Julho

Wanthu winango akalewa ayai akacita bzinthu bzomwe bzingatikalipise, tingakhale na thupo. Ndipo bzingakhale bzakuwawa kwene-kwene akakhala kuti munthu omwe watikalipisayo ni xamwali wa ponda ndipondembo ayai wacibale wathu. Pakulimbana na msunamo, onani bzomwe tingapfunze na ciratizo ca m’Bibliya ca Ana omwe akhaboneresedwa na mkazibza wace. (1 Sam. 1:12) Ninga Ana, ifepanombo tingapembe kwa Yahova ticimala nthawe izinji ndipo mu mpembomo tingamuuze bzomwe bzimbaticitisa thupo na bzomwe bzimbatipasa mantha. Ndipo tikambapemba, nthawe zinango mafala yathu yangacoke lini yentse bwino-bwino. Nthawe zinango, tingauze Yahova bzinthu bzomwe bzikuticitisa thupo uko tikulira. Napo bziri tenepo, Yahova an’dzaneta lini kutitetekera. Kuthimizira bzimwebzi, tikagumana na mabvuto, tin’funika kukumbukira malango ya mpostolo Paulo yomwe yambagumanika pa Wafiripo 4:6, 7. Pa mavesiya, mpostolo Paulo adatiuza kuti tin’funika kumbatenda Yahova mu mpembo. Ifepano tina bzinthu bzizinji bzomwe tingatendere Yahova, tingamutende thangwe rakuti adatipasa moyo, cirengedwe, lufoyi lace lakukhulupirika na cidikhiro comwe tinaco cakudzakhala na moyo wakusaya kumala. w20.02 21 ¶3; 22 ¶6

Kulewalewa ni mphaso yomwe Yahova adatipasa. (Kuf. 4:10, 11; Cibv. 4:11) Ndipo mwakuphatisa basa Fala lace, lomwe ni Bibliya, iye ambatithandiza kudziwa momwe tingaphatisire bwino basa mphasoyi. Ifepano ntsiku zentse tin’funika kukhala wakukonzeka kumbalewalewa bza Yahova na Umambo bwace. (Mat. 24:14; War. 10:14) Tikacita bzimwebzi, timbakhala tikutewezera Jezu. Libodzi mwa mathangwe yomwe yadacitisa Jezu kubwera pano pa dziko la pantsi, likhali lakuuza winango cadidi cakulewa bza Baba wace. (Ju. 18:37) Tenepo, tin’funika kumbawonesesa momwe timbalewalewera. Ndipo tikambauza winango bza Yahova, tin’funika kumbawauza ‘mwakuderekha na mwa ulemu.’ Tin’funikambo kumbalatiza kuti timbabvesesa momwe ambabvera na kulemekeza bzomwe ambakhulupira. (1 Pe. 3:15) Bzimwebzi bzin’dzacitisa kuti tikwanise kulewalewa nawo mwakusaya kunesa, na kuwapfunzisa cadidi ca m’Bibliya acitokonyedwa mitima yawo. Akulu wa gwere akawona kuti m’bale ayai mpfumakazi akufunikira malango, iwo an’funika lini kuzeza kumupasa malangoyo. Napo bziri tenepo, iwo an’funika kupereka malangoyo kuna m’baleyo ayai kuna mpfumakaziyo ikakhala kuti iri payokha. Akulu ambafuna kuti bzinthu bzicitike mwa cintsintsi, ndipopa iwo ambasankhula nthawe yakuthemera kuti aceze na munthu akafuna kumupasa malango. Koma pakulewalewa na munthuyo, akuluwo ambalewalewa naye mwa ulemu. w20.03 18-19 ¶2-4

Kodi tingambapembere bzinthu bziponi? Ifepano tingapembe kwa Yahova kuti ‘[athumizire] cikhulupiro’ cathu. (Lu. 17:5; Ju. 14:1) Ndipo ifepano timbafunikira cikhulupiro camphanvu thangwe Sathani akufuna kuyeza mteweri ali-wense wa Jezu. (Lu. 22:31) Kodi cikhulupiro cingatithandize tani? Cingatithandize kucita bzense bzomwe tingakwanise kuti tilimbane na mabvuto yomwe tinkugumana nayo, ndipo tikacita bzimwebzo, cikhulupiro comwe tinaco kwa Yahova cin’dzatithandiza kumalisa thupo lomwe tingakhale nalo thangwe ra kudziwa kuti iye an’dzamalisa mabvuto yense pa nthawe yakuthemera. Ndipo thangwe ra kukhulupira kuti iye angamalise mabvutoyo kuposa momwe ifepano tingayamalisire, timbakhala na mtendere wa mu mtima. (1 Pe. 5:6, 7.) Mpembo umbatithandiza kupitiriza kukhala na mtendere wa mu mtima, bziribe basa mabvuto yomwe tingagumane nayo. Onani ciratizo ca m’bale Robert, omwe tsapano ana magole pafupi-fupi 80, ndipo ankutumikira ninga mkulu wa gwere. Iye adalewa kuti: “Malango ya m’cinembo ca Wafiripo 4:6, 7, yadandithandiza kulimbana na mayezo mazinji pa moyo wangu. Mwa ciratizo, ndikhalimbana na bvuto la cuma. Ndipo nthawe zinango ndidaima kutumikira ninga mkulu wa gwere.” Kodi n’ciyani comwe cidathandiza Robert kupitiriza kukhala na mtendere wa mu mtima? Iye adalewa kuti: “Thupo likandibwerera, ndimbapemba kwa Yahova mwakusaya kucedwa. Ndimbakhulupira kuti ndikapemba mwakubwereza-bwereza, ndimbakhala na mtendere wa mu mtima.” w19.04 9-10 ¶5-7

Kupswitha mwana ni pikado ikulu kwene-kwene pamaso pa Mulungu. Munthu akaphonyera mwanzace, ambakhala ankuphonyera Yahova. Kumbukirani bzomwe cikhalewa Cakutonga comwe Mulungu akhadapasa Ajirayeri. Cakutongaco cikhalewa kuti munthu akabera ayai akapumpsa nyakufendererana naye nyumba, akhakhala wakusaya ‘kukhulupirika kwa Yahova,’ bzomwe bzikuthandauza kuti akhaphonyera Yahovayo. (Mwam. 6:2-4) Kulewa mwakusaya kupenukira, munthu akapswitha mwana ambakhala ankudzonga ufulu bwa mwanayo bwakukhala wakukhotcerereka, ndipo kwa Mulungu ni kusaya kukhulupirika. Ndipo munthu omwe ambadziwika ninga Mboni ya Yahova akapswitha mwana ambapswipiza mbiri ya Yahovayo. Ndipopa tin’funika kudziwa kuti kupswitha mwana ni pikado ikulu pamaso pa Mulungu ndipo tin’funika kumbanyansidwa nayo. Nkhani za mu Nsanza ya Mulindiri na Galamukani! zimbalewa bzomwe wanthu omwe adapswithidwa angacite kuti amalise msunamo wawo, bzomwe winango angacite kuti awathandize na kuwalimbisa na momwe abereki angakhotcerere wana wawo. Ndipo gulu lathu limbapereka malango ya m’Bibliya kwa akulu wa gwere momwe angasamalirire pikado yakupswitha mwana. Pambuyo pa kupereka malangoyo gululo limbapenda kawiri-kawiri kuti liwone penu akuluwo akuyaphatisa basa ayai penu pangafunike kucinja malangoyo. w19.05 9-10 ¶8-9

Fala la Mulungu liri ninga mphanga yakuthwa yomwe ingakwanise kugwata magunkha yomwe Sathani ambamwaza. (Wayef. 6:17) Mwa ciratizo, Fala la Mulungu limbagaziratu gunkha lakuti anyakufa angakwanise kulewalewa na wanthu omwe ana moyo. (Psal. 146:4) Ndipo limbatiuzambo kuti Yahova yekha ndiye omwe ambakwanisa kudziwa bzakutsogolo. (Zai. 45:21; 46:10) Tenepo, tikambawerenga Fala la Mulungu na kumbalikumbukira nsiku zense, ifepano tin’dzakhala wakukonzeka kulamba na kuwenga magunkha yomwe yambamwazidwa na mizimu yakuipa. Lekani kumbacita bzinthu bzomwe bzimbabverana na kukhulupira mizimu. Akristau wacadidife timbacita lini bzamizimu bza mtundu uli-wense. Mwa ciratizo, timbayenda lini kwa anyabezi, ndipo timbayezera lini kulewalewa na anyakufa. Kuthumizira bzimwebzi, ifepano timbatcenkha kucita miyambo yomwe imbabverana na cikhulupiro cakuti munthu akafa ambapitiriza kukhala na moyo ku mbuto inango. Ndipo timbaphatisa lini basa njira iri-yense yacirendo kuti tidziwe bzakutsogolo. Ifepano timbadziwa kuti bzinthu bzimwebzi bzidaipa kwene-kwene, ndipo bzingaticitise kuti tibverane na Sathani pabodzi na madimonyo yace. w19.04 22 ¶8-9

Wanthu omwe ambabvuma kuphatisa basa nzeru za dzikoli ambanyoza mitemo ya m’Bibliya, ndipo ambaiwona kuti njakusaya kuthandiza. Iwo pinango angabzibvunze kuti, ‘Thangwe ranyi Mulungu adatilenga na bzikhumbo bzakugonana ndipo akutiuza kuti tileke kubziphatisa basa?’ Wanthu amwewa ambabvunza mbvunzo umweyu thangwe ambakumbuka kuti munthu angacite ciri-cense comwe akufuna. Tsono Bibliya limbalewa cinthu cinango cakusiyana na makumbukidwe yamweya. Iro limbalewa kuti tin’funika lini kumbateweza cikhumbo ciri-cense ca thupi lathu, koma timbaphatise basa mphanvu yomwe tinayo kuti tilimbane na bzikhumbo bzakuipa. (Wakol. 3:5) Kuthumizira bzimwebzi, Yahova adatilinganizira malowozi yomwe ni njira yakumalisira bzikhumbo bzakugonana mwakuthemera. (1 Wak. 7:8, 9) Mwakusiyana na nzeru za dzikoli, Bibliya limbatipfunzisa kuti timbawone nkhani yakugonana mwakuthemera. Iro limbalewa kuti kugonana kumbabweresa cikondweso kwa anyakulowolana. (Mim. 5:18, 19) Ndipopa Bibliya limbalewa kuti: ‘Ali-wense wa imwepo an’funika kudziwa kulinyang’anira bwino thupi race kuti akhale wakucena na wakulemekezeka, sikuti na kalanga kakusaya kuphatika ninga momwe ambacitira wanthu wa mitundu omwe ambadziwa lini Mulungu.’​—1 Wat. 4:4, 5. w19.05 22-23 ¶7-9

Mulungu an’dzalekerera lini atumiki wace kuti adzapfudzidwe na wanthu wakuipa. Atumiki wacewo ambalemekeza dzina lace na kubvera mtemo wakuti acoke mu Babulo Mkulu. (Mab. 15:16, 17; Cibv. 18:4) Iwo ambathandizambo wanthu winango kucoka mu Babulo Mkuluyo. Ndipopa atumiki wa Yahovawa an’dzatambira lini ‘naye pabodzi matsoka yace.’ Napo bziri tenepo, iwo an’dzafunika kulimbisa cikhulupiro cawo kuti an’dzakwanise kupirira mayezo yomwe angadzagumane nayo. (Zakiy. 38:2, 8) Pambuyo pa bzipembedzo bzense bzakunama kupfudzidwa, atumiki wa Mulungu an’dzakhala ninga muti omwe wapulumuka pa cimphepo camphanvu. Sathani akadzawona bzimwebzi, an’dzakalipa kwene-kwene. Iye an’dzalatiza ukali bwacebo mwakuphatisa basa ‘mafala yakunyansa’ yakufuliziridwa na madimonyo, ndipo thangwe ra mafalayo mitundu ya wanthu in’dzaphatana kuti izunze atumiki wa Mulungu. (Cibv. 16:13, 14) Ndipo ciphatano ca mitundu ya wanthuci cimbacemeredwa ‘Gogi wa dziko la Magogi.’ Pomwe mabomayo yan’dzazunza atumiki wa Yahova, nkhondo ya Armagedo in’dzayamba.​—Cibv. 16:16. w19.09 11 ¶12-13

Mu nthawe ya Jirayeri wakale, Sathani akhaphatisa basa bzipembedzo bzakunama kuti alimbise nkhani yakugonana. Nsiku zino, iye ambacitambo bzibodzi-bodzi. Bzipembedzo bzakunama bzimbalekerera kugonana kwakusaya kubvumizika, ndipo bzimbakucitisa kuwoneka ninga kulibe kuipa. Tsono bzakutewera bzace mpsakuti, azinji omwe ambalewa kuti mbatumiki wa Mulungu, aleka kuphatisa basa mitemo yace yakulungama yakulewa bza nkhani imweyi. Mu tsamba lomwe mpostolo Paulo adanembera Akristau wa ku Roma, adafotokoza bzakutewera bzomwe bzimbabwera thangwe ra bzipembedzo bzakunama bzomwe bzimbalimbisa kugonana kwakusaya kubvumizika. (War. 1:28-31) Ndipo bzinthu bzinango bzomwe ‘mpsakusaya kuthemera,’ ni kugonana kwakusaya kubvumizika na kugonana kwa amuna ayai akazi wokha-wokha. (War. 1:24-27, 32; Cibv. 2:20) Tenepo, mpsakufunika kwene-kwene kuti timbabvere bzomwe Bibliya limbapfunzisa. Nzeru za wanthu zimbapitana na malamulo ya Yahova ndipo zimbayatsutsa. Ndipo izo zimbabverana lini na cisapo ca mzimu wa Mulungu, koma na ‘mabasa ya thupi.’ (Wag. 5:19-23) Nzeru zimwezi zimbalimbisa wanthu kukhala wakubzikuza, ndipo ninga bzakutewera bzace wanthuwo ambakhala ‘wakubzifuna.’ (2 Tim. 3:2-4) Makhalidwe yamweya njakusiyana na yomwe atumiki wa Mulungu ambalimbisidwa kukhala nayo, yomwe ni kufatsa na kubzicepswa.​—2 Sam. 22:28. w19.06 5-6 ¶12-14

Eliya adatumikira Yahova mu nthawe yakunesa, ndipo adagumana na mabvuto ya dzawoneni. Yahova adauza Eliya kuti apase Elizeu mabasa manango yomwe iye akhacita. Mwa kucita bzimwebzi, Yahova adapasa Eliya xamwali wabwino omwe angadamuthandiza pa nthawe yomwe Eliyayo angadafunikira kutsangalazidwa. Mwa njira ibodzi-bodziyi, tikambauza xamwali wathu wa pa mtima momwe tinkubvera mu mtima mwathu, iye an’dzatithandiza kulimbana na makumbukidwe yomwe yambaticitisa thupo. (2 Wam. 2:2) Tsono penu munkuwona kuti palibe munthu omwe mungamuuze bza mu mtima mwanu, pembani kwa Yahova kuti akuthandizeni kugumana Mkristau wakukhwima mwauzimu omwe angakulimbiseni. Yahova adathandiza Eliya kulimbana na thupo lace, acitumikira mwakukhulupirika kwa magole mazinji. Bzomwe bzidacitikira Eliya bzimbatilimbisa kwene-kwene. Nthawe zinango tingakhale na thupo lomwe lingadzonge thanzi na makumbukidwe yathu. Tsono tikathemba Yahova, iye an’dzatipasa mphanvu zomwe tinkufunikira kuti tipitirize kumbamutumikira.​—Zai. 40:28, 29. w19.06 15 ¶4; 16 ¶9-10

Cinthu cibodzi comwe cingatithandize kukhala wakukhwimika nsiku zino, ni kupalizira bzipsa bzabwino bza Umambo bwa Mulungu. Thangwe ranyi? Thangwe ndakuti kupalizira kumbatithandiza kukhulupira Yahova na kuleka kugopa wathu. Ninga momwe thupi lathu limbakhalira lamphanvu tikambacita masenzeka yakulimbisa thupi, kukhwimika kwathu kumbalimbambo tikambapalizira nyumba na nyumba, kucita upalizi bwa padeca, bwakusaya kulinganizidwa na mbuto za malonda. Tenepo, tikakulisa kukhwimika kwathu mwa kupalizira nsiku zino, tin’dzakhala wakukonzeka kupitiriza kupalizira napo maboma yacidzaletsa basa lathu lakupalizira. (1 Wat. 2:1, 2) Tingapfunze bzizinji na ciratizo ca mpfumakazi yakukhulupirika yakucemeredwa Nancy Yuen yomwe idakhala yakukhwimika. Napo mpfumakaziyi ikhana metro ibodzi na pakati, ikhabva lini mantha mwakamfulumize. Pomwe idauzidwa kuti ileke kupalizira bzipsa bzabwino, mpfumakaziyi idalamba ndipo idaikhidwa m’kawoko kwa magole yakupitirira 20 ku dziko la China. Ndipo nduna zomwe zikhamubvunza bza nkhaniyo zidalewa kuti mpfumakaziyo “ikhana mtimbo kuposa wanthu wense” wa ku China. w19.07 5-6 ¶13-14

Mu utumiki bwakumunda, ifepano timbagumana na wanthu omwe ambafuna kupfunza Bibliya, koma azinji ambafuna lini ne na pang’onopo. Tsono tin’funika kuwathandiza kuti akulise cikhumbo cawo cakufuna kupfunza Bibliya. Kuti bzimwebzi bzikwanisike, tin’funika kumbakonzekera bwino na kumbakumbukira nkhani zomwe zingatokonye mitima yawo. Tikamala, timbanyang’ane njira za momwe tingayambisire maceza na wanthuwo. Mwa ciratizo, imwepo mungauuze mwenekaciro nyumba kuti: “Ndikhafuna kudziwambo makumbukidwe yanu pa nkhani inango. Mabvuto yomwe timbagumana nayo nsiku zino, yambatokonya dziko lense la pansi. Kodi imwepo munkukumbuka kuti tinkufunikira boma lomwe lingamalise mabvuto yathu?” Patsogolo pace, muwerengereni cinembo ca Daniel 2:44 kuti mumuthandize. Ayai mungamubvunze kuti: Ndikhafuna kudziwa makumbukidwe yanu. “Njiponi njira yakulelera wana kuti akule bwino?” Patsogolo pace, muwerengereni cinembo ca Bzakutonga 6:6, 7. Mwakusaya kupenukira, kuthandiza wanthu kuti akhale anyakupfunza wa Kristu, kungatithandize kukhala na cikondweso cikulu kwene-kwene. w19.07 15-16 ¶4, 6-7

Kodi tingapalizire tani wanthu omwe ambakhulupira lini Mulungu? M’bale munango omwe wakhala ankupalizira kwa nthawe itali, adapereka malango aya: “Kawiri-kawiri, munthu akalewa kuti: ‘Inepano ndimbakhulupira lini Mulungu,’ ambakhala akulewa kuti ambakhulupira lini mirungu yomwe wanthu wa komwe ambakhala ambainamata. Inepano ndimbatawiriza makumbukidwe yawoyo ndipo ndimbalewa kuti mirunguyo, imbakonzedwa na wanthu ndipo njacadidi lini. Patsogolo pace, ndimbawerenga Jeremiya 16:20 ndikamala ndimbabvunza kuti: ‘Kodi tingadziwe tani kuti mulungu uyu ngwacadidi ndipo uyu ngwakukonzedwa na wanthu?’ Pakutawira mtawiroyo ndimbatetekera mwatceru, ndipo patsogolo pace ndimbawerenga cinembo ca Zaiya 41:23, comwe cimbati: ‘Tiuzeni bzomwe bzin’dzacitika kutsogolo, kuti tidziwe kuti imwepo ndimwe mirungu.’ Pakumalizira ndimbalatiza polofesiya yakuperekedwa na Yahova yomwe idakwanirisidwa.” Ndipo m’bale munango adati: “Inepano ndimbalatiza wanthu bziratizo bza m’Bibliya, mapolofesiya ya m’Bibliya yomwe yadakwanirisidwa na malamulo ya m’cirengedwe. Patsogolo pace, ndimbawauza kuti bzensenebzi ni umboni bwakuti alipo Mulengi wanzeru. Tenepo munthu akabvuma kuti Mulengi alipo, inepano ndimbamulatiza bzomwe Bibliya limbalewa bza Yahova.” w19.07 23-24 ¶14-15

Bzinthu bzakufunika bzimbaphatanidza kucenesedwa kwa dzina la Mulungu, kukwanisika kwa mapiciro yace, mtendere na ciphatano ca gwere. (Mat. 6:9, 10; Ju. 13:35) Tikambawona bzinthu bzimwebzi kukhala bzakufunika pa moyo wathu, timbalatiza kuti timbafuna Yahova. Mpostolo Paulo adalewambo kuti tileke ‘kukhala wakuphonya.’ Bzimwebzi bzikulewa lini kuti tin’funika kukhala wakulungamiratu kuti tileke kuphonya. Ifepano tingandendemerane lini na Yahova omwe ambaphonya lini. Koma tikacita bzense bzomwe tingakwanise kuti tikulise lufoyi lathu na kutsimikizira bzinthu bzomwe mpsakufunika kwene-kwene, Yahova an’dzatiwona ninga wakusaya kuphonya. Ndipo njira inango ya momwe tingalatizire lufoyi lathu ni kutcenkha kukalipisa winango. Mafala yakuti tcenkhani kucita bzinthu bzakukalipisa winango ni cenjezo lakufunika kwene-kwene. Kodi tingacite tani bzinthu bzomwe bzingakalipise winango? Tingacite bzimwebzi na momwe timbasankhulira masenzeka yathu, kabvalidwe kathu ayai basa lomwe timbaphata. Pinango bzomwe tikucitabzo bzingakhale bzinthu bomwe Bibliya limbaleweratu lini kuti mpsakuphonyeka. Tsono tikacita bzakusankhula bzomwe bzingatokonye cikumbu-mtima ca winango mpaka kufika pa kukalipa nadzo, lingakhale bvuto likulu kwene-kwene.​—Mat. 18:6. w19.08 10 ¶9-11

Kuyambira mu gole la 1935, Mboni za Yahova zimbabvesesa kuti thimu likulu ­lomwe Juwau adawona, ni Akristau wakukhulupirika omwe ana cidikhiro cakudzakhala na moyo wakusaya kumala pa dziko la pansi. (Cibv. 7:9, 10) Koma napo bziri tenepo, wanthu omwe ambacita mbali ya thimuli kuti adzapulumuke pa citsautso cikulu, iwo an’funika kupfunza bza Yahova yakanati kuyamba Magole 1.000. Ndipo iwo an’funikambo kukhala na cikhulupiro cakulimba kuti adzakwanise ‘kupulumuka pa bzinthu bzense bzomwe bzin’dzacitika’ bukanati kuyamba Utongi bwa Magole 1.000 bwa Kristu. (Lu. 21:34-36) Wale omwe ambacita mbali ya thimu likulu, ambakomedwa kwene-kwene na cidikhiro comwe anaco. Iwo ambabvesesa kuti ni Yahova omwe ana udindo bwa kusankhula kuti atumiki wace wakukhulupirika akamutumikire kudzulu ayai pa dziko la pansi pano. Tenepo, wakudzozedwa na wa m’thimu likulu ambazindikira kuti an’dzatambira bzisimbo, koma sikuti thangwe rakuti adathemera, koma thangwe rakuti Yahova ngwakudeka mtima ndipo adapereka mwana wace Jezu Kristu ninga cakulombolera.​—War. 3:24. w19.09 28 ¶10; 29 ¶12-13

Kodi utumiki bwanu bwacinja? Citani ciri-centse kuti utumiki bwatsapanobu bukufambireni. Lekani kukumbuka kuti kucinjako n’cizindikiro cakuti mwacita cinthu cinango cakuphonyeka ayai tsapano ndimwe lini pomwe wakufunika. Mbakumbirani thandizo la Yahova ndipo mbapitirizani kupalizira. Tewezerani ciratizo ca Akristau wakukhulupirika wa m’magole dzana yakuyambirira. Iwo akhapalizira bzipsa bzabwino kuli-kwense komwe akhali. (Mab. 8:1, 4) Tenepo, imwepo mukapitiriza kumbapalizira, mun’dzakhala na bzakutewera bzabwino. Mwa ciratizo, apainiya omwe akhatumikira ku dziko linango adathamangisidwa ndipo adayenda kukakhala m’dziko lomwe likhali pafupi. Tsono m’dzikolo mukhafunika apalizi omwe akhalewalewa cirewedwe comwe apaliziwo akhacidziwa. Tenepo, minyezi ming’ono-ng’ono padakhazikisidwa magulu yakusiyana-siyana ndipo yadawanda mwakamfulumize. Tin’funika kudziwa kuti cikondweso cathu cikulu cimbabwera thangwe ra kukhala pa uxamwali na Yahova. Ndipopa pitirizani kulimbisa uxamwali bwanu na Yahova ndipo mbamukumbirani nzeru, malango na thandizo. Kumbukirani kuti imwepo mudafika pa kufuna utumiki bwanu bwakuyamba bule thangwe mukhana mtima wakufuna kuthandiza wanthu. Tenepo, ikhani mtima wanu pa gawo la tsapanoli ndipo onani momwe Yahova an’dzakuthandizirani kuti mulifune gawolo.​—Mpal. 7:10. w19.08 24-25 ¶15-16

Yahova ni omwe adatilenga. Tenepo, mpsakubveka kulewa kuti ndiye ana udindo bwa kumbatiuza bzomwe mpsabwino na bzomwe mpsakuipa. Ndipopa tin’funika kumbamubvera. (Cibv. 4:11) Tsono pana thangwe linango lomwe limbaticitisa kumbabvera Yahova, ndipo thangwero ndakuti utongi bwace n’bwabwino kwene-kwene. Kwa magole mazinji, maboma ya wanthu yakhala na mphanvu yakutonga wanthu winango, koma tikafuna kundendemezera utongi bwawobo na utongi bwa Yahova, bzikuwonekeratu kuti Yahova ni mtongi wanzeru kwene-kwene, walufoyi na wansisi ndipo ambadekera mtima wanthu wense. (Kuf. 34:6; War. 16:27; 1 Ju. 4:8.) Kodi tingalatize tani kuti timbabvera Yahova? Cakuyamba, tin’funika kumbacita bzinthu bzense bzomwe iye ambafuna. Caciwiri, tin’funika lini kuthemba luso lathu la kubvesesa bzinthu. (Mim. 3:5) Ndipo kudziwa makhalidwe yace yabwino ni cinthu cinango comwe cingatithandize kumubvera. Thangwe ranyi? Thangwe ndakuti iye ambaphatisa basa makhalidwe yacewo pakucita bzomwe ambafuna. (Psal. 145:9) Tikapfunza bzizinji bza Yahova, tin’dzamufuna kwene-kwene. Ndipo thangwe ra kumufunako, tin’dzafunika lini kucita kukhala na ndandanda wa bzinthu bzomwe tin’funika kucita na bzomwe tin’funika lini kucita. w19.09 14 ¶1, 3

Sathani ambatsanzikidzira wanthu mitolo yakulemera kwene-kwene yomwe iwo ambakwanisa lini kuitakula. Mwa ciratizo, iye ambafuna kuti ifepano timbakhulupire kuti Yahova an’dzatilekerera lini pikado zathu, nakuti tin’themera lini kufunidwa naye. Kumweku n’kunama, ndipo kuli ninga cimtolo comwe tingakwanise lini kucitakula! (Ju. 8:44) Koma cadidi n’cakuti, ifepano tikayenda kuna Jezu, timbalekereredwa pikado zathu. (Mat. 11:28) Ndipo Yahova ambatifuna kwene-kwene. (War. 8:32, 38, 39) Mtolo omwe Jezu ambatikumbira kuti tinyamule, ngwakusiyana na mitolo yomwe timbatakula nsiku na nsiku. Mwa ciratizo, bzimbacitika munthu kucokera kubasa adaneta ayai adasunama. Koma mwakusiyana na bzimwebzi, ifepano tikambaphatira basa Yahova pabodzi na Jezu, timbakhala na mphanvu ndipo timbakondwa kwene-kwene. Napo bziri tenepo, nthawe zinango timbaneta, tsono tikabzikakamiza kuyenda ku mitsonkhano, timbabwerera kumui talimbisidwa ndipo timbakhala na mphanvu. Mpsibodzi-bodzimbo tikambacita nyongo yakupalizira na kucita pfunziro lathu lapatekha, bzisimbo bzomwe timbakhala nabzo, bzimbaposa mphanvu yomwe timbadzonga! w19.09 20 ¶1; 23-24 ¶15-16

Pakuti yandosala nthawe yakucepa kuti nsiku ya Yahova ifike, iye an’funa kuti tipalizire bzipsa bzabwino na nyongo. Tenepo, tensenefe tin’funika kukhala na ‘bzakucita bzizinji pa basa la Mbuya.’ (1 Wak. 15:58) Pomwe Jezu adalewa bzinthu bzakufunika bzomwe bzingadadzacitika mu nsiku za kumalizira, iye adathumizira kuti: ‘Bzipsa bzabwino bzin’funika kupaliziridwa kwa wanthu wa mitundu yense cakuyamba.’ (Mar. 13:4, 8, 10; Mat. 24:14) Kumbukirani ibzi: Nthawe zense zomwe mumbayenda kukapalizira, mumbakhala mukucita mbali ya kukwanirisidwa kwa polofesiya ya m’Bibliya! Kodi tingalewe ciyani pa nkhani ya kukula kwa basa lakupalizira? Pa gole liri-lense, wanthu azinji ambatetekera bzipsa bzabwino bza Umambo. Mwa ciratizo, kumbukirani bza kuthumizirika kwa mbogo ya apalizi mu nsiku za kumalizira zino, kuzungulira dziko lense la pansi. Mu gole la 1914, mbogo ya apalizi m’madziko 43, ikhali 5.155. Koma nsiku zino, pana apalizi wakukwana 8.5 midyau omwe ali m’madziko yakukwana 240! Napo bziri tenepo, basa lathu likanati kufika kuphampha. Tenepo, ifepano tin’funika kupitiriza kudziwisa wanthu kuti ni Umambo bwa Mulungu bokha bomwe bun’dzamalisa mabvuto yense yomwe yambatiboneresa.​—Psal. 145:11-13. w19.10 8 ¶3; 9-10 ¶7-8

Yahova adaphatisa basa Barzilai kuti athandize Mambo Davide. Pa nthaweyo, Davide akhathawa mwana wace Abisalomu omwe akhafuna kumupha, ndipo Davideyo pabodzi na wanthu omwe akhamuperekeza akhana ‘njala, nyota ndipo akhadaneta.’ Tsono Barzilai omwe akhadakalamba, pabodzi na amuna winango adaikha moyo wawo pa ngozi kuti agumane bzakusaya bza Davide na bza wanthu omwe akhamuperekezawo. Napo Barzilai akhadakalamba, iye alibe kukumbuka kuti Yahova angadamuphatisa lini pomwe basa. Koma thangwe ra kudeka mtima, iye adaphatisa basa bzomwe akhanabzo kuti athandize atumiki wa Mulungu omwe akhafunikira thandizo. (2 Sam. 17:27-29) Kodi tikupfunza ciyani? Tikupfunza kuti bziribe basa kuti tina magole mangasi, Yahova angatiphatise basa kuti tithandize abale omwe akufunikira thandizo m’dziko lomwe timbakhala ayai m’madziko manango. (Mim. 3:27, 28; 19:17) Napo tingakwanise lini kuyenda tekha kukathandizira abalewo, tingacite cakupereka cathu pa bzakupereka bza pa dziko lense, ndipo tikacita bzimwebzo, gulu lathu lin’dzakhala na kobiri zakuthandizira abale wa pa dziko lense omwe akufunikira thandizo.​—2 Wak. 8:14, 15. w19.10 21 ¶6

Bzingakhale bzakunesa kuuza wanthu winango bzomwe bziri mu mtima mwathu, penu munthu munango adacita bzinthu bzomwe tiribe kukomedwa nabzo ayai bzidatisunamisa. (Mim. 18:19) Ayai pinango tingawone kuti tiribe nthawe yakucita uxamwali. Tsono lekani kukumbuka kuti bzingakwanisike lini. Tenepo, tikafuna kuti axamwali wathu ambatithandize pa mabvuto, tin’funika kulimbisa uxamwali bwathu na iwo kuyambira nsiku zino. Ndipo tingacite bzimwebzi mwa kumbawauza bzomwe bziri mu mtima mwathu. (1 Pe. 1:22) Jezu adalatiza kuti akhakhulupira axamwali wace mwa kulewalewa nawo mwakutsudzuka, ndipo akhawabisira lini cinthu ciri-cense. (Ju. 15:15) Ifepano tingamutewezere mwa kumbauza axamwali wathu bzinthu bzomwe bzimbatikondwesa, bzimbatipasa thupo na bzomwe bzimbatisunamisa. Mukambaceza na munthu, mbamutetekerani akambalewalewa, ndipo mukacita bzimwebzi, mun’dzawona kuti bzomwe mumbakumbuka na bzakulinga bzanu mpsakundendemerana na bzace. Mukambauza axamwali wanu bzomwe bziri mu mtima mwanu na kumbawatetekera akambalewalewa, uxamwali bwanu bun’dzalimba kwene-kwene.​—Mim. 27:9. w19.11 4 ¶8-9

Pa nthawe ya citsautso cikulu, pinango mafala yomwe tikuyapalizira yan’dzacinja. Nsiku zino, timbapalizira bzipsa bzabwino bza Umambo ndipo timbacita nyongo yakupfunzisa wanthu. Koma pa nthawe ya citsautso cikulu, upalizi bwathu bun’dzakhala bwamphanvu, ndipo Bibliya limbandendemezera upalizibu ninga nvula ya matalala. (Cibv. 16:21) Pinango pa nthawe imweyi tin’dzapalizira kuti dziko la Sathaniri lasala pang’ono kupfudzidwa. Nthaweyo ikadzafika, tin’dzadziwa upalizi bomwe tin’dzaphatisa basa na momwe tingadzapalizirire. Kodi tin’dzaphatisa basa njira za upalizi zomwe takhala tikuziphatisa basa kwa magole 100 m’mbuyomu? Ayai tin’dzaphatisa basa njira zinango? Tin’dzawona pa nthaweyo. Koma comwe tikudziwa n’cakuti, ifepano tin’dzakhala na mwayi wakudziwisa mafala yakulewa bza ciyeruzo ca Yahova! (Zakiy. 2:3-5) Mafala yomwe tin’dzapalizira yan’dzakalipisa wanthu, tenepo iwo an’dzafuna kuti aimise basa lathu lakupalizira. Ndipopa nsiku zino, ifepano tin’funika kukhulupira Yahova kuti atithandize pa basali. Tenepo, ifepano tikupenukira lini kuti napo kutsogolo Mulungu an’dzatipasa mphanvu kuti ticite bzomwe iye akufuna.​—Mik. 3:8. w19.10 16 ¶8-9

Fala lakuti ‘kusoceresa’ likuthandauza kuti tikambafunisisa bzinthu bzakuthupi bzomwe mpsakusaya kufunika kwene-kwene, tin’dzatayika. Ndipo bzin’dzacitisa cikhulupiro cathu kugwera m’bzikhumbo ‘bzizinji bzakuipa na bzakudzonga.’ (1 Tim. 6:9) Tenepo tin’funika lini kuyebwa kuti Sathani ambaphatisa basa bzinthu bzimwebzi kuti atepese cikhulupiro cathu. Pinango tingakhale na kobiri zakukwana kugulira bzinthu bzizinji bzakuthupi. Kodi bzingakhale bzakuphonyeka kugula bzinthu bzomwe tikufuna, koma pa nthaweyo bzikufunika lini? Pinango-pense. Kumbukirani mibvunzo iyi: ‘Napo ndina kobiri za kugulira cinthu, kodi ndinayo nthawe na mphanvu zakuphatisira basa na kusamalira cinthuco? Kodi ndikuyamba kufunisisa kwene-kwene bzinthu bzakuthupi? Kodi kufunisisa bzinthu bzakuthupi kukundicitisa kukhala ninga mulumbwana omwe adalamba mcemo wa Jezu ule?’ (Mar. 10:17-22) Kulewa mwakusaya kupenukira, cinthu cabwino kwene-kwene n’kukhala na moyo wakusaya kufuna bzizinji na kuphatisa basa nthawe pabodzi na mphanvu zathu pakucita kufuna kwa Mulungu! w19.11 18-19 ¶15-16

Mulungu angakupaseni ‘mphanvu’ kuti mukwanirise cakulinga canu. (Waf. 2:13) Tenepo, pembani kuti akupaseni mphanvu. Ndipo kumbiranimbo Yahova mzimu wace wakucena kuti akupaseni mphanvu zomwe mukufunikira. Ndipo pitirizani kupemba napo penu mukukumbuka kuti mipembo yanu ikanati kutawiridwa. Lekani kuyebwa kuti Jezu adalewa kuti: ‘Pitirizani kukumbira [mzimu wakucena], ndipo mun’dzapasidwa.’ (Lu. 11:9, 13) Ndipo Mbanembanimbo bzomwe mun’funa kucita. Kuti mukwanise kumaliza basa liri-lense, imwepo mun’funika kumbakonzekera, mukamala mumbacite bzinthu mwakubverana na momwe mwakonzekerera. Bzimwebzi bzikuphatanidzambo bzakusankhula bzanu. Nembani bzinthu bzense bzomwe mukufuna kucita na bzomwe mun’funikira kubzikwanirisa. Ndipo kucepesa mabasa kungakuthandizeni kuwona momwe mukupitira patsogolo. Mwa ciratizo, mpostolo Paulo adapereka malango kwa Akristau wa ku Kolinto yakuti ‘nsiku yakuyamba ya mdzinga uli-wense’ ambacite bzakupereka. Tenepo, bzingadafunika lini kucita bzakupereka pa nsiku yomwe iye angadafika. (1 Wak. 16:2) Bzimwebzi bzikulatiza kuti kucepesa mabasa, kungakuthandizeni kuleka kukhala na makumbukidwe yakuti mungakwanise lini kucita mabasayo. w19.11 29 ¶13-14

Wanthu winango angalewe kuti ambadziwa Mulungu thangwe ra kudziwa dzina lace na bzinthu bzinango bzomwe iye adalewa ayai adacita. Koma pana bzinthu bzizinji bzomwe munthu angacite kuti amudziwe bwino Yahova. Tin’funika kukhala na nthawe yakupfunza bza Yahova pabodzi na makhalidwe yace yabwino. Tikamala kucita bzimwebzo, tin’dzayamba kubvesesa thangwe race iye ambalewa na kucita bzinthu bzinango. Bzimwebzi bzin’dzatithandiza kudziwa penu Yahova akubverana na makumbukidwe yathu, bzakusankhula bzathu na bzomwe timbacita. Pambuyo pakuti tabvesesa bzomwe Yahova an’funa kuti ticite, tin’funika kucita bzinthu mwakubverana na bzomwe tapfunzabzo. Wanthu winango angatiseke thangwe ra kutumikira Yahova. Ndipo kutisekako kungathumizirike tikayamba kumbayenda ku mitsonkhano. Koma tikathemba Yahova, iye an’dzatisiya lini na pang’onopo. Kumuthemba komwe tingacite, kun’dzatithandiza kuti tikhale naye pa uxamwali mpaka muyaya. Kodi mpsakukwanisika kumudziwadi bwino Yahova ticikhala naye pa uxamwali? Inde, mpsakukwanisika! w19.12 16-17 ¶3-4

Nthawe zinango, abereki anganete thangwe ra mabvuto yomwe angagumane nayo pakupfunzisa wana wawo. Koma Yahova ngwakukonzeka kuthandiza aberekiwo. Iye ambatetekera mipembo ya abereki yakukumbira thandizo la momwe angalerere wana wawo. Ndipo iye ambatawira mipemboyo, mwakuphatisa basa Bibliya, mabukhu, bziratizo na malango ya abereki winango wa m’gwere omwe ambapfunzisa bwino wana wawo. Wanthu winango ambalewa kuti kulera wana ni basa lomwe limbamala magole 20. Tsono cadidi n’cakuti, abereki alibe malire yakupfunzisa wana wawo. Ndipo bzinthu bzakufunika kwene-kwene bzomwe iwo angapase wanawo, ni lufoyi, nthawe na kuwapfunzisa momwe angatumikirire Yahova. Abereki an’funika kudziwa kuti mwana ali-wentse angatokonyedwe mwa kusiyana na cipfunziso comwe angapereke. Mwa ciratizo, azinji omwe adaleredwa na abereki omwe ambafuna Yahova, ambabzibva ninga momwe mpfumakazi ya ku Ásia yakucemeredwa Joanna Mae imbabvera. Mpfumakaziyo idati: “Nimbatenda kwene-kwene abereki wangu thangwe rakuti iwo adandipfunzisa na kundithandiza kuti nimbafune Yahova. Ndipo nimbawona kuti iwo alibe kundondibereka, koma adandipasa moyo wathandauzo.” (Mim. 23:24, 25) Akristau azinji omwe adaleredwa na abereki omwe ambafuna Yahova ambabzibvambo tenepoyo. w19.12 27 ¶21-22

Mpsakusaya kunesa kuwona m’gwere mwathu abale na mpfumakazi omwe an’funikira kutsangalazidwa. Nthawe zinango, m’bale akafunikira mtsangalazo, tingacite mantha thangwe ra kusaya kudziwa bzomwe tingalewe na kucita. Koma napo bzikhale tenepo, tin’funika kumbacita ciri-centse kuti timutsangalaze. Pakuti tiri kuphampha kwa dzikoli, bzinthu bziniyenda bziciipiratu ndipo moyo un’khala wakunesa kwene-kwene. (2 Tim. 3:13) Tenepo, ifepano timbafunikira kutsangalazidwa, thangwe ndife wakuperewera ndipo timbaphonya kawiri-kawiri. Mpostolo Paulo, adakwanisa kukhala wakukhulupirika mpaka kuphampha kwa moyo wace, thangwe ra mtsangalazo ukulu omwe akhatambira kuna akristau anzace. Ndipopa ifepano, tin’funika kukhala wakukhulupirika ninga Aristako, Tikiko na wakukonzeka kutumikira winango ninga Marko. Tikacita bzimwebzi, tin’dzakwanisa kuthandiza abale na mpfumakazi zathu kupitiriza kutumikira Yahova mwakukhulupirika.​—1 Wat. 3:2, 3. w20.01 12-13 ¶17-19

Anyakudzozedwa ambafuna lini kuti winango ambawalemekeze mwakunyanyirira. (Waf. 2:2, 3) Iwo ambadziwambo kuti pomwe adadzozedwa, Yahova alibe kuuza ne munthu na m’bodziyo. Ndipopa anyakudzozedwa ambadabwa lini, pakuyamba munthu akapenukira kuti iwo mbakudzozedwa. Iwo ambadziwa kuti Bibliya limbatipfunzisa kuti tin’funika lini kumbathamangira kukhulupira munthu akatiuza kuti wapasidwa na Mulungu udindo bwakupambulika. Mkristau wakudzozedwa ambafuna lini kuti wanthu amutumbize, ndipo iye akagumana na wanthuwo ambawauza lini kuti ngwakudzozedwa. Ndipo ambasamwira lini winango thangwe ra kudzozedwako. (1 Wak. 4:7, 8) Akristau wakudzozedwa ambawona lini kuti an’funika kumbandoceza okha-okha, ninga thimu lakupambulika. Iwo ambayeza lini kunyang’ana anyakudzozedwa anzawo kuti aceze na cakulinga cakufuna kudziwa kuti adadzozedwa tani, ayai kuti acite pfunziro la Bibliya la pawokha. (Wag. 1:15-17) Bzingadakhala kuti iwo ambacita bzimwebzi, gwere lingadakhala lini lakuphatana. Ndipo angadakhala akucita bzinthu mwakusiyana na mzimu wakucena, omwe umbathandiza wanthu wa Mulungu kukhala pa mtendere na wakuphatana.​—War. 16:17, 18. w20.01 28 ¶6-7

Pomwe bzimwebzi bzin’dzakhala bzikucitika, wanthu omwe akhanamata bzipembedzo bzakunama bzomwe pa nthaweyo bzin’dzakhala bzapfudzidwa, an’dzawona kuti Mboni za Yahova zikupitiriza kunamata Yahovayo. Bzimwebzi bzin’dzacitisa wanthu pabodzi na anyakumwaza nkhani kuipidwa nazo. Ndipo maboma pabodzi na mtongi wawo, Sathani, an’dzatiwenga kwene-kwene thangwe rakuti ni cipembedzo cathu basi comwe cin’dzakhala ciripo pa nthaweyo. Tenepo, iwo an’dzawona kuti alibe kukwanisa cakulinga cawo ca kupfudza bzipembedzo bzense pa dziko la pansi. Na thangwe limweri, iwo an’dzafuna kulimbana nafe. Pa nthawe imweyo, mabomayo yan’dzakhala Gogi wa ku Magogi. Iyo yan’dzabverana kuti yamenyane na atumiki wa Yahovafe. (Zakiy. 38:2, 14-16) Kudziwa bzomwe bzin’dzacitika pa citsautso cikulu kungaticitise thupo, thangwe tikudziwa lini momwe bzin’dzacitikira. Koma cadidi n’cakuti: Tin’funika lini kudzacita mantha na citsautso cikulu. Thangwe Yahova an’dzatipasa malango yomwe yan’dzatithandiza kupulumusa moyo wathu.​—Psal. 34:19. w19.10 16-17 ¶10-11

Ifepano timbacita bzizinji sikuti kumutenda kokha; ndipo timbalatiza kutenda kwathu Yahova m’mafala na m’bzicito. Bzimwebzi bzimbaticitisa kukhala wakusiyana na wanthu azinji ntsiku zino. Ifepano tikukhala m’dziko lomwe wanthu azinji ambatenda lini bzinthu bzentse bzomwe Mulungu ambawacitira. Kulewa cadidi, cibodzi mwa bzizindikiro bzomwe bzikulatiza kuti tikukhala ‘m’ntsiku zakumalizira,’ ni kusaya kutenda komwe wanthu akucita. (2 Tim. 3:1, 2) Tenepo, ifepano tin’funika lini kuwatewezera wanthu amwewa! Yahova an’funa kuti wentse omwe ambamunamata akhale pa uxamwali. Kulewa cadidi, lufoyi lomwe timbalatizana, limbatidziwikisa ninga akristau wacadidi. (Ju. 13:35) Tikutawiriza bzomwe nyakunemba bukhu la Psalymo adanemba kuti: ‘Mpsabwino, ndipo mpsakudekeza abale kukhala pabodzi mwakuphatana!’ (Psal. 133:1) Tikambafuna abale na mpfumakazi zathu, timbalatiza kwa Yahova kuti timbamufuna. (1 Ju. 4:20) Kulewa mwakusaya kupenukira, mpsakudekeza kwene-kwene kukhala pabodzi na abale na mpfumakazi omwe ‘[mbakudeka mtima na wa] ntsisi!’​—Wayef 4:32. w20.02 9 ¶6–7

Mabvuto ya Ana yalibe kucinja nthawe imweyoletu. Iye akhakhala nyumba ibodzi na mkhaziba wace Penina. Ndipo Bibliya limbalewa lini kuti Penina akhacinja makhalidwe yace. Koma Ana akhafunika kupitiriza kupirira mafala yakuipa yomwe mkhaziba waceyo akhamulewa. Kucita bzimwebzi kudathandiza Ana kubwezeresa na kupitiriza kukhala na mtendere wa mu mtima. Pomwe Ana adadziwa kuti Yahova wabva mpembo wace, alibe kukhala pomwe na thupo, ndipo iye adaderekhedwa, acibvuma kuti Yahova amutsangalaze. Na kupita kwa nthawe, Yahova adatawira mpembo wa Ana mwa kumupasa mwana omwe akhamufunisisa! (1 Sam. 1:19, 20; 2:21) Tingakhale na mtendere napo mabvuto yomwe tikugumana nayo yakumala lini. Napo tipembe mwakubwereza-bwereza na kuyenda ku mitsonkhano mwakukhazikika, koma mabvuto yanango yangamale lini. Tsono na bzomwe bzidacitika na Ana, tikupfunza kuti tikabvuma Yahova kuti atitsangalaze pa mabvuto yathu, palibe cinthu comwe cingamutazise kucita bzimwebzo. Iye an’dzatiyebwa lini ndipo an’dzatithandiza kupirira mabvutoyo.​—Waheb 11:6. w20.02 22 ¶9-10

Akulu an’funika kuphatisa basa malango ya mavesi ya Bibliya kuti athandize munthu kucita bzakusankhula bzanzeru. Thangwe ranyi nthawe zinango an’funika kukhala wakukhwimika pakulewalewa? Kumbukirani bzomwe bzidacitikira Eli omwe akhali Mkulu wa Antsembe. Iye akhana wana wace awiri wacimuna ndipo akhawafuna kwene-kwene. Tsono wanawo, akhalemekeza lini Yahova. Iwo akhana udindo bukulu kwene-kwene bwakutumikira ninga antsembe pa tendi la mkonkhano. Koma akhaphatisa basa udindo bwawobo mwakuphonyeka, akhalemekeza lini ntsembe zomwe wanthu akhapereka kwa Yahova, ndipo akhacita upombo mwakusaya kubisa. (1 Sam. 2:12-17, 22) Ninga momwe Cakutonga ca Mozeji cikhalewera, wana wa Eli akhathemera kuphedwa thangwe ra bzomwe akhacitabzo. Tsono Eli adawalekerera kwene-kwene wanawo, mwa kuwapasa malango yakusaya mphanvu ndipo iye adabvuma kuti wanawo apitirize kutumikira pa tendi la mkonkhano. (Bzak. 21:18-21) Kodi n’ciyani comwe Yahova adacita na Eli pa bzomwe bzidacitikabzo? Yahova adabvunza Eli kuti: ‘Thangwe ranyi iwepo ukupitiriza kulemekeza kwene-kwene wana wako kuposa ine?’ Tenepo, Yahova adaleweratu kuti wana wa Eli angadafa.​—1 Sam. 2:29, 34. w20.03 19 ¶4-5