Setembro

Kodi ciratizo ca Yahova na Jezu ca kuphata basa mwamphanvu cikulatiza kuti tin’funika lini kumbapuma? Ne ndibzo lini! Yahova ambaneta lini, ndipo pambuyo pakucita basa liri-lentse iye ambafunikira lini kupuma. Koma Bibliya limbalewa kuti, pomwe Yahova adamala kulenga kudzulu na dziko la pantsi, ‘iye adapuma pa basa lace.’ (Kuf. 31:17) Mafalaya yakuthandauza kuti Yahova adaima kulenga bzinthu acipambula nthawe kuti awonesese bzentse bzomwe adakonza. Ndipo Jezu pomwe akhali pano pa dziko la pantsi, adaphatambo basa kwene-kwene, koma akhapambula nthawe yakupuma na yakudya pabodzi na axamwali wace. (Mat. 14:13; Lu. 7:34) Bibliya limbalimbikisa atumiki wa Mulungu kuti ambaphate basa. Iwo an’funika lini kukhala atofu, koma ambaphate basalo na nyongo. (Mim. 15:19) Penu imwepo ndimwe msolo wa banja, mun’funika kuphata basa kuti mukwanise kusamalira banja lanu. Ndipo anyakupfunza wentse wa Kristu ana udindo bwa kupalizira bzipsa bzabwino. Napo bziri tenepo, iwo an’funika kukhala na nthawe yakukwanira yakupuma. w19.12 2 ¶2; 3 ¶4-5

Mbatcenkhani kuuza anzanu nkhani zakubverana na madimonyo. Jezu ni ciratizo cabwino pa nkhani imweyi. Pomwe Jezu akhanati kubwera pansi pano, iye akhali kudzulu, ndipo akhadziwa bwino Sathani pabodzi na madimonyo. Tsono iye akhandokhalira lini kumbafotokozera wanthu bzomwe mizimu yakuipayo idacita. M’mbuto mwace, Jezu akhafuna kucitira umboni Yahova, sikuti kutsatsa mabasa yakuipa ya Sathani. Tenepo, ifepano tingatewezere Jezu mwa kumbatcenkha kumwaza nkhani zakulewa bza madimonyo. Ndipo timbalatize na mafala yathu kuti ‘mtima [wathu ukukondwa] thangwe ra nkhani yabwino’ yomwe njacadidi. (Psal. 45:1) Lekani kumbagopa mizimu yakuipa. M’dziko tinkukhalali, bzimbaticitikira bzinthu bzizinji bzakuipa. Mwa ciratizo, ngozi za pa mseu, matenda ayai infa ya mwadzidzidzi. Tsono bzikaticitikira, tin’funika lini kumbakumbuka kuti ni mizimu yakuipa yomwe yacitisa bzimwebzo. Bibliya limbalewa kuti ‘nthawe na bzinthu bzakusaya kudikhirika bzimbagwera wanthu wense.’ (Mpal. 9:11) Yahova adalatiza kuti ngwamphanvu kwene-kwene kuposa madimonyo. w19.04 24 ¶13-14

Kodi akulu wa gwere ambateweza lamulo la boma lakudziwisa bomalo penu munthu wapswitha mwana? Inde. M’madziko manango muna lamulo lomwe limbalewa kuti munthu akadziwa kuti mwana wapswithidwa ambakauze boma. Ndipo akulu wa m’madziko yamweya ambabvera lamulolo. Kucita bzimwebzi kungakhale lini kuphonyera cakutonga ca Mulungu. (Mab. 5:28, 29) Tenepo munthu akauza akulu wa gwere kuti mwana wapswithidwa, akuluwo mwakamfulumize an’funika kudziwisa cipinda ca mthambi kuti adziwe bzomwe angacite mwakubverana na lamulo la boma. Akulu akambalewalewa na mwana omwe wapswithidwa pabodzi na abereki wace, ayai munthu munango omwe wadziwa bza kupswithidwa kwa mwanayo, mwakudeka mtima an’funika kuwakumbusa kuti bzingakhale bwino kuyendesa nkhaniyo ku boma. Tsono tani penu munthu omwe wapswitha mwanayo ni m’bale ayai mpfumakazi ya m’gwere ndipo nkhaniyo yadziwika m’mudzi momwe ambakhala? Kodi Mkristau omwe wazimbula nkhaniyo an’funika kubzipasa mulandu wakuti ndiye wacitisa kuti mbiri ya Yahova idzongeke? Ne. Thangwe kupswitha mwana ni ibodzi mwa pikado zomwe zimbapswipizisa dzina la Mulungu. w19.05 10-11 ¶13-14

Bibliya limbalangiza mwamuna na mkazi kuti ambalemekezane na kulemekezambo malowozi yawo. Iro limbalimbisa anyakulowolana kuti apitirize kukhala pabodzi, mwakulewa kuti: ‘Mwamuna an’dzasiya baba wace na mai wace, acidzaphatana na mkazace, ndipo awiriwo an’dzakhala thupi libodzi.’ (Ciy. 2:24) Mwa kusiyana na nzeru zimwezi, wanthu omwe ambapumpsidwa na nzeru za dzikoli ambawona mwakusiyana nkhani imweyi, iwo ambalewa kuti ali-wense omwe ali pa banja an’funika kumbakumbukira bzakusaya bzace sikuti bza mwanzace. Bukhu linango lomwe limbalewa bza kulambana limbati: “Lumbiro lomwe anyakulowolana ambacita pa malowozi yawo lakuti ‘pomwe tense awiri tikana moyo’ lidapitidwa m’mbuto na lumbiro lakuti kulowolana ni ‘pomwe awirife tikadafunana.’” Pakuti wanthu ambawona malowozi kuti njakusaya kukhalisa, tenepo, mabanja yambalambana ndipo manango yambadzongeka. Bzimwebzi bzinkulatiziratu padeca kuti, wanthu wa dzikoli ambawona mwakuphonyeka nkhani ya malowozi. w19.05 23 ¶12

Mpostolo Paulo akhana thupo na Akristau winango, thangwe bzinkuwoneka kuti winango wa iwo akhatengeka na makumbukidwe yakuphonyeka na nzeru za wanthu zomwe zimbalimbisidwa na dziko la Sathaniri. (Wayef. 4:17-19) Bzimwebzi bzingacitikembo na ali-wense wa ifepano. Thangwe ranyi? Thangwe ndakuti Sathani omwe ni mulungu wa dzikoli, ankucita ciri-cense kuti aticose m’gulu la Yahova ndipo iye ambaphatisa basa bzinthu bzakusiyana-siyana. Mwa ciratizo, Sathani akazindikira kuti tina ka mtima kadyera ayai timbafuna kubvekera, iye angaphatise basa bzinthu bzimwebzi kuti atiyeze. Ndipo iye angaphatisembo basa bzinthu bzinango bzomwe timbabzidziwa pa moyo wathu, cikhalidwe cathu ayai mapfunziro yomwe tidacita kuti tikhale na makumbukidwe ninga yace. Kodi tingakwanise tani kucosa m’makumbukidwe mwathu ‘bzinthu bzakuzika kwene-kwene?’ (2 Wak. 10:4) Paulo adatawira kuti: ‘Tinkupfudza makumbukidwe na [bzinthu bzense bzomwe bzinkutsutsana] na cidziwiso ca Mulungu, ndipo tinkuikha m’kawoko makumbukidwe yense kuti tiyacitise kubvera Kristu.’ (2 Wak. 10:5) Kulewa cadidi, na thandizo la Yahova ifepano tingakwanise kucosa makumbukidwe yathu yakuipa. w19.06 8 ¶1-3

Napo kuti adagumana na mabvuto mazinji, Ana, Davide na munembi wa Psalymo akhathemba thandizo la Yahova. Iwo akhacita bzimwebzi mwa kumbapemba kwa Yahova, acimbamuuza thupo lawo. M’mipembomo iwo akhamuuza mathangwe yomwe yakhawacitisa thupo. Ndipo alibe kuleka kumbayenda ku m’mbuto yakunamatira Yahova. (1 Sam. 1:9, 10; Psal. 55:22; 73:17; 122:1) Yahova adabvera nsisi wense atatu, ndipo adawapasa thandizo lomwe akhafunikira. Ana adakhala na mtendere wa mu mtima. (1 Sam. 1:18) Davide adanemba kuti: ‘Nyakulungama ambagumana na matsoka mazinji, koma Yahova ambamupulumusa pa matsoka yenseneyo.’ (Psal. 34:19) Ndipo munembi wa Psalymo ule adabzibva kuti Yahova akhadaphata ‘boko [lace] lamadidi,’ acimutsogolera na malango ya lufoyi. (Psal. 73:23, 24) Kodi tinkupfunza ciyani na bziratizobzi? Tinkupfunza kuti nthawe zinango ifepano tin’dzalemedwa na mabvuto yomwe yan’dzaticitisa thupo kwene-kwene. Tsono tin’dzayakunda tikambakumbukira momwe Yahova adathandizira winango, tikambapemba kwa iye, na kumubvera.​—Psal. 143:1, 4-8. w19.06 17 ¶14-15

Lekani kubvuma kuti mafala yali-yense yomwe wanthu ambalewa ayai bzomwe iwo ambacita, bzikucitiseni manyazi thangwe ra kukhala Mboni ya Yahova. (Mik. 4:5) Kumbukirani bziratizo bza apostolo ku Jeruzalemu pomwe Jezu adaphedwa. Iwo akhadziwa momwe atsogoleri wacipembedzo ca Cidjuda akhawawengera kwene-kwene. (Mab. 5:17, 18, 27, 28) Napo bzikhali tenepo, apostolowo alibe kulekeza kumbayenda ku templo ndipo iwo adalatiza padeca kuti akhali anyakupfunza wa Jezu thangwe akhapalizira. (Mab. 5:42) Iwo alibe kubvuma kuti mantha yawatazise kupalizira. Tenepo, ifepanombo tingakunde mantha mwa kumbabzidziwikisa kuti ndife Mboni za Yahova, ku basa, ku xikola na komwe timbakhala. (Mab. 4:29; War. 1:16) Thangwe ranyi apostolo akhakomedwa? Iwo akhadziwa thangwe race akhawengedwa, ndipo akhawona kuti ni cinthu cakufunika kwene-kwene kuwengedwa thangwe ra kucita kufuna kwa Yahova. (Lu. 6:23; Mab. 5:41;1 Pe. 2:19-21; 3:14) Tenepo, tikazindikira kuti tikuwengedwa thangwe ra kucita bzinthu bzabwino, tin’funika lini kusiya kutumikira Yahova thangwe rakuti wanthu ankutiwenga. w19.07 7 ¶19-20

Jezu pabodzi na ateweri wace akhakoya Ntsiku ya Malinkhuma thangwe iwo akhabvera lamulo lomwe Ajirayeri adapasidwa na Mozeji. Koma Jezu adalatiza mwa mafala na bzicito kuti lamulo lakukoya Ntsiku ya Malinkhuma, likhaletsa lini kudekera mtima munthu na kuthandiza winango. (Mat. 12:9-11) Iye akhawona kuti bzikhali lini bzakuphonyeka kudekera mtima na kuthandiza winango pa Ntsiku ya Malinkhuma. Bzomwe Jezu akhacita bzidalatiza kuti akhabvesesa thangwe lomwe lidacitisa Yahova kupereka kwa Ajirayeri lamulo lakukoya Ntsiku ya Malinkhuma. Tenepo, kupuma komwe Ajirayeriwo akhacita pa ntsikuyi, kukhawapasa mpata kuti akwanise kunamata Mulungu. Jezu adakulira pa banja lomwe likhana cizolowezi cakuphatisa basa Ntsiku ya Malinkhuma kuti linamate Yahova. Ifepano timbadziwa bzimwebzo thangwe Bibliya limbalewa bza Jezu pomwe akhali mu mzinda wa Nazaleti omwe iye adabadwira, iro limbati: ‘Ninga cizolowezi cace, pa ntsiku ya Malinkhuma adapita mu sinagoga ndipo adaima kuti awerenge.’ (Lu. 4:15-19) Ndipo Anyakupfunza wa Jezu akhalemekeza kwene-kwene lamulo la kukoya Ntsiku ya Malinkhuma, ndipopa iwo adadikhirira kuti ntsikuyi ipite patsogolo pace apitirize kusamalira thupi la Jezu.​—Lu. 23:55, 56. w19.12 4 ¶10

Mkristau ali-wense ana udindo bwakuthandizira basa la kufufudza wanthu wakuthemera. Tingandendemezere basa limweri na wanthu omwe ambanyang’ana mwana akakhala wataika. Mu njira iponi? Kumbukirani ciratizoci: Mwana munango wa magole matatu yakubadwa wacoka pamui ndipo wataika. Wanthu wakukwana 500 abzipereka kuti anyang’ane mwanayo. Pakumalizira pace, pambuyo pa phindi 20, mwanayo agumanidwa m’munda na munthu munango. Munthuyo akufuna lini kutumbizidwa na wanthu thangwe ra bzimwebzi. Ndipo iye akulewa kuti: “Mwanayi awoneka thangwe tense tathandizira kuti iye awoneke.” Wanthu azinji ali ninga mwana wakutaika ule. Iwo alibe cidikhiro, koma akufuna kuthandizidwa. Tensene wakukwana 8 midyau tinkuphata basa lakunyang’ana wanthu wakuthemera. Pinango imwepo munkugumana lini munthu omwe akufuna kupfunza namwe Bibliya. Koma apalizi winango ankugumana munthu omwe akufuna kupfunza cadidi ca m’Fala la Mulungu mu gawo libodzi-bodziro. M’bale ayai mpfumakazi, akagumana munthu omwe na kupita kwa nthawe ambadzakhala nyakupfunza wa Kristu, wensene omwe adathandizirambo pa basa lakunyang’ana wanthu wakuthemera ambakhalambo wakukondwa. w19.07 16-17 ¶9-10

Mpostolo Paulo adakumbusa Akristau wa ku Firipo kufunika kwakupitiriza kuthamanga mwakupirira, thangwe wanthu wa ku Firipo akhazunza Akristauwo kuyambira pomwe gwere lidakhazikisidwa. Bzense bzidayamba mu gole la 50 mu nthawe ya Jezu, pomwe Mulungu adatsogolera Paulo na Sila kuyenda ku ‘Masedoniya.’ (Mab. 16:9) Kumweko iwo adagumana mkazi munango wakucemeredwa Lidiya, omwe akhambawatetekera ndipo ‘Yahova adafungula mtima wace kuti abvesese’ bzipsa bzabwino. (Mab. 16:14) Ndipo mwakusaya kutenga nthawe, iye pabodzi na wanthu wa m’banja mwace adabatizidwa. Koma Dyabu mwakusaya kucedwa, adabweresa mabvuto kwa Paulo na Sila. Wanthu wa mu mzinda adawakwekweta aciyenda nawo kwa akulu-akulu wa boma, ndipo adawanamizira mulandu wakuti akhabweresa phiringu mu mzindamo. Ndipo ninga bzakutewera bzace, Paulo na Sila adamenyedwa, adaikhidwa m’kawoko ndipo adauzidwa kuti acoke mu mzindamo. (Mab. 16:16-40) Kodi iwo adabwerera mbuyo? Ne alibe! Apa tani bza abale na mpfumakazi zomwe zikhali za gwere lomwe likhadakhazikisidwa tsapanopa? Mwakusaya kupenukira, iwo adalimbisidwa kwene-kwene na ciratizo ca Paulo na Sila. Tenepo, iwo adapirirambo! w19.08 2 ¶1-2

Mwakusaya kupenukira, ‘bzisapo bzakulungama’ bzikhaphatanidza lufoyi lawo kwa Yahova na kuna wanthu wace. Ndipo lufoyiro limbaphatanidzambo momwe timbalewalewera na wanthu winango pa bzomwe timbakhulupira pakulewa bza Jezu na cidikhiro comwe tinaco. Timbabala ‘bzisapo bzakulungama’ tikambacita basa lakufunika lomwe ndakupfunzisa wanthu. (Mat. 28:18-20) Bziribe basa momwe bzinthu bziriri pa moyo wathu, ifepano tingakwanise kuyetima ninga mibvuniko. Nthawe zinango, cinthu comwe cingawoneke ninga cakutiphingiza kupalizira bzipsa bzabwino, cingatipase mpata wakupalizira. Mwa ciratizo, mpostolo Paulo adanembera tsamba Akristau wa ku Firipo pomwe akhali m’kawoko ku Roma. Napo kuti iye akhali m’kawoko alibe kusiya kupalizira alindiri na wanthu omwe akhabwera kudzamuzungira. Paulo adapalizira na nyongo mwakubverana na momwe bzinthu bzikhaliri pa moyo wace, ndipo bzimwebzi bzidathandiza abale kukhala wakukhulupirika na wakukhwimika ‘pakulewalewa mafala ya Mulungu mwakusaya mantha.’​—Waf. 1:12-14; 4:22. w19.08 12 ¶15-16

Thangwe likulu lomwe limbaticitisa kukhala wakubzicepswa ni kufuna kukondwesa Yahova. Mpostolo Pedru adabvekesa bwino nfundo imweyi pomwe adanemba mafala ya mu vesi la ntsiku ya lero. Bukhu lakuti “Bwera Ukhale Wotsatira Wanga” limbafotokoza mafala yomwe mpostolo Pedru adalewa pa msolo  3, ndime 23 yakuti: “Kubzikuza kuli ninga veneno, ndipo kumbadzonga bzinthu bzizinji. Ni khalidwe lomwe lingacitise munthu wa luso kwene-kwene kukhala wakusaya kufunika kwa Mulungu. Koma munthu wakubzicepswa napo angawoneke kukhala wakunyozeka, ambakhala wakufunika kwene-kwene kwa Yahova. . . . [Ndipo iye] an’dzakupasani mabaibai mwakukomedwa thangwe ra kubzicepswa kwanu.” Kodi ciripo cinthu cakufunika kwene-kwene kuposa kukondwesa Yahova? (Mim.  23:15) Tikakhala wakubzicepswa timbagumana phindu pa moyo wathu, Yahova ambakomedwa ndipo wanthu angafune kukhala nafe pa uxamwali. Mungacite tani bzimwebzi? Kumbukirani makhalidwe yomwe wanthu winango anayo yomwe yambakuderani.​—Mat. 7:12. w19.09 4 ¶8-9

Akulu wa gwere ambaphata basa na nyongo kuti athandize abale na mpfumakazi zawo. Ndipo iwo ambabziwona lini kukhala wakufunika kwene-kwene kuposa abale wawo thangwe ra udindo bomwe anabo. M’mbuto mwace, iwo ambacita bzinthu na abale m’gwere mu njira yabwino kwene-kwene. (1 Wat. 2:7, 8) Ndipo thangwe ra lufoyi na kubzicepswa, iwo ambakwanisa kudziwa momwe angalewelewere na winango. Andrew omwe ankutumikira ninga mkulu kwa magole mazinji, adati: “Inepano ndidazindikira kuti mkulu wa gwere akambadekera mtima winango na kukhala wakucezeka, bzimwebzi bzimbatokonya mitima ya abale. Makhalidweya yambacitisa gwere kuti likhale lakuphatana na akulu.” Ndipo Tony omwe ankutumikirambo ninga mkulu adalewa kuti: “Inepano nimbayeza kuphatisa basa malango ya pa Wafiripo 2:3 ndipo nthawe zense nimbacita nyongo yakumbawona winango kukhala wakundiposa. Bzimwebzi bzimbandithandiza kutcenkha kungingimiza winango kuti ambandibvere.” Akulu wa gwere an’funika kukhala wakubzicepsa ninga momwe Yahova aliri. Napo kuti Yahova ni Mtongi wa cirengedwe cense, iye ‘ambabuluka m’nyansi’ ndipo ‘ambadzusa wakubzicepswa ku pfumbi.’ (Psal. 18:35; 113:6, 7) Ndipopa Yahova ambakomedwa lini na wanthu wakubzikuza na wakusamwa. w19.09 16-17 ¶11-12

Ifepano tin’dzapitiriza kugumana mtsangalazo tikanyamula djoki la Jezu mwakumbawona bzinthu m’njira yakuthemera. Pakuti basa lomwe timbacita nda Yahova, iro lin’funika kumbacitidwa mwakubverana na kufuna kwa Yahovayo. Ifepano ndife anyabasa, ndipo iye ni omwe ambatipasa malango ya momwe tingacitire lacero. (Lu. 17:10) Tenepo, kuyeza kuphata basa la Yahova mu njira yathu-yathu, bzingakhale bzibodzi-bodzi kumenyana na djoki. Ifepano tikambacita bzinthu bzomwe Yahova ambakomedwa nabzo, tin’dzakwanisa kukunda mabvuto yomwe tikhayadikhirira lini. Ndipo kumbukirani kuti palibe omwe angatazise Yahova kucita bzomwe iye akufuna kuti bzicitike! (War. 8:31; 1 Ju. 4:4) Cakulinga cathu cin’funika kukhala cakupasa mbiri Baba wathu, Yahova. Wanthu wa mu nthawe ya Jezu omwe akhaphata basa na dyera ayai thangwe ra bzikhumbo bzawo, adasunama ndipo adasiya kunyamula djoki la Jezu. (Ju. 6:25-27, 51, 60, 66; Waf. 3:18, 19) Koma mwakusiyana na iwo, wanthu omwe akhaphata basa thangwe ra lufoyi na Mulungu pabodzi na kufuna anzawo, adapitiriza kunyamula djoki la Jezu mwakukondwa kwa moyo wawo wense pa dziko la pansi, ndipo adakhala na cidikhiro cakudzatonga pabodzi na Kristu kudzulu. Ninga wanthu omwe akhana lufoyiwa, ifepano tikapitiriza kunyamula djoki la Jezu na cakulinga cabwino, tin’dzaphata basa mwakukondwa. w19.09 20 ¶1; 24-25 ¶19-20

Kumbukiranimbo bzisimbo bzomwe mungakhale nabzo thangwe ra kutsudzuka ku bzipfunziso bzakunama. (Ju. 8:32) Mpsabwino kwene-kwene kukhala na ufulu bumwebu, ndibzo lini? Tikutsimikiza na mtima wentse kuti wanthu azinji an’dzatsudzulidwa. Ndipo tsapanopapa, Jezu an’pfudza cipembedzo cakunama pabodzi na maboma yakusaya cirungamo yomwe yalipoya. Pa nthawe imweyi, Mulungu an’dzakhotcerera ‘thimu likulu la wanthu’ lomwe likumutumikira, ndipo an’dzalisimba na moyo wabwino pano pa dziko la pantsi. (Cibv. 7:9, 14) Wanthu bzulu na bzulu an’dzumusidwa, ndipo an’dzakhala na mwayi wakutsudzulidwa ku bzinthu bzentse bzakuipa bzomwe bzimbacitika thangwe ra pikado ya Adamu. (Mab. 24:15). Mkati mwa Utongi bwa Jezu bwa Magole 1.000, iye pabodzi na wentse omwe an’dzatonga naye pabodzi, an’dzathandiza wanthu kukhala na thanzi labwino na uxamwali bwakulimba na Mulungu. Pa nthawe yakubwezeresa na yakutsudzulidwayi, in’dzakhala ninga Gole la ufulu yomwe ikhacitika mu nthawe ya Ajirayeri. Bzimwebzi bzikuthandauza kuti wanthu wentse omwe akutumikira Yahova mwakukhulupirika, an’dzakhala wakulungamiratu ndipo an’dzatsudzulidwa ku pikado. w19.12 12-13 ¶14-16

M’magole dzana yakutoma, mwamuna munango wakucemeredwa Zuze (lomwe likhali dzina linango la Barnaba), adakhala wakukonzeka kuphatisidwa basa na Yahova. (Mab. 4:36, 37) Pomwe Saulo adakhala MKristau, abale azinji akhagopa kumufenderera thangwe iye akhazunza omwe akhakhulupira Kristu. Koma Barnaba adamutsangalaza ndipo adamuthandiza mwalufoyi ndipo mwakusaya kupenukira Sauloyo adatenda kwene-kwene thandizolo. (Mab. 9:21, 26-28) Pa nthawe inango, abale omwe akhakhala kutali na mzinda wa Antiyokiya wa ku Siriya, akhafunikira mtsangalazo. Tenepo, akulu wa ku Jeruzalemu adatumiza munthu kuti akawazungire. Kodi mun’dziwa kuti adatumiza yani? Barnaba! Iwo adasankhula bwino. Thangwe ranyi tikulewa tenepo? Thangwe ndakuti Bibliya limbalewa kuti Barnaba ‘adayamba kulimbisa wanthu wense kuti apitirize kukhala wakukhulupirika kwa Mbuya na mtima wawo wense.’ (Mab. 11:22-24) Nsiku zino, Yahova angatithandizembo kuti titsangalaze abale pabodzi na mpfumakazi zathu. Mwa ciratizo, iye angatiphatise basa kuti titsangalaze omwe afedwa, nyakusunama ayai nyakuduwala mwa kumuzungira ayai kumupfuwira mtedwe. Kodi imwepo mungabvume kuti Yahova akuphatiseni basa ninga momwe adacitira na Barnaba?​—1 Wat. 5:14. w19.10 22 ¶8

Nthawe zinango tikambaphata basa pabodzi na axamwali wathu, timbakwanisa kuwona sikuti kokha makhalidwe yawo yabwino, koma timbawonambo bzakuphonya bzawo. Tsono n’ciyani comwe cingatithandize kuti tipitirize kukhala nawo pa uxamwali? Ifepano tin’funika lini kudikhirira kuti abale na mpfumakazi zathu zikhale zakulungamiratu. Ndipopa, ifepano tikakhala pa uxamwali na winango, tin’funika kucita nyongo yakukulisa uxamwali bwathubo kuti bupitirize kukhala bwakulimba. Tenepo, xamwali wathu akaphonya, tin’funika kumuthandiza mwa kumupasa malango yabwino yakucokera m’Bibliya. (Psal. 141:5) Ndipo akatiphonyera, tin’funika kumulekerera. Tikamulekerera, tin’funika kutcenkha kuuza winango ne kudzamukumbusa bzomwe adatiphonyerabzo. Nsiku zakumalizira zino, mpsakufunika kwene-kwene kuti timbawone bzabwino bzomwe abale wathu ambacita, sikuti bzomwe iwo ambaphonya! Tikacita bzimwebzi, uxamwali bwathu na iwo bun’dzakhala bwakulimba. Ndipo cikadzafika citsautso cikulu, tin’dzathandizana. w19.11 6 ¶13, 16

Pakucitisa mapfunziro ya Bibliya, tin’funika kucita ciri-cense comwe tingakwanise kuti tipfunzise wanthu kuti ‘akhale anyakupfunza . . . , na kuwapfunzisambo kukoya bzinthu bzense bzomwe [Jezu adatiuza].’ Ndipo tin’funikambo kuthandiza wanthu kuti abvesese kuti mpsakufunika kwene-kwene kwa iwo kusankhula kutumikira Yahova na kuthandizira Umambo bwace. Bzimwebzi bzikuthandauza kuthandiza wanthuwo kuti aphatise basa bzomwe ambapfunza, na kubzipereka kwa Yahova acibatizidwa. Tenepo iwo akacita bzimwebzi, an’dzapulumuka pa nsiku ya Yahova. (1 Pe. 3:21) Kandosala kanthawe kang’ono-ng’ono kuti dziko lakuipali lipfudzidwe. Na thangwe limweri, ifepano tin’funika lini kuluza nthawe na kupfunzisa wanthu Bibliya omwe an’funa lini kucinja moyo wawo kuti atumikire Yahova. (1 Wak. 9:26) Basa lathu lin’funika kuphatidwa mwakamfulumize! Wanthu azinji an’funika kubva bzipsa bza Umambo pomwe madzi yakali m’mabondo. w19.10 11-12 ¶14-15

Ntsiku Yakumpsinkha Pikado ikafika, Ajirayeri akhakonkhana ndipo mkulu wa ansembe akhapereka nsembe ya bzifuwo. Nsembeyo ikhathandiza Ajirayeriwo kukumbukira kuti akhafunika kucenesedwa pikado zomwe akhacita! Koma cakuyamba, mkulu wa nsembe akhakukhuthula pa masimbe ya moto bzakununcirisa mwakusamala kwene-kwene, ndipo m’Cipindamo mukhanuncira bwino. Kodi tikupfunza ciyani na bzimwebzi? Bibliya limbalewa kuti mipembo yomwe Yahova ambabvuma ya atumiki wace wakukhulupirika iri ninga bzakununcirisa. (Psal. 141:2; Cibv. 5:8) Kumbukirani kuti mkulu wa ansembe akhapita na ulemu pomwe akhayenda kukaikha bzakununcirisa pamaso pa Yahova. Mpsibodzi-bodzimbo na ifepano, tikapemba kwa Yahova tin’funika kumbalatiza ulemu. Tenepo, timbatenda kwene-kwene kuti Mulengi wa cirengedwe cense ambafuna kuti timufenderere na kukhala naye pafupi ninga momwe mwana ambacitira na babace. (Tiy. 4:8) Iye ambabvuma kuti tikhale axamwali wace! (Psal. 25:14) Umweyu ni mwayi ukulu kwene-kwene, tenepo tin’funika kutcenkha kucita cinthu ciri-cense comwe cingamusunamise. w19.11 20-21 ¶3-5

Kodi komwe mumbakhala wanthu ambawona tani nkhani ya basa? M’madziko mazinji, wanthu akuphata basa kwene-kwene ntsiku zino kuposa m’mbuyomu. Wanthu amwewa, ambakhala alibe nthawe yakupuma, yakuceza na mabanja yawo ne yakupfunza bza Mulungu. (Mpal. 2:23) Tsono alipo wanthu winango omwe ambafuna lini kuphata basa ndipo ambanyang’ana mathangwe kuti aleke kuphata basalo. (Mim. 26:13, 14) Yahova na Jezu ambawona mwakusiyana kwene-kwene nkhani ya basa na momwe wanthu wa m’dzikoli ambaliwonera. Ifepano timbadziwa kuti Yahova ambafuna kuphata basa. Jezu adatsimikizira nfundo imweyi pomwe adalewa kuti: ‘Baba wangu akupitiriza kuphata basa mpaka pano.’ (Ju. 5:17) Kumbukirani basa lomwe Mulungu adacita pomwe adalenga anjo wakusaya kulewengeka, nyenyezi na dziko la pantsi. Timbawonambo bzinthu bzizinji bzakudeka bzomwe Mulungu adalenga pa dziko lomwe tikukhalali. w19.12 2 ¶1-2

Kodi Davide adacita tani kuti akhale pa uxamwali bwakulimba na Yahova? Davide adapfunza na cirengedwe ca Yahova. Pomwe Davide akhali tswaka, nthawe zizinji akhakhala ku busa acimbasamalira mabira ya pai wace. Pinango ni nthawe imweyi yomwe iye adayamba kukumbukira bza cirengedwe ca Yahova. Mwa ciratizo, pomwe Davide akhanyang’anisa kudzulu usiku, iye akhawona bzinthu bzizinji sikuti kokha bzulu na bzulu bza nyenyezi. (Psal. 19:1, 2) Pomwe Davide akhakumbukira momwe iye na wanthu winango adakonzedwera, adakwanisa kuwona nzeru zakudabwisa zomwe Yahova anazo. (Psal. 139:14) Ndipo pomwe akhakumbukira bzinthu bzomwe Yahova adalenga, adafika pakubziwona kuti akhali lini cinthu pakubzindendemezera na Yahovayo. (Psal. 139:6) Kodi tikupfunza ciyani na ciratizo ca Davide? Tikupfunza kuti, tin’funika kumbapambula nthawe kuti timbawone bzinthu bzakudeka bzomwe Yahova adabzilenga pa dzikoli, ticimbakumbukirambo bzomwe mungapfunze na Yahova mwakuphatisa basa cirengedwe comwe ciri pafupi nafe ninga miti, bzirombo na wanthu. Tikacita tenepoyo, pa ntsiku iri-yentse tin’dzapfunza bzinthu bzizinji bza Baba wathu wa lufoyi. (War. 1:20) Ndipo nakupita kwa nthawe, mun’dzawona kuti lufoyi lomwe munalo kwa Yahova lin’dzathimizirika. w19.12 19-20 ¶15-17

Mozeji adasankhula kutumikira Mulungu. Pomwe Mozeji akhana magole yakukwana 40, adasankhula kukhala ku mbali ya wanthu wa Mulungu, omwe akhali Ajirayeri, m’mbuto mwa kufuna kudziwika ninga ‘mwana wa mwana wacikazi wa Farawo.’ Iye adalamba kukhala munthu wakubvekera. Mwa kuthandizira Ajirayeri omwe akhali pa ukapolo ku Edjipito, Mozeji akhadziwa kuti Farawo angadakomedwa lini na bzimwebzo, thangwe Farawoyo akhali mambo wamphanvu ndipo Aedjipito akhamuwona ninga mulungu. Bzimwebzi bzikulatiza kuti Mozeji akhana cikhulupiro camphanvu! Iye akhathemba Yahova. Ndipo kumuthembako kudamucitisa kuti akhale pa uxamwali bwakulimba na Yahovayo kwa moyo wace wentse. (Mim. 3:5) Kodi tikupfunza ciyani na ciratizo ca Mozeji? Tikupfunza kuti, ninga Mozeji, ifepano tin’funika kusankhula kutumikira Mulungu na kukhala ku mbali ya wanthu wace. Kutumikira Yahova kumbafuna kubzipereka, thangwe nthawe zinango wanthu omwe ambadziwa lini Yahovayo angatitsutse. Koma tikakhulupira Baba wathu wakudzulu, iye an’dzatithandiza!​—w19.12 17 ¶5-6

Napo ifepano tidalengedwa na pfumbi, koma kwa Yahova ndife wakufunika kwene-kwene kuposa pfumbiro. Kodi timbadziwa tani bzimwebzi? Timbadziwa thangwe rakuti Yahova adalenga wanthufe na luso lakuti timbatewezere makhalidwe yace. (Ciy. 1:27) Mwakucita bzimwebzi, iye adaticitisa kukhala wakufunika kwene-kwene kuposa cakulengedwa ca moyo ciri-centse ca pano pa dziko la pantsi, ndipo adatipasambo udindo bwakusamalira dziko na bzirombo. (Psal. 8:4-8) Napo kuti Adamu adaphonya, Yahova akupitiriza kuwona wanthu kukhala wakufunika kwene-kwene. Kodi timbadziwa tani bzimwebzi? Timbadziwa thangwe rakuti Yahova adapereka Mwana wace wakufunidwa, Jezu ninga ntsembe kuti atilombole ku pikado zathu. (1 Ju. 4:9, 10) Ndipo thangwe ra ntsembeyo, Yahova an’dzalamusa wanthu omwe adafa thangwe ra pikado ya Adamu, ‘wakulungama na wakusaya kulungama.’ (Mab. 24:15) Fala la Mulungu limbalatiza kuti ifepano ndife wakufunika kwa Yahova, bziribe basa penu tikuduwala, tidasauka ayai tidakalamba.​—Mab 10:34,35. w20.01 15 ¶5-6

Cidikhiro cakudzayenda kukakhala kudzulu n’cakupasirana lini napo wanthuwo akhale wa dzinza libodzi. Koma nyakudzozedwa ambapasidwa cidikhiroci na Mulungu. (1 Wat. 2:12) Tenepo tcenkhani kucita mibvunzo yomwe ingasunamise wanthu wa m’banja mwawo. Mwa ciratizo, tin’funika lini kubvunza mkazi wa nyakudzozedwa mbvunzo ninga uyu: “Kodi mumbabzibva tani mukakumbukira bza kudzakhala na moyo wakusaya kumala pano pa dziko la pantsi, pa nthawe yomwe mwamuna wanu an’dzakhala ali kudzulu?” Kulewa mwakusaya kupenukira, ifepano timbatsimikiza na mtima wentse kuti m’dziko lipsa Yahova an’dzapereka ‘cakukhumba ca bza moyo bzentse.’ (Psal. 145:16) Tikambacita bzinthu mwakuthemera na Akristau wakudzozedwa, sikuti kumbawawona kukhala wakufunika kwene-kwene kuposa winango, ifepano timbakhala wakukhotcerereka. Mwa njira iponi? Bibliya limbatiuza kuti Akristau winango wakudzozedwa pinango angapitirize lini kukhala wakukhulupirika. (Mat. 25:10-12; 2 Pe. 2:20, 21) Tenepo, tikambabvera malango ya kutcenkha ‘kutumbiza munthu,’ tin’dzatewera lini munthuyo, napo akhale wakudzozedwa, wakubvekera kwene-kwene ayai omwe akutumikira Yahova kwa magole mazinji. (Juda 16) Patsogolo pace, iye akadzasiya kukhala wakukhulupirika ayai akadzacosedwa m’gwere, ifepano tin’dzaluza lini cikhulupiro cathu kwa Yahova ne kusiya kumutumikira. w20.01 29 ¶9-10

Pakuti ndife ‘wana wakufunidwa’ wa Yahova, timbacita ciri-centse kuti timutewezere. Timbamutewezera mwa kukhala walufoyi, wakudeka mtima na wakulekerera winango akatiphonyera. Tenepo, wale omwe ambadziwa lini Mulungu akambawona makhalidwe yathu yabwino, pinango angafune kudziwa bzizinji pakulewa bza Mulunguyo. (1 Pe. 2:12) Abereki wacikristau an’funika kumbasamalira wana wawo ninga momwe Yahova ambatisamalirira. Ndipo aberekiwo akambatewezera Yahova, wana wawo an’dzafunambo kukhala pa uxamwali na iye. Mwana omwe ambasamwirira baba wace, ambafunisisa kuuza winango bza babaceyo. Mpsibodzi-bodzimbo na ifepano, thangwe ra kusamwirira Baba wathu omwe ni Yahova, timbafunisisa kuuza winango kuti amudziwembo. Tentsenefe timbabzibva ninga momwe Mambo Davide adabvera, iye adati: ‘Inepano nin’dzalewa bza Yahova mwakucita kusamwirira.’ (Psal. 34:2) Tani penu ndimwe wa manyazi? Kodi mungacite tani kuti mukhale wakukhwimika kuti mulewelewe bza Yahova? Yezerani kukumbukira momwe Yahova ambakondwera tikambalewa bza iye. Ndipo kumbukiranimbo phindu lomwe wanthu angakhale nalo akapfunza bza Yahova. Kumbukiranimbo kuti, penu Yahova adapasa mphanvu Akristau wa m’magole dzana yakuyambirira kuti akhale wakukhwimika, iye an’dzakupasanimbo mphanvu kuti mukhale wakukhwimika.​—1 Wat. 2:2. w20.02 11 ¶12-13

Azinji omwe akupfunza Bibliya akuyenda patsogolo ndipo akubatizidwa. Koma bzikuwoneka kuti winango omwe akupfunza nafe Bibliya mwakukhazikika, akucita mantha kukhala anyakupfunza wa Kristu. Iwo ambakomedwa na kupfunzako, koma akucita lini nyongo kuti afike pakubatizidwa. Tikudziwa kuti imwepo muna anyakupfunza wa Bibliya ndipo mun’funa kuwathandiza kuti aphatise basa bzomwe iwo ambapfunza kuti akhale anyakupfunza wa Kristu. Yahova ambafuna lini kuti wanthu amutumikire mwakucita kungingimizidwa, koma thangwe ra kumufuna. Ndipopa tin’funika kuthandiza anyakupfunza wathu kubvesesa kuti Yahova ambacita nawo thupo ndipo ambawafuna kwene-kwene. Ndipo tin’funikambo kuwathandiza kuti ambawone Yahova ninga ‘baba wa nkhungwa na nyakukhotcerera akazi mantsiwa.’ (Psal. 68:5) Anyakupfunza wanu akazindikira momwe Yahova ambawafunira, iwo an’dzayamba kumufunambo. Tenepo thandizani anyakupfunza wanuwo kubvesesa kuti Mulungu wa lufoyi an’funa kuwapasa moyo wakusaya kumala, ndipo iye ngwakukonzeka kuwathandiza kuti akwanise kudzaugumana moyoyo. w20.01 3 ¶7-8

Mpostolo Paulo akhali wakubzicepesa, ndipopa iye akhabvuma kutsangalazidwa na axamwali wace. Iye akhacita lini thupo kuti wanthu winango angadamulewa kuti ngwakutepa thangwe ra kubvuma kutsangalazidwa na winango pa nthawe zakunesa. (Wakol. 4:7-11)Tikakhala wakubzicepesa na kubvuma kutsangalazidwa, abale na mpfumakazi zathu zin’dzakhala zakutsudzuka kutipasa thandizo lomwe tikufunikira. Paulo akhadziwa kuti mafala ya Mulungu yangadamutsangalaza. (War. 15:4) Mafalayo yangadamupasambo nzeru kuti akwanise kulimbana na mayezo. (2 Tim. 3:15, 16) Pomwe iye akhali m’kawoko ku Roma pa ulendo bwaciwiri, Paulo adadziwa kuti infa yace iri pafupi. Kodi n’ciyani comwe Paulo adacita pa nthawe yakunesayi? Iye adakumbira Timotio kuti amubweresere ‘mipukutu’ mwakusaya kucedwa. (2 Tim. 4:6, 7, 9, 13) Thangwe ranyi? Thangwe ndakuti mipukutuyo ikhana mbali za Bzinembo Bzacihebereu bzomwe Paulo angadaphatisa basa pa pfunziro lace la Bibliya. Tenepo, tikatewezera Paulo mwa kumbapfunza Fala la Mulungu mwakukhazikika, Yahova an’dzaphatisa basa Bibliya kuti atitsangalaze napo tikagumana na mabvuto yakunesa. w20.02 23-4 ¶14-15

Elifazi, Bilidadi na Zofari alibe kulokotera nthawe yomwe akhana Djobi kuti akumbukire momwe angadathandizira. Kodi tikudziwa tani bzimwebzi? Tikudziwa thangwe ra bzomwe iwo adadzalewa patsogolo pace, bzomwe bzikulatiza kuti pa nthawe yomwe adamala ne kulewa cinthu ire, akhanyang’ana njira yakuti agumanire mathangwe yakulewera Djobi kuti akhabonera thangwe rakuti akhadacita bzinthu bzakuipa. Bzinthu bzinango bzomwe amunawa adalewa bzikhali bzacadidi, koma bzizinji bzomwe iwo adalewa bza Djobi na Yahova bzikhali bzakuipa ndipo bzikhali bzakunama. Iwo adalewa kuti Djobi akhali munthu wakuipa. (Djobi 32:1-3) Kodi n’ciyani comwe Yahova adacita? Iye adakalipa kwene-kwene na bzomwe amunawo adalewa. Ndipo adawalewa kuti akhali wapezi-pezi, tenepo adauza Djobi kuti awapempherere. (Djobi 42:7-9) Bzomwe adacita Elifazi, Bilidadi na Zofari, bzikutipfunzisa bzinthu bzizinji. Cakuyamba, tin’funika lini kumbayeruza abale wathu. (Mat. 7:1-5) Koma akambalewalewa tin’funika kumbawatetekera mwakusaya kuwagwata mafala. Tikacita bzimwebzi, tin’dzakwanisa kubvesesa mabvuto yomwe iwo akugumana nayo. (1 Pe. 3:8) Caciwiri, tikambalewalewa, tin’funika kumbawonesesa kuti tikulewa cadidi ndipo mafala yathu yana munyu. (Wayef. 4:25) Cacitatu, Yahova ambafuna kuti bzomwe timbalewa kuna wanthu winango bzikhale bzabwino.​—w20.03 22-3 ¶15-16

Kawiri-kawiri, ifepano timbadziwa bwino Yahova, tikambapfunzisa winango bza iye. Mwa ciratizo, ifepano timbawona ntsisi zomwe Yahova anazo kwa wanthu, pomwe iye ambatithandiza kugumana wale omwe an’funa kukhala axamwali wace. (Ju. 6:44; Mab. 13:48) Timbawona momwe mphanvu ya Fala la Mulungu imbaphatira basa, tikawona anyakupfunza wathu wa Bibliya akucinja bzinthu bzakuipa bzomwe akhacita, aciyamba kubvala unthu bupsa. (Wakol. 3:9, 10) Ndipo ifepano ndife mboni zakuwona na maso bza kupirira komwe Yahova akukulatiza mwa kupasa wanthu azinji wa m’gawo lathu mpata wa kupfunza bza iye acikhala na cidikhiro cakudzapulumuka. (War. 10:13-15) Bziribe basa kuti tikutumikira Yahova kwa magole mangasi, koma tin’funika nthawe zentse kumbalemekeza uxamwali bomwe tinabo na Yahova. Ndipo njira ibodzi yomwe ingalatize kuti timbalemekeza uxamwali bwathubo, ni kumbalewalewa naye mu mpembo. Penu imwepo mun’funa kukhala pa uxamwali na munthu, mun’funika kumbalewalewa naye kawiri-kawiri. Tenepo, kuti mukhale pa uxamwali bwakulimba na Yahova, mun’funika kumbapemba kawiri-kawiri kwa iye, ndipo lekani kumbacita mantha kumuuza bzomwe bziri mu mtima mwanu. w19.12 19 ¶11, 13-14

Kukumbukira mafalaya kumbatitsangalaza kwene-kwene! Ndipo ninga Mambo wa Umambo bwa Mulungu, Jezu an’dzamalisa bzakuipa bzense bzomwe bzimbayambisidwa na Sathani pabodzi na dziko lace lakuipali. (Zai. 65:17; 1 Ju. 3:8; Cibv. 21:3, 4) Bzimwebzi bzimbatipasa cidikhiro cabwino kwene-kwene! Napo Jezu adatipasa basa lakupalizira lomwe ndakunesa, iye anafe pabodzi kuti atithandize pa basali mpaka kuphampha kwa mkonzedwe uno wa bzinthu. (Mat. 28:19, 20) Kudziwa bzimwebzi kumbatilimbisa kwene-kwene. Ndipo mtsangalazo, cidikhiro na cirimbiso ni bzinthu bzakufunika bzomwe bzingatithandize kukhala na mtendere wa mu mtima. Kodi mungacite tani kuti mupitirize kukhala na mtendere wa mu mtima, napo mukasunama thangwe ra mabvuto yakusiyana-siyana yomwe munkugumana nayo? Kutewezera bzomwe Jezu adacita kungakuthandizeni pa nkhani imweyi. Cakuyamba, pitirizani kumbapemba pa bzense bzomwe mungagumane nabzo. Caciwiri, mbabverani Yahova na kupemba kwa iye napo bzikakhala bzakunesa kucita bzimwebzo. Cacitatu, kumbirani axamwali wanu kuti akuthandizeni pa mabvuto yanu. Mukacita bzimwebzi, mtendere wa Mulungu un’dzakhala mu mtima mwanu. (Waf. 4:6, 7) Ndipo ninga Jezu, imwepo mun’dzakunda mayezo yali-yense yomwe mungagumane nayo.​—Ju. 16:33. w19.04 13 ¶16-17