Agosto

Kodi mukudziwa kuti n’thangwe ranyi Yahova ambanemba mu “bukhu lace lacikumbuso” madzina ya wale omwe ambalatiza kuti ambamugopa na kukumbukira dzina lace? Ni thangwe rakuti mafala yathu yambalatiza bzomwe bziri mu mtima mwathu. Jezu adati: “Pamulomo pambalewa bzinthu bzomwe bzadzala mu mtima.” (Mat. 12:34) Yahovayo akufuna kuti wale omwe ambamufuna adzakhale na moyo wakusaya kumala mu dziko lipsa. Kalalewedwe kathu kangacitise kuti Yahova abvume kunamata kwathu ayai ne. (Tiy. 1:26) Wanthu winango omwe ambadziwa lini Mulungu ambalewalewa mwaukali na mwakubzikuza. (2 Tim. 3:1-5) Tsono ifepano tin’funika lini kukhala ninga iwo. Ifepano timbafuna Yahova ndipo tin’funika kucita ciri-centse kuti iye akomedwe na kalalewedwe kathu. Tsono, kodi Yahova angakomedwe tikambandolewalewa bwino pa mitsonkhano na mu upalizi, koma kumui ticimbalewalewa kuipa? — 1 Ped. 3:7. w22.04 5 ¶4-5

Mulungu an’dzawapasa nyanga 10 na cirombo makumbukidwe yakupfudza Babiloniya Mkulu. Inde, Yahova an’dzacitisa kuti mitundu ya wanthu iphatise basa cirombo cifuira, comwe ni bungwe la Nações Unidas kuti apfudze magereja yakunama ya pa dziko lentse na kuyamalisiratu. (Apok. 18:21-24) N’ciyani comwe tin’funika kucita? Ifepano tin’funika kucita ciri-centse kuti kunamata kwathu kupitirize kukhala “kwakucena na kwakusaya kupswipizidwa kwa Mulungu.” (Tiy. 1:27) Tin’funika kutcenkha kumbatetekera bzinthu bzakunama, kumbanyoza mitemo ya Mulungu na kumbacita bzinthu bza mizimu bzomwe wanthu wa m’Babiloniya Mkulu ambacita. Ndipo tin’funika kupitiriza kucenjeza wanthu kuti ‘acoke’ mu Babiloniya Mkulu kuti aleke kudzakhala na mulandu wa pikado zace kwa Mulungu. — Apok. 18:4. w22.05 11 ¶17; 14 ¶18

Abereki mbawonani bzinthu bzakusiyana-siyana bzomwe mungacite kuti mupfunzise wana wanu bza Yahova na bzinthu bzabwino bzomwe iye akucitirani. (Deut. 6:6, 7) Kucita bzimwebzi n’kwakufunika, maka-maka bzikakhala kuti mpsakukwanisika lini kuti mumbapfunze na wana wanu pamui nthawe zentse thangwe mwentse ndimwe lini atumiki wa Yahova. Mpfumakazi inango, yakucemeredwa Christine, idati: “Ndikhakhala na nthawe yakucepa kuti nimbaceze na wana wangu ndipopa ndikhawapfunzisiratu ndikandogumana mpata.” Cinthu cinango comwe mungacite, ni kumbalewa bzinthu bzabwino bzomwe gulu la Yahova limbacita na bzomwe abale na mpfumakazi ambacita. Lekani kumbalewa kuipa akulu. Kumbukirani kuti mukambalewa bzinthu bzabwino, bzingacitise kuti wana wanuwo ayende kukawakumbira thandizo akagumana na mabvuto. Mbakhalani na mtendere pamui panu. Nthawe zentse mbalatizani kuti mumbafuna mwamuna wanu na wana wanu. Mukakhala mukuceza bza mwamuna wanu, mbalewalewani mwaulemu ndipo pfunzisani wana wanu kumbacita bzibodzi-bodzibzo. Na bzimwebzi, mun’dzacitisa kuti pamui panu pakhale na mtendere ndipo bzin’dzacitisambo kuti wana wanu apfunze bza Yahova. — Tiy. 3:18. w22.04 18 ¶10-11

Mafala yomwe Jezu adauza Akristau wa gwere la ku Efezo, yakulatiza kuti iwo akhapirira ndipo akhapitiriza kutumikira Yahova napo kuti akhagumana na mabvuto yakusiyana-siyana. Tsono iwo akhadasiya lufoyi lomwe akhanalo pakuyamba. Iwo akhafunika kukhala pomwe na lufoyi lomwe akhanalo pakuyamba, thangwe angadasaya kucita tenepoyo Yahova angadakomedwa lini na kunamata kwawo. Mpsibodzi-bodzimbo na ifepano ntsiku zino, tin’funika kucita bzizinji kuposa kundopirira basi. Tin’funika kupirira na mathangwe yabwino. Mulungu wathu ambandofuna lini kudziwa bzomwe tikucita basi, koma ambafunambo kudziwa thangwe ranyi tikucita tenepo. Bzimwebzi mpsakufunika, thangwe iye ambafuna kuti timbamunamate thangwe ra kumufuna na kutenda bzomwe ambaticitira. (Mim. 16:2; Mar. 12:29, 30) Tin’funika kupitiriza kukhala wakupenya. Akristau wa gwere la ku Sarde akhana bvuto linango. Iwo akhadatumikira kale Yahova na nyongo, tsono adadzaleka kucita tenepo. Jezu adawauza kuti iwo akhafunika “kukhala tceru.” (Apok. 3:1-3) N’cadidi, Yahova ambayebwa lini nyongo yomwe timbacita pa basa lace. — Aheb. 6:10. w22.05 3 ¶6-7

Salomau adalewa kuti kuphata basa na nyongo kungacitise munthu kukhala wakukondwa. Ndipo iye adalewambo kuti “imweyi ni mphaso yakucokera kwa Mulungu.” (Mpal. 5:18, 19) Salomau akhadziwa bwino bzimwebzi thangwe iye akhaphata basa na nyongo! Iye adamanga nyumba, adabzala miti ya uva, adakonza madimba na mathawale ya madzi kuti ambatcule. Ndipo adakonzambo mizinda. (1 Ama. 9:19; Mpal. 2:4-6) Limweri likhali basa lamphanvu, ndipo lidamukondwesa. Tsono iye akhadziwa kuti akhafunika kucita bzinthu bzinango kuti akhale wakukondwa. Ndipopa adaphatambo basa la Yahova. Iye adatsogolera basa lakumanga templo ya Yahova yomwe ikhali yakudeka kwene-kwene. Basa limweri lidamala magole 7 likucitika! (1 Ama. 6:38; 9:1) Pomwe Salomau adamala kuphata mabasa yentseneya, iye adazindikira kuti cinthu comwe cingacitise munthu kukhala wakukondwa kwene-kwene ni kutumikira Yahova. Iye adanemba kuti: “Pambuyo pa kubva bzentse, nfundo ikulu njiyi: Gopa Mulungu wacadidi ucibvera malamulo yace.” — Mpal. 12:13. w22.05 22 ¶8

M’Bibliya muna nkhani zizinji za wanthu omwe Yahova adawalekerera. Kodi ni wanthu aponi omwe imwepo mukuwakumbukirambo? Pinango mwakumbukira Mambo Manase. Mambo umweyu akhali wakuipa kwene-kwene ndipo adacita bzinthu bzizinji bzakuipa. Iye adanamata mirungu yakunama ndipo akhauza wanthu kuti acitembo bzibodzi-bodzibzi. Iye adapha wana wace aciwapereka ntsembe kwa mirungu yakunama. Ndipo adacita pomwe bzinthu bzinango bzizinji kuposa bzimwebzi. Iye adaikha cifanikiso ca mulungu wakunama mu templo yakucena ya Yahova. Pakulewa bza iye, Bibliya limbati: “Iye adacita bzinthu bzakuipa bzizinji kwene-kwene bzomwe Yahova adanyantsidwa nabzo.” (2 Nkha. 33:2-7) Tsono pomwe Manase adakungula na mtima wentse, Yahova adamulekerera. (2 Nkha. 33:12, 13) Pinango mwakumbukira pomwe bza Mambo Davide. Iye adacita pikado zikulu kwene-kwene; adacita upombo na mkazi wa mwenekaciro, ndipo kuti abise bzimwebzi, adapheseratu bayaceyo. Pomwe Davide adakungula na mtima wentse acizindikira kuphonya kwaceko, Yahova adamulekererambo. (2 Sam. 12:9, 10, 13, 14) Nkhani zimwezi zikutithandiza kubvesesa kuti Yahova ngwakukonzeka kutilekerera. w22.06 3 ¶7

Mpsakunesa kupitiriza kukhala na cidikhiro cakulimba. Nthawe zinango, tingayambe kuwona ninga kuti Mulungu akucedwa kucita bzomwe adalewa. Tsono tin’funika kukumbukira kuti Yahova ambafa lini, ndipopa nthawe yomwe ifepano tingaiwone ninga ikulu kwene-kwene kwa Yahova ni kanthawe kakucepa. (2 Ped. 3:8, 9) Yahova an’dzacitadi bzentse bzomwe adalewa. Tsono pinango angacite lini bzimwebzo pa nthawe yomwe ifepano tikufuna. Kodi n’ciyani comwe cingatithandize kupirira pomwe tikudikhirira kuti nthaweyo ifike? (Tiy. 5:7) Pitirizani kukhala pa uxamwali bwakulimba na Yahova, thangwe ndiye omwe adalewa kuti an’dzaticitira bzinthu bzabwino kutsogolo. Kumbukirani kuti Bibliya limbalewa kuti cidikhiro tingakhale naco tikakhulupira kuti Yahova alipo ndipo “ambabaira wanthu omwe ambamulinga na mtima wentse.” (Aheb. 11:1, 6) Ifepano tikakhulupira na mtima wentse kuti Yahova alipo, tin’dzakhulupirambo kuti iye an’dzacita bzomwe adalewa. Tin’funika kumbapemba kwa Yahova na kuwerenga Fala lace. N’cadidi kuti tingakwanise lini kumuwona Yahova koma tingakhale naye pa uxamwali. Tingacite tani bzimwebzi? Tingacite bzimwebzi mwa kumbalewalewa naye mu mpembo na cikhulupiro cakuti iye an’titetekera. — Jer. 29:11, 12. w22.10 26-27 ¶11-13

Tiyezezere kuti mukumuwona Djobi adakhala padotha, ndipo akubva kuwawa kwene-kwene. (Djob. 2:8) Axamwali wace akupitiriza kumulewa kuipa ndipo akulewambo kuti bzomwe iye ambacita bziribe na basalo. Pa nthawe imweyi, iye akubva kuwawa thupi lace na mu mtima mwace ndipo akubuula thangwe ra kusaikidwa wana wace. Tsono pomwe papita nthawe pang’ono, Djobi wanyamala. (Djob. 2:13) Pomwe axamwali wacewo akumuwona, pinango iwo akukumbuka kuti iye wanyamala thangwe rakuti akukonzekera kulewa mafala kuti atukwane Mulungu. Penu iwo akukumbuka bzimwebzi, anemba m’madzi. Thangwe ranyi? Thangwe pomwe Djobi akudjigumisa msolo wace, akunyang’anisa axamwali wacewo, ndipo iye akuwauza kuti: “Mpaka kufa kwangu, ndin’dzasiya lini kukhala na mtima wakusaya kugawanika.” (Djob. 27:5) Kodi n’ciyani cidathandiza Djobi kukhala wakukhwimika napo kuti akhagumana na mabvuto yentseneya? Comwe cidamuthandiza n’cakuti iye adapitiriza kukhala na cidikhiro, akhafuna Mulungu ndipo akhakhulupirambo kuti mabvuto yomwe akhagumana nayo yangadadzamala. Iye akhacita bzimwebzi napo pa nthawe yakunesa kwene-kwene. Ndipo akhadziwambo kuti napo acifa, Yahova angadadzamulamusa acikhala pomwe na moyo. — Djob. 14:13-15. w22.06 22 ¶9

Ifepano tina mwayi ukulu kwene-kwene wakupemba kwa Ule omwe adalenga kudzulu na dziko la pantsi. Ndokumbukirani ibzi: Ifepano tingakwanise kulewalewa naye nthawe iri yentse, m’cirewedwe ciri-centse na pomwe tiri ku nyumba ya ulapi ayai m’kawoko. Tingapembe na citsimikizo centse cakuti Baba wathu walufoyi an’dzatitetekera. Ifepano timbatenda kwene-kwene mwayi omwe tidapasidwayu. Mambo Davide akhalemekeza kwene-kwene mwayi wa kucita mpembo. Ndipopa iye adaimbira Yahova kuti: “Mpembo wangu ukhale cakufukiza kwa imwepo.” (Sal. 141:1, 2) Pa nthawe yomwe Davide adanemba mafalaya, cakufukiza cakununtcira comwe antsembe akhaciphatisa basa pa kunamata kwa cadidi cikhakonzedwa mwakamderekho. (Eki. 30:34, 35) Ndipopa, pomwe Davide adalewa mafalaya, akhafuna kulewa kuti iye akhafunika kuyamba kukumbukira bwino-bwino bzomwe angadauza Yahova mu mpembo, ninga momwe bzakufukiza bzakununtcira bzikhakonzedwera. Bzimwebzi ni bzomwe ifepano tin’funikambo kucita. Tikufuna kuti mipembo yathu imbakondwese Yahova. w22.07 20 ¶1-2; 21 ¶4

Kubwezera n’kwa Yahova. Yahova alibe kutipasa ugo bwakubwezera munthu akaticitira cinthu cakuipa. (Aro. 12:20, 21) Pakuti ndife wanthu wakuperewera ndipo nthawe zinango bzimbatinesa kubvesesa nkhani, tingakwanise lini kutonga bwino nkhaniyo ninga momwe Mulungu angadacitira. (Aheb. 4:13) Ndipo nthawe zinango ifepano tingatazire kucita bzinthu bzabwino thangwe ra momwe tikubvera. Mwakutsogoleredwa na mzimu wakucena wa Yahova, Tiyago adanemba kuti: “Ukali bwa munthu bumbabweresa lini cirungamo ca Mulungu.” (Tiy. 1:20) Ndipopa tikakhala taphonyeredwa tingakhale na citsimikizo centse cakuti Yahova an’dzacita bzinthu bzabwino ndipo an’dzawonesesa kuti cirungamo cicitike. Tikambalekerera timbalatiza kuti timbakhulupira kuti Yahova an’dzacita cirungamo. Tikasiya nkhani m’manja mwa Yahova, timbalatiza kuti timbakhulupira na mtima wentse kuti Yahova an’dzamalisa kubonera kwentse komwe timbagumana nako thangwe ra pikado. Mu dziko lipsa lomwe likubwera, bzinthu bzentse bzomwe bzimbatiwawa “bzin’dzakumbukiridwa lini pomwe, ne kubwera pomwe mu mtima.” — Zai. 65:17. w22.06 10-11 ¶11-12

Wanthu akambatiwenga bzimbalatiza kuti Yahova akukomedwa nafe. (Mat. 5:11, 12) Dyabu ndiye akucitisa bzentsenebzi. Tsono Jezu ana mphanvu kwene-kwene kuposa iye! Ndipopa, mwakuthandizidwa na Jezuyo, mafala yabwino ya Umambo yakufikira wanthu wa mitundu yentse. Mbatiwoneni umboni bwakulatiza kuti bzimwebzi mpsacadidi. Mphitca inango yomwe apalizi wa Umambo akugumana nayo, njakuti wanthu omwe ambawapalizira ambalewalewa bzirewedwe bzakusiyana-siyana. Tsono Jezu adauza mpostolo Juwau m’masomphenya kuti mu ntsiku zakumalizira mafala yabwino yangadadzapaliziridwa mu bzirewedwe bzentse. (Apok. 14:6, 7) Kodi bzimwebzi bzikucitikadi? Inde. Ifepano tikupereka mwayi kuna wanthu azinji kuti abve na kubvuma mafala ya Umambo. Ntsiku zino, wanthu pa dziko lentse la pantsi ambawerenga nkhani zakucokera m’Bibliya pa webisaite yathu ya jw.org thangwe iyo ina nkhani mu bzirewedwe bzakupitirira 1000! Bungwe Lakutonga lidabvumiza kuti bukhu lomwe timbaliphatisa basa pa kupfunzisa wanthu, lakuti Khalani na Moyo Wakukondwa Mpaka Kale-kale!, lisanduliziridwe mu bzirewedwe bzakupitirira 700. w22.07 9 ¶6-7

Jezu akhabvera ntsisi wanthu. Mpostolo Mateu adanemba kuti: “Pakuwona thimu la wanthulo, iye adawabvera ntsisi, thangwe wanthuwo akhali wakupwetekeka na wakumwazika ninga mabira yakusaya makabusa.” (Mat. 9:36) Kodi Yahova akhabva tani na bzimwebzi? Jezu adati: “Baba wangu wakudzulu an’funa lini kuti m’bodzi mwa wanthu omwe ali ninga tuwanawa ataike.” (Mat. 18:14) Ifepano timbakomedwa kwene-kwene na mafalaya thangwe yambalatiza kuti Jezu ambatifuna. Ndipopa tikamudziwa bwino Jezu, lufoyi lathu kwa Yahova lin’dzakula kwene-kwene. Imwepo mungapfunzembo kufuna kwene-kwene Yahova na kupitiriza kukula mwauzimu mukambaceza na abale na mpfumakazi wa m’gwere mwanu omwe mbakukhwima mwauzimu. Mukacita bzimwebzi, mun’dzawona kuti iwo mbakukondwa kwene-kwene pakutumikira Yahova ndipo akukhumbula lini thangwe ra kucita bzimwebzi. Mukambaceza nawo, abvunzeni bzinthu bzomwe bzidawacitikira pakutumikira Yahova. Ndipo mukafuna kucita cinthu cikulu pa moyo wanu, auzeni kuti akupaseni malango. Kumbukirani kuti “anyakupereka malango akawanda bzinthu bzimbafamba bwino.” w22.08 3 ¶6-7

Tentsenefe timbagumana na mabvuto napo kuti yambakhala yakusiyana-siyana. Tsono pomwe tikugumana na mabvutoyo timbakhala tiri lini tekha. Yahova omwe ni Baba wathu ambakhala akutiwona. Iye ambakhala ali ku mbali yathu ndipo ambakhala wakukonzeka kutitetekera pomwe tikumuuza mabvuto yathu. Ndipo ambafunisisa kutithandiza. (Zai. 43:2) Ifepano tina citsimikizo cakuti tingakwanise kulimbika tikakhala tikugumana na mabvuto thangwe iye ambatipasa bzomwe timbafunikira kuti tipirire. Iye adatipasa mpembo, Bibliya, cakudya cizinji cauzimu na abale wathu wacikristau. Iye adatipasa bzentsenebzi kuti bzitithandize pomwe tikugumana na mabvuto. Timbatenda kwene-kwene Baba wathu wa kudzulu thangwe rakuti nthawe zentse maso yace yali pa ifepano! Bzimwebzi bzimbacitisa kuti “mitima yathu ikomedwe thangwe ra iye.” (Sal. 33:21) Ifepano timbatenda bzinthu bzentse bzomwe Yahova adatipasa kuti bzitithandize kukhala wakulimba pomwe tikugumana na mabvuto. Tsono tin’funika lini kundoberekera manja. Kodi bzimwebzi bzin’funa kulewanyi? Bzimwebzi bzin’funa kulewa kuti tin’funika kubvera Yahova ticimbacita bzomwe iye ambakomedwa nabzo. Tikacita bzimwebzi, maso yace yan’dzakhala pa ifepano nthawe zentse! w22.08 13 ¶15-16

Ntsiku zino, wanthu akusaya kuti angakhulupire mbani. Bzikuwanesa kukhulupira wanthu omwe ambawoneka kuti ambacita bzinthu bzabwino kwa iwo. Iwo ambatazira kukhulupira atsogoleri wa ndale, masiyentista na anyamalonda thangwe ambabzibvunza penu bzomwe wanthu amwewa ambacita, ambabzicitadi na mtima wakufuna kuthandiza wanthu ayai ne. Iwo ambakhulupirambo lini atsogoleri wa magereja. Ndipopa ambakhulupira lini Bibliya lomwe atsogoleri wa magerejawo ambati ambaliphatisa basa. Atumiki wa Yahovafe timbakhulupira na mtima wentse kuti Yahova ni “Mulungu wacadidi” ndipo timbakhulupirambo kuti iye ambafuna kuti ifepano tikhale na moyo wabwino. (Sal. 31:5; Zai. 48:17) Timbadziwa kuti tin’funika kumbakhulupirambo bzomwe timbawerenga m’Bibliya. Timbatawiriza mafala yomwe mpfunzi munango wa Bibliya adanemba. Iye adati: “Bzinthu bzentse bzomwe Mulungu adalewa mpsacadidi ndipo bzentse bzomwe ambalewa bzimbacitika. Wanthu wa Mulungu ambakhulupira bzomwe [Bibliya] limbalewa thangwe ambakhulupira Mulungu omwe ni mwenekaciro Bibliyalo.” w23.01 2 ¶1-2

Cinthu cinango comwe tingacite kuti tilimbikise abale na mpfumakazi zathu ndico kulimbisa cikhulupiro cawo kwa Yahova. Bzimwebzi mpsakufunika thangwe rakuti pana bzinthu bzakusiyana-siyana bzomwe bzingawofokese cikhulupiro cawo. Abale wathu winango ambanyozedwa na wanthu omwe ni Mboni lini. Ndipo Akristau winango ambaduwala-duwala ayai ambawawidwa mu mtima thangwe ra bvuto linango lomwe lidawacitikira pa moyo wawo. Akristau winango akudikhirira kumala kwa dziko lakuipali koma bzikanati kucitika. Akristau wakuyambirira adagumanambo na mabvuto ninga yamweya. Mpostolo Paulo akhaphatisa basa Fala la Mulungu kuti alimbise cikhulupiro ca abale na mpfumakazi zace. Pinango Akristau wa ku Djudeya akhasaya cakutawira pomwe Adjuda winango ayai adzinza wawo akhalewa kuti kunamata kwa Adjuda kukhali kwabwino kwene-kwene kuposa kwa Akristau. Ndipopa tsamba la Ahebereu, lomwe Paulo adawanembera, lidawalimbikisa kwene-kwene. (Aheb. 1:5, 6; 2:2, 3; 9:24, 25) Pinango iwo adaphatisa basa nfundo zakubveka bwino zomwe ziri m’tsambali kuti akwanise kutawira wanthu omwe akhawagaza. w22.08 23-24 ¶12-14

Wanthu mu dziko la Sathaniri akusaya munthu wakumuthemba. Thangwe ranyi? Thangwe kazinji-kazinji iwo ambapondesedwa mwala na munthu omwe akhamukhulupira. Iwo ambanamizidwa na anyamalonda, wanthu wa ndale pabodzi na akulu-akulu wa magereja. Ndipo bzomwe bzimbawawawa kwene-kwene mpsakuti ambafika pakunamizidwa na axamwali wawo, avizinyu wawo ayai adzinza wawo caiwo. Bzimwebzi bzimbatidabwisa lini. Thangwe Bibliya limbalewa kuti: “Dziwa kuti [mu] ntsiku zakumalizira . . . wanthu an’dzakhala . . . wakusaya kukhulupirika, . . . wakulewa kuipa anzawo, . . . [na] wakuphindukira anzawo.” Wanthu ambalatiza makhalidwe yamweya thangwe ra kucitisidwa na Sathani, omwe ni mtongi wa dzikoli. (2 Tim. 3:1-4; 2 Ako. 4:4) Tsono Akristaufe timbadziwa kuti tin’funika kukhulupira Yahova. Ifepano timbadziwa kuti iye ambatifuna ndipo ‘an’dzasiya lini’ axamwali wace. (Sal. 9:10) Ifepano timbakhulupirambo Kristu Jezu thangwe rakuti iye adatifera. (1 Ped. 3:18) Ndipo timbakhulupira Bibliya thangwe rakuti malango yomwe limbapereka yambatithandiza. — 2 Tim. 3:16, 17. w22.09 2 ¶1-2

Mpfatso caiwo ni cinthu lini comwe timbandokhala naco mu kanthawe kakucepa tikamala ticipsoma. Koma ni cinthu comwe tingakhale naco moyo wathu wentse. Kodi bzimwebzi bzingakwanisike? Inde. Jezu adafotokoza bzomwe tingacite kuti tikhale na mpfatso caiwo, pomwe akhafotokoza nkhani yace ya pa phiri. Iye adati: “An’kondwa mbale omwe ambadziwa kuti an’funika kutsogoleredwa na Mulungu.” (Mat. 5:3) Jezu akhadziwa kuti wanthufe tidalengedwa na mtima wa kufuna kudziwa Mulengi wathu, Yahova Mulungu, na kumunamata. Yahova ni “Mulungu wakukondwa,” ndipopa wanthu omwe ambamunamata angakhalembo wakukondwa. (1 Tim. 1:11) Kodi mpfatso caiwo tingakhale nawo thangwe rakuti bzinthu bziri bwino pa moyo wathu basi? Ne. Pa nkhani yace ya pa phiri, Jezu adalewa kuti “[wanthu] omwe akulira” angakhale wakukondwa. Ndipo Jezu adalewambo bzibodzi-bodzibzi kwa omwe “akuzunzidwa thangwe ra kucita cirungamo.” (Mat. 5:4, 10, 11) Bzomwe Jezu akhafuna kupfunzisa mpsakuti tingakhale lini na mpfatso caiwo thangwe rakuti bzinthu bziri bwino pa moyo wathu basi. Koma timbakhala nawo tikadziwa Yahova na kukhala pa uxamwali bwakulimba na iye. — Tiy. 4:8. w22.10 6 ¶1-3

Kuzindikira kumbathandiza Mkristau kuwona “nthawe yakunyamala na nthawe yakulewalewa.” (Mpal. 3:7) M’madziko manango muna mwani wakuti: “Kulewalewa ni prata, tsono kunyamala ni oro.” Mafalaya yan’funa kulewa kuti nthawe zinango ni bwino kundonyamala kusiyana na kulewalewa. Onani bzomwe mkulu m’bodzi wa gwere ambacita. Nthawe zinango iye ambakumbiridwa kuti akathandize magwere manango yomwe yana mabvuto makulu. Pakulewa bza mkuluyu, mkulu munango omwe ambatumikira naye m’gwere libodzi adalewa kuti: “Iye ambacita bzinthu mwakucenjera kwene-kwene kuti aleke kuzimbula nkhani za cintsintsi za gwere linango.” Mkuluyu ambalemekezedwa na akulu anzace thangwe rakuti iye ambacita bzinthu mwakuzindikira. Ndipo anzacewo ambakhulupira na mtima wentse kuti iye an’dzazimbula lini nkhani za cintsintsi za gwere lawo kuna magwere manango. Kuleka kunama ni cinthu cinango cakufunika kuti wanthu ambatikhulupire. Ifepano timbakhulupira munthu omwe ambalewa bzacadidi thangwe timbadziwa kuti iye an’tinamiza lini. — Aef. 4:25; Aheb. 13:18. w22.09 12 ¶14-15

Wanthu azinji ambakhala ninga ankhuthu akabva “nzeru ikukuwa mu msewu.” (Mim. 1:20) Bibliya limbalewa kuti pana magrupo matatu ya wanthu omwe ambalamba nzeru yacadidi. Pana “wanthu wakusaya kudziwa bzinthu,” “wanthu wakunyoza,” na “wanthu wakupusa.” (Mim. 1:22-25) “Wanthu wakusaya kudziwa bzinthu” mbale omwe ambandokhulupira bzinthu bzentse bzomwe ambabva, ndipo ambakhala lini na nthawe kuti akumbuke. (Mim. 14:15) Iwo ambanamizidwa na atsogoleri wa magereja ayai atsogoleri wa ndale. Winango bzimbawawawa akazindikira kuti akunamizidwa. Tsono wanthu omwe ambafotokozedwa pa Mimwani 1:22 ambabvuma basi kupitiriza kunamizidwako. (Jer. 5:31) Iwo ambafuna lini kudziwa bzomwe Bibliya limbalewa ayai kuteweza mitemo yace. Ifepano tin’funa lini kukhala ninga mkazi umweyu! — Mim. 1:32; 27:12. w22.10 19 ¶5-7

Gulu la Yahova limbatipasambo malango kuti yatikhotcerere. Kawiri-kawiri ifepano timbauzidwa kuti tipereke número yathu ya telefoni kwa akulu wa gwere kuti adzakwanise kuceza nafe pakacitika malengwa. Ifepano tingapasidwembo malango yakutiuza komwe tin’thawira, komwe tingakatambire thandizo ayai bzomwe tingacite kuti tithandize anzathu. Tikasaya kuteweza malango yamweya, ifepano timbaikha moyo wathu na wa akulu pa ngozi, thangwe akuluwo ndiwo omwe ambatinyang’anira. (Aheb. 13:17) Abale na mpfumakazi omwe adathawa m’mii mwawo thangwe ra malengwa ya pantsi, ayai mabvuto yanango adacita nyongo kuti azolowere moyo upsa ndipo adapitiriza kucita bzizinji pa kutumikira Yahova. Abale na mpfumakazi amwewa ambatewezera Akristau wakuyambirira. Pomwe gwere la ku Jeruzalemu lidayamba kuzunzidwa, Akristau wa m’gwere limwelire adabalalikira m’mphimpha zinango “[acimbapalizira] mafala yabwino ya Mulungu” m’mbuto zomwe akhathawirazo. (Mab. 8:4) Kucita basa la kupalizira kudawathandiza kukumbukira bzinthu bzabwino bzomwe Umambo bwa Mulungu bun’dzacita sikuti mabvuto yawo. Ndipopa iwo adapitiriza kukhala na mpfatso caiwo na mtendere. w22.12 19 ¶12-13

Yahova ambasamalira ali-wentse payekha. Pomwe Jezu akhanati kutumiza ateweri wace kuti ayende kukapalizira, iye adawalimbikisa kuti aleke kukacita mantha. (Mat. 10:29-31) Iye adacita bzimwebzi mwakuwafotokozera bza mbalame zomwe zikhadziwika kwene-kwene ku Jirayeri. Mu nthawe ya Jezu mbalame zimwezi zikhali lini zakufunika kwene-kwene. Koma Jezu adauza anyakupfunza wace kuti: “Palibe ne na kabodzi ka tumbalametu komwe kangagwe pantsi Baba wanu wakudzulu acisaya kudziwa.” Iye adalewa pomwe kuti: “Imwepo ndimwe wakufunika kwene-kwene kuposa tumbalame tuzinji.” Na mafala yamweya, Jezu adawatsimikizira kuti Yahova ambafuna mtumiki wace ali-wentse payekha. Ndipopa iwo akhafunikira lini kugopa cizunzo. Pomwe anyakupfunzawo akhawona tumbalame pomwe akhapalizira, mwakusaya kupenukira akhakumbukira mafala yomwe Jezu akhadawauza yale. Mukambawona mbalame, mbakumbukirani kuti Yahova ambakufunani pamwekha “thangwe ndimwe wakufunika kwene-kwene kuposa tumbalame tuzinji.” Ndipo na thandizo lace, imwepo mungakwanise kukunda cizunzo. w23.03 18 ¶12

Nthawe zinango, ifepano timbagumana na mabvuto, ninga kunyozedwa na adzinza wathu ayai kucosedwa basa. Tikamala nthawe ikulu tikugumana na mabvuto, tingasaye bzakucita ndipo tingagoboke m’mabondo. Ndipo Sathani akawona bzimwebzi ambafuna kuticitisa kukumbuka kuti Yahova aleka kutifuna. Iye ambafuna kuti ifepano tikumbuke kuti ni Yahova ayai ni gulu lace lomwe likucitisa kuti ifepano tibonere. Bzinthu ninga bzimwebzi bzidacitikirambo Ajirayeri pomwe akhali ku Edjipito. Pomwe Mozeji na Aroni adalalewa nawo, Ajirayeriwo adakhulupira kuti iwo akhadatumidwa na Yahova kuti awacose ku ukapolo. (Eki. 4:29-31) Tsono pomwe Farawo adayamba kuwaboneresa, iwo adayamba kukalipira Mozeji na Aroni acimbalewa kuti ndiwo acitisa kuti iwo abonere. (Eki. 5:19, 20) Ajirayeriwo akhanyoza atumiki wakukhulupirika wa Mulungu. Penu mwamala magole mazinji mukubonera na mabvuto, comwe mungacite ni kupemba kwa Yahova kuti akuthandizeni. w22.11 15 ¶5-6

Yahova ndiye ambapereka moyo ndipo ana mphanvu ya kulamusa wanthu omwe adafa. Iye adapasa mphanvu Eliya kuti alamuse mwana wa mamsiwa wa ku Zarefati. (1 Ama. 17:21-23) Ndipo iye adapasambo mphanvu Elizeu kuti alamuse mwana wa mkazi wa ku Sunemu. (2 Ama. 4:18-20, 34-37) Nkhani zimwezi na zinango zimbalatiza kuti Yahova ana mphanvu yakulamusa wanthu omwe adafa. Pomwe Jezu akhali pa dziko la pantsi, Baba wace adamupasa mphanvu yakulamusa wanthu wakufa. (Juw. 11:23-25, 43, 44) Tsono tsapano Jezu ali kudzulu ndipo adapasidwa “utongi bwentse, kudzulu na pa dziko la pantsi.” Ndipopa iye an’dzakwanisa kucita bzomwe adalewa, bzakulamusa wanthu “wentse omwe ali m’thenje” kuti adzakhale na cidikhiro ca kudzakhala na moyo kuyenda na kuyenda. — Mat. 28:18; Juw. 5:26-29. w22.12 5 ¶10

Ajirayeri angadatetekera lini Zakiyeri ndipo kumweku kukhali kulamba kutetekera Yahova. Mafala ya m’vesi la lero yadatsimikizira Zakiyeri kuti napo wanthuwo angadalamba, bzikhafuna lini kulewa kuti iye akhakwanisa lini kucita bwino-bwino basa lace la upolofeta. Yahova adauzambo Zakiyeri kuti pa nthawe yomwe iye angadadzakhala akuwalanga, wanthuwo ‘angadadzadziwa kuti pakati pawo pakhana mpolofeta.’ (Ezek. 2:5; 33:33) Mafala yamweya yadapasa mphanvu Zakiyeri kuti akwanise kucita basa lace la kupalizira. Ifepanombo timbakhala na mphanvu ya kupalizira thangwe timbadziwa kuti tidatumidwa na Yahova. Iye adatipasa mwayi wakukhala “mboni” zace. (Zai. 43:10) Umweyu ni mwayi ukulu kwene-kwene! Tawona kuti Yahova adauza Zakiyeri kuti: “Leka kugopa.” Ndipo iye akuuzambo ifepano kuti: “Lekani kugopa.” (Ezek. 2:6) Thangwe ranyi tin’funika lini kugopa anyamadulanthaka wathu? Thangwe ifepano tidatumidwa na Yahova, ndipo iye an’dzatithandiza ninga momwe adacitira na Zakiyeri. — Zai. 44:8. w22.11 3-4 ¶4-5

Ntsiku zino ifepano timbatenda kwene-kwene kukhulupirika kwa akulu na atumiki wakuthandiza.Abale amwewa ambacita nyongo kuti bzinthu bzitifambire bwino mwauzimu. Ndipo timbatenda Yahova thangwe ra basa lomwe iwo ambacita. Kodi ifepano tingacite tani kuti tilatizembo kuti ndife wanthu wakukhulupirika? Ifepano timbafuna abale na mpfumakazi zathu ndipo timbafuna kudziwa kuti moyo wawo uli tani. Tsono tin’funika lini kumbafuna kudziwa nkhani zomwe tiribe ugo bwa kuzidziwa. Bzimwebzi bzikhacitika mu gwere la Akristau wakuyambirira. Akristau winango ‘akhambacita magunkha, kumbapitira nkhani zawene na kumbalewa bzinthu bzomwe akhafunika lini kubzilewa.’ (1 Tim. 5:13) Ifepano tin’funa lini kukhala ninga iwo. Tsono tiyezezere kuti munthu munango watiuza nkhani ndipo watikumbira kuti tileke kuuza munthu. Pinango ni mpfumakazi yatiuza matenda yomwe inayo ayai mabvuto yomwe ikugumana nayo ndipo yatiuza kuti bzimwebzi ni cintsintsi. Kodi tingauze wanthu winango nkhani zimwezi? Ne. Tin’funika lini kucita bzimwebzi. w22.09 10 ¶7-8

Fala la Cigerego lomwe lidasanduliziridwa kuti ‘kucinja makumbukidwe’ lingasanduliziridwembo kuti “kucinja nzeru.” Ndipopa kucinja nzeru kumbathandauza lini kundokhala munthu wabwino pa bzinthu bzing’ono-ng’ono basi. Koma kumbathandauza kupitiriza kucinja makhalidwe yathu tikawona kuti yakubverana lini na bzomwe Yahova ambafuna. Bzimwebzi bzimbacitidwa lini kabodzi kokha. Ni bzinthu bzomwe tin’funika kumbabzicita nthawe zentse. Tikadzakhala wanthu wakulungama mu dziko lipsa, tin’dzacita bzinthu bzomwe Yahova ambakomedwa nabzo nthawe zentse. Tsono pakali pano, ifepano tin’funika kucita nyongo kuti Yahova ambakomedwe nafe. Onani kuti pa Aroma 12:2, mpostolo Paulo adalewa kuti tin’funika kucinja makumbukidwe yathu kuti tidziwe bzomwe Mulungu akufuna kuti ticite. Ifepano tin’funika lini kubvuma kutewezera nzeru za wanthu wa m’dzikoli. Koma tin’funika kupitiriza kumbabzidinga kuti tiwone penu bzomwe timbacita bzikulatiza kuti timbatsogoleredwa na nzeru za Mulungu ayai za dzikoli. w23.01 8-9 ¶3-4

Kodi Yahova angatikhotcerere pa bvuto liri-lentse lomwe tingagumane nalo? Kodi iye ambacitisa bzinthu bzakuipa bzomwe bzikuticitikira kuti bzisanduke bzabwino? Ne, Bibliya limbapfunzisa lini bzimwebzi. (Mpal. 8:9; 9:11) Tsono comwe timbadziwa n’cakuti tikakhala tikugumana na mabvuto, Yahova ambakhala akuwona ndipo ambatitetekerambo tikamukumbira thandizo. (Sal. 34:15; Zai. 59:1) Ndipo cinthu cinango comwe Yahova ambacita n’cakuti ambatithandiza kupirira mabvuto yomwe tikugumana nayoyo. Kodi iye ambacita tani bzimwebzi? Cinthu cibodzi comwe Yahova ambacita ni kutitsangalaza na kutilimbikisa pa nthawe yomwe tikugumana na mabvuto. (2 Ako. 1:3, 4) Kodi imwepo mukukumbukirambo nthawe yomwe mudawona Yahova akukutsangalazani na kukulimbikisani? Kazinji-kazinji tikakhala tikugumana na mabvuto, timbakwanisa lini kuwona kuti Yahova akutithandiza. Timbadzazindikira kuti iye akhatithandiza pomwe mabvutoyo yamala. w23.01 17-18 ¶13-15

Cirombo cimweci cidakhala ninga cirombo comwe cina misolo 7 cire, tsono kusiyana n’kwakuti cirombo cimweci n’cifuira. Ndipo Bibliya limbalewa kuti ico ni “cifanikiso ca cirombo” na “mambo waci 8.” (Apok. 13:14, 15; 17:3, 8) Bibliya limbalewa kuti “mambo” umweyu aniwonekera ndipo imbafika nthawe yomwe ambanyembereka ndipo ambadzawonekera pomwe. Bzomwe Bibliya likulewabzi mpsomwe bzidacitikira bungwe la Nações Unidas, lomwe limbathandizira nkhani za ndale za pa dziko lentse. Pakuyamba bungwe limweri likhadziwika na dzina lakuti Liga das Nações. Tsono pa nthawe ya Nkhondo Yaciwiri ya pa Dziko Lentse, bungweri lidaima kuphata basa. Pomwe nkhondoyi idamala, bungweri lidadzawonekera pomwe ndipo lidadzayamba kudziwika na dzina lakuti Nações Unidas. Bzirombo bzimwebzi, ayai maboma, bzimbacitisa wanthu kucita nkhondo na Yahova pabodzi na wanthu wace. Ndipo Mpostolo Juwau adalewa kuti bzirombobzi bzimbakhala ninga kuti bzikutsonkhanisa “amambo wa pa dziko lentse lakukhalidwa na wanthu” ku nkhondo ya Armagedo yomwe ni “ntsiku ikulu ya Mulungu Wamphanvu-zentse.” Apok. 16:13, 14, 16. w22.05 10 ¶10-11

Pomwe Jezu adayamba kupfunza kuwerenga Bzinembo, iye adabzidziwa bwino Bzinembobzo, adayamba kubzifuna na kubziphatisa basa pa moyo wace. Kumbukirani bzomwe bzidacitika ntsiku inango pomwe Jezu akhali ku templo pomwe akhana magole 12. Apfunzisi wa Fala la Mulungu akhayadziwa bwino Malamulo ya Mozeji, tsono iwo “akhambadabwa kwene-kwene na mitawiro yace pabodzi na kubvesesa kwace bzinthu.” (Luk. 2:46, 47, 52) Ifepanombo tingadziwe Fala la Mulungu na kumbalifuna tikambaliwerenga ntsiku zentse. Tingapfunze bzizinji na bzomwe Jezu adalewa kwa wale omwe akhadziwa Malamulo, omwe akhali anembi, Afarizeu na Asaduki. Iwo akhambawerenga Bzinembo ntsiku zentse, tsono akhaphatisa lini basa bzomwe akhawerengabzo. Jezu adafotokoza bzinthu bzitatu bzomwe atsogoleriwa akhafunikira kucita kuti agumane phindu na bzomwe akhawerengabzo. Bzomwe iye adalewabzo bzin’tithandizambo kuti (1) tibvesese bzomwe timbawerenga, (2) tigumane nfundo zakuthandiza na (3) tibvume kuti Fala la Mulungu liticinje. w23.02 8-9 ¶2-3

Bzinthu bzinango bzomwe tin’funika lini kumbabzicita ndibzo kumbaceza kwene-kwene na munthu omwe tin’funa lini kulowolana naye, kumwa kwene-kwene, kudya kwene-kwene, kumbalewa mafala yakuipa, kukhala na axamwali wakuipa, kuwona mavidiyo yakumenyana, kuwona pornografia na bzinthu bzinango bzakundendemera na bzimwebzi. (Sal. 101:3) Sathani akunyang’ana manera kuti adzonge uxamwali bwathu na Yahova. (1 Ped. 5:8) Tikasaya kucenjera, iye angaticitise pang’ono na pang’ono kukhala wanthu wakusaya kulungama, wa ukali, wa ciwengo na wakukoyera anzathu cakumtima. (Agal. 5:19-21) Tikasaya kucita cinthu kuti tibzimalise, ibzo bzingakule mu mtima mwathu ndipo bzingatidzonge. (Tiy. 1:14, 15) Ngozi inango yomwe tin’funika kuitcenkha ndiyo kucita uxamwali na wanthu wakuipa. Tin’funika kudziwa kuti bzingakhale bzakupusa kutewezera wanthu omwe timbamala nawo nthawe izinji tiri nawo pabodzi. (1 Ako. 15:33) Tikakhala wanthu wakucenjera, tin’dzatcenkha kumbaceza na wanthu omwe ambabvera lini mitemo ya Yahova. (Luk. 21:34; 2 Ako. 6:15) Tin’dzakwanisa kuwona ngozi yomwe ingabwere ticiitcenkha. w23.02 16 ¶7; 17 ¶10-11

Lufoyi lanu kwa Yahova lidakula pomwe imwepo mudapfunza bzizinji pakulewa bza iye. Imwepo mukufunisisa kukhala xamwali wace ndipo mukufuna kuti uxamwalibo buyenderere. Iye ambafuna kuti mukondwese mtima wace. (Mim. 23:15, 16) Kuti iye akomedwe, mun’funika lini kumbandolewa kuti tin’funika kucita bzinthu bzabwino, koma mucileka kucita bzinthu bzabwinobzo. Bzomwe imwepo mumbacita pa moyo wanu bzin’dzalatiza kuti mumbamufuna Yahova ayai ne. Cimweci ndico cinthu cabwino kwene-kwene comwe mungasankhule kucita pa moyo wanu. Kodi mungalatize tani kuti mumbafuna Yahova? Cakuyamba, citani mpembo wa kubzipereka kwa Yahova. (Sal. 40:8) Ndipo latizani kuti mwabzipereka kwa Yahova mwa kubatizidwa. Imwepo mukabatizidwa mun’dzakhala na moyo wabwino kwene-kwene. Imwepo mukabatizidwa, mun’dzayamba moyo unovu. Mun’dzakhala na moyo sikuti wakubzikondwesa mwekha, koma wakuti mukondwese Yahova. (Aro. 14:8; 1 Ped. 4:1, 2) Cimweci ni cinthu cakufunika kwene-kwene comwe mungacite. Tsono mukacicita, mun’dzakhala na moyo wabwino kwene-kwene. w23.03 5-6 ¶14-15