Dezembro

Kodi Mwamuna munango wa ku Etiyopiya akhalidi wakukonzeka kuti abatizidwe? Onani kuti mwamuna wa ku Etiyopiya “akhadayenda ku Jeruzalemu kuti akanamate.” (Mab. 8:27) Iye akhadabvuma cipfunziso ca Adjuda. Iye adapfunza bza Yahova kucokera m’Bzinembo bza Cihebereu. Ndipo iye akhafunisisa kupfunza bzizinji. Pomwe Filipi adayenda kukagumana naye, adamuwona akuwerenga mwakukuwa bukhu la mpolofeta Zaiya. (Mab. 8:28) Iye akhafuna kupitiriza kupfunza bzinthu bzizinji. Iye adacita ulendo kucokera ku Etiyopiya aciyenda ku Jeruzalemu kuti akanamate Yahova. Mwamuna wa ku Etiyopiya adapfunza bzinthu bzinango bzakufunika kwene-kwene na Filipi pakulewa bza Mesiya. (Mab. 8:34, 35) Pomwe iye adabva bzimwebzi, lufoyi lace kwa Yahova na Jezu lidakula. Iye adacinja moyo wace acifuna kubatizidwa kuti akhale mteweri wa Jezu. Filipi adawona kuti mwamunayo akhadakonzeka kuti abatizidwe, ndipopa adamubatiza. w23.03 8-9 ¶3-6

Tikambalewa bzinthu bzakunama Yahova angakomedwe lini nafe. (Mim. 6:16, 17) Ntsiku zino, wanthu azinji ambakumbuka kuti kunama kulibe kuipa. Tsono, ifepano timbatcenkha kunama thangwe Yahova ambatiuza kuti kudaipa. (Sal. 15:1, 2) N’cadidi kuti tin’funika kutcenkha kumbalewa bzinthu bzakunama. Tsono tin’funikambo kutcenkha kumbalewa bzinthu bzomwe bzingacitise kuti munthu akumbuke bzinango, pomwe bzinthu bziri lini tenepoyo. Ndipo tin’funikambo kutcenkha kumwaza magunkha. (Mim. 25:23; 2 Ates. 3:11) Mukawona kuti nkhani yomwe mukuceza ikufuna kukhala magunkha, mungandocinje nkhaniyo muciyamba kulewa nkhani inango yabwino. Tikukhala mu dziko lomwe wanthu azinji ambalewalewa mafala yakuipa, ndipopa tin’funika kucita nyongo kuti timbalewelewe bzinthu bzomwe bzimbakondwesa Yahova. Tikambaphatisa basa bwino mphaso yakulewalewa mu upalizi, pa mitsonkhano na pomwe tikuceza na anzathu, iye an’dzatisimba. Wanthu wakuipa akadzacosedwa, bzin’dzatinesa lini kutumbiza Yahova na mafala yathu. — Djuda 15. w22.04 9 ¶18-20

Kukumbukira kuti Yahova na Jezu ambatifuna kwene-kwene kumbacitisambo kuti ifepano tiwafune. (1 Juw. 4:10) Tikakumbukira kuti Jezu adafera m’bodzi na m’bodzi wa ifepano kuti tidzapulumuke, timbamufuna kwene-kwene. Mpostolo Paulo akhadziwa bzimwebzi, ndipopa adauza Akristau wa ku Galatiya kuti: “Mwana wa Mulungu . . . adandifuna, acibzipereka thangwe ra ine.” (Agal. 2:20) Ntsembe ya cakulombolera ya Jezu imbacitisa kuti imwepo mukhale axamwali wa Yahova. (Juw. 6:44) Kodi imwepo mumbakomedwa lini thangwe ra kudziwa kuti Yahova adawona makhalidwe yanu yabwino ndipo adapagali pereso yakuumira kwene-kwene kuti mukhale xamwali wace? Ndipopa mpsabwino kubzibvunza kuti: ‘Kodi lufoyi langu kwa Yahova na Jezu likundicitisa kuti ndicite ciyani?’ Lufoyi lathu kwa Yahova na kwa Jezu limbaticitisa kuti tifunembo anzathu. — 2 Ako. 5:14, 15; 6:1, 2. w23.01 28 ¶6-7

Bibliya ni cinthu cakufunika kwene-kwene comwe Yahova ambaciphatisa basa kuti athandize wanthu wace “[kumutumikira] mwakuphatana.” Yahova adacitisa kuti mbali zizinji za m’Bibliya zinembedwe mu njira yakuti wanthu wakubzicepesa okha ndiwo akwanise kuzibvesesa. (Luk. 10:21) Wanthu azinji ambawerenga Bibliya. Tsono ni wanthu wakubzicepesa okha omwe ambabvesesa mafala ya m’Bibliya na kuyaphatisa basa. (2 Ako. 3:15, 16) Tikakhala tikuwerenga Bibliya timbakwanisa kuwona cinthu comwe cimbalatiza kuti Yahova ngwanzeru kwene-kwene. Yahova ambaphatisa basa Bzinembo kuti atipfunzise sikuti ninga thimu basi, koma ali-wentse wa ifepano payekha-payekha. Ifepano tikakhala tikuwerenga Fala la Mulungu timbakwanisa kubvesesa kuti Yahova ambafuna munthu ali-wentse payekha-payekha. (Zai. 30:21) Tikawerenga Bibliya, bzimbakhala ninga kuti mafalayo yadanembedwereratu ifepano. Koma, ifepano timbadziwa kuti Bibliya lidanembedwera wanthu azinji pa dziko lentse la pantsi. Tsono, thangwe ranyi nkhani zace zimbakhala zakuthandiza kuna munthu ali-wentse payekha-payekha? Bzimwebzi bzimbakwanisika thangwe Mwenekaciro wa Bibliya ngwanzeru kwene-kwene. — 2 Tim. 3:16, 17. w23.02 4-5 ¶8-10

Pakuti ndife Akristau wacadidi, timbafuna kwene-kwene Yahova. Ndipopa timbafuna kumutumikira na mtima wanthu wentse. Tsono kuti tikwanise kucita bzimwebzi tin’funika kukhala na bzakulinga bzauzimu, ninga kukulisa makhalidwe yacikristau, kupfunza maluso manango na kuwona bzomwe tingacite kuti tithandize anzathu. Thangwe ranyi tin’funika kucita bzizinji pakutumikira Yahova? Cakuyamba, ni thangwe rakuti tikufuna kuti Baba wathu wakudzulu akomedwe. Yahova ambakomedwa kwene-kwene akambatiwona kuti tikuphatisa basa luso lathu lentse pakumutumikira. Ndipo cinthu cinango n’cakuti, tikacita nyongo kuti tiyende patsogolo mwauzimu, tin’dzakwanisa kuthandiza abale na mpfumakazi zathu. (1 Ates. 4:9, 10) Tin’funika kupitiriza kuyenda patsogolo mwauzimu, napo kuti tina magole mazinji tikutumikira Yahova. w22.04 22 ¶1-2

Atsogoleri wa ndale wa dzikoli an’dzapfudza Babiloniya Mkulu, omwe ni magereja yakunama ya pa dziko lentse. Bzimwebzi bzin’dzakhala ciyambi ca citsautso cikulu. Tsono, kodi wanthu an’dzayamba kutumikira Yahova thangwe ra citsautsoco? Ne. Thangwe bukhu la Apokalipse kapitulo 6 limbalewa kuti pa nthawe yakunesayi wanthu omwe ambanamata lini Yahova, an’dzafuna kukhotcereredwa na atsogoleri wa ndale na anyamalonda wa m’dzikoli omwe ali ninga mapiri. Iwo an’dzathandizira lini Umambo bwa Mulungu, ndipopa Yahova an’dzawawona kuti ni anyamadulanthaka wace. (Luk. 11:23; Apok. 6:15-17) Tsono atumiki wakukhulupirika wa Yahova an’dzapitiriza kukhala wakusiyana na wanthu wentse pa nthawe yakunesayi. Ndipo ndiwo okha omwe an’dzapitiriza kutumikira Yahova Mulungu na kulamba kuthandizira “cirombo.” — Apok. 13:14-17. w22.05 16-17 ¶8-9

Wanthu wa Mulungu akundopalizira lini “mafala yabwino ya Umambo” basi. (Mat. 24:14) Iwo akuthandizirambo basa lomwe anjo wakufotokozedwa pa Apokalipse kapitulo 8 mpaka 10 akucita. Anjo amwewa akudziwisa matsoka yakusiyana-siyana yomwe yan’dzagwera wanthu omwe ambalamba kubvera Umambo bwa Mulungu. Ndipopa Mboni za Yahova zimbadziwisa mafala yomwe yali ninga “matalala na moto” yakulewa bza nyathwa yomwe Mulungu an’dzapereka kwa wanthu wakusiyana-siyana wa m’dziko la Sathaniri. (Apok. 8:7, 13) Wanthu an’funika kudziwa kuti cimaliziro ciri pafupi ndipo an’funikambo kudziwa kuti an’funika kucinja moyo wawo kuti adzapulumuke pa ntsiku ya ukali bwa Yahova. (Zef. 2:2, 3) Tsono mafala yamweya yambadekera lini wanthu wentse, ndipopa tin’funika kukhala wakukhwimika kuti tiyapalizire. Pa nthawe ya citsautso cikulu tin’dzadziwisa cirango comwe Mulungu an’dzapereka kwa wanthu wakuipa ndipo iwo an’dzakomedwa lini nabzo. — Apok. 16:21. w22.05 7 ¶18-19

Kumbukirani bza banja lacikristau lomwe lakhala na mwana. Iwo ambakhala amala magole mazinji akubva nkhani za bzomwe abereki angacite pakulera wana wawo. Tsono kuyambira pa nthawe yomwe iwo ambakhalambo na mwana, nkhani zimwezi zimbakhalambo zakufunika kwene-kwene kwa iwo. Thangwe iwo ambakhala na mwana wawombo omwe an’funika kumulera. Limweri ni basa likulu kwene-kwene! Bzimwebzi bzikutithandiza kubvesesa kuti bzinthu bzikacinja pa moyo wathu, mavesi manango ya m’Bibliya yambakhala yakufunika kwene-kwene kwa ifepano. Ndipopa atumiki wa Yahova ambawerenga Fala la Mulungu ninga momwe amambo wa Jirayeri adauzidwira kuti ambacite. Iwo adauzidwa kuti ambawerenge Fala la Mulungu na kumbakumbukira bzomwe awerengabzo ‘ntsiku zentse za moyo wawo.’ (Deut. 17:19) Abereki, imwepo muna mwayi ukulu kwene-kwene, wakupfunzisa wana wanu bza Yahova. Tsono mun’funika lini kundowapfunzisa bza Mulungu basi, koma pana bzinthu bzinango bzomwe mun’funikambo kucita. Imwepo mun’funika kuwathandiza wana wanu kuti ambafune Yahova. w22.05 26 ¶2-3

Mpsakukwanira lini kukhumbula thangwe ra pikado yomwe tacita ayai thangwe ra bzinthu bzakuipa bzomwe tacita. Tin’funika kucita cinthu. Ndipo kucinja ni cinthu cibodzi comwe Yahova ambakumbukira akambawona penu angalekerere munthu ayai ne. Kucinja kumbathandauza ‘kuzungunuka’ ayai kubwerera. Kuti munthu alatize kuti wacinja, iye an’funika kusiya makhalidwe yace yakuipa aciyamba kufamba mu njira ya Yahova. (Zai. 55:7) Munthuyo an’funika kucinja nzeru zace kuti ayambe kutsogoleredwa na nzeru za Yahova. (Aro. 12:2; Aef. 4:23) Iye an’funika kucita ciri-centse kuti asiye moyo wace wakale-kale, bzicito bzace na makumbukidwe yace. (Akol. 3:7-9) Tsono kuti Yahova atilekerere, pana cinthu cinango cakufunika kwene-kwene comwe tin’funika kucita. Kodi cinthuco n’ciponi? Ndico kukhulupira ntsembe ya cakulombolera ya Kristu. Yahova ambaphatisa basa ntsembeyi kuti atilekerere akawona kuti tikucita nyongo kuti ticinje makhalidwe yathu na moyo wathu. — 1 Juw. 1:7. w22.06 6 ¶16-17

Kuyambira pomwe Adamu adaphonyera Mulungu, wanthu ambacitira anzawo bzinthu bzakuipa. (Mpal. 8:9) Wanthu winango ambaphatisa basa kuipa udindo bwawo kuti acitire wanthu bzinthu bzakuipa. Akambowa ambapweteka wanthu, wana ku xikola ambatukwana na kukhumbza anzawo ndipo nthawe zinango wanthu ambaboneresedwa na wanthu wa m’banja mwawo caiwo. Ndipopa wanthu ambagopa wanthu anzawo. Tsono, kodi Sathani ambaphatisa tani basa mantha yamweya kuti awofokese cikhulupiro cathu? Sathani ambaphatisa basa mantha yomwe ifepano tinayo na wanthu kuti atitazise kukhala wakukhulupirika kwa Mulungu na kucita basa lakupalizira. Ndipo Sathani ambapumpsambo maboma ya m’dzikoli kuti yaletse basa lathu na kutizunza. (Luk. 21:12) Wanthu azinji wa m’dziko la Sathaniri ambamwaza nkhani zakuipa na zakunama zakulewa bza ifepano. Ndipo wanthu omwe ambakhulupira nkhani zakunamazi angatinyoze ayai kutiboneresa. (Mat. 10:36) Ifepano timbadabwa lini na bzomwe Sathani ambacitabzi. Thangwe ranyi? Thangwe iye akhacita kale bzimwebzi na Akristau wakuyambirira. — Mab. 5:27, 28, 40. w22.06 16 ¶10-11

Kodi mbani an’dzacitambo mbali ya “wanthu azinji” omwe an’dzathandizidwa kucita cirungamo? Ni wanthu omwe an’dzalamusidwa, wanthu omwe an’dzapulumuka pa Armagedo na wana omwe angadzabadwe mu dziko lipsa. Mpaka kuphampha kwa magole 1000, wanthu wentse omwe an’dzakhala na moyo pa dziko la pantsi pano an’dzakhala wakulungama. Tin’funika kukumbukira kuti wanthu akadzakhala wakulungama bzin’funa lini kulewa kuti iwo an’dzatambiriratu moyo wakusaya kumala. Kumbukirani bza Adamu na Eva. Iwo akhali wanthu wakulungama. Koma iwo akhafunika kubvera Yahova kuti akhale na mwayi wakukhala na moyo wakusaya kumala. Tsono iwo alibe kucita bzimwebzi, ndipopa adaluza mwayi umweyu. (Aro. 5:12) Pakuti wanthu wentse an’dzakhala wakulungama kuphampha kwa magole 1000, kodi iwo an’dzathandizira utongi bwa Yahova mpaka kale-kale? Ayai winango an’dzakhala ninga Adamu na Eva, omwe alibe kubvera Yahova napo kuti akhali wakulungama? Mibvunzo imweyi in’dzafunika kutawiridwa. w22.09 22-23 ¶12-14

Mukambawona bzinthu bzakuipa bzomwe bzikucitika ntsiku zino, kodi bzimbakunesani kukhulupira kuti bzinthu bzin’dzakhala bwino kutsogoloku? Ifepano timbawona kuti wanthu ambafunana lini pomwe pa ubale bwawo ninga momwe bzikhacitikira kale-kale. Wanthu ambacita bzinthu bzizinji bzakuipa ndipo ambabzifuna kwene-kwene. Ndipo wanthu azinji bzimbawanesa kukhulupira atongi wawo. Tsono, kuwona bzinthu bzimwebzi bzikucitika kungakuthandizeni kukhulupira kuti bzinthu bzin’khala bwino kutsogoloku. Thangwe ranyi tikulewa tenepoyo? Thangwe Bibliya likhadaleweratu kuti mu “ntsiku zakumalizira” wanthu angadadzacita bzimwebzi. (2 Tim. 3:1-5) Wanthu omwe ana mitima yabwino akukwanisa kuwona kuti bzomwe polofesiyayi idalewa bzikucitikadi mu ntsiku zathu zino, ndipo bumwebu ni umboni bwakuti Jezu Kristu wakhala Mambo wa Umambo bwa Mulungu. Tsono imweyi ni polofesiya ibodzi basi pa mapolofesiya mazinji yomwe yambalewa bza Umambo bwa Mulungu. Ndipopa kupfunza mapolofesiya yentseya kun’tithandiza kudziwa bzomwe Yahova akucita ntsiku zino. w22.07 2 ¶1-2

Pa nthawe ya matenda ya COVID-19, tidatambirambo malango yakubveka bwino ya momwe tingacitire mitsonkhano ya gwere na kucita basa la kupalizira. Ndipo mwakusaya kucedwa, tidayamba kucita mitsonkhano ya gwere, mitsonkhano ya dera na mitsonkhano ya cigawo mwakuphatisa basa videoconferência. Ndipo tidayambambo kucita upalizi mwakucita kumbanemba matsamba na telefoni. Yahova adasimba nyongo yathu. Marelatoriyo ya mthambi zizinji yadalatiza kuti mbogo ya apalizi idathimizirika. Ndipo apalizi azinji adafotokoza bzinthu bzakulimbikisa bzomwe adagumana nabzo pomwe akhacita basa la kupalizira pa nthawe ya matendaya. Wanthu winango akhawona ninga kuti gulu la Mulungu likhakhwimisa malamulo pomwe likhafotokoza bzomwe tikhafunika kucita pa nthawe ya matendaya. Tsono pomwe malangoyo yakhaperekedwa, bzikhadzawoneka kuti nganzeru. Ndipo tikambakumbukira momwe Jezu akutsogolerera wanthu wace mwalufoyi, ifepano timbakhala na citsimikizo cakuti bziribe basa bzomwe bzingadzaticitikire kutsogoloku, Yahova na Mwana wace Jezu an’dzakhala nafe. — Aheb. 13:5, 6. w22.07 13 ¶15-16

Pana cinthu cinango pomwe comwe tin’funika kucita kuposa kundotumbiza Yahova basi. Pomwe tikupemba kwa iye, ifepano tin’funikambo kumbamutenda thangwe ra bzinthu bzentse bzomwe ambaticitira. Tingamutende thangwe ra maluwa yakudeka yomwe timbawona, bzakudya bzakukoma bzomwe tinabzo na axamwali wabwino omwe iye adatipasa. Yahova adatipasa bzinthu bzimwebzi na bzinango kuti tikhale na moyo wabwino. (Sal. 104:12-15, 24) Ndipo tin’funikambo kumbamutenda kwene-kwene thangwe ra kutipasa malango yakucokera m’Bibliya yomwe yambatithandiza kukhala na cikhulupiro cakulimba na mwayi wa kudzakhala na moyo wabwino kutsogolo. Mpsakupusa kuyebwa kutenda bzinthu bzentse bzomwe Yahova ambaticitira. Tsono n’ciyani comwe cingatithandize kukumbukira? Imwepo munganembe lista ya bzinthu bzomwe mudakumbira Yahova. Ndipo na kupita kwa nthawe onani kuti Yahova akutawirani tani. Mukamala mungapembe kwa Yahova kuti mumutende thangwe ra kukuthandizani. — Akol. 3:15. w22.07 22 ¶8-9

Ifepano timbadziwa kuti kundopfunza cadidi n’kwakukwanira lini. Kuti tigumane phindu na bzomwe timbapfunzabzo, tin’funika kubziphatisa basa pa moyo wathu. Tikacita bzimwebzi, tin’dzakhala wakukondwa kwene-kwene. (Tiy. 1:25) Kodi tingadziwe tani kuti timbaphatisadi basa bzomwe timbapfunza pa moyo wathu? M’bale munango adalewa kuti comwe cingatithandize ndico kuwona bzomwe tikukwanisa kucita na bzomwe tikukwanisa lini. Mpostolo Paulo adabvekesa nfundo imweyi mwakulewa kuti: “Bziribe basa momwe tayendera patsogolo, mbatipitirizeni kufamba mu njira imweyi.” (Afil. 3:16) Kodi ni phindu liponi lomwe timbakhala nalo tikacita nyongo yakupitiriza “kufamba m’cadidi”? Timbakhala na makhalidwe yabwino, ndipo Yahova pabodzi na abale wathu wacikristau ambakomedwa nafe kwene-kwene. (Mim. 27:11; 3 Juw. 4) Bzimwebzi ni bzinthu bzomwe bzimbaticitisa kufuna cadidi na kukhala na moyo mwakubverana na cadidico. w22.08 18-19 ¶16-18

Kodi n’ciyani comwe akulu angacite kuti alatize kuti ambafuna Yahova na Jezu? Cinthu cakufunika kwene-kwene comwe angacite ni kudyesa mabira ya Jezu. (1 Ped. 5:1, 2) Jezu adabvekesa bwino nfundo imweyi pomwe akhaceza na Pedru. Pedru akhadalamba Jezu katatu-kentse, ndipopa iye adapasidwa mpata wakuti alatize kuti ambamufuna Jezuyo. Pomwe Jezu adalamusidwa, iye adabvunza Pedru kuti: “Simau mwana wa Juwau, kodi umbandifuna?” Kuti Pedru alatize kuti ambafuna Mbuya wace, iye akhafunikira kucita cinthu cinango. Jezu adamuuza kuti: “Dyesa wana wa mabira yangu.” (Juw. 21:15-17) Ndipo Pedru adacitadi bzimwebzi moyo wace wentse. Iye akhakonkhobza bwino mabira ya Mbuya, acilatiza kuti akhafuna kwene-kwene Jezu. Akulu, kodi mungalatize tani kuti mafala yomwe Jezu adauza Pedru ngakufunika kwa imwepo? Imwepo mungalatize kuti mumbafuna kwene-kwene Yahova mukambalimbikisa abale na mpfumakazi na kuthandizambo omwe adadjedjera mwauzimu kubwerera kwa Yahova. — Ezek. 34:11, 12. w23.01 29 ¶10-11

Tin’funika kutcenkha kukumbuka kuti palibe munthu angakwanise kubvesesa mabvuto yomwe tikugumana nayo. Thangwe ranyi? Thangwe nzeru zimwezi zingaticitise kukumbuka kuti palibe bzomwe tingacite ndipo tingakwanise lini kupitiriza kucita bzinthu bzabwino. Bibliya limbalewa kuti: “Pomwe mukugumana na mayezoyo, iye an’dzakupasani njira yakupulumukira kuti mukwanise kuyapirira.” Ndipopa tingakwanise kupitiriza kukhala wakukhulupirika kwa Yahova napo kuti mtima wakufuna kucita bzinthu bzakuipa ungakhale wa mphanvu kwene-kwene. Ndipo dziwani kuti Yahova an’kuthandizani kucita bzinthu bzabwino. Lekani kuyebwa kuti ifepano ndife wanthu wakuperewera ndipo tingakwanise lini kutcenkheratu kukhala na nzeru zakuipa. Tsono nzeruzo zikabwera, ifepano tingatcenkhe kucita bzinthu bzakuipa. Tingacite bzinthu mwakukhwimika ninga momwe adacitira Zuze pomwe adalamba kupumpsidwa na mkazi wa Potifari. (Gen. 39:12) Imwepo mun’funika lini kubvuma kukundidwa na nzeru zakuipa! w23.01 12-13 ¶16-17

Cirungamo ni libodzi mwa makhalidwe yakufunika ya Yahova. (Deut. 32:4) Cirungamo n’cakundendemerana na kusaya tsankhulo, ndipo Yahova alibe tsankhulo. (Mab. 10:34, 35) Kusaya tsankhulo kwace kudawonekera pa cirewedwe comwe iye adasankhula kuti Bibliya linembedwe. Yahova adalewa kuti mu ntsiku zakumalizira “cidziwiso cacadidi cin’dzawanda.” Wanthu azinji angadadzakhala na cidziwisoci. (Dan. 12:4) Cinthu cibodzi comwe cacitisa kuti cidziwisoci ciwande ndico kusandulizira, kudinda na kugawira wanthu Mabibliya na mabukhu manango yakufotokoza bza Bibliya. Tsono wanthu wa Yahova asandulizira Fala la Mulungu, cipande cace ayai lantero, m’bzirewedwe bzakupitirira 240, ndipo yakugawiridwa kwa wanthu fovolo. Bzimwebzi bzikucitisa kuti wanthu wa mitundu yentse abvume “mafala yabwino ya Umambo” pomwe cimaliziro cikanati kufika. (Mat. 24:14) Mulungu wathu wacirungamo akufuna kuti wanthu azinji akhale na mwayi wakudziwa cadidi mwa kuwerenga Fala lace. Bzimwebzi bzikucitika thangwe rakuti iye ambatifuna kwene-kwene. w23.02 5 ¶11-12

Kodi imwepo mumbafuna cirungamo? Tikudziwa kuti mumbafuna. Tsono tentsenefe ndife wakuperewera, ndipopa tikasaya kucenjera tingayambe kutewezera wanthu wa m’dzikoli ticiwona cirungamo ninga momwe iwo ambawonera. (Zai. 5:20) Pomwe Jezu akhali pantsi pano, atsogoleri wa magereja akhabziwona kuti mbanthu wakulungama kuposa wanthu winango. Tsono Jezu adawatsimula thangwe iwo akhambalewa kuipa anzawo na kumbathimizira malamulo yawo pa malamulo ya Mulungu. (Mpal. 7:16; Luk. 16:15) Ntsiku zino, wanthu winango ambacitambo bzimwebzi. Iwo ambabziwona kuti mbakulungama ndipo ambadziwa bzinthu kwene-kwene kuposa anzawo. Tsono kucita bzimwebzi ni cirungamo lini ndipo Yahova ambakomedwa lini nabzo. Cirungamo ni khalidwe labwino kwene-kwene. Mwa cigwatira, tingalewe kuti cirungamo ni kucita bzinthu bzomwe Yahova Mulungu ambakomedwa nabzo. M’Bibliya, fala lakuti “cirungamo” limbafuna kulewa kuteweza mitemo ya Yahova pa moyo wathu. w22.08 27 ¶3-5

Jezu adakhulupira anyakupfunza wace napo kuti nthawe zinango iwo akhaphonya. (Juw. 15:16) Pa nthawe inango, Tiyago na Juwau adakumbira Jezu kuti adzawapase mpando wabwino mu Umambo bwa Mulungu. Tsono Jezu alibe kuwakumbukira kuipa ayai kuwacosa kuti aleke kukhala pomwe apostolo wace. (Mar. 10:35-40) Ndipo pa usiku bomwe Jezu adamangidwa, anyakupfunza wace wentse adamuthawa. (Mat. 26:56) Tsono Jezu alibe kukumbuka kuti iwo ni wanthu wakuipa. Iye akhadziwa kuti iwo mbakuperewera; ndipo “adapitiriza kuwafuna mpaka kuphampha kwa moyo wace.” (Juw. 13:1) Pomwe Jezu adalamusidwa, iye adapasa apostolo wace wakukhulupirika wakukwana 11 basa lakufunika kwene-kwene. Iye adawauza kuti atsogolere basa lakupfunzisa wanthu na kuthandiza mabira yace. (Mat. 28:19, 20; Juw. 21:15-17) Jezu adawakhulupira kwene-kwene amuna amwewa thangwe akhawadziwa bwino; ndipo iwo adatumikira Yahova mwakukhulupirika mpaka kuphampha kwa moyo wawo wa pa dziko la pantsi. Jezu adakhulupira wanthu wakuperewera ndipo ifepano tingacitembo bzimwebzi. w22.09 6 ¶12

Tikatsimikizira kuti Yahova ambatifuna na kuti iye ali ku mbali yathu, ifepano tin’dzagopa lini Sathani. Nyakunemba Salimo 118 adagumana na mabvuto makulu pa moyo wace. Iye akhana anyamadulanthaka azinji ndipo winango wa iwo akhali wanthu wakubvekera (mavesi 9, 10). Ndipo pa nthawe inango iye adagumana na bvuto likulu kwene-kwene (vesi 13). Iye adalangidwa na Yahova (vesi 18). Napo bzikhali tenepo, nyakunemba Salimoyu adalewa kuti: “Nin’dzacita lini mantha.” Iye akhadziwa kuti Yahova ni Baba wace wa kudzulu omwe ambamufuna napo kuti akhadamulanga. Nyakunemba Salimoyu akhatsimikizira na mtima wentse kuti pa mabvuto yali-yentse yomwe angadagumana nayo, Mulungu wace angadakhala wakukonzeka kumuthandiza. (Sal. 118:29) Tin’funika kutsimikizira kuti Yahova ambatifuna. Citsimikizo cimweci ndico cin’dzatithandiza kukunda mantha yomwe yambabwera thangwe ra bzinthu bzitatu ibzi: cakuyamba, tin’dzadyesa tani banja lathu, caciwiri, kugopa wanthu na cacitatu, kugopa kufa. w22.06 15 ¶3-4

Tin’funika kuwonesesa kuti kunamata Yahova kuli pa mbuto yakutoma pa moyo wathu. Pakuti Yahova ni Mulengi wathu, ifepano tin’funika kumunamata. (Apok. 4:11; 14:6, 7) Ndipopa cinthu cakufunika pa moyo wathu cin’funika kukhala kumunamata “mu mzimu na cadidi.” Ndipo iye ambakomedwa na kunamata kumweku. (Juw. 4:23, 24) Ifepano tikufuna kuti mzimu wakucena umbatitsogolere pakunamata kwathu kuti kunamata kwathuko kubverane na cadidi comwe ciri m’Fala lace. Tin’funika kuwona kuti kutumikira Yahova ni kwakufunika pa moyo wathu, napo penu tikukhala m’dziko lomwe basa lathu ndakuletsedwa. Tikulewa pano, abale na mpfumakazi wakupitirira 100 ali m’kawoko thangwe ra kukhala Mboni za Yahova. Napo bziri tenepo, iwo akupitiriza kupemba kwa Yahova, kupfunza Fala lace na kuuzambo wanthu winango bza Mulungu na Umambo bwace. Wanthu akambatinyoza ayai kutizunza, ifepano timbapitiriza kukhala wakukondwa thangwe ra kudziwa kuti Yahova an’tithandiza ndipo an’dzatibaira. — 1 Ped. 4:14. w22.10 9 ¶13

Bukhu la Mimwani lina malango yomwe yangatithandize kukhala na moyo wabwino tikayaphatisa basa. Cakuyamba, mbakomedwani na bzomwe munabzo. Mimwani 23:4, 5 ambatipasa malango yakuti: “Leka kumbabzinetesa na basa kuti ugumane cuma . . . pakuti ico cimbabzikonzera matenga ninga ya mphungu ndipo cimbambuluka ciciyenda kudzulu.” Napo bziri tenepo, wanthu omwe adadala kale na wakusauka wentse ambafuna kukhala na kobiri zizinji. Ndipopa nthawe zinango iwo ambacita bzinthu bzomwe bzimbawacitisa kukakhala na mbiri yakuipa, kudzonga uxamwali bwawo na anzawo ndipo winango ambafika pakudzonga moyo wawo caiwo. (Mim. 28:20; 1 Tim. 6:9, 10) Caciwiri, mbayambani kukumbuka pomwe mukanati kulewalewa. Tikasaya kuwona bwino, tingalewe bzinthu bzomwe bzingawawe anzathu. Mimwani 12:18 ambati: “Alipo munthu omwe ambalewalewa mwakusaya kukumbuka ninga kulasa kwa xipada, tsono lirime la wanthu wanzeru limbalimbisa.” Ifepano tikambatcenkha kucita magunkha timbabverana na anzathu. — Mim. 20:19. w22.10 21 ¶14; 22 ¶16-17

Zakiyeri akhafunika kubvesesa bwino mafala yomwe akhafunika kukauza Ajirayeri. Ndipo akhafunika kuyakhulupira kuti akwanise kukauza Adjuda. Tsono pomwe adalidya, padacitika cinthu cakudabwisa. Zakiyeri adabva kuti tsambalo “likhatapira ninga uci.” (Ezek. 3:3) Thangwe ranyi? Ni thangwe rakuti kwa Zakiyeri, ukhali mwayi ukulu kwene-kwene kukalalewa mu dzina la Yahova, ndipo bzimwebzi bzikhali bzakudekeza ninga kutapira kwa uci. (Sal. 19:8-11) Iye adatenda kwene-kwene Yahova thangwe ra kumusankhula kuti akhale mpolofeta wace. Pomwe padapita nthawe, Yahova adauza Zakiyeri kuti: “Tetekera ucibvesesa bwino mafala yomwe nin’funa kukuuza.” (Ezek. 3:10) Bzimwebzi bzikhathandauza kuti Zakiyeri akhafunika kubvesesa bwino mafala yamphanvu yomwe akhafunika kukauza Adjuda yomwe yakhadanembedwa pa tsamba lire na kuyakumbukira mwakamderekho. Kucita bzimwebzi kudalimbisa cikhulupiro ca Zakiyeri. (Ezek. 3:11) Zakiyeri adakhala wakukonzeka kucita basa lomwe adapasidwa thangwe akhadabvesesa bwino mafalayo. w22.11 6 ¶12-14.

Penu kucinja kwa bzinthu mu gulu la Yahova kukuyeza cikhulupiro canu, n’ciyani comwe imwepo mun’funika kucita? Thandizirani kucinjako. Pa nthawe yomwe Ajirayeri akhali mu dambo Akowati ndiwo akhambanyamula thungwa la mpangano acifamba patsogolo pa wanthu wentse. (Num. 3:29, 31; 10:33; Djos. 3:2-4) Limweri likhali basa labwino kwene-kwene. Tsono bzinthu bzidacinja pomwe Ajirayeri adapita mu Dziko Lakupiciridwa. Thangwe kumweko thungwa la mpangano likhafunika lini pomwe kumbanyamulidwa. Ndipopa Akowati adapasidwa basa linango. (1 Nkha. 6:31-33; 26:1, 24) Bibliya limbalewa lini kuti Akowati adadandaula thangwe ra kucinjaku. Kodi nkhaniyi ikutipfunzisa ciyani? Tikupfunza kuti nthawe zentse tin’funika kumbathandizira kucinja komwe kungacitike mu gulu la Yahova, napo penu kucinjako kwacinjambo utumiki bwathu. Mbakomedwani na basa liri-lentse lomwe mwapasidwa. Kumbukirani kuti cinthu cakufunika kwene-kwene kwa Yahova ni basa lini lomwe mukucita, koma ni kubvera kwanu. w22.11 23 ¶10-11

Oneziforo alibe kutewezera bzomwe Akristau wale adacita pomwe mpostolo Paulo adaikhidwa m’kawoko. “Iye alibe kucita manyazi thangwe ra kumangidwa kwa [Paulo].” Koma adayenda kukanyang’ana Paulo. Ndipo pomwe adamugumana, adanyang’ana manera kuti amuthandize. Bzomwe Oneziforo adacita bzidaikha moyo wace pa ngozi. Kodi tikupfunza ciyani na nkhani imweyi? Tikupfunza kuti tin’funika lini kugopa kuthandiza abale wathu akakhala akuzunzidwa, koma tin’funika kumbawakhotcerera na kuwathandiza. (Mim. 17:17) Iwo akufunikira lufoyi na thandizo lathu. Kumbukirani bzomwe abale na mpfumakazi zathu ku Rússia akucita kuti athandize abale wawo omwe ali m’kawoko. Abale na mpfumakazi akakhala akutongedwa mirandu mu nyumba ya mphala, iwo ambayendambo kumweko kuti akawathandize. Kodi tikupfunza ciyani na nkhani imweyi? Tikupfunza kuti abale omwe akutsogolera gulu lathu akambanyozedwa, kumangidwa ayai kuzunzidwa, tin’funika lini kukhala na mantha. Koma tin’funika kumbawapempherera, kuthandiza mabanja yawo na kunyang’anambo manera kuti tiwathandize. — Mab. 12:5; 2 Ako. 1:10, 11. w22.11 17 ¶11-12

Akulu an’funika kutsangalaza na kuthandiza abale omwe ana thupo. (1 Ped. 5:2) Malengwa ya pantsi yakacitika, cinthu cakutoma comwe akulu an’funika kucita ni kuwona penu abale na mpfumakazi ali pa mbuto yakukhotcerereka, ana cakudya, bzakubvala na pakukhala. Tsono pomwe nthawe ikupita, iwo an’funika kupitiriza kumbatsangalaza na kulimbikisa abale wawo. (Juw. 21:15) M’bale Harold, omwe ambatumikira m’Komiti ya Mthambi, adayenda kale kukawona abale wakusiyana-siyana omwe adagwedwa na malengwa ya pantsi. Iye adati: “Pambatenga nthawe kuti abale ayambe pomwe kukhala na mpfatso. Pinango iwo angayambe pomwe kukhala na bzinthu pang’ono na pang’ono. Tsono akakhala kuti adafedwa, iwo ambapitiriza kukhala wakusunama. Tingalewe lini kuti kucita bzimwebzi n’kusaya cikhulupiro thangwe munthu ali-wentse ambabva tenepoyo.” Akulu ambateweza malango yomwe yambati “lirani na omwe akulira.” — Aro. 12:15. w22.12 22 ¶1; 24-25 ¶10-11

Yahova ambatipasa mzimu wace wakucena kuti atithandize kupitiriza kucita bzinthu bzabwino. Tikambapfunza Fala la Mulungu, timbacitisa kuti mzimu wakucenayo uphate basa mwa ifepano. Ndipo mzimu wakucenayo umbatithandizambo tikakhala tayenda ku mitsonkhano. Pa mitsonkhano imweyi, ifepano timbaceza na abale na mpfumakazi omwe akucitambo nyongo kuti acite bzinthu bzabwino, ndipo bzimwebzi bzimbatilimbikisa kwene-kwene. (Aheb. 10:24, 25; 13:7) Tikambapemba kwa Yahova, tin’funika kumbamuuza bzentse bzomwe bzikuticitisa thupo, ndipo iye an’dzatipasa mzimu wace wakucena omwe un’dzatithandiza kupitiriza kucita bzinthu bzabwino. N’cadidi kuti kupemba na kumbayenda ku mitsonkhano bzin’dzacitisa lini kuti tisiyiretu kukhala na nzeru zakuphonyeka, koma bzin’dzatithandiza kupitiriza kucita bzinthu bzabwino. Napo penu tayamba kucita bzinthu bzomwe bzimbatithandiza kukhala pa uxamwali bwabwino na Yahova, mpsakufunika basi kucita nyongo kuti tikhale na makhalidwe yabwino nakuti tileke kukundidwa na nzeru zakuipa. w23.01 11 ¶13-14

Napo kuti Bibliya ni bukhu lini lakulewa bzomwe tingacite kuti tikhotcerere moyo wathu ayai bzinthu bzomwe tingadye, koma iro limbalatiza momwe Yahova ambaziwonera nkhani zimwezi. Iye ambaticenjeza kuti: “Khotcerera thupi lako ku tsoka.” (Mpal. 11:10) Kudya kwene-kwene na kumwa kwene-kwene bzimbaletsedwa m’Bibliya thangwe bzimbadzonga thupi. (Mim. 23:20) Yahova ambafuna kuti ticite bzinthu mwanzeru pomwe tikudya ayai kumwa. (1 Ako. 9:25) Tingalatize kuti timbatenda mphaso ya moyo yomwe Yahova adatipasa tikambacita bzinthu mwanzeru. (Sal. 119:99, 100; Mim. 2:11) Ifepano tingalatize kuti timbasankhula bzinthu mwanzeru pa nkhani ya kudya. Penu pana cakudya comwe cimbaticitisa kuti tiduwale, ifepano tin’dzasiya kucidya. Ndipo timbalatizambo kuti timbacita bzinthu mwanzeru tikambagona mwakukwanira, tikambacita masenzeka yakulimbisa thupi, tikambasamba na kupsaira m’nyumba mwathu. w23.02 21 ¶6-7

Kodi mungagumane tani nfundo zakuthandiza pomwe mukuwerenga Bibliya? Onani bzomwe 2 Timotio 3:16, 17 ambalewa. Mavesiya yambalewa kuti “bzinembo bzentse . . . mpsakuthandiza” (1) pa kupfunzisa, (2) pa kutsimula, (3) pa kulungamiza bzinthu na (4) pa kulanga mwakulungama. Tingakwanise kugumana phindu limweri napo m’mabukhu yomwe timbayaphatisa lini basa kawiri-kawiri. Onani momwe nkhani ya m’Bibliya yomwe mwawerenga ikukupfunzisirani bza Yahova na bzomwe iye ambafuna. Ndipo onani momwe nkhaniyo ingakuthandizireni pa kutsimula na momwe ingakuthandizireni kuzindikira na kutcenkha bzinthu bzomwe bzingadzonge cikhulupiro canu. Ndipo onanimbo momwe nkhaniyo ingalungamizire nfundo yakuphonyeka yomwe munthu omwe mwagumana naye mu utumiki waifotokoza. Ndipo onani momwe ingakulangireni kuti mumbakwanise kuwona bzinthu ninga momwe Yahova ambabziwonera. Tikakumbukira nfundo zinaizi, tin’dzakwanisa kugumana phindu pomwe tikuwerenga Bibliya. w23.02 11 ¶11

Polofesiya inango ya m’bukhu la Daniyeli ikhadaleweratu kuti Jezu angadadzatambira Umambo kuphampha kwa nthawe zinomwe. Kodi mpsakukwanisika kudziwa nthawe yomwe Jezu angadadzakhala Mambo? (Dan. 4:10-17) “Nthawe zinomwe” ni magole yakukwana 2520. Nthawe imweyi idayamba mu gole la 607 AEC. Mu gole limwelire, acikunda wa ku Babiloniya adacosa pa mpando mambo omwe akhatonga ku Jeruzalemu, omwe ukhali ninga mpando wa Umambo wa Yahova. Ndipo mu 1914, Yahova adaikha Jezu pa mpando, “omwe ngwakuthemera mwa lamulo” kuti akhale Mambo wa Umambo bwa Mulungu. (Ezek. 21:25-27) Kodi kudziwa polofesiya imweyi kumbatithandiza tani? Kubvesesa bwino-bwino polofesiya ya “nthawe zinomwe” kumbatitsimikizira kuti Yahova ambateweza bzomwe ambalewa pa nthawe yace. Ndipopa, ifepano tikudziwa kuti iye an’dzakwanirisa mapolofesiya yentse yomwe adalewa pa nthawe yomwe akufuna. Tingakhale na citsimikizo centse cakuti ntsiku ya Yahova ‘in’fika tsapanopapa!’ — Hab. 2:3. w22.07 3 ¶3-5