Novembro

Nsiku zino, wanthu azinji napo wale omwe adapfunza kwene-kwene ambalewa kuti malango ya Bibliya njakusaya kuthandiza. Iwo ambalewa kuti munthu omwe ambawona anzace kukhala wakumuposa ambacitisa anzacewo kumuwona kuti ngwakugona, nakuti alibe na basalo. Kodi bzakutewera bza makumbukidwe ya Sathaniya mpsiponi? Kodi imwepo mumbayawona tani makumbukidweya? Kodi wanthu omwe ambabzifuna mwakunyanyira ambakhaladi wakukondwa? Kodi iwo ana mabanja yakukondwana axamwali wabwino? Kodi ambakhala pa uxamwali na Mulungu? Kucokera pa bzomwe mumbawona, kodi ni mbali iponi yomwe imbakhala na bzakutewera bzabwino, kuphatisa basa nzeru za dzikoli ayai nzeru zakucokera m’Fala la Mulungu? (1 Wak. 3:​19) Wanthu omwe ambabvera malango ya wale omwe ambawonedwa na dzikoli kuti mbanzeru ali ninga munthu omwe wayenda kukazunga ku mbuto yacirendo ndipo kumweko iye akubvunza njira mwanzace omwe wayenda kumweko kukazungambo, tenepo wense awiri ataika. Mwakubverana na bzimwebzi, Jezu adalewa bza wanthu ‘wanzeru’ wa mu nthawe yace, kuti: ‘Iwo ni atsogoleri azimola. Pakuti, zimola adatsogolera zimola mwanzace, wense an’dzagwera m’dindi.’​—Mat. 15:14. w19.05 24-25 ¶14-16

Magole yano, mbogo ya wanthu omwe ambadya mkate na kumwa vinyu ikuthimizirika. Kodi tin’funika kucita thupo na bzimwebzi? Ne. ‘Yahova ambadziwa wanthu wace.’ (2 Tim. 2:19) Ndipo iye ambadziwa kuti ni mbani omwe ngwakudzozedwa. Koma abale omwe ambalewenga mbogo ya wanthu omwe ambadya mkate na kumwa vinyu ambawadziwa lini. Tenepo, mbogo yomwe wanthuwo ambalewenga imbaphatanidza omwe adadzozedwa na omwe alibe. Mwa ciratizo, winango akhadya na kumwa mbuyomu, koma tsapano adasiya. Winango angakhale na bvuto la makumbukidwe, ndipo bvutolo lingawacitise kukumbuka kuti iwo mbakudzozedwa nakuti an’katonga pabodzi na Kristu kudzulu. Ndipopa tingakwanise lini kudziwa kuti ni Akristau angasi wakudzozedwa omwe akalipo pa dziko pano. M’mbuto zizinji za pa dziko la pantsi zin’dzakhala na anyakudzozedwa pomwe Jezu an’dzabwera kudzawatenga kuti ayende nawo kudzulu. Bibliya limbalewa kuti mu ntsiku zakumalizira, pa dziko la pantsi pan’dzakhala na mbogo yakucepa ya anyakudzozedwa. (Cibv. 12:17) Tsono iro limbalewa lini kuti mbangasi omwe an’dzakhala alipo pano pa dziko la pantsi citsautso cikulu cikadzayamba. w20.01 29-30 ¶11-13

Napo kuti ndife wakuperewera, Yahova ambafunisisa kuti tikhale m’banja lace, ndipo iye ambaneta lini kutithandiza. N’cadidi kuti nthawe zinango ifepano tingamuphonyere ayai kumusiya, koma iye an’dzatisiya lini na pang’onopo. Pakufuna kufotokoza momwe Yahova ambafunira wana wace, Jezu adalewa bza there la mwana wakutaika. (Lu. 15:11-32) Baba wakufotokozedwa mu therelo alibe kutaya cidikhiro cakuti mwana wace angadabwerera. Pomwe mwanayo adabwerera kumui, pai wacewo adamutambira na manja mawiri. Mpsibodzi-bodzimbo na ifepano, tikamusiya Yahova, ticikungula, tingakhale na citsimikizo centse cakuti Baba wathu wa lufoyi, ngwakukonzeka kutitambira na manja mawiri tikabwerera kwa iye. Baba wathu an’dzakonza bzinthu bzentse bzomwe Adamu adadzonga. Pomwe Adamu adapanduka, Yahova adasankhula wanthu wa mitundu yakusiyana-siyana wakukwana 144.000, kuti adzatumikire kudzulu ninga wamambo na antsembe pabodzi na Mwana wace. M’dziko lipsa, Jezu pabodzi na wa 144.000, an’dzathandiza wanthu wakubvera kuti akhale wakulungamiratu. Ndipo wanthuwo akadzapulumuka pa mayezo yakumalizira, Yahova an’dzawapasa moyo wakusaya kumala. Bzimwebzi bzikadzacitika, Baba wathu an’dzakomedwa kwene-kwene akadzawona kuti dziko la pantsi ladzala na wana wace wakulungamiratu. Kulewa mwakusaya kupenukira, imweyi in’dzakhala nthawe yakudekeza kwene-kwene! w20.02 6-7 ¶17-19

Ali-wense wa ifepano an’funika kubzibvunza kuti: ‘Kodi kucinja komwe ndikucita kuti ndikhale Mkristau wacadidi n’kwa kundofuna kubziwonesera ayai ndinkucinja kucokera mkati mwa mtima?’ Tenepo, kudziwa kusiyanaku n’kwakufunika kwene-kwene. Pa cinembo ca Mateu 12:43-45, Jezu adalewa bzomwe tin’funika kucita. Mafalaya yambatipasa pfunziro lakufunika lakuti: Tin’funika lini kucosa kokha makumbukidwe yakuipa, koma tin’funikambo kudzaza mbuto yomwe tacosayo na makumbukidwe ya Mulungu. Kodi bzingakwanisike kucinja unthu bwathu bwa mkati? Bibliya limbatawira kuti: ‘Bvalani unthu bupsa bomwe budalengedwa mwakubverana na kufuna kwa Mulungu m’cirungamo caico na cikhulupiro.’ (Wayef. 4:24) Inde, bzingakwanisike kucinja unthu bwathu bwa mkati, tsono pambafunika nyongo. Tenepo tin’funika kucita bzizinji sikuti kokha kulimbana na bzikhumbo bzakuipa na kuleka kucita bzinthu bzakuipa. Tin’funikambo kucinja ‘mphanvu yakutsogolera makumbukidwe’ yathu. Bzimwebzi bzimbaphatanidza kucinja bzikhumbo bzathu, bzizolowezi na mathangwe yomwe yambaticitisa kucita bzinthubzo. Ndipopa pambafunika kupitiriza kulatiza nyongo kuti bzimwebzi bzikwanisike. w19.06 9-10 ¶6-7

Yahova adatumiza wanjo kuti akapulumuse Loti pabodzi na banja lace. Pomwe wanjowo adafika mu mzindamo, adauza Loti kuti acoke mwakamfulumize. Koma m’mbuto mwakubvera cenjezolo, Bibliya limbati: ‘Loti akhazeza.’ Tsono pomwe wanjowo adawona kuti ankucedwa, adaphata boko la Loti pabodzi na wanthu wa m’banja lace aciwacosa kunja kwa mzindayo. (Ciy. 19:15, 16) Ndipo wanjowo adauza Loti kuti athawire ku mapiri. Tsono m’mbuto mwakubvera cenjezo la Yahovalo, iye adakumbira kuti athawire mu mzinda munango wa pafupi. (Ciy. 19:17-20) Tenepo, Yahova mwakudeka mtima adamubvera ndipo adabvuma kuti ayende mu mzindayo. Na kupita kwa nthawe, Loti adacita mantha kukhala mu mzindamo ndipo adayenda ku dera la kumapiri, ku mbuto yomwe Yahova akhadamuuza kuti ayende pakuyamba ire. (Ciy. 19:30) Kulewa mwakusaya kupenukira, Yahova adapirira kwene-kwene na Loti. Ninga Loti, pinango m’bale wathu wa m’gwere angacite cakusankhula cakuipa acibonera na bzakutewera bzace. Tsono n’ciyani comwe tingacite, bzimwebzi bzikacitika? Pinango mungafune kumuuza kuti iye ankubvuna bzomwe adabzala, ndipo bzingakhale bzacadidi. (Wag. 6:7) Koma bzingakhale bwino kucita cinthu cinango cakusiyana na bzimwebzi. Tin’funika kuthandiza m’bale wathuyo ninga momwe Yahova adathandizira Loti. w19.06 20-21 ¶3-5

Anyamadulanthaka wathu akaletsa basa lathu lakupalizira, cakulinga cawo cimbakhala kufuna kutigopswa kuti tisiye kutumikira Yahova. Kuthumizira pa ciretsoco, iwo angamwaze nkhani zakutinamizira, kutumiza wamphanvu zaumangi kuti an’dzafufudze m’nyumba zathu, kutiyendesa ku nyumba za mphala, ndipo angafike pakufungira abale wathu m’kawoko. Iwo ambakumbuka kuti akawafungira m’kawoko, winangofe tin’dzacita mantha. Tenepo, ifepano tikabvuma kuti mantha yatikunde, tingakhale pa ngozi yakusiya kutumikira Yahova. Tin’funa lini kukhala ninga wale omwe ambalewedwa pa Mwambo 26:36, 37. Ndipo tin’funika lini kubvuma kuti mantha yatibweze m’mbuyo ayai yatitazise kupitiriza kumbacita mabasa yauzimu. Ifepano timbakhulupira Yahova na mtima wathu wense, ndipo timbacita lini mantha. (Zai. 28:16) Nthawe zense timbapemba kwa Yahova kuti ambatitsogolere. Timbadziwa kuti iye akakhala kumbali yathu, maboma ya wanthu yomwe yana mphanvu kwene-kwene yan’dzakwanisa lini kutitazisa kutumikira mwakukhulupirika Mulungu wathu. M’mbuto mwakutipasa mantha, cizunzo cingaticitise kutumikira kwene-kwene Yahova kuposa kale. w19.07 9-10 ¶6-7

Penu imwepo mukuwona kuti basa lanu lakupfunzisa linkubala lini bzisapo, lekani kubwerera mbuyo. Kumbukirani kuti Jezu adandendemezera omwe ambacita basa lakupfunzisa na msodzi wa nsomba. Asodzi wa nsomba angamale nthawe izinji kuti aphate nsomba. Kawiri-kawiri, iwo ambaphata basa kuyambira kumadanda kweca ayai ku macibese kwene-kwene, ndipo nthawe zinango iwo ambayenda kukamedzera ku mbuto zakutali. (Lu. 5:5) Mpsibodzi-bodzi, Akristau winango ambamala nthawe izinji ankuphata basa lakupfunzisa mwakupirira, ku mbuto zakusiyana-siyana. Thangwe ranyi iwo ambacita bzimwebzi? Kuti athumizire mipata yakugumana na wanthu. Nyongo yomwe Akristauwa ambacita imbawathandiza kwene-kwene, thangwe ambakwanisa kugumana wanthu wakufunisisa kubva bzipsa bzabwino. Kodi imwepo mungayezere kupalizira pa nthawe na mbuto yomwe mukuwona kuti munigumana wanthu azinji? Thangwe ranyi kupfunzisa Bibliya kumbafuna kupirira? Thangwe libodzi ndakuti basa lathu ndakuthandiza lini kokha nyakupfunza wa Bibliya kudziwa na kufuna nfundo za m’Bibliya. Koma tin’funika kumuthandiza kudziwa na kufuna mweneciro wa Bibliya, Yahova. w19.07 18-19 ¶14-15

Winango wa ifepano pinango tikulimbana na makumbukidwe yakubzipasa mulandu thangwe ra pikado zomwe tidacita kale-kale. Penu bzimwebzi bzinkukucitikirani, kodi bzingakhale lini bwino kukhazikisa pfunziro lanu la pamwekha lakulewa bza nsembe ya cakulombolera ya Jezu? Mukambacita pfunzirolo, mbakumbukirani ndipo mbaipemberani nkhaniyo. Bzimwebzi bzin’dzakuthandizani kuleka kumbabzipasa mulandu thangwe ra pikado zomwe Yahova adakulekererani kale. Kumbukirani cinthu cinango comwe tingapfunze na Paulo. Abale winango adasiya basa lomwe likhawapasa kobiri zizinji, kuti atumikire Yahova mwakukwanira. Penu imwepo ndimwe bodzi wa iwo, comwe cingakuthandizeni kuyebwa ‘bzinthu bzakumbuyo’ ni kuleka kumbakumbukira phindu lomwe mungadaligumana thangwe ra bzinthu bzomwe mudasiya. (Mirew. 11:4-6; Mpal. 7:10) ‘Bzinthu bza m’mbuyo’ bzingaphatanidzembo bzinthu bzabwino bzomwe tidacita mu utumiki bwa Yahova na mayezo yomwe tidayapirira mbuyomu. Kulewa cadidi, tikambakumbukira momwe Yahova adatithandizira mbuyomu, tingalimbise uxamwali bwathu na iye. Tenepo, tin’funika lini kumbakumbuka kuti bzinthu bzizinji bzomwe tidacitira Yahova mpsakukwanira.​—1 Wak. 15:58. w19.08 3 ¶5-6

Tingapembe kwa Baba wathu mwaulemu pa nthawe iri-yentse, bziribe basa kuti tiri mbuto iponi. Iye ambakhala lini wakutanganidwa mwakuti angatazire kutetekera mipembo yathu. Tikazindikira kuti Yahova ambatetekera mipembo yathu, lufoyi lathu kwa iye lin’dzathimizirika. Munembi winango wa bukhu la Psalymo adalewa kuti: ‘Inepano nimbamufuna Yahova, thangwe iye ambabva fala langu.’ (Psal. 116:1) Baba wathu ambandotetekera lini mipembo yathu, koma ambaitawirambo. Mpostolo Juwau adalewa kuti: ‘Ciri-centse comwe timukumbireco mwakubverana na kufuna kwace, iye ambatibva.’ (1 Ju. 5:14, 15) Koma ni nthawe lini zentse zomwe Yahova ambatawira mipembo yathu ninga momwe tikufunira. Iye ambadziwa bzomwe mpsabwino kuna ifepano, ndipo nthawe zinango angatitawire lini ndipo angafune kuti tidikhirire pang’ono. (2 Wak. 12:7-9) Yahova ambatisamalira. Iye ambacita bzomwe ambafuna kuti azipai wentse ambacite. (1 Tim. 5:8) Mwa ciratizo, pai ambacita ciri-centse kuti asamalire wana wace mwakuwapasa bzomwe ambafunikira kuti akhale na moyo. Mpsibodzi-bodzimbo na Yahova, iye ambafuna lini kuti ifepano timbakhale na thupo thangwe ra kusaya cakudya, bzakubvala na mbuto yakukhala. (Mat. 6:32, 33; 7:11) Pakuti iye ni Baba wa lufoyi, Yahova ambatitsimikizira kuti an’dzaticitira bzentse bzomwe timbafunikira. w20.02 5 ¶10-12

Ni wentse lini omwe ana cidikhiro cakudzayenda kudzulu ambacita mbali ya ‘kapolo wakukhulupirika na wanzeru.’ (Mat. 24:45-47) Ninga momwe bzikhaliri m’magole dzana yakutoma, Yahova na Jezu ntsiku zino akuphatisa basa abale ang’ono-ng’ono kuti adyese ayai apfunzise wanthu azinji. Pa nthawe imweyire, ni Akristau ang’ono-ng’ono wakudzozedwa omwe adaphatisidwa basa kuti anembe Bzinembo Bzacigirego Bzacikristau. Ndipo ntsiku zinombo, ni Akristau ang’ono-ng’ono basi wakudzozedwa omwe ana udindo bwakupasa wanthu wa Mulungu ‘cakudya pa nthawe yakuthemera.’ Yahova an’funa kudzapasa moyo wakusaya kumala pano pa dziko la pantsi wanthu azinji omwe ambamutumikira, ndipo ang’ono-ng’ono an’dzakatonga pabodzi na Jezu kudzulu. Yahova ambasimba atumiki wace wentse, kuyambira ‘Mdjuda’ kuphatanidzambo ‘amuna khumi’ ndipo ambafuna kuti iwo ambabvere malamulo yace acipitiriza kukhala wakukhulupirika kwa iye. (Zak. 8:23) Tenepo, wentse an’funika kupitiriza kukhala wakubzicepesa. Ndipo wentse an’funika kutumikira Yahova na kukhala wakuphatana. An’funikambo kucita nyongo kuti gwere lipitirize kukhala pa mtendere. Na tenepo, pakuti tiri kuphampha kwa ntsiku zakumalizira, mbatipitirizeni kutumikira Yahova na kutewera Kristu ninga ‘thimu libodzi.’ w20.01 31 ¶15-16

Ifepano tin’funika lini kungingimiza adzinza wathu kuti atetekere bzipsa bzabwino, koma tingawalimbise kuti ambakumbukire na kubvuma bzomwe Bibliya limbapfunzisa. (2 Tim. 3:14, 15) Khalani ciratizo cabwino. Kawiri-kawiri, bzomwe ifepano timbacita bzimbadabwisa kwene-kwene adzinza wathu kuposa bzomwe timbalewa. Pitirizani kuthandiza adzinza wanu. Yahova ni ciratizo cabwino kwa ifepano. Iye ‘mwakubwereza-bwereza’ ambapasa wanthu mwayi wakuti abvume bzipsa bzabwino kuti adzakhale na moyo. (Jer. 44:4) Ndipo mpostolo Paulo adauza Timotio kuti apitirize kuthandiza winango. Thangwe ranyi? Thangwe ndakuti kucita bzimwebzi kungadapulumusa iye pabodzi na wanthu omwe angadamubvera. (1 Tim. 4:16) Ifepano timbafuna adzinza wathu, ndipo tin’funa kuti iwo adziwembo cadidi ca m’Fala la Mulungu. w19.08 14 ¶2; 16-17 ¶8-9

Tin’funika kumbakumbukira kuti munthu akatipasa malango, ndiye kuti tacita cinthu cakuphonyeka kuposa momwe tikhakumbukira. Pinango tingalambe pomwe tikupasidwa malangoyo. Tingayambe kupasa mulandu nyakutipasa malangoyo ayai momwe wayaperekera. Koma tikakhala wakubzicepswa tin’dzabvuma malangoyo mwakusaya kunesa. Munthu wakubzicepswa ambatenda kwene-kwene akapasidwa malango. Kumbukirani cakucitika ici: Yezezerani kuti imwepo muli pa mitsonkhano m’Nyumba ya Umambo. Ndipo pambuyo pa mitsonkhano mwamusana na abale wakusiyana-siyana, tsono pomwe mwamala, m’bale munango akukutengerani pa mbali, acikuuzani mwakazewe-zewe kuti: “M’mano mwanu mudaphatirira cakudya.” Tikupenukira lini kuti imwepo, mungabve manyazi kwene-kwene. Koma, kodi mungatende lini m’baleyo thangwe rakuti wakudziwisani? Pinango mungadafuna kuti iye akuuzeni mitsonkhano ikanati kuyamba! Mpsibodzi-bodzimbo, m’bale akacita nyongo yakutipasa malango yomwe tikufunikira, tin’funika kubzicepswa na kutenda malangoyo. Ndipo tin’funika kuwona m’baleyo ninga xamwali, sikuti nyamadulanthaka wathu.​—Mim. 27:5, 6; Wag. 4:16. w19.09 5 ¶11-12

Yahova adapasa azimai udindo bwakufunika kwene-kwene, ndipo mbali inango ya udindobo ni kudziwa kusamalira bwino wana wawo. Bzomwe mai ambacita na kulewa, bzingatokonye kwene-kwene moyo wa wana wace mpaka kale-kale. (Mim. 22:6) Kuti tibvesese bwino bza nkhaniyi, mbatiwoneni bzomwe azimai angapfunze na Mariya, mai wa Jezu. Mariya akhadziwa bwino bzinembo. Iye akhalemekeza kwene-kwene Yahova ndipo akhalimbisa uxamwali bomwe akhanabo na iye. Mariya akhali wakukonzeka kucita bzomwe Yahova akhafuna, napo kuti bzimwebzi bzikhaphatanidza kucinja moyo wace wense. (Lu. 1:35-38, 46-55) Penu imwepo ndimwe mai, dziwani kuti pana njira zizinji za momwe mungatewezerere Mariya. Kodi mungamutewezere tani? Cakuyamba, imwepo mun’funika kulimbisa kwene-kwene uxamwali bomwe munabo na Yahova, mwa kumbacita pfunziro la Bibliya la pamwekha na kumbapemba kwa iye nthawe zense. Caciwiri, khalani wakukonzeka kucinja moyo wanu kuti Yahova akomedwe namwe. w19.09 18 ¶17-19

Juwau adawona matsomphenya yakudabwisa yomwe yakhalewa bza kutsogolo. M’matsomphenyamo, iye adawona wanjo omwe akhadaphata mphepo zakupfudzira za citsautso cikulu, mpaka nthawe yakudindidwa kwakumalizira kwa akapolo wa Mulungu. (Cibv. 7:1-3) Amwewa ambacita mbali ya thimu la wanthu wakukwana 144.000 omwe an’dzakatonga pabodzi na Jezu kudzulu. (Lu. 12:32; Cibv. 7:4) Pambuyo pa bzimwebzi, Juwau adawona pomwe thimu linango, ndipo adalewa kuti: ‘Ndidawona thimu likulu la wanthu lomwe palibe munthu angadakwanisa kulilewenga, lakucokera ku mitundu, madzinza, mbumba na bzirewedwe bzense. Iwo akhadaima pa maso pa mpando wa umambo na pa maso pa Mwana wa bira.’ (Cibv. 7:9-14) Tenepo, kumbukirani momwe Juwau adakhalira wakukondwa pomwe adadziwa kuti kutsogolo wanthu azinji angadadzanamata Mulungu mwacadidi! Mwakusaya kupenukira, matsomphenyaya yadalimbisa cikhulupiro ca Juwau. Ndipo ifepano omwe tikukhala mu nsiku zakumalizira, timbalimbisidwambo kwene-kwene thangwe ra kudziwa kuti matsomphenyayo yandosala pang’ono kukwanirisidwa! Nthawe zathu zino, wanthu azinji ayamba kunamata Yahova ndipo ana cidikhiro cakuti an’dzapulumuke pa citsautso cikulu na kun’dzakhala na moyo wakusaya kumala pa dziko la pansi pano. w19.09 26 ¶2-3

Tiyezezere kuti atsogoleri wa maboma apereka cidziwiso cakuti ‘mtendere na cisungiko.’ Pinango iwo akutsimikiza na mtima wense kuti tsapano akwanisa kucitisa dziko kukhala pa mtendere. Ndipo akufuna kuti wanthu awone kuti iwo an’kwanisa kumalisa mabvuto yense ya pa dziko la pansi. Tsono cadidi n’cakuti, atsogoleriwo an’dzakwanisa lini kuletsa bzomwe bzin’dzacitika pambuyo pakuperekedwa kwa cidziwisoco. Thangwe ranyi? Thangwe ndakuti ‘Babulo Mkulu’ an’dzapfudzidwa! (Cibv. 17:5, 15-18) ‘Mulungu [an’dzaikha] m’mitima mwawo makumbukidwe yace.’ Kodi makumbukidweyo njaponi? Ni kupfudzidwa kwa bzipembedzo bzense bzakunama, kuphatanidzambo bzomwe bzimbati mpsacikristau. Mulungu an’dzaikha makumbukidwe yace m’mitima mwa ‘nyanga khumi’ za ‘cirombo cipfuwiira.’ ‘Cirombo cipfuwiira’ cikuimira bungwe la Nações Unidas, ndipo nyanga khumi zikuimira maboma yense yomwe yambathandizira bungwero. (Cibv. 17:3, 11-13; 18:8) Tenepo, mabomaya yakadzamukira cipembedzo cakunama, cin’dzakhala cizindikiro cakuti citsautso cikulu cikuyamba. Imweyi in’dzakhala nthawe yakupasa mantha kwa wanthu wense omwe ali pa dziko la pansi. w19.10 14 ¶1, 3

M’magole dzana yakutoma, Diotrefe akhacitira njiru abale omwe akhatsogolera gwere lacikristau. Iye akhafuna ‘kukhala pa mbuto yakuyamba’ m’gwere. Tenepo, iye akhalewa kuipa mpostolo Juwau na abale winango kuti wanthu m’gwere aleke kuwalemekeza. (3 Ju. 9, 10) Napo kuti palibe ne m’bodzi wa ifepano omwe angacite bzomwe Diotrefe adacita, koma bzingacitike m’gwere m’bale kupasiwa udindo bomwe ifepano tikhabufunisisa, ticiyamba kumucitira njiru. Bzimwebzi bzingacitike maka-maka tikawona kuti tina luso la momwe tingasamalirire udindobo kuposa m’baleyo. Njiru ziri ninga muti wa minga. Ndipo zikamera mizi mu mtima mwathu, bzingakhale bzakunesa kuzizula. Njiru zimbabwera thangwe ra makumbukidwe yakuipa ninga ntsanje, kubzikuza na dyera. Ndipo zingatazise munthu kukhala na makhalidwe yabwino ninga lufoyi, ntsisi na kudeka mtima. Tenepo, tikawona kuti mtima wathu wayamba kukhala na njiru, tin’funika kuzicoseratu mwakamfulumize. w20.02 15 ¶6-7

Mpostolo Paulo akhafuna lini kulewa kuti iye akhana munga caiwo, koma akhalewa bza bvuto lomwe akhanalo m’thupi mwace. Iye akhalewa kuti mabvuto yomwe akhagumana nayo yakhali ninga ‘anjo wa Sathani’ omwe adabwera kuti adzamumenye. Pinango Sathani na madimonyo yace ndiwo lini akhacitisa Paulo kugumana mabvuto. Koma pinango madimonyoyo yadawona kuti Paulo akhana ‘munga m’thupi,’ tenepo yadamupsidinga mwamphanvu mpaka iye kubva kuwawa kwene-kwene. Kodi n’ciyani comwe Paulo adacita? Paulo akhafuna kuti munga omwe ukhali m’thupi mwace ucosedwe. Iye adalewa kuti: ‘Thangwe ra bzimwebzi, ndidamukumbira Mbuya [Yahova] katatu-kense, kuti andicose mungayo.’ Napo Paulo akhacita mipembo, koma mungayo udapitiriza kukhala m’thupi mwacemo. Kodi bzimwebzi bzikuthandauza kuti Yahova alibe kutawira mipembo yace? Ne na pang’onopo. Yahova adamutawira. Iye alibe kumalisa mabvuto yomwe Paulo akhagumana nayo, koma adamupasa mphanvu kuti akwanise kuyapirira. Yahova adalewa kuti: ‘Mphanvu yangu imbakhala yakukwana ukakhala wakutepa.’ (2 Wak. 12:8, 9) Na thandizo la Mulungu, Paulo adakwanisa kupitiriza kukhala wakukondwa na mtendere wa mu mtima!​—Waf. 4:4-7. w19.11 9 ¶4-5

Yahova ni Mulengi ndipo ndiye omwe adatipasa moyo, ndipopa ifepano tin’funika kunamata iye yekha basi. (Cibv. 4:11) Koma pana ngozi. Napo kuti timbafuna na kulemekeza Yahova, pana bzinthu bzinango bzomwe bzingatitazise kunamata iye yekha basi. M’Bibliya, kufuna kwene-kwene Yahova kumbathandauza kunamata iye yekha basi. Tenepo, tin’funika lini kuti munthu ayai cinthu ciri-cense cititazise kunamata iye yekha basi. (Kuf. 34:14) Ifepano timbanamata lini Yahova mwakusaya kudziwa. Thangwe ranyi tikulewa tenepo? Thangwe ndakuti kunamata kwathu kumbacokera pa bzomwe timbapfunza pakulewa bza iye. Ifepano timbadziwa makhalidwe yabwino ya Yahova ndipo yambatidabwisa. Ndipo timbadziwambo bzomwe iye ambafuna na bzomwe ambafuna lini, ndipo timbacita ciri-cense kuti timutewezere. Timbabvesesa ndipo timbathandizira cakulinga comwe anaco kwa wanthufe. Kukhala xamwali wa Mulungu ni mwayi ukulu kwene-kwene kwa ifepano. (Psal. 25:14) Cinthu ciri-cense comwe timbapfunza kwa Mulengi wathu cimbatithandiza kukhala pa uxamwali bwakulimba na iye.​—Tiy. 4:8. w19.10 26 ¶1-3

Nsiku zino, abale na mpfumakazi, akugumana na mabvuto yakusiyana-siyana. Mwa ciratizo, azinji akubonera na malengwa ya pansi, ninga bziteke-teke na kusefukira kwa madzi. Ndipo winango akubonera na ngozi zomwe zimbacitisidwa na wanthu, ninga nkhondo na ukapondo. Bzimwebzi bzikambacitika, winango wa ifepano angatambire axamwaliwa kumui kwawo. Ndipo winango angawathandize mwa kuwapasa kobiri. Koma comwe tensenefe tingacite ni kupemba kwa Yahova kuti athandize abale na mpfumakazizo. Nthawe zinango tikabva kuti m’bale ayai mpfumakazi yathu idasunama, pinango tingasaye cakulewa ayai cakucita. Koma napo bziri tenepo, pana bzizinji bzomwe tingacite. Mwa ciratizo, tingapambule nthawe kuti ticeze naye, ndipo akambalewalewa tin’funika kumutetekera mwatceru. Ndipo pakucezapo tingamuwerengere vesi la m’Bibliya lakutsangalaza lomwe timbalifuna kwene-kwene. (Zai. 50:4) Tsono cinthu cakufunika kwene-kwene kuposa bzense, ni kukhala ku mbali ya axamwali wathuwo akakhala akufunikira thandizo lathu. Ifepano tin’funika kukulisa na kupitiriza kukhala pa uxamwali bwakulimba na abale wathu. Thangwe ifepano tin’pitiriza kukhala pa uxamwali bwakulimba sikuti kokha mpaka kuphampha kwa dzikoli, koma mpaka muyaya! w19.11 7 ¶18-19

Cifuwo comwe cikhaperekedwa ninga nsembe, nyama yace ikhadyedwa na wanthu wa m’banja la munthu omwe akhapereka nsembeyo pabodzi na ansembe. Koma nyama inango ikhaperekedwa ninga nsembe kokha kwa Yahova. Yahova akhawona mafuta ya nyama yomwe ikhaperekedwa ninga nsembe kukhala cinthu cakufunika kwene-kwene. Ndipo iye adalewa kuti mbali zinango za nyamayo, ninga masapi na impso zikhali zakupambulika kwene-kwene. (Mwam. 3:6, 12, 14-16) Na tenepo, Yahova akhakomedwa kwene-kwene Mjirayeri akapereka kuna iye mafuta na mbali zinango zakufunika za nsembeyo mwakufuna yekha. Mjirayeri omwe akhapereka bzimwebzi, akhalatiza kuti akhafunisisa kupereka kwa Yahova bzinthu bzabwino bzomwe akhanabzo pa moyo wace. Mpsibodzi-bodzimbo na Jezu, thangwe ra kufuna Yahova adabzipereka ninga nsembe mwakucita bzense bzomwe adakwanisa kuti amutumikire na moyo wace wense. (Ju. 14:31) Jezu akhakomedwa na kucita kufuna kwa Mulungu. (Psal. 40:8) Mwakusaya kupenukira, Yahova akhakomedwa kwene-kwene pomwe akhawona Jezu akucita nyongo kuti acite kufuna kwa Yahovayo! w19.11 22-23 ¶9-10

Bibliya limbalewa kuti, Mulungu adaima kulenga bzinthu pa dziko la pantsi pambuyo pa ntsiku zitanthatu. (Ciy. 2:2) Koma Yahova ambafuna kuphata basa, ndipopa akupitiriza kuphata basalo mu njira zakusiyana-siyana. (Ju. 5:17) Pakuti Yahova adapuma pa ntsiku yacinomwe, tenepo iye adauza Ajirayeri kuti ambapumembo ntsiku zentse zacinomwe za mdzinga uli-wentse. Ndipo Yahova adalewa kuti Ntsiku ya Malinkhuma ikhali cizindikiro kwa iye na Ajirayeriwo. (Kuf. 31:12-14) Palibe munthu ali-wentse akhabvumizidwa kuphata basa pa Ntsiku ya ­Malinkhuma, ne wana, ne akapolo, ne bzifuwo. (Kuf. 20:10) Ntsiku imweyi ikhali yakundonamata Mulungu basi. Atsogoleri azinji wa bzipembedzo wa mu nthawe ya Jezu, akhacitisa lamulo la kukoya ntsiku ya sabudu kukhala lakunesa. Iwo akhalewa kuti bzikhali bzakuphonyeka munthu kutenga cinthu ciri-cense m’munda kuti akadye, ne kupoza munthu. (Mar. 2:23-27; 3:2-5) Tsono, Jezu adalatiza kwa omwe akhamutetekera, kuti bzomwe atsogoleriwo akhacita, ndibzo lini bzomwe Mulungu akhafuna. w19.12 3-4 ¶8-9

Bzimbakhala bzakusaya kunesa kutewezera Yahova, tikambapfunza kwene-kwene bza makhalidwe yace. Davide akhadziwa bwino Baba wace wakudzulu, ndipopa iye akhakwanisa kumutewezera pomwe akhacita bzinthu na winango. Ndipo pakuti akhali pa uxamwali bwakulimba na Yahova, Davide adakhala m’bodzi mwa wamambo omwe akhafunidwa kwene-kwene mu Jirayeri, ndipo Yahova akhamuphatisa basa ninga ciratizo kwa wamambo winango wa Jirayeri. (1 Wam. 15:11; 2 Wam. 14:1-3) Kodi tikupfunza ciyani na ciratizo ca Davide? Tin’funika kukhala ‘anyakutewezera Mulungu.’ Tenepo, tikambatewezera makhalidwe ya Yahova, timbalatiza kuti ndife wana wace. ( Wayef. 4:24) Ifepano tin’funika lini kuleka kupfunza bza Yahova. (Mpal. 3:11) Koma cinthu cakufunika kwene-kwene ni kuphatisa basa bzomwe timbapfunzabzo, sikuti kumbandopfunza basi. Tsono, tikacita bzimwebzi na kutewezera Baba wathu wa lufoyi, Yahova, iye an’dzapitiriza kutifenderera. (Tiy. 4:8) Tenepo, mwakuphatisa basa Fala lace, Yahova akutitsimikizira kuti an’dzasiya lini omwe ambacita nyongo kuti amudziwe bwino. w19.12 20 ¶20; 21 ¶21, 23

Djakobi akhafuna wana wace wentse, koma maka-maka akhafuna kwene-kwene Zuze, omwe akhana magole 17 yakubadwa. Kodi abale wa Zuzeyo akhabzibva tani na bzimwebzo? Iwo adayamba kumucitira njiru acimuwenga kwene-kwene. Zuze alibe kucitira abale wacewo cinthu ciri-centse cakuphonyeka comwe cingadacitisa kuti amuwenge. Napo bzikhali tenepo, iwo adamugulisa ninga kapolo ndipo adanamiza baba wawo, mwakuwauza kuti mwana omwe mumbamufuna kwene-kwene ule wadyedwa na cirombo. Tenepo thangwe ra njiru, abale wa Zuze adadzonga mtendere wa banja lawo ndipo adasunamisa baba wawo. (Ciy. 37:3, 4, 27-34) Njiru zimbagumanika pa ndandanda ya ‘mabasa ya thupi’ yomwe yangaphe ndipo yangadzatazise munthu kupita mu Umambo bwa Mulungu. (Wag. 5:19-21) Kawiri-kawiri njiru zimbayambisa makhalidwe yakuipa, ninga ciwengo, ndewo na ukali bwakupitirira malire. Bzomwe abale wa Zuze adacita bzimbalatiza kuti njiru zingadzonge mbverano na mtendere omwe umbakhala ulipo pa banja. N’cadidi kuti palibe ne m’bodzi wa ifepano omwe angacite bzomwe abale wa Zuzewa adacita, koma cadidi n’cakuti tentsenefe ndife wakuperewera ndipo mtima wathu umbapumpsa. Ndipopa nthawe zinango tingayambe kucitira njiru wanthu winango. w20.02 14 ¶1-3

Mozeji akhana udindo bwakutsogolera wanthu wa Mulungu, koma akhacitira lini njiru omwe akhathemera kukhalambo na udindobo. Mwa ciratizo, pa nthawe inango, Yahova adapambula pang’ono mzimu wace wakucena omwe ukhali mwa Mozeji acipasa akulu wa Jirayeri omwe akhadaima pafupi na tendi la mkonkhano. Pa nthawe ing’ono-ng’ono, Mozeji adabva kuti akulu awiri wa gwere omwe akhalibe kuyenda ku tendi la mkonkhano, adatambirambo mzimu wakucena aciyamba kucita bzinthu ninga apolofeta. Kodi n’ciyani comwe Mozeji adacita pomwe Djosuwe adakumbira Mozejiyo kuti ayende kukawaletsa bzomwe akhacitabzo? Iye alibe kukhala na njiru na bzomwe Yahova adacitira akuluwo. M’mbuto mwace, Mozeji adabzicepesa ndipo adakomedwa kwene-kwene na udindo bomwe akuluwo adapasiwa. (Mirew. 11:24-29) Kodi tikupfunza ciyani na bzomwe Mozeji adacita? Penu imwepo ndimwe mkulu wa gwere, kodi bungwe la akulu lidakukumbirani kale kuti mupfunzise m’bale winango, kuti asamalire udindo bomwe imwepo mumbabufuna kwene-kwene? Tsono mukakhala wakubzicepesa ninga Mozeji, imwepo mun’dzasunama lini mukadzakumbiridwa kuti mupfunzise m’bale winango kuti asamalire udindobo. M’mbuto mwace, mun’dzakomedwa kwene-kwene na kuthandiza m’bale wanuyo. w20.02 15 ¶9; 17 ¶10-11

Matenda yangatokonye kwene-kwene makumbukidwe yathu, ndipo tingafike pakubziwona kuti ndife lini wakufunika kwa munthu ali-wentse. Ndipo nthawe zinango tingacite manyazi tikadziwa kuti winango akuwona kuti tikutazira kucita bzinthu bzinango, ayai tikafuna kuti winango atithandize. Ndipo napo winango angadziwe lini kuti tikuduwala, pinango tingabzibve lini bwino tikawona kuti tikutazira kucita bzinthu bzinango bzomwe tikhacita kale-kale. Napo kuti bvutoli limbatisunamisa, Yahova ambatipasa mphanvu kuti tikwanise kupirira. Mwa njira iponi? Yahova adaikha m’Bibliya mafala yabwino kuti yambatikumbuse kuti ifepano ndife wakufunika kwene-kwene kwa iye, napo tikaduwala. (Psal. 31:19; 41:3) Tenepo, mwakuphatisa basa mafala yakufuliziridwa Yahova an’dzatithandiza kulimbana na makumbukidwe yakuipa yomwe yangabwere tikaduwala. Khalani na citsimikizo cakuti Yahova akudziwa bza matendayo. Tenepo, mukumbireni kuti akuthandizeni kumbawona bzinthu mu njira yakuthemera pa matendayo. Mukamala werengani m’Bibliya mafala yabwino yomwe Yahova adakunemberani kuti yakutsangalazeni. Ndipo ikhani makumbukidwe yanu pa mavesi yomwe yakulatiza momwe Yahova ambawonera mtumiki wace ali-wentse kukhala wakufunika. Mukacita bzimwebzi, mun’dzawona kuti Yahova ngwabwino kwa wentse omwe ambamutumikira mwakukhulupirika.​—Psal. 84:11. w20.01 15-16 ¶9-10; 17 ¶12

Izaki akhali munthu wakudala kwene-kwene, ndipopa Afilisteu akhamucitira njiru thangwe ra kudalako. (Ciy. 26:12-14) Iwo adafucira micera yentse yomwe Izaki akhamwesera bzifuwo bzace. (Ciy. 26:15, 16, 27) Ninga Afilisteu, wanthu winango ntsiku zino ambacitira njiru omwe ana kobiri zizinji kuposa zomwe iwo anazo. Wanthu amwewa ambandofuna lini kukhala na bzinthu bzomwe anzawo anabzo, koma ambafuna kuti anzawowo aleke kukhala na bzinthubzo. Atsogoleri wa bzipembedzo bza cidjuda, akhacitira njiru Jezu thangwe wanthu azinji akhamufuna kwene-kwene. (Mat. 7:28, 29) Jezu akhaimikira Mulungu, ndipo akhapfunzisa cadidi. Napo bzikhali tenepo, atsogoleri wa bzipembedzowo akhamwaza magunkha na nkhani zakulewa kuipa Jezu kuti adzonge mbiri yace. (Mar. 15:10; Ju. 11:47, 48; 12:12, 13, 19) Kodi tikupfunza ciyani na bzimwebzi? Tikupfunza kuti tin’funika lini kumbacitira njiru abale na mpfumakazi za m’gwere, omwe ambafunidwa na abale wentse thangwe ra makhalidwe yawo yabwino. M’mbuto mwace, tin’funika kucita nyongo kuti titewezere makhalidwe yawoyo.​—1 Wak. 11:1. w20.02 15 ¶4-5

Yezezani kuti mukukhala mu nthawe ya utongi bwa Perisi m’magole ya mbuyomu. Ndipo muna nkhani yakuti muceze na Mambo. Tenepo mukucita ulendo bwa kuyenda ku mzinda wa Susani komwe kumbakhala Mamboyo. Tsono pomwe mwafika, mukanati kulewalewa na Mambo, cakuyamba mun’funika kubvumizidwa, thangwe mukasaya kucita bzimwebzi, mungaphedwe! Tikutenda kwene-kwene Yahova thangwe ali lini ninga Mambo wa ku Perisi! Yahova ngwamphanvu zentse ndipo ngwapadzulu kwene-kwene kuposa mtongi ali-wentse, koma napo bziri tenepo, iye ambabvuma kuti timbalewelewe naye pa nthawe iri-yentse. Ndipo iye ambafuna kuti timbacite bzimwebzi mwakutsudzuka. Mwa ciratizo, napo kuti Yahova ana madzina ya ulemu, ninga Mulengi, Wamphanvu-zentse na Mbuya Mkululetu, iye ambafuna kuti timbamucemere ‘Baba.’ (Mat. 6:9) Bzimwebzi bzikuthandauza kuti Yahova ambafuna lini kuti timbamuwone ninga kuti ali patali na ifepano, koma timbamuwone ninga Baba omwe tinaye pafupi. Mpsakudekeza lini kudziwa bzimwebzi? Mpsakufunika kuti timbacemere Yahova kuti ‘Baba,’ thangwe ndiye omwe adatipasa moyo. (Psal. 36:9) Pakuti Yahova ni Baba wathu, ifepano tin’funika kumbamubvera. Ndipo tikambacita bzomwe Yahova ambatikumbira kuti ticite, iye an’dzatipasa bzisimbo bzizinji. (Waheb. 12:9) Cibodzi mwa bzisimbobzo ni moyo wakusaya kumala, bziribe basa kuti tin’dzakhala nawo kudzulu ayai pa dziko la pantsi. w20.02 2 ¶1-3

Cakulinga cathu n’cakuthandiza nyakupfunza wathu wa Bibliya kuti akule mwauzimu. (Wayef. 4:13) Kumayambiriro, munthu akabvuma pfunziro la Bibliya, iye angafunisise kudziwa phindu lomwe aniligumana na pfunzirolo. Koma lufoyi lace kwa Yahova likambathimizirika, iye ambayamba kukumbukira momwe angathandizire winango, kuphatanidzambo abale wa m’gwere. (Mat. 22:37-39) Bzikafunikira, lekani kuzeza kuuza nyakupfunza wanu bza mwayi omwe tinawo wa kucita bzakupereka bzomwe bzimbathandizira basa la Umambo. Pfunzisani anyakupfunza wanu wa Bibliya bzomwe angacite akagumana mabvuto. Tiyezezere kuti nyakupfunza wanu wa Bibliya ni mpalizi wakusaya kubatizidwa, ndipo akuuzani kuti m’bale ayai mpfumakazi inango ya m’gwere yacita bzinthu bzomwe bziribe kumudekera. Kodi mungamuthandize tani? Lekani kuthamangira kumuuza kuti ni mbani omwe waphonya pakati pa awiriwo, koma mufotokozereni bzomwe Bibliya limbalewa kuti acite. Mukacita tenepo, iye an’dzandosiya nkhaniyo acilekerera m’baleyo, ndipo bzikasaya kukwanisika an’dzayenda kukaceza na m’baleyo mwa lufoyi na mwakudeka mtima, na cakulinga cakufuna [‘kupulumusa m’baleyo.’] (Ndendemezerani na Mateu 18:15.) Thandizani nyakupfunza wanuyo kukonzekera bzomwe angakalewe. w20.01 5-6 ¶14-15

Timbalatiza kuti timbatenda kutilekerera komwe Yahova ambacita, tikambapemba kwa iye, tikambabvuma malango yace, na pomwe timbacita ciri-centse kuti titcenkhe kucita pikado mwakubwereza-bwereza. Tikambacita bzimwebzi, timbakhala na mtendere wa mu mtima. James, m’bale omwe adacita pikado ikulu, adawona kuti bzimwebzi mpsacadidi. Mpsakulimbisa kwene-kwene kudziwa kuti ‘Yahova ali pafupi na wale omwe adasweka mtima; iye ambapulumusa wale omwe atepa!’(Psal. 34:18) Pakuti tiri kuphampha kwa ntsiku zakumalizira, tin’gumana na bzinthu bzizinji bzomwe bzin’ticitisa thupo. Tenepo, yakakubwererani makumbukidwe yomwe yangakucitiseni thupo, lekani kucedwa kukumbira Yahova mu mpembo kuti akuthandizeni. Mbapfunzani Bibliya ntsiku zentse. Mbakumbukirani bzomwe Ana, mpostolo Paulo na Mambo Davide adacita. Ndipo mukumbireni Baba wanu wakudzulu kuti akuthandizeni kuwona comwe cimbakucitisani thupo. (Psal. 139:23) Bvumani kuti iye ambakuthandizeni pa mabvutoyo, maka-maka yale yomwe mukuwona kuti mungakwanise lini kulimbana nayo mwekha. Mukacita bzimwebzi, mun’dzakhala ninga nyakunemba bukhu la Psalymo omwe adaimbira nyimbo Yahova kuti: ‘Pomwe makumbukidwe yakundiboneresa yadadzala mu mtima mwangu, mafala yanu yakunditsangalaza yadakondwesa moyo wangu.’​—Psal. 94:19. w20.02 24 ¶17; 25 ¶20-21

Mulungu adaikha nzeru zace m’makumbukidwe mwa anembi wa Bibliya, mwakuphatisa basa mzimu wakucena. Tikambawerenga Bibliya na kukumbukira bzomwe timbawerengabzo, malango ya Mulungu yambapita m’makumbukidwe na mu mtima mwathu. Malangoyo yambatithandiza kucinja bzinthu pa moyo wathu kuti tikondwese Yahova. (Waheb. 4:12) Tsono kuti mzimu wakucena utithandize, tin’funika kumbapambula nthawe yakupfunza Bibliya ntsiku zense na kukumbukira bzomwe timbawerengabzo. Tikacita bzimwebzi, Fala la Mulungu lin’dzaphata basa pa bzomwe timbalewa na kucita. Tinfunikambo kunamata Mulungu pa mitsonkhano. (Psal. 22:22) Pa mitsonkhano pambagumanika mzimu wakucena wa Yahova. (Cibv. 2:29) Tikakhala pa mitsonkhano pabodzi na abale wathu kuti tinamate Mulungu, timbapemba ticikumbira mzimu wakucena, timbaimba nyimbo za Umambo zakucokera m’Fala la Mulungu, ndipo timbatambira malango ya m’Bibliya yakufotokozedwa na abale wakusankhulidwa na mzimu wakucena. Tsono kuti mzimuyo utithandize, tin’funika kumbakonzekera mitsonkhanoyo kuti timbakwanise kupereka mitawiro. w19.11 11 ¶13-14