Junho

Djobi akhali pa uxamwali bwakulimba na Yahova, akhana mui ukulu, wana azinji ndipo akhadadala kwene-kwene. (Djob. 1:1-5) Tsono pa ntsiku ibodzi yokha, Djobi adaluza bzentse bzomwe akhanabzo. Cakutoma, iye adaluza vida yace yentse. (Djob. 1:13-17) Ndipo wana wace wentse adafa kabodzi na kabodzi. Mukukumbuka kuti Djobi na mkazace adabva tani pomwe adauzidwa kuti wana wawo wentse 10 agweredwa na nyumba ndipo afera m’mwemo? Iwo adabva kuwawa kwene-kwene mu mtima mwawo ndipo adasaya muti wakuphata. Ndipopa Djobi adang’amba bzakubvala bzace ndipo adabulumunda pantsi uko akulira kwene-kwene. (Djob. 1:18-20) Cinthu cinango comwe Sathani adacita ni kuduwalisa Djobi matenda yakuwawa kwene-kwene na yakupasa manyazi. (Djob. 2:6-8) Pomwe mabvutoya yakhanati kubwera, Djobi akhali munthu wakulemekezeka kwene-kwene m’mudzi omwe akhakhala. Ndipo wanthu akhayenda kuna iye kukakumbira nzeru. (Djob. 31:18) Tsono pomwe adadzayamba kuduwala, wanthu adasiya kucita naye tsantsa. Ndipo abale wace, axamwali wace wa ponda ndipondembo na anyabasa wace caiwo adasiyambo kucita naye tsansa! — Djob. 19:13, 14, 16. w22.06 21 ¶5-6

Tikabatizidwa, tentsenefe tin’funika kupitiriza kuteweza malango yomwe mpostolo Paulo adapereka kwa Akristau wa ku Efezo. Iye adawalimbikisa kuti akule ‘acifika pa msinkhu wa munthu mkulu.’ (Aef. 4:13) Bzimwebzi bzin’funa kulewa kuti iwo akhafunika kupitiriza kukula mwauzimu. Imwepo mumbafuna kale Yahova. Tsono mungapitirize kumufuna kwene-kwene. Mungacite tani bzimwebzi? Mpostolo Paulo adafotokoza bzomwe mungacite pa Afilipi 1:9. Iye adapemba kuti lufoyi lomwe Akristau wa ku Filipi akhanalo “lipitirize kukula.” Ndipopa ifepano tingakwanisembo kukulisa lufoyi lathu kwa Yahova. Kodi tingacite tani bzimwebzi? Tingacite bzimwebzi mwa ‘kukhala na cidziwiso caico pabodzi na kubvesesa bzinthu.’ Tikamudziwa bwino Yahova, tin’dzamufuna kwene-kwene ndipo tin’dzakomedwambo na momwe ambacitira bzinthu. Ndipo cinango n’cakuti tin’dzafunisisa kumukondwesa na kutcenkha kucita bzinthu bzomwe bzingamukalipise. Ndipo tin’dzacitambo nyongo ya kudziwa bzomwe iye akufuna kuti ifepano ticite, ticicita bzimwebzo. w22.08 2-3 ¶3-4

Bzomwe bzidanembedwa mu bukhu la Apokalipse bziribe kunembedwera wanthu wentse koma bzidanembedwera kokha atumiki wakubzipereka wa Mulungu. Pakuti ndife wanthu wa Mulungu timbadabwa lini kuwona kuti tikucitambo mbali pa kukwanisika kwa mapolofesiya ya m’bukhu lakudekezali. Ndipo mpostolo Juwau adalewa nthawe yomwe mapolofesiya ya m’bukhuli yangadadzakwanisika. Iye adati: “Mwakutsogoleredwa na mzimu wakucena, ndidafika pa ntsiku ya Mbuya.” (Apok. 1:10) Mpostolo Juwau adanemba mafala yamweya pafupi-fupi mu gole la 96 EC ndipo pangadapita magole mazinji kwene-kwene kuti ifike “ntsiku ya Mbuya.” (Mat. 25:14, 19; Luk. 19:12) Tsono mapolofesiya ya m’Bibliya, yambatithandiza kubvesesa kuti ntsiku imweyi idayamba mu 1914, pomwe Jezu adayamba kutonga kudzulu. Kuyambira gole limweri, mapolofesiya ya m’bukhu la Apokalipse yakukwanisika ndipo wanthu wa Mulungu ambacitambo mbali pa mapolofesiyaya. Ndipopa, tingalewe kuti tsapano tikukhala mu “ntsiku ya Mbuya”! — Apok. 1:3. w22.05 2 ¶2-3

Pomwe cirombo na mpolofeta wakunama bzikana moyo bzin’dzathusidwa mu thawale la moto wakugaka mwamphanvu. Ndipopa mautongi yamweya, yomwe ni anyamadulanthaka wa Mulungu, yan’dzapfudzidwa pomwe yakadatonga ndipo yan’dzawoneka lini pomwe. N’ciyani comwe tin’funika kucita? Pakuti ndife Akristau, tin’funika kukhala wakukhulupirika kwa Mulungu na Umambo bwace. (Juw. 18:36) Tin’funika kutcenkha kupitira nkhani za ndale. Kucita bzimwebzi kungakhale kwakunesa, thangwe atongi wa m’dzikoli ambafuna kuti ifepano tiwathandize mwa mafala na bzicito bzathu. Tsono wanthu omwe ambabvuma kucita bzomwe atongi wa m’dzikoli akufuna, ambatambira cizindikiro ca cirombo. (Apok. 13:16, 17) Ndipo ali-wentse omwe ambatambira cizindikiro cimweci, ambadzonga uxamwali bwace na Yahova ndipo an’dzatambira lini moyo wakusaya kumala. (Apok. 14:9, 10; 20:4) Ndipopa mpsakufunika kwene-kwene kutcenkha kupitira nkhani za ndale, napo atongi wa dzikoli ayezere kutipumpsa kuti tikhale ku mbali yawo. w22.05 10-11 ¶12-13

Cinthu cibodzi comwe imwepo mungacite ni kupfunza kukhala na luso pa basa linango. Tikakulisa luso lathu tin’dzakwanisa kucita bzizinji pakutumikira Yahova. Kumbukirani kuti kukufunikira abale na mpfumakazi azinji kuti aphate basa lakumanga nyumba za Beteli, Nyumba za Mitsonkhano Mikulu-mikulu na Nyumba za Umambo. Azinji omwe ambacita basa limweri adalipfunza thangwe ra kuphata basa pabodzi na abale omwe ana luso pa basali. Ntsiku zino abale na mpfumakazi akupfunza bzomwe angacite kuti ambakwanise kukonza bzinthu bzikadzongeka mu Nyumba ya Mitsonkhano Mikulu-mikulu na Nyumba za Umambo. Thangwe ra bzimwebzi, Yahova, “Mambo wa nthawe zentse,” na Jezu Kristu, omwe “ni Mambo wa . . . amambo,” akuphatisa basa wanthu wa luso kwene-kwene kuti acite bzinthu bzikulu. (1 Tim. 1:17; 6:15) Ifepano tikufuna kuphata basa na nyongo ndipo tiphatisembo basa luso lathu kuti titumbize Yahova sikuti kubzitumbiza tekha. — Juw. 8:54. w22.04 24 ¶7; 25 ¶ 11

Salomau akhadadala kwene-kwene ndipo akhakhala mu nyumba yabwino na yakudeka. (1 Ama. 10:7, 14, 15) Tsono Jezu akhali lini wakudala ndipo akhalibe nyumba yakukhala. (Mat. 8:20) Koma wentsenewa akhawona bzinthu bzomwe akhanabzo mwacikati-kati, thangwe nzeru zawo zikhacokera kwa Yahova Mulungu. Salomau adalewa kuti tikakhala na kobiri, ifepano tingakwanise kugula bzinthu bzakufunika pa moyo wathu. N’cadidi kuti Salomau akhali wakudala, tsono iye adazindikira kuti pana bzinthu bzakufunika kwene-kwene kuposa kobiri. Ndipopa iye adanemba kuti: “Kuli bwino kukhala na dzina labwino [ayai, mbiri yabwino,] kuposa kukhala na cuma cizinji.” (Mim. 22:1) Salomau adalewambo kuti wanthu omwe ambafuna kwene-kwene kobiri ambakhala lini wakukondwa na bzomwe anabzobzo. (Mpal. 5:10, 12) Ndipo iye adaticenjeza kuti tileke kumbathemba kobiri zomwe tinazo, thangwe napo zicikhala zizinji tani, nthawe iri-yentse zingamale. — Mim. 23:4, 5. w22.05 21 ¶4-5

Tikambakumbukira mwakamderekho bzomwe Yahova ambatipasa ntsiku zino timbalimbisa uxamwali bwathu na iye. Ndipo tikakumbukirambo bzinthu bzomwe iye an’dzaticitira kutsogolo timbakhala na cidikhiro cakudzamutumikira kuyenda na kuyenda. Bzinthu bzentse bzomwe Yahova ambatipasabzi bzimbacitisa kuti tikhale wakukondwa pakumutumikira. Yahova an’dzatipulumusa pa ntsiku yomwe an’dzapfudza dziko lakuipali. Tikudziwa kuti Yahova ni “Mulungu wacirungamo.” Iye an’dzalekerera lini kuti dzikoli lipitirize kukhala tenepa kuyenda na kuyenda. (Zai. 25:9) Ifepano tin’pitiriza kudikhirira mpaka ntsiku yomwe cipulumuso cathu cin’dzafika. Pakali pano tin’pitiriza kulemekeza mwayi omwe tinawo wa kupemba kwa Yahova, kupfunza Fala lace na kumbakumbukira bzinthu bzabwino bzomwe iye ambatipasa. Kucita bzimwebzi kun’tithandiza kupirira na kupitiriza kumutumikira mwakukondwa. w22.11 13 ¶18-19

Bibliya limbafotokoza lini bza batismo ya Timotio, koma tingakwanise kukumbukira momwe mai wace, Eunise adabvera ntsiku imweyo. (Mim. 23:25) Eunise akhadakwanisa kukunda mabvuto yentse yomwe adagumana nayo kuti apfunzise mwana wace kufuna Yahova na Jezu Kristu. Timotio adaleredwa m’banja lomwe abereki wace akhanamata lini pabodzi. Pai wace akhali mgerego ndipo mai wace na yavu wace akhali Adjuda. (Mab. 16:1) Bzikuwoneka kuti Timotio akhali mwana, pomwe Eunise na Loide adakhala Akristau. Napo bzikhali tenepo, banja lawolo lidapitiriza kukhala lakusiyana pa nkhani ya kunamata. Kodi Timotio angadatewera mbani? Mpsibodzi-bodzimbo ntsiku zino, mpfumakazi zizinji zimbafuna mabanja yawo. Ndipo zimbacita nyongo kwene-kwene kuti zithandize wana wawo kukhala pa uxamwali bwakulimba na Yahova. Mulungu wathu ambatenda kwene-kwene nyongo yawo. (Mim. 1:8, 9) Yahova athandiza kale mpfumakazi zizinji kupfunzisa wana wawo kumufuna na kumutumikira. w22.04 16 ¶1-3

Tsapanopapa Yahova an’dzapasa mabomaya “makumbukidwe yakucita bzomwe iye akufuna.” Mabomaya yomwe ni “amambo 10,” yan’dzaphindukira magulu ya magereja yakunama na kuyapfudza yentse. (Apok. 17:1, 2, 12, 16) Kodi timbadziwa tani kuti Babiloniya Mkulu an’pfudzidwa tsapanopapa? Kuti titawire mbvunzo umweyu, bwerani tikumbukire bzomwe bzidacitikira mzinda wakale-kale wa Babiloniya, omwe ukhadakhotcereredwa na Mkulo ukulu wa Eufrate. Bukhu la Apokalipse limbandendemezera wanthu azinji omwe akuthandizira Babiloniya Mkulu na “madzi.” (Apok. 17:15) Tsono bukhu limweri limbalatiza kuti madziyo ‘yan’dzauma,’ bzomwe bzin’funa kulewa kuti wanthu azinji omwe akuyathandizira an’dzasiya kuyathandizirako. (Apok. 16:12) Mafala yamweya yakukwanisika ntsiku zino. Wanthu azinji ntsiku zino akusiya kupemphera ndipo akuphatisa basa njira zinango kuti amalise mabvuto yawo. w22.07 5-6 ¶14-15

Tikambalekerera anzathu timbalatiza kuti timbatenda ntsisi za Yahova. Mu nkhani ibodzi yomwe Jezu adafotokoza, iye adandendemezera Yahova na mbuya omwe adalekerera kapolo omwe akhamufiyali kobiri zizinji kwene-kwene zomwe angadakwanisa lini kuzibweza. Tsono kapoloyo alibe kubvera ntsisi kapolo omwe akhamufiyali kobiri zing’ono-ng’ono basi. (Mat. 18:23-35) Kodi bzomwe Jezu adalewabzi bzikutipfunzisa ciyani? Bzikutipfunzisa kuti, penu ifepano timbatenda ntsisi zomwe Yahova ambatilatiza, tin’dzakwanisa kulekererambo anzathu. (Sal. 103:9) Ntsanza ya Mulindiri inango m’mbuyomu idafotokoza bzimwebzi tenepa: “Napo penu ifepano talekerera anzathu kazinji-kentse, bzingandendemere lini na kulekerera pabodzi na ntsisi zomwe Mulungu ambatilatiza mwakuphatisa basa ntsembe ya Jezu Kristu.” Tikambalekerera anzathu, Yahova an’dzatilekererambo. Yahova ambabvera ntsisi wanthu omwe ambabverambo ntsisi anzawo. (Mat. 5:7) Jezu adabvekesa bwino bzimwebzi pomwe adapfunzisa anyakupfunza wace kupemba. — Mat. 6:14, 15. w22.06 10 ¶8-9

Jezu adabadwa pantsi pano na thupi la munthu. Iye akhatewezera bwino-bwino makhalidwe ya Baba wace. (Juw. 14:9) Ndipopa, tikamudziwa bwino Jezu tin’dzamudziwambo bwino Yahova Mulungu na kumufuna. Cinthu cinango n’cakuti timbagumana phindu na bzomwe Jezu adapfunzisa na momwe ambatsogolerera gwere lacikristau ntsiku zino. Iye adatipfunzisa bzomwe tingacite kuti tikondwese Yahova. Ndipo tentsenefe tingagumanembo phindu na infa ya Jezu. Pomwe Jezu adalamusidwa, iye adapereka mulopa wace kuti ukhale ntsembe yakulungamiratu ‘yakucenesa pikado zathu zentse.’ (1 Juw. 1:7) Tsapano iye ni Mambo wakulemekezeka, omwe angafe lini. Ndipo tsapanopapa iye an’dzatsotola msolo wa nyoka. (Gen. 3:15) Atumiki wakukhulupirika wa Yahova an’dzakomedwa kwene-kwene pomwe Sathani an’dzapfudzidwa. Pomwe tikudikhirira nthawe imweyo, mbatilekeni kubwerera m’mbuyo. Mulungu wathu ngwakukhulupirika. Iye an’dzabweresa bzisimbo bzizinji kuna ‘mitundu yentse [ya wanthu] pa dziko la pantsi.’ w22.07 18 ¶13; 19 ¶19

Ifepano tin’funika kukhala wakukonzeka kucinja bzomwe tikufuna kucita. Thangwe ranyi? Thangwe pa nthawe iri-yentse bzinthu bzingacinje pa moyo wathu. Kumbukirani bzomwe bzidacitikira mpostolo Paulo, iye adathandiza pa basa lakupfunzisa wanthu ku Tesalonika mpaka kukhala gwere. Tsono Adjuda adayambisa phiringu ndipo bzimwebzi bzidacitisa kuti Paulo angingimizidwe kucoka mu mzindamo. (Mab. 17:1-5, 10) Paulo angadapitiriza kukhala ku Tesalonika, angadaikha moyo wa abale wace pangozi. Tsono Paulo adapitiriza basi kuwathandiza. Ndipo adazolowerana na kucinjako. Pomwe padapita nthawe, iye adatuma Timotio kuti akathandize abale wa ku Tesalonika kukhala na cikhulupiro cakulimba. (1 Ates. 3:1, 2) Kulewa cadidi, abale wa ku Tesalonika adakomedwa kwene-kwene. Kodi tikupfunza ciyani na bzomwe bzidacitikira Paulo ku Tesalonika? Pinango tingakhale tasankhula kale utumiki bomwe tikufuna kucita, tsono bzinthu bzingacinje pa moyo wathu ticitazira kucita bzomwe tikufunabzo. (Mpal. 9:11) Penu bzimwebzi bzikukucitikirani, imwepo mungasankhule utumiki bunango bomwe mungakwanise kucita. w22.04 25-26 ¶14-15

Yahova ambatitsangalaza mwa kutipasa cidikhiro ca kutsogolo. M’Bibliya muna mavesi mazinji yomwe yambatitsangalaza tikakhala tikugumana na mabvuto. Mwakuphatisa basa Bibliya, Yahova ambatiuza kuti palibe mabvuto ayai cinthu ciri-centse comwe tingagumane naco “cingatilekanise na lufoyi” lace. (Aro. 8:38, 39) Ndipo iye ambatiuzambo kuti “ali pafupi na wentse omwe ambamucemera” mu mpembo. (Sal. 145:18) Yahova ambatiuza kuti tikamukhulupira, ifepano tingakwanise kupirira mabvuto yentse yomwe tingagumane nayo ticipitiriza kukhala wakukondwa. (1 Ako. 10:13; Tiy. 1:2) Fala la Mulungu limbatikumbusa kuti mabvuto yomwe tikugumana nayoya njakanthawe ndipo yambatikonzekeresa kuti tidzatambire mabaibai yakusaya kumala kutsogolo. (2 Ako. 4:16-18) Yahova ambatiuza kuti an’dzacosa Sathani Dyabu pabodzi na wanthu omwe ali ku mbali yace thangwe ndiwo omwe ambayambisa mabvuto yomwe timbagumana nayoya. (Sal. 37:10) Kodi imwepo mudakoya mu msolo mavesi yanango ya m’Bibliya yomwe yangadzakuthandizeni kupirira mabvuto yomwe tin’dzagumana nayo kutsogolo? w22.08 11 ¶11

Kodi imwepo mumbacita thupo kuti mun’dzakwanisa lini kuteweza mitemo yakulungama ya Yahova pa moyo wanu wentse? Penu mumbakumbuka tenepo, mun’funika lini kucita thupo. Yahova adalewa kuti cirungamo cathu cingakhale “ninga mabimbi ya m’nyanza.” (Zai. 48:18) Yezezerani kuti imwepo mudaima m’mphepete mwa nyanza ndipo mukuwona mabimbi. Kodi mungayambe kukumbuka kuti ntsiku inango mabimbiyo yan’dzamala? Ne! Imwepo mumbadziwa kale kuti mabimbiyo yan’dzamala lini. Cirungamo canu cingakhale ninga mabimbi ya m’nyanza; ico cingamale lini! Kodi mungacite tani kuti bzimwebzi bzikwanisike? Mukafuna kucita cinthu, mbayambani kukumbuka bzomwe Yahova akufuna kuti mucite, ndipo mukamala citani bzimwebzo. Napo mucikhala muli pa nthawe yakunesa kuti mucite bzinthu bzabwino, Baba wanu an’dzakhala namwe, an’dzakuthandizani kuti mucite bzinthu bzabwino na kuteweza mitemo yace yakulungama pa moyo wanu. — Zai. 40:29-31. w22.08 30 ¶15-17

Kuphampha kwa magole 1000, Sathani an’dzacosedwa m’kawoko. Bzimwebzi bzikadzacitika, iye an’dzayezera kupumpsa wanthu wakulungama. Pa nthawe imweyi, wanthu wentse an’dzakhala na mwayi wakulatiza kuti ambalemekeza dzina la Mulungu na kuthandizira utongi bwace. (Apok. 20:8-10) Bzomwe wanthu an’dzacita pa nthawe imweyi ndibzo bzin’dzacitisa kuti madzina yawo yapitirize kukhala yalipo mu bukhu la moyo ayai yadzapfudzidwe. Bibliya limbalewa kuti wanthu winango an’dzacita bzinthu ninga Adamu na Eva, iwo an’dzalamba kutongedwa na Yahova. Kodi n’ciyani cin’dzacitikira wanthu amwewa? Pa Apokalipse 20:15 pambatiuza kuti: “Ali-wentse omwe dzina lace liribe kugumanika mu bukhu la moyo, adathusidwambo mu thawale la moto.” Mafalaya yakulatiza kuti wanthu wakupandukawa an’dzapfudzidwa. Tsono wanthu azinji wakulungama an’dzakunda mayezo yakumaliziraya. w22.09 23-24 ¶15-16

Mu nthawe ya Akristau wakuyambirira, Akristau winango omwe akhali Adjuda akhangingimira kuti Akristau omwe akhali lini Adjuda acitidwe mgwatidwe. Pinango iwo akhalewa tenepo thangwe ra kugopa kulewedwa kuipa na Adjuda anzawo. (Agal. 6:12) Mpostolo Paulo alibe kukomedwa na nzeru imweyo, koma alibe kungingimira kuti iwo acite bzomwe iye akhafuna. Kodi n’ciyani comwe iye adacita? Iye adayendesa nkhaniyo kwa apostolo na akulu ku Jeruzalemu. (Mab. 15:2) Bzimwebzi bzidathandiza kuti Akristau wa mu nthawe imweyire apitirize kukhala wakukondwa na wakubverana mu gwere. (Mab. 15:30, 31) Tikanesana na anzathu, bzingakhale bwino kukumbira thandizo kuna akulu wa gwere. Iwo angatithandize kuti tibverane pomwe na anzathuwo. Ndipo cinthu cinango comwe cingatithandize ni kufufudza m’mabukhu yathu kuti tidziwe bzomwe Bibliya limbalewa pa nkhani yomwe tanesanayo na kuwonambo malango yomwe gulu lathu limbapereka. Tikambateweza malangoyo na kutcenkha kungingimira nzeru zathu, tin’dzacitisa kuti abale na mpfumakazi m’gwere ambabverane. w22.08 22 ¶8-9

Nthawe zinango ifepano tingafune kuuza axamwali wathu nkhani zathu za cintsintsi. Tsono nthawe zinango bzimbanesa. Pinango thangwe rakuti tiribe kuzolowera kumbauza anzathu nkhani zathu ayai thangwe rakuti tidauza kale munthu nkhani ya cintsintsi koma tidadzabva kuti iye auzambo wanthu winango nkhaniyo. Tsono tentsenefe timbakomedwa tikakhala na xamwali omwe ambazimbula lini cintsintsi. Akulu omwe ambazimbula lini cintsintsi ali “ninga mbuto yakuthawira conzi na mbuto yakuwosera nvula yamphanvu” kwa abale na mpfumakazi zawo. (Zai. 32:2) Ifepano timbadziwa kuti akulu wa gwere mbakukhulupirika ndipo tikawauza nkhani za cintsintsi iwo an’dzauza lini munthu nkhanizo. Ndipo ifepano timbacita lini cinthu comwe cingacitise kuti iwo atiuze nkhani za cintsintsi za wanthu winango. Timbatendambo akazi wa akulu wa gwere thangwe iwo ambayezera lini kucitisa amuna wawo kuwazimbulira nkhani za cintsintsi za abale na mpfumakazi m’gwere. Ndipo mpsabwino kwene-kwene kudziwa kuti akulu wa gwere ambauza lini azikazawo nkhani za cintsintsi za abale na mpfumakazi. w22.09 11 ¶10-11

Ifepano tikukhulupira na mtima wentse kuti Yahova an’dzapulumusa atumiki wace wakukhulupirika pa “citsautso cikulu” comwe cikubwera. (Mat. 24:21; Dan. 12:1) Iye an’dzacita bzimwebzi pomwe mbverano wa mitundu ya wanthu wakudziwika na dzina lakuti Gogi wa Magogi an’dzafuna kupha atumiki wakukhulupirika wa Yahova. Napo mbverano umweyu ucidzakhala na madziko yentse yakukwana 193, yomwe yambacita mbali ya bungwe la Nações Unidas, un’dzakwanisa lini kukunda Mulungu Mkululetu na acikunda wace wa kudzulu! Thangwe ranyi? Thangwe Yahova adalewa kale kuti: “Nin’dzabzilemekeza, nin’dzabzicenesa ndipo nin’dzacitisa kuti mitundu ya wanthu indidziwe ndipo iwo an’dzadziwa kuti ine ndine Yahova.” (Ezek. 38:14-16, 23) Kupitira kwa Mulungu ndiko kun’dzacitisa kuti nkhondo ya Armagedo idzayambike. Ndipo pa nkhondo imweyi, Mulungu an’dzapfudza “amambo wa pa dziko lentse” la pantsi. (Apok. 16:14, 16; 19:19-21) Koma “wanthu wakulungama okha ndiwo an’dzakhala pa dziko la pantsi. Ndipo omwe akupitiriza kukhala wakukhulupirika an’dzakhala m’mwemo.” — Mim. 2:21. w22.10 16-17 ¶16-17

Timbadziwa lini bzomwe bziri mu mtima mwa abale wathu. ‘Yahova yekha ni omwe ambafufudza bzakulinga bza mtima wa munthu.’ (Mim. 16:2) Iye ambafuna wanthu wakucokera m’madziko yentse na bzikhalidwe bzakusiyana-siyana. Ndipo ambatiuza kuti ‘timbafunane kwene-kwene.’ (2 Ako. 6:13) Ifepano tin’funika kumbafuna abale na mpfumakazi zathu, sikuti kumbawalewa kuipa. Cinthu cinango comwe tin’funika lini kucita ni kumbakumbukira kuipa wanthu omwe ni Mboni lini za Yahova. Ifepano tin’funika lini kumbakumbukira kuipa famidya zathu zomwe ni Mboni lini ticimbalewa kuti: “Amwewa angadzakhale lini Mboni.” Tin’funika lini kucita bzimwebzi. Thangwe kucita bzimwebzi kungakhale kubzikuza na kubziwona kuti ndife wakulungama kuposa anzathu. Tin’funika kukumbukira kuti Yahova akupereka mpata kuna “wanthu wentse” kuti akungule. (Mab. 17:30) Ndipo tin’funikambo kukumbukira kuti kubziwona kuti ndife wakulungama kuposa anzathu ni kusaya cirungamo. Tikambafuna mitemo yakulungama ya Yahova tin’dzakhala wakukondwa ndipo wanthu winango an’dzawona makhalidwe yathu yabwino, an’dzatifuna na kufunambo kwene-kwene Mulungu. w22.08 31 ¶20-22

Pomwe tikuphata basa la kupalizira, timbadziwa kuti wanthu winango angatinyoze ayai kutitazisa kucita basali. Ndipo bzimwebzi bziniyenda bzicilemweratu kutsogoloku. (Dan. 11:44; 2 Tim. 3:12; Apok. 16:21) Tsono, ifepano timbadziwa kuti Yahova an’dzatithandiza. Kodi timbadziwa tani bzimwebzi? Timbadziwa bzimwebzi thangwe rakuti nthawe zentse Yahova ambathandiza atumiki wace kucita basa lomwe awapasa, napo acikhala akugumana na mabvuto makulu. Kodi iye ambacita tani bzimwebzi? Mbatiwoneni bzomwe bzidacitikira mpolofeta Zakiyeri pomwe akhapalizira Adjuda omwe akhali akapolo ku Babiloniya. Kodi Zakiyeri akhapalizira wanthu wa moda wanyi? Yahova adalewa kuti wanthu omwe Zakiyeri akhapalizira akhali “wantimbo,” “wamakani” na “wakupanduka.” Iwo akhali ninga minga na anyamkalize. Ndipopa Yahova adauza Zakiyeri kazinji-kentse kuti: “Leka kugopa”! (Ezek. 2:3-6) Zakiyeri adakwanisa kucita basa la kupalizira thangwe (1) akhadatumidwa na Yahova, (2) adapasidwa mphanvu na mzimu wakucena ndipo (3) adathandizidwa na Fala la Mulungu. w22.11 2 ¶1-2

Pa bzinthu bzentse bzomwe Yahova adalenga pa dziko la pantsi ni wanthu okha omwe adalengedwa kuti aleke kumbafa. Yahova adatipasambo mtima wakufuna kukhala na moyo kuyenda na kuyenda. Bibliya limbalewa kuti ‘Mulungu adapasa wanthu mtima wakufuna kukhala na moyo wa muyaya.’ (Mpal. 3:11) Ndipopa, ifepano timbafuna lini kufa. (1 Ako. 15:26) Tikaduwala, timbandokhala lini phee kudikhira kufa. Koma timbayenda ku xipitali kuti tikatambire mankhwala kuti tilimbe. Timbayezera umu na umu kuti tileke kufa. Ndipo xamwali wathu ayai m’bale wathu akasaika, bzimbatiwawa kwene-kwene, napo acikhala mwana ayai nkhalamba. (Juw. 11:32, 33) Bzikuwonekeratu kuti Mulengi wathu akhafuna kuti ifepano tikhale na moyo wakusaya kumala. Thangwe bzingadakhala kuti akhafuna lini angadatipasambo lini mtima wakufuna kukhala na moyo wakusaya kumalayo. w22.12 3 ¶5; 4 ¶7

Abale na mpfumakazi zathu angaduwale, kucita mantha ayai kugumana na mabvuto yanango yakusiyana-siyana mu ntsiku zakunesa zino. Pitirizani kumbaceza na abale na mpfumakazi zanu. Matenda yakayambika nthawe zinango timbafunika kukhala patali na patali na anzathu. Ndipo pa nthawe imweyi pinango tingabzibve ninga mpostolo Juwau. Iye akhafuna kuceza na xamwali wace Gayo maso a maso. (3 Juw. 13, 14) Tsono iye akhadziwa kuti bzimwebzi bzingadakwanisika lini. Ndipopa adamunembera tsamba. Mpsibodzi-bodzimbo na imwepo. Nthawe zinango bzingakhale bzakunesa kuceza na abale wanu maso na maso. Bzimwebzi bzikacitika, mungaphatise basa njira zinango kuti muceze nawo. Mukapitiriza kuceza na anzanu, imwepo mun’dzawona kuti ndimwe wakukhotcerereka ndipo mun’dzakhala wakugwa mpfuwa. Mukawona kuti muna thupo kwene-kwene, uzani akulu ndipo iwo an’dzakulimbikisani. — Zai. 32:1, 2. w22.12 17-18 ¶6-7

Bibliya limbalewa kuti Zuze adamangidwa minyendo yace ndipo mkhosi mwace mukhana makorenti. (Sal. 105:17, 18) Pa moyo wa Zuze, bzinthu bzidayenda bziciipiratu. Iye akhali kapolo omwe akhafunidwa, koma adadzafungiridwa m’kawoko. Kodi imwepo mudapemba kale kwa Yahova kuti akuthandizeni kumalisa bvuto lomwe mukhagumana nalo, koma bzinthu bzidayenda bzicilemweratu? Bzimwebzi bzingacitike. Yahova ambatikhotcerera lini mwakudabwisa kuti tileke kugumana na mabvuto mu dziko la Sathaniri. (1 Juw. 5:19) Tsono dziwani ibzi: Yahova ambawona mabvuto yentse yomwe mukugumana nayo ndipo ambakuthandizani. (Mat. 10:29-31; 1 Ped. 5:6, 7) Iye adalewa kuti: “Inepano nin’dzakusiya lini ndipo cipo ndicidzakuthawa.” (Aheb. 13:5) Yahova angakuthandizeni kupirira bvuto lomwe lingawoneke ninga kuti lingamale lini. w23.01 16 ¶7-8

Bibliya limbatiuza pomwe cinthu cinango comwe Yahova ambacita kuti alatize kuti ambatifuna. Iro limbalewa kuti Mulungu wathu an’dzatisiya lini tikamuphonyera. Ajirayeri akhaphonyera Yahova kazinji-kentse, tsono akakungula na mtima wawo wentse, Yahovayo akhawalekerera. Akristau wakuyambirira adawonambo kuti Mulungu ngwalufoyi. Mwakucita kutsogoleredwa na mzimu wakucena, mpostolo Paulo adauza Akristau wa ku Kolinto kuti ‘alekerere na kutsangalaza’ munthu omwe akhadacita pikado pomwe adakungula. (2 Ako. 2:6, 7; 1 Ako. 5:1-5) Bzimwebzi bzikulatiza kuti Yahova alibe kusiya atumiki wace thangwe rakuti adamuphonyera! Koma, iye adawatsimula ndipo adawathandiza kubwerera pomwe kwa iye. Ndipo iye an’dzacitambo bzibodzi-bodzibzi na munthu ali-wentse omwe an’cita pikado akakungula ntsiku zino. (Tiy. 4:8-10) Bibliya ndakufunika kwene-kwene thangwe limbalatiza kuti Yahova ngwanzeru, ngwacirungamo ndipo ngwalufoyi. Bukhu limweri limbalatiza kuti Yahova ambafuna kuti ifepano timudziwe. Iye akufuna kuti ifepano tikhale axamwali wace. w23.02 7 ¶16-17

Ifepano timbafunisisa kudziwa bzinthu bzomwe bzikucitisa kuti mapolofesiya ya m’Bibliya yakwanisike. Pomwe Jezu akhali pa dziko lapantsi, iye adalewa bzinthu bzakusiyana-siyana bzomwe bzingadadzatithandiza kudziwa kuti dziko la Sathaniri liri kufika kuphampha. (Mat. 24:3-14) Mpostolo Pedru adatiuza kuti tikhale tceru pomwe mapolofesiya ya m’Bibliya yakukwanisika kuti cikhulupiro cathu cipitirize kukhala cakulimba. (2 Ped. 1:20, 21) Iye akutithandiza kudziwa thangwe ranyi tin’funika kumbawona bzinthu bzomwe bzikucitisa kuti mapolofesiya ya m’Bibliya yakwanisike. Iye adaticenjeza kuti tipitirize “kukumbukira bza kubwera kwa ntsiku ya Yahova.” (2 Ped. 3:11-13) Thangwe ranyi? Sikuti thangwe rakuti tikufuna kuti tidziwe “ntsiku na nthawe” yomwe Yahova an’dzabweresa Armagedo, koma timbacita bzimwebzi thangwe tikufuna kuphatisa basa bwino nthawe yathu kuti tilatize ‘makhalidwe yakucena ticimbacita bzinthu bzomwe bzin’latiza kuti ndife wanthu wakubzipereka kwa Mulungu.’ (Mat. 24:36; Luk. 12:40) Ifepano tin’funa kudziwa bza kubwera kwa ntsiku ya Yahova kuti ticite bzomwe Yahova ambafuna na kulatizambo kuti timbamufuna. Kuti bzimwebzi bzikwanisike, tin’funika nthawe zentse kukhala wakucenjera ayai kukhala wakupenya. w23.02 16 ¶4, 6

Pana bzinthu bzomwe Akristau wa “mabira manango” an’funika kucita kuti adzapite m’Paraizo. Ifepano tin’funika kulatiza kuti timbafuna Akristau wakudzozedwa. Jezu adalewa kuti bzomwe timbacitira Akristau wakudzozedwawa bzingacitise kuti tidzatambire moyo wakusaya kumala ayai ne. (Mat. 25:31-40) Ifepano tingawathandize mwakumbacita basa la kupalizira na kupfunzisa wanthu na nyongo. (Mat. 28:18-20) Tin’funika lini kucita kudikhirira kupita m’Paraizo kuti tidzakhale na makhalidwe yomwe Yahova ambakomedwa nayo. Mpsabwino kuyambiratu nthawe zino kukhala na makhalidwe yabwino. Tin’funika kumbalewa cadidi na kumbacita bzinthu bzomwe Yahova ambakomedwa nabzo. Tin’funika kukhala wakukhulupirika kwa Yahova, kwa mkazathu ayai mwamuna wathu na kwa Akristau anzathu. Tikambacita bzinthu bzomwe Yahova ambakomedwa nabzo bzin’dzatinesa lini kumubvera m’Paraizo. Ifepano tin’funikambo kupfunza basa na bzinthu bzinango kuti tilatize kuti tikufuna kudzakhala m’Paraizo. w22.12 11-12 ¶14-16

Ifepano timbafuna kuti Jezu akhale Mambo wathu thangwe iye ni Mtongi wabwino. Ndipo Yahova adakonzekeresa Mwana wace kuti athemere kutonga. (Zai. 50:4, 5) Jezu adalatiza lufoyi likulu kwene-kwene. (Juw. 13:1) Pakuti Jezu ni Mambo wathu, ifepano tin’funika kumbamufuna. Iye adalewa kuti wanthu omwe ambamufuna na kubvera malamulo yace mbaxamwali wace. (Juw. 14:15; 15:14, 15) Kukhala xamwali wa Mwana wa Mulungu ni mwayi ukulu kwene-kwene! Imwepo mumbadziwa kuti Jezu ngwakubzicepesa ndipo ambatewezera makhalidwe ya Baba wace. Imwepo mudapfunza kuti iye adapasa cakudya wanthu omwe akhana njala, adalimbikisa omwe akhadawofoka ndipo adapoza omwe akhaduwala. (Mat. 14:14-21) Ndipo imwepo mukuwona kuti iye akutsogolera gwere lacikristau ntsiku zino. (Mat. 23:10) Ndipo imwepo mukudziwa kuti iye an’dzacita bzizinji kwene-kwene akadzatonga dzikoli. Kodi mungalatize tani kuti mumbamufuna Jezu? Imwepo mungacite bzimwebzi mwa kutewezera bzomwe iye adacita. Ndipo njira ibodzi yakucitira bzimwebzi ni kubzipereka na kubatizidwa. w23.03 4 ¶8, 10

Yahova adalenga bzinthu bza kudzulu na bza pa dziko la pantsi kuti atipfunzise makhalidwe yace. (Sal. 104:24, 25) Mbakumbukirani momwe iye adatilengera. Iye adalenga bzinthu bzakudeka kuti ifepano tikomedwe nabzo. Yahova adatilenga mu njira yakuti timbakwanise kuwona, kubva, kuphata, kulawidza na kubva mnuntci. Bibliya limbafotokoza bza phindu lomwe timbakhala nalo tikambawona cirengedwe. Phindulo ndakuti timbafika pa kudziwa makhalidwe ya Yahova. (Aro. 1:20) Tikambawona bzinthu bzomwe Yahova adalenga timbazindikira kuti iye ni Mulungu wanzeru kwene-kwene. Kumbukirani bza cakudya cabwino comwe timbadya. Bzentsenebzi bzimbalatiza kuti Yahova ambatifuna kwene-kwene. Cinango n’cakuti tikambawona bzinthu bzomwe iye adalenga, timbamudziwa bwino ndipo bzimbaticitisa kuti tikhale naye pa uxamwali bwakulimba. w23.03 16 ¶4-5

Pomwe dzikoli likuyenda liciipiratu, bzingakhale bzakunesa kwa ifepano kukhulupira Bibliya. Wanthu angatiuze bzinthu bzakunama bzomwe bzingaticitise kutazira kukhulupira Bibliya na kapolo wakukhulupirika na wanzeru omwe Yahova akuphatisa basa kuti atitsogolere ntsiku zino. Tsono tikabvuma na mtima wathu wentse kuti Bibliya ni Fala la Mulungu, ifepano tin’dzabvuma lini kuti cikhulupiro cathu cicepe. Ifepano ‘tin’dzabvera malamulo ya Yahova nthawe zentse, mpaka kale-kale.’ (Sal. 119:112) Ifepano ‘tin’dzacita lini manyazi’ kuuza wanthu cadidi ca m’Bibliya na kuwalimbikisa kuteweza mitemo ya Yahova. (Sal. 119:46) Ndipo tin’dzakwanisambo kupirira mabvuto makulu yomwe tingagumane nayo na kuzunzidwa ticipitiriza kukhala ‘wakukondwa.’ (Akol. 1:11; Sal. 119:143, 157) Cadidi cimbatipasa cidikhiro ndipo cimbatithandiza kuti bzinthu bzitifambire bwino pa moyo wathu. Cadidici cimbatipasambo cidikhiro ca kudzakhala na moyo wabwino pomwe dzikoli lin’dzakhala likutongedwa na Umambo bwa Mulungu. w23.01 7 ¶16-17

Pa usiku bwakumalizira bwa moyo wace pantsi pano, Jezu adapempherera anyakupfunza wace. Ndipo adakumbira Baba wace kuti ‘awanyang’anire thangwe ra nyakuipayo.’ (Juw. 17:15) Bzimwebzi bzikulatiza kuti Jezu akhawafuna kwene-kwene anyakupfunza wacewo. Napo kuti akhadziwa kuti akhadasala pang’ono kuti agumane na mabvuto pa moyo wace, iye akhacita thupo na apostolo wace. Ifepano timbatewezera Jezu mwa kuleka kumbandokumbukira bzomwe tikufuna basi. Koma timbakumbukirambo abale na mpfumakazi zathu mwa kumbawapempherera nthawe zentse. Tikambacita bzimwebzi, timbakhala tikuteweza lamulo la Jezu lakuti timbafunane ndipo pa nthawe ibodzi-bodziyo timbalatizambo kwa Yahova kuti timbafuna kwene-kwene Akristau anzathu. Kupempherera abale na mpfumakazi zathu n’kutaya lini nthawe. Fala la Mulungu limbatiuza kuti “mpembo wakudandaulira wa munthu wakulungama una mphanvu kwene-kwene.” (Tiy. 5:16) Abale wathu akufunikira mipembo yathu thangwe akugumana na mabvuto mazinji. w22.07 23-24 ¶13-15