Junho

Ana, mai wace wa mpolofeta Samuyeri adalimbana na mabvuto yakunesa pa moyo wawo. Iye adamala magole mazinji ne kubereka. (1 Sam. 1:2) Tsono mu nthawe imweyire, Ajirayeri azinji akhakumbuka kuti mkazi akasaya kubereka ana tsoka ndipo Mulungu akumusimba lini. Tenepo, Ana akhacita manyazi kwene-kwene. (Ciy. 30:1, 2) Ndipo cinthu cinango comwe cikhacitisa moyo wa Ana kukhala wakunesa kwene-kwene, n’cakuti bayace akhana mkazi winango wakucemeredwa Penina, omwe akhanaye wana. Tsono Peninayo akhamuseka. Bzimwebzi bzikhasunamisa kwene-kwene Ana. Tenepo iye adakalipa nabzo ndipo adafika ‘[pakulira na kuleka] kudya.’ Ndipo ‘[bzikhamuwawa kwene-kwene] mu mtima.’ (1 Sam. 1:7, 10) Kodi Ana adatsangalazidwa tani? Ana adapemba kwa Yahova acimuuza momwe akhabvera mu mtima mwace. Pomwe iye adamala kupembako, adakafotokoza bvuto lacero kuna Eli, Mkulu wa Ansembe. Tenepo, Eliyo adauza Ana kuti: ‘Ndoko mwa mtendere, ndipo Mulungu wa Jirayeri akupase bzomwe wamukumbirabzo.’ Kodi mukudziwa bzomwe bzidadzacitika? Ana ‘adayenda kukadya, ndipo alibe kukhala pomwe na thupo.’ (1 Sam. 1:17, 18) Mpembo udathandiza Ana kukhala pomwe na mtendere wa mu mtima. w20.02 21 ¶4-5

Tsapanopapa, Yahova an’pfudza dzikoli. Tsono omwe an’dzapulumuka ni okha omwe ana ‘makumbukidwe yabwino yomwe yangawathandize kugumana moyo wakusaya kumala.’ (Mab. 13:48) Ndipopa timbafunambo kupalizira adzinza wathu kuti atumikire Yahova. Baba wathu wa lufoyi Yahova, ‘an’funa lini kuti munthu ali-wense adzapfudzidwe, koma an’funa kuti wense akungule.’ (2 Pe. 3:9) Tin’funika kukumbukira kuti pana njira yakuthandiza na yakusaya kuthandiza yakupalizirira bzipsa bzabwino. Mwa ciratizo, pomwe tikupalizira wanthu omwe timbawadziwa lini timbalewalewa nawo mwaulemu, koma adzinza wathu timbalewalewa nawo mwakutsudzuka. Azinji wa ifepano tikakumbukira bzomwe tidacita mbuyomu pomwe tidayamba kupalizira adzinza wathu, timbawona kuti njira yomwe tidaiphatisa basa ikhali lini yabwino. Mpsabwino kukumbukira mafala ya mpostolo Paulo pomwe tikupalizira adzinza wathu. Tikasaya kucita bzimwebzi tin’dzawakalipisa, m’mbuto mwa kuwathandiza kudziwa cadidi ca m’Bibliya. w19.08 14-15 ¶3-5

Kodi imwepo mudabva tani pomwe mudapfunza cadidi cakulewa bza Mwana wa Mulungu? Mudapfunza kuti Jezu ni munthu waciwiri wakufunika kwene-kwene pa cirengedwe centse. Iye adabvuma kupereka moyo wace ninga ntsembe yakutilombolera. Thangwe ra kudeka mtima, iye adatifera. Ndipo tikambalatiza na bzicito bzathu kuti timbakhulupira ntsembe ya Jezu, tingalekereredwe pikado zathu, tingakhale pa uxamwali na Mulungu ndipo kutsogolo tingadzatambire moyo wakusaya kumala. (Ju. 3:16) Jezu ni Mkulu wathu wa Antsembe. Tenepo, iye akufuna kutithandiza kuti tigumane phindu na ntsembe yace, na kukhala pa uxamwali bwakulimba na Mulungu. (Waheb. 4:15; 7:24, 25) Pakuti iye ni Mambo wa Umambo bwa Mulungu, Yahova an’dzamuphatisira basa kuti acenese dzina la Yahovayo, kumalisa mabvuto yentse na kubweresa bzisimbo bzakusaya kumala m’Paraizo, pano pa dziko la pantsi. (Mat. 6:9, 10; Cibv. 11:15) Jezu ni ciratizo cabwino kwa ifepano. Iye adatipfunzisa na ciratizo cace bzomwe bzimbathandauza kuphatisa basa moyo pa kucita kufuna kwa Mulungu. (Ju. 4:34) Mukabvuma bzomwe Bibliya limbapfunzisa pakulewa bza Jezu, ndiye kuti muniyamba kufuna Mwana wakufunidwa wa Mulungu. Ndipo lufoyi limwero, lingakucitiseni kuphatisa basa moyo wanu kuti mutumikire Mulungu ninga momwe Jezu adacitira. Ndipo lufoyiro ni lomwe likukucitisani kufuna kubzipereka kwa Yahova mucibatizidwa. w20.03 10 ¶12-13

Jezu adapemba mwakubwereza-bwe­reza pa nsiku yomwe mangwana ya­ce angadaphedwa. Pomwe iye adalatiza anyakupfunza wace momwe angacitire msinda wakukumbukira infa yace, iye adapembera bzizindikiro bza pa msindayo, mkate na vinyu. (1 Wak. 11:23-25) Ndipo akanati kucoka pa mbuto yomwe adacitira Paskwa, iye adapembera anyakupfunza wace. (Ju. 17:1-26) Pomwe iye pabodzi na anyakupfunza wacewo adafika ku Phiri la Mioliva nsiku imweyire usiku, iye adapemba mwakubwereza-bwereza. (Mat. 26:36-39, 42, 44) Ndipo mafala yakumalizira yomwe Jezu adayalewa akanati kufa yakhali ninga mpembo. (Lu. 23:46) Jezu adauza Yahova mu mpembo bzinthu bzense bzomwe bzingadamucitikira pa nsiku yomwe adaphedwa. Jezu adapirira mayezo yomwe akhagumana nayo thangwe akhakhulupira Baba wace ndipo adalatiza bzimwebzi mwa kumbapemba kawiri-kawiri kwa iye. Koma mwakusiyana na iye, apostolo wace adatazira kupitiriza kupemba usiku bomwe Jezu adaphuphudza ankupemba. Ninga bzakutewera bzace, iwo alibe kukhwimika pomwe anyamadulanthaka adafika. (Mat. 26:40, 41, 43, 45, 56) Tenepo, ifepano tingapitirize kukhala wakukhulupirika pa mayezo kokha tikambatewezera Jezu mwa kumbapemba ‘mwakusaya kulekeza.’ w19.04 9 ¶4-5

Yahova ambawenga kukhulupira mizimu! Mwa ciratizo, mu nthawe ya Ajirayeri, Yahova adawauza kuti: ‘Pakati panu aleke kuwoneka munthu omwe an’tentha mwana wace pamoto, nyakuvima, waku­cita matsenga, wakuwombeza, wanyanga, wakulodza, ali-wense wakubvunza nyakulewa-lewa na mizimu, wakulewa bzakutsogolo ayai ali-wense wakufuna kudziwa bza anyakufa. Pakuti ali-wense omwe an’cita bzimwebzi, ngwakunyansa pa maso pa Yahova.’ (Bzak. 18:10-12) Akristaufe tiri lini pansi pa Cakutonga comwe Yahova akhadapereka kwa Ajirayeri. Koma timbadziwa kuti iye alibe kucinja momwe akhawonera bzinthu mu nthawe imweyire pa nkhani ya kukhulupira mizimu. Yahova ambaticenjeza kuti titcenkhe kukhulupira mizimu thangwe ambadziwa kuti Sathani ambaphatisa basa njira imweyi kuti adzonge nayo wanthu. Sathani ambaphatisa basa bzamizimu kuti amwaze magunkha yace, ninga yale yakulewa kuti munthu akafa ambapitiriza kukhala na moyo ku m’mbuto inango. (Mpal. 9:5) Iye ambaphatisambo basa bzamizimu kuti ambagopswere wanthu, acitalikirana na Yahova. Iye ambacita bzimwebzi kuti wanthu ­ambakhulupire mphanvu za mizimu yakuipa m’mbuto mwakukhulupira Yahova. w19.04 21 ¶5-6

Kupswitha mwana ni pikado yomwe imbawawa kwene-kwene ndipo imbaboneresa winango. Tenepo, tin’funika kumbakhotcerera wana kwa wanthu ninga amwewa, ndipo wana omwe adacitiridwa ciwembo ninga cimweci an’funika kumbatsangalazidwa na kuthandizidwa. (Wat. 5:14) Munthu akapswitha mwana ambapswipiza mbiri ya gwere. (Mat. 5:16; 1 Pe. 2:12) Tin’funika lini kubvuma kukhala na wanthu m’gwere omwe ambacita bzinthu bzakuipa koma ankukungula lini, ndipo ankudzonga mbiri ya gwere. Tsono munthu akasaya kubvera bzakutonga, ninga kupswitha mwana, iye waphonyera atongi akulu-akulu wa boma. (Ndendemezerani na cinembo ca Mab. 25:8) Akulu wa gwere alibe udindo bwa kulanga wanthu omwe alibe kubvera cakutonga ca boma. Tsono iwo ambakhotcerera lini munthu omwe wapswitha mwana kuti aleke kupasidwa cirango na atongi wa boma. w19.05 9 ¶4-7

Yahova ni Mpfunzisi wathu Mkulu omwe ambatithandiza kulimbana na mabvuto yense yomwe timbagumana nayo pa moyo wathu. (Zai. 30:​20, 21) Fala lace limbatipasa bzense bzomwe timbafunikira kuti tikhale ‘wakuthemera’ na ‘wakukonzeka [kucita] basa liri-lense labwino.’ (2 Tim. 3:17) Tikambaphatisa basa bzipfunziso bza m’Bibliya, timbakhala wanzeru kuposa wale omwe ambakhulupira ‘nzeru za dzikoli.’ (Psal. 119:97-100) Nzeru za dziko kawiri-kawiri zimbalimbisa wanthu kuti ambabzifune wokha. Tenepo, bzingatinese kulimbana na makumbukidwe pabodzi na kucita bzinthu bzomwe wanthu wa m’dzikoli ambacita. Tsono Bibliya limbalewa kuti: ‘Samalani kuti munthu aleke kukuphatani ninga cirombo mwakuphatisa basa makumbukidwe ya wanthu na mapumpso.’ (Wakol. 2:8) Bibliya likhadafotokoza kale kuti mu nsiku zakumalizira, wanthu angadadzakhala ‘wakufunisisa kubzikondwesa.’ (2 Tim. 3:4) Kuwanda kwa matenda kupasirana yomwe yambabwera thangwe ra kugonana, ninga mwa ciratizo, SIDA bzinkulatiza kuti bzomwe dziko limbalimbikisa wanthu kuti mpsabwino kucita mpsapezi-pezi.​—2 Pe. 2:19. w19.05 21 ¶1-2; 22 ¶4-5

Sathani adapumpsa Ajirayeri kuti bzinthu bzingadawafambira bwino, angadabvuma kutewezera miyambo ya mitundu yomwe akhakhala nayo pafupi. Tsono mitundu inangoyo ikhakhulupira kuti mirungu yawo ingadawabvumbisira nvula kokha iwo angadacita cinthu cinango cakuinamata. Tenepo, wale omwe akhalibe cikhulupiro kwa Yahova akhakhulupira kuti imweyi ikhali njira yakuthawira cirala, ndipo akhacita miyambo yacikunja yakunamata mulungu wakunama Baala. Cinthu cinango comwe Sathani adaphatisa basa kuti apumpsire naco Ajirayeri ni cikhumbo cakugonana. Mitundu yacikunja ikhanamata mirungu yawo mwa kucita bzinthu bzakunyansa. Kunamata kwakunyansako kukhaphatanidza kugonana kwa amuna na akazi wokha-wokha komwe kukhacitika mu templo. Tenepo iwo akhawona kugonana kumweku kukhala kwakubvumizika! (Bzak. 23:17, 18; 1 Wam. 14:24) Ndipo iwo akhakhulupira kuti miyambo yomwe akhacita ikhalimbisa mirungu yawo kucitisa minda kucosa phoso lizinji. Bzimwebzi bzidacitisa Ajirayeri azinji kutengeka na miyambo yomwe ikhalimbisa kugonanayo, ndipo thangwe ra bzimwebzi iwo adayamba kunamata mirungu yakunama. w19.06 2 ¶3; 4 ¶7-8

Abale azinji omwe ambatumikira pa Beteli na winango omwe utumiki bwawo bwacinja, bzingakhale bzakunesa kwa abale wathuwa kusiya basa lomwe akhalifuna kwene-kwene. Penu imwepo ndimwe m’bodzi wa iwo, kodi n’ciyani comwe cingakuthandizeni pa nthawe imweyi? Pitirizani kukhala pa uxamwali na Yahova, mwa kumbawerenga Bibliya nsiku zense na kumbakumbukira bzomwe mukuwerengabzo. Ndipo penu imwepo munkutumikira m’gwere lipsa, pitirizani kucita bzense bzomwe mungakwanise kuti mupalizire bzipsa bzabwino mwakukwanira. Yahova ambakumbukira wense omwe akupitiriza kumutumikira mwakukhulupirika, napo penu iwo akukwanisa lini kucita bzomwe akhacita kale-kale. Khalani na moyo wakusaya kufuna bzizinji. Lekani kubvuma kuti bzinthu bza dziko la Sathaniri bzikutaziseni kutumikira Yahova. (Mat. 13:22) Ndipo lekani kutetekera wanthu omwe ambatumikira lini Yahova ayai axamwali na abale wanu, omwe angawoneke ninga kuti akufuna kukuthandizani mwa kulewa kuti imwepo mun’funika kukhala na kobiri zizinji kuti moyo wanu ukufambireni bwino. (1 Ju. 2:15-17.) Ifepano tin’funika kumbakhulupira Yahova, omwe ambatipasa bzomwe timbafunikira pa ‘nthawe yakuthemera.’​—Waheb. 4:16; 13:5, 6. w19.08 20 ¶4; 21-22 ¶7-8

Kodi imwepo munkugumana na bvuto lomwe linkukucitisani thupo kwene-kwene? Mpsakutsangalaza kudziwa kuti Yahova ambabvesesa momwe ifepano timbabvera tikagumana na mabvuto. Yahova ambadziwa bzomwe timbakumbuka na momwe timbabvera. (Psal. 103:14; 139:3, 4) Tenepo, tikambathemba Yahova, iye an’dzatithandiza kulimbana na mabvuto yomwe yambaticitisa thupo. Thupo lingakucitiseni kuwona kuti bvuto lanu lin’dzamala lini, ndipo bzimwebzi bzingakutayiseni mtima. Bzimwebzi bzikakucitikirani, mbakumbukirani kuti Yahova an’dzakuthandizani kulimbana na thupo lanu. Kodi iye angakuthanidizeni tani? Iye akufuna kuti mumbapembe kwa iye, mucimuuza mabvuto yanu na momwe munkubvera mu mtima mwanu. (Psal. 5:3; 1 Pe. 5:7) Tenepo, mbapembani kwa Yahova mukambagumana na mabvuto. Iye an’dzalewalewa lini namwe ninga momwe adacitira na Eliya, koma an’dzalewalewa namwe mwakuphatisa basa Fala lace Bibliya, pabodzi na gulu lace. Nkhani zomwe mumbawerenga m’Bibliya zingakutsangalazeni na kukupasani cidikhiro. Kuthumizira bzimwebzi, abale na mpfumakazi zanu za m’gwere angakulimbisenimbo.​—War. 15:4; Waheb. 10:24, 25. w19.06 16 ¶7-8

Mukambazunzidwa, mbapembani kwa Yahova ndipo mbakhuthulani ‘mtima wanu ninga madzi’ mucimufotokozera bzomwe bzimbakucitisani mantha na thupo. (Mal. 2:19) Mukambapemba na mtima wense, mun’dzabzibva kukhala pafupi na Yahova. (War. 8:8, 39) Tsimikizani kuti mapiciro yakulewa bza Umambo bwa Mulungu yan’dzakwanisikadi. (Mirew. 23:19) Penu imwepo mumbakhulupira lini kuti mapiciro ya Mulungu yan’dzakwanirisidwa, bzin’dzakhala bzakusaya kunesa Sathani pabodzi na omwe ali kumbali yace kukugopswani. (Mim. 24:10; Waheb. 2:15) Mbapambulani nthawe kuti mupfunze bza mapiciro ya Mulungu yakulewa bza Umambo bwace na cakulombolera, ndipo mbawonani bzomwe bzingakucitiseni kukhulupira kuti bzimwebzi bzin’dzacitikadi. Thangwe ranyi ni bwino kucita bzimwebzi? Ciratizo pa nkhaniyi ni Stanley Jones, omwe adamala magole manomwe ali m’kawoko thangwe ra cikhulupiro cace. Kodi n’ciyani comwe cidamuthandiza kupirira mwakukhulupirika? Iye adati: “Cikhulupiro cangu cidakhala cakulimba thangwe ndikhadziwa bza Umambo bwa Mulungu na bzomwe Umambobo bun’dzakwanirisa, ndipo ndikhapenukira lini bzimwebzi. Tenepo palibe omwe anganditazise kutumikira Yahova.” Mukakhala na cikhulupiro cakulimba pa mapiciro ya Mulungu, mun’dzamufenderera Yahova ndipo mun’dzabvuma lini kuti mantha yakutaziseni kumutumikira.​—Mim. 3:25, 26. w19.07 2 ¶1; 3-4 ¶6-7

Thangwe ranyi basa lakupfunzisa ndakufunika kwene-kwene? Thangwe ndakuti ni anyakupfunza okha wa Kristu omwe angakhale pa uxamwali na Mulungu. ­Kuthumizira bzimwebzi, wale omwe ambatewezera Kristu ambakhala na moyo wabwino kuyambira tsapano ndipo kutsogolo an’dzakhala na moyo wakusaya kumala. (Ju. 14:6; 17:3) Kulewa cadidi, Jezu adatipasa basa likulu kwene-kwene, koma tiri lini tekha pa basalo. Ninga momwe mpostolo Paulo adanembera, ifepano ‘ndife anyabasa anzace wa Mulungu.’ (1 Wak. 3:9) Tenepo, ni mwayi ukulu kwa wanthu wakuperewerafe, Yahova na Jezu kutipasa basa limweri! Ndipo kuthandiza wanthu kuti akhale anyakupfunza wa Kristu, kungatithandize kukhala na cikondweso cikulu kwene-kwene. Cinthu cakuyamba comwe tin’funika kucita pa nkhani ya kupfunzisa, ni kufufudza wanthu omwe akufunisisa kupfunza bza Yahova. Ndipo tikambauza bza Yahova munthu ali-wense omwe timbagumana naye, timbalatiza kuti ndifedi Mboni za Yahova. Ifepano timbalatiza kuti ndife Akristau wacadidi, tikambabvera lamulo lakuperekedwa na Kristu lakupalizira bzipsa bzabwino. w19.07 15 ¶3-5

Cinthu cakuyamba comwe wanthu azinji ambadekedwa naco ni malango ya nzeru yomwe yali m’Bibliya. Mpfumakazi inango ya ku Nova York, yomwe imbapalizira wanthu omwe ambalewalewa cirewedwe ca cimandarimi, idalewa kuti: “Ndimbacita nyongo yakulatiza wanthuwo kuti ndimbawakumbukira ndipo ndimbawatetekera. Ndikazindikira kuti mbalendo omwe abwere tsapanopapa, ndimbawabvunza kuti: ‘Kodi moyo wanu unkufamba tani m’dziko lacirendoli? Mwagumana kale basa? Kodi wanthu wa kuno ankukusamalirani bwino?’” Nthawe zinango, mibvunzoyi imbathandiza mpfumakaziyi kuyambisa nkhani zinango zomwe Bibliya limbapfunzisa. Ndipo bzikafunika, mpfumakaziyo imbabzunza pomwe kuti: “Kodi imwepo mukuwona kuti pana cinthu comwe cingathandize wanthu kuti ambabverane? Kodi mungafune kuti ndikulatizeni nfundo inango ya m’Bibliya? Iyo imbati: ‘Ciyambi ca ndewo ciri ninga kuboola damu kuti madzi yabule, tenepo phiringu likanati layambika thawani.’ Kodi mukukumbuka kuti malangoya yangatithandize kukhala bwino na winango?” (Mim. 17:14) Maceza ninga yamweya yangatithandize kuwona penu munthuyo angafune kudzazungiridwa pomwe. w19.07 23 ¶13

Abale omwe ambauzidwa kuti akatumikire ku mbuto inango angafunikirembo kudziwa momwe angalipirire mtsonkho. Pinango iwo ayai m’bale wawo angakhale akuduwala. Ayai pinango angakhale asunama thangwe ra kufedwa m’bale wawo. Ndipo nthawe zinango angakhale akudandaula axamwali omwe akhanawo pomwe akhacita utumiki bwa nthawe zense, napo kuti palibe munthu omwe akudziwa. Tenepo pangatenge nthawe kuti iwo ayebwe bzinthu bzimwebzi. Na ciratizo canu cabwino, mungawathandize kuzolowerana na moyo watsapano. Mpfumakazi inango yomwe idatumikira kwa magole mazinji ku dziko lacirendo, idalewa kuti: “Ku gawo komwe ndikhatumikira pakuyamba, ndikhacitisa mapfunziro ya Bibliya nsiku zense. Tsono ku gawo lipsa, ndikhagumana lini mpata wakufungula vesi la Bibliya ne kulatiza munthu vidiyo mu utumiki bwakumunda. Koma abale wa gwere lipsa lomwe ndikhatumikira akhandiuza kuti ndiyende nawo pabodzi ku maulendo yakubwereza na mapfunziro yawo. Pomwe ndidawona kukhwimika na nyongo ya abalewo pakucitisa mapfunziro ya Bibliya, ndidayamba kuzolowerana na gawolo. Ndidapfunza momwe ndingayambisire maceza na wanthu wa m’gawolo pa ulendo bwakuyamba. Bzimwebzi bzidandicitisa kuyamba pomwe kukhala wakukondwa.” w19.08 22 ¶10; 24 ¶13-14

Ninga momwe adacitira Evodiya na Sintike, bzingatinese kumbafuna abale. Mwa ciratizo, pinango bzingatiwawe tikawona kuti m’bale wayebwa kutithandiza kupsaira mu Nyumba ya Umambo. Ndipo tikambakumbukira bzinthu bzense bzomwe abale ambatiphonyera, tin’dzasunama kwene-kwene, ndipo lufoyi lathu kwa iwo lin’dzacepa. Penu m’gwere mwanu muna m’bale ayai mpfumakazi yomwe mudapitana nayo mafala, bzingakhale bwino kukumbukira nfundo iyi: Yahova ambadziwa bzakuphonya bzathu pabodzi na bza abale wathu. Koma napo bziri tenepo, iye akupitiriza kutifuna. Na thangwe limweri, ifepano tin’funika kutewezera lufoyi la Yahova na kumbawona bzinthu bzabwino bzomwe abale wathu ambacita. Tenepo, tikambacita nyongo yakumbafuna abale wathu tin’dzakhala wakuphatana nawo kwene-kwene.​—Waf. 2:1, 2. w19.08 9-10 ¶7-8

Yahova ambafuna wanthu wakubzicepswa. Ndipopa iye ambakomedwa ndipo ambafuna kukhala nawo pa uxamwali. Koma ‘nyakubzikuza iye ambamudziwa na patali.’ Tensenefe timbafuna kukondwesa Yahova na kukhala naye pa uxamwali. Tsono kuti bzimwebzi bzikwanisike, tin’funika kukhala wakubzicepswa. Munthu wakubzicepswa ambabziwona lini kukhala wapadzulu kuposa winango ndipo ambabzikuza lini. Bibliya limbalewa kuti munthu wakubzicepswa ambadziwa kuti Yahova n’gwapadzulu kwene-kwene, ndipo ambazindikira kuti alipo wanthu winango omwe ambadziwa bzinthu kuposa iye. (Waf. 2:3, 4) Wanthu winango ambawoneka ninga wakubzicepswa, koma ndiwo lini. Pinango iwo angawoneke tenepoyo thangwe ra kukhala munthu wa manyazi. Ayai pinango pomwe akhali wana abereki wawo adawapfunzisa momwe angalemekezere winango. Koma mu mtima mwawo angakhale wakubzikuza kwene-kwene. Tsono nsiku ziwande ayai zicepe, iwo an’dzalatiza momwe aliri.​—Lu. 6:45. w19.09 2 ¶1, 3-4

‘Bzipsa bzabwino [bzomwe] Mbuya wathu Jezu’ adapfunzisa, bzimbaphatanidza cadidi cense. Ifepano timbabvera bzipsa bzabwinobzo tikambabziphatisa basa pa moyo wathu. Kubverako kumbaphatanidza kuikha Umambo bwa Mulungu pa mbuto yakuyamba, kuphatisa basa mitemo yakulungama ya ­Mulungu na kudziwisa winango bza Umambobo. (Mat. 6:33; 24:14) Ndipo kumbaphatanidzambo kuthandiza Akristau wakudzozedwa, omwe ambacita mabasa yakusiyana-siyana. (Mat. 25:31-40.) Tsapanopapa iwo anibwezera ‘mabira manango’ kudeka mtima komwe adawalatiza. (Ju. 10:16) Kodi aniwabwezera tani? Nkhondo ya Armagedo ikanati kuyamba, Akristau wense wakudzozedwa wakukwana 144.000, an’dzakhala ali kudzulu ninga wana wakusaya kufa wa Mulungu. Iwo an’dzacita mbali ya anyankhondo wakudzulu omwe an’dzapfudza Gogi na kukhotcerera ‘thimu likulu la wanthu’ omwe ambatumikira Yahova. (Cibv. 2:26, 27; 7:9, 10) Mwakusaya kupenukira, thimulo lin’dzatenda kwene-kwene mwayi omwe lidakhala nawo wakuthandizira Akristau wakudzozedwa wa Yahova pomwe akhali pa dziko la pansi! w19.09 12-13 ¶16-18

Thangwe ranyi tingalewe kuti basa lomwe Jezu adatipasa limbatilimbisa? Thangwe tina anyakunyang’anira ­wabwino. Yahova ni Nyakunyang’anira wathu Mkulu ndipo iye ngwakuuma lini mtima. M’mbuto mwace iye ambatenda kwene-kwene basa lomwe timbamucitira. (Waheb. 6:10) Iye ambatipasa mphanvu zomwe timbafunikira kuti timbakwanirise udindo bwathu. (2 Wak. 4:7; Wag. 6:5) Jezu, Mambo wathu, ambatipasa ciratizo cabwino ca momwe tingacitire bzinthu na winango. (Ju. 13:15) Ndipo akulu wa m’gwere omwe ambatisamalira, ambatewezera Jezu, ‘m’busa mkulu.’ (Waheb. 13:20; 1 Pe. 5:2) Iwo ambatikhotcerera na kutipfunzisa, ndipo ambacita nyongo yakukhala wakudeka mtima, ambatitsangalaza na kutilimbisa. Ndipo ifepano tina axamwali wabwino. Palibe wanthu winango omwe ambacita basa labwino kuposa lomwe timbacita, ayai omwe ana axamwali wabwino kuposa omwe ifepano tinawo. Mwa ciratizo, kumbukirani mwayi omwe ifepano tinawo, wakuphata basa pabodzi na abale na mpfumakazi omwe ambabziwona lini kukhala wakufunika kwene-kwene kuposa winango. Iwo ana maluso kwene-kwene, koma mbakubzicepswa ndipo ambawona winango kukhala wakuwaposa. Iwo ambandotiwona lini ninga anyabasa anzawo, koma ambatiwonambo ninga axamwali. Lufoyi lawo ndamphanvu kwene-kwene ndipo mbakukonzeka kutifera! w19.09 20 ¶1; 23 ¶12-14

Mu Cenjezoli mpostolo Paulo adalewa bza ‘ntsiku ya Yahova.’ (1 Wat. 5:1-6) Pa nkhani imweyi, ntsiku ya Yahova in’dzayambira pa kumukiridwa kwa ‘Babulo Mkulu,’ boma la pa dziko lentse la pantsi la bzipembedzo bzakunama ndipo in’dzamalira pa Armagedo. (Cibv. 16:14, 16; 17:5) Paulo adalewa bzomwe tin’funika kucita kuti tikonzekere ‘nsiku ya Yahova.’ Tin’funika lini ‘kugona ninga momwe winango akucitira.’ Koma tin’funika ‘kukhala wakupenya’ na kupitiriza kukhala tceru kuti titcenkhe kupitira nkhani za ndale za m’dzikoli. Thangwe tikazipitira nkhani zandale, bzin’dzakhala bzakusaya kunesa kucita ‘mbali ya dziko.’ (Ju. 15:19) Ifepano timbadziwa kuti ni Umambo bwa Mulungu bokha bomwe bungabwerese mtendere pa dziko la pansi. Tin’funika kuthandiza wanthu winango kuti apfunze bzomwe Bibliya limbalewa pa nkhani ya bzomwe bzin’dzacitika kutsogolo. Cikadzayamba citsautso cikulu, nthawe yakuti wanthu adzasankhule kutumikira Yahova in’dzawoneka lini. Ndipopa tin’funika kuwapalizira mwakamfulumize! w19.10 8 ¶3; 9 ¶5-6

Pomwe iwo adamala kunemba mpukutuyo, Jeremiya adakumbira xamwali wace Baruke kuti awerengere wanthu mafala yomwe yakhali pa mpukutuyo. (Jer. 36:5, 6) Kuwerengera wanthu mafalayo ikhali ngozi ikulu-yense, koma napo bzikhali tenepo, Baruke adakhwimika ndipo adayawerenga. Kodi mukukwanisa kukumbukira momwe Jeremiya adabvera pomwe adawona Baruke akupita mu templo, aciyamba kuwerengera wanthu mafalayo? (Jer. 36:8-10) Pomwe nduna za ku Juda zidabva bzomwe Baruke adacita, zidacemera Barukeyo kuti aziwerengere mpukutuyo mwakukuwa. (Jer. 36:14, 15) Pomwe ndunazo zidamala kubva, zidayenda kukauza Mambo Jehoyakimu mafala yomwe Jeremiya adanemba pa mpukutuyo. Thangwe ra nsisi, ndunazo zidauza Baruke kuti: ‘Iwepo pabodzi na Jeremiya ndokoni, ndipo mukabisalike kuti munthu ali-wense aleke kukuwonani pa mbutoyo.’ (Jer. 36:16-19) Yamweya yakhali malango yakuthandiza kwene-kwene! Pomwe Mambo Jehoyakimu adabva mafala yomwe yakhali mu mpukutu omwe Jeremiya adanemba, adakalipa kwene-kwene ndipo adatentha mpukutuyo acitonga kuti Jeremiya na Baruke aikhidwe m’kawoko. Koma Jeremiya adatenga mpukutu unango acipasa Baruke. Ndipo Jeremiya adauza Barukeyo kuti anembe ‘mafala yense yomwe yakhali pa mpukutu omwe udatenthedwa na Jehoyakimu, mambo wa Juda.’​—Jer. 36:26-28, 32. w19.11 3-4 ¶4-6

Yahova angakhale ciri-cense comwe akufuna kuti akwanirise cakulinga cace. Mwa ciratizo, Yahova adakhala kale Mpfunzisi, Nyakutsangalaza na Mpalizi. Bzimwebzi ni bzinthu bzakucepa pa bzomwe Yahova adakhala kale. (Zai. 48:17; 2 Wak. 7:6; Wag. 3:8) Koma iye ambaphatisambo basa wanthu kuti akwanirise cakulinga cace. (Mat. 24:14; 28:19, 20; 2 Wak. 1:3, 4) Ndipo Yahova angapase mtumiki wace ali-wense nzeru na mphanvu zomwe angafunikire kuti acite kufuna kwace. Ninga momwe adziwi winango ambafotokozera, bzense bzomwe Yahova ambacita, bzimbabverana na thandauzo la dzina lace. Tensenefe timbafuna kuti Yahova atiphatise basa pakukwanirisa kufuna kwace, koma winango angapenukire kuti mbakufunika kwa iye. Thangwe ranyi? Thangwe ra kukalamba, kusaya luso ayai kutazira kucita bzinthu bzinango pa moyo wawo. Winango angawone kuti bzomwe akucita mpsakukwanira, ndipo an’funika lini kuthumizira pomwe bzakucita. w19.10 20 ¶1-2

Kufunisisa bzinthu bzakuthupi kungatepese cikhulupiro cathu ndipo kungaticitise kusiya kutumikira Yahova. Mpostolo Paulo adalewa kuti: ‘Palibe munthu wakutumikira ninga mcikunda omwe ambacita basa la malonda na wanthu winango pamoyo wace na cakulinga cakukondwesa omwe adamupitisa basa la ucikundalo.’ (2 Tim. 2:4) Acikunda wa Roma akhabvumizidwa lini kuphata basa linango lomwe likhabverana lini na ucikundabo. Ifepano tiri ninga acikunda wabwino, ndipo cinthu cakufunika kwene-kwene comwe tin’funika kucita ni kukondwesa atsogoleri wathu, Yahova na Jezu. Bzimwebzi mpsakufunika kwene-kwene kuposa cinthu ciri-cense comwe tingakhale naco m’dziko la Sathaniri. Ifepano timbaphatisa basa mphanvu na nthawe yathu kuti titumikire Yahova na kusamalira sikuti kokha mkhotco wa cikhulupiro cathu, koma timbasamalirambo bzifuzo bzense bza nkhondo yakulimbana na Sathani pabodzi na madimonyo yace. Ifepano tin’funika kukhala wakupenya nthawe zense. Thangwe ranyi? Mpostolo Paulo adacenjeza kuti ‘omwe akufunisisa kukhala wakudala’ an’dzasoceresedwa pa ‘cikhulupiro.’​—1 Tim. 6:9, 10. w19.11 17 ¶12, 14-15

Ikanati kufika ‘nsiku ya Yahova’, atongi wa maboma an’dzalewa kuti ‘mtendere na cisungiko.’ (1 Wat. 5:1-3, 6) Mwakubverana na 1 Watesalonika 5:2, ‘nsiku ya Yahova’ imbaimira ‘citsautso cikulu.’ (Cibv. 7:14) Kodi tin’dzadziwa tani kuti citsautso cikulu cayamba kucitika? Bibliya limbalewa kuti pan’dzabveka mafala yomwe yan’dzakhala ninga cizindikiro ca kuyambika kwa citsautso cikuluco. Bibliya lidaleweratu kuti mafala yakuti ‘mtendere na cisungiko’ yan’dzakwanirisidwa. Thangwe ranyi atongi wa maboma an’dzalewa mafalaya? Kodi atsogoleri wa bzipembedzo an’dzayalewambo? Pinanego-pense. Napo bziri tenepoyo, mafala yakuti ‘mtendere na cisungiko’ kun’dzakhala kunama kunango kwa madimonyo. Tsono kunama kumweku kun’dzabweresa ngozi ikulu, thangwe azinji an’dzakumbuka kuti mbakukhotcerereka, koma cadidi n’cakuti nthawe imweyi in’dzakhala ciyambi ca citsautso cikulu comwe cikanati kucitika pa moyo wa wanthu. Ninga momwe Bibliya limbalewera, ‘nthawe imweyo cipasu-pasu cin’dzawafikira mwakudzidzimusa, ninga kuwawidwa kwa mkazi omwe akufuna kubereka.’ Tsono n’ciyani cin’dzacitika na atumiki wakukhulupirika wa Yahova? Pakuti iwo ambadziwa lini nsiku yomwe citsautso cikulu cin’dzayambika, pinango an’dzadzidzimuka thangwe cin’dzayamba mwadzidzidzi, koma an’dzakhala adakonzeka kale. w19.09 9 ¶7-8

Pakucita cakusankhula mbalatizani kuti muna bzakulinga. Mukambalatiza kuti muna bzakulinga, bzin’dzakunesani lini kubzikwanirisa. Mwa ciratizo, pinango imwepo mungasankhule kumbawerenga Bibliya mwakukhazikika. Koma mukakhala mulibe ndandanda bzinganese kukwanirisa cakulinga canuco. Ciratizo cinango n’ca akulu wa gwere omwe asankhula kucita ulendo bwa ubusa mwakukhazikika, koma na kupita kwa nthawe, iwo akuteweza lini cakusankhula cawoco. Kuti bziwafambire bwino, iwo an’funika kubzibvunza mibvunzo ninga iyi: “Kodi tanemba kale madzina ya abale na mpfumakazi zomwe zin’funikira ulendo bwa ubusa? Kodi tasankhula kale nsiku na nthawe yomwe tingadzawazungire?” Ndipo mbacitani bzomwe mungakwanise. Palibe munthu omwe ana nthawe, mphanvu ayai bzinthu bzomwe angaphatise basa kuti acitire bzense bzomwe angafune. Ndipopa, tin’funika kumbacita bzinthu bzomwe tingakwanise. Tenepo, mukawona kuti bzikukunesani kukwanirisa cakusankhula canu, cinjani. w19.11 29 ¶11-12

Bukhu la Zaiya 65:21-23, limbafotokoza momwe moyo un’dzakhalira pano pa dziko la pantsi kutsogoloku. Wanthu winango ambakumbuka kuti m’paraizo palibe munthu an’dzaphata basa, koma an’dzandokhala basi. Tsono makumbukidwe yamweya njacadidi lini, thangwe Bibliya limbalewa kuti wanthu wa Mulungu ‘an’dzapfatsa na mabasa yakuphatidwa na manja yawo.’ Tenepo, tina citsimikizo centse cakuti, kuphampha kwa Utongi bwa Kristu bwa magole 1.000, ‘cirengedwe cin’dzatsudzulidwa ku ukapolo bwa kubvunda, cicidzakhala na ufulu bwa mbiri ya wana wa Mulungu.’ (War. 8:21) Mu nthawe ya Ajirayeri, Yahova adapereka lamulo lakuti wanthu wace ambakoye Ntsiku ya Malinkhuma, kuti ambapume pa mabasa yawo ya ntsiku na ntsiku, aciphatisa basa nthawe ya Malinkhumayo kuti anamate Yahovayo. Tsono iye an’funa kuti wanthu wace adzacite bzibodzi-bodzibzi mu Utongi bwa Jezu bwa Magole 1.000. Bzimwebzi bzikulatiza kuti pan’dzakhala na nthawe yakunamata Mulungu. Ndipo kunamata Mulungu n’kwakufunika kwene-kwene kuti tikhale wakukondwa, ndipo m’dziko lipsa tin’dzakhala na nthawe yakucita bzimwebzo. Kulewa mwakusaya kupenukira, ifepano tin’dzakhala wakukondwa kwene-kwene thangwe tin’dzaphata basa lakutsangalaza na kutumikira Mulungu mkati mwa Utongi bwa Kristu bwa magole 1.000. w19.12 12 ¶15; 13 ¶17-18

‘Kukhomereza’ kumbathandauza kupfunzisa (cinthu) mwakubwereza-bwereza. Tenepo, abereki an’funika kumbakhala na nthawe yakumbaceza na wana wawo. Nthawe zinango bzingakhale bzakunetesa kwa abereki kubwerezera-bwerezera malango yabodzi-bodzi kwa wana wawo. Napo bziri tenepo, abereki an’funika kuwona kuti ni mwayi kuthandiza wana wawo kubvesesa na kuphatisa basa Fala Mulungu. Tenepo adziweni bwino wana wanu. Kapitulo 127 ya bukhu la Psalymo imbandendemezera wana na misewe. (Psal. 127:4) Misewe imbakonzedwa na bzinthu bzakusiyana-siyana ndipo inango imbakhala ikulu, inango ing’ono, mpsibodzi-bodzimbo na wana, iwo ambakhala wakusiyana-siyana. Tenepo, abereki an’funika kudziwa momwe angapfunzisire mwana ali-wentse payekha. Banja linango la ku Israel lomwe lidakwanisa kulera bwino wana wawo awiri kuti atumikire Yahova, lidafotokoza bzomwe bzidawathandiza. Iro lidati: “Ifepano tikhacitisa pfunziro la Bibliya mwana ali-wentse payekha.” Kulewa cadidi, banja liri-lentse lingasankhule bzomwe lingapfunze na wana wawo. w19.12 26-27 ¶18-20

Tikakhala pa mabvuto, mpsabwino kukhala na axamwali omwe angatithandize! Ryan, omwe adafedwa pai wace pa ngozi ya pa nsewu, adalewa kuti: “Munthu akakhala akubonera, ambakwanisa lini kucita bzinthu bzomwe akhabzicita kale ntsiku na ntsiku.” Iye adalewa pomwe kuti: “Bzimbakhala bzakutsangalaza kwene-kwene munthu akakuthandiza, bziribe basa kuti thandizolo ndakucepa.” Tenepo, kumbukirani kuti imwepo mun’dzakhala mtsangalazo ukulu kwene-kwene mukambathandiza winango napo pa bzinthu bzakucepa. Nyakupfunza winango wakucemeredwa Marko, omwe adakhala na moyo mu nthawe ya Jezu, akhana bzinthu bzizinji bzakucita pa basa la Yahova. Napo bzikhali tenepo, iye adapambula nthawe kuti atsangalaze mpostolo Paulo, ndipo Pauloyo akhakhala wakutsudzuka kukumbira Marko kuti amuthandize. Angela, omwe adaphedwa wacibale wace, ambatendambo kwene-kwene thangwe ra kukhala na axamwali wakukonzeka kumutsangalaza ninga momwe akhacitira Marko. Iye adalewa kuti: “Xamwali omwe ambafuna kuthandiza ambakhala wakufikirika. Iye ambalatiza padeca kuti an’funadi kukuthandiza ndipo ambakumbuka lini kawiri kuti apereke thandizolo.” Tenepo, tingabzibvunze kuti: ‘Kodi abale ambandiwona ninga munthu wakukonzeka kutsangalaza na kuthandiza winango na bzicito?’ w20.01 11-12 ¶14-16

Kodi Mkristau angadye tani na kumwa bzizindikiro ‘mwakusaya kuthemera?’ Iye angacite bzimwebzo akasaya kuteweza malamulo yakulungama ya Mulungu. (Waheb. 6:4-6; 10:26-29) Tenepo, anyakudzozedwa ambadziwa kuti an’funika kupitiriza kukhala wakukhulupirika kwa Mulungu, kuti adzatambire mabai-bai yawo ya kuyenda kudzulu. (Waf. 3:13-16) Mzimu wakucena wa Yahova umbathandiza atumiki wace kukhala wabzicepesa, sikuti wakubzikuza. (Wayef. 4:1-3; Wakol. 3:10, 12) Tenepo, anyakudzozedwa ambabziwona lini kukhala wakufunika kwene-kwene kuposa winango. Iwo ambadziwa kuti Yahova ambapasa mzimu wakucena atumiki wace wentse mwakundendemerana na iwo. Ndipo iwo ambabziwona lini kuti ambabvesesa kwene-kwene cadidi ca m’Bibliya kuposa winango. Ndipo iwo ambauza lini munthu kuti wadzozedwa nakuti an’funika kuyamba kudya mkate na kumwa vinyu pa Cikumbuso. M’mbuto mwace, iwo mbakubzicepesa ndipo ambadziwa kuti ni Yahova yekha omwe ambacemera munthu kuti akakhale kudzulu. w20.01 27-28 ¶4-5

Yahova akufuna kuti timufenderere na kumbalewalewa naye. Iye ambafuna kuti timbalimbikire kupemba ndipo nthawe zentse ambatitetekera. (War. 12:12) Ndipo iye ambaneta lini kutitetekera. Tenepo, ifepanombo timbamutetekera mwa kumbawerenga Bibliya pabodzi na mabukhu yanango yomwe yambatithandiza kubvesesa Bibliyalo. Ndipo timbamutetekerambo mwa kukhala tceru pa mitsonkhano yathu. Ninga momwe maceza yabwino yambathandizira wana kufenderera abereki wawo, maceza yabwino yomwe timbacita na Yahova, yambatithandiza kupitiriza kumufenderera. Kumbukirani momwe iriri mipembo yomwe mumbacita kwa Yahova. Iye ambafuna kuti timbamuuze makumbukidwe yathu na momwe timbabvera mu mtima mwathu. (Psal. 62:8) Tingacite bzimwebzo mwa kubzibvunza kuti: ‘Kodi mipembo yangu imbakhala ibodzi-bodzi ayai nimbandobwerezera-bwerezera, ayai imbacokera pantsi pa mtima?’ Tikupenukira lini kuti imwepo mumbafuna kwene-kwene Yahova, ndipo mun’funa kupitiriza kukhala naye pa uxamwali bwakulimba. Tsono kuti mukwanise kucita bzimwebzi, mun’funika kumbalewalewa naye kawiri-kawiri. Tenepo, muwoneni Yahova kukhala xamwali wanu wakukhulupirika, ndipo mbamuuzani bzentse bzomwe bzimbakukondwesani na bzomwe bzimbakucitisani thupo. Ndipo tsimikizirani kuti iye angakuthandizeni. w20.02 9 ¶4-5

Yahova adapasa akulu wa gwere udindo bwakusamalira wanthu wace. Akuluwo angapfunze bzizinji na Nehemiya mwakutewezera momwe iye adasamalirira wanthu wa Mulungu. Ninga mtongi wa Juda, Nehemiya akhana udindo bukulu. (Neh. 1:11; 2:7, 8; 5:14) Kumbukirani mayezo yomwe Nehemiya adagumana nayo. Iye adadziwa kuti Ajuda akhalemekeza lini templo ndipo akhapereka lini mtsonkho mwakubverana na cakutonga comwe cikhalewa kuti wanthu ambapereke mtsonkho kwa Alevi. Ndipo kuthumizira bzimwebzi, Ajuda akhateweza lini cakutonga ca Malinkhuma, ndipo winango wa iwo akhadalowola akazi omwe akhatumikira lini Yahova. Kodi Nehemiya angadalimbana tani na mayezo ninga yamweya? (Neh. 13:-30) Nehemiya alibe kuphatisa basa udindo bwace kuti angingimize wanthu wa Mulungu kuti abvere nzeru zace. M’mbuto mwace, iye adapemba kwa Yahova kuti amutsogolere. Ndipo adapfunzisa mbumbayo Cakutonga ca Mulungu. (Neh. 1:4-10; 13:1-3) Kuthumizira bzimwebzi, Nehemiya adakhala wakubzicepswa ndipo ­adaphata basa pabodzi na Ajuda winango pakukonza litsito la Jeruzalemu.​—Neh. 4:5. w19.09 16 ¶9-10