Abril

Bzibvunzeni kuti: ‘Kodi nimbacita ciyani ndikapasidwa malango? Kodi nimbazindikira kuphonya kwangu, ayai nimbanyang’ana mathangwe kuti ndilambe malangoyo? Kodi nimbapasa mulandu wanthu winango?’ Mukambawerenga m’Bibliya nkhani za wanthu wakukhulupirika, onani bzomwe iwo adacita kuti akwanise kulimbana na mabvuto yawo. Mbabzibvunzani kuti: ‘Kodi n’ciyani comwe ningacite kuti nditewezere mtumiki wakukhulupirika wa Yahovayu?’ Ifepano tingapfunzembo mwa kumbawona bzomwe Akristau anzathu akucita. Kodi pana m’bale ayai mpfumakazi ya m’gwere mwanu yomwe ikupitiriza kukhala yakukhulupirika napo kuti wanthu ambayezera kuipumpsa, adzinza wace ambayezera kuiletsa kutumikira Yahova ayai imbaduwala-duwala? Kodi pana m’bale ayai mpfumakazi yomwe ina makhalidwe yabwino kwene-kwene yomwe imwepo mun’funambo kukhala nayo? Mukambawona bzinthu bzabwino bzomwe abale na mpfumakazi ambacita, imwepo mungapfunze bzinthu bzakusiyana-siyana bzomwe bzingakuthandizeni kupirira. Ifepano timbatenda kwene-kwene abale na mpfumakazi amwewa, omwe ambalatiza makhalidwe yabwino kuti ifepano tiwatewezere! — Aheb. 13:7. w22.04 13 ¶13-14

Tikakhala tikugumana na mabvuto pa moyo wathu, mkulu wa gwere angabwere ku mui kwathu acidzatitsangalaza. Ndipo timbakomedwambo bzikakhala kuti mpainiya waluso abvuma kuyenda nafe pabodzi kukacitisa pfunziro, acitifotokozera nfundo zinango zomwe zingatithandize kucitisa bwino pfunzirolo. Abale na mpfumakazi wentsenewa ambakomedwa kwene-kwene thangwe ra kutithandiza. Ifepano tingakhalembo wakukondwa tikambabzipereka kuti tithandize abale wathu. Tsono n’ciyani comwe cingakuthandizeni penu mukufunambo kucita bzizinji pakutumikira Yahova? Sankhulaniretu cinthu comwe mukufuna kucita. Lekani kundokumbuka kuti, ‘ndikufuna kucita bzizinji m’gwere.’ Thangwe bzingakhale bzakunesa kuna imwepo kudziwa bzomwe mun’funika kucita kuti mukwanise bzomwe mukufunabzo. Ndipopa mpsakufunika kuti musankhuliretu cinthu comwe mukufuna kucita. Ndipo nthawe zinango bzingakhale bwino kunemba bzomwe mukufuna kucitabzo na kuwona momwe mungacitire. w22.04 25 ¶12-13

Yahova akukonkhanisa kale “thimu likulu” la wanthu kuti adzakhale nzika za Umambo bwa Mulungu. (Apok. 7:9, 10) N’cadidi kuti iwo akukhala mu dziko lomwe mukucitika nkhondo, koma akupitiriza kukhala wakubverana napo kuti ambakhala m’madziko yakusiyana, mbamadzinza yakusiyana ndipo ana makhalidwe yakusiyana. Makhalidwe yawo yakulatiza kuti adasula bzifuzo bza nkhondo acibzisandusa mapaza. (Mik. 4:3) Iwo ambamenya lini nkhondo, koma ambapfunzisa wanthu bzomwe Mulungu akufuna kuti awathandize kudzakhala na “moyo caiwo.” (1 Tim. 6:19) Nthawe zinango, adzinza wawo angawaseke ayai iwo angabonere na kusauka thangwe ra kuthandizira Umambo bwa Mulungu. Tsono Yahova ambawathandiza mwa kuwapasa bzinthu bzakufunikira. (Mat. 6:25, 30-33; Luk. 18:29, 30) Bzentsenebzi bzikulatiza kuti Umambo bwa Mulungu bulipodi ndipo bun’pitiriza kucita bzomwe Yahova akufuna. w22.12 5 ¶13

Mpaka kuphampha kwa magole 1000 wanthu wentse omwe an’dzakhala na moyo pantsi pano an’dzakhala wakulungama. Palibe munthu omwe an’dzakhala pomwe na pikado yomwe tidatambira kucokera kwa Adamu. (Aro. 5:12) Pikado yentse yomwe tidatambira kwa Adamu in’dzacosedwa. Ndipopa mpaka kuphampha kwa magole 1000, wanthu wentse omwe an’dzakhala pomwe na moyo an’dzakhala wakulungamiratu. (Apok. 20:5) Tikudziwa kuti Jezu adapitiriza kukhala wakukhulupirika kwa Mulungu napo kuti Sathani adayezera kumupumpsa. Tsono, kodi wanthu wakulungama an’dzakwanisa kukhala wakukhulupirika kwa Yahova pomwe Sathani an’dzayezera kuwapumpsa? Ali-wentse wa ifepano an’funika kudzalatiza kukhulupirika kwace kwa Yahova pomwe Sathani an’dzatsudzulidwa ku ciphompho kuphampha kwa magole 1000. (Apok. 20:7) Wanthu omwe an’dzapitiriza kukhala wakukhulupirika pa nthawe yakumalizirayi an’dzatambira moyo wakusaya kumala ndipo an’dzapfatsa na mtendere caiwo. (Aro. 8:21) Tsono wanthu omwe an’dzapandukira Yahova, an’dzapfudzidwa. — Apok. 20:8-10. w22.05 19 ¶18-19

Bzomwe polofesiyayi idalewa bzidacitika pomwe Sathani adacitisa kuti Adjuda pabodzi na Aroma aphe Mwana wa Mulungu. (Luk. 23:13, 20-24) Munthu akapwetekeka katende angatazire kufamba mpaka cironda cace kupola. Mpsibodzi-bodzimbo na bzomwe bzidacitikira Jezu. Pomwe iye adaphedwa aciikhidwa m’thenje, alibe kukwanisa kucita cinthu ciri-centse mkati mwa ntsiku zitatu. (Mat. 16:21) Jezu akhafunika kulamusidwa kwa anyakufa kuti polofesiya ya pa Genesesi 3:15 ikwanisike. Thangwe ranyi tikulewa tenepoyo? Thangwe polofesiyayi ikhadaleweratu kuti mbeu ya mkazi ingadadzatsotola msolo wa nyoka. Bzimwebzi bzin’funa kulewa kuti cironda comwe cikhali pa katende wa mbeuyi cikhafunika kupola. Ndipo ndibzo bzomwe bzidacitika. Pa ntsiku yacitatu, Jezu adalamusidwa kwa anyakufa ndipo adakhala na thupi lauzimu lomwe limbafa lini. Ndipo ikadzakwana nthawe yomwe Mulungu akufuna kuti Jezu adzatsotole msolo wa Sathani, Jezuyo an’dzacita bzimwebzo. (Aheb. 2:14) Akristau wakudzozedwa omwe an’dzatonga na Kristu, an’dzaphata naye basa pabodzi pakupfudza anyamadulanthaka wa Mulungu omwe ali pantsi pano, omwe ambacita mbali ya mbeu ya nyoka. — Apok. 17:14; 20:4, 10. w22.07 16 ¶11-12

Abereki, thandizani wana wanu kukhala na axamwali wabwino. Fala la Mulungu limbalewa mwakubveka bwino kuti axamwali wathu angaticitise kukhala wanthu wabwino ayai wakuipa. Kodi imwepo mumbawadziwa axamwali wa wana wanu. Kodi n’ciyani comwe mungacite kuti muthandize wana wanu kukhala na axamwali omwe ambafunambo Yahova? (1 Ako. 15:33) Imwepo mungawathandize kukhala na axamwali wabwino mwa kucemera wale omwe mbaxamwali wa Yahova kuti ambadzaceze namwe na kumbadzacezambo na wana wanu kumui kwanu. (Sal. 119:63) Pai wakucemeredwa Tony adafotokoza kuti: “Papita magole mazinji, inepano na mkazangu tikumbacemera abale na mpfumakazi wa misinkhu yakusiyana-siyana na wakucokera m’madziko yakusiyana-siyana kuti adzaceze kumui kwathu. Iwo ambadya nafe pabodzi na kucita nafe kunamata kwa pa banja. Bzimwebzi ni bzinthu bzabwino kwene-kwene bzomwe timbacita kuti tidziwe abale na mpfumakazi omwe ambafuna Yahova na kumutumikira mwakukondwa. Wana wathu ambapfunza bzizinji na bzomwe abalewa ambafotokoza, kukhulupirika kwawo na nyongo yomwe ambacita pakutumikira Yahova. Wentsenewa adathandiza wana wathu kukhala pa uxamwali bwakulimba na Yahova.” w22.05 29-30 ¶14-15

Pomwe akulu akutonga Mkristau omwe wacita pikado ikulu, bzomwe iwo ambafuna ni kucita cinthu comwe cimbakhala cacitidwa kale kudzulu. Kodi gwere limbagumana tani phindu na bzimwebzi? Kucita bzimwebzi kumbabweresa phindu kuna gwere, thangwe bzimbacitisa kuti akulu aleke kusiya munthu omwe wacita pikado acisaya kukungula kukhala m’gwere. Munthuyo akapitiriza kukhala m’gwere, angadzonge winango. (1 Ako. 5:6, 7, 11-13; Tito 3:10, 11) Ndipo bzimwebzi bzimbathandizambo munthu omwe wacita pikadoyo kuti akungule acilekereredwa na Yahova. (Luk. 5:32) Akulu ambapempherera munthu omwe wakungula ndipo ambakumbira Yahova kuti amuthandize kukhala pomwe pa uxamwali na iye. (Tiy. 5:15) Tiyezezere kuti munthu omwe wacita pikado, alibe kukungula pomwe akulu akhaceza naye. Bzimwebzi bzikacitika, iye ambacosedwa m’gwere. Tsono, munthuyo akakungula na mtima wentse, acibwerera kwa Yahova, iye ambamulekerera na mtima wentse. (Luk. 15:17-24) Ndipo ambacita bzimwebzi napo kuti munthuyo adacita pikado ikulu kwene-kwene. — 2 Nkha. 33:9, 12, 13; 1 Tim. 1:15. w22.06 9 ¶5-6

Pa dziko lentse la pantsi Akristau akukwanisa kukunda mabvuto yakucokera kwa Dyabu, thangwe Yahova ambawathandiza. (1 Ped. 5:9) Imwepo mungakwanisembo. Tsapanopapa Yahova an’phatisa basa Jezu pabodzi na anyakudzozedwa “kuti apfudze mabasa ya Dyabu.” (1 Juw. 3:8) Bzimwebzi bzikadzacitika, wanthu wa Mulungu an’dzamutumikira pa dziko la pantsi ‘mwakusaya kugopa cinthu ciri-centse.’ (Zai. 54:14; Mik. 4:4) Pomwe nthawe imweyi ikanati kufika, tin’funika kucita ciri-centse kuti tikunde mantha. Ifepano tin’funika kulimbisa cikhulupiro cathu cakuti Yahova ambafuna na kukhotcerera atumiki wace. Comwe cingatithandize kucita bzimwebzi, ndico kumbakumbukira na kucezerana bzomwe Yahova adacita kuti akhotcerere wanthu wace m’mbuyomu. Ndipo tingakumbukirembo bzomwe iye adaticitira pomwe tikhagumana na mabvuto. Mwakuthandizidwa na Yahova, ifepano tingakwanise kukunda mantha! — Sal. 34:4. w22.06 19 ¶19-20

Utongi bwamphanvu bumbayezezeredwa na “nzayo za simbi yakusanganizikana na dongo.” Ndipo utongibu bukutonga kale. Ibo budayamba kuwonekera pa nthawe ya Nkhondo Yakuyamba ya pa Dziko Lentse, pomwe maboma ya Grã-Bretanha na Estados Unidos yadabverana yaciyamba kucitira bzinthu pabodzi. Mbverano umweyu umbadziwika na dzina lakuti Anglo-Americana. Cifanikiso comwe Nabukadinazori adawona m’matulo cikulatizambo kuti utongi bwamphanvu pa dziko lentse bwakumalizira bungadadzakhala bwakusiyana na mautongi yanango yomwe yadapita m’mbuyomu. Utongi bumwebu n’bwakusiyana na mautongi yentse yomwe yambafotokozedwa mu polofesiyayi, thangwe mautongi ya m’mbuyomu yakhayezezeredwa na bzinthu bzakulimba ninga oro ayai prata. Tsono mbverano wa Anglo-Americana umbayezezeredwa na simbi yakusanganizikana na dongo. Dongolo ni wanthu wakusiyana-siyana omwe ambatongedwa na umambobu. (Dan. 2:43) Ntsiku zino, bzikucita kuwonekeratu padeca kuti wanthuwa ambatazisa atsogoleri wa utongibu kucita bzentse bzomwe akufuna, thangwe iwo ambacita mavoti, kucita makampanya yakukhotcerera ufulu bwa wanthu na kucita greve. w22.07 4-5 ¶9-10

Kodi imwepo mukuzeza kubatizidwa? Penu ndibzo, mungacite bwino kubzibvunza kuti: “N’ciyani cikunditazisa kuti ndibatizidwe?” (Mab. 8:36) Jezu adayezezera kucita bzomwe Baba wace ambafuna na cakudya. Thangwe ranyi? Cakudya n’cabwino kwa ifepano. Jezu akhadziwa kuti bzentse bzomwe Yahova ambatiuza kuti ticite mpsabwino kwa ifepano. Yahova angatiuze lini kuti ticite cinthu cakuipa. Kodi bzomwe Yahova akufuna mpsakuti imwepo mubatizidwe? Inde. (Mab. 2:38) Penu imwepo mungazeze lini kudya cakudya cakukoma, thangwe ranyi mukuzeza kubatizidwa? Imwepo mukabatizidwa, dziwani kuti mun’dzagumana phindu likulu kwene-kwene. Thangwe ranyi wanthu winango ambazeza kubatizidwa? Azinji ambatawira kuti: “Ndikanati kukonzeka.” Kusankhula kubzipereka kwa Yahova na kubatizidwa ni cinthu cakufunika kwene-kwene. Ndipopa mun’funika kuikumbukira bwino nkhani imweyi. w23.03 7 ¶18-20

Pomwe adadzozedwa, Jezu adakhala mbali yakuyambirira ya mbeu ya mkazi. Ndipo pomwe iye adalamusidwa, adapasidwa “ulemerero na citumbizo” na “utongi bwentse, kudzulu na pa dziko la pantsi,” pabodzi na mphanvu za ‘kupfudza mabasa ya Dyabu.’ (Aheb. 2:7; Mat. 28:18; 1 Juw. 3:8) Tsono iripombo mbali yaciwiri ya mbeu ya mkazi. Mpostolo Paulo adalewa bza mbali ya mbeu imweyi pomwe akhauza Akristau wakudzozedwa omwe akhali Adjuda na omwe akhali lini Adjuda kuti: “Penu ndimwe wa Kristu, ndimwedi wana wa Abalahamu, wakutambira utaka mwakubverana na lumbiro.” (Agal. 3:28, 29) Yahova akadzoza Mkristau na mzimu wakucena, iye ambacita mbali ya mbeu ya mkazi. Ndipopa omwe ambacita mbali ya mbeu ya mkaziyu ni Jezu Kristu pabodzi na amambo wakukwana 144 000. (Apok. 14:1) Wentsenewa ambatewezera makhalidwe ya Baba wawo omwe ni Yahova Mulungu. w22.07 16 ¶8-9

Pakuti tikukhala mu ntsiku zakumalizira, tin’pitiriza kugumana na mabvuto. (2 Tim. 3:1) Bzimwebzi bzikacitika, ifepano tingacite thupo ndipo tingawofoke. Bzimwebzi bzingacitike maka-maka pomwe mabvutoyo yakakhala yakubwera pafupi-pafupi. Tsono, kumbukirani kuti maso ya Yahova yali pa ifepano, ndipo iye an’dzatithandiza kukhala wakulimba pomwe tikugumana na mabvuto. Kumbukirani momwe Yahova adathandizira Djobi, omwe akhali munthu wakukhulupirika. Djobi adagumana na mabvuto mazinji mwakamphindiza. Pomwe akhadikhirira lini, adabva kuti bzifuwo bzace bzabewa ndipo anyabasa wace aphewa. Pomwe padandopita mphindi pang’ono, adabva kuti wana wace wentse afa. Pomwe iye adabva bzimwebzi, adawawidwa kwene-kwene. (Djob. 1:13-19) Ndipo pomwe akhalira bzifuwo bzace na wana wace, iye adayamba kuduwala matenda yakuwawa kwene-kwene. (Djob. 2:7) Maso ya Yahova yakhali pa Djobi. Pakuti Yahova akhamufuna kwene-kwene Djobi, iye adamupasa bzomwe akhafunikira kuti apirire mabvuto yomwe akhagumana nayoyo. w22.08 11 ¶8-10

Kutsimulidwa kumbawawa. Tikapasidwa malango, tingayambe kuwona ninga kuti malangoyo ngakufunika lini kwa ifepano ayai yalemwa. Ndipo bzimwebzi bzingatitazise kuwona kuti malangoyo yakulatiza kuti Yahova ambatifuna. (Aheb. 12:5, 11) Bvumani malango mucicinja makhalidwe yanu. Nthawe zinango, Jezu adatsimula Pedru patsogolo pa apostolo anzace. (Mar. 8:33; Luk. 22:31-34) Pinango Pedru akhabva manyazi. Tsono iye adapitiriza kukhala wakukhulupirika kwa Jezu. Iye adabvuma malango yomwe adapasidwa ndipo adapfunza na kuphonya kwace. Ndipopa Yahova adabaira Pedru ndipo adamupasa basa lakufunika kwene-kwene mu gwere. (Juw. 21:15-17; Mab. 10:24-33; 1 Ped. 1:1) Tikupfunza kuti bzinthu bzimbatifambira bwino tikabvuma malango ticicinja makhalidwe yathu. Ndipo tin’funikambo lini kumbakumbuka kuti wanthu an’tiwona tani tikatsimulidwa. Tikacita bzimwebzi, tin’dzakhala wanthu wakufunika kwene-kwene kwa Yahova na kwa abale wathu. w22.11 21-22 ¶6-7

Abulahamu akhadziwa kuti Yahova angadacita lini cinthu cakusaya kulungama. Mpostolo Paulo adalewa kuti Abalahamu akhadziwa kuti Yahova angadalamusa mwana wace Izaki. (Aheb. 11:17-19) Ndipo cinango n’cakuti, Yahova akhadalewa kale kuti Izaki angadadzakhala pai wa mtundu ukulu, koma pa nthawe imweyi Izaki akhalibe wana. Abalahamu akhafuna kwene-kwene Yahova, ndipopa iye adakhulupira kuti Baba wace angadacita bzinthu bzakulungama. Iye adabvera Yahova napo pa nthawe yakunesa thangwe rakuti akhamukhulupira. (Gen. 22:1-12) Kodi tingatewezere tani Abalahamu? Tingatewezere Abalahamu mwa kupitiriza kupfunza bza Yahova. Tikacita bzimwebzi, ifepano tin’dzamudziwa bwino Yahovayo ndipo tin’dzamufuna kwene-kwene. (Sal. 73:28) Ndipo tin’dzapfunzisa nzeru zathu na mtima wathu kuti timbakumbuke ninga Mulungu. (Aheb. 5:14) Munthu akatipumpsa kuti ticite bzinthu bzakuipa, ifepano tin’dzalamba. Ndipo ne tin’dzakumbukira lini kucita cinthu comwe cingaipire Baba wathu wa kudzulu ayai kudzonga uxamwali bwathu na iye. w22.08 28-29 ¶11-12

Pomwe mpostolo Paulo pabodzi na Barnaba adazungira kaciwiri mizinda ya Listra, Ikoniyo na Antiyokiya, “adaikha akulu mu gwere liri-lentse.” (Mab. 14:21-23) Amuna omwe adasankhulidwawo adakwanisa kutsangalaza bwino gwere ninga momwe ambacitira akulu wa gwere ntsiku zino. Mpostolo Paulo adakumbusa Akristau anzace kuti ‘mtambo ukulu wa mboni’ udakwanisa kupirira mabvuto yakusiyana-siyana na thandizo la Yahova. (Aheb. 12:1) Paulo akhadziwa kuti kukumbukira moyo wa atumiki wa Yahova wakale-kale, omwe adapirira mabvuto yakusiyana-siyana, kungadathandiza abale wace wacikristau kukhala wanthu wakukhwimika na kupitiriza kumbakumbukira “mzinda wa Mulungu wamoyo.” (Aheb. 12:22) Mpsibodzi-bodzimbo na nthawe zathu zino. Tentsenefe timbalimbikisidwa kwene-kwene tikambakumbukira momwe Yahova adathandizira Gidiyoni, Baraki, Davide, Samuyeli na wanthu azinji kukunda mabvuto yakusiyana-siyana. — Aheb. 11:32-35. w22.08 21-22 ¶5-6

Kodi wanthu omwe an’dzalamusidwa an’dzatongedwa thangwe ra “bzicito” bziponi? Kodi bzin’dzakhala bzinthu bzomwe adacita pomwe akhanati kufa? Ne! Kumbukirani kuti Bibliya limbalewa kuti munthu akafa pikado zace zimbalekereredwa. Ndipopa, “bzicito” bzawobzo ni bzinthu lini bzomwe adacita pomwe akhanati kufa. Koma ni bzinthu bzomwe iwo an’dzacita akadzapfunzisidwa malamulo ya Mulungu mu dziko lipsa. Ndipo atumikimbo wakukhulupirika wa Yahova ninga Nowa, Samuyeli, Davide na Daniyeli an’dzafunikambo kupfunzisidwa bza Jezu Kristu na ntsembe ya cakulombolera yomwe iye adapereka. Bzimwebzi bzikulatiza kuti wanthu wakusaya kulungama an’dzakhala na bzizinji kuti apfunze! Kodi n’ciyani cin’dzacitikira wanthu omwe an’dzalamba kuphatisa basa bzomwe an’dzapfunzisidwa? Apokalipse 20:15 ambatiuza kuti: “Ali-wentse omwe dzina lace liribe kugumanika mu bukhu la moyo, adathusidwambo mu thawale la moto.” Bzimwebzi bzin’funa kulewa kuti iwo an’dzapfudzidwa ndipo an’dzawoneka lini pomwe. Ndipopa mpsakufunika kwene-kwene kuti tentsenefe tiwonesese kuti dzina lathu lidanembedwa mu bukhu la moyo ndipo lipitirize kukhala m’mwemo! w22.09 19 ¶17-19

Timbateweza mitemo ya m’Bibliya tikafuna kucita bzakusankhula pa kulewa bza thanzi lathu na kuikhidwa mulopa. (1 Tim. 3:9) Tikafuna kuuzambo anzathu bzomwe tasankhula, tin’funika kumbakumbukira mafala ya pa Afilipi 4:5, yomwe yambati: “Citisani kuti wanthu wentse awone kuti imwepo mumbangingimira lini nzeru zanu.” Penu ifepano timbawona bzinthu mwakuthemera, tin’dzacita lini thupo kwene-kwene na thanzi lathu; Ifepano timbafuna na kulemekeza abale na mpfumakazi zathu, napo acisankhula bzinthu bzakusiyana na bzomwe ifepano tasankhula. (Aro. 14:10-12) Timbalatiza kuti timbatenda Yahova, omwe ni Mwenekaciro wa moyo, tikambakhotcerera moyo wathu na kucita bzinthu bzomwe bzingamukondwese. (Apok. 4:11) Pakuti tiri mu dziko lakuipa, ifepano tin’pitiriza kubonera na matenda pabodzi na malengwa ya pantsi. Tsono bzimwebzi ndibzo lini bzomwe Mulengi wathu akhafuna kwa ifepano. Tsapanopali, iye an’tipasa moyo wabwino ndipo tin’dzaduwala lini pomwe ne kufa. (Apok. 21:4) Pomwe nthawe imweyi ikanati kufika, mpsabwino kwene-kwene kukhala na moyo ticitumikira Baba wathu wa kudzulu, Yahova! w23.02 25 ¶17-18

Kuyambira kale-kale, Yahova akulatiza kuti ana mphanvu yakutonga maboma ya wanthu. (Aro. 13:1) Mbatiwoneni nkhani zitatu zomwe zikulatiza bzimwebzi. Farawo wa ku Edjipito akhaboneresa wanthu wa Yahova ndipo akhalamba kuwatsudzula. Tsono Mulungu adawatsudzula ku ukapolo ndipo adacitisa kuti Farawoyo afe mu Nyanza Ifuira. (Eki. 14:26-28; Sal. 136:15) Mambo Belisazari wa ku Babiloniya adayamba kubzilemekeza yekha sikuti “kulemekeza Mbuya wa kudzulu” ndipo iye “adatumbiza mirungu ya prata na oro” sikuti kutumbiza Yahova. (Dan. 5:22, 23) Tsono Mulungu adamunyazisa. Pa “usiku bubodzi-bodzibo,” Belisazari adaphedwa ndipo umambo bwace budaperekedwa kwa Amediya na Aperisi. (Dan. 5: 30, 31) Mambo Herode Agripa Wakuyamba wa ku Palestina adapha mpostolo Tiyago ndipo adamanga mpostolo Pedru kuti adzamuphembo. Tsono Yahova adacitisa kuti bzomwe Herodeyo akhafuna bzireke kucitika. “Anjo wa Yahova adacitisa kuti iye aduwale,” ndipo adafa. — Mab. 12:1-5, 21-23. w22.10 15 ¶12

Tikambawerenga bzomwe Yahova adacita kuti athandize wanthu wakukhulupirika wakale-kale, cidikhiro cathu cin’dzakhala camphanvu kwene-kwene. Tin’funika kukumbukira kuti bzinthu bzentse bzomwe bziri m’Fala la Mulungu “bzidanembedwa kuti bzitipfunzise, ndipo tina cidikhiro thangwe ra kupirira kwathu na cilimbiso cakucokera m’Bzinembo.” (Aro. 15:4) Kumbukirani kuti Yahova ambacita bzomwe ambalewa. Onani bzomwe bzidacitikira Abalahamu na Sara. Iwo adapfitsa msinkhu omwe bzingadakwanisika lini kubereka mwana. Koma Mulungu adawauza kuti iwo angadakhala na mwana. (Gen. 18:10) Kodi n’ciyani comwe Abalahamu adacita? Bibliya limbati: “Iye [adakhala na] cikhulupiro cakuti angadakhala pai wa wanthu wa mitundu izinji.” (Aro. 4:18) Abalahamu akhadziwa lini kuti Mulungu angadacita tani kuti bzimwebzi bzikwanisike. Napo bzikhali tenepo, iye akhakhulupira kuti Mulungu angadamupasa mwana. Ndipo bzimwebzi bzidacitikadi. (Aro. 4:19-21) Nkhani ninga zimwezi zikutipfunzisa kuti nthawe zentse timbakhulupire kuti Yahova ambacita bzomwe ambalewa. w22.10 27 ¶13-14

Bzomwe polofesiyayi imbalewa bzidadzacitikadi pomwe Adjuda adacoka ku Babiloniya. Yahova adalatiza kuti ni Mpfunzisi Mkululetu kwa iwo. Ndipo na thandizo lace, wanthuwo adakwanisa kubwezeresa kunamata kwacadidi. Ntsiku zinombo, ifepano timbakomedwa thangwe ra kudziwa kuti Yahova ni Mpfunzisi wathu Mkululetu. Zaiya adalewa kuti ifepano tiri ninga anyakupfunza omwe akupfunzisidwa na Yahova. Iye adalewa kuti: “Maso yanu yan’dzayamba kumbamuwona Mpfunzisi wanu Mkululetu.” Mafala ya Zaiyaya yakulatiza kuti Mpfunzisiyu an’dzakhala ninga adaima kutsogolo kwa anyakupfunza wace. Ifepano timbagumana phindu na bzomwe Yahova ambatipfunzisa ntsiku zino. Kodi iye ambatipfunzisa tani? Mwakuphatisa basa gulu lace. Ndipo timbatenda Yahova thangwe ra malango yomwe timbatambira. Malango yomwe timbatambira pa mitsonkhano, m’mabukhu yathu, m’mavidiyo na bzinthu bzinango yambatithandiza kupirira mabvuto na kukhala wakukondwa. w22.11 10 ¶8-9

Pakulewa bza nthawe ya cimaliziro mu nthawe ya Adjuda na cizindikiro “cakumala kwa dzikoli” mu nthawe yathu ino, Jezu adati: “Pakulewa bza ntsikuyo ayai nthawe yace palibe omwe akudziwa, ne anjo wa kudzulu ne Mwana, koma Baba yekha basi.” Ndipo patsogolo pace, iye adacenjeza anyakupfunza wace kuti ‘apitirize kukhala tceru na kupitiriza kukhala adapenya.’ (Mar. 13:32-37) Akristau wakuyambirira omwe akhali Adjuda akhafunika kukhala tceru kuti apulumuke. Jezu adauza ateweri wace bzizindikiro bzakulatiza kuti mzinda wa Jeruzalemu wasala pang’ono kupfudzidwa. Iye adawauza kuti: “Mukadzawona Jeruzalemu wazunguliridwa na acikunda, mudzadziwe kuti wasala pang’ono kupfudzidwa.” Pa nthawe imweyi, iwo akhafunika kudzacita bzomwe Jezu adawauza; iwo akhafunika “[kudzathawira] ku mapiri.” (Luk. 21:20, 21) Wanthu omwe adabvera malango ya Jezuya adapulumuka pomwe Aroma adapfudza mzinda wa Jeruzalemu. Ifepano tikukhala mu ntsiku zakumalizira za dziko lakuipali. Ndipopa tin’funikambo kukhala na nzeru ndipo tin’funikambo kukhala tceru. w23.02 14 ¶1-2; 16 ¶3

Yahova ambapfunzisa atumiki wace kuti akhale wakukhulupirika na wakulungama. Bzimwebzi bzimbacitisa kuti iwo akhale wakukondwa. (Mim. 13:5, 6) Kodi Yahova adakucitiranimbo kale bzimwebzi pomwe imwepo mukhapfunza Bibliya? Imwepo mudapfunza kuti bzomwe Mulungu ambacita mpsabwino kwa wanthu wentse. (Sal. 77:13) Ndipopa imwepo mumbafuna kucita bzomwe Mulunguyo ambafuna. (Mat. 6:33) Imwepo mumbafuna kukhotcerera cadidi na kulatiza kuti bzomwe Sathani ambalewa mpsakunama. Tsono kodi mungacite tani bzimwebzi? Imwepo mungasankhule kulamba kutetekera Sathani mucifuna cadidi. Imwepo muna mphanvu yakulewa kuti: ‘Nin’funa lini kutetekera Sathani, koma ndikufuna kuphatisisa cadidi. Ndikufuna kuti Yahova akhale Mtongi wangu, ndipo ndikufuna kucita bzinthu bzomwe iye ambalewa kuti mpsabwino.’ Kodi mungacite tani bzimwebzi? Mungacite bzimwebzi mwa kucita mpembo kwa Yahova mucibzipereka. Ndipo mukamala mungabatizidwe kuti wanthu wentse adziwe kuti mwabzipereka kwa iye. Kufuna cadidi na cirungamo ndiko kungakucitiseni kuti mubatizidwe. w23.03 3 ¶4-5

Ulipo mtendere unango omwe wanthu azinji m’dzikoli ambaudziwa lini. Umweyu ni ‘mtendere wa Mulungu’ ndipo mtendere umweyu timbakhala nawo tikakhala tiri pa uxamwali na Baba wathu wa kudzulu. Tikakhala pa mtendere na Mulungu timbabva kuti ndife wakukhotcerereka. (Afil. 4:6, 7) Mtendere wa moda umweyu umbaticitisambo kuti tibverane na wanthu omwe ambafuna Mulungu. Ndipo timbakhalambo pa uxamwali bwa ponda ndipondembo na ‘Mulungu wathu wa mtendere.’ (1 Ates. 5:23) Tikamudziwa bwino Yahova, kumukhulupira na kumubvera, iye ambatipasa mtendere omwe umbatithandiza kukhala wakuderekha pomwe tikugumana na mabvuto. Kodi mpsakukwanisika kukhala na mtendere wa Mulungu tikakhala tikugumana na mabvuto ninga matenda, malengwa ya pantsi, nkhondo ayai kuzunzidwa? Tikudziwa kuti munthu ali-wentse ambacita thupo na mabvuto yamweya. Abale na mpfumakazi zizinji ambateweza malango ya Jezuya ninga momwe vesi la lero likulatizira. Na thandizo la Yahova, iwo akupitiriza kukhala na mtendere napo kuti akugumana na mabvuto makulu. w22.12 16 ¶1-2

Ifepano tingatazise lini kuti bzinthu bzakusaya kudikhiririka bzicitike pa moyo wathu. Ndipopa tin’funika kutcenkha kumbakumbuka kuti Yahova ambatifuna thangwe ra utumiki bwathu, ndipo tin’funikambo kumbatcenkha kumbandendemezera utumiki bomwe tikucita na bomwe anzathu akucita. (Agal. 6:4) Ndipo mpsakufunikambo kuwona bzomwe tingacite kuti tithandize anzathu na kupitiriza kutumikira Yahova. Imwepo mun’dzakwanisa kucita bzizinji pakutumikira Yahova, mukasaya kufuna bzinthu bzizinji pa moyo wanu na kutcenkha mangawa. Imwepo mukacita bzinthu bzing’ono-bzing’ono, bzin’dzakuthandizani kucita bzinthu bzikulu-bzikulu. Tiyezezere kuti mukufuna kukhala mpainiya wakukhazikika, mun’sairanyi kubakayamba kucita upainiya bwakuthandiza mwezi uli-wentse? Penu mun’funa kukhala mtumiki wakuthandiza, bzingakhale lini bwino kumbamala nthawe izinji muli mu utumiki? Bzomwe mungapfunze pakali pano, bzin’dzakuthandizani kucita bwino utumiki bwanu kutsogolo. Ndipopa khalani wakutsimikiza kucita bzentse bzomwe mungakwanise pa utumiki bomwe mwapasidwa. w22.04 26 ¶16-17

Yahova angatithandize kulimbana na mabvuto ya pa moyo na kukondwa pa basa lathu lakupambulika. Tikauza Yahova bzomwe bzikuticitisa thupo, cinthu cakuyamba comwe angacite cingakhale kutipasa mphanvu kuti tikwanise kupirira. Penu bvutolo likumala lini, tin’funika kupitiriza kukumbira Yahova mphanvu. Ndipo iye ambatiuza kuti ticite bzimwebzo. Mafala ya pa Zaiya 62:7 yakubvekesa bwino nfundo imweyi. Iyo yambati: “Pitirizani kumukumbusa [Yahova].” Kodi mafala yamweya yan’funa kulewanyi? Mafalaya yakutikumbusambo nkhani ya mpembo yomwe Jezu adaifotokoza pa Luka 11:8-10, 13. Pa mavesi yamweya, Jezu adalewa kuti tin’funika ‘kupitiriza kukumbira’ mzimu wakucena. Ifepano tingakumbirembo Yahova kuti atithandize kucita bzinthu bzabwino. w22.11 8 ¶1; 9 ¶6-7

Imwepo na banja lanu mungakonzekereretu cizunzo. Tsono lekani kukumbukiriratu mabvuto yomwe pinango mungadzagumane. Koma limbisani uxamwali bwanu na Yahova ndipo thandizani wana wanu kucitambo bzibodzi-bodzibzi. Mukabzibva kuti muna thupo, pembani kwa Yahova na mtima wanu wentse. (Sal. 62:7, 8) Ndipo khalani na nthawe yakucezerana kuti thangwe ranyi mun’funika kuthemba Yahova. Ninga momwe tingakonzekereretu malengwa ya pantsi, tikakonzekereratu cizunzo comwe cikubwera kutsogolo, tin’dzapfunzisa wana wathu kuti ambathembembo Yahova. Ndipo cizunzoco cikadzayamba, iwo an’dzakhala wakuderekha na wakugwa mpfuwa. Mtendere wa Mulungu umbaticitisa kubzibva wakukhotcerereka. (Afil. 4:6, 7) Na mtendere umweyu, Yahova ambaderekhesa mtima wathu napo kuti tingabonere na matenda, malengwa ya pantsi ayai kuzunzidwa ntsiku zino. Iye ambaphatisa basa akulu wa nyongo kuti atithandize. Ndipo adapasa ali-wentse wa ifepano mwayi wakuthandiza abale wathu. Mtendere umweyu umbatithandiza kukonzekera mabvuto makulu yomwe tin’gumana nayo kutsogoloku na “citsautso cikulu.” — Mat. 24:21. w22.12 27 ¶17-18

Tin’funikambo kutcenkha kumbabzipasa mulandu thangwe ra pikado zomwe tidacita kale-kale. N’cadidi kuti tin’funika lini ‘kumbacita pikado utowa’ thangwe rakuti Jezu adatifera. (Aheb. 10:26-31) Tsono tikacita pikado, tin’funika kukhulupira kuti tikakungula, ticikumbira Yahova kuti atilekerere na kukumbirambo thandizo kwa akulu ticicinja makhalidwe yathu, Yahova an’dzatilekerera na mtima wentse. (Zai. 55:7; Mab. 3:19) Ntsembe ya cakulombolera ya Jezu ina mphanvu yakucenesa pikado zathu zentse ndipo in’dzacitisa kuti moyo ukhale wakukwanisika m’Paraizo. Moyo m’Paraizomo un’dzakhala wakudekeza kwene-kwene. Mun’dzakhala na wanthu azinji omwe tin’dzafuna kuwadziwa ndipo tin’dzaphata basa labwino kwene-kwene. Tin’dzamudziwa bwino Baba wathu wa kudzulu na kupfatsa na bzinthu bzabwino bzomwe iye an’dzatipasa. Tin’dzakhala na bzinthu bzizinji kuti tipfunze. Ndipo tin’dzadziwambo bzinthu bzizinji bzomwe iye adalenga. w22.12 13 ¶17, 19

‘Mkazi umweyu’ angakhale lini Eva. Thangwe polofesiyayi ikulewa kuti mbeu ya mkazi ‘ingadadzatsotola’ msolo wa nyoka. Nyoka ni Sathani omwe ni cakulengedwa cauzimu. Ndipopa palibe munthu wakuperewera omwe angadadzakwanisa kutsotola msolo wace. Tsono kodi Sathani angadadzapfudzidwa tani? Bukhu lakumalizira la m’Bibliya limbatithandizambo kudziwa mkazi omwe ambafotokozedwa pa Genesesi 3:15. (Apok. 12:1, 2, 5, 10) Mkazi umweyu ali lini ninga akazi wa pantsi pano. Thangwe Bibliya limbalewa kuti iye adaponda mwezi ndipo ana korowa yomwe ina nyenyezi 12 mu msolo mwace. Ndipo iye adakhala na pathupi acibereka mwana omwe mkazi wa pantsi pano angabereke lini. Mwanayo ni Umambo bwa Mulungu. Umambobo ni bwa kudzulu ndipopa tingalewembo kuti mkaziyu ngwa kudzulu. Mkazi umweyi ni mbali ya kudzulu ya gulu la Yahova ndipo omwe ambacita mbali ya gulu limweri ni bzakulengedwa bzauzimu. (Agal. 4:26) Fala la Mulungu limbatithandizambo kudziwa mbali yakuyambirira ya mbeu ya mkazi. Iro limbalewa kuti mbeuyo ingadadzakhala mwana wa Abalahamu. — Gen. 22:15-18. w22.07 15-16 ¶6-8

Mphaso yomwe Yahova adatipasa yomwe ni Bibliya idadzala na malango yace. Malango ya m’Bibliya yakuthandiza wanthu azinji. Bibliya limbacinja moyo wa wanthu. Pomwe mabukhu yakuyambirira ya m’Bibliya yakhanembedwa, Mozeji adauza wanthu wa Mulungu, Ajirayeri, kuti: “Limweri ni fala lini lakusaya cinthu, iro limbathandauza moyo kwa imwepo.” (Deut. 32:47) Wanthu omwe adabvera Fala la Mulungu adakhala na moyo wabwino. (Sal. 1:2, 3) Napo kuti Fala la Mulungu lidanembedwa kale-kale, iro likadapitiriza kuthandiza wanthu ntsiku zino. Malango yomwe timbagumana m’Bibliya yambatithandiza nthawe zentse; iyo yalatiza kuti yana mphanvu yakuthandiza wanthu napo kuti Bibliyalo ndakale-kale. Tikambawerenga bukhu limweri na kumbakumbukira bzomwe tikuwerenga, Mwenekaciro wa bukhuli ambaphatisa basa mzimu wace wakucena kuti atithandize kuphatisa basa bzomwe tikuwerengabzo pa moyo wathu. (Sal. 119:27; Malak. 3:16; Aheb. 4:12) Inde, Mwenekaciro Bibliya, Yahova, akufunisisa kutithandiza. Ndipopa ifepano tin’funika kumbawerenga Bibliya nthawe zentse! w23.02 3 ¶5-6

Kapitulo 13 ya bukhu la Apokalipse imbatiuza kuti msolo waci 7, omwe ni Utongi Bwamphanvu pa Dziko Lentse bwa Grã-Bretanha na América, umbacita bzinthu ninga cirombo comwe cina ‘nyanga ziwiri ninga za mwana wa bira, koma cimbalewalewa ninga cinyoka.’ Ciromboci “cidacita bzakudabwisa bzikulu-bzikulu, mwakuti cidacitisa moto kugwa pa dziko la pantsi kucokera kudzulu wanthu akuwona.” (Apok. 13:11-15) Makapitulo 16 na 19 yambalewambo kuti cirombo cimweci ni “mpolofeta wakunama.” (Apok. 16:13; 19:20) Mpolofeta Daniyeli adalewambo mafala ninga yamweya, pomwe adalewa kuti Utongi Bwamphanvu pa Dziko Lentse bwa Grã-Bretanha na América ‘bungadadzapfudza mwakuti bwerani mudzawone.’ (Dan. 8:19, 23, 24) Bzimwebzi mpsomwe bzidacitika pa Nkhondo Yaciwiri ya pa Dziko Lentse. Masiyentista yomwe yadakonza mabomba mawiri yomwe yadacitisa kuti nkhondoyi imale, yakhali ya ku Grã-Bretanha na ya ku América. Ndipopa tingalewe kuti Utongi Bwamphanvu pa Dziko Lentse bwa Grã-Bretanha na América “[budacitisadi] moto kugwa pa dziko la pantsi kucokera kudzulu.” w22.05 10 ¶9