Julho

Kulewalewa ni mphaso yakucokera kwa Mulungu wathu omwe ngwalufoyi. Napo bziri tenepo mphaso yakulewalewa idaphatisidwa basa kuipa. Sathani Dyabu adanamiza Eva ndipo kunama kwaceko kudacitisa kuti wanthu akhale wakuperewera na wapikado. (Gen. 3:1-4) Adamu adaphatisambo basa kuipa mphaso yakulewalewayi pomwe iye adaphonya. Iye adapasa mulandu Eva na Yahova kuti ndiwo adacitisa kuti iye aphonye. (Gen. 3:12) Pomwe Kaini adapha m’bale wace, iye adanamiza Yahova. (Gen. 4:9) Ndipo ntsiku zino, mavidiyo mazinji na nyimbo bzimbakhala na mafala yakuipa. Wana ambabva mafala yakuipa ku xikola ndipo akulu-akulu ambayabva ku basa. Tikasaya kuwona bwino, ifepano tingayambembo kumbalewalewa mafala ya kuipa, thangwe tazolowera kubva wanthu azinji akuyalewa. Pakuti ndife Akristau, tin’funa kuti Yahova ambakomedwe nafe. Kuti ticite bzimwebzi, tin’funika lini kundotcenkha mafala yakutukwana basi, koma tin’funikambo kumbaphatisa basa bwino mphaso ya kulewalewa kuti titumbize Mulungu wathu. w22.04 4 ¶1-3

Jezu akhambawona bzinthu mwacikati-kati. Iye akhambadya na kumwa. (Luk. 19:2, 6, 7) Pa nthawe inango, iye adasandusa madzi yacikhala vinyu yabwino kwene-kwene, ndipo cimweci cikhali cakudabwisa comwe iye adayamba kucita. (Juw. 2:10, 11) Pa ntsiku yomwe adaphedwa, iye akhadabvala cakubvala cakuumira. (Juw. 19:23, 24) Tsono Jezu akhawona lini kuti bzinthu bzomwe akhanabzobzo bzikhali bzakufunika kwene-kwene pa moyo wace. Jezu adapfunzisa kuti tikaikha Umambo pa mbuto yakuyamba, Yahova an’dzatipasa bzentse bzomwe tikufunikira pa moyo wathu. Abale na mpfumakazi azinji agumana phindu thangwe ra kuphatisa basa malango yakucokera kwa Mulungu pa nkhani ya kobiri. Onani bzomwe m’bale m’bodzi omwe akanati kulowola, wakucemeredwa Daniel, adacita. Iye adati: “Pomwe ndikhali mulumbwana, ndidasankhula kuikha kutumikira Yahova pa mbuto yakuyamba pa moyo wangu.” Daniel alibe kufuna kukhala na bzinthu bzizinji pa moyo wace, ndipopa iye adakwanisa kuphatisa basa nthawe na luso lace pa kuthandizira kukagwa malengwa ya pantsi na kutumikira pa Beteli. Iye adalewa pomwe kuti: “Napo kuti kobirizo zingadakhala zizinji kwene-kwene, izo zingadandendemera lini na bzisimbo bzomwe Yahova wandipasa.” w22.05 21-22 ¶6-7

Ifepano tingalatize kuti timbafuna cadidi mwa kumbapfunza Bibliya na mabukhu yakukonzedwa na kapolo wakukhulupirika na wanzeru. Kuposa bzentse, ifepano tin’funika kupitiriza kumbapfunza bzinthu bzizinji bza m’Bibliya napo kuti tiri m’cadidi kuyambira kale-kale. Kupfunza kulibe kupusa, koma pambafunika nyongo. Pinango imwepo mumbaneseka kupfunza. Napo bziri tenepo, Yahova akutikumbira kuti ‘tipitirize kunyang’ana’ na ‘kupitiriza kufufudza’ cadidi kuti ticibvesese bwino. (Mim. 2:4-6) Tikacita nyongo yakupfunza, ifepano tin’dzagumana phindu. Pa nkhani yakucita pfunziro la patekha, m’bale Corey adalewa kuti ambapfunza vesi liri-lentse palokha. Iye adafotokoza kuti: “Inepano nimbawerenga mafala ya m’nyantsi ya vesi liri-lentse ndipo nimbawerengambo mareferentsiya na nkhani zinango zakulewa bza nkhaniyo. . . . Kucita bzimwebzi kumbandithandiza kudziwa bzinthu bzizinji!” Penu timbaphatisa basa njira imweyi ayai njira inango, bzentse bziri bwino. Tikambaphatisa basa nthawe yathu pakupfunza, timbalatiza kuti timbatenda cadidi. — Sal. 1:1-3. w22.08 17 ¶13; 18 ¶15-16

Pomwe Jezu akhali pa dziko la pantsi pano, adaphatisa basa cirengedwe kuti apfunzise anyakupfunza wace bza Baba wace. Mbatiwoneni cinthu cibodzi pa bzinthu bzomwe iye adapfunzisa. Yahova ambalatiza lufoyi lace kwa wanthu wentse. Pa Nkhani ya pa Phiri, Jezu adaphatisa basa dzuwa na nvula thangwe bzikhali bzinthu bzomwe wanthuwo akhabzidziwa bwino. Bzinthu bziwiribzi mpsakufunika kuti wanthu akhale na moyo. Yahova angadafuna angadapasa lini bzinthu bzimwebzi wanthu omwe ambamutumikira lini. Tsono iye ambagasira dzuwa na kubvumbisira nvula wanthu wentse. (Mat. 5:43-45) Jezu adapfunzisa anyakupfunza wace kuti Yahova ambafuna kuti ifepano timbalatize lufoyi kwa wanthu wentse. Tikambawona kumira kwa dzuwa na nvula, ifepano timbakwanisa kuwona kuti Yahova ana lufoyi kwa wanthu wentse. Ndipo bzimwebzi bzimbatithandiza kuti timbalatizembo lufoyi kwa wanthu wentse mwa kuwapalizira. w23.03 17 ¶9-10

Kodi n’ciyani comwe cidadabwisa mpostolo Juwau? Akhali mkazi omwe akhadapakira cirombo cifuira. Iye akhadziwika na dzina lakuti “puta mkulu” na “Babiloniya Mkulu.” Iye ambacita “uputa” na “amambo wa pa dziko la pantsi.” (Apok. 17:1-5) Kodi “Babiloniya Mkulu” n’ciyani? Mkazi umweyu angakhale lini bungwe la ndale, thangwe bukhu la Apokalipse likulewa kuti iye akucita uputa na atsogoleri wa ndale wa m’dzikoli. (Apok. 18:9) Kulewa cadidi, iye ambayezera kutonga atsogoleriwa, bzomwe bziri ninga kuwapakira. Ndipo angakhale lini anyamalonda wa m’dziko la Sathaniri thangwe bukhu la Apokalipse limbawagumambo pawokha kuti “anyamalonda wa pa dziko la pantsi.” (Apok. 18:11, 15, 16) Kale-kale, mzinda wa Babiloniya ukhali likulu la kunamata kwakunama. Ndipopa tingalewe kuti Babiloniya Mkulu ni kunamata kwentse kwakunama. Inde, Babiloniya Mkulu ni magereja yakunama ya pa dziko lentse. — Apok. 17:5, 18. w22.05 11 ¶14-16

Mai omwe ni Mkristau ambabzibvunza penu wana wace an’dzatumikira Yahova ninga momwe Timotio adacitira. Abereki ambadziwa kuti mu dziko la Sathaniri muna wanthu omwe ambafuna kupumpsa wana wawo kuti ambacite bzinthu bzakuipa. Ndipo azimai azinji ambagumana na mabvuto pakulera wana wawo, thangwe rakuti alibe mwamuna ayai mwamunayo ambanamata lini Yahova. N’cadidi kuti mpfumakazi zomwe zikupfunzisa zokha wana thangwe rakuti mwamuna ambanamata lini Yahova zimbagumana na mabvuto, tsono ndiwo lini okha. Napo bzicikhala kuti abereki wentse awiri, akutumikira Yahova, bzingawanesembo kupfunzisa wana wawo mpaka kukhala atumiki wa Yahova. Tsono lekani kukhala na thupo. Yahova an’kuthandizani. Ndipo mungabvunzembo abereki winango omwe ambaphatisa basa bzinthu bzomwe gulu lathu linabzo kuti mudziwe momwe iwo ambacitira. (Mim. 11:14) Pembani kwa Yahova kuti akuthandizeni kucita mibvunzo yomwe in’dzacitisa kuti wana wanu atsudzuke kukuuzani bzomwe akukumbuka na momwe akubvera. — Mim. 20:5. w22.04 17 ¶4, 7; 18 ¶9

Kuti timbafune kwene-kwene Yahova, tin’funika kumudziwa bwino Jezu, thangwe iye adatewezera bwino-bwino makhalidwe ya Baba wace. (Aheb. 1:3) Cinthu cabwino comwe tingacite kuti timudziwe bwino Jezu ni kupfunza mabukhu ya m’Bibliya yomwe yambafotokoza bza moyo wace. Penu imwepo mukanati kuyamba kuwerenga Bibliya ntsiku zentse, bzingakhale bwino kuyamba. Mukacita bzimwebzi, mun’dzamudziwa bwino Jezu. Pomwe mukuwerenga nkhani zakulewa bza moyo wa Jezu Kristu, onani makhalidwe yabwino yomwe iye akhanayo. Iye akhali munthu wakufikirika, ndipo akhalatiza lufoyi kuna wana mwa kuwanyamula m’manja mwace. (Mar. 10:13-16) Jezu akhali wakudeka mtima ndipo anyakupfunza wace akhagopa lini kumuuza bzinthu. (Mat. 16:22) Jezu akhalatiza makhalidwe yamweya pakutewezera Baba wace wa kudzulu. Yahova ngwakufikirikambo, ndipopa ifepano tingalewelewe naye mu mpembo. Tikambapemba, tingamuuze bzentse bzomwe bzikuticitisa thupo. Ndipo iye an’dzacita lini nafe ciya ayai kutipasa mulandu. Iye ambatifuna na kutithandiza. — 1 Ped. 5:7. w22.08 3 ¶4-5

Yahova ambatidziwa bwino-bwino thangwe ndiye omwe adatilenga. Mpsabwino kudziwa kuti Yahova ambadziwa bwino-bwino momwe munthu ali-wentse pa dziko la pantsi pano adakonzedwera. (Sal. 139:15-17) Ndipopa iye ambakwanisa kuwona bzentse bzomwe timbaphonya thangwe ra pikado yomwe tidatambira kucokera kwa abereki wathu. Iye ambadziwa bzomwe bzidacitika pa moyo wathu ndipo ambadziwambo kuti bzimwebzi bzidacinja tani unthu bwathu. Kodi kudziwa bzimwebzi kumbacitisa kuti Yahova aticitire ciyani? Bzimwebzi bzimbamucitisa kuti ambatibvere ntsisi tikamuphonyera. (Sal. 78:39; 103:13, 14) Yahova adalatiza kuti ambafunisisa kutilekerera. Iye ambadziwa kuti bzomwe Adamu adacita, bzidacitisa kuti tentsenefe tikhale na pikado ndipo timbafe. (Aro. 5:12) Palibe bzomwe ifepano tingadacita kuti tibzipulumuse tekha na kupulumusambo anzathu ku mabvuto yamweya. (Sal. 49:7-9) Tsono, Mulungu wathu walufoyi adatilatiza ntsisi mwa kunyang’ana njira kuti atipulumuse. Pa Juwau 3:16 pambalewa kuti Yahova adatuma Mwana wace wakubadwa-yekha kuti adzatifere. — Mat. 20:28; Aro. 5:19. w22.06 3 ¶5-6

Yahova adalatiza kuti anyakulekerera anzawo an’dzalekereredwambo pomwe akhalewalewa na mtumiki wace Djobi. Munthu wakukhulupirikayu akhawawidwa kwene-kwene na bzinthu bzomwe Elifazi, Bilidadi, na Zofari adalewa. Yahova adauza Djobi kuti awapempherere. Pomwe Djobi adacita bzimwebzi, Yahova adamubaira. (Djob. 42:8-10) Tikambakoya cakumtima, timbabzipweteka tekha. Ukali buli ninga cimtolo cakulemera. Ndipo Yahova akudziwa kuti tikatula cimtolo cimweci, tin’pepukidwa. (Aef. 4:31, 32) Ndipopa, iye ambatiuza kuti ‘tileke kukhala na ciya.’ (Sal. 37:8) Mpsabwino kwene-kwene kuteweza malango yamweya. Tikambakoya cakumtima, ifepano tingakhale lini na manungo yabwino. (Mim. 14:30) Ndipo tikapitiriza kukhala na ciya na mwanzathu, timbakhala ninga kuti tamwa veneno. Venenoyo ingapweteke lini mwanzathuyo, koma in’pweteka ifepano. Ndipopa tikalekerera anzathu, ifepano timbakhala na phindu. Ifepano timbakhala na mtendere mu mtima mwathu ndipo timbapitiriza kutumikira Yahova mwakukondwa. w22.06 10 ¶9-10

Cidikhiro cathu cimbakhala ninga kapaseti thangwe cimbatikhotcerera kuti tireke kukhala na nzeru zakuipa, zomwe zingaticitise kudzonga uxamwali bwathu na Yahova. (1 Ako. 15:33, 34) Cidikhiro cathu cimbatithandizambo kutcenkha kukumbuka kuti tingakwanise lini kucita bzomwe Yahova ambakomedwa nabzo. Kumbukirani kuti xamwali wakunama wa Djobi wakucemeredwa Elifazi adauza Djobiyo mafala ninga yamweya. Iye adati: “Kodi munthu wakucokera ku pfumbi angakhalembo wakucena?” Ndipo iye adalewa pomwe kuti: “Ona! Mulungu ambakhulupira lini anjo wace, ndipo napo kudzulu caikoku iye ambakuwona kuti kudapswipa basi.” (Djob. 15:14, 15) Mafala yamweya ngakunama. Ndipo kumbukirani kuti Sathani ambafuna kuti imwepo mumbakumbukembo tenepoyo. Thangwe ambadziwa kuti mukakhala na nzeru zimwezi mungasiye kukhala na cidikhiro. Ndipopa cosani nzeru zimwezi mu mtima mwanu. Khulupirani kuti Yahova akufuna kuti imwepo mudzakhale na moyo wakusaya kumala ndipo iye an’dzakuthandizani kukhala nawo. — 1 Tim. 2:3, 4. w22.10 25-26 ¶8-10

Sathani akhafuna kucitisa Djobi kukhulupira kuti iye akhabonera thangwe rakuti Mulungu akhamufuna lini pomwe. Sathani adaphatisa basa conzi kuti cigwese nyumba yomwe wana 10 wa Djobi akhadyera. (Djob. 1:18, 19) Ndipo iye adacitisambo kuti moto ucoke kudzulu ucicontha bzifuwo bza Djobi pabodzi na anyabasa wace omwe akhabziusa. (Djob. 1:16) Moto na conzico bzidacokera kudzulu, ndipopa Djobi adakumbuka kuti ni Mulungu omwe adabzicitisa. Thangwe ra bzimwebzi, Djobi adakumbuka kuti pakhana cinthu comwe akhadaphonyera Yahova. Napo bzikhali tenepo, iye adalamba kutukwana Baba wace wa kudzulu. Djobi akhadziwa kuti bzinthu bzentse bzabwino bzomwe akhanabzo pa moyo wace bzikhadacokera kwa Yahova. Ndipopa iye adayamba kukumbuka kuti, penu Mulungu adamupasa bzinthu bzabwino ndipo adatambira, ndiye kuti akhafunikambo kubvuma kutambira bzinthu bzakuipa. Ndipopa iye adati: “Dzina la Yahova lipitirize kutumbizidwa.” — Djob. 1:20, 21. w22.06 21 ¶7

Jezu adacenjezambo anyakupfunza wace mwa kuwauza mafala ya pa Juwau 17:14. Ifepano tikukwanisa kuwona kukwanisika kwa polofesiya imweyi, maka-maka m’magole 100 yakumaliziraya. Kodi ikukwanisika tani? Pomwe padapita nthawe yakucepa kucokera pomwe Kristu adakhala Mambo wa Umambo bwa Mulungu mu 1914, Sathani adathusidwa pantsi pano. Ntsiku zino iye ali pantsi pano pomwe akudikhirira ntsiku yace ya kupfudzidwa. (Apok. 12:9, 12) Tsono iye alibe kundokhalambo tenepoyo. Iye adakalipa kwene-kwene ndipo akutulira ciya caceco pa wanthu wa Mulungu. (Apok. 12:13, 17) Ndipopa ntsiku zino, dzikoli limbawenga kwene-kwene wanthu wa Mulungu. Tsono ifepano tin’funika lini kugopa Sathani na wanthu wace. Koma tin’funika kukhala na citsimikizo ninga comwe mpostolo Paulo akhanaco. Iye adanemba kuti: “Penu Mulungu ali ku mbali yathu, mbani an’dzatigaza?” (Aro. 8:31) Ifepano tingakhulupire Yahova na mtima wentse. w22.07 18 ¶14-15

Jezu akhacita lini thupo kuti pinango ni wanthu ang’ono-ng’ono omwe angadadzacita basa la kupalizira kuphampha kwa dzikoli. Iye akhadziwa kuti polofesiya ya pa Salimo ingadadzakwanisika. Polofesiyayi imbati: “Wanthu wako an’dzabzipereka mwakufunisisa pa ntsiku yomwe un’dzatsogolera acikunda wako ku nkhondo.” (Sal. 110:3) Penu imwepo mukucitambo basa la kupalizira, ndiye kuti mukuthandizira Jezu na kapolo wakukhulupirika ndipo mukuthandizirambo kuti polofesiyayi ikwanisike. Basali likufamba bwino, tsono pana mphitca zinango. Mphitca ibodzi yomwe apalizi wa Umambo ambagumana nayo ni kugazidwa. Apanduki, atsogoleri wa magereja na wanthu wa ndale ambauza wanthu bzinthu bzakunama pakulewa bza basa lathu. Adzinza wathu, anzathu wa ku basa na wanthu winango omwe timbawadziwa akabva mafala yakunamaya, iwo angacite ciri-centse kuti aticitise kusiya kutumikira Yahova na kupalizira. M’madziko manango, abale wathu ambagopswedwa, kumangidwa na kuikhidwa m’kawoko. w22.07 8 ¶1; 9 ¶5-6

Yahova ambafuna kuti timbakhale na nthawe ya kupfunza Bibliya na kukumbukira bzomwe timbapfunzabzo. Tikambaphatisa basa bzomwe timbapfunza, cikhulupiro cathu cimbalimba ndipo timbakhala pa uxamwali bwakulimba na Baba wathu wa kudzulu. Bzimwebzi bzimbatithandiza kukhala wakulimba kuti tikwanise kupirira tikakhala tikugumana na mabvuto. Ndipo Yahova ambaperekambo mzimu wakucena kuna wale omwe ambathemba Fala lace. Mzimu wakucenayo ungatipase “mphanvu yakuposa yacibadwa” kuti tipirire mabvuto yomwe tikugumana nayo. (2 Ako. 4:7-10) Mwakuthandizidwa na Yahova, “kapolo wakukhulupirika na wanzeru” ambakonza bzinthu bzizinji bzauzimu kuti bzitithandize kulimbisa cikhulupiro cathu na kuticitisa kukhala wakupenya mwauzimu. Iye ambakonza mabukhu, mavidiyo na nyimbo. (Mat. 24:45) Yahova ambapfunzisa wanthu wace kuti ambafunane na kutsangalazana pa nthawe zakunesa. (2 Ako. 1:3, 4; 1 Ates. 4:9) Abale na mpfumakazi zathu ambafunisisa kutithandiza kuti tipitirize kukhala wakukhulupirika pomwe tikugumana na mabvuto. w22.08 12 ¶12-14

Mwa kumbauza anzathu makhalidwe yabwino yomwe abale na mpfumakazi zathu anayo, timbacitisa kuti iwo afune kukhala pa uxamwali bwa ponda-ndipondembo. Ndipo bzimwebzi bzin’dzacitisa kuti iwo ambafunane kwene-kwene m’gwere. Nthawe zinango Akristau wakukhwima mwauzimu anganesane. Ndipo mpsimwebzi bzomwe bzidacitikira mpostolo Paulo na Barnaba. Iwo adanesana kwene-kwene thangwe rakuti Barnaba akhafuna kuti iwo atenge Marko pa ulendo bwawo bwa umisiyonariyo, tsono Paulo akhafuna lini. “Iwo adakalipizana kwene-kwene” ndipo adafika pa kumwazana. (Mab. 15:37-39) Tsono Paulo, Barnaba na Marko adadzabverana pomwe. Pomwe padapita nthawe, Paulo adadzalewa makhalidwe yabwino yomwe Barnaba na Marko akhanayo. (1 Ako. 9:6; Akol. 4:10) Mpsibodzi-bodzimbo na ifepano. Tikanesana na anzathu, tin’funika kucita ciri-centse kuti tibverane pomwe ndipo timbapitirize kumbawona makhalidwe yabwino yomwe abale na mpfumakazi zathu anayo. Tikacita bzimwebzi, tentse tin’dzakhala wakubverana. w22.08 23 ¶10-11

Pomwe tikucita nyongo kuti titeweze mitemo yakulungama ya Yahova, tin’funika kutcenkha kumbandendemezera bzomwe ifepano tikucita na bzomwe anzathu akucitambo, ticimbakumbuka kuti ifepano tikucita bzinthu bzabwino kuposa iwo. Tin’funika kukumbukira kuti Yahova ni “Muyeruzi wa dziko lentse la pantsi.” (Gen. 18:25) Yahova alibe kutipasa ugo bumwebu. Zuze alibe kupasa mulandu wanthu omwe adamucitira bzinthu bzakuipa. Abale wace caiwo adamuphata acimuthusa mu mcera wakusaya madzi, adamugulisa kuti akakhale kapolo ndipo adanamiza pai wawo kuti iye wafa. Pomwe padapita magole, Zuze adadzawonana pomwe na abale wace. Tsono pa nthawe imweyi, iye akhali mtongi waciwiri ku Edjipito. Ndipo akhana mphanvu yakutonga abale wace na kuwabwereza. Abale wacewo akhagopa kuti iye angadacita bzimwebzi napo kuti iwo akhadakungula na mtima wawo wentse. Tsono Zuze adawauza kuti: “Lekani kugopa. Kodi ine ndapita m’mbuto mwa Mulungu?” (Gen. 37:18-20, 27, 28, 31-35; 50:15-21) Zuze akhali wakubzicepesa, ndipopa adazindikira kuti ni Yahova yekha omwe akhana ugo bwakutonga abale wacewo. w22.08 30 ¶18-19

Kodi imwepo mukudziwa kuti Yahova angakuphatiseni basa kuti atawire mipembo ya atumiki wace wakukhulupirika? Inde, Yahova angakuphatiseni basa. Iye angaphatise basa mkulu wa gwere, mtumiki wakuthandiza, mpainiya ayai mpalizi ali-wentse m’gwere. Iye angakuphatisenimbo basa napo penu ndimwe mwana, wacikulire, m’bale ayai mpfumakazi. M’bale ayai mpfumakazi akakumbira Yahova thandizo, kazinji-kazinji Yahova ambaphatisa basa akulu na abale winango wakukhwima mwauzimu kuti apereke “mtsangalazo ukulu” kuna munthuyo. (Akol. 4:11) Ni mwayi ukulu kwene-kwene kuphatisidwa basa na Yahova kuti tithandize abale wathu mu njira imweyi! Ndipo ifepano tina mwayi wakucita bzimwebzi pa nthawe ya matenda, kukacitika malengwa ya pantsi ayai abale wathu akakhala akuzunzidwa. Ndipo tingafune kuthandiza anzathu, koma bzingakwanisike lini, pinango thangwe rakuti adzinza wathu akugumanambo na mabvuto. Ifepano timbafuna kuthandiza abale wathu, ndipo Yahova ambakomedwa kwene-kwene akatiwona tikuwathandiza. — Mim. 19:17. w22.12 22 ¶1-2

Lufoyi limbatithandiza kukhala munthu wakukhulupirika. Jezu adalewa kuti malamulo mawiri yakufunika kwene-kwene ndiyo kufuna Yahova na kufuna anzathu. (Mat. 22:37-39) Tikambafuna Yahova, ifepano tin’dzafunisisa kutewezera kukhulupirika kwace. Ndipopa tingalewe kuti kufuna abale na mpfumakazi zathu kun’dzaticitisa kutcenkha kumbauza wanthu winango nkhani za cintsintsi. Ndipo tin’dzalewa lini cinthu comwe cingacitise m’bale ayai mpfumakazi kubva manyazi ayai kuwawidwa naco. Kubzicepesa kun’dzatithandiza kukhala munthu wakukhulupirika. Mkristau wakubzicepesa ambafuna lini kukhala wakuyambirira kuuza wanthu nkhani kuti awoneke kuti ambadziwa nkhani zizinji. (Afil. 2:3) Ndipo ambawonesa lini wanthu kuti ana nkhani za cintsintsi zomwe angazilewe lini. Kubzicepesa kun’dzatithandizambo kutcenkha kumbauza wanthu nkhani za mu msolo mwathu zomwe zimbalewedwa lini m’Bibliya ne m’mabukhu yathu. w22.09 12 ¶12-13

Anjo adauza Daniyeli kuti wanthu wa Mulungu angadadzabvesesa mapolofesiya mazinji ya m’bukhu la Daniyeli mu ntsiku zakumalizira, ndipo “palibe munthu wakuipa omwe [angadadzabvesesa] mafala yamweya.” (Dan. 12:10) Ino ni nthawe yakulatiza kuti timbafuna kucita bzinthu bzabwino. (Malak. 3:16-18) Yahova akukonkhanisa wanthu omwe ambawawona ninga “cuma cakupambulika”; wanthu omwe mbakufunika kwene-kwene kwa iye. Ndipo ifepano tikufunambo kukhala m’bodzi wa iwo. Ifepano tikukhala mu nthawe zakudekeza kwene-kwene. Tsono pana bzinthu bzinango bzabwino kwene-kwene bzomwe bzin’citika tsapanopapa. Ifepano tiniwona kumala kwa dziko lakuipali. Bzimwebzi bzikamala, tin’dzawona bzomwe Yahova adauza Daniyeli bzikucitika. Iye adamuuza kuti: “Kuphampha kwa ntsikuzo un’dzalamuka kuti udzatambire gawo lako.” (Dan. 12:13) Kodi imwepo mukufuna lini kudzawona Daniyeli pabodzi na adzinza wanu ‘akulamusidwa’ kwa anyakufa? Penu mukufuna, citani nyongo kuti mupitirize kukhala wakukhulupirika kwa Yahova. Mukacita bzimwebzi, dzina lanu lin’dzapitiriza kukhala lidanembedwa mu bukhu la moyo la Yahova. w22.09 24 ¶17; 25 ¶19-20

Mafala yamweya yadapasa mphanvu Zakiyeri. Thangwe ranyi tikulewa tenepoyo? Tikulewa tenepoyo thangwe rakuti pomwe Zakiyeri adabva mafalaya, iye adakumbukira kuti Yahova akhadalewa kale mafala yakundendemerana na yamweya pomwe adasankhula Mozeji na Zaiya kuti akhale apolofeta wace. (Eki. 3:10; Zai. 6:8) Ndipo Zakiyeri akhadziwambo kuti Yahova adathandiza tani apolofeta awiriwa kukunda mphitca zakusiyana-siyana. Ndipopa, pomwe Yahova adauza Zakiyeri kawiri-kentse kuti: “Inepano ndikukutuma,” iye adadziwiratu kuti Yahovayo angadamuthandiza. Ndipo Zakiyeri adanemba kazinji-kentse kuti: “Fala la Yahova lidafika kwa inepano.” (Ezek. 3:16) Mafala yamweya yakuti: “Fala la Yahova lidafika kwa inepano” yambagumanika kazinji-kentse mu bukhu la Zakiyeri. (Ezek. 6:1) Bzikuwonekeratu padeca kuti Zakiyeri akhakhulupira na mtima wentse kuti akhadatumidwa na Yahova. Ndipo cinango n’cakuti, Zakiyeri akhali mwana wa wantsembe. Pinango-pentse pai wace adamupfunzisa kuti Yahova adathandiza tani apolofeta wace wakale-kale. Yahova adauza Izaki, Djakobo na Jeremiya kuti: “Inepano ndinawe.” — Gen. 26:24; 28:15; Jer. 1:8. w22.11 2 ¶3

Adamu na Eva adacita pikado ndipo adacitisa kuti wana wawo wentse ambafe. Tsono bzomwe Yahova akufuna bziribe kucinja. (Zai. 55:11) Iye akufuna kuti wanthu wakukhulupirika adzakhale na moyo wakusaya kumala. Tikulewa bzimwebzi thangwe ra bzinthu bzomwe iye adalewa na kucita kuti bzimwebzi bzikwanisike. Yahova adalewa kuti an’dzalamusa anyakufa acidzawapasa moyo wakusaya kumala. (Mab. 24:15; Tito 1:1, 2) Djobi, omwe akhali munthu wakukhulupirika, akhakhulupira kuti Yahova an’dzalamusa wanthu wakufa. (Djob. 14:14, 15) Ndipo mpolofeta Daniyeli akhakhulupirambo kuti wanthu an’dzalamusidwa acidzakhala na mwayi wakukhala na moyo wakusaya kumala. (Sal. 37:29; Dan. 12:2, 13) Adjuda wa mu nthawe ya Jezu akhakhulupirambo kuti Yahova an’dzapasa atumiki wace wakukhulupirika “moyo wakusaya kumala.” (Luk. 10:25; 18:18) Jezu adafotokoza kazinji-kentse nkhani yakulamusidwa kwa anyakufa, ndipo iyeletu adalamusidwa na Baba wace pomwe akhadafa. — Mat. 19:29; 22:31, 32; Luk. 18:30; Juw. 11:25. w22.12 4-5 ¶8-9

Yahova ambafuna kuti tikhale axamwali wace. (Tiy. 4:8) Iye ambafuna kukhala Mulungu wathu, Baba wathu na Xamwali wathu. Iye ambatawira mipembo yathu ndipo ambatithandiza tikakhala tikugumana na mabvuto. Ndipo iye ambaphatisambo basa gulu lace kuti atipfunzise na kutikhotcerera. Kuti tikhale axamwali wa Yahova, tin’funika kumbapemba kwa iye, kumbawerenga Fala lace na kumbakumbukira bzomwe tawerengabzo. Tikacita bzimwebzi, ifepano tin’dzamufuna kwene-kwene Yahova na kumbamutenda. Ndipo tin’dzamubvera, thangwe iye ngwakuthemera kucitiridwa bzimwebzi. (Apok. 4:11) Tikamudziwa bwino Yahova, tin’dzamukhulupira na kukhulupirambo gulu lace lomwe iye adalikhazikisa kuti litithandize. Sathani ambafuna kutilekanisa na Yahova ndipo iye ambadziwa kuti mpsakupusa pomwe tikugumana na mabvuto. Kodi iye ambacita tani? Iye ambaticitisa kuti pang’ono na pang’ono tisiye kukhulupira Yahova na gulu lace. Tsono ifepano tingakwanise kubzikhotcerera. Kuti tibzikhotcerere, tin’funika kulimbisa cikhulupiro cathu kwa Yahova. Tikacita bzimwebzi, tin’dzapitiriza kukhala wakukhulupirika kwa Mulungu wathu na kukhulupirambo gulu lace. — Sal. 31:13, 14. w22.11 14 ¶1-3

Akristau wacadidi azinji ambaikha ufulu bwawo pabodzi na moyo wawo pa ngozi thangwe ra kufuna Yahova omwe ni Mtongi Mkululetu. Akristau amwewa ali ninga Ahebereu atatu omwe adapitiriza kukhala wakukhulupirika kwa Mulungu Mkululetu, omwe adawapulumusa mu forno ya moto. Pa nkhani ya kufunika kwa kupitiriza kukhala wakukhulupirika kwa Mulungu, nyakunemba Salimo Davide adanemba kuti: “Yahova an’dzatonga wanthu. Nditongeni imwe Yahova, mwakubverana na kulungama kwangu ndipo nditongeni mwakubverana na kukhulupirika kwangu.” (Sal. 7:8) Davide adanemba pomwe kuti: “Kukhulupirika kwangu na kulungama kwangu bzindikhotcerere.” (Sal. 25:21) Cinthu cabwino comwe tingacite ni kupitiriza kukhala wakukhulupirika kwa Yahova! Tikacita bzimwebzi, ifepano tin’dzalewa mafala ninga yomwe nyakunemba Salimo adalewa. Iye adati: “Wakupfatsa ni wale omwe mbakusaya kuphonya . . . , omwe ambateweza Malamulo ya Yahova.” — Sal. 119:1. w22.10 17 ¶18-19

Maceza yomwe Djobi adakhala nayo na Yahova yadaposa maceza yentse yomwe iye adakhala nayo pa moyo wace. Pa macezayo, Yahova adaphatisa basa cirengedwe kuti athandize Djobi kuzindikira kuti Yahova ni Mulungu wanzeru nakuti ambasamalira atumiki wace. Djobi adawona kuti Yahova angakwanise kumusamalira thangwe iye ambasamalira bzirombo. (Djob. 38:39-41; 39:1, 5, 13-16) Iye adapfunza bzinthu bzizinji pakulewa bza Yahova mwakuwona bzinthu bza m’cirengedwe. Tingapfunze bzizinji pakulewa bza Yahova tikambawona bzinthu bzomwe iye adalenga. Tsono nthawe zinango bzimwebzi bzingakhale bzakunesa. Penu timbakhala mu mzinda, mpsakunesa kwene-kwene kuwona bzinthu bza m’cirengedwe. Napo ticikhala ku mbuto komwe mpsakupusa kuwona bzinthu bza m’cirengedwe, tingasaye nthawe ya kumbapfunza bzinthu bza m’cirengedwebzo. Tsono pana phindu lomwe tingakhale nalo tikakhala na nthawe yakumbawona bzinthu bza m’cirengedwe. w23.03 15 ¶1-2

Jezu adalewa kuti mu ntsiku zakumalizira kungadadzacitika “bziteke-teke” na mabvuto manango. (Luk. 21:11) Iye adalewambo kuti “kusaya kubvera malamulo” kun’dzalemweratu. Bzimwebzi bzimbacitikadi thangwe ntsiku zathu zino dima, kuphana na nkhondo bziri pentse-pentse. (Mat. 24:12) Jezu alibe kulewa kuti mabvuto yamweya yangadadzandoboneresa wanthu omwe ambanamata lini Yahova basi. Atumiki azinji wa Yahova akubonerambo na mabvuto yamweya. (Zai. 57:1; 2 Ako. 11:25) Yahova angatikhotcerere lini mwakudabwisa ku malengwa yentse yomwe yangacitike, koma iye ambatithandiza kupitiriza kukhala wakugwa mpfuwa. Tikakonzekereratu bzakucita, tin’dzakwanisa kukhala wakuderekha malengwa ya pantsi yakacitika. Kodi kukonzekera kumbalatiza kuti timbakhulupira lini Yahova? Ne, ndibzo lini. Kukonzekera kumbalatiza kuti ifepano timbakhulupira Yahova. Thangwe ranyi tikulewa tenepoyo? Thangwe Fala la Mulungu limbatiuza kuti tin’funika kukonzekera pomwe malengwa yakanati kucitika. w22.12 18 ¶9-10

Pomwe Zuze akhali m’kawoko, Yahova adacitisa kuti mambo wa ku Edjipito alote maloto mawiri. Ndipopa pomwe mamboyo adadziwa kuti Zuze ana luso lakuthumbudzula maloto, iye adamucemeresa. Ndipo Zuze adakwanisa kuthumbudzula maloto ya Farawo mwakuthandizidwa na Yahova. Pomwe Farawo adawona kuti Yahova akhamuthandiza mulumbwanayu, iye adamuikha kuti ambanyang’anire cakudya mu dziko lentse la Edjipito. (Gen. 41:38, 41-44) Pomwe padapita nthawe, mu Edjipito mudacitika njala, ndipo njalayo idafika ku dziko la Kanani, komwe kukhala famidya ya Zuze. Pa nthawe imweyi, Zuze angadakwanisa kuthandiza famidya yace kuti akhotcerere dzinza lomwe lingadabadwira Mesiya. Yahova ndiye akhacitisa kuti bzinthu bzentse bzimufambire bwino Zuze. Napo kuti abale wace akhafuna kumupha, Yahova adaphatisa basa mpata umweyo kuti bzomwe akhafuna bzicitike. w23.01 17 ¶11-12

Munthu omwe adacenjera ambakwanisa kuwona bzinthu bzomwe bzingadzonge uxamwali bwace na Yahova acibzitcenkha. Bzimwebzi bzimbamucitisa kuti iye apitirize kufunidwa na Mulungu. (Mim. 22:3; Djuda 20, 21) Mpostolo Paulo adauza Akristau kuti akhale wakucenjera. Iye adauza Akristau wa ku Efezo kuti: “Khalani tceru kuti muleke kufamba ninga wanthu wakusaya nzeru, koma ninga wanthu wanzeru.” (Aef. 5:15, 16) Sathani akuyezera kudzonga uxamwali bwathu na Yahova, ndipopa Bibliya limbatiuza kuti: “Pitirizani kuzindikira kufuna kwa Yahova.” Bzimwebzi mpsakufunika kuti tikwanise kubzikhotcerera kwa Sathaniyo. (Aef. 5:17) Kuti timbasankhule bwino bzakucita, tin’funika kumbadziwa bzomwe “Yahova ambafuna.” Tingacite bzimwebzi mwa kumbawerenga Bibliya nthawe zentse ticimbakumbukira bzomwe tawerengabzo. Tikambadziwa bzomwe Yahova ambafuna na kucita nyongo yakukhala na “makumbukidwe ya Kristu,” ifepano tin’dzacita bzinthu “mwa nzeru,” napo pa bzinthu bzomwe bziribe kucita kunembedweratu m’Bibliya kuti tin’funika kubzicita ayai ne. — 1 Ako. 2:14-16. w23.02 16-17 ¶7-9

Kodi mumbapsaira kangasi m’nyumba mwanu? Imwepo mumbapsaira m’nyumba yomwe mun’funa kukhala; mumbamupsaira bwino-bwino kuti mukhale mudacena. Tsono n’ciyani cingacitike mukasaya kumupsaira pomwe? M’nyumbamo mungapswipe. Ndipopa mun’funika kumbamupsaira nthawe zentse kuti mukhale mudacena. Tin’funikambo kucita bzibodzi-bodzibzi pa nkhani ya nzeru zathu na unthu bwathu. Pomwe tinati kubatizidwa, ifepano timbacita nyongo kuti “[tibzicenese] pa bzinthu bzomwe bzimbapswipiza thupi na mzimu.” (2 Ako. 7:1) Tsono tikabatizidwa, ifepano tin’funika kuteweza malango ya mpostolo Paulo, yakuti: “Pitirizani kukhala wanthu wapsa.” (Aef. 4:23) Kucita bzimwebzi n’kwakufunika thangwe rakuti pang’ono na pang’ono tingayambe pomwe kukhala na makhalidwe yomwe yangaticitise kukhala wakupswipa kwa Yahova. Ndipopa kuti tipitirize kukhala wakucena kwa Yahova, tin’funika kumbabzidinga nthawe zentse kuti tidziwe nzeru zathu, unthu bwathu na bzomwe tingacite nzeru zakuipa zikatibwerera. w23.01 8 ¶1-2

Pomwe Jezu akhapfunzisa wanthu, kazinji-kazinji iye akhambalewa Bzinembo na mu msolo mwace! Pa nthawe yomwe Jezu adabatizidwa na kudzozedwa na mzimu wakucena, iye adayamba pomwe kukumbukira bzinthu bzentse bzomwe adacita pomwe akhanati kubwera pa dziko la pantsi. Mafala yakuyambirira yomwe iye adalewa pomwe adabatizidwa na pa nthawe yomwe akhanati kuphedwa yakhali ya m’Bzinembo. (Deut. 8:3; Sal. 31:5; Luk. 4:4; 23:46) Ndipo magole matatu na meya yomwe Jezu adacita basa lakupalizira, iye adapfunzisa wanthu mwakuphatisa basa Bzinembo ndipo akhawauzambo bzomwe bzikhathandauza. (Mat. 5:17, 18, 21, 22, 27, 28; Luk. 4:16-20) Pomwe Jezu akhanati kuyamba utumiki bwace, iye akhawerenga na kubva Fala la Mulungu kazinji-kentse. Abereki wace, Mariya na Zuze, akhambalewa mafala ya m’Bzinembo. (Deut. 6:6, 7) Ndipo Jezu akhambayenda ku sinagoga Sabudu iri-yentse na famidya yace. (Luk. 4:16) Kumweko, iye akhatetekera mwatceru kwene-kwene pomwe Bzinembobzo bzikhawerengedwa. w23.02 8 ¶1-2

Pana bzinthu bzizinji bzomwe bzingaticitise kuti timbafune Yahova. Imwepo mudakwanisa kubvesesa kuti iye ni “mwenekaciro moyo” ndipo “mphaso iri-yentse yabwino na yakulungama” imbacokera kwa iye. (Sal. 36:9; Tiy. 1:17) Bzinthu bzentse bzabwino bzomwe imwepo munabzo bzimbacokera kwa Baba wathu wa lufoyi, Yahova. Cakulombolera ni mphaso yabwino kwene-kwene yomwe Yahova adatipasa. Thangwe ranyi tikulewa tenepoyo? Yahova na Mwana wace ambafunana kwene-kwene. Jezu adati: “Baba wangu ambandifuna” ndipo “[ine] nimbafuna Baba.” (Juw. 10:17; 14:31) Uxamwali bwawo budakula kwene-kwene thangwe adamala magole mazinji akuphata basa pabodzi. (Mim. 8:22, 23, 30) Tsapano kumbukirani kuti Yahova adabva tani pomwe adawona Mwana wace akuboneresedwa na kuphedwa. Yahova ambafuna kwene-kwene wanthu, kuphatanidzambo imwepo, ndipopa iye adapereka Mwana wace wapamtima kuti aphedwe kuti tidzakhale na moyo wakusaya kumala. (Juw. 3:16; Agal. 2:20) Tikakumbukira bzimwebzi, ifepano tin’funika kumufuna kwene-kwene Mulungu. w23.03 4-5 ¶11-13

Tin’funika kutcenkha kutetekera bzomwe apanduki ambapfunzisa. Jezu adatsimula Akristau winango wa m’gwere la ku Pergamo thangwe rakuti akhalewa bzinthu bzomwe bzikhacitisa kuti abale aleke kubverana. (Apok. 2:14-16) Iye adatenda Akristau wa ku Tiyatira omwe adalamba “bzinthu bzakuzika bza Sathani” ndipo adawalimbikisa kuti ‘aphatisise’ cadidi. (Apok. 2:24-26) Akristau wakuwofoka omwe akhadayamba kupumpsika na bzinthu bzakunama bzomwe apanduki akhapfunzisa, akhafunika kukungula. Tsono tanimbo ntsiku zathu zino? Ifepano tin’funika kutcenkha kutetekera nkhani iri-yentse yomwe imbabverana lini na bzomwe Yahova ambafuna. Tin’funika kukumbukira kuti nthawe zinango apanduki angawoneke ninga “mbakubzipereka kwa Mulungu,” tsono iwo ambadziwika thangwe rakuti “ambacita lini bzinthu mwakubverana na kubziperekako.” (2 Tim. 3:5) Cinthu cibodzi comwe cingatithandize kuzindikira na kutcenkha kutetekera bzomwe apanduki ambapfunzisa, ni kumbapfunza bwino-bwino Fala la Mulungu. (2 Tim. 3:14-17; Djuda 3, 4) Tin’funika kuwonesesa penu Yahova akukomedwa na kunamata kwathu ayai ne. Penu tikucita cinthu comwe cikucitisa kuti Yahova aleke kukomedwa na kunamata kwathu, tin’funika kucinja kuti iye akomedwe nafe. — Apok. 2:5, 16; 3:3, 16. w22.05 4 ¶9; 5 ¶11