Maio

Pomwe Juwau adamala kuwona gulu libodzi kudzulu, iye adawona “thimu likulu.” Tsono thimu limweri likhali lakusiyana na la wa 144 000, thangwe ni thimu la wanthu wakusaya kulewengeka. Kodi timbadziwa ciyani bza iwo? Juwau adauzidwa kuti: “Amwewa ni omwe acokera ku citsautso cikulu, iwo afula bzakubvala bzawo bzitali acibzicenesa na mulopa wa Mwana wa Bira.” (Apok. 7:14) Thimu likululi likadzapulumuka pa citsautso cikulu lin’dzakhala pa dziko la pantsi pano ndipo lin’dzatambira bzisimbo bzizinji kwene-kwene. (Sal. 37:9-11, 27-29; Mim. 2:21, 22; Apok. 7:16, 17) Bziribe basa penu tasankhulidwa kuti tikakhale na moyo kudzulu ayai tidzakhale pantsi pano, tentsenefe tin’funika kukhulupira na mtima wentse kuti bzomwe bzidanembedwa pa Apokalipse kapitulo 7 bzin’dzacitikadi. Imweyi in’dzakhala nthawe yakudekeza kwene-kwene kwa magulu mawiri ya atumiki wa Mulunguya. Ifepano tin’dzakomedwa thangwe rakuti tidasankhula kukhala wakukhulupirika ku utongi bwa Yahova. w22.05 16 ¶6-7

Imwepo mukafuna kusankhula bzakucita, mumbapemba kwa Mulungu kuti akupaseni nzeru thangwe rakuti mukufuna nzeruzo. (Tiy. 1:5) Mambo Salomau adanemba kuti: “Nzeru n’cinthu cakufunika kwene-kwene.” (Mim. 4:7) Tsono Salomau akhalewa lini bza nzeru ziri-zentse. Iye akhalewa bza nzeru zakucokera kwa Yahova Mulungu. Tsono, kodi nzeru zakucokera kwa Mulunguzo zingatithandize tikakhala tikugumana na mabvuto ntsiku zino? Inde zingatithandize. Cinthu cibodzi comwe cingatithandize kukhala na nzeru ndico kupfunza na kuphatisa basa malango ya amuna awiri omwe akhali wanzeru kwene-kwene. Wakutoma ni Salomau. Bibliya limbalewa kuti “Mulungu adapasa Salomau nzeru na luso lakudabwisa.” (1 Ama. 4:29) Ndipo waciwiri ni Jezu. Iye akhana nzeru kwene-kwene kuposa munthu ali-wentse. (Mat. 12:42) Pakulewa bza Jezu, Fala la Mulungu likhadalewa kale kuti: “Mzimu wa Yahova un’dzakhala pa iye, mzimu wanzeru na wakubvesesa bzinthu.” — Zai. 11:2. w22.05 20 ¶1-2

Ifepano tingakhale na bzakulinga bzauzimu napo kuti takalamba. Onani bzomwe idacita mpfumakazi Beverley, yomwe ina magole 75. Iyo ikhambaduwala-duwala ndipo ikhaneseka kufamba. Mpfumakaziyi ikhafuna kucita bzizinji pa kampanya ya kucemerera wanthu ku Cikumbuso. Ndipopa iyo idawona bzomwe ingadacita. Pomwe mpfumakazi Beverley idakwanisa bzomwe ikhafuna idakomedwa kwene-kwene. Bzomwe iyo idacitabzi bzidalimbikisa abale na mpfumakazi m’gwere kuti ambacite nyongo mu utumiki. Yahova ambatenda basa lomwe abale na mpfumakazi omwe mbacikulire ambacita, napo kuti angakwanise lini kucita bzinthu bzizinji. (Sal. 71:17) Tsungirani kucita utumiki bomwe mungakwanise. Khalani na makhalidwe yomwe yangakuthandizeni kulimbisa uxamwali bwanu na Yahova. Pfunzani maluso yakusiyana-siyana yomwe mungayaphatise basa pakutumikira Mulungu na gulu lace. Onani bzomwe mungacite kuti muthandize abale na mpfumakazi zanu. Mukacita tenepo, mun’dzakhala ninga Timotio ndipo ‘kuyenda kwanu patsogolo kun’dzawonekera padeca kwa wanthu wentse.’ — 1 Tim. 4:15. w22.04 27 ¶18-19

Tani penu imwepo mwacita nyongo yakupfunzisa wana wanu, tsono m’bodzi wa iwo alewa kuti an’funa lini kutumikira Yahova? Lekani kukumbuka kuti mulibe kumupfunzisa bwino mwanayo. Yahova adapasa tentsenefe ufulu bwa kusankhula, ndipo wana wanu anabombo ufulu bumwebu. Iwo angasankhule kutumikira Yahova ayai ne. Khulupirani kuti ntsiku ibodzi iye an’dzabwerera. Kumbukirani nkhani ya m’Bibliya ya mwana wakutaika. (Luk. 15:11-19, 22-24) Mulumbwana wakufotokozedwa mu nkhani imweyi adacita bzinthu bzizinji bzakuipa, tsono pakumalizira, mulumbwanayo adadzabwerera kumui. Abereki, imwepo mudapasidwa mphaso yabwino kwene-kwene, yomwe ni kupfunzisa wana kuti akadzakula adzanamate Yahova. (Sal. 78:4-6) Limweri ni basa lakunesa, ndipo tikukutendani kwene-kwene thangwe ra kupfunzisa wana wanu kumufuna na kumubvera. — Aef. 6:4. w22.05 30-31 ¶16-18

Ali-wentse wa ifepano an’funika kucita bzomwe angakwanise kuti gwere lipitirize kukhala pa mtendere na lakubverana. Onani bzomwe Akristau wakuyambirira adacita. Iwo akhana mphaso zakusiyana-siyana ndipo akhacitambo mabasa yakusiyana-siyana. (1 Ako. 12:4, 7-11) Tsono iwo akhacita lini mapici ayai kumbanesana. Ndipo Paulo adawalimbikisa kuti ambacite bzentse bzomwe bzikhafunikira kuti “alimbise thupi la Kristu.” Iye adanembera Akristau wa ku Efezo kuti: “Ciwalo centse cikaphata bwino basa, cimbathandizira kuti thupi likule bwino licilimba mu lufoyi.” (Aef. 4:1-3, 11, 12) Akristau omwe adateweza malango ya Pauloya, adacitisa kuti mu gwere mukhale na mtendere na ciphatano. Ndipo mpsimwebzi bzomwe timbawona m’magwere yathu ntsiku zino. Khalani wakutsimikiza kutcenkha kumbabzindendemezera na anzanu. Koma pfunzani na bzomwe Jezu adacita ndipo citani nyongo ya kutewezera makhalidwe yace. Khalani na citsimikizo centse cakuti Mulungu omwe ‘ngwakulungama an’dzayebwa lini basa lanu.’ (Aheb. 6:10) Iye ambawona nyongo yentse yomwe mumbacita kuti mumukondwese. w22.04 14 ¶15-16

Ifepano timbadziwa kuti tiribe ugo bwakuuza Yahova kuti alekerere munthu omwe wacita pikado ayai asaye kumulekerera! Tsono pana cinthu comwe ifepano tin’funika kucita. Kodi cinthu cimweco n’ciponi? Nthawe zinango munthu angatiphonyere, ndipo pinango angatiphonyere cinthu cikulu. Bzimwebzi bzikacitika, pinango iye angakumbire kuti timulekerere ndipo pinango angatikumbire lini. Napo bziri tenepo, ifepano tingamulekerere munthuyo ticileka kumukoyera cakumtima. Kulewa cadidi, pangapite nthawe ndipo pangafunike nyongo kuti tikwanise kucita bzimwebzi, maka-maka bzikakhala kuti bzomwe munthuyo wacitabzo bzatiwawa kwene-kwene. Ntsanza ya Mulindiri ya 15 Setembro, 1994, idati: “Imwepo mukalekerera munthu omwe wakuphonyerani, bzin’funa lini kulewa kuti mukukomedwa na bzomwe iye wacitabzo. Kwa Akristau, kulekerera kumbathandauza kusiya nkhaniyo m’manja mwa Yahova. Iye ndiye ana ugo bwakutonga m’cirengedwe centse, ndipo an’dzawonesesa kuti cirungamo cacitika pa nthawe yace.” w22.06 9 ¶6-7

Yahova angadatsonkhanisa wanthu wakucokera ku mitundu yentse, dzinza liri-lentse na cirewedwe ciri centse. Ndipo wentse pabodzi angadadzamunamata mwakukhulupirika. Tikuwona kuti mafala yamweya yakukwanisikadi mu ntsiku zathu zino. Yahova akutsonkhanisadi wanthu omwe akudziwika na dzina lakuti “thimu likulu.” (Apok. 7:9, 10) Thimu limweri lina amuna, akazi na wana wakucokera m’madziko yakusiyana-siyana. Napo bziri tenepo, wentse mbakubverana ndipo ambakhala mwa mtendere. (Sal. 133:1; Juw. 10:16) Nthawe zentse, iwo ambakhala wakukonzeka kuuzambo anzawo bza cidikhiro cawo cabwino kwene-kwene cakudzakhala mu dziko lipsa. (Mat. 28:19, 20; Apok. 14:6, 7; 22:17) Penu imwepo mumbacita mbali ya thimu likululi, tikukhulupira kuti mumbadziwa kuti bzinthu bzabwino bzomwe bzikubwera kutsogoloku mpsakufunika kwene-kwene. Sathani akufuna lini kuti ifepano tikhale na cidikhiro. Bzomwe iye akufuna ni kuticitisa kukumbuka kuti Yahova an’dzateweza lini bzomwe adalewa. Tikabvuma kuti Sathani aticitise kukhala wakusaya cidikhiro, ifepano tingawofoke, ndipo pinango tingasiiretu kutumikira Yahova. w22.06 20-21 ¶2-3

Cidikhiro cathu cimbatithandiza kukhala wakuderekha ticimbakhulupira kuti bzinthu bzin’khala bwino. Kumbukirani kuti Jezu adalewa kale kuti tin’dzazunzidwa. (Juw. 15:20) Ndipopa kukumbukira bzinthu bzabwino bzomwe Yahova an’dzaticitira kutsogolo kun’dzatithandiza kupitiriza kumutumikira. Cidikhiro cidathandiza Jezu kupitiriza kukhala wakukhulupirika, napo akhadziwa kuti angadaboneresedwa na kuphedwa. Pa ntsiku ya Pentekosite ya 33 EC, mpostolo Pedru adalewa mafala ya m’bukhu la Salimo pakufotokoza bzomwe bzidathandiza Jezu kupitiriza kukhala wakuderekha. Mafalaya yambati: “Inepano ndidakhala na cidikhiro; thangwe imwe mun’dzandisiya lini m’Thenje, ndipo mun’dzabvuma lini kuti thupi la munthu wanu wakukhulupirika libvunde. . . . Mun’dzadzaza mtima wangu na cikondweso pamaso panu.” (Mab. 2:25-28; Sal. 16:8-11) Jezu akhadziwa kuti Mulungu angadamulamusa ndipo angadabwerera kuna Baba wace wa kudzulu. — Aheb. 12:2, 3. w22.10 25 ¶4-5

Pa nthawe inango apostolo awiri, Tiyago na Juwau, adauza mai wawo kuti akumbire Jezu kuti adzawapase mbuto zakulemekezeka kudzulu. (Mat. 20:20, 21) Bzomwe Tiyago na Juwau adacitabzi bzidalatiza kuti iwo akhali wakubzikuza ndipo akhabziwona kuti akhali wakufunika kwene-kwene kuposa anzawo. (Mim. 16:18) Tiyago na Juwau ndiwo lini wokha omwe adalatiza khalidwe la kubzikuza pa nthawe imweyire. Onanimbo bzomwe apostolo winango wale adacita: “Pomwe anyakupfunza 10 wale adabva bzomwe Tiyago na Juwau adacita, iwo adakalipa.” (Mat. 20:24) Bzimwebzi bzikulatiziratu kuti Tiyago na Juwau pabodzi na apostolo winangowo adapopotezana. Kodi n’ciyani comwe Jezu adacita pa nkhani imweyi? Iye alibe kuwakalipira. Iye alibe kulewa kuti iwo ni wanthu wakuipa ndipo angadayenda kukanyang’ana apostolo winango omwe ambalatizana lufoyi. Koma iye adaceza nawo mwakugwa nfuwa, thangwe akhadziwa kuti iwo akhafuna kucita bzinthu bzabwino. (Mat. 20:25-28) Iye adapitiriza kucita nawo bzinthu mwa lufoyi. w23.03 28-29 ¶10-13

Imwepo mwacita kale bzinthu bzizinji bzabwino. Imwepo mwapfunza Bibliya ndipo pinango mwamala magole mukucita bzimwebzi. Ndipo kupfunzako kwakutsimikizirani kuti Bibliya ni Fala la Mulungu. Cinthu cinango n’cakuti mwafika pa kumudziwa Yahova omwe ni Mwenekaciro wa Bibliyalo. Ndipo lufoyi lanu kwa iye lakucitisani kuti mubzipereke mucibatizidwa. Ndipopa tikuti makolokoto! Pomwe mukhanati kubatizidwa, imwepo mudagumana na mabvuto yomwe yangadakutazisani kukhala wakukhulupirika kwa Yahova. Tsono pomwe mukukula mwauzimu, imwepo mun’dzagumana na mabvuto yanango. Sathani an’dzayezera kukutazisani kufuna Yahova na kupitiriza kumutumikira. (Aef. 4:14) Tsono mun’funika lini kubvuma kuti bzimwebzi bzikucitikireni. Kodi n’ciyani comwe cingakuthandizeni kupitiriza kukhala wakukhulupirika kwa Yahova na kuteweza lumbiro lomwe mudacita pomwe mudabzipereka kwa iye? Comwe cingakuthandizeni ni ‘kupitiriza kukula’ mwauzimu. — Aheb. 6:1. w22.08 2 ¶1-2

Munthu ali-wentse pa mui an’funika lini kumbazimbula nkhani za cintsintsi za pa muipo. Tiyezezere tenepa: Pinango mkazi angakhale na kaleya. Kodi bayaceyo angauze wanthu winango bzimwebzo? Ne. Kucita bzimwebzo kunganyazise mkazaceyo. Mwamunayo ambafuna mkazace, ndipopa angacite lini cinthu comwe cingamuwawe. (Aef. 5:33) Wana an’funikambo kulemekezedwa. Ndipo mpsakufunika kuti abereki ambadziwe bzimwebzi. Iwo an’funika lini kunyazisa wana wawo mwa kumbauza wanthu winango bzinthu bzomwe wana wawowo ambaphonya. (Akol. 3:21) Ndipo wana an’funikambo kukhala wakucenjera kuti aleke kumbauza wanthu winango nkhani zomwe zinganyazise wanthu wa pa mui pawo. Wanthu wentse pa mui ambabverana kwene-kwene bzikakhala kuti wentse akucita nyongo yakuleka kumbazimbula nkhani za cintsintsi. w22.09 10 ¶9

Yahova adalewalewa na Djobi ndipo adamukumbusa kuti Yahovayo ana nzeru kwene-kwene ndipo ambafuna cirengedwe cace. Iye adauza Djobi bza bzirombo bzakudabwisa bzomwe adalenga. (Djob. 38:1, 2; 39:9, 13, 19, 27; 40:15; 41:1, 2) Yahova adaphatisambo basa mulumbwana wakukhulupirika wakucemeredwa Elihu kuti alimbikise na kutsangalaza Djobi. Elihu adauza Djobi kuti nthawe zentse Yahova ambabaira atumiki wace omwe ambalatiza kupirira. Tsono Yahova adamuphatisa pomwe basa Elihu kuti apereke malango kwa Djobi. Elihu adathandiza Djobi kuti aleke kumbabzikumbukira yekha. Ndipo adamukumbusa kuti tentsenefe ndife wakucepa kwene-kwene pakubzindendemezera na Yahova, omwe ni Mulengi wa cirengedwe centse. Yahova adapasambo basa Djobi; iye adauza Djobiyo kuti apempherere axamwali wace atatu omwe adacita pikado. (Djob. 42:8-10) Kodi Yahova ambatithandiza tani ntsiku zino tikakhala tikugumana na mabvuto? Yahova ambalewalewa lini nafe ninga momwe adacitira na Djobi. Tsono iye ambaphatisa basa Fala lace, Bibliya, kuti alewelewe nafe. — Aro. 15:4. w22.08 11 ¶10-11

Mu gwere la ku Roma mukhana Akristau omwe akhali Adjuda na omwe akhali lini Adjuda. Pomwe Lamulo la Mozeji lidaima kuphata basa, atumiki wa Yahova akhafunika lini pomwe kuteweza malamulo yomwe yakhaletsa kudya bzakudya bzinango. (Mar. 7:19) Kuyambira nthawe imweyire, Akristau omwe akhali Adjuda akhana ufulu bwa kudya cakudya ciri-centse comwe angadafuna. Tsono Akristau anango omwe akhali Adjuda akhawona kuti akhafunika lini kucita tenepoyo, ndipopa gwerelo lidayamba kugawanika. Mpostolo Paulo adabvekesa kufunika kwa kukhala wakubverana. Ndipo Paulo adathandizambo Akristauwo kuwona kuti nkhani ninga zimwezi zikhadzonga mbverano wa Akristau na gwere kubodzi. (Aro. 14:19, 20) Ndipo iye akhali wakukonzeka kusiya kucita bzinthu bzinango kuti aleke kusunamisa Akristau anzace. (1 Ako. 9:19-22) Mpsibodzi-bodzimbo na ifepano ntsiku zino. Kuti tibverane na anzathu, tin’funika kutcenkha kungingimiza anzathuwo kucita bzinthu bzomwe ifepano tikufuna. w22.08 22 ¶7

Ifepano tikacita nyongo kuti ticite cinthu pakutumikira Yahova, timbakwanisa kucita cinthuco. Mpsibodzi-bodzimbo na kucita nyongo kuti tikhale wakulungama. Yahova akatiwona kuti tikucita nyongo kuti tikhale wakulungama, iye an’dzatithandiza kukhala na khalidwe limweri napo kuti nthawe zinango bzingatinese. (Sal. 84:5, 7) Yahova ambatifuna, ndipopa ambatikumbusa nthawe zentse kuti kucita bzinthu bzakulungama ni mtolo lini. (1 Juw. 5:3) Koma kucita bzimwebzi kumbatikhotcerera; ndipo ifepano timbafuna kukhotcereredwako ntsiku zentse. Kumbukirani bzifuzo bzentse bza nkhondo yauzimu bzomwe mpostolo Paulo adabzilewa. (Aef. 6:14-18) Kodi ni cifuzo ciponi comwe cimbakhotcerera mtima wa Mkristau? Ni cirungamo comwe ciri ninga “cakukhotcerera pa cifuwa.” Cakukhotcerera pa cifuwa cikhakhotcerera mtima wa mcikunda. Mpsibodzi-bodzimbo na mitemo yakulungama ya Yahova. Iyo imbakhotcerera mtima wathu wakuyezezera. Ndipopa tin’funika nthawe zentse kumbawonesesa kuti tina bzifuzo bzentse bza nkhondo, kuphatanidzambo cirungamo ninga cakukhotcerera pa cifuwa! — Mim. 4:23. w22.08 29 ¶13-14

Kuyambira kale-kale, Fala la Mulungu likuthandiza amuna na akazi wakukhulupirika. Yahova adacitisa kuti wanthu akopiyari Fala lace kuti lipitirize kukhala liripo mpaka ntsiku zathu zino. Napo kuti omwe akhakopiyariwo akhali wanthu wakuperewera, iwo akhacita mphole kwene-kwene pa kukopiyaripo. Mdziwi munango wa nkhani za m’Bibliya, pa kufotokoza bza Bzinembo bza Cihebereu, adalewa kuti: “Palibe bukhu lomwe lidakopiyaridwi bwino kwene-kwene kuposa Bibliya.” Ndipopa, ifepano tingakhulupire na mtima wentse kuti mafala yomwe timbawerenga m’Bibliyamo ndiyo yomwe Mwenekaciro, Yahova, akhafuna kuti yanembedwe. Yahova ndiye omwe ambapereka “mphaso iri-yentse yabwino na yakulungama.” (Tiy. 1:17) Bibliya ni ibodzi mwa mphaso zabwino kwene-kwene zomwe Yahova adatipasa. Munthu akatipasa mphaso timbadziwa kuti munthuyo ambatifuna ndipo akudziwa bzomwe tikufunikira. Mpsibodzi-bodzimbo na munthu omwe adatipasa Bibliya. Ifepano tikambawerenga Bibliya, timbapfunza bzizinji pakulewa bza Yahova. Timbapfunza kuti iye ambadziwa bzomwe ifepano tikufunikira pa moyo wathu. w23.02 2-3 ¶3-4

Ifepano tin’dzakomedwa kwene-kwene tikadzawona Yahova akuyamba kulamusa anyakufa mkati mwa Utongi bwa Magole 1000 bwa Kristu! Wanthu omwe adafedwa adzinza wawo na axamwali wawo akufunisisa kudzawawona pomwe ndipo Yahova akufunisisambo. (Djob. 14:15) Ndokumbukirani momwe iwo an’dzabvera akadzawona adzinza wawo na axamwali wawowo akulamusidwa. Iwo an’dzakomedwa kwene-kwene. Wanthu “wakulungama,” omwe madzina yawo yali mu bukhu la moyo, “an’dzamuka kuti atambire moyo.” (Mab. 24:15; Juw. 5:29) Pinango abale na axamwali wathu winango omwe adasaika ndiwo an’dzayamba kumuka. Ndipo wanthu “wakusaya kulungama,” omwe alibe kukhala na mwayi wakupfunza bza Yahova ayai kumutumikira, “an’dzamuka kuti atongedwe.” Wanthu wentse omwe an’dzalamusidwa an’dzafunika kupfunzisidwa. (Zai. 26:9; 61:11) Ndipopa mu dziko lipsa mun’dzakhala na basa likulu lakupfunzisa wanthu. — Zai. 11:10. w22.09 20 ¶1-2

Yahova adalatiza mphanvu zace mwa kukunda amambo azinji omwe adabverana kuti acite nkhondo na Ajirayeri. Iye adamenyera nkhondo Ajirayeri ndipo adawathandiza kukunda mbali ikulu ya Dziko Lakupiciridwa. (Djos. 11:4-6, 20; 12:1, 7, 24) Kazinji-kentse, Yahova adalatiza kuti ni Mulungu Mkululetu! Mambo Nabukadinazori wa ku Babiloniya adabzikuza acibzilewa kuti akhana mphanvu na ulemerero. Tsono iye akhafunika kupereka ulemerero bwentse kwa Mulungu. Ndipopa Yahova adamulanga mwa kumukhalisa nyamsala. Pomwe Nabukadinazori adadzalimba, iye “adatumbiza Mulungu Mkululetu” ndipo adazindikira kuti “utongi bwa Yahova n’bwakusaya kumala.” Ndipo iye adalewa kuti: “Palibe munthu omwe angamuletse kucita bzomwe akufuna.” (Dan. 4:30, 33-35) Nyakunemba Salimo adalewa kuti: “Wakukondwa ni mtundu omwe Mulungu wawo ni Yahova; wanthu omwe Iye awasankhula kukhala utaka bwace.” (Sal. 33:12) Mafala ya vesiri yakulatiza kuti ifepano tin’funika kupitiriza kukhala wakukhulupirika kwa Yahova! w22.10 15-16 ¶13-15

Bzinthu bzizinji bzomwe Bibliya lidalewa bzidacitika kale, ndipo bzimwebzi bzimbatitsimikizira kuti bzomwe bzikanati kucitika bzin’dzacitikambo. Timbabva ninga momwe nyakunemba salimo adabvera pomwe adanemba kuti: “Ndikudikhirira cipulumuso canu thangwe fala lanu ni cidikhiro cangu.” (Sal. 119:81) Mwakuphatisa basa Bibliya, Yahova akutipasa “cidikhiro cabwino na tsogolo labwino.” (Jer. 29:11) Bzomwe tikudikhirira kutsogolo bzin’dzacitikadi thangwe ni Yahova omwe adalewa. Ndipopa, bwerani tipitirize kuthemba Fala la Mulungu mwa kupitiriza kupfunza mapolofesiya. Cinthu comwe cingatithandize kukhulupira Bibliya ni kuwona kuti malango ya m’Bibliyayo yakuthandiza wanthu ntsiku zino. (Sal. 119:66, 138) Iro lathandiza mabanja mazinji. Wanthu winango akhadasala pang’ono kulambana, koma tsapano ambabverana. Ndipo wana wawo akukomedwa kukhala m’banja lacikristau lomwe iwo mbakukhotcerereka ndipo ambafunidwa. — Aef. 5:22-29. w23.01 5 ¶12-13

Kumbukirani phindu lomwe mwakhala nalo thangwe ra kukwanisika kwa bzomwe Bibliya limbalewa. Jezu adalewa kuti Baba wace angadadzakupasani bzinthu bzakufunikira. (Mat. 6:32, 33) Ndipo iye adalewa pomwe kuti Yahova an’dzakupasani mzimu wace wakucena mukaukumbira. (Luk. 11:13) Yahova ambacitadi bzimwebzi. Ndipo mungakumbukirembo bzinthu bzomwe ambakucitirani. Pinango mungakumbukire kuti iye adalewa kuti an’dzakulekererani pikado zanu, an’dzakutsangalazani na kukupasani bzinthu bzakufunikira kuti mupitirize kukhala pa uxamwali bwakulimba na iye. (Mat. 6:14; 24:45; 2 Ako. 1:3) Mukambakumbukira bzomwe Mulungu adakucitirani kale, mun’dzakhulupirambo kuti bzomwe adalewa bzin’dzacitikadi. Nyakunemba Salimo adalewa kuti: “An’kondwa ni ule . . . omwe ambadikhirira Yahova Mulungu wace, . . . Omwe ambapitiriza kukhala wakukhulupirika nthawe zentse.” — Sal. 146:5, 6. w22.10 27 ¶15; 28 ¶17

Kodi polofesiya yakulewa bza kubwezeresedwa kwa kunamata kwacadidi ikukwanisikambo ntsiku zino? Inde. Kodi ikukwanisika tani? Kuyambira mu gole la 1919 EC, wanthu azinji akucoka mu Babiloniya Mkulu, omwe ni magereja yentse yakunama. Ndipo iwo akuyenda ku mbuto yabwino kwene-kwene kuposa Dziko Lakupiciridwa lomwe Ajirayeri adapasidwa. Iwo akuyenda mu paraizo wauzimu. (Zai. 51:3; 66:8) Kuyambira mu 1919 EC, Akristau wakudzozedwa ali mu paraizo wauzimu. Ndipo Akristau omwe ana cidikhiro cakudzakhala na moyo wakusaya kumala pa dziko la pantsi akupitambo mu paraizo umweyu ndipo akutambira bzisimbo bzizinji bzakucokera kwa Yahova. (Juw. 10:16; Zai. 25:6; 65:13) Paraizo wauzimu umweyu ali pa dziko lentse la pantsi thangwe atumiki wa Mulungu ali pa dziko lentse la pantsi. Ndipopa ifepano tingakhalembo mu paraizo wauzimu umweyo ticithandizira kunamata kwacadidi. w22.11 11-12 ¶12-15

Kodi bzimbakunesani kukhulupira kuti Yahova alipo kuyambira “kale-kale”? (Zai. 40:28) Penu bziri tenepo, dziwani kuti ndimwe lini mwekha. Elihu adalewa kuti: “Wanthufe timbakwanisa lini kudziwa kuti iye ana magole mangasi.” (Djob. 36:26) Tsono kusaya kudziwa cinthu bzimbafuna lini kulewa kuti cinthuco kulibe ayai n’cacadidi lini. Thangwe ranyi tikulewa tenepoyo? Tiyezezere kuti tikudziwa lini kuti mphanvu ya maluju imbaphata tani basa. Bzimwebzi bzin’funa lini kulewa kuti mphanvu ya malujuyo kulibe. Ifepano timbadziwa kuti iripo thangwe timbawona maluju yakugaka. Mpsibodzi-bodzimbo na Mulungu. Wanthufe tingakwanise lini kudziwa kuti bzidacitika tani kuti iye akhale na moyo wakuyenda na kuyenda. Koma bzin’funa lini kulewa kuti nkhani imweyi njakunama. Kusaya kubvesesa kwathu kumbacitisa lini kuti Mulungu aleke kukhala na moyo wakuyenda na kuyenda. (Aro. 11:33-36) Yahova alipo kuyambira kale-kale. Ndipo akhalipo kale napo pomwe akhanati “kukonza kudzulu.” — Jer. 51:15. w22.12 2-3 ¶3-4

Nthawe zinango ifepano tingakumbiridwe kuti tipempherere wanthu winango. Mpfumakazi yomwe ikucitisa pfunziro la Bibliya ingakumbire mpfumakazi yomwe ikuiperekeza kuti icite mpembo. Tsono mpfumakazi yomwe ikuperekezayo pinango ingamudziwe lini bwino-bwino munthu omwe an’funa kumupemphererayo. Ndipopa bzingakhale bwino kuti mpfumakaziyo icite mpembo wakumalizira, thangwe ingakhale na mpata wakudziwa bwino bzomwe ingalewe mu mpembo pakupempherera nyakupfunzayo. M’bale angakumbiridwe kuti acite mpembo pa mtsonkhano wa utumiki bwa kumunda ayai pa mtsonkhano wa gwere. Abale omwe ana mwayi wa kucita mipembo pa mitsonkhano, an’funika kumbakumbukira cakulinga ca mitsonkhanoyo. Iwo an’funika lini kuphatisa basa mpemboyo kuti apereke malango ku gwere ayai kuti apereke bzidziwiso. Kazinji-kazinji bzimbadikhiririka kuti nyimbo na mpembo bzimale mphindi zixanu. Ndipopa m’bale omwe akucita mpembo an’funika lini kulewalewa “mafala mazinji,” maka-maka kumayambiriro kwa mitsonkhano. — Mat. 6:7. w22.07 24 ¶17-18

Jezu adalewa kuti mu ntsiku zakumalizira kungadadzawoneka matenda mu “mbuto zakusiyana-siyana.” (Luk. 21:11) Kodi kudziwa bzimwebzi kumbatithandiza tani kukhala na mtendere? Kumbatithandiza thangwe timbadabwa lini tikawona matenda yakusiyana-siyana. Timbadziwa kuti bzomwe bzikucitikabzi ni bzomwe Jezu adalewa kuti bzingadadzacitika. Ndipopa tin’funika kuteweza malango yomwe Jezu adayapereka kwa wanthu omwe angadadzakhala mu ntsiku zakumalizira, yakuti: “Dzakhaleni tceru kuti bzimwebzi bzireke kudzakucitisani mantha.” Matenda yakayambika, nthawe zinango tingatazire kucita bzinthu bzinango bzomwe tikhacita kale-kale. Tsono tin’funika lini kubvuma kuti matendayo yambatitazise kupfunza Bibliya pa tekha na kumbayenda ku mitsonkhano. Tikambawerenga mabukhu yathu na kumbawona mavidiyo timbakwanisa kudziwa nkhani za abale na mpfumakazi omwe adapitiriza kukhala wakukhulupirika napo kuti akhagumana na mabvuto. w22.12 17 ¶4, 6

Djakobo akhamufuna kwene-kwene mwana wace Zuze. (Gen. 37:3, 4) Bzimwebzi bzidacitisa kuti wana winango wa Djakoboyo amuwenge m’bale wawoyo. Ndipopa pomwe iwo adagumana mpata, adamugulisa kwa anyakucita malonda wa ku Midiyani. Amidiyaniwo adatenga Zuze aciyenda naye ku Edjipito komwe kukhali kutali kwene-kwene na komwe iye akhakhala. Ndipo kumweko, iwo adakamugulisa kuna mkulu wa acikunda wakulindira mambo, omwe akhacemeredwa Potifari. Tikuwona kuti bzinthu bzidacinja pa moyo wa Zuze kabodzi na kabodzi. Iye akhali mwana omwe akhafunidwa kwene-kwene na pai wace, koma adakakhala kapolo wa munthu wa ku Edjipito! (Gen. 39:1) Nthawe zinango, ifepano tingagumane na mabvuto yomwe ‘wanthu wentse ambagumana nayo.’ (1 Ako. 10:13) Ayai tingabonere thangwe rakuti ndife anyakupfunza wa Jezu. Wanthu angatiseke, angatizunze thangwe ra bzomwe timbakhulupira ayai angatiletse kutumikira Yahova. (2 Tim. 3:12) Tikakhala tikugumana na mabvuto ninga yamweya, Yahova angatithandize kupirira. w23.01 14-15 ¶3-4

M’bale akatiphonyera, nthawe zinango tingawone kuti bziri bwino kucezerana naye. Tsono pomwe tikanati kucita bzimwebzo, tingacite bwino kubzibvunza kuti: ‘Kodi ndikuibvesesa bwino nkhaniyi?’ (Mim. 18:13) ‘Kodi iye wandikalipisa utowa?’ (Mpal. 7:20) ‘Kodi ca ntsiku ndidaphonyerambo kale munthu tenepa?’ (Mpal. 7:21, 22) ‘Ndikayenda kuti ndikaceze naye, kodi nkhaniyi inkamala bwino ayai inkakula-kula?’ Tikakhala na nthawe ya kukumbukira mibvunzo imweyi, tin’dzakwanisa kulatiza lufoyi kuna abale na mpfumakazi zathu ndipo tin’dzawalekerera mwakusaya kunesa. Ifepano tin’dzalatiza kuti ndife ateweri wa Jezu tikambalatiza lufoyi kuna abale na mpfumakazi zathu akatiphonyera. Tikacita bzimwebzi, wanthu an’dzadziwa kuti ndifedi Akristau wacadidi ndipo an’dzafunambo kunamata nafe pabodzi Yahova. Ndipopa, mbatipitirizeni kulatiza lufoyi thangwe iro limbazindikirisa Akristau wacadidi. w23.03 31 ¶18-19

Bibliya limbatithandiza kubvesesa kuti khalidwe likulu kwene-kwene la Yahova ni lufoyi. Iye alibe kutiuza bzinthu bzizinji bzomwe mpsakusaya kufunikira pakumutumikira thangwe rakuti ambatifuna. (Juw. 21:25) Yahova adalatiza pomwe lufoyi lace kuna ifepano mu njira yomwe adanembera Bibliya. Iye alibe kuikha m’Bibliyamo lista ya bzinthu bzizinji kwene-kwene bzomwe tin’funika kucita ndipo alibe kutipasa malamulo pa cinthu ciri-centse pa moyo wathu. Bzomwe iye adacita mpsakuti adanemba m’Bibliya nkhani za moyo wa wanthu, mapolofesiya yakudekeza na malango yakuthandiza. Iye an’funa kuti tikambawerenga nkhani zimwezi timbaphatise basa nzeru zathu kuti tizindikire bzinthu bzomwe iye akufuna kuti ticite. Bzimwebzi bzimbaticitisa kuti timufune na kumubvera. Bibliya limbalatiza kuti Yahova ambatifuna kwene-kwene. Thangwe ranyi tikulewa tenepoyo? Thangwe m’Bibliya muna nkhani zomwe zidacitikira wanthu kale-kale. Nkhani zawozo zimbatithandiza thangwe rakuti iwo akhali “[wanthumbo] ninga ifepano” ndipo bzomwe bzidawacitikirabzo bzimbaticitikirambo ntsiku zino. (Tiy. 5:17) Ndipo cakudekeza kwene-kwene n’cakuti, tikambawona bzomwe Yahova adacita na wanthu amwewa timbakwanisa kubvesesa kuti iye ni “Mulungu wa ntsisi kwene-kwene.” — Tiy. 5:11. w23.02 6 ¶13-15

Bukhu lakumalizira la m’Bibliya limbayamba na mafala yakuti: “Jezu Kristu, adatumiza anjo wace kwa mtumiki wace Juwau kuti akamulatize bzinthu bzomwe bzin’funika kucitika mwakamfulumize kutsogolo.” (Apok. 1:1) Bzimwebzi bzikulatiza kuti ifepano timbafunisisa kudziwa kuti mapolofesiya ya m’Bibliya yakukwanisika tani. Ndipo timbafunisisambo kuuza anzathu bzinthu bzimwebzi. Tsono pomwe tikuceza na anzathu bza mapolofesiya ya m’Bibliya, tin’funika lini kumbalewa bzinthu bza mu msolo mwathu. Thangwe ranyi? Thangwe bzimwebzi bzingacitise kuti gwere lireke kukhala lakubverana. Ifepano tingabve akulu-akulu wa boma akulewa bzinthu bzomwe angacite kuti abwerese mtendere na mkhomeko kuna wanthu wentse. Tikabva bzinthu bzimwebzi tin’funika lini kukumbuka kuti bzomwe akulewabzo bzikukwanirisa polofesiya ya pa 1 Atesalonika 5:3. Koma nthawe zentse tin’funika kumbaphatisa basa malango mapsa yomwe tapasidwa. Tikambaphatisa basa nfundo za m’mabukhu yakukonzedwa na gulu la Yahova pomwe tikuceza na anzathu, tin’dzacitisa kuti gwere likhale lakubverana ndipo tentse tin’dzakhala “na nzeru ibodzi.” — 1 Ako. 1:10; 4:6. w23.02 16 ¶4-5

Thangwe ranyi imwepo mumbafuna Jezu Kristu? Jezu ambafuna cadidi, ngwakubzicepesa ndipo ngwacirungamo. Penu imwepo mumbafuna cadidi na cirungamo, ndiye kuti mumbamufunambo Jezu Kristu. Jezu adakhotcerera cadidi mwakukhwimika. (Juw. 18:37) Kodi Jezu adalatiza tani kuti ngwakubzicepesa? Iye adacita bzimwebzi mwa kutumbiza Baba wace sikuti kubzitumbiza yekha. (Mar. 10:17, 18; Juw. 5:19) Kodi mumbabzibva tani thangwe ra kubzicepesa kwa Jezu? Kulewa cadidi, bzimwebzi bzimbakucitisani kuti mufune Mwana wa Mulungu na kumutewezerambo. Thangwe ranyi Jezu ngwakubzicepesa? Thangwe iye ambafuna ndipo ambatewezera Baba wace omwe ngwakubzicepesambo. (Sal. 18:35; Aheb. 1:3) Kodi imwepo mumbakomedwa lini thangwe ra kudziwa kuti Jezu ana makhalidwe ninga ya Baba wace? w23.03 3-4 ¶6-7

Bibliya limbalewa bza magrupo mawiri ya wanthu omwe adafa ndipo an’dzalamusidwa kuti adzapasidwe mwayi wakudzakhala na moyo wakusaya kumala pa dziko la pantsi pano. Grupo lakuyamba ni wanthu “wakulungama” ndipo laciwiri ni wanthu “wakusaya kulungama.” Wanthu “wakulungama” ni wanthu omwe adatumikira Yahova mwakukhulupirika pomwe akhana moyo. Tsono wanthu “wakusaya kulungama” ni wanthu omwe alibe kutumikira Yahova pomwe akhana moyo. Pakuti magrupo mawiriya yan’dzalamusidwa, kodi bzimwebzi bzin’funa kulewa kuti madzina yawo yadanembedwa mu bukhu la moyo? Wanthu “wakulungama” omwe an’dzalamusidwa madzina yawo yakhadanembedwa kale mu bukhu la moyo pomwe iwo akhanati kufa. Tsono kodi madzina yawo yadapfudzidwa mu bukhu la moyo pomwe iwo adafa? Ne. Thangwe kwa Yahova iwo “akana moyo.” Yahova ni Mulungu “sikuti wa anyakufa koma wa wanthu wamoyo, thangwe kwa iye wentse ana moyo.” (Luk. 20:38) Bzimwebzi bzin’funa kulewa kuti wanthu wakulungama akadzalamusidwa madzina yawo yan’dzakhala yalipo kale mu bukhu la moyo. Tsono bzin’dzakhala ninga kuti iyo yakadanembedwa na “lápis.” — Luk. 14:14. w22.09 16 ¶9-10

Yahova akhafuna kuti Adamu akomedwe na bzinthu bza m’cirengedwe. Iye adamuikha mu paraizo wakudeka ndipo adamupasa basa lakuti asamalire paraizoyo. (Gen. 2:8, 9) Kumbukirani momwe Adamu akhabvera pakuwona mbewu zomwe akhadabzala pabodzi na maluwa zikumera. Ukhali mwayi ukulu kwene-kwene kwa Adamu kukhala m’zunde la Edeni! Ndipo Yahova adam’pasa mwayi ukulu wakupasa madzina bzirombo. (Gen. 2:19, 20) Yahova angadafuna angadapereka yekha madzinayo. Pomwe Adamu akhanati kupereka madzinayo, iye adayamba kupfunza cirombo ciri-centse kuti acidziwe bwino. Adamu akhakomedwa kwene-kwene kucita bzimwebzi. Bzimwebzi bzidamuthandiza kudziwa kuti Yahova ni Mulungu wanzeru kwene-kwene ndipo adalenga bzinthu bzakudeka. w23.03 15 ¶3

Pakuti utongi bwa Anglo-Americana bumbayezezeredwa na nzayo za cifanikiso cire, ibo ni utongi bwakumalizira bomwe bumbafotokozedwa m’Bibliya. (Dan. 2:31-33) Palibe utongi bunango bwa wanthu bomwe bun’dzabwera bumwebu bukamala. Koma ibo bun’dzamalira pa Armagedo pomwe Umambo bwa Mulungu bun’dzabupfudza na kupfudzambo maboma yentse ya wanthu. (Apok. 16:13, 14, 16; 19:19, 20) Kodi kudziwa polofesiya imweyi kumbatithandiza tani? Polofesiya ya m’bukhu la Daniyeli imbafotokoza umboni bunango bwakulatiza kuti tikukhala mu ntsiku zakumalizira. Magole yakupitirira 2500 m’mbuyomu, Daniyeli adaleweratu kuti utongi bwa Babiloniya bukamala kutonga, pangadadzawoneka pomwe mautongi manango manai yamphanvu yomwe yangadadzatonga wanthu wa Mulungu. Ndipo iye adalewa pomwe kuti Utongi Bwamphanvu pa Dziko Lentse bwa Anglo-Americana bungadadzakhala bwakumalizira. Bzimwebzi bzimbatipasa mphanvu na cidikhiro cakuti tsapanopapa Umambo bwa Mulungu bun’pfudza maboma yentse ya wanthu bucitonga dziko la pantsi. w22.07 4 ¶9; 5 ¶11-12