Outubro

Tina umboni buzinji bwakulatiza kuti Yahova ambakhotcerera wanthu wace nsiku zino. Kumbukirani ibzi: Ifepano timbapalizira na kupfunzisa cadidi ca m’Bibliya pa dziko lense la pansi. (Mat. 28:19, 20) Ndipo pakupalizirapo timbacenjeza wanthu bza mabasa yakuipa ya Sathani. Bzingadakhala kuti Sathani ana mphanvu zakusaya malire, iye angadaimisa basa lomwe timbacitali. Tsono iye ambacita lini bzimwebzo thangwe mphanvu zace n’zakucepa. Ndipopa tin’funika lini kumbagopa mizimu yakuipa. Tenepo, tikakhulupirika kwa Yahova, madimonyo yangaticite lini cinthu cakuipa. Tsono tensenefe tin’funika kulimbana na mizimu yakuipa, ticikhulupira Yahova. Tikacita bzimwebzo, tin’dzagumana bzisimbo bzizinji pa moyo wathu, ndipo tin’dzabvuma lini kupumpsidwa na magunkha ya Sathani. Ndipo tin’dzabvumambo lini kuti kugopa madimonyo kutitazise kutumikira Yahova. Kuthumizira bzimwebzi, tin’dzalimbisa uxamwali bwathu na Yahova. Tiyago adanemba kuti: ‘Mutsutseni Dyabu, ndipo iye an’dzakuthawani. Mufenderereni Mulungu ndipo iye an’dzakufendereranimbo.’​—Tiy. 4:7, 8. w19.04 24 ¶15; 25 ¶18

Abereki dziwani kuti wana wanu ni mphaso [‘yakucokera] kwa Yahova.’ Tenepo, Yahova wakupasani udindo bwakukhotcerera wanawo. Tsono n’ciyani comwe mungacite kuti muwakhotcerere kuna wanthu omwe ana msambo wakupswitha wana? Cakuyamba, pfunzani nkhani zomwe zimbalewa bza kupswitha wana. Mbapfunzani bza wanthu omwe ambapswitha wana na bzomwe ambacita kuti awapumpse. Khalani tceru na bzicito bzakuipa ayai na wanthu wakugopswa. (Mim. 22:3; 24:3) Kumbukirani kuti nthawe zizinji, omwe ambapswitha wana ni wanthu wakudziwika na omwe wanawo ambawakhulupira. Caciwiri, mbakhalani wakutsudzuka kuceza na wana wanu ndipo mbawalimbisani kuti aleke kumbacita mantha akambaceza namwe. (Bzak. 6:6, 7; Tiy. 1:19) Kumbukirani kuti wana omwe adapswithidwa kale, kawiri-kawiri ambafuna lini kuuza winango bzomwe bzidawacitikira. Iwo ambacita mantha kuti wanthu angawakhulupire lini, ayai pinango munthu omwe adawapswithayo adawauza kuti akazimbula an’dzawona comwe cidameta nkhanga mpala. Tenepo mukawona cinthu cinango cakuphonyeka kwa wana wanu, abvunzeni mwakudeka mtima kuti akuuzeni, ndipo akambafotokoza mbawatetekerani mwakupirira. Cacitatu, pfunzisani wana wanu. Mbawauzani bzomwe angalewe na kucita munthu akawaphata mu njira yakusaya kuthemera. w19.05 13 ¶19-22

Thangwe ranyi Yahova ambanyansidwa na wanthu wakubzikuza? Thangwe libodzi ndakuti wanthu omwe ambakulisa na kulimbisa khalidwe la kubzifuna mwakunyanyira ambabzikuza ninga Sathani. Mwa ciratizo, kumbukirani momwe Sathani adabzikuzira pomwe adauza Jezu kuti amunamate, napo iye akhadziwa kuti Mulungu adaphatisa basa Jezuyo pakulenga bzinthu bzense. (Mat. 4:8, 9; Wakol. 1:15, 16) Tenepo, wanthu omwe mbakusaya kubzikuza ambatsimikiza na mtima wense kuti nzeru za dzikoli n’za kupusa pamaso pa Mulungu. (1 Wak. 3:19) Bibliya limbatithandiza kuwona momwe tiriri. Iro limbalewa kuti mpsakufunika munthu nthawe zinango kumbabzifunambo. Jezu adalewa kuti: ‘Funa mwanzako ninga momwe umbabzifunira wekha,’ bzimwebzi bzinkulatiza kuti tin’funika kumbabzifuna mwacika-kati. (Mat. 19:19) Tsono Bibliya limbatipfunzisa lini kuti tin’funika kumbabziwona kukhala wakufunika kwene-kwene kuposa winango. Koma iro limbatiuza kuti: ‘Lekani kucita ciri-cense na ndewo ayai na dyera, koma mwa kubzicepswa, mbawonani winango kukhala wakukuposani.’​—Waf. 2:3; War. 12:3. w19.05 24 ¶13-14

Kumbukirani bzinthu bzomwe mudacinja pomwe mudayamba kupfunza cadidi ca Mulungu mucisankhula kumutumikira. Azinji wa ifepano tikhafunika kusiya bzinthu bzinango bzakuipa. (1 Wak. 6:9-11) Ndipopa, timbatenda kwene-kwene Yahova thangwe adatithandiza kusiya bzinthu bzakuipabzo! Tsono, tileke kukumbuka kuti, ‘basi, ndin’funika lini pomwe kucinja, pakuti ndidacinja kale.’ Napo kuti tidasiya kucita pikado zikulu-zikulu zomwe tidacita tinati tabatizidwa, tin’funika kucita nyongo yakutcenkha cinthu ciri-cense comwe cingaticitise kuyamba pomwe kucita pikado zomwe tidasiyazo. Tenepo, pana bzinthu bziwiri bzomwe tin’funika kucita. Cakuyamba, kuleka ‘kutewezera’ ayai kutengeka na dzikoli. Caciwiri, ‘[kusandulika]’ mwa kucinja makumbukidwe yathu. Kucinjako kumbaphatanidza bzinthu bzizinji sikuti kucinja bzinthu bzakunja bzokha. Ndipo kucinjako kumbatokonya mbali zense za moyo wathu. Ifepano tin’funika kucinja na mtima wense, makhalidwe na bzikhumbo bzathu. w19.06 9 ¶4-6

Tikasunama, mitsonkhano ya gwere imbatithandiza kubwezeresa mphanvu. Tenepo tikakhala pa mitsonkhanoyo, timbapasa Yahova mipata yakulatiza kuti iye ni ‘mthandizi na nyakutitsangalaza’ wathu. Ndipo ku mitsonkhanoko ifepano timbalimbisidwa na mzimu wakucena wa Mulungu, Fala lace pabodzi na atumiki wace. Mitsonkhano imbatipasa mipata yakuti timbalimbisane ‘m’cikhulupiro.’ (War. 1:11, 12) Mpfumakazi inango yakucemeredwa Sofia idati: “Yahova pabodzi na abale wathu ambandithandiza kupirira. Ndipopa mitsonkhano ya gwere njakufunika kwene-kwene pa moyo wangu. Ndipo ndidazindikira kuti ndikakhala mu utumiki bwakumunda na pa mitsonkhano, ndimbagumana mphanvu zomwe zimbandithandiza kulimbana na thupo pabodzi na msunamo.” Tikakhala wakusunama tin’funika kukumbukira kuti Yahova alibe kupicira kudzandomalisa thupo lathu kutsogoloku kokha, napo nsiku zino, iye ngwakukonzeka kutithandiza kulimbana na thupolo. Iye ambatipasa ‘mphanvu’ kuti tikwanise kukunda msunamo na thupo.​—Waf. 2:13. w19.06 19 ¶17-18

Cinthu cakuyamba comwe Jezu adacita pomwe adalamusidwa, ni mtsonkhano omwe adacita na anyakupfunza wace. Ndipo pa mtsonkhanoyo iye adawapasa malango yakufunika kwene-kwene. Pa mtsonkhano omwe Jezu adaulinganiza, iye adauza anyakupfunza wace bza basa lakufunika kwene-kwene lomwe iwo angadacita pa nthawe imweire, ndipo ntsiku zino, ifepano tikucitambo basa libodzi-bodziro. Pa mtsonkhanoyo Jezu adalewa kuti: ‘Ndokoni mukapfunzise wanthu wa mitundu yentse, . . . [ndipo mukawapfunzise] kusunga bzinthu bzentse bzomwe ndidakuuzani.’ (Mat. 28:19, 20) Jezu akufuna kuti ateweri wace wentse apalizire. Lamulo limweri alibe kulipereka kokha kuna apostolo wace 11 wakukhulupirika wale. Thangwe ranyi tikulewa tenepo? Thangwe ndakuti pomwe Jezu adapereka lamulo lakupfunzisa wanthu pa phiri la Galileya, apostolo wace akhali lini okha. Kodi tikudziwa tani bzimwebzi? Kumbukirani kuti anjo adauza akazi wale kuti: ‘Imwepo mun’kamugumana ku [Galileya].’ (Mat. 28:7) Tenepo, bzikuwoneka kuti akazi wakukhulupirika wale, akhalipombo pomwe Jezu adapereka lamulo lakupalizira. w20.01 2-3 ¶1-4

Jezu adafotokoza thangwe lomwe lingaticitise kudikhirira kuzunzidwa. Iye adalewa kuti ifepano tiniwengedwa thangwe timbacita lini mbali ya dzikoli. Tenepo, cizunzo ni cizindikiro lini cakuti Yahova ankukomedwa lini nafe. Koma cimbathandauza kuti ifepano tinkucita bzomwe mpsabwino! Wanthu wakuperewera angakwanise lini kutiletseratu kunamata Yahova Mulungu Wamphanvu-zense. Azinji adayezera kale kucita bzimwebzo, koma adatazira. Kumbukirani bzomwe bzidacitika pa Nkhondo Yaciwiri ya pa Dziko Lense. Pa nthaweyo, maboma ya m’madziko mazinji yadazunza kwene-kwene atumiki wa Mulungu. Basa lathu liribe kundoletsedwa na wa cipani ca Nazi ku Alemanha, koma lidaletsedwambo na maboma ya ku Austrália, Canadá na madziko manango. Kodi cizunzoci cidamalisa basa lathu lakupalizira? Mu gole la 1939 pomwe nkhondoyo idayamba, pa dziko lense la pansi pakhana apalizi 72.475. Tsono mu 1945 pomwe nkhondoyo idamala, na thandizo la Yahova bzidawoneka kuti akhalipo apalizi wakukwana 156.299. Mbogo ya apalizi idathumizirika kawiri-kense. w19.07 9 ¶4-5

Penu imwepo mukanati kugumana munthu kuti mumupfunzise Bibliya, mungathandizire kupfunzisako mwa njira inango. Mwa ciratizo, mungauze omwe nkuyambiratu kubwera mu Nyumba ya Umbambo kuti takutambirani na kuwasekerera. Mukawalatiza lufoyi mwa njira imweyi, iwo a’dzawona kuti ifepano ndifedi Akristau wacadidi. Kuthumizira bzimwebzi, mbacitani nyongo yakumbapereka mitawiro pa mitsonkhano. Mitawiro yanu napo ikhale ifupi, ingathandize wanthu wapsa kuwona momwe angafotokozerere mwakuthemera cikhulupiro cawo. Mungathandizembo mpalizi mupsa mwakucita makonzedwe yakuti muyende naye mu utumiki bwakumunda, na kumuthandiza kuphatisa basa Bibliya kuti apfunzise wanthu. Mukacita bzimwebzi, mun’dzamuthandiza kutewezera ciratizo ca Kristu. (Lu. 10:25-28) Akristau azinji ambakhala wakutanganidwa thangwe ana bzinthu bzizinji bzakucita. Koma napo bziri tenepo, iwo ambapambula nthawe kuti acitise mapfunziro ya Bibliya, ndipo iwo ambakomedwa na kucita bzimwebzi. w19.07 17 ¶11, 13

Mpostolo Paulo alibe kubvuma kuti bzinthu bzabwino ayai bzakuipa bzomwe akhadacita bzimutazise kutumikira Yahova. Iye adalewa kuti kuyebwa ‘bzinthu bzakumbuyo’ kudamuthandiza kuti akagumane ‘bzinthu bza kutsogolo’ ayai kukwanirisa macipi yakuthamanga. Kodi ni bzinthu bziponi bzomwe bzingadatazisa Paulo kuthamanga? Cakuyamba, Paulo akanati kukhala Mkristau adacita bzinthu bzizinji bzakudabwisa. Koma iye adawona bzinthubzo ninga ‘mudu wa thukuta.’ (Waf. 3:3-8) Caciwiri, iye alibe kubvuma kuti makumbukidwe yakuphonyeka pa bzomwe akhacita pakuzunza Akristau, yamutazise kutumikira Yahova. Ndipo cacitatu, iye alibe kukumbuka kuti bzinthu bzense bzabwino bzomwe akhadacitira Yahova bzikhali bzakukwanira kuti aleke kucita nyongo yakutumikira Yahovayo. Paulo adacita bzinthu bzizinji pa basa lakupalizira napo kuti adaikhidwa m’kawoko, adamenyedwa, adabomedwa na minyala, adalubzika m’madzi, adabonera na njala na usiwa. (2 Wak. 11:23-27) Ndipo pa bzense bzomwe iye adacita na kubonera komwe adagumana nako, Paulo akhadziwa kuti akhafunika kupitiriza kutumikira Yahova. Ifepano tin’funika kucitambo bzibodzi-bodzibzi. w19.08 3 ¶5

Abale na mpfumakazi nsiku zino, akutewezerambo ciratizo ca Paulo. Iwo ambakhala m’madziko yomwe ambakwanisa lini kupalizira mwakutsudzuka ayai kupalizira nyumba na nyumba. Napo bziri tenepoyo iwo ambanyang’ana mipata yakupalizirira bzipsa bzabwino. (Mat. 10:17-20) Libodzi mwa madzikoyo, nyakunyang’anira dera, adalewa kuti mpalizi ali-wense m’gawo lace akhafunikira kupalizira dzinza lace, omwe adafendererana naye nyumba, anzace wa ku xikola, wa ku basa na wanthu omwe iye ambawadziwa. Kwa magole mawiri wanthu m’gwere adawanda m’cigawo cimweci. Pinango tikukhala komwe basa lathu lakupalizira limbaletsedwa lini. Koma napo bziri tenepo, mukacita bzense bzomwe mungakwanise kuti mupalizire, Yahova an’dzakupasani maluso ya momwe mungapalizirire napo pa nthawe yomwe mun’dzagumana na mabvuto. (Waf. 2:13) Nsiku zino, ifepano tin’funika kumbateweza malango yomwe yambagumanika mu tsamba lomwe mpostolo Paulo adanembera Akristau wa ku Firipo. Ndipo tin’funikambo kutsimikizira bzinthu bzakufunika kwene-kwene, kukhala wakusaya kuphonya, kutcenkha kucita bzinthu bzomwe bzingakalipise winango na kudzala na bzisapo bzakulungama. Tikacita bzimwebzi, lufoyi lathu lin’dzathumizirika ndipo tin’dzatumbizisa Baba wathu Yahova. w19.08 13 ¶17-18

Palibe omwe ambakomedwa kukhala na munthu omwe ambafuna kuti winango acite bzomwe iye akufuna ndipo ambafuna lini kuuzidwa cakucita. Koma timbakomedwa kwene-kwene thangwe ra kukhala pakati pa abale walufoyi, ‘wansisi na wakubzicepswa.’ (1 Pe. 3:8) Tenepo, tikakhala nawo pa uxamwali, ndipo ticikhalambo wakubzicepswa iwo an’dzatsudzuka nafe. Kubzicepswa kumbacitisa moyo wathu kukhala wabwino. Nthawe zinango, ifepano tin’dzawona bzinthu bzomwe bzingadzawoneke ninga kuti mpsakusaya kulungama. Nthawe zinango, wanthu omwe ana luso lakucepa ambalemekezedwa kuposa omwe ana luso kwene-kwene. Koma Salomau adazindikira kuti bzomwe tin’funika kucita ni kubvuma momwe moyo wathu uliri, sikuti kumbandokumbukira bzinthu bzakuphonyeka. (Mpal. 6:9) Tenepo, kuti tikwanise kucita bzimwebzi tin’funika kukhala wakubzicepswa. w19.09 4-5 ¶9-10

Wale omwe ana udindo ninga pai, ana mwayi wakucita bzinthu bzomwe bzingacitise winango kugumana phindu. Yahova adapasa azipai udindo bwakutsogolera wanthu wa m’banja mwawo, ndipo iye ambafuna kuti azipaiwo ambapfunzise wana wawo, kuwatsogolera na kumbawatsimula akafunikira. (1 Wak. 11:3) Tsono bzimwebzi bzikuthandauza lini kuti iwo angaphatise basa udindo bwawobo mu njira iri-yense yomwe afuneyo, koma iwo an’funika kumbakumbukira kuti Yahova ndiye omwe adayambisa banja. Tenepo akambacita bzimwebzi, dzina lace limbatumbizidwa. (Wayef. 3:14, 15) Kuti azipai alatize kuti ambabvera Yahovayo, iwo an’funika kumbaphatisa basa udindo bwawo mu njira yomwe ingamukondwese. Lekani kumbaphatisa basa udindo bwanu mu njira yakuphonyeka. Koma mbabvumani mukaphonya, ndipo winango akakupasani malango yakucokera m’Bibliya, mbayaphatisani basa. Mukacita bzimwebzi, wanthu wa m’banja mwanu an’dzawona kuti ndimwe wakubzicepswa ndipo iwo an’dzakulemekezani. Ndipo mukakhala mukupemba na banja lanu, mbalatizani kuti mumbathemba Yahova kuti akuthandizeni kutsogolera banja lanu, tenepo banja lanulo lin’dzawona kuti imwepo mumbafunikira citsogozo cace. Kuthumizira bzimwebzi, mbawonani kunamata Yahova kukhala cinthu cakufunika kwene-kwene pa moyo wanu. (Bzak. 6:6-9) Ndipo dziwani kuti ciratizo canu cabwino ni mphaso yabwino yomwe imwepo mungapereke kwa banja lanu. w19.09 15 ¶8; 17 ¶14; 18 ¶16

Marko akhali wakukondwa pa kutumikira winango na mtima wentse. Mwa ciratizo, iye adatumikira kazinji kentse na mpostolo Paulo pabodzi na mpostolo Pedru, ndipo adawathandiza kuti akwanirise maudindo yawo na kusamalirambo bzomwe iwo akhasaya pa moyo wawo. (Mab. 13:2-5; 1 Pe. 5:13) Ndipo pakulewa bza Marko, Paulo adalewa kuti akhali ninga m’bodzi wa anyabasa anzace omwe akhacita ‘bzinthu bzakubverana na Umambo bwa Mulungu,’ ndipo akhamutsangalaza. (Wakol. 4:10, 11) Marko adakhala xamwali wa pa mtima wa Paulo. Mwa ciratizo, mu gole la 65, pomwe Paulo akhali m’kawoko ku Roma pa ulendo bwakumalizira, iye adanembera Timotio tsamba lace laciwiri. Mu tsambalo, Paulo adakumbira Timotio kuti ayende ku Roma pabodzi na Marko. (2 Tim. 4:11) Kulewa mwakusaya kupenukira, Paulo akhatenda kwene-kwene basa lentse lomwe xamwali wace wakukhulupirika Marko akhacita. Ndipopa adakumbira kuti adzakhale naye pa nthawe yakufunika kwene-kwene ire. Marko adathandiza Paulo sikuti na mafala yokha, koma na bzicito, ninga kumupasa cakudya ayai mipukutu yakunembera na tinta. Bzikuwoneka kuti thandizo na cirimbiso comwe Marko adapereka kuna Paulo, bzidathandiza kwene-kwene Pauloyo kupirira ntsiku zace zakumalizira akanati kuphewa. w20.01 11 ¶12-13

Pomwe tidabvuma kunyamula djoki la Jezu, tidasankhula kukhala na moyo wakusaya kufuna bzizinji na basa lakuuma. Ndipopa Jezu adalewa kuti tin’dzazunzidwa. Koma tingadikhirire kuti Yahova an’tipasa mphanvu kuti tikwanise kupirira mabvuto yali-yense. Ndipo tikapirira kwene-kwene, tin’dzakhala wakukhwimika. (Tiy. 1:2-4) Tingadikhirirembo kuti Yahova an’tithandiza pa bzomwe timbasaya, ndipo Jezu an’pitiriza kutitsogolera ndipo abale na mpfumakazi an’tilimbisa. (Mat. 6:31-33; Ju. 10:14; 1 Wat. 5:11) Mkazi omwe akhaduwala matenda yakutaya mulopa ule, adatsangalazidwa pa nsiku yomwe adapozedwa na Jezu. (Lu. 8:43-48) Tsono kuti apitirize kukhala na mtsangalazo, iye akhafunika kukhala mteweri wa Kristu. Kodi mukumbukira comwe adacita? Penu iye adasankhula kunyamula djoki la Kristu, kumbukirani mabai-bai yomwe adatambira yakutonga pabodzi na Jezu kudzuulu! Tenepo, cinthu ciri-cense comwe iye adasiya kuti akhale mteweri wa Kristu, cingadandendemerana lini na cisimbo cimweci. Bziribe basa penu cidikhiro cathu n’cakudzayenda kudzulu ayai n’cakudzakhala pansi pano, tentsenefe tin’funika kumbatenda mcemo wa Jezu omwe tidaubvuma, wakuti: ‘Bwerani kuna Ine!’ w19.09 25 ¶21-22

Pomwe akhafuna thandizo, atumiki wa Davide adayenda kuna Mjirayeri munango wakudala wakucemeredwa Nabali kuti akakumbire cakudya. Iwo adawona kuti bzikhali bzakuthemera kukakumbira cakudya Nabali, thangwe pomwe iwo akhali m’dambo adakhotcerera bzifuwo bzace. Koma pakuti Nabali akhali wadyera, alibe kuwapasa na cinthuco. Pomwe Davide adabva bzimwebzo, adakalipa kwene-kwene ndipo adakhumba kupha Nabali pabodzi na wanthu wense wa pa mui pace. (1 Sam. 25:3-13, 22) Tsono Abigayeli, omwe akhali mkazi wa Nabali adabva bza nkhaniyo. Iye akhadadeka ndipo akhali munthu wakuzindikira. Tenepo, mwakukhwimika, Abigayeli adayenda kukagumana na Davide, ndipo pomwe adagumana naye adagodama acimukumbira kuti aleke kukacita bzomwe akhakhumba kucitira Nabali. Ndipo mwakudeka mtima Abigayeli adauza Davide kuti bzomwe akhafuna kucitabzo bzingadamubweresera mulandu wa mulopa, koma bzikhali bwino kusiya nkhaniyo m’manja mwa Yahova. Tenepo, kubzicepswa na kucita bzinthu mwanzeru komwe Abigayeli adacita kudaderekhesa mtima wa Davide. Ndipo Davideyo adazindikira kuti Abigayeli akhadatumidwa na Yahova. (1 Sam. 25:23-28, 32-34) Abigayeli akhana makhalidwe yabwino yomwe yadacitisa Yahova kumuphatisa basa. Bzimwebzi bzingacitikembo na mpfumakazi m’gwere, zikakhala zakudeka mtima na zakuzindikira zingaphatisidwe basa na Yahova kuti zilimbise mabanja yawo na gwere.​—Tito 2:3-5. w19.10 23 ¶10

Akristau wense wacadidi an’funika kuwonesesa kuti akucita lini mbali ya Babulo Mkulu. Anyakupfunza wa Bibliya winango, pomwe akhanati kuyamba kupfunza cadidi ca m’Bibliya, pinango akhacita mbali ya bzipembedzo bzakunama. Ndipo akhagumanika pa mitsonkhano na kucita mbali pa bzomwe bzipembedzobzo bzimbacita. Ayai akhaperekambo kobiri zakuthandizira magereja yawo. Tsono nyakupfunza wa Bibliya akafuna kukhala mpalizi wakusaya kubatizidwa, cakuyamba iye an’funika kusiya kucita cinthu ciri-cense cakubverana na cipembedzo cakunama. Iye an’funika kunemba tsamba lakulewa kuti wasiya kucita mbali, ayai an’funa lini pomwe kukhala m’bodzi wa cipembedzo cawo, ne ciri-cense comwe ciri mkati mwa Babulo Mkulu. Mkristau wacadidi an’funika kuwonesesa kuti basa lace likubverana lini na Babulo Mkulu. (2 Wak. 6:14-17) Mwa ciratizo, iye an’funika lini kuphata basa pa gereja. Ndipo Mkristau omwe akuphata basa pa empreza inango, angabvume lini kucita mabasa manango yomwe yambathandizira kumwaza nkhani za cipembedzo cakunama. Penu iye ambaphata basa lakubzitongera yekha, anganyang’ane lini ne kubvuma basa lomwe limbabverana na Babulo Mkulu. Thangwe ranyi tin’funika kucita bzimwebzi? Thangwe ndakuti, magulu yacipembedzoya kuna Mulungu njakupswipa ndipo ambakomedwa lini nayo, tenepo tin’funa lini kugawana nayo bzicito pabodzi na pikado zawo.​—Zai. 52:11. w19.10 12 ¶16-17

Jeremiya adanemba bukhu lomwe limbadziwika na dzina lace, ndipo adanembambo mabukhu ya 1 Wamambo na 2 Wamambo. Mwakusaya kupenukira, basa limweri lidacitisa Jeremiya kuwona momwe Yahova ambabvera nsisi wanthu wakuperewera. Mwa ciratizo, iye akhadziwa bza moyo wa mambo Akabe, omwe akhacita bzinthu bzizinji bzakuipa, koma iye adakungula ndipo Yahova adamulekerera acimuuza kuti, angadabweresa lini tsoka lomwe likhafuna kugwera iye pabodzi na wanthu wa pamui pace. (1 Wam. 21:27-29) Jeremiya akhadziwambo bza moyo wa Manase omwe adacita bzinthu bzomwe bzidasunamisa kwene-kwene Yahova kuposa bzomwe Akabe adacita. Tsono napo bzikhali tenepo, Manaseyo adakungula ndipo Yahova adamulekerera. (2 Wam. 21:16, 17; 2 Nkha. 33:10-13) Kudziwa nkhanizi, kudathandiza Jeremiya kutewezera Yahova mwa kukhala wansisi na wakudeka mtima. Kumbukirani momwe Jeremiya adathandizira Baruke pomwe iye akhadasunama mu utumiki bwace. Jeremiya alibe kukhala na makumbukidwe yakuti Baruke angadacinja lini, koma adamuthandiza mwa kumuuza mafala yakutsangalaza yakucokera kwa Mulungu.​—Jer. 45:1-5. w19.11 6 ¶14-15

Bukhu la Mwambo, limbalewa kuti Mjirayeri alatize kutenda kwace akhafunika kupereka nsembe ya wense. (Mwam. 7:11-13, 16-18) Ndipo iye akhapereka nsembeyo thangwe ra kufuna Yahova, sikuti mwakungingimizidwa. Ninga nsembe ya wense, basa lomwe ifepano timbacitira Yahova mwakufuna tekha, ni njira ibodzi yakulatiza kuti timbamufuna. Ifepano timbacitira Yahova bzabwino bzomwe timbakwanisa thangwe timbamufuna na mtima wense. Kumbukirani momwe Yahova ambakhalira wakukondwa akawona bzulu na bzulu bza wanthu akumutumikira mwakubzipereka thangwe ra kufuna iye pabodzi na malamulo yace! Yahova ambalemekeza bzomwe timbacita, kuphatanidzambo mathangwe yomwe yambaticitisa kucita bzimwebzo. Mwa ciratizo, penu imwe mwakalamba ndipo mukukwanisa lini kucita bzomwe mukhafuna pakutumikira Yahova, dziwani kuti iye ambabvesesa bzimwebzo. Pinango mungayambe kukumbuka kuti mun’kwanisa lini kucitira bzizinji Yahova, koma dziwani kuti iye ambawona lufoyi lomwe limbakucitisani kucita bzomwe mukukwanisa. Iye ambakomedwa kwene-kwene kutambira bzabwino bzomwe mungakwanise kumucitira. w19.11 22 ¶9; 23 ¶11-12

Ifepano tin’funika kumbawona basa mwakuthemera. Mambo Salomau adafuliziridwa na Mulungu acinemba kuti: ‘Cakucitika ciri-centse . . . cina nthawe yace.’ Iye adalewa kuti pana nthawe yakubzala, yakumanga, yakuseka, yakubzina na yakucita mabasa yanango. (Mpal. 3:1-8) Kulewa mwakusaya kupenukira, kuphata basa na kupuma ni bzinthu bziwiri bzakufunika kwene-kwene pa moyo wa munthu. Jezu adawonambo bzinthu bzimwebzi kukhala bzakufunika. Mwa ciratizo, ntsiku inango apostolo adabwerera wakuneta kucokera kukapalizira ndipo akhasaya ‘nthawe yakudya.’ Jezu adawauza mafala yomwe yali pa vesi ya ntsiku ya lero. (Mar. 6:30-34) Napo kuti iye pabodzi na anyakupfunza wace akhapuma lini nthawe zentse zomwe akhafunikira, koma Jezu akhadziwa kuti kupuma n’kwakufunika. Nthawe zinango, tentsenefe timbafunikira kupuma ayai kucinja bzinthu bzinango bzomwe timbacita ntsiku na ntsiku. Tingapfunze bzimwebzi na Cakutonga comwe Mulungu adapasa Ajirayeri, comwe cikhalewa bza kukoya ntsiku ya Malinkhuma. Ntsiku zino, ifepano timbangingimizidwa lini kubvera Cakutongaci, koma kupfunza Cakutongaci kungatithandize kubvesesa momwe tingacitire bzinthu pa nkhani ya basa na kupuma. w19.12 3 ¶6-7

Yahova adalewa kuti angadadzasamalira atumiki wace wakukhulupirika, ndipo iye ambacita ciri-centse kuti akwanirise bzomwe adalewabzo. (Psal. 31:1-3) Kuthimizira bzimwebzi, Yahova ambadziwa kuti akasaya kutisamalira, ifepano tingasuname. Ndipo iye adalewa kuti an’dzatipasa bzinthu bzomwe timbafunikira kuti tikhale na moyo, na bzomwe timbafunikira kuti tipitirize kumutumikira mwakukhulupirika! (Mat. 6:30-33; 24:45) Tikambakumbukira kuti Yahova ambacita bzentse bzomwe ambalewa, bzingatithandize kumukhulupira napo tikagumana na bvuto la kobiri. Kumbukirani bzomwe bzidacitika na Akristau wa m’magole dzana yakuyambirira. Pomwe Akristau wa ku Jeruzalemu adayamba kuzunzidwa ‘wentse adabalalikira m’bzigawo bza Djudeya na Samariya, kupambula apostolo okha.’ (Mab. 8:1) Kodi mukudziwa bzomwe bzidadzacitika? Iwo adagumana na bvuto la kobiri! Bzikuwoneka kuti akristau adaluza nyumba na mabasa yawo. Napo bzikhali tenepo, Yahova alibe kuwasiya, ndipo iwo adapitiriza kukhala wakukondwa. (Mab. 8:4; Waheb. 13:5, 6; Tiy. 1:2, 3) Tenepo, ninga momwe Yahova adathandizira Akristau wakukhulupirika wa m’magole dzana yakuyambirira, iye an’dzatithandizambo.​—Psal. 37:18, 19. w20.01 17-18 ¶14-15

Pomwe Davide adakhotcerera mabira ya pai wace ku bzirombo, ninga mphondolo na cimbalangondo, Davide adazindikira kuti adakwanisa kucita bzimwebzo thangwe ra thandizo la Yahova. Pomwe adakunda cinzonzomtali camphanvu cakucemeredwa Goliyati, Davide adazindikirambo kuti Yahova ndiye adamuthandiza. (1 Sam. 17:37) Ndipo pomwe adapulumuka kuna Mambo wa njiru Sauli, Davide adadziwa kuti Yahova ni omwe adamupulumusa. (Psal. 18), mafala yomwe yali padzulu pa kapituloyi) Bzingadakhala kuti Davide ngwakubzikuza, kulewa mwakusaya kupenukira iye angadabzipasa mbiri thangwe ra kukunda komwe adacita. Koma iye akhali wakubzicepesa ndipo akhazindikira kuti Yahova akhamuthandiza pa moyo wace. Kodi tikupfunza ciyani na ciratizo ca Davide? Tin’funika kumbacita bzinthu bzizinji sikuti kundombakumbira kuti Yahova athandize. Tin’funikambo kuzindikira kuti ni lini, ndipo Yahovayo angatipase tani thandizolo. Ndipo tikakhala wakubzicepesa na wakuzindikira malire yathu, tin’dzakwanisa kuzindikira thandizo lomwe Yahova ambatipasa, mwa kutithandiza kucita bzinthu bzomwe tingakwanise lini kubzicita tekha. Tikambacita bzimwebzi, uxamwali bwathu na Yahovayo bumbalimba kwene-kwene. w19.12 20 ¶18-19

Tina mathangwe mazinji yakulatiza kuti wanthufe ndife wakufunika kwene-kwene kwa Yahova. Iye adatikwewa ndipo adawona momwe tidabvumira bzipsa bzabwino. (Ju. 6:44) Ndipo pomwe tidayamba kumufenderera Yahova, iye adatifendererambo. (Tiy. 4:8) Yahova ambalatizambo kuti ndife wakufunika, mwa kupambula nthawe yace na kucita nyongo kuti atipfunzise. Iye ambadziwa momwe ifepano tiriri na momwe tingadzakhalire kutsogolo. Ndipo iye ambatilanga thangwe ambatifuna. Bzimwebzi bzikulatiza kuti ifepano ndife wakufunika kwene-kwene kwa Yahova! Napo kuti wanthu winango akhawona Mambo Davide kukhala wakusaya kufunika, koma iye akhadziwa kuti Yahova akhamufuna ndipo akhamuthandiza. Kukhala na makumbukidwe yamweya, kudathandiza Davideyo kupirira mabvuto yomwe akhagumana nayo pa moyo wace. (2 Sam. 16:5-7) Mpsibodzi-bodzimbo na ifepano, tikasunama ayai tikagumana na mabvuto, Yahova angatithandize kuwona bzinthu mwakusiyana na momwe tikubziwonera, na kupirira bvuto liri-lentse lomwe tingagumane nalo. (Psal. 18:27-29) Na thandizo la Yahova, palibe comwe cingatitazise kumutumikira mwakukondwa.​—War. 8:31. w20.01 15 ¶7-8

Mukafuna kuticitisa pfunziro la Bibliya, mbacitani mpembo mukanati mwayamba pfunzirolo. Kawiri-kawiri, pfunziro likakhazikika, bzikakwanisika bzimbakhala bwino kuyamba na kumaliza pfunzirolo na mpembo pa midzinga ­yakuyambirira. Tin’funika kulatiza nyakupfunza wa Bibliya kuzindikira kuti ifepano tingabvesese Fala la Mulungu kokha na thandizo la Mulungu. Apalizi winango kuti akwanise kufotokoza kufunika kwa mpembo akanati kuyamba pfunziro, ambawerenga bukhu la Tiyago 1:5, lomwe limbati: ‘Penu alipo omwe akusaya nzeru, apitirize kukumbira kwa Mulungu.’ Akamala kuwerenga ambabvunza nyakupfunza wawo kuti: “Kodi Mulungu tingamukumbire tani nzeru?” Bzikuwonekeratu kuti nyakupfunzayo ambatawira kuti tin’funika kupemba kwa Mulungu. Pfunzisani nyakupfunza wanu wa Bibliya momwe angapembere. Muuzeni kuti Yahova akufunisisa kubva mipembo yace yakucokera mu mtima. Ndipo muuzenimbo kuti tikambacita mipembo ya patekha, tingauze Yahova momwe tikubvera mu mtima mwathu na bzentse bzomwe tingauze lini munthu ali-wentse. Kumbukirani kuti Yahova ambadziwa kale momwe ifepano tiriri.​—Psal. 139:2-4. w20.01 2 ¶3; 5 ¶11-​12

Yahova ambadziwa kuti ni nthawe iponi yomwe angasankhule munthu kuti akhale wakudzozedwa. (War. 8:28-30) Yahova adayamba kusankhula wanthu kuti akhale wakudzozedwa pomwe Jezu adandolamusidwa. Bzikuwoneka kuti m’magole dzana yakutoma, Akristau wentse wacadidi akhali wakudzozedwa. Koma na kupita kwa nthawe, azinji omwe akhabziti mbakristau akhatewera lini Kristu. Tsono Yahova adadzoza Akristau wacadidi omwe akhalipo pa nthaweyo, napo kuti iwo akhali ang’ono-ng’ono. Iwo akhali ninga tirigu yomwe Jezu adalewa kuti ingadakulira pakati pa nyakasongole. (Mat. 13:24-30) Ndipo mu ntsiku zakumalizira zino, Yahova akupitiriza kusankhula wanthu omwe an’dzacita mbali ya wa 144.000. Tenepo, penu Mulungu an’sankhula Akristau winango kuti akhale wakudzozedwa pomwe tiri kuphampha kwa dzikoli, tin’funika lini kupenukira nzeru zace. (War. 9:11) Ndipo tin’funika kusamala kwene-kwene kuti tireke kukhala ninga anyabasa omwe adafotokozedwa mu there la Jezu. Iwo adadandaula thangwe ra bzomwe adacita mweneciro munda kuna anyabasa omwe adayamba kuphata basa pomwe nthawe ikhadamala kale.​—Mat. 20:8-15. w20.01 30 ¶14

Yahova ni Baba walufoyi ndipo akufuna kuti banja lace likhale lakukondwa. Tina mathangwe mazinji yomwe yangaticitise kukhala wakukondwa ntsiku zino, napo tigumane na mabvuto. Mwa ciratizo, tina citsimikizo centse cakuti Baba wakudzulu ambatifuna kwene-kwene. Tina cidziwiso cacadidi ca m’Fala la Mulungu, Bibliya. (Jer. 15:16) Ndipo tikucita mbali ya banja lakupambulika kwene-kwene, lomwe lina wanthu omwe ambafuna Yahova, malamulo yace ndipo ambafunanambo. (Psal. 106:4, 5) Kuthimizira bzimwebzi, tingapitirize kukhala wakukondwa thangwe tikudziwa kuti moyo un’dzakhala wabwino kwene-kwene kutsogoloku. Timbadziwambo kuti tsapanopapa, Yahova animalisa mabvuto yentse ndipo mwakuphatisa basa Umambo bwace, anisandusa dzikoli licikhala Paraizo. Ndipo tikudikhirira kudzatambira anyakufa omwe an’dzalamusidwa kuti adzakhale pomwe na moyo. (Ju. 5:28, 29) Nthawe imweyi in’dzakhala yakudekeza kwene-kwene! Ndipo kuthimizira bzimwebzi, tsapanopapa omwe ali kudzulu na omwe ali pano pa dziko la pantsi, anipereka ulemu, citumbizo, na kunamata komwe kumbathemera Baba wathu walufoyi. w20.02 13 ¶15-16

Imwepo mukacita pikado ikulu, lekani kubisa. M’mbuto mwace, pembani kwa Yahova ndipo muuzeni bzentse bzomwe mwacita. Mukacita bzimwebzi, mun’dzatsangalazidwa ndipo mun’dzabzipasa lini pomwe mulandu. Koma mukafuna kuti mubwezerese uxamwali bwanu na Yahova, imwepo mun’funika kucita bzizinji sikuti kupemba kokha. Imwepo mun’funika kubvuma malango. Pomwe Yahova adatumiza mpolofeta Natani kuti akaceze na Mambo Davide bza pikado yomwe akhadacita na Bateseba, Davideyo alibe kubisa ayai kucepswa pikadoyo. M’mbuto mwace, iye adabvuma kuti akhadaphonyera sikuti mwamuna wa Bateseba yekha, koma maka-maka Yahova. Davide adabvuma malango ya Yahova, ndipo Yahovayo adamulekerera. (2 Sam. 12:10-14) Mpsibodzi-bodzimbo na ifepano, tikacita pikado ikulu, tin’funika kuuza omwe Yahova adawaikha kuti atinyang’anire. (Tiy. 5:14, 15) Ndipo tin’funika lini kumbacepswa bzomwe tacitabzo. Tikabvuma na kuphatisa basa malango yomwe timbatambira, tin’dzakhala na mtendere wa mu mtima ndipo tin’dzakhalambo wakukondwa. w20.02 24-25 ¶17-18

‘Amuna khumi’ akuimira wale omwe ana cidikhiro cakudzakhala na moyo wakusaya kumala pantsi pano. Iwo ambadziwa kuti Yahova akusimba anyakudzozedwa omwe akuimira ‘Mdjuda’ ndipo ambawona kuti ni mwayi ukulu kwene-kwene kutumikira nawo Mulungu pabodzi. Napo kuti mpsakukwanisika lini kudziwa dzina la m’bodzi na m’bodzi la anyakudzozedwa omwe alipo ntsiku zino pa dzikoli, koma omwe ana cidikhiro cakudzakhala pa dziko la pantsi ‘angayende’ nawo pabodzi. Kodi bzingacitike tani? Onani kuti Bibliya limbalewa kuti ‘amuna khumi’ ‘an’dzaphatirira mkanjo wa mwamuna m’bodzi Mdjuda.’ Napo kuti vesiri likulewa bza Mdjuda m’bodzi, koma mafala mawiri yakuti ‘namwe’ yakuimira wanthu azinji sikuti m’bodzi. Bzimwebzi bzikuthandauza kuti mwamuna Mdjuda akuimira lini munthu m’bodzi, koma akuimira gulu lentse la anyakudzozedwa. Tenepo, wale omwe mbakudzozedwa lini akutumikira Yahova pabodzi na anyakudzozedwa. Koma omwe ana cidikhiro cakudzakhala na moyo pano pa dziko la pantsi ambawona lini anyakudzozedwa ninga atsogoleri, thangwe ambadziwa kuti mtsogoleri wawo ni m’bodzi yekha, omwe ni Jezu.​—Mat. 23:10. w20.01 26 ¶1-2

Jezu adalewa kuti wanthu angadadzazindikira anyakupfunza wace wacadidi, kokha anyakupfunzawo angadalatiza lufoyi lomwe Jezuyo adawalatizambo. Mafalaya yadayamba kuphata basa kuyambira kuna anyakupfunza wace wakuyambirira, ndipo ntsiku zino yakuphatambo basa kuna ifepano. Ndipopa mpsakufunika kuti timbafunane napo bzinese tani. Tenepo, bzibvunzeni kuti: ‘Kodi ndikupfunza ciyani na abale na mpfumakazi omwe adapitiriza kumbafunana napo kuti bzikhali bzakunesa?’ Nthawe zinango bzingatinese kumbafunana, thangwe tentse ndife wakuperewera. Napo bziri tenepo, tin’funika kucita nyongo kuti titewezere Jezu. Iye adalewa kuti m’bale wathu akatiphonyera, tin’funika kumbakhazikisa mtendere na m’baleyo. (Mat. 5:23, 24) Iye adalewa pomwe kuti tikondwese Mulungu, tin’funika kupitiriza kukhala wakubverana na winango. Mulungu ambakomedwa kwene-kwene akatiwona tikucita ciri-centse kuti tikhale pa mtendere na abale wathu. Ndipo tikambakoyera ca mu mtima abale wathu na kulamba kumbakhazikisa mtendere na abalewo, Mulungu ambawona kunamata kwathu kukhala kwapezi-pezi.​—1 Ju. 4:20. w20.03 24 ¶1-4

Sathani, omwe ni ‘baba wa gunkha’ wakhala ankupumpsa wanthu kuyambira mu nthawe za Adamu na Eva. (Ju. 8:44) Yanango mwa magunkha yace yambaphatanidza bzipfunziso bzakunama bzakulewa bza infa. Ndipo miyambo na bzicito bzomwe bzimbacitisa wanthu kugopa mizimu ya anyakufa bzimbacokera pa bzipfunziso bzimwebzi. Thangwe ranyi wanthu azinji ambakhulupira magunkha ya Sathaniya? Sathani ambadziwa momwe wanthu ambabvera akafedwa, tenepo iye ambalokotera bzimwebzo kuti awapumpse. Ifepano timbafuna lini kufa thangwe tidalengedwa kuti tikhale kwa muyaya. (Mpal. 3:11) Ndipopa tingalewe kuti infa ni nyamadulanthaka wathu. (1 Wak. 15:26) Napo Sathani ankucita nyongo kuti magunkha yaceya yaleke kuzindikiridwa, koma cadidi cakulewa bza infa ciribe kubisika. Wanthu azinji nsiku zino akudziwa cadidi cakulewa bza infa, ndipo ankudziwisambo anzawo bzomwe Bibliya limbapfunzisa pakulewa bza mkhalidwe na cidikhiro ca anyakufa. (Mpal. 9:5, 10; Mab. 24:15) Kudziwa bzimwebzi kumbatitsangalaza, ndipo kumbatithandiza kuleka kugopa ne kucita thupo na bzomwe bzimbacitika munthu akafa. w19.04 14 ¶1; 15 ¶5-6

Yahova Mulungu ambafuna atumiki wace. Iye nthawe zense ambawafuna ndipo an’dzawafuna mpaka kale-kale. Napo bziri tenepo, iye ambafunambo cirungamo. (Psal. 33: 5) Tenepo ifepano tina citsimikizo ca bzinthu bziwiri ibzi: (1) Yahova bzimbamuwawa kwene-kwene akawona atumiki wace ankucitiridwa bzinthu mwakusaya cirungamo. (2) Iye ambapicira kuti an’dzalekerera lini atumiki wace kucitiridwa bzinthu mwakusaya cirungamo. Cakutonga comwe Mulungu adapasa Ajirayeri mwakuphatisa basa Mozeji cikhalimbisa lufoyi. Cakutongaco cikhalimbisa wanthu kukhala wacirungamo kwa wanthu wense, maka-maka kwa wale omwe akhawoneka kukhala wakusaya kukhotcerereka. (Bzak. 10: 18) Kulewa mwakusaya kupenukira, Cakutongaci cinkulatiza momwe Yahova ambasamalirira atumiki wace. Cakutonga ca Mozeji cidaleka kuphata basa pomwe gwere Lacikristau lidakhazikisidwa mu 33 C.E. Kodi bzimwebzi bzinkuthandauza kuti Akristau angadakhala alibe cakutonga comwe cingadawathandiza kukhala walufoyi na wacirungamo? Ne ndibzo lini! Thangwe Akristauwo adadzakhala na cakutonga cipsa comwe ni ‘cakutonga ca Kristu.’ Jezu alibe kunembera ateweri wace ndandanda ya bzinthu bzomwe iwo akhafunikira kucita, koma adawapasa malango, malamulo na mitemo yomwe ingadawatsogolera pa moyo wawo. Tenepo ‘Cakutonga ca Kristu’ cimbaphatanidza bzinthu bzense bzomwe Jezu adapfunzisa. w19.05 2 ¶1-3

Munthu ali-wense ambafuna kutsangalazidwa na kutsangalaza winango. Mwa ciratizo, mwana akagwa pakusenzeka acicoka cironda pa bondo, ambathamangira mai ayai pai wace ankulira. N’cadidi kuti abereki wacewo angapoze lini cirondaco, koma angamutsangalaze. Pinango iwo angamubvunze kuti awauze bzomwe bzacitika, kumupukuta misozi, kumuuza mafala yabwino na kumuikha mankhwala pacirondapo. Akacita bzimwebzi, mwanayo anganyamale aciyenda pomwe kukasenzeka. Na kupita kwa nthawe cirondaco cimbapola. Nthawe zinango, wana ambasunama kwene-kwene akacitiridwa bzinthu bzakuipa. Wana winango ambapswithidwa. Mwa ciratizo, winango angapswithidwe kabodzi ayai kazinji kense. Tsono bziribe basa kuti mwanayo bzidamucitikira kangasi, koma cadidi n’cakuti iye ambasunama kwene-kwene ndipo ambayebwa lini. w19.05 14 ¶1-2