Fevereiro

Kodi bzimwebzi bzimbathandauza ciyani? Ninga momwe Jezu adalewera, bzimwebzi bzimbathandauza kuti tin’funika kufuna anzathu na kubvuma kuwafera bzikafunikira. Bibliya limbalatiza kuti lufoyi ndakufunika kwene-kwene. Wanthu azinji ambafuna mavesi ya m’Bibliya ninga yomwe yambalewa kuti: “Mulungu ni lufoyi.” (1 Juw. 4:8) “Umbafune mwanzako ninga momwe umbabzifunira wekha.” (Mat. 22:39) “Lufoyi limbampsinkha pikado zizinji.” (1 Ped. 4:8) “Lufoyi limbamala lini.” (1 Ako. 13:8) Mavesi yamweya na yanango yambalatiza padeca kuti mpsakufunika kumbalatizana lufoyi. Lufoyi limbacokera kwa Yahova, ndipo wale omwe akusimbidwa na iye na omwe ana mzimu wace ndiwo angakwanise kulatiza lufoyi limweri. (1 Juw. 4:7) Ndipo Jezu adalewa kuti ni lufoyi lokha lomwe lingadawazindikirisa kuti ni Akristau wacadidi. Ninga momwe Jezu adalewera, wanthu azinji ambawazindikira Akristau wacadidi thangwe ra lufoyi lomwe iwo ambalatizana. w23.03 27-28 ¶5-8

Kodi mun’funa kuti bzileke kumbakunesani kulekerera anzanu. Imwepo mungayambe kupfunza na kumbakumbukira nkhani za m’Bibliya zakulewa bza wale omwe adalekerera anzawo na mtima wentse na wale omwe alibe. Mungakumbukirembo bzomwe Jezu adacita. Iye akhalekerera wanthu na mtima wentse. (Luk. 7:47) Ndipo iye akhambawonambo bzinthu bzabwino bzomwe wanthuwo angacite sikuti kuphonya kwawo. Jezu akhali wakusiyana kwene-kwene na Afarizeu omwe “akhanyoza anzawo.” (Luk. 18:9) Mukamala kukumbukira nkhani zimwezi, bzibvunzeni kuti: ‘Kodi nimbatsungira kuwona ciyani kuna anzangu? Kodi nimbandowona kuphonya kwawo?’ Penu bzimbakunesani kulekerera mwanzanu, nembani makhalidwe yabwino yomwe iye anayo. Ndipo mukamala bzibvunzeni kuti: ‘Kodi Jezu ambamuwona tani munthu umweyu? Kodi iye angadamulekerera?’ Kucita bzimwebzi kun’dzakuthandiza kucinja nzeru zanu. Pakuyamba, pinango bzingatinese kulekerera munthu omwe watiphonyera. Koma tikapitiriza kucita nyongo tin’dzakwanisa kumbalekerera anzathu na mtima wentse. w22.04 23 ¶6

M’bukhu la Apokalipse anyamadulanthaka wa Mulungu akuyezezeredwa na bzirombo. Ndipo bukhuli limbafotokoza bzirombo bzakusiyana-siyana. Cakuyamba cimbalewedwa kuti ‘cikufumphuka m’nyanza.’ Ico cikhana “nyanga 10 na misolo 7.” (Apok. 13:1) Caciwiri cimbalewedwa kuti ‘cikhacokera pa dziko la pantsi.’ Cirombo cimweci cikhalewalewa ninga cinyoka ndipo cidacitisa “moto kugwa pa dziko la pantsi.” (Apok. 13:11-13) Ndipo bukhu la Apokalipse limbalewambo bza cirombo cacitatu, cakusiyana na bzentsebzi. Ico cikhali “cifuira kwene-kwene” ndipo cikhadapakiridwa na puta. Bzirombo bzitatu bzimwebzi ni anyamadulanthaka wa Yahova omwe angadadzamala nthawe izinji ali pa nkhondo na Yahova Mulungu na Umambo bwace. Ndipopa mpsakufunika kuti tiwadziwe anyamadulanthaka amwewa. (Apok. 17:1, 3) Tin’funika kubvesesa kuti bzirombobzi na putayu bzikuthandauza ciyani. Ndipo comwe cingatithandize kubvesesa ni kubvuma kuti Bibliya lokha-lokhali litifotokozere. Bzirombo bzizinji bzomwe bzimbagumidwa m’bukhu la Apokalipse, thandauzo lace limbafotokozedwa na mabukhu manango ya m’Bibliya. w22.05 8-9 ¶3-4

Atumiki wa Yahova winango ambakwanisa lini kucita bzomwe akhacita kale-kale, thangwe rakuti akalamba ayai thangwe ra kuduwala-duwala. Mukakhala mwagoboka m’mabondo thangwe rakuti mukukwanisa lini kucita bzizinji pakutumikira Yahova, bzibvunzeni kuti, ‘Kodi n’ciyani comwe Yahova akufuna kuna inepano?’ Kumbukirani kuti iye ambafuna kuti mumucitire bzomwe mungakwanise. Tiyezezere tenepa: Mpfumakazi yomwe ina magole 80 ikuwona kuti ikukwanisa lini kucita bzizinji mu utumiki ninga momwe ikhacitira pomwe ikhana magole 40. Iyo ikucita bzentse bzomwe ingakwanise, koma ikuwona ninga kuti Yahova akukomedwa lini nayo. Tsono, bziridi tenepoyo? Kumbukirani ibzi. Pomwe mpfumakaziyi ikhana magole 40, ikhacita bzentse bzomwe ingadakwanisa pakutumikira Yahova, koma tsapano ina magole 80 ndipo ikupitiriza basi kucita bzimwebzo, iyo ikucita bzizinji pa kutumikira Yahova. Ndipo tikumbukirembo kuti tikacita bzentse bzomwe tingakwanise, Yahova an’dzalewa kuti: “Wacita bwino!” (Ndendemezerani na Mateu 25:20-23.) Tikambakumbukira kwene-kwene bzomwe tingakwanise kucita, sikuti bzomwe tingakwanise lini kucita, tin’dzakhala wakukondwa. w22.04 10 ¶2; 11 ¶4-6

Apokalipse kapitulo 21 ambandendemezera wa 144 000 na mzinda wakudeka kwene-kwene wakucemeredwa “Jeruzalemu mupsa.” Mzinda umweyu udamangidwa na aliserse ya minyala 12 yomwe idanembedwa “madzina 12 ya apostolo 12 wa Mwana wa Bira.” (Apok. 21:10-14; Aef. 2:20) Mzinda wakuyezezerayu ukhali wakusiyana kwene-kwene na mizinda yentse. Mseu wace ukulu ukhadakonzedwa na oro caiyo, misuwo yace 12 idakonzedwa na minyala yakuumira, maparede na aliserse yace bzidakonzedwa pomwe na minyala inango yakuumira ndipo iyo ikhadapimidwa bwino kwene-kwene. (Apok. 21:15-21) Tsono bzikhawoneka kuti pana cinthu comwe cikhasala. Juwau adalewa kuti: “Ndiribe kuwona templo mwemo, thangwe Yahova, Mulungu Wamphanvu-zentse pabodzi na Mwana wa Bira, ndiwo templo ya mzindayo. Ndipo mzindayo ukhafunika lini kubvunikiridwa na dzuwa ayai mwezi, pakuti ulemerero bwa Mulungu bukhabvunika kale, ndipo kandiyero yace ikhali Mwana wa Bira.” (Apok. 21:22, 23) Wale omwe ambacita mbali ya Jeruzalemu mupsa an’dzakhala pabodzi na Yahova. — Aheb. 7:27; Apok. 22:3, 4. w22.05 17-18 ¶14-15

Napo kuti Yahova ni Mulengi wathu, Nyakutipasa malamulo na Muyeruzi, iyembo ni Pai wathu wa kudzulu omwe ambatifuna kwene-kwene. (Sal. 100:3; Zai. 33:22) Ifepano tikaphonya ticikungula na mtima wentse, iye an’dzatilekerera, thangwe ambafunisisa kucita bzimwebzi. (Sal. 86:5) Yahova adaphatisa basa mpolofeta Zaiya kuti atitsimikizire kuti ngwakukonzeka kutilekerera. Iye adati: “Napo pikado zanu n’zifuira ninga mulopa, inepano nin’dzazicenesa . . . ninga matalala.” (Zai. 1:18) Pakuti ndife wakuperewera, nthawe zinango ifepano timbalewa ayai kucita bzinthu bzomwe bzimbakalipisa anzathu. (Tiy. 3:2) Tsono, bzimwebzi bzin’funa lini kulewa kuti tingakwanise lini kucita uxamwali na iwo. Ifepano tingakwanise kukhala nawo pa uxamwali tikakhala wakulekerera. (Mim. 17:9; 19:11; Mat. 18:21, 22) Mwanzathu akatiphonyera pang’ono, Yahova an’funa kuti timbamulekerere. Ifepano tin’funika kucita bzimwebzi thangwe Yahova ambatilekerera ‘na mtima wentse’ tikamuphonyera. — Zai. 55:7. w22.06 8 ¶1-2

N’cadidi kuti tin’funika kutcenkha kumbabzindendemezera na anzathu, koma tingapfunze na bzomwe atumiki winango wa Yahova ambacita. Munthu wabwino kwene-kwene omwe tingamutewezere ni Jezu. Napo kuti iye akhali munthu wakulungama, makhalidwe yace na bzinthu bzomwe adacita bzingatipfunzise bzinthu bzizinji. (1 Ped. 2:21) Tikambacita nyongo kuti timutewezere, ifepano tin’dzakhala atumiki wa Yahova wabwino kwene-kwene. Fala la Mulungu limbalewa bza amuna na akazi wakukhulupirika omwe ifepano tingawatewezere napo kuti akhaphonyambo. M’bodzi wa iwo ni Davide. Yahova adalewa kuti iye ni “munthu omwe ambakondwesa mtima wangu.” (Mab. 13:22) Tsono Davide akhaphonya. Ndipo nthawe inango, iye adacita pikado zikulu-zikulu. Napo bziri tenepo, iye ni munthu wabwino basi kuti timutewezere. Thangwe ranyi? Thangwe iye akhalamba lini kuphonya kwace. Koma adabvuma malango yamphanvu yomwe adapasidwa ndipo adakumbira kuti Mulungu amulekerere pikado zacezo. Ndipopa, Yahova adamulekerera. — Sal. 51:3, 4, 10-12. w22.04 13 ¶11-12

Bibliya limbalewa kuti infa ni nyamadulanthaka. (1 Ako. 15:25, 26) Ifepano tikakumbukira bza kufa timbacita thupo kwene-kwene, maka-maka bzikakhala kuti ifepano ayai wadzinza wathu akuduwala kwene-kwene. Thangwe ranyi timbagopa kufa? Thangwe Yahova adatilenga kuti timbakhale na moyo wakusaya kumala. (Mpal. 3:11) Tsono kugopa infako kungatithandize nthawe zinango. Thangwe ranyi? Thangwe kungakhotcerere moyo wathu. Ndipo kumbacitisa kuti timbadye cakudya cabwino, timbacite masenzeka yakulimbisa thupi, timbanyang’ane thandizo la ulapi tikakhala tikuduwala na kutcenkha kuikha utowa moyo wathu pa ngozi. Sathani ambadziwa kuti ifepano timbafuna kukhala na moyo. Ndipo iye adalewa kuti tin’dzabvuma kudzonga uxamwali bwathu na Yahova na kucita cinthu ciri-centse kuti tipulumuse moyo wathu. (Djob. 2:5) Koma iye akhanama. Pakuti ndiye “omwe ambacitisa kuti wanthu afe,” ndipopa ambayezera kutigopswa mwakuphatisa basa infa kuti tisiye kutumikira Yahova. — Aheb. 2:14, 15. w22.06 18 ¶15-16

Tikayamba kuzunzidwa, ifepano timbatsonkhana m’tumagrupo tung’ono-tung’ono. Ndipopa mpsakufunika kumbabverana kwene-kwene na abale wathu. Kumbukirani kuti Sathani ni nyamadulanthaka wathu ndipo ambafuna kuti tileke kubverana. Tin’funika lini kubvuma kuti Sathani atitazise kubverana na abale wathu. Tikapitana na abale wathu, tin’funika kuceza nawo nkhaniyo ticimalisa bvutolo. (Mim. 19:11) Tikhale wakukonzeka kuthandiza anzathu. (Tito 3:14) Thandizo lomwe abale winango adapereka kwa mpfumakazi ya m’grupo lawo lidathandiza abale wa mu grupo lentsenero. Iwo adakhala wakubverana kwene-kwene ninga ubale bwawo. (Sal. 133:1) Pana abale na mpfumakazi zizinji omwe akupitiriza kutumikira Yahova napo kuti boma limbawaletsa kucita bzimwebzo. Winango wa iwo ali m’kawoko thangwe ra cikhulupiro cawo. Ifepano tingawapempherere, tingapemphererembo famidya zawo, abale omwe ambawalimbikisa na wale omwe ambawakhotcerera mu nyumba za mphala. (Akol. 4:3, 18) Lekani kuyebwa kuti mipembo yanu ingathandize abale na mpfumakazi wentsewa! — 2 Ates. 3:1, 2; 1 Tim. 2:1, 2. w22.12 26-27 ¶15-16

Wana ambatewezera bzomwe abereki wawo ambacita. N’cadidi kuti pai ali-wentse angaphonye thangwe tentse ndife wakuperewera. (Aro. 3:23) Napo bziri tenepo, abereki an’funika kucita nyongo yakukhala na makhalidwe yabwino. Pai m’bodzi adalewa kuti: “Wana adakhala ninga thonje, lomwe tikalinyika m’madzi ayai m’mafuta iro limbakweweratu bzimwebzo.” Ndipo adalewa pomwe kuti: “Wana an’dzalatiza penu timbacita bzomwe timbawapfunzisa ayai ne.” Ndipopa, penu tin’funa kuti wana wathu ambafune Yahova, ifepano ndife tin’funika kulatiza kuti timbafuna kwene-kwene Yahovayo. Pana bzinthu bzizinji bzomwe abereki angacite kuti apfunzise wana wawo kufuna Yahova. Andrew, omwe ana magole 17, adalewa kuti: “Nthawe zentse abereki wangu akhambatiuza kuti mpembo ngwakufunika. Usiku buli-bwentse pai wangu akhambapemba nande pabodzi, napo ndikakhala kuti ndapemba kale. . . . Tsapano nimbapemba kwa Yahova ndipo nimbabva kuti iye ni Pai omwe ambandifuna.” Abereki, dziwani kuti mukambafuna kwene-kwene Yahova mungathandizembo wana wanu kumufunambo. w22.05 28 ¶7-8

Cinthu cibodzi comwe mun’funika kucita kuti mubatizidwe ni kukungula pikado zanu. (Mab. 2:37, 38) Imwepo mukakungula na mtima wentse, bzinthu bzin’dzakufambirani bwino pa moyo wanu. Kodi imwepo mudasiya kucita bzinthu bzomwe Yahova ambabziwenga, ninga upombo, kufumali na nthabwala zakutukwana? (1 Ako. 6:9, 10; 2 Ako. 7:1; Aef. 4:29) Citani nyongo kuti mubzisiye. Kumbirani thandizo kwa munthu omwe ambapfunza namwe Bibliya ayai kwa akulu wa gwere. Penu ndimwe tswaka ndipo mukukhala pabodzi na abereki wanu, auzeni kuti akuthandizeni kusiya kucita bzinthu bzakuipa bzomwe bzingakutaziseni kubatizidwa. Cinthu cinango comwe mun’funika kucita kuti mupitirize kunamata Yahova ndico kumbayenda ku mitsonkhano nthawe zentse na kukhala na ndondomeko yabwino yauzimu. (Aheb. 10:24, 25) Imwepo mukabvumizidwa kuti mumbapalizire, mbacitani nyongo yakucita bzimwebzi nthawe zentse. w23.03 10-11 ¶14-16

Omwe ambafotokozedwa pa Genesesi 3:14, 15 ni “nyoka,” pabodzi na “mbeu” ya nyokayo. Nyoka caiyo-caiyo ingadabva lini bzomwe Yahova adalewa mu zunde la Edeni. Ndipopa mafala ya Yahovaya yakhalewedwa kwa cinthu comwe cikhana nzeru. Kodi cinthu cimweci n’ciyani? Pa Apokalipse 12:9 pambatithandiza kudziwa. Pamwepa pambalewa kuti “cinyoka cakale-kale” ni Sathani Dyabu. Nthawe zinango Bibliya limbaphatisa basa fala lakuti mbeu pakufuna kulewa bza wanthu omwe ambatewezera nzeru ayai bzicito bza munthu munango, bzomwe bzimbacitisa kuti iye akhale ninga pai wawo. Ndipopa tingalewe kuti mbeu ya nyoka ni anjo wakuipa omwe adapandukira Mulungu pabodzi na wanthu omwe ambatewezera Sathani. Iwo ambalamba kubvera Mulungu ndipo ambaboneresa wanthu wace. Anjo wakuipa omwe adasiya mbuto zawo kudzulu mu ntsiku za Nowa na wanthu wakuipa omwe ambatewezera Dyabu ndiwo ambacita mbali ya mbeu yace. — Gen. 6:1, 2; Juw. 8:44; 1 Juw. 5:19; Djuda 6. w22.07 14-15 ¶4-5

Mpostolo Paulo akhafuna kwene-kwene abale na mpfumakazi zace. Iye akhabvera ntsisi wale omwe akhagumana na mabvuto, thangwe akhadagumanambo kale na mabvuto. Pa nthawe inango, Paulo akhalibe kobiri, ndipo adafunika kuphata basa kuti agumane bzinthu bzakufunika pa moyo wace na kuthandizambo Akristau anzace. (Mab. 20:34) Iye adaphata basa lakukonza matendi. Pomwe adafika ku Kolinto, iye adaphata basa limweri pabodzi na Akila na Prisila. Tsono iye akhambapalizira kwa Adjuda na Agerego pa “ntsiku zentsene za Sabudu.” Pomwe Timotio adafika, “Paulo adayamba kukhala wakutanganika kwene-kwene na basa lakupalizira fala.” (Mab. 18:2-5) Paulo alibe kuyebwa kuti cinthu cakufunika kwene-kwene pa moyo wace cikhali kutumikira Yahova. Iye adaphata basa mwanyongo kuti agumane bzinthu bzakufunika pa moyo wace na kucita utumiki, ndipopa adakwanisa kulimbikisa abale na mpfumakazi zace kuti ambacitembo bzibodzi-bodzibzo. Iye adawakumbusa kuti an’funika lini kubvuma kuti thupo lakufuna kudyesa banja lawo na bzinthu bzinango bziwatazise kutumikira Yahova, comwe ni ‘cinthu cakufunika kwene-kwene.’ w22.08 20 ¶3

Ntsiku zino, cakulinga ca Mulungu n’cakuti mafala yabwino ya Umambo yapaliziridwe pa dziko lentse la pantsi. (1 Tim. 2:3, 4) Basa limweri nda Yahova ndipo iye adalipereka m’manja mwa Mwana wace wapamtima kuti alitsogolere. Pakuti basali likutsogoleredwa na Jezu, ifepano tingatsimikizire kuti lin’dzamalizidwa pa nthawe yomwe Yahova akufuna kuti limale, pomwe dzikoli likanati kumala. (Mat. 24:14) Thangwe ranyi tikulewa tenepoyo? Pomwe Jezu akhadasala pang’ono kuyenda kudzulu, adatsonkhana na ateweri wace winango wakukhulupirika pa phiri linango ku Galileya. Iye adawauza kuti: “Ndapasidwa utongi bwentse, kudzulu na pa dziko la pantsi.” Onani bzomwe iye adalewa patsogolo pace. Iye adati: “Ndokoni, ndipo kapfunziseni wanthu wa mitundu yentse kuti akhale anyakupfunza wangu.” (Mat. 28:18, 19) Mafala yamweya yakulatiza kuti Jezu adapasidwa utongi bwentse kuti atsogolere basa la kupalizira. Ndipo Jezuyo akupitiriza kutsogolera basa lakupalizirali ntsiku zino. w22.07 8 ¶1, 3; 9 ¶4

Wanthu wakulungama, omwe adacita bzinthu bzabwino pomwe akhanati kufa, “an’dzamuka kuti atambire moyo” thangwe madzina yawo yadanembedwa kale mu bukhu la moyo. Bzimwebzi bzin’funa kulewa kuti kulamusidwa kwa wanthu “omwe akhacita bzinthu bzabwino” komwe kumbafotokozedwa pa Juwau 5:29 ni kubodzi-bodzi na kulamusidwa kwa wanthu “wakulungama” komwe kumbafotokozedwa pa Mabasa 24:15. Kabvesesedwe kamweka kakubverana na mafala ya pa Aroma 6:7, yomwe yambati: “Munthu omwe wafa, walekereredwa pikado zace.” Wanthu wakulungama adalekereredwa pikado zawo pomwe adafa, tsono Yahova ambapitiriza kukumbukira bzinthu bzabwino bzomwe iwo adacita. (Aheb. 6:10) Koma wanthu wakulungamawa an’dzafunika kupitiriza kukhala wakukhulupirika kuti madzina yawo yadzapitirize kukhala yadanembedwa mu bukhu la moyo. w22.09 18 ¶13, 15

Mpolofeta Daniyeli adalatiza kuti akhali munthu wakukhulupirika. Iye adayendesedwa ku ukapolo ku Babiloniya koma palibe kupita nthawe izinji kuti ayambe kudziwika kuti ni munthu wakukhulupirika. Ndipo wanthu adayamba kumukhulupira kwene-kwene pomwe Yahova adamuthandiza kuzimbula maloto ya Mambo Nabukadinazori wa ku Babiloniya. (Dan. 4:20-22, 25) Pomwe padapita magole, Daniyeli adalatiza pomwe kuti ngwakukhulupirika pomwe adathumbudzula mafala yomwe yakhadanembedwa pa parede mu nyumba ya mambo wa ku Babiloniya. (Dan. 5:5, 25-29) Pomwe padapita nthawe, Dariyo na nduna zace adadzawona kuti “Daniyeli akhana luso lakudabwisa.” Iwo adazindikira kuti Daniyeli “akhali munthu wakukhulupirika, akhaphata bwino basa ndipo akhacita lini bobobo.” (Dan. 6:3, 4) Munthu ali-wentse an’funika kumbabzibvunza kuti: ‘Kodi inepano nimbadziwika ninga munthu wakukhulupirika?’ Tikakhala wakukhulupirika, timbatumbizisa Yahova. w22.09 8-9 ¶2-4

Ifepano tikambateweza mitemo ya Yahova pa nkhani ya cabwino na cakuipa, bzinthu bzimbatifambira bwino. Thangwe ranyi tikulewa tenepo? Tiyezezere kuti munthu ali-wentse angadakhala na mphimo yace-yace yakupimira cimanga ayai yakupimira bzinthu bzinango yakusiyana na ya mwanzace. Bzikuwonekeratu kuti bzingadakhala lini bwino. Ndipo tanimbo dotolo ali-wentse angadambaphatisa basa mankhwala yomwe akukumbuka mu msolo mwace kuti alape nayo atenda? Bzikuwonekeratu kuti wanthu angadambafa kwene-kwene. Mpsibodzi-bodzimbo na mitemo ya Yahova. Tikambaiteweza, bzinthu bzimbatifambira bwino. Yahova ambasimba wanthu omwe ambateweza mitemo yace. Iye adalewa kuti: “Anyakulungama an’dzatambira dziko la pantsi, acidzakhala m’mwemo mpaka kale-kale.” (Sal. 37:29) Wanthu omwe an’dzakhala mu dziko limweri an’dzakhala wakubverana, wakukondwa na mwa mtendere thangwe an’dzateweza mitemo ya Yahova. Yahova akufuna kuti ifepano tidzakhalembo mu dziko limweri. Tsono kuti bzimwebzi bzidzakwanisike, ifepano tin’funika kukhala wanthu wakulungama! w22.08 27-28 ¶6-8

Tikakhala tikugumana na mabvuto bzingakhale bzakunesa kupitiriza kukhala wakukhulupirika kwa Yahova na gulu lace. Kodi n’ciyani cingatithandize bzimwebzi bzikacitika? Comwe cingatithandize ni kupitiriza kukhala wakupenya na wakulimba m’cikhulupiro. Kuti tikhale wakupenya tin’funika kukhala wakugwa mpfuwa na wakuderekha ndipo tin’funikambo kumbakumbukira kuti Yahova akuiwona tani nkhaniyo. Tikacita tenepoyo, tin’dzacita lini bzinthu mwakusaya kukumbuka bwino. Nthawe zinango m’bale omwe ana udindo angatiphonyere. Pinango iye alibe kutiphonyera utowa. (Aro. 3:23; Tiy. 3:2) Napo bziri tenepo, bzomwe acitabzo bzingatiwawe basi. Pinango bzingatitazise kugona. Ndipo tingambakumbuke kuti: ‘M’bale caiye angacite bzimwebzi? Kodi limweri ni guludi la Yahova?’ Tsono kumbukirani kuti Sathani ambakomedwa tikakhala na nzeru zimwezi. (2 Ako. 2:11) Nzeru zimwezi zingaticitise kusiya kutumikira Yahova na kubverana na gulu lace. Ndipopa timbafunika kutcenkha kukalipa. w22.11 20 ¶1, 3; 21 ¶4

Yahova adatipasa cidikhiro cabwino kwene-kwene cakuti tidzakhale na moyo wakusaya kumala. Wanthu winango akudikhirira kukakhala na moyo wakusaya kumala kudzulu, komwe an’kapasidwa thupi lauzimu lomwe lingafe lini. (1 Ako. 15:50, 53) Ndipo wanthu azinji akudikhirira kudzakhala na moyo wakukondwa na wakusaya mabvuto pantsi pano. (Apok. 21:3, 4) Penu cidikhiro cathu n’cakudzakhala na moyo kudzulu ayai pa dziko la pantsi pano, tentsenefe tina cidikhiro cabwino kwene-kwene. Ifepano tikudikhirira kuti bzinthu bzabwino bzin’dzacitika thangwe rakuti Yahova ndiye adalewa. (Aro. 15:13) Ifepano tikudziwa bzomwe Yahova adalewa ndipo tikudziwambo kuti ambanama lini. (Num. 23:19) Timbakhulupira kuti Yahova akufuna ndipo ana mphanvu ya kucita bzentse bzomwe adalewa. Baba wathu wa kudzulu ambatifuna kwene-kwene ndipo an’funa kuti timbamukhulupire. Cidikhiro cathu kwa Yahova cikakhala cakulimba tin’dzakwanisa kupirira pomwe tikugumana na mabvuto ndipo tin’dzakhala wakukhwimika na wakukondwa, napo tikadzagumana na mabvuto kutsogolo. w22.10 24 ¶1-3

Pakuti wanthuwo akhafuna lini kubva, Zaiya adalewa kuti Yahova angadawalekerera kuti abonere. (Zai. 30:5, 17; Jer. 25:8-11) Ndipo bzimwebzi bzidadzacitikadi. Iwo adadzayendesedwa ku ukapolo ku Babiloniya. Tsono pa wanthu omwe adayenda ku ukapolowo pakhana wanthu winango omwe akhali wabwino. Ndipo Zaiya adalewa kuti ingadakwana nthawe yomwe Yahova angadadzawabwezera ku dziko lawo la Jirayeri. (Zai. 30:18, 19) Ndipo bzimwebzi bzidadzacitikadi; Yahova adawacosa ku ukapolo. Tsono bzimwebzi bziribe kucitika pa nthawe imweyoletu. Mafala yakuti “Yahova akudikhirira kuti akulatizeni kudeka mtima kwace” yambalatiza kuti pangadapita nthawe kuti bzimwebzi bzicitike. Ndipo padapitadi magole 70 kuti Adjuda omwe akhali wakukhulupirika acoke ku ukapolo ku Babiloniya acibwerera ku Jeruzalemu. (Zai. 10:21; Jer. 29:10) Pomwe Adjuda akhabwerera ku dziko lawo, misozi ya kulira idadzasanduka misozi yakusekerera. w22.11 9 ¶4

M’madziko mazinji ntsiku zino, abale na mpfumakazi zathu akugumanambo na mabvuto ninga yomwe apostolo adagumana nayo mu nthawe ya Akristau wakuyambirira, pomwe akhazunzidwa thangwe ra kupalizira bza dzina la Jezu. Atongi wa nyumba ikulu ya mphala ya Adjuda ‘akhawauza kuti aleke kupfunzisa pomwe mu dzina la Jezu.’ (Mab. 4:18-20; 5:27, 28, 40) Tsono iwo akhadziwa kuti munthu omwe akhana mphanvu kwene-kwene kuposa atongiwo adawapasa basa lakuti ‘apalizire wanthu na kucitira umboni mwakukwanira’ bza Kristu. (Mab. 10:42) Ndipopa, Pedru na Juwau, omwe akhalalewa mu dzina la apostolo wentse, adalewa mwakukhwimika kuti iwo angadabvera Mulungu sikuti atongiwo. Ndipo adalewa pomwe kuti angadasiya lini kupalizira bza Jezu. (Mab. 5:29) Pomwe apostolo wale adamala kumenyedwa thangwe ra kukhala wakukhulupirika, iwo adacoka mu nyumba ya mphalayo “wakukondwa kwene-kwene thangwe adakhala na mwayi wakunyozedwa thangwe ra dzina la Jezu.” Ndipo iwo adapitiriza kucita basa la kupalizira! — Mab. 5:41, 42. w22.10 12-13 ¶2-4

Tikayamba kupfunza Bibliya timbapfunza bzinthu bzakusaya kunesa. Mu tsamba lomwe adanembera Ahebereu, mpostolo Paulo adacemera bzipfunziso bzimwebzi kuti “bzinthu bzakuyambirira.” Iye akhalewa lini kuti ‘bzipfunziso bzakuyambirirabzo’ bzikhali bzakusaya kufunika; koma akhabzindendemezera na mkaka wa mwana. (Aheb. 5:12; 6:1) Iye adalimbikisa Akristau kuti apitirize kupfunza bzizinji bza m’Fala la Mulungu. Kodi imwepo mumbafuna kupfunza bzinthu bzakunesa bza m’Bibliya? Kodi mukufuna kupitiriza kupfunza bzizinji pakulewa bza Yahova na kucita bzomwe iye ambafuna? Azinji wa ifepano bzimbatinesa kupfunza. Tani kwa imwepo? Pomwe mukhali ku xikola, imwepo mudapfunza kuwerenga. Kodi mukhakomedwa na kupfunzako? Ayai mukhawona kuti mungadakwanisa lini kupfunzako? Wanthu winango ambawona kuti angakwanise lini kupfunza mwakuphatisa basa mabukhu. Penu muli ninga iwo, dziwani kuti Yahova angakuthandizeni. Iye ni Mpfunzisi wabwino kwene-kwene. w23.03 9-10 ¶8-10

Tikakhala wanthu wakubzicepesa, tin’dzacitisa kuti Fala la Mulungu likhazikike mu mtima mwathu. Ndipo tin’funikambo kutcenkha kukhala wakubzikuza kuti Fala la Mulungu litithandize kukhala wa ntsisi na wa lufoyi. Momwe ifepano timbacitira bzinthu na wanthu winango bzimbalatiza penu tikubvuma kuti Fala la Mulungu liticinje. Afarizeu alibe kubvuma kuti Fala la Mulungu licinje mitima yawo, ndipopa akhapasa “mulandu wanthu wakusaya [mathangwe].” (Mat. 12:7) Mwakundendemerana na bzimwebzi, bzomwe ifepano timbacita na wanthu winango bzimbalatiza penu timbabvuma kuti Fala la Mulungu liticinje ayai ne. Kodi timbawona makhalidwe yabwino yomwe anzathu anayo ayai timbandowona bzinthu bzomwe iwo ambaphonya basi? Kodi ndife wa ntsisi na wakukonzeka kulekerera ayai timbakulumiza kukalipa na kukoyera cakumtima anzathu? Kubzicita mibvunzo imweyi kun’dzatithandiza kudziwa penu tikubvuma kuti Fala la Mulungu licinje kakumbukidwe kathu na bzakucita bzathu. — 1 Tim. 4:12, 15; Aheb. 4:12. w23.02 12 ¶13-14

Kumbukirani bzomwe Zuze wa ku Arimateya adacita. Iye akhalemekezedwa kwene-kwene na Adjuda. Ndipo akhali m’bodzi wa atongi wa nyumba ya mphala ya Adjuda yakucemeredwa Sinedriyo. Pa nthawe yomwe Jezu akhacita utumiki bwace, iye adakhala nyakupfunza wace, koma akhali lini wakukhwimika. Juwau adanemba kuti iye “akhabzilewa lini padeca kuti akhali nyakupfunza wace, thangwe akhagopa Adjuda.” (Juw. 19:38) Zuze akhafuna mafala yabwino ya Umambo, tsono iye akhabziwonesa lini padeca kuti akhakhulupira Jezu. Pinango iye akhagopa kuti akabziwonesera padeca, Adjuda angadasiya kumulemekeza. Tsono Bibliya limbatiuza kuti pomwe Jezu adafa, Zuze “adakhwimika kuyenda kwa Pirato kukakumbira mtembo wa Jezu.” (Mar. 15:42, 43) Pa nthawe imweyi, iye adalatiza padeca kuti akhali nyakupfunza wa Jezu. Kodi imwepo mudabvambo kale mantha ninga Zuze? w23.01 30 ¶13-14

Mambo wacikazi wa ku Xeba adabva kuti Ajirayeri akhana moyo wabwino kwene-kwene pomwe Salomau akhatonga. Ndipopa, iye adacoka ku dziko lace aciyenda ku Jeruzalemu kuti akawone yekha. (1 Ama. 10:1) Pomwe adawona ulemerero bwentse bomwe Salomau akhanabo na moyo wabwino omwe wanthu akhanawo, iye adauza Salomauyo mafala ya m’cinembo ca vesi la leroya. Tsono bzinthu bzabwino bzomwe bzikhacitika mu utongi bwa Salomau bzikulatiza bzinthu bzizinji kwene-kwene bzomwe Yahova an’dzacita pomwe Mwana wace Jezu an’dzakhala akutonga. Jezu ngwabwino kwene-kwene kuposa Salomau. Thangwe Salomau akhali munthu wakuperewera, ndipo adadzacita bzinthu bzakuipa bzomwe bzidadzabweresera mabvuto wanthu wa Mulungu. Tsono Jezu ngwakulungama ndipo ambaphonya lini. (Luk. 1:32; Aheb. 4:14, 15) Bzimwebzi bzikulatiza kuti iye an’dzacita lini cinthu ciri-centse comwe cingadzabweresere mabvuto wanthu omwe an’dzakhala akuwatonga. Iye ngwakuthemera kukhala Mambo wathu thangwe ni munthu wabwino kwene-kwene. w22.12 11 ¶9-10

Penu matenda yomwe yakuphata wanthu azinji yakumwazika komwe timbakhala, n’ciyani comwe tin’funika kucita? Tin’funika kubvera malango yomwe boma lingapereke, ninga kusamba m’manja, kukhala patali-patali, kubvala maskra na kukhala kwatekha. Tikambabvera malangoyo, timbalatiza kuti timbatenda mphaso ya moyo yomwe Yahova adatipasa. Pa nthawe imweyo, tingabve bzinthu bzakunama na axamwali wathu, avizinyu wathu na m’manotisiya. Tin’funika lini kukhulupira “mafala yali-yentse” yomwe tingabve. Tingacite bwino kubvera malango yomwe yangaperekedwe na boma pabodzi na adotolo. (Mim. 14:15) Bungwe Lakutonga na mthambi ambafufudza pomwe akanati kupereka malango ya momwe gwere lingacitire pa nkhani ya mitsonkhano na basa lakupalizira. Tikambabvera malangoyo, timbakhala wakukhotcerereka ndipo timbakhotcererambo anzathu. Ndipo bzingacitisembo kuti Mboni za Yahova zikhale na mbiri yabwino. — 1 Ped. 2:12. w23.02 23 ¶11-12

Pomwe Ajirayeri adapita mu Dziko Lakupiciridwa, iwo adakakhala ku mbuto zakusiyana-siyana. Pakuti Ajirayeri akhakhala ku mbuto zakusiyana-siyana, bzimwebzi bzingadacitisa kuti aleke kudziwana. Ndipopa Yahova adakonza makonzedwe yakuti iwo ambagumane acimbabva Fala la Mulungu likuwerengedwa na kufotokozedwa. (Deut. 31:10-12; Neh. 8:2, 8, 18) Ajirayeri akayenda ku Jeruzalemu kuti akanamate Yahova, iwo akhakomedwa kwene-kwene kudziwana na anzawo omwe akhacokera ku mphimpha zakusiyana-siyana! Yahova adakonza makonzedwe yamweya kuti athandize wanthu wace kukhala wakubverana. Ndipo gwere la Akristau wakuyambirira likhana wanthu wakucokera m’bzirewedwe bzakusiyana-siyana, mbuto zakusiyana-siyana na bzikhalidwe bzakusiyana-siyana. Tsono pakuti iwo akhafuna kwene-kwene Fala la Mulungu, adakhala wanthu wakubverana thangwe akhambagumana mbuto ibodzi kuti anamate Mulunguyo. Wanthu omwe ambayamba kutumikira Yahova angakwanise kubvesesa Fala la Mulungu akathandizidwa na Akristau anzawo na kuyenda ku mitsonkhano. — Mab. 2:42; 8:30, 31. w23.02 3 ¶7

Yahova adalewa kuti wanthu omwe ambacita bzomwe iye ambafuna an’dzakhala na “moyo wakusaya kumala.” (Aro. 6:23) Kukumbukira bzimwebzi kumbaticitisa kuti timufune kwene-kwene Yahovayo. Iye ambatifuna kwene-kwene, ndipopa akufuna kudzatipasa moyo wakusaya kumala kuti tileke kudzasiyana naye. Kudziwa kuti Mulungu an’dzatipasa moyo wakusaya kumala kumbatithandiza kupirira mabvuto yomwe timbagumana nayo. Anyamadulanthaka wathu akatigopswa kuti an’tipha, ifepano timbasiya lini kutumikira Yahova. Thangwe ranyi? Thangwe timbadziwa kuti tikafa wakukhulupirika kwa Yahova, iye an’dzatilamusa ticidzakhala na moyo wakusaya kumala. (Juw. 5:28, 29; 1 Ako. 15:55-58; Aheb. 2:15) Ifepano timbadziwa kuti Yahova angaticitise kukhala na moyo wakusaya kumala thangwe rakuti iye ndiye Mwenekaciro moyo, ndipo ambafa lini. (Sal. 36:9) Bibliya limbatitsimikizira kuti Yahova alipo kuyambira kale-kale mpaka kuyenda na kuyenda. — Sal. 90:2; 102:12, 24, 27. w22.12 2 ¶1-3

Atumiki wa Yahovafe timbadabwa lini tikakhala tikugumana na mabvuto. Timbadziwa kuti bzomwe Bibliya limbalewa mpsacadidi. Iro limbati: “Tin’funika kupirira mabvuto mazinji, kuti tikapite mu Umambo bwa Mulungu.” (Mab. 14:22) Ndipo timbadziwambo kuti mabvuto mazinji yomwe timbagumana nayo yangamale lini mu dziko lino. Ni mu dziko lipsa mokha momwe “infa in’dzawoneka lini pomwe. Pan’dzawoneka lini pomwe kusunama, kulira ne kuwawidwa.” (Apok. 21:4) Yahova angatikhotcerere lini ku mabvuto yentse yomwe tingagumane nayo. Tsono tikagumana na mabvuto, iye ambatithandiza kupirira. Onani bzomwe mpostolo Paulo adauza Akristau wa ku Roma. Cakuyamba, iye adalewa mabvuto mazinji yomwe iye pabodzi na abale wacewo akhagumana nayo. Pomwe adamala, adalewa kuti: “Ifepano tikukunda thangwe ra mphanvu ya ule omwe adatifuna.” (Aro. 8:36, 37) Bzimwebzi bzikuthandauza kuti Yahova ambatithandiza kupirira tikakhala tikugumana na mabvuto. w23.01 14 ¶1-2