita pa kumutumikira.​—Waheb. 6:10-12. w19.04 2 ¶1-3

Magunkha yakulewa bza anyakufa yambaipisa mbiri ya Yahova. Magunkha yamweya yambaphatanidza cipfunziso cakunama cakulewa kuti munthu wakuipa akafa ambayenda kukatenthedwa ku moto. Tsono cipfunziso cimweci cimbaipisa mbiri ya Mulungu! Mwa njira iponi? Cipfunzisoci cimbacitisa wanthu kukhulupira kuti napo Mulungu ngwalufoyi, iyembo ngwaciwembo ninga momwe Sathani aliri. (1 Ju. 4:8) Kodi imwepo mumbabzibva tani na bzimwebzi? Ndipo kodi Yahovayo ambabzibva tani thangwe ra magunkha yamweya? Cadidi n’cakuti iye ambawenga ciwembo ca mtundu uli-wense. (Jer. 19:5) Magunkha ya Sathani yakulewa bza infa yambacitisa wanthu kuleka kukhulupira nsembe ya cakulombolera ya Kristu. (Mat. 20:28) Gunkha linango la Sathani ndakuti munthu akafa mbali inango imbapitiriza kukhala na moyo. Tsono bzingadakhala kuti mpsacadidi, palibe munthu omwe angadafa ndipo Kristu angadatifera lini kuti atilombole. Kumbukirani kuti nsembe ya Kristu ni lufoyi likulu lomwe lidalatizidwa kwa wanthu. (Ju. 3:16; 15:13) Ndokumbukirani momwe Yahova na Mwana wace ambabvera na bzipfunziso bzomwe bzimbacitisa kuti mphaso yakufunikayi iwonedwe ninga yakusaya phindu! w19.04 14 ¶1; 15-16 ¶8-9

Kodi bzipfunziso bza Jezu bzidanembedwa kuponi? M’mabukhu ya Mateu, Marko, Luka na Juwau timbagumana bzinthu bzizinji bzomwe Jezu adalewa na kupfunzisa pomwe akhali pano pa dziko la pansi. Bzinembo bzakumalizira Bzacigirego Bzacikristau, bzimbatithandiza kubvesesa kakumbukidwe ka Jezu thangwe omwe adanemba Bzinembobzi adafuliziridwa na mzimu wakucena ndipo akhana ‘makumbukidwe ya Kristu.’ Bzomwe Jezu adapfunzisa bzimbatokonya mbali zense za moyo wathu. Mwa ciratizo, ‘cakutonga ca Kristu’ cimbaphata basa pa bzense bzomwe timbacita pamui, kubasa, ku xikola na m’gwere. (Wag. 6:2) Ifepano timbapfunza cakutongaci mwa kuwerenga Bzinembo Bzacigirego Bzacikristau na kumbabzikumbukira pambuyo pa kubziwerenga. Ndipo timbabvera cakutongaci mwa kuteweza malango, malamulo pabodzi na mitemo yakufuliziridwa yomwe imbagumanika m’mabukhu ya m’Bibliya. Tenepo tikambabvera cakutonga ca Kristu, timbakhala tinkubverambo Yahova omwe ni Mulungu wathu walufoyi, omwe ni mwenekaciro wa bzense bzomwe Jezu adapfunzisa.​—Ju. 8:28. w19.05 3 ¶6-7

Bzimbakhala bzakupasa nsisi wanthu akambacita bzomwe Sathani ambafuna. Napo bziri tenepo, Yahova ana mphanvu kwene-kwene kuposa Sathani pabodzi na wale omwe ambacita kufuna kwa Sathaniyo. Ndipopa timbatsimikiza na mtima wense kuti Yahova ambadziwa kubonera kwathu, ndipo iye angatipase mtsangalazo omwe tikufunikira. Tenepo, ndife wakusimbidwa thangwe ra kutumikira ‘Mulungu wa mtsangalazo wense, omwe ambatitsangalaza pa matsautso yathu yense, kuti tikwanise kutsangalazambo winango omwe ali pa matsautso ya mtundu uli-wense thangwe ife tatsangalazidwa na Mulungu.’ (2 Wak. 1:3, 4) Wale omwe adapswithidwa ayai alibe kukhotcereredwa na abereki wawo kwa wanthu omwe ambapswitha wana ayai pinango adapswithidwa na omwe ambawadziwa, ambafunika kutsangalazidwa. Mambo Davide akhadziwa kuti tikakhulupira Yahova nthawe zense an’dzatitsangalaza. (Psal. 27:10) Davide akhana citsimikizo cense cakuti Yahova an’dzakhala Baba kwa wale omwe anisiyidwa na wanthu wa m’banja mwawo. Mwa njira iponi? Mwakuphatisa basa atumiki wace wakukhulupirika. Ndipopa abale na mpfumakazi zathu za m’gwere ziri ninga wanthu wa m’banja lathu. Mwa ciratizo, Jezu adalewa kuti wale omwe akhanamata naye Yahova, akhali abale, mpfumakazi na mai wace.​—Mat. 12:48-50. w19.05 15-16 ¶8-9

Kodi cinthu cakuyamba comwe tin’funika kupfunza n’ciponi? Nsiku zense tin’funika kumbapambula nthawe kuti timbapfunze Fala la Mulungu. Ndipo mavesi ya kawerengedwe ka Bibliya komwe kambaphatisidwa basa pa mitsonkhano ya gwere pa mdzinga uli-wense, yacepesedwa kuti timbakhale na nthawe izinji yakukumbukira na kufufudza m’mabukhu yathu nkhani zomwe zinkubverana na bzomwe tawerengabzo. Tsono cakulinga cathu cin’funika lini kukhala cakundowerenga mavesi yomwe yaikhidwa pa mdzinga uli-wense, koma kumbabvuma kuti Fala la Mulungu litokonye mtima wathu na kutithandiza kupitiriza kukhala pa uxamwali na Yahova. (Psal. 19:14) Pfunziro la Nsanza ya Mulindiri lomwe timbacita pa mtsonkhano wa gwere, limbatithandiza kubvesesa Bibliya. Tenepo, mbawerengani mucimbakumbukira bzinembo, maka-maka bzomwe bzimbawerengedwa pa pfunzirolo. Mbakhalani tceru kuti muwone nfundo ikulu yomwe inkugumanika m’mavesi yomwe yali mu ndime. Ndipo mbapambulani nthawe yakukumbukira bzomwe mwawerenga m’bzinembobzo na kuwona momwe mungabziphatisire basa pa moyo wanu.​—Djos. 1:8. w19.05 27 ¶5, 9

Jezu ni ciratizo cabwino pa nkhani ya kuikha basa lakupalizira pa mbuto yakuyamba. Cinthu cakufunika kwene-kwene pa moyo wa Jezu, cikhali kupalizira bzipsa bza Umambo bwa Mulungu. Kuti apalizire wanthu azinji iye akhafamba mtantho utali. Ndipo iye nthawe zense akhanyang’ana mipata yakusiyana-siyana kuti apalizire wanthu nyumba na nyumba na kuli-kwense komwe kukhagumanika wanthu. Bzimwebzi bzinkulatiza kuti Jezu akhaikha utumiki bwace pa mbuto yakuyamba. Ifepano tingatewezere Jezu mwa kunyang’ana mipata kuti tipalizire wanthu bzipsa bzabwino kuli-kwense komwe tingawagumane. Ndipo timbabzimana bzinthu bzizinji kuti tipalizire wanthu wakusiyana-siyana. (Mar. 6:31-34; 1 Pe. 2:21) Abale winango m’gwere ambatumikira ninga apainiya wakupambulika, wakukhazikika, ayai wakuthandiza. Ndipo winango ambapfunza cirewedwe cinango ayai ambayenda ku mbuto komwe kunkufunika apalizi azinji. Napo bziri tenepo, basa lizinji limbacitidwa na apalizi omwe ambakwanisa lini kucita bzomwe bzafotokozedwabzi. Yahova ambatiuza lini kuti ticite bzomwe tingakwanise lini, koma iye ambakomedwa na ciri-cense comwe timbacita mu utumiki. w19.04 3-4 ¶7-8

Bzibvunzeni kuti: ‘Kodi inepano ndina kamtima ka njiru ayai ka nsanje?’ (1 Pe. 2:1) ‘Kodi ndimbabziwona kukhala wapadzulu thangwe ra mbuto yomwe ndimbakhala, mapfunziro yomwe ndidacita ayai kobiri zomwe ndinazo?’ (Mim. 16:5) ‘Kodi ndimbawona wanthu winango kukhala wakusaya kufunika thangwe rakuti alibe bzinthu bzinango bzomwe ine ndinabzo, ayai thangwe rakuti mtundu wawo ngwakusiyana na wangu?’ (Tiy. 2:2-4) ‘Kodi inepano ndimbatengeka na bzinthu bzomwe bzimbatsatsidwa na dziko la Sathaniri?’ (1 Ju. 2:15-17) ‘Kodi ndimbafuna kucita masenzeka yomwe yambalatiza bzinthu bza unzazi na bzaciwembo?’ (Psal. 97:10; 101:3; Am. 5:15) Mitawiro ya mibvunzoyi inkuthandizani kuwona mbali zomwe mun’funikira kucinja. Kawiri-kawiri wanthufe, timbatengeka na bzomwe axamwali wathu ambacita. (Mim. 13:20) Tikakhala tiri kubasa ayai ku xikola, timbakhala pakati pa wanthu omwe ambatithandiza lini kukhala na makumbukidwe ya Yahova. Koma axamwali wabwino tingawagumane pa mitsonkhano yathu yacikristau. Ndipo pa mitsonkhanoyo timbalimbisidwa pa ‘lufoyi na pa mabasa yabwino.’​—Waheb. 10:24, 25. w19.06 12 ¶13-14

Yahova akhafuna lini kuti ifepano timbagumane na mabvuto pabodzi na thupo lomwe tinkugumana nalo nsiku zino. Tenepo, napo mtumiki wakukhulupirika wa Yahova angalewembo mafala mwakusaya kukumbuka bwino thangwe ra mabvuto yomwe ankugumana nayo kwa nthawe itali. (Djobi 6:2, 3) Napo iye alewe mafala yomwe yangasunamise Yahova na ifepano kubodzi, tin’funika lini kumbakalipa ayai kuyeruza munthu thangwe ra bzomwe alewa. Nthawe zinango, munthu omwe ankulimbana na thupo angafunikirembo malango ya m’Bibliya ayai thandizo linango. (Wag. 6:1) Kodi akulu wa gwere angathandize tani munthuyo? Iwo angacite bwino kutewezera ciratizo ca Eliu, omwe adatetekera mwatceru pomwe Djobi akhafotokoza bza mu mtima mwace. (Djobi 33:6, 7) Iye adapereka malango yace kokha pambuyo pa kubvesesa makumbukidwe ya Djobi. Tenepo akulu omwe ambatewezera ciratizo ca Eliu, ambatetekera mwatceru ndipo ambacita nyongo yakubvesesa momwe munthu ankubvera mu mtima mwace. Kucita bzimwebzi, kumbacitisa kuti munthu omwe ankupasidwa malangoyo atokonyedwe mu mtima. w19.06 22-23 ¶10-11

Kodi tingapitirize tani kutumikira Yahova basa lathu likaletsedwa? Mthambi in’dzapereka malango kwa akulu wa m’gwere ya momwe tingatambirire cakudya cauzimu, momwe tingatsonkhanire na kupalizira. Penu mthambi inkukwanisa lini kulewalewa na akulu wa m’gwere, akuluwo an’dzathandiza imwepo na abale wense wa m’gwere kuti mudzapitirize kunamata Yahova. Iwo an’dzapereka malango mwakuphatisa basa Bibliya na mabukhu yathu yakulewa bza Bibliya. (Mat. 28:19, 20; Waheb. 10:24, 25) Yahova wapicira kuti atumiki wace an’dzasaya lini cakudya cauzimu. (Zai. 65:13, 14; Lu. 12:42-44) Tenepo, tsimikizirani kuti gulu la Yahova lin’dzacita ciri-cense kuti likupaseni bzomwe mun’dzafunikira kuti mupitirize kulimbisa cikhulupiro canu. Tsono pana cinthu comwe imwepo mun’funikira kudzacitambo. Basa lathu likadzaletsedwa dzanyang’aneni mbuto yabwino kuti mudzabise Bibliya lanu na mabukhu manango yomwe mungadzakhale nayo. Dzasamaleni kuti muleke kudzaikha bzinthubzo pa mbuto yomwe bzingadzagumanidwe na wanthu mwakusaya kunesa, bziribe basa penu ni mabukhu yakudindidwa ayai ni mabukhu yomwe yali m’mitcini ya nzeru. Tenepo, ali-wense wa ifepano an’funika kucita bzense bzomwe angakwanise kuti alimbise cikhulupiro cace. w19.07 10 ¶10-11

Kwa magole mazinji, wanthu azinji pa dziko la pansi akhanamata. Koma magole yano bzinthu bziri lini tenepoyo. Mbogo ya wanthu omwe ambanamata lini inkuthumizirika. Ndipo m’madziko manango wanthu azinji ambalewa kuti alibe na cipembedzoco. (Mat. 24:12) Winango ni thangwe ra bzikhumbo ayai thupo na moyo wawo. (Lu. 8:14) Winango omwe akhanamata adaleka kukhulupira kuti Mulungu alipo. Winango ambakhulupira Mulungu, koma ambawona kuti nkhani ya cipembedzo idamala mphanvu, njakusaya kufunika ndipo imbapitana na nkhani za siyensiya na cadidi. Pinango iwo ambabva axamwali, apfunzisi ayai anyakumwaza nkhani akulewa kuti moyo udacita kusandulika, koma akanati kubva mathangwe yakubveka bwino yomwe yangawacitise kukhulupira Mulungu. Winango ambafuna lini kunamata thangwe ra bzomwe atsogoleri wa bzipembedzo ambacita kuti adyere wanthu kobiri na kugumana udindo. Ndipo winango ambakhala m’madziko yomwe boma limbaletsa mabasa yacipembedzo. w19.07 20 ¶1-2

Anyakuthamanga mapici ambafunikira mphanvu zakukwanira kuti akwanise kuthamanga bwino, koma kuti munthu akule mwauzimu bzinthu bzimwebzi mpsakufunikira lini. Kulewa cadidi, abale wathu winango ambapitiriza kucita bzomwe angakwanise kuti apitirize kutumikira Yahova napo kuti mbakukalamba ayai ambaduwaladuwala. (2 Wak. 4:16) Pinango imwepo mwakhala munkutumikira Yahova kwa magole mazinji, koma tsapano thanzi lanu linkukubvumizani lini kucita bzinthu ninga momwe mukhacitira kale-kale. Penu bziridi tenepo, lekani kutaya mtima. Lekani kuyebwa kuti Yahova ambakumbukira bzense bzomwe mudamucitira mbuyomu ndipo ambabziwona kukhala bzakufunika. (Waheb. 6:10) Ndipo kumbukirani kuti ni kuwanda lini kwa bzinthu bzomwe timbacitira Yahova bzomwe bzimbalatiza kuti timbamufuna kwene-kwene. Mbuto mwace, ifepano timbalatiza kuti timbafuna kwene-kwene Yahova tikakhala na makumbukidwe yabwino na kumucitira bzense bzomwe tingakwanise. (Wakol. 3:23) Yahova ambadikhirira lini kuti ticite bzinthu bzomwe tingakwanise lini kucita.​—Mar. 12:43, 44. w19.08 3 ¶6; 5 ¶11-12

Yahova ambaphatisa basa atumiki wace kuti athandize wanthu winango kukhala pa uxamwali na iye. (Mat. 5:14, 15; 1 Pe. 2:12) Mwa ciratizo, penu mwamuna ayai mkazi wanu ni Mboni lini ya Yahova, kodi ambadziwa abale wa m’gwere mwanu? Muuzeni mwanzanuyo kuti ambayende namwe ku mitsonkhano yanthu ya gwere. (1 Wak. 14:24, 25) Tikudikhirira na mtima wense kuti adzinza wathu wense adzatumikire nafe pabodzi Yahova. Tsono napo ticite nyongo kuti tithandize adzinza wathu kuti akhalembo atumiki wa Mulungu, pinango iwo angafike lini pa kukhala Mboni. Bzimwebzi bzikacita, tin’funika lini kubzipasa mulandu thangwe ra cakusankhula cathu comwe tidacita ca kutumikira Yahova. Ndipo tin’funika lini kungingimiza munthu kuti abvume bzomwe timbakhulupira. Koma abereki wanu angatokonyedwe kwene-kwene, akawona kuti ndimwe wakukondwa thangwe ra kutumikira Yahova. Tenepo, mbawapemberani, mbalewalewani nawo mwaulemu ndipo lekani kuneta kuwathandiza! (Mab. 20:20) Khulupirani kuti Yahova an’dzasimba nyongo yanu. Ndipo adzinza wanu akakutetekerani, iwo an’dzapulumuka! w19.08 18-19 ¶15-17

Kodi Jezu akhathandauza ciyani na mafalaya? Iye akhathandauza kuti tin’funika kupitiriza kukhala na moyo wakusaya kufuna bzizinji ayai kuikha makumbukidwe yathu yense pa cinthu cibodzi cakufunika, ndipo tin’funika lini kubvuma kuti cinthu ciri-cense cititazise kuikha utumiki bwathu pa mbuto yakuyamba. Jezu caiyeyo ni ciratizo cabwino pa nkhani ya kumbaikha utumiki pa mbuto yakuyamba pa moyo wace, ndipo iye adapfunzisa ateweri wace kuti ambaikhembo patsogolo kutumikira Yahova na Umambo bwace. Tenepo, ifepano tingatewezere Jezu mwakumbawona basa lakupalizira kukhala cinthu cakufunika kwene-kwene pa moyo wathu. Iye adalewa kuti: ‘Pitirizani kuikha pakutoma, Umambo bwa Mulungu.’ (Mat. 6:33) Cinthu cibodzi comwe cingatithandize kumbaikha utumiki bwathu pa mbuto yakuyamba, ni kutcenkha kudzonga nthawe yathu izinji mwa kumbacita bzinthu bzakusaya kufunika. Koma timbaphatise basa nthaweyo mwa kuthandiza wanthu winango kudziwa na kufuna Yahova. Mwa ciratizo, kodi tingacepese nthawe yomwe timbacita basa lathu lakuthupi kuti tikhale na nthawe izinji yakupalizira bzipsa bzabwino pa mdzinga uli-wense? Kodi tingacepese masenzeka manango yomwe yangatidzongere nthawe izinji? w19.04 5-6 ¶12-13

M’magole yapitaya, abale azinji omwe akhatumikira Yahova mu utumiki bwa nthawe zense, utumiki bwawo budacinja. Abale azinji omwe adacinja utumiki bwawo adaneseka kwene-kwene na kucinjako. Winango wa iwo adacita utumikibo kwa magole mazinji ndipo akhabufuna kwene-kwene. Ndipopa pomwe adatambira utumiki bunango, ­pakuyamba bzidawanesa kuzolowera. Koma na kupita kwa nthawe adadzazolowera. Thangwe ranyi? Thangwe ndakuti iwo ambadziwa kuti adabzipereka kwa Yahova, sikuti thangwe ra basa ne utumiki, koma thangwe ra kufuna Yahova. (Wakol. 3:23) Iwo ambakomedwa kwene-kwene kupitiriza kutumikira Yahova mwakubzicepswa bziribe basa mbuto ayai utumiki bomwe akucita. Ndipo akagumana na mabvuto iwo ambatulira Yahova thupo lawo ‘lense,’ thangwe ambadziwa kuti iye aniwasamalira. (1 Pe. 5:6, 7) Timbatenda kwene-kwene kuti Fala la Mulungu limbatilimbisa kuti timbakhale wakubzicepswa. Tikakhala wakubzicepswa timbacitisa winango kukhala nafe pa uxamwali ndipo ifepano timbagumana phindu. Timbakwanisa kulimbana na mabvuto yomwe timbagumana nayo pa moyo wathu. Ndipo kuposa bzense, timbakhala pa uxamwali bwakulimba na Baba wathu wakudzulu. w19.09 6-7 ¶15-17

Ninga msolo wa banja, Davide akhana udindo bwa kutsogolera banja lace, ndipo kuthumizira bzimwebzi, Yahova adamupasa pomwe udindo bunango, bwakutsogolera mtundu wa Jirayeri. Ninga Mambo, Davide akhana udindo bukulu kwene-kwene. Koma nthawe zinango, iye adaphatisa basa udindo bwacebo mwakuphonyeka. (2 Sam. 11:14, 15) Tsono napo bzikhali tenepo, Davide adalatiza kuti akhabvera Yahova pomwe iye adabvuma kutsimulidwa. Ndipo iye adafotokozera Yahovayo mu mpembo momwe iye akhabvera, ndipo adacita ciri-cense kuti ateweze malango yace. (Psal. 51:1-4) Kuthumizira bzimwebzi, Davide adalatiza kuti akhali wakubzicepswa mwa kubvuma malango yomwe akhapasidwa na amuna na akazi. (1 Sam. 19:11, 12; 25:32, 33) Davide adapfunza na bzomwe adaphonya, ndipo iye adawona kunamata Yahova kukhala kwakufunika kwene-kwene pa moyo wace. Mambo Davide akhadziwa kuti kubvera Yahova kuna phindu. Nsiku zino, ifepano timbawona kusiyana komwe kulipo pakati pa wanthu omwe ambabvera Yahova na omwe ambanyoza malango yace. Wale omwe ambasankhula kubvera Yahova, ‘an’dzakuwa mwa cikondweso thangwe ra mkhalidwe labwino wa mtima wawo.’​—Zai. 65:13, 14. w19.09 17 ¶15; 19 ¶21

Mu gole la 1935, Mboni za Yahova zidabvesesa kuti thimu likulu lin’dzafunika lini kucita kuyenda kudzulu kuti likaime ‘pa maso pa mpando wa Umambo na pa maso pa Mwana wa bira.’ M’mbuto mwace, bzimwebzi bzingacitike napo thimulo likukhala pa dziko la pansi. Mwa ciratizo, kuima pa ‘maso pa mpando wa umambo’ kumbathandauza kuzindikira utongi bwa Yahova na kumubvera. (Zai. 66:1) Ndipo kuima pa ‘maso pa Mwana wa bira’ kumbathandauza kukhulupira nsembe ya cakulombolera ya Jezu. Mwakundendemerana na bzimwebzi, bukhu la Mateu 25:31, 32, limbalewa kuti ‘mitundu yense ya wanthu’ kuphatanidzambo anyakuipa, ‘in’dzatsonkhanisidwa’ patsogolo pa mpando wa umambo wa Jezu kudzulu. Tsono napo kuti bzin’dzakhala tenepo, cadidi n’cakuti mitundu imweyi iri lini kudzulu, koma pa dziko la pansi pano. Kabvesesedwe kapsa komwe Mboni za Yahova zidakhala nako kali bwino. Iwo adabvesesa kuti thangwe ranyi Bibliya limbalewa lini kuti thimu likulu lin’dzayenda kudzulu. Koma thimu libodzi lokha la wanthu wakukwana 144.000, ni lomwe lina cidikhiro cakudzayenda kudzulu, ndipo ‘an’dzatonga dziko lense la pansi’ pabodzi na Jezu.​—Cibv. 5:10. w19.09 28 ¶9

Yahova an’funa kuti atumiki wace asiyane na Babulo Mkulu. Bzimwebzi bzikuthandauza kusiya kucita ciri-cense cakubverana na cipembedzo cakunama. Ifepano tin’funika kupitiriza kunamata kwacadidi mwa kutsimikiza kutumikira Yahova. Mbatiwoneni njira ziwiri za momwe tingacitire bzimwebzi. Njira yakuyamba, tin’funika kuthandizira makhalidwe yakulungama ya Yahova. Ifepano tin’funika lini kutengera makhalidwe yakuipa ya m’dzikoli. Mwa ciratizo, tin’funika lini kubvuma mtundu uli-wense wa kugonana kwakusaya kubvumizika, kuphatanidzambo kugonana kwa amuna na akazi wokha-wokha. (Mat. 19:4, 5; War. 1:26, 27) Njira yaciwiri, ifepano pabodzi na abale wathu tin’funika kupitiriza kunamata Yahova. Tingacite bzimwebzi, mwa kutsonkhana m’Nyumba za Umambo, za abale ayai mwakabisira. Bziribe basa bzomwe bzingacitike, tin’funika lini kusiya kumbagumanika pa mitsonkhano. Kulewa cadidi, tin’funika kumbatsonkhana pabodzi ‘maka-maka pomwe tikuwona kuti nsikuyo ikufika.’​—Waheb. 10: 24, 25. w19.10 16 ¶6-7

Yahova ambafuna kuti tikondwe na moyo, ndipo cinthu comwe cingatithandize ni masenzeka. Bibliya limbati: ‘Palibe comwe n’cabwino kwa munthu kuposa kudya, kumwa na kukondwesa mtima wace pa basa lace lomwe waphata na nyongo.’ (Mpal. 2:24) Koma m’dzikoli muna masenzeka mazinji yomwe yangadzonge makhalidwe yathu yabwino. Masenzekayo yambalemekeza lini makhalidwe yabwino ndipo yambacitisa wanthu kubvuma ayai kufuna kucita bzinthu bzomwe Mulungu ambakomedwa lini nabzo. Ifepano tin’funa kunamata Yahova yekha basi. Ndipopa tin’funika lini kudyera pa ‘meza ya Yahova’ ndipo pa nthawe ibodzi-bodziyo kudyerambo pa ‘meza ya madimonyo.’ (1 Wak. 10:21, 22) Kudya cakudya pabodzi na munthu munango, ni cizindikiro cakulatiza kuti tinaye uxamwali. Ifepano tikambasankhula masenzeka yomwe yambalimbisa ndewo, bza mizimu, bza unzazi ayai bzikhumbo bza thupi, tin’dzakhala tikudya cakudya cakuphikidwa na anyamadulanthaka wa Mulungu. Bzimwebzi bzingadzonge unthu bwathu pabodzi na uxamwali bomwe tinabo na Yahova. w19.10 26 ¶2; 29-30 ¶11-12

Nyakufambisa xitima ya m’madzi akafuna kuti mphepo imuthandize, iye an’funika kucita bzinthu bziwiri. Cakuyamba, iye an’funika kuikha xitimayo pa mbuto pomwe pakucita mphepo, thangwe akasaya kucita tenepo, bzingakhale bzakunesa kuti xitimayo icoke pa mbutoyo. Caciwiri, iye an’funika kufuthula bzinguwo bza xitimayo acibzifungula kwene-kwene. Napo penu kukucita mphepo kwene-kwene, xitimayo in’dzapitiriza kufamba kokha bzinguwobzo bzikakhala bzidafunguka bwino ndipo bzikumenyedwa na mphepo. Mpsibodzi-bodzimbo na ifepano, tin’dzakwanisa kupitiriza kutumikira Yahova kokha na thandizo la mzimu wakucena. Tsono kuti mzimuyo utithandize, tin’funika kucita bzinthu bziwiri. Cakuyamba, tin’funika kumbacita bzinthu bzomwe bzimbatsogoleredwa na mzimu wa Mulungu. Caciwiri, tin’funika kucita nyongo kuti tizolowere kumbacita bzinthubzo. (Psal. 119:32) Mzimu wakucena un’dzatipasa mphanvu yakuti tipitirize kutumikira Mulungu na kupirira mabvuto. w19.11 9 ¶8; 10 ¶11

Pa nsiku yace yakumalizira ninga munthu pansi pano, Jezu adacita thupo kwene-kwene. Iye adacita thupo sikuti thangwe ra kukumbukira bza infa yakuwawa yomwe ingadamucitikira mwakusaya kucedwa. Koma ni thangwe ra lufoyi lomwe akhanalo kwa Baba wace na kufuna kumukondwesa. Jezu akhadziwa kuti angadapitiriza kukhala wakukhulupirika pa mayezo yomwe angadagumana nayo, angadacitisa kuti dzina la Yahova licenesedwe. Iye akhafunambo wanthu, ndipo akhadziwa kuti cidikhiro cathu cakudzakhala na moyo wakusaya kumala cingadakwanisika kokha iye angadapitiriza kukhala wakukhulupirika kwa Yahova mpaka kufa. Napo Jezu akhacita thupo kwene-kwene, iye adapitiriza ­kukhala na mtendere wa mu mtima. Iye akhana ‘mtendere wa Mulungu,’ ndipopa adakhala pa uxamwali bwakulimba na Yahova. Ndipo bzimwebzi bzidathandiza Jezuyo kukhala na mtendere wa mu mtima. (Waf. 4:6, 7) Palibe ne na m’bodzi wa ifepano omwe an’dzagumana na mazunzo ninga yomwe Jezu adayapirira, koma ateweri wace wense an’dzagumana na mayezo. (Mat. 16:24, 25; Ju. 15:20) Ndipo ninga Jezu, nthawe zinango tingacite thupo thangwe ra mayezoyo. w19.04 8 ¶1-3

Bzingakhale bwino ali-wense wa ifepano kubzibvunza kuti: ‘Kodi inepano nimbatenda Yahova thangwe ra kucita mbali ya gulu lace?’ Mu nthawe ya Mozeji, Yahova adatumiza moto kucokera kudzulu omwe udalatiza kuti Yahovayo adabvuma ansembe omwe adawasankhula. Mpsibodzi-bodzimbo ntsiku zino, Yahova ambatipasa umboni bwakubveka bomwe bumbatithandiza kuwona kuti iye akuphatisa basa gulu lace. Ndipopa ifepano tina bzinthu bzizinji bzomwe tingamutendere. (1 Wat. 5:18) Kodi tingalatize tani kuti tikuthandizira gulu lomwe Yahova akuliphatisa basa? Mwa kuphatisa basa bzomwe timbapfunza m’Bibliya, m’mabukhu, pa mitsonkhano ya gwere, mitsonkhano mikulu-mikulu na ya cigawo. Kuthimizira bzimwebzi, tingalatize kuti timbathandizira gululo, mwa kumbapalizira na kupfunzisa na nyongo. (1 Wak. 15:58) Tsimikizani kuphatisa basa bzense bzomwe tapfunza mu bukhu la Mwambo. Cakuyamba, kuti Yahova atambire nsembe zathu, tin’funika kubvumidwa naye. Caciwiri, timbatumikire Yahova thangwe ra kumutenda. Cacitatu, timbacitire Yahova bzomwe tingakwanise thangwe rakuti timbamufuna. Cacinai, timbathandizire na mtima wense gulu lomwe Yahova akulisimba. Tikacita bzimwebzi, tin’dzalatiza kwa Yahova kuti timbakomedwa na mwayi wakumutumikira ninga Mboni zace! w19.11 25 ¶17-18

Jezu akhathandauza lini kuti ifepano tingadadzacita bzakudabwisa bzomwe iye adacita. Koma akhathandauza kuti anyakupfunza wacewo, angadadzapalizira na kupfunzisa wanthu azinji mu gawo likulu, kwa nthawe izinji kuposa iye. Penu imwepo muli pa basa, bzibvunzeni kuti: ‘Kodi kubasa kwangu, nimbadziwika ninga wakuphata basa na nyongo? Kodi nimbacita ciri-centse kuti basa langu limbacoke bwino licimala pa nthawe yakuikhidwa?’ Penu munti inde, dziwani kuti patrau wanu an’dzakukhulupirani kwene-kwene. Ndipo anzanu wa kubasa an’dzakhala wakukonzeka kukutetekerani pomwe mun’dzawauza bzipsa bzabwino. Pakulewa bza basa lakupalizira na kupfunzisa, mungabzibvunze kuti: ‘Kodi nimbadziwika ninga mpalizi wa nyongo? Kodi nimbakonzekera bwino momwe ningayambisire maceza na wanthu pa ­ulendo bwakuyamba? Kodi nimbacita ulendo bwakubwereza kwa wanthu omwe alatiza kuti an’funa kudziwa bzizinji? Kodi nimbaphatisa basa njira za upalizi zakusiyana-siyana ndikakhala ndiri mu utumiki bwakumunda?’ Penu munti inde, mun’dzakhala wakukondwa mu utumiki bwanu. w19.12 5 ¶14-15

Banja likambacita cakusankhula ca kukhala na wana, lin’funika kumbakumbukira bzinthu bziwiri bzakufunika: Cakuyamba, kodi ni lini pomwe banjalo lingakhale na wana? Caciwiri, kodi ni wana angasi omwe an’funa kukhala nawo? Kodi ni nthawe iponi yomwe banja lingacezerane bza cakusankhulaci? Ndipo thangwe ranyi pomwe banja likucita cakusankhulaci lin’funika kukumbukira bzinthu bziwiribzi? Nthawe zizinji, banja lin’funika kumbacezerana bza kukhala na wana akanati alowolana. Thangwe ranyi? Thangwe banja limbafunika kukhala na nzeru ibodzi pa nkhani imweyi. Ndipo mwamuna na mkazi an’funika kupenda penu adakonzeka kusamalira udindo bumwebu. Mabanja yanango yambapangana kuleka kukhala na mwana gole libodzi ayai mawiri, pambuyo pa malowozi. Iwo ambacita bzimwebzi kuti akhale na nthawe izinji yakuzolowerana na moyo wa banja. Ndipo kucita bzimwebzi, kungawathandize kudziwana bwino akanati kukhala abereki, udindo bomwe bumbafuna nthawe izinji na mphanvu. w19.12 23 ¶4-5

Kuzungulira dziko lentse la pantsi, atumiki azinji wa Yahova akugumana mabvuto yomwe yambawacitisa thupo ayai kusunama. Kodi m’gwere mwanu muna abalembo ninga amwewa? Mwa ciratizo, Akristau winango akuduwala kwene-kwene ndipo winango adasunama thangwe ra kufedwa. Winango adasunama thangwe rakuti abale wawo ayai axamwali wawo wakupha nawo ntsomba na mwala adasiya kutumikira Yahova. Ndipo winango akubonera thangwe ra kugwedwa na malengwa ya pantsi. Tenepo, abale wentsenewa an’funika kutsangalazidwa. Kodi tingawatsangalaze tani? Khalani xamwali wakukhulupirika. Axamwali wakukhulupirika ambadzonga nthawe pabodzi na mphanvu zawo kuti athandize abale na mpfumakazi. Mwa ciratizo, m’bale winango wakucemeredwa Peter adauzidwa na dotolo kuti akhana nthenda ikulu ndipo mwakusaya kucedwa ingadamupha. Kathryn, omwe ni mkazace adati: “Banja linango m’gwere mwathu lidayenda nafe ku nyumba ya ulapi komwe tidakazindikira nthenda ya Peter. Ku nyumba ya ulapiko, banjalo lidatsimikiza kutithandiza matendayo. Ndipo nthawe zentse tikafunikira thandizo, iwo akhali wakukonzeka kutithandiza.” Kulewa mwakusaya kupenukira, mpsakufunika kwene-kwene kukhala na axamwali wacadidi, omwe angatithandize kupirira tikagumana mabvuto! w20.01 8 ¶1; 9 ¶5; 10 ¶6

Bzingadakhala kuti imwepo mukhali m’bodzi wa anyakupfunza omwe akhadatsonkhana m’cipinda ca m’dzaulu pa Pentekosite wa mu 33 E.C., mungadapenukira lini kuti mwadzozedwa na mzimu wakucena. (Mab. 2:5-12) Kodi wentse omwe mbakudzozedwa na mzimu wakucena, ambadzozedwa mwakudabwisa ayai pa nthawe ibodzi-ibodzi? Ne. Mbatiwoneni kuti ni nthawe iponi munthu ambadzozedwa. Ni Akristau lini okha wakukwana 120 omwe adadzozedwa na mzimu wakucena pa ntsiku imweyire. Thangwe ranyi tikulewa tenepoyo? Thangwe ndakuti patsogolo pace pa ntsiku ibodzi-bodzi ire, wanthu wakukwana 3.000 adadzozedwambo na mzimu wakucena. Wanthu amwewa adadzozedwa pa ntsiku yomwe adabatizidwa. (Mab. 2:37, 38, 41) Koma na kupita kwa magole, ni Akristau lini wentse omwe adadzadzozedwa pa ntsiku yomwe adabatizidwa. Mwa ciratizo, Asamariya adadzozedwa na mzimu wakucena pomwe padapita nthawe pang’ono kucokera pomwe adabatizidwa. (Mab. 8:14-17) Ndipo kudzozedwa kwinango komwe kumbacitika lini kawiri-kawiri, kudacitikira Korneliyo pabodzi na wanthu wa m’banja lace, thangwe iwo adadzozedwa akanati kubatizidwa.​—Mab. 10:44-48. w20.01 20-21 ¶2-4

M’bukhu la Mateu, Marko, Luka na Juwau, Jezu pakulewa bza Yahova adaphatisa basa fala lakuti ‘Baba’ kwa maulendo yakukwana 165. Thangwe ranyi Jezu adalewa kwene-kwene bza Yahova? Thangwe libodzi likhali lakufuna kuthandiza wanthu kuti atsimikizire kuti Yahova ni Baba wa lufoyi. (Ju. 17:25, 26) Tingapfunze bzizinji bza Yahova mwa kuwona momwe akhacitira bzinthu na Mwana wace, Jezu. Yahova nthawe zentse akhabva na kutawira mipembo ya Jezu. (Ju. 11:41, 42) Pa mabvuto yentse yomwe Jezu akhagumana nayo, iye akhabzibva kuti akhafuniwa ndipo akhathandiziwa na Baba wace. (Lu. 22:42, 43) Ninga Baba wa lufoyi, Yahova adacitisa Mwana wace kudziwa kuti akhamuthandiza. (Mat. 26:53; Ju. 8:16) Napo kuti Yahova alibe kukhotcerera Jezu ku mabvuto yentse yomwe akhagumana nayo, koma adamuthandiza kuyapirira. Jezu akhadziwa kuti mabvuto yomwe akhagumana nayo, yakhali ya ka nthawe kakucepa. (Waheb. 12:2) Yahova adalatiza kuti akhafuna kwene-kwene Jezu mwa kumutetekera, kumusamalira, kumupfunzisa na kumuthandiza.​—Ju. 5:20; 8:28. w20.02 3 ¶6-7,9

Penu mwasankhula kucita nawo mbali ya miyambo, cakuyamba mun’funika kukumbukira momwe cakusankhula canuco cingatokonyere cikumbu-mtima ca winango, maka-maka Akristau anzanu. Tenepo, tin’funika kucita ciri-cense kuti tireke kukhukhumudwisa munthu ali-wense! (Mar. 9:42) Tin’funikambo kutcenkha kumbalewa kuipa wanthu omwe ni mboni lini za Yahova. Koma thangwe ra lufoyi timbalewelewe nawo mwaulemu, ndipo bzimwebzi bzin’dzacitisa kuti Yahova atumbizidwe. Kulewa cadidi, ifepano tin’funika lini kumbawagaza, kuwaseka ayai kumbawanyoza thangwe ra miyambo yawo. Kumbukirani kuti lufoyi ndamphanvu kwene-kwene! Ndipo tikambacita bzinthu mwakuthemera na mwaulemu mu njira imweyi, tin’dzafewesa mitima ya wanthu omwe ambagaza bzomwe timbakhulupira. Mbabzidziwikisani ninga Mboni ya Yahova komwe mumbakhala. (Zai. 43:10) Penu m’bale wanu wasaika, adzinza wanu pabodzi na wanthu omwe mudafendererana nawo nyumba angaipidwe kwene-kwene imwepo mukalamba kucita nawo mwambo omwe iwo an’funa kucita. Ifepano tin’funika lini kucita manyazi thangwe ra kusankhula kwathu kutsogoleredwa na mitemo ya Yahova.​—War. 1:16. w19.04 17-18 ¶14-16

Apostolo 12 adafamba pabodzi na Jezu pomwe iye akhali pano pa dziko la pantsi, koma mpostolo Paulo adakhala Mkristau pambuyo pa Jezuyo kufa acilamusidwa. Napo kuti nakupita kwa nthawe adadzakhala ‘mpostolo wa mitundu,’ Paulo alibe kukhala na mwayi wakucita mbali ya apostolo 12 wale. (War. 11:13; Mab. 1:21-26) M’mbuto mwakucitira njiru apostolo 12 wale thangwe rakuti adafamba na Jezu, Paulo akhawona udindo bomwe akhanabo kukhala bwakumukwanira. Ninga Paulo, tikakhala wakubzicepesa na ­kumbawona bzomwe tinabzo kukhala bzakutikwanira, bzin’dzatinesa lini kulemekeza wale omwe adapasiwa udindo na Yahova. (Mab. 21:​2026) Iye ambaikha akulu kuti atsogolere m’gwere. Napo kuti iwo mbakuperewera, koma Yahova ambawawona ninga ‘mphaso za amuna.’ (Wayef. 4:8, 11) Tenepo, mpsakufunika kuti timbawalemekeze na kumbateweza mwakubzicepesa malango yomwe iwo ambatipasa. Tikacita tenepo, tin’dzakhala pa uxamwali bwakulimba na Yahova ndipo tin’dzakhalambo pa mtendere na abale wathu. w20.02 17 ¶13-14

Pinango imwepo mukhalemekeza kwene-kwene Bibliya, napo mukhanati mwayamba kulipfunza na Mboni za Yahova. Kuthimizira bzimwebzi, pinango mudapfunza kufuna Jezu. Ndipo pakuti tsapano mwadziwa Mboni za Yahova, bzikuwonekeratu kuti mumbafuna kwene-kwene kukhala nawo pabodzi. Koma kufuna bzinthu bzimwebzi kungakucitiseni lini kuti mubzipereke kwa Yahova mucibatizidwa. Cinthu comwe cingakucitiseni kuti mubatizidwe ni lufoyi lomwe mungakhale nalo kwa Yahova Mulungu. Ndipo ­mukambafuna kwene-kwene Yahova kuposa cinthu ciri-centse, imwepo mun’dzabvuma lini kuti cinthu cinango ayai munthu akutaziseni kutumikira Yahovayo. Kufuna Yahova kun’dzakucitisani kufika pa kubatizidwa ndipo kun’dzakuthandizanimbo kupitiriza kukhala wakukhulupirika pambuyo pa kubatizidwa. Jezu adalewa kuti tin’funika kumbafuna Yahova na mtima wathu wentse, moyo wathu wentse, nzeru zathu zentse, na mphanvu zathu zentse. (Mar. 12:30) Kodi n’ciyani comwe mungacite kuti mumbafune Yahova na kumulemekeza kwene-kwene? Mbakumbukirani lufoyi lomwe Yahova ambakulatizani. Ndipo mukacita bzimwebzi imwepo mun’dzamufunambo. w20.03 4 ¶4-5

Kodi tin’funika kucita ciyani kuti tikwanirise mbali zense za utumiki bwathu? Tin’funika kucita bzense bzomwe tingakwanise kuti timbapalizire na kupfunzisa. Koma kumala nthawe izinji tinkupalizira n’kwakukwanira lini, tin’funikambo kumbafuna Yahova na anzathu kubodzi. Bzimwebzi mpsakufunika kwene-kwene pa maso pa Yahova, ndipo bzingatithandize kukwanirisa utumiki bwathu bwacikristau na mtima wathu wense. (Mar. 12:30, 31; Wakol. 3:23) Kutumikira Mulungu na mtima wense kumbathandauza kubzipereka komwe timbacita pa basa lace, mwakuphatisa basa mphanvu pabodzi na luso lathu. Tikambawona kuti ni mwai kucita basa lakupalizira, tin’dzacita bzense bzomwe tingakwanise kuti tipalizire wanthu bzipsa bzabwino. Napo kuti nthawe zinango tingakwanise lini kumala nthawe izinji ninga momwe tikhafunira mu utumiki, koma napo bziri tenepo timbafuna kucita basa lakupalizirali. Tenepo tin’funika kukulisa luso lathu lakupalizira kuti timbatokonye mitima ya wanthu na bzipsa bzabwino. Inde, tin’funika kumbaikha basali pa mbuto yakuyamba. w19.04 2 ¶3; 3 ¶4, 6

Magunkha ya Sathani yakulewa bza infa yambathumizira msunamo na kubonera kwa wanthu. Mwa ciratizo, kumbukirani bza abereki omwe akulira thangwe ra kufedwa mwana wawo, tsono iwo akuuzidwa kuti Mulungu watenga mwanayo kuti akakhale anjo kudzulu. Kodi gunkha limweri lingacepese msunamo wa aberekiwo ayai lingathumizire? Bzipembedzo bzidalokotera cipfunziso cakunama cakuti wanthu wakuipa akafa an’dzazunzidwa, kuti bzibonerese wanthu, ayai kuwatentha pa muti thangwe ra kulamba kubvera bzipfunziso bza gereja. Mwakubverana na bukhu linango, wanthu omwe akhambacita ciwembo cimweci akhafuna kuti anyakupandukawo “alawidzembo pang’ono momwe kuliri kuzunzidwa na moto kwa muyaya,” tenepo iwo angadakungula pomwe akanati kufa, acileka kudzayendesedwa ku moto wakuzunzidwirayo. M’madziko manango, wanthu ambangingimizidwa kunamata azibale wawo omwe adafa, kuwalemekeza ayai kunyang’ana njira zakuti asimbidwe nawo. Ndipo winango ambacita bzinthu bzakufuna kukondwesa anyamuya wawo kuti aleke kuwalanga. Tsono bzipfunziso bzakucokera ku magunkha ya Sathanibzi bzimbabweresa lini mtsangalazo caiwo. M’mbuto mwace, bzimbacitisa wanthu kukhala na thupo kwene-kwene ayai kugopa anyakufa. w19.04 14 ¶1; 16 ¶10