Setembro

Tikambaphatisa bwino basa mphaso ya kulewalewa, wanthu ambadziwa kuti ndife atumiki wa Yahova. Ndipo timbathandiza wanthuwo kuwona kusiyana komwe kulipo “pakati pa omwe ambatumikira Mulungu na omwe ambam’tumikira lini.” (Malak. 3:18) Onani bzomwe bzidacitika na mpfumakazi inango yakucemeredwa Kimberly. Iye adauzidwa kuti acite basa linango ku xikola na mwanzace. Pomwe adamala kucita basalo, mwanzaceyo adawona kuti Kimberly akhali wakusiyana na wanthu winango ku xikolako. Iye akhambalewa lini kuipa wanthu, akhambalewalewa bwino na anzace, ndipo akhambalewa lini mafala yakutukwana. Bzimwebzi bzidadabwisa mwanzaceyo ndipo adabvuma kupfunza Bibliya. Kulewa cadidi Yahova ambakomedwa, kalalewedwe kathu kakacitisa wanthu kufuna kupfunza Bibliya! Tentsenefe tikufuna kuti kalalewedwe kathu kambalemekezese Yahova. w22.04 5-6 ¶5-7

Mariya Madalena adacosedwa bziwanda na Jezu. Iye adakhala mteweri wa Jezu ndipo adamuthandiza mu upalizi. (Luk. 8:1-3) Mariya adatenda kwene-kwene bzomwe Jezu adamucitira, tsono iye akhadziwa lini kuti Jezu angadadzamucitira pomwe bzinthu bzizinji kutsogolo. Jezu angadapereka moyo wace “kuti ali-wentse omwe [animukhulupira]” adzatambire moyo wakusaya kumala. (Juw. 3:16) Mariya adalatiza kutenda Jezu mwakupitiriza kukhala wakukhulupirika kwa iye. Pomwe Jezu akhabva kuwawa pa muti wakuzunzidwira, Mariya akhali pafupipo kuti atsangalaze Jezu na wanthu winango omwe akhali pamwepombo. (Juw. 19:25) Pomwe Jezu adafa, Mariya pabodzi na akazi anango awiri adayenda na bzakununtcirisa ku thenje. (Mar. 16:1, 2) Mariya adakhala na mwayi wakuwona Jezu pomwe adalamusidwa na kulalewa naye. Ni anyakupfunza wakucepa okha omwe adakhala na mwayi umweyu. — Juw. 20:11-18. w23.01 27 ¶4

Tin’funika lini kumbandokhala phee ticileka kucita nyongo pakutumikira Yahova, thangwe rakuti tidacita kale bzizinji pakumutumikira m’mbuyomu. N’cadidi kuti nthawe zinango tingakwanise lini kucita bzizinji ninga bzomwe tikhacita kale-kale, tsono tin’funika basi kupitiriza kukhala na “bzakucita bzizinji pa basa la Mbuya” na kupitirizambo kukhala wakupenya mpaka kuphampha. (1 Ako. 15:58; Mat. 24:13; Mar. 13:33) Tin’funika kukhala wanyongo pakutumikira Yahova na kumunamata na mtima wentse. Mafala yomwe Jezu adauza gwere la ku Laudiseya yakulatiza kuti iwo akhana bvuto lawombo. Iwo akhali “wakuthuma” pakunamata Yahova. Tingati iwo akhali atofu, ndipopa Jezu adalewa kuti iwo akhali “wakubonera na wakupasa ntsisi.” Iwo akhafunika kukhala na nyongo pa basa la Yahova na pakumunamata. (Apok. 3:16, 17, 19) Kodi ifepano tikupfunza ciyani? Tikupfunza kuti tikayamba kukhala atofu pakutumikira Yahova, tin’funika kukhala tceru ticiwona bzinthu bzabwino bzomwe Yahova na gulu lace ambatipasa na kumbatenda kwene-kwene bzinthu bzimwebzi. (Apok. 3:18) Tin’funika lini kumbaphata basa kwene-kwene kuti tikhale na moyo wabwino, mpaka kuwona kuti kutumikira Yahova n’cinthu lini cakufunika kwa ifepano. w22.05 3-4 ¶7-8

Kuyambira kale-kale, Yahova akunemba bukhu labwino kwene-kwene. Bukhu limweri lina madzina ya wanthu kuyambira munthu wakukhulupirika wakuyamba wakucemeredwa Abeli. (Luk. 11:50, 51) Nthawe yentseneyi Yahova akhala akunemba madzina ya atumiki wace azinji. Ndipo ntsiku zino, bukhuli lina madzina mazinji kwene-kwene. Bibliya limbacemera bukhu limweri kuti “bukhu la cikumbuso” na “bukhu la moyo.” (Malak. 3:16; Apok. 3:5; 17:8) Mu bukhu limweri muna madzina ya wanthu omwe ambalemekeza kwene-kwene Yahova na kufuna dzina lace. Iwo an’dzakhala na mwayi wa kudzatambira moyo wakusaya kumala. Ntsiku zino, ifepano tinganembesembo dzina lathu mu bukhu la moyo. Kodi tingacite tani bzimwebzi? Tingacite bzimwebzi mwa kukhala pa uxamwali bwakulimba na Yahova, bzomwe bzimbakwanisika thangwe ra ntsembe ya cakulombolera ya Mwana wace, Jezu Kristu. (Juw. 3:16, 36) Tentsenefe tikufunisisa kuti dzina lathu linembedwembo mu bukhu la moyo limweri, bziribe basa kuti tin’dzayenda kudzulu ayai tin’dzakhala pa dziko la pantsi pano. w22.09 14 ¶1-2

Bukhu la Apokalipse limbalewambo bza “cinyoka cikulu cifuira ninga moto.” (Apok. 12:3) Cinyoka cimweci cidamenyana na Jezu pabodzi na anjo wace. (Apok. 12:7-9) Ndipo cinyoka cibodzi-bodzici cimbacitambo nkhondo na atumiki wa Mulungu ndipo ndico cimbapereka mphanvu kwa bzirombo ayai mautongi ya wanthu. (Apok. 12:17; 13:4) Kodi cinyoka cimweci ni mbani? Ico ni “cinyoka cakale-kale cire, cakucemeredwa Dyabu na Sathani.” (Apok. 12:9; 20:2) Ico ndico cimbatonga ayai kuthandizira anyamadulanthaka wa Yahova. Kodi n’ciyani cin’dzacitikira cinyoka? Pa Apokalipse 20:1-3 pambalewa kuti anjo m’bodzi an’dzamanga Sathani acimuthusa ku ciphompho. Bzimwebzi bzin’funa kulewa kuti iye an’dzakhala ninga ali m’kawoko. Sathani ‘an’dzapumpsa lini pomwe wanthu [mpaka kumala] kwa magole 1000.’ Pakumalizira, Sathani na madimonyo yace an’dzathusidwa “mu thawale la moto wakugaka.” Bzimwebzi bzin’funa kulewa kuti an’dzapfudzidwa ndipo an’dzawoneka lini pomwe. Yezezerani kubziwona kuti muli mu dziko lomwe liribe Sathani na madimonyo yace! Kulewa cadidi, limweri lin’dzakhala dziko labwino kwene-kwene. w22.05 14 ¶19-20

Jezu akhaphata basa na nyongo. M’magole yakuyambirira ya moyo wace pantsi pano, iye adaphata basa la kupala matabwa. (Mar. 6:3) Mpsakucita lini kubvunza kuti abereki wace akhatenda thandizo lomwe iye akhawapasa pa kuthandiza banja lawo lomwe likhali likulu. Jezu akhali wakulungamiratu, ndipopa tingalewe kuti iye akhadziwa bwino basa la kupala matabwa, ndipo wanthu akhakomedwa na bzinthu bzomwe iye akhawakonzera! Bzikuwoneka kuti Jezu akhakomedwa na basa lace. Tsono, napo kuti iye akhaphata basa limweri, iye akhapambulambo nthawe kuti ambatumikire Yahova. (Juw. 7:15) Ndipo pomwe adadzakhala mpalizi wa nthawe zentse, iye adauza abveseri wace kuti: “Lekani kuphatira basa cakudya comwe cimbamala, koma phatirani basa cakudya comwe cimbamala lini comwe cimbatsogolera ku moyo wakusaya kumala.” (Juw. 6:27) Ndipo pa Nkhani ya pa Phiri, Jezu adati: “Gwezekani cuma canu kudzulu.” (Mat. 6:20) Tikambaphatisa basa malango yanzeru yakucokera kwa Yahova, ifepano tin’dzawona basa mwacikati-kati. Pakuti ndife Akristau, timbauzidwa kuti tin’funika kuphata “basa labwino mwamphanvu.” w22.05 22 ¶9-10

Eunise akhana makhalidwe yabwino yomwe Timotio adayatewezera. Timotio akhadziwiratu kuti bzomwe mai wace akhacita, akhabzicita thangwe ra lufoyi lomwe akhanalo kuna Yahova. Ndipo iye adawona yekha kuti kutumikira Yahova, kukhacitisa mai wace kukhala wakukondwa kwene-kwene. Mpsibodzi-bodzimbo ntsiku zino, mpfumakazi zizinji zakwanisa kuthandiza wanthu wa m’banja mwawo kuyamba kutumikira Yahova thangwe ra makhalidwe yawo yabwino ‘sikuti na mafala.’ (1 Ped. 3:1, 2) Kodi imwepo mungacitembo tani bzibodzi-bodzibzi? Mbawonani kuti uxamwali bwanu na Yahova ni cinthu cakufunika kwene-kwene. (Deut. 6:5, 6) Mpfumakazi, imwepo mumbacita bzinthu bzizinji ninga bzomwe azimai azinji ambacita. Imwepo mumbaphatisa basa nthawe yanu, kobiri, na bzinthu bzinango kuti muthandize wana wanu. Ndipo nthawe zinango mumbataza kugona. Tsono mun’funika lini kulekerera kuti kuwanda kwa basa, kukutaziseni kulimbisa uxamwali bwanu na Yahova. Ndipopa, mbapambulani nthawe kuti mumbapembe pa mwekha, kupfunza Bibliya na kumbayenda ku mitsonkhano. Mukacita tenepoyo, mun’dzakhala pa uxamwali bwakulimba na Yahova ndipo mun’dzakhala munthu wabwino omwe wanthu wa pamui panu na wanthu winango angatewezere. w22.04 16 ¶1; 19 ¶12-13

Timbakomedwa thangwe rakuti Yahova alibe kutipasa udindo bwa kutonga wanthu! Yahova, omwe ni Muyeruzi Mkulu, ndiye an’dzacita basa lakufunikali. (Aro. 14:10-12) Ndipopa ifepano tingakhulupire na mtima wathu wentse kuti iye an’dzatonga bzinthu mwacirungamo mwakubverana na mitemo yace yakulungama pa nkhani ya cabwino na cakuipa. (Gen. 18:25) Yahova an’dzacita lini cinthu cakusaya kulungama! Tikudikhirira na mtima wentse nthawe yomwe Yahova an’dzamalisa mabvuto yentse yomwe timbagumana nayo thangwe ra kuperewera na pikado. Pa nthawe imweyi, mabvuto yentse na kubonera kwentse komwe tinako bzin’dzamala. (Sal. 72:12-14; Apok. 21:3, 4) Ifepano tin’dzakumbukira lini pomwe mabvuto yomwe tikugumana nayoya. Pomwe tikudikhirira kuti nthawe imweyi ifike, bwerani timbatende kwene-kwene Yahova thangwe rakuti iye adatilenga kuti timbakwanisembo kumutewezera mwakulekerera anzathu. w22.06 13 ¶18-19

Muyeruzi wabwino ngule omwe ambadziwa na kubvesesa malamulo yentse. Iye ambadziwa cabwino na cakuipa. Kodi n’ciyani cinango comwe muyeruzi wabwino an’funika kucita? Pomwe iye akanati kutonga nkhani, cakuyamba an’funika kubvesesa bwino nkhani yomwe an’funa kutongayo. Yahova ndiye yekha omwe ambadziwa bwino nkhani iri-yentse pomwe akanati kuitonga, ndipopa ndiye yekha omwe an’themera kutonga nkhani. Yahova adasiyana na ayeruzi omwe ni wanthu thangwe ambadziwa bzentse bza nkhani yomwe an’funa kuitonga. (Gen. 18:20, 21; Sal. 90:8) Iye ambatonga lini mwakubverana na bzomwe wanthu awona ayai kubva. Iye ambabvesesa bwino bzomwe munthu acita, bzomwe bzamucitisa kuti acite cinthuco, komwe adakulira na momwe bzinthu bziriri komwe ambakhala. Ndipo Yahova ambadziwambo bzomwe bziri mu mtima mwa munthu. Iye ambadziwa penu munthuyo acita pikadoyo utowa ayai ne. Palibe cinthu comwe cingabisike kwa Yahova. (Aheb. 4:13) Ndipopa Yahova akawona kuti bziri bwino kulekerera munthu, bzin’funa kulewa kuti iye wabvesesa nkhaniyo ndipo akuwona kuti munthuyo an’themeradi kulekereredwa. w22.06 4 ¶8-9

Ifepano tin’funika kudziwa bwino-bwino bzomwe Sathani adacitira Djobi thangwe iye ambacitambo bzibodzi-bodzibzi na ifepano ntsiku zino. Sathani akhafuna kulewa kuti ifepano timbafuna lini Yahova na mtima wentse. Ndipo tikagumana na mabvuto, tin’dzasiya kukhala wakukhulupirika kwa iye kuti tipulumuse moyo wathu. Ndipo Sathani adalewa pomwe kuti Mulungu ambatifuna lini ndipo ambawona lini nyongo yomwe timbacita kuti timukondwese. Tsono ifepano tin’dzabvuma lini kupumpsidwa na Sathani thangwe timbadziwa kale njira zace. Tikakhala tikugumana na mabvuto, tin’funika kuwona mabvutoyo kuti ni mwayi kuti tibzidziwe bwino. Mabvuto yomwe Djobi adagumana nayo yadamuthandiza kuwona bzinthu bzomwe akhafunika kucinja pa moyo wace, ndipo adacinjadi. Cibodzi mwa bzinthubzo n’cakuti iye adapfunza kukhala wakubzicepesa. (Djob. 42:3) Ifepano tingabzidziwembo bwino tikakhala tikugumana na mabvuto. Ifepano tikazindikira bzinthu bzinango bzomwe timbaphonya, tin’funika kucita nyongo kuti ticinje. w22.06 23 ¶13-14

Yahova adalewa kale kuti an’dzatithandiza. Kumbukirani bzomwe iye adalewa pomwe akhanati kulewa mafala yakuti: “Imwepo ndimwe mboni zangu.” Yahova adalewa kuti: “Ukadzapita na m’madzi, ine nin’dzakhala nawe, ndipo ukadzayambuka mikulo, iyo in’dzakumiza lini. Ukadzafamba pa moto, un’dzapsa lini, ne kubvulidwa.” (Zai. 43:2) Pomwe tikupalizira, nthawe zinango tingagumane na mphitca zomwe ziri ninga madzi na mabvuto yomwe yali ninga moto. Koma Yahova ambatithandiza kuti tipitirize kupalizira. (Zai. 41:13) Wanthu azinji ntsiku zino ambalamba kubva mafala yabwino. Tsono, ifepano timbapitiriza basi kupalizira thangwe timbadziwa kuti kulamba kwawo kutetekera bzin’funa lini kulewa kuti tikutazira kucita basa lathu la kupalizira. Timbakomedwa kwene-kwene thangwe ra kudziwa kuti Yahova ambakomedwa akatiwona tikupitiriza kupalizira mafala yace mwakukhulupirika. Mpostolo Paulo adalewa kuti: “Ali-wentse an’dzatambira mabaibai yace mwakubverana na basa lace.” — 1 Ako. 3:8; 4:1, 2. w22.11 4 ¶5-6

Ntsiku zino timbawona mapolofesiya ya m’Bibliya yakukwanisika. Wanthu ‘wa bzirewedwe bzentse’ akupfunza kulewalewa “cirewedwe cakucena” comwe ni cadidi ca m’Bibliya. (Zak. 8:23; Zef. 3:9) Wanthu wakupitirira mamidyau 8 m’madziko yakukwana 240 akucita mbali ya gulu la Yahova ndipo gole liri-lentse wanthu wakupitirira 10 000 ambabatizidwa! Tsono cinthu cakufunika kwene-kwene ni kuwanda lini kwa wanthuwo, koma ni makhalidwe yacikristau yomwe iwo adayapfunza ndipo ambayalatiza, komwe ni kubvala “unthu bupsa.” (Akol. 3:8-10) Iwo adasiya kucita bzinthu bza upombo, ndewo, ukambowa, tsankhulo na kucita bzinthu bzakulatiza kuti ambafuna kwene-kwene dziko lawo. Polofesiya yakunembedwa pa Zaiya 2:4 ikukwanisika thangwe iwo ‘akupfunza lini pomwe nkhondo.’ Tikambacita nyongo yakulatiza makhalidwe yabwino, timbacitisa kuti wanthu abwere mu gulu la Mulungu ndipo timbalatiza kuti tikutewera mtsogoleri wathu Kristu Jezu. (Juw. 13:35) Thangwe ranyi bzimwebzi bzikukwanisika? Bzimwebzi bzikukwanisika thangwe rakuti Jezu akutipasa bzomwe tikufunikira kuti tikwanise kulatiza makhalidwe yabwino. w22.07 9 ¶7-8

Tikambapemba kwa Yahova, tin’funika kumbalewalewa mwaulemu kwene-kwene. Kumbukirani bza masomphenya yakudabwisa yomwe mpolofeta Zaiya, Zakiyeri, Daniyeli na mpostolo Juwau adawona. Yentseneyo yambalatiza kuti Yahova ni Mambo wakulemekezeka. Mpolofeta Zaiya “adawona Yahova ali pa mpando wace wakulemekezeka na wapadzaulu.” (Zai. 6:1-3) Mpolofeta Zakiyeri adawona Yahova ali pa ngolo yace yakudzulu ndipo pomwe akhalipo “pakhayetima ninga . . . citaleza.” (Ezek. 1:26-28) Mpolofeta Daniyeli adawona “Wa ntsiku Zizinji” adabvala bzakubvala bzicena, ndipo m’mphepete mwa mpando wace mukhagaka moto. (Dan. 7:9, 10) Ndipo mpostolo Juwau adawona Yahova adakhala pa mpando wace wa umambo ndipo m’mphepete mwa mpandoyo mukhana citaleza comwe cikhana mawonekedwe ninga mwala wa Esmeralda. (Apok. 4:2-4) Tikambakumbukira ulemerero bukulu bomwe Yahova anabobu, ifepano timbakwanisa kuwona kuti ni mwayi ukulu kwene-kwene kulewalewa naye mu mpembo ndipo timbawonambo kufunika kwa kulewalewa naye mwaulemu. w22.07 20 ¶3

Maswakamwe, Sathani ambayezera kukutazisani kukula mwauzimu. Cinthu cibodzi comwe iye ambacita ni kukucitisani kukumbuka kuti bzinthu bzinango bzomwe Bibliya limbapfunzisa mpsakunama. Ndipo cibodzi mwa bzinthu bzomwe bzimbapitana na Bibliya ni nkhani yakuti bzinthu bzidacita kusanduka. Nkhani imweyi imbanyoza Mulungu ndipo ntsiku ziwande ayai zicepe imwepo mun’dzaibva basi ikulewedwa. Pomwe mukhali mwana, pinango mukhaidziwa lini nkhani imweyi, tsono pomwe mwakulapa pinango mukuipfunza ku xikola. Nthawe zinango bzingawoneke ninga kuti bzomwe apfunzisi akulewa mpsacadidi. Tsono kumbukirani kuti iwo pinango alibe kupfunza bwino-bwino umboni bwakuti alipo Mulengi. Onani mafala yomwe yali pa Mimwani 18:17. Vesiri limbalewa kuti: “Munthu akayamba ndiye kufotokoza mbali yace pa mulandu, ambawoneka ninga ana lazau, tsono mwanzace akabwera acifotokozambo mbali yace, bzentse bzimbawonekera padeca.” Imwepo mun’funika kumbapfunza bwino-bwino Fala la Mulungu, Bibliya pabodzi na mabukhu yathu, sikuti kumbandokhulupira cinthu ciri-centse comwe mumbabva ku xikola. w22.08 2 ¶2; 4 ¶8

Ifepano tikufuna kubvesesa bzomwe timbawerenga m’Fala la Mulungu, thangwe tikasaya kubvesesa bzomwe tikuwerenga, kuwerengako kungakhale kulibe phindu. Thangwe ranyi tikulewa tenepoyo? Kumbukirani bzomwe Jezu adauza “mwamuna munango omwe akhali mdziwi wa Malamulo.” (Luk. 10:25-29) Pomwe mwamuna umweyu adabvunza bzomwe akhafunikira kucita kuti adzagumane moyo wakusaya kumala, Jezu adamuthandiza kugumana mtawiro mwakuphatisa basa Fala la Mulungu. Iye adamubvunza kuti: “Kodi bzomwe bzidanembedwa m’Malamulo bzimbalewa ciyani? Kodi iwepo umbabvesesa tani?” Mwamunayo adakwanisa kupereka mtawiro mwakuphatisa basa bzinembo bzomwe bzimbalewa kuti tin’funika kufuna Mulungu na anzathu. (Lev. 19:18; Deut. 6:5) Tsono onani bzomwe iye adabvunza. Iye adati: “Kodi mwanzanguyo ni mbani maka-maka?” Bzimwebzi bzikulatiza kuti mwamunayu akhabvesesa lini bzomwe akhawerenga. Ndipopa, iye alibe kukwanisa kuphatisa basa bzinembobzi pa moyo wace. Yahova ndiye angatithandize kubvesesa Bibliya. Ndipopa, mukumbireni kuti akupaseni mzimu wace wakucena kuti ukuthandizeni kukhala tceru na kukuthandizani kuphatisa basa bzomwe mwawerenga. w23.02 9 ¶4-5

“Kodi mudadziwa tani cadidi?” Tikudziwa kuti imwepo mudatawira kale mbvunzo umweyu kazinji-kentse. Umweyu ni mbvunzo wakuyamba omwe timbabvunza Akristau anzathu tikadziwana nawo. Ifepano timbakomedwa kwene-kwene abale na mpfumakazi zathu akatiuza momwe adadziwira Yahova ndipo timbakomedwambo kuwauza momwe tidadziwira cadidi. (Aro. 1:11) Tikambaceza nkhani zimwezi, timbawona kuti cadidi ni cinthu cakufunika kwene-kwene pa moyo wathu. Ndipo kucita bzimwebzi kumbatithandizambo kufunisisa kupitiriza “kufamba m’cadidi,” bzomwe bzimbathandauza kupitiriza kucita bzinthu bzomwe Yahova ambakomedwa nabzo. Pana bzinthu bzizinji bzomwe bzimbaticitisa kufuna cadidi. Koma thangwe likulu ndakuti Yahova ndiye Mwenekaciro cadidi. Mwakuphatisa basa Fala lace, Bibliya, ifepano timbadziwa kuti iye alibe kundophatisa basa mphanvu zace kuti akonze kudzulu na dziko la pantsi basi, koma iye ambatipasambo bzinthu bzakufunikira pa moyo wathu kuti tipitirize kukhala na moyo. — 1 Ped. 5:7. w22.08 14 ¶1, 3

Mpostolo Paulo adalimbikisa abale na mpfumakazi zace kuti ambacite “mabasa yabwino” pakulatiza lufoyi. (Aheb. 10:24) Paulo akhambandothandiza lini abale wace mwa mafala basi, koma akhawathandizambo mwa bzicito. Bzimwebzi bzidawonekera padeca pomwe Akristau wa ku Djudeya adagwedwa na njala. Pa nthawe imweyi, Paulo adacitambo basa lakupereka thandizo kwa abalewo. (Mab. 11:27-30) N’cadidi kuti Paulo akhacita nyongo kwene-kwene pa basa lakupalizira na kupfunzisa. Koma pa nthawe ibodzi-bodziyo iye akhathandizambo abale wace wacikristau pa bzomwe akhafunikira pa moyo wawo. Bzimwebzi bzidathandiza abale na mpfumakaziwo kuwona kuti Yahova akhawathandiza. Ntsiku zino, tikabziperekambo kuti tithandize abale na mpfumakazi zathu omwe agwedwa na malengwa ya pantsi timbalimbisa cikhulupiro cawo kwa Yahova. Ifepano tingalimbisembo cikhulupiro ca abale na mpfumakazi zathu tikambacita bzakupereka kuti bzithandizire basa la pa dziko lentse. Tikacita bzimwebzi, timbathandiza abale na mpfumakazi zathu kukhulupira na mtima wentse kuti Yahova an’dzawalekerera lini. w22.08 24 ¶14

Bibliya limbalewa bzinthu bzizinji bzomwe bzidacitika kale ndipo bzinango bzidadzacitika pomwe padapita magole mazinji. Nkhani zakufotokoza bzomwe bzidacitika kale-kale zimbalatiza kuti bzomwe Bibliya lidalewa bzidacitikadi. Bzimwebzi bzimbatidabwisa lini thangwe timbadziwa kuti ni Yahova omwe adacitisa kuti bzimwebzi bzinembedwe. Kumbukirani nkhani yakulewa bza kukundidwa kwa mzinda wa Babiloniya. Pakati pa gole la 778 mpaka 772 AEC, mzimu wa Mulungu udatsogolera mpolofeta Zaiya kunemba kuti mzinda wamphanvu wa Babiloniya ungadadzapfudzidwa. Ndipo iye adalewambo dzina la munthu omwe angadadzatsogolera nkhondoyo kuti ni Siro. Ndipo adalewambo bzomwe bzingadadzacitika pa kupfudzidwa kwa mzindayo. (Zai. 44:27–45:2) Zaiya adalewa pomwe kuti mzinda wa Babiloniya ungadadzapfudzidwa ndipo ungadadzakhalidwa lini pomwe na wanthu. (Zai. 13:19, 20) Babiloniya adadzapfudzidwa na Amedi na Aperisi mu gole la 539 AEC, ndipo mpaka pano mbuto yomwe ikhana mzinda umweyu ni matere. w23.01 4 ¶10

Yahova adatisankhula kuti ticite mbali ya banja la pa dziko lentse la atumiki wace. Umweyu ni mwayi ukulu kwene-kwene kwa ifepano thangwe umbaticitisa kukhala na bzisimbo bzizinji! (Mar. 10:29, 30) Ifepano tina abale na mpfumakazi pa dziko lentse la pantsi omwe ambafuna Yahova ndipo ambacita nyongo kuti ateweze mitemo yace. Ndife wanthu wakusiyana bzirewedwe, cikhalidwe na kabvalidwe. Tsono tikakhala pabodzi timbalatiza kuti timbabverana napo kuti tikhadziwana lini. Comwe cimbatidekera kwene-kwene ndico kutsonkhana pabodzi na abale wathu ticinamata na kutumbiza Baba wathu wa kudzulu Yahova. Ndipopa tin’funika kumbabverana nawo. (Sal. 133:1) Bzimwebzi mpsakufunika thangwe rakuti iwo ambatithandiza tikagumana na mabvuto. (Aro. 15:1; Agal. 6:2) Ndipo iwo ambatithandizambo kupitiriza kutumikira Yahova. (Aheb. 10:23-25) Kodi bzinthu bzingadakhala tani tingadasaya kukhala na abale na mpfumakazi kuti ambatikhotcerere kuna anyamadulanthaka wathu, omwe ni Sathani Dyabu na dziko lakuipali? w22.09 2-3 ¶3-4

Nthawe zinango bzinganese kukhala wakubziphata tikakhala tikuceza pa interneti. Ndipo tikasaya kuwona bwino tingazimbule nkhani za cintsintsi kwa wanthu azinji mwakusaya kudziwa. Tin’funikambo kukumbukira kuti tikambalewa nkhani za cintsintsi pa interneti timbadziwa lini kuti n’ciyani comwe wanthu an’cita na nkhanizo na mabvuto yomwe yangabwere. Kukhala wanthu wakubziphata kumbatithandizambo kunyamala pomwe anyamadulanthaka wanthu akutingingimiza kuti tizimbule bzinthu bzomwe bzingaikhe pa ngozi moyo wa abale na mpfumakazi zathu. Bzimwebzi bzingacitike tikakhala tikubvunzidwa na mapolisiya m’madziko yomwe basa lathu ndakuletsedwa ayai tiribe ufulu bwa kunamata. Pa nthawe ninga zimwezi, tingaphatise basa nfundo ya m’Bibliya yakuti ‘tiphate mulomo wathu.’ (Sal. 39:1) Bwerani tilatize kuti ndife wanthu wakukhulupirika kwa wanthu wa pa mui pathu, axamwali wathu, abale na mpfumakazi zathu ayai wanthu winango. Ndipo kuti bzimwebzi bzikwanise tin’funika kukhala wanthu wakubziphata. w22.09 13 ¶16

Kuti tikhale na mpfatso caiwo tin’funika kumbawerenga Fala la Mulungu. Ndipo iro ndakufunika kwa ifepano. Jezu adalewa kuti: “Munthu ambakhala lini na moyo na cakudya cokha, koma na mafala yentse yakucokera mkamwa mwa Yahova.” (Mat. 4:4) Ndipopa tin’funika kumbawerenga Fala la Mulungu, Bibliya, ntsiku zentse. Yahova ambatifuna ndipopa adatipasa malango yace, mwakuphatisa basa Bibliya, kuti yatithandize kukhala na moyo wabwino. Bibliya limbatiuza bzomwe iye an’funa kuti ticite, bzomwe tingacite kuti tikhale naye pa uxamwali na bzomwe tingacite kuti iye atilekerere pikado zathu. Ndipo Bibliya limbatithandizambo kudziwa bzomwe Mulungu an’funa kudzaticitira kutsogolo. (Jer. 29:11) Cadidi ca m’Bibliya comwe timbapfunza cimbatithandiza kuti tikhale na moyo wabwino. Tikakhala tawofoka thangwe ra mabvuto yomwe timbagumana nayo, tingawerenge Fala la Yahova na kukumbukira mwakamderekho bzomwe tawerengabzo. w22.10 7 ¶4-6

Bibliya limbatiuza kuti tin’funika lini kukhala wanthu wakusaya kudziwa bzinthu, koma tikhale “akulu pakubvesesa [kwathu] bzinthu.” Ifepano timbabvesesa bzinthu bzizinji tikambaphatisa basa nfundo za m’Bibliya pa moyo wathu. Pomwe ntsiku zikupita, ifepano tin’dzawona kuti nfundo zimwezi zikutithandiza kutcenkha mabvuto mazinji ndipo tikucita bzinthu mwanzeru. Mpsabwinombo kuwona bzinthu bzabwino bzomwe tacita kale. Penu ifepano tidayamba kale-kale kupfunza Bibliya na kuyenda ku mitsonkhano, tingabzibvunze kuti: ‘N’ciyani cikunditazisa kubzipereka kwa Yahova na kubatizidwa?’ Ndipo penu tidabatizidwa kale, kodi tikupitiriza kuyenda patsogolo na kuthimizira luso lathu lakupalizira na kupfunzisa mafala ya Mulungu? Kodi bzomwe ifepano timbacita bzimbalatiza kuti timbatsogoleredwa na nfundo za m’Bibliya? Kodi timbalatiza kuti tina makhalidwe yacikristau tikakhala tikucita bzinthu na anzathu? Tikawona kuti pana bzinthu bzomwe tin’funika kucinja, tin’funika kukumbukira malango ya Yahova yomwe ‘yambapasa nzeru wanthu wakusaya kudziwa bzinthu.’ — Sal. 19:7. w22.10 20 ¶8

Zakiyeri adakwanisa kuwona kuti mzimu wa Mulungu ngwamphanvu kwene-kwene. Bzomwe Zakiyeri adawona m’masomphenya bzidamuthandiza kudziwa kuti mzimu wa Mulungu ukhathandiza anjo wamphanvu na kufambisa ngolo ya kudzulu. (Ezek. 1:21) Kodi n’ciyani comwe Zakiyeri adacita pomwe adawona bzimwebzi? Iye adanemba kuti: “Pomwe ndidawona bzimwebzi ndidatsulimisa msolo wangu.” Bzimwebzi bzikulatiza kuti Zakiyeri akhana mantha kwene-kwene, ndipopa adatsulimisa msolo wace pantsi. (Ezek. 1:28) Tsono, pomwe padapita nthawe, Zakiyeri adayamba kukumbukira bzinthu bzakudabwisa bzomwe adawona m’masomphenyayo, ndipo iye adakhulupira kuti mzimu wakucena ungadamuthandiza kucita basa lomwe adapasidwa. Yahova adauza Zakiyeri kuti: “Mwana wa munthu, cita kuima kuti ndilalewe nawe.” Mafala yamweya pabodzi na “mzimu” wakucena bzidapasa mphanvu Zakiyeri kuti aime. (Ezek. 2:1, 2) Pomwe Zakiyeri akhacita utumiki bwace, iye akhatsogoleredwa na “boko” la Mulungu, omwe ni mzimu wakucena wa Mulunguyo. — Ezek. 3:22; 8:1; 33:22; 37:1; 40:1. w22.11 4 ¶7-8

Mpolofeta Zaiya akulewa kuti Yahova ali ninga mpfunzisi omwe akufamba m’mambuyo mwa anyakupfunza wace acimbawapanganiza njira. Ntsiku zino timbabva fala la Mulungu m’mambuyo mwathu. Kodi timbalibva tani? Tikumbukire kuti mafala ya Mulungu yadanembedwa kale-kale kwene-kwene. Ndipopa tikambawerenga Bibliya timbakhala ninga tikubva fala la Mulungu m’mambuyo mwathu. (Zai. 51:4) Kodi tingacite tani kuti tigumane phindu na bzomwe Yahova ambatipfunzisa? Onani bzinthu bziwiri bzomwe Zaiya adanemba. Iye adati: “Njira njiyi. Fambani m’mwemo.” Tin’funika lini kundodziwa ‘njirayo’ basi, koma tin’funikambo ‘kufamba m’mwemo.’ Yahova ambaphatisa basa Fala lace pabodzi na gulu lace kuti atithandize kudziwa bzomwe iye ambafuna. Ndipo ambatithandizambo kuwona momwe tingaphatisire basa bzomwe tadziwabzo. Ndipopa kuti tipitirize kutumikira Yahova mwakukondwa tin’funika kucita bzinthu bziwiribzi. Tikacita bzimwebzi Yahova an’dzatibaira. w22.11 11 ¶10-11

Pomwe apostolo azinji wa Jezu adamala kufa, Akristau wakunama adapita m’gwere. (Mat. 13:24-27, 37-39) Iwo akhalewa “bzinthu bzakuphonyeka, kuti apumpse anyakupfunza kuti akhale ku mbali yawo.” (Mab. 20:30) Cinthu cibodzi pa “bzinthu bzakuphonyeka” bzomwe Akristau wakunamawa akhapfunzisa cikhali cakuti Jezu akhafunika kufa kazinji-kentse kuti ntsembe yace ikwanise kumalisa pikado za wanthu azinji. Tsono Bibliya limbalewa mwakubveka bwino kuti iye adapereka ntsembe “kabodzi kokha mpaka kale-kale, kuti anyamule pikado za wanthu azinji.” (Aheb. 9:27, 28) Ntsiku zino, wanthu wa mitima yabwino ambakhulupira cipfunziso cakunamaci. Iwo ambayenda m’magereja ndipo nthawe zinango ambakumbukirambo infa ya Jezu. Iwo ambacemera msinda umweyu kuti “Paskwa.” Magereja manango yambakumbukira lini infa ya Jezu, ndipopa wanthu omwe ambanamata magereja yamweya ambadziwa lini phindu la ntsembe ya Jezu. w23.01 21 ¶5

Mkati mwa Utongi bwa Jezu bwa Magole 1000, wanthu omwe adafa an’dzalamusidwa ndipo omwe ambabvera Yahova an’dzathandizidwa kukhala wanthu wakulungama. Wanthu wentse omwe Yahova an’dzawawona kuti mbakulungama “an’dzatambira dziko la pantsi ndipo an’dzakhala m’mwemo kuyenda na kuyenda.” (Sal. 37:10, 11, 29) Pa nthawe imweyo, “infa ninga nyamadulanthaka wakumalizira in’dzapfudzidwa.” (1 Ako. 15:26) Cidikhiro cathu cakudzakhala na moyo wakusaya kumala n’cacadidi thangwe cimbafotokozedwa m’Fala la Mulungu. Cidikhiro cimweci cimbatithandiza kupitiriza kukhala wakukhulupirika kwa Yahova mu ntsiku zakumalizira zino zomwe n’zakunesa. Tsono kuti Yahova akomedwe nafe, tin’funika lini kundokhulupirika thangwe rakuti tikufuna kudzakhala na moyo wakusaya kumala basi. Koma tin’funika kukhulupirika thangwe rakuti timbafuna kwene-kwene Yahova na Jezu. (2 Ako. 5:14, 15) Tikacita bzimwebzi, tin’dzawatewezera ndipo tin’dzacita nyongo pakuthandiza anzathu kukhalambo na cidikhiro. (Aro. 10:13-15) Tikambafuna kuthandiza anzathu, Yahova an’dzafuna kukhala nafe pa uxamwali bomwe cipo bucidzamala. w22.12 6-7 ¶15-16

Tikayamba kuzunzidwa tingasiye kukhala na mpfatso caiwo na mtendere. Ifepano tingakhale na thupo ndipo tingabzibvunze kuti: ‘N’ciyani cin’ticitikira?’ Mpsakuphonyeka lini kubzibvunza tenepoyo. Tsono tin’funika kucita mphole. Thangwe Jezu adalewa kuti kuzunzidwa kungacitise ateweri wace kuwofoka. (Juw. 16:1, 2) Timbadziwa kuti Jezu adalewa kuti tin’dzazunzidwa, tsono iye adalewambo kuti tingakwanise kukhala wakukhulupirika. (Juw. 15:20; 16:33) Basa lathu likaletsedwa tingatambire malango kucokera ku mthambi na kwa akulu wa gwere. Malango yamweya yambaperekedwa kuti yatikhotcerere, kuti tipitirize kutambira mabukhu, kuti tipitirize kumbatsonkhana na kuti tipitirize kupalizira. Mukapasidwa malango, yaphatiseni basa. (Tiy. 3:17) Ndipo cinango n’cakuti tin’funika lini kuuza wanthu omwe an’funika lini kudziwa nkhani ya abale wathu ayai ya gwere. — Mpal. 3:7. w22.12 20-21 ¶14-16

Jezu akupitiriza kutsogolera anyakupfunza wace pa basa la kupalizira mafala yabwino ya Umambo pa dziko lentse la pantsi. Iye akucita mbali yace. Ndipo mwakuphatisa basa gulu la Yahova, Jezu ambatipfunzisa momwe tingapalizirire ndipo ambatipasa bzinthu bzomwe bzimbatithandiza kumwaza mafala yabwino ya Umambo. (Mat. 28:18-20) Ifepano timbalatiza kuti tikucita bzomwe Jezu adatiuza tikambacita nyongo pa basa la kupalizira na kupfunzisa wanthu na mwa kupitiriza kukhala tidapenya pomwe tikudikhirira kuti Yahova amalise dziko lakuipali. Tikaphatisa basa malango ya pa Ahebereu 6:11, 12, tin’dzaphatisisa cidikhiro cathu “mpaka kuphampha.” Yahova adaikha kale ntsiku na nthawe yakuti adzapfudze dziko la Sathaniri. Ntsikuyo ikadzafika, iye an’dzakwanirisa bzomwe bzidanembedwa mu polofesiya ya kulewa bza nkhani imweyi. Tsono, ifepano tingawone ninga kuti ntsikuyo ikucedwa. Koma, ntsiku ya Yahova ‘in’dzacedwa lini!’ (Hab. 2:3) Ndipopa, bwerani tentse ‘tipitirize kudikhirira Yahova, tipitirize kudikhirira Mulungu wa cipulumuso cathu.’ — Mik. 7:7. w23.02 19 ¶15-16

Munthu omwe akukwira phiri kuti afike pa ntsonga, nthawe zinango iye angaime pang’ono m’mbuto zinango kuti awone bzinthu bzomwe bziri m’mphepete mwa phirilo pomwe akanati kufika pa ntsongapo. Mpsibodzi-bodzimbo na imwepo. Pomwe mukutumikira Yahova, nthawe zinango mbaimani mucimbakumbukira bzinthu bzabwino bzomwe iye akukucitirani kuti mukwanise kupirira mabvuto yomwe mukugumana nayo. Kuphampha kwa ntsiku iri-yentse mbabzibvunzani kuti: ‘Kodi n’ciyani comwe Yahova wandicitira lero? Napo kuti mabvuto yangu yakanati kumala, kodi Yahova wandithandiza tani kupirira mabvutoyo?’ Mbacitani nyongo kuti mukwanise kuwona cisimbo cibodzi cakucokera kwa Yahova comwe cikulatiza kuti iye akukuthandizani kupirira mabvuto yomwe mukugumana nayo. Pomwe bvuto lathu likanati kumala, tingapitirize kupemba kwa Yahova kuti atithandize. (Afil. 4:6) Tsono tin’funikambo kumbawona bzinthu bzomwe iye akutipasa pa nthawe yomwe tikugumana na mabvutoyo. Iye adalewa kuti an’dzatipasa mphanvu ndipo an’dzatithandiza kupirira. Ndipopa mbatendani Yahova thangwe rakuti iye ambakuthandizani. Mukacita bzimwebzi, mun’dzakwanisa kuwona kuti iye akukuthandizani napo kuti mabvuto yanu yakanati kumala. — Gen. 41:51, 52. w23.01 19 ¶17-18

Bzibvunzeni kuti: ‘Kodi bzomwe nimbacita bzimbalatiza kuti inepano nimbakhulupira kuti dzikoli lin’pfudzidwa tsapanopa? Kodi bzomwe nimbakumbuka pa nkhani ya kupfunza na basa bzimbalatiza kuti nimbawona kuti kutumikira Yahova ni cinthu cakufunika kwene-kwene? Kodi nimbakhulupira kuti Yahova an’dzandithandiza kudyesa banja langu?’ Dziwani kuti Yahova ambakomedwa kwene-kwene akawona kuti tikucita bzinthu bzomwe iye ambakomedwa nabzo. (Mat. 6:25-27, 33; Afil. 4:12, 13) Ifepano tin’funika kukhala na nthawe ya kumbabziwona tekha kuti tidziwe kuti tina nzeru za moda wanyi ticicinja tikawona kuti tayamba kukhala na nzeru zakuphonyeka. Paulo adauza Akristau wa ku Kolinto kuti: “Pitirizani kubziyeza kuti muwone penu mukana cikhulupiro cakulimba. Pitirizani kubziyeza kuti muwone kuti ndimwe munthu wa mtundu wanyi.” (2 Ako. 13:5) Ndipopa tikambawerenga Fala la Mulungu, kupfunza nzeru zace na kucita bzinthu bzomwe iye ambakomedwa nabzo, nzeru zathu zin’dzacinja. — 1 Ako. 2:14-16. w23.01 9 ¶5-6