Outubro

Tentsenefe tingacitise kuti mitsonkhano ikhale yakudekeza kwene-kwene mwa kumbaimba nyimbo pabodzi na abale na mpfumakazi zathu na kumbapereka mitawiro yakukonzekeredwa bwino. Tsono, winango bzimbawanesa kuimba ayai kutawira pa mitsonkhano. Kodi imwepo bzimbakunesanimbo? Penu mun’ti inde, onani bzomwe bzidathandiza abale na mpfumakazi winango kukunda bvuto limweri. Pakuimba, wanthu winango azindikira kuti kuimba na mtima wentse kumbathandiza. Tikambaimba nyimbo za Umambo, cinthu cikulu ni kutumbiza Yahova. Tenepo mbakonzekerani nyimbozo kumui, ninga momwe mumbacitira pa kukonzekera mbali zinango za mitsonkhano Ndipo yezerani kuwona kubverana komwe kulipo pakati pa bzomwe nyimboyo ikulewa na bzomwe tin’kapfunza pa mitsonkhanopo. Ndipo yezeranimbo kukumbukira kwene-kwene bzomwe nyimboyo ikulewa sikuti kukhala na madu ya kuimba. Kutawira pa mitsonkhano bzingakhale bzakunesa kwa winango. Tsono n’ciyani cingathandize? Yezerani kucita bzimwebzi ntsiku zentse. Kumbukirani kuti Mtawiro Wabwino un’funika kukhala wacigwatira, wakusaya kunesa na kutawira mbvunzo omwe wabvunzidwayo. Yahova ambatenda kwene-kwene kufuna kwathu kumutumbiza pa mitsonkhano ya gwere. w22.04 7-8 ¶12-15

Fala lakuti “mthandizi” limbathandauza munthu omwe akuthamanga kuti akathandize mwanzace omwe akukumbira thandizo. Ndoyezezerani kuti mukuwona Yahova akuthamanga kuti akathandize munthu omwe akugumana na mabvuto. Imwepo mukutawiriza kuti mafala yamweya yakulatiza kuti Yahova akufunisisa kukhala Mthandizi wathu. Ifepano tin’dzakwanisa kupirira mabvuto ticipitiriza kukhala wakukondwa thangwe Yahova ali ku mbali yathu. Kodi n’ciyani comwe Yahova ambacita kuti atithandize kupirira? Kuti titawire mbvunzo umweyu bwerani tiwone bukhu la Zaiya. Thangwe ranyi? Thangwe mapolofesiya mazinji yomwe Zaiya adanemba yangathandize atumiki wa Mulungu ntsiku zino. Cinango n’cakuti, pomwe Zaiya akhanemba bza Yahova akhaphatisa basa mafala yakusaya kunesa kubvesesa. Timbawona bzimwebzi mu kapitulo 30. Kapitulo imweyi ina mafala yomwe yambatithandiza kubvesesa momwe Yahova ambatithandizira ntsiku zino. Zaiya adanemba kuti Yahova ambatithandiza mwa kucita bzinthu ibzi: (1) kutetekera na kutawira mipembo yathu, (2) kutipasa malango na (3) kutisimba ntsiku zino na kutsogolo. w22.11 8 ¶2-3

Mafala yomwe Jezu adauza Akristau wa magwere ya ku Ejimirna na Filadelfiya iye adauza Akristau wa magwereya kuti akhafunika lini kugopa kuzunzidwa, thangwe Yahova angadadzawabaira angadapitiriza kukhala wakukhulupirika. (Apok. 3:10) Ifepanombo nthawe iri-yentse tingazunzidwe ndipo tin’funika kukhala wakukonzeka kupirira. (Mat. 24:9, 13; 2 Ako. 12:10) Bukhu la Apokalipse limbatiuza kuti wanthu wa Mulungu angadadzazunzidwa mu “ntsiku ya Mbuya,” yomwe ni ntsiku zathu zino. (Apok. 1:10) Kapitulo 12 ya bukhu la Apokalipse imbalewa bza nkhondo yomwe idacitika kudzulu, pa nthawe yomwe Jezu adayamba kutonga mu Umambo bwa Mulungu. Migeli, omwe ni Jezu Kristu, pabodzi na anyankhondo wace adamenya nkhondo na Sathani pabodzi na madimonyo yace. (Apok. 12:7, 8) Anyamadulanthaka wa Mulunguwa adakundidwa acithusidwa pantsi pano, ndipopa iwo ambayambisa mabvuto makulu yomwe yambaboneresa wanthu pa dziko lentse. — Apok. 12:9, 12. w22.05 5 ¶12-13

Katongedwe ka Yahova nthawe zentse n’kakulungama. Iye alibe tsankhulo, ndipo ambacita lini kuwona nkhope kuti alekerere munthu. Iye ambalekerera lini munthu thangwe rakuti adadala, ngwakubvekera ayai thangwe rakuti ambadziwa bzinthu kwene-kwene. (1 Sam. 16:7; Tiy. 2:1-4) Palibe munthu omwe angapase Yahova bobobo ayai kumungingimiza kuti atonge munthu mwakusiyana na momwe iye akhafuna kutongera. Iye ambatonga lini munthu thangwe rakuti wakalipa na bzomwe munthuyo acita. (Eki. 34:7) Yahova ambabvesesa bzinthu ndipo ambakwanisa kudziwa bzomwe bziri mu mtima mwa munthu, ndipopa ngwakuthemera kutonga wanthu kuposa muyeruzi ali-wentse. (Deut. 32:4) Anembi wa Bzinembo bza Cihebereu adazindikira kuti kulekerera kwa Yahova n’kwakusiyana na kwa wanthu. Ndipopa pomwe iwo akhanemba Bibliya, adaphatisa basa fala la Cihebereu lakulatiza kusiyana kumweku. Bukhu linango lidalewa kuti “falalo lidandophatisidwa basa pakufotokoza kulekerera komwe Mulungu ambakucita kuna wanthu. Fala limweri limbaphatisidwa lini basa pakufotokoza kulekerera komwe wanthu ambacitirana okha-okha.” Yahova ndiye yekha omwe ambakwanisa kulekerera munthu omwe wacita pikado akakungula na mtima wentse. w22.06 4 ¶10-11

Penu mukupfunzisa mwekha mwana cadidi ca m’Bibliya thangwe rakuti mulibe mwamuna, ayai mwamuna wanu ambatumikira lini Yahova, khalani na citsimikizo centse cakuti kukhulupirika kwanu kumbalimbikisa anzanu Tani penu wana wanu akuphatisa lini basa bzomwe mukuwapfunzisa? Kumbukirani kuti basa lakupfunzisa mwana limbamala nthawe izinji. Imwepo mukabzala muti nthawe zinango mungambabzibvunze penu mutiyo un’dzakula, ucibala bzisapo. Imwepo mumbadziwa lini bzomwe bzin’citika kutsogolo, koma mumbapitiriza kuuthirizira kuti ukule. (Mar. 4:26-29) Mpsibodzi-bodzimbo na kupfunzisa mwana, nthawe zinango mungabzibvunze penu mukukwanisadi kupfunzisa wana wanu kufuna Yahova. N’cadidi kuti imwepo mungakwanise lini kuwasankhulira bzakucita, tsono mukacita nyongo pa kuwapfunzisa, mun’dzakhala mukuwathandiza kuti iwo asankhule kukhala axamwali wa Mulungu. w22.04 19-20 ¶16-17

Pomwe Salomau akhanamata Yahova mwakukhulupirika, iye akhabziwona mwacikati-kati. Pomwe akhali mulumbwana, iye adazindikira kuti pana bzinthu bzomwe angadakwanisa lini kucita yekha ndipo adakumbira Yahova kuti amutsogolere. (1 Ama. 3:7-9) Kumayambiriro kwa utongi bwace, Salomau akhadziwa ngozi yakukhala wakubzikuza. Mpsakupasa ntsisi kuti pomwe padapita magole, iye alibe kuphatisa basa malango yaceya. Iye adayamba kukhala wakubzikuza ndipo alibe kubvera mitemo ya Mulungu. Ubodzi wa mitemoyo ukhalewa kuti mambo wa Ajirayeri akhafunika lini “kukhala na akazi azinji kuti mtima wace uleke kupambuka.” (Deut. 17:17) Tsono Salomau alibe kubvera mtemo umweyu ndipo adalowola akazi 700 ndipo akhana akazi pomwe winango wapambali 300! (1 Ama. 11:1-3) Pinango Salomau akhakumbuka kuti bzimwebzi “bzingadamubweresera lini mabvuto.” Tsono na kupita kwa nthawe, iye adabonera thangwe ra kusaya kubvera Yahova. — 1 Ama. 11:9-13. w22.05 23 ¶12

Ntsiku zino pana bzinthu bziwiri bzakufunika kwene-kwene bzomwe wanthu an’funika kubzisankhulira okha. Iwo angasankhule kubvera Yahova, omwe ni Mtongi wa cirengedwe centse, ayai kukhala ku mbali ya nyamadulanthaka wace, omwe ni Sathani Dyabu. Munthu ali-wentse an’funika kusankhula mbali yace bzinese bzitani. Ndipo bzomwe angasankhule bzingacitise kuti adzatambire moyo wakusaya kumala ayai ne. (Mat. 25:31-33, 46) Pa nthawe ya citsautso cikulu wanthu an’dzaikhidwa cizindikiro cakuti adzapulumuke ayai cakuti adzapfudzidwe. (Apok. 7:14; 14:9-11; Ezek. 9:4, 6) Penu mwasankhula kale kuthandizira utongi bwa Yahova, mwacita bwino kwene-kwene. Tsapano imwepo mukufunisisa kuthandizambo anzanu kucitambo bzibodzi-bodzibzi. Wanthu omwe ambatumikira Yahova mwakukhulupirika an’dzatambira mabaibai. Ndipopa tentsenefe tin’funika kupfunza cadidi cakufunika kwene-kwene ca m’Bibliyaci. Tikacita bzimwebzi, tin’dzakhala na mphanvu ya kupitiriza kutumikira Yahova. Ndipo cinango n’cakuti, tin’dzakwanisa kuphatisa basa bzomwe tikupfunzabzo kuti tithandize wanthu winango kusankhula kukhala ku mbali ya Umambo bwa Mulungu na kupitiriza kumutumikira. w22.05 15 ¶1-2

Ifepano tin’funika kutetekera Yahova sikuti anyamadulanthaka wathu. Djobi adatetekera bwino-bwino pomwe Yahova akhalewalewa naye. Mafala yomwe Mulungu adauza Djobi yadamuthandiza kubvesesa kuti iye akhawona mabvuto yentse yomwe Djobiyo akhagumana nayo. Ndipo bzikhakhala ninga kuti akumuuza kuti: ‘Ndikuwona bzentse bzomwe bzikukucitikira. Kodi ukukumbuka kuti inepano ningakwanise lini kukuthandiza?’ Djobi adatawira mwakubzicepesa ndipo adatenda Yahova thangwe bzinthu bzabwino bzomwe akhamucitira. Iye adati: “Ndikhandobva bza imwe, koma tsapano ndikucita kukuwonani ndekha na maso yangu.” (Djob. 42:5) Bzikuwoneka kuti Djobi akhanati kucoka padotha pale pomwe adalewa mafala yamweya, thupi lace likhadadzala na bzironda. Napo bzikhali tenepo, Yahova adamutsimikizira kuti akhamufuna kwene-kwene ndipo akhakomedwa naye. (Djob. 42:7, 8) Ntsiku zino, wanthu angatitukwane ayai kuticitira bzinthu bzinango bzakuipa. Iwo angayezere kupswipiza mbiri yathu ayai mbiri ya gulu lathu. Tsono nkhani ya Djobi yatipfunzisa kuti Yahova ambakhulupira kuti ifepano tin’dzapitiriza kukhala wakukhulupirika kwa iye napo tikagumana na mabvuto. w22.06 24 ¶15-16

N’cadidi kuti kudzulu anjo an’dzakomedwa kwene-kwene Babiloniya Mkulu akadzapfudzidwa. Tsono pana cinthu pomwe cinango comwe cin’dzacitisa kuti wale omwe ali kudzulu akomedwe kwene-kwene. (Apok. 19:1-3) Cinthuco ni “malowozi ya Mwana wa Bira,” yomwe ni nkhani yakudekeza kwene-kwene ya m’bukhu la Apokalipse. Akristau wentse omwe ambacita mbali ya wa 144 000 an’dzakhala ali kale kudzulu pomwe nkhondo ya Armagedo ikanati kuyamba. Tsono imweyi in’dzakhala lini nthawe yakuti malowozi ya Mwana wa Bira yacitike. (Apok. 21:1, 2) Malowozi ya Mwana wa Bira yan’dzacitika nkhondo ya Armagedo ikadzamala, pomwe anyamadulanthaka wentse wa Mulungu apfudzidwa. (Sal. 45:3, 4, 13-17) Kodi n’ciyani cin’dzacitika pa malowozi ya Mwana wa Bira? Malowozi yambacitisa kuti mwamuna na mkazi ayambe kukhala pabodzi. Mpsibodzi-bodzimbo na malowozi ya Mwana wa Bira. Iyo yan’dzacitisa kuti Mambo, omwe ni Jezu Kristu, pabodzi na “namwali” wace, omwe ni anyakudzozedwa wa 144 000, ayambe kutonga pabodzi. Cinthu cakufunikaci cin’dzayambisa utongi bwa boma lipsa lomwe lin’dzatonga pa dziko la pantsi mkati mwa magole 1000. — Apok. 20:6. w22.05 17 ¶11-13

Jezu adalewa kuti mu ntsiku zakumalizira, iye angadadzaikha “kapolo wakukhulupirika na wanzeru” kuti apereke cakudya cauzimu kuna wanthu wa Yahova. (Mat. 24:45) Ndipo ndibzo bzomwe bzikucitika. Mtsogoleri wathu Jezu Kristu akuphatisa basa kathimu kang’ono ka amuna wakudzozedwawa kuti kapereke “cakudya [cauzimu] pa nthawe yakuthemera” kuna wanthu wa Mulungu na kuna wanthu winango omwe akufuna kudziwa bzizinji bza m’Bibliya. Amuna amwewa ambatonga lini cikhulupiro ca wanthu winango. (2 Ako. 1:24) Thangwe iwo ambadziwa kuti Jezu Kristu ndiye “mtsogoleri” wa wanthu wa Mulungu. (Zai. 55:4) Kuyambira mu 1919, kapolo wakukhulupirika akukonza mabukhu yakusiyana-siyana yomwe yambapereka mwayi kwa wanthu kuti apfunze cadidi kucokera m’Fala la Mulungu. Mu 1921, kapolo umweyu adakonza bukhu lakuti Zeze wa Mulungu kuti lithandize wanthu kudziwa bzizinji bza m’Bibliya. Pomwe magole yakhapita, mabukhu manango yadakonzedwambo kuti yathandize wanthu kupfunza Bibliya. Kodi ni bukhu liponi lomwe lidakuthandizani kudziwa na kufuna Baba wathu wa kudzulu? w22.07 10 ¶9-10

Yahova ni Munthu wabwino kwene-kwene. Bzinthu bzomwe Yahova ambaticitira nthawe zentse bzimbakhala bzizinji kuposa bzomwe ifepano timbamucitira. (Mar. 10:29, 30) Iye angakuthandizeni kukhala na moyo wabwino tsapano na kutsogolo. Imwepo mun’funika kupitiriza kutumikira Baba wanu wa lufoyi mpaka kale-kale. Mukacita bzimwebzi, lufoyi lanu kwa Yahova lin’dzapitiriza kukula, ndipo imwepo mun’dzakhala na mwayi wa kudzatambira moyo wakusaya kumala. Imwepo mukabzipereka kwa Yahova mucibatizidwa, mumbakhala na mwayi wakupasa Baba wanu Yahova cinthu cabwino kwene-kwene. Iye adakupasani bzinthu bzabwino kwene-kwene. Ndipo imwepo mungalatize kuti mumbatenda bzomwe Yahova adakucitiranibzi mwa kucita bzizinji pa kumutumikira. (Djob. 1:8; 41:11; Mim. 27:11) Bzimwebzi ni bzinthu bzabwino bzomwe mungacite pa moyo wanu. w23.03 6 ¶16-17

Alumbwana na atsikana ambafika pa msinkhu omwe cikhumbo cakufuna kucita malume ya pa mphasa cimbakhala camphanvu kwene-kwene. Ndipo anzawo angayezere kuwapumpsa kuti acite upombo. Sathani akufuna kuti mucite bzomwe mtima wanu ukufuna. Tsono n’ciyani comwe cingakuthandizeni kupitiriza kukhala na makhalidwe yakucena? (1 Ates. 4:3, 4) Cinthu cibodzi comwe cingakuthandizeni ni kupemba kwa Yahova. Pomwe mukupemba, muuzeni Yahova momwe mukubvera ndipo mukumbireni kuti akupaseni mphanvu. (Mat. 6:13) Kumbukirani kuti Yahova akufuna kukuthandizani sikuti kukupasani mulandu. (Sal. 103:13, 14) Lekani kuyezera kumalisa mwekha mabvuto yanu. Uzani abereki wanu bvuto lomwe mukugumana nalo. Nthawe zinango bzingakuneseni kuuza abereki wanu nkhani ninga zimwezi. Tsono mpsakufunika basi kucita tenepoyo. Mukambawerenga Bibliya na kumbakumbukira bwino-bwino bzomwe mwawerengabzo, bzin’dzakhala bzakusaya kunesa kucita bzinthu bzomwe bzimbakondwesa Yahova. Imwepo mun’dzawona kuti mun’funikira lini kukhala na lamulo lakukuuzani bzakucita pa cinthu ciri-centse, thangwe mun’dzabvesesa bzomwe Yahova akufuna kuti mucite pa nkhani iri-yentse. w22.08 5 ¶10-12

Msolo wa banja wacikristau ambawona nkhani yakunyang’anira banja lace cakudya kuti njakufunika kwene-kwene. Penu imwepo ndimwe msolo wa banja pinango mungacite thupo kuti munigumana tani cakudya na kobiri zakuti mupagali nyumba ya aluge. Ndipo pinango mungacitembo mantha kuti mukacosedwa basa mun’dzakwanisa lini kugumana linango. Ayai mungagope kucinja bzinthu pa moyo wanu kuti mucite bzizinji pakutumikira Yahova, thangwe ra kugopa kuti bzinthu bzin’kufambirani lini bwino. Sathani akwanisa kale kucitisa atumiki azinji wa Yahova kusiya kumutumikira thangwe ra kukhala na mantha yamweya. Sathani ambayezera kuticitisa kukhulupira kuti Yahova alibe nafe basa ndipo tin’funika kucita tekha nyongo yakunyang’ana cakudya kuti tipase banja lathu. Ifepano tingayambe kukumbuka kuti tin’funika kucita ciri-centse kuti tipitirize kukhala pa basa, napo penu pa basapo akutiuza kuti ticite bzinthu bzomwe bzingadzonge uxamwali bwathu na Yahova. w22.06 15 ¶5-6

Ifepano timbadziwa kuti Mulungu “[ngwantsisi] ndipo ambafulumiza lini kukalipa; iye ngwakudzala na lufoyi lacadidi pabodzi na cadidi.” (Eki. 34:6) Yahova ambafuna cirungamo. (Zai. 61:8) Ndipopa bzimbamuwawa kwene-kwene akambatiwona tikubonera. Iye ngwakukonzeka ndipo akufunisisa kumalisa mabvuto yentse yomwe tikugumana nayo. (Jer. 29:11) Bzimwebzi bzimbaticitisa kuti timbamufune kwene-kwene Yahova! Ndipo tikudikhirira na mtima wentse kuti tidzawone kukwanisika kwa bzinthu bzentse bzomwe iye adalewa! Kodi ndiponi thangwe linango lomwe limbaticitisa kufuna cadidi? Thangwe linango ndakuti cadidico cimbatipasa cidikhiro. Thangwe ranyi tikulewa tenepo? Thangwe pa bzinthu bzizinji bzomwe tidapfunza m’Bibliya, tidapfunzambo bza cidikhiro ca kutsogolo. Ndangula imbacitisa kuti mwadiya uleke kugwinyidwa na conzi. Mpsibodzi-bodzimbo na cadidi cakulewa bza kutsogolo comwe tidapfunza m’Bibliya. Ico cimbaticitisa kukhala wakulimba pomwe tikugumana na mabvuto. Mu vesi la lero mpostolo Paulo akhalewa bza cidikhiro comwe Akristau wakudzozedwa anaco cakuyenda kukakhala kudzulu. Tsono mafala yamweya yakuphatambo basa kwa Akristau omwe ana cidikhiro cakudzakhala m’paraizo pa dziko la pantsi. (Juw. 3:16) Ndipopa, kudziwa bza cidikhiro ca kudzakhala na moyo wakusaya kumala kumbacitisa kuti moyo wathu ukhale na phindu. w22.08 14-15 ¶3-5

Lufoyi ndiro lingatithandize kumbakhulupira abale na mpfumakazi zathu. Kapitulo 13 ya bukhu la Akolinto wakuyamba imbalewa bzinthu bzakusiyana-siyana bzomwe lufoyi lingatithandize kucita kuti tikhulupire abale wathu. (1 Ako. 13:4-8) Pa vesi 4 pambalewa kuti “lufoyi limbapirira ndipo ndakudeka mtima.” Ifepano timbaphonyera Yahova kazinji-kentse, koma iye ambapitiriza kutifuna. Ndipopa, abale wathu akacita cinthu comwe tiribe kukomedwa naco, ifepano tin’funikambo kupitiriza kuwafuna. Pa vesi 5 pambalewa kuti: “[Lufoyi] limbakalipa lini kamangu ndipo limbakoya lini cakumtima.” Bzimwebzi bzikutipfunzisa kuti tin’funika lini ‘kumbakoyera cakumtima anzathu,’ mwakumbakumbukira bzinthu bzakuipa bzomwe iwo adaticitira. Mpsabwino kwene-kwene kukumbukira mafala ya pa Mpalizi 7:9, yomwe yambalewa kuti: “Leka kumbafulumiza kukalipa.” Mbacitani nyongo ya kumbawona abale wanu ninga momwe Yahova ambawawonera. Mulungu ambafuna abale na mpfumakazi zathu ndipo ambalekerera pikado zawo. Ifepano tin’funikambo kucita bzibodzi-bodzibzi. (Sal. 130:3) Ifepano tin’funika lini kumbandowona bzinthu bzakuipa bzomwe iwo ambacita, koma tin’funikambo kumbawona makhalidwe yawo yabwino. — Mat. 7:1-5. w22.09 3-4 ¶6-7

Bukhu la Daniyeli limbafotokoza bzinthu bzakusiyana-siyana bzomwe bzin’dzacitika mu ntsiku zakumalizira. Pa Daniyeli 12:1 pambalewa kuti Migeli, omwe ni Jezu Kristu, ‘an’dzaima kuti athandize wanthu wa Mulungu.’ Bzomwe polofesiyayi imbalewa bzidayamba kucita mu gole la 1914, pomwe Jezu adakhala Mambo wa Umambo bwa Mulungu kudzulu. Tsono, Daniyeli adauzidwa kuti Jezu “an’dzaima” pomwe pa “nthawe ya matsautso makulisa yomwe yakanati kuwoneka ciyambiremo ca mtundu wa wanthu mpaka nthawe imweyo.” “Nthawe ya matsautso” imweyi ni “citsautso cikulu” comwe cimbalewedwa pa Mateu 24:21. Jezu an’dzaima, bzomwe bzikuthandauza kuti an’dzakhotcerera wanthu wa Mulungu kuphampha kwa nthawe ya matsautsoyi, yomwe ni pa Armagedo. Bukhu la Apokalipse limbacemera wanthu amwewa kuti ‘thimu likulu lomwe lacokera ku citsautso cikulu.’ — Apok. 7:9, 14. w22.09 21 ¶4-5

Madzina yomwe yadanembedwa mu bukhu la moyoli yangapfudzidwe, bzomwe bziri ninga kuti Yahova adayanemba na lápis. (Apok. 3:5) Ndipopa, ifepano tin’funika kupitiriza kukhala wakukhulupirika kuti madzina yathu yapitirize kukhala m’mwemo mpaka pa nthawe yomwe yangadzapfudzidwe lini, bzomwe bzin’dzakhala ninga kuti yanembedwa na lapizera. Thimu la wanthu omwe madzina yawo yadanembedwa mu bukhu la moyo ni wanthu omwe adasankhulidwa kuti akatonge pabodzi na Jezu kudzulu. Mafala yomwe mpostolo Paulo adanembera ‘anyabasa anzace’ wa ku Filipi yakulatiza kuti madzina ya anyakudzozedwa, ayai omwe adasankhulidwa kuti akatonge pabodzi na Jezu kudzulu, yadanembedwa mu bukhu la moyo. (Afil. 4:3) Tsono, kuti madzina yawo yapitirize kukhala yalipo mu bukhuli, iwo an’funika kupitiriza kukhala wakukhulupirika. Iwo an’funika kukhala wakukhulupirika mpaka pomwe an’dzaikhidwa selo yakumalizira, akadzasala pang’ono kufa ayai citsautso cikulu cikadzafuna kuyamba. Pa nthawe imweyo, madzina yawo yan’dzanembedwa mu bukhu la moyo mwakuti yangadzapfudzidwe lini pomwe, bzomwe bzin’dzakhala ninga kuti yanembedwa na lapizera. — Apok. 7:3. w22.09 14 ¶3; 15 ¶5-6

Pinango bzidakucitikiranimbo kale kuti mwanzanu adaphika cakudya comwe mumbacifuna kwene-kwene. Tsono mudacidya mwakamfulumize thangwe rakuti mukhathamangira kukacita cinthu cinango ayai nzeru zanu zikhali kunango. Pomwe mudamala kudyako, pinango mudawona kuti mulibe kubva goso la cakudyaco. Bzibodzi-bodzibzi bzingacitikembo pomwe tikuwerenga Bibliya. Nthawe zinango tingawerenge mwakamfulumize mwakuti tingabve lini na cinthuco. Ndipopa pomwe mukuwerenga Bibliya khalani na nthawe yakuti mumbakumbukire ayai kuyezera kuwona bzomwe mukuwerengabzo bzikucitika. Mukacita tenepoyo, imwepo mun’dzakhala na mpfatso caiwo. Jezu adasankhula “kapolo wakukhulupirika na wanzeru” kuti ambatipase cakudya pa nthawe yace, ndipo ifepano timbadyesedwa bwino mwauzimu. (Mat. 24:45) Kapolo wakukhulupirikayu ambaphatisa basa Bibliya kuti akonze cakudya cauzimu comwe ambapereka. — 1 Ates. 2:13. w22.10 7-8 ¶6-8

Bibliya likhadalewa kale kuti mu ntsiku zakumalizira kungadadzawoneka wanthu azinji wakunyoza. (2 Ped. 3:3, 4) Iwo ambacita “bzakufuna bzawo bzakulatiza kusaya kugopa Mulungu.” (Djuda 7, 17, 18) Kodi n’ciyani cingatithandize kuti tileke kutewezera nzeru za anyakupanduka? Cinthu cibodzi comwe tingacite ni kuleka kucita tsantsa na wanthu omwe ambandokhalira kugung’uzika. (Sal. 1:1) Bzimwebzi bzin’funa kulewa kuti tin’funika lini kuwerenga ayai kutetekera nkhani za wanthu wakupanduka. Thangwe tikacita bzimwebzi tingayambe kukhala na mtima wakundokhalira kugung’uzika ticimbawona ninga kuti bzomwe Yahova akucita pa kutsogolera gulu lace bziri lini bwino-bwinoletu nakuti malango yomwe gulu la Yahova limbatipasa yakucokera lini kwa Yahovayo. Ndipopa, tin’funika kumbabzibvunza kuti: ‘Kodi nimbang’ung’uzika tikakhala tatambira malango mapsa, ayai kafotokozedwe kapsa ka mavesi? Kodi nimbandokhalira kuwona bzinthu bzakuphonyeka bza wanthu omwe akutitsogolera?’ Tikawona kuti tayamba kukhala na nzeru zimwezi, tin’funika kucinja mwakamfulumize. Tikacita bzimwebzi, Yahova an’dzakomedwa nafe. — Mim. 3:34, 35. w22.10 20 ¶9-10

Mzimu wa Mulungu udapasa Zakiyeri mphanvu kuti akwanise kupalizira wanthu “wakuuma misolo na wakusaya kubva.” Yahova adauza Zakiyeri kuti: “Ndacitisa nkhope yako kukhala yakulimba ninga nkhope zawo, ndipo ndacitisambo mkuma wako kukhala wakulimba ninga mikuma yawo. Ndacitisa mkuma wako kukhala ninga diamante, wakulimba ninga mwala. Leka kuwagopa ne kucita mantha na nkhope zawo.” (Ezek. 3:8, 9) Pomwe Yahova akhalewa mafalaya, bzikhakhala ninga akuuza Zakiyeri kuti: ‘Leka kubvuma kuti wanthu akugobole m’mabondo. Inepano nin’dzakupasa mphanvu.’ Pomwe Yahova adamala kumuuza mafalaya, mzimu wa Mulungu udathandiza Zakiyeri kucita basa la kupalizira. Zakiyeri adanemba kuti: “Boko la Yahova lidandinyamula.” Zakiyeri adamala sumana ibodzi akupfunza na kukumbukira mafala yomwe iye adauzidwa kuti akapalizire wanthuwo. (Ezek. 3:14, 15) Yahova adamuuza kuti ayende mu gowa ayai mu cigwa. Ndipo kumweko “mzimu udapita mwa iye.” (Ezek. 3:23, 24) Pa nthawe imweyi, Zakiyeri akhali wakukonzeka kuyamba utumiki bwace. w22.11 4-5 ¶8-9

Muuzeni Yahova bzomwe bzikukucitisani thupo mu mpembo, ndipo mukumbireni thandizo. Mpolofeta Habakuki adagumana na mabvuto mazinji. Pa nthawe inango, iye adabzibvunza penu Yahova akhacitadi naye thupo. Ndipopa iye adauza Yahova bzentse bzomwe bzikhamucitisa thupo. Yahova adatawira mpembo wa mtumiki wace wakukhulupirikayu. (Hab. 2:2, 3) Habakuki adakumbukira kuti Yahova ambathandiza tani atumiki wace. Pomwe adamala kucita bzimwebzi, iye adakhala pomwe wakukondwa. Iye adadziwa kuti Yahova ambacita naye thupo ndipo angadamuthandiza kupirira mabvuto yentse yomwe akhagumana nayo. (Hab. 3: 17-19) Kodi tikupfunza ciyani na nkhani imweyi? Tikupfunza kuti tikagumana na mabvuto, tin’funika kupemba kwa Yahova ticimuuza momwe tikubvera. Tikamala, tiwone kuti iye an’tithandiza tani. Tikacita bzimwebzi, Yahova an’dzatipasa mphanvu zomwe tikufunikira kuti tikwanise kupirira. Ndipo tikawona kuti Yahova akutithandiza, cikhulupiro cathu cin’dzalimba kwene-kwene. Tikakhala na ndondomeko yakucita bzinthu bzauzimu, tin’dzabvuma lini kuti ciri-centse cititazise kutumikira Yahova. — 1 Tim. 6:6-8. w22.11 15 ¶6-7

Jezu adakhomereredwa pabodzi na akapondo awiri ndipo iwo akhabva kuwawa kwene-kwene pa miti yakuzunzidwira ire. (Luk. 23:32, 33) Akapondo awiriwo akhanyoza Jezu. (Mat. 27:44; Mar. 15:32) Tsono m’bodzi wa iwo adacinja nzeru zace. Iye adauza Jezu kuti: “Jezu, mudzandikumbukirembo mukadzapita mu Umambo bwanu.” Jezuyo adamutawira na mafala ya m’vesi la leroya. (Luk. 23:39-42) Tikakumbukira mafala yomwe Jezu adauza kapondo ule, tin’funika kumbabzibvunza kuti moyo m’Paraizomo un’dzakhala tani maka-maka. Ifepano tingadziwe momwe moyo un’dzakhalira m’Paraizo tikakumbukira momwe bzinthu bzikhaliri mu utongi bwa Mambo Salomau. Bibliya limbalewa kuti Jezu ni mkulu kuposa Salomau. Ndipopa tingakhulupirembo kuti iye pabodzi na anyakudzozedwa an’dzacitisa dzikoli kukhala paraizo wakudeka kwene-kwene. (Mat. 12:42) Tsono Akristau wa mabira manango an’funika kudziwa bzomwe an’funika kucita kuti adzakhale na moyo wakusaya kumala m’Paraizo. — Juw. 10:16. w22.12 8 ¶1; 9 ¶4

Zaiya akutitsimikizira kuti Yahova an’dzatitetekera bwino-bwino akadzatibva tikulira pa kumukumbira thandizo. Ndipo an’dzatitawira mwakamfulumize. Thangwe ranyi tikulewa tenepoyo? Zaiya adalewa pomwe kuti: “Akadzandobva kulira kwakoko, iye an’dzakutawiriratu.” Mafala yamweya yakutithandiza kubvesesa kuti Baba wathu ambafunisisa kuthandiza wanthu omwe ambamukumbira thandizo. Kudziwa bzimwebzi kumbatithandiza kupirira na kupitiriza kukhala wakukondwa. Yahova ambatetekera mipembo ya m’bodzi na m’bodzi wa ifepano. Thangwe ranyi tikulewa tenepoyo? Onani kuti kumayambiriro kwa kapitulo 30 kuna fala lakuti “imwepo” thangwe rakuti mafalaya yakulewedwa kwa wanthu azinji. Tsono pa vesi 19 pana fala lakuti “iwepo” bzomwe bzin’funa kulewa kuti mafala ya m’vesiri yakulewedwa kwa munthu m’bodzi. Zaiya adanemba kuti: “Iwepo un’dzalira lini; iye an’dzakudekera mtima; ndipo iye an’dzakutawiriratu.” Yahova ni Baba walufoyi iye ambacita thupo na m’bodzi na m’bodzi wa ifepano ndipo ambatetekera mpembo wa mtumiki wace ali-wentse. — Sal. 116:1; Zai. 57:15. w22.11 9 ¶5-6

Dziwani kuti mukapitiriza kupalizira napo kuti mukuzunzidwa mun’dzakhala na mpfatso caiwo ndipo mun’dzakhalambo wakugwa mpfuwa. Mu nthawe ya Akristau wakuyambirira, akulu-akulu wa Adjuda adauza apostolo kuti asiye kupalizira. Tsono apostolowo adapitiriza kubvera Mulungu. Ndipo bzimwebzi bzidawacitisa kukhala na mpfatso caiwo. (Mab. 5:27-29, 41, 42) N’cadidi kuti basa lathu likaletsedwa timbafunika kucita bzinthu mwakucenjera kwene-kwene pakupalizira. Tsono tikacita nyongo pa basa la kupalizira, tin’dzakomedwa kwene-kwene thangwe ra kudziwa kuti tikukondwesa Yahova ndipo tikupfunzisa wanthu mafala yabwino yomwe yangawathandize kudzagumana moyo wakusaya kumala. Dziwani kuti mpsakukwanisika kupitiriza kukhala na mtendere napo pomwe mukugumana na mabvuto. Mukakhala mukugumana na mabvuto, mun’funika kumbakumbukira kuti mtendere omwe tikufuna ni mtendere omwe ni Yahova yekha omwe angakupaseni mtendere umweyu. Ndipopa mukagumana na mabvuto ninga matenda, malengwa ya pantsi ayai kuzunzidwa, mun’funika kuthemba Yahova na kukhala wakubverana na gulu lace. Ndipo pitirizani kudikhirira bzinthu bzabwino bzomwe Yahova an’dzakucitirani. Mukacita tenepoyo, “Mulungu wa mtendere an’dzakhala namwe.” — Afil. 4:9. w22.12 21 ¶17-18

Kuti bzimwebzi bzikwanisike, tin’funika kucita nyongo. Tin’funika kucita nyongo kuti tisiye kukhala na makhalidwe ninga kupopota, ukali na ciya. (Aef. 4:31, 32) Thangwe ranyi kucita bzimwebzi kungakhale kwakunesa? Thangwe bzimbanesa kusiya makhalidwe yomwe tidakula nayo. Kumbukirani kuti Bibliya limbalewa kuti pana wanthu omwe “ambadiza lini kukalipa” ndipo “ambapopota kwene-kwene.” (Mim. 29:22) Kutcenkha kukhala na makhalidwe yamweya kungakhale kwakunesa kwene-kwene napo tikabatizidwa. (Aro. 7:21-23) Penu pana makhalidwe yakuipa yomwe yakukunesani kuyasiya, pembani kwa Yahova mucimuuza bzimwebzo, ndipo dziwani kuti iye an’dzatetekera mipembo yanu na kukuthandizani. (1 Juw. 5:14, 15) Yahova an’dzacinja lini makhalidwe yathu mwakudabwisa, koma iye an’dzatipasa mphanvu kuti tileke kubwerera m’mbuyo. (1 Ped. 5:10) Pitirizani kucita bzinthu mwakubverana na mipembo yanu. Lekani kucita bzinthu bzomwe bzingakucitiseni kukhala na unthu bwakale. Ndipo citani nyongo kuti muleke kumbakumbuka bzinthu bzakuipa. — Afil. 4:8; Akol. 3:2. w23.01 10 ¶7, 9-10

Cinthu cibodzi comwe tingacite kuti tilatize kuti timbafuna wanthu ni kupalizira na nyongo. Tin’funika kumbapalizira wanthu wentse omwe tingagumane nawo, napo wale omwe ambalalewa cirewedwe cinango na omwe adacokera dziko linango. Ndipo timbapalizirambo wanthu wentse, napo penu adapfunza ayai alibe, adadala ayai adasauka. Tikacita bzimwebzi, timbakhala tikuteweza mafala yakuti Yahova an’funa kuti “wanthu wa mtundu uli-wentse apulumuke acifika pakukhala na cidziwiso caico cacadidi.” (1 Tim. 2:4) Cinthu cinango comwe timbacita kuti tilatize kuti timbafuna Mulungu na Jezu ni kumbafunambo abale na mpfumakazi zathu. Tin’funika kumbacita nawo thupo na kuwathandiza akakhala akugumana na mabvuto. Timbawatsangalaza akakhala afedwa, timbayenda kukawawona akakhala akuduwala ndipo timbawalimbikisa akakhala agoboka m’mabondo. (2 Ako. 1:3-7; 1 Ates. 5:11, 14) Timbapitiriza kuwapempherera ticimbakumbukira kuti “mpembo wakudandaulira wa munthu wakulungama una mphanvu kwene-kwene.” — Tiy. 5:16. w23.01 28-29 ¶7-8

Nyakumanga nyumba ambakhala na madu pa basa lace akambaphata basa lacero. Mpsibodzi-bodzimbo na ifepano. Tin’dzakwanisa kulimbikisa abale na mpfumakazi zathu tikambacita bzimwebzi nthawe zentse. Ifepano tingawathandize kupirira mabvuto tikawafotokozera nkhani za atumiki wa Yahova wakale-kale omwe adapirirambo mabvuto. (Aheb. 11:32-35; 12:1) Tingapitirize kumbabverana na abale wathu tikambawona bzinthu bzabwino bzomwe iwo ambacita, kucita nyongo kuti tileke kunesana na anzathu ndipo tikanesana, kucita nyongo kubverana nawo pomwe. (Aef. 4:3) Ndipo tingapitirizembo kulimbisa cikhulupiro ca abale na mpfumakazi zathu mwa kuwauza nfundo zakufunika za m’Bibliya, kuwapasa bzinthu bzakufunikira pa moyo wawo na kuwalimbikisa, cikhulupiro cawo cikawofoka. Tingakomedwembo kwene-kwene tikambalimbikisa abale na mpfumakazi zathu m’gwere. Tsono Nyumba za Umambo na nyumba zinango zomwe zimbamangidwa, zimbadzagumuka na kupita kwa nthawe. Koma phindu lakulimbikisa anzathu lin’dzakhala liripo mpaka kale-kale! w22.08 22 ¶6; 25 ¶17-18

Jezu adalewa khalidwe lakufunika kwene-kwene lomwe tin’funika kukhala nalo pomwe tikuwerenga Fala la Mulungu, lomwe ni kuzindikira. (Mat. 24:15) Kodi kuzindikira n’ciyani? Kuzindikira ni kubvesesa momwe nkhani yomwe tikuwerengayo ikubveranirana ayai ikusiyanirana na inzace na kubvesesambo bzinthu bzomwe bzikubveseseka lini bwino-bwino. Jezu adalatizambo kuti kuzindikira n’kwakufunika kuti tikwanise kubvesesa mapolofesiya ya m’Bibliya. Khalidwe limweri ndakufunika kuti tikwanisembo kubvesesa bzinthu bzentse bzomwe tikuwerenga m’Bibliya. Yahova ambathandiza atumiki wace kuzindikira bzomwe akuwerenga. Ndipopa mbapembani kwa iye kuti akuthandizeni kukhala na khalidwe limweri. Kodi imwepo mungacite tani kuti bzomwe mukucita pa kuwerenga bzibverane na bzomwe mwamukumbira Yahova? Onani momwe nkhaniyo ikubveranirana na bzomwe mumbadziwa kale. Yezerani kubvesesa na kuphatisa basa bzomwe mukuwerengabzo pa moyo wanu. (Aheb. 5:14) Imwepo mukambazindikira bzomwe mukuwerenga, mun’dzakwanisa kubvesesa Fala la Mulungu. w23.02 10 ¶7-8

Tiyezezere kuti xamwali wanu wakupasani nyumba. Tsono nyumbayo idadzongeka-dzongeka. Napo bziri tenepo, iyo njakuumira kwene-kwene. Imwepo mungamutende kwene-kwene xamwali wanuyo ndipo mungaisamalire nyumbayo. Mwakundendemerana na bzimwebzi, Yahova adatipasa mphaso yabwino kwene-kwene yomwe ni moyo. Kulewa cadidi, Yahova adalatiza kuti ambafuna kuti tikhale na moyo mwa kupereka mwana wace kuti atilombole. (Juw. 3:16) Yahova ni Mwenekaciro wa moyo. (Sal. 36:9) Mpostolo Paulo akhadziwa bzimwebzi. Ndipopa iye adalewa kuti: “Thangwe ra iye, ifepano tina moyo, timbafamba ndipo tiripo.” (Mab. 17:25, 28) Bzimwebzi bzikulatiza kuti moyo wathu ni mphaso yakucokera kwa Yahova. Iye ambatipasa bzomwe timbafunikira kuti tikhale na moyo. (Mab. 14:15-17) Tsono Yahova ambacita lini bzakudabwisa kuti atikhotcerere kuti tileke kufa. Iye ambafuna kuti tikhale na thanzi labwino kuti tipitirize kumutumikira. — 2 Ako. 7:1. w23.02 20 ¶1-2

Ifepano timbatenda kwene-kwene Yahova Mulungu wathu thangwe ra kutipasa Bibliya! Iye ambaphatisa basa Bibliya kuti atipase malango kuti tikwanise kukhala wakulimba pomwe tikugumana na mabvuto yakusiyana-siyana ntsiku zino. Iye ambaphatisambo basa Bibliya kuti atithandize kudziwa bzinthu bzabwino bzomwe an’funa kudzaticitira kutsogolo na kuzimbula makhalidwe yabwino yomwe anayo. Ifepano tin’komedwa kwene-kwene kupfunza bza makhalidweyo. Kucita bzimwebzi kun’ticitisa kufuna kufendererana na Mulungu wathu na kukhalambo pa uxamwali bwakulimba na iye. (Sal. 25:14) Yahova ambafuna kuti wanthu amudziwe. Kale-kale, iye adaphatisa basa maloto, masomphenya na anjo kuti auze wanthu bzomwe iye akhafuna. (Num. 12:6; Mab. 10:3, 4) Tsono bzimwebzi bzingadasaya kunembedwa, bzingadakhala bzakunesa kwa ifepano kubzidziwa. Ndipopa Yahova adauza wanthu kuti ‘abzinembe m’bukhu.’ Pakuti “njira ya Mulungu wathu njakulungama,” ifepano tikutsimikizira kuti bzomwe adacitabzi mpsabwino kwene-kwene ndipo mpsakuthandiza kwa ifepano. — Sal. 18:30. w23.02 2 ¶1-2

Citani bzinthu bzomwe bzingakuthandizeni kukhala na cikhulupiro cakulimba na kukhala wakukhwima mwauzimu. (Aef. 3:16) Mbakhalani na nthawe ya kuwerenga na kupfunza Bibliya pa mwekha. (Sal. 1:2, 3) Ndipo mungakhalembo na nthawe kuti mumbapembe kazinji kwa Yahova nakuti mumbapembembo na mtima wentse. Kuti mukwanise kucita bzimwebzi, pinango mungafunike kukhala munthu wakubziphata pa nkhani ya kusankhula bzinthu bzomwe mungapfatse nabzo na kuphatisa basa bwino nthawe yanu. (Aef. 5:15, 16) Imwepo mungakule mwauzimu mukambathandiza wanthu winango. Mungathandize abale na mpfumakazi wacikulire wa m’gwere mwanu na wale omwe mbakuwofoka. Pinango mungathandize acikulire mwa kuyenda kukawagulira bzinthu ayai kuwathandiza kudziwa momwe angaphatisire basa telefoni, tableti ayai komputadori yawo. Mungalatizembo kuti mumbafuna wanthu omwe ni Mboni lini mwa kuwauzambo mafala yabwino ya Umambo. (Mat. 9:36, 37) Penu mungakwanise, citani nyongo kuti mucite utumiki bwa nthawe zentse. w22.08 6 ¶16-17