Dezembro

Ifepano, tikasaya kumbabziphata pakulewalewa tingabzibweresere mabvuto mazinji. Mwa ciratizo, tiyezezere kuti imwepo mwagumana na m’bale ayai na mpfumakazi yomwe imbakhala ku dziko lomwe basa lathu lakupalizira ndakuletsedwa, kodi bzingakhale bwino kumubvunza kuti akuuzeni momwe basalo likufambira ku dzikolo? Pinango imwepo mungamubvunze na mathangwe yabwino sikuti thangwe ra kufuna kumutapa mkamwa. M’cadidi kuti ifepano timbafuna abale wathu ndipo timbacita thupo na bzomwe bzimbawacitikira. Ndipo timbafunambo kuwaguma m’mipembo yathu. Napo bziri tenepo, bzimbafunika kuti timbakhale wakubziphata pakulewalewa ayai kundonyamala. Tsono tikangingimiza munthu kuti atiuze nkhani ya cintsintsi, bzingalatize kuti timbamufuna lini munthuyo ne abale na mpfumakazi omwe akumukhulupira kuti an’zimbula lini nkhaniyo. Kulewa mwakusaya kupenukira, palibe ne m’bodzi wa ifepano akufuna kuti bzinthu bzifikiretu pakuipa kuna abale wathu omwe akukhala m’madziko yomwe yambaletsa basa lathu lakupalizira. Ndipo palibe ne m’bale ayai mpfumakazi yomwe ikutumikira m’madzikoyo, ingafune kuzimbula momwe Mboni za Yahova zikupalizirira, momwe zikucitira mitsonkhano na mabasa yanango.—w20.03 21 ¶11-12

Mulungu akhafuna lini kuti wanthu ambafe. Ndipo kuti Adamu na Eva akhale na moyo wakusaya kumala, iwo akhafunikira kubvera Yahova omwe adawapasa lamulo lakusaya kunesa kubvera. Iye adawauza kuti: ‘Muti wakudziwisa cabwino na cakuipa, bzin’funika lini kuudya, thangwe nsiku yomwe un’dzaudya, cadidi un’dzafa.’ (Ciy. 2:16, 17) Tsono, na kupita kwa nthawe Sathani adabwera kudzadzonga. Iye adalewalewa na Eva mwakuphatisa basa nyoka, acimuuza mafala yomwe yakutsogolera vesi la leroli. Bzakupasa nsisi mpsakuti Eva adakhulupiradi gunkhali, ndipo adadya cisapoco. Iye adadzapasambo bayace cisapoco, ndipo bayaceyo adadyambo. (Ciy. 3:6) Bzimwebzi bzidacitisa kuti wanthu akhale na pikado, aciyamba kufa. (War. 5: 12) Ninga momwe Mulungu akhadalewera, Adamu na Eva adadzafadi. Tsono Sathani akanati kusiya kumbanamiza wanthu pakulewa bza infa. Gukha linango lomwe iye ambalewa limbabverana na cipfunziso cakuti munthu akafa, thupi lacero ndiro limbafa, koma mzimu umbapitiriza kukhala na moyo ku dziko la mizimu. Gunkhali limbafotokozedwa mu njira zakusiyana-siyana, ndipo lacitisa kuti wanthu azinji apumpsidwe kuyambira kale-kale mpaka nsiku zathu zino.​—1 Tim. 4:1. w19.04 14-15 ¶3-4

Wana ambakhala alibe luso lakukumbuka bwino ayai lakutcenkha ngozi ninga momwe acikulire ambacitira. Ndipopa bziribe kunesa kuna munthu wacikulire kupumpsa mwana kuti amupswithe. Wanthu omwe ambapswitha wana ambauza wanawo bzinthu bzakunama, mwa ciratizo, ambapasa mulandu mwanayo wakuti acita kufuna yekha, ambamuuza kuti aleke kuzimbula bzomwe bzacitikabzo thangwe palibe munthu ali-wense omwe an’dzamukhulupira ne kumuthandiza akadziwa bza nkhaniyo, ndipo ambamuuzambo kuti acikulire na wana akagonana, bzimbalatiza kuti ambafunana. Kunama kumweku kumbadzonga luso lakukumbuka la mwanayo ndipo pambatenga nthawe itali kuti abvesese kuti akhanamizidwa. Bzimwebzi bzingacitise mwanayo kukula na makumbukidwe yakubziwona kuti alibe basa, wakusaya kufunika ndipo an’themera lini lufoyi ne kutsangalazidwa. Wanthu omwe adapswithidwa ambasunama kwa magole mazinji. Kulewa cadidi ciwembo cimweci ni pikado ikulu kwene-kwene! Ndipo bzimwebzi ni umboni bomwe bunkulatiza kuti tinkukhala mu nsiku zakumalizira, nthawe yomwe wanthu azinji mbakusaya kufuna ‘abale wawo’ ndipo ‘wanthu wakuipa na wacinyengo’ ankupitiriza kuipiratu.​— 2 Tim. 3:1-5, 13 w19.05 15 ¶7-8

Kodi n’ciyani comwe Jezu akhaphatisa basa pakupfunzisa? Cakuyamba, iye akhapfunzisa wanthu na bzomwe akhalewa. Mafala yace yakhana mphanvu thangwe iye akhalewa cadidi ca Mulungu, akhapfunzisa cakulinga ca moyo, ndipo akhauza wanthuwo kuti Umambo bwa Mulungu ni bomwe bun’dzamalisa mabvuto yawo yense. (Lu. 24:19) Jezu akhapfunzisambo na bzicito bzace. Ndipo bzimwebzi bzidathandiza ateweri wace kuti acitembo bzomwe iye akhacitabzo. (Ju. 13:15) Kodi ni lini pomwe Jezu adapfunzisa wanthu? Iye adawapfunzisa pa nthawe yomwe akhacita utumiki bwace pano pa dziko la pansi. (Mat. 4:23) Ndipo pomwe adalamusidwa adapfunzisambo pang’ono ateweri wace. Mwa ciratizo, iye adawonekera kwa anyakupfunza wace, ndipo patsogolo pace adawonekerambo kwa wanthu wakupitirira 500, ndipo adauza anyakupfunza wacewo mafala yakuti ‘ndokoni mukapfunzise wanthu.’ (Mat. 28:19, 20; 1 Wak. 15:6) Ninga msolo wa gwere, Jezu adapitiriza kupfunzisa ateweri wace napo pomwe adabwerera kudzulu. Na kupita kwa nthawe, mu gole la 96 EC, Kristu adatsogolera mpostolo Juwau kuti akalimbise na kupereka malango kwa Akristau wakudzozedwa.​—Wakol. 1:18; Cibv. 1:1. w19.05 3 ¶4-5

Nsiku zino, kuti munthu akhale na moyo ambafunika kucita nyongo ikulu kwene-kwene. Mwa ciratizo, abale wathu azinji ambaphata basa kwa nthawe itali kuti agumane kobiri zakugulira cakudya, bzakubvala na kumangira nyumba mabanja yawo. Winango ambamala nthawe izinji ankucita ulendo bwakuyenda ku basa ndipo ambabwerera kumui akamaliza basalo. Azinji ambaphata basa kwene-kwene kuti agumane kobiri zakuthandizira wanthu wa m’banja mwawo. Ndipo kuphampha kwa nsiku iri-yense ya basa lawo, abale na mpfumakazi ambakhala wakuneta. Ndipo thangwe ra kunetako, iwo ambakwanisa lini kucita pfunziro la pawokha. Tin’funika kumbapambula nthawe yakupfunza Fala la Mulungu na mabukhu yathu yacikristau. Bzimwebzi mpsakufunika thangwe bzimbatithandiza kukhala pa uxamwali bwakulimba na Yahova ndipo kutsogolo tin’dzatambira moyo wakusaya kumala! (1 Tim. 4:15) Abale winango ambabesera nsiku zense kuti apfunze pa nthawe yomwe wanthu azinji wa pamui pawo akadagona, ndipo makumbukidwe yawo yambakhala yakali pa mbuto. Ndipo winango ambasankhula nthawe yakucepa kuphampha kwa nsiku kuti apfunze bzinthu bzauzimu na kukumbukira bzomwe apfunzabzo.​—w19.05 26 ¶1-2

Kucinja kumbacitika lini mwadzidzidzi ndipo kumbandocitika lini kokha. Pinango tingafunike kucita ‘nyongo’ ikulu yomwe ingatenge magole mazinji. (2 Pe. 1:5) Tin’funika kucita ciri-cense kuti ticinje unthu bwathu bwa mkati. Cinthu cakuyamba comwe tin’funika kucita ni mpembo. Ifepano tin’funika kumbapemba ninga adacitira nyakunemba bukhu la psalymo, iye adati: ‘Ikhani mwa ine mtima wakucena, imwe Mulungu, ndipo ikhani mwa ine mzimu upsa, wakukhazikika.’ (Psal. 51:10) Tenepo, mpsakufunika kuzindikira kuti tin’funika kucinja mphanvu ya makumbukidwe yathu na kukumbira thandizo kwa Yahova. Cinthu caciwiri comwe tin’funika kucita ni kukumbukira bzomwe timbawerenga. Tikambawerenga Fala la Mulungu nsiku zense, tin’funika kupambula nthawe yakumbakumbukira bzomwe timbawerengabzo, ayai kukumbukira bzinthu bzomwe tin’funika kucinja. (Psal. 119:59; Waheb. 4:12; Tiy. 1:25) Tin’funika kuzindikira penu tinkutokonyedwa na bzipfunsiso bza nzeru za wanthu wa m’dzikoli. Ndipo tin’funikambo kuzindikira bzinthu bzomwe bzimbatitazisa kukhala wakukhulupirika mwauzimu ticicita nyongo yakucinja. w19.06 8 ¶1; 10 ¶10; 12 ¶11-12

Mukambacita bzakusankhula, khazikisani nthawe yakuti mucite bzomwe mwakumbuka kucitabzo ndipo lekani kucinja nthaweyo. Lekani kumbandodikhirira nthawe yabwino yokha-yokha. (Mpal. 11:4) Ndipo samalani kuti bzinthu bzakusaya kufunika, bzireke kukudzongerani nthawe pabodzi na mphanvu zomwe mungaziphatise basa pakucita bzinthu bzakufunika kwene-kwene. (Waf. 1:10) Bzikakwanisika, mbacitani mabasa yanango pa nthawe yomwe winango angakuphingezeni lini. Tenepo mbawauzani kuti aleke kukusokonezani. Ndipo mukakhala mukucita mabasa yanuyo, mbathimisani mtedwe ayai mtcini wanu wanzeru ndipo mensaje zomwe zingapite mun’dzaziwone pa nthawe inango. Bzakutewera bzomwe bzimbabwera thangwe ra bzakusankhula bziri ninga ulendo. Mukafunisisa kufika ulendo bwanu, imwepo mun’dzapitiriza na ulendobo napo penu mungafunikire kucinja njira yakupitira thangwe rakuti njirayo yafungidwa. Mpsibodzi-bodzimbo na imwepo, mukambakumbukira bzakutewera bzomwe bzimbabwera thangwe ra bzakusankhula bzanu, mun’dzabwerera lini m’mbuyo mwakamfulumize mukagumana na mphitca ayai pakafunikira kucinja bzinthu bzinango.​—Wag. 6:9. w19.11 30 ¶17-18

Kodi ndiponi thangwe likulu lomwe likukucitisani kuti mubatizidwe? Thangwe ra kupfunza Bibliya, imwepo mwapfunza bzizinji pakulewa bza Yahova, momwe iye aliri na momwe ambacitira bzinthu. Mwakusaya kupenukira, bzomwe mwapfunzabzo bzatokonya kwene-kwene mtima wanu, ndipo bzacitisa kuti lufoyi lomwe munalo kwa Yahovayo lithimizirike. Tenepo, thangwe likulu lomwe likukucitisani kuti mubatizidwe ni lufoyi lomwe munalo kwa iye. Thangwe linango lomwe likukucitisani kuti mubatizidwe, ni cadidi ca m’Bibliya comwe mudapfunza na kucikhulupira. Kumbukirani bzomwe Jezu adalewa pomwe adapereka lamulo lakupfunzisa wanthu. (Mat. 28:19, 20) Mwakubverana na bzomwe Jezu adalewa, wale omwe an’funa kubatizidwa, an’funika kubatizidwa ‘m’dzina la Baba, la Mwana, na la mzimu wakucena.’ Kodi iye akhafuna kulewa ciyani na mafalaya? Iye akhalewa kuti imwepo mun’funika kukhulupira na mtima wanu wentse cadidi ca m’Bibliya comwe cimbalewa bza Yahova, Mwana wace, Jezu, na mzimu wakucena. Cadidi cimweci n’camphanvu kwene-kwene ndipo cingatokonye mtima wanu. w20.03 9 ¶8-9

Yahova adatumiza wanjo sikuti akandocenjeze Loti, koma kuti akamuthandize kupulumuka pakupfudzidwa kwa mzinda wa Sodoma. (Ciy. 19:12-14, 17) Mpsibodzi-bodzi na ifepano, tikawona kuti m’bale wathu ankusankhula njira yomwe inimubweresera bzakutewera bzakuipa, tin’funika kumucenjeza. Ndipo napo iye acedwe kuphatisa basa malango ya m’Bibliya yomwe wapasidwa, tin’funika kupirira. Tenepo, tin’funika kukhala ninga wanjo awiri wale. Tin’funika kupitiriza kuthandiza m’bale wathuyo sikuti kuleka kumuthandiza thangwe rakuti akucedwa kucinja. Ndipo tingamuthandize mwa mafala na bzicito. (1 Ju. 3:18) Nthawe zinango pinango tingafunike kumulatiza momwe iye angaphatisire basa malango yomwe wapasidwa. Yahova alibe kundokhalira kukumbukira bzakuphonya bza Loti. M’mbuto mwace, iye adafulizira mpostolo Pedru kunemba kuti Loti akhali munthu wakulungama. Tenepo ifepano timbakomedwa kwene-kwene kudziwa kuti Yahova ambalekerera bzakuphonya bzathu! (Psal. 130:3) Ifepano tingatewezerembo ciratizo cace. Mwa njira iponi? Mwa kumbawona makhalidwe yabwino yomwe abale na mpfumakazi zathu anayo. Tikacita bzimwebzi tin’dzapirira nawo, ndipo bzin’dzakhala bzakusaya kunesa iwo kubvuma thandizo lomwe tingawapase. w19.06 21 ¶6-7

Penu boma la dziko lanu likukuletsani kutumikira Yahova, pinango mungawone kuti bzingakhale bwino kuyenda ku dziko lomwe mungakatumikire Yahova mwakutsudzuka. Cimweci ni cakusankhula ca munthu ali-wense pa yekha. Pomwe akanati kusankhula bzomwe angacite, winango ambatoma apfunza bzomwe Akristau wakuyambirira adacita pomwe akhazunzidwa. Anyakupfunza omwe akhakhala mu Jeruzalemu adathawira ku mizinda ya Judeya na Samariya, ndipo winango adayenda ku madera yakutali ninga ku Fenisiya, ku Chipre na ku Antiyokiya. (Mat. 10:23; Mab. 8:1; 11:19) Tsono, pomwe cidacitika cizunzo cinango kwa Akristau wakuyambirira, mpostolo Paulo adasankhula kupitiriza kukhala m’madera yomwe basa lakupalizira likhadaletsedwa. (Mab. 14:19-23) Kodi tinkupfunza ciyani na bzakucitika bziwiribzi? Tinkupfunza kuti kuyenda ayai kuleka kuyenda ku dziko linango thangwe ra cizunzo ni cakusankhula ca msolo wa banja. Ndipo pomwe akanati kucita cakusankhulaco, iye an’funika kupemba kwa Yahova, acipenda momwe bzinthu bziriri na banja lacero. Ndipo an’funikambo kukumbukira bzakutewera bzabwino na bzakuipa bzomwe bzingabwere thangwe ra kuyenda ku dziko linangolo. Ifepano tin’funika lini kutsutsa cakusankhula comwe winango angacite. w19.07 10 ¶8-9

Jezu adatiuza kuti: ‘Ndokoni mukapfunzise wanthu wa mitundu yense.’ (Mat. 28:19) Ndipo kuthumizira bzimwebzi tin’funika lini kupfunzisa anyakupfunza wa Bibliya kokha bzomwe Jezu adauza anyakupfunza wace kuti acite, koma tin’funika kuwapfunzisa momwe angabziphatisire basa pa moyo wawo. Tin’funika kupirira nawo na kuwathandiza akambacita nyongo yakuphatisa basa nfundo za m’Bibliya. Winango ambacinja makumbukidwe na bzicito bzawo mwakusaya kucedwa, koma winango ambatenga nthawe itali. Ciratizo ca misiyonario munango wa ku Perú cin’tithandiza kubvesesa thangwe race kupirira n’kwakufunika. Iye adati: “Inepano ndidapfunza mabukhu mawiri yakulewa bza Bibliya na munthu munango wakucemeredwa Raul. Koma iye akhagumana na mabvuto mazinji pa moyo wace yomwe yakhamutazisa kutumikira Yahova. Ndipo akhana mabvuto m’banja, akhalewalewa mafala yakuipa, ndipo wana wace akhaneseka kumulemekeza. Iye akhafika pa mitsonkhano mwakukhazikika, ndipopa ndidapitiriza kumuzungira kuti ndikathandize iye na banja lace lense. Pomwe yadamala magole 3 kucokera pomwe ndidadziwana naye, iye adakhala wakuthemera kubatizidwa.” w19.07 15 ¶3; 19 ¶15-17

Kumbukirani bzinthu bzomwe mpostolo Paulo akhacita pomwe adanembera tsamba Akristau wa ku Firipo. Iye akhali m’kawoko mu nyumba inango ku Roma ndipo angadakwanisa lini kucoka kuti akapalizire. Tenepo iye akhambapalizira wanthu omwe akhabwera kudzamuwona ndipo akhanembera matsamba magwere yapatali. Iye akhadziwa kuti, ninga Kristu, akhafunika kucita nyongo kuti afike kuphampha kwa moyo wace. Ndipopa iye adandendemezera moyo wa Mkristau na mapici yakuthamanga. (1 Wak. 9:24-27) Anyakucita mapici yakuthamanga, akambathamanga ambaikha makumbukidwe yawo yense pa mzere wakumalizira omwe umbaikhidwa ndipo ambanyang’anisa lini cinthu cinango comwe cingawaceukise. Mwa ciratizo, omwe ambathamangira mu mzinda pinango iwo angafunike kutewera nsewu omwe m’mphepete mwace muna maloja na bzinthu bzinango bzomwe bzingawaceukise. Kodi munkukwanisa kuwona nyakucita mapici yakuthamanga adaima ndipo akunyang’anisa bzinthu mu loja pomwe anzace ankupitiriza kuthamanga? Iye angacite lini bzimwebzo! Mpsibodzi-bodzimbo na ifepano omwe tiri pa mapici yakuthamanga kuti tikatambire moyo, tin’funika kutcenkha bzinthu bzomwe bzingaticeukise. Tenepo, tikapitiriza kuikha makumbukidwe yathu pa malipo yomwe tinkuyadikhirira kutsogolo na kutumikira Yahova na nyongo, tin’dzatambira mabaibai ninga momwe Paulo adacitira! w19.08 3 ¶4; 4 ¶7

Tikasankhula kubvera Mulungu, moyo wathu pabodzi na bzomwe timbakhulupira bzimbacinja, ndipo bzimbakhala bzakunesa kwa adzinza wathu kubvuma kucinja. Bzinthu bzakuyamba bzomwe iwo ambawona kuti tacinja, ni kulamba kucita nawo madyo yomwe yambacitiwa ku dzikoli, na kuleka kupitira nkhani za ndale. Pakuyamba adzinza wathu winango angakomedwe lini nafe. (Mat. 10:35, 36) Tsono ifepano tin’funika lini kuwona kuti iwo angacinje lini. Tenepo, tikasiya kuwathandiza kubvesesa bzomwe timbakhulupira, tingayambe kuwona kuti iwo an’themera lini kudzatambira moyo wakusaya kumala. Yahova alibe kutipasa udindo bwa kumbayeruza wanthu, koma adabupereka kwa mwana wace, Jezu. (Ju. 5:22) Tikapitiriza kupirira, tin’dzathandiza adzinza wathu kutetekera bzipsa bzabwino. Tin’funika kukhala wakukhwimika na wakusamala, napo tikakhala tikupirira mayezo. (1 Wak. 4:12b) Pangatenge nthawe kuti abereki wathu abvesese bza ubwino bwakutumikira Yahova. w19.08 17 ¶10, 13; 18 ¶14

“Ndikakumbukira mabvuto yomwe ndidagumana nayo, nimbawona kuti ningadakwanisa lini kuyamalisa ndekha.” Kodi mudalewambo kale mafala ninga yamweya? Azinji wa ifepano tidayalewa kale. Pinango imwepo mudalewa mafalaya pomwe mudakumbukira bza mphanvu yomwe mudagumana, kuti mukwanise kupirira pomwe mukhaduwala ayai pomwe mudafedwa m’bale wanu. Mukakumbukira mabvutoyo, mumbazindikira kuti mudakwanisa kuyapirira kokha thangwe ra ‘mphanvu yakuposa yacibadwa’ yomwe ni mzimu wakucena wa Yahova. (2 Wak. 4:7-9) Ifepano timbafunikira mzimu wakucena kuti utithandize kupirira mapumpso ya dziko lakuipali. (1 Ju. 5:19) Ndipo tin’funikambo kulimbana na ‘mphanvu ya mizimu yakuipa.’ (Wayef. 6:12) Mzimu wakucena wa Yahova umbatipasa mphanvu kuti tikwanise kucita cinthu ciri-cense comwe tin’funa napo tikugumana na mabvuto. Mpostolo Paulo adatsimikiza na mtima wense kuti akhakwanisa kutumikira Yahova na kwakwanirisa utumiki bwace napo akhagumana na mabvuto, thangwe ra kuthemba ‘mphamvu ya Kristu.’​—2 Wak. 12:9. w19.11 8 ¶1-3

Bibliya lina nkhani za wanthu omwe adawona Jezu maso na maso. Mbafunani Jezu, kuti lufoyi lanu kwa Yahova lithimizirike. Thangwe ranyi? Thangwe ndakuti Jezu ambatewezera ndendende makhalidwe ya Baba wace. Tenepo, mukambapfunza bza Jezu, mun’dzawona kuti Yahova ngwakufunika kwene-kwene kuna imwepo. Kumbukirani momwe Jezu akhalatizira ntsisi wanthu omwe winango akhawawona kuti mbakunyozeka, thangwe ra kusauka, kupunduka na kuduwala. Ndipo kumbukiranimbo malango yomwe Jezu ambakupasani, na phindu lomwe mwaligumana thangwe ra kuphatisa basa malangoyo. (Mat. 5:1-11; 7:24-27) Mukambakumbukira bza ntsembe yomwe Jezu adaipereka kuti tilekereredwe pikado zathu, lufoyi lanu kwa iye lin’dzathimizirika kwene-kwene. (Mat. 20:28) Ndipo mukabvesesa kuti Jezu adabzipereka kuti akufereni, imwepo mun’dzakhala wakukonzeka kukungula pikado zanu na kukumbira Yahova kuti akulekerereni. (Mab. 3:19, 20; 1 Ju. 1:9) Imwepo mukambafuna Jezu pabodzi na Yahova, mun’dzafunisisa kukhala pa uxamwali na wanthu omwe ambawafunambo. w20.03 5-6 ¶10-12

M’bale angayambe kukumbuka kuti ndiye basi omwe angakwanise kucita basa linango m’gwere. Pinango mkazi wa m’bale munango angayambe kukumbuka kuti: ‘Abayangu angadacita bwino basali kuposa m’bale ngana!’ Tsono tikakhala wakubzicepswa, tin’dzakhala lini na makumbukidwe yakubzikuzaya. Tingapfunze bzizinji na momwe Mozeji adacitira bzinthu. Timbadziwa kuti iye akhafuna kwene-kwene udindo bwace bwa kutsogolera Ajirayeri. Kodi Mozeji adabva tani pomwe Yahova adasankhula amuna winango kuti ambaphate naye basa? Iye alibe kuwacitira njiru. (Mirew. 11:24-29) Ndipo adakhala wakubzicepswa pomwe adabvuma kugawana nawo basa lakumbayeruza wanthu. (Kuf. 18:13-24) Bzimwebzi bzidacitisa kuti Ajirayeri akhale na amuna azinji wakusamalira nkhani zawo, sikuti kumbamala nthawe izinji akudikhirira kuti nkhanizo zisamaliridwe. Bzimwebzi bzikulatiza kuti Mozeji akhafunika kwene-kwene kumbathandiza winango sikuti kukhala na udindo buzinji. Cimweci n’ciratizo cabwino kwa ifepano! Tin’funika lini kuyebwa kuti tikhale wakufunika kwa Yahova, tin’funika kukhala wakubzicepswa sikuti kukhala na luso. w19.09 5-6 ¶13-14

Ifepano tikudziwa lini bzomwe bzin’dzacitisa kuti maboma yamukire Babulo Mkulu. Pinango mabomayo yan’dzawona ninga kuti bzipembedzo ndibzo bzomwe bzikutazisa mtendere pa dziko la pansi ndipo bzikupitira kwene-kwene nkhani za ndale. Ayai yan’dzawona kuti bzipembedzobzo bzikubzigwezekera kobiri zizinji na bzinthu bzakuthupi. (Cibv. 18:3, 7) Bzimwebzi bzikuthandauza lini kuti maboma yakadzamukira Babulo Mkulu yan’dzapfunza wanthu wense omwe akucita mbali ya cipembedzo cakunama. Kulewa cadidi, mabomayo yan’dzaphadzana na magulu ya cipembedzo. Ndipo bzipembedzo bzikadzapfudzidwa, wanthu omwe ambacita mbali ya bzipembedzobzi an’dzazindikira kuti bzipembedzobzo bzamala mphanvu, ndipo an’dzafuna lini kucita nabzo pomwe tsansa. Bibliya limbalewa lini kukula kwa nthawe yomwe Babulo Mkulu an’dzakhala akupfudzidwa, koma comwe timbadziwa n’cakuti in’dzakhala nthawe yakucepa. (Cibv. 18:10, 21) Yahova wapicira ‘kufupikisa nsiku’ za citsautso kuti ‘anyakusankhulidwa’ pabodzi na cipembedzo cacadidi apulumuke.​—Mar. 13:19, 20. w19.10 15 ¶4-5

Azimai, pinango imwepo mudaleredwa na abereki omwe akhadiza lini kukalipira wana wawo. Na bzimwebzi, pinango mungakumbuke kuti njira imweyi njabwino kuti munthu alerere nayo wana. Napo pambuyo pa kupfunza momwe Yahova akufuna kuti mumbasamalire wana wanu, pinango bzingakuneseni kuceza nawo mwakugwa nfuwa, maka-maka mukakhala mwaneta ayai penu wana wanuwo akukubverani lini. (Wayef. 4:31) Pa nthawe imweyi, imwepo mun’funika kupemba kwa Yahova kuti akuthandizeni. (Psal. 37:5) Azimai winango bzimbawanesa kulatiza lufoyi wana wawo. Akazi winango adaleredwa na abereki omwe akhalibe lufoyi na wana wawo. Tsono penu imwepo ndimwe m’bodzi wa iwo, lekani kutewezera bzakuphonya bzomwe iwo akhacitabzo. Tenepo, mun’funika kubvera Yahova na kupfunza momwe mungalatizire lufoyi wana wanu. Pinango bzingakuneseni kucinja makumbukidwe yanu. Koma mungakwanise kucinja, mucikhala na phindu pa moyo wanu pabodzi na banja lanu. w19.09 18-19 ¶19-20

Munthu omwe ambatumikira Yahova ndipo ambadzonga nthawe yace pa pezi thangwe ra kucita nyongo kuti akhale wakudala mu dzikoli, bziri ninga kutumikira ambuya awiri. Iye ambatumikira lini Yahova yekha basi. Kuphampha kwa magole dzana yakutoma, kukhana gwere linango mu mzinda wa Laodiseya, ndipo abale wa gwerelo akhalewa mwakubzikuza kuti: ‘Ndidadala, ndina kobiri, ndipo ndikusaya lini cinthu.’ Koma Yahova pabodzi na Jezu akhawawona kuti ‘mbakubonera, mbakupasa nsisi, mbakusauka, mbazimola ndipo akhali pezi.’ Jezu adawapasa malango thangwe rakuti iwo akhafunisisa kwene-kwene kobiri, sikuti thangwe ra kudala, ndipo kufunisisa kobiri kwawoko kukhadzonga uxamwali bwawo na Yahova. (Cibv. 3:14-17) Tenepo, tikazindikira kuti tayamba kufunisisa kobiri, tin’funika kubwezeratu makumbukidweyo mwakamfulumize. (1 Tim. 6:7, 8) Tikasaya kucita bzimwebzi, tin’dzayamba kufuna bzinthu bza m’dzikoli ndipo Yahova an’dzakomedwa lini na kunamata komwe timbacita kwa iye, thangwe iye ambafuna kuti timbanamate ‘iye yekha basi.’​—Bzak. 4:24. w19.10 27 ¶5-6

Fala lomwe lasanduliziridwa kuti ‘kutsogoleredwa’ mu cigirego, limbathandauza ‘kulimbisidwa’ ayai ‘kuuzidwa.’ Kodi n’ciyani comwe cidacitisa Pedru kuti aphatise basa fala lakuti ‘kutsogoleredwa’? Luka omwe adanemba bukhu la Mabasa, adaphatisambo basa fala limweri mu cigirego pakufotokoza bza xitima ya m’madzi yomwe ikhapfuwidwa na cimphepo. (Mab. 27:15) Mdziwi winango wa Bibliya, adalewa kuti pomwe mpostolo Pedru adanemba kuti anembi wa Bibliya adatsogoleredwa na mzimu wakucena, iye adaphatisa basa fala linango lomwe lingadacitisa wanthu kukumbukira bza xitima ya m’madzi. Na tenepo, Pedru akhafuna kulewa kuti ninga momwe xitima ya m’madzi imbatsogoleredwera na cimphepo kuti ifike komwe ikuyenda, apolofeta omwe adanemba Bibliya adatsogoleredwambo na mzimu wakucena kuti amalize basa lawo. Ndipo mdziwi m’bodzi-bodzi ule adalewa pomwe kuti: “Anembi akhali ninga bzinguwo bza xitima ya m’madzi bzomwe bzikhafuthulidwa pakufamba. Iwo akhadakonzeka kucita basa lomwe mzimu wakucena ukhawatsogolera.” Yahova adacita bzomwe akhafuna. Iye adawapasa ‘cimphepo,’ ayai mzimu wakucena. Ndipo anembi wa Bibliya adacitambo mbali yawo. Iwo adaphata basa mwakutsogoleredwa na mzimu wakucena. Ninga mphepo yomwe imbagwinya xitima ya m’madzi ikakhala pa nyanza yomwe ina mabimbi, mzimu wakucena ungatithandize ntsiku zino kupitiriza kutumikira Mulungu mpaka kufika m’dziko lipsa lomwe iye an’funa kudzatipasa. w19.11 9 ¶7-9

Kusunama kungatepese cikhulupiro cathu. Nthawe zinango tingasuname thangwe ra mabvuto pa moyo wathu. Koma cadidi n’cakuti mabvuto yambathawika lini. Tsono tin’funika lini kumbandokumbukira nthawe zense mabvutoyo, thangwe tikacita tenepoyo, tingayebwe bzinthu bzense bzabwino bzomwe Yahova walewa kuti an’dzaticitira kutsogoloku. (Cibv. 21:3, 4) Ndipo kusunama kungatitepese na kutitazisa kupitiriza kutumikira Yahova. Mbatiwoneni bzomwe bzidacitika na mpfumakazi inango ya ku Estados Unidos. Mpfumakaziyo ikhafunika kusamalira bayace omwe akhaduwala kwene-kwene. Mpfumakaziyo idanemba kuti: “Nthawe zinango mabvuto yomwe timbagumana nayo, yambatiwawa ndipo yambatisunamisa, koma cidikhiro cathu n’cakulimba. Nimbatenda kwene-kwene bzinthu bzense bzomwe Yahova ambatipasa kuti bzilimbise cikhulupiro cathu. Ifepano timbafunikira malango pabodzi na cirimbiso. Bzimwebzi bzimbatithandiza kupitiriza kutumikira Yahova na kupirira mayezo.” Mafala ya mpfumakaziyi yakutithandiza kuwona kuti mpsakukwanisika kukunda msunamo! Kodi tingacite tani bzimwebzi? Tin’funika kumbawona kuti Sathani ndiye omwe ambacitisa mabvuto yathu. Ndipo tin’funika kumbakhulupira kuti Yahova an’dzatitsangalaza tikagumana na mabvuto. Tin’funikambo kumbatenda cakudya cauzimu comwe iye ambatipasa. w19.11 16 ¶9-10

Mpsakufunika kuti akulu wa gwere ambaphatise basa malangoya. Mkulu ali-wentse wa gwere ambadziwa kuti an’funika lini kumbauza wanthu nkhani za cintsintsi zomwe zimbacitika m’gwere. Mkuluyo akacita bzimwebzo ndipo abale acidziwa bza nkhaniyo an’dzamukhulupira lini pomwe, ndipo mbiri yace in’dzaipa. Tenepo, omwe ana maudindo m’gwere an’funika lini kukhala munthu ‘wakulewa pawiri.’ (1 Tim. 3:8) Bzimwebzi bzikuthandauza kuti akulu wa gwere an’funika lini kukhala wa magunkha. Na tenepo, mkulu omwe ambafuna mkazace ambamuuza lini nkhani za cintsintsi zomwe mkaziyo an’funikira lini kuzidziwa. Mkazi wa mkulu wa gwere angathandize bayace kuti apitirize kukhala na mbiri yabwino. Kodi angacite tani? Mwa kuleka kungingimiza bayaceyo kuti amuuze nkhani za cintsintsi. Ndipo akacita bzimwebzi ambakhala akuthandiza lini kokha bayaceyo, koma ambakhalambo akulemekeza abale ayai mpfumakazi zomwe zauza bayaceyo nkhaniyo. Ndipo kuposa bzentse, Yahova ambakomedwa kwene-kwene thangwe ra kuwona mkaziyo akuthandizira gwere kuti likhale pa mtendere na lakuphatana.​—War. 14:19. w20.03 22 ¶13-14

Mpsakutsangalaza kwene-kwene kudziwa kuti Pa Phiri la Sinai, mu gole la 1512 Kristu akanati kubwera, Mozeji adatsogolera msinda omwe Aroni na wana wace adasankhulidwa kuti akhale ansembe. Ajirayeri adatsonkhana kuti awone ansembe akupereka nsembe zakuyambirira za bzifuwo. (Kuf. 40:17; Mwam. 9:1-5) Kodi Yahova adalatiza tani kuti adabvuma ansembe omwe adasankhulidwawo? Pomwe Aroni na Mozeji akhasimba wanthu, Yahova adatumiza moto omwe udapsereresa nsembe yomwe ikhali pa mphatso. (Mwam. 9:23, 24) Kodi moto omwe udacokera kudzulu ukhalatiza ciyani? Yahova adatumiza moto kucokera kudzulu pakufuna kulatiza kuti iye akhadabvuma ndipo akhathandizira Aroni pabodzi na wana wace omwe adawasankhula kuti akhale ansembe. Pomwe Ajirayeri adawona na maso yawo cakucitika comwe cidalatiza kuti Yahova akhathandizira ansembe wale, adakhala na mathangwe yakubveka yakuthandizirambo ansembewo. Thangwe ranyi kubvumidwa komwe ansembe adacita na Yahova n’kwakufunika kwa ifepano ntsiku zino? Thangwe ndakuti ansembe wa Ajirayeri akhaimira ansembe wakufunika kwene-kwene. Kristu ni Mkulu wathu wa Ansembe, ndipo iye an’dzatonga dziko la pansi pabodzi na akristau wakudzozedwa wakukwana 144.000 kucokera kudzulu. (Waheb. 4:14; 8:3-5; 10:1) Kulewa mwakusaya kupenukira, ntsiku zino, Yahova akutsogolera ndipo akusimba gulu lace. w19.11 23 ¶13; 24 ¶14, 16

Pomwe akhali ku Kolinto, Paulo akhakhala kumui kwa banja la Akila na Prisila, ndipo ‘adaphata basa pabodzi na banjali, pakuti likhakonzambo matendi.’ Pomwe Paulo adalewa kuti akhaphata basa ‘usiku na masikati’ akhathandauza lini kuti iye akhapuma lini. Iye akhana ntsiku zomwe akhapuma kuphata basa lace lakukonza matendi, ninga mwa ciratizo Ntsiku za Malinkhuma. Ntsiku zimwezi, Paulo akhana mpata wakupalizira Adjuda, omwe akhaphatambo lini basa pa Ntsiku za Malinkhuma. (Mab. 13:14-16, 42-44; 16:13; 18:1-4) Mpostolo Paulo akhaphata basa na nyongo. Ndipo iye akhabvuma lini kuti basalo limutazise kupalizira ‘bzipsa bzabwino’ mwakukhazikika. (War. 15:16; 2 Wak. 11:23) Iye akhauza winango kuti ambapalizirembo mwakukhazikika. Akila na Prisila akhali anyabasa anzace wa Paulo ndipo akhaphata basa la ‘Kristu Jezu.’ (War. 12:11; 16:3) Mpostolo Paulo adauzambo abale wa Kolinto kuti akhafunika kukhala na ‘bzakucita bzizinji pa basa la Mbuya.’ (1 Wak. 15:58; 2 Wak. 9:8) Ndipo Yahova adafulizira mpostolo Paulo kunemba kuti: ‘Munthu akasaya kuphata basa, aleke kudya.’​—2 Wat. 3:10. w19.12 5 ¶12-13

Yahova adalenga banja lakuyamba kuti likhale na wana. Kodi ni mbani omwe angasankhule kuti banja likhale na wana, ndipo ni lini pomwe angakhale nawo wanawo? M’madziko yanango, wanthu ambadikhirira kuti anyakulowolana akhale na mwana mwakamfulumize. Ndipo mabanja yanango yambangingimizidwa na acibale wawo ayai wanthu winango kuti akhale na wana akandolowolana. M’bale winango wa ku Ásia, wakucemeredwa Jethro, adalewa kuti: “M’gwere, mabanja yanango yomwe yana wana yambangingimiza mabanja yomwe yalibe kuti yakhalembo nawo.” Ndipo m’bale winango wa ku Ásia, wakucemeredwa Jeffrey, adati: “Mabanja yanango yomwe yana wana yambauza omwe alibe kuti akadzakalamba an’dzasaya wakuwasamalira.” Tsono pa nkhani yakukhala na wana, banja liri-lentse ndiro lingasankhule kukhala nawo ayai ne, thangwe cimweci ni cakusankhula ca ali-wentse payekha ndipo udindo n’bwa banjalo. (Wag. 6:5) N’cadidi kuti axamwali na acibale, ambafuna kuti banja lipsa likhale lakukondwa, koma iwo an’funika kukumbukira kuti kusankhula kukhala na wana ayai ne, ni cakusankhula ca banjalo. 1 Wat 4:11. w19.12 22 ¶1-3

Kodi imwepo bzimbakunesani kuwona Mulungu ninga Baba wanu? Wanthu winango ambakumbuka kuti Yahova ngwapadzulu kwene-kwene ndipo ifepano tikabzindendemezera na iye, ndife lini na cinthuco. Ndipopa iwo ambakumbuka kuti mpsakunesa kukhulupira kuti Mulungu Wamphanvu-zentse ambacita thupo na munthu ali-wentse payekha. Tsono Baba wathu wa lufoyi ambafuna lini kuti timbakumbuke tenepo. Iye adatipasa moyo ndipo ambafuna kuti tikhale axamwali wace. Mpostolo Paulo adabvekesa nfundo imweyi kwa wanthu wa ku Atena omwe akhamubvesera pomwe akhalewa bza Yahova. Iye adati: ‘[Mulungu] ali lini kutali na m’bodzi na m’bodzi wa ifepano.’ (Mab. 17:24-29) Tenepo, Yahova an’funa kuti ali-wentse wa ifepano ambalewelewe naye ninga momwe mwana ambatsudzukira akambalewalewa na baba wace wa lufoyi. Wanthu winango bzimbawanesa kuwona Yahova ninga Baba wawo, thangwe rakuti abereki wawo adawalatiza lufoyi pang’ono ayai ne na pang’onopo. Onani bzomwe idalewa mpfumakazi inango: “Pai wangu akhandizunza kwene-kwene. Ndipo pomwe ndidayamba kupfunza Bibliya, bzikhandinesa kwene-kwene kubzibva kukhala pafupi na Baba wakudzulu. Koma pomwe ndidadziwa Yahova, bzinthu bzentse bzidacinja.” Kodi bzimwebzi bzidakucitikiranimbo kale? Penu munti inde, tsimikizani kuti mungawone Yahova ninga Baba wabwino kuposa wentse. w20.02 3 ¶4-5

Pinango mungakumbuke kuti bzomwe mumbacitira Yahova mpsing’ono-ng’ono. Tsono Jezu adatipfunzisa kuti kwa Yahova, bzentse bzomwe timbacita pakumutumikira mpsakufunika kwene-kwene. (Psal. 92:12-15; Lu. 21:2-4) Tenepo, mbaikhani makumbukidwe yanu pa bzomwe mungakwanise kucita. Mwa ciratizo, imwepo mungauze winango bza Yahova, kupemphererera abale na mpfumakazi zanu na kuwalimbisa kuti apitirize kutumikira mwakukhulupirika. Bzomwe bzimbacitisa Yahova kukuwonani kukhala anyabasa anzace, ni kumubvera komwe mungacite sikuti bzinthu bzomwe mungakwanise kucita. (1 Wak. 3:5-9) Tikutenda kwene-kwene thangwe ra kunamata Yahova, Mulungu omwe ambawona mtumiki wace ali-wentse kukhala wakufunika! Iye adatilenga kuti timbacite kufuna kwace, ndipo kunamata kwacadidi kumbatikondwesa kwene-kwene pa moyo wathu. (Cibv. 4:11) Ndipo napo dziko litiwone kukhala wakusaya kufunika, koma kwa Yahova ndife wakufunika kwene-kwene. (Waheb. 11:16, 38) Tenepo, bziribe basa penu tikuduwala, tina bvuto la kobiri ayai tidakalamba, tin’funika kukumbukira kuti palibe cinthu ciri-centse comwe cingatilekanise na lufoyi la Baba wathu wakudzulu.​—War. 8:38, 39. w20.01 18 ¶16; 19 ¶18-19

Tingakunde njiru mwa kukhala wakubzicepesa na kuwona bzomwe tinabzo kukhala bzakukwanira. Ndipo tikakhala na makhalidwe yabwinoya, tin’dzakhala tiribe ka mtima ka njiru. Kubzicepesa kun’dzatithandiza kuleka kumbabziwona kukhala wapadzulu kwene-kwene. Ndipo munthu wakubzicepesa ambabziwona lini kuti ngwakufunika kwene-kwene kuposa winango. (Wag. 6:3, 4) Munthu omwe ambawona bzomwe anabzo kukhala bzakumukwanira ambakomedwa na bzinthu bzomwe anabzobzo, ndipo ambabzindendemezera lini na winango. (1 Tim. 6:7, 8) Tenepo, munthu wakubzicepesa na omwe ambawona bzomwe anabzo kukhala bzakukwanira, ambakomedwa kwene-kwene akawona winango akupasiwa cinthu cabwino. Kuti tikwanise kukunda njiru, kukhala wakubzicepesa na kumbawona bzomwe tinabzo kukhala bzakutikwanira, tin’funikira thandizo la mzimu wakucena wa Mulungu. (Wag. 5:16; Waf. 2:3, 4) Mzimuyo ungatithandize kupenda makumbukidwe yathu na unthu bwathu. Ndipo na thandizo la Yahova, ifepano tingakwanise kucinja makumbukidwe yathu yakuipa yacikhala yabwino.​—Psal. 26:2. w20.02 15 ¶8-9

Kubzipereka kwa Mulungu ni lumbiro, ndipo iye ambafuna kuti imwepo mulikwanirise. Tenepo, pitirizani kumbatsonkhana na gwere lanu. Abale na mpfumakazi za m’gwere zin’dzakhala ninga wanthu wa m’banja lanu cairo. Ndipo mukambagumanika pa mitsonkhano mwakusaya kumoga-moga, uxamwali bwanu na abalewo bun’dzalimba kwene-kwene. Mbawerengani Bibliya ntsiku zentse na kukumbukira bzomwe mwawerengabzo. (Psal. 1:1, 2) Mukambawerenga Bibliya, mbaimani kuti mumbakumbukire bzomwe mwawerengabzo. Mukacita bzimwebzi, mafala ya m’Bibliya yan’dzatokonya mtima wanu. Lekani kusiya kumbapemba. (Mat. 26:41) Mukambapemba na mtima wanu wentse, uxamwali bwanu na Yahova bun’dzalimba. ‘Pitirizani kuikha pakutoma, Umambo bwa Mulungu.’ (Mat. 6:33) Mungacite bzimwebzi mwa kumbawona basa lakupalizira kukhala cinthu cakufunika na cakuyambirira pa moyo wanu. Ndipo mukambapalizira mwakusaya kumoga-moga, imwepo mun’dzalimbisa cikhulupiro canu ndipo mun’dzathandizambo winango kuti akhale na cidikhiro cakudzakhala na moyo wakusaya kumala. Mabvuto yali-yentse yomwe mukugumana nayo m’dzikoli ‘njakanthawe na yakupepuka.’ (2 Wak. 4:17) Koma mwakusiyana na bzimwebzi, imwepo mukabzipereka na kabatizidwa, mun’khala na moyo wabwino kuyambira tsapano ndipo kutsogolo mun’dzakhala na ‘moyo caiwo.’ Kodi bzina phindu? Inde!​—1 Tim. 6:19. w20.03 13 ¶19-21

Penu nyakupfunza wanu wa Bibliya akucinja lini, nthawe zinango mungabzibvunze kuti: ‘Kodi nin’funika kusiya kupfunza naye?’ Mukanati mwacita cakusankhula ciri-centse pa nkhaniyi, kumbukirani luso la munthuyo. Thangwe ranyi? Thangwe ndakuti wanthu winango ambatenga nthawe izinji kuti akule mwauzimu, koma winango ne. Tenepo, bzibvunzeni kuti: ‘Kodi nyakupfunza wangu akuyenda patsogolo mwakubverana na momwe bzinthu bziri pa moyo wace? Kodi iye wayamba kuphatisa basa bzomwe akupfunza?’ (Mat. 28:20) Mpsakupasa ntsisi kuti anyakupfunza winango ali ninga Ajirayeri wa mu nthawe ya Zakiyeri. Onani bzomwe Yahova adawauza mwakuphatisa basa Zakiyeri. Iye adati: ‘Iwepo uli ninga nyimbo ya lufoyi kuna iwo, nyimbo yakuimbidwa na fala labwino ndipo yakuimbidwa na bzakuimbira bza bzingwe. Iwo an’dzabva mafala yako, tsono palibe ne m’bodzi omwe an’dzayateweza.’ (Zakiy. 33:32) Nthawe zinango bzingakhale bzakunesa kuuza munthu kuti tin’pfunza lini naye pomwe Bibliya. Napo bziri tenepo, tin’funika lini kuyebwa kuti ‘nthawe yomwe yasalayi yafupika.’ M’mbuto mwakutaya nthawe papezi na munthu omwe akuyenda lini patsogolo, tin’funika kunyang’ana wanthu omwe ana ‘makumbukidwe yabwino yomwe yangadzawathandize kugumana moyo wakusaya kumala.’​—Mab. 13:48. w20.01 6 ¶17; 7 ¶20

Bzipembedzo bzizinji bzimbapfunzisa lini cadidi ca m’Bibliya comwe cimbalewa kuti wanthu omwe ambabvera Mulungu an’dzakhala na moyo wakusaya kumala pa dziko la pansi. (2 Wak. 4:3, 4) Ndipo ibzo bzimbapfunzisambo kuti wanthu wakulungama akafa ambayenda kudzulu. Tsono bzimwebzi mpsakusiyana na bzomwe anyakupfunza wa Bibliya omwe akhadziwisa Nsanza ya Mulindiri kuyambira mu 1879 akhakhulupira. Iwo akhabvesesa kuti Mulungu an’dzabwezeresa paraizo pa dziko la pansi, ndipo bzulu na bzulu bza wanthu wakubvera an’dzakhala na moyo pa dziko la pansi pano sikuti kudzulu. Napo bziri tenepo, padatenga nthawe kuti anyakupfunzawo azindikire wanthu wakulungamawo. Mpsakubveka kuti Anyakupfunza wa Bibliya akhadabvesesambo kuti mwakubverana na Fala la Mulungu, wanthu winango ‘adagulidwa pa dziko la pansi’ kuti akatonge pabodzi na Jezu kudzulu. (Cibv. 14:3) Thimu limweri lingadakonzedwa na Akristau wanyongo na wakubzipereka wakukwana 144.000 omwe adatumikira Mulungu mwakukhulupirika pomwe akhali pa dziko la pansi.​—w19.09 27 ¶4-5