Novembro

Mkristau an’funika lini kutukwana. Tsono pana kalalewedwe kanango komwe tin’funika pomwe kutcenkha. Tin’funika kucita mphole kuti tileke kumbalewa kuipa wanthu wa cikhalidwe cinango, dzinza linango ayai wakucokera ku dziko linango. Tin’funika lini kulewa bzinthu bzomwe kwa iwo bzingakhale kuwatukwana. Kalalewedwe kanu kambalimbikise anzanu. Khalani wakukonzeka kumbatenda sikuti kumbandolewa kuipa wanthu ayai kudandaula. Ajirayeri akhana mathangwe yakubveka kuti ambatende bzomwe Mulungu akhawacitira. Tsono kawiri-kawiri iwo akhambadandaula. Tikambadandaula tingacitise kuti wanthu winango ayambembo kudandaula. Kumbukirani kuti bzomwe azondi 10 adalewa bzidacitisa kuti “Ajirayeri wentse ayambe kudandaulira Mozeji.” (Num. 13:31–14:4) Tsono tikambatenda anzathu timbawapasa mphanvu kuti apitirize kucita bzinthu bzabwino. Ndipopa tin’funika kucita ciri-centse kuti tigumane mipata kuti timbatende anzathu na mtima wentse. w22.04 8 ¶16-17

Kuyambira kale-kale, Yahova ambathandiza wana azinji kukhala axamwali wace. Ndipo iye angathandizembo wana wanu kukhala pa uxamwali bwakulimba na iye, penu iwo akufuna. (1 Ako. 3:6, 7) Napo kuti wana wanu angayambiretu lini kutumikira Yahova na mtima wawo wentse, Yahovayo an’pitiriza kuwafuna. (Sal. 11:4) Ndipo pa nthawe yomwe iwo an’dzakhala na “makumbukidwe yabwino,” iye an’dzawathandiza kukhala axamwali wace. (Mab. 13:48; 2 Nkha. 16:9) Iye angakuthandizeni kulewa bzinthu bzabwino bzomwe bzingacitise wana wanu kufunisisa kukutetekerani. (Mim. 15:23) Ndipo Yahova angacitisembo kuti m’bale ayai mpfumakazi akhale nawo pa uxamwali na kuwathandiza kukhala axamwali wace. Yahova angathandize wana wanu kumbakumbukira bzinthu bzomwe mudawapfunzisa pomwe akhali wana, napo pomwe akula. (Juw. 14:26) Dziwani kuti Yahova an’dzakusimbani kwene-kwene mukapitiriza kupfunzisa wana wanu mwa mafala na bzicito. w22.04 21 ¶18

Pakuti Sathani ambakwanisa lini pomwe kuyenda kudzulu iye ana ukali bukulu kwene-kwene na anyakudzozedwa omwe akali pantsi pano, omwe ambaimikira Umambo bwa Mulungu “ndipo ambaphatambo basa lakucitira umboni bza Jezu.” (2 Ako. 5:20; Aef. 6:19, 20) Mu 1918, abale 8 omwe akhadziwika adanamiziridwa mirandu, acifungiridwa m’kawoko. Iwo adatongedwa kuti akhale m’kawokomo magole mazinji. Bzimwebzi bzikhawonesa ninga kuti basa la anyakudzozedwa amwewa laimiratu, bzomwe bzikhali ninga kuti “aphedwa.” (Apok. 11:3, 7-11) Tsono kumayambiriro kwa gole la 1919, abale wakudzozedwa wale adacosedwa m’kawoko ndipo mirandu yentse yomwe akhawanamizira ire idamalisidwa. Ndipo pa nthawe imweyire iwo adayambiratu basa lakupalizira. Tsono Sathani akupitiriza basi kuzunza wanthu wa Mulungu. Kuyambira nthawe imweyire, iye adayambisa mazunzo yomwe yali ninga “mkulo wa madzi” kuti abonerese atumiki wa Mulungu. (Apok. 12:15) Ndipopa, m’bodzi na m’bodzi wa ifepano, an’funika “kupirira na kukhala na cikhulupiro.” — Apok. 13:10. w22.05 5-6 ¶14-16

Mpostolo Juwau adawona m’masomphenya magulu mawiri ya wanthu omwe mbakukhulupirika ku utongi bwa Mulungu ndipo adatambira bzisimbo bza moyo wakusaya kumala. Gulu lakuyamba likhana wanthu wakukwana 144 000. Iwo adatengedwa pa dziko lapantsi kuti akatonge na Jezu mu utongi bwace ayai mu Umambo kudzulu. Ndipo iwo an’dzatonga naye pabodzi dziko la pantsi. (Apok. 5:9, 10; 14:3, 4) M’masomphenyaya, Juwau adawona wa 144 000 adaima pabodzi na Jezu pa Phiri la Ziyoni kudzulu. (Apok. 14:1) Kuyambira mu ntsiku za apostolo mpaka ntsiku zathu zino, wanthu azinji akusankhulidwa kuti akacite mbali ya wa 144 000. (Luk. 12:32; Aro. 8:17) Tsono Juwau adauzidwa kuti mbakucepa mwa wanthu wakusankhulidwawa omwe an’dzakhala akana moyo mu ntsiku zakumalizira. (Apok. 12:17) Pomwe citsautso cikulu cin’dzakhala cikucitika, iwo an’dzatengedwa aciyenda kudzulu kuti akakhale na anzawo omwe adafa kale mwakukhulupirika. Iwo an’dzatonga pabodzi na Jezu mu Umambo bwa Mulungu. — Mat. 24:31; Apok. 5:9, 10. w22.05 16 ¶4-5

Jezu adapfunzisa ateweri wace kuti ambabziwone mwacikati-kati. Iye adawauza kuti: “Napo tsisi la mu msolo mwanu [Mulungu] ambalilewenga lentse.” (Mat. 10:30) Mafala yamweya ngakulimbikisa kwene-kwene kwa ifepano, maka-maka penu tina msambo wakumbakumbuka kuti tiribe na basalo. Mafala ya Jezuya yakulatiza kuti Baba wathu wa kudzulu ambatifuna kwene-kwene. Tin’funika lini kukumbuka kuti Yahova akuphonya akambatilekerera kupitiriza kumunamata na kutiwona kuti ndife wakuthemera kudzatambira moyo wakusaya kumala mu dziko lipsa. Magole 15 m’mbuyomu, Ntsanza ya Mulindiri inango idalewa kuti ifepano tin’funika kumbabziwona mwacikati-kati. Iyo idati: “N’cadidi kuti tin’funika lini kumbabziwona kuti ndife wanthu wakufunika kwene-kwene ticiyamba kukhala wakubzikuza, koma tin’funikambo lini kumbakumbuka kuti tiribe na basalo. Cakufunika kwene-kwene, n’cakuti tin’funika kumbabziwona mwacikati-kati, bzomwe bzin’funa kulewa kuti tin’funika kumbazindikira kuti pana bzinthu bzomwe timbakwanisa kubzicita bwino ndipo pana bzinthu bzomwe timbatazira kucita.” w22.05 24-25 ¶14-16

Kodi n’ciyani comwe m’bodzi na m’bodzi wa ifepano angacite kuti mu gwere mukhale na ciphatano? Tingacite bzimwebzi mwa kambakhala pa mtendere na anzathu. (Mat. 5:9; Aro. 12:18) Tikambacita nyongo kuti tikhale pa mtendere na anzathu timbacitisa kuti paraizo wathu wauzimu akhale wakudeka kwene-kwene. Tin’funikambo kukumbukira kuti ni Yahova omwe adacemera wanthu wentse omwe ali m’paraizo wauzimuyu kuti abwere kudzamunamata. (Juw. 6:44) Ndipo dziwani kuti Yahova ambakomedwa kwene-kwene akatiwona tikucita nyongo kuti mu gwere mukhale na mtendere nakuti atumiki wace wentse akhale wakubverana. (Zai. 26:3; Ag. 2:7) Yahova ambapasa atumiki wace bzinthu bzizinji bzabwino. Kodi tingacite tani kuti bzimwebzi bzimbatithandize? Tin’funika kumbakumbukira mwakamderekho bzomwe timbapfunza mu Fala la Mulungu. Kucita bzimwebzi kun’dzatithandiza kukhala na makhalidwe yacikristau na ‘kumbafuna abale’ m’gwere na mtima wentse. — Aro. 12:10. w22.11 12-13 ¶16-18

Ifepano tikacita pikado, Yahova angatilekerere. Ndipo tikabvuma kuti Yahova watilekerera, timbapepukidwa ndipo timbatsangalazidwa mu mtima mwathu. Ifepano timbabzibva tenepo tikakhala kuti talekereredwa na “Yahova.” (Mab. 3:19) Yahova akatilekerera, ambaticitisa kuti tikhale pomwe pa uxamwali na iye ndipo timbakhala ninga kuti tikhalibe na kuphonyako. Yahova akatilekerera, iye an’dzatimanga lini pomwe mulandu ayai kutilanga thangwe ra pikado zomwe tacita. (Zai. 43:25) Iye akatilekerera bzimbakhala ninga kuti wataya pikado zathu kutali “ninga [momwe] kumabvadzuwa kuliri kutali na kumadokero.” (Sal. 103:12) Tikakumbukira kutilekerera komwe Yahova ambacita, ifepano timbatenda kwene-kwene. (Sal. 130:4) Yahova ambalekerera munthu sikuti thangwe rakuti pikado yaceyo njing’ono ayai njikulu. Yahova ni Mulengi wathu, Nyakutipasa malamulo na Muyeruzi wathu, ndipo bzimwebzi ndibzo bzimbamucitisa kuti awone penu angalekerere munthu omwe wacita pikado ayai ne. w22.06 5 ¶12-14

Yahova adapereka cidikhiro cabwino kwa wanthu wentse omwe ambamufuna. Tsapanopapa iye an’malisa matenda, kusunama na infa. (Apok. 21:3, 4) Yahova an’dzathandiza ‘wanthu wakulungama’ omwe akumudikhirira kukonza dzikoli kuti likhale paraizo. (Sal. 37:9-11) Tentsenefe tin’dzakhala pa uxamwali bwabwino na bwakulimba na Yahova, ndipo uxamwali bumwebu bun’dzakhala bwabwino kwene-kwene kuposa bomwe tinabo na iye ntsiku zino. Cimweci ni cidikhiro cabwino kwene-kwene kwa tentsenefe! Tsono, thangwe ranyi tin’funika kukhulupira kuti bzentse bzomwe Mulungu adalewa bzin’dzacitikadi? Thangwe Yahova ambanama lini. Ndipopa ifepano tina mathangwe yakubveka kuti ‘tidikhirire Yahova.’ (Sal. 27:14) Ndipo tingalatize kuti timbadikhirira Yahova na mtima wentse mwakukhala wakupirira ticidikhirira mwakukondwa nthawe yomwe Mulunguyo an’dzacita bzentse bzomwe adalewa. (Zai. 55:10, 11) Tipitirize kukhala wakukhulupirika kwa Yahova thangwe iye “ambabaira wanthu omwe ambamulinga na mtima wentse.” w22.06 20 ¶1; 25 ¶18

Tina citsimikizo centse cakuti Yahova, omwe ni msolo wa banja lace, ambadziwa nfundo yomwe iri pa 1 Timotio 5:8. Tikakhulupira na mtima wentse kuti Yahova ambatifuna ndipo ambafunambo banja lathu, tin’dzakhulupirambo kuti nthawe zentse tin’dzakhala na bzinthu bzakufunikira pa moyo wathu. (Mat. 6:31, 33) Yahova ambafuna kutipasa bzinthu bzakufunikira pa moyo wathu ndipo ambapereka na manja mawiri. Pomwe iye adalenga dziko, alibe kundotipasa bzinthu bzakufunikira kuti tikhale na moyo basi. Koma adadzaza dzikoli na bzinthu bzinango bzabwino kwene-kwene bzomwe timbakomedwa nabzo. Iye adacita bzimwebzi thangwe ra kutifuna. (Gen. 2:9) Napo pa nthawe yomwe tiribe bzinthu bzizinji, tin’funika kudziwa kuti ni Yahova omwe akutipasa bzinthu bzing’ono-ng’ono bzomwe tinabzobzo. (Mat. 6:11) Tin’funika kumbakumbukira nthawe zentse kuti bzinthu bzomwe Yahova an’dzatipasa kutsogolo bzin’dzakhala bzizinji kuposa bzomwe tikuluza ntsiku zino. Ndipo kutsogoloku iye an’dzatipasambo moyo wakusaya kumala. — Zai. 65:21, 22. w22.06 15 ¶7-8

Wanthu omwe ayamba kutumikira Yahova tsapanopa, ndiwo lini okha omwe an’funika kucita nyongo kuti amudziwe bwino Yahova. Tentsenefe tin’funikambo kucita nyongo. Mpostolo Paulo adanemba kuti kuphatisa basa bzomwe timbapfunza m’Bibliya kungatithandize “kusiyanisa cabwino na cakuipa.” Ntsiku zino, mpsakunesa kukhala na makhalidwe yabwino thangwe rakuti wanthu azinji ambaphatisa lini basa mitemo ya Yahova pa moyo wawo. Tsono Jezu ambacita ciri-centse kuti bzomwe timbapfunza bziticitise kukhala na cikhulupiro cakulimba. Bzomwe timbapfunzabzo bzimbacokera m’Fala la Mulungu, Bibliya. Ninga Jezu, ifepano timbalemekeza dzina la Mulungu. (Juw. 17:6, 26) Mu 1931, ifepano tidayamba kudziwika na dzina la m’Bibliya lakuti Mboni za Yahova. Mwakucita bzimwebzi, tidalatiza kuti dzina la Mulungu ndakufunika kwene-kwene kwa Baba wathu wa kudzulu. (Zai. 43:10-12) Ndipo Bibliya Lakusanduliziridwa la Dziko Lipsa lidabwezeresa dzina la Mulungu m’mbuto zentse zomwe likhadacosedwa. w22.07 11 ¶11-12

Mafala yabwino ya Umambo bwa Mulungu yambacitambo mbali ya cadidi ca m’Bibliya comwe tidapfunza. Jezu adandendemezera cadidi cakulewa bza Umambo bwa Mulungu na cuma cakubisika. Pa Mateu 13:44, Jezu adati: “Umambo bwa kudzulu buli ninga cuma cakubisika m’munda, comwe munthu adacigumana, acicibisa; tsono, thangwe ra kukomedwa, iye adayenda kukagulisa bzentse bzomwe akhanabzo, acigula mundayo.” Onani kuti munthuyo akhanyang’ana lini cumaco. Tsono pomwe iye adacigumana adacita nyongo kuti akhale naco. Iye adayenda kukagulisa bzentse bzomwe akhanabzo. Thangwe ranyi? Thangwe akhadziwa kuti cumaco cikhali cakufunika kwene-kwene. Ifepano timbadziwa kuti palibe cinthu comwe dzikoli lingatipase comwe cingaticitise kukhala wakukondwa kuposa kutumikira Yahova ntsiku zino, ndipo kutsogolo ticidzatambira moyo wakusaya kumala pomwe tin’dzatongedwa na Umambo bwa Mulungu. Mwayi wakukhala pa uxamwali bwakulimba na Yahova un’funika kukhala pa mbuto yakuyamba kuposa cinthu ciri-centse. Ndipo kuposa bzentse, timbakomedwa thangwe ra kudziwa kuti ‘tikumukondwesa kwene-kwene.’ — Akol. 1:10. w22.08 15 ¶8-9; 17 ¶12

Kodi Zuze akhadziwa tani kuti Mulungu ambawona kuti kucita upombo ni ‘cinthu cakuipa kwene-kwene’? Pa nthawe imweyire Lamulo la Mozeji lakuti “leka kucita upombo” likhanati kunembedwa. Ndipo iro lidadzanembedwa pomwe padapita magole yakukwana 200. (Eki. 20:14) Tsono, Zuze akhamudziwa bwino Yahova ndipo akhadziwambo kuti Yahovayo ambaipidwa na munthu omwe ambacita upombo. Iye akhadziwa kuti Yahova adakonza kuti malume ya pa mphasa yambacitike kwa mwamuna na mkazi wakulowolana basi. Ndipo iye adabva momwe Yahova adakhotcererera yavu wace Sara kawiri-kentse pomwe akhadatengedwa na mwamuna munango kuti akhale mkazace. (Gen. 2:24; 12:14-20; 20:2-7) Zuze adakumbukira nkhani zentsenezi, ndipo bzimwebzi bzidamucitisa kudziwa bzomwe Mulungu ambafuna na bzomwe ambafuna lini. Iye akhabvera mitemo yakulungama ya Yahova ndipo akhafunisisa kuiteweza thangwe akhafuna Mulungu. w22.08 26 ¶1-2

Polofesiyayi ikulewa lini bza kulamusidwa kwakuyezezera, komwe kukucitika na atumiki wa Mulungu mu ntsiku zakumalizira zino, ninga momwe tikhalewera kale-kale. Koma, mafala yamweya yakulewa bza kulamusidwa kwa anyakufa komwe kun’dzacitika mu dziko lipsa. Kodi tikudziwa tani bzimwebzi? Tikudziwa bzimwebzi thangwe fala lakuti “pfumbi” lomwe liri pa polofesiyayi liripombo pa Djobi 17:16 ndipo lina thandauzo libodzi-bodzi na fala lakuti “Thenje.” Bzimwebzi bzikutithandiza kubvesesa kuti Daniyeli 12:2 akulewa bza kulamusidwa caiko komwe kun’dzacitika zikadzamala ntsiku zakumalizira na nkhondo ya Armagedo. Tsono kodi Daniyeli 12:2 an’funa kulewanyi akambalewa kuti wanthu winango an’dzalamusidwa kuti adzakhale na “moyo wakusaya kumala”? Vesiri lin’funa kulewa kuti wanthu omwe an’dzalamusidwa an’dzapfunzisidwa bza Yahova na Jezu. Tsono, wale omwe an’dzapitiriza kupfunza bza iwo, na kuwabvera mkati mwa magole 1000, an’dzatambira moyo wakusaya kumala. — Juw. 17:3. w22.09 21 ¶6-7

Bzimwebzi bzin’funa lini kulewa kuti Yahova an’funa kuti timbandokhulupire abale wathu thangwe rakuti tikuuzidwa kuti ticite bzimwebzi, koma iye an’funa kuti tiwakhulupire thangwe rakuti ambacita bzinthu bzabwino. Kukhulupira munthu kudandendemera na kulemekeza munthu. Kuti ifepano tilemekeze munthu pambatenga nthawe. Kodi mungacite tani kuti mumbakhulupire abale wanu? Adziweni bwino abale wanuwo. Mbakhalani na nthawe yakumbaceza nawo mukakhala muli ku mitsonkhano, mbayendani nawo mu utumiki ndipo mbakhalani wakupirira na abale wanu mwa kuwapasa mpata kuti alatize kuti mbakukhulupirika. Pinango mungayambe kumbawauza bzinthu bzinango bzomwe bzikukucitikirani. Tsono pomwe uxamwali bwanu na iwo bukukula, imwepo mungakhale wakutsudzuka kuwauza bzinthu bza mu mtima mwanu. (Luk. 16:10) Tsono tani m’bale wanu akasaya kukhala wakukhulupirika kwa imwepo? Lekani kukumbuka kuti iye ni munthu wakuipa. Koma mupaseni nthawe kuti alatize kuti ni munthu wabwino. Ndipo lekani kubvuma kuti bzakucita bza wanthu winango bzikucitiseni kuleka kukhulupira abale wanu. w22.09 4 ¶7-8

M’bale m’bodzi wakucemeredwa Miqueas, omwe ni mkulu wa gwere, adacitiridwa bzinthu bzakuipa na akulu winango wa gwere. Napo bzikhali tenepo, iye adapitiriza kukhala wakupenya ndipo alibe kubvuma kukhala na nzeru zakuipa. Iye akhambapemba kwa Yahova kuti amupase mzimu wakucena na mphanvu kuti apirire. Ndipo iye adafufudzambo m’mabukhu yathu nkhani zomwe zingadamuthandiza. Kodi nkhaniyi ikutipfunzisa ciyani? Tikupfunza kuti m’bale ayai mpfumakazi akaticitira cinthu cakuipa, tin’funika kupitiriza kukhala wakuderekha na kuleka kukhala na nzeru zakuipa. Ifepano tingadziwe lini comwe cacitisa m’bale ayai mpfumakazi kulewa ayai kucita cinthu comwe catiwawaco. Ndipopa tin’funika kupemba kwa Yahova ticimukumbira kuti atithandize kuwona bzinthu ninga momwe iye ambawonera. Tikacita tenepoyo, tin’dzakwanisa kuwona kuti m’bale ayai mpfumakaziyo alibe kutiphonyera utowa ndipo tin’dzakwanisambo kumulekerera. (Mim. 19:11) Kumbukirani kuti Yahova ambadziwa bzentse ndipo an’dzakupasani mphanvu kuti mupirire. — Mpal. 5:8. w22.11 21 ¶5

Khalani na axamwali omwe ambafuna Yahova. Axamwali wathu angatithandize kukhala Akristau wakukhwima mwauzimu. (Mim. 13:20) John, omwe tsapano ni mkulu wa gwere, adati: “Pomwe ndikhali mulumbwana, kuyenda mu utumiki kudandithandiza kukhala na axamwali azinji. Axamwali amwewa akhana nyongo kwene-kwene pa basa lakupalizira ndipo iwo adandithandiza kuwona kuti basa limweri limbadekeza kwene-kwene. . . . Ndipo ndidazindikirambo kuti ndikhaluza mwayi wa kukhala na axamwali wabwino, thangwe rakuti ndikhandokhala pa uxamwali na wanthu wa msinkhu wangu basi.” Kodi n’ciyani comwe mun’funika kucita mukazindikira kuti mukucita uxamwali na munthu omwe angadzonge uxamwali bwanu na Yahova? Paulo akhadziwa kuti mu gwere la Akristau wakuyambirira mungadawoneka wanthu winango omwe akhalibe makhalidwe yabwino. Ndipopa, iye adauza Timotio kuti aleke kubverana nawo wanthu amwewo. (2 Tim. 2:20-22) Uxamwali bwathu na Yahova ni cinthu cakufunika kwene-kwene. Ifepano timbacita nyongo kuti tilimbise uxamwalibu. Ndipopa tin’funika lini kucita uxamwali na wanthu omwe angadzonge uxamwali bwathu na Baba wathu wa kudzulu. w22.08 5-6 ¶13-15

Ifepano tidasiyana na wanthu wakupusa omwe ambalamba kubvera mitemo ya Mulungu, thangwe rakuti ifepano timbafuna Yahova ndipo timbafuna kuteweza mitemo yace. Comwe cingatithandize kucita bzimwebzi ndico kubzindendemezera na wanthu omwe ambabvera lini mitemo yace. Tikacita bzimwebzi, tin’dzawona kuti iwo ambagumana na mabvuto mazinji thangwe ra kusaya kubvera Yahova. Tsono ifepano tina moyo wabwino thangwe rakuti timbabvera Mulungu. (Sal. 32:8, 10) Yahova ambapereka nzeru kwa wanthu wentse. Koma iye ambangingimiza lini wanthu kuphatisa basa nzeru zacezo. Tsono iye ambaleweratu bzomwe wanthu omwe anilamba kuphatisa basa nzeru zacezo an’dzagumana nabzo. (Mim. 1:29-32) Iwo “an’dzabonera thangwe ra bzicito bzawo.” Ntsiku zino, iwo ambabonera kale ndipo kutsogolo Yahova an’dzawapfudza. Tsono wanthu omwe ambabvera malango ya Yahova na kuyaphatisa basa, bzinthu bzin’dzawafambira bwino kwene-kwene. Ndipopa Yahova adalewa kuti: “Munthu wakundibvera an’dzakhala wakukhotcerereka ndipo an’dzagopa lini tsoka.” — Mim. 1:33. w22.10 21 ¶11-13

Kugopa Yahova kumbathandauza kumulemekeza kwene-kwene mwa kutcenkha kucita cinthu comwe ambakomedwa lini naco. (Mim. 16:6) Ndipo tin’funika kucita nyongo ya kubvera mitemo ya Mulungu yomwe iri m’Bibliya pa nkhani ya cabwino na cakuipa. (2 Ako. 7:1) Ifepano tin’dzakhala na mpfatso caiwo tikambacita bzinthu bzomwe Yahova ambakomedwa nabzo na kutcenkha kucita bzomwe ambawenga. (Sal. 37:27; 97:10; Aro. 12:9) Munthu angadziwe kuti Yahova ana ugo bwakulewa kuti ici n’cabwino ici n’cakuipa, tsono iye an’funika kuteweza bzomwe Yahova akufuna. (Aro. 12:2) Makhalidwe yathu ndiyo yambalatiza kuti timbakhulupira kuti mitemo ya Yahova njakulungama ayai ne. (Mim. 12:28) Davide akhawona kuti malamulo ya Yahova ngakulungama. Ndipopa iye adalewa kuti: “Imwepo mudandidziwisa njira ya moyo. Pan’khala imwe pana cikondweso cokha-cokha; ku boko lanu ladidi kuna cikondweso mpaka muyaya.” — Sal. 16:11. w22.10 8 ¶9-10

Jezu akhabziwona mwacikati-kati ndipo akhali wakubzicepesa. Pomwe iye akhanati kubwera pantsi pano, adacita bzinthu bzizinji pakutumikira Yahova. Bibliya limbati: “Thangwe ra iye bzinthu bzinango bzentse bzidalengedwa, kuyambira kudzulu na pa dziko la pantsi.” (Akol. 1:16) Pa ntsiku yomwe adabatizidwa, bzikuwoneka kuti Jezu adakumbukira bzinthu bzentse bzomwe iye adacita pomwe akhali pabodzi na Baba wace. (Mat. 3:16; Juw. 17:5) Tsono bzimwebzi bziribe kucitisa kuti Jezu akhale wakubzikuza. Koma iye adapitiriza kukhala wakubzicepesa ndipo akhabziwonesa lini kuti ambadziwa bzinthu bzizinji kuposa munthu ali-wentse. Iye adauza anyakupfunza wace kuti “alibe kubwera [pa dziko la pantsi pano] kudzatumikiridwa, koma kudzatumikira na kupereka moyo wace kuti alombole wanthu azinji.” (Mat. 20:28) Ndipo iye adalewa pomwe kuti ambacita lini bzinthu bza mu msolo mwace. Jezu akhali wakubzicepesa kwene-kwene! Ndipo ifepano tin’funika kumutewezera. w22.05 24 ¶13

Akambakumbukira kuti anilekerera ayai ne munthu omwe acita pikado, Yahova ambawona penu munthuyo akudziwa kuti bzomwe wacitabzo mpsakuphonyeka ayai ne. Jezu adabvekesa nfundo imweyi pa Luka 12:47, 48. Munthu omwe ambacita kukonzekera kuti acite bzinthu bzomwe iye akudziwa kuti Mulungu ambaletsa, ambakhala akucita pikado ikulu kwene-kwene. Munthu umweyu ali pa ngozi thangwe angalekereredwe lini na Yahova. (Mar. 3:29; Juw. 9:41) Penu n’tenepo, kodi tingadikhirire kulekereredwa? Inde! Thangwe Yahova ambawona penu munthu omwe wacita pikadoyo wakunguladi na mtima wentse. Kukungula kumbathandauza “kucinja nzeru na makhalidwe yathu.” Munthu omwe wakungula ambakhumbula na kusunama thangwe ra bzinthu bzakuipa bzomwe wacita. Ndipo bzimbamuwawambo akakumbukira kuti watazira kucita bzinthu bzabwino. Iye ambandosunama lini thangwe ra bzinthu bzakuipa bzomwe wacita, koma ambasunamambo akakumbukira bzinthu bzomwe bzamucitisa kufika pakucita pikado. w22.06 5-6 ¶15-17

Anyamadulanthaka wathu ambaphatisa basa radio, televisão na interneti kuti anamizire abale omwe akutsogolera mu gulu la Yahova. (Sal. 31:13) Abale winango ambamangidwa acinamiziridwa kuti mbakambowa. Akristau wakuyambirira adagumanambo na bvuto libodzi-bodziri pomwe mpostolo Paulo adanamiziridwa acimangidwa. Winango adasiya kuthandiza Paulo pomwe iye akhali m’kawoko ku Roma. (2 Tim. 1:8, 15; 2:8, 9) Kodi mukukumbuka kuti Paulo adabva tani na bzimwebzi? Iye akhadapirira kale mabvuto yakusiyana-siyana na kuikha moyo wace pa ngozi kuti awathandize. (Mab. 20:18-21; 2 Ako. 1:8) Ifepano tin’funika lini kukhala ninga Akristau amwewale, omwe alibe kuthandiza Paulo. Ndipopa tin’funika lini kudabwa tikawona Sathani akuzunza abale omwe akutsogolera mu gulu la Yahova. Bzomwe iye ambafuna mpsakuti abale amwewa asiye kukhala wakukhulupirika kuti ifepano tigoboke m’mabondo. (1 Ped. 5:8) Pitirizani kuthandiza abale wanu, ndipo pitirizani kukhala wakukhulupirika kwa iwo. — 2 Tim. 1:16-18. w22.11 16-17 ¶8-11

Kapondo m’bodzi omwe akhadakhomereredwa pa muti kumbali kwa Jezu omwe akhadalatiza kukungula ule, pinango pentse akhali Mdjuda. Adjuda akhanamata Mulungu m’bodzi yekha basi. Tsono wanthu wa mitundu minango akhanamata mirungu mizinji. (Eki. 20:2, 3; 1 Ako. 8:5, 6) Bzingadakhala kuti kapondo ule akhali lini Mdjuda, pinango mbvunzo wa m’vesi la leroli ungadakhala wakuti: “Kodi iwepo umbagopa lini mirungu?” Cinango n’cakuti Jezu alibe kutumidwa kuti akapalizire wanthu wa mitundu inango, koma “kwa mabira yakutaika ya mtundu wa Jirayeri.” (Mat. 15:24) Mulungu adauza Ajirayeri kuti iye angadadzalamusa wanthu omwe adafa. Mafala yomwe kapondo ule adalewa yakulatiza kuti iye akhadziwa bzimwebzi. Iye akhadziwambo kuti Yahova angadalamusa Jezu kuti akatonge mu Umambo bwa Mulungu kudzulu. Ndipo iye akhakhulupira kuti Mulungu angadamulamusambo. Ninga Mdjuda, kapondo ule akhadziwa bwino bza nkhani ya Adamu na Eva. Ndipopa iye adadziwa kuti Paraizo omwe Jezu adaulewa pa Luka 23:43 ungadadzakhala pa dziko la pantsi pano. — Gen. 2:15. w22.12 8-9 ¶2-3

Mzimu wa Mulungu ndiwo umbatipasa mphanvu kuti tikwanise kucita basa la kupalizira. Thangwe ranyi tikulewa tenepoyo? Tikulewa tenepoyo thangwe Sathani ali pa nkhondo na ifepano kuti atitazise kucita basa la kupalizira. (Apok. 12:17) Wanthu azinji ambakumbuka kuti Sathani ngwamphanvu kwene-kwene ndipo tingakwanise lini kumukunda. Tsono tikambacita basa la kupalizira, ifepano timbakhala tikumukunda! (Apok. 12:9-11) Thangwe ranyi? Thangwe tikambapalizira, ifepano timbalatiza kuti timbamugopa lini Sathaniyo. Tenepo, timbatsimikizira kuti mzimu wakucena ukutitsogolera ndipo Yahova akukomedwa nafe. (Mat. 5:10-12; 1 Ped. 4:14) Kodi n’ciyani comwe ifepano tikupfunza tikambakumbukira bzomwe Mulungu adacita kuti apase mphanvu Zakiyeri? Tikupfunza kuti Mulungu angatipase mphanvu kuti tikwanise kukunda mabvuto yentse yomwe tingagumane nayo mu utumiki. (2 Ako. 4:7-9) Tsono n’ciyani comwe tingacite kuti tipitirize kutambira mzimu wa Mulungu? Ifepano tin’funika kupitiriza kupemba kwa Yahova na kukhulupirambo na mtima wentse kuti an’dzabva mipembo yathu. w22.11 5 ¶10-11

Cinthu cibodzi comwe tingacite kuti tilatize kuti timbafuna abale na mpfumakazi zathu ni kucita nyongo kuti timbakhale nawo bwino. Pa nkhani ya kulekerera, tin’funika kutewezera Yahova. Penu Yahova adabvuma kuti Mwana wace afe kuti ifepano tilekereredwe pikado zathu, ifepano tin’funikambo kulekerera abale wathu akatiphonyera. Tin’funika lini kukhala ninga kapolo omwe Jezu adamulewa ule. Iye adalekereredwa mangawa ya kobiri zizinji kwene-kwene. Tsono alibe kulekererambo mwanzace omwe akhamufiyali kobiri yakucepa kwene-kwene. (Mat. 18:23-35) Tikapitana na m’bale ayai mpfumakazi yathu, bzingakhale bwino kucezerana naye nkhaniyo ticibverana, pomwe ntsiku ya Cikumbuso ikanati kufika. (Mat. 5:23, 24) Tikacita bzimwebzi, tin’dzalatiza kuti timbafuna kwene-kwene Yahova na Jezu. w23.01 29 ¶8-9

Cinthu cibodzi comwe tingacite kuti tithandize abale na mpfumakazi zathu ni kuwabvunza. (Mim. 20:5) Tingawabvunze kuti tidziwe penu iwo ana cakudya cakukwana, ana mankhwala ayai akufuna bzinthu bzinango. Ndipo penu empreza yawo ikucosa wanthu basa, tingawabvunzembo kuti tidziwe penu an’cosedwa basa ayai ne na kuti an’kwanisa kupagali nyumba ya aluge. Ndipo tingawabvunzembo kuti tidziwe penu akufuna kuthandizidwa kukonza madokumento kuti akwanise kumbatambira thandizo lomwe boma limbapereka. Yahova akufuna kuti tentsenefe timbathandize anzathu. (Agal. 6:10) Napo kuti tingacite lini bzizinji, koma kacinthu kang’ono komwe tingacite kangathandize m’bale omwe akuduwala. Wana angaperekeze abereki wawo pomwe akuyenda kukawona m’bale omwe akuduwala. Alumbwana angathandize mpfumakazi yacikulire mwa kuyenda kukaigulira bzinthu ku bazali. Ndipo abale winango m’gwere angaphikire cakudya m’bale ayai mpfumakazi yomwe ikuduwala. Abale winango ambatumizira akulu wa gwere matsamba yakuwatenda thangwe ra basa lomwe iwo ambacita pa nthawe ya matenda. Tikapitiriza ‘kumbalimbikisana na kumbapasana mphanvu,’ tentse m’gwere timbakhala wakulimba! — 1 Ates. 5:11. w22.12 22 ¶2; 23 ¶5-6

Asaduki akhayadziwa bwino mabukhu maxanu yakuyambirira ya Bzinembo bza Cihebereu, tsono iwo akhaphatisa lini basa bzomwe akhawerenga m’mabukhu yamweya. Onani bzomwe Jezu adalewa pomwe Asadukiwo adamubvunza bza nkhani yakulamusidwa kwa anyakufa. Iye adawabvunza kuti: “Kodi mulibe kuwerenga m’bukhu la Mozeji, bza nkhani yakulewa bza citsamba ca minga, pomwe Mulungu adamuuza kuti: ‘Ine ndine Mulungu wa Abalahamu, Mulungu wa Izaki na Mulungu wa Djakobo’?” (Mar. 12:18, 26) Napo kuti Asaduki akhaidziwa bwino nkhani imweyi, mbvunzo omwe Jezu adawacitayu udalatiza kuti pakhana cinthu cakufunika kwene-kwene comwe iwo akhacibvesesa lini, comwe ni cipfunziso cakulewa bza kulamusidwa kwa anyakufa. (Luk. 20:38) Kodi tikupfunza ciyani? Pomwe tikuwerenga, tin’funika kukhala tceru kuti tibvesese bzomwe vesiro ayai bzomwe nkhaniyo ikutipfunzisa. Tin’funika lini kundobvesesa bzinthu bzakupusa bzokha basi, koma tin’funikambo kuyezera kubvesesa bzinthu bzakunesa na mitemo inango ya m’Bibliya yomwe njakunesa kuibvesesa. w23.02 11 ¶9-10

Mboni zomwe zikufotokozedwa mu vesi la ntsiku ya lero zidagumana na mabvuto makulu kwene-kwene; koma zidapitiriza kukhala zakukhulupirika kwa Yahova. (Aheb. 11:36-40) Kodi kupirira na nyongo yawoyo bzidandoyenda papezi? Ne, n’tenepo lini! Napo kuti pomwe akhana moyo alibe kuwona bzinthu bzomwe Mulungu adawauza kuti an’dzacita, iwo adapitiriza kukhala na cidikhiro. Pakuti akhakhulupira kuti Yahova akhakomedwa nawo, iwo adakhulupira kuti bzomwe Mulungu adawauzabzo bzin’dzacitika ndipo iwo an’dzabziwona na maso yawo. (Aheb. 11:4, 5) Bzomwe iwo adacitabzi bzikutilimbikisambo tentsenefe kuti tipitirize kudikhirira Yahova. Ifepano tikukhala mu dziko lomwe bzinthu bzikuyenda bziciipiratu. (2 Tim. 3:13) Sathani akadapitiriza kuyeza wanthu wa Mulungu. Napo kuti tingadzagumane na mabvuto kutsogoloku, bwerani tipitirize kuphatira basa Yahova na nyongo ticimbakhulupira kuti “timbaikha cidikhiro cathu kwa Mulungu wamoyo.” — 1 Tim. 4:10. w22.06 25 ¶17-18

Thangwe libodzi lomwe limbaticitisa kufuna kukhala na thanzi labwino ndakuti ticite bzizinji pa kutumikira Yahova. (Mar. 12:30) Ndipopa timbatcenkha kucita bzinthu bzomwe bzingadzonge thanzi lathu. (Aro. 12:1) Napo kuti tingacite nyongo kuti tikhale na thanzi labwino, tingaduwale basi. Tsono ifepano timbacita bzimwebzi kuti tilatize Baba wathu wa kudzulu kuti timbatenda mphaso ya moyo yomwe iye adatipasa. Matenda na kukalamba bzingatitazise kucita bzinthu bzizinji bzomwe tikhacita kale-kale. Bzimwebzi bzingatiwawe kwene-kwene. Tsono tin’funika kucita nyongo ya kubzisamalira kuti tikhale na thanzi labwino. Thangwe ranyi? Thangwe napo pomwe tikuduwala ayai pomwe takalamba, ifepano tingapitirize kutumbiza Yahova ninga momwe adacitira Mambo Davide. Timbakomedwa kwene-kwene kudziwa kuti ndife wakufunika kwa Mulungu wathu napo penu tikuduwala ayai ndife wakukalamba! (Mat. 10:29-31) Napo ticifa, iye an’dzatilamusa. (Djob. 14:14, 15) Ndipopa, pomwe tikana moyo tin’funika kukhotcerera moyo wathu. w23.02 20-21 ¶3-5

Kodi madzina ya wanthu wa thimu likulu la mabira manango yan’dzapitiriza kukhala yalipo mu bukhu la moyo akadzapulumuka pa Armagedo? Inde. (Apok. 7:14) Jezu adalewa kuti wanthu omwe ali ninga mabirawa “an’dzayenda [kukatambira] moyo wakusaya kumala.” (Mat. 25:46) Tsono wanthu omwe an’dzapulumuka pa Armagedowa an’dzatambiriratu lini moyo wakusaya kumala. Mkati mwa Utongi bwa Magole 1000, Jezu “an’dzawausa aciwatsogolera ku ntsantsa ya madzi ya moyo.” Wanthu omwe an’dzateweza bzomwe Jezu an’dzawapfunzisa na kupitiriza kukhala wakukhulupirika kwa Yahova madzina yawo yan’dzapfudzidwa lini mu bukhu la moyo, bzomwe bzin’dzakhala ninga kuti yanembedwa na lapizera. (Apok. 7:16, 17) Tsono wanthu omwe ali ninga mbuzi, an’dzapfudzidwa pa Armagedo. Jezu adalewa kuti iwo “an’dzayenda ku infa yakusaya kumala.” (Mat. 25:46) Ndipo mwakutsogoleredwa na mzimu wakucena, mpostolo Paulo adalewa kuti ‘wanthu amwewa an’dzapasidwa nyathwa ndipo an’dzapfudzidwa mpaka kale-kale.’ — 2 Ates. 1:9; 2 Ped. 2:9. w22.09 16 ¶7-8

Banja likambakhala na nthawe ya kuwona cirengedwe ca Yahova pabodzi, iwo ambakhala wakutsudzuka ndipo ambakhala wakubverana. Bzimwebzi bzimbacitisa kuti iwo afunane kwene-kwene. Yahova adakonza mbuto zakudeka pa dziko la pantsi ndipo ifepano tingaphatise basa mbuto zimwezi kuti ticite bzinthu bzomwe timbafuna. Mabanja mazinji yambafuna kuyenda pabodzi kukawona mbuto yomwe ina bzirombo, kukwira mapiri ayai kuyenda pabodzi ku gombe. Mu dziko lipsa abereki pabodzi na wana wawo an’dzakondwa na cirengedwe ca Yahova kuposa momwe akukondwera ntsiku zino. Tin’dzagopa lini pomwe bzirombo ndipo ibzo bzin’dzatigopambo lini pomwe. (Zai. 11:6-9) Ifepano tin’dzakondwa na bzinthu bzomwe Yahova adalenga mpaka muyaya. (Sal. 22:26) Tsono abereki, lekani kudikhirira nthawe imweyo kuti muyambe kupfunzisa wana wanu kuti ambakomedwe na cirengedwe. Imwepo mukaphatisa basa cirengedwe kuti mupfunzise wana wanu bza Yahova, iwo an’dzalewambo mafala ninga yomwe Mambo Davide adalewa, yakuti: “Imwe Yahova, palibe mabasa yomwe yangandendemerane na yanu.” — Sal. 86:8. w23.03 25 ¶16-17