Março

Mpostolo Pedru adalimbikisa Akristau kuti ambaphatise basa mphaso iri-yentse yomwe angakhale nayo kuti alimbikise anzawo. Iye adanemba kuti: “Mwakubverana na luso lomwe ali-wentse adatambira, liphatiseni basa pakutumikira winango ninga nyakunyang’anira omwe adatambira kudeka mtima kukulu kwa Mulungu.” (1 Ped. 4:10) Tin’funika lini kuleka kuphatisa basa mphaso zentse zomwe Yahova adatipasa thangwe ra kugopa kuti wanthu winango angaticitire njiru ayai angagoboke m’mabondo. Tsono tin’funika kucita mphole kuti tileke kucita magayo thangwe ra mphasozo. (1 Ako. 4:6) Tireke kuyebwa kuti luso liri-lentse lomwe ifepano tinalo ni mphaso yakucokera kwa Mulungu. Ndipo tin’funika kuiphatisa basa kuti tilimbikise abale na mpfumakazi zathu m’gwere, sikuti kucita magayo. (Afil. 2:3) Tikambaphatisa basa mphanvu na luso lomwe tinalo kuti ticite bzomwe Mulungu akufuna, tin’dzakhala wakukondwa, sikuti thangwe rakuti timbacita bzinthu bzizinji kuposa anzathu ayai thangwe rakuti timbacita bwino bzinthu kuposa iwo. Koma tin’dzakhala wakukondwa thangwe rakuti tikuphatisa basa mphaso zomwe tinazozo kuti titumbize Yahova. w22.04 11-12 ¶7-9

Jezu akhafuna kwene-kwene Fala la Mulungu. Ndipo mafala ya polofesiya yakulewa bza iye pa Salimo 40:8 yambalatiza momwe iye akhabvera. Mafalayo yambati: “Nimbakomedwa kucita bzomwe mumbafuna, imwe Mulungu wangu, ndipo lamulo lanu liri mu mtima mwangu.” Bzimwebzi bzidamucitisa kuti akhale wakukondwa kwene-kwene ndipo bzinthu bzidamufambira bwino pa kutumikira Yahova. Ifepano tingakhalembo wakukondwa tikambawerenga Fala la Mulungu na mtima wentse. (Sal. 1:1-3) Bwerani titewezere bzomwe Jezu adalewa na kucita mwa kumbawerenga na kupfunza Bibliya. Kuti tikwanise kubvesesa bzomwe tikuwerenga, tin’funika kumbapemba, kuwerenga pa mbuto yomwe iribe baludya, kubzicita mibvunzo na kumbanemba nfundo zomwe n’zakufunika. Tingaphatise basa luso lathu la kuzindikira kuti tikwanise kugumana nfundo zakuthandiza m’mabukhu yakukonzedwa na kapolo wakukhulupirika na wanzeru. Tikabvuma kupfunzisika, tin’dzabvuma kuti Fala la Mulungu liticinje. Tikacita bzimwebzi pa kuwerenga kwathu Bibliya, tin’dzagumana phindu ndipo tin’dzakhala pa uxamwali bwakulimba na Yahova. — Sal. 119:17; Tiy. 4:8. w23.02 13 ¶15-16

Sankhulani luso lomwe mun’funa kukhala nalo ndipo mukamala yambani kuwona bzomwe mungacite kuti mukhale nalo lusolo. Kodi mungacite tani bzimwebzi? Tiyezezere kuti imwepo mukufuna kukulisa luso lanu lakupfunzisa. Bzingakhale bwino kwene-kwene kupfunza broxura lakuti Kulisani Luso Lanu la Kuwerenga na Kupfunzisa. Mukakhala kuti mwapasidwa mbali kuti mukacite pa mitsonkhano ya pakati pa sumana, mungakumbire m’bale omwe ana luso kuti akutetekereni kuti abve momwe mwakonzekerera ndipo mukamala angakuuzeni mbali zinango zomwe mun’funika kucinja. Mukacita bzimwebzo abale na mpfumakazi an’dzakwanisa kuwona kuti ndimwe munthu wakulimbikira na wakukhulupirika. (2 Ako. 8:22) Tsono tani penu bzikukunesani kukhala na luso lomwe mukufuna? Lekani kubwerera m’mbuyo. Kodi Timotio adakhala mpfunzisi wabwino kwene-kwene? Bibliya limbalewa lini. Tsono, tingakwanise kuwona kuti iye adacitadi bwino-bwino utumiki bwace thangwe rakuti adateweza malango ya mpostolo Paulo. — 2 Tim. 3:10. w22.04 24-25 ¶8-11

Kodi cirombo comwe cina misolo 7 n’ciyani? Tawona kuti ciromboci cidakhala ninga nyalugwe, tsono cina nzayo ninga za urso, mulomo wace udakhala ninga wa mphondolo ndipo cina nyanga 10. Nyalugwe, urso, mphondolo na cirombo comwe cina nyanga 10 bzimbagumidwa mu kapitulo 7 ya bukhu la Daniyeli. Tsono cirombo cakufotokozedwa m’bukhu la Apokalipse cina mawonekedwe yakutengana na bzirombo bzentsenebzi. Cirombo cimweci ni boma lini libodzi lokha ayai boma lomwe limbatonga dziko lentse. Juwau adalewa kuti ico cikhatonga “dzinza liri-lentse, mbumba, cirewedwe na mtundu uli-wentse wa wanthu.” Ndipopa tingalewe kuti cina mphanvu kuposa boma lomwe likutonga dziko libodzi lokha. (Apok. 13:7) Cirombo cimweci ni mautongi ayai maumambo yentse yamphanvu yomwe yakutonga wanthu kuyambira kale-kale. (Mpal. 8:9) Cinthu cinango comwe cikulatiza bzimwebzi n’cakuti nthawe zinango Bibliya limbaphatisa basa número 10 pakufuna kulewa cinthu cipulumira. w22.05 9 ¶6

Kodi mbani omwe an’dzagumana phindu na bzinthu bzabwino bzomwe Mulungu an’dzatipasa? Wakuyamba ni wanthu wa thimu likulu omwe an’dzapulumuka pa Armagedo pabodzi na wana omwe angadzabadwe mu dziko lipsa. Tsono pa Apokalipse kapitulo 20 pambatiuzambo kuti wanthu omwe adafa an’dzamuka. (Apok. 20:11-13) Wanthu wakulungama omwe adafa pabodzi na wakusaya kulungama, omwe alibe kukhala na mwayi wa kupfunza bza Yahova, an’dzamuka kuti akhale pomwe na moyo pantsi pano. (Mab. 24:15; Juw. 5:28, 29) Kodi bzimwebzi bzin’funa kulewa kuti wanthu wentse omwe adafa an’dzamuka mu Utongi bwa Magole 1000? Ne. Wanthu omwe adalamba kutumikira Yahova pomwe akhana moyo an’dzamusidwa lini kwa anyakufa. Thangwe adakhala kale na mwayi wa kupfunza bza Yahova koma adalamba, acilatiziratu kuti an’themera lini kudzakhala na moyo m’Paraizo pantsi pano. — Mat. 25:46; 2 Ates. 1:9; Apok. 17:8; 20:15. w22.05 18 ¶16-17

Mwakuphatisa basa “kapolo wakukhulupirika na wanzeru,” Jezu akukonzekeresa gulu lakuwoneka na maso pa dziko la pantsi kuti wanthu anamate Mulungu mwacadidi. (Mat. 24:45) Kodi imwepo mumbaliwona tani gulu limweri? Pakutawira, pinango mwakumbukira mafala ya mpostolo Pedru, omwe adauza Jezu mafala ya mu vesi la lero. Kodi ifepano tingadakhala tiri kuponi tingadasaya kukhala m’gulu la Yahova? Mwakuphatisa basa gululi, Kristu akucita ciri-centse kuti tipasidwe cakudya cauzimu cakukwana bwino kuti tipitirize kukhala wakukhulupirika kwa Mulungu. Iye ambatipfunzisa kuti tikwanise kucita bwino basa lathu la kupalizira. Ndipo ambatithandizambo kubvala “unthu bupsa,” kuti tikondwese Yahova. (Aef. 4:24) Jezu ambatipasa malango yanzeru pa nthawe zakunesa. Phindu la malangoya lidawonekera pa nthawe yomwe matenda ya COVID-19 yadayambika. Pomwe wanthu azinji m’dzikoli akhasaya muti wakuphata, Jezu adacita ciri-centse kuti tipasidwe malango yakubveka bwino yomwe yangadatithandiza kukhala wakukhotcerereka. w22.07 12 ¶13-14

Yahova adauza Ajirayeri kuti akhafunika kumbapfunzisa wana wawo bza iye nthawe zentse. (Deut. 6:6, 7) Ntsiku iri-yentse Ajirayeri akhana nthawe izinji kuti ambaceze na wana wawo na kuwalimbikisa kuti ambafune Yahova na mtima wawo wentse. Pinango Ajirayeri akhapfunzisa wana wawo wacimuna pomwe akhaphata nawo pabodzi basa lakubzala ayai kubvuna. Ndipo pinango mkazi akhapfunzisa mwana wacikazi kufuna Yahova pa nthawe yomwe akhaphata basa pabodzi lakuluka, kusona na pomwe akhacita mabasa manango ya pamui. Pomwe abereki akhaphata basa pabodzi na wana wawo, iwo akhaceza nkhani zizinji zakufunika kwene-kwene. Iwo akhaceza bza makhalidwe yabwino ya Yahova na momwe iye akhathandizira banja lawo. M’madziko mazinji, abereki ambakhala alibe nthawe yakukhala pamui kuti ambaceze na wana wawo, thangwe iwo ambakhala ali ku basa ndipo wana ambakhalambo ali ku xikola. Ndipopa abereki an’funika kumbanyang’ana nthawe kuti ambaceze na wana wawo. — Aef. 5:15, 16. w22.05 28 ¶10-11

Munthu akacita pikado ikulu, ambakhala waphonyera kwene-kwene Mulungu. Penu Mkristau wacita pikado imweyi, iye an’funika kupemba kwa Yahova kuti amulekerere, ndipo an’funikambo kukauza akulu wa gwere. (Sal. 32:5; Tiy. 5:14) Kodi n’ciyani comwe akulu ambacita? Tikudziwa kuti ni Yahova yekha omwe ana ugo bwakulekerera pikado, ndipo ambacita bzimwebzo mwakuphatisa basa ntsembe ya cakulombolera. Tsono iye adapasa akulu ugo bwakuphatisa basa Bibliya kuti awone penu munthu omwe wacita pikadoyo angapitirize kukhala m’gwere ayai ne. (1 Ako. 5:12) Kuti akuluwo akwanise kucita bzimwebzi, cinthu cibodzi comwe iwo ambacita ni kugumana mitawiro ya mibvunzo iyi: Kodi munthuyo wacita utowa pikadoyi? Kodi iye adacita kukonzekera kuti acite pikadoyi? Kodi iye wacita kangasi pikadoyi? Iwo an’funikambo kubzibvunza kuti: Kodi pana umboni bwakulatiza kuti iye wakungula? Ndipo, kodi pana umboni bwakulatiza kuti Yahova wamulekerera? — Mab. 3:19. w22.06 9 ¶4

Jezu adauzambo ateweri wace kuti ambacite bzinthu bzakulungama. (Mat. 5:6) Bzimwebzi bzikulatiza kuti ifepano tin’funika kumbafuna kucita bzinthu bzabwino. Kodi imwepo mumbafuna cadidi na cirungamo? Tikudziwa kuti mtawiro wanu ngwakuti inde. Imwepo mumbanama lini ndipo mumbawenga bzinthu bzentse bzakuipa. (Sal. 119:128, 163) Munthu omwe ambanama ambatewezera Sathani, omwe ni mtongi wa dzikoli. (Juw. 8:44; 12:31) Bzomwe Sathani ambafuna ni kupswipiza dzina la Yahova Mulungu. Sathani adayambira kale-kale kulewa bzinthu bzakunama pakulewa bza Yahova. Iye adayambira mu zunde la Edeni. Iye ambayezera kucitisa wanthu kukumbuka kuti Yahova ni Munthu wakuipa ndipo ambamana wanthu wace bzinthu bzabwino. (Gen. 3:1, 4, 5) Sathani akadapitiriza kucita bzimwebzi. Iye akadapitiriza kudzonga nzeru za wanthu. Iye ambawacitisa kufuna kucita bzinthu bzakuipa, ndipopa iwo akusankhula kusaya “kufuna cadidi.” — Aro. 1:25-31. w23.03 2 ¶3

Pinango imwepo mukucita nyongo kuti musiye kucita bzinthu bzakuipa, tsono bzikukunesani. Pinango mungacite ciya thangwe rakuti mukutazira kucita bzomwe mukufuna. N’ciyani comwe cingakuthandizeni kupirira mpaka kufika pa kubatizidwa? Ni lufoyi lanu kwa Yahova. Lufoyi lanu kwa Yahova ni cinthu cakufunika kwene-kwene. (Mim. 3:3-6) Tikakhala na lufoyi kwa Yahova tin’dzabwerera lini m’mbuyo pomwe tikugumana na mabvuto. Bibliya limbalewa kuti Yahova ana lufoyi lacadidi kuna atumiki wace. Ndipo lufoyi limweri limbamala lini. Imwepo mudalengedwa m’cifanikiso ca Mulungu. (Gen. 1:26) Kodi lufoyiro tingalilatizembo tani? Mbayambani ntsiku iri-yentse na kutenda Yahova. (1 Ates. 5:18) Ntsiku iri-yentse, mbabzibvunzani kuti: ‘Kodi Yahova ambalatiza tani kuti ambandifuna?’ Mukamala pembani kwa Yahova mucimutenda pa bzinthu bzomwe ambakucitirani. w23.03 12 ¶17-19

Jezu adathandiza apostolo wace 12 mwa lufoyi. Kodi tingapfunze ciyani na bzimwebzi? Tikakhala tapitana na anzathu, cakufunika kwene-kwene ni momwe timbacitira bzinthu na anzathuwo sikuti kukumbukira kwene-kwene bzomwe iwo acita. Mwanzathu akaticitira cinthu comwe tiribe kukomedwa naco, tingabzibvunze kuti: ‘Thangwe ranyi bzomwe iye wacitabzi bzikundiwawa? Kodi bzimwebzi bzikulatiza kuti pana mbali inango yomwe nin’funika kucinja? Kodi munthu omwe wandiphonyerayi akugumana na bvuto pa moyo wace? Napo penu ndina lazau, kodi ningalatize lufoyi mwa kundoisiyambo tenepoyo nkhaniyi?’ Tikambacita bzinthu mwa lufoyi na anzathu tin’dzalatiza kuti ndife ateweri wa Jezu. Bzomwe Jezu adacita bzikutipfunzisambo kuti tin’funika kucita nyongo yakuti timbawabvesese Akristau anzathu. (Mim. 20:5) Jezu akhakwanisa kuwona bzomwe bziri mu mtima mwa munthu, koma ifepano tingakwanise lini. Tsono ifepano tingakwanise kulekerera abale na mpfumakazi zathu akatiphonyera. (Aef. 4:1, 2; 1 Ped. 3:8) Bzingakhale bzakupusa kucita bzimwebzo tikawadziwa bwino abale wathuwo. w23.03 30 ¶14-16

Tikakhala tikufuna kutambira thandizo la ulapi, Sathani angaphatise basa mpata umweyu kuti adzonge cikhulupiro cathu. Adotolo ayai abale wathu omwe ni Mboni lini za Yahova angayezere kutingingimiza kuti tiikhidwe mulopa, komwe ni kuphonyera mitemo ya Mulungu. Ayai munthu unango angayezere kutingingimiza kuti tibvume thandizo la ulapi lomwe limbabverana lini na bzomwe Bibliya limbapfunzisa. Napo timbafuna lini kufa, timbadziwa kuti Yahova an’dzapitiriza kutifuna napo ticifa. (Aro. 8:37-39) Axamwali wa Yahova akafa, iye ambapitiriza kuwakumbukira ninga kuti iwo akana moyo. (Luk. 20:37) Ndipo iye an’dzawalamusa kuti akhale pomwe na moyo. (Djob. 14:15) Yahova adapagali pereso yakuumira kwene-kwene kuti ifepano ‘tidzakhale na moyo wakusaya kumala.’ (Juw. 3:16) Ifepano timbadziwa kuti Yahova ambatifuna kwene-kwene ndipo ambatithandiza. Ndipopa timbathemba iye kuti atitsangalaze, atipase nzeru na mphanvu tikakhala tikuduwala ayai wanthu akafuna kutipha. — Sal. 41:3. w22.06 18 ¶16-17

Bibliya limbalewa kuti: “Kugopa Yahova ndico ciyambi ca nzeru, ndipo kudziwa Mulungu Wakucena Kwene-kwene ndiko kubvesesa bzinthu.” (Mim. 9:10) Ndipopa tikafuna kucita cinthu cikulu pa moyo wathu, tin’funika kumbakumbukira bzomwe Yahova, omwe ni “Mulungu Wakucena Kwene-kwene,” akufuna kuti ticite. Tingacite bzimwebzi mwakuyamba kuwona bzomwe Bibliya limbalewa pa nkhaniyo na bzomwe mabukhu yathu yambapfunzisa. Tikambacita bzimwebzi, ifepano tin’dzalatiza kuti tina nzeru yacadidi. (Mim. 2:5-7) Ni Yahova yekha omwe angatipase nzeru yacadidi. (Aro. 16:27) Thangwe ranyi tikulewa tenepoyo? Thangwe lakutoma ndakuti, iye ni Mulengi, ndipo ambadziwa bwino cirengedwe cace. (Sal. 104:24) Laciwiri ndakuti, bzentse bzomwe Yahova ambacita bzimbalatiza kuti iye ana nzeru kwene-kwene. (Aro. 11:33) Lacitatu ndakuti, malango yentse yomwe Yahova ambapereka yambathandiza wanthu wentse omwe ambayaphatisa basa. (Mim. 2:10-12) Ndipopa, penu tikufuna kukhala na nzeru yacadidi, tin’funika kubvuma kuti Yahova ndiye yekha omwe angatipase malango. Ndipo tin’funikambo kumbathemba nzeru zace tikafuna kucita cinthu. w22.10 19 ¶3-4

Sathani adakundidwa pa nkhondo yomwe idalewedwa pa Apokalipse kapitulo 12 ndipo iye pabodzi na madimonyo yace adathusidwa pantsi pano. Sathani adabva ciya na bzimwebzi ndipo iye adatulira ciya caceco wanthu wakukhala pa dziko la pantsi. Ndipopa Bibliya limbati: “Tsoka dziko la pantsi.” (Apok. 12:7-12) Kodi kudziwa mapolofesiya yamweya kumbatithandiza tani? Bzinthu bzomwe bzikucitika m’dzikoli na kucinja kwa makhalidwe ya wanthu bzimbatithandiza kudziwa kuti Jezu ni Mambo ndipo akutonga kudzulu. Ndipopa tikawona wanthu akucita bzinthu bzakuipa ntsiku zino ifepano bzimbatiipira koma timbacita lini ciya, thangwe bzomwe iwo akucitabzo bzimbakhala bzikukwanirisa mapolofesiya ya m’Bibliya. Umambo bwa Mulungu bukutonga! (Sal. 37:1) Ndipo timbadziwa kuti bzinthu bzakuipabzi bziniyenda bzicithimizirika pomwe Armagedo ikufendera. (Mar. 13:8; 2 Tim. 3:13) Kodi imwepo mumbatenda Baba wanu wa kudzulu thangwe ra kukuthandizani kudziwa bzomwe bzikucitisa kuti mabvuto yawande pa dziko la pantsi? w22.07 3-4 ¶7-8

Tingakumbire Yahova kuti athandize abale na mpfumakazi zathu kupirira matenda, malengwa ya pantsi, nkhondo, kuzunzidwa na mabvuto yanango. Ndipo tingapemphererembo abale na mpfumakazi omwe akucita nyongo kuti athandize abale omwe akugumana na mabvutowa. Penu tikudziwa madzina yawo, tingawagume m’mipembo yathu ya patekha. Timbalatiza kuti timbafuna abale wathu tikambakumbira Yahova kuti awathandize kupirira. Abale omwe ana udindo bwa kutsogolera m’gwere ambatenda kwene-kwene tikambawapempherera. Mpostolo Paulo akhadziwa kufunika kwa kucita bzimwebzi, ndipopa iye adanemba kuti: “Ndipemphererenimbo kuti ndikafuna kulewalewa, yandibwerere mafala yakuthemera kuti ndikwanise kulewalewa mwakukhwimika, pakudziwisa winango cintsintsi cakupambulika ca mafala yabwino.” (Aef. 6:19) Ntsiku zino, tina abale azinji omwe ambatsogolera bzinthu mu gulu la Yahova. Ndipo ifepano timbalatiza kuti timbawafuna tikambakumbira Yahova kuti asimbe basa lawo. w22.07 23-24 ¶14-16

Mcikunda ambabvala kapaseti kuti akhotcerere msolo wace. Mpsibodzi-bodzimbo na ifepano. Pa nkhondo yathu yauzimu tin’funika kukhotcerera nzeru zathu kwa Sathani. Thangwe iye ambatibweresera bzinthu bzizinji kuti adzonge nzeru zathuzo. Kapaseti imbakhotcerera mcikunda. Cidikhiro cathu ciri ninga kapaseti imweyi, thangwe cimbakhotcerera nzeru zathu kuti tipitirize kukhala wakukhulupirika kwa Yahova. Cidikhiro cathu cakudzakhala na moyo wakusaya kumala cimbatithandiza kucita bzinthu mwanzeru. Thangwe ranyi? Thangwe tikasaya kukhala na cidikhiro ticiyamba kukhala na nzeru ninga za wanthu wa m’dzikoli, tin’dzayebwa kuti kutsogoloku tin’dzakhala na moyo wakusaya kumala. Onani bzomwe bzidacitikira Akristau wa ku Kolinto. Iwo akhadayebwa cinthu cakufunika comwe Mulungu adalewa, cakuti anyakufa an’dzamuka. (1 Ako. 15:12) Ndipopa Paulo adawauza kuti wanthu omwe akhalibe cidikhiro cimweci ambandocita bzinthu bzomwe akukomedwa nabzo pa nthaweyo basi. (1 Ako. 15:32) Ntsiku zinombo wanthu omwe alibe cidikhiro kwa Mulungu ambandocita bzinthu bzomwe akukomedwa nabzo basi. Tsono ifepano timbakhulupira Mulungu. w22.10 25-26 ¶8-9

Yahova ambafuna kuti timbapembe kwa iye. Iye ambawona mabvuto yomwe timbagumana nayo, ndipo nthawe zentse ambatetekera mipembo yathu. Iye ambakomedwa kubva mipembo ya atumiki wace. (Mim. 15:8) Kodi mungamuuze ciyani Mulungu mu mpembo mukabzibva kuti muli mwekha? Muuzeni Yahova momwe mukubvera mu mtima mwanu. (Sal. 62:8) Mungamuuze thupo lomwe munalo na momwe mukubvera thangwe ra thupolo. Mukumbireni Yahova kuti akuthandizeni kudziwa bzomwe mungacite penu mukubzibva kuti muli mwekha ayai mudasunama nakuti akuthandizeni kukhala wakukhwimika na kukupasani nzeru kuti mukwanise kulewalewa bwino-bwino bzomwe mumbakhulupira. (Luk. 21:14, 15) Penu imwepo mukutsautsika mu mtima, mungakumbire Yahova kuti mukhale wakukhwimika kuti muuze Mkristau wakukhwima mwauzimu mabvuto yanuyo. Imwepo mungakumbirembo Yahova kuti athandize omwe akukutetekeraniyo kubvesesa bvuto lanulo. Onani kuti iye akutawira tani mipembo yanu ndipo bvumani thandizo la anzanu. Mukacita bzimwebzi, imwepo mun’dzapepukidwa. w22.08 10 ¶6

Gwere lipsa la ku Tesalonika lidagumana na mabvuto mazinji. Mthithi wa wanthu udayamba, “kukwekweta . . . abale winango ndipo adayenda nawo kwa atsogoleri wa mu mzindamo.” (Mab. 17:6) Kodi mukukwanisa kuwona kuti Akristau anovu wale adabva tani pomwe adawona bzimwebzi bzikuwacitikira? Bzimwebzi bzidawawawa kwene-kwene, ndipo pinango bzingadawacitisa kusiya kucita nyongo pakutumikira Yahova. Tsono mpostolo Paulo akhafuna lini kuti bzimwebzi bziwacitikire. Ndipopa iye adanyang’ana manera kuti apitirize kuthandiza Akristau anovuwo. Iye adauza Atesalonikawo kuti: “Tidatuma Timotio, m’bale [wathu] . . . kuti adzalimbise cikhulupiro canu na kukutsangalazani, kuti munthu ali-wentse pakati panu aleke kutepa na matsautso yamweya.” (1 Ates. 3:2, 3) Timotio pakuti adawona momwe Yahova adaphatisira basa Paulo kuti alimbikise abale na mpfumakazi wa ku Listra, iyembo adakwanisa kuthandiza abale na mpfumakazi wa ku Tesalonika wale na kuwatsimikizirambo kuti bzinthu bzingadawafambira bwino. — Mab. 14:8, 19-22; Aheb. 12:2. w22.08 21 ¶4

Pomwe gole la 1900 likhanati kufika, kagrupo ka anyakupfunza wa Bibliya komwe kakhatsogoleredwa na Charles Taze Russell kadayamba kupfunza Bibliya mwakamderekho. Iwo akhafuna kudziwa cadidi pa nkhani ya ntsembe ya Jezu na bzomwe wanthu angafunike kucita pa kukumbukira infa yaceyo. Bzinthu bzomwe iwo akhafufudza bzimbatithandiza ntsiku zino. Thangwe ranyi tikulewa tenepoyo? Thangwe kufufudza kwawoko kudacitisa kuti tidziwe mphanvu ya ntsembe yomwe Jezu adapereka. (1 Juw. 2:1, 2) Ifepano tidakwanisambo kudziwa kuti pana magrupo mawiri ya wanthu omwe akudikhirira bzinthu bziwiri bzakusiyana. Grupo lakuyamba nda wanthu omwe an’kakhala na moyo omwe umbafa lini kudzulu ndipo grupo laciwiri nda wanthu omwe an’dzakhala na moyo wakusaya kumala pantsi pano. Kudziwa bzimwebzi kwaticitisa kuti tikhale axamwali wa Yahova. (1 Ped. 3:18) Ndipopa, ifepano timbacemera anzathu kuti adzakhale nafe pabodzi pa Cikumbuso, ninga momwe abale wathu wakukhulupirika adacitira m’mbuyomu. Ndipo timbacita Cikumbusoco ninga momwe Jezu adapfunzisira ateweri wace. w23.01 21 ¶6-7

Jezu adapfunzisa wanthu bzomwe Umambo bwa Mulungu bun’dzacita. Timbatenda ntsembe ya cakulombolera thangwe idacitisa kuti tikhale axamwali wa Yahova na Jezu. Ndipo wanthu omwe ambakhulupira ntsembeyi ana cidikhiro cakudzakhala na moyo wakusaya kumala na kudzawona wanthu omwe adafa akulamusidwa. (Juw. 5:28, 29; Aro. 6:23) Palibe comwe ifepano tidacita kuti tithemere kutambira mabaibai yentseneya; ndipo tingakwanise lini kupagali Mulungu na Jezu pa bzomwe adaticitirabzi. (Aro. 5:8, 20, 21) Comwe tingacite ni kutenda basi. Tsono tingatende tani? Tingaphatise basa bzinthu bzathu kuti tithandizire mabasa ya Umambo. Tingabzipereke kuti tithandizire basa lakumanga na kukonza nyumba za gulu lathu zomwe zadzongeka. w23.01 26 ¶3; 28 ¶5

Jezu pabodzi na anzace an’dzatonga na kuthandiza wanthu omwe ambakhala pa dziko lentse la pantsi. Anyakudzozedwa wakukwana 144 000 an’dzaphatambo basa ninga la Jezu Kristu. Iwo an’dzakhala amambo na antsembe. (Apok. 5:10) Mu nthawe ya Ajirayeri, antsembe ndiwo akhathandiza wanthu kukhala na manungo yabwino na kuwathandizambo kubvera Malamulo. Tsono ifepano timbadziwa kuti “Lamulo ni ciratizo ca bzinthu bzabwino bzomwe bzikubwera.” Ndipopa tingakhulupirembo kuti Jezu pabodzi na anyakudzozedwa an’dzathandiza wanthu wa Mulungu kukhala na manungo yabwino na kukhalambo pa uxamwali bwakulimba na Yahova. (Aheb. 10:1) Ifepano tikudziwa lini kuti iwo an’dzacita tani kuti ambakwanise kuuza wanthu bzakucita pomwe iwo ali kudzulu. Ndipo tingakhulupire kuti m’Paraizo, tin’dzatambira malango yomwe tikufunikira. — Apok. 21:3, 4. w22.12 11 ¶11-13

Thangwe libodzi lomwe limbaticitisa kucemera anzathu kuti abwere ku Cikumbuso ndakuti iwo adziwe bzomwe Yahova na Jezu adaticitira. (Juw. 3:16) Ifepano timbakhulupira kuti bzomwe iwo aniwona na kubva pa Cikumbusoco bzingawacitise kupfunza Bibliya acikhalambo atumiki wa Yahova. Ifepano timbacemerambo wanthu omwe adasiya kutumikira Yahova. Timbacita bzimwebzi kuti tiwakumbuse kuti Mulungu akadawafuna. Azinji wa iwo ambabwera ku Cikumbuso ndipo ifepano timbakomedwa tikawona bzimwebzi. Kubwera kwawo ku Cikumbuso kumbawakumbusa nthawe zomwe akhana moyo wabwino pomwe akhatumikira Yahova. (Sal. 103:1-4) Ifepano timbacita nyongo yakucemera wanthu azinji kuti abwere ku Cikumbuso thangwe timbadziwa kuti Yahova ambakomedwa na munthu ali-wentse pa yekha. — Luk. 15:7; 1 Tim. 2:3, 4. w23.01 20 ¶1; 22-23 ¶9-11

Pa usiku bwakumalizira pomwe Jezu akhanati kuphedwa, iye adakumbira cinthu cakufunika kwene-kwene kwa Baba wace wa kudzulu. Iye adakumbira Yahova kuti anyang’anire ateweri wace. (Juw. 17:15, 20) Yahova ambanyang’anira kale na kukhotcerera atumiki wace. Tsono, Jezu akhadziwa kuti ateweri wace angadadzazunzidwa na Sathani mwakuti bwerani mudzawone. Ndipo Jezu akhadziwambo kuti ateweri wace angadakwanisa kulimba pa mapumpso ya Dyabu pokha-pokha na thandizo la Yahova. Dziko la Sathaniri limbacitisa Akristau wacadidi kugumana na mabvuto mazinji ntsiku zino. Ifepano timbagumana na mabvuto yomwe yangatiwofokese na kutitazisa kukhala wakukhulupirika kwa Yahova. Tsono tin’funika lini kucita mantha, thangwe Yahova ambawona atumiki wace ndipo ambawonambo mabvuto yomwe timbagumana nayo. Iye ngwakukonzeka kutithandiza kupirira mabvutoyo. Inde Yahova ‘ambawona wale omwe ambamugopa . . . kuti awapulumuse.’ — Sal. 33:18-20. w22.08 8 ¶1-2

Gole liri-lentse, pa nthawe ya Cikumbuso, ifepano timbalatiza kutenda kwathu mwa kumbakumbukira bzomwe Jezu adaticitira na kumbapemba kwene-kwene. Ndipo timbalimbikisambo wanthu azinji kuti adzabwerembo pa msinda umweyu. Ndipo ifepano timbacita nyongo kuti tileke kudzatazira kuyenda ku Cikumbuso. Pa Cikumbuso, ifepano timbadziwa kuti thangwe ranyi wanthufe tikhafunikira cakulombolera nakuti bzidacitika tani kuti infa ya munthu m’bodzi ipagali pikado za wanthu azinji. Timbakumbusidwambo kuti pau na vinyu bzimbathandauza ciyani ndipo timbadziwambo wanthu omwe angadye pauyo na kumwa vinyuyo. (Luk. 22:19, 20) Ndipo timbakumbukirambo bzinthu bzabwino bzomwe an’dzatambira wanthu omwe an’dzakhala pa dziko la pantsi. (Zai. 35:5, 6; 65:17, 21-23) Tsono tin’funika lini kukumbuka kuti wanthu wentse ambadziwa kale bzimwebzi. w23.01 20 ¶2; 21 ¶4

Mulungu adacitisa kuti wanthu adzatambire moyo wakusaya kumala mwa kucosa pikado yawo na ntsembe ya cakulombolera ya Mwana wace. (Mat. 20:28) Mpostolo Paulo adalewa kuti: “Pakuti infa idabwera thangwe ra munthu m’bodzi, tenepo kulamusidwa kwa anyakufa kun’dzacitikambo kucokera kwa munthu m’bodzi. Tentse timbafa thangwe ra Adamu, tenepo tentse tin’dzalamusidwambo thangwe ra Kristu.” (1 Ako. 15:21, 22) Jezu adapfunzisa ateweri wace kuti ambapembe kuti Umambo bwa Mulungu bubwere nakuti kufuna kwa Mulungu kucitike pa dziko la pantsi pano. (Mat. 6:9, 10) Ndipo cinthu cibodzi comwe Mulungu akufuna n’cakuti wanthu adzakhale na moyo wakusaya kumala. Kuti bzimwebzi bzikwanisike, iye adasankhula Mwana wace Jezu Kristu kuti akhale Mambo wa Umambo bwa Mulungu. Iye adasankhulambo wanthu wakukwana 144 000 kuti adzaphate basa na Jezu pakucita bzomwe Mulunguyo akufuna. — Apok. 5:9, 10. w22.12 5 ¶11-12

Tikakhala tafedwa bzimbatiwawa kwene-kwene! Ndipo kuwawako kumbathumizirika tikambakumbukira munthuyo na kubonera komwe adacita pomwe akhadasala pang’ono kufa. Tsono pakapita nthawe, timbayebwa. Ndipo tikakumbukira cinthu comwe munthu omwe adafayo adalewa kuti atilimbikise ayai kuti atisekese, timbadzayamba pomwe kukhala na mpfatso. Mpsibodzi-bodzimbo na infa ya Jezu. Tikambawerenga bza kubonera kwa Jezu na kufa kwace, timbabva ntsisi kwene-kwene. Maka-maka pa nthawe ya Cikumbuso, timbakhala na nthawe yakukumbukira kufunika kwa ntsembe ya cakulombolera yomwe iye adapereka. (1 Ako. 11:24, 25) Tsono, ifepano timbakomedwa kwene-kwene tikakumbukira bzinthu bzentse bzomwe Jezu adalewa na kucita pomwe akhali pantsi pano. Ndipo timbakomedwambo tikakumbukira bzomwe iye akucita na bzomwe an’dzaticitira kutsogolo. w23.01 26 ¶1-2

Pomwe Jezu adafa, anyakupfunza wace adabva ntsisi kwene-kwene. Jezu, omwe akhali mtsogoleri wawo na xamwali wawo, akhadafa. Ndipo iwo akhakumbuka kuti bzentse bzomwe akhadacita bzire bzamalira pamwepale. (Luk. 24:17-21) Tsono, pomwe Jezu adalamusidwa, iye adawathandiza kuwona kuti bzomwe bzikhadacitika bzire bzikhadanembedwa kale m’Bibliya, ndipo iye adawapasa basa lakufunika kuti acite. (Luk. 24:26, 27, 45-48) Pomwe padapita nthawe, Jezu adabwerera kudzulu. Pa nthawe imweyi, anyakupfunza wace akhabva lini pomwe ntsisi, koma akhapfatsa kwene-kwene. Iwo akhapfatsa thangwe akhadziwa kuti Mbuya wawo akhana moyo ndipo angadawathandiza kucita basa lomwe adawapasa. Ndipopa iwo adatumbiza Yahova. (Luk. 24:52, 53; Mab. 5:42) Kuti titewezere anyakupfunza wa Jezu, tin’funika kuikha Umambo bwa Mulungu pa mbuto yakutoma pa moyo wathu. Ifepano timbafunika kupirira kuti titumikire Yahova. Koma iye adalewa kuti an’dzatibaira tikacita tenepoyo. — Mim. 10:22. w23.01 30-31 ¶15-16

Ifepano tin’funa lini kucita bzinthu bzakuipa ninga Adamu na Eva. Kuti titcenkhe kucita bzimwebzi, tin’funika kupitiriza kupfunza bza Yahova, kudziwa makhalidwe yace na kuyezera kubvesesa momwe iye ambakumbukira. Tikambacita bzimwebzi, ifepano tin’dzamufuna kwene-kwene Yahova. Kumbukirani bzomwe Abalahamu adacita. Iye akhafuna kwene-kwene Yahova. Napo pa nthawe yomwe akhabvesesa lini bzomwe Yahova akhafuna kucita, iye alibe kusiya kumufuna. Koma adayezera kumudziwa bwino Yahova. Pa nthawe inango, pomwe iye adabva kuti Yahova akhafuna kupfudza mizinda ya Sodoma na Gomora, Abalahamu adacita thupo kuti “Muyeruzi wa dziko lentse la pantsi” angadapfudza wanthu wakuipa pabodzi na wanthu wakulungama. Kuna Abalahamu, bzimwebzi bzikhali bzinthu bzakusaya kulungama, ndipopa iye adabvunza Yahova mibvunzo mizinji pa nkhani imweyi. Yahova adatawira mibvunzo yentse ya Abalahamu. Pakumalizira, Abalahamuyo adazindikira kuti Yahova ambadziwa mitima ya wanthu ndipo angaphe lini wanthu wakuipa pabodzi na wanthu wakulungama. — Gen. 18:20-32. w22.08 28 ¶9-10

Pomwe Mtongi wa cigawo, Nehemiya, adamaliza kumanga mpanda wa Jeruzalemu mu gole la 455 AEC, iye adanyang’ana wanthu wakuthembeka omwe angadakwanisa kusamalira mzindayo. M’bodzi mwa wanthu omwe iye adasankhula ni mtsogoleri wa Nyumba Yakulimba wakucemeredwa Ananiya. Bibliya limbalewa kuti Ananiya akhali “munthu wakukhulupirika [omwe] akhagopa Mulungu wacadidi kuposa wanthu winango.” (Neh. 7:2) Ananiya akhafuna Yahova na kugopa kumuphonyera, ndipopa akhacita nyongo pa basa lomwe adapasidwalo. Kufuna Yahova na kugopa kumuphonyera kungatithandizembo kuphata basa mwakukhulupirika pakutumikira Yahova. Munthu munango omwe adalatiza pomwe kuti akhali wakukhulupirika ni Tikiko. Paulo akhamuthemba kwene-kwene m’baleyu ndipo adalewa kuti iye akhali “mtumiki wakukhulupirika.” (Aef. 6:21, 22) Paulo alibe kundopasa Tikiko basa lakuti akapereke matsamba kwa abale wa ku Efezo na wa ku Kolose basi. Koma adamupasambo basa lakuti akawalimbikise na kuwatsangalaza. Ntsiku zino, tinawombo abale wakukhulupirika omwe ambatithandiza mwauzimu ninga Tikiko. — Akol. 4:7-9. w22.09 9-10 ¶5-6

Zuze adamala magole 13 akubonera. Pa nthawe imweyi, pinango Zuze angadakumbuka kuti Yahova akumufuna lini pomwe. Ndipo pinango angadakumbukambo kuti Mulungu wamulekerera pa nthawe ya mabvuto. Tsono Zuze alibe kukumbuka tenepoyo ne kukoya cakumtima, koma adapitiriza kukhala wakuderekha. Pomwe adakhala na mpata wakucitira abale wace wale bzakuipa, iye alibe kucita tenepoyo. Iye adawalatiza lufoyi na kuwalekerera. (Gen. 45:4, 5) Zuze adakwanisa kucita bzimwebzi thangwe iye akhandokhalira lini kukumbukira mabvuto yace, koma akhakumbukira bzomwe Yahova akhafuna kuti iye acite. (Gen. 50:19-21) Kodi nkhaniyi ikutipfunzisa ciyani? Tikupfunza kuti tikacitiridwa cinthu cakuipa tin’funika lini kumbapasa mulandu Yahova ayai kukumbuka kuti iye atiyebwa. Koma timbakumbukire bzomwe Yahova akucita pakutithandiza kupirira. Ndipo cinango n’cakuti m’bale wathu akatiphonyera tin’funika kupitiriza kumufuna na kumulekerera bzomwe aphonyabzo. w22.11 21 ¶4

Mpolofeta Daniyeli adawona masomphenya yakulatiza padeca kuti Yahova ni Mulungu Mkululetu kuposa atongi wentse wa maboma ya wanthu. Pakuyamba, Daniyeli adawona bzirombo bzinai bzomwe ni mautongi manai yamphanvu pa dziko lentse. Mautongi yamweya ni Babiloniya, Mediya na Perisi, Gresiya, Roma na utongi bwa ntsiku zino bwa Anglo-Americana. (Dan. 7:1-3, 17) Ndipo Daniyeli adawona Yahova Mulungu adakhala pa mpando wa umambo mu nyumba ya mphala kudzulu. (Dan. 7:9, 10) Mulungu adatenga utongi bwa maboma ya pa dziko lentse la pantsi acibupereka kwa wanthu winango omwe adathemera kutonga. Kodi wanthu amwewa mbani? Iye adabupereka kwa ‘omwe akhawoneka ninga mwana wa munthu,’ omwe ni Jezu Kristu, na kwa “wakucena wa Mulungu Mkululetu,” omwe ni wa 144 000 omwe an’dzatonga “mpaka kale-kale.” (Dan. 7:13, 14, 18) Bzimwebzi bzikulatiza kuti Yahova ni “Mulungu Mkululetu.” Bzinthu bzomwe Daniyeli adawona m’masomphenya bzikundendemerana na bzinthu bzomwe iye akhadalewa kale. Daniyeli adalewa kuti: “Mulungu wa kudzulu ambacosa amambo m’mipando yawo aciikha winango.” — Dan. 2:19-21. w22.10 14-15 ¶9-11