Janeiro

Kodi n’ciyani comwe cidacitisa kuti Timotio athemere kucita bzizinji pakutumikira Yahova? Ni makhalidwe yace yabwino. (Afil. 2:19-22) Mafala yomwe Paulo adalewa yakulatiza kuti Timotio akhali wakubzicepesa, wakukhulupirika, wakulimbikira pa basa, na munthu wakuthembeka. Iye akhafunisisa kuthandiza abale na mpfumakazi. Thangwe ra bzimwebzi, Paulo adamufuna ndipo alibe kuzeza kumupasa mabasa makulu-makulu. Mpsibodzi-bodzimbo na ifepano. Tikakhala na makhalidwe yomwe Yahova ambakomedwa nayo, iye an’dzatifuna ndipo an’dzatiphatisa basa mu gwere. (Sal. 25:9; 138:6) Pembani kwa Yahova ndipo onani makhalidwe yomwe mun’funika kukhala nayo. Sankhulani libodzi lomwe imwepo mun’funa kuyamba kukhala nalo. Kodi mukufuna kukhala wakugwa mpfuwa? Kodi mukufuna kucita nyongo kuti mumbakhale pa mtendere na anzanu na kumbawalekerera akakuphonyerani? Bzingakhale bwino kwene-kwene kubvunza xamwali wanu kuti akuthandizeni kuwona bzinthu bzomwe imwepo mun’funika kucinja. — Mim. 27:6. w22.04 23 ¶4-5

Yahova ambafuna kuti tikhale wakukondwa. Ifepano timbadziwa bzimwebzi thangwe kukondwa kumbacita mbali ya makhalidwe ya bzisapo bza mzimu wa Mulungu. (Agal. 5:22) Kupasa kumbakondwesa kwene-kwene kuposa kutambira. Ndipopa ifepano timbakomedwa kwene-kwene tikambacita bzizinji pakutumikira Yahova na kucitambo bzinthu bzakusiyana-siyana pakuthandiza abale wathu. (Mab. 20:35) Ninga momwe likulewera vesi la lero, mpostolo Paulo adalewa bzinthu bziwiri bzomwe bzingatithandize kupitiriza kukhala wakukondwa. Cakuyamba, tin’funika kucitira Yahova bzomwe tingakwanise. Tikambamucitira Yahova bzomwe tingakwanise, tin’dzakhala wakukondwa. (Mat. 22:36-38) Caciwiri, tin’funika kutcenkha kumbabzindendemezera na anzathu. Bziribe basa kuti tina mphanvu, luso ayai bzinthu bzinango bzomwe timbadziwa bwino kucita, ifepano tingatende Yahova thangwe ra bzimwebzi. Tsono tikawona kuti wanthu winango akutiposa pa mbali inango ya utumiki, tin’funika kukomedwa thangwe rakuti iwo akuphatisa basa luso lawo pakutumbiza Yahova. w22.04 10 ¶1-2

Magereja yentse yakunama yan’dzapfudzidwa kabodzi na kabodzi. Ndipo bzimwebzi bzin’dzacitisa kuti dziko lentse la pantsi lidzadabwe. (Apok. 18:8-10) Kupfudzidwa kwa Babiloniya Mkulu kun’dzadzidzimusa wanthu wentse pa dziko la pantsi ndipo kungadzawawawe. Tsono wanthu wa Mulungu an’dzakomedwa kwene-kwene. Thangwe nyamadulanthaka wa Yahova Mulunguyu an’dzawoneka lini pomwe, ndipo bzimwebzi bzin’dzalatizambo kuti kupulumusidwa kwawo ku dziko lakuipali kwafendera! Mpolofeta Daniyeli adalewa kuti mu ntsiku zakumalizira ‘cidziwiso cacadidi cingadadzawanda.’ Ndipo Bzimwebzi bzikucitikadi! Ifepano tikubvesesa bzinthu bzizinji pa nkhani ya mapolofesiya ntsiku zino. (Dan. 12:4, 9, 10) Kukwanisika kwa mapolofesiyaya kukuticitisa kuti tilemekeze kwene-kwene Yahova na Fala lace. (Zai. 46:10; 55:11) Ndipopa pitirizani kulimbisa cikhulupiro canu mwa kumbapfunza Fala la Mulungu na kuthandizambo wanthu winango kulimbisa uxamwali bwawo na Yahova. Thangwe iye ambakhotcerera wentse omwe ambamuthemba ndipo an’dzawapasa “mtendere wakusaya kumala.” — Zai. 26:3. w22.07 6-7 ¶16-17

Bukhu la Apokalipse limbalewa kuti Umambo bwa Mulungu bukutonga kudzulu ndipo Sathani adathothedwa kudzuluko. (Apok. 12:1-9) Kuthothedwa kwaceku kudacitisa kuti kudzulu kukhale na mtendere, tsono kudabweresa mabvuto kwa ifepano. Thangwe ranyi? Thangwe Sathani adakalipa kwene-kwene ndipo ali pa nkhondo na wanthu omwe ambatumikira Yahova mwakukhulupirika pantsi pano. (Apok. 12:12, 15, 17) Kodi n’ciyani comwe tingacite kuti tipitirize kukhala wakulimba pomwe tiri pa nkhondo na Sathani? (Apok. 13:10) Cinthu cibodzi comwe cingatithandize ni kudziwa bzomwe bzin’dzacitika kutsogolo. Ndipo mu bukhu la Apokalipse, mpostolo Juwau adanemba bzisimbo bzizinji bzomwe tin’dzakhala nabzo. Cibodzi mwa bzisimbo bzimwebzi n’cakuti anyamadulanthaka wentse wa Mulungu an’dzaphedwa. Vesi lakuyambirira la bukhu la Apokalipse, limbatiuza kuti bzomwe tiniwerengabzi bzidacita ‘kulatizidwa’ kwa mpostolo Juwau mwa bzizindikiro. — Apok. 1:1. w22.05 8 ¶1-3

Kukhulupirika kwa atumiki wa Yahova, kun’dzacitisa kuti anyamadulanthaka wace akalipe kwene-kwene. Ndipo ciphatano ca mitundu ya wanthu cin’dzayenda kukacita nkhondo na wanthu wa Mulungu wa pa dziko lentse. Mu Bibliya, nkhondo imweyi imbacemeredwa kuti nkhondo ya Gogi wa ku Magogi. (Ezek. 38:14, 15) Kodi Yahova an’dzacita ciyani anyamadulanthaka wace akadzafuna kupha wanthu wace? Iye akutiuza kuti: “Inepano nin’dzakalipa kwene-kwene.” (Ezek. 38:18, 21-23) Pa Apokalipse kapitulo 19 pambatiuza bzomwe bzin’dzacitika. Yahova an’dzatumiza Mwana wace kuti adzakhotcerere wanthu wace na kukunda anyamadulanthaka wace. Pa nkhondoyi, Jezu an’dzakhala pabodzi na “acikunda wakudzulu” omwe ni anjo wakukhulupirika wa Yahova pabodzi na wa 144 000. (Apok. 17:14; 19:11-15) Kodi nkhondo imweyi in’dzamala tani? Pa nkhondoyi, wanthu wentse wakuipa pabodzi na magulu ya wanthu yomwe yambabvera lini Yahova an’dzapfudzidwa. — Apok. 19:19-21. w22.05 17 ¶9-10

Pomwe Adamu na Eva adandoti phonyeni, Yahova adaperekeratu cidikhiro kwa wana wa Adamuyo mwa kulewa polofesiya yakufunika kwene-kwene. Polofesiya imweyi imbagumanika pa Genesesi 3:15 yomwe imbati: “Nin’dzaikha ciwengo pakati pa iwepo na mkaziyo, na pakati pa mbeu yako na mbeu yace. Iye an’dzakutsotola msolo, ndipo iwepo un’dzamuluma katende wace.” Polofesiyayi imbagumanika mu bukhu lakutoma la m’Bibliya. Tsono nkhani yace imbabverana na mabukhu yentse ya m’Bibliya. Iyo iri ninga mtanda omwe umbacitisa kuti mphalo zentse zigumane pa ntsodzi. Mafala yomwe yambagumanika pa Genesesi 3:15 yambacitisa kuti nkhani za mabukhu yentse ya m’Bibliya zikhale nkhani ibodzi. Ndipo nkhani yace njakuti Mulungu an’dzatumiza Mpulumusi omwe an’dzapfunza Dyabu na wanthu omwe ambabvera Dyabuyo. Bzimwebzi bzin’dzakhala bzakudekeza kwene-kwene kwa wanthu wentse omwe ambafuna Yahova! Kupfunza Bibliya kun’tithandiza kuwona momwe mapolofesiya yakukwanisikira na momwe tingagumanire phindu. w22.07 14 ¶1-3

Kumbirani Yahova kuti akupaseni nzeru kuti mukwanise kuthandiza wana wanu kumufuna. (Tiy. 1:5) Iye ngwakuthemera kutipasa nzeru. Thangwe ranyi tikulewa tenepoyo? Pana mathangwe mazinji. Mbatiwoneni mawiri mwa iyo. Lakutoma, Yahova ambadziwa kuti kukhala pai n’ciyani thangwe iye ni Paimbo. (Sal. 36:9) Ndipo laciwiri ndakuti, malango yentse yomwe iye ambatipasa yambatithandiza kukhala na moyo wabwino. (Zai. 48:17) Yahova akuphatisa basa Fala lace pabodzi na gulu lace kuti apfunzise imwepo abereki nkhani zakusiyana-siyana zomwe zingakuthandizeni kupfunzisa wana wanu kumufuna. (Mat. 24:45) Imwepo mungagumane malango yakuthandiza mu nkhani zakuti “Mfundo Zothandiza Mabanja,” zomwe zikhabwera m’marevista ya Mukani! m’mbuyomu ndipo tsapano zikugumanika pa webisaite yathu ya jw.org. Ndipo pa webisaiteyi panambo mavidiyo yakusiyana-siyana yomwe yangathandize abereki kuphatisa basa malango ya Yahova pakulera wana wawo. — Mim. 2:4, 5. w22.05 27 ¶4-5

Yahova ni Munthu omwe ambadziwa kulekerera m’cilengedwe centse. Cakuyamba, iye ngwakukonzeka kulekerera. Caciwiri, iye ambatidziwa bwino-bwino. Iye ambadziwa momwe moyo wathu uliri, ndipopa ndiye yekha omwe ambakwanisa kudziwa penu takunguladi na mtima wentse ayai ne. Ndipo cacitatu, Yahova akatilekerera, iye ambapfudza pikado zathu mwakuti bzimbakhala ninga kuti tikhalibe na kundophonyako. Bzimwebzi bzimbaticitisa kubva bwino mu mtima mwathu ndipo bzimbaticitisambo kukhala pomwe pa uxamwali na iye. Tsono ifepano tin’dzapitiriza kucita pikado, thangwe ndife wakuperewera. Bzimwebzi bzikacitika, comwe cingatithandize ndico kukumbukira mafala yomwe yali mu bukhu la Estudo Perspicaz das Escrituras, Volume 1, tsamba 210, yomwe yambati: “Yahova ngwantsisi ndipo ambadziwa kuti atumiki wace mbakuperewera, iwo an’funika lini kumbakhala adasunama thangwe ra bzomwe ambaphonya, bzomwe bzimbacitika thangwe ra kuperewera kwawo. (Sal. 103:8-14; 130:3) Iwo akacita nyongo yakucita bzinthu bzabwino, angakhale wakukondwa. (Afi 4:4-6; 1Ju 3:19-22)” w22.06 7 ¶18-19

Kutigopswa mwakuphatisa basa maboma ndibzo lini bzokha bzomwe Sathani ambacita. Wanthu winango ambagopa bzomwe adzinza wawo an’kumbuka kuposa kumenyedwa ayai kucitiridwa bzinthu bzakuipa. Iwo ambafuna kwene-kwene adzinza wawo ndipo ambafuna kuti iwo apfunzembo cadidi na kufuna Yahova. Bzimbawawawa kwene-kwene akawona kuti adzinza wawo akunyoza Mulungu wacadidi na atumiki wace. Tsono nthawe zinango adzinza wathu omwe akhanyoza cadidi ambadzayamba kupfunza Bibliya aciyamba kutumikira Yahova. Tiyezezere kuti adzinza wathu aleka kubverana nafe thangwe rakuti takhala Mboni ya Yahova. Kodi tingacite ciyani? Ifepano tingatsangalazidwe na mafala yabwino kwene-kwene yakugumanika pa Salimo 27:10. Tikambakumbukira kuti Yahova ambatifuna kwene-kwene, tin’dzacita lini thupo kuti moyo wathu un’dzakhala tani adzinza wathu akatilamba. Tin’dzakhala na citsimikizo centse cakuti Yahova an’dzatibaira thangwe ra kupirira kwathu. Yahova an’dzatipasa bzomwe tikufunikira pa moyo wathu ndipo an’dzatithandiza kukhala wakugwa mpfuwa, wakukondwa na kutithandizambo kupitiriza kukhala pa uxamwali bwakulimba na iye! w22.06 16-17 ¶11-13

Pomwe Jezu akhacita basa lakupalizira, wanthu adamunamizira kuti ambamwa kwene-kwene, adalungwa, ni mtumiki wa Dyabu, akhateweza lini mtemo wa ntsiku ya Sabudu na nyakunyoza Mulungu. (Mat. 11:19; 26:65; Luk. 11:15; Juw. 9:16) Tsono Jezu akhambawatawira lini mwaukali. Ifepano tin’funika kukhala ninga Jezu pomwe wanthu akulewalewa nafe mwaukali. Ndipo tin’funika lini kumbawatawira mwaukali. (1 Ped. 2:21-23) Tsono kucita bzimwebzi kulibe kupusa. (Tiy. 3:2) Kodi n’ciyani cingatithandize? Mwenekaciro mui akakukalipirani pomwe mukumupalizira, lekani kumutawira kuipa. M’bale wakucemeredwa Sam adalewa kuti: “Nimbakumbukira kuti munthuyo an’funika kudziwa cadidi ndipo Mulungu angamuthandize kucinja.” Kumbukiranimbo kuti nthawe zinango mwenekaciro mui angakalipe thangwe tiribe kumufikira pa nthawe yabwino. Tikagumana na munthu omwe adakalipa, tin’funika kupemba kwa Yahova ticimukumbira kuti atithandize kukhala wakugwa mpfuwa na kutithandizambo kuti tileke kulewa mafala yakuipa. w22.04 6 ¶8-9

Cinthu cakufunika comwe cingathandize wana kukhala axamwali wa Yahova ndico kupfunza nawo Bibliya. (2 Tim. 3:14-17) Tsono Bibliyalo limbalatiza kuti pana cinthu cinango comwe wana an’funika kucita kuti amudziwe Yahova. M’bukhu la Mimwani muna mbali ibodzi yomwe imbalatiza pai omwe akukumbusa mwana wace kuti akwanise kuwona makhalidwe yomwe Yahova anayo yomwe yambawonekera mu cirengedwe. (Mim. 3:19-21) Abereki, pinango imwepo mumbakomedwa kwene-kwene mukayenda kukazunga na wana wanu. Phatisani basa nthawe imweyi kuti muthandize wana wanuwo kudziwa kuti ‘bzinthu bzomwe Yahova adalenga’ bzimbalatiza kuti iye ana makhalidwe yabwino. (Aro. 1:20) Onani momwe Jezu adaphatisira basa cirengedwe pa kupfunzisa. Pa nthawe inango, iye adauza anyakupfunza wace kuti akumbukire bza akhungubwe na maluwa. (Luk. 12:24, 27-30) Iye adapfunzisa anyakupfunza wace cinthu cakufunika kwene-kwene cakuti Baba wawo wakudzulu ngwabwino ndipo ngwakupasa. Yahova an’dzadyesa na kubvazika atumiki wace wakukhulupirika ninga momwe ambacitira na akhungubwe na maluwa. w23.03 20-21 ¶1-4

Ifepano timbatenda Yahova thangwe timbapemba kwa iye mu dzina la Mwana wace. Yahova ambaphatisa basa Jezu kuti atipase bzomwe takumbira. Ndipo iye ambatetekera na kutawira mipembo yomwe imbacitidwa mu dzina la Jezu ndipo ambalekerera pikado zathu mwakuphatisa basa ntsembe ya cakulombolera ya Jezu. (Aro. 5:1) Bibliya limbalewa kuti Jezu ni “mkulu wa antsembe [wathu omwe] adakhala kumbali yamadidi ya mpando wa umambo wa Mulungu Mkululetu kudzulu.” (Aheb. 8:1) Jezu ni “mthandizi [wathu] . . . omwe ali pabodzi na Baba.” (1 Juw. 2:1) Timbatenda kwene-kwene Yahova thangwe ra kutipasa Mkulu wa Antsembe omwe ambabvesesa kuwofoka kwathu ndipo “ambatikumbirira kwa Mulungu mwakutidandaulira.” (Aro. 8:34; Aheb. 4:15) Ndipopa tingadakwanisa lini kulewalewa na Yahova mu mpembo pangadakhala palibe ntsembe ya cakulombolera ya Jezu. Ndipo tentsenefe tingakwanise lini kutenda bwino-bwino Yahova thangwe ra mphaso yakufunika kwene-kwene, yomwe ni Mwana wace! w22.07 23 ¶10-12

Munthu wakukhulupirika ambacita nyongo yakuteweza bzomwe iye alewa ndipo ambanama lini. (Sal. 15:4) Bzimwebzi bzimbacitisa kuti wanthu ambamukhulupire. Ifepano tikufuna kuti abale na mpfumakazi zathu ambatikhulupire. Ifepano tingangingimize lini anzathu kuti ambatikhulupire. Koma tin’funika kucita bzinthu bzabwino kuti iwo ambatikhulupire. Kukhala wakukhulupirika tingakuyezezere na kobiri. Kuti tiigumane timbaicokera kaluma, koma kuti imale mpsakupusa. Yahova ngwakuthemera kuti timbamukhulupire thangwe “bzentse bzomwe ambacita mpsakukhulupirika.” (Sal. 33:4) Ndipo iye ambafuna kuti timutewezere. (Aef. 5:1) Timbatenda Yahova thangwe ra kutibweresa m’gulu lace lomwe lina abale omwe ambafunana na kukhulupirana. Ndipopa tentsenefe tinfunika kucita nyongo kuti abale na mpfumakazi zathu ambatikhulupire. Ali-wentse akacita nyongo ya kukhala walufoyi, wakubzicepesa, wa luso la kuzindikira, wa kumbalewa cadidi na wakubziphata, bzimbacitisa kuti abale ambakhulupirane. Mbatipitirizeni kutewezera Mulungu wathu, Yahova, mwa kulatiza kuti ndife wakukhulupirika. w22.09 8 ¶1-2; 13 ¶17

Napo kuti tiri m’gulu la Yahova, nthawe zinango tingabzibve ninga kuti tiri tekha ndipo tingawone ninga kuti tin’funika kucita tekha nyongo kuti timalise nzeru zakuphonyeka zomwe tinazo. Onani momwe Yahova adacitira bzinthu na mpolofeta Eliya. Yahovayo adamucitisa kuti alewe bzomwe bzikhamucitisa thupo. Iye adabvunza Eliya kawiri-kentse kuti: “Kodi ukucitanyi pano?” (1 Ama. 19:9, 13) Pomwe Eliya akhafotokoza momwe akhabvera, Yahova akhamutetekera. Ndipo adamutsimikizirambo kuti akhali lini yekha; pakhana Ajirayeri azinji omwe akhanamatambo Yahova ninga iye. (1 Ama. 19:11, 12, 18) Eliya adabva bwino kwene-kwene pomwe adafotokozera Yahova momwe akhabvera mu mtima mwace na kuwona momwe Yahovayo adamutawirira. Ndipo Yahova adauza Eliya kuti acite mabasa yanango yakufunika. Iye adamuuza kuti akadzoze Hazayeli kuti akhale mambo wa Siriya, Jehu kuti akhale mambo wa Jirayeri na Elizeu kuti akhale mpolofeta. (1 Ama. 19:15, 16) Mabasa yamweya yadathandiza Eliya kuwona kuti Yahova akhapitiriza kumufuna. Ndipo Mulungu adamupasambo mthandizi, omwe akhali Elizeu. w22.08 8 ¶3; 9 ¶5

Kodi gwere lanu limbatsonkhana mu Nyumba ya Umambo inovu ayai yomwe yakonzedwa papsa? Penu bziri tenepo, imwepo mudakomedwa kwene-kwene pomwe mudatsonkhana kakuyamba mu Nyumba ya Umambo inovuyo. Ndipo pinango mukhacita kucoka misozi pomwe mukhaimba nyimbo yakuyamba pa mitsonkhanoyo, thangwe ra kukomedwa. Nyumba za Umambo zikamangidwa bwino zimbatumbizisa Yahova. Tsono pana cinthu cinango comwe cimbatumbizisa kwene-kwene Yahova kuposa kumanga Nyumba za Umambo. Kodi cinthuco n’ciyani? Ni kulimbikisa abale na mpfumakazi zathu. Basa limweri ndakufunika kwene-kwene thangwe timbalimbikisa wanthu omwe ambabwera kudzatsonkhana nafe mu Nyumba za Umambozo. Mpostolo Paulo akhakumbukira bzimwebzi pomwe adalewa mafala yomwe yali m’vesi la leroya. Iye akhadziwa bwino kulimbikisa Akristau anzace. Iye akhawabvera ntsisi. Ifepano tingamutewezerembo mwa kulimbikisa abale na mpfumakazi zathu ntsiku zino. — 1 Ako. 11:1. w22.08 20 ¶1-2

Mkristau omwe an’funa kucita bzinthu bzakulungama kwa Yahova, iye an’funika kucita malonda yace mwa cirungamo. Munthu wakulungama ambaipidwa akawona munthu munango akucitiridwa bzinthu bzakusaya kulungama. Ndipopa pomwe akanati kucita cinthu, iye ambayamba kukumbuka kuti awone penu bzomwe an’funa kucitabzo ‘Yahova ambakomedwa nabzo’ ayai ne. Bibliya limbalewa kuti Yahova ndiye Mwenekaciro cirungamo. Ndipopa, iye ambalewedwa kuti ni “mbuto yakukhala ya cirungamo.” (Jer. 50:7) Pakuti Yahova ni Mulengi wathu, iye ndiye yekha omwe ana ugo bwakutiuza kuti ici n’cabwino ici n’cakuipa. Thangwe ranyi? Thangwe kuperewera kumbatitazisa kusiyanisa cabwino na cakuipa. Iye ambadziwa bwino-bwino bzinthu bzomwe mpsabwino na bzomwe mpsakuipa. (Mim. 14:12; Zai. 55:8, 9) Pakuti tidalengedwa mu cifanikiso ca Mulungu, ifepano tingakwanise kuteweza mitemo yace yakulungama. (Gen. 1:27) Ndipo ifepano timbafuna kucita bzimwebzi. Baba wathu walufoyi ambafuna kuti timutewezere. — Aef. 5:1. w22.08 27 ¶5-6

Tikakhala tikugumana na mabvuto ayai tidapswoma, tingafune cinthu cinango kuti cititsangalaze. Bzimwebzi mpsabwino. Tsono tin’funika kucita mphole kuti tireke kucita cinthu comwe Yahova ambawenga. (Aef. 5:10-12, 15, 16) Mu tsamba lomwe mpostolo Paulo adanembera Akristau wa ku Filipi, iye adawalimbikisa kuti apitirize kumbakumbukira bzinthu bzomwe “mpsakulungama . . . mpsakucena . . . bzomwe bzimbafunidwa, [na] bzomwe mpsabwino.” (Afil. 4:8) N’cadidi kuti Paulo akhaleweratu lini bzinthu bzakupfatsa nabzo pomwe adalewa mafalaya. Koma bzomwe adalewabzi bzingatithandize kusankhula mwanzeru bzinthu bzakupfatsa nabzo. Thangwe ranyi tikulewa tenepoyo? Yezerani kucita ibzi: Cosani fala lakuti “bzinthu” lomwe liri pa vesiri muciikha fala lakuti “nyimbo,” “mavidiyo,” “novela” ayai “vidiyo-geime.” Kucita bzimwebzi kungakuthandizeni kudziwa bzinthu bzakupfatsa nabzo bzomwe Mulungu angakomedwe nabzo. Thangwe ifepano tikufuna kuteweza mitemo ya Mulungu pa moyo wathu. — Sal. 119:1-3. w22.10 9 ¶11-12

Wanthu “wakusaya kulungama” adacita bzinthu bzizinji bzakuipa. Iwo an’dzafunika kupfunzisidwa kuti ambateweze mitemo yakulungama ya Yahova pa moyo wawo. Kuti bzimwebzi bzidzakwanisike, Umambo bwa Mulungu bun’dzatsogolera basa likulu lakupfunzisa wanthu pa dziko lentse la pantsi. Kodi mbani an’dzapfunzisa wanthu wakusaya kulungamawa? Iwo an’dzapfunzisidwa na thimu likulu na wanthu wakulungama omwe an’dzalamusidwa. Kuti madzina ya wanthu wakusaya kulungamawa yadzanembedwe mu bukhu la moyo, iwo an’dzafunika kukhala axamwali wa Yahova na kubzipereka kwa iye. Jezu Kristu pabodzi na anyakudzozedwa an’dzakhala akuwanyang’anisisa kuti adzawone penu akuphatisa basa bzomwe akupfunzabzo ayai ne. (Apok. 20:4) Munthu omwe an’dzalamba kuteweza bzomwe akupfunzisidwa, an’dzaphedwa, napo acidzakhala kuti apfitsa kale magole 100. (Zai. 65:20) Yahova na Jezu ambakwanisa kudziwa bzomwe bziri mu mtima mwa munthu, ndipopa iwo an’dzalekerera lini munthu kudzonga bzinthu mu dziko lipsa. — Zai. 11:9; 60:18; 65:25. w22.09 17 ¶11-12

Pa vesiri, mafala yakuti “omwe akutonga pakati pathu” yambalewa bza wanthu omwe ana mpando ayai wanthu omwe ambatonga dzikoli. Akristau an’funika kumbabvera atongi wa maboma, thangwe iwo ambacitisa kuti bzinthu bzifambe bwino mu dzikoli. Ndipo nthawe zinango iwo ambathandiza atumiki wa Yahova. (Apok. 12:16) Ndipopa ifepano timbauzidwa kuti tin’funika kumbapagali mitsonkho, kumbawagopa na kumbawalemekeza, thangwe iwo ambafuna bzimwebzi. (Aro. 13:7) Tsono, tin’funikambo kukumbukira kuti akulu-akulu wa boma amwewa ana mphanvu thangwe rakuti Yahova walekerera kuti iwo akhale nazo mphanvuzo. Jezu adabvekesa nfundo imweyi pomwe akhabvunzidwa na Mtongi wa boma la Roma wakucemeredwa Ponsiyo Pirato. Pirato adalewa kuti akhana mphanvu yakutsudzula Jezu ayai yakutonga kuti iye aphedwe. Tsono Jezu adamuuza kuti: “Imwepo mungadakhala lini na mphanvu iri-yentse pa inepano, bzingadakhala kuti mulibe kupasidwa kucokera kudzulu.” (Juw. 19:11) Mpsibodzi-bodzimbo na ntsiku zino. Mphanvu zomwe akulu-akulu wa boma anazo zina malire, ninga momwe zikhalirimbo mphanvu za Pirato. w22.10 14 ¶6

Mzimu wa Yahova udatsogolera Mambo Davide kunemba bzomwe bzingadadzacitika pomwe mambo wanzeru na wakukhulupirika angadadzatonga. (Sal. 37:10, 11, 29) Ifepano timbawerengera wanthu mafala ya pa Salimo 37:11 tikakhala tikuwauza bza Paraizo. Kucita bzimwebzi n’kuphonya lini thangwe Jezu adafotokoza mafala yamweya pa Nkhani ya pa Phiri. Bzimwebzi bzikulatiza kuti bzomwe mavesiya yambalewa bzin’dzacitika kutsogolo. (Mat. 5:5) Tsono mafala ya Davideya yakhalatizambo momwe moyo ungadakhalira mu ntsiku za Mambo Salomau. Pomwe Salomau akhatonga dziko la Jirayeri, wanthu wa Mulungu adakhala na mtendere caiwo ndipo bzinthu bzikhawafambira bwino mu dziko lomwe “likhayerera mkaka na uci.” Mulungu adawauza kuti: “Mukapitiriza kubvera malango yangu na kuteweza malamulo yangu . . . , nin’dzakupasani mtendere m’dzikolo mwakuti mun’dzagona mwakusaya kugopa munthu ali-wentse.” (Lev. 20:24; 26:3, 6) Bzimwebzi bzidacitikadi mu utongi bwa Mambo Salomau. (1 Nkha. 22:9; 29:26-28) Mafala yomwe yambafotokozedwa pa Salimo 37:10, 11, 29 yadacitika mu nthawe ya Mambo Salomau ndipo yan’dzacitika pomwe kutsogoloku. w22.12 10 ¶8

Pakuti ndife Akristau wacadidi tin’funika kumbateweza malango ya gulu la Yahova. Bibliya lina malango yomwe yangatithandize kuti bzinthu bzitifambire bwino. Iro limbati: “Malango yanzeru yangakuthandize kukunda nkhondo, ndipo anyakupereka malango akawanda bzinthu bzimbafamba bwino.” (Mim. 24:6) Kodi nfundo imweyi tingaiphatise tani basa pomwe tikupalizira? Ifepano tin’funika kucita nyongo ya kuteweza malango yomwe timbapasidwa, sikuti kucita bzomwe ifepano tikuwona kuti mpsabwino. Pa mitsonkhano yathu yacikristau, ifepano timbapasidwa malango yomwe yangatithandize kukhala apfunzisi wabwino. Ku mitsonkhanoko kumbafotokozedwa nkhani zakucokera m’Bibliya ndipo kumbacitidwa pomwe bziratizo bza upalizi bzomwe bzimbatipfunzisa momwe tingaphatire basa la kupalizira. Ndipo cinango n’cakuti, gulu la Yahova limbakonza mabukhu na mavidiyo kuti bzithandize wanthu kubvesesa bwino Bibliya. Timbatenda kwene-kwene Yahova thangwe ra kutipasa malango yace m’Bibliya! Kodi tingadakhala na moyo wa moda wanyi tingadasaya kudziwa nzeru za Yahova? Bwerani nthawe zentse timbaphatise basa nzeru zomwe Yahova ambatipasa. — Mim. 3:13-17. w22.10 23 ¶18-19

Tikamala kudya, ifepano timbaderekha mbuto ibodzi kuti cakudyaco ciphate bwino basa m’thupi mwathu. Tikamalambo kuwerenga Bibliya, ticikhala na nthawe yakukumbukira bzomwe tawerengabzo, cikhulupiro cathu cimbalimba. Mpsimwebzi bzomwe Yahova akufuna kuti ifepano ticite. Kuti bzimwebzi bzikwanisike, tin’funika kumbapemba, kuwerenga na kukumbukira bzomwe tawerengabzo. Cakuyamba, tin’funika kumbapemba kuti Yahova akonzekerese mtima wathu kuti tikwanise kubvesesa nzeru zace. Caciwiri, tiwerenge mbali ya m’Bibliya yomwe tin’funa. Ndipo cacitatu, tin’funika kumbaima kuti tikumbukire bzomwe tawerengabzo. Tikacita bzimwebzi tin’dzabvesesa bwino Fala la Mulungu ndipo tin’dzakhala na cikhulupiro cakulimba. Thangwe ranyi mpsakufunika kumbawerenga Bibliya na kumbakumbukira bzomwe tawerengabzo? Kucita bzimwebzi kumbatithandiza kupitiriza kupalizira mafala ya Mulungu na kutikonzekeresambo kuti tidzakwanise kudziwisa wanthu cirango ca Mulungu kutsogoloku. Ndipo cinango n’cakuti, tikambawona makhalidwe yabwino yomwe Yahova anayo, uxamwali bwathu na iye bumbalimba kwene-kwene. w22.11 6-7 ¶16-17

Jezu adalatiza kuti mbanyakupfunza lini wace okha omwe angadadzawazindikira Akristau wacadidi, napombo wale omwe ambatumikira lini Yahova angadadzawazindikirambo thangwe ra lufoyi lomwe iwo ambalatizana. Ndipo wanthu ambakwanisa kuwona kuti Mboni za Yahova zimbafunana. Koma iwo ni wanthu wakuperewerambo. (1 Juw. 1:8) Tikawadziwa bwino abale wathu, timbakwanisambo kuwona bzakuphonya bzawo. (Aro. 3:23) Tsono wanthu winango ambalekerera kuti bzakuphonya bza winango bziwacitise kusiya kutumikira Yahova. Kodi Jezu adalatiza tani lufoyi kwa ateweri wace? Ndipo tingamutewezerembo tani Jezu ntsiku zino? Ifepano tin’funika kukumbukira mitawiro ya mibvunzo imweyi. Tikacita bzimwebzi, bzin’dzatithandiza kulatiza lufoyi kwa anzathu tikapitana nawo. — Aef. 5:2. w23.03 26-27 ¶2-4

Pomwe tikufika kuphampha kwa dzikoli, tingagumane na mabvuto m’gwere. Mabvuto yamweya yangayeze kukhulupirika kwathu kwa Yahova. Ndipopa tin’funika kukhala tidapenya nthawe zentse. M’bale wanu akakuphonyerani, lekani kumukoyera cakumtima. Mukatambira malango, onani phindu la malangoyo sikuti manyazi yomwe mun’khala nayo. Bvumani malango mucicinja makhalidwe yanu. Ndipo gulu la Yahova likacinja bzinthu, imwepo bvumani kucinjako na kuteweza malango. Pitirizani kukhala wakukhulupirika kwa Yahova na gulu lace napo mukakhala mukuyezedwa. Mun’funika kukhala wakuderekha, wakukumbuka bwino na kuwona bzinthu ninga momwe Yahova ambawonera. Pitirizani kupfunza na nkhani za wanthu omwe ambafotokozedwa m’Bibliya, omwe adagumanambo na mabvuto ninga yanu ndipo onani bzomwe adacita kuti ayakunde. Mbapembani kwa Yahova kuti akuthandizeni ndipo pitirizani kubverana na gwere. Mukacita bzimwebzi, Sathani an’dzakwanisa lini kukulekanisani na Yahova pabodzi na gulu lace. — Tiy. 4:7. w22.11 24-25 ¶14-16

Pomwe malengwa ya pantsi yakanati kucitika akulu ambathandiza abale na mpfumakazi kuti akhale wakukonzeka. Iwo ambawonesesa kuti wentse m’gwere akuphatisa basa malango ya momwe angabzikhotcererere ku malengwayo na kuwaligariri. N’ciyani comwe munthu ali-wentse payekha an’funika kucita? Penu malengwayo yacitika pafupi na komwe mumbakhalako, bvunzani akulu kuti mudziwe bzomwe mungacite kuti muthandizire. Pinango mungapereke nyumba zanu kuti omwe agwedwa na malengwawo ayai kuti omwe abwera kudzawathandizawo abakakhale. Ndipo imwepo mungaperekembo cakudya kuna wale omwe akufunikira thandizo. Penu malengwa ya pantsi yacitika kutali na komwe mumbakhala, imwepo mungathandize basi. Kodi mungathandize tani? Mungapempherere wanthu omwe agwedwa na malengwawo. (2 Ako. 1:8-11) Ndipo mungacitembo bzakupereka bzanu ku basa lathu la pa dziko lentse. (2 Ako. 8:2-5) Penu mungakwanise kuyenda komwe kwacitika malengwa ya pantsiyo, mungabvunze akulu wa gwere kuti mudziwe bzomwe mungacite kuti mukwanise kuyenda kumweko. Penu imwepo mwacemeredwa, mungapfunzisidwe mucitumizidwa komwe kukufunikira thandizoko. w22.12 24 ¶8; 25 ¶11-12

Bibliya linango lidasandulizira mafala ya m’vesi la lero tenepa: “Palibe mayezo yomwe imwepo mwagumana nayo yomwe palibe munthu omwe akanati kugumana nayombo.” Mafala yamweya yadanembedwera Akristau omwe akhakhala mu mzinda wa Kolinto thangwe pomwe akhanati kutendeuka, winango akhacita upombo, akhacita malume ya pa mphasa ya amuna ayai akazi okha-okha na kumwa mpaka kuledzera. (1 Ako. 6:9-11) Kodi mukukumbuka kuti iwo adasiyiratu nzeru zentse zakuipa pomwe adabatizidwa? Ne. Iwo akhali Akristau wakudzozedwa. Tsono iwo akhali wanthu wakuperewerambo ninga ifepano. Iwo akhafunika kupitiriza kucita nyongo kuti aleke kukhala na nzeru zakuphonyeka. Mpsabwino kwene-kwene kudziwa bzimwebzi. Thangwe ranyi? Thangwe bzimbatithandiza kudziwa kuti ndife lini tekha omwe tikucita nyongo kuti titcenkhe nzeru zakuipa. Abale wathu winango adacitambo bzibodzi-bodzibzo. Ndipo imwepo mungakwanise kupitiriza kulimbisa “cikhulupiro canu, pakudziwa kuti abale wanu pa dziko lentse la pantsi, akugumanambo na mabvuto mabodzi-bodziya.” — 1 Ped. 5:9. w23.01 12 ¶15

Jezu adakumbira Yahova kuti awanyang’anire ateweri wace. (Juw. 17:11) Kodi kudziwa bzimwebzi kumbatithandiza tani kukhala wakukhwimika? Kumbatithandiza thangwe timbadziwa kuti Yahova ana mphanvu kuposa anyamadulanthaka wathu. (1 Juw. 4:4) Yahova ambadziwa bzentse. Ndipopa tikudziwa kuti tikamuthemba, iye an’dzatithandiza kukunda mantha ticikhala wakukhwimika. Kodi mumbabva manyazi kuuza anzanu kuti ndimwe Mboni ya Yahova? Kodi mumbazeza kukhala mpalizi wakusaya kubatizidwa ayai kubatizidwa thangwe ra kucita thupo kuti wanthu winango an’kuwonani tani? Penu bziri tenepo, lekani kubvuma kuti bzimwebzi bzikutaziseni kucita cinthu comwe mukudziwa kuti n’cabwino. Pembani kwa Yahova kuti akuthandizeni. Mukumbireni kuti akuthandizeni kukhala wakukhwimika kuti mucite bzomwe iye ambakomedwa nabzo. Mukacita bzimwebzi, mun’dzawona kuti Yahova akutawira mipembo yanu, ndipo mun’dzakhala wakukhwimika kwene-kwene. — Zai. 41:10, 13. w23.01 29 ¶12; 30 ¶14

Jezu adabvunza kuti: “Kodi mulibe kuwerenga?” Iye adacita mbvunzo umweyu kuti alatize kuti Afarizeu akhaphatisa basa mwakuphonyeka bzomwe akhawerenga. (Mat. 12:1-7) Pa nthawe imweyire, Afarizeu adalewa kuti anyakupfunza wa Jezu akhacita bzinthu bzomwe bzikhabvumizidwa lini pa ntsiku ya Sabudu. Pakuwatawira, Jezu adaphatisa basa mafala yakugumanika m’bukhu la Ozeya pakufuna kulatiza kuti Afarizeuwo akhabvesesa lini kuti n’thangwe ranyi lamulo la Sabudu lidaikhidwa nakuti akhalatiza lini ntsisi. Thangwe ranyi amuna amwewa akhalamba kucinjidwa na bzomwe akhawerenga m’Fala la Mulungu? Thangwe iwo akhali wakubzikuza. Bzimwebzi bzidacitisa kuti iwo aleke kubvesesa bzomwe akhawerengabzo. (Mat. 23:23; Juw. 5:39, 40) Onani kuti pa Mateu 19:4-6, Jezu adabvunza pomwe Afarizeu kuti: “Kodi mulibe kuwerenga?” Iwo alibe kubvesesa bzomwe Mulungu akhafuna kulewa pa nkhani ya malowozi. Na mafala ya Jezuya, ifepano tikupfunza kuti tin’funika kumbawerenga Bibliya na mtima wakufewa. Mwakusiyana na Afarizeu, ifepano tin’funika kumbaliwerenga na mtima wentse ticibvuma kupfunzisika. w23.02 12 ¶12-13

Yahova adapasa Ajirayeri Malamulo yomwe yakhawathandiza kuti ambatcenkhe ngozi pa mui na ku basa. (Eki. 21:28, 29; Deut. 22:8) Munthu omwe akhapha mwanzace mwa ngozi akhagumana na mabvuto makulu. (Deut. 19:4, 5) Malamuloyo yakhalatiza kuti munthu omwe apweteka mwana omwe ali m’mimba mwa ngozi, akhafunikira kulangidwa. (Eki. 21:22, 23) Bibliya limbalatiza kuti Yahova ambafuna kuti ifepano timbatcenkhe ngozi. Timbalatiza kuti timbatenda mphaso ya moyo yomwe Yahova adatipasa tikambatcenkha ngozi ku mui na ku basa. Penu tikufuna kutaya bzinthu bzomwe bzingaceke, kuphaya, veneno ayai mankhwala, tiwonesese kuti tataya pa mbuto yabwino pomwe bzingapweteke lini wanthu ndipo wana angafike lini kumweko. Tin’funika kucita mphole pomwe tagasa moto, tapferusa madzi na pomwe tikuphata basa na bzifuzo bzomwe bzingapweteke munthu. Tin’funika lini kumbabzisiya balala-balala. Ndipo tin’funikambo lini kufambisa karo, mota ayai njinga pomwe tamwa mankhwala yomwe yangatipase tulo, pomwe tamwa bzakumwa bzakuledzeresa ayai pomwe tikubva tulo. Ndipo tin’funika lini kumbatinya telefoni pomwe tikufambisa. w23.02 21-22 ¶7-9

Yahova ni Mpfunzisi wakudeka mtima na wa ntsisi. Iye ambafuna kuthandiza anyakupfunza wace. (Sal. 130:3) Ndipo iye ambadikhirira lini kuti ticite bzinthu bzomwe tingakwanise lini kucita. Onani kuti iye adatipasa mphaso yabwino kwene-kwene yomwe ni ulupi. (Sal. 139:14) Mulengi wathu, Yahova, akufuna kuti timbakomedwe na kupfunza. Ndipopa ni cinthu canzeru ‘kufunisisa’ kupfunza Fala la Mulungu, Bibliya. (1 Ped. 2:2) Tenepo, mbacitani nyongo yakuwerenga Bibliya na kulipfunza nthawe zentse. (Djos. 1:8) Na thandizo la Yahova, imwepo mun’dzakomedwa kuwerenga na kupfunza bzizinji pakulewa bza Yahova. Kundodziwa bzomwe tin’funika kucita n’kwakukwanira lini. Cakufunika kwene-kwene ndico kukhala na makhalidwe yomwe Yahova ambakomedwa nayo, ninga lufoyi na kumukhulupira. (1 Ako. 8:1-3) Pomwe mukupfunza, mun’funika kupitiriza kumbamukumbira Yahova kuti akuthandizeni kukhala na cikhulupiro cakulimba. (Luk. 17:5) Iye ambatawira mipembo imweyi. w23.03 10 ¶11, 13

Jezu akhafuna kuti anyakupfunza wace akhale na basa la kucita pomwe akudikhirira kumala kwa dzikoli. Ndipopa iye adawapasa basalo. Iye adawauza kuti apalizire mafala yabwino ya Umambo “ku Jeruzalemu, ku Djudeya kwentse na ku Samariya, mpaka mbuto zakutali za pa dziko la pantsi.” (Mab. 1:6-8) Limweri ni basa likulu kwene-kwene lomwe ateweri wa Jezu adapasidwa! Iwo adalatiza kuti akhaphatisa basa bwino nthawe yawo mwa kuphata basalo na nyongo. Kuti tilatize kuti ndife wakucenjera, tin’funika kuwona kuti tikuphatisa tani basa nthawe yathu. “Bzinthu bzakusaya kudikhirika” bzingagwere ali-wentse wa ifepano. (Mpal. 9:11) Ifepano tingafe nthawe iri-yentse. Kuti tiphatise basa bwino nthawe yathu tin’funika kucita bzomwe Yahova ambafuna mwa kulimbisa uxamwali bwathu na iye. (Juw. 14:21) Bibliya limbati: “Khalani wakulimba, na wakusaya kutekenyeka, ndipo nthawe zentse khalani na bzakucita bzizinji pa basa la Mbuya.” (1 Ako. 15:58) Tikacita bzimwebzi, tin’dzakhumbula lini cimaliziro cikafika ayai moyo wathu ukafika kuphampha pomwe dzikoli likanati kumala. — Mat. 24:13; Aro. 14:8. w23.02 18 ¶12-14