Agosto

Napo Jezu akhazunzidwa, iye akhana mtendere wa mu mtima thangwe akhadziwa kuti akhakondwesa Baba wace. Ndipopa iye adapitiriza kubvera, napo bzikhali bzakunesa kucita bzimwebzo. Bzimwebzi bzikulatiza kuti iye akhafuna Baba wace ndipo akhawona kutumikira Yahova kukhala cinthu cakufunika kwene-kwene pa moyo wace. Iye anati kubwera pano pa dziko la pansi, akhali ‘misiri’ wa Mulungu. (Mim. 8:30) Ndipo pomwe akhali pansi pano, iye adapfunzisa na nyongo wanthu winango bza Baba wace. (Mat. 6:9; Ju. 5:17) Basa limweri lidamubweresera cikondweso cikulu kwene-kwene. (Ju. 4:34-36) Tingatewezere Jezu mwa kubvera Yahova na ‘[kumbacita] bzizinji pa basa la Mbuya’ nthawe zense. (1 Wak. 15:58) Ndipo ‘tikambatanganidwa’ pa basa lakupalizira, timbakwanisa kuwona mabvuto yathu mu njira yakuthemera. (Mab. 18:5) Mwa ciratizo, wanthu omwe timbagumana nawo mu utumiki kawiri-kawiri ambagumana na mabvuto mazinji kuposa ifepano. Tsono akapfunza bza lufoyi la Yahova na kuphatisa basa malango yomwe Yahovayo ambapereka, ambakhala na moyo wabwino na wakukondwa. Tenepo, tikambawona bzimwebzi bzikucitika, timbatsimikiza kuti Yahova ambatisamalira. w19.04 10-11 ¶8-9

Akristauwa akhadakonzeka kulimbana na mizimu yakuipa. Napo kuti mabukhu yomwe akhaphatisa basayo yakhali yakuumira kwene-kwene, iwo alibe kufuna kupasa ne kugulisira munthu, koma adawona kuti bzikhali bwino kuyatentha. Bzimwebzi bzinkuwonesa kuti iwo akhalibe basa na kobiri, koma akhandofuna kukondwesa Yahova. Kodi tingatewezere tani ciratizo ca Akristau wakuyambirira wale? Mwa kuleka kuphatisa basa cinthu ciri-cense cakubverana na bza matsenga. Bzimwebzi bzimbaphatanidza bzithumwa, ayai cinthu ciri-cense comwe wanthu ambabvala ayai ambakhala naco kuti abzikhotcerere ku mizimu yakuipa. (1 Wak. 10:21) Mbasankhulani masenzeka mwanzeru. Bzibvunzeni kuti: ‘Kodi bzinthu bzomwe ndimbasenzeka nabzo bzimbabverana na bzamizimu?’ Tenepo mukafuna kusankhula masenzeka, mbasankhulani yomwe yangakuthandizeni kutcenkha kucita cinthu ciri-cense comwe Yahova ambawenga. Ndipo mbacitani bzomwe mungakwanise kuti mukhale ‘na cikumbu-mtima cakucena pamaso pa Mulungu.’​—Mab. 24:16. w19.04 22-23 ¶10-12

Akulu wa gwere akambasamalira nkhani ya pikado ikulu, cakulinga cawo cikulu cimbakhala kutumbizisa dzina la Yahova na kukhotcerera mbiri yace. (Mwam. 22:31, 32; Mat. 6:9) Cakulinga cinango comwe akulu ambakhala naco n’cakufuna kuthandiza abale na mpfumakazi wa m’gwere kupitiriza kukhala pa uxamwali bwakulimba na Yahova na kutsangalazambo wale omwe adacitiridwa bzinthu bzakuipa. Kuthumizira bzimwebzi, akulu wa gwere ambafufudza kuti awone penu munthu omwe wacita pikadoyo wakungula, ndipo akakungula ambamuthandiza kukonzesa uxamwali bwace na Yahova. (Tiy. 5:14, 15) Mkristau omwe ambacita pikado ikulu kuti atsangalaze bzikhumbo bzace bzakuipa ali ninga munthu omwe ankuduwala. Bzomwe bzinkuthandauza kuti iye alibe uxamwali bwabwino na Yahova. Ndipo bzimwebzi bzikacitika, akulu wa gwere ambakhala ninga adotolo wauzimu. Tenepo iwo ambacita nyongo yakuthandiza omwe ‘ankuduwala [ayai nyakucita pikado] kubzibva bwino.’ Ndipo malango yawo yakucokera m’Bibliya yangamuthandize kukhala pomwe pa uxamwali na Mulungu, koma bzimwebzi bzingacitike kokha munthuyo akakungula na mtima wense.​—Mab. 3:19; 2 Wak. 2:5-10. w19.05 10 ¶10-11

Yahova angatipase cikhumbo cakucita bzinthu. Kodi iye angacite tani bzimwebzo? Mwa ciratizo, pinango tingadziwe kuti m’gwere mwathu muna m’bale ayai mpfumakazi yomwe ikufuna thandizo ayai pana cinthu comwe cikufuna kukonzedwa. Ayai tingabve mkulu wa gwere akupereka cidziwiso cakucokera ku mthambi cakutiuza kuti pakufunika thandizo ku dera lomwe ndathu lini. Pinango mungabzibvunze kuti: ‘Kodi n’ciyani comwe ningacite kuti ndithandize?’ Ayai pinango tingapasidwe basa lakunesa ndipo tikudziwa lini momwe tingalicitire. Ayai pinango pambuyo pa kuwerenga vesi linango la m’Bibliya, tingabzibvunze kuti: ‘Kodi ningaphatise tani basa vesiri kuti ndithandize winango?’ Onani kuti Yahova ambatingingimiza lini kucita bzimwebzi. Koma iye akawona kuti ifepano tikufuna kuthandiza, iye angatipase cikhumbo kuti tikwanise kucita bzimwebzo. Yahova angatipasembo mphanvu yakucita bzinthu. (Zai. 40:29) Iye angaphatise basa mzimu wakucena kuti tithumizire luso lomwe tinalo kale. (Kuf. 35:30-35) Ndipo Yahova angatipfunzise momwe tingacitire mabasa manango, mwakuphatisa basa gulu lace. Penu imwepo mukukwanisa lini kucita basa lomwe mwapasidwa, kumbirani thandizo. Kuthumizira bzimwebzi, khalani wakutsudzuka kukumbira Yahova kuti akupaseni ‘mphanvu yakuposa yacibadwa.’​—2 Wak. 4:; Lu. 11:13. w19.10 21 ¶3-4

Dzikoli limbalimbisa khalidwe limweri. Bukhu linango limbalewa kuti m’magole ya 1970 “pakhana mabukhu yomwe yakhana malango yakuthandiza wanthu kuti akhale na moyo wabwino.” Ndipo manango ya mabukhu yamweya “yakhalimbisa anyakuyawerenga kuti abzidziwe bwino na kubzibvuma acimbakumbukira momwe akhaliri kale.” Mwa ciratizo, libodzi mwa mabukhu yamweya limbalewa kuti: “Umbabzifune thangwe ndiwe wakudeka ndipo ndiwe wakudabwisa kwene-kwene kuposa wense omwe adakhala kale na moyo.” Bukhulo limbalewambo kuti: “Munthu angasankhule yekha momwe angacitire bzinthu, na kucita bzinthu bzomwe iye akuwona kuti mpsabwino na bzomwe bzikumudekera.” Kodi nzeru imweyi mudaibvambo kale? Sathani adalimbisa Eva kucita bzibodzi-bodzibzi. Iye adauza Evayo kuti angadakhala ‘ninga Mulungu, [mwakudziwa] bzabwino na bzakuipa.’ (Ciy. 3:5) Nsiku zino, wanthu azinji ambakumbukira kwene-kwene bza iwo okha, ambafuna lini kuuzidwa cakucita ndipo ambafunambo lini kuti Mulungu awauze cabwino na cakuipa. Ndipo khalidwe limweri limbawonekera na momwe wanthu ambawonera nkhani ya malowozi. w19.05 23 ¶10-11

Nthawe zinango, Mambo Davide adagumanambo na mabvuto yomwe yakhamucitisa thupo. Davide adacita thupo kwene-kwene thangwe ra pikado zizinji zomwe akhadacita. (Psal. 40:12) Mwana wace wa pa mtima Abisalomu adamupandukira, ndipo patsogolo pace adamutewera m’mbuyo kuti amuphe. (2 Sam. 15:13, 14; 18:33) Ndipo m’bodzi mwa axamwali wace wa ponda-ndipondembo adamuphindukira. (2 Sam. 16:23–17:2; Psal. 55:12-14) Tsono tikambawerenga makapitulo ya m’bukhu la Psalymo yomwe yadanembedwa na Davideyo, timbawona kuti napo akhadasunama, iye alibe kutaya mtima ne kusiya kukhulupira Yahova. (Psal. 38:5-10; 94:17-19) Na kupita kwa nthawe, munembi munango wa bukhu la Psalymo adayamba kucitira njiru wanthu omwe akhana makhalidwe yakuipa. Pinango iye akhali wa mbadwo ya Mlevi Azafe ndipo adatumikira pa nyumba ya Mulungu. Tenepo, iye adasunama kwene-kwene mpaka adaluza cikondweso cace. Ndipo adayamba kuwona kuti kutumikira Mulungu kukhali kwakusaya phindu.​—Psal. 73:2-5, 7, 12-14, 16, 17, 21. w19.06 17 ¶12-13

Sathani ambalimbisa bzikhumbo bzacibadwa. Bzimbakhala bzacibadwa kwa wanthufe kupfunza maluso yakusiyana-siyana yomwe yangatithandize kugumana bzakusaya bzathu na bza mabanja yathu. (1 Tim. 5:8) Tsono malusoyo tingayagumane tikayenda ku xikola na kucita nyongo yakupfunza. Koma tin’funika kukhala wakusamala kwene-kwene. Thangwe ranyi? Thangwe ndakuti m’madziko mazinji, apfunzi akakhala ku xikola ambapfunza lini kokha maluso yakuwathandiza, koma ambapfunzambo bzinthu bzomwe bzimbacokera ku nzeru za wanthu. Mwa ciratizo, apfunziwo ambalimbisidwa kuti aleke kukhulupira bzakuti Mulungu alipo ne kulemekeza Bibliya. Iwo ambauzidwa kuti wanthu wense ambakhulupira kuti camoyo ciri-cense cidacita kusandulika. (War. 1:21-23) Kulewa cadidi, mapfunziso yamweya yambapitana na ‘nzeru za Mulungu.’ (1 Wak. 1:19-21; 3:18-20) Ifepano tin’funika kutsimikiza kuleka kubvuma kuphatidwa ‘ninga cirombo mwakuphatisa basa makumbukidwe ya wanthu’ yomwe Sathani ambayapereka m’dzikoli. (Wakol. 2:8) Tenepo, lekani kubvuma kuti Sathani akupumpseni. (1 Wak. 3:18) Ndipo lekani kubvuma kuti Sathani akuyebweseni kuti Yahova ni mbani. Koma nthawe zense mbaphatisani basa malango yapadzulu ya Yahova. Ndipo lekani kubvuma kuti Sathani akutaziseni kubvera malango ya Yahova. w19.06 6 ¶13; 7 ¶17

Kumbukirani bza phindu lomwe iwo angakhale nalo akapfunza bzomwe Bibliya limbapfunzisa. Mukambalewalewa nawo, mumbawatetekere na kulemekeza bzomwe iwo angalewe. Mukambacita bzimwebzi, imwepo mudzakwanisa kuwabvesesa bwino-bwino ndipo iwo an’dzakhala wakukonzeka kutetekera bzomwe mungawauze. Nthawe zinango kuti munthu abvume kupfunza Bibliya, ifepano pinango tingafunike kuphatisa basa nthawe pabodzi na mphanvu zathu kuti timbacite maulendo yakubwereza. Thangwe ranyi? Thangwe ndakuti pinango iwo ambakhala alibe kukonzeka kuti atitambire pa ulendo bwakubwereza. Ndipo pinango imwepo mungafunike kucita ulendo bwakubwereza kazinji kense pomwe munthuyo akanati kubvuma kupfunza Bibliya. Kumbukirani, kuti muti ukule pambafunika kuuthirizira. Mpsibodzi-bodzimbo, lufoyi la wanthu kwa Yahova na Kristu lingakule tikambawazungira mwakubwereza-bwereza. w19.07 14 ¶1; 15-16 ¶7-8

Kodi Jezu akhafuna kulewa ciyani na mafalaya? Iye akhalewa lini kuti Akristau angadakomedwa thangwe ra kuwengedwa. Koma iye akhaticenjeza bzinthu bzomwe bzingadaticitikira. Ifepano timbacita lini mbali ya dziko. Koma timbaphatisa basa mapfunziso ya Jezu pa moyo wathu ndipo timbapalizira bzipsa bzomwe iye adapalizirambo. Ndipopa dziko limbatiwenga. (Ju. 15:18-21) Koma ifepano timbafuna kukondwesa Yahova. Tenepo, ifepano tiribe nabzo basa wanthu akambatiwenga thangwe ra kufuna kwathu Yahovako. Ndipo tin’funika lini kumbakumbuka kuti ndife wakusaya kufunika penu winango ambatifuna lini. Ifepano tikudziwa lini kuti ni lini tin’dzayamba kuzunzidwa ayai pomwe maboma yan’dzaletsa kunamata kwathu Yahova. Koma comwe tikudziwa n’cakuti tin’funika kukonzekera kuyambira lero kuti tilimbise uxamwali bwathu na Yahova mwakukhala wakukhwimika na kudziwa momwe tingakhalire na wanthu omwe ambatiwenga. Kukonzekera komwe tin’cita kuyambira tsapano, kun’dzatithandiza kupitiriza kutumikira Yahova kutsogolo. w19.07 6-7 ¶17-18, 21

Tikambapfunza Bibliya na wanthu omwe ambanamata lini, tin’funika kupitiriza kuwathandiza kuti akulise cikhulupiro cawo cakuti Mulungu alipo. Tin’funikambo kuwathandiza kuti ambakhulupire Bibliya. Bzimwebzi bzikulatiza kuti nthawe zinango tin’funika kumbalewa mwakubwereza-bwereza bzomwe timbapfunzisa. Pa pfunziro liri-lense, timbalatize umboni bwakuti Bibliya ni Fala la Mulungu mwa kuwauuza mapolofesiya ya m’Bibliya yomwe yadakwanisika kale, kubverana kwa nkhani za m’Bibliya likambalewa bza siyensiya, momwe Bibliya limbatithandizira pa moyo wathu na bzinthu bzinango. Tingathandize wanthu kukhala anyakupfunza wa Kristu mwa kuwalatiza lufoyi cairo, bziribe basa penu iwo ambanamata ayai ne. (1 Wak. 13:1) Tikambawapfunzisa, cakulinga cathu n’cakuwalatiza kuti Mulungu ambatifuna ndipo an’funa kuti ifepano timufunembo. Gole liri-lense, wanthu azinji omwe kale-kale akhafuna pang’ono ayai ne na pang’onopo bzakunamata, ambapfunza kufuna Mulungu ndipo ambabatizidwa. Ndipopa tin’funika kukhala na makhalidwe yabwino, kulatiza lufoyi wanthu wense na kuwatetekera akambafotoza makumbukidwe yawo. Timbabvesese thangwe lomwe limbawacitisa kukumbuka tenepo. Ndipo na ciratizo cathu, tiwapfunzise kuti akhale anyakupfunza wa Kristu. w19.07 24 ¶16-17

Yahova adaphatisa basa wana wacikazi wa Salumu kuti amange litsito la Jeruzalemu. (Neh. 2:20; 3:12) Napo kuti pai wawo akhali nduna, wanawo akhali wakukonzeka kuphata basa lakunesa na lakugopswa. (Neh. 4:15-18) Nsiku zino, mpfumakazi zizinji zimbalatizambo nyongo imweyi. Izo zimbakomedwa kuthandizira mabasa yakusiyana-siyana, ninga, kuphata basa la kumanga-manga na kukonza-konza mbuto zakudzongeka pa nyumba zakunamatira. Tenepo, luso, kubzipereka na kukhulupirika kwa mpfumakazizi kumbathandizira kwene-kwene kuti basa lathu lifambe bwino. Mkazi munango omwe adaphatisidwa basa na Yahova ni Tabita. Bibliya limbalewa kuti ‘iye akhacita mabasa yabwino ndipo akhathandiza wanthu azinji omwe akhali wakusauka.’ (Mab. 9:36) Pakuti akhali wakupasa na wakudeka mtima, wanthu azinji, maka-maka mansiwa, adadandaula kwene-kwene pomwe iye adafa. Koma pomwe mpostolo Pedru adamulamusa, iwo adakomedwa kwene-kwene. (Mab. 9:39-41) Kodi tikupfunza ciyani na ciratizo ca Tabita? Tikupfunza kuti tensenefe, maswaka na mkhalamba, amuna na akazi, tin’funika kuphatisa basa bzinthu bzomwe tinabzo kuti tithandize abale na mpfumakazi zathu. w19.10 23 ¶11-12

Kodi tingakhukhumudwise tani winango? Kumbukirani cakucitikaci: Nyakupfunza wa Bibliya omwe bzikhamunesa kumalisa cizolowezi ca kumwa mowa, koma na kupita kwa nthawe adadzakwanisa kumalisa cizolowezico. Iye wazindikira kuti an’funika lini pomwe kumwa mowa ne na pang’onopo. Ndipo wacinja bzinthu bzizinji pa moyo wace acibatizidwa. Patsogolo pace, m’bale munango wakonza madyo ndipo wacemera m’baleyo ku madyoko, ndipo ankumupasa mowa, acimbati: “Tsapano iwepo ndiwe Mkristau; una mzimu wakucena wa Yahova. Ndipo kubziretsa ni khalidwe libodzi la cisapo ca mzimu. Ukambakhala wakubziretsa bzindzakuthandiza kumwa mowa mwakusaya kupitirira malire.” Kumbukirani bzakutewera bzakuipa bzomwe bzingabwere thangwe m’bale mupsayi kubvera malangoya! Bzomwe timbapfunza pa mitsonkhano bzimbatithandiza kuwona bzinthu bzomwe Yahova ambabziwona kukhala bzakufunika. Ndipo timbapfunza momwe tingaphatisire basa bzomwe timbapfunzabzo kuti tileke kukhala wakuphonya. Pomwe timbalimbisidwa na abale wathu, lufoyi lathu kwa Mulungu na kwa abale wathuwo limbayenda licikula. Tikambafuna Yahova na abale wathu na mtima wense, tin’dzacita nyongo yakutcenkha kukhukhumudwisa abale wathu. w19.08 10 ¶9; 11 ¶13-14

Wanthu omwe ambawoneka ninga kuti ambabzikhulupira ndipo ambacita lini manyazi kulewa bzomwe ambadziwa, bzin’funa lini kulewa kuti iwo mbakubzikuza. (Ju. 1:46, 47) Napo bziri tenepo, iwo an’funika kumbasamala kwene-kwene kuti aleke kumbathemba nzeru zawo. Tsono bziribe basa penu ndife wamanyazi ayai ne, tensenefe tin’funika kucita nyongo kuti tikhale wakubzicepswa. Kumbukirani ciratizo ca mpostolo Paulo. Yahova adamuphatisira basa kuti akhazikise magwere m’mizinda yakusiyana-siyana. Tenepo, tikupenukira lini kuti iye adacita bzinthu bzizinji pa basa lakupalizira kuposa apostolo winango wa Jezu. Napo bzikhali tenepo, Paulo alibe kubziwona kukhala wapadzulu kuposa apostolo anzacewo. Patsogolo pace, Paulo adalewa mwakusaya kubisa kuti iye adakhala pa uxamwali na Yahova thangwe ra kudeka mtima kukulu kwa Yahovayo, sikuti thangwe ra luso lomwe akhanalo ayai bzinthu bzomwe adacita. (1 Wak. 15: 10) Paulo akhali ciratizo cabwino pa nkhani yakubzicepsa. Timbadziwa bzimwebzi thangwe ra tsamba lace lomwe adanembera Akristau wa ku Kolinto, iye alibe kubzibweresera mbiri, napo kuti amuna winango wa m’gwere akhafuna kulatiza kuti akhadziwa bzinthu kwene-kwene kuposa Pauloyo!​—2 Wak. 10:10. w19.09 3 ¶5-6

Thangwe libodzi lomwe lingacitise kuti bzitinese kubvera Yahova ndakuti tensenefe tina pikado ndipo ndife wakuperewera. Ndipopa nthawe zinango timbacita bzinthu bzomwe Mulungu ambabzifuna lini. Mwa ciratizo, pomwe Adamu na Eva alimbe kubvera Mulungu mwakudya cisapo comwe adawaletsa, iwo adabzisankhulira okha bzabwino na bzakuipa. (Ciy. 3:22) Nsiku zino, wanthu azinji ambabvera lini Yahova, iwo ambandocita bzomwe ambafuna. Nthawe zinango, kubvera Yahova kungakhale kwakunesa napo kwa wale omwe ambamudziwa na kumufuna. Mpostolo Paulo akhabzibvambo tenepo. (War. 7:21-23) Ninga Paulo, ifepano timbafuna kucita bzomwe Yahova ambabziwona kukhala bzabwino. Koma tin’funika kucita nyongo yakumbalimbana na makumbukidwe yakufuna kucita bzinthu bzakuipa. Thangwe linango lomwe lingatitazise kubvera Yahova, ni cikhalidwe cathu na komwe tidakulira. Mwa ciratizo, nzeru za wanthu zimbapitana na bzomwe Yahova ambakumbuka, ndipo kawiri-kawiri timbafunika kucita nyongo kuti tileke kutengeka nazo. w19.09 15 ¶4-6

Tin’funika kuzindikira kuti mphanvu za ali-wense wa ifepano zina malire. Ndipopa tin’funikambo kusamala pa bzomwe tingacite na mphanvu zathuzo. Mwa ciratizo, tingadzonge mphanvu zathu papezi mwa kumbatsanda kubzigwezekera bzinthu bzakuthupi. Kumbukirani bzomwe Jezu adauza tswaka lakudala lomwe lidamubvunza kuti: ‘Kodi n’ciyani comwe nin’funika kucita kuti ndidzatambire moyo wakusaya kumala?’ Bzikuwoneka kuti iye akhali munthu wabwino, thangwe bukhu la Bzipsa Bzabwino bza Marko limbalewa kuti Jezu ‘adam’funa.’ Tenepo, Jezu adamuuza mafala yomwe yali pa vesi ya nsiku ya leroya. Mwamunayo akhafuna kukhala mteweri wa Jezu, tsono alibe kukwanisa thangwe ‘akhana bzinthu bzizinji.’ (Mar. 10:17-22) Ndipo mpsakupasa nsisi kuti iye adalamba kunyamula mtolo omwe Jezu adamupasa ndipo adapitiriza kuphatira basa ‘cuma.’ (Mat. 6:24) Apa tani mungadakhala ndimwepo, kodi mungadasankhula kucita ciyani? Nthawe zensene, ifepano tin’funika kumbakumbira kuti mpsiponi bzinthu bzomwe timbaikha pa mbuto yakuyamba pa moyo wathu. Thangwe ranyi? Thangwe bzimwebzi bzin’dzatithandiza kuwona penu tikuphatisa basa bwino mphanvu yathu ayai ne. w19.09 24 ¶17-18

Ifepano tin’pitiriza kupalizira mpaka Yahova adzalewe kuti basali lamalira pano. Kodi zasala nthawe zingasi kuti wanthu adziwe Yahova Mulungu pabodzi na Jezu Kristu? (Ju. 17:3) Tikudziwa lini. Koma bzomwe tikudziwa mpsakuti mpaka kuyamba kwa citsautso cikulu, wense omwe ana makumbukidwe ‘yabwino yomwe [yangawathandize] kukagumana moyo wakusaya kumala’ angabvume bzipsa bzabwino. (Mab. 13:48) Kodi tingathandize tani wanthu amwewa pomwe nthawe ikalipo? Yahova mwakuphatisa basa gulu lace, ambatipasa bzinthu bzense bzomwe timbafunikira kuti tipfunzisire wanthu cadidi. Mwa ciratizo, ifepano timbapfunzisidwa mdzinga uli-wense pa mtsonkhano omwe umbacitika pakati pa mdzinga. Pa mtsonkhanoyu timbathandizidwa momwe tingayambisire maceza, kucita ulendo bwakubwereza na kucitisa mapfunziro ya Bibliya. Kuthumizira bzimwebzi, gulu la Yahova limbatipasa Bzinthu Bzomwe Timbapfunzisira. Mwa ciratizo, pambuyo pakuceza na munthu omwe akufunisisa kudziwa bzizinji, mugawireni katsamba ayai revista kuti asale aciwerenga mpaka pa ulendo bwaciwiri. Ali-wense wa ifepano an’funika kupitiriza kupalizira bzipsa bzabwino bza Umambo mwezi uli-wense. w19.10 9 ¶7; 10 ¶9-10

Simiyoni, mwamuna omwe akhali wakukalamba na wakukhulupirika mu Jeruzalemu, adauzidwa na Yahova kuti angadafa lini akanati kuwona Mesiya. Bzikuwoneka kuti Simiyoni adalimbisidwa kwene-kwene na piciro lomwe akhalidikhira kwa magole mazinji. Tenepo, Yahova adasimba kwene-kwene kukhulupirika na kupirira kwa mwamunayu. Nsiku inango, mwakuthandizidwa na mphanvu ya ‘mzimu,’ Simiyoni adayenda ku templo. Kumweko iye adawona tcece Jezu, ndipo Yahova adaphatisa basa Simiyoni kuti alewe bza tcecero kuti lingadadzakhala Kristu. (Lu. 2:25-35) Napo Simiyoni adafa Jezu akanati kuyamba utumiki bwace, iye adatenda kwene-kwene thangwe rakuti Yahova adamuphatisa basa mu njira imweyi. Ndipo kutsogoloku an’dzatambira bzisimbo bzizinji! M’dziko lipsa, mwamuna wakukhulupirikayu an’dzawona momwe utongi bwa Jezu bun’dzabweresera bzisimbo kuna wanthu wense pa dziko la pansi. (Ciy. 22:18) Ifepano tin’funikambo kumbatenda mwayi uli-wense omwe Yahova ambatipasa mwakutiphatisa basa m’gulu lace. w19.10 22 ¶7; 23 ¶12

Tensenefe tin’funika kukhotcerera mtima wathu, bziribe basa penu ndife wakudala ayai wakusauka. Kodi tingacite tani? Lekani kubvuma kuti cikhumbo cakufunisisa kobiri cikule mu mtima mwanu. Ndipo lekani kuwona basa lanu kukhala lakufunika kwene-kwene kuposa kutumikira Yahova. Kodi mungadziwe tani kuti bzimwebzi bzikucitika kwa imwepo? Mungabzibvunze kuti: ‘Ndikakhala pa mitsonkhano ayai mu utumiki bwakumunda, kodi nimbandokumbukira bza basa langu? Kodi nimbafuna kukoya kobiri zizinji kuti ndireke kudzabonera kutsogolo? Kodi kobiri na bzinthu bza kuthupi bzikubweresa mabvuto m’banja mwangu? Kodi ningabvume kuphata basa lomwe winango ambalinyoza kuti ndikhale na nthawe izinji pa kutumikira Yahova?’ (1 Tim. 6:9-12) Mukambacita mibvunzoyi, mbakumbukirani kuti Yahova ambatifuna kwene-kwene, ndipo iye wapicira wense omwe ambanamata iye yekha basi kuti: ‘Nin’dzakusiyani lini na pang’onopo ne kukuthawani.’ Na thangwe limweri mpostolo Paulo adanemba kuti: ‘Moyo wanu ukhale wakusaya kufunisisa kobiri.’​—Waheb. 13:5, 6. w19.10 29 ¶10

Ifepano tikambaphata basa pabodzi na abale wathu na kuwona makhalidwe yawo yabwino, tin’dzapfunza bzizinji ndipo lufoyi lathu kwa iwo lin’dzathimizirika, ninga momwe bzidacitikira Jeremiya na Baruke. Mwa ciratizo, kodi mumbabzibva tani mukambapalizira pabodzi na m’bale wanu mu utumiki bwakumunda, ndipo iye akambafotokoza mwakukhwimika bzomwe ambakhulupira ayai akambalewa na mtima wace wense bzomwe Yahova an’dzacita kutsogoloku? Mwakusaya kupenukira, bzimwebzi bzimbacitisa kuti lufoyi lanu na iye lithimizirike. Adeline mpfumakazi yomwe ina magole 23 yakubadwa, iyo idakumbira xamwali wace wakucemeredwa Camila kuti akapalizire ku gawo lomwe likufunikira apalizi azinji. Adeline adalewa kuti: “Ifepano tikhafuna kupalizira ndipo tikhafunambo utumiki bwathu. Awirife tikhafunika kulimbisidwa mwauzimu.” Kodi ndiponi phindu lomwe iwo adagumana thangwe ra kuphata basa pabodzi? Adeline adati: “Kuphampha kwa nsiku iri-yense, ifepano tikhambaceza nkhani zakulimbisa zomwe tagumana nabzo mu utumiki ndipo tikhawona na pafupi momwe Yahova ambatsogolerera basa lathu lakupalizira. Kulewa cadidi, ifepano tikhakomedwa thangwe maceza yomwe tikhacita yakhali yabwino ndipo yadatithandiza kuti tidziwane bwino.” w19.11 5 ¶10-11

Mu nthawe zakale-kale, mcikunda omwe akhakhwimika pa nkhondo akhalemekezedwa kwene-kwene. Koma akabwerera kumui alibe mkhotco, akhakhala wakunyozeka. Mfotokozi winango wa nkhani za Roma adanemba kuti: “Mcikunda omwe akhasiya mkhotco wace ku nkhondo akhalemekezedwa lini ne na pang’onopo.” Ndipopa acikunda akhafunika kuphatisisa bwino mikhotco yawo. Ifepanombo tin’funika kuphatisisa mkhotco wa cikhulupiro cathu. Kodi tingacite tani? Mwa kumbagumanika pa mitsonkhano mwakukhazikika na kumbauza winango bza Yahova na Umambo bwace. (Waheb. 10:23-25) Kuthimizira bzimwebzi, tin’funika kumbawerenga Bibliya nsiku zense. (2 Tim. 3:16, 17) Tikacita bzimwebzi, palibe cifuzo ciri-cense comwe Sathani ambaphatisa basa comwe cingadzatidzonge. (Zai. 54:17) ‘Mkhotco mkulu wa cikhulupiro’ cathu un’dzatikhotcerera. Ndipo ciphatano cathu na abale pabodzi na mpfumakazi zathu cin’dzakhala cakulimba kwene-kwene. Tin’dzakunda nkhondo zomwe timbacita zakulimbisa cikhulupiro cathu, ndipo kuposa bzense, tin’dzakhala na mwayi wakuwona Jezu akukunda nkhondo yakulimbana na Sathani pabodzi na ateweri wace.​—Cibv. 17:14; 20:10. w19.11 19 ¶18-19

Mukambanemba bzomwe mukukhumba kucita, bzin’dzakhala bzakusaya kunesa kubzikwanirisa. (1 Wak. 14:40) Mwa ciratizo akulu wa gwere adatambira malango ya momwe angaikhire pa udindo mkulu mwanzawo kuti ambanembe cakusankhula ciri-cense comwe akuluwo angacite. Mkulu wakusankhulidwayo ambanemba omwe wasankhulidwa kuti acite basa linango, na nthawe yakukhazikisidwa kuti alikwanirise. Akulu akambanemba ndandanda, bzimbakhala bzakusaya kunesa kucita bzomwe asankhula. Tenepo, imwepo mungacitembo bzibodzi-bodzibzi pa moyo wanu wa nsiku na nsiku. Mwa ciratizo, munganembe bzomwe mukufuna kucita pa nsiku iri-yense, ndipo mukamala nembani cinthu cakuyambirira comwe mukufuna kucita. Mukacita bzimwebzi, mun’dzakwanisa kumaliza bzomwe mwayamba kucita na nthawe yabwino. Koma mun’funika kucita nyongo. Kuti titeweze na kumaliza bzomwe tayamba kucita, pambafunika nyongo. (War. 12:11) Mpostolo Paulo adauza Timotio kuti ‘pitiriza kukhala wakubzipereka pa kuwerenga’ na kukhala mpfunzisi wabwino. Malangoya njabwino, ndipo ifepano tingayaphatise basa pomwe tikufuna kucitira Yahova bzinthu bzense bzabwino bzomwe tingakwanise.​—1 Tim. 4:13, 16. w19.11 29-30 ¶15-16

Pomwe Yahova adauza Mozeji kuti ayende kukalombola Ajirayeri omwe akhali pa ukapolo ku Edjipito, Mozeji adacita mantha ndipo mwakubwereza-bwereza adauza Yahova kuti akhathemera lini kucita basalo. Tsono thangwe ra ntsisi, Yahova adabvesesa momwe Mozeji akhabvera ndipo adamuthandiza. (Kuf. 4:10-16) Kodi bzakutewera bzace bzidakhala bziponi? Mozeji adakwanisa kucita basa lomwe Mulungu adamuuza lakudziwisa Farawo mafala ya ciyeruzo. Patsogolo pace, Mozeji adawona Yahova akuphatisa basa mphanvu zace zakudabwisa mwa kupulumusa Ajirayeri, acipfudza Farawo pabodzi na acikunda wace wamphanvu pa Nyanza Ifuira. (Kuf. 14:26-31; Psal. 136:15) Pomwe Ajirayeri adalomboledwa ku Edjipito, kawiri-kawiri akhandokhalira kudandaula. Napo bzikhali tenepo, Mozeji akhawona kupirira komwe Yahova akhacita. (Psal. 78:40-43) Mozeji adawonambo kubzicepesa kukulu kwa Yahova pomwe Yahovayo adabvuma kucinja makumbukidwe yace, thangwe ra kuuzidwa na Mozejiyo. (Kuf. 32:9-14) Kucokera nthawe imweyi, uxamwali bwa Mozeji na Yahova budakhala bwamphanvu kwene-kwene, ndipo kwa Mozeji bzikhali ninga kuti akhawona Baba wace wakudzulu.​—Waheb. 11:27. w19.12 17 ¶7-9

Anyakupfunza azinji wa Jezu akhali wa ku Galileya. Tenepo, bzingadakhala lini bzakunesa kutsonkhana na wanthu azinji pa phiri la Galileya, kusiyana na kutsonkhanira kumui kwa munthu ku Jeruzalemu. Ndipo Jezu akhadawonekera kale kwa anyakupfunza wace 11 m’nyumba inango ku Jeruzalemu. Jezu angadafuna kupereka lamulo lakupalizira na kupfunzisa wanthu kokha kwa anyakupfunza wace, iye angadacita bzimwebzo ku Jeruzalemu. Ndipo angadafunika lini kuuza apostolo wace, akazi pabodzi na wanthu winango kuti akagumane naye ku Galileya. (Lu. 24:33, 36) Lamulo lakupfunzisa wanthu liribe kuperekedwa kokha kwa akristau wakuyambirira. Kodi tikudziwa tani bzimwebzi? Pomwe Jezu adapereka lamulolo kwa anyakupfunza wace, iye adamaliza na mafala yakuti: ‘Ine ndiri pabodzi na imwe ntsiku zentse mpaka kuphampha kwa dzikoli.’ (Mat. 28:19, 20) Ntsiku zino wanthu azinji akucita basa lakupfunzisa winango kuti akhale anyakupfunza wa Kristu. Mwa ciratizo, wanthu pafupi-fupi 300.000 pa gole liri-lentse, ambabatizidwa kuti akhale Mboni za Yahova na anyakupfunza wa Jezu Kristu. w20.01 2 ¶1 3 ¶5-6

Matenda, kuluza basa na kukalamba ni bzinthu bzomwe bzingatitazise kucita bzizinji pa kutumikira Yahova. Penu imwepo mukugumana na mabvuto ninga yamweya, pinango mungabziwone kuti ndimwe lini wakufunika na pang’onopo. Mabvuto ninga yamweya yangakucitiseni kuleka kukhala wakukondwa, kuleka kubziwona kukhala wakufunika ndipo yangadzonge mbverano omwe ulipo pakati pa imwepo na winango. Dzikoli likulatiza momwe Sathani ambawonera moyo. Kuyambira kale-kale, Sathani ambacita bzinthu bzomwe bzimbacitisa wanthu kubziwona kuti mbakusaya kufunika. Pakuti iye ngwakuipa basi, adauza Eva kuti angadakhala na ufulu bwakubzisankhulira bzinthu, angadaleka kubvera Mulungu, napo kuti Sathaniyo akhadziwa bwino kuti Evayo angadacita bzimwebzo, angadafa. Ndipo pakuti Sathani ndiye omwe akutsogolera nkhani za malonda, za ndale na za bzipembedzo bza m’dzikoli, mpsakudabwisa lini kuwona anyakucita malonda, wandale na atsogoleri wa bzipembedzo akucita bzinthu ninga momwe iye ambacitira, bzomwe bzimbalatiza kuti iwo ambalemekeza lini moyo ne wanthu anzawo. Yahova an’funa kuti ifepano timbabziwone kuti ndife wakufunika ndipo iye ngwakukonzeka kutithandiza tikagumana na mabvuto.​—War. 12:3. w20.01 14-15 ¶1-4

Kwa magole yakupitirira 40, Jeremiya adakhala na wanthu omwe akhakhulupira lini Mulungu. Wanthuwo akhali wakufendererana nawo nyumba, ndipo winango wa iwo pinango akhali abale wace omwe akhakhala mu mzinda wa Anatoti omwe iye adabadwira. (Jer. 11:21; 12:6) Napo bzikhali tenepo, iye alibe kubziwona kuti akhali yekha. M’mbuto mwace, iye akhauza munembi wace Baruke momwe akhabvera, ndipo ifepano tikudziwa bzimwebzi thangwe bzidanembedwa m’Bibliya. (Jer. 8:21; 9:1; 20:14-18; 45:1) Bzikuwoneka kuti Baruke na Jeremiya akhafunana ndipo akhalemekezana kwene-kwene, ndipopa Baruke adakwanisa kunemba bzinthu bzense bzomwe bzikhacitika pa moyo wa Jeremiya. (Jer. 20:1, 2; 26:7-11) Jeremiya adacenjeza Ajirayeri bza kupfudzidwa kwa Jeruzalemu kwa magole mazinji. (Jer. 25:3) Tsono Yahova adapereka mpata wakumalizira kuti wanthu wace akungule. Tenepo iye adauza Jeremiya kuti anembe pa mpukutu matsoka yense yomwe yangadagwera Ajirayeri, iwo angadasaya kukungula. (Jer. 36:1-4) Pomwe Jeremiya na Baruke akhaphata pabodzi basa lomwe Mulungu akhadawapasali, iwo akhalimbisana na maceza yomwe akhacita, thangwe pinango, adamala minyezi mizinji akucita basali. w19.11 2-3 ¶3-4

Kodi tin’funika kumbawawona tani Akristau wakudzozedwa? Mpsakuphonyeka kutumbiza ayai kulemekeza munthu mwakupitirira malire, napo akhale Mkristau wakudzozedwa. (Mat. 23:8-11) Kumbukirani ciratizo ca akulu wa gwere. Bibliya limbatiuza kuti timbatewezere ‘cikhulupiro cawo,’ tsono limbatiuzambo kuti tin’funika lini kumbawona munthu ali-wentse ninga mtsogoleri wathu. (Waheb. 13:7) N’cadidi kuti Bibliya limbalewa kuti abale winango ambathemera kupasiwa ‘ulemu bukulu.’ Bzimwebzi bzimbacitika thangwe rakuti iwo ‘ambatsogolera bwino’ ndipo ‘ambaphata basa la kulewalewa na kupfunzisa na nyongo,’ sikuti thangwe ra kukhala wakudzozedwa. (1 Tim. 5:17) Tenepo, tikatumbiza na kulemekeza mwakupirira malire Mkristau wakudzozedwa, tin’dzamucitisa kuleka kukhala wakutsudzuka. Ayai tin’dzawacitisa kukhala wakubzikuza. (War. 12:3) Tenepo, tin’funika lini kucitisa ne m’bodzi wa abale wa Kristuwa kukhala na khalidwe limweri!​—Lu. 17:2. w20.01 29 ¶8

Mpostolo Paulo akhana mathangwe mazinji yakucitira thupo. Mabvuto yomwe abale na mpfumakazi akhagumana nayo yakhamucitisa thupo kwene-kwene. (2 Wak. 2:4; 11:28) Wanthu omwe akhamutsutsa, kawiri-kawiri akhamumenya acimbamuikha m’kawoko. Iye adapirirambo mabvuto yomwe yakhamucitisa thupo, ninga ‘[kusaya]’ bzinthu bzakuthupi. (Waf. 4:12) Ndipo pakuti akhadalubzika kale m’nyanza katatu kentse, iye akhacita thupo kwene-kwene akafamba na ngalawa. (2 Wak. 11:23-27) Kodi n’ciyani comwe cikhathandiza Paulo akakhala na thupo? Paulo akhacita thupo na abale na mpfumakazi zace thangwe ra mabvuto yomwe iwo akhagumana nayo, koma iye alibe kuyezera kuyamalisa yekha mabvutoyo. Paulo akhadziwa kuti angadacita lini ciri-centse mwa iye yekha. Tenepo iye adakumbira anzace wakukhulupirika ninga Timotio na Tito kuti amuthandize kusamalira gwere. Kulewa mwakusaya kupenukira, basa lomwe abalewa akhacita, lidacepesa thupo la Paulo.​—Waf. 2:9, 20; Tito 1:1, 4, 5. w20.02 23 ¶11-12

Yahova akufuna kuti wana ambabvere abereki wawo, ndipo iye akufunambo kuti ifepano timbamubvere. Tin’funika kumbabvera Yahova thangwe iye ni Mulengi, ambasamalira moyo wathu ndipo ngwanzeru kwene-kwene kuposa abereki wentse. Koma kuposa bzentse, lufoyi ndiro limbaticitisa kuti timbabvere Yahova. (1 Ju. 5:3) Napo kuti pana mathangwe mazinji yomwe yangaticitise kubvera Yahova, iye ambatingingimiza lini kucita bzimwebzo. Yahova adatipasa ufulu bwakusankhula kucita bzomwe tingafune, ndipopa iye ambakomedwa kwene-kwene tikambamubvera thangwe ra kumufuna. Abereki ambafuna kuti wana wawo akhale wakukhotcerereka. Ndipopa iwo ambakhazikisa malamulo kuti yakhotcerere wanawo. Tsono wanawo akabvera malamuloyo, ambalatiza kuti ambakhulupira na kulemekeza aberekiwo. Tenepo, mpsakufunikambo kwene-kwene kwa ifepano kudziwa na kubvera malamulo ya Baba wathu wakudzulu. Tikacita bzimwebzi, timbalatiza kwa Yahova kuti timbamufuna na kumulemekeza ndipo timbagumanambo phindu pa moyo wathu. (Zai. 48:17, 18) Koma wale omwe ambalamba Yahova na malamulo yace, bzimbawamalira kuipa.​—Wag. 6:7, 8. w20.02 9-10 ¶8-9

Ninga Abigayeli, ifepanombo tin’funika kukhala wakukhwimika kuti tikwanise kulewalewa na munthu omwe wayamba kucita bzinthu bzakuphonyeka. (Psal. 141:5) Koma pakucita bzimwebzo, tin’funika kumbalewalewa mwaulemu. Tenepo, tikambapereka malango kuna munthu, timbalatiza kuti ndife axamwali wacadidi. (Mim. 27:17) Akulu wa gwere an’funika kukhala wakukhwimika kuti akwanise kulewalewa na wale omwe ayamba kucita bzinthu bzakuphonyeka. (Wag. 6:1) Akuluwo ambayebwa lini kuti mbakuperewerambo ndipo nthawe zinango iwo angafunikirembo malango. Koma bzimwebzi bzimbawatazisa lini kupereka malango kwa omwe akufunikira. (2 Tim. 4:2; Tito 1:9) Akulu akambapereka malangoyo, ambaphatisa basa luso lawo lakulewalewa ndipo ambathandiza m’bale ayai mpfumakazi mwaulemu na mwakudeka mtima. Iwo ambacita bzimwebzi thangwe ra kufuna abalewo. (Mim. 13:24) Koma cinthu cakufunika kwene-kwene comwe cimbacitisa akuluwo kupereka malango, ni kucita thupo na kupswipizidwa kwa dzina la Mulungu. Ndipopa iwo ambakhotcerera malamulo yace pabodzi na gwere ku ngozi iri-yentse yomwe ingabwere.​—Mab. 20:28. w20.03 20 ¶8-9

Yahova adacitisa Mozeji kukhala mpulumusi kwa Ajirayeri. Kodi ni nthawe iponi yomwe Yahova adaphatisa basa Mozeji? Kodi ni nthawe yomwe Mozeji akhabzibva kukhala wakuthemera pambuyo pa kupfunzisidwa ‘nzeru zense za Aedjipito’? (Mab. 7:22-25) Ne, Yahova adaphatisa basa Mozeji kokha pambuyo pa kumupfunzisa kukhala munthu wakubzicepswa na wakupfatsa. (Mab. 7:30, 34-36) Yahova adathandiza Mozeji kukhala wakukhwimika kuti akakwanise kulewalewa na mtongi wamphanvu wa Edjipito. (Kuf. 9:13-19) Bzimwebzi bzikulatiza kuti Yahova ambaphatisa basa wale omwe ambatewezera makhalidwe yace na kuthemba mphanvu zace. Kuyambira kale-kale, Yahova ambacitisa atumiki wace kukhala bzomwe iye akufuna kuti acite bzinthu bzizinji. Kodi iye an’dzacitisa imwepo kukhala ciyani? Bzimwebzi bzimbathemba nyongo yomwe imwepo mumbailatiza. (Wakol. 1:29) Mukabzipereka, Yahova an’dzacitisa imwepo kukhala mpalizi wa nyongo, nyakutsangalaza wabwino, nyabasa waluso, mpfunzisi waluso, xamwali wakuthandiza, ayai cinthu cinango ciri-centse comwe iye angafune, kuti acite bzomwe akufuna. w19.10 21 ¶5; 25 ¶14

Axamwali wabwino angatithandize kupitiriza kukhala wakukhulupirika kwa Yahova. Tsono kuti tikhale na axamwali wabwino, tin’funika kuyamba ndifepano kukhala wabwino. (Mat. 7:12) Mwa ciratizo, Bibliya limbatilimbisa kuti timbaphatise basa nthawe na mphanvu zathu kuti tithandize winango, maka-maka wale omwe ‘[mbakusaya].’ (Wayef. 4:28) Tikambatanganidwa na kuthandiza winango, tin’dzakhala wakukondwa. (Mab. 20:35) Axamwali wathu angatithandize tikagumana na mabvuto na kupitiriza kukhala na mtendere wa mu mtima. Ciratizo pa nkhaniyi ni Eliu omwe adatetekera Djobi pomwe akhafotokoza bza mabvuto yace. Mpsibodzi-bodzimbo na ifepano, axamwali wathu angatithandize mwa kutitetekera mwatceru tikambawauza bza mabvuto yathu. (Djobi 32:4) Tin’funika lini kumbadikhira kuti axamwali wathu atiuze bzakucita, koma tin’funika kumbaphatisa basa mwanzeru malango yawo yakucokera m’mabukhu yakulewa bza Bibliya. (Mim. 15:22) Ndipo ninga Mambo Davide omwe mwakubzicepswa adabvuma thandizo la axamwali wace, ifepano tin’funika lini kumbabzikuza axamwali wathu akambatipasa thandizo. (2 Sam. 17:27-29) Kulewa cadidi, kukhala na axamwali ninga amwewa ni mphaso yakucokera kwa Yahova.​—Tiy. 1:17. w19.04 11 ¶12; 12 ¶14-15